Għajnuna finanzjarja lill-Greċja

 

SOMMARJU TA’:

Regolament (UE) Nru 472/2013 dwar it-tisħiħ tas-sorveljanza ekonomika u baġitarja tal-pajjiżi fiż-żona tal-euro li jesperjenzaw jew ikunu mhedda b’diffikultajiet finanzjarji gravi

Deċiżjoni ta’ Implimentazzjoni (UE) 2019/338 dwar l-estensjoni tas-sorveljanza msaħħa għall-Greċja

Deċiżjoni ta’ Implimentazzjoni (UE) 2018/1192 dwar l-attivazzjoni ta’ sorveljanza msaħħa għall-Greċja

X’INHU L-GĦAN TAR-REGOLAMENT U MINN XIEX TIKKONSISTI L-GĦAJNUNA FINANZJARJA LILL-GREĊJA?

• Ir-Regolament (UE) Nru 472/2013 huwa maħsub biex isaħħaħ is-sorveljanza ekonomika u baġitarja għall-pajjiżi taż-żona tal-euro li jesperjenzaw jew li jkunu mhedda b’diffikultajiet gravi fir-rigward tal-istabbilta finanzjarja tagħhom.
• Il-Greċja rċeviet appoġġ finanzjarju mill-pajjiżi taż-żona tal-euro u mill-Fond Monetarju Internazzjonali (FMI) biex tiffaċċja d-diffikultajiet finanzjarji u l-isfidi ekonomiċi tagħha minn Mejju 2010 sa Awwissu 2018. Wara l-konklużjoni b’suċċess tal-programm ta’ appoġġ għall-istabbiltà fl-20 ta’ Awwissu 2018, il-Greċja ġiet integrata bis-sħiħ fil-qafas tas-Semestru Ewropew tal-koordinazzjoni tal-politika ekonomika u soċjali. Fl-istess ħin, il-qafas tas-sorveljanza msaħħa * kien attivat għal Greċja kif ipprovdut mir-Regolament 472 tal-2013.

PUNTI EWLENIN

• L-ewwel programm ta’ aġġustament:
  • tħabbar mill-Grupp tal-Euro fit-2 ta’ Mejju 2010;
  • ipprovda EUR 52.9 biljun f’self bilaterali minn pajjiżi membri fiż-żona tal-euro lill-Greċja taħt il-Faċilità ta’ Self Griega;
  • il-FMI sellef ammont addizzjonali ta’ madwar EUR 20 biljun.
• It-tieni programm ta’ aġġustament:
  • ġie approvat mill-Grupp tal-Euro fid-9 ta’ Marzu 2012 u baqa’ għaddej sa ma skada f’Ġunju 2015;
  • ipprova self ta’ EUR 141.8 biljun mill-pajjiżi tal-membri taż-żona tal-euro permezz tal-Faċilità Ewropea ta’ Stabbiltà Finanzjarja (EFSF);
  • il-FMI sellef ammont addizzjonali ta’ madwar EUR 12-il biljun.
• It-tielet programm ta’ aġġustament:
  • beda fid-19 ta’ Awwissu 2015 u tlesta b’suċċess fl-20 ta’ Awwissu 2018 kif skedat;
  • ipprovda self sa EUR 86 biljun mill-MES.
• Qabel setgħu jinbdew in-negozjati mal-UE dwar it-termini tat-tielet programm ta’ aġġustament, il-Greċja kellha taqbel:
  • dwar riformi tal-VAT u tal-pensjonijiet;
  • li timplimenta d-Direttiva dwar l-irkupru u r-riżoluzzjoni tal-banek tal-UE;
  • li tissalvagwardja l-indipendenza tal-awtorità statistika tal-Greċja;
  • li tadotta kodiċi tal-proċedura ċivili.
• Barra minn hekk, il-Greċja qablet li:
  • terġa’ tikseb is-sostenibbiltà fiskali billi tirriforma s-sistemi tal-VAT u tal-pensjoni u tiġġieled l-evażjoni tat-taxxa;
  • tissalvagwardja l-istabbiltà finanzjarja permezz tar-rikapitalizzazzjoni tal-banek (jiġifieri tirristruttura d-dejn u l-ekwità tagħhom) u ssaħħaħ il-governanza tagħhom;
  • timplimenta riformi li jippromwovu t-tkabbir ekonomiku, il-ħolqien tal-impjiegi, il-kompetittività u l-investiment;
  • timmodernizza l-amministrazzjoni statali u pubblika, b’mod partikolari billi ttejjeb l-effiċjenza tas-sistema ġudizzjarja u ssaħħaħ il-ġlieda kontra l-korruzzjoni.
• Mal-konklużjoni b’suċċess tal-programm ta’ aġġustament, il-Kummissjoni Ewropea adottat id-Deċiżjoni ta’ Implimentazzjoni (UE)2018/1192 li attivat sorveljanza ekonomika u baġitarja msaħħa għall-Greċja, li daħlet fis-seħħ fil-21 ta’ Awwissu 2018. L-ewwel rapport dwar is-sorveljanza msaħħa dwar il-Ġreċja ġie ppubblikat f’Novembru 2018 u t-tieni wieħed fi Frar 2019. Id-Deċiżjoni ta’ Implimentazzjoni (UE) 2019/338 estendiet il-perjodu ta’ sorveljanza msaħħa għal perjodu ulterjuri ta’ 6 xhur mill-21 ta’ Frar 2019.

  Fil-5 ta’ Ġunju 2019, ġie ppubblikat it-tielet rapport ta’ sorveljanza msaħħa għall-Greċja.

MINN META JIBDA JAPPLIKA R-REGOLAMENT?

Dan ilu japplika mit-30 ta’ Mejju 2013.

SFOND

Għal aktar informazzjoni, ara:

• Għajnuna finanzjarja lill-Greċja (Kummissjoni Ewropea)
• Qafas ta’ sorveljanza msaħħa għall-Greċja (Kummissjoni Ewropea)
• Programm MES għall-Greċja (Mekkaniżmu Ewropew ta’ Stabbiltà).

TERMINI EWLENIN

DOKUMENTI EWLENIN

Ir-Regolament (UE) Nru 472/2013 tal-Parlament Ewropew u tal-Kunsill tal-21 ta’ Mejju 2013 dwar it-tisħiħ tas-sorveljanza ekonomika u baġitarja tal-Istati Membri fiż-żona tal-euro li jesperjenzaw jew ikunu mhedda b’diffikultajiet gravi fir-rigward tal-istabbiltà finanzjarja tagħhom (ĠU L 140, 27.5.2013, pp. 1-10)

Deċiżjoni ta’ Implimentazzjoni tal-Kummissjoni (UE) 2019/338 tal-20 ta’ Frar 2019 dwar l-estensjoni tas-sorveljanza msaħħa għall-Greċja (ĠU L 60, 28.2.2019, pp. 17-19)

Deċiżjoni ta’ Implimentazzjoni tal-Kummissjoni (UE) 2018/1192 tal-11 ta’ Lulju 2018 dwar l-attivazzjoni ta’ sorveljanza msaħħa għall-Greċja (ĠU L 211, 22.8.2018, pp. 1-4)

DOKUMENTI RELATATI

Deċiżjoni ta’ Implimentazzjoni tal-Kunsill (UE) 2015/1411 tal-19 ta’ Awwissu 2015 li tapprova l-programm ta’ aġġustament makroekonomiku tal-Greċja (ĠU L, 20.8.2015, pp. 12-16)

Deċiżjoni ta’ Implimentazzjoni tal-Kunsill (UE) 2015/1181 tal-19 ta’ Lulju 2015 dwar l-għoti ta’ assistenza finanzjarja għal żmien qasir mill-Unjoni lill-Greċja (ĠU L 192, 18.7.2015, pp. 15-18)

Deċiżjoni ta’ Implimentazzjoni tal-Kunsill (UE) 2015/1182 tal-19 ta’ Lulju 2015 li tapprova l-programm ta’ aġġustament tal-Greċja (ĠU L 192, 18.7.2015, p. 19)

l-aħħar aġġornament 24.07.2019