Maġġoranza kwalifikata

Maġġoranza kwalifikata (MK) hija n-numru ta' voti meħtieġa fil-Kunsill sabiex tkun tista’ tiġi adottata deċiżjoni meta jkunu qegħdin jiġu diskussi kwistjonijiet fuq il-bażi tal-Artikolu 16 tat-Trattat dwar l-Unjoni Ewropea u l-Artikolu 238 tat-Trattat dwar il-Funzjonament tal-Unjoni Ewropea. Taħt il-proċedura leġiżlattiva ordinarja, il-Kunsill jaġixxi b’MK, f’ko-deċiżjoni mal-Parlament Ewropew.

Fl-1 ta’ Novembru 2014, ġiet introdotta proċedura ġdida għal votazzjoni b’MK, ir-regola ta’ ‘maġġoranza doppja’. Hawnhekk, meta l-Kunsill jivvota fuq proposta mressqa mill-Kummissjoni jew mir-Rappreżentant Għoli tal-UE għall-Affarijiet Barranin u l-Politika ta' Sigurtà, tinkiseb MK jekk jiġu ssodisfati 2 kundizzjonijiet:

• ikun hemm 55% tal-pajjiżi tal-UE li jivvotaw favur - jiġifieri 16 minn 28;
• il-proposta tiġi appoġġjata minn pajjiżi li jirrappreżentaw mill-inqas 65% tal-popolazzjoni totali tal-UE.

Meta l-Kunsill jivvota fuq proposta mhux magħmula mill-Kummissjoni jew mir-Rappreżentant Għoli, deċiżjoni tiġi adottata jekk:

• ikun hemm 72% tal-voti tal-pajjiżi tal-UE favur u
• dawn jirrappreżentaw mill-inqas 65% tal-popolazzjoni tal-UE.

Sal-31 ta' Marzu 2017, kull pajjiż tal-UE jista’ jitlob li tittieħed deċiżjoni skont ir-regoli fis-seħħ qabel l-1 ta’ Novembru 2014 (jiġifieri skont ir-regoli definiti mit-Trattat ta' Nizza).

ARA WKOLL

• Coreper
• Il-Kunsill tal-Unjoni Ewropea
• Il-kompromess ta’ Ioannina
• Proċedura leġiżlattiva ordinarja (Kodeċiżjoni)
• Maġġoranza kkwalifikata msaħħa
• Unanimità
• Kemm jiswew il-voti fil-Kunsill
• Sommarju tal-EUR-Lex dwar l-estensjoni tal-votazzjoni b'maġġoranza kkwalifikata u l-proċedura leġislattiva ordinarja
• Maġġoranza kkwalifikata fuq is-sit elettroniku tal-Kunsill tal-Unjoni Ewropea