(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni. L-Artikolu 10(2) ta’ dak ir-Regolament jipprevedi l-evalwazzjoni mill-ġdid tal-addittivi awtorizzati skont id-Direttiva tal-Kunsill 70/524/KEE (2).

(2)

Il-preparazzjoni tas-Saccharomyces cerevisiae CNCM I-1077 kienet awtorizzata mingħajr limitu ta’ żmien f’konformità mad-Direttiva 70/524/KEE bħala addittiv tal-għalf għall-baqar tal-ħalib u għall-baqar tas-simna bir-Regolament tal-Kummissjoni (KE) Nru 1200/2005 (3). Sussegwentement, dik il-preparazzjoni ddaħħlet fir-Reġistru tal-Addittivi tal-Ikel bħala prodott eżistenti, f’konformità mal-Artikolu 10(1), il-punt (b) tar-Regolament (KE) Nru 1831/2003.

(3)

F’konformità mal-Artikolu 10(2) tar-Regolament (KE) Nru 1831/2003, flimkien mal-Artikolu 7 tiegħu, tressqet applikazzjoni għall-awtorizzazzjoni tal-preparazzjoni tas-Saccharomyces cerevisiae CNCM I-1077 bħala addittiv tal-għalf għall-baqar tal-ħalib u għall-baqar tas-simna. F’konformità mal-Artikolu 7 tar-Regolament (KE) Nru 1831/2003, tressqet applikazzjoni oħra għall-awtorizzazzjoni ta’ użu ġdid ta’ dik il-preparazzjoni bħala addittiv fl-għalf għal speċijiet ruminanti minuri u għall-kamelidi. Dawk l-applikazzjonijiet talbu li l-addittiv jiġi kklassifikat fil-kategorija tal-addittivi “addittivi żootekniċi” u fil-gruppi funzjonali “sustanzi li jsaħħu d-diġestibbiltà” u “stabilizzaturi tal-flora intestinali” u kienu akkumpanjati mid-dettalji u mid-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

Fl-opinjonijiet tagħha tal-4 ta’ Lulju 2017 (4) u tad-29 ta’ Ġunju 2022 (5), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, fil-kundizzjonijiet proposti tal-użu, il-preparazzjoni tas-Saccharomyces cerevisiae CNCM I-1077 hija sikura għall-annimali fil-mira, għall-konsumaturi u għall-ambjent. Ikkonkludiet ukoll li l-preparazzjoni mhijiex irritant jew sensitizzatur tal-ġilda iżda hija irritant tal-għajnejn, u li l-esponiment mill-inalazzjoni huwa improbabbli. L-Awtorità kkonkludiet li l-preparazzjoni għandha l-potenzjal li ttejjeb il-prestazzjoni tal-baqar tas-simna meta tiġi pprovduta f’doża minima ta’ madwar 6 x 108 CFU/kg ta’ għalf sħiħ, filwaqt li tinnota wkoll li żewġ studji in vivo wrew effett pożittiv fuq il-prestazzjoni tat-tkabbir tal-bhejjem tal-ifrat fornuti bl-addittiv b’doża minima ta’ 5 x 108 CFU/kg ta’ għalf sħiħ. Hija estendiet din il-konklużjoni għal speċijiet minuri ta’ ruminanti u kamelidi mrobbija għall-produzzjoni tal-laħam. L-Awtorità ma setgħetx tikkonkludi, abbażi tad-data pprovduta mill-applikant, dwar l-effikaċja ta’ dak l-addittiv għall-baqar tal-ħalib, iżda nnotat li l-preparazzjoni wriet effett pożittiv fuq il-prestazzjoni fil-baqar tal-ħalib fi tliet studji. L-Awtorità vverifikat ukoll ir-rapport dwar il-metodi ta’ analiżi tal-addittiv tal-għalf fl-għalf, li ġie ppreżentat mil-Laboratorju ta’ Referenza stabbilit bir-Regolament (KE) Nru 1831/2003.

(5)

L-applikant irtira l-applikazzjoni fl-24 ta’ Frar 2023 għall-awtorizzazzjoni tal-preparazzjoni taħt il-grupp funzjonali “sustanzi li jsaħħu d-diġestibbiltà” u għall-użu tagħha għal speċijiet minuri ta’ ruminanti tal-ħalib u għall-kamelidi tal-ħalib.

(6)

Meta titqies id-data ġenerali pprovduta, il-kapaċità diġà murija tal-addittiv biex itejjeb il-parametri tal-prestazzjoni f’ruminanti oħra tal-ħalib, jiġifieri l-mogħoż tal-ħalib u n-nagħaġ tal-ħalib, u l-istorja twila tal-kummerċjalizzazzjoni u l-użu ta’ dik il-preparazzjoni, il-Kummissjoni tqis li l-kundizzjonijiet biex tintwera l-effikaċja huma ssodisfati għall-baqar tas-simna, għall-ispeċijiet minuri ta’ ruminanti u għall-kamelidi mrobbija għall-produzzjoni tal-laħam fornuti bl-addittiv b’doża minima ta’ 5 × 108 CFU/kg ta’ għalf sħiħ, u għall-baqar tal-ħalib fornuti bl-addittiv b’doża minima ta’ 4 × 108 CFU/kg ta’ għalf sħiħ.

(7)

Il-valutazzjoni tal-addittiv turi li l-kundizzjonijiet għall-awtorizzazzjoni, kif previsti fl-Artikolu 5 tar-Regolament (KE) Nru 1831/2003, huma ssodisfati. Għaldaqstant, jenħtieġ li l-użu ta’ dik il-preparazzjoni jiġi awtorizzat. Il-Kummissjoni hija tal-fehma li jenħtieġ li jittieħdu miżuri protettivi xierqa sabiex jiġu evitati effetti avversi fuq is-saħħa tal-bniedem, b’mod partikolari fir-rigward tal-utenti tal-addittiv.

(8)

Billi r-raġunijiet ta’ sikurezza ma jeħtiġux l-applikazzjoni immedjata tal-modifiki fil-kundizzjonijiet tal-awtorizzazzjoni tal-preparazzjoni kkonċernata, li huma maħsuba għall-baqar tal-ħalib u għall-baqar tas-simna, huwa xieraq li jiġi previst perjodu tranżizzjonali għall-partijiet interessati biex iħejju ruħhom biex jissodisfaw ir-rekwiżiti l-ġodda li jirriżultaw mill-awtorizzazzjoni.

(9)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,