(1)

De bhun Airteagal 18 de Rialachán (AE) Uimh. 596/2014, eisitheoirí, rannpháirtithe sa mhargadh lamháltas astaíochtaí, ardáin ceantála, ceantálaithe agus ar fhairtheoirí ceant, nó aon duine eile atá ag gníomhú thar a gceann nó ar a gcuntas, ceanglaítear orthu liostaí de dhaoine ar an taobh istigh a tharraingt suas agus iad a choimeád cothrom le dáta i gcomhréir le formáid bheacht.

(2)

Le bunú formáide beaichte, lena n-áirítear teimpléid chaighdeánacha a úsáid, ba cheart cur i bhfeidhm aonfhoirmeach an cheanglais a éascú, is é sin an ceanglas maidir le liostaí de dhaoine ar an taobh istigh a tharraingt suas agus a thabhairt cothrom le dáta, mar a leagtar síos i Rialachán (AE) Uimh. 596/2014. Ba cheart go n-áiritheofaí leis freisin go dtabharfar an fhaisnéis is gá do na húdaráis inniúla chun an cúram a chomhlíonadh maidir le sláine na margaí airgeadais a chosaint agus maidir le drochúsáid mhargaidh a d’fhéadfadh a bheith ann a imscrúdú.

(3)

Ós rud é gur féidir le réimse faisnéise ón taobh istigh a bheith ann laistigh d’eintiteas ag an am céanna, ba cheart go sainaithneofaí go beacht le liostaí de dhaoine ar an taobh istigh an fhaisnéis shonrach ón taobh istigh a bhfuil rochtain ag daoine atá ag obair don eintiteas uirthi. Dá bhrí sin, sna liostaí de dhaoine ar an taobh istigh ba cheart an fhaisnéis shonrach ón taobh istigh a shonrú (arb éard a d’fhéadfadh a bheith inti faisnéis a bhaineann le beart gnó, tionscadal, imeacht — lena n-áirítear cinn chorparáideacha nó airgeadais — foilsiú ráiteas airgeadais nó rabhadh brabúis). Chuige sin, ba cheart na liostaí de dhaoine ar an taobh istigh a roinnt ina rannáin ina mbeidh rannáin ar leith le haghaidh faisnéis shonrach ón taobh istigh. Ba cheart go liostófaí i ngach rannán gach duine ag a bhfuil rochtain ar an bhfaisnéis shonrach chéanna ón taobh istigh.

(4)

Chun iontrálacha iolracha maidir le sonraí pearsanta na ndaoine céanna i rannáin éagsúla den liosta de dhaoine ar an taobh istigh a sheachaint, ba cheart é a bheith indéanta na sonraí pearsanta sin a liostú i rannán ar leith sa liosta de dhaoine ar an taobh istigh, dá ngairtear an rannán maidir le daoine a bhíonn ar an taobh istigh ar bhonn buan, nach mbaineann le faisnéis shonrach ón taobh istigh. Níor cheart go n-áireofaí ar an rannán sin maidir le daoine a bhíonn ar an taobh istigh ar bhonn buan ach na daoine sin a bhfuil rochtain acu i gcónaí, mar gheall ar an sórt feidhme nó poist atá acu, ar gach faisnéis ón taobh istigh laistigh den eintiteas.

(5)

Leasaíodh Rialachán (AE) Uimh. 596/2014 le Rialachán (AE) 2019/2115 ó Pharlaimint na hEorpa agus ón gComhairle (2), lena dtugtar isteach ceanglais nach bhfuil chomh dian le haghaidh eisitheoirí a ligtear isteach a n-ionstraimí airgeadais chun a dtrádála ar mhargadh fáis FBManna (eisitheoirí ar mhargaí fáis FBManna), trí na daoine a liostaítear a theorannú dóibh siúd a bhfuil rochtain rialta acu ar fhaisnéis ón taobh istigh de bharr chineál a bhfeidhme nó a bpoist laistigh den eisitheoir.

(6)

De mhaolú ar an bhforáil sin, féadfaidh na Ballstáit a cheangal ar eisitheoirí ar mhargaí fáis FBManna na daoine ar fad dá dtagraítear in Airteagal 18(1)(a) de Rialachán (AE) Uimh. 596/2014 a áireamh ina gcuid liostaí de dhaoine ar an taobh istigh. Mar sin féin, i bhfianaise na n-acmhainní daonna agus airgeadais níos lú a bhíonn ag FBManna de ghnáth, measadh go mbeadh sé comhréireach dóibh úsáid a bhaint as formáid lena mbaineann ualach riaracháin níos éadroime i gcomparáid le formáid na liostaí de dhaoine ar an taobh istigh a bhunaíodh de bhun Airteagal 18(1), pointe (a), de Rialachán (AE) Uimh. 596/2014, agus inneachar na liostaí a theorannú don mhéid atá fíor-riachtanach chun na daoine aonair ábhartha a shainaithint. Bheadh sé ina fhaoiseamh d’eisitheoirí mura gcuirfí iallach orthu sonraí teagmhála pearsanta a choinneáil ar a gcuid liostaí, ní bheadh orthu sonraí a bhailiú agus a thabhairt cothrom le dáta ó dhaoine ar an taobh istigh ach fós féin ní bhainfí uirlis d’údaráis inniúla náisiúnta, uirlis a úsáidtear chun daoine a láimhseálann an fhaisnéis ón taobh istigh a shainaithint agus chun teacht orthu ag a dteagmháil ghairmiúil. Ba cheart an deis a bheith ag na heisitheoirí sin freisin sonraí na ndaoine a bhfuil rochtain acu, mar gheall ar an sórt feidhme nó poist atá acu, ar an bhfaisnéis uile ón taobh istigh i gcónaí a liostú i rannán maidir le daoine a bhíonn ar an taobh istigh ar bhonn buan den liosta de dhaoine ar an taobh istigh seachas na sonraí pearsanta a bhaineann le daoine a bhíonn ar an taobh istigh ar bhonn buan a chur le gach liosta a bhaineann go sonrach le beart gnó nó imeacht. Ba cheart go mbeadh a bhfuil i rannáin bhuana den sórt sin ar an taobh istigh teoranta freisin don mhéid atá fíor-riachtanach chun na daoine ábhartha a shainaithint.

(7)

Ba cheart na sonraí pearsanta is gá chun na daoine ar an taobh istigh a shainaithint a bheith sa liosta de dhaoine ar an taobh istigh. Aon phróiseáil a dhéantar ar shonraí pearsanta chun liostaí de dhaoine ar an taobh istigh dá dtagraítear in Airteagal 18 de Rialachán (AE) Uimh. 596/2014 a bhunú agus a choimeád, ba cheart an phróiseáil sin a bheith i gcomhréir le Rialachán (AE) 2016/679 ó Pharlaimint na hEorpa agus ón gComhairle (3).

(8)

Ba cheart sonraí a bheith sna liostaí de dhaoine ar an taobh istigh freisin, ar sonraí iad a d’fhéadfadh cabhrú leis na húdaráis inniúla imscrúduithe a dhéanamh, agus cabhrú leo anailís mhear a dhéanamh ar iompraíocht trádála daoine ar an taobh istigh, chun naisc a bhunú idir daoine ar an taobh istigh agus daoine a bhfuil baint acu le trádáil amhrasach, agus chun teagmhálacha a shainaithint eatarthu ag amanna criticiúla. I ndáil leis sin, tá uimhreacha teileafóin riachtanach toisc go gcuireann siad ar chumas an údaráis inniúil gníomhú go tapa agus taifid sonraí tráchta a iarraidh, más gá. Thairis sin, ba cheart na sonraí sin a chur ar fáil ag an tús, ionas nach gcuirfí isteach ar shláine an imscrúdaithe dá mbeadh ar an údarás inniúil dul ar ais chuig an eisitheoir, chuig an rannpháirtí sa mhargadh lamháltas astaíochtaí, chuig an ardán ceantála, chuig an gceantálaí, chuig an bhfairtheoir ceant nó chuig an duine ar an taobh istigh le linn imscrúdú chun iarrata breise ar fhaisnéis a dhéanamh.

(9)

Chun a áirithiú gur féidir na liostaí de dhaoine ar an taobh istigh a chur ar fáil don údarás inniúil a luaithe is féidir arna iarraidh sin agus gur féidir iad a nuashonrú gan mhoill i gcónaí, ba cheart an liosta de dhaoine ar an taobh istigh a choinneáil i bhfoirm leictreonach. Ba cheart go n-áiritheofaí leis an bhfoirm leictreonach go gcoinneofar faoi rún an fhaisnéis atá ar áireamh sa liosta de dhaoine ar an taobh istigh. D’fhonn ualach riaracháin díréireach ar eisitheoirí ar mhargaí fáis FBManna a sheachaint, féadfaidh siad an liosta de dhaoine ar an taobh istigh a choinneáil i bhfoirm leictreonach ach níor cheart, áfach, feidhm a bheith ag an gceanglas sin maidir leis na heisitheoirí sin, ar choinníoll go n-áiritheofar iomláine, rúndacht agus sláine na faisnéise.

(10)

D’fhonn an t-ualach riaracháin a laghdú maidir leis na liostaí de dhaoine ar an taobh istigh a chur isteach, ba cheart gurb iad na húdaráis inniúla féin a chinnfidh na modhanna leictreonacha sonracha le haghaidh an tarchurtha, ar choinníoll gur féidir, leis na modhanna leictreonacha sin, na liostaí a choinneáil faoi rún.

(11)

Ar mhaithe le soiléireacht, trédhearcacht agus deimhneacht dhlíthiúil, ba cheart formáidí na liostaí uile de dhaoine ar an taobh istigh dá dtagraítear i Rialachán (AE) Uimh. 596/2014 a chomhdhlúthú in aon ghníomh dlí amháin. Dá bhrí sin, ba cheart an fhormáid le haghaidh na liostaí de dhaoine ar an taobh istigh dá dtagraítear in Airteagal 18(1), pointe (a), de Rialachán (AE) Uimh. 596/2014 agus na liostaí de dhaoine ar an taobh istigh dá dtagraítear in Airteagal 18(6) den Rialachán sin a bheith sa Rialachán seo. Mar thoradh air sin, ba cheart Rialachán Cur Chun Feidhme (AE) 2016/347 ón gCoimisiún (4) a aisghairm.

(12)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (5) agus thug sé a thuairim uaidh an 7 Meitheamh 2021.

(13)

Tá an Rialachán seo bunaithe ar na dréachtchaighdeáin theicniúla cur chun feidhme arna gcur faoi bhráid an Choimisiúin ag an Údarás Eorpach um Urrúis agus Margaí.

(14)

Rinne an tÚdarás Eorpach um Urrúis agus Margaí comhairliúcháin phoiblí oscailte maidir leis na dréachtchaighdeáin theicniúla cur chun feidhme ar a bhfuil an Rialachán seo bunaithe, rinne an tÚdarás anailís ar na costais agus ar na tairbhí a d’fhéadfadh a bheith ag gabháil leo agus d’iarr sé comhairle ón nGrúpa Geallsealbhóirí um Urrúis agus Margaí arna bhunú le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (6),