Clár sonrach lena gcuirtear chun feidhme Fís Eorpach — an clár réime um thaighde agus um nuálaíocht

 

ACHOIMRE AR:

Cinneadh (AE) 2021/764 lena mbunaítear an clár sonrach lena gcuirtear chun feidhme Fís Eorpach — an clár réime um thaighde agus um nuálaíocht

CAD IS AIDHM LEIS AN GCINNEADH?

Maidir leis an gcinneadh seo:

• cuirtear chun feidhme leis Rialachán (AE) 2021/695 maidir le Fís Eorpach (féach an achoimre) — an clár réime um thaighde agus um nuálaíocht (T & I), mar a shainítear leis na rialacha mionsonraithe maidir leis an gclár sonrach a chur chun feidhme, mar a shocraítear leis an tréimhse a mhairfidh sé agus mar a sholáthraítear leis na hacmhainn a mheastar a bheith riachtanach.

Aisghairtear Cinneadh 2013/743/AE leis an gcinneadh.

PRÍOMHPHOINTÍ

Féach an achoimre ar Rialachán (AE) 2021/695 le haghaidh níos mó eolais ar chuspóirí, ar struchtúr agus ar bhuiséad Fís Eorpach.

Cuireann an clár sonrach leis na cuspóirí ginearálta agus sonracha atá leagtha amach sa Rialachán maidir le Fís Eorpach (Rialachán (AE) 2021/695).

Is iad seo a leanas na cuspóirí oibriúcháin leis an gclár sonrach:

• buntaighde barr feabhais agus taighde ar thús cadhnaíochta a neartú;
• barr feabhais a neartú agus a scaipeadh, lena n–áirítear trí rannpháirtíocht níos leithne a chothú ar fud an Aontais Eorpaigh (AE);
• na naisc idir taighde, nuálaíocht agus, nuair is cuí, oideachas agus beartais eile a neartú, lena n–áirítear comhlántacht le beartais agus gníomhaíochtaí náisiúnta, réigiúnacha agus AE maidir le taighde agus nuálaíocht;
• tacú le cur chun feidhme thosaíochtaí bheartais an Aontais Eorpaigh, lena n–áirítear spriocanna forbartha inbhuanaithe (SFInna) na Náisiún Aontaithe agus Comhaontú Pháras;
• Taighde agus nuálaíocht atá freagrach a chur chun cinn agus prionsabal an réamhchúraim á chur san áireamh;
• gné na hinscne sa chlár sonrach a neartú;
• naisc um chomhoibriú a neartú i dtaighde agus nuálaíocht na hEorpa agus sna hearnálacha agus disciplíní ar fad, lena n–áirítear na heolaíochtaí sóisialta agus na daonnachtaí;
• an comhar idirnáisiúnta a neartú;
• bonneagar taighde a nascadh agus a fhorbairt ar fud an Limistéir Eorpaigh Taighde (LET) agus rochtain thrasnáisiúnta a sholáthar;
• tallann a mhealladh agus taighdeoirí agus nuálaithe a choimeád sa LET, lena n–áirítear trí shoghluaisteacht;
• eolaíocht oscailte a chothú agus infheictheacht don phobal agus rochtain oscailte ar fhoilseacháin phoiblí agus taighde sonraí, lena n–áirítear eisceachtaí iomchuí, a áirithiú;
• saothrú torthaí taighde agus nuálaíochta a spreagadh agus torthaí a scaipeadh agus a shaothrú go gníomhach, go háirithe chun infheistíochtaí príobháideacha agus forbairt beartas a mhéadú;
• spriocanna uaillmhianacha a sholáthar, trí mhisin taighde agus nuálaíochta, laistigh de spriocdháta socraithe;
• feabhas a chur ar an ngaol agus ar an idirghníomhaíocht idir an eolaíocht agus an tsochaí, lena n–áirítear infheictheacht na heolaíochta sa tsochaí agus cumarsáid na heolaíochta, agus rannpháirtíocht na saoránach agus úsáideoirí deiridh i bpróisis maidir le comhdhearadh agus comhchruthú a chur chun cinn;
• dlús a chur leis an aistriú tionsclaíoch, lena n–áirítear trí scileanna feabhsaithe don nuálaíocht;
• gníomhaíochtaí taighde agus nuálaíochta a spreagadh i bhfiontair bheaga agus mheánmhéide (FBManna) agus cuideachtaí nuálacha a chruthú agus a mhéadú, go háirithe gnólachtaí nuathionscanta, FBManna agus, i gcásanna eisceachtúla, cuideachtaí meánchaipitlithe;
• feabhas a chur ar rochtain ar mhaoiniú riosca, lena n–áirítear trí shineirgí le clár InvestEU arna bhunú le Rialachán (AE) 2021/523 (féach an achoimre), go háirithe i gcás nach soláthraíonn an margadh maoiniú inmharthana.

Agus na cuspóirí sin á gcur i gcrích, d’fhéadfaí na riachtanais nua agus riachtanais gan choinne a thiocfadh chun cinn le linn thréimhse chur chun feidhme an chláir shonraigh a chur san áireamh. D’fhéadfadh freagairtí ar dheiseanna, ar ghéarchéimeanna agus ar bhagairtí atá ag teacht chun cinn a bheith i gceist leis sin, má bhíonn údar cuí leo, chomh maith le freagairtí ar riachtanais a bhaineann le beartais úra AE a fhorbairt.

Is é seo a leanas struchtúr an chláir shonraigh (a thagann le struchtúr an rialacháin maidir le Fís Eorpach, seachas an Institiúid Eorpach um Nuálaíocht agus Teicneolaíocht):

• Colún I — Eolaíocht den scoth
• Colún II — Dúshláin dhomhanda agus iomaíochas tionsclaíoch na hEorpa
• Colún III — An Eoraip Nuálach
• Cuid — Rannpháirtíocht a leathnú agus an LET a neartú.

An Plean Straitéiseach agus na cláir oibre

Tá an clár sonrach éascaithe ag plean straitéiseach ilbhliantúil um ghníomhaíochtaí taighde agus nuálaíochta, lena gcuirtear an chomhsheasmhacht idir na cláir oibre, tosaíochtaí AE agus tosaíochtaí náisiúnta chun cinn.

Tá toradh na pleanála straitéisí leagtha amach i bplean straitéiseach ilbhliantúil, chun ábhar sa chlár oibre lena gcuirtear chun feidhme an clár sonrach a ullmhú, agus cuimseofar ann an méid seo a leanas, de réir mar is cuí agus i measc nithe eile:

• an tionchar measta;
• tásc den mhéid a leithdháileadh ar gach gníomh agus misean agus amchlár táscach cur chun feidhme;
• na nithe seo a leanas i ndáil le deontais:
  • na tosaíochtaí
  • na critéir roghnúcháin agus dámhachtana, agus ualach coibhneasta na gcritéar éagsúil dámhachtana
  • ráta uasta mhaoiniú iomlán na gcostas incháilithe.

Clúdaítear sa phlean straitéiseach uastréimhse 4 bliana, agus solúbthacht leordhóthanach á gcoimeád ionas go bhféadfaidh an tAontas Eorpach aghaidh a thabhairt go tapa ar dhúshláin úra agus ar dhúshláin atá ag teacht chun cinn, ar dheiseanna agus ar ghéarchéimeanna gan choinne. Dírítear go sonrach sa phlean straitéiseach ar an gcolún “Dúshláin dhomhanda agus iomaíochas tionsclaíoch na hEorpa” agus clúdaítear ann chomh maith gníomhaíochtaí ábhartha i gcolún eile agus sa chuid “Rannpháirtíocht a leathnú agus an LET a neartú”.

Buiséad

Tá buiséad EUR 83.397 billiún i bpraghsanna reatha leis an gclár sonrach, chomh maith le buiséad breise EUR 2.790 billiún i bpraghsanna tairiseacha 2018 a thagann as Airteagal 5 de Rialachán (AE, Euratom) 2020/2093 (creat airgeadais ilbhliantúil 2021-2027, féach an achoimre) agus buiséad eile EUR 5.000 billiún i bpraghsanna tairiseacha 2018 a thagann as Ionstraim Théarnamh AE chun tacú leis an téarnamh i ndiaidh ghéarchéim COVID-19 (Rialachán (AE) 2020/2094, féach an achoimre).

CÉN UAIR ATÁ TOSACH FEIDHME AN CHINNIDH?

Tá feidhm leis ón 1 Eanáir 2021.

CÚLRA

Féach chomh maith:

• Fís Eorpach (An Coimisiún Eorpach)
• Fís Eorpach: Cár taighde agus nuálaíochta an Aontais Eorpaigh 2021-2027 (An Coimisiún Eorpach).

PRÍOMHDHOICIMÉAD

Cinneadh (AE) 2021/764 ón gComhairle an 10 Bealtaine 2021lena mbunaítear an Clár Sonrach lena gcuirtear chun feidhme Fís Eorpach — an Clár Réime um Thaighde agus um Nuálaíocht, agus lena n–aisghairtear Cinneadh 2013/743/AE (IO L 167I, 12.5.2021, lgh. 1-80)

DOICIMÉID GHAOLMHARA

Rialachán (AE) 2021/695 ó Pharlaimint na hEorpa agus ón gComhairle an 28 Aibreán 2021 lena mbunaítear Fís Eorpach — an Clár Réime um Thaighde agus um Nuálaíocht, lena leagtar síos a rialacha rannpháirtíochta agus scaipthe, agus lena n–aisghairtear Rialachán (AE) Uimh.1290/2013 agus Rialachán (AE) Uimh. 1291/2013 (IO L 170, 12.5.2021, lgh. 1-68)

Rialachán (AE) 2020/2094 ón gComhairle an 14 Nollaig 2020 lena mbunaítear Ionstraim Théarnaimh de chuid an Aontais Eorpaigh chun tacú leis an téarnamh i ndiaidh ghéarchéim COVID-19 (OJ L 433I, 22.12.2020, lgh. 23-27)

Nuashonraithe 02.07.2021