Rialacha slándála na Comhairle chun faisnéis rúnaicmithe a chosaint (EUCI)

 

ACHOIMRE AR:

Cinneadh 2013/488/AE maidir leis na rialacha slándála chun faisnéis rúnaicmithe AE a chosaint

CAD IS AIDHM LEIS AN GCINNEADH?

Tá sé d’aidhm leis córas slándála cuimsitheach a chur ar bun chun faisnéis rúnaicmithe a chosaint lena gcumhdaítear Comhairle AE, a hArdrúnaíocht (ARC) agus tíortha AE chun tacú le gníomhaíochtaí na Comhairle sna réimsí go léir ina bpléitear le faisnéis rúnaicmithe.

PRÍOMHPHOINTÍ

Raon feidhme

• Leagtar amach sa chinneadh na bunphrionsabail agus na híoschaighdeáin slándála chun Faisnéis Rúnaicmithe AE (FRAE) a chosaint.
• Tá feidhm ag na prionsabail agus na caighdeáin sin maidir leis an gComhairle agus an Ardrúnaíocht agus ní mór do thíortha AE cloí leo de réir a ndlíthe chun a áirithiú go gcuireann siad uile leibhéal cosanta comhionann ar fáil do FRAE.

Faisnéis rúnaicmithe

Ciallaíonn FRAE aon fhaisnéis nó ábhar a ainmnítear le rúnaicmiú slándála AE, agus má nochtar í gan údarú, d’féadfadh tionchar a bheith aige sin ar leasanna AE nó ar leas thír amháin nó níos mó de chuid AE.

Tá 4 leibhéal rúnaicmithe ann:

• 1.

  Top Secret: faisnéis agus ábhar a bhféadfadh nochtadh neamhúdaraithe ina leith a bheith ina chúis le dochar thar a bheith tromchúiseach a dhéanamh do leasanna bunriachtanacha AE nó do leasanna bunriachtanacha ceann amháin nó níos mó de thíortha AE;

• 2.

  Secret: faisnéis agus ábhar a bhféadfadh nochtadh neamhúdaraithe ina leith díobháil thromchúiseach a dhéanamh do leasanna bunriachtanacha AE nó do leasanna bunriachtanacha ceann amháin nó níos mó de thíortha AE;

• 3.

  EU Confidential: faisnéis agus ábhar a bhféadfadh nochtadh neamhúdaraithe ina leith díobháil a dhéanamh do leasanna bunriachtanacha AE nó do leasanna bunriachtanacha ceann amháin nó níos mó de thíortha AE;

• 4.

  EU Confidential: faisnéis agus ábhar a bhféadfadh nochtadh neamhúdaraithe ina leith a bheith míbhuntáistiúil do leasanna bunriachtanacha AE nó do leasanna bunriachtanacha ceann amháin nó níos mó de thíortha AE;

Rochtain ar FRAE

Tá bearta slándála pearsanta deartha chun a áirithiú nach dtugtar rochtain ar FRAE ach do na daoine seo a leanas:

• daoine ar gá dóibh a bheith ar an eolas;
• daoine a bhfuil imréiteach slándála ar an leibhéal ábhartha faighte, nuair is cuí; agus
• daoine a bhfuil a gcuid freagrachtaí curtha in iúl dóibh.

CÉN UAIR ATÁ TOSACH FEIDHME AN CHINNIDH?

Tá feidhm leis ón 15 Deireadh Fómhair 2013.

CÚLRA

Ghlac an Coimisiún Eorpach agus Parlaimint na hEorpa rialacha chomh maith lena rialaítear an chaoi a bpléitear le FRAE:

• Tá rialacha an Choimisiúin leagtha amach i gCinneadh 2015;
• tá rialacha na Parlaiminte leagtha amach sa Chinneadh ón mBiúró a tháinig i bhfeidhm in 2014.

PRÍOMHDHOICIMÉAD

Cinneadh 2013/488/AE ón gComhairle an 23 Meán Fómhair 2013 maidir le rialacha slándála i dtaca le faisnéis rúnaicmithe AE a chosaint (IO L 274, 15.10.2013, lgh. 1-50)

Rinneadh leasuithe comhleanúnacha ar Chinneadh 2013/488/AE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Cinneadh (AE, Euratom) 2015/444 ón gCoimisiún an 13 Márta 2015 maidir le rialacha slándála i dtaca le faisnéis rúnaicmithe AE a chosaint (IO L 72, 17.3.2015, lgh. 53-88)

Cinneadh ó Bhiúró Pharlaimint na hEorpa an 15 Aibreán 2013 maidir leis na rialacha lena rialaítear an tslí ina ndéileálann Parlaimint na hEorpa le faisnéis rúnda (IO C 96, 1.4.2014, lgh. 1-51)

Nuashonraithe 23.11.2018