L-iżvilupp tal-iskejjel u t-tagħlim eċċellenti
SOMMARJU TA’:
Komunikazzjoni (COM(2017) 248 final) — L-iżvilupp tal-iskejjel u t-tagħlim eċċellenti għal bidu tajjeb fil-ħajja
X’INHU L-GĦAN TAL-KOMUNIKAZZJONI?
Il-komunikazzjoni tidentifika l-isfidi li jaffaċċjaw l-iskejjel u t-tagħlim fl-UE u tiddeskrivi modi li permezz tagħhom l-UE tista’ tappoġġja l-pajjiżi tal-UE biex jagħmlu riforma tas-sistemi tal-iskejjel tagħhom biex jaffaċċjaw dawn l-isfidi.
PUNTI EWLENIN
L-iskejjel għandhom rwol fundamentali fit-tagħlim tul il-ħajja, u għalhekk hemm bżonn ta’ azzjoni biex jittejbu l-kwalità u l-prestazzjoni tal-edukazzjoni skolastika. Kważi l-pajjiżi kollha tal-UE jaffaċċjaw diversi sfidi ewlenin.
- Nuqqasijiet fl-iżvilupp tal-kompetenzi:
- 1 minn kull 5 studenti għandu diffikultajiet serji fil-ħiliet tal-qari, tal-matematika u tax-xjenza, li jwasslu għall-probabbiltà li dawn jaffaċċjaw ostakli tul ħajjithom għall-inklużjoni soċjali u biex isibu impjieg;
- proporzjon relattivament baxx ta’ studenti jiksbu riżultati tajbin ħafna;
- Ħafna żgħażagħ għandhom nuqqas ta’ ħiliet diġitali xierqa;
- minkejja l-progress lejn il-mira tal-Ewropa 2020 biex ir-rata ta’ studenti li jitilqu mill-iskola titnaqqas għal inqas minn 10 %, hemm wisq żgħażagħ li jitilqu mill-iskola jew mit-taħriġ b’mod prematur.
- L-edukazzjoni skolastika mhux dejjem twettaq bis-sħiħ il-parti tagħha biex tippromwovi l-ekwità u l-ġustizzja soċjali:
- id-distakk bejn is-sessi fil-matematika u fix-xjenza qed jonqos, madankollu l-isterjotipi tas-sessi għadhom jagħmluha diffiċli biex ikun hemm involviment;
- iż-żgħażagħ minn sfondi żvantaġġati għandhom probabbiltà erba’ darbiet aktar li jkollhom riżultati edukattivi baxxi minn dawk bi sfondi aktar vantaġġati;
- hemm sfidi speċifiċi għal studenti bi sfondi ta’ migrazzjoni jew Rom;
- L-Estonja u l-Finlandja wrew li s-sistemi edukattivi skolastiċi jistgħu jipprovdu livelli għoljin ta’ kisbiet kif ukoll ta’ ekwità fl-istess ħin.
- L-effett tar-ritmu tal-bidla teknoloġika u diġitali fuq l-ekonomiji u fuq is-soċjetajiet:
- l-iskejjel iridu jirrispondu aħjar għal din ir-realtà l-ġdida — m’għadux biżżejjed li nattrezzaw iż-żgħażagħ tagħna b’ħiliet jew għarfien li jaf ma jdumux;
- l-iskejjel iridu jiżviluppaw ir-reżiljenza u l-ħila biex jadattaw għall-bidla b’modi ġodda ta’ tagħlim f’dinja li qiegħda ssir dejjem aktar mobbli u diġitali;
- is-sistemi edukattivi jeħtieġ li jiġu mmodernizzati biex jippromwovu l-kreattività u l-ħsieb kritiku, kif ukoll mentalità intraprenditorjali.
Hemm tliet oqsma li fihom l-appoġġ fil-livell Ewropew jista’ jgħin biex jiġu indirizzati l-isfidi.
- L-iżvilupp ta’ skejjel aħjar u aktar inklużivi, inkluż:
- l-appoġġ lill-istudenti kollha u l-iżvilupp tal-kompetenzi tagħhom;
- it-tisħiħ tat-tagħlim bil-ftuħ ta’ forom ġodda ta’ kooperazzjoni ma’, pereżempju servizzi lokali, organizzazzjonijiet fil-komunità, negozji u universitajiet sabiex jgħinu liż-żgħażagħ sabiex iħejju għall-impjieg futur u jkomplu l-istudji;
- it-titjib fl-aċċess għall-edukazzjoni u l-indukrar bikri tat-tfal u fil-kwalità tagħhom.
- L-appoġġ lill-għalliema u lill-mexxejja tal-iskejjel għal tagħlim eċċellenti, inkluż:
- biex il-karrieri fit-tagħlim isiru aktar attraenti;
- biex ix-xogħol ta’ għalliem jitqies bħala professjoni ta’ studenti għal karriera kollha tagħhom li jaħdmu flimkien;
- l-appoġġ għat-tmexxija tal-iskejjel.
- It-tisħiħ tal-effikaċja, tal-ekwità u tal-effiċjenza fit-tmexxija tas-sistemi edukattivi fl-iskejjel:
- investimenti adegwati u effiċjenti fir-riżorsi tal-iskejjel;
- il-kombinament tal-awtonomija u tal-assigurazzjoni tal-kwalità.
Il-Kummissjoni Ewropea timpenja ruħha biex:
- iżżid il-kooperazzjoni bejn l-iskejjel permezz tal-Erasmus+ u l-parteċipazzjoni f’eTwinning;
- tiżviluppa għodda ta’ awtovalutazzjoni għall-iskejjel dwar il-kapaċità diġitali;
- tappoġġja t-titjib fl-edukazzjoni fix-xjenza, fit-teknoloġiji, fl-inġinerija u fil-matematika (STEM) permezz ta’ rabtiet u kooperazzjoni tal-edukazzjoni għolja, tar-riċerka u tan-negozji mal-iskejjel;
- tippromwovi u tappoġġja l-esperimentazzjoni tal-politika dwar l-iżvilupp ta’ pedagoġiji multilingwi u ta’ tagħlim fi klassijiet diversifikati bħala parti mill-programm ta’ ħidma tal-2018 ta’ Erasmus+;
- issegwi l-osservazzjonijiet tal-Kumitat tan-Nazzjonijiet Uniti dwar id-Drittijiet ta’ Persuni b’Diżabilità billi tappoġġja l-kooperazzjoni bejn l-Aġenzija Ewropea għall-Bżonnijiet Speċjali u l-Edukazzjoni Inklużiva u l-pajjiżi tal-UE;
- tappoġġja l-edukazzjoni u l-indukrar bikri tat-tfal ta’ kwalità għolja u taqsam l-aqwa prattika;
- toffri gwida dwar il-politika fuq il-karrieri u fuq l-iżvilupp professjonali tal-għalliema u tal-mexxejja tal-iskejjel;
- tissimplifika l-aċċess u tippromwovi opportunitajiet għall-għalliema futuri biex jiksbu esperjenza prattika ta’ tagħlim barra mill-pajjiż bl-appoġġ ta’ Erasmus+;
- tiżviluppa komunitajiet u riżorsi online għall-professjonisti li jaħdmu fl-iskejjel;
- Tkompli tiżviluppa proġetti konġunti mal-Organizzazzjoni għall-Kooperazzjoni u l-Iżvilupp Ekonomiċi (OECD) għall-produzzjoni ta’ data komparattiva dwar il-persunal tal-iskejjel;
- tistabbilixxi arranġament ta’ appoġġ tekniku f’kooperazzjoni mal-OECD biex tgħin lill-pajjiżi tal-UE li jfittxu l-assistenza għal riformi kbar fl-edukazzjoni skolastika;
- tressaq rapport konġunt dwar l-effikaċja u l-effiċjenza tan-nefqa fl-edukazzjoni skolastika; u
- tiżviluppa gwida mmirata dwar il-politika fuq l-assigurazzjoni tal-kwalità flimkien mal-pajjiżi tal-UE u mal-partijiet ikkonċernati.
It-triq ’il quddiem
Ir-riforma tas-sistemi edukattivi tal-iskejjel hija kompitu tal-pajjiżi tal-UE, iżda l-Kummissjoni hija lesta li tappoġġjahom b’firxa ta’ għodod u proċessi tal-UE. Is-Semestru Ewropew huwa fattur li diġà wera li jikseb riżultati, filwaqt li l-kooperazzjoni volontarja skont l-ET 2020 għandha tiġi żviluppata aktar biex tgħin lill-pajjiżi tal-UE. B’mod partikolari, il-Monitoraġġ tal-Edukazzjoni u t-Taħriġ għandu jintuża bis-sħiħ biex jgħin lill-Istati Membri sabiex jieħdu deċiżjonijiet politiċi infurmati u bbażati fuq l-evidenza.
SFOND
Ara wkoll:
DOKUMENT EWLIENI
Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — L-iżvilupp tal-iskejjel u t-tagħlim eċċellenti għal bidu tajjeb fil-ħajja (COM(2017) 248 final, 30.5.2017)
DOKUMENTI RELATATI
Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali u lill-Kumitat tar-Reġjuni dwar Mard Rari — Ninvestu fiż-żgħażagħ tal-Ewropa (COM(2016) 940 final, 7.12.2016)
l-aħħar aġġornament 10.08.2017
Top