—

għal Utopia SARL, minn M. Le Berre, avukat,

—

għall-Gvern Franċiż, minn D. Colas u C. Candat, bħala aġenti,

—

għall-Kummissjoni Ewropea, minn A. Caeiros u F. Dintilhac, bħala aġenti,

1

It-talba għal deċiżjoni preliminari tirrigwarda l-interpretazzjoni tal-Artikolu 60 tar-Regolament tal-Kunsill (KEE) Nru 918/83, tat-28 ta’ Marzu 1983, li jwaqqaf sistema Komunitarja ta’ eżenzjoniiet minn dazju doganali (ĠU Edizzjoni Speċjali bil-Malti, Kapitolu 2, Vol. 1, p. 419), kif emendat bl-att li jirrigwarda l-kondizzjonijiet tal-adeżjoni tar-Repubblika Ċeka, ir-Repubblika tal-Estonja, ir-Repubblika ta’ Ċipru, ir-Repubblika tal-Latvja, ir-Repubblika tal-Litwanja, ir-Repubblika tal-Ungerija, ir-Repubblika ta’ Malta, ir-Repubblika tal-Polonja, ir-Repubblika tas-Slovenja u r-Repubblika tas-Slovakkja u l-aġġustamenti għat-trattati li fuqhom hija stabbilita l-Unjoni Ewropea (ĠU 2003 L 236, p. 33, iktar ’il quddiem ir-“Regolament Nru 918/83”), u tar-Regola Ġenerali 5(b) tan-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), kif emendata bir-Regolament tal-Kummissjoni (KE) Nru 1789/2003, tal-11 ta’ Settembru 2003 (ĠU L 281, p. 1, iktar ’il quddiem in-“NM”).

2

Din it-talba tressqet fil-kuntest ta’ kawża bejn id-Direction générale des douanes et droits indirects, ix-Chef de l’Agence de poursuites de la Direction nationale du renseignement et des enquêtes douanières u d-Direction régionale des douanes et droits indirects de Lyon u Utopia SARL (iktar ’il quddiem “Utopia”) dwar avviż għall-irkupru kkontestat minn din il-kumpannija.

3

Ir-Regolament tal-Kunsill (KE) Nru 1186/2009, tas-16 ta’ Novembru 2009, li jistabbilixxi sistema Komunitarja ta’ eżenzjonijiet mid-dazju doganali (ĠU L 324, p. 23), ħassar u ssostitwixxa r-Regolament Nru 918/83, b’effett mill-1 ta’ Jannar 2010. Madankollu, fid-dawl tad-data tal-fatti tal-kawża prinċipali, din tal-aħħar tibqa’ rregolata minn dan ir-regolament tal-aħħar.

4

L-Artikolu 60 tar-Regolament Nru 918/83, l-uniku artikolu taħt it-Titolu XIII ta’ dan ir-regolament, intitolat “Annimali tal-laboratorju, u sustanzi bijoloġiċi jew kimiċi maħsubin għal riċerka” jipprovdi li:

“1.   Eżenzjoni minn dazji fuq l-importazzjoni għandha tingħata fir-rigward ta’:

[...]

2.   L-eżenzjoni msemmija fil-paragrafu 1 għandha tkun limitata għal annimali [...] li huma maħsubin għal:

[...]”

5

L-Artikolu 128 ta’ dan ir-regolament jipprovdi:

“Fejn eżenzjoni minn dazji fuq l-importazzjoni tingħata bil-kondizzjoni li l-oġġetti jitpoġġew għal użu partikolari mir-riċevent, l-awtoritajiet kompetenti biss ta’ l-Istati Membri fit-territorju ta’ liema l-oġġetti msemmijin ħa jintużaw jistgħu jagħtu din l-eżenzjoni.”

6

L-Artikolu 129 tal-imsemmi regolament jipprovdi:

“L-awtoritajiet kompetenti ta’ l-Istati Membri għandhom jieħdu l-miżuri xierqa kollha sabiex jiżguraw li l-oġġetti li tqiegħdu f’ċirkolazzjoni ħielsa, fejn l-eżenzjoni mid-dazji fuq l-importazzjoni tingħata bil-kondizzjoni li l-oġġetti jitpoġġew għal użu partikolari mir-riċevent, ma jistgħux jintużaw għal skopijiet oħrajn mingħajr ma jitħallsu d-dazji fuq l-importazzjoni relevanti, sakemm l-użu alternattiv mhuwiex konformi mal-kondizzjonijiet mniżżla f’dan ir-Regolament.”

7

L-Artikolu 131 tal-istess regolament jipprovdi:

“Fil-każ fejn dan ir-Regolament jipprovdi li l-għotja ta’ eżenzjoni għandha tkun soġġetta għas-sodisfazzjoni ta’ ċerti kondizzjonijiet, il-persuna involuta għandha, għas-sodisfazzjon ta’ l-awtoritajiet kompetenti, tipprovdi prova li dawn il-kondizzjonijiet ġew issodisfati.”

8

In-NM hija bbażata fuq is-sistema armonizzata dinjija għad-deskrizzjoni u l-kodifika ta’ oġġetti (iktar ’il quddiem is-“SA”), redatta mill-Kunsill tal-Kooperazzjoni Doganali, li sar l-Organizzazzjoni Dinjija tad-Dwana, u adottata bil-Konvenzjoni Internazzjonali konkluża fi Brussell fl-14 ta’ Ġunju 1983 u approvata f’isem il-Komunità Ekonomika Ewropea bid-Deċiżjoni tal-Kunsill 87/369/KEE, tas-7 ta’ April 1987 (ĠU L 198, p. 1).

9

L-ewwel parti tan-NM tinkludi sensiela ta’ dispożizzjonijiet preliminari. F’din il-parti, taħt it-Taqsima I, li tikkonċerna r-“Regoli Ġenerali”, tinkludi s-Sezzjoni A, intitolata “Regoli ġenerali għall-interpretazzjoni tan-Nomenklatura Magħquda”. Fost dawn ir-regoli hemm inkluż ir-Regola Ġenerali 5 li tipprovdi li:

“Bħala żieda mad-dispożizzjonijiet ta’ hawn fuq, ir-regoli li ġejjin għandhom japplikaw fir-rigward ta’ oġġetti imsemmijin fihom:

[...]

10

In-nota ta’ qiegħ il-paġna marbuta mat-terminu “imballaġġi” li tinsab taħt ir-regola ġenerali 5(b), tan-NM tippreċiża li:

“It-[terminu ‘imballaġġi’ ifisser] kwalunkwe kontenituri esterni jew interni, holders, sarr jew irfid għajr armar għat-trasport (eż. kontenituri għat-trasport), tarpolini, taljoli jew tagħmir ta’ trasport anċillari. It-terminu. [Dan it-terminu] ma jkoprix il-kontenituri msemmijin fir-regola ġenerali 5(a).”

11

Apparti din in-nota ta’ qiegħ il-paġna, ir-Regola Ġenerali 5(b) tan-NM tirriproduċi eżattament il-kliem tar-Regola Ġenerali 5(b) tas-SA.

12

In-nota ta’ spjegazzjoni marbuta mar-Regola Ġenerali 5(b) tan-NM li tinsab fl-Avviż tal-Kummissjoni Ewropea intitolata “Noti ta’ spjegazzjoni tan-Nomenklatura Magħquda tal-Komunitajiet Ewropej” (ĠU 2002, C 256, p. 1) tistabbilixxi li:

“L-imballaġġi normalment użati għall-kummerċjalizzazzjoni tax-xabriet, ġammijiet, mustarda, ħwawar u oħrajn għandhom jiġu kklassifikati mal-oġġetti li jkunu fihom anki meta dawn ikunu jistgħu jintużaw validament b’mod ripetut.”

13

In-nota ta’ spjegazzjoni marbuta mal-imsemmija regola ġenerali, li hija inkluża fis-SA, tipprevedi li din tal-aħħar “tirregola l-klassifikazzjoni tal-imballaġġi tat-tip normalment użati għal oġġetti li jkunu protetti fihom [iżda li din] ma hijiex obbligatorja meta tali imballaġġi jkunu jistgħu b’mod jintużaw b’mod ripetut, pereżempju fil-każ ta’ ċerti btieti tal-metall jew reċpjenti tal-ħadid għall-gass ikkompressat jew fi stat likwidu”.

14

Utopia, kumpannija li teżerċita l-attività tagħha taħt l-isem kummerċjali Marshall Bioresources, timporta fi Franza annimali li joriġinaw mill-Istati Uniti, li huma maħsuba għar-riċerka fil-laboratorju.

15

Matul is-sena 2006, l-amministrazzjoni doganali Franċiża wettqet verifika a posteriori tal-importazzjonijiet ta’ klieb u ta’ nemes ħajjin imwettqa minn Utopia bejn ix-xahar ta’ Marzu u x-xahar ta’ Diċembru 2004. Din il-verifika wriet li din il-kumpannija wettqet dawn l-importazzjonijiet b’eżenzjoni tad-dazji doganali, billi bbażat ruħha fuq l-Artikolu 60 tar-Regolament Nru 918/83.

16

Din l-amministrazzjoni kkunsidrat li Utopia, li ma kellhiex bħala l-attività tagħha t-tagħlim jew ir-riċerka xjentifika u li ma kinitx tibbenefika mill-awtorizzazzjoni meħtieġa, ma setgħetx titlob il-benefiċċju tal-eżenzjoni tad-dazji doganali previst fl-Artikolu 60. Konsegwentement, l-imsemmija amministrazzjoni kkonstatat, permezz ta’ proċess verbal tas-7 ta’ Marzu 2007, diversi istanzi ta’ ksur doganali li ppermettew li jiġu evitati ċerti ammonti ta’ dazji u ħarġet, fis-27 ta’ Marzu 2007, avviż għall-irkupru ta’ dawn l-ammonti.

17

Fis-26 ta’ Lulju 2007, wara ċ-ċaħda, mill-amministrazzjoni doganali tal-kontestazzjoni ta’ Utopia, din il-kumpannija ppreżentat rikors għall-annullament ta’ dan il-proċess verbal u ta’ dan l-avviż għall-irkupru. Permezz ta’ sentenza tal-10 ta’ Jannar 2011, it-tribunal d’instance ta’ Lyon laqa’ dan ir-rikors u annulla l-imsemmi avviż.

18

L-amministrazzjoni doganali ppreżentat appell minn din is-sentenza quddiem il-cour d’appel de Lyon, li, permezz ta’ sentenza tal-20 ta’ Ottubru 2011, laqgħet l-argument ta’ Utopia bbażat fuq l-applikazzjoni tal-Artikolu 60 tar-Regolament Nru 918/83 fejn iddeċidiet li l-importazzjoni ta’ annimali ħajjin tista’ ssir b’eżenzjoni mid-dazju, peress li dawn l-annimali jkunu maħsuba li jintużaw fil-laboratorju. Għall-kuntrarju, f’din is-sentenza, il-cour d’appel de Lyon ikkonfermat id-dejn doganali kkontestat fir-rigward tal-gaġeġ maħsuba għat-trasport tal-imsemmija annimali ħajjin, fejn ikkunsidrat li dawn ma kinux jikkostitwixxu imballaġġi tal-prodotti, fis-sens tar-Regola Ġenerali 5(b) tan-NM. F’dan ir-rigward, il-cour d’appel de Lyon ċaħdet l-argument ta’ Utopia bbażat fuq il-fatt li l-gaġeġ inkwistjoni fil-kawża prinċipali jinkrew lilha mill-fornitur Amerikan u li kienu ser jiġu rritornati lura lilu wara t-trasport tal-annimali, u li huwa biss l-użu ripetut ta’ dawn il-gaġeġ fit-territorju tal-Unjoni Ewropea li jista’ jitqies li huwa użu ripetut, fis-sens ta’ din ir-Regola Ġenerali 5(b).

19

Ir-rikorrenti fil-kawża prinċipali ppreżentaw appell ta’ kassazzjoni kontra l-imsemmija sentenza tal-cour d’appel de Lyon, li kien jirrigwarda l-kwistjoni dwar l-applikazzjoni, f’dan il-każ, tal-Artikolu 60 tar-Regolament Nru 918/83. Utopia ppreżentat quddiem il-Cour de cassation appell inċidentali li jirrigwarda l-kwistjoni dwar l-applikazzjoni tar-Regola Ġenerali 5(b) tan-NM għall-gaġeġ maħsuba għat-trasport tal-annimali kkonċernati.

20

F’dawn iċ-ċirkustanzi, il-Cour de cassation iddeċidiet li tissospendi l-proċeduri quddiemha u li tagħmel dawn id-domandi preliminari lill-Qorti tal-Ġustizzja:

21

Permezz tal-ewwel domanda tagħha, il-qorti tar-rinviju tistaqsi jekk importatur ta’ annimali speċjalment ippreparati sabiex jintużaw fil-laboratorju, jistax jibbenefika mill-eżenzjoni mid-dazju fuq l-importazzjoni prevista għal dan it-tip ta’ merkanzija mill-Artikolu 60 tar-Regolament Nru 918/83, meta huwa nnifsu ma huwiex stabbiliment pubbliku jew ta’ utilità pubblika jew privata ċċertifikat, li għandu bħala attività prinċipali t-tagħlim jew ir-riċerka xjentifika, iżda li bħala klijenti għandu stabbilimenti li jissodisfaw dawn il-kundizzjonijiet.

22

Jeħtieġ li jitfakkar li, skont l-Artikolu 60, l-eżenzjoni mid-dazju fuq l-importazzjoni għandha tingħata, b’mod partikolari, għal “annimali preparati speċjalment għal użu fil-laboratorju”, sakemm id-destinatarju tagħhom ikollu bħala l-attività prinċipali tiegħu t-tagħlim jew ir-riċerka xjentifika u li dan id-destinatarju jkun stabbiliment pubbliku jew ta’ utilità pubblika, dipartiment rilevanti ta’ tali stabbiliment, jew stabbiliment ta’ natura privata. Madankollu, jekk l-imsemmi stabbiliment ikun stabbiliment ta’ natura privata, huwa għandu jiġi ċċertifikat mill-awtorità kompetenti tal-Istat Membru kkonċernat sabiex jirċievi dawn l-annimali b’eżenzjoni mid-dazju.

23

Għalhekk mill-imsemmi Artikolu 60 jirriżulta li l-applikazzjoni tiegħu teħtieġ li għandhom jiġu ssodisfatti żewġ kundizzjonijiet distinti. Skont l-ewwel waħda minn dawn il-kundizzjonijiet, l-annimali importati għandhom jiġu ppreparati speċjalment sabiex jintużaw fil-laboratorju. Skont it-tieni waħda minn dawn tal-aħħar, id-destinatarju ta’ dawn l-annimali għandu jissodisfa kriterji speċifiċi li jirrigwardaw it-tip ta’ stabbiliment ikkonċernat, l-attività eżerċitata u, eventwalment, il-pussess ta’ ċertifikat.

24

Huwa paċifiku li l-importazzjonijiet inkwistjoni fil-kawża prinċipali jissodisfaw dawn iż-żewġ kundizzjonijiet, li għalihom huma suġġetti rispettivament l-annimali kkonċernati u d-destinatarji ta’ dawn tal-aħħar.

25

Madankollu, l-ewwel domanda magħmula mill-qorti tar-rinviju tirrigwarda l-punt dwar jekk l-importatur tal-annimali msemmija fl-Artikolu 60 tar-Regolament Nru 918/83 għandux, bil-għan li jibbenefika mill-eżenzjoni mid-dazju fuq l-importazzjoni prevista għal dan it-tip ta’ prodotti, jissodisfa l-kriterji li jippermettulu li jiġi kklassifikat bħala destinatarju ta’ dawn l-annimali, fis-sens ta’ dan l-artikolu.

26

F’dan ir-rigward, jeħtieġ li jiġi rrilevat li l-importatur tal-annimali ma huwiex previst fl-imsemmi Artikolu 60.

27

Madankollu, skont ġurisprudenza stabbilita, hemm lok, għall-interpretazzjoni ta’ dispożizzjoni tad-dritt tal-Unjoni, li jittieħed kont mhux biss tat-termini ta’ din tal-aħħar, iżda wkoll tal-kuntest tagħha u l-għanijiet segwiti mil-leġiżlazzjoni li tifforma parti minnha (ara, b’mod partikolari, is-sentenza Brain Products, C‑219/11, EU:C:2012:742, punt 13 u l-ġurisprudenza ċċitata).

28

Fir-rigward tal-kuntest li jinsab fih l-Artikolu 60 tar-Regolament Nru 918/83, jeħtieġ li jiġi rrilevat li dan ir-regolament jipprovdi għal diversi eżenzjonijiet doganali li l-benefiċċju tagħhom huwa marbut espressament mas-sodisfazzjon, mill-importatur, ta’ ċerti kundizzjonijiet. Għalhekk, l-importazzjoni bla dazju prevista fl-Artikolu 2 tal-imsemmi regolament jistabbilixxi kundizzjonijiet marbuta mal-importatur kif ukoll man-natura tal-oġġett importat, li jistabbilixxu li l-prodott għandu jiġi importat minn persuna fiżika li tittrasferixxi r-residenza normali tagħhom lejn it-territorju doganali tal-Unjoni (sentenza Treimanis, C‑487/11, EU:C:2012:556, punti 15 u 16).

29

Għall-kuntrarju, il-benefiċċju ta’ eżenzjonijiet doganali oħra previsti mir-Regolament Nru 918/83 jiddependi qabel xejn iktar fuq l-użu mid-destinatarju tal-prodott importat milli fuq l-identità tal-importatur. Dan japplika wkoll, b’mod partikolari, fir-rigward tal-eżenzjoni li jibbenefikaw minnha l-prodotti ta’ natura edukattiva, xjentifika jew kulturali maħsuba għal ċerti organi ta’ riċerka jew ta’ tagħlim, prevista fl-Artikolu 51 ta’ dan ir-regolament.

30

Għandu jiġi kkonstatat li l-eżenzjoni prevista fl-Artikolu 60 tar-Regolament Nru 918/83 taqa’ taħt din it-tieni kategorija ta’ eżenzjonijiet, li l-benefiċċju tagħhom jiddependi iktar fuq l-użu mid-destinatarju tal-prodott importat milli fuq l-identità tal-importatur.

31

Jeħtieġ ukoll li jiġi rrilevat, kif tagħmel il-Kummissjoni, li mill-kliem tal-Artikoli 128 u 129 tar-Regolament Nru 918/83 jirriżulta li l-leġiżlatur tal-Unjoni ppreveda l-ipoteżi fejn l-importatur jista’ jkun persuna differenti mid-destinatarju tal-prodott importat, f’sitwazzjonijiet bħal dawk previsti fl-Artikolu 60 ta’ dan ir-regolament.

32

F’dan ir-rigward, hemm lok li jiġi kkunsidrat li mit-termini tal-Artikoli 128 u 129 tar-Regolament Nru 918/83, moqrija flimkien mal-Artikolu 131 ta’ dan tal-aħħar jirriżulta, minn naħa, li importatur jista’ jibbenefika mill-eżenzjoni msemmija fl-Artikolu 60 tal-imsemmi regolament unikament jekk jipprova, għas-sodisfazzjoni tal-awtoritajiet kompetenti, li l-prodotti importati huma effettivament maħsuba għall-istabbilimenti previsti fl-imsemmi artikolu u għall-finijiet tal-użu li jikkundizzjona din l-eżenzjoni, u, min-naħa l-oħra, li huma biss l-awtoritajiet kompetenti tal-Istat Membru li fit-territorju għandhom jintużaw dawn il-prodotti li li jistgħu jagħtu l-imsemmija eżenzjoni. Għall-kuntrarju, bl-ebda mod ma jirriżulta minn dawn id-dispożizzjonijiet tal-imsemmija artikoli li l-importatur għandu jkun jista’ jiżgura huwa stess l-użu li jikkundizzjona l-għoti tal-eżenzjoni inkwistjoni.

33

Fir-rigward tal-għan segwit mill-Artikolu 60 tar-Regolament Nru 918/83, jeħtieġ li jiġi kkonstatat li t-twettiq ta’ dan l-għan, li jikkonsisti fl-iffaċilitar tal-attivitajiet ta’ riċerka billi jippermetti lil ċerti stabbilimenti bbażati fl-Unjoni li jimportaw, bl-inqas spejjeż, annimali speċjalment ippreparati sabiex jintużaw fil-laboratorju, ma jiġix ostakolat mill-possibbiltà, għall-dawn l-istabbilimenti, li jagħżlu s-soluzzjoni ta’ importazzjoni l-iktar adegwata u l-iktar vantaġġuża għalihom.

34

Konsegwentement, fid-dawl tal-kuntest li jaqa’ taħtu l-Artikolu 60 tar-Regolament Nru 918/83 u tal-għan segwit minn din id-dispożizzjoni, ma huwiex rikjest li l-importatur tal-annimali msemmija f’dan l-artikolu, sabiex jibbenefika mill-eżenzjoni mid-dazju fuq l-importazzjoni prevista għal dan it-tip ta’ prodotti, għandu jissodisfa l-kriterji li jippermettulu li jiġi kklassifikat bħala destinatarju ta’ dawn l-annimali, fis-sens tal-imsemmi artikolu.

35

Mill-kunsiderazzjonijiet preċedenti kollha jirriżulta li jeħtieġ li tingħata risposta għall-ewwel domanda li l-Artikolu 60 tar-Regolament Nru 918/83 għandu jiġi interpretat fis-sens li, jekk l-annimali ppreparati speċjalment sabiex jintużaw fil-laboratorju li importatur idaħħal fit-territorju tal-Unjoni jkunu maħsuba għal stabbiliment pubbliku jew ta’ utilità pubblika jew privata ċċertifikat, li jkollu bħala l-attività prinċipali tiegħu t-tagħlim jew ir-riċerka xjentifika, dan l-importatur, minkejja li ma jkunx huwa stess tali stabbiliment, jista’ jibbenefika mill-eżenzjoni mid-dazju fuq l-importazzjoni prevista f’dan l-artikolu għal dan it-tip ta’ prodott.

36

Permezz tat-tieni domanda tagħha, il-qorti tar-rinviju tistaqsi, essenzjalment, jekk ir-Regola Ġenerali 5(b) tan-NM għandhiex tiġi interpretata fis-sens li l-gaġeġ li jintużaw għat-trasport ta’ annimali ħajjin maħsuba għar-riċerka fil-laboratorju jaqgħux fil-kategorija tal-imballaġġi li għandhom jiġu kklassifikati mal-prodotti li jkunu fihom.

37

Hemm lok li jitfakkar li, skont din ir-regola ġenerali, l-imballaġġi li jinkludu l-prodotti jiġu kklassifikati ma’ dawn tal-aħħar unikament meta dawn ikunu tat-tip normalment użat għal din in-natura ta’ prodotti.

38

Għaldaqstant, bil-għan li tingħata risposta għat-tieni domanda, jeħtieġ li jiġi vverifikat jekk il-gaġeġ użati għat-trasport ta’ annimali ħajjin maħsuba għar-riċerka fil-laboratorju jistgħux jitqiesu li jaqgħu taħt it-tip ta’ imballaġġi normalment użat għal din in-natura ta’ annimali.

39

F’dan ir-rigward, hemm lok li jitfakkru l-eżempji li jinsabu fin-noti ta’ spjegazzjoni marbuta man-NM u mas-SA, fir-rigward tal-imballaġġi li għandhom jitqiesu li huma tat-tip normalment użat għan-natura ta’ prodotti li jkunu fihom. Skont dawn in-noti ta’ spjegazzjoni, jikkostitwixxu tali imballaġġi ċerti btieti tal-metall jew reċipjenti tal-ħadid għall-gass ikkompressat jew fi stat likwidu jew inkella l-imballaġġi normalment użati għall-kummerċjalizzazzjoni ta’ xarbiet, ġammijiet, mustarda, ħwawar u oħrajn.

40

Kif irrileva l-Gvern Franċiż fl-osservazzjonijiet tiegħu, minn dan isegwi li l-imballaġġi normalment użati mal-prodotti li jkunu fihom huma jew imballaġġi li huma strettament neċessarji għall-użu tal-prodotti inkwistjoni, jew imballaġġi li normalment jintużaw għall-kummerċjalizzazzjoni u l-użu tal-prodotti li jkunu fihom. Fil-fatt, ikun impossibbli l-użu ta’ gass ikkompressat jew fi stat likwidu b’mod indipendenti mir-reċipjenti tal-ħadid li jkunu fih. Bl-istess mod, hija diffiċilment konċepibbli l-kummerċjalizzazzjoni jew l-użu tal-ġamm jew tal-mustarda mingħajr l-użu tar-reċipjenti normalment previsti sabiex jikkontjenu dawn it-tip ta’ prodotti.

41

Fid-dawl tan-noti ta’ spjegazzjoni marbuta man-NM u mas-SA, hemm lok li jiġi kkunsidrat li l-gaġeġ li jintużaw għat-trasport ta’ annimali ħajjin maħsuba għar-riċerka fil-laboratorju ma jistgħux jitqiesu li jaqgħu taħt it-tip ta’ imballaġġ normalment użat għal din in-natura ta’ annimal, fis-sens tar-Regola Ġenerali 5(b). Fil-fatt, filwaqt li jiġi ammess li dawn il-gaġeġ huma normalment użati għat-trasport bl-ajru ta’ dawn l-annimali, dawn tal-aħħar la huma strettament neċessarji u lanqas abitwalment użati għall-kummerċjalizzazzjoni u l-użu tal-imsemmija annimali.

42

F’dan ir-rigward, jeħtieġ li jiġi rrilevat li mill-atti tal-proċess li jinsab għad-dispożizzjoni tal-Qorti tal-Ġustizzja jirriżulta li, normalment, il-gaġeġ għat-trasport u l-annimali inkwistjoni fil-kawża prinċipali ma jintużawx flimkien mid-destinatarji tagħhom. F’dan il-każ, huwa paċifiku li dawn il-gaġeġ jiġu rritornati lura lill-importatur wara l-kunsinna tal-annimali.

43

Minn dawn il-kunsiderazzjonijiet preċedenti jirriżulta li r-risposta għat-tieni domanda għandha tkun li r-Regola Ġenerali 5(b) tan-NM għandha tiġi interpretata fis-sens li gaġeġ użati għat-trasport ta’ annimali ħajjin maħsuba għar-riċerka fil-laboratorju ma jaqgħux taħt il-kategorija tal-imballaġġi li għandhom jiġu kklassifikati mal-prodotti li jkunu fihom.

44

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (It-Tmien Awla) taqta’ u tiddeċiedi: