EUR-Lex Access to European Union law
This document is an excerpt from the EUR-Lex website
Document 32024R0358
Commission Delegated Regulation (EU) 2024/358 of 29 September 2023 supplementing Regulation (EU) 2020/1503 of the European Parliament and of the Council with regard to regulatory technical standards specifying requirements on credit scoring of crowdfunding projects, pricing of crowdfunding offers, and risk management policies and procedures
Regolament Delegat tal-Kummissjoni (UE) 2024/358 tad-29 ta’ Settembru 2023 li jissupplimenta r-Regolament (UE) 2020/1503 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw ir-rekwiżiti dwar l-evalwazzjoni tal-kreditu ta’ proġetti ta’ finanzjament kollettiv, l-ipprezzar tal-offerti ta’ finanzjament kollettiv, u l-politiki u l-proċeduri tal-ġestjoni tar-riskju
Regolament Delegat tal-Kummissjoni (UE) 2024/358 tad-29 ta’ Settembru 2023 li jissupplimenta r-Regolament (UE) 2020/1503 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw ir-rekwiżiti dwar l-evalwazzjoni tal-kreditu ta’ proġetti ta’ finanzjament kollettiv, l-ipprezzar tal-offerti ta’ finanzjament kollettiv, u l-politiki u l-proċeduri tal-ġestjoni tar-riskju
C/2023/6442
ĠU L, 2024/358, 22.1.2024, ELI: http://data.europa.eu/eli/reg_del/2024/358/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
Relation | Act | Comment | Subdivision concerned | From | To |
---|---|---|---|---|---|
Completion | 32020R1503 | 11/02/2024 |
Il-Ġurnal Uffiċjali |
MT Serje L |
2024/358 |
22.1.2024 |
REGOLAMENT DELEGAT TAL-KUMMISSJONI (UE) 2024/358
tad-29 ta’ Settembru 2023
li jissupplimenta r-Regolament (UE) 2020/1503 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw ir-rekwiżiti dwar l-evalwazzjoni tal-kreditu ta’ proġetti ta’ finanzjament kollettiv, l-ipprezzar tal-offerti ta’ finanzjament kollettiv, u l-politiki u l-proċeduri tal-ġestjoni tar-riskju
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2020/1503 tal-Parlament Ewropew u tal-Kunsill tas-7 ta’ Ottubru 2020 dwar fornituri Ewropej ta’ servizzi ta’ finanzjament kollettiv għan-negozji, u li jemenda r-Regolament (UE) 2017/1129 u d-Direttiva (UE) 2019/1937 (1), u b’mod partikolari l-Artikolu 19(7) tiegħu,
Billi:
(1) |
L-Artikolu 23 tar-Regolament (UE) 2020/1503 jirrikjedi li l-fornituri ta’ servizzi ta’ finanzjament kollettiv jipprovdu biżżejjed informazzjoni lill-investituri dwar il-kwalità tal-proġetti ta’ finanzjament kollettiv u lis-sidien tal-proġetti, b’mod partikolari billi jipprovdu skeda bl-informazzjoni ewlenija dwar l-investiment, li jkun fiha l-informazzjoni meħtieġa biex tittieħed deċiżjoni infurmata dwar l-investiment. Madankollu, jenħtieġ ukoll li l-investituri jkunu infurmati b’mod adegwat dwar kif il-fornituri ta’ servizzi ta’ finanzjament kollettiv jikkalkulaw l-evalwazzjonijiet tal-kreditu għall-proġetti ta’ finanzjament kollettiv u s-sidien tal-proġetti biex ikunu jistgħu jifhmu u jqabblu aħjar ir-riskji sottostanti għal self ta’ finanzjament kollettiv differenti. |
(2) |
F’dawn l-aħħar snin, it-tekniki tal-valutazzjoni tar-riskju tal-kreditu u l-kalkolu tal-evalwazzjonijiet tar-riskju tal-kreditu, flimkien ma’ tekniki statistiċi aktar tradizzjonali, ġew żviluppati skont approċċi innovattivi bbażati fuq l-intelliġenza artifiċjali u t-tagħlim awtomatiku. Pereżempju, għal intrapriżi żgħar u medji mingħajr storja twila ta’ kreditu, metodi innovattivi bbażati fuq data dwar it-tranżazzjonijiet jistgħu jkunu aktar utli minn metodi bbażati fuq data tradizzjonali dwar il-karta tal-bilanċ. Minħabba l-kumplessità tagħhom, l-użu ta’ dawk it-tekniki jista’ jżid l-asimmetrija tal-informazzjoni bejn l-investituri u l-fornituri ta’ servizzi ta’ finanzjament kollettiv. Għaldaqstant, jenħtieġ li d-deskrizzjoni tal-metodu użat mill-fornituri ta’ servizzi ta’ finanzjament kollettiv biex jikkalkulaw l-evalwazzjonijiet tal-kreditu tindika l-mudell ta’ evalwazzjoni użat biex jappoġġa tali kalkolu, kif ukoll informazzjoni suffiċjenti dwar il-fatturi finanzjarji u mhux finanzjarji li jintużaw bħala input f’dawk il-mudelli ta’ evalwazzjoni u dwar l-output ipprovdut mill-mudelli ta’ evalwazzjoni. |
(3) |
L-investituri jistgħu ma jkunux kompletament konxji tal-mekkaniżmu għall-formazzjoni tal-prezzijiet għal offerti ta’ finanzjament kollettiv, u d-diversi fatturi involuti fih. Għaldaqstant, jenħtieġ li tiżdied it-trasparenza biex jiġi ffaċilitat it-tqabbil bejn self differenti. B’mod partikolari, meta l-fornituri ta’ servizzi ta’ finanzjament kollettiv jissuġġerixxu l-prezz ta’ offerta ta’ finanzjament kollettiv, jenħtieġ li dawn jiddeskrivu b’mod preċiż il-metodu użat għall-kalkolu ta’ dawk il-prezzijiet. Jenħtieġ li dik id-deskrizzjoni tqis dawk l-elementi li huma rilevanti kemm fil-mument kif ukoll wara l-punt meta jkun oriġina self, b’mod partikolari fir-rigward tat-tariffi li fornitur ta’ servizzi ta’ finanzjament kollettiv jista’ jitlob mill-investituri u mis-sidien tal-proġetti għas-servizzi pprovduti lilhom. |
(4) |
Jenħtieġ li l-prezz tas-self iffaċilitat fuq il-pjattaforma tal-fornitur ta’ servizzi ta’ finanzjament kollettiv ikun ġust u xieraq. B’hekk jenħtieġ li jiġi żgurat li l-prezz jirrifletti l-profil tar-riskju u l-valur preżenti nett tas-self, u li l-fornitur ta’ servizzi ta’ finanzjament kollettiv ikun qies il-kundizzjonijiet ġenerali tas-suq. |
(5) |
Jenħtieġ li l-fornituri ta’ servizzi ta’ finanzjament kollettiv iwettqu valutazzjoni affidabbli tar-riskju ta’ kreditu bħala protezzjoni minima għall-investituri li ma jkollhomx biżżejjed informazzjoni dwar l-affidabbiltà kreditizja tas-sidien tal-proġetti u dwar is-sostenibbiltà tal-proġetti ta’ finanzjament kollettiv. Sabiex jiġi żgurat li l-fornituri ta’ servizzi ta’ finanzjament kollettiv jivvalutaw ir-riskju ta’ kreditu tal-proġetti ta’ finanzjament kollettiv u tas-sidien tal-proġetti b’mod sod u robust, jenħtieġ li dawn iqisu ammont suffiċjenti ta’ informazzjoni dwar dawk il-fatturi li jaffettwaw is-sitwazzjoni finanzjarja u l-istrateġija tan-negozju tas-sidien tal-proġetti u tal-proġetti ta’ finanzjament kollettiv. Barra minn hekk, billi valutazzjoni komprensiva tar-riskju ta’ kreditu trid tqis ukoll jekk tali riskju huwiex ikkumpensat mid-disponibbiltà ta’ arranġamenti ta’ protezzjoni tal-kreditu, jenħtieġ li l-fornituri ta’ servizzi ta’ finanzjament kollettiv iqisu wkoll informazzjoni dwar il-kollateral u l-garanziji użati biex jittaffa r-riskju ta’ kreditu. |
(6) |
Jenħtieġ li l-fornituri ta’ servizzi ta’ finanzjament kollettiv ikollhom aċċess għall-informazzjoni rilevanti li tinsab fid-dokumentazzjoni relatata mal-valutazzjonijiet tar-riskju ta’ kreditu biex jippermettu analiżi ta’ valutazzjoni komparattiva adegwata dwar l-affidabbiltà kreditizja tas-sidien tal-proġetti prospettivi u jtejbu l-mudelli u l-għodod użati għall-approvazzjoni ta’ proġetti li għandhom jiġu ffinanzjati fuq il-pjattaformi tagħhom. Jenħtieġ li d-data personali inkluża f’dik l-informazzjoni tinħażen għal perjodu ta’ mhux aktar minn ħames snin u xorta waħda tiġi ttrattata f’konformità mar-Regolament (UE) 2016/679 tal-Parlament Ewropew u tal-Kunsill (2). |
(7) |
Jenħtieġ li l-proċess biex jiġi ddeterminat il-prezz ta’ offerta ta’ finanzjament kollettiv jinkludi wkoll valwazzjoni preċiża tas-self ta’ finanzjament kollettiv. Għaldaqstant, jenħtieġ li l-fornituri ta’ servizzi ta’ finanzjament kollettiv jiżguraw li, matul iċ-ċiklu tal-ħajja tas-self, tali valwazzjoni tkun ibbażata fuq għadd suffiċjenti ta’ fatturi li jirriflettu l-istruttura tal-introjtu u tal-kostijiet tas-self, kif ukoll il-livell ta’ riskju tiegħu. |
(8) |
Strutturi ta’ governanza tajba jsaħħu l-protezzjoni tal-investitur. Għal dak l-għan, jenħtieġ li l-fornituri ta’ servizzi ta’ finanzjament kollettiv ikollhom fis-seħħ arranġamenti ta’ governanza li jkunu proporzjonati għall-kumplessità tagħhom, flimkien ma’ politiki li jispeċifikaw l-elementi ta’ divulgazzjoni li jiżguraw li l-informazzjoni pprovduta lill-investituri tkun dettaljata b’mod preċiż u suffiċjenti u tirrappreżenta l-proġett ta’ finanzjament kollettiv. Barra minn hekk, jenħtieġ li titwettaq diliġenza dovuta fuq il-proġetti ta’ finanzjament kollettiv u fuq is-sidien tal-proġetti. Għaldaqstant, jenħtieġ li l-qafas tal-ġestjoni tar-riskju msemmi fl-Artikolu 4(4), il-punt (f) tar-Regolament (UE) 2020/1503 jidentifika r-rwoli u l-funzjonijiet ewlenin li huma responsabbli għall-valutazzjoni tar-riskju ta’ kreditu u għall-assenjar ta’ self għall-kategoriji ta’ riskju rispettivi. Jenħtieġ li tali qafas ikun jaqbel mal-kumplessità tal-mudell kummerċjali tal-fornituri tal-finanzjament kollettiv u t-tip ta’ self iffaċilitat, u jirrifletti s-salvagwardji stabbiliti fir-Regolament (UE) 2020/1503 għall-ġestjoni tar-riskji tal-ħasil tal-flus u tal-finanzjament tat-terroriżmu. |
(9) |
Dan ir-Regolament huwa bbażat fuq l-abbozz tal-istandards tekniċi regolatorji żviluppat mill-Awtorità Bankarja Ewropea (European Banking Authority, EBA) f’kooperazzjoni mill-qrib mal-Awtorità Ewropea tat-Titoli u s-Swieq (European Securities and Markets Authority, ESMA) u ppreżentat lill-Kummissjoni. |
(10) |
L-EBA wettqet konsultazzjonijiet pubbliċi miftuħa dwar l-abbozzi tal-istandards tekniċi regolatorji li dan ir-Regolament huwa bbażat fuqhom, analizzat il-kostijiet u l-benefiċċji relatati potenzjali, u talbet il-pariri tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3). |
(11) |
Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (4) u ta l-opinjoni tiegħu fl-10 ta’ Jannar 2023, |
ADOTTAT DAN IR-REGOLAMENT:
KAPITOLU I
DESKRIZZJONI TAL-METODU UŻAT GĦALL-KALKOLU TAL-EVALWAZZJONIJIET TAL-KREDITU GĦALL-PROĠETTI TA’ FINANZJAMENT KOLLETTIV U L-PREZZIJIET TAL-OFFERTI TA’ FINANZJAMENT KOLLETTIV
Artikolu 1
Format tad-deskrizzjoni tal-metodu għall-kalkolu tal-evalwazzjonijiet tal-kreditu għall-proġetti ta’ finanzjament kollettiv u l-prezzijiet tal-offerti ta’ finanzjament kollettiv
Il-fornituri ta’ servizzi ta’ finanzjament kollettiv li japplikaw evalwazzjonijiet tal-kreditu għall-proġetti ta’ finanzjament kollettiv jew li jissuġġerixxu l-ipprezzar tal-offerti ta’ finanzjament kollettiv għandhom jiżguraw li d-deskrizzjoni tal-metodi użati għall-kalkolu ta’ dawk l-evalwazzjonijiet tal-kreditu jew il-prezzijiet tkun preċiża, affidabbli u aġġornata regolarment, u tikkonforma ma’ dan kollu li ġej:
(a) |
id-deskrizzjoni tingħaraf b’mod ċar mill-komunikazzjonijiet ta’ kummerċjalizzazzjoni; |
(b) |
id-deskrizzjoni tkun ippreżentata b’mod li jkun faċli biex jinqara u espress b’mod li jiffaċilita l-fehim tagħha. |
Artikolu 2
Elementi li għandhom jiġu inklużi fid-deskrizzjoni tal-metodu użat għall-kalkolu tal-evalwazzjonijiet tal-kreditu għall-proġetti ta’ finanzjament kollettiv
1. Id-deskrizzjoni tal-metodu użat għall-kalkolu tal-evalwazzjonijiet tal-kreditu tal-proġetti ta’ finanzjament kollettiv għandu jkun fiha l-informazzjoni kollha li ġejja:
(a) |
liema mill-mudelli ta’ evalwazzjoni li ġejjin intużaw:
|
(b) |
jekk hemmx arranġamenti ta’ governanza xierqa fis-seħħ għad-disinn u l-użu tal-mudell; |
(c) |
deskrizzjoni tal-qafas applikat biex jiġi żgurat li l-kwalità tal-output tal-mudell tiġi vvalutata u jsir monitoraġġ tagħha regolarment; |
(d) |
jekk intużax mudell li ġie żviluppat minn fornituri terzi. |
2. Apparti l-informazzjoni msemmija fil-paragrafu 1, id-deskrizzjoni tal-metodu użat għall-kalkolu tal-evalwazzjonijiet tal-kreditu tal-proġetti ta’ finanzjament kollettiv għandu jkun fiha l-informazzjoni kollha li ġejja:
(a) |
informazzjoni dwar is-sors ta’ kwalunkwe data użata għall-alimentazzjoni ta’ mudelli ta’ evalwazzjoni, u li tindika, b’mod partikolari, jekk l-informazzjoni hijiex:
|
(b) |
spjegazzjoni ta’ kif il-metodu jikkunsidra l-fatturi finanzjarji li ġejjin relatati ma’ sid il-proġett u mal-proġett ta’ finanzjament kollettiv u jużahom bħala input fil-mudell tal-evalwazzjoni:
|
(c) |
spjegazzjoni ta’ kif il-metodu jikkunsidra l-fatturi mhux finanzjarji li ġejjin relatati ma’ sid il-proġett u jużahom bħala input fil-mudell tal-evalwazzjoni:
|
(d) |
il-piżijiet assenjati lill-fatturi finanzjarji u mhux finanzjarji msemmija fil-punti (b) u (c); |
(e) |
il-metriċi rilevanti li jitqiesu fir-rigward tal-fatturi finanzjarji u mhux finanzjarji msemmija fil-punti (b) u (c); |
(f) |
spjegazzjoni ta’ kif ir-riskji li jirriżultaw minn attivitajiet ta’ ħasil tal-flus u ta’ finanzjament tat-terroriżmu jitqiesu meta jiġu assenjati l-evalwazzjonijiet tal-kreditu; |
(g) |
deskrizzjoni tal-output tal-mudell tal-evalwazzjoni, inkluża tabella li tindika l-passi tal-evalwazzjoni tal-kreditu, li tindika għal kull pass:
|
(h) |
deskrizzjoni ta’ kemm-il darba l-evalwazzjonijiet tal-kreditu u l-klassifikazzjonijiet korrispondenti tal-proġett ta’ finanzjament kollettiv jiġu aġġornati matul il-ħajja tas-self li jiffinanzja l-proġett; |
(i) |
indikazzjoni ta’ jekk l-evalwazzjonijiet tal-kreditu miksuba bl-użu ta’ mudelli awtomatizzati jistgħux jiġu kkoreġuti manwalment, u ċ-ċirkostanzi li fihom isiru tali korrezzjonijiet manwali; |
(j) |
indikazzjoni ta’ kif l-output tal-metodu jiġi kkunsidrat fid-determinazzjoni ta’:
|
3. Il-fornituri ta’ servizzi ta’ finanzjament kollettiv għandhom jinfurmaw lill-investituri meta bidla fil-metodu użat biex jiġu ddeterminati l-evalwazzjonijiet tal-kreditu twassal għal bidliet materjali fir-riżultati ta’ dak il-metodu.
4. Għall-finijiet tal-paragrafu 2, il-punt (a)(i), meta l-informazzjoni msemmija f’dak il-punt tkun ibbażata fuq kontijiet mhux awditjati, il-fornituri ta’ servizzi ta’ finanzjament kollettiv għandhom jiddivulgaw lill-investituri biżżejjed informazzjoni dwar l-affidabbiltà ta’ dik l-informazzjoni.
Artikolu 3
Elementi li għandhom jiġu inklużi fid-deskrizzjoni tal-metodu użat għall-kalkolu tal-prezzijiet ta’ offerti ta’ finanzjament kollettiv
1. Id-deskrizzjoni tal-metodu użat għall-kalkolu tal-prezz għall-offerti ta’ finanzjament kollettiv għandha tispjega kif l-elementi kollha li ġejjin tas-self jitqiesu fl-istrateġija tal-ipprezzar:
(a) |
l-ammont ta’ kapital tas-self; |
(b) |
il-maturità tas-self; |
(c) |
l-istruttura taż-żmien tal-ħlasijiet parzjali ta’ ripagamenti; |
(d) |
ir-riżultati tal-mudelli tal-evalwazzjoni; |
2. Id-deskrizzjoni tal-metodu msemmi fil-paragrafu 1 għandha tindika kif l-elementi kollha li ġejjin huma kkunsidrati fil-punt tal-oriġinazzjoni tas-self:
(a) |
ir-rata tal-imgħax mingħajr riskju użata; |
(b) |
il-kategorija tar-riskju ta’ sid il-proġett assenjata f’konformità mal-Artikolu 19; |
(c) |
id-disponibbiltà ta’ kollateral jew ta’ garanziji; |
(d) |
kwalunkwe kost operatorju u amministrattiv, u tariffi imposti mill-fornitur ta’ servizzi ta’ finanzjament kollettiv għal servizzi pprovduti b’rabta mas-self; |
(e) |
fejn rilevanti, kwalunkwe riskju ieħor assoċjat mas-self. |
3. Apparti l-elementi msemmija fil-paragrafi 1 u 2, id-deskrizzjoni tal-metodu msemmi fil-paragrafu 1 għandha tindika wkoll kif jitqiesu l-elementi kollha li ġejjin wara l-punt tal-oriġinazzjoni tas-self:
(a) |
tariffi għall-amministrazzjoni u l-monitoraġġ tas-self; |
(b) |
tariffi fir-rigward tal-evalwazzjoni mill-ġdid tal-kollateral; |
(c) |
tariffi għal bidliet fit-termini tal-ftehim ta’ self jew fil-kundizzjonijiet ta’ ristrutturar, inklużi bidliet wara inadempjenza minn sid il-proġett; |
(d) |
tariffi għall-bejgħ tas-self mill-investitur; |
(e) |
tariffi għar-ripagament bikri tas-self; |
(f) |
tariffi għall-fondi ta’ kontinġenza kif imsemmi fl-Artikolu 6(5) u (6) tar-Regolament (UE) 2020/1503. |
KAPITOLU II
VALUTAZZJONI TAR-RISKJU TA’ KREDITU U VALUTAZZJONI TAS-SELF
Artikolu 4
Approċċi u informazzjoni għall-valutazzjoni tar-riskju tal-kreditu u l-valutazzjoni tas-self
Għall-finijiet ta’ dan il-kapitolu, il-fornituri ta’ servizzi ta’ finanzjament kollettiv għandhom:
(a) |
jadottaw metodi u approċċi għall-valutazzjoni tar-riskju tal-kreditu u l-valutazzjoni tas-self li huma proporzjonati għad-daqs, it-tip u l-maturità tas-self u għall-karatteristiki ta’ sid il-proġett u tal-proġett ta’ finanzjament kollettiv; |
(b) |
jużaw informazzjoni u data preċiżi, affidabbli u aġġornati. |
Artikolu 5
Rekwiżiti ġenerali għall-valutazzjonijiet tar-riskju ta’ kreditu ta’ proġetti ta’ finanzjament kollettiv jew tas-sidien tal-proġetti
1. Meta jivvalutaw ir-riskju ta’ kreditu tal-proġetti ta’ finanzjament kollettiv jew tas-sidien tal-proġetti, il-fornituri ta’ servizzi ta’ finanzjament kollettiv għandhom jivvalutaw il-kapaċità attwali u futura ta’ sid il-proġett li jissodisfa l-obbligi finanzjarji stabbiliti fil-ftehim ta’ self.
2. Il-fornituri ta’ servizzi ta’ finanzjament kollettiv għandhom jiddokumentaw tajjeb id-deċiżjonijiet dwar il-valutazzjoni msemmija fil-paragrafu 1 u għandhom iżommu dik id-dokumentazzjoni għal mill-inqas ħames snin wara r-ripagament tal-aħħar ħlas parzjali tas-self.
3. Għall-fini tal-paragrafu 2, kwalunkwe data personali kif definita fl-Artikolu 4(1) tar-Regolament (UE) 2016/679, għandha tinżamm għal mhux aktar minn ħames snin wara r-ripagament tal-aħħar ħlas parzjali tas-self.
Artikolu 6
Informazzjoni li għandha tiġi kkunsidrata fil-valutazzjonijiet tar-riskju ta’ kreditu ta’ proġetti ta’ finanzjament kollettiv jew tas-sidien tal-proġetti
Meta jivvalutaw ir-riskju ta’ kreditu tal-proġetti ta’ finanzjament kollettiv jew tas-sidien tal-proġetti, il-fornituri ta’ servizzi ta’ finanzjament kollettiv għandhom jikkunsidraw l-informazzjoni kollha li ġejja:
(a) |
id-deskrizzjoni tal-proġett ta’ finanzjament kollettiv; |
(b) |
l-iskop tas-self; |
(c) |
l-istruttura tas-sjieda ta’ sid il-proġett; |
(d) |
il-pjan ta’ direzzjoni tan-negozju li fuqu huwa bbażat il-proġett ta’ finanzjament kollettiv; |
(e) |
id-disponibbiltà ta’ kollateral jew ta’ garanziji. |
Artikolu 7
Fatturi li għandhom jiġu kkunsidrati fil-valutazzjoni tas-sitwazzjoni finanzjarja ta’ sid il-proġett jew tal-proġett ta’ finanzjament kollettiv
1. Meta jivvalutaw ir-riskju ta’ kreditu tal-proġetti ta’ finanzjament kollettiv jew tas-sidien tal-proġetti, il-fornituri ta’ servizzi ta’ finanzjament kollettiv għandhom jikkunsidraw il-fatturi kollha li ġejjin b’rabta mas-sitwazzjoni finanzjarja ta’ sid il-proġett jew tal-proġett ta’ finanzjament kollettiv:
(a) |
l-introjtu u l-fluss tal-flus iġġenerati mill-proġett ta’ finanzjament kollettiv matul l-aħħar sentejn, fejn disponibbli; |
(b) |
l-introjtu u l-flussi tal-flus mistennija tal-proġett ta’ finanzjament kollettiv f’xenarji differenti; |
(c) |
is-sitwazzjoni finanzjarja attwali u proġettata ta’ sid il-proġett, inkluż kwalunkwe self u obbligazzjonijiet eżistenti oħra; |
(d) |
id-disponibbiltà ta’ kollateral jew ta’ garanziji oħra. |
2. Għall-finijiet tal-paragrafu 1, il-punt (c), il-fornituri ta’ servizzi ta’ finanzjament kollettiv għandhom jikkunsidraw il-fatturi li ġejjin meta jivvalutaw self u obbligazzjonijiet oħra li sid il-proġett jista’ jkollu fis-seħħ fiż-żmien tat-talba għal self:
(a) |
l-ammont ta’ dak is-self jew obbligazzjonijiet oħrajn; |
(b) |
il-munita li fiha jinħareġ dak is-self jew obbligazzjonijiet oħrajn; |
(c) |
il-maturità ta’ dak is-self jew obbligazzjonijiet oħrajn; |
(d) |
l-iskeda ta’ ripagament ta’ dak is-self jew obbligazzjonijiet oħrajn; |
(e) |
ir-rata tal-imgħax jew kwalunkwe kumpens ieħor previst f’dawk il-kuntratti ta’ self jew obbligazzjonijiet oħrajn. |
3. Meta jwettqu l-valutazzjoni msemmija fil-paragrafi 1 u 2, il-fornituri ta’ servizzi ta’ finanzjament kollettiv għandhom jikkunsidraw indikaturi finanzjarji, speċifiċi għall-klassi tal-assi jew speċifiċi għat-tip ta’ prodott rilevanti għall-aħħar tliet snin finanzjarji, fejn disponibbli, f’konformità mal-politiki stabbiliti fil-Kapitolu IV. Dawk l-indikaturi għandhom jiġu kkalkulati f’konformità mal-Istandards Internazzjonali ta’ Rapportar Finanzjarju jew il-Prinċipji tal-Kontabbiltà Ġeneralment Aċċettati lokali, f’konformità mal-politiki stabbiliti fil-Kapitolu IV.
4. L-indikaturi finanzjarji rilevanti jistgħu jinkludu l-punti elenkati fl-Anness, iżda mhumiex limitati għalihom.
5. Meta jużaw projezzjonijiet finanzjarji biex jivvalutaw ir-riskju ta’ kreditu, il-fornituri ta’ servizzi ta’ finanzjament kollettiv għandhom jiżguraw li dawk il-projezzjonijiet ikunu bbażati fuq suppożizzjonijiet solidi u prudenti u jkunu konsistenti ma’ data storika u aspettattivi raġonevoli tas-suq.
Artikolu 8
Informazzjoni li għandha tiġi kkunsidrata fil-valutazzjoni tal-mudell u l-istrateġija tan-negozju tal-proġetti ta’ finanzjament kollettiv u tas-sidien tal-proġetti
Meta jivvalutaw ir-riskju ta’ kreditu tal-proġetti ta’ finanzjament kollettiv jew tas-sidien tal-proġetti, il-fornituri ta’ servizzi ta’ finanzjament kollettiv għandhom jikkunsidraw l-informazzjoni li ġejja b’rabta mal-mudell tan-negozju u l-istrateġija tan-negozju tal-proġett ta’ finanzjament kollettiv:
(a) |
l-għarfien ta’ sid il-proġett tas-settur tan-negozju relatat mal-proġett ta’ finanzjament kollettiv u l-esperjenza fi proġetti simili; |
(b) |
il-fattibbiltà u s-sostenibbiltà tal-pjan ta’ direzzjoni tan-negozju marbut mal-proġett ta’ finanzjament kollettiv; |
(c) |
analiżi tal-punti b’saħħithom u d-dgħufijiet tal-proġett ta’ finanzjament kollettiv; |
(d) |
il-livell ta’ kompetizzjoni fis-settur tan-negozju li fih ikun qed iseħħ il-proġett ta’ finanzjament kollettiv; |
(e) |
it-tip ta’ klijenti u l-pożizzjoni ġeografika tagħhom. |
Artikolu 9
Informazzjoni dwar arranġamenti ta’ protezzjoni tal-kreditu
1. Meta self mogħti lil sid il-proġett ikun garantit minn arranġamenti ta’ protezzjoni tal-kreditu, il-fornituri ta’ servizzi ta’ finanzjament kollettiv għandhom jieħdu l-passi raġonevoli kollha biex jiġbru informazzjoni dwar:
(a) |
il-preċiżjoni tal-valutazzjoni tal-kollateral u l-garanziji; |
(b) |
l-effettività u l-infurzabbiltà tal-kollateral u l-garanziji. |
2. Il-fornituri ta’ servizzi ta’ finanzjament kollettiv għandhom jivvalutaw u jagħmlu monitoraġġ b’mod regolari tal-valur tal-kollateral u l-garanziji, u jieħdu azzjoni xierqa jekk il-valur tal-kollateral jonqos materjalment.
Artikolu 10
Informazzjoni dwar il-protezzjoni ffinanzjata tal-kreditu
1. Meta s-self ikun garantit minn kollateral, il-fornituri ta’ servizzi ta’ finanzjament kollettiv għandhom jiżguraw li l-valutazzjoni tal-kollateral tqis l-informazzjoni kollha li ġejja:
(a) |
informazzjoni dwar il-maturità tal-kollateral; |
(b) |
għal kollateral finanzjarju, l-aħħar prezz disponibbli għall-kollateral u l-prezz medju matul it-12-il xahar preċedenti f’suq likwidu u nnegozjat; |
(c) |
għal kollateral fiżiku, l-aħħar valur tas-suq disponibbli; |
(d) |
informazzjoni dwar l-eżistenza ta’ suq għal-likwidazzjoni immedjata tal-kollateral; |
(e) |
miżura tal-volatilità tal-valur tal-kollateral. |
2. Fin-nuqqas ta’ suq li jistabbilixxi b’mod oġġettiv prezz jew valur tas-suq għall-kollateral, il-fornituri ta’ servizzi ta’ finanzjament kollettiv għandhom jikkunsidraw l-informazzjoni kollha li ġejja:
(a) |
is-suppożizzjonijiet li ntużaw biex jiġi vvalutat il-valur tal-kollateral; |
(b) |
il-frekwenza li biha l-valur jista’ jinkiseb fil-pront, inkluża evalwazzjoni jew valutazzjoni professjonali. |
3. Għall-finijiet tal-paragrafi 1 u 2, il-fornituri ta’ servizzi ta’ finanzjament kollettiv għandu jkollhom fis-seħħ politiki u proċeduri biex jagħmlu monitoraġġ tal-valur tal-kollateral.
Artikolu 11
Informazzjoni dwar il-protezzjoni tal-kreditu mhux iffinanzjata
Meta s-self ikun garantit, il-fornituri ta’ servizzi ta’ finanzjament kollettiv għandhom jiżguraw li l-valutazzjoni tal-kollateral tqis l-informazzjoni kollha li ġejja:
(a) |
l-identità tal-garanti; |
(b) |
it-tip ta’ garanzija; |
(c) |
l-eżegwibbiltà tal-garanzija; |
(d) |
il-livell ta’ protezzjoni pprovdut mill-garanzija; |
(e) |
l-ammont li l-garanti jkun impenja ruħu li jħallas fil-każ ta’ inadempjenza ta’ sid il-proġett jew nuqqas ta’ pagament minn dak is-sid tal-proġett. |
Artikolu 12
Informazzjoni dwar il-kontabbiltà
Meta d-dikjarazzjonijiet finanzjarji awditjati ma jkunux disponibbli għall-aħħar sentejn finanzjarji, il-fornituri ta’ servizzi ta’ finanzjament kollettiv għandhom, għall-finijiet tal-Artikolu 4(4), il-punt (b)(i) tar-Regolament (UE) 2020/1503, jibbażaw il-valutazzjoni tas-sitwazzjoni finanzjarja ta’ sid il-proġett fuq dokumenti mħejjija minn konsulent tat-taxxa, kontabilist ġuramentat jew persuna ċċertifikata oħra soġġetta għal sistema ta’ assigurazzjoni tal-kwalità professjonali.
Artikolu 13
Informazzjoni li għandha tiġi kkunsidrata għall-valutazzjoni tas-self
1. Meta jivvalutaw kull self kif imsemmi fl-Artikolu 4(4), il-punt (e)(i) tar-Regolament (UE) 2020/1503, il-fornituri ta’ servizzi ta’ finanzjament kollettiv għandhom:
(a) |
iwettqu valutazzjoni tas-self mogħti lis-sidien tal-proġetti filwaqt li jqisu informazzjoni suffiċjenti u aġġornata; |
(b) |
iwettqu l-valutazzjoni fi żmien tliet xhur qabel l-għoti tas-self. |
2. Għall-finijiet tal-paragrafu 1, fil-punt tal-oriġinazzjoni tas-self, il-fornituri ta’ servizzi ta’ finanzjament kollettiv għandhom jikkunsidraw il-fatturi kollha li ġejjin:
(a) |
il-maturità tas-self; |
(b) |
il-frekwenza tal-pagamenti parzjali u l-flussi futuri tal-flus mistennija; |
(c) |
jekk hemmx xi opzjoni ta’ prepagamenti prevista fil-kuntratt tas-self; |
(d) |
rata tal-imgħax mingħajr riskju biex jiġu skontati l-pagamenti magħmula mis-self; |
(e) |
ir-rata tal-imgħax stabbilita fil-ftehim tas-self; |
(f) |
il-probabbiltà ta’ inadempjenza minn sid il-proġett kif stabbilit fl-Artikolu 1(1) tar-Regolament Delegat tal-Kummissjoni (UE) 2022/2115 (5); |
(g) |
il-valur ta’ kwalunkwe kollateral, jekk ikun hemm; li sid il-proġett ikun uża bħala parti mill-ftehim tas-self; |
(h) |
kwalunkwe garanzija u l-livell ta’ protezzjoni pprovduti minn dawk il-garanziji. |
3. Għall-finijiet tal-paragrafu 1, wara l-punt tal-oriġinazzjoni tas-self, il-fornitur ta’ servizzi ta’ finanzjament kollettiv għandu jqis, minbarra l-fatturi msemmija fil-paragrafu 2, il-fatturi li ġejjin:
(a) |
iż-żmien għall-maturità tas-self; |
(b) |
l-istennija ta’ telf fil-futur. |
4. Meta l-fornituri ta’ servizzi ta’ finanzjament kollettiv, f’konformità mal-Artikolu 4(4), il-punt (e)(iii), tar-Regolament (UE) 2020/1503, iwettqu l-valutazzjoni ta’ self wara inadempjenza, dawn għandhom iwettqu l-valutazzjoni tal-kollateral u l-garanziji b’mod konservattiv u għandhom jikkunsidraw tariffi u spejjeż oħra relatati mal-ġbir tad-dejn.
KAPITOLU III
PREZZAR ĠUST U XIERAQ TAS-SELF
Artikolu 14
Fatturi biex jiġi żgurat prezzar ġust u xieraq tas-self
1. Meta jiddeterminaw il-prezz għal self li jiffaċilitaw, il-fornituri ta’ servizzi ta’ finanzjament kollettiv għandhom iqisu l-fatturi kollha li ġejjin:
(a) |
il-profil tar-riskju ta’ sid il-proġett jew tal-proġett ta’ finanzjament kollettiv, kif determinat fil-kategoriji ta’ riskju msemmija fl-Artikolu 19; |
(b) |
il-valur preżenti nett tas-self; |
(c) |
il-kundizzjonijiet prevalenti tas-suq fil-punt tal-oriġinazzjoni tas-self u matul il-ħajja tas-self; |
(d) |
l-istrateġija tan-negozju tagħhom. |
2. Meta jikkalkulaw il-valur preżenti nett imsemmi fil-paragrafu 1, il-punt (b), il-fornituri ta’ servizzi ta’ finanzjament kollettiv għandhom jikkunsidraw il-fatturi kollha li ġejjin:
(a) |
l-ammont ta’ kapital tas-self; |
(b) |
il-maturità tas-self; |
(c) |
il-frekwenza tal-ħlasijiet parzjali tas-self; |
(d) |
rata tal-imgħax xierqa biex jiġu skontati r-ripagamenti futuri. |
KAPITOLU IV
POLITIKI U PROĊEDURI BIEX TIĠI ŻGURATA INFORMAZZJONI SUFFIĊJENTI GĦALL-KLIJENTI U BIEX IKUNU JISTGĦU JSIRU VALUTAZZJONIJIET TAR-RISKJU TAL-KREDITU, VALUTAZZJONI TAS-SELF U PREZZAR
Artikolu 15
Arranġamenti ta’ governanza għall-informazzjoni lill-klijenti
1. Għall-informazzjoni lill-klijenti kif imsemmi fl-Artikolu 19 tar-Regolament (UE) 2020/1503, il-fornituri ta’ servizzi ta’ finanzjament kollettiv għandu jkollhom fis-seħħ qafas ta’ governanza adegwat u għandu jkollhom deskrizzjoni bil-miktub tiegħu.
2. Għall-finijiet tal-paragrafu 1, il-fornituri ta’ servizzi ta’ finanzjament kollettiv għandhom jiżguraw dan kollu li ġej:
(a) |
li l-informazzjoni kollha pprovduta lill-klijenti tkun kompluta u aġġornata; |
(b) |
li l-arranġamenti, il-proċessi u l-mekkaniżmi ta’ governanza interna għad-divulgazzjoni ta’ informazzjoni lill-klijenti jkunu proporzjonati għad-daqs u l-kumplessità tal-fornitur ta’ servizzi ta’ finanzjament kollettiv. |
3. Il-fornituri ta’ servizzi ta’ finanzjament kollettiv għandhom jiżguraw li d-divulgazzjonijiet kwantitattivi kollha lill-klijenti jkunu akkumpanjati minn narrattiva kwalitattiva u informazzjoni supplimentari oħra li tista’ tkun meħtieġa għall-klijenti biex jiksbu fehim sħiħ tad-divulgazzjonijiet kwantitattivi.
Artikolu 16
Politiki għad-divulgazzjoni ta’ informazzjoni lill-klijenti
1. Il-politiki għad-divulgazzjoni tal-informazzjoni lill-klijenti kif imsemmi fl-Artikolu 19 tar-Regolament (UE) 2020/1503 għandhom jiżguraw li l-informazzjoni kollha lill-klijenti tiġi ppreżentata b’mod li jkun faċli biex tinqara, u espressa b’mod li jiffaċilita l-fehim, b’mod partikolari minn investituri mhux sofistikati prospettivi.
2. Il-fornituri ta’ servizzi ta’ finanzjament kollettiv għandhom jiżguraw li l-politiki li jipprovdu biżżejjed informazzjoni lill-klijenti jkun fihom l-elementi kollha li ġejjin:
(a) |
il-frekwenza għall-aġġornament tal-informazzjoni pprovduta lill-klijenti; |
(b) |
ir-rwoli jew il-funzjonijiet responsabbli għat-tħejjija tal-informazzjoni għall-klijenti; |
(c) |
it-trattament ta’ informazzjoni li jista’ jkollha impatt fuq l-ipprezzar ta’ self (informazzjoni sensittiva għall-prezzijiet); |
(d) |
il-proċess għall-validazzjoni tal-informazzjoni għall-klijenti. |
3. Il-korp maniġerjali tal-fornitur ta’ servizzi ta’ finanzjament kollettiv għandu japprova l-politiki, il-proċeduri u l-arranġamenti organizzattivi relatati mad-divulgazzjoni ta’ informazzjoni lill-klijenti, u dawk il-politiki għandhom ikunu bil-miktub, aġġornati regolarment, u dokumentati tajjeb.
Artikolu 17
Stabbiliment ta’ qafas ta’ ġestjoni tar-riskju
1. Il-qafas ta’ ġestjoni tar-riskju msemmi fl-Artikolu 4(4)(f) tar-Regolament (UE) 2020/1503 għandu jkun:
(a) |
integrat fl-istruttura organizzattiva u tat-teħid ta’ deċiżjonijiet ġenerali tal-fornitur ta’ servizzi ta’ finanzjament kollettiv; |
(b) |
proporzjonat għall-kumplessità tal-mudell operatorju tan-negozju tal-fornitur ta’ servizzi ta’ finanzjament kollettiv. |
2. Fil-qafas tal-ġestjoni tar-riskju tagħhom, il-fornituri ta’ servizzi ta’ finanzjament kollettiv għandhom jispeċifikaw ir-rwoli jew il-funzjonijiet responsabbli għall-valutazzjoni tar-riskju ta’ kreditu u l-kompiti ta’ monitoraġġ, il-proċess ta’ approvazzjoni ta’ proġetti ta’ finanzjament kollettiv li għandhom jiġu proposti lill-investituri, u l-valutazzjoni tas-self.
3. Il-fornituri ta’ servizzi ta’ finanzjament kollettiv għandhom jistabbilixxu oqfsa ta’ rapportar trasparenti. Dawk l-oqfsa ta’ rapportar għandhom jiżguraw li l-korp maniġerjali tal-fornituri ta’ servizzi ta’ finanzjament kollettiv u r-rwoli u l-funzjonijiet jiġu pprovduti b’informazzjoni adegwata li tippermettilhom ikejlu, jivvalutaw u jagħmlu monitoraġġ tar-riskju ta’ kreditu. Il-qafas ta’ rapportar għandu jkun dettaljat u dokumentat biżżejjed.
4. Il-korp maniġerjali tal-fornitur ta’ servizzi ta’ finanzjament kollettiv għandu jissorvelja l-implimentazzjoni tal-arranġamenti ta’ governanza u organizzattivi relatati mal-qafas tal-ġestjoni tar-riskju, inkluż l-istabbiliment, il-manutenzjoni u l-pubblikazzjoni tal-politiki u l-proċeduri rispettivi.
Artikolu 18
Rwoli u funzjonijiet stabbiliti fil-qafas tal-ġestjoni tar-riskju
1. Ir-rwoli u l-funzjonijiet stabbiliti fil-qafas tal-ġestjoni tar-riskju għandhom ikunu responsabbli għal dan li ġej:
(a) |
il-valutazzjoni tar-riskju ta’ kreditu tal-proġetti ta’ finanzjament kollettiv u tas-sidien tal-proġetti għall-finijiet ta’ evalwazzjoni f’konformità mal-Kapitolu III; |
(b) |
l-għoti ta’ self lil kategoriji ta’ riskju xierqa; |
(c) |
it-tfassil ta’ proċessi xierqa għall-monitoraġġ u r-rapportar tar-riskju ta’ kreditu; |
(d) |
l-istabbiliment ta’ proċessi xierqa biex jiġu indirizzati sitwazzjonijiet li fihom sid il-proġett ma jkunx jista’ jissodisfa l-obbligi tiegħu jew ikun inadempjenti, kif stabbilit fl-Artikolu 1(1) tar-Regolament Delegat (UE) 2022/2115. |
2. Meta l-fornituri ta’ servizzi ta’ finanzjament kollettiv iwettqu kompiti individwali ta’ ġestjoni tal-portafoll fir-rigward ta’ self f’konformità mal-Artikolu 6 tar-Regolament (UE) 2020/1503, dawn għandu jkollhom fis-seħħ proċess dettaljat u dokumentat biex jallokaw il-fondi tal-investituri fost il-proġetti ta’ finanzjament kollettiv.
3. Il-fornituri ta’ servizzi ta’ finanzjament kollettiv li jissuġġerixxu l-ipprezzar tal-offerti ta’ finanzjament kollettiv għandu jkollhom fis-seħħ qafas ta’ pprezzar adegwat, appoġġat minn dokumentazzjoni u strutturi ta’ governanza responsabbli għat-teħid ta’ deċiżjonijiet dwar l-ipprezzar xierqa.
Artikolu 19
Kategoriji ta’ riskju
1. Il-fornituri ta’ servizzi ta’ finanzjament kollettiv għandhom jiżguraw li l-assenjar ta’ self lil kategoriji ta’ riskju f’konformità mal-Artikolu 18(1)(b) jirrifletti:
(a) |
il-livelli ta’ riskju tal-proġetti ta’ finanzjament kollettiv rispettivi kif determinati mill-output tal-mudelli interni ta’ evalwazzjoni tal-kreditu f’konformità mal-Kapitolu I; |
(b) |
fatturi speċifiċi li huma relatati mas-self, inklużi r-rata tal-imgħax, il-maturità tas-self u l-frekwenza tal-pagamenti parzjali, iżda mhux limitati għalihom. |
2. Il-fornituri ta’ servizzi ta’ finanzjament kollettiv għandhom jiżguraw li:
(a) |
il-qafas tal-ġestjoni tar-riskju fih proċeduri adegwati għar-rieżami tal-assenjar ta’ self lil kategoriji u għall-assenjar mill-ġdid tiegħu għal kategorija ġdida ta’ riskju kull meta jkun hemm bidla fl-evalwazzjoni tal-kreditu rispettiv jew f’fatturi oħra relatati mas-self; |
(b) |
kull kategorija ta’ riskju hija assoċjata ma’ probabbiltà ta’ inadempjenza. |
Artikolu 20
Approvazzjoni ta’ proġetti ta’ finanzjament kollettiv
1. Fil-qafas tal-ġestjoni tar-riskju, il-fornituri ta’ servizzi ta’ finanzjament kollettiv għandhom jistabbilixxu proċessi ċari u dokumentati tajjeb għall-approvazzjoni ta’ proġetti ta’ finanzjament kollettiv li għandhom jiġu proposti lill-investituri.
2. Il-proċessi stabbiliti f’konformità mal-paragrafu 1 għandhom jistabbilixxu r-responsabbiltajiet tar-rwol u l-funzjonijiet rilevanti fl-istruttura organizzazzjonali tal-fornitur ta’ servizzi ta’ finanzjament kollettiv.
3. Il-fornituri ta’ servizzi ta’ finanzjament kollettiv għandhom jiżguraw li l-membri tal-persunal li jistgħu japprovaw proġetti li għandhom jiġu proposti lill-investituri jkunu mħarrġa b’mod adegwat u jkollhom għarfien espert u anzjanità rilevanti fir-rigward tas-setgħat speċifiċi delegati lilhom.
Artikolu 21
Użu ta’ mudelli awtomatizzati
1. Meta jintużaw mudelli awtomatizzati għall-valutazzjoni tar-riskju ta’ kreditu ta’ proġetti ta’ finanzjament kollettiv jew ta’ sidien ta’ proġetti u għall-approvazzjoni ta’ proġetti ta’ finanzjament kollettiv li għandhom jiġu proposti lill-investituri, il-fornituri ta’ servizzi ta’ finanzjament kollettiv għandhom jiżguraw li:
(a) |
ir-rwoli u l-funzjonijiet ikkonċernati jkollhom fehim tajjeb tal-metodoloġija ta’ dawk il-mudelli, id-data tal-input tagħhom, u s-suppożizzjonijiet u l-limitazzjonijiet tagħhom; |
(b) |
il-korp maniġerjali jkollu fehim suffiċjenti tal-użu tal-innovazzjoni abilitata mit-teknoloġija applikata għall-prodotti finanzjarji; |
(c) |
il-mudelli awtomatizzati jkunu adattati għall-iskop tagħhom, u li l-użu tagħhom ikun proporzjonat għad-daqs u l-kumplessità tal-attività ta’ sid il-proġett, tal-proġett ta’ finanzjament kollettiv u l-ammont tas-self. |
2. Għall-finijiet tal-paragrafu 1, il-fornituri ta’ servizzi ta’ finanzjament kollettiv għandu jkollhom fis-seħħ politiki u proċeduri u jistabbilixxu arranġamenti ta’ governanza xierqa għat-tfassil u l-użu ta’ tali mudelli awtomatizzati.
3. Il-politiki u l-proċeduri msemmija fil-paragrafu 2 għandhom:
(a) |
jiżguraw il-kwalità tad-data użata bħala input għall-mudelli awtomatizzati; |
(b) |
jiżguraw li l-kwalità tal-output tal-mudelli awtomatizzati tiġi vvalutata regolarment; |
(c) |
jistabbilixxu kriterji biex jiġi deċiż meta l-eżitu ta’ tali mudelli awtomatizzati jista’ jiġi revokat. |
4. Il-fornituri ta’ servizzi ta’ finanzjament kollettiv għandu jkollhom fis-seħħ dokumentazzjoni adegwata li tkopri l-metodoloġija, l-input tad-data u l-kriterji li jużaw il-mudelli awtomatizzati għall-valutazzjoni tar-riskju ta’ kreditu, il-monitoraġġ tar-riskju ta’ kreditu u l-approvazzjoni ta’ proġetti ta’ finanzjament kollettiv li għandhom jiġu proposti lill-investituri.
Artikolu 22
Politiki għall-valutazzjoni tar-riskju ta’ kreditu
1. Fil-qafas tal-ġestjoni tar-riskju ta’ kreditu tagħhom, il-fornituri ta’ servizzi ta’ finanzjament kollettiv għandhom jistabbilixxu politiki u proċeduri xierqa dwar ir-riskju ta’ kreditu għad-determinazzjoni tal-kriterji għall-valutazzjoni u l-monitoraġġ tar-riskju ta’ kreditu.
2. Il-fornituri ta’ servizzi ta’ finanzjament kollettiv għandu jkollhom fis-seħħ politiki u proċeduri ta’ ġestjoni tar-riskju ta’ kreditu li jispeċifikaw dan kollu li ġej:
(a) |
il-proċess għall-approvazzjoni ta’ proġetti ta’ finanzjament kollettiv li għandhom jiġu proposti lill-investituri; |
(b) |
il-proċess għall-assenjazzjoni ta’ proġetti ta’ finanzjament kollettiv u s-sidien tal-proġetti għal kategoriji ta’ riskju f’konformità mal-Artikolu 19; |
(c) |
l-informazzjoni u l-fatturi li għandhom jintużaw biex tiġi vvalutata l-affidabbiltà kreditizja tal-proġetti ta’ finanzjament kollettiv u tas-sidien tal-proġetti f’konformità mal-Kapitolu II; |
(d) |
il-kriterji għall-aċċettazzjoni u l-użu ta’ miżuri ta’ mitigazzjoni tar-riskju ta’ kreditu; |
(e) |
il-kundizzjonijiet għall-użu ta’ teħid ta’ deċiżjonijiet awtomatizzat fil-proċess għall-approvazzjoni ta’ proġetti ta’ finanzjament kollettiv li għandhom jiġu proposti lill-investituri; |
(f) |
iċ-ċirkustanzi li fihom huma possibbli devjazzjonijiet minn proċeduri standard; |
(g) |
il-proċess għall-monitoraġġ tar-riskju tal-kreditu wara l-punt tal-oriġinazzjoni tas-self; |
(h) |
il-proċessi biex jiġu ttrattati s-sidien tal-proġetti li jkunu tardivi fir-ripagament tas-self tagħhom. |
3. Il-politiki u l-proċeduri ta’ riskju ta’ kreditu msemmija fil-paragrafu 1 għandhom:
(a) |
ikunu proporzjonati għad-daqs u l-kumplessità tal-proġetti ta’ finanzjament kollettiv offruti fuq il-pjattaforma tal-finanzjament kollettiv; |
(b) |
jidentifikaw b’mod ċar ir-rwoli u/jew il-funzjonijiet responsabbli għat-twettiq tal-kompiti rilevanti; |
(c) |
jiġu dokumentati u jinżammu aġġornati. |
4. Il-politiki dwar ir-riskju ta’ kreditu msemmija fil-paragrafu 1 għandhom jispeċifikaw jekk u kif il-fornituri ta’ servizzi ta’ finanzjament kollettiv jinkludu riskji ambjentali, soċjali u ta’ governanza fil-valutazzjoni tar-riskju ta’ kreditu tal-proġetti ta’ finanzjament kollettiv.
Artikolu 23
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, id-29 ta’ Settembru 2023.
Għall-Kummissjoni
Il-President
Ursula VON DER LEYEN
(1) ĠU L 347, 20.10.2020, p. 1.
(2) Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).
(3) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea), u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).
(4) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).
(5) Ir-Regolament Delegat tal-Kummissjoni (UE) 2022/2115 tat-13 ta’ Lulju 2022 li jissupplimenta r-Regolament (UE) 2020/1503 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw il-metodoloġija għall-kalkolu tar-rati ta’ inadempjenza tas-self offrut fuq pjattaforma ta’ finanzjament kollettiv (ĠU L 287, 8.11.2022, p. 33).
ANNESS
Indikaturi finanzjarji rilevanti li għandhom jiġu kkunsidrati fil-valutazzjoni tas-sitwazzjoni finanzjarja msemmija fl-Artikolu 7(4)
I)
Indikaturi tal-profittabbiltà:
(a) |
Introjtu Nett Annwali |
(b) |
EBITDA |
(c) |
Redditu fuq l-Ekwità (Return on Equity, RoE) – RoE = (EBIT-Taxxa-Mgħax Imħallas)/(Ekwità Medja) |
(d) |
Redditu fuq l-Assi (Return on Assets, RoA) – RoA = (EBIT-Taxxa)/(Assi Totali Medji) |
(e) |
Marġni tal-Profitt Nett (Net Profit Margin, NPM) – NPM = (EBIT-Taxxa)/(Assi Totali Medji) |
(f) |
Bejgħ għall-Assi Totali (Sales to Total Assets, STA) – STA = Bejgħ/(Assi Totali Medji) |
II)
Indikaturi tal-ingranaġġ u tad-dejn:
(a) |
Proporzjon ta’ Dejn-Ekwità (Debt to Equity Ratio, DER) – DER = (Dejn+Valur tal-Lokazzjonijiet)/Ekwità |
(b) |
Proporzjon tad-Dejn (Debt Ratio, DR) – DR = (Dejn Totali)/(Assi Totali) |
(c) |
Rendiment tad-Dejn (Debt Yield, DY) – DY = EBITDA/Ammont ta’ Self |
(d) |
Proporzjon bejn is-Self u l-Kost (Loan to Cost, LC) – LC = (Ammont tas-Self)/(Kost tal-Kostruzzjoni) |
(e) |
Proporzjon bejn is-Self u l-Valur (Loan to Value, LV) – LV = (Ammont tas-Self)/(Valur tal-Proprjetà) |
III)
Indikaturi tal-likwidità:
(a) |
Proporzjon tal-Kopertura tal-Imgħax (Interest Coverage Ratio, ICR) – ICR = EBIT/Spejjeż tal-Imgħax |
(b) |
Proporzjon tal-Kopertura tas-Servizz tad-Dejn (Debt Service Coverage Ratio, DSCR) – DSCR = EBITDA/(Ammont ta’ Kapital+Ammont tal-Imgħax) |
(c) |
Proporzjon bejn il-Fluss ta’ Flus u d-Dejn (Cash Flow to Debt Ratio, CFD) – CFD = (Fluss ta’ Flus)/Dejn |
(d) |
Proporzjon ta’ Flus (Cash Ratio, CR) – CR = (Flus+Titoli Kummerċjabbli)/(Obbligazzjonijiet Kurrenti) |
(e) |
Proporzjon bejn il-Kapital Operatorju Nett u l-Assi Totali (Net Working Capital to Total Assets, NWCTA) – NWCTA = (Assi Kurrenti (Flus, Titoli b’Terminu Qasir, Riċevuti, Inventarji, Assi Kurrenti Oħra))/Assi |
IV)
Indikaturi tal-kapital:
(a) |
Rata ta’ Kapitalizzazzjoni (Capitalisation Rate, CR) – CR = (Introjtu Operatorju Nett)/Kapital |
(b) |
Rendiment tal-Qligħ (Profit Yield, PY) – PY = (Introjtu Nett)/Kapital |
ELI: http://data.europa.eu/eli/reg_del/2024/358/oj
ISSN 1977-074X (electronic edition)