This document is an excerpt from the EUR-Lex website
Il-kontroll ta’ konċentrazzjonijiet bejn kumpaniji
SOMMARJU TA’:
X’INHU L-GĦAN TAR-REGOLAMENT?
- Huwa jistipula r-regoli tal-UE fir-rigward tal-konċentrazzjonijiet* meta żewġ kumpaniji jew aktar jingħaqdu permezz ta’ amalgamazzjoni jew akkwist.
- Dan ifisser li amalgamazzjoni waħda fl-UE m’għandhiex għalfejn tiġi nnotifikata lil bosta awtoritajiet tal-kompetizzjoni fl-UE; hija bbażata fuq il-prinċipju tas-sussidjarjetà fejn amalgamazzjoni hija eżaminata mill-awtorità ġudizzjarja li tkun fl-aħjar pożizzjoni li tagħmel dan.
PUNTI EWLENIN
Dan ir-regolament japplika għall-konċentrazzjonijiet kollha b’dimensjoni tal-UE*.
Proċedura ta’ notifika
- Bħala regola ġenerali, il-parti jew partijiet li jiksbu kontroll wara l-konċentrazzjoni għandhom jinnotifikaw lill-Kummissjoni Ewropea qabel l-implimentazzjoni tagħha.
- Ir-regolament jippermetti wkoll notifika qabel il-konklużjoni ta’ ftehim vinkolanti li tiffaċilita l-koordinazzjoni ma’ ġurisdizzjonijiet oħra fl-investigazzjonijiet ta’ amalgamazzjonijiet. Din il-proċedura, magħrufa bħala qabel in-notifika, tippermetti lid-ditti jew lill-persuni kkonċernati li jinfurmaw lill-Kummissjoni, permezz ta’ sottomissjoni motivata, qabel ma jinnotifikaw konċentrazzjoni. B’dan il-mod, il-partijiet jistgħu juru lill-Kummissjoni li l-amalgamazzjoni proposta, filwaqt li tirriżulta f’konċentrazzjoni b’dimensjoni transfruntiera, taffettwa l-kompetizzjoni fis-suq ta’ pajjiż wieħed tal-UE.
- Jekk il-pajjiż tal-UE in kwistjoni ma jaqbilx mal-applikazzjoni biex jirreferi l-każ fi żmien 15-il jum ta’ xogħol minn meta jirċievi s-sottomissjoni, il-Kummissjoni għandha 25 jum ta’ xogħol minn meta tirċievi s-sottomissjoni biex tirreferi l-każ kollu jew parti minnu lill-awtoritajiet kompetenti ta’ dak il-pajjiż tal-UE sabiex dak il-pajjiż ikun jista’ japplika l-liġi nazzjonali tiegħu dwar il-kompetizzjoni.
- L-istess proċedura tapplika meta persuna jew ditta tkun tixtieq tiġbed l-attenzjoni tal-Kummissjoni għall-effetti transfruntiera li amalgamazzjoni mingħajr dimensjoni tal-UE jista’ jkollha fuq livell Ewropew.
Bidu tal-proċedimenti: il-Kummissjoni
Ladarba tirċievi notifika, il-Kummissjoni għandha tiddeċiedi jekk:
- tibdix proċedimenti;
- twettaqx investigazzjonijiet; u
- timponix multi.
L-ewwel, tistabbilixxi permezz ta’ deċiżjoni jekk il-konċentrazzjoni:
- taqax taħt dan ir-regolament;
- hijiex kompatibbli mas-suq komuni;
- tqajjimx dubji serji dwar il-kompatibilità tagħha.
Fit-teorija, konċentrazzjonijiet b’dimensjoni tal-UE ma jistgħux jiġu implimentati qabel in-notifika jew għal tliet ġimgħat wara n-notifika. Jekk, madankollu, konċentrazzjoni diġà ġiet implimentata u ddikjarata inkompatibbli mas-suq komuni, il-Kummissjoni tista’ tordna lill-kumpaniji kkonċernati sabiex ixolju l-konċentrazzjoni jew ireġġgħu lura s-sitwazzjoni għal kif kienet qabel l-implimentazzjoni tal-konċentrazzjoni.
Il-Kummissjoni tista’ wkoll tadotta miżuri interim jekk issib li konċentrazzjoni notifikata, għalkemm fl-ambitu ta’ dan ir-regolament, ma toħloqx dubji serji dwar il-kompatibilità tagħha mas-suq komuni, jew teħtieġ biss bidla sempliċi biex tkun konformi mas-suq komuni.
Biex tinforza l-konformità ma’ dan ir-Regolament, il-Kummissjoni tista’ timponi:
- multi ta’ mhux aktar minn 1 % mill-fatturat aggregat tad-ditta meta din tipprovdi informazzjoni mhux korretta, mhux kompluta jew qarrieqa jew meta ma tipprovdix l-informazzjoni sal-limitu ta’ żmien miftiehem. Tista’ timponi multi meta s-siġilli mwaħħla waqt spezzjoni jkunu nkisru. Tista’ jimponi multi sa 10 % tal-fatturat aggregat tad-ditta kkonċernata fejn, jew intenzjonalment jew b’negliġenza, din tonqos milli tinnotifika konċentrazzjoni qabel l-implimentazzjoni tagħha, timplimenta konċentrazzjoni bi ksur tar-regolament jew tonqos milli tikkonforma ma’ deċiżjoni tal-Kummissjoni; jew
- ħlasijiet perjodiċi ta’ penali li ma jaqbżux il-5 % tal-fatturat aggregat medju ta’ kuljum tal-kumpanija għal kull jum ta xogħol ta’ dewmien, ikkalkulat mid-data stabbilita mill-Kummissjoni fid-deċiżjoni tagħha li tistabbilixxi li teħtieġ informazzjoni, tordna spezzjonijiet, eċċ.
Il-Kummissjoni għandha tikkonsulta Kumitat Konsultattiv magħmul minn rappreżentanti tal-awtoritajiet tal-pajjiżi tal-UE qabel ma tieħu kwalunkwe deċiżjoni dwar il-kompatibilità, l-inkompatibbiltà jew l-impożizzjoni ta’ multi jew ħlasijiet perjodiċi ta’ penali. Il-Qorti tal-Ġustizzja tal-Unjoni Ewropea tista’ tabolixxi, tnaqqas jew iżżid kwalunkwe multa jew ħlas ta’ penali perjodiku imposti.
Proċedura ta’ referenza: il-Kummissjoni u l-awtoritajiet kompetenti tal-pajjiżi tal-UE
Filwaqt li qabel, il-valur tal-bejgħ u l-kriterji “3+” kienu applikati mal-identifikazzjoni ta’ konċentrazzjonijiet b’effett transfruntier (jiġifieri kompetenza esklussiva tal-UE fejn mill-inqas tliet pajjiżi tal-UE jitolbu referenza), ir-Regolament (KE) Nru 139/2004 jintroduċi t-tielet kriterju għall-referenza lill-awtoritajiet kompetenti tal-pajjiżi tal-UE.
- Pajjiż tal-UE jista’, fi żmien 15-il jum ta’ xogħol mid-data li jirċievi kopja tan-notifika, jaġixxi fuq l-inizjattiva tiegħu stess jew fuq talba tal-Kummissjoni, u jiddikjara li konċentrazzjoni taffettwa b’mod sinifikanti l-kompetizzjoni fis-suq domestiku tiegħu. Is-suq tal-prodott jew tas-servizz għandu jippreżenta l-karatteristiċi kollha ta’ suq distint mingħajr, madankollu, ma jikkostitwixxi parti sostanzjali tas-suq komuni.
- Il-Kummissjoni għandha 65 jum ta’ xogħol wara n-notifika tal-konċentrazzjoni biex tiddeċiedi jekk tittrattax il-każ innifsu skont dan ir-regolament jew jekk tirreferix il-każ kollu jew parti minnu lill-awtoritajiet kompetenti tal-pajjiż tal-UE; jekk il-Kummissjoni tonqos milli tadotta deċiżjoni, il-każ jitqies li ġie riferut lill-pajjiż tal-UE inkwistjoni.
- Il-pajjiżi tal-UE jistgħu wkoll jitolbu lill-Kummissjoni tinvestiga jekk konċentrazzjoni, għalkemm mingħajr dimensjoni tal-UE, tfixkilx b’mod sinifikanti l-kompetizzjoni bejn il-pajjiżi tal-UE u jekk hijiex se jkollha effett sinifikanti fuq il-kompetizzjoni fit-territorju/i tagħhom. Il-Kummissjoni għandha mbagħad tinforma lill-awtoritajiet kompetenti tal-pajjiżi tal-UE u lid-ditti kkonċernati, billi tistabbilixxi limitu ta’ żmien ta’ 15-il jum ta’ xogħol, li fih, kwalunkwe pajjiż ieħor tal-UE jista’ jissieħeb fit-talba inizjali. Jekk, fi żmien għaxart (10) ijiem ta’ xogħol, il-Kummissjoni ma tkunx adottat deċiżjoni jekk tirreferix jew le il-każ, din titqies li tkun adottat deċiżjoni skont it-talba.
MINN META JAPPLIKA R-REGOLAMENT?
Ilu japplika mill-1 ta’ Mejju 2004.
SFOND
Għal aktar informazzjoni, ara:
- Regolament dwar l-Amalgamazzjonijiet (Il-Kummissjoni Ewropea).
TERMINI EWLENIN
- l-amalgamazzjoni ta’ żewġ kumpaniji jew aktar li qabel kienu indipendenti;
- l-akkwist, minn persuna waħda jew minn aktar minn persuna waħda (li diġà tikkontrolla jew li diġà jikkontrollaw mill-anqas kumpanija waħda), jew minn kumpanija jew minn aktar minn kumpanija waħda, ta’ kontroll dirett jew indirett ta’ kumpanija jew ta’ aktar minn kumpanija waħda.
Tranżazzjonijiet multipli li jiddependu fuq xulxin jew li huma konnessi mill-qrib huma meqjusin bħala konċentrazzjoni waħda.
- il-fatturat dinji aggregat ikkombinat tal-kumpaniji kollha kkonċernati huwa ta’ aktar minn EUR 5 biljun; u
- il-fatturat aggregat fl-UE ta’ mill-anqas tnejn mill-kumpaniji kkonċernati huwa ta’ aktar minn EUR 250 miljun, sakemm kull waħda mill-kumpaniji kkonċernati ma tiġġenerax aktar minn żewġ terzi mill-fatturat aggregat tagħha madwar l-UE f’pajjiż wieħed tal-UE.
Anki jekk il-limiti msemmija hawn fuq ma jintlaħqux, konċentrazzjoni jista’ jkollha dimensjoni tal-UE jekk:
- il-fatturat dinji aggregat ikkombinat tal-kumpaniji kollha kkonċernati huwa ta’ aktar minn EUR 2.5 biljun;
- f’kull wieħed minn tal-anqas tliet pajjiżi tal-UE, il-fatturat aggregat ikkombinat tal-kumpaniji kollha kkonċernati huwa ta’ aktar minn EUR 100 miljun;
- f’kull wieħed ta’ minn tal-anqas tliet pajjiżi tal-UE, il-fatturat aggregat ta’ kull waħda minn tal-anqas tnejn mill-kumpaniji kkonċernati huwa ta’ aktar minn EUR 25 miljun;
- il-fatturat aggregat madwar l-UE kollha ta’ mill-anqas tnejn mill-kumpaniji kkonċernati huwa ta’ aktar minn EUR 100 miljun, sakemm kull waħda mill-kumpaniji kkonċernati ma tiġġenerax aktar minn żewġ terzi mill-fatturat aggregat tagħha madwar l-UE kollha f’pajjiż wieħed tal-UE.
DOKUMENT EWLIENI
Regolament tal-Kunsill (KE) Nru 139/2004 tal-20 ta’ Jannar 2004 dwar il-kontroll ta’ konċentrazzjonijiet bejn kumpaniji (ir-Regolament tal-KE dwar l-Għaqdiet) (ĠU L 24, 29.1.2004, p. 1-22)
DOKUMENTI RELATATI
Avviż mill-Kummissjoni dwar proċedura ssimplifikata għat-trattament ta’ ċerti konċentrazzjonijiet skont ir-Regolament tal-Kunsill (KE) Nru 139/2004 (ĠU C 366, 14.12.2013, p. 5-9)
Rettifika dwar l-Avviż tal-Kummissjoni dwar proċedura simplifikata għat-trattament ta’ ċerti konċentrazzjonijiet skont ir-Regolament tal-Kunsill (KE) Nru 139/2004 (ĠU C 11, 15.1.2014, p. 6)
l-aħħar aġġornament 08.01.2019