Responsabbiltà ta’ trasportatur bl-ajru għall-passiġġieri u għall-bagalji

 

SOMMARJU TA’:

Ir-Regolament (UE) Nru 2027/97 dwar trasportaturi bl-ajru fl-eventwalità ta’ inċidenti

X’INHU L-GĦAN TAR-REGOLAMENT?

Ir-regolament jimplimenta l-Konvenzjoni ta’ Montreal tal-1999 minħabba li din għandha x’taqsam ma’ kwistjonijiet ta’ responsabbiltà f’eventwalità ta’ inċidenti u kumpens għal passiġġieri u għall-bagalji tagħhom li qed jivvjaġġaw bl-ajru (ara s-sommarju).

Nota: Ir-regolament oriġinali (qabel ma’ ġie emendat mir-Regolament (KE) Nru 889/2002) jikkonċerna r-responsabbiltajiet għall-mewt jew għall-korriment ta’ passiġġieri ta’ trasportaturi bl-ajru fl-Unjoni Ewropea (UE) minħabba inċidenti. Ir-regolament emendatorju tal-2002 ġab ir-regolament oriġinali konformi mar-regoli internazzjonali ġodda fil-Konvenzjoni ta’ Montreal, biex jinkludi wkoll kwistjonijiet ta’ responabbiltajiet ta’ bagalji u dewmien.

PUNTI EWLENIN

Ir-responsabbiltà ta’ trasportatur bl-ajru għal passiġġieri u għall-bagalji tagħhom

Ir-regolament jiġbor fil-qosor ir-regoli ta’ responsabbiltà implimentati mit-trasportaturi bl-ajru tal-UE taħt il-leġiżlazzjoni tal-UE u l-Konvenzjoni ta’ Montreal, u l-leġiżlazzjoni nazzjonali tal-Istati Membri tal-UE. Il-kumpens huwa spjegat bħala l-valur approssimattiv tad-drittijiet speċjali ta’ prelevament (SDRs)* fil-munita lokali.

Notifikazzjoni tal-assigurazzjoni tal-passiġġier

It-trasportaturi bl-ajru tal-UE jeħtieġ li:

• jkunu nxurjati sa’ livell suffiċjenti li jkun adegwat għall-persuni kollha ntitolati għall-kumpens biex jirċievu l-ammont kollu li għandhom dritt għalih taħt ir-regolament;
• jassiguraw li taqsira tal-provviżjonijiet ewlenin li jikkontrollaw ir-responsabbiltà għall-passiġġieri u għall-bagalji tagħhom tkun disponibbli għall-passiġġieri fil-punti kollha tal-bejgħ, inkluż bit-telefown u permezz tal-internet;
• jużaw avviż ibbażat fuq l-anness tar-regolament.

Trasportaturi bl-ajru tal-UE jeħtieġ li jipprovdu wkoll indikazzjoni bil-miktub lil kull passiġġier dwar il-limitu tar-responsabbiltà tat-trasportatur bl-ajru għall-vjaġġ rigward:

• mewt jew korriment;
• qerda, telf jew ħsara lill-bagalji; u
• ħsara minħabba dewmien.

Il-limiti ta’ hawn fuq huma dawk stabbiliti minn dan ir-regolament sakemm it-trasportatur bl-ajru ma japplikax limiti iktar għolja minn jeddu. Għal trasport minn trasportaturi bl-ajru mhux tal-UE, dawn ir-rekwiżiti japplikaw biss għal vjaġġi lejn, minn jew ġo l-UE.

Kumpens f’każ ta’ mewt jew korriment

M’hemm l-ebda limiti finanzjarji għar-responsabbiltà lejn korriment jew mewt ta’ passiġġier. Għal ħsarat sa 100 000 SDRs, it-trasportatur tal-ajru ma jistax jikkuntesta t-talbiet għall-kumpens. ’Il fuq minn dan l-ammont, it-trasportatur bl-ajru jista’ jiddefendi ruħu kontra talba billi juri li ma kienx negliġenti jew inkella li kellu tort.

Ħlasijiet bil-quddiem

Jekk passiġġier jinqatel jew ikorri, it-trasportatur bl-ajru jeħtieġ li jagħmel pagament bil-quddiem biex ikopri bżonnijiet immedjati, fi żmien 15-il ġurnata minn meta l-persuna tiġi identifikata, taħt il-kundizzjonijiet sussegwenti.

• F’każ ta’ mewt, dan il-pagament bil-quddiem jeħtieġ li ma jkunx inqas minn 16 000 SDRs.
• Pagament bil-quddiem ma jikkostitwixxix rikonoxximent ta’ responsabbiltà u jista’ jiġi kumpensat ma’ kwalunkwe somma sussegwenti li titħallas għar-responsabbiltà tat-trasportatur bl-ajru.
• Ma jkunx jista’ jiġi ritornat sakemm it-trasportatur juri li l-ħsara ġiet ikkawżata jew saret minħabba negliġenza jew omissjoni tal-persuna li qed titlob il-kumpens, jew fejn il-persuna li rċeviet il-pagament bil-quddiem ma kienitx intitolata għaliha.

Dewmien tal-passiġġieri

Jekk passiġġier ikollu d-dewmien, it-trasportatur bl-ajru huwa risponsabbli għad-dannu sakemm huwa ħa l-passi kollha raġjonevoli possibbli biex jevita dan id-dannu. Ir-responsabbiltà għandha limitu ta’ 4 150 SDRs.

Dewmien ta’ bagalji

Jekk il-bagalji jkollhom dewmien, it-trasportatur bl-ajru huwa responsabbli għad-danni sakemm huwa ħa l-miżuri kollha raġjonevoli possibbli biex dan jiġi evitat. Ir-responsabbiltà hija limitata għal 1 000 SDRs.

Qerda, telf jew ħsara lill-bagalji

It-trasportatur bl-ajru huwa responsabbli għall-qerda, għat-telf jew għall-ħsara tal-bagalji, ir-responsabbiltà hija sa 1 000 SDRs. Għal bagalji li ġew irreġistrati, huwa responsabbli anke jekk ma kienx tort tiegħu, sakemm il-bagalja ma kienitx difettuża. Għal bagalji li ma ġewx iċċekkjati, it-trasportatur huwa responsabbli biss jekk għandu tort.

Limiti għola għall-bagalji

Il-passiġġieri jistgħu jibbenefikaw minn limiti ta’ responsabbiltà aktar għolja billi jagħmlu dikjarazzjoni speċjali sa mill-aktar tard meta jagħmlu check-in u billi jħallsu miżata supplementari. Il-miżata teħtieġ li tirrifletti l-ispejjeż addizzjonali ’l fuq minn dawk ta’ bagalja valutata fil-limitu tar-responsabbiltà. It-tariffa għandha tkun disponibbli meta tintalab.

Ilmenti fuq bagalji

Jekk il-bagalji rreġistrati ssirilhom il-ħsara, jittardjaw, jintilfu jew jinqerdu, il-passiġġier għandu jikteb u jagħmel ilment lit-trasportatur bl-ajru malajr kemm jista’ jkun, fi żmien 7 ijiem għal ħsara u 21 ġurnata għal dewmien wara l-wasla.

Kwalunkwe azzjoni fil-qorti teħtieġ li titressaq fi żmien sentejn mid-data tal-wasla tal-ajruplan jew mid-data meta l-ajruplan kellu jasal.

MINN META JAPPLIKA R-REGOLAMENT?

Ilu japplika mis-17 ta’ Ottubru 1998.

SFOND

Għal aktar informazzjoni, ara:

• Il-Politika ta’ sigurtà tal-avjazzjoni fl-Ewropa (il-Kummissjoni Ewropea).

TERMINI PRINĊIPALI

DOCUMENT EWLIENI

Ir-Regolament tal-Kunsill (KE) Nru 2027/97 tad-9 ta’ Ottubru 1997 dwar ir-responsabbilità ta’ trasportaturi bl-ajru fl-eventwalità ta’ incidenti (ĠU L 285, 17.10.1997, pp. 1-3).

L-emendi suċċessivi għar-Regolament (KE) Nru 2027/97 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Proposta għal Regolament tal-Parlament Ewropew u tal-Kunsill li jemenda r-Regolament (KE) Nru 261/2004 li jistabbilixxi regoli komuni dwar il-kumpens u l-assistenza għal passiġġieri fil-każ li ma jitħallewx jitilgħu u ta’ kanċellazzjoni jew dewmien twil ta’ titjiriet, u r-Regolament (KE) Nru 2027/97 dwar ir-responsabbilità ta’ trasportaturi bl-ajru, fejn jidħol it-trasport bl-ajru tal-passiġġieri u l-bagalji tagħhom (COM(2013) 130 finali, 13.3.2013).

Konvenzjoni għall-unifikazzjoni ta’ ċerti regoli għat-trasport Internazzjonali bl-Ajru (il-Konvenzjoni ta’ Montreal) (ĠU L 194, 18.7.2001, pp. 39–49).

Id-Deċiżjoni tal-Kunsill 2001/539/KE tal-5 ta’ April 2001 dwar il-konklużjoni tal-Komunità Ewropea tal-Konvenzjoni għall-Unifikazzjoni ta’ Ċerti Regoli għat-Trasport Internazzjonali bl-Ajru (il-Konvenzjoni ta’ Montreal) (ĠU L 194, 18.7.2001, p. 38).

l-aħħar aġġornament 17.01.2022