SENTENZA TAL-QORTI TAL-ĠUSTIZZJA (L-Ewwel Awla)
14 ta’ Ottubru 2021 ( *1 )
“Rinviju għal deċiżjoni preliminari – Regolament (UE) Nru 528/2012 – Artikolu 3(1)(a) u (c) – Kunċetti ta’ ‘prodott bijoċidali’ u ta’ ‘sustanza attiva’ – Kundizzjonijiet – Mod ta’ azzjoni minbarra sempliċi azzjoni fiżika jew mekkanika – Artikolu 9(1)(a) – Approvazzjoni ta’ sustanza attiva – Portata tal-approvazzjoni”
Fil-Kawża C‑29/20,
li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Oberlandesgericht Köln (il-Qorti Reġjonali Superjuri ta’ Köln, il-Ġermanja), permezz ta’ deċiżjoni tal‑10 ta’ Jannar 2020, li waslet fil-Qorti tal-Ġustizzja fit‑23 ta’ Jannar 2020, fil-proċedura
Biofa AG
vs
Sikma D. Vertriebs GmbH und Co. KG,
IL-QORTI TAL-ĠUSTIZZJA (L-Ewwel Awla),
komposta minn L. Bay Larsen (Relatur), Viċi President tal-Qorti tal-Ġustizzja, li qiegħed jaġixxi bħala President tal-Ewwel Awla, N. Jääskinen u J.‑C. Bonichot, Imħallfin,
Avukat Ġenerali: A. Rantos,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
– |
għal Biofa AG, minn C. Stallberg, Rechtsanwalt, |
– |
għal Sikma D. Vertriebs GmbH und Co. KG, minn B. Münster, Rechtsanwalt, |
– |
għall-Kummissjoni Ewropea, minn R. Lindenthal u M. Noll‑Ehlers, bħala aġenti, |
wara li semgħet il-konklużjonijiet tal-Avukat Ġenerali, ippreżentati fis-seduta tal‑20 ta’ Mejju 2021,
tagħti l-preżenti
Sentenza
1 |
It-talba għal deċiżjoni preliminari tirrigwarda l-interpretazzjoni tal-Artikolu 3(1)(a) u tal-Artikolu 9(1)(a) tar-Regolament (UE) Nru 528/2012 tal-Parlament Ewropew u tal-Kunsill tat‑22 ta’ Mejju 2012 dwar it-tqegħid fis-suq u l-użu tal-prodotti bijoċidali (ĠU 2012, L 167, p. 1 u r-rettifika fil-ĠU 2017, L 280, p. 58), kif emendat bir-Regolament (UE) Nru 334/2014 tal-Parlament Ewropew u tal-Kunsill tal‑11 ta’ Marzu 2014 (ĠU 2014, L 103, p. 22) (iktar ’il quddiem ir-“Regolament Nru 528/2012”). |
2 |
Din it-talba tressqet fil-kuntest ta’ tilwima bejn Biofa AG, kumpannija li tiżviluppa u tikkummerċjalizza prodotti bijoċidali, u Sikma D. Vertriebs GmbH und Co. KG (iktar ’il quddiem “Sikma”), kumpannija ta’ bejgħ online ta’ prodotti għall-ġlieda kontra l-organiżmi ta’ ħsara, u li tirrigwarda l-kummerċjalizzazzjoni minn Sikma ta’ prodotti li fihom sustanza attiva li kienet is-suġġett ta’ approvazzjoni u li hija intiża għall-użu fil-prodotti bijoċidali. |
Il-kuntest ġuridiku
Id-dritt tal-Unjoni
Ir-Regolament Nru 528/2012.
3 |
Il-premessi 1, 3 u 9 tar-Regolament (UE) Nru 528/2012 huma fformulati kif ġej:
[…]
[…]
|
4 |
L-Artikolu 1 ta’ dan ir-regolament, intitolat “Għan u suġġett”, jipprovdi: “1. L-għan ta’ dan ir-Regolament huwa li jtejjeb il-funzjonament tas-suq intern permezz tal-armonizzazzjoni tar-regoli dwar it-tqegħid fis-suq u l-użu tal-prodotti bijoċidali, filwaqt li jiżgura livell għoli ta’ protezzjoni kemm tas-saħħa tal-bniedem kif ukoll tal-annimali u tal-ambjent. Id-dispożizzjonijiet ta’ dan ir-Regolament huma bbażati fuq il-prinċipju ta’ prekawzjoni, li l-għan tiegħu hu li jkunu salvagwardjati s-saħħa tal-bniedem, is-saħħa tal-annimali u l-ambjent. […] 2. Dan ir-Regolament jistabbilixxi r-regoli għal:
[…]
[…]” |
5 |
L-Artikolu 3 tal-imsemmi regolament, intitolat “Definizzjonijiet”, jipprevedi, fil-paragrafi 1 u 3 tiegħu: “1. Għall-finijiet ta’ dan ir-Regolament, id-definizzjonijiet li ġejjin għandhom japplikaw:
[…]
[…]
[…]
[…] 3. Il-Kummissjoni tista’, fuq talba ta’ Stat Membru, tiddeċiedi, permezz ta’ atti ta’ implimentazzjoni, […] jekk prodott jew grupp ta’ prodotti speċifiċi humiex prodott bijoċidali jew oġġett ittrattat jew l-ebda wieħed minnhom. Dawk l-atti ta’ implimentazzjoni għandhom jiġu adottati b’konformità mal-proċedura ta’ eżami msemmija fl-Artikolu 82(3).” |
6 |
L-Artikolu 4 tal-istess regolament, intitolat “Kondizzjonijiet għall-approvazzjoni” huwa fformulat kif ġej fil-paragrafu 1 tiegħu: “Sustanza attiva għandha tiġi approvata għal perijodu inizjali mhux itwal minn 10 snin jekk tal-inqas wieħed mill-prodotti bijoċidali li jkun fih dik is-sustanza attiva jista’ jkun mistenni li jissodisfa l-kriterji stipulati fil-punt (b) tal-Artikolu 19(1) b’kont meħud tal-fatturi stipulati fl-Artikolu 19(2) u (5). […]” |
7 |
L-Artikolu 6 tar-Regolament Nru 528/2012, intitolat “Rekwiżiti tad-data għal applikazzjoni”, jipprovdi, fil-paragrafu 1 tiegħu: “Applikazzjoni għall-approvazzjoni ta’ sustanza attiva għandu jkun fiha tal-anqas l-elementi li ġejjin:
[…]” |
8 |
Skont l-Artikolu 9 ta’ dan ir-regolament, intitolat “Approvazzjoni ta’ sustanza attiva”: “1. Il-Kummissjoni għandha meta tirċievi l-opinjoni tal-Aġenzija msemmija fl-Artikolu 8(4), […]:
[…] 2. Is-sustanzi attivi approvati għandhom jiddaħħlu f’lista tal-Unjoni ta’ sustanzi attivi approvati. Il-Kummissjoni għandha żżomm il-lista aġġornata u tagħmilha disponibbli elettronikament għall-pubbliku.” |
9 |
L-Artikolu 19 tal-imsemmi regolament, intitolat “Kondizzjonijiet għall-għotja ta’ awtorizzazzjoni”, jipprevedi, fil-paragrafu 1 tiegħu: “Prodott bijoċidali għajr dawk eliġibbli għal proċedura ta’ awtorizzazzjoni simplifikata f’konformità mal-Artikolu 25 għandu jiġi awtorizzat sakemm jiġu sodisfatti l-kondizzjonijiet li ġejjin:
[…]” |
10 |
L-Artikolu 95 tal-istess regolament, intitolat “Miżuri transizzjonali rigward l-aċċess għad-dossier tas-sustanza attiva”, jipprovdi, fil-paragrafi 1 u 2 tiegħu: “1. Mill-1 ta’ Settembru 2013, l-Aġenzija għandha tagħmel disponibbli għall-pubbliku u għandha taġġorna b’mod regolari lista tas-sustanzi attivi kollha, u s-sustanzi kollha li jiġġeneraw sustanza attiva, li għalihom ikun ġie ppreżentat u aċċettat jew ivvalidat minn Stat Membru dossier […] fi proċedura prevista minn dan ir-Regolament jew dik id-Direttiva […]. Għal kull sustanza rilevanti, il-lista għandha tinkludi wkoll il-persuni kollha li jkunu għamlu tali preżentazzjoni […] Persuna stabbilita fl-Unjoni li timmanifattura jew timporta sustanza rilevanti, waħidha jew fi prodotti bijoċidali […] jew li timmanifattura jew li tagħmel għad-dispożizzjoni fis-suq prodott bijoċidali li jkun magħmul minn, ikun fih jew jiġġenera dik is-sustanza rilevanti […], tista’ fi kwalunkwe ħin tippreżenta lill-Aġenzija dossier sħiħ dwar is-sustanza għal dik is-sustanza rilevanti, ittra għall-aċċess għal dossier sħiħ dwar is-sustanza, jew referenza għal dossier sħiħ dwar is-sustanza li għaliha l-perjodi kollha ta’ protezzjoni tad-data jkunu skadew. […] […] 2. Mill-1 ta’ Settembru 2015, prodott bijoċidali li fih, li jiġġenera jew li jikkonsisti f’sustanza rilevanti, inkluża fil-lista msemmija fil-paragrafu 1, ma għandux jitqiegħed fis-suq sakemm il-fornitur tas-sustanza jew il-fornitur tal-prodott ma jkunx inkluż fil-lista msemmija fil-paragrafu 1 għat-tip(i) tal-prodott li għalih/għalihom jappartjeni l-prodott.” |
Ir-Regolament ta’ Implimentazzjoni (UE) 2017/794
11 |
Skont l-Artikolu 1 tar-Regolament ta’ Implimentazzjoni tal-Kummissjoni (UE) 2017/794 tal‑10 ta’ Mejju 2017 li japprova d-diossidu tas-siliċju Kieselguhr bħala sustanza attiva eżistenti għall-użu fil-prodotti bijoċidali għall-prodotti tat-tip 18 (ĠU 2017, L 120, p. 7). “Id-diossidu tas-siliċju Kieselguhr huwa approvat bħala sustanza attiva għall-użu fil-prodotti bijoċidali għall-prodotti tat-tip 18, soġġett għall-ispeċifikazzjonijiet u l-kundizzjonijiet stabbiliti fl-Anness.” |
Id-dritt Ġermaniż
12 |
Bis-saħħa tal-Artikoli 3 u3a tal-Gesetz gegen den unlauteren Wettbewerb (il-Liġi Kontra l-Kompetizzjoni Żleali, BGBl. 2010 I, p. 254), fil-verżjoni tagħha applikabbli għall-kawża prinċipali, il-ksur ta’ dispożizzjoni legali, li tkun intiża, b’mod partikolari, sabiex tirregola l-aġir tal-operaturi tas-suq fi ħdanu, jikkostitwixxi prattika kummerċjali żleali pprojbita, jekk dan il-ksur ikun tali li jaffettwa b’mod sinjifikattiv l-interessi tal-konsumaturi, ta’ operaturi oħra fis-suq jew tal-kompetituri. |
Il-kawża prinċipali u d-domanda preliminari
13 |
Biofa, kumpannija kummerċjali rregolata mid-dritt Ġermaniż, tiżviluppa u tikkummerċjalizza prodotti bijoċidali. |
14 |
Taħt l-isem kummerċjali InsectoSec®, wieħed minn dawn il-prodotti, użat għall-ġlieda kontra l-parassiti fil-gallinari, jinkludi s-sustanza attiva msejħa “trab diatomaċju” jew “kieselguhr” (iktar ’il quddiem is-“sustanza attiva inkwistjoni”). |
15 |
Biofa, konformement mar-Regolament Nru 528/2012, talbet lill-Kummissjoni Ewropea tapprova s-sustanza attiva inkwistjoni, li ngħatatilha permezz tar-Regolament ta’ Implimentazzjoni 2017/794, bħala sustanza attiva intiża għall-użu fil-prodotti bijoċidali tat-tip ta’ prodott 18, jiġifieri insettiċidi, akariċidi u prodotti għall-kontroll ta’ artropodi oħra, kif deskritti fl-Anness V tar-Regolament Nru 528/2012, bla ħsara għall-ispeċifikazzjonijiet u għall-kundizzjonijiet imsemmija fl-Anness ta’ dan ir-regolament. |
16 |
Mid-deċiżjoni ta’ rinviju jirriżulta li Biofa kienet imniżżla fil-lista ta’ fornituri prevista fl-Artikolu 95(1) tar-Regolament Nru 528/2012. Hija l-unika produttriċi ta’ din is-sustanza attiva. |
17 |
Sikma, kumpannija rregolata mid-dritt Ġermaniż, tikkummerċjalizza l-prodott imsemmi “HS Mikrogur” li fih ukoll is-sustanza attiva inkwistjoni, iżda li huwa propost lis-sidien tal-annimali u lill-industrija tal-ikel għall-finijiet tal-ġlieda kontra d-dud li jinfesta t-tjur. |
18 |
Peress li Sikma ma tixtrix essenzjalment is-sustanza attiva inkwistjoni mingħand Biofa, din tal-aħħar ippreżentat azzjoni quddiem il-Landgericht Köln (il-Qorti Reġjonali ta’ Köln, il-Ġermanja) għal waqfien minn prattika ta’ kompetizzjoni żleali. Insostenn tar-rikors tagħha, Biofa ssostni li l-azzjoni tas-sustanza attiva inkwistjoni li tinsab fil-prodott ikkummerċjalizzat minn Sikma ma tippermettix biss lil dan il-prodott jissodisfa l-funzjoni tiegħu permezz ta’ sempliċi azzjoni fiżika jew mekkanika. Għalhekk, l-imsemmi prodott għandu jiġi kklassifikat bħala “prodott bijoċidali”, fis-sens tal-Artikolu 3(1)(a) tar-Regolament Nru 528/2012. Għaldaqstant, il-kummerċjalizzazzjoni ta’ dan il-prodott minn Sikma tikkostitwixxi prattika kummerċjali illegali bis-saħħa tad-dritt nazzjonali u tikser, barra minn hekk, id-dispożizzjonijiet ta’ dan ir-regolament. |
19 |
Skont Sikma, il-prodott li hija tikkummerċjalizza ma jistax jiġi kklassifikat bħala “prodott bijoċidali”, fis-sens tal-Artikolu 3(1)(a) tar-Regolament Nru 528/2012, inkwantu l-azzjoni tas-sustanza attiva inkwistjoni hija biss fiżika jew mekkanika. |
20 |
Il-Landgericht Köln (il-Qorti Reġjonali ta’ Köln) ċaħdet it-talba ta’ Biofa. Wara li kkunsidrat li hija kellha teżamina jekk il-prodott ikkummerċjalizzat minn Sikma jaqax taħt il-kunċett ta’ “prodott bijoċidali”, fis-sens ta’ din id-dispożizzjoni, din il-qorti ddeċidiet, fuq il-bażi ta’ rapport ta’ perizja nazzjonali, li dan il-prodott ma kienx intiż li jeqred, li jimpedixxi, li jrendi mhux dannuż jew li jipprevjeni l-azzjoni ta’ organiżmi ta’ ħsara jew li jiġġilidhom b’kull mod ieħor permezz ta’ azzjoni differenti minn sempliċi azzjoni fiżika jew mekkanika u li, għaldaqstant, l-imsemmi prodott ma kienx jaqa’ taħt dan il-kunċett. |
21 |
Adita b’appell minn din id-deċiżjoni tal-Landgericht Köln (il-Qorti Reġjonali ta’ Köln) minn Biofa, il-qorti tar-rinviju, l-Oberlandesgericht Köln (il-Qorti Reġjonali Superjuri ta’ Köln, il-Ġermanja), filwaqt li hija inklinata tikkonferma l-fondatezza tal-imsemmija deċiżjoni, tistaqsi madankollu jekk l-approvazzjoni ta’ sustanza attiva permezz ta’ regolament ta’ implimentazzjoni, konformement mal-Artikolu 9 tar-Regolament Nru 528/2012, timplikax li l-qorti adita hija obbligata tikkunsidra li l-prodott li fih din is-sustanza huwa “prodott bijoċidali”, fis-sens tal-Artikolu 3(1)(a) ta’ dan ir-regolament, mingħajr ma l-imsemmija qorti tkun tista’ tiddetermina, jekk ikun il-każ permezz ta’ perizja mmexxija b’ħeffa f’dan ir-rigward, jekk il-kundizzjonijiet magħmula minn din l-aħħar dispożizzjoni humiex issodisfatti. |
22 |
F’dawn iċ-ċirkustanzi, l-Oberlandesgericht Köln (il-Qorti Reġjonali Superjuri ta’ Köln) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domanda preliminari li ġejja: “L-approvazzjoni ta’ sustanza attiva b’regolament ta’ implimentazzjoni skont l-Artikolu 9(1)(a) tar-[Regolament Nru 528/2012] tfisser li huwa stabbilit, fil-proċeduri ġudizzjarji fi Stat Membru, il-fatt li s-sustanza li fuqha hija bbażata l-approvazzjoni hija intiża, għall-finijiet tal-Artikolu 3(1)(a) [ta’ dan ir-regolament], [li jeqirdu, jimpedixxu, irendu mhux dannuż, jipprevjenu l-azzjoni ta’, jew li jeżerċitaw b’mod ieħor effett ta’ kontroll fuq kwalunkwe organiżmu ta’ ħsara] li taġixxi bi kwalunkwe mezz għajr b’azzjoni sempliċement fiżika jew mekkanika, jew hija l-qorti tal-Istat Membru mitluba tiddeċiedi l-kawża li għandha tiddetermina, fil-konstatazzjonijiet ta’ fatt tagħha, jekk il-kundizzjonijiet materjali tal-Artikolu 3(1)(a) [tal-imsemmi regolament] humiex issodisfatti, anki wara l-adozzjoni ta’ regolament ta’ implimentazzjoni?” |
Fuq id-domanda preliminari
23 |
Permezz tad-domanda tagħha, il-qorti tar-rinviju tistaqsi, essenzjalment, jekk l-ewwel inċiż tal-Artikolu 3(1)(a) tar-Regolament Nru 528/2012, moqri flimkien mal-Artikolu 3(1)(c) ta’ dan ir-regolament, għandux jiġi interpretat fis-sens li prodott, intiż li jeqred, li jimpedixxi jew li jrendi mhux dannuż l-organiżmi ta’ ħsara, li fih sustanza attiva approvata bis-saħħa ta’ regolament ta’ implimentazzjoni tal-Kummissjoni, konformement mal-Artikolu 9(1)(a) tal-imsemmi regolament, jaqax, sempliċement minħabba din l-approvazzjoni, taħt il-kunċett ta’ “prodott bijoċidali”, fis-sens tal-ewwel inċiż ta’ dan l-Artikolu 3(1)(a), fejn hija l-qorti nazzjonali kompetenti li għandha tivverifika jekk dan il-prodott jissodisfax il-kundizzjonijiet kollha ffissati minn din l-aħħar dispożizzjoni biex ikun jista’ jaqa’ taħt dan il-kunċett. |
24 |
Preliminarjament, għandu jiġi rrilevat li, peress li d-domanda magħmula tirrigwarda esklużivament l-ipoteżi ta’ prodott “li [fih] sustanza attiva approvata” minn regolament ta’ implementazzjoni, għandu jsir riferiment għad-definizzjoni ta’ “prodott bijoċidali”, li tinsab fl-ewwel inċiż tal-Artikolu 3(1)(a) tar-Regolament Nru 528/2012, li jipprevedi speċifikament tali ipoteżi. |
25 |
Bis-saħħa ta’ din id-dispożizzjoni, “prodott bijoċidali” jfisser “kwalunkwe sustanza jew taħlita, fl-għamla li jiġu fornuti lill-utent, li jikkonsistu minn, li fihom jew li jiġġeneraw sustanza attiva waħda jew aktar, bl-intenzjoni li jeqirdu, jimpedixxu, irendu mhux dannuż, jipprevjenu l-azzjoni ta’, jew li jeżerċitaw b’mod ieħor effett ta’ kontroll fuq kwalunkwe organiżmu ta’ ħsara bi kwalunkwe mezz għajr b’azzjoni sempliċement fiżika jew mekkanika”. |
26 |
Għalhekk, mill-formulazzjoni tal-ewwel inċiż tal-Artikolu 3(1)(a) tar-Regolament Nru 528/2012 jirriżulta li prodott għandu jiġi kklassifikat bħala “prodott bijoċidali”, fis-sens ta’ din id-dispożizzjoni, jekk jissodisfa tliet kundizzjonijiet. L-ewwel, dan il-prodott għandu jkun ikkostitwit minn “sustanza attiva” waħda jew iktar, kemm jekk minħabba l-fatt li jkun fih dawn is-sustanzi jew li jiġġenerahom. It-tieni, l-imsemmi prodott għandu jfittex li jilħaq ċerti għanijiet, jiġifieri li jeqred, li jimpedixxi, jew li jrendi mhux dannużi l-organiżmi ta’ ħsara, li jipprevjeni l-azzjoni tagħhom jew li jeżerċita kontroll fuqhom. It-tielet, il-mod ta’ azzjoni tal-istess prodott għandu jkun “bi kwalunkwe mezz għajr b’azzjoni sempliċement fiżika jew mekkanika”. |
27 |
Il-Qorti tal-Ġustizzja ddeċidiet, f’dan ir-rigward, li sakemm l-effett ta’ prodott jirriżulta minn “kwalunkwe mezz għajr b’azzjoni sempliċement fiżika jew mekkanika”, fis-sens ta’ din id-dispożizzjoni, u sakemm il-kundizzjonijiet l-oħra previsti fiha jiġu ssodisfatti, dan il-prodott jaqa’, inkontestabbilment, fil-kamp ta’ applikazzjoni tal-imsemmija dispożizzjoni (Sentenza tad‑19 ta’ Diċembru 2019, Darie, C‑592/18, EU:C:2019:1140, punt 38). |
28 |
Minn dan isegwi li t-tliet kundizzjonijiet iffissati fl-ewwel inċiż tal-Artikolu 3(1)(a) ta’ dan ir-regolament, kif spjegati fil-punt 24 ta’ din is-sentenza, huma ta’ natura kumulattiva, b’tali mod li l-preżenza, fil-prodott ikkonċernat, ta’ sustanza attiva ma għandhiex bħala effett, waħedha, li tagħtiha l-karatteristika ta’ “prodott bijoċidali”, fis-sens ta’ din id-dispożizzjoni. |
29 |
Madankollu, għandu jiġi ppreċiżat li ċ-ċirkustanza li prodott ikun fih sustanza attiva approvata minn regolament ta’ implimentazzjoni tal-Kummissjoni, konformement mal-Artikolu 9(1)(a) tar-Regolament Nru 528/2012, għandu jitqies bħala indizju sinjifikattiv tal-fatt li l-prodott inkwistjoni jista’ jitqies bħala “prodott bijoċidali”, fis-sens tal-ewwel inċiż tal-Artikolu 3(1)(a) ta’ dan ir-regolament. |
30 |
F’dan ir-rigward, għandu jitfakkar li l-kunċett ta’ “sustanza attiva”, ikopri, skont l-Artikolu 3(1)(c) tal-imsemmi regolament, kull sustanza jew mikro-organiżmu li jeżerċita azzjoni fuq jew kontra l-organiżmi ta’ ħsara. Għalkemm, b’differenza mill-mod ta’ azzjoni ppreċiżat fl-ewwel inċiż tal-punt (a) tal-Artikolu 3(1), il-punt (c) ta’ dan l-aħħar paragrafu ma jinkludi ebda spjegazzjoni dwar il-mod ta’ azzjoni ta’ tali sustanza, madankollu għandu jiġi kkunsidrat, kif irrileva l-Avukat Ġenerali fil-punti 56 sa 62 tal-konklużjonijiet tiegħu, li l-metodu ta’ azzjoni “għajr b’azzjoni sempliċement fiżika jew mekkanika” huwa inerenti għal “sustanza attiva” bħal dik inkwistjoni fil-kawża prinċipali, li ġiet approvata konformement mal-Artikolu 4 tar-Regolament Nru 528/2012. |
31 |
Fil-fatt, kif sostniet il-Kummissjoni fl-osservazzjonijiet bil-miktub tagħha, il-mod ta’ azzjoni ta’ sustanza attiva huwa eżaminat waqt il-proċedura ta’ approvazzjoni ta’ sustanza attiva. F’din l-okkażjoni, il-kundizzjonijiet imsemmija fl-Artikolu 4 tar-Regolament Nru 528/2012 huma vverifikati u, b’mod partikolari, kif jipprevedi b’mod espliċitu l-paragrafu 1 ta’ din id-dispożizzjoni, sustanza attiva tiġi approvata biss jekk mill-inqas prodott bijoċidali li jkun fih din is-sustanza attiva jkun jista’ jissodisfa l-kriterji ta’ awtorizzazzjoni tal-prodotti bijoċidali msemmija fl-Artikolu 19(1)(b) ta’ dan ir-regolament. |
32 |
Barra minn hekk, l-Artikolu 6(1)(a) u (b) tal-istess regolament jipprevedi li l-applikazzjoni għal approvazzjoni ta’ sustanza attiva ma għandhiex tinkludi biss “dossier għas-sustanza attiva” nnifisha, iżda wkoll “dossier li jissodisfa r-rekwiżiti stabbiliti fl-Anness III għal tal-anqas prodott bijoċidali rappreżentattiv wieħed li jkun fih is-sustanza attiva”. |
33 |
Minn dan isegwi li sustanza attiva hija, mid-definizzjoni tagħha stess, imsejħa biex “taġixxi fuq jew kontra organiżmi ta’ ħsara”, fis-sens tal-Artikolu 3(1)(c) tar-Regolament Nru 528/2012, u li din hija approvata biss sa fejn jintwera li din tista’ sservi sabiex jinħoloq prodott li jeżerċita effett ta’ kontroll fuq tali organiżmi għajr b’azzjoni li ma hijiex fiżika jew mekkanika. |
34 |
F’dawn iċ-ċirkustanzi, għandu jiġi kkunsidrat li jekk il-kompożizzjoni ta’ prodott speċifiku hija identika għal dik tal-prodott bijoċidali rappreżentattiv li fih is-sustanza attiva, fis-sens tal-Artikolu 6(1)(b) tar-Regolament Nru 528/2012, il-qorti nazzjonali adita hija għalhekk obbligata li tikklassifika dan il-prodott partikolari bħala “prodott bijoċidali”, fis-sens tal-ewwel inċiż tal-Artikolu 3(1)(a) ta’ dan ir-regolament. |
35 |
L-għan tar-Regolament Nru 528/2012 jikkonferma din l-interpretazzjoni. Kif jirriżulta mill-Artikolu 1(1) ta’ dan ir-regolament, moqri fid-dawl tal-premessa 3 tiegħu, l-għan ta’ dan ir-regolament huwa li jtejjeb il-funzjonament tas-suq intern permezz tal-armonizzazzjoni tar-regoli għat-tqegħid fis-suq u l-użu tal-prodotti bijoċidali, filwaqt li jiżgura livell għoli ta’ protezzjoni kemm tas-saħħa tal-bniedem kif ukoll tal-annimali u tal-ambjent, filwaqt li d-dispożizzjonijiet tiegħu huma bbażati fuq il-prinċipju ta’ prekawzjoni li l-għan tiegħu huwa li jiġu ssalvagwardjati s-saħħa tal-bniedem, is-saħħa tal-annimali u l-ambjent. F’dan ir-rigward, għandu jitfakkar, hekk kif diġà ddeċidiet il-Qorti tal-Ġustizzja, li hija l-preżenza stess ta’ sustanza attiva bħala tali fi prodott li jista’ jippreżenta riskju għall-ambjent (ara, f’dan is-sens, is-sentenzi tal‑1 ta’ Marzu 2012, Söll, C‑420/10, EU:C:2012:111, punt 27, u tad‑19 ta’ Diċembru 2019, Darie, C‑592/18, EU:C:2019:1140, punt 44). |
36 |
Mill-proċess li għandha għad-dispożizzjoni tagħha l-Qorti tal-Ġustizzja jirriżulta li, f’dan il-każ, Biofa semmiet, fl-applikazzjoni tagħha għall-approvazzjoni tas-sustanza attiva inkwistjoni, prodott bijoċidali rappreżentattiv, kompost 100 % minn din is-sustanza attiva. Minn dan jirriżulta li jekk il-kompożizzjoni tal-prodott ikkummerċjalizzat minn Sikma tkun identika għal dik tal-prodott bijoċidali rappreżentattiv, dan l-ewwel prodott ikollu jitqies bħala “prodott bijoċidali”, fis-sens tal-ewwel inċiż tal-Artikolu 3(1)(a) tar-Regolament Nru 528/2012, mingħajr ma Sikma tkun tista’ validament topponi li s-sustanza attiva li tinkludi l-prodott tagħha sservi esklużivament biex tippermetti lil dan tal-aħħar jissodisfa l-funzjoni tiegħu permezz ta’ sempliċi azzjoni fiżika jew mekkanika fuq jew kontra l-organiżmi ta’ ħsara. |
37 |
Fin-nuqqas ta’ dan, tali evalwazzjoni taqa’ f’idejn il-qorti tar-rinviju. |
38 |
Fid-dawl tal-punti preċedenti, hemm lok li r-risposta għad-domanda magħmula tkun li l-ewwel inċiż tal-Artikolu 3(1)(a) tar-Regolament Nru 528/2012, moqri flimkien mal-Artikolu 3(1)(c) ta’ dan ir-regolament, għandu jiġi interpretat fis-sens li prodott, intiż li jeqred, li jimpedixxi jew li jrendi mhux dannuż l-organiżmi ta’ ħsara, li fih sustanza attiva approvata bis-saħħa ta’ regolament ta’ implimentazzjoni tal-Kummissjoni, konformement mal-Artikolu 9(1)(a) tal-imsemmi regolament, ma jaqax, sempliċement minħabba din l-approvazzjoni, taħt dan il-kunċett ta’ “prodott bijoċidali” fis-sens tal-ewwel inċiż tal-Artikolu 3(1)(a), fejn għalhekk hija l-qorti nazzjonali kompetenti li għandha tivverifika jekk dan il-prodott jissodisfax il-kundizzjonijiet kollha ffissati minn din l-aħħar dispożizzjoni biex ikun jista’ jaqa’ taħt dan il-kunċett. Madankollu, fil-każ fejn il-kompożizzjoni tal-imsemmi prodott hija identika għal dik tal-prodott bijoċidali ppreżentat bħala rappreżentattiv waqt l-applikazzjoni għall-approvazzjoni ta’ din is-sustanza attiva, din il-qorti hija obbligata tikkunsidra li dan l-istess prodott jaqa’ taħt l-imsemmi kunċett. |
Fuq l-ispejjeż
39 |
Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, minbarra dawk tal-imsemmija partijiet, ma jistgħux jitħallsu lura. |
Għal dawn il-motivi, il-Qorti tal-Ġustizzja (L-Ewwel Awla) taqta’ u tiddeċiedi: |
L-ewwel inċiż tal-Artikolu 3(1)(a) tar-Regolament (UE) Nru 528/2012 tal-Parlament Ewropew u tal-Kunsill tat‑22 ta’ Mejju 2012 dwar it-tqegħid fis-suq u l-użu tal-prodotti bijoċidali, kif emendat bir-Regolament (UE) Nru 334/2014 tal-Parlament Ewropew u tal-Kunsill tal‑11 ta’ Marzu 2014, moqri flimkien mal-Artikolu 3(1)(c) ta’ dan ir-regolament, għandu jiġi interpretat fis-sens li prodott, intiż li jeqred, li jimpedixxi jew li jrendi mhux dannuż l-organiżmi ta’ ħsara, li fih sustanza attiva approvata bis-saħħa ta’ regolament ta’ implimentazzjoni tal-Kummissjoni, konformement mal-Artikolu 9(1)(a) tal-imsemmi regolament, ma jaqax, sempliċement minħabba din l-approvazzjoni, taħt dan il-kunċett ta’ “prodott bijoċidali” fis-sens tal-ewwel inċiż tal-Artikolu 3(1)(a), fejn għalhekk hija l-qorti nazzjonali kompetenti li għandha tivverifika jekk dan il-prodott jissodisfax il-kundizzjonijiet kollha ffissati minn din l-aħħar dispożizzjoni biex ikun jista’ jaqa’ taħt dan il-kunċett. Madankollu, fil-każ fejn il-kompożizzjoni tal-imsemmi prodott hija identika għal dik tal-prodott bijoċidali ppreżentat bħala rappreżentattiv waqt l-applikazzjoni għall-approvazzjoni ta’ din is-sustanza attiva, din il-qorti hija obbligata tikkunsidra li dan l-istess prodott jaqa’ taħt l-imsemmi kunċett. |
Firem |
( *1 ) Lingwa tal-kawża: il-Ġermaniż.