IL-KUMMISSJONI EWROPEA
Brussell, 8.6.2017
COM(2017) 292 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
dwar ir-Rieżami ta’ Nofs it-Terminu tal-Pjan ta’ Azzjoni tal-Unjoni tas-Swieq Kapitali
{SWD(2017) 224 final}
{SWD(2017) 225 final}
1.Introduzzjoni
L-ogħla prijorità tal-Kummissjoni hija li ssaħħaħ l-ekonomija tal-UE u li tistimola l-investiment biex toħloq l-impjiegi.
Biex jissaħħaħ l-investiment fuq żmien twil, jeħtieġ li jkollna swieq tal-kapital aktar b’saħħithom. Dawn is-swieq jeħtieġ li jipprovdu sorsi ġodda ta’ finanzi korporattivi u li jgħinu biex jiżdiedu l-għażliet ta’ investiment, billi jagħmlu disponibbli l-benefiċċju konkreti tas-Suq uniku għan-negozju u l-Unitajiet domestiċi tal-UE. In-negozji tal-UE, minn dawk ġodda u dawk li jridu jkabbru għal negozji multinazzjonali stabbiliti sew, jeħtieġu aċċess għal firxa wiesgħa ta’ sorsi ta’ finanzjament, biex jinvestu fl-innovazzjoni u l-espansjoni tal-kumpanija. L-unitajiet domestiċi jeħtieġu aċċess għas-swieq tal-kapital, biex ikollhom aktar opportunitajiet u opportunitajiet aħjar biex jinvestu għall-futur tagħhom.
Il-prodotti u s-servizzi finanzjarji meħtieġa jistgħu jkunu offruti b’kundizzjonijiet aktar kompetittivi minn istituzzjonijiet finanzjarji, banek, ditti ta' investiment u investituri istituzzjonali li joperaw fi swieq tal-kapital kbar u integrati. Is-swieq tal-kapital wkoll għandhom il-potenzjali li jindirizzaw il-fondi privati lejn investiment aktar sostenibbli.
L-irkupru ekonomiku tal-UE qed iżid fil-momentum, b’ħames sena konsekuttiva ta’ tkabbir. Madanakollu, hemm riskji negattivi sinifikanti. Il-kontribut tal-investiment għat-tkabbir għadu baxx u r-rata tal-investiment għadha taħt il-livelli ta’ qabel il-kriżi. Id-dgħufija persistenti fl-investiment tkompli ttaqqal il-momentum ta’ rkupru u ta’ tkabbir fuq tul ta’ żmien.
Huwa għalhekk li l-President Juncker stabbilixxa il-ħtieġa li jinbena suq uniku għall-kapital bħala waħda mill-prijoritajiet ewlenin tiegħu — Unjoni tas-swieq tal-kapital (CMU) għal-Istati Membri Kollha.
Is-CMU jsaħħaħ it-tielet pilastru tal-Pjan ta' Investiment għall-Ewropa. Hija se toffri benefiċċji għall-Istati Membri kollha. waqt li ssaħħaħ ukoll l-Unjoni Ekonomika u Monetarja (UEM) billi tappoġġa l-konverġenza soċjali u tgħin biex tassorbi l-iskossi ekonomiċi fiż-żona tal-euro. Dan ħareġ mir-rapport tal-Ħames Presidenti dwar Nikkompletaw l-Unjoni Ekonomika u Monetarja tal-Ewropa.
Ir-Riżoluzzjoni tal-Parlament Ewropew tad-19 ta’ Jannar 2016 irrikonoxxiet ir-rwol importanti li s-swieq tal-kapital jista’ jkollhom fl-indirizzar tal-ħtiġijiet finanzjarji tal-ekonomiji tal-Istati Membri u ssottolinjat li s-CMU għadu jiffoka aktar fuq l-utenti aħħarin tas-swieq tal-kapital, jiġifieri kumpaniji u investituri.
Aktar riċentament, tqajmu għadd ta’ sfidi ġodda għall-integrazzjoni finanzjarja, li jimponu ħtieġa biex isaħħu u jittrasformaw ir-riforma tal-aġenda tas-swieq tal-kapital tal-UE.
B’mod partikolari, it-tluq futur tal-akbar ċentru finanzjarju mill-UE jagħmel neċessarju r-rivalutazzjoni ta’ kif is-CMU jista’ jiżgura li n-negozji u l-investituri tal-UE jkollhom aċċess għal swieq tal-kapital b’saħħithom, dinamiċi u aktar integrati, waqt li r-riskji għall-istabbiltà finanzjarja jkunu ġestiti b’mod xieraq.
Dan jitlob għal azzjoni b'saħħitha, superviżjoni u miżuri aktar effettivi biex ikun żgurat li l-benefiċċji tas-CMU jinħassu mal-UE kollha kemm hi. IS-CMU jrid ukoll jipproponi modi biex jaħfen is-setgħat trasformattivi tat-teknoloġija finanzjarja u jixxiftja l-kapital privat lejn investiment sostenibbli.
Id-Dokument ta’ Riflessjoni dwar l-Approfondiment tal-Unjoni Ekonomika u Monetarja (UEM) tal-31 ta’ Mejju jiddikjara li l-progress dwar is-CMU huwa importantissimu biex jgħin sabiex ikunu pprovduti sorsi aktar innovattivi, sostenibbli u diversifikati ta’ finanzjament għall-unitajiet domestiċi u għan-negozji. Huwa jenfasizza wkoll li, sabiex ikun suċċess, l-impenn tal-Parlament Ewropew, tal-Kunsill u tal-partijiet kkonċernati kollha huwa indispensabbli.
Il-Kunsill Ewropew ta’ Ġunju 2016 talab għal “progress rapidu u determinat biex jiġi żgurat aċċess aktar faċli għal finanzjament għan-negozji u jingħata appoġġ għall-investiment fl-ekonomija reali billi tiġi promossa l-aġenda tal-Unjoni tas-swieq tal-kapital.”
F’Settembru 2016, il-Kummissjoni adottat Komunikazzjoni li titlob riforma aċċellerata.
Fit-13 ta’ Diċembru 2016, id-Dikjarazzjoni Konġunta mill-Parlament Ewropew, mill-Kunsill u mill-Kummissjoni dwar il-prijoritajiet leġiżlattivi tal-UE għall-2017 inkludew l-inizjattivi dwar il-ħolqien ta’ suq aktar sigur u aktar trasparenti għat-titolizzazzjoni u l-prospetti imtejba għat-titoli, biex iwasslu għas-CMU.
Madankollu, il-Kummissjoni ma tistax tibni is-CMU weħedha. Is-suċċess tiegħu se jiddependi fuq il-livell tal-impenn politiku mill-Istati Membri, il-Parlament Ewropew u l-parteċipanti fis-suq.
Huwa se jiddependi fuq kif negozji, fornituri ta’ servizzi finanzjarji kbar u żgħar u investituri istituzzjonali u dawk fil-livell tal-konsumatur jużaw l-elementi kostitwenti. L-awtoritajiet nazzjonali u l-parteċipanti fis-suq għandhom rwol ewlieni fil-bini ta’ kanali finanzjarji u segmenti tas-suq, kif ukoll l-infrastruttura legali, fiskali u teknika meħtieġa biex jinħattu ostakoli għall-integrazzjoni tal-UE u biex jkun żviluppat Suq Uniku veru għall-kapital.
Il-Kummissjoni hija impenjata għall-indirizzar tal-isfidi. Huwa għalhekk li dan ir-rieżami jaġġorna u jikkumplimenta l-aġenda oriġinali b’miżuri ġodda ta’ prijorità, waqt li jieħdu mir-risposti tal-konsultazzjoni pubblika ta’ Jannar-Marzu 2017.
Il-proposti kollha se jkunu soġġetti għall-konsultazzjoni xierqa u l-valutazzjoni tal-impatt se ssir fuq il-firxa sħiħa tal-għażliet biex jinkisbu l-objettivi.
2.Nimplimentaw l-aġenda tas-CMU
L-isfidi stabbiliti fil-Pjan ta’ Azzjoni tas-CMU 2015 għadhom rilevanti daqs qabel. Is-CMU huwa meħtieġ għaliex il-banek u s-swieq tal-kapital huma t-tnejn komponenti vitali tas-sistema finanzjarja, li ma jikkompetux bejniethom iżda jikkomplementaw lil xulxin. Il-178 tweġiba għall-konsultazzjoni pubblika dwar ir-Rieżami ta' Nofs it-Terminu tas-CMU ikkonfermaw l-isfidi aktar speċifiċi s-CMU jrid jindirizza (ara l-kaxxa hawn taħt għal ħarsa ġenerali tal-kummenti li ħarġu mill-konsultazzjoni).
·Id-ditti Ewropej ġodda u dawk li jridu jkabbru jeħtieġu aktar finanzjament ta’ riskju biex jinvestu fl-innovazzjoni u t-tkabbir. Hemm il-bżonn li jkunu żviluppati u msaħħa forom ġodda ta’ kapital ta' riskju emerġenti flimkien mal-kreditu bankarju.
·Id-daqs tal-ekwità pubblika u tas-swieq tad-dejn tal-UE jinsab wara dak ta’ ekonomiji żviluppati oħra, speċjalment f’ċerti Stati Membri. L-aċċess għas-swieq pubbliċi jiswa u huwa kumpless, speċjalment għall-kumpanija żgħar u b'kapitalizzazzjoni medja.
·L-isforzi neċessarji li saru mill-banek tal-UE wara l-kriżi finanzjarja biex inaqqsu l-iskoperturi eċċessivi għar-riskju u l-ingranaġġ ikkontribwixxew għal tnaqqis f’self ġdid għan-negozji tal-UE. Is-swieq tal-kapital jistgħu joffru soluzzjonijiet b’saħħithom biex jgħinu lill-banek jiġġestixxu l-karti bilanċjali b’mod aktar effiċjenti, u biex jiffinanzjaw is-self tagħhom lin-negozji u lill-unitajiet domestiċi.
·Ma hemmx biżżejjed investiment mill-kumpaniji tal-assigurazzjoni u l-fondi ta’ pensjoni fil-kapital ta' riskju, fl-ekwità u fl-infrastruttura. Aktar kapital privat jeħtieġ li jkun mobilizzat biex jiffinanzja l-investiment sostenibbli, it-tranżizzjoni għal ekonomija b'livell baxx ta' emissjonijiet ta' karbonju investiment biex ikunu sodisfatti bżonnijiet soċjali importanti.
·L-impenn minn investitur fil-livell tal-konsum mas-swieq tal-kapital għadu baxx. L-unitajiet domestiċi tal-UE huma fost dawk li l-aktar ifaddlu fid-dinja, iżda l-biċċa l-kbira ta’ dan it-tfaddil jinżamm f’kontijiet bankarji b’perjodi ta’ maturità qosra. Aktar investiment fis-swieq tal-kapital jista’ jgħin biex ikunu sodisfatti l-isfidi li jirriżultaw mit-tixjiħ demografiku u mir-rati baxxi tal-imgħax. Madanakollu, dan mhux se jseħħ sakemm l-investitur fil-livell tal-konsum ma jkollhomx aċċess għal propożizzjonijiet attraenti ta’ investiment b’termini kompetittivi u trasparenti.
·Bosta ostakoli li ilhom hemm u li għandhom l-għeruq fil-fond ifixklu l-investiment transfruntier tal-UE, biex b’hekk jimminaw l-effiċjenza tal-ekonomija tal-UE. L-ostakoli huma ta’ deterrent għall-investituri milli jiddiversifikaw il-portafolli ġeografiċi tagħhom, inaqqsu s-suq tal-likwidità, u jagħmluha aktar diffiċli li l-kumpaniji jkabbru.
|
Matul l-aħħar 18-il xahar, skont l-iskeda oriġinali, il-Kummissjoni wettqet aktar minn nofs il-miżuri (20 minn 33) imħabbra fil-Pjan ta’ Azzjoni tas-CMU.
Sar sforz partikolari biex jiżdiedu s-sors tal-finanzjament tar-riskju hekk kif il-kumpaniji jespandu gradwalment, u biex dawn isiru aktar disponibbli madwar l-UE.
·Kapital ta' riskju– Sar progress tajjeb fl-implimentazzjoni tal-pakkett tal-Kummissjoni. Il-qbil fil-prinċipju tal-Parlament Ewropew u tal-Kunsill nhar it-30 ta’ Mejju dwar ir-Regolament dwar il-Fondi Ewropej ta’ Kapital ta’ Riskju (EuVECA) u dwar ir-Regolament dwar il-Fondi Ewropej ta' Intraprenditorija Soċjali (EuSEF) se jagħmluha aktar faċli biex l-investituri jinvestu f’kumpaniji żgħar u medji innovattivi billi fetaħ ir-regolament għall-maniġers tal-fondi ta’ kull daqs u billi espanda l-firxa ta’ kumpaniji li jistgħu jinvestu fihom. Il-proċedura tal-għażla għall-maniġers għall-fond jew fondi ta’ Fondi pan-Ewropej tal-kapital tar-riskju se tkun iffinalizzata fix-xhur li ġejjin. Is-servizzi tal-Kummissjoni rrieżaminaw l-inċentivi fiskali nazzjonali għall-kapital tar-riskju u għall-investitur informali. Waqt li bnew fuq dan u fuq l-inizjattivi mistennija skont l-Inizjattiva għan-negozji l-ġodda u għal dawk li qed jespandu tal-2016, illum qed ikun ippubblikat studju li jistabbilixxi prattiki tajba. Dan se jappoġġa t-tfassil u l-implimentazzjoni tal-politika tal-Istati Membri, anki permezz tas-Semestru Ewropew, biex tittejjeb l-effikaċja ta’ tali inċentivi fiskali u trawwem l-iżvilupp tas-swieq tal-kapital lokali.
·Il-kumpaniji li jidħlu fi swieq ġodda jew li jiġbru kapital minnhom – sar progress biex dan ikun iffaċilitat. Il-Ftehim ta’ Diċembru 2016 mill-Parlament Ewropew u mill-Kunsill dwar Regolament dwar il-Prospetti modernizzat se jkun ippubblikat f'Ġunju 2017 u japplika minn nofs l-2019. Bħala parti mit-titjib, l-Awtorità Ewropea tat-Titoli u s-Swieq (ESMA) se topera bażi tad-dejta tal-prospetti onlajn mifruxa mal-UE, b’xejn. Il-Kummissjoni issa qiegħda taħdem mal-Parlament Ewropew, mal-Istati Membri, u mal-ESMA biex iddaħħal fis-seħħ miżuri ta' implimentazzjoni, notevolment dwar il-kontenut u l-format tal-Prospetti ta’ tkabbir tal-UE, l-iskrutinju u l-approvazzjoni, id-dokument tar-reġistrazzjoni universali u l-informazzjoni li għandha tkun divulgata għall-ħruġ ta’ titoli sekondarji (biex ikunu żgurati rekwiżiti simplifikati għal emittenti żgħar u frekwenti). Il-Kummissjoni ħadet ukoll passi biex tindirizza l-polarizzazzjoni fis-sistema fiskali li tiffavorixxi d-dejn kontra l-ekwità, bħala parti mill-proposta tagħha ta’ Ottubru 2016 għal Bażi komuni konsolidata għat-taxxa korporattiva (BKKTK). Ir-rieżami ta’ ostakli regolatorji biex ikunu elenkati SMEs u ta’ likwidità fis-suq permezz ta’ bonds maħruġa mill-kumpaniji.
·Il-kapaċità tal-banek li jsellfu lill-ekonomija – sar progress biex tkun illiberata l-kapaċità fuq il-karti bilanċjali tal-banek, biex b’hekk ikun iġġenerat finanzjament addizzjonali għall-ekonomija. Il-Parlament Ewropew u l-Kunsill laħqu ftehim fil-prinċipju dwar titolizzazzjoni sempliċi, trasparenti u standardizzata, flimkien ma rieżami tar-rekwiżiti kapitali għall-banek fit-30 ta’ Mejju. F’Novembru tal-2016, il-Kummissjoni pproponiet emenda għar-regoli ta’ rekwiżit kapitali għall-banek, biex b’hekk tathom is-setgħa li jeżentaw is-settur kollu ta’ unjoni tal-kreditu ta’ Stat Membru. Il-konsultazzjoni mifruxa mal-UE dwar qafas għal bonds koperti u strutturi simili għal self lil negozji żgħar, tlestiet.
·Investiment tal-Infrastruttura - l-att delegat tas-Solvibbiltà II kien emendat f’Settembru 2015 u daħal fis-seħħ f'April tal-2016, biex b’hekk saret anqas għalja għal kumpaniji tal-assigurazzjoni tal-UE biex jinvestu fi proġetti ta’ infrastruttura li jikkwalifikaw. Illum il-Kummissjoni qiegħda wkoll tippreżenta miżuri biex tirrieżamina l-kalibrazzjonijiet tar-riskju għall-investiment fl-infrastruttura korporattiva. Biex tinkoraġġixxi l-investiment privat mill-banek fi proġetti ta’ infrastruttura, il-proposta ta’ Novembru 2016 biex tkun emendata l-leġiżlazzjoni dwar ir-rekwiżiti kapitali (CRR/CRD IV) toħloq ambjent regolatorju aktar sensittiv għar-riskju biex jippromwovi proġetti ta’ infrastruttura ta’ kwalità għolja u jnaqqas ir-riskji għall-investituri.
·Investiment istituzzjonali u fil-livell tal-konsumatur- tlesta xogħol fundamentali solidu biex jirfed il-proposti dwar pensjonijiet personali madwar l-UE, it-tqassim transfruntiera tal-fondi ta’ investiment u kostijiet imnaqqsa għall-kumpaniji tal-assigurazzjoni biex jinvestu fl-ekwità privata u f’dejn korporattiv privat. B’mod parallel, f'Marzu 2017, il-Kummissjoni ppreżentat il-Pjan ta' Azzjoni għas-Servizzi Finanzjarji għall-Konsumatur, li tispjega modi biex il-konsumaturi jkunu pprovduti b’għażla akbar u aċċess aħjar għas-servizzi finanzjarji għall-konsumatur madwar l-UE. Biex jikkumplementaw l-isforzi dwar iż-Żona Unika ta' Pagamenti bl-Euro (SEPA), il-pjan ta' azzjoni jindirizza wkoll il-kwistjoni ta’ kostijiet għolja biex isiru ċertu pagamenti fl-UE. Il-Kummissjoni qiegħda wkoll tħejji l-ħidma tagħha mal-Awtoritajiet Superviżorji Ewropej (ESAs) dwar it-trasparenza dejjem tikber u l-kostijiet ta’ komparabilità u l-prestazzjoni tal-prodott ta' investiment u pensjonijiet għall-konsumatur.
·Ristrutturar preventiv u possibilità oħra għall-imprendituri - f'Novembru tal-2016, il-Kummissjoni tipproponi regoli dwar ristrutturar preventiv, biex tevita l-likwidazzjoni ta’ kumpaniji vijabbli b’diffikultajiet finanzjarji u tagħti lill-imprendituri ċans biex jerġgħu jidħlu fil-ħajja tan-negozju wara l-falliment. Il-proposta tistabbilixxi wkoll regoli biex tittejjeb l-effiċjenza tal-proċeduri ta’ insolvenza, biex jagħmluhom aktar prevedibbli, anqas għalja u aktar rapidi. Dawn il-proposti attwalment qed ikunu nnegozjati mill-Parlament Ewropew u l-Kunsill u l-adozzjoni rapida tagħhom se tagħmel kontribut importanti biex ikun żgurat li l-ambjent legali jappoġġa l-attività tan-negozju.
·Ir-Rapport tal-Kummissjoni ta’ Marzu tal-2017 jistabbilixxi pjan direzzjonali għat-tneħħija tal-ostakli nazzjonali għall-moviment liberu tal-kapital. Il-Kunsill Affarijiet Ekonomiċi u Finanzjarji approva l-pjan direzzjonali fit-23 ta’ Mejju 2017.
·L-Istabbiltà finanzjarja - għalkemm mezzi ta’ finanzjament aktar diversi taħt is-CMU se jagħmlu s-sistema finanzjarja tal-UE aktar reżiljenti, tibqa’ l-ħtieġa li jkunu identifikati ir-riskji ta’ stabbiltà jekk dawn jimmaterjalizzaw fis-swieq tal-kapital u l-ħtieġa li nkunu nistgħu nirreaġixxu għalihom. Wara l-konsultazzjoni tagħha fl-2016, il-Kummissjoni issa se taħdem biex tiżgura li l-Bord Ewropew dwar ir-Riskju Sistemiku (BERS) għandu l-kapaċità li jimmonitorja r-riskji potenzjali għall-istabbiltà finanzjarja li jirriżultaw mill-finanzjament ibbażat fuq is-suq.
Mill-miżuri pendenti fejn tħabbar xogħol preparatorju fil-Pjan ta' azzjoni tas-CMU, il-Kummissjoni issa se timxi ‘l quddiem bi tliet proposti leġiżlattivi, li huma ċentrali għall-ħolqien tas-CMU:
1.Proposta leġiżlattiva dwar Prodott ta’ Pensjoni Personali Pan-Ewropew (PEPP) sa tmien Ġunju 2017. Dan se jipprepara l-pedamenti għal suq sigur, aktar kost-effiċjenti u trasparenti fi tfaddil personali vijabbli u volontarju għall-pensjonijiet li jista’ jkun ġestit fuq skala pan-Ewropea. Hija se tgħin biex ikunu sodisfatti l-bżonnijiet tan-nies li jixtiequ itejbu l-adegwatezza tat-tfaddil tagħhom għall-irtirar, jindirizzaw l-isfida demografika, jikkumplementaw il-prodotti u l-iskemi tal-pensjoni eżistenti, u jappoġġaw il-kost-effiċjenza tal-pensjonijiet personali billi joffru opportunitajiet tajba għall-investiment fuq tul ta’ żmien ta’ pensjonijiet personali;
2.Proposta leġiżlattiva li tispeċifika konflitt tal-liġijiet fir-regoli dwar l-effetti tal-partijiet terzi ta’ tranżazzjonijiet f’titoli u pretensjonijiet fil-Q4 2017. Differenzi fit-trattament nazzjonali tal-effetti tal-partijiet terzi tal-assenjament tal-pretensjonijiet tad-dejn jikkumplikaw l-użu ta’ dawn l-istrumenti bħala kollateral transfruntiera u jagħmluha diffiċli għall-investituri li jipprezzaw ir-riskju tal-investimenti tad-dejn. Billi tneħħi l-inċertezza dwar il-liġijiet applikabbli li tagħti lok għal kostijiet u riskji, din il-proposta se tippromwovi t-tranżazzjonijiet transfruntieri. Hija se tibni fuq ix-xogħol ta’ grupp ta’ esperti mogħti mandat speċjalment u r-riżultat tal-konsultazzjoni pubblika li hemm għaddejja. Il-proposta se tipprovdi ċarezza dwar liema liġi tapplika għall-effetti tal-partijiet terzi f’każijiet ta’ tranżazzjonijiet f’titoli u pretensjonijiet;
3.Proposta leġiżlattiva għal qafas tal-UE għal bonds koperti fil-Q1 2018. Din se jkollha l-għan li toħloq suq tal-bonds koperti aktar integrat fl-UE mingħajr ma jimminaw il-kwalità tal-bonds koperti eżistenti. Is-swieq ta’ bonds koperti huma mezz importanti għall-finanzjament fit-tul tal-ekonomija reali;
B’mod parallel, il-Kummissjoni se tesplora l-possibilità li jkunu żviluppati Noti Garantiti Ewropej bħala strument għas-self tal-SMEs u self infrastrutturali.
Barra minn hekk, il-Kummissjoni qiegħda wkoll tkompli bil-ħidma preparatorja dwar il-miżuri segwenti biex timplimenta l-impenji fil-Pjan ta' Azzjoni oriġinali:
·Emendi tar-Regolament Delegat li jissupplimenta is-Solvibbiltà II fl-2018 biex ikun rieżaminat it-trattament prudenzjali tal-ekwità privata u tad-dejn pjazzat privatament, fejn ikun prudenzjalment ġustifikat, mill-perspettiva superviżorja abbażi tar-riskju;
·Rakkomandazzjoni dwar pjazzamenti privati (nibnu fuq l-esperjenza ta’ reġimi nazzjonali li jiffunzjonaw sew). Is-swieq għall-pjazzament privat tad-dejn jistgħu jwessgħu id-disponibbiltà tal-finanzi għal kumpanija mhux elenkata ta’ daqs medju. Ir-rakkomandazzjoni se tkun informata mir-riżultati tal-istudju, li għandu jkun ippubblikat fil-Q4 2017;
·Komunikazzjoni dwar pjan direzzjonali għat-tneħħija tal-ostakoli għall-infrastruttura tas-suq wara n-negozjar(nibni fuq ir-rakkomandazzjonijiet tal-EPTF – il-Forum Ewropew wara n-negozjar) – fil-Q4 2017. L-infrastruttura tas-suq wara n-negozjar għandha rwol vitali fis-swieq tat-titoli, billi tiżgura t-trasferimenti ordnat tas-sjieda, il-ħlas u l-eżerċitar tad-drittijiet li huma marbuta mat-titoli. Bħala medja, negozji transfruntiera għadhom sostanzjalment aktar għalja minn negozji domestiċi. Ambjent wara n-negozjar effiċjenti jista’ jnaqqas tali kostijiet. Abbażi tar-rapport EPTF, is-servizzi tal-Kummissjoni dalwaqt se jniedu konsultazzjoni pubblika biex jiġbru l-opinjonijiet tal-partijiet kkonċernati dwar fejn jaħsbu li hemm il-bżonn għal titjib ulterjuri fil-qasam ta’ wara n-negozjar, biex tinkiseb integrazzjoni aħjar;
·Komunikazzjoni dwar is-swieq tal-bonds maħruġa minn kumpaniji (nibnu fuq ir-rakkomandazzjonijiet tal-Grupp ta’ esperti dwar il-Likwidità fis-Suq tal-Bonds Maħruġa minn Kumpaniji) – fil-Q4 2017. Is-swieq tal-bonds maħruġa minn kumpaniji huma mezz importanti ta’ finanzjament għal kumpaniji aktar kbar. Il-Kummissjoni qed tirrieżamina kif dawn is-swieq jiffunzjonaw, b’attenzjoni dwar kif il-likwidità fis-suq sekondarju tista’ tittejjeb;
·Kodiċi ta' kondotta biex ikunu ssimplifikati il-proċeduri tat-taxxa minn ras il-għajn, b’attenzjoni partikolari fuq ir-rifużjonijiet – sa tmiem l-2017. Il-Kummissjoni qed taħdem mal-esperti fiskali nazzjonali biex jikkondividu l-aħjar prattiki u jaqblu dwar kodiċi. Dan se jkun pass prattiku lejn soluzzjonijiet operazzjonali effiċjenti għall-irkupru ta’ taxxi minn ras il-għajn.
3.Għaliex l-UE teħtieġ is-CMU aktar minn qatt qabel
Żviluppi riċenti fil-kuntest politiku u ekonomiku tal-UE jitlob swieq tal-kapital b’saħħithom u kompetittivi biex jiffinanzjaw l-Ekonomija tal-UE flimkien mal-Unjoni Bankarja. Dawn l-iżviluppi jagħmlu ir-Rieżami ta' nofs it-terminu tal-Pjan ta' azzjoni tas-CMU saħansitra aktar rilevanti u f’waqtu.
Fid-dawl tal-interkonnessjoni dejjem tiżdied tas-swieq finanzjarji, fl-UE u globalment, hemm bżonn li s-superviżjoni tal-UE tkun ulterjorment integrata biex taffaċċa l-isfidi futuri tas-swieq finanzjarji tal-UE. Il-Kummissjoni tibqa’ impenjata lejn swieq finanzjarji integrati u kooperazzjoni internazzjonali. L-ekwivalenza hija l-istrument ewlieni li l-UE tuża biex timmaniġġja b’mod effettiv l-attività transfruntiera tal-atturi fis-suq f’ambjent prudenzjali b’saħħtu u sigur, waqt li tiżgura il-funzjonament tas-suq uniku. Dan jitlob tisħiħ tal-qafas superviżorju għall-ekwivalenza.
Fl-UE, il-qafas superviżorju huwa element neċessarju għal swieq tal-kapital li jiffunzjonaw tajjeb u li huma integrati, li jibni fuq l-objettivi ddikjarati fir-Rapport tal-Ħames Presidenti. Qed jittieħdu passi biex tiżdied il-kapaċità tal-ESAs biex jippreservaw is-swieq ordnati u l-istabbiltà finanzjarja tal-UE. Dan jinkludi l-konsultazzjoni riċenti dwar l-operazzjonijiet tal-ESAs. Fl-UE-27 b’mod partikolari, il-kapaċità tal-ESMA biex tiżgura superviżjoni konsistenti madwar l-UE għandha tissaħħaħ. Dan għandu jiżgura li l-ġabra unika tar-regoli tkun implimentata b’mod uniformi madwar is-suq uniku. Għaldaqstant, entitajiet finanzjarji b’daqs u profili tar-riskju għandhom ikunu soġġetti għall-istess standard ta’ superviżjoni jkunu fejn ikunu jinsabu fl-UE u biex ikun evitat l-arbitraġġ regolatorju. Id-Dokument ta’ Riflessjoni dwar l-approfondiment tal-UEM enfasizza li qafas superviżorju aktar integrat li jiżgura l-implimentazzjoni komuni tar-regoli għas-settur finanzjarju u eżekuzzjoni superviżorja aktar ċentralizzata hija ewlenija għall-bini ta’ CMU.
It-tluq tar-Renju Unit mis-suq uniku jsaħħaħ il-ħtieġa urġenti li l-qafas tas-suq tal-kapital jissaħħaħ u jkun integrat ulterjorment, anki fuq kontropartijiet ċentrali (CCPs), ditti tal-investiment u swieq għal offerti pubbliċi inizjali (IPOs). Huwa jsaħħaħ il-bżonn għall-integrazzjoni ulterjuri tas-superviżjoni fil-livell tal-UE.
It-Teknoloġija finanzjarja (FinTech) qed titrasforma s-swieq tal-kapital billi ġġib atturi ġodda fis-suq u soluzzjonijiet aktar effiċjenti, iżżid il-kompetizzjoni, u tnaqqas il-kostijiet għan-negozji u l-investituri. Eżempji ta’ innovazzjoni finanzjarja li tista’ tagħmel is-swieq tal-kapital tal-UE usa’ u aktar profondi jinkludu: il-finanzjament kollettiv u għodod oħra ta’ finanzjament; finanzjament tal-katina ta’ provvista; konsulenza robotika; ivvutar onlajn tal-azzjonisti; u l-applikazzjoni possibbli tat-teknoloġija bi blokok f’katina wara n-negozjar. FinTech tista’ toffri soluzzjonijiet f’bosta segmenti u funzjonijiet tas-suq tal-kapital, bħal: ħruġ tal-ekwità; governanza korporattiva; immaniġġjar ta' assi; intermedjazzjoni tal-investiment; distribuzzjoni tal-prodott; u l-infrastruttura tas-suq wara n-negozjar inkluż kustodja tat-titoli.
Leġiżlazzjoni aktar riċenti bħad-Direttiva dwar is-Servizzi ta’ Ħlas (PSD 2) tfasslet biex tirreaġixxi għal bidliet teknoloġiċi rapidi fl-industrija ta’ ħlas u b’hekk biex tiżgura approċċ ibbilanċjat li jippermetti li l-kumpaniji FinTech jiżviluppaw mudelli ġodda ta' negozju. Il-konsultazzjoni pubblika li qed issir dwar FinTech se tgħin lill-Kummissjoni biex tidentifika kwistjonijiet ġodda li jistgħu jeħtieġu li jkunu integrati fil-qafas ta’ politika tas-CMU.
L-organizzazzjoni profonda mill-ġdid tas-sistema finanzjarja hija neċessarja biex l-investimenti jsiru aktar sostenibbli u biex is-sistema tippromwovi żvilupp verament sostenibbli minn perspettiva ekonomika, soċjali u ambjentali. Dan jimplika li jinstab mod biex is-sostenibbiltà tkun integrata fil-qafas regolatorju u ta’ politika finanzjarja u biex ikunu mmobilizzati u orjentati aktar flussi ta’ kapital privat lejn investimenti sostenibbli. Is-17-il Għan ta’ Żvilupp Sostenibbli (SDGs) identifikati fl-Aġenda 2030 tan-NU għall-Iżvilupp Sostenibbli jipprovdu qafas biex jidderieġu tali investimenti diretti, li l-UE hija totalment impenjata li timplimenta.
Fost sfidi sostenibbli oħra fit-tul ta’ żmien, il-ġestjoni tat-tibdil fil-klima jiddependi fuq li l-flussi finanzjarji jsiru sostenibbli mal-objettivi fuq żmien twil dwar id-dekarbonizzazzjoni u l-iżvilupp reżiljenti għat-tibdil fil-klima. Il-ftehim ta’ Pariġi, li mmarkat punt ta’ bidla fl-impenn globali għat-trattament tat-tibdil fil-klima, poġġew il-finanzi fil-qalba ta’ din il-politika.
L-Aġenda 2030 tan-NU tissottolinja wkoll ir-rwol ewlieni li l-finanzi għandu jkollhom biex jissodisfaw l-SDGs. Dawk li jfasslu l-politika u l-industrija finanzjarja qed jibdew jipproponu soluzzjonijiet li jinċentivaw investituri biex iċaqalqu l-appoġġ għal proġetti sostenibbli u fit-tul u kumpaniji sostenibbli.
Billi tirrikonoxxi l-importanza ta’ dawn l-isfidi, il-Kummissjoni stabbilit Grupp ta’ Esperti ta’ Livell Għoli biex jagħtuha parir dwar kif tintegra il-kunsiderazzjonijiet ta’ sostenibbiltà fir-regolament finanzjarju tal-UE u fil-prattiki tas-swieq finanzjarji.
Bl-istess mod, is-swieq tal-kapital jistgħu jgħinu biex il-kapital privat ikun dirett lejn opportunitajiet ta’ investiment profittabbli b’esternalitajiet soċjali pożittivi, biex b’hekk jgħinu lill-UE twettaq ir-responsabilitajiet soċjali tagħha.
Investituri istituzzjonali tradizzjonalment kienu investituri f’ekwità fuq terminu twil fis-swieq kapitali. Madanakollu, matul il-15-il sena li għaddew il-kumpaniji tal-assigurazzjoni naqqsu l-investiment fil-kapital għal madwar 5-10 % tal-portafoll kurrenti totali tagħhom. Investimenti fil-kapital minn fondi ta’ pensjoni baqgħu aktar sinifikanti, iżda jinvestu jew b’mod predominanti fuq is-suq domestiku jew, jekk barra, lil hinn miż-żona euro. Hemm bżonn li jkunu vvalutati l-ixprunaturi ekonomiċi tal-investimenti fil-kapital mill-kumpaniji tal-assigurazzjoni u mill-fondi ta’ pensjoni, inkluż investimenti fl-UE u l-impatt potenzjali ta’ limiti regolatorji fil-livelli ta’ UE u dak nazzjonali u fatturi oħra.
Finalment, hemm bżonn li titwessa’ l-firxa ġeografika tas-swieq tal-kapital sabiex l-Istati Membri kollha jistgħu jaħsdu l-benefiċċji ta’ swieq tal-kapital approfonditi u aktar integrati. Is-CMU jista’ jgħin biex ikunu żviluppati segmenti tas-suq u mezzi ta’ finanzjament li jeħtieġu prossimità u soluzzjonijiet lokali għan-negozji u għall-investituri. Fl-istess waqt, is-CMU se jwassal għal swieq tal-kapital aktar integrati, u b’hekk jippermetti li kumpaniji u investituri jaċċessaw konsorzji ta’ kapital approfonditi f’postijiet oħra fl-UE.
4.Inizjattivi prijoritarji ġodda biex isaħħu l-pjan ta' azzjoni tas-CMU
Dawn l-isfidi li qed jevolvu jitolbu tfassil mill-ġdid tal-Pjan ta’ Azzjoni għall-Unjoni tas-swieq tal-kapital sabiex jipprovdi tweġibiet b’saħħithom. Dan ir-Rieżami ta’ Nofs it-Terminu hu mibni fuq sett ġdid ta’ miżuri prijoritarji li jkomplu jiffokaw fuq: is-simplifikazzjoni tal-investimenti transfruntieri u l-iżvilupp ta’ ekosistemi tas-suq tal-kapital fl-UE kollha; u l-indirizzar ta’ xi dimensjonijiet addizzjonali ta’ sistemi tas-swieq tal-kapital tal-UE li qed jiżviluppaw.
Il-miżuri identifikati hawnhekk, flimkien mal-ħidma pendenti tas-CMU, jikkostitwixxu l-bażi għal kontribut deċiżiv u dejjiemi għat-twittija tat-triq għal Unjoni tas-swieq tal-kapital vera sal-2019. L-inizjattivi l-ġodda ppreżentati f’din il-Komunikazzjoni se jiġu integrati fil-programm ta’ ħidma tal-Kummissjoni għall-2018. Il-miżuri kollha se jiġu ppreparati skont il-prinċipji tar-Regolamentazzjoni Aħjar, notevolment permezz tal-valutazzjoni tal-impatt, billi jkunu minimizzati l-kostijiet ta’ konformità u tiġi żgurata l-proporzjonalità meta jkunu qed jiġu żviluppati l-proposti leġiżlattivi.
Is-sett ta’ miżuri konsolidati immirati biex jistabbilixxu s-sisien għas-CMU sal-2019 huwa ppreżentat fl-Anness. Informazzjoni aktar dettaljata dwar ix-xogħol tas-servizzi tal-Kummissjoni biex jimplimentaw l-impenji dwar l-Unjoni tas-swieq tal-kapital hija inkluża fid-Dokument ta’ Ħidma tal-Persunal li jakkumpanja din il-Komunikazzjoni. Progress qawwi fl-implimentazzjoni ta’ dan il-programm se tagħti spinta irriversibbli għall-objettiv tal-ħolqien ta’ Unjoni tas-swieq tal-kapital.
4.1.Tisħiħ tal-effikaċja tas-superviżjoni biex tkun aċċellerata l-integrazzjoni tas-swieq
Is-superviżjoni se tkun fil-qalba tal-isforzi biex tinbena l-Unjoni tas-Swieq tal-Kapital (CMU) minħabba r-rwol ċentrali li għandha biex taċċellera l-integrazzjoni tas-suq u toħloq l-opportunitajiet tas-suq uniku għal entitajiet finanzjarji u għall-investituri.
Aktar superviżjoni effettiva u konsistenti hija essenzjali biex jiġu eliminati l-possibbiltajiet għal arbitraġġ regolatorju bejn l-Istati Membri fil-mod kif jagħmlu superviżjoni tal-entitajiet u tal-attivitajiet finanzjarji.
Superviżjoni effettiva u konsistenti tiżgura l-funzjonament tajjeb tas-swieq tal-kapital billi telimina l-ostakli għal investiment transfruntieri, u tikkontribwixxi biex tissimplifika l-ambjent tan-negozju u tnaqqas il-kostijiet tal-konformità li jirriżultaw minn implimentazzjoni diverġenti għad-ditti li joperaw fuq bażi transfruntiera. Superviżjoni aktar effettiva tas-suq uniku toħloq aktar opportunitajiet għal entitajiet finanzjarji u għall-investituri, u tippermetti lil kumpaniji biex ikollhom aċċess għal finanzjament f’suq usa’. Superviżjoni effettiva u konsistenti tikkontribwixxi wkoll biex tissaħħaħ il-protezzjoni tal-investitur, tinbena l-fiduċja fis-swieq tal-kapital, u biex tiġi ppreservata l-istabbiltà finanzjarja.
L-ESMA, l-Awtorità Ewropea tal-Assigurazzjoni u l-Pensjonijiet tax-Xogħol (EIOPA) u l-Awtorità Bankarja Ewropea (ABE) għandhom rwol ewlieni fit-trawwim ta’ konverġenza superviżorja u għalhekk sabiex imexxu’ l quddiem l-integrazzjoni tas-suq.
Il-konsultazzjoni riċenti tal-ASE wriet li r-regoli li skonthom l-ASE topera jeħtieġ li jevolvu biex tiżdied l-effikaċja tas-superviżjoni. Reazzjoni mill-partijiet interessati għall-konsultazzjoni indikaw il-ħtieġa li jiġi aġġustat il-qafas regolatorju li taħtu topera tal-ASE biex itejbu l-kapaċità tagħhom ta’ superviżjoni tas-settur finanzjarju u b’hekk biex jinkisbu l-objettivi tagħhom.
L-ESMA b’mod partikolari għandha rwol ewlieni fit-trawwim tal-integrazzjoni tas-suq tal-kapital. Biex jiġi żgurat approċċ mifrux mal-UE kollha għas-superviżjoni u għall-applikazzjoni konsistenti tal-ġabra unika ta’ regoli għas-swieq tal-kapital, hemm bżonn li tissaħħaħ l-abbiltà tal-ESMA biex tidentifika u tindirizza nuqqasijiet fis-sistema ta’ superviżjoni nazzjonali, u sabiex jiġu identifikati oqsma fejn is-superviżjoni diretta tal-ESMA tista’ tiġi ġġustifikata.
L-isfidi li jirriżultaw fir-rigward ta’ CCPs għandhom jitqiesu b’mod partikolari. L-importanza sistemika dejjem akbar tas-CCPs għas-sistema finanzjarja tal-UE - minħabba d-daqs u l-interkonnettività - enfasizzat in-nuqqasijiet tal-arranġamenti attwali għas-CCPs tal-UE u ta’ pajjiżi terzi. Il-Kummissjoni ħabbret l-intenzjoni tagħha li tippreżenta proposta leġiżlattiva f'Ġunju biex b’hekk issaħħaħ il-qafas kemm għas-CCPs tal-UE u wkoll għal dawk ta’ pajjiżi terzi biex jkunu żgurati l-istabbiltà finanzjarja, is-sikurezza u l-korrettezza tas-CCPs u biex tappoġġa l-iżvilupp ulterjuri tas-CMU.
Għodod superviżorji tal-ESMA jenħtieġ li jkunu ottimizzati biex ikun żgurat li n-nuqqasijiet identifikati fis-sistemi nazzjonali ta’ eżiti u prattiki superviżorji jkunu trattati b’mod konsistenti u koerenti, filwaqt li jkun irrispettat il-prinċipju ta’ sussidjarjetà.
Azzjoni Prijoritarja 1
Fi Q3 2017 il-Kummissjoni se tipproponi emendi fit-tħaddim tal-ESMA u ta’ ESAs oħra biex tiġi promossa l-effikaċja ta’ superviżjoni konsistenti madwar l-UE u lil hinn minnha. F’oqsma speċifiċi, il-Kummissjoni se ssaħħaħ is-setgħat tal-ESMA inklużi, fejn ikun meħtieġ, billi twettaq superviżjoni diretta biex tappoġġa l-funzjonament tas-CMU.
4.2.Tittejjeb il-proporzjonalità ta’ regoli biex jappoġġaw offerti pubbliċi inizjali u ditti tal-investiment
Jeħtieġ li jsir aktar biex jiġi żgurat li l-kumpaniji Ewropej u l-investituri jkunu jistgħu jaħsdu l-benefiċċji sħaħ ta’ aċċess għas-swieq pubbliċi. B’mod partikolari, l-elenkar pubbliku tal-SMEs għadu baxx fl-UE. L-ammont ta’ ekwità miġbur fi swieq dedikati għall-SMEs naqas b’EUR 9 biljun meta mqabbel mal-livelli ta’ qabel il-kriżi.
L-isfidi partikolari huma ffaċċati mill-kumpaniji żgħar u ta’ daqs medju li jfittxu li jiġbru anqas minn EUR 100 miljun permezz tal-ħruġ pubbliku. L-ambjent regolatorju attwali jista’ jiskoraġġixxi lil dawn il-kumpaniji milli jiġbru l-kapital fis-swieq pubbliċi. Il-pjan ta’ Azzjoni tas-CMU enfasizza l-ħtieġa li jiġi żgurat li s-Swieq tat-Tkabbir tal-SMEs isibu bilanċ tajjeb bejn li jipprovdu biżżejjed protezzjoni lill-investituri u li jevitaw piż amministrattiv bla bżonn.
Il-Kummissjoni ħadmet ma’ rappreżentanti tas-swieq pubbliċi tal-ekosistemi biex tivvaluta kif swieq pubbliċi għall-SMEs qed jiffunzjonaw, u biex tidentifika soluzzjonijiet potenzjali għal ostakoli għall-elenkar tal-SMEs. Is-servizzi tal-Kummissjoni dalwaqt se jippubblika rapport dwar l-ostakoli għall-elenkar tal-SMEs bħala l-punt tat-tluq għal programm koerenti ta’ ħidma f’dan il-qasam, inkluż Proposta għal Azzjoni prijoritarja 2.
Filwaqt li tibni fuq kontribuzzjonijiet sinifikanti mill-partijiet ikkonċernati, il-Kummissjoni se tirrieżamina l-ostakli regolatorji għall-ammissjoni tal-SMEs fis-swieq regolati u fis-swieq għat-tkabbir tal-SMEs kif previst permezz tas-Sejħa għal Evidenza. Dan ir-rieżami fil-mira ta’ leġislazzjoni settorjali importanti (pereżempju, MiFID II u MAR) se jfittex li jesplora sa liema punt dawn id-dispożizzjonijiet leġislattivi jikkunsidraw ir-restrizzjonijiet fuq l-SMEs u fuq is-“Swieq għat-tkabbir”.
Azzjoni Prijoritarja 2
Permezz ta’ valutazzjoni tal-impatt, il-Kummissjoni se tinvestiga jekk l-emendi fil-mira għal-leġiżlazzjoni rilevanti tal-UE jistgħux iwasslu għal ambjent regolatorju aktar proporzjonat biex jappoġġa l-elenkar tal-SMEs fis-swieq pubbliċi, li jista’ jwassal għal bidliet immirati fil-leġiżlazzjoni settorjali fit-tieni kwart tal-2018.
Ditti ta’ investiment li jipprovdu firxa ta’ servizzi li jagħtu lill-investituri aċċess għal swieq tat-titoli u tad-derivattivi permezz ta’ pariri dwar l-investiment, immaniġġjar tal-portafoll, senserija, eżekuzzjoni tal-ordnijiet, negozjar għan-nom proprju, sottoskrizzjoni eċċ. Il-Programm Qafas tal-UE li jirregolaw l-awtorizzazzjoni u t-twettiq tagħhom huwa stipulat fil-MiFID. Barra minn hekk, huma soġġetti għal regoli prudenzjali taħt is-CRR/CRD. B’mod aktar effettiv il-qafas prudenzjali u superviżorju kkalibrat għad-daqs u n-natura tad-ditti ta’ investiment għandhom jerġgħu jdaħħlu l-kundizzjonijiet ekwi, jagħtu spinta lill-kompetizzjoni u jtejbu l-aċċess tal-investituri għal opportunitajiet ġodda u modi aħjar ta’ ġestjoni tar-riskji tagħhom. Għalhekk għandu jiġi żgurat li kull rilokazzjoni ma tkunx immotivata minn arbitraġġ regolatorju jew minn differenzi fil-qafas superviżorju.
Azzjoni Prijoritarja 3
Il-Kummissjoni se tippreżenta proposta leġiżlattiva biex tirrieżamina t-trattament prudenzjali tad-ditti tal-investiment fir-raba’ kwart tal-2017.
4.3.Naħfnu l-potenzjal ta’ FinTech
Il-Kummissjoni qed tivvaluta kif FinTech tista’ tikkontribwixxi għal approfondiment u għat-twessiegħ tas-swieq tal-kapital tal-UE billi tintegra il-potenzjal tad-diġitalizzazzjoni biex jinbidlu l-mudelli tan-negozju permezz ta’ soluzzjonijiet xprunata mid-dejta fil-ġestjoni tal-assi, intermedjazzjoni tal-investiment u distribuzzjoni tal-prodott.
Negozji innovattivi, irrispettivament minn jekk ikunux ġodda jew diġà stabbiliti fis-suq, iqajmu tħassib li prattiki superviżorji nazzjonali jistgħu jillimitaw il-ħila tagħhom li jinnovaw u li joffru servizzi transfruntieri. B’mod partikolari, ditti innovattivi jargumentaw li huma soġġetti għal prattiki sproporzjonata jew inkonsistenti fl-applikazzjoni tar-rekwiżiti regolatorji.
Dan l-aħħar, ir-regolaturi u s-superviżuri f’xi Stati Membri żviluppaw metodi biex jappoġġaw l-iżvilupp ta’ negozji innovattivi billi jaħdmu magħhom biex jifhmu kwistjonijiet speċifiċi. Dawn l-inizjattivi — li jissejħu “ambjenti ta' sperimentazzjoni regolatorja” — jinkludu ċentri li jipprovdu gwida dwar ir-regolamentazzjoni applikabbli u l-assistenza superviżorja diretta filwaqt li dawn id-ditti qed jittestjaw l-attivitajiet tagħhom.
Barra minn hekk, saru sforzi biex tkun rikonoxxuta l-eżistenza ta’ kumpaniji FinTech u biex ikun introdott approċċ bilanċjat għal kumpaniji FinTech f’leġiżlazzjoni riċenti, bħad-Direttiva dwar is-Servizzi ta’ Pagament (PSD 2).
Il-konsultazzjoni pubblika li għaddejja bħalissa dwar FinTech imnedija fit-23 ta’ Marzu 2017 se tipprovdi input ta’ valur lill-Kummissjoni dwar:
·jekk humiex meħtieġa, arranġamenti ta’ liċenzjar ġodda u aktar proporzjonati għal attivitajiet u kumpaniji FinTech f’oqsma bħalma huma l-finanzjament kollettiv ibbażat fuq is-self u fuq l-investiment;
·kif għandhom jiġu appoġġati kumpaniji FinTech, irreġistrati f’wieħed mill-pajjiżi tal-UE, li jagħmlu kummerċ transfruntier mingħajr ma jkunu jeħtieġu awtorizzazzjoni ulterjuri f’kull pajjiż tal-UE (“passaportar”).
Azzjoni Prijoritarja 4
Bħala parti minn approċċ komprensiv biex jippermetti FinTech, il-Kummissjoni se tivvaluta l-każ għal qafas ta’ passportar u ta’ liċenzjar tal-UE għal attivitajiet FinTech fir-raba’ kwart tal-2017.
4.4.Permezz tas-swieq tal-kapital biex isaħħaħ is-self tal-banek u l-istabbiltà
Is-swieq tal-kapital jistgħu wkoll jgħinu lill-banek Ewropej sabiex jingħelbu l-isfidi ta’ self mhux produttiv (NPLs) li qed ikollhom effett negattiv fuq xi sistemi bankarji nazzjonali. NPLs jkollhom impatt negattiv sinifikanti fuq il-profittabbiltà tal-banek u l-kapaċità tagħhom li jsellfu, inkluż lill-SMEs.
Il-politiki li għandhom l-għan li jtejbu l-funzjonament ta’ swieq sekondarji għall-NPLs huma parti ewlenija ta’ kwalunkwe soluzzjoni durabbli. Din is-soluzzjoni tista’ tinkludi passi li jippromwovu aktar prevedibbiltà u trasparenza li jippermettu lix-xerrejja potenzjali fis-suq sekondarju tal-NPLs li jipprezzaw b’mod aktar preċiż dawk l-assi.
Din tippermetti wkoll li l-banek ibiegħu l-NPLs tagħhom lil ġabra akbar ta’ investituri li potenzjalment iwassal għal prezzijiet ta’ tranżazzjoni li jirriflettu aħjar il-valur tal-assi sottostanti. Dan se jwassal għal karti bilanċjali mnaddfa u istituzzjonijiet ta’ kreditu mħejjija aħjar biex ikunu jistgħu jipprovdu fluss ta’ kreditu ġdid lill-ekonomija.
Is-servizzi tal-Kummissjoni dalwaqt se jniedu konsultazzjoni pubblika dwar oqsma potenzjali ta’ azzjoni tal-UE bħalma huma is-servizzjar tas-self minn partijiet terzi (jiġifieri partijiet oħra għajr il-mutwanti) u t-trasferiment ta’ self, anki lil entitajiet mhux bankarji.
Il-ġestjoni tal-NPLs tibbenefika wkoll minn eżekuzzjoni tas-self aktar effiċjenti u aktar prevedibbli u minn oqfsa ta’ insolvenza imfassla biex jippermettu l-irkupru tal-valur rapidu mill-kredituri garantiti. L-eżerċizzju ta’ parametraġġ referenzjarju li għaddej bħalissa se jitlesta fir-raba’ kwart tal-2017. Dan se jitfa’ dawl fuq il-karatteristiċi tas-sistemi ta’ eżekuzzjoni/ insolvenza li jikkontribwixxu għal eżiti aħjar/ agħar.
Ix-xogħol tal-parametraġġ referenzjarju qiegħed jissottolinja wkoll l-isfidi li qed iħabbtu wiċċhom magħhom il-banek u kredituri ipotekarji oħra kkawżati min-nuqqas ta’ effiċjenza fl-oqfsa legali għall-eżekuzzjoni tal-kollateral sabiex jirkupraw il-valur minn self improduttiv. Hemm ambitu għat-tisħiħ tal-kapaċità tal-kredituri ipotekarji li jirkupraw il-valur minn kollateral ipotekat fuq self lil korporattivi u intraprendituri, fuq il-bażi tal-esperjenza ta’ xi Stati Membri b’modi li ma jeħtiġux tbagħbis tas-sistemi ta’ proċedimenti ta’ insolvenza u ta’ qabel l-insolvenza nazzjonali u li huwa konsistenti mal-objettivi tal-proposta ta’ ristrutturar u tat-tieni opportunità.
Bħala parti mill-isforzi tagħha biex tindirizza l-kwistjoni ta’ self improduttiv, il-Kummissjoni se tippreżenta miżuri biex jappoġġaw swieq sekondarji għal self improduttiv. Barra minn hekk, il-Kummissjoni se tniedi valutazzjoni tal-impatt bil-ħsieb li tiġi kkunsidrata inizjattiva leġiżlattiva possibbli biex isaħħaħ l-kapaċità ta’ kredituri ipotekarji li jirkupraw il-valur minn self iggarantit lil korporazzjonijiet u intraprendituri (Q1 2018), filwaqt li tibqa’ konsistenti mal-proposta tal-Kummissjoni ta’ Novembru 2016 dwar il-funzjonament effettiv tas-sistemi ta’ ristrutturar/qabel l-insolvenza u kumplimentari magħha u tagħmel l-almu tagħha kollu biex tappoġġa lill-koleġiżlaturi biex jintlaħaq ftehim dwar din il-proposta bħala prijorità.
4.5.Tissaħħaħ it-tmexxija tal-UE fuq l-investiment sostenibbli
Kemm l-Aġenda 2030 tan-NU għall-Iżvilupp Sostenibbli u wkoll il-Ftehim ta’ Pariġi jagħmluha ċara li r-riforma tas-sistema finanzjarja hija ċentrali biex tpoġġi l-ekonomiji tagħna fuq it-triq ta’ tkabbir sostenibbli. L-orjentazzjoni mill-ġdid tal-flussi ta’ kapital privat għal investimenti aktar sostenibbli, teħtieġ li nifformulaw mill-ġdid l-qafas finanzjarju tagħna b’mod komprensiv u profond.
Id-deċiżjonijiet ta’ investiment ta’ terminu twil jenħtieġ li jintegraw riskji u redditi usa’, inklużi dawk marbuta mal-esternalitajiet ambjentali jew soċjali oħra.
L-indirizzar tar-riskji relatati mal-klima u l-ambjent huwa importanti wkoll għal sistema finanzjarja stabbli. Għal dan l-għan, il-Kummissjoni waqqfet Grupp ta’ Livell Għoli ta’ Esperti dwar finanzjament sostenibbli biex tiżviluppa programm ta’ politika Ewropea. Il-grupp se jippubblika r-rakkomandazzjonijiet tiegħu għal strateġija globali u komprensiva tal-UE dwar finanzi sostenibbli sa Diċembru 2017.
Is-swieq finanzjarji huma dejjem aktar adatti biex jiddifferenzjaw bejn investimenti sostenibbli u oħrajn. Il-bonds ħodor huma fuq quddiem. Fondi ta’ impatt soċjali u l-oriġinazzjoni u l-ippakkjar ta’ mutwi ipotekarji ta’ effiċjenza enerġetika huma eżempji oħrajn. L-iżvilupp pożittiv ta’ dawn is-swieq għand jkun appoġġat permezz ta’ miżuri fil-livell tal-UE biex titjieb il-fiduċja fir-rigward tal-implimentazzjoni tal-proġetti, id-divulgazzjoni u t-tikketti, u tipprovdi r-rikonoxximent regolatorju xieraq ta’ kwalunkwe osservazzjoni ta’ titjib fil-prestazzjoni tar-redditi tar-riskju ta’ dawn l-assi.
Il-Kummissjoni dalwaqt se tippubblika linji gwida mhux vinkolanti li se jipprovdu lill-kumpanniji metodoloġija bbażata fuq il-prinċipji biex jgħinuhom jikkonformaw mal-leġiżlazzjoni eżistenti tal-UE dwar ir-rekwiżiti ta’ rappurtar mhux finanzjarju. Dawn il-linji gwida jibnu fuq oqfsa tematiċi jew settorjali, bħalma huma r-rakkomandazzjonijiet tat-Task Force FSB dwar Divulgazzjoni Finanzjarja Relatata mal-Klima (TCFD - Task Force on Climate-related Financial Disclosures) li jistgħu jkunu utli għad-divulgazzjoni ta’ informazzjoni mhux finanzjarja.
Fil-kuntest tal-konsultazzjoni għar-rieżami ta’ nofs it-terminu tas-CMU, il-Kummissjoni kienet imħeġġa biex tirrifletti dwar il-passi li jistgħu jitnedew issa biex tibda l-kalibrazzjoni mill-ġdid tal-qafas ta’ politika finanzjarja tal-UE. Eżempji ta’ kwistjonijiet li kienu identifikati jinkludu:
·kjarifika li l-obbligi fiduċjarji tas-sidien tal-assi u tal-maniġers tal-assi jinkludu l-integrazzjoni ta’ kunsiderazzjonijiet Ambjentali, Soċjali u ta’ Governanza (ESG- Environmental, Social and Governance) fit-teħid tad-deċiżjonijiet;
·li jkun żgurat li s-sostenibbiltà hija aktar ċentrali għall-governanza korporattiva;
·il-promozzjoni ta’ integrazzjoni aħjar tal-prestazzjoni ESG fil-klassifikazzjonijiet tal-emittent u fil-parametri referenzjarji ewlenin tas-suq.
Ir-rieżami tal-qafas tal-Fond Ewropew għal Investimenti Strateġiċi (FEIS) qiegħed ukoll jitfa’ aktar enfasi fuq il-kisba tal-objettivi ambjentali u soċjali tal-UE. Il-kapital privat, il-finanzjament tal-FEIS u fondi oħrajn tal-UE għandhom jiġu kkombinati b’mod effiċjenti għaċ-ċaqliq tal-investimenti lejn dawk l-esternalitajiet soċjali u ambjentali pożittivi, biex b’hekk, jikkontribwixxu lejn l-ilħuq tal-objettivi tal-Pilastru Ewropew tad-Drittijiet Soċjali riċenti.
Azzjoni Prijoritarja 6
Sa mhux aktar tard mill-ewwel kwart tal-2018, il-Kummissjoni se tiddeċiedi dwar is-segwitu konkret li se tagħti għar-rakkomandazzjonijiet tal-Grupp ta’ Esperti ta’ Livell Għoli dwar Finanzi Sostenibbli. B’mod partikolari, hija diġà bdiet taħdem biex tħejji miżuri biex ittejjeb id-divulgazzjoni u tintegra aħjar is-sostenibbiltà/ESG fil-metodoloġiji ta’ klassifikazzjoni u fil-proċessi superviżorji, kif ukoll fil-mandati ta’ investiment ta’ investituri istituzzjonali u maniġers tal-assi. Hija se tiżviluppa wkoll approċċ għal kunsiderazzjonijiet ta’ sostenibbiltà f’rieżamijiet leġiżlattivi futuri tal-leġiżlazzjoni finanzjarja.
4.6.Investimenti transfruntier
Il-fondi ta’ investiment fl-UE għadhom żgħar u anqas kosteffiċjenti milli f’xi ġurisdizzjonijiet oħra, filwaqt li d-distribuzzjoni tal-fondi tibqa’ limitata ġeografikament. L-evidenza miġbura matul il-konsultazzjoni pubblika turi li raġuni ewlenija għal dan hija n-nuqqas ta’ konverġenza regolatorja u superviżorja, inklużi rekwiżiti nazzjonali diverġenti dwar l-użu ta’ passaport ta’ kummerċjalizzazzjoni skont id-Direttivi UCITS u AIFM. Distribuzzjoni transfruntiera akbar, b’mod partikolari distribuzzjoni diġitali transfruntiera tippermetti li l-fondi jikbru, talloka l-kapital b’mod aktar effiċjenti madwar l-UE, u tippermetti kompetizzjoni fis-swieq nazzjonali biex twassal għal valur aħjar u aktar innovazzjoni.
L-ostakli għad-distribuzzjoni transfruntiera tal-fondi ta’ investiment kienu wkoll identifikati mill-Kummissjoni u minn grupp ta’ esperti ta’ rappreżentanti tal-Istati Membri. Ir-riżultat kien pjan direzzjonali ta’ miżuri endorsjati mill-Istati Membri f’Mejju 2017 sabiex jiġu indirizzati l-ewwel sensiela ta’ ostakli identifikati u biex jiġu identifikati u jitneħħew l-ostakoli potenzjali oħra f’oqsma rilevanti għas-CMU.
Barra mill-fondi ta’ investiment, il-pjan direzzjonali fih miżuri f’oqsma oħra bħalma huma proċeduri ta’ taxxa minn ras l-għajn.
Azzjoni Prijoritarja 7
Il-Kummissjoni se tniedi valutazzjoni tal-impatt bil-ħsieb li tikkunsidra proposta leġiżlattiva possibbli sabiex tkun iffaċilitata id-distribuzzjoni transfruntiera u s-superviżjoni ta’ UCITS u AIFs fl-ewwel kwart tal-2018.
Ambjent ta’ investiment stabbli huwa kruċjali biex tinkoraġġixxi aktar l-investiment fl-UE. Aktar ċarezza dwar l-istandards sostantivi eżistenti tal-UE hija partikolarment importanti għall-investituri tal-UE, l-amministrazzjonijiet nazzjonali, il-partijiet ikkonċernati kif ukoll għall-imħallfin tal-qrati nazzjonali. Dan għandu jiżgura aktar trasparenza dwar il-protezzjoni effettiva tad-drittijiet tal-investituri tal-UE fis-suq uniku.
Trattati bilaterali dwar l-investiment bejn l-Istati Membri jistabbilixxu standards ta’ trattament differenti barra mill-qafas legali tal-UE għall-investiment transfruntier fis-suq uniku. Dawn huma inkompatibbli mal-liġi tal-UE. Il-Kummissjoni qed tkompli bil-proċeduri ta’ ksur fir-rigward ta’ trattati intra-UE dwar investiment bilaterali (BITs). Barra minn hekk, il-Kummissjoni qed tivvaluta wkoll alternattivi biex jiġi stabbilit qafas ta’ riżoluzzjoni amikevoli ta’ tilwim dwar l-investiment.
Azzjoni Prijoritarja 8
Fl-ewwel kwart tal-2018, il-Kummissjoni se tadotta Komunikazzjoni interpretattiva li tipprovdi gwida dwar ir-regoli eżistenti tal-UE dwar it-trattament ta’ investimenti transfruntiera.
Hija se tniedi wkoll minnufih valutazzjoni tal-impatt bil-ħsieb li tistabbilixxi qafas adegwat għar-riżoluzzjoni amikevoli ta’ tilwim dwar l-investiment.
|
4.7.Appoġġ għall-iżvilupp ta’ ekosistemi lokali tas-suq tal-kapital
Biex il-finanzjament ibbażat fuq is-suq ikun vijabbli u sostenibbli bħala alternattiva tas-self bankarju, is-CMU jeħtieġ li jibni ċirkwiti finanzjarji, konvenzjonijiet tas-suq u infrastrutturi tekniċi u legali. Dawn se jippermettu lill-parteċipanti fis-suq li joperaw fuq livell lokali, reġjonali jew nazzjonali, kif ukoll li jwettqu tranżazzjonijiet b’aktar kunfidenza fuq skala pan-Ewropea.
Il-maturità tas-swieq tal-kapital tvarja b’mod konsiderevoli fost il-pajjiżi. Hemm bżonn li titwessa’ l-firxa ġeografika tas-swieq tal-kapital sabiex l-Istati Membri kollha jaħsdu l-benefiċċji ta’ swieq tal-kapital approfonditi u aktar integrati. Hawnhekk l-akbar sfidi jħabbtu wiċċhom magħhom l-Istati Membri mill-Ewropa Ċentrali, tal-Lvant u tax-Xlokk (CESEE).
Biex tappoġġa l-iżvilupp ta’ swieq lokali u tgħinu biex issaħħaħ l-ekosistemi tas-suq tal-kapital permezz ta’ assistenza teknika, il-Kummissjoni qiegħda taħdem b’mod attiv ma’ numru dejjem jikber ta’ Stati Membri.
Id-diskussjonijiet li saru mill-Kummissjoni bl-Inizjattiva ta’ Vjenna, li tappoġġa l-investiment fir-reġjun CESEE u lil hinn minnu, wasslet għal Grupp ta’ Ħidma CMU li ġie stabbilit f’Marzu 2017. Sa tmiem l-2017 il-Grupp ta’ Ħidma se joħroġ rapport li jidentifika l-aktar oqsma importanti ta’ ħidma u jipproponi soluzzjonijiet għal aktar żvilupp tas-swieq tal-kapital.
Il-Kummissjoni se tkompli tappoġġa b’qawwa sforzi biex titwessa’ l-firxa ġeografika tas-swieq tal-kapital permezz ta’ prossimità u soluzzjonijiet lokali għal finanzjament tal-SMEs. Ħidma ewlenija biex jintlaħqu dawn l-objettivi huwa l-għoti ta’ appoġġ tekniku lill-Istati Membri permezz tal-Programm ta’ Appoġġ għal Riformi Strutturali. Il-programm se jikkontribwixxi għar-riformi strutturali istituzzjonali, amministrattivi u li jtejbu t-tkabbir fl-Istati Membri billi tipprovdi appoġġ lill-awtoritajiet nazzjonali. Taħt dan il-programm, il-Kummissjoni s’issa rċeviet aktar minn ħamsin talba għal appoġġ tekniku fis-settur finanzjarju minn tlettax-il Stat Membru, b’enfasi qawwija fuq l-appoġġ għall-iżvilupp ta’ swieq tal-kapital.
Azzjoni Prijoritarja 9
Sat-tieni kwart tal-2018, il-Kummissjoni se tipproponi strateġija komprensiva tal-UE dwar passi li jistgħu jittieħdu fil-livell tal-UE biex jappoġġaw il-kapaċità lokali u reġjonali fl-iżvilupp tas-suq tal-kapital madwar l-UE. Dan se jibni fuq ir-rapport tal-Grupp ta’ Ħidma CMU tal-Inizjattiva ta’ Vjenna u se jikkunsidra l-esperjenza permezz tal-provvediment dejjem jikber tal-appoġġ tekniku “on-demand” taħt il-Programm ta’ Appoġġ għar-Riforma Strutturali tal-Kummissjoni.
5.Konklużjoni: Jixpruna riforma b’impatt durabbli
Is-CMU tfittex li toħloq il-kundizzjonijiet abilitanti sabiex il-forom il-ġodda ta’ finanzjament jkunu jistgħu jiġu żviluppati u msaħħa għan-negozji, b’mod partikolari kumpaniji żgħar, u għall-investiment fit-tul u fl-infrastruttura. Hija għandha l-għan li tuża l-innovazzjonijiet finanzjarji biex timla l-lakuna ta’ informazzjoni bejn l-investituri u n-negozji u tipprovdi opportunitajiet ta’ investiment aktar kosteffettivi lill-investituri fil-livell ta’ konsumatur. Is-CMU tfittex ukoll li timmobilizza l-kapital privat biex tiffinanzja l-investiment sostenibbli billi tidentifika modi biex toħloq regolamentazzjoni finanzjarja li taċċellera iċ-ċaqliq ta’ kapital privat minn proġetti li mhumiex sostenibbli ambjentalment u soċjalment għal proġetti sostenibbli.
Is-CMU tfittex li tegħleb id-dipendenza tal-ekonomija tal-UE fuq is-self mill-banek billi tipprovdi sistema aktar diversifikata li fiha l-finanzjament mhux bankarju jikkomplementa b’mod effiċjenti l-finanzjament bankarju tradizzjonali.
Dan iżid l-ammonti disponibbli biex jiffinanzja l-ekonomija tal-UE. Minħabba li s-CMU tinvolvi l-ibbilanċjar wiesgħa tas-sistema finanzjarja tal-UE, tali tibdil strutturali profond jeħtieġ iż-żmien biex jissawwar u jissoda lilu nnifsu.
Riforma regolatorja hija parti waħda biss mill-bidla li hija meħtieġa. Hemm bżonn iż-żmien biex jinbnew iċ-ċirkwiti finanzjarji, il-konvenzjonijiet tas-suq u l-infrastrutturi tekniċi u legali li jippermettu li l-parteċipanti fis-suq joperaw b’mod aktar effiċjenti.
Il-Kummissjoni b’mod konsistenti wettqet l-impenji tagħha fil-pjan ta’ azzjoni tas-CMU ta’Settembru 2015, f’konformità mal-iskeda ta’ żmien oriġinali. L-għan ta’ dan il-proġett huwa li jġib bidla u b’hekk jinħoloq finanzjament tas-suq tal-kapital aktar żviluppat u aktar effiċjenti. Huwa notevolment ippreżenta proposti biex ikunu żviluppati s-swieq tal-kapital ta’ riskju; jagħmilha aktar faċli u irħas għall-kumpaniji biex ikollhom aċċess għas-swieq pubbliċi billi jiġu riveduti r-regoli dwar il-prospetti; ineħħi t-trattament fiskali preferenzjali tad-dejn fuq l-ekwità; jippromwovi suq tat-titolizzazzjoni sikur u likwidu; u jagħti li intraprendituri onesti l-opportunità biex jirristrutturaw jew it-tieni opportunità fil-każ ta’ falliment. Il-Kummissjoni adottat ukoll miżuri biex jappoġġjaw l-investiment fl-infrastruttura minn kumpaniji tal-assigurazzjoni u banek.
Wara x-xogħol ta’ tħejjija komprensiv mħabbar fil-Pjan ta’ Azzjoni oriġinali, il-Kummissjoni dalwaqt se tagħmel proposti għal prodott tal-pensjoni personali tal-UE sempliċi, effiċjenti u kompetittiv, għat-tneħħija ta’ ostakoli transfruntieri ta’ pussess ta’ titoli u ta’ bonds koperti.
Fost il-prijoritajiet ġodda tar-Rieżami ta’ nofs it-terminu tas-CMU, il-Kummissjoni se jkollha l-għan li ssaħħaħ il-qafas superviżorju għas-swieq tal-kapital, biex ittejjeb il-proporzjonalità tar-regoli għal kumpanniji żgħar elenkati kif ukoll għal ditti ta’ investiment, biex tneħħi ostakoli ulterjuri għal investiment transfruntier, li jsaħħaħ it-tmexxija tal-UE dwar finanzi sostenibbli, u biex jabilitaw FinTech.
Ir-reviżjoni ta’ nofs it-terminu tistabbilixxi aġenda ta’ riforma komprensiva b’tali mod li l-elementi kostitwenti tas-CMU jkunu f’posthom sal-2019. Dan se jankra l-kundizzjonijiet abilitanti li jirriformaw is-sistema finanzjarja tal-UE, li tinvolvi l-ibbilanċjar mill-ġdid tat-taħlita bejn il-finanzjament bankarju u dak mhux bankarju.
Dawn il-passi se jiżguraw ukoll li s-swieq tal-kapital tal-UE jkunu jistgħu jwieġbu għal sfidi ġodda, li jinkludu t-tluq tar-Renju Unit mis-Suq Uniku.
Is-suċċess tas-CMU se jiddependi fuq il-livell ta’ impenn politiku mill-Parlament Ewropew u mill-Istati Membri u kif il-parteċipanti tas-suq jagħmlu użu mill-elementi kostitwenti. L-industrija trid tagħmel il-parti tagħha biex il-klijenti tagħha jerġgħu jafdawha u tinbena l-fiduċja fis-swieq tal-kapital madwar l-UE.
Il-Kummissjoni se tirrapporta regolarment lill-Parlament Ewropew u lill-Kunsill dwar il-progress tagħha. Dawn ir-rapporti għandhom iservu bħala bażi għal djalogu msaħħaħ bejn l-istituzzjonijiet li jiżgura li jsir progress sinifikanti fuq miżuri ta’ prijorità proposti taħt il-leġislatura attwali.
Anness — ħarsa ġenerali lejn l-elementi kostitwenti għas-CMU li għandhom ikunu fil-post sal-2019
Dan l-Anness jagħti ħarsa ġenerali lejn il-miżuri li għandhom l-għan li jistabbilixxu s-sisien għas-CMU sal-2019. Huwa jinkludi miżuri ta’ prijorità mir-Rieżami ta' nofs it-terminu, segwitu tal-impenji eżistenti u għadd ta’ miżuri ġodda.
Aktar informazzjoni dettaljata dwar dawn il-miżuri kollha hija pprovduta fid-Dokument ta’ Ħidma tal-Persunal tal-Kummissjoni (Analiżi Ekonomika) li jakkumpanja din il-Komunikazzjoni. It-tabelli ta’ hawn taħt jindikaw ukoll — fejn diġà stabbiliti — jekk miżura tieħux il-forma ta’ proposta leġiżlattiva (L), miżura ta’ livell 2 (L2), miżura nonleġiżlattiva (NL), jew Komunikazzjoni tal-Kummissjoni (C).
Tisħiħ tal-kapaċità tas-swieq tal-kapital tal-UE
|
Superviżjoni
|
Tipproponi emendi fit-tħaddim tal-ESMA u ta’ ESAs oħra biex tiġi promossa l-effikaċja ta’ superviżjoni konsistenti madwar l-UE u lil hinn minnha (azzjoni prijoritarja 1)
|
Azzjoni Prijoritarja (L)
|
Q3 2017
|
Tiżviluppa swieq tal-kapital lokali u reġjonali
|
Strateġija komprensiva tal-UE dwar l-iżviluppi tas-suq tal-kapital lokali u reġjonali madwar l-UE (azzjoni prijoritarja 9)
|
Azzjoni Prijoritarja (NL)
|
Q2 2018
|
Finanzjament għall-innovazzjoni, kumpaniji emerġenti u kumpaniji mhux elenkati
|
Pjattaformi innovattivi ta’ finanzi korporattivi
|
Valutazzjoni tal-każ għal qafas ta’ liċenzjar u passportar tal-UE għall-attivitajiet FinTech (azzjoni prijoritarja 4)
|
Azzjoni Prijoritarja
|
Q4 2017
|
|
Rapport dwar l-aħjar prassi fil-finanzjament tal-katina ta’ provvista
|
Azzjoni ġdida (NL)
|
Q4 2018
|
L-investituri informali (business angels) u l-finanzjament ta’ riskju
|
Prattika tajba dwar skemi ta’ inċentivi fiskali għall-kapital ta’ riskju u l-investiment minn investitur informali
|
Azzjoni ta’ segwitu (NL)
|
2017-18
|
Pjazzamenti privati
|
Rakkomandazzjoni dwar il-promozzjoni tal-aħjar prattika
|
Azzjoni ta’ segwitu (NL)
|
Q4 2017
|
L-ostakli għall-informazzjoni għall-finanzjament tal-SMEs
|
L-għażla tal-proposti wara s-Sejħa għal proposti biex ikunu iffinanzjati proġetti ta’ bini tal-kapaċità fil-programm Orizzont 2020.
|
Azzjoni ta’ segwitu (NL)
|
Q4 2017
|
Faċilitazzjoni għad-dħul u l-ġbir ta' kapital għall-kumpaniji mis-swieq pubbliċi
|
Il-prospetti għal offerti lill-pubbliku
|
Miżuri ta’ implimentazzjoni
|
Azzjoni ta’ segwitu (L2)
|
2018-2019
|
Swieq tal-bonds korporattivi
|
Komunikazzjoni (pjan direzzjonali) biex tipproponi segwitu possibbli
|
Azzjoni ta’ segwitu (C)
|
Q4 2017
|
Il-pakkett għall-elenkar tal-SMEs
|
Tinvestiga, permezz ta’ valutazzjoni tal-impatt, jekk emendi mmirati għal-leġiżlazzjoni rilevanti tal-UE jistgħux irendu ambjent regolatorju aktar proporzjonat biex jappoġġjaw l-elenkar tal-SMEs fis-swieq pubbliċi (azzjoni prijoritarja 2)
|
Azzjoni Prijoritarja
|
Q2 2018
|
|
Il-valutazzjoni tal-impatt ta’ regoli tal-livell 2 tal-MiFID II dwar riċerka tal-ekwità ta’ SMEs elenkati
|
Azzjoni ġdida (NL)
|
Q1 2019
|
|
Timmonitorja l-progress dwar l-impenn mill-IASB biex ittejjeb -id-divulgazzjoni, l-aċċessibbiltà u l-użu tal-IFRS
|
Azzjoni ta’ segwitu (NL)
|
Għaddejja bħalissa
|
|
Jiġu żviluppati l-aħjar prattiki dwar l-użu mill-Istati Membri ta’ fondi tal-UE biex jiffinanzjaw parzjalment il-kostijiet imġarrba mill-SMEs meta jkunu qed ifittxu l-ammissjoni tal-ishma tagħhom fuq is-Swieq ta’ Tkabbir tal-SMEs futuri.
|
Azzjoni ġdida (NL)
|
Q2 2018
|
Rekwiżiti prudenzjali proporzjonati
|
Proposta leġiżlattiva biex tittejjeb il-proporzjonalità tar-regoli prudenzjali għad-ditti tal-investiment (azzjoni prijoritarja 3)
|
Azzjoni Prijoritarja (L)
|
Q4 2017
|
Investiment fit-tul, l-infrastruttura u l-investiment sostenibbli
|
Investiment ta’ terminu twil
|
Valutazzjoni tal-ixprunaturi ta’ investimenti fil-kapital minn kumpaniji tal-assigurazzjoni u fondi tal-pensjoni
|
Azzjoni ġdida (NL)
|
Q4 2018
|
|
L-emenda tat-trattament prudenzjali tal-ekwità privata u tad-dejn korporattiv bi pjazzament privat fis-Solvibbiltà II
|
Azzjoni ta’ segwitu (L2)
|
Q3 2018
|
|
L-irrapportar dwar jekk it-trattament kontabilistiku ta’ strumenti azzjonarji fl-IFRS 9 jwassalx, b’mod suffiċjenti, għal finanzjament fuq terminu twil.
|
Azzjoni ġdida (NL)
|
Q2 2018
|
Investimenti fl-infrastruttura
|
Miżuri biex ikun rieżaminat l-kalibrar tar-riskju għall-korporattivi tal-infrastruttura
|
Azzjoni ta’ segwitu (L2)
|
Q2 2017
|
Investiment sostenibbli
|
Id-deċiżjoni dwar segwitu konkret għar-rakkomandazzjonijiet tal-Grupp ta’ Esperti ta’ Livell Għoli dwar finanzi sostenibbli (azzjoni prijoritarja 6)
|
Azzjoni Prijoritarja
|
Q1 2018
|
It-trawwim tal-investiment fil-livell tal-konsumatur
|
Pensjonijiet personali
|
Proposta leġiżlattiva dwar prodott tal-pensjoni personali pan-Ewropew
|
Azzjoni ta’ segwitu (L)
|
Q2 2017
|
Is-swieq tal-prodotti ta’ investiment fil-livell tal-konsumatur
|
Segwitu għal studju dwar sistemi ta’ distribuzzjoni ta’ prodotti ta’ investiment fil-livell tal-konsumatur madwar l-UE. Rapportar rikorrenti mill-ESAs tal-kost u tal-prestazzjoni tal-kategoriji prinċipali ta’ investiment fil-livell tal-konsumatur fuq medda twila ta’ żmien u prodotti tal-pensjoni. Studju tal-fattibbiltà dwar l-iżvilupp ta’ sistema ċentralizzata għal rekwiżiti obbligatorji ta’ divulgazzjoni u servizzi relatati.
|
Azzjoni ta’ segwitu (NL)
|
Q2 2018
|
L-involviment tal-investitur fil-livell ta’ konsumatur
|
Abbażi tal-esperjenza tal-Istati Membri bil-Kont tat-Tfaddil għall-Investiment u studju eżistenti dwar skemi għas-sjieda tal-ishma tal-impjegati, l-iżvilupp tal-aħjar prassi
|
Azzjoni ġdida (NL)
|
Q1 2019
|
It-tisħiħ tal-kapaċità bankarja għall-appoġġ ta’ ekonomija usa’
|
Finanzjament tas-suq għal banek
|
Emendi għar-Regolament ta’ Delega tal-Kummissjoni tkun introdotta STS tat-titolizzazzjoni bi trattament prudenzjali speċifiku f’Solvibbiltà II
|
Azzjoni ta’ segwitu (L2)
|
Għaddejja bħalissa
|
|
Proposta leġiżlattiva għal qafas tal-UE dwar bonds koperti
|
Azzjoni ta’ segwitu (L)
|
Q1 2018
|
|
Tivvaluta l-każ għall-Politika Ewropea ta’ Noti għal self lil SMEs u self ta’ infrastruttura
|
Azzjoni ta’ segwitu
|
Q2 2018
|
Swieq sekondarji għal self improduttiv
|
Tippreżenta miżuri biex jiġi żviluppat suq sekondarju għal NPLs (azzjoni prijoritarja 5)
|
Azzjoni Prijoritarja (NL u L)
|
Q4 2017
|
|
Tniedi valutazzjoni tal-impatt bil-għan li tkun ikkunsidrata inizjattiva leġiżlattiva possibbli biex isaħħaħ il-kapaċità ta’ kredituri ipotekarji biex jirkupraw il-valur minn self ipotekarju lil korporazzjonijiet u intraprendituri (azzjoni prijoritarja 5)
|
Azzjoni Prijoritarja
|
Q1 2018
|
|
Studju ta’ valutazzjoni komparattiva tal-eżiti li jesperjenzaw il-banek taħt sistemi ta’ eżekuzzjoni tas-self (inkluża l-insolvenza) fil-ġestjoni ta’ self inadempjenti.
|
Azzjoni ta’ segwitu (NL)
|
Q4 2017
|
Tiffaċilita l-investiment transfruntier
|
Fondi ta’ investiment
|
Valutazzjoni tal-impatt bil-ħsieb li tkun ikkunsidrata proposta leġiżlattiva possibbli biex tiġi ffaċilitata d-distribuzzjoni transfruntiera ta' UCITS u AIFs (azzjoni prijoritarja 7)
|
Azzjoni Prijoritarja
|
Q1 2018
|
Infrastruttura tas-suq ta’ wara n-negozjar
|
Komunikazzjoni (pjan direzzjonali) biex jiġu indirizzati l-ostakli Giovannini li fadal u oħrajn
|
Azzjoni ta’ segwitu (C)
|
Q4 2017
|
|
Proposta leġiżlattiva li tispeċifika konflitt tal-liġijiet fir-regoli dwar l-effetti tal-partijiet terzi ta’ tranżazzjonijiet f’titoli u pretensjonijiet
|
Azzjoni ta’ segwitu (L)
|
Q4 2017
|
Tassazzjoni
|
Is-simplifikazzjoni tal-aħjar prattiki u l-kodiċi ta’ kondotta tal-proċeduri għat-taxxa minn ras l-għajn b’enfasi fuq ir-rifużjonijiet.
|
Azzjoni ta’ segwitu (NL)
|
Q4 2017
|
|
Studju dwar ostakli tat-taxxa diskriminatorji għall-investiment transfruntier minn fondi tal-pensjonijiet u assiguraturi tal-ħajja.
|
Azzjoni ta’ segwitu (NL)
|
Q4 2017
|
Governanza korporattiva
|
Minn pajjiż għall-ieħor jiġi ffaċilitat l-eżerċitar tad-drittijiet tal-azzjonist inkluż il-vot fl-implimentazzjoni tad-Direttiva dwar id-Drittijiet tal-Azzjonisti 2 ippubblikata fl-20 ta’ Mejju 2017.
|
Azzjoni ġdida (L2)
|
Q3 2018
|
Ostakli nazzjonali għall-moviment liberu tal-kapital
|
Il-monitoraġġ tal-implimentazzjoni tal-Pjan Direzzjonali dwar it-tneħħija tal-ostakli nazzjonali għall-moviment liberu tal-kapital u t-tkomplija tad-diskussjoni mal-Grupp Espert.
|
Azzjoni ta’ segwitu (NL)
|
Għaddejja bħalissa
|
L-istabbiltà tal-qafas regolatorju
|
Il-Komunikazzjoni interpretattiva biex tipprovdi gwida dwar l-istandards eżistenti tal-UE għat-trattament tal-investimenti transfruntier tal-UE (azzjoni prijoritarja 8)
|
Azzjoni Prijoritarja (C)
|
Q1 2018
|
|
Valutazzjoni tal-impatt bil-ħsieb li jkun stabbilit qafas adegwat għar-riżoluzzjoni amikevoli ta’ tilwim dwar l-investiment (azzjoni prijoritarja 8)
|
Azzjoni Prijoritarja
|
Q3 2017
|
Tisħiħ tal-kapaċità biex tiġi ppreservata l-istabbiltà finanzjarja
|
Ikun żgurat li l-BERS għandu l-kapaċità li jimmonitorja r-riskji potenzjali għall-istabbiltà finanzjarja li jirriżultaw minn finanzjament ibbażat fuq is-suq.
|
Azzjoni ta’ segwitu (L)
|
Q3 2017
|