(1)

L-Unjoni hi mibnija fuq is-solidarjetà, fost iċ-ċittadini tagħha u fost l-Istati Membri. Dak il-valur universali u komuni jiggwida l-azzjonijiet tal-Unjoni u jipprovdi l-għaqda meħtieġa biex tlaħħaq mal-isfidi attwali u dawk tal-ġejjieni għas-soċjetà, li ż-żgħażagħ Ewropej għandhom ir-rieda li jgħinu biex jiġu indirizzati billi jesprimu s-solidarjetà tagħhom fil-prattika. L-Artikolu 2 tat-Trattat dwar l-Unjoni Ewropea (TUE) jenfasizza s-solidarjetà bħala wieħed mill-prinċipji ewlenin tal-Unjoni. Il-prinċipju ta’ solidarjetà huwa msemmi wkoll fl-Artikolu 21(1) TUE bħala wieħed mill-pedamenti tal-azzjoni esterna tal-Unjoni.

(2)

Minħabba ż-żieda sinifikanti fil-ħtiġijiet umanitarji globali u bil-ħsieb li tissaħħaħ il-promozzjoni tas-solidarjetà u l-viżibbiltà tal-għajnuna umanitarja fost iċ-ċittadini tal-Unjoni, hemm bżonn li tiġi żviluppata s-solidarjetà bejn l-Istati Membri u l-pajjiżi terzi milquta minn diżastri naturali jew ikkawżati mill-bniedem.

(3)

L-azzjonijiet ta’ volontarjat ta’ għajnuna umanitarja jenħtieġ li jikkontribwixxu għal rispons umanitarju bbażat fuq il-ħtiġijiet u jkunu ggwidati mill-Kunsens Ewropew dwar l-Għajnuna Umanitarja stabbilit fid-Dikjarazzjoni Konġunta mill-Kunsill u r-Rappreżentanti tal-Gvernijiet tal-Istati Membri mlaqqgħin fil-Kunsill, il-Parlament Ewropew u l-Kummissjoni Ewropea intitolata “Il-Kunsens Ewropew dwar l-Għajnuna Umanitarja” (4). Il-liġi umanitarja internazzjonali u l-liġi internazzjonali dwar id-drittijiet tal-bniedem jenħtieġ li jiġu promossi.

(4)

Fejn xieraq, jenħtieġ li jitqies ir-rwol ċentrali u ġenerali ta’ koordinazzjoni tal-Uffiċċju għall-Koordinazzjoni tal-Affarijiet Umanitarji tan-Nazzjonijiet Uniti (NU) fil-promozzjoni ta’ rispons internazzjonali koerenti għall-kriżijiet umanitarji.

(5)

L-azzjonijiet ta’ volontarjat ta’ għajnuna umanitarja jenħtieġ li jikkontribwixxu għal rispons umanitarju adegwat li jsaħħaħ il-perspettiva tal-ġeneri fil-politika ta’ għajnuna umanitarja tal-Unjoni u li jippromwovu reazzjoni umanitarja adegwata għall-ħtiġijiet speċifiċi tan-nisa u tal-irġiel ta’ kull età. L-azzjonijiet ta’ volontarjat ta’ għajnuna umanitarja jenħtieġ li jqisu l-ħtiġijiet u l-kapaċitajiet ta’ persuni li jinsabu fl-aktar sitwazzjonijiet vulnerabbli, fosthom in-nisa u t-tfal, u persuni l-aktar f’riskju.

(6)

L-azzjonijiet ta’ volontarjat ta’ għajnuna umanitarja jenħtieġ li jistinkaw biex jikkontribwixxu għat-tisħiħ tal-effikaċja u l-effiċjenza tal-għajnuna umanitarja tal-Unjoni, f’konformità mal-prinċipji ta’ Donazzjoni Umanitarja Tajba.

(7)

Id-diskors dwar l-Istat tal-Unjoni tal-14 ta’ Settembru 2016 saħaq fuq il-bżonn li ninvestu fiż-żgħażagħ u ħabbar l-istabbiliment ta’ Korp Ewropew ta’ Solidarjetà bl-għan li jinħolqu opportunitajiet għaż-żgħażagħ madwar l-Unjoni biex dawn jagħtu kontribut sinifikanti lis-soċjetà, juru solidarjetà u jiżviluppaw il-ħiliet tagħhom, biex ikunu jistgħu jiksbu mhux biss esperjenza ta’ xogħol iżda wkoll esperjenza umana imprezzabbli.

(8)

Fil-komunikazzjoni tagħha tas-7 ta’ Diċembru 2016 intitolata “Korp Ewropew ta’ Solidarjetà”, il-Kummissjoni saħqet fuq il-bżonn li jissaħħu l-pedamenti għall-ħidma ta’ solidarjetà madwar l-Ewropa, li ż-żgħażagħ jingħataw aktar opportunitajiet u opportunitajiet aħjar għal attivitajiet ta’ solidarjetà li jkopru firxa wiesgħa ta’ oqsma, u li jingħata appoġġ lill-atturi nazzjonali, reġjonali u lokali fl-isforzi tagħhom biex jindirizzaw sfidi u kriżijiet differenti. Dik il-Komunikazzjoni nediet l-ewwel fażi tal-Korp Ewropew ta’ Solidarjetà li fiha ġew immobilizzati riżorsi taħt programmi differenti tal-Unjoni biex joffru opportunitajiet ta’ volontarjat, ta’ traineeships jew ta’ impjiegi liż-żgħażagħ madwar l-Unjoni.

(9)

Fil-kuntest ta’ dan ir-Regolament, “solidarjetà” hija mifhuma bħala sens ta’ responsabbiltà individwali u kollettiva għall-ġid komuni, li jiġi espress permezz ta’ azzjoni konkreta.

(10)

Il-kontribut ta’ assistenza lil persuni u komunitajiet barra mill-Unjoni li jeħtieġu għajnuna umanitarja, fuq il-bażi tal-prinċipji fundamentali tal-umanità, in-newtralità, l-imparzjalità u l-indipendenza, huwa espressjoni importanti ta’ solidarjetà.

(11)

Hemm bżonn li s-solidarjetà mal-vittmi ta’ kriżijiet u diżastri f’pajjiżi terzi tiġi żviluppata aktar u li jiżdiedu l-għarfien kif ukoll il-viżibbiltà tal-għajnuna umanitarja, u l-volontarjat b’mod ġenerali, bħala attività tul il-ħajja fost iċ-ċittadini tal-Unjoni.

(12)

L-Unjoni u l-Istati Membri impenjaw ruħhom li jimplimentaw l-Aġenda 2030 tan-NU għall-Iżvilupp Sostenibbli u l-Għanijiet ta’ Żvilupp Sostenibbli tagħha, kemm internament kif ukoll permezz ta’ azzjonijiet esterni.

(13)

Fil-konklużjonijiet tiegħu tad-19 ta’ Mejju 2017 dwar l-operazzjonalizzazzjoni tar-rabta bejn l-aspett umanitarju u l-iżvilupp, il-Kunsill irrikonoxxa l-ħtieġa li tissaħħaħ ir-reżiljenza permezz ta’ rabta aħjar bejn l-għajnuna umanitarja u l-kooperazzjoni għall-iżvilupp u li jkomplu jissaħħu r-rabtiet operazzjonali bejn l-approċċi komplementari tal-għajnuna umanitarja, il-kooperazzjoni għall-iżvilupp u l-prevenzjoni tal-kunflitti.

(14)

Iż-żgħażagħ jenħtieġ li jiġu pprovduti b’opportunitajiet faċilment aċċessibbli u inklużivi biex jinvolvu ruħhom f’attivitajiet ta’ solidarjetà, li jistgħu jippermettulhom jesprimu l-impenn tagħhom li jkunu ta’ benefiċċju għall-komunitajiet filwaqt li jiksbu esperjenza, għarfien, ħiliet u kompetenzi siewja għall-iżvilupp personali, edukattiv, soċjali, ċiviku u professjonali tagħhom, u b’hekk itejbu l-impjegabbiltà tagħhom. Dawk l-attivitajiet jenħtieġ li jappoġġaw ukoll il-mobilità tal-voluntiera żgħażagħ, u l-għarfien interkulturali u d-djalogu interkulturali.

(15)

L-attivitajiet ta’ solidarjetà offruti liż-żgħażagħ jenħtieġ li jippermettu kontributi konkreti u ta’ benefiċċju miż-żgħażagħ. L-attivitajiet ta’ solidarjetà jenħtieġ li jwieġbu għall-ħtiġijiet mhux sodisfatti tas-soċjetà u jikkontribwixxu għat-tisħiħ tal-komunitajiet u l-parteċipazzjoni ċivika. L-attivitajiet ta’ solidarjetà jenħtieġ li joffru liż-żgħażagħ l-opportunità li jiksbu għarfien, ħiliet u kompetenzi siewja. L-attivitajiet ta’ solidarjetà jenħtieġ li jkunu finanzjarjament aċċessibbli għaż-żgħażagħ u jitwettqu f’kundizzjonijiet sikuri u tajbin għas-saħħa.

(16)

Il-Programm tal-Korp Ewropew ta’ Solidarjetà (il-‘Programm’) jipprovdi punt ta’ dħul uniku għall-attivitajiet ta’ solidarjetà madwar l-Unjoni u lil hinn minnha. Sabiex il-finanzjament tal-Unjoni u l-impatt tal-Programm ikunu kemm jista’ jkun effikaċi, il-Kummissjoni jenħtieġ li tipprova tistabbilixxi sinerġiji fil-programmi rilevanti kollha b’mod koerenti, iżda mingħajr ma dawn is-sinerġiji jwasslu biex il-fondi jintużaw biex jintlaħqu objettivi għajr dawk stabbiliti f’dan ir-Regolament. Jenħtieġ li jkunu żgurati l-konsistenza u l-komplementarjetà ma’ politiki rilevanti oħrajn tal-Unjoni, bħall-Istrateġija tal-Unjoni Ewropea għaż-Żgħażagħ 2019-2027 (5), u programmi rilevanti oħrajn tal-Unjoni, b’mod partikolari l- l-Programm Erasmus+, stabbilit bir-Regolament (UE) 2021/817 tal-Parlament Ewropew u tal-Kunsill (6). Il-Programm huwa mibni fuq il-kwalitajiet tajbin u fuq is-sinerġiji tal-programmi preċedenti u dawk eżistenti, b’mod partikolari s-Servizz Volontarju Ewropew, stabbilit bir-Regolament (UE) Nru 1288/2013 tal-Parlament Ewropew u tal-Kunsill (7), u l-inizjattiva tal-Voluntiera tal-Għajnuna tal-UE, stabbilita bir-Regolament (UE) Nru 375/2014 tal-Parlament Ewropew u tal-Kunsill (8). Jenħtieġ li tiġi żgurata wkoll il-komplementarjetà ma’ networks eżistenti fil-livell tal-Unjoni li huma pertinenti għal attivitajiet tal-Programm, bħan-network Eurodesk. Barra minn hekk, jenħtieġ li tiġi żgurata l-komplementarjetà bejn l-iskemi relatati eżistenti, b’mod partikolari skemi ta’ solidarjetà nazzjonali bħall-volontarjat, is-servizz ċiviku u skemi ta’ mobilità għaż-żgħażagħ, u l-Programm, biex l-impatt u l-kwalitajiet ta’ dawn l-iskemi jissaħħu u jiġi arrikkiti reċiprokament u, fejn xieraq, issir ħidma fuq il-bażi ta’ prattiki tajbin. Jenħtieġ li l-Programm ma jiħux post skemi nazzjonali simili. Jenħtieġ li jiġi żgurat l-aċċess indaqs taż-żgħażagħ kollha għall-attivitajiet ta’ solidarjetà nazzjonali.

(17)

Sabiex id-durata tiegħu tiġi allinjata ma’ dik tal-qafas finanzjarju pluriennali għall-perijodu mill-1 ta’ Jannar 2021 sal-31 ta’ Diċembru 2027 (il-“QFP 2021-2027”) stabbilit fir-Regolament tal-Kunsill (UE, Euratom) 2020/2093 (9), jenħtieġ li l-Programm jiġi stabbilit għal perijodu ta’ seba’ snin.

(18)

Fir-rigward tal-interpretazzjoni tal-atti legali relatati tal-Unjoni, huwa xieraq li kemm l-attivitajiet ta’ volontarjat transfruntiera u l-volontarjat li jkompli jiġi appoġġat skont ir-Regolament (UE) Nru 1288/2013 jitqiesu ekwivalenti għall-volontarjat li jitwettaq taħt is-Servizz Volontarju Ewropew.

(19)

Il-Programm hu maħsub li jipprovdi opportunitajiet ġodda liż-żgħażagħ biex iwettqu attivitajiet ta’ volontarjat f’oqsma relatati mas-solidarjetà, kif ukoll biex ifasslu u jiżviluppaw proġetti ta’ solidarjetà fuq il-bażi tal-inizjattiva tagħhom stess. Dawk l-opportunitajiet jikkontribwixxu għat-tisħiħ tal-iżvilupp personali, edukattiv, soċjali, ċiviku u professjonali taż-żgħażagħ. Jenħtieġ li l-Programm jappoġġa wkoll attivitajiet ta’ networking għall-parteċipanti u l-organizzazzjonijiet parteċipanti u miżuri li jiżguraw il-kwalità tal-attivitajiet appoġġati u li jsaħħu l-validazzjoni tal-eżiti ta’ tagħlim tal-parteċipanti. Il-Programm b’hekk għandu l-għan li jikkontribwixxi wkoll għall-kooperazzjoni Ewropea rilevanti għaż-żgħażagħ u s-sensibilizzazzjoni għall-impatt pożittiv tiegħu. Huwa xieraq li l-attivitajiet ta’ solidarjetà offruti jsegwu proċedura ċara u dettaljata indirizzata lill-parteċipanti u lill-organizzazzjonijiet parteċipanti, li tistabbilixxi l-passi tal-fażijiet kollha tal-attivitajiet ta’ solidarjetà.

(20)

L-attivitajiet ta’ solidarjetà jenħtieġ li jippreżentaw valur miżjud Ewropew potenzjali u jenħtieġ li jkunu għall-benefiċċju tal-komunitajiet, u jrawmu l-iżvilupp personali, edukattiv, soċjali, ċiviku u professjonali tal-parteċipanti., Jenħtieġ li l-attivitajiet ta’ solidarjetà jiġu żviluppati b’rabta ma’ oqsma differenti, bħal: l-edukazzjoni u t-taħriġ; il-ħidma fost iż-żgħażagħ; l-impjiegi; l-ugwaljanza bejn il-ġeneri; l-intraprenditorija u, b’mod partikolari, l-intraprenditorija soċjali; iċ-ċittadinanza u l-parteċipazzjoni demokratika; l-għarfien interkulturali u d-djalogu interkulturali; l-inklużjoni soċjali; l-inklużjoni ta’ persuni b’diżabilità; il-protezzjoni tal-ambjent u tan-natura; l-azzjoni klimatika; il-prevenzjoni ta’ diżastri, it-tħejjija għalihom u l-irkupru minnhom; l-agrikoltura u l-iżvilupp rurali; il-forniment ta’ oġġetti tal-ikel u mhux tal-ikel; is-saħħa u l-benessri; il-kultura, inkluż il-wirt kulturali; il-kreattività; l-edukazzjoni fiżika u l-isport; l-assistenza soċjali u s-servizzi soċjali’ l-akkoljenza u l-integrazzjoni ta’ ċittadini ta’ pajjiżi terzi, filwaqt li jitqiesu l-isfidi li jħabbtu wiċċhom magħhom persuni li ġejjin minn ambjent ta’ migrazzjoni; il-kooperazzjoni u l-koeżjoni territorjali; u l-kooperazzjoni minn naħa għal oħra tal-fruntieri. L-attivitajiet ta’ solidarjetà jenħtieġ li jinkludu dimensjoni soda ta’ tagħlim u ta’ taħriġ permezz ta’ attivitajiet rilevanti li jiġu offruti lill-parteċipanti qabel, matul u wara l-attività ta’ solidarjetà.

(21)

Il-volontarjat, kemm fi ħdan l-Unjoni kif ukoll lil hinn minnha, jikkostitwixxi esperjenza rikka f’kuntest ta’ tagħlim mhux formali u informali u jssaħħaħ l-iżvilupp personali, soċjoedukattiv u professjonali, iċ-ċittadinanza attiva, il-parteċipazzjoni ċivika u l-impjegabbiltà taż-żgħażagħ. Il- volontarjat jenħtieġ li ma jkollux effett negattiv fuq impjieg bi ħlas potenzjali jew eżistenti u jenħtieġ li ma jitqiesx bħala sostitut għal dan. Jenħtieġ li l-Kummissjoni u l-Istati Membri jikkooperaw fir-rigward tal-politiki ta’ volontarjat fil-qasam taż-żgħażagħ permezz tal-metodu miftuħ ta’ kooperazzjoni.

(22)

L-ispirtu ta’ inizjattiva taż-żgħażagħ hu assi importanti għas-soċjetà u għas-suq tax-xogħol. Il-Programm jikkontribwixxi għat-trawwim ta’ dak l-ispirtu ta’ inizjattiva billi joffri l-opportunità liż-żgħażagħ li jfasslu u jimplimentaw il-proġetti ta’ solidarjetà tagħhom stess bil-għan li jindirizzaw sfidi speċifiċi għall-benefiċċju tal-komunitajiet lokali tagħhom. Il-proġetti ta’ solidarjetà huma opportunità biex jiġu ppruvati ideat li jikkonċernaw, u soluzzjonijiet innovattivi għal, sfidi komuni permezz ta’ approċċ minn isfel għal fuq u dawn jappoġġjaw liż-żgħażagħ biex ikunu huma stess xprun ta’ attivitajiet ta’ solidarjetà. Il-proġetti ta’ solidarjetà jservu wkoll bħala punt tat-tluq għal aktar involviment f’attivitajiet ta’ solidarjetà u huma l-ewwel pass biex il-parteċipanti jitħeġġu sabiex jinvolvu rwieħhom f’impjieg indipendenti u jkomplu jkunu ċittadini attivi bħala voluntiera, trainees jew impjegati f’assoċjazzjonijiet, organizzazzjonijiet nongovernattivi jew korpi oħra attivi fis-settur tas-solidarjetà, ta’ organizzazzjonijiet mingħajr skop ta’ qligħ u dak taż-żgħażagħ.

(23)

Il-parteċipanti fil-voluntarjt (“voluntiera”) jistgħu jikkontribwixxu għat-tisħiħ tal-kapaċità tal-Unjoni li tipprovdi għajnuna umanitarja etika u bbażata fuq il-ħtiġijiet u jistgħu jikkontribwixxu għat-titjib tal-effikaċja tas-settur umanitarju dment li jkunu adegwatament magħżula, mħarrġa u mħejjija għall-mobilizzazzjoni sabiex jiġi żgurat li jkollhom il-ħiliet u l-kompetenzi meħtieġa biex jgħinu lin-nies fil-bżonn bl-aktar mod effikaċi possibbli u dment li jkunu jistgħu jistrieħu fuq appoġġ u superviżjoni suffiċjenti fuq il-post. Għalhekk, ħarrieġa, mentors u esperti b’livell għoli ta’ ħiliet, taħriġ u esperjenza jaqdu rwol importanti billi dawn jikkontribwixxu għall-effikaċja tar-rispons umanitarju fuq il-post kif ukoll għall-appoġġ mogħti lill-voluntiera bħala parti mill-volontarjat. Tali ħarrieġa, mentors u esperti jistgħu jkunu involuti fil-volontarjat sabiex jiggwidaw u jakkumpanjaw lill-voluntiera u jgħinu biex jiġu appoġġati l-komponenti tal-iżvilupp u t-tisħiħ tal-kapaċitajiet tal- volontarjat, biex b’hekk jissaħħu n-networks u l-komunitajiet lokali. Jenħtieġ li tingħata attenzjoni partikolari lill-kapaċità tal-organizzazzjonijiet ospitanti fil-pajjiżi terzi u l-ħtieġa li l-voluntarjat jiġi integrat fil-kuntest lokali u li tiġi ffaċilitata l-interazzjoni tal-voluntiera mal-atturi umanitarji lokali, il-komunità ospitanti u s-soċjetà ċivili.

(24)

Huwa importanti li l-parteċipanti u l-organizzazzjonijiet parteċipanti jħossu li jappartjenu għal komunità ta’ individwi u ta’ entitajiet b’impenn li jsaħħu s-solidarjetà madwar l-Ewropa. Fl-istess ħin, l-organizzazzjonijiet parteċipanti jeħtieġu appoġġ biex isaħħu l-kapaċità tagħhom li joffru attivitajiet ta’ solidarjetà ta’ kwalità tajba lil numru dejjem jikber ta’ parteċipanti. Il-Programm jenħtieġ li jappoġġa l-attivitajiet ta’ networking li għandhom l-għan li jissaħħu l-involviment tal-parteċipanti u tal-organizzazzjonijiet parteċipanti f’tali komunità, li jitrawwem spirtu tal-Programm u li jitħeġġeġ l-iskambju ta’ prattiki u ta’ esperjenza siewja. L-attivitajiet ta’ networking jenħtieġ li jikkontribwixxu wkoll għas-sensibilizzazzjoni dwar il-Programm fost l-atturi pubbliċi u privati u għall-iffaċilitar tal-ġbir ta’ feedback mingħand il-parteċipanti u l-organizzazzjonijiet parteċipanti dwar l-implimentazzjoni tal-Programm.

(25)

Jenħtieġ li tingħata attenzjoni partikolari biex jiġu żgurati l-kwalità tal-attivitajiet ta’ solidarjetà u l-opportunitajiet offruti taħt il-Programm, b’mod partikolari billi jiġu offruti taħriġ, appoġġ lingwistiku u appoġġ amministrattiv online jew offline lill-parteċipanti qabel, matul u wara l-attività ta’ solidarjetà inkwistjoni, kif ukoll assigurazzjoni, inkluż kopertura għal inċidenti, mard u responsabbiltà ta’ partijiet terzi. Jenħtieġ li tiġi żgurata l-validazzjoni tal-għarfien, tal-ħiliet u tal-kompetenzi miksuba mill-parteċipanti permezz tal-esperjenza tagħhom mill-Programm. Is-sigurtà u s-sikurezza tal-parteċipanti, tal-organizzazzjonijiet parteċipanti u tal-benefiċjarji fil-mira jibqgħu ta’ importanza kruċjali. Tali sigurtà u sikurezza jenħtieġ li tinkludi rekwiżiti ta’ awtorizzazzjoni xierqa għall-parteċipanti li jaħdmu ma’ gruppi vulnerabbli skont il-liġi nazzjonali applikabbli. L-attivitajiet kollha ta’ solidarjetà jenħtieġ li jikkonformaw mal-prinċipju ta’ “la tagħmilx ħsara” u jenħtieġ li jiġu implimentati b’kunsiderazzjoni mistħoqqa għall-impatt ta’ ċirkostanzi mhux previsti bħal kriżijiet ambjentali, kunflitti jew pandemiji. Jenħtieġ li l-voluntiera ma jintbagħtux jaħdmu f’operazzjonijiet li jitwettqu f’żoni ta’ kunflitti armati internazzjonali u mhux internazzjonali jew f’faċilitajiet li jmorru kontra l-istandards internazzjonali tad-drittijiet tal-bniedem.

(26)

Il-Programm jenħtieġ li jirrispetta l-prinċipji stabbiliti fil-Linji Gwida tal-UE tal-2017 għall-Promozzjoni u l-Protezzjoni tad-Drittijiet tat-Tfal u fl-Artikolu 9 tal-Konvenzjoni tan-NU dwar id-Drittijiet ta’ Persuni b’Diżabilità.

(27)

Biex jiġi żgurat l-impatt tal-attivitajiet tal-Programm fuq l-iżvilupp personali, edukattiv, soċjali, kulturali, ċiviku u professjonali tal-parteċipanti, jenħtieġ li l-għarfien, il-ħiliet u l-kompetenzi li jiffurmaw l-eżiti ta’ tagħlim tal-attività inkwistjoni jiġu identifikati u dokumentati sew. Għal dak il-għan, jenħtieġ li jitħeġġeġ l-użu ta’ strumenti effettivi fil-livell tal-Unjoni u dak nazzjonali għar-rikonoxximent ta’ tagħlim mhux formali u informali, bħall-Youthpass u l-Europass, kif xieraq, skont iċ-ċirkostanzi u l-ispeċifiċitajiet nazzjonali, kif rakkomandat fir-Rakkomandazzjoni tal-Kunsill tal-20 ta’ Diċembru 2012 (10).

(28)

Il-Kummissjoni u l-aġenziji nazzjonali jenħtieġ ukoll li jinkoraġġixxu lill-parteċipanti preċedenti biex jaqsmu l-esperjenzi tagħhom permezz ta’ networks taż-żgħażagħ, stabbilimenti edukattivi u sessjonijiet ta’ ħidma fi rwoli bħal ambaxxaturi jew bħala membri ta’ network.. Parteċipanti preċedenti jistgħu wkoll jagħtu kontribut għat-taħriġ tal-parteċipanti.

(29)

Tikketta tal-kwalità jenħtieġ li tiżgura li l-organizzazzjonijiet parteċipanti jikkonformaw mal-prinċipji u mar-rekwiżiti tal-Programm fir-rigward tad-drittijiet u tar-responsabbiltajiet tagħhom matul l-istadji kollha tal-esperjenza ta’ solidarjetà.

(30)

Kwalunkwe entità li tixtieq tieħu sehem fil-Programm jenħtieġ li tirċievi tikketta tal-kwalità dment li tikkonforma mal-kondizzjonijiet xierqa. Il-korpi ta’ implimentazzjoni tal-Programm jenħtieġ li jmexxu l-proċess li jwassal għall-attribuzzjoni ta’ tikketta tal-kwalità fuq bażi kontinwa. Il-korpi ta’ implimentazzjoni tal-Programm jenħtieġ li jirrivalutaw perjodikament jekk l-entitajiet jibqgħux jikkonformaw mal-kondizzjonijiet li wasslu għall-attribuzzjoni tat-tikketti tal-kwalità. It-tikketta tal-kwalità jenħtieġ li tiġi revokata fejn jinstab, fil-kuntest tal-verifiki mwettqa mill-korpi ta’ implimentazzjoni tal-Programm, li l-entità inkwistjoni ma għadhiex tikkonforma ma’ dawk il-kondizzjonijiet. Jenħtieġ li l-proċess amministrattiv għall-attribuzzjoni ta’ tikketta tal-kwalità jiqsar kemm jista’ jkun biex ma jaqtax qalb organizzazzjonijiet iżgħar.

(31)

Kwalunkwe entità li tixtieq tapplika għal finanzjament biex toffri attivitajiet ta’ solidarjetà mill-Programm jenħtieġ li l-ewwel tirċievi tikketta tal-kwalità. Jenħtieġ li tali prekondizzjoni ma tapplikax għal persuni fiżiċi li jitolbu appoġġ finanzjarju f’isem grupp informali ta’ parteċipanti għall-proġetti ta’ solidarjetà tagħhom. Il-kisba ta’ tikketta tal-kwalità, madankollu, jenħtieġ li ma twassalx b’mod awtomatiku għal finanzjament mill-Programm.

(32)

Bħala regola ġenerali, jenħtieġ li l-applikazzjonijiet għal għotjiet jintbagħtu lill-aġenzija nazzjonali tal-pajjiż fejn tkun ibbażata l-organizzazzjoni parteċipanti. L-applikazzjonijiet għal għotjiet għal attivitajiet b’dimensjoni tal-Unjoni kollha jew b’dimensjoni internazzjonali, fosthom attivitajiet ta’ solidarjetà ta’ tims ta’ volontarjat f’oqsma ta’ prijorità identifikati fil-livell tal-Unjoni u attivitajiet ta’ solidarjetà b’appoġġ għal operazzjonijiet ta’ għajnuna umanitarja f’pajjiżi terzi, jistgħu jiġu mmaniġġati ċentralment jekk ikun xieraq.

(33)

L-organizzazzjonijiet parteċipanti jistgħu jwettqu bosta funzjonijiet fil-qafas tal-Programm. F’kapaċità ta’ ospitant, jenħtieġ li l-organizzazzjonijiet parteċipanti jwettqu attivitajiet marbuta mal-akkoljenza tal-parteċipanti, inkluż l-organizzazzjoni ta’ attivitajiet u l-għoti ta’ gwida u appoġġ lill-parteċipanti waqt l-attività ta’ solidarjetà, kif xieraq. F’kapaċità ta’ appoġġ, jenħtieġ li huma jwettqu attivitajiet marbuta mal-mobilizzazzjoni tal-parteċipanti, kif ukoll mat-tħejjija tal-parteċipanti qabel, u mal-gwida tagħhom matul u wara l-attività ta’ solidarjetà, inkluż it-taħriġ tal-parteċipanti u l-gwida tagħhom lejn organizzazzjonijiet lokali wara l-attività ta’ solidarjetà sabiex jiżdiedu l-opportunitajiet għal esperjenzi oħra ta’ solidarjetà. It-tikketta tal-kwalità jenħtieġ li tirrifletti l-fatt li rekwiżiti speċifiċi jvarjaw skont it-tip ta’ attività ta’ solidarjetà pprovduta, u tiċċertifika li l-organizzazzjoni tkun kapaċi tiżgura l-kwalità tal-attivitajiet ta’ solidarjetà matul l-istadji kollha tal-esperjenza ta’ solidarjetà, f’konformità mal-prinċipji u l-objettivi tal-Programm. Kwalunkwe entità li sostanzjalment tbiddel l-attivitajiet tagħha jenħtieġ li tinforma lill-korp ta’ implimentazzjoni kompetenti tal-Programm, li jista’ jirrivaluta jekk dik l-entità għandhiex tikkonforma mal-kondizzjonijiet li wasslu għall-attribuzzjoni tat-tikketta kwalità.

(34)

Sabiex l-attivitajiet ta’ solidarjetà fost iż-żgħażagħ jingħataw appoġġ, jenħtieġ li l-organizzazzjonijiet parteċipanti jkunu entitajiet pubbliċi jew privati jew organizzazzjonijiet internazzjonali, sew bi skop ta’ qligħ u sew mingħajr, u jistgħu jinkludu organizzazzjonijiet taż-żgħażagħ, istituzzjonijiet reliġjużi, assoċjazzjonijiet tal-karità, organizzazzjonijiet umanistiċi sekulari, organizzazzjonijiet mhux governattivi jew atturi oħra mis-soċjetà ċivili.

(35)

Jenħtieġ li jiġi ffaċilitat it-tkabbir tal-proġetti tal-Programm. Jenħtieġ li jidħlu fis-seħħ miżuri speċifiċi li jgħinu lill-promoturi tal-Programm biex japplikaw għal għotjiet jew jiżviluppaw sinerġiji permezz ta’ appoġġ għall-Fondi Strutturali u ta’ Investiment Ewropej u l-programmi tal-Unjoni marbuta mal-migrazzjoni, is-sigurtà, il-ġustizzja u ċ-ċittadinanza, is-saħħa u l-kultura.

(36)

Iċ-Ċentri tar-Riżorsi tal-Korp Ewropew ta’ Solidarjetà jenħtieġ li jassistu lill-korpi ta’ implimentazzjoni tal-Programm, lill-organizzazzjonijiet parteċipanti u lill-parteċipanti sabiex titjieb il-kwalità tal-implimentazzjoni tal-attivitajiet tal-Programm u biex tissaħħaħ l-identifikazzjoni u l-validazzjoni tal-kompetenzi miksuba permezz ta’ dawk l-attivitajiet, inkluż permezz tal- Youthpass.

(37)

Il-Portal tal-Korp Ewropew ta’ Solidarjetà jenħtieġ li jibqa’ jiġi żviluppat b’mod kontinwu biex jiġi żgurat aċċess faċli għall-Programm f’konformità mal-istandards stabbiliti mid-Direttiva (UE) 2016/2102 tal-Parlament Ewropew u tal-Kunsill (11) u jiġi pprovdut punt ta’ kuntatt waħdieni kemm għall-individwi kif ukoll għall-organizzazzjonijiet interessati fir-rigward, fost oħrajn, tar-reġistrazzjoni, l-identifikazzjoni u t-tlaqqigħ tal-profili u tal-opportunitajiet, in-networking u l-iskambji virtwali, it-taħriġ online, l-appoġġ lingwistiku u ta’ wara l-attività u funzjonijiet utli oħra, li jistgħu jirriżultaw fil-ġejjieni.

(38)

Jenħtieġ li l-Portal tal-Korp Ewropew ta’ Solidarjetà jkompli jiġi żviluppat filwaqt li jitqies il-Qafas Ewropew għall-Interoperabbiltà, stabbilit fil-komunikazzjoni tal-Kummissjoni tat-23 ta’ Marzu 2017 intitolat “Il-Qafas Ewropew għall-Interoperabbiltà – Strateġija ta’ Implimentazzjoni”., li jipprovdi gwida speċifika dwar kif jitwaqqfu s-servizzi pubbliċi diġitali interoperabbli u li huwa implimentat fl-Istati Membri u membri oħra taż-Żona Ekonomika Ewropea permezz tal-oqfsa nazzjonali għall-interoperabbiltà. Il-qafas Ewropew għall-Interoperabbiltà joffri lill-amministrazzjonijiet pubbliċi b’47 rakkomandazzjoni konkreta dwar kif itejbu l-governanza tal-attivitajiet ta’ interoperabbiltà tagħhom, jistabbilixxu r-relazzjonijiet fost l-organizzazzjonijiet, jissimplifikaw il-proċessi li jappoġġaw is-servizzi diġitali minn tarf sa tarf u jiżguraw li la l-atti legali eżistenti u lanqas dawk ġodda ma jikkompromettu l-isforzi ta’ interoperabbiltà.

(39)

Ir-Regolament (UE, Euratom) 2018/1046 tal-Parlament Ewropew u tal-Kunsill (12) (ir-“Regolament Finanzjarju”) japplika għall-Programm. Ir-Regolament Finanzjarju jistabbilixxi regoli dwar l-implimentazzjoni tal-baġit tal-Unjoni, inklużi r-regoli dwar għotjiet, premjijiet, akkwist, ġestjoni indiretta, strumenti finanzjarji, garanziji baġitarji, assistenza finanzjarja u r-rimborż ta’ esperti esterni.

(40)

F’konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (13), u r-Regolamenti tal-Kunsill (KE, Euratom) Nru 2988/95 (14), (Euratom, KE) Nru 2185/96 (15) u (UE) 2017/1939 (16), l-interessi finanzjarji tal-Unjoni jridu jiġu protetti permezz ta’ miżuri proporzjonati, inkluż miżuri relatati mal-prevenzjoni, is-sejbien, il-korrezzjoni u l-investigazzjoni ta’ irregolaritajiet, inkluż frodi, mal-irkupru ta’ fondi mitlufa, imħallsa bi żball jew użati b’mod mhux korrett, u, fejn xieraq, mal-impożizzjoni ta’ penali amministrattivi. B’mod partikolari, f’konformità mar-Regolamenti (Euratom, KE) Nru 2185/96, u (UE, Euratom) Nru 883/2013, l-Uffiċċju Ewropew Kontra l-Frodi (OLAF) għandu s-setgħa li jwettaq investigazzjonijiet amministrattivi, inkluż kontrolli u spezzjonijiet fuq il-post, bil-għan li jiġi stabbilit jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni.L-Uffiċċju tal-Prosekutur Pubbliku Ewropew (UPPE) għandu s-setgħa, skont ir-Regolament (UE) 2017/1939, li li jinvestiga u jressaq għall-prosekuzzjoni reati kriminali li jaffettwaw l-interessi finanzjarji tal-Unjoni kif previst fid-Direttiva (UE) 2017/1371 tal-Parlament Ewropew u tal-Kunsill (17). F’konformità mar-Regolament Finanzjarju, kwalunkwe persuna jew entità li tirċievi fondi mill-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti tal-Awdituri u, fir-rigward ta’ dawk l-Istati Membri li jipparteċipaw fil-kooperazzjoni msaħħa skont ir-Regolament (UE) 2017/1939, l-UPPE, u tiżgura li kwalunkwe parti terza involuta fl-implimentazzjoni tal-fondi tal-Unjoni tagħti drittijiet ekwivalenti.

(41)

Il-Programm huwa mmirat għal żgħażagħ ta’ età bejn it-18 u t-30 sena. Sabiex jipparteċipaw fl-attivitajiet offruti mill-Programm, jenħtieġ li tali żgħażagħ ikunu meħtieġa li l-ewwel jirreġistraw fil-Portal tal-Korp Ewropew ta’ Solidarjetà.

(42)

Fid-dawl tal-isfidi speċifiċi tal-azzjoni umanitarja, il-parteċipanti li jkunu voluntiera b’appoġġ għal operazzjonijiet ta’ għajnuna umanitarja jenħtieġ li jkollhom mill-inqas 18-il sena u ma jkollhomx aktar minn 35 sena.

(43)

Jenħtieġ li tingħata attenzjoni partikolari biex jiġi żgurat li l-attivitajiet ta’ solidarjetà jkunu aċċessibbli għaż-żgħażagħ kollha, u b’mod partikolari ż-żgħażagħ b’anqas opportunitajiet. Jenħtieġ li jiġu stabbiliti miżuri speċjali biex jippromwovu l-inklużjoni soċjali u, b’mod partikolari, il-parteċipazzjoni taż-żgħażagħ żvantaġġati, inkluż l-provvediment ta’ akkomodazzjoni raġonevoli li tippermetti l-parteċipazzjoni effettiva ta’ persuni b’diżabilità fuq bażi ugwali ma’ oħrajn f’konformità mal-Artikolu 27 tal-Konvenzjoni tan-NU dwar id-Drittijiet ta’ Persuni b’Diżabilità u mad-Direttiva tal-Kunsill 2000/78/KE (18). Tali miżuri speċjali jenħtieġ li jqisu r-restrizzjonijiet imposti mill-pożizzjoni remota ta’ għadd ta’ żoni rurali, tar-reġjuni ultraperiferiċi tal-Unjoni u tal-pajjiżi u t-territorji extra-Ewropej, u mill-faqar ta’ xi żoni periurbani. Bl-istess mod, l-Istati Membri, il-pajjiżi u t-territorji extra-Ewropej u l-pajjiżi terzi assoċjati mal-Programm jenħtieġ li jistinkaw biex jadottaw il-miżuri xierqa kollha biex ineħħu l-ostakli legali u amministrattivi għall-funzjonament xieraq tal-Programm. Jenħtieġ li l-miżuri jsolvu, fejn possibbli, u mingħajr preġudizzju għall-acquis ta’ Schengen u għal-liġi tal-Unjoni dwar id-dħul u r-residenza ta’ ċittadini ta’ pajjiżi terzi, kwistjonijiet amministrattivi li joħolqu diffikultajiet fil-kisba ta’ viżi u ta’ permessi ta’ residenza u, fil-każ ta’ attivitajiet transkonfinali fi ħdan l-Unjoni, il-kisba ta’ Karta Ewropea tal-Assigurazzjoni tas-Saħħa.

(44)

Billi jirrifletti l-importanza li jiġi indirizzat it-tibdil fil-klima f’konformità mal-impenji tal-Unjoni li timplimenta l-Ftehim ta’ Pariġi adottat taħt il-Konvenzjoni Qafas tan-Nazzjonijiet Uniti dwar il-Bidla fil-Klima u biex jikseb l-Għanijiet ta’ Żvilupp Sostenibbli tan-NU, il-Programm huwa intiż li jikkontribwixxi għall-integrazzjoni tal-azzjonijiet klimatiċi u għall-kisba tal-mira kumplessiva ta’ 30 % tal-infiq tal-baġit tal-Unjoni li jappoġġa l-għanijiet klimatiċi. F’konformità mal-Patt Ekoloġiku Ewropew bħala pjan ta’ azzjoni għal tkabbir sostenibbli, l-azzjonijiet taħt dan ir-Regolament jenħtieġ li jirrispettaw il-prinċipju ta’ “la tagħmilx ħsara” mingħajr ma jbiddlu n-natura fundamentali tal-Programm. Matul l-implimentazzjoni tal-Programm, jenħtieġ li jiġu identifikati u stabbiliti azzjonijiet rilevanti u li dawn jiġu rivalutati fil-kuntest tal-evalwazzjonijiet rilevanti u l-proċess ta’ rieżami. Huwa xieraq ukoll li jitkejlu l-azzjonijiet rilevanti li jikkontribwixxu għall-għanijiet klimatiċi, inkluż dawk maħsuba biex inaqqsu l-impatt ambjentali tal-Programm.

(45)

Dan ir-Regolament jistabbilixxi pakkett finanzjarju għall-Programm li għandu jikkostitwixxi l-ammont ta’ referenza primarja, fi ħdan it-tifsira tal-Punt 18 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar ir-riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda (19) għall-Parlament Ewropew u l-Kunsill matul il-proċedura baġitarja annwali.

(46)

It-tipi ta’ finanzjament u l-metodi ta’ implimentazzjoni skont dan ir-Regolament jenħtieġ li jintgħażlu abbażi tad-disponibbiltà tagħhom biex jinkisbu l-għanijiet speċifiċi tal-azzjonijiet u biex jinkisbu r-riżultati, filwaqt li jitqiesu, b’mod partikolari, il-kostijiet tal-kontrolli, il-piż amministrattiv, u r-riskju mistenni tan-nuqqas ta’ konformità. Meta tkun qed issir dik l-għażla marbuta mal-għotjiet, jenħtieġ li jiġu kkunsidrati somom f’daqqa, rati fissi u skali tal-kostijiet unitarji.

(47)

Il-pajjiżi terzi li huma membri taż-Żona Ekonomika Ewropea jistgħu jieħdu sehem fil-programmi tal-Unjoni fil-qafas tal-kooperazzjoni stabbilit skont il-Ftehim dwar iż-Żona Ekonomika Ewropea (20), li jipprevedi l-implimentazzjoni ta’ dawk il-programmi abbażi ta’ deċiżjoni adottata skont dak il-Ftehim. Pajjiżi terzi jistgħu wkoll jieħdu sehem abbażi ta’ strumenti ġuridiċi oħrajn. F’dan ir-Regolament jenħtieġ li tiġi introdotta dispożizzjoni speċifika li tirrikjedi li pajjiżi terzi jagħtu d-drittijiet u l-aċċess neċessarji meħtieġa biex l-uffiċjal awtorizzanti responsabbli, l-OLAF u l-Qorti tal-Awdituri jeżerċitaw il-kompetenzi rispettivi tagħhom b’mod komprensiv. Il-parteċipazzjoni sħiħa tal-pajjiżi terzi fil-Programm jenħtieġ li tkun soġġetta għall-kondizzjonijiet stabbiliti fil-ftehimiet speċifiċi li jkopru l-parteċipazzjoni tal-pajjiż terz ikkonċernat fil-Programm. Barra minn hekk, il-parteċipazzjoni sħiħa tinvolvi l-obbligu li tiġi stabbilita aġenzija nazzjonali u li jiġu ġestiti wħud mill-azzjonijiet tal-Programm taħt ġestjoni indiretta. Entitajiet legali minn pajjiżi terzi li mhumiex assoċjati mal-Programm jenħtieġ li jkunu jistgħu jipparteċipaw f’uħud mill-azzjonijiet tal-Programm, kif definit fil-programmi ta’ ħidma u fis-sejħiet għal proposti ppubblikati mill-Kummissjoni. Meta jiġi implimentat il-Programm, jistgħu jiġu kkunsidrati arranġamenti speċifiċi fir-rigward tal-parteċipazzjoni ta’ entitajiet legali minn -Andorra, Liechtenstein, Monaco, San Marino, u s-Santa Sede.

(48)

Sabiex jiġi mmassimizzat l-impatt tal-Programm, jenħtieġ li jsiru dispożizzjonijiet biex l-Istati Membri u l-pajjiżi terzi assoċjati mal-Programm u ma’ programmi oħra tal-Unjoni jitħallew jagħmlu finanzjament addizzjonali disponibbli f’konformità mar-regoli tal-Programm.

(49)

Skont id-Deċiżjoni tal-Kunsill 2013/755/UE (21), il-persuni u l-entitajiet stabbiliti f’pajjiżi u territorji extra-Ewropej huma eliġibbli għal finanzjament soġġett għar-regoli u l-għanijiet tal-Programm u l-arranġamenti possibbli applikabbli għall-Istat Membru li miegħu l-pajjiż jew it-territorju extra-Ewropew huwa marbut.

(50)

Fid-dawl tal-Artikolu 349 tat-Trattat dwar il-Funzjonament tal-Unjoni Ewropea (TFUE) u f’konformità mal-komunikazzjoni tal-Kummissjoni tal-24 ta’ Ottubru 2017 intitolata “Sħubija strateġika aktar b’saħħitha u mġedda mar-reġjuni ultraperiferiċi tal-UE”, il-Programm jenħtieġ li jqis is-sitwazzjoni speċifika tar-reġjuni ultraperiferiċi msemmija f’dak l-Artikolu. Jenħtieġ li jittieħdu miżuri biex tiżdied il-parteċipazzjoni tar-reġjuni ultraperiferiċi fl-azzjonijiet kollha, inkluż permezz ta’ appoġġ finanzjarju, fejn rilevanti, għal azzjonijiet ta’ mobbiltà. Jenħtieġ li jitrawmu l-iskambji tal-mobbiltà u l-kooperazzjoni bejn il-persuni u l-organizzazzjonijiet minn dawk ir-reġjuni u pajjiżi terzi, b’mod partikolari l-ġirien tagħhom. Tali miżuri jenħtieġ li jiġu mmonitorjati u evalwati regolarment.

(51)

F’konformità mar-Regolament Finanzjarju, jenħtieġ li l-Kummissjoni tadotta programmi ta’ ħidma u tinforma dwarhom lill-Parlament Ewropew u lill-Kunsill. Jenħtieġ li l-programmi ta’ ħidma jistabbilixxu l-miżuri meħtieġa għall-implimentazzjoni tagħhom f’konformità mal-objettivi ġenerali u speċifiċi tal-Programm, mal-kriterji tal-għażla u tal-għoti għall-għotjiet, kif ukoll mal-elementi l-oħra kollha meħtieġa. Jenħtieġ li l-programmi ta’ ħidma u kwalunkwe emenda tagħhom jiġu adottati permezz ta’atti ta’ implimentazzjoni f’konformità mal-proċedura ta’ eżami.

(52)

F’konformità mal-paragrafi 22 u 23 tal-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (22), jenħtieġ li l-Programm jiġi evalwat abbażi tal-informazzjoni miġbura f’konformità mar-rekwiżiti ta’ monitoraġġ speċifiċi, filwaqt li jiġi evitat piż amministrattiv, b’mod partikolari fuq l-Istati Membri, u regolamentazzjoni żejda. Jenħtieġ li dawk ir-rekwiżiti, fejn xieraq, jinkludu indikaturi miżurabbli bħala bażi għall-evalwazzjoni tal-effetti tal-Programm fuq il-post, fosthom l-effetti fuq l-isfidi tas-soċjetà u umanitarji.

(53)

Jenħtieġ li jiġu żgurati sensibilizzazzjoni, pubbliċità u disseminazzjoni xierqa tal-opportunitajiet u tar-riżultati tal-azzjonijiet appoġġati mill-Programm fil-livell lokali, nazzjonali u Ewropew. Jenħtieġ li tingħata attenzjoni partikolari lill-intrapriżi soċjali, billi jitħeġġu biex jappoġġaw l-attivitajiet tal-Programm. L-attivitajiet ta’ sensibilizzazzjoni, ta’ pubbliċità u ta’ disseminazzjoni jenħtieġ li jibbażaw fuq il-korpi ta’ implimentazzjoni kollha tal-Programm u jenħtieġ li, fejn rilevanti, ikollhom l-appoġġ ta’ partijiet ikkonċernati ewlenin oħra. Barra minn hekk, jenħtieġ li l-Kummissjoni tinvolvi ruħha ma’ firxa wiesgħa ta’ partijiet ikkonċernati, inkluż l-organizzazzjonijiet parteċipanti, fuq bażi regolari tul iċ-ċiklu tal-ħajja tal-Programm, sabiex tiffaċilita l-kondiviżjoni ta’ prattiki tajbin u tar-riżultati tal-proġetti u tiġbor feedback dwar il-Programm. Jenħtieġ li l-aġenziji nazzjonali jiġu mistiedna jipparteċipaw f’ dak ilproċess.

(54)

Sabiex jintlaħqu aħjar l-għanijiet tal-Programm, jenħtieġ li, preferibbilment, il-Kummissjoni, l-awtoritajiet nazzjonali u l-aġenziji nazzjonali jaħdmu flimkien u, fejn xieraq, fi sħubija ma’ organizzazzjonijiet mhux governattivi, intrapriżi soċjali, organizzazzjonijiet taż-żgħażagħ, organizzazzjonijiet li jirrappreżentaw persuni b’ diżabilità, u partijiet ikkonċernati lokali li għandhom għarfien espert dwar l-azzjonijiet ta’ solidarjetà.

(55)

Sabiex tiġi żgurata effiċjenza akbar fil-komunikazzjoni lill-pubbliku ġenerali u sinerġiji aktar b’saħħithom bejn l-attivitajiet ta’ komunikazzjoni mwettqa b’inizjattiva tal-Kummissjoni, ir-riżorsi finanzjarji allokati għall-komunikazzjoni skont dan ir-Regolament jenħtieġ li jikkontribwixxu wkoll biex ikopru l-komunikazzjoni korporattiva tal-prijoritajiet ta’ politika tal-Unjoni, safejn dawk il-prijoritajiet ikunu relatati mal-għan ġenerali tal-Programm.

(56)

Sabiex jiġi żgurat li dan ir-Regolament jiġi impliment b’mod effiċjenti u effettiv, jenħtieġ li l-Programm jagħmel użu massimu mill-arranġamenti ta’ ġestjoni li diġà huma fis-seħħ. Għaldaqstant, l-implimentazzjoni ġenerali tal-Programm jenħtieġ li tiġi fdata f’idejn l-istrutturi eżistenti, jiġifieri l-Kummissjoni u l-aġenziji nazzjonali maħtura biex jimmaniġġjaw l-azzjonijiet imsemmija fil-kapitolu III tar-Regolament (UE) 2021/817. Azzjonijiet taħt il-fergħa “parteċipazzjoni taż-żgħażagħ fl-għajnuna umanitarja relatata mal-attivitajiet ta’ solidarjetà”, mandankollu, jenħtieġ li jiġu primarjament immaniġġjati direttament. Jenħtieġ li l-Kummissjoni tikkonsulta regolarment mal-partijiet ikkonċernati ewlenin, inkluż l-organizzazzjonijiet parteċipanti, dwar l-implimentazzjoni tal-Programm.

(57)

Sabiex jiġu żgurati l-ġestjoni finanzjarja tajba u ċ-ċertezza legali fl-Istati Membri u l-pajjiżi terzi assoċjati mal-Programm, jenħtieġ li kull awtorità nazzjonali taħtar korp indipendenti tal-awditjar. Meta dan ikun fattibbli, u sabiex tiġi mmassimizzata l-effiċjenza, il-korpi indipendenti tal-awditjar jenħtieġ li jkunu l-istess bħal dawk maħtura għall-azzjonijiet imsemmija fil-kapitolu dwar iż-żgħażagħ tar-Regolament (UE) 2021/817.

(58)

Jenħtieġ li l-Istati Membri jagħmlu ħilithom biex jadottaw il-miżuri xierqa kollha biex ineħħu l-ostakli legali u amministrattivi għall-funzjonament xieraq tal-Programm. Dak jinkludi r-riżoluzzjoni, fejn possibbli u mingħajr preġudizzju għal-liġi tal-Unjoni dwar il-kwistjonijiet tad-dħul u tar-residenza ta’ ċittadini ta’ pajjiżi terzi, li joħolqu diffikultajiet fil-kisba ta’ viżi u permessi ta’ residenza.

(59)

Is-sistema ta’ rapportar dwar il-prestazzjoni jenħtieġ li tiżgura li d-data għall-monitoraġġ tal-implimentazzjoni u tal-evalwazzjoni tal-Programm tinġabar b’mod effiċjenti, effettiv, u fil-ħin, u fil-livell xieraq ta’ dettall. Jenħtieġ li din id-data tiġi kkomunikata lill-Kummissjoni b’tali mod li tikkonforma mar-regoli rilevanti dwar il-protezzjoni tad-data.

(60)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li l-Kummissjoni tingħata setgħat ta’ implimentazzjoni. Jenħtieġ li dawk is-setgħat jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (23).

(61)

Sabiex jiġu ssimplifikati r-rekwiżiti għall-benefiċjarji, jenħtieġ li jintużaw kemm jista’ jkun għotjiet simplifikati fl-għamla ta’ somom f’daqqa, finanzjament b’rata fissa u kostijiet unitarji. L-għotjiet simplifikati biex jiġu appoġġati l-azzjonijiet ta’ mobbiltà tal-Programm, kif definit mill-Kummissjoni, jenħtieġ li jqisu l-għoli tal-ħajja u l-ispejjeż tal-għajxien u tas-sussistenza tal-pajjiż ospitanti. F’konformità mal-liġi nazzjonali, jenħtieġ li l-Istati Membri jiġu mħeġġa wkoll biex jeżentaw lil dawk l-għotjiet minn kwalunkwe taxxa u imposti soċjali; għotjiet li jingħataw lil individwi minn entitajiet legali pubbliċi jew privati jenħtieġ li jiġu ttrattati bl-istess mod.

(62)

Sabiex tiġi żgurata valutazzjoni effettiva tal-progress tal-Programm lejn il-ksib tal-objettivi tiegħu, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 TFUE biex temenda l-Anness fir-rigward tal-indikaturi ta’ prestazzjoni tal-Programm. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet. B’mod partikolari, biex tiġi żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jkunu qed jittrattaw it-tħejjija tal-atti delegati.

(63)

Dan ir-Regolament jirrispetta d-drittijiet fundamentali u josserva l-prinċipji rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea (il-‘Karta’), B’mod partikolari, dan ir-Regolament ifittex li jiżgura rispett sħiħ tad-dritt għall-ugwaljanza bejn l-irġiel u n-nisa u d-dritt ta’ nondiskriminazzjoni abbażi tas-sess, oriġini razzjali jew etnika, reliġjon jew twemmin, diżabbiltà, età jew orjentazzjoni sesswali, sfond soċjoekonomiku, u li jippromwovi l-applikazzjoni tal-Artikoli 21 u 23 tal-Karta.

(64)

Ir-regoli finanzjarji orizzontali adottati mill-Parlament Ewropew u mill-Kunsill abbażi tal-Artikolu 322 TFUE japplikaw għal dan ir-Regolament. Dawk ir-regoli huma stabbiliti fir-Regolament Finanzjarju u b’mod partikolari, jiddeterminaw il-proċedura għall-istabbiliment u l-implimentazzjoni tal-baġit permezz ta’ għotjiet, akkwisti pubbliċi, premjijiet u implimentazzjoni indiretta, u jipprevedu għall-verifiki dwar ir-responsabbiltà tal-atturi finanzjarji. Ir-regoli adottati abbażi tal-Artikolu 322 TFUE jinkludu wkoll reġim ġenerali ta’ kundizzjonalità għall-protezzjoni tal-baġit tal-Unjoni.

(65)

Minħabba li l-għan ta’ dan ir-Regolament, jiġifieri li tissaħħaħ il-parteċipazzjoni taż-żgħażagħ u l-organizzazzjonijiet f’attivitajiet ta’ solidarjetà aċċessibbli u ta’ kwalità għolja, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 TUE. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-għan.

(66)

F’konformità mar-Regolament Finanzjarju, huwa possibbli li tingħata għotja għal azzjoni li tkun diġà bdiet, dment li l-applikant ikun jista’ juri l-ħtieġa li jibda l-azzjoni qabel il-firma tal-ftehim ta’ għotja. Madankollu, l-ispejjeż imġarrba qabel id-data tal-preżentazzjoni tal-applikazzjoni għal għotja mhumiex eliġibbli għal finanzjament tal-Unjoni, ħlief f’każijiet eċċezzjonali debitament ġustifikati. Sabiex jiġi evitat kwalunkwe tfixkil fl-appoġġ tal-Unjoni li jista’ jkun ta’ preġudizzju għall-interessi tal-Unjoni, jenħtieġ li jkun possibbli li fid-deċiżjoni ta’ finanzjament, għal perijodu limitat ta’ żmien fil-bidu tal-QFP 2021-2027, u f’każijiet debitament ġustifikati biss, tkun prevista l-eliġibbiltà tal-attivitajiet u l-ispejjeż mill-1 ta’ Jannar 2021, anki jekk dawk l-attivitajiet ġew implimentati u dawk l-ispejjeż imġarrba qabel ma ġiet ippreżentata l-applikazzjoni għal għotja.

(67)

L-azzjonijiet jew l-inizjattivi li mhumiex appoġġati taħt dan ir-Regolament ma jistgħux jiġu inklużi fil-programmi ta’ ħidma.

(68)

Sabiex jiġi ottimizzat il-valur miżjud mill-investimenti ffinanzjati kompletament jew parzjalment permezz tal-baġit tal-Unjoni, jenħtieġ li jitfittxew sinerġiji b’mod partikolari bejn il-Programm u programmi oħra tal-Unjoni, inkluż Fondi implimentati taħt ġestjoni kondiviża. Sabiex jiġu massimizzati dawk is-sinerġiji, jenħtieġ li jiġu żgurati mekkaniżmi abilitanti ewlenin, inkluż finanzjament kumulattiv f’azzjoni mill-Programm u programm ieħor tal-Unjoni, sakemm tali finanzjament kumulattiv ma jaqbiżx l-ispejjeż eliġibbli totali tal-azzjoni. Għal dak il-għan, dan ir-Regolament jenħtieġ li jistabbilixxi regoli xierqa, b’mod partikolari dwar il-possibbiltà li tiġi ddikjarata l-istess spiża jew nefqa fuq bażi prorata lill-Programm u lil programm ieħor tal-Unjoni.

(69)

Ir-Regolament (UE) 2018/1475 tal-Parlament Ewropew u tal-Kunsill (24) jenħtieġ li jitħassar b’effett mill-1 ta’ Jannar 2021.

(70)

Sabiex tiġi żgurata l-kontinwità fl-għoti ta’ appoġġ fil-qasam ta’ politika rilevanti u biex tkun tista’ ssir l-implimentazzjoni tal-Programm mill-bidu tal-QFP 2021-2027, jenħtieġ li dan ir-Regolament jidħol fis-seħħ b’urġenza u jenħtieġ li japplika, b’effett retroattiv, mill-1 ta’ Jannar 2021,