(1)

Is é is aidhm do Threoir 2004/37/CE ó Pharlaimint na hEorpa agus ón gComhairle (3) oibrithe a chosaint ar rioscaí dá sláinte agus dá sábháilteacht a thagann as nochtadh do charcanaiginí nó do shó-ghineacha san ionad oibre. Leis an Treoir sin, déantar foráil maidir le leibhéal comhsheasmhach cosanta ar na rioscaí a bhaineann leis an nochtadh ceirde do charcanaiginí agus só-ghineacha trí bhíthin chreat na bprionsabal ginearálta ionas gur féidir leis na Ballstáit a áirithiú go gcuirfear ceanglais íosta i bhfeidhm ar bhealach comhsheasmhach. Is é is aidhm do na ceanglais íosta sin oibrithe a chosaint ar leibhéal an Aontais. Is féidir leis na Ballstáit forálacha níos déine a shocrú.

(2)

Trí cheanglais íosta a leagan síos le haghaidh cosaint oibrithe ar fud an Aontais, le Treoir 2004/37/CE, feabhsaítear an tsoiléireacht agus cuirtear le machaire comhréidh níos fearr do na gníomhaithe eacnamaíocha sna hearnálacha a úsáideann na substaintí a thagann faoi raon feidhme na Treorach sin, rud a léiríonn tábhacht ghníomhaíocht an Aontais sa réimse sin.

(3)

De réir na fianaise eolaíche is déanaí, is féidir le substaintí atá tocsaineach don atáirgeadh a bheith ina gcúis le héifeachtaí díobhálacha ar an bhfheidhm ghnéasach agus ar thorthúlacht i bhfireannaigh fhásta agus i mbaineannaigh fhásta, agus ar fhorbairt an tsleachta. Ar aon dul le carcanaiginí nó só-ghineacha, is iad is substaintí atá tocsaineach don atáirgeadh substaintí arb údar mór imní iad agus a bhféadfaidís éifeachtaí tromchúiseacha dochúlaithe a bheith acu ar shláinte oibrithe iad substaintí atá tocsaineach don atáirgeadh. Dá bhrí sin, ba cheart substaintí atá tocsaineach don atáirgeadh a rialáil freisin faoi Threoir 2004/37/CE chun feabhas a chur ar an gcomhsheasmhacht, inter alia, le Rialachán (CE) Uimh. 1907/2006 ó Pharlaimint na hEorpa agus ón gComhairle (4) agus chun íosleibhéal cosanta comhchosúil a áirithiú ar leibhéal an Aontais.

(4)

I gcás fhormhór na substaintí atá tocsaineach don atáirgeadh, is féidir, ó thaobh na heolaíochta de, leibhéil a shainaithint nach mbeadh éifeachtaí díobhálacha don tsláinte mar thoradh ar nochtadh faoina mbun. Níor cheart feidhm a bheith ag na ceanglais maidir le híoslaghdú nochta a leagtar síos i dTreoir 2004/37/CE ach amháin maidir leis na substaintí sin atá tocsaineach don atáirgeadh nach féidir leibhéal sábháilte nochta a shainaithint ina leith agus a shainaithnítear mar “shubstaintí neamhthairsí” sa cholún nodaireachta d’Iarscríbhinn III a ghabhann le Treoir 2004/37/CE. Maidir le gach substaint eile atá tocsaineach don atáirgeadh, ba cheart d’fhostóirí a áirithiú go ndéanfar an riosca a bhaineann le nochtadh oibrithe a laghdú a mhéid is féidir.

(5)

De réir na sonraí eolaíocha is déanaí, d’fhéadfadh sé go mbeadh gá le teorainnluachanna bitheolaíocha i gcásanna sonracha chun oibrithe a chosaint ar nochtadh do roinnt carcanaiginí, só-ghineacha nó substaintí atá tocsaineach don atáirgeadh. Dá bhrí sin, ba cheart teorainnluachanna bitheolaíocha agus forálacha ábhartha gaolmhara a áireamh i dTreoir 2004/37/CE.

(6)

Le Prionsabal 10 de Cholún Eorpach na gCeart Sóisialta (5), a rinne Parlaimint na hEorpa, an Chomhairle agus an Coimisiún a fhógairt i gcomhpháirt le chéile ag an gCruinniú Mullaigh Sóisialta do Phoist Chóra agus d’Fhás an 17 Samhain 2017, déantar foráil maidir le ceart na n-oibrithe chun ardleibhéal cosanta dá sláinte agus dá sábháilteacht ag an obair, lena n-áirítear cosaint ar nochtadh do charcanaiginí, do shó-ghineacha agus do shubstaintí atá tocsaineach don atáirgeadh san ionad oibre.

(7)

Is gné thábhachtach de na socruithe ginearálta a bhaineann le hoibrithe a chosaint a bunaíodh le Treoir 2004/37/CE iad teorainnluachanna ceangailteacha um nochtadh ceirde agus ní ceadmhach na teorainnluachanna sin a shárú. Ba cheart teorainnluachanna agus forálacha eile atá ábhartha go díreach a bhunú le haghaidh na gcarcanaiginí, na só-ghineach agus na substaintí sin uile atá tocsaineach don atáirgeadh ar ina leith atá an fhaisnéis, lena n-áirítear sonraí eolaíocha agus teicniúla atá cothrom le dáta, ar fáil lenar féidir déanamh amhlaidh.

(8)

I gcás só-ghineach agus fhormhór na gcarcanaiginí, ní féidir, ó thaobh na heolaíochta de, leibhéil a shainaithint nach mbeadh éifeachtaí díobhálacha sláinte mar thoradh ar nochtadh faoina mbun. Bíodh is nach féidir na rioscaí do shláinte agus sábháilteacht na n-oibrithe as nochtadh do charcanaiginí agus só-ghineacha ag an obair (riosca iarmharach) a dhíothú trí theorainnluachanna maidir le nochtadh do charcanaiginí agus só-ghineacha san ionad oibre a leagan síos i dTreoir 2004/37/CE, ní beag an cúnamh sin, mar sin féin, mar go laghdaítear go mór na rioscaí a eascraíonn as nochtadh dá leithéid sin trí bhíthin an chur chuige céim ar chéim agus chuspóirdhírithe a glacadh sa Treoir sin.

(9)

Ní dochar teorainnluachanna ceangailteacha um nochtadh ceirde do na hoibleagáidí eile atá ar fhostóirí de bhun Threoir 2004/37/CE, amhail úsáid carcanaiginí, só-ghineach agus substaintí atá tocsaineach don atáirgeadh san ionad oibre a laghdú nó nochtadh oibrithe do charcanaiginí, do shó-ghineacha agus do shubstaintí atá tocsaineach don atáirgeadh a chosc nó a laghdú, ná do na bearta ba cheart a chur chun feidhme chun na críche sin. A mhéid is féidir go teicniúil, ba cheart a áireamh ar na bearta sin substaint, meascán nó próiseas a chur in ionad na carcanaigine, an tsó-ghinigh agus na substainte atá tocsaineach don atáirgeadh nach bhfuil contúirteach nó nach bhfuil chomh contúirteach céanna do shláinte oibrithe, córas dúnta a úsáid, nó bearta eile a bhfuil sé d’aidhm acu leibhéal nochta oibrithe a laghdú.

(10)

Is gá oiliúint leordhóthanach agus iomchuí a chur ar oibrithe nuair a nochtar nó nuair is dócha go nochtfar do charcanaiginí, do shó-ghineacha nó do shubstaintí atá tocsaineach don atáirgeadh iad, lena n-áirítear iad siúd atá i dtáirgí íocshláinte guaiseacha áirithe. An oiliúint a cheanglaítear ar an bhfostóir a chur ar fáil de bhun Airteagal 11 de Threoir 2004/37/CE, ba cheart í a oiriúnú chun riosca nua nó athraithe a chur san áireamh, go háirithe nuair a nochtar oibrithe do charcanaiginí nua, do shó-ghineacha nua nó do shubstaintí nua atá tocsaineach don atáirgeadh nó do roinnt carcanaiginí éagsúla, só-ghineacha éagsúla nó substaintí éagsúla atá tocsaineach don atáirgeadh, lena n-áirítear i dtáirgí íocshláinte guaiseacha, nó i gcás athrú ar dhálaí a bhaineann leis an obair.

(11)

Tá substaint amháin nó níos mó i dtáirgí íocshláinte guaiseacha áirithe a chomhlíonann na critéir lena gcur in aicme charcanaigineach (catagóir 1A nó 1B), in aicme shó-ghineach (catagóir 1A nó 1B) nó in aicme mar thocsaineach don atáirgeadh (catagóir 1A nó 1B) i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle (6) agus a thagann, dá bhrí sin, faoi raon feidhme Threoir 2004/37/CE. Níl rochtain éasca ag oibrithe, fostaithe ná údaráis forfheidhmithe, áfach, ar fhaisnéis shoiléir agus nuashonraithe i dtaobh an gcomhlíonann táirge íocshláinte na critéir sin. Chun cur chun feidhme cuí Threoir 2004/37/CE a áirithiú agus chun soiléireacht a chur ar fáil maidir le húsáid na dtáirgí íocshláinte guaiseacha sin agus na rioscaí a bhaineann lena láimhseáil, is gá céimeanna a ghlacadh chun cabhrú le fostóirí iad a shainaithint. I gcomhréir le teachtaireacht ón gCoimisiún an 28 Meitheamh 2021 dar teideal an EU strategic framework on health and safety at work 2021-2027 [creat straitéiseach AE maidir le sláinte agus sábháilteacht ag an obair 2021-2027], tá an Coimisiún le treoirlínte a chur ar fáil, lena n-áirítear maidir le hoiliúint, prótacail, faireachas agus faireachán, chun oibrithe a chosaint ar nochtadh do tháirgí íocshláinte guaiseacha.

(12)

Maidir leis an measúnú riosca dá bhforáiltear in Airteagal 3 de Threoir 2004/37/CE, ba cheart d’fhostóirí aird ar leith a thabhairt, agus measúnú á dhéanamh acu ar nochtadh do tháirgí íocshláinte guaiseacha a thagann faoi raon feidhme na Treorach sin, chun a áirithiú nach rachadh an ceanglas maidir le táirgí den sórt sin a ionadú chun dochair do shláinte na n-othar.

(13)

Leis an Treoir seo, neartaítear cosaint sláinte agus sábháilteachta oibrithe san ionad oibre. Ba cheart teorainnluachanna nua a leagan amach i dTreoir 2004/37/CE i bhfianaise na faisnéise atá ar fáil, lena n-áirítear sonraí eolaíocha agus teicniúla atá cothrom le dáta, agus ba cheart é sin a bheith bunaithe ar mheasúnú críochnúil ar an tionchar socheacnamaíoch a bhíonn ag prótacail maidir le leibhéil nochta a thomhas san ionad oibre agus ar fháil na bprótacal sin. Ba cheart a áireamh ar an bhfaisnéis sin, más féidir, sonraí maidir le rioscaí iarmharacha do shláinte oibrithe, tuairimí ón gCoiste um Measúnú Riosca (RAC) de chuid na Gníomhaireachta Eorpaí Ceimiceán a bunaíodh le Rialachán (CE) Uimh. 1907/2006 (ECHA), agus le tuairimí ón gCoiste Comhairleach um Shábháilteacht agus Sláinte ag an Obair a bunaíodh le Cinneadh ón gComhairle an 22 Iúil 2003 (7) (ACSH). Tá faisnéis a bhaineann le riosca iarmharach, a cuireadh ar fáil go poiblí ar leibhéal an Aontais, luachmhar i ndáil le haon obair a dhéanfar amach anseo ar mhaithe le teorainn a chur leis na rioscaí a eascraíonn as nochtadh ceirde do charcanaiginí, do shó-ghineacha agus do shubstaintí atá tocsaineach don atáirgeadh.

(14)

Ba cheart don Choimisiún a chur de chúram ar ACSH féachaint tuilleadh ar an bhféidearthacht modheolaíocht rioscabhunaithe a ghlacadh ar bhonn na faisnéise atá ar fáil, lena n-áirítear sonraí eolaíocha agus teicniúla, agus é mar aidhm leis teorainnluachanna a shocrú ar leibhéal nochta a chomhfhreagraíonn do riosca go bhforbrófaí éifeacht dhíobhálach ar an tsláinte, amhail ailse, lena n-áirítear an rogha iad a bhunú sa raon idir uasleibhéal riosca agus íosleibhéal riosca.

(15)

I gcomhréir le moltaí RAC agus ACSH, i gcás inar féidir, bunaítear teorainnluachanna do bhealach ionanálaithe an nochta maidir le tréimhse thagartha 8 n-uaire mar mheán am-ualaithe (teorainnluachanna nochta fhadtéarmaigh) agus, i gcás carcanaiginí áirithe, só-ghineacha áirithe agus substaintí áirithe atá tocsaineach don atáirgeadh maidir le tréimhse thagartha níos giorra, 15 nóiméad mar mheán am-ualaithe i gcoitinne (teorainnluachanna nochta ghearrthéarmaigh), chun na héifeachtaí a eascraíonn as nochtadh gearrthéarmach a theorannú, a mhéid is féidir.

(16)

Ina theannta sin, is gá breithniú a dhéanamh ar chonairí ionsúcháin eile seachas ionanálú i gcás na gcarcanaiginí uile, na só-ghineach uile agus na substaintí uile atá tocsaineach don atáirgeadh, lena n-áirítear go bhféadfaidís dul tríd an gcraiceann, chun an leibhéal cosanta is fearr is féidir a áirithiú. Leagtar síos nodaireachtaí breise do shubstaintí guaiseacha agus meascáin ghuaiseacha i Rialachán (CE) Uimh. 1272/2008.

(17)

Is ar shaineolas eolaíoch ábhartha arna sholáthar ag RAC a bhunaítear an measúnú ar éifeachtaí sláinte carcanaiginí faoi réir na Treorach seo. De bhun Comhaontú ar Leibhéal Seirbhíse a shínigh an Ard-Stiúrthóireacht um Fhostaíocht, Gnóthaí Sóisialta agus Cuimsiú de chuid an Choimisiúin agus ECHA, cuireann RAC meastóireachtaí eolaíocha ar fáil maidir le próifíl thocsaineolaíoch gach ceann de na substaintí ceimiceacha tosaíochta roghnaithe i dtaca lena n-éifeachtaí díobhálacha ar shláinte oibrithe.

(18)

Comhlíonann aicrilinítríl na critéir lena cur in aicme charcanaigineach (catagóir 1B) i gcomhréir le Rialachán (CE) Uimh. 1272/2008 agus, dá bhrí sin, is carcanaigin í de réir bhrí Threoir 2004/37/CE. Ar bhonn na faisnéise atá ar fáil, lena n-áirítear sonraí eolaíocha agus teicniúla, is féidir teorainnluach fadtéarmach agus gearrthéarmach a shocrú don charcanaigin sin. Is féidir aicrilinítríl a ionsú tríd an gcraiceann chomh maith. Dá bhrí sin, is iomchuí teorainnluach a bhunú le haghaidh aicrilinítríle faoi raon feidhme Threoir 2004/37/CE agus an nodaireacht “craiceann” a shannadh di. Chomhaontaigh ACSH, bunaithe ar thuairim ó RAC, gurbh fhóinteach an faireachán bitheolaíoch i gcás aicrilinítríle. Ba cheart sin a chur san áireamh agus treoir á forbairt maidir le húsáid phraiticiúil an fhaireacháin bhitheolaíoch.

(19)

Maidir le haicrilinítríl, d’fhéadfadh sé a bheith deacair teorainnluach de 1 mg/m3 (0,45 csm) agus teorainnluach gearrthéarmach 4 mg/m3 (1,8 csm) a chomhlíonadh sa ghearrthéarma. Ba cheart idirthréimhse 4 bliana tar éis theacht i bhfeidhm na Treorach seo a thabhairt isteach, dáta ón mbeidh feidhm ag an Teorainnluachanna um Nochtadh Ceirde (OEL) sin.

(20)

Comhlíonann comhdhúile nicile na critéir lena gcur in aicme charcanaigineach (catagóir 1A) i gcomhréir le Rialachán (CE) Uimh. 1272/2008 agus, dá bhrí sin, is carcanaiginí iad de réir bhrí Threoir 2004/37/CE. Ar bhonn na faisnéise atá ar fáil, lena n-áirítear sonraí eolaíocha agus teicniúla, is féidir teorainnluachanna a shocrú don ghrúpa carcanaiginí sin. D’fhéadfadh íogrú craicinn agus íogrú na conaire riospráide teacht as nochtadh do chomhdhúile nicile san ionad oibre. Dá bhrí sin, is iomchuí dhá theorainnluach a bhunú le haghaidh chodáin in-ionanálaithe agus inanálaithe na gcomhdhúl nicile faoi raon feidhme Threoir 2004/37/CE agus an nodaireacht “íogrú craicinn agus riospráide” a shannadh dóibh.

(21)

Maidir le comhdhúile nicile, d’fhéadfadh sé a bheith deacair teorainnluach 0,01 mg/m3 le haghaidh an chodáin inanálaithe agus teorainnluach 0,05 mg/m3 le haghaidh an chodáin in-ionanálaithe a chomhlíonadh i roinnt earnálacha nó próiseas, go háirithe an bruithniú, scaglanna agus an táthú. De bhreis air sin, ós rud é gur féidir na bearta bainistithe riosca comhionanna a úsáid le haghaidh comhdhúile cróimiam (VI) agus nicile, maidir leis na bearta idirthréimhseacha a bhfuil sé d’aidhm acu nochtadh don dá ghrúpa carcanaiginí sin a laghdú, ba cheart iad a ailíniú. Dá bhrí sin, ba cheart idirthréimhse go dtí an 17 Eanáir 2025 a thabhairt isteach, an dáta sin san áireamh, ar lena linn ba cheart feidhm a bheith ag teorainnluach 0,1 mg/m3 le haghaidh chodán in-ionanálaithe na gcomhdhúil nicile. Leis an idirthréimhse, d’áiritheofaí ailíniú le dáta theacht i bhfeidhm OEL le haghaidh comhdhúile cróimiam (VI) a glacadh le Treoir (AE) 2017/2398 ó Pharlaimint na hEorpa agus ón gComhairle (8).

(22)

Comhlíonann beinséin na critéir lena cur in aicme charcanaigineach (catagóir 1A) i gcomhréir le Rialachán (CE) Uimh. 1272/2008 agus, dá bhrí sin, is carcanaigin í de réir bhrí Threoir 2004/37/CE. Is féidir beinséin a ionsú tríd an gcraiceann chomh maith. Ba cheart an teorainnluach a leagtar amach in Iarscríbhinn III a ghabhann le Treoir 2004/37/CE le haghaidh beinséine a athbhreithniú i bhfianaise sonraí eolaíocha níos nuaí agus is iomchuí an nodaireacht “craiceann” a choinneáil. Chomhaontaigh ACSH, bunaithe ar thuairim ó RAC, gurbh fhóinteach an faireachán bitheolaíoch i gcás beinséine. Ba cheart sin a chur san áireamh agus treoir á forbairt maidir le húsáid phraiticiúil an fhaireacháin bhitheolaíoch.

(23)

Maidir le beinséin, d’fhéadfadh sé a bheith deacair teorainnluach athbhreithnithe 0,2 csm (0,66 mg/m3) a chomhlíonadh i roinnt earnálacha sa ghearrthéarma. Ba cheart, dá bhrí sin, idirthréimhse 4 bliana tar éis theacht i bhfeidhm na Treorach a thabhairt isteach. Mar bheart idirthréimhseach, ba cheart do theorainnluach 1 csm (3,25 mg/m3) dá bhforáiltear i dTreoir (AE) 2019/130 ó Pharlaimint na hEorpa agus ón gComhairle (9) leanúint d’fheidhm a bheith aige go dtí an 5 Aibreán 2024 agus ba cheart feidhm a bheith ag teorainnluach idirthréimhseach 0,5 csm (1,65 mg/m3) ón 5 Aibreán 2024 go dtí an 5 Aibreán 2026.

(24)

Ba cheart an teorainnluach le haghaidh deannach silice criostalta inanálaithe a leagtar amach in Iarscríbhinn III a ghabhann le Treoir (AE) 2017/2398 a athbhreithniú i bhfianaise mheastóireachtaí an Choimisiúin de bhun Threoir 2004/37/CE agus i bhfianaise sonraí eolaíocha agus teicniúla a tháinig chun cinn le déanaí.

(25)

Rinne an Coimisiún comhairliúchán dhá chéim idir na comhpháirtithe sóisialta ar leibhéal an Aontais i gcomhréir le hAirteagal 154 den Chonradh ar Fheidhmiú an Aontais Eorpaigh. Chuaigh sé i gcomhairle le ACSH freisin, a ghlac tuairimí le haghaidh na substaintí tosaíochta uile a bhaineann leis an Treoir seo, agus a mhol teorainnluach ceangailteach um nochtadh ceirde amháin nó níos mó le haghaidh gach ceann acu, chomh maith le nodaireachtaí, i gcás inarb iomchuí.

(26)

Ba cheart grinnscrúdú agus athbhreithniú a dhéanamh ar na teorainnluachanna a bunaíodh sa Treoir seo go rialta chun comhsheasmhacht le Rialachán (CE) Uimh. 1907/2006 a áirithiú. Go háirithe, maidir le beinséin, déanfaidh an Coimisiún, i ndlúthchomhar le ACSH, measúnú ar a indéanta atá sé OEL a laghdú tuilleadh, agus tuairim RAC ó 2018 á cur san áireamh mar aon le haon fhaisnéis nua ábhartha.

(27)

Ós rud é nach féidir leis na Ballstáit cuspóir na Treorach seo, eadhon oibrithe a chosaint ar rioscaí dá sláinte agus dá sábháilteacht, lena n-áirítear rioscaí den sórt sin a chosc, a eascraíonn as nochtadh do charcanaiginí, do shó-ghineacha nó do shubstaintí atá tocsaineach don atáirgeadh ag an obair, nó ar dócha go n-eascróidh siad as, a ghnóthú go leordhóthanach agus, de bharr a fairsinge agus a héifeachtaí, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(28)

Ós rud é gur le cosaint sláinte agus sábháilteachta oibrithe san ionad oibre a bhaineann an Treoir seo, ba cheart í a thrasuí laistigh de 2 bhliain ó dháta a teacht i bhfeidhm.

(29)

Ba cheart, dá bhrí sin, Treoir 2004/37/CE a leasú dá réir sin,