(1)

Ir-Regolament (UE) 2018/848 u b’mod partikolari l-Parti I tal-Anness II tiegħu, jistabbilixxi ċerti rekwiżiti fir-rigward tal-użu ta’ materjal riproduttiv tal-pjanti fil-fażi ta’ konverżjoni u mhux organiku.

(2)

Fid-dawl tal-eliminazzjoni gradwali tad-derogi mill-użu ta’ materjal organiku għar-riproduzzjoni tal-pjanti stabbiliti fl-Artikolu 53 tar-Regolament (UE) 2018/848, huwa importanti li jiżdiedu l-produzzjoni u t-tqegħid fis-suq ta’ materjal riproduttiv tal-pjanti organiku u dak fil-fażi ta’ konverżjoni.

(3)

Skont l-Artikolu 10(4) tar-Regolament (UE) 2018/848, il-materjal riproduttiv tal-pjanti jista’ jiġi kkummerċjalizzat bħala “fil-fażi ta’ konverżjoni” meta jkun rispettat perjodu ta’ konverżjoni ta’ mill-inqas 12-il xahar. Skont l-Artikolu 26(1) tar-Regolament (UE) 2018/848, l-Istati Membri jridu jiżguraw li tiġi stabbilita bażi ta’ data aġġornata regolarment għall-elenkar ta’ materjal riproduttiv tal-pjanti organiku u fil-fażi ta’ konverżjoni, eskluża n-nebbieta, iżda inkluża l-patata taż-żrigħ, li hija disponibbli fit-territorji tagħhom. Barra minn hekk, l-Artikolu 26(2) jirrikjedi li l-Istati Membri jkollhom fis-seħħ sistemi li jippermettu lill-operaturi li jikkummerċjalizzaw materjal riproduttiv tal-pjanti organiku jew fil-fażi ta’ konverżjoni u li jkunu kapaċi jfornuh fi kwantitajiet suffiċjenti u fi żmien raġonevoli, li fuq bażi volontarja, mal-ismijiet u d-dettalji ta’ kuntatt tagħhom, jippubblikaw informazzjoni b’xejn dwar il-materjal riproduttiv tal-pjanti organiku u dak fil-fażi ta’ konverżjoni, bħall-materjal riproduttiv tal-pjanti ta’ materjal eteroġenju organiku jew ta’ varjetajiet organiċi adattati għall-produzzjoni organika, eskluża n-nebbieta, iżda inkluża l-patata taż-żrigħ, li hija disponibbli bil-kwantità f’dak li hu piż ta’ dak il-materjal u l-perjodu tas-sena li fiha tkun disponibbli. Madankollu, l-Artikolu 26(5) jipprevedi li l-Istati Membri jistgħu jkomplu jużaw sistemi ta’ informazzjoni rilevanti diġà eżistenti.

(4)

Għalhekk, huwa importanti li meta l-materjal riproduttiv organiku tal-pjanti ma jkunx disponibbli biżżejjed u tali nuqqas ta’ disponibbiltà jintwera permezz ta’ rekords miġbura fil-bażi tad-data u s-sistemi msemmija hawn fuq, tingħata prijorità għall-użu ta’ materjal riproduttiv tal-pjanti fil-fażi ta’ konverżjoni fuq materjal riproduttiv tal-pjanti mhux organiku. Barra minn hekk, skont l-Artikolu 6(i) tar-Regolament (UE) 2018/848, jenħtieġ li jkun permess l-użu ta’ materjal riproduttiv tal-pjanti organiku u dak fil-fażi ta’ konverżjoni.

(5)

Filwaqt li jitqiesu l-prattiki diverġenti attwali fl-Istati Membri, huwa wkoll ta’ importanza partikolari li fejn ma jkunx disponibbli materjal riproduttiv tal-pjanti organiku u dak fil-fażi ta’ konverżjoni fi kwalità jew kwantità suffiċjenti, jiġu armonizzati l-kriterji u l-kundizzjonijiet speċifiċi għall-ħruġ ta’ awtorizzazzjonijiet għall-użu ta’ materjal riproduttiv tal-pjanti mhux organiku. Jenħtieġ li din l-armonizzazzjoni tippermetti li tiġi evitata kompetizzjoni inġusta potenzjali fil-produzzjoni organika u li tiżgura li ċerti dispożizzjonijiet prekawzjonarji jiġu applikati għall-materjal riproduttiv tal-pjanti u, fil-każ ta’ trattamenti fitosanitarji preskritti, jenħtieġ li fejn xieraq tkun soġġetta għal perjodu ta’ konverżjoni tar-roqgħa tal-art kif previst fil-punti 1.7.3. u 1.7.4. tal-Parti I tal-Anness II tar-Regolament (UE) 2018/848.

(6)

Minkejja l-isforzi li saru mill-operaturi involuti fil-produzzjoni ta’ materjal riproduttiv organiku tal-pjanti, għad hemm ħafna speċijiet, sottospeċijiet jew varjetajiet li ma jkunx disponibbli materjal riproduttiv tal-pjanti organiku u dak fil-fażi ta’ konverżjoni għalihom, u li jeħtieġ li jiġi ssimplifikat il-proċess ta’ awtorizzazzjonijiet għalihom, billi mingħajr ma tiġi pperikolata n-natura organika tal-prodotti jitnaqqas il-piż amministrattiv. Għalhekk, sabiex jitnaqqas in-numru ta’ talbiet għal awtorizzazzjonijiet individwali, huwa xieraq li jiġu previsti awtorizzazzjonijiet ġenerali nazzjonali annwali għal speċijiet, sottospeċijiet jew varjetajiet, soġġetti għal ċerti kundizzjonijiet, u għall-adozzjoni ta’ listi nazzjonali ta’ speċijiet jew sottospeċijiet li għalihom huma disponibbli varjetajiet xierqa ta’ materjal riproduttiv organiku tal-pjanti jew fil-fażi ta’ konverżjoni fi kwantità suffiċjenti. Jenħtieġ li dak l-approċċ jippermetti li jiġi limitat ir-rikors għal awtorizzazzjonijiet individwali. Barra minn hekk, dawk il-listi nazzjonali jikkostitwixxu informazzjoni rilevanti, li hija mistennija li żżid l-għarfien u ċ-ċertezza fis-settur tal-materjal riproduttiv organiku tal-pjanti u b’hekk tiffaċilita l-iżvilupp ulterjuri kemm f’dan is-settur tal-produzzjoni speċjalizzat ħafna kif ukoll fl-użu ta’ materjal riproduttiv organiku tal-pjanti.

(7)

Jenħtieġ għalhekk li l-Parti I tal-Anness II tar-Regolament (UE) 2018/848 tiġi emendata skont dan.

(8)

Fl-interess taċ-ċarezza u taċ-ċertezza legali, jenħtieġ li dan ir-Regolament jibda japplika mid-data tal-applikazzjoni tar-Regolament (UE) 2018/848,