SENTENZA TAL-QORTI TAL-ĠUSTIZZJA (Id-Disa’ Awla)
10 ta’ Marzu 2021 ( *1 )
“Rinviju għal deċiżjoni preliminari – Tariffa Doganali Komuni – Klassifikazzjoni tariffarja – Nomenklatura Magħquda – Intestaturi tariffarji 3004 u 3808 – Interpretazzjoni – Regolament (KE) Nru 455/2007 – Soluzzjoni spot-on għall-qtates kontra l-infestazzjonijiet tal-bergħud u tal-qurdien – Effetti terapewtiċi jew profilattiċi”
Fil-Kawża C‑941/19,
li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Krajský soud v Ostravě (il-Qorti Reġjonali ta’ Ostrava, ir-Repubblika Ċeka), permezz ta’ deċiżjoni tat‑13 ta’ Diċembru 2019, li waslet fil-Qorti tal-Ġustizzja fis‑27 ta’ Diċembru 2019, fil-proċedura
Samohýl group a.s.
vs
Generální ředitelství cel,
IL-QORTI TAL-ĠUSTIZZJA (Id-Disa’ Awla),
komposta minn N. Piçarra (Relatur), President tal-Awla, D. Šváby u K. Jürimäe, Imħallfin,
Avukat Ġenerali: G. Hogan,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
– |
għall-Gvern Ċek, minn M. Smolek, J. Vláčil u O. Serdula, bħala aġenti, |
– |
għall-Kummissjoni Ewropea, minn J. Hradil u M. Salyková, bħala aġenti, |
wara li rat id-deċiżjoni meħuda, wara li nstema’ l-Avukat Ġenerali, li l-kawża tiġi deċiża mingħajr konklużjonijiet,
tagħti l-preżenti
Sentenza
1 |
It-talba għal deċiżjoni preliminari tirrigwarda l-interpretazzjoni tal-intestaturi tariffarji 3004 u 3808 tan-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87 tat‑23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), fil-verżjoni tiegħu li tirriżulta mir-Regolament ta’ Implimentazzjoni tal-Kummissjoni (UE) Nru 1101/2014, tas‑16 ta’ Ottubru 2014 (ĠU 2014, L 312, p. 1, iktar ’il quddiem in-“NM”). |
2 |
Din it-talba tressqet fil-kuntest ta’ kawża bejn Samohýl group a.s. (iktar ’il quddiem “Samohýl”) u l-Generální ředitelství cel (id-Direttorat Ġenerali tad-Dwana, ir-Repubblika Ċeka), dwar l-informazzjoni vinkolanti dwar it-tariffi (iktar ’il quddiem il-“BTI”) maħruġa għall-prodott imsemmi “Bob Martin Clear 50 mg – soluzzjoni spot-on għall-qtates”. |
Il-kuntest ġuridiku
In-NM
3 |
Il-klassifikazzjoni doganali tal-merkanzija importata fl-Unjoni Ewropea hija rregolata min-NM, li hija bbażata fuq is-sistema armonizzata għad-deskrizzjoni u l-kodifika ta’ oġġetti (iktar ’il quddiem is-“SA”), stabbilita mill-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta’ Oġġetti, konkluża fi Brussell fl‑14 ta’ Ġunju 1983 fil-kuntest tal-Organizzazzjoni Dinjija tad-Dwana (ODD), u approvata, flimkien mal-Protokoll tagħha li jemendaha tal‑24 ta’ Ġunju 1986, f’isem il-Komunità Ekonomika Ewropea, bid-Deċiżjoni tal-Kunsill 87/369/KEE, tas‑7 ta’ April 1987 (ĠU Edizzjoni Speċjali bil-Malti, Kapitolu 2, Volum 2, p. 288, iktar ’il quddiem is-“SA”). |
4 |
In-NM tirriproduċi l-intestaturi u s-subintestaturi b’6 numri tas-SA, u huma biss is-seba’ u t-tmien numru li jikkostitwixxu subdiviżjonijiet li huma speċifiċi għaliha. |
5 |
Skont l-Artikolu 12(1) tar-Regolament Nru 2658/87, il-Kummissjoni Ewropea għandha tadotta kull sena regolament li jirriproduċi l-verżjoni sħiħa tan-NM u r-rati tad-dazji doganali, kif tirriżulta mill-miżuri adottati mill-Kunsill tal-Unjoni Ewropea jew mill-Kummissjoni. Dan ir-regolament japplika b’effett mill‑1 ta’ Jannar tas-sena ta’ wara. |
6 |
Il-verżjoni tan-NM applikabbli għall-fatti fil-kawża prinċipali, kif jirriżulta mill-proċess li għandha l-Qorti tal-Ġustizzja, hija dik tas-sena 2015, li toħroġ mir-Regolament Nru 1101/2014. |
7 |
L-ewwel parti tan-NM tinkludi Taqsima I, iddedikata għar-regoli ġenerali, li s-sezzjoni A tagħha, intitolata “Regoli ġenerali għall-interpretazzjoni tan-[NM]”, tipprovdi: “Il-klassifikazzjoni ta’ oġġetti fin-[NM] għandha tkun irregolata mill-prinċipji li ġejjin:
[…]
[…]
|
8 |
It-tieni parti tan-NM, intitolata “Skeda ta’ Dazji tad-Dwana”, hija maqsuma f’21 taqsima. It-Taqsima VI ta’ din il-parti, intitolata “Prodotti tal-industrija kimika jew dawk relatati magħha”, tinkludi l-Kapitolu 30, intitolat “Prodotti farmaċewtiċi”, li fin-nota addizzjonali tiegħu jipprovdi: “Titlu 3004 [L-intestatura 3004] jinkludi preparazzjonijiet mediċinali mill-ħxejjex u preparazzjonijiet ibbażati fuq dawn is-sustanzi attivi: vitamini, minerali, aminoaċti jew aċti-grassi essenzjali, f’pakki għal bejgħ bl-imnut. Dawn il-preparazzjonijiet huma kklassifikati f’titlu 3004 jekk ikollhom fuq it-tabella, fuq il-pakkett jew fl-istruzzjonijiet għal min jużahom li jkunu magħhom dawn l-istqarrijiet dwar:
Dan it-titlu jinkludi preparazzjonijiet mediċinali omeopatiċi meta dawn josservaw il-kundizzjonijiet ta’ (a), (c) u (d). Fil-każ ta’ preparazzjonijiet bbażati fuq vitamini, minerali, amino-aċti jew aċti‑grassi essenzjali, il-livell ta’ waħda minn dawn is-sustanzi għal kull doża irrikmandata kuljum indikata fuq it-tabella għandu jkun ogħla sewwa mill-konċessjoni irrikmandata kuljum biex tinżamm is-saħħa jew il-benesseri ġenerali.” |
9 |
Il-Kapitolu 30 tan-NM jinkludi, partikolarment, l-intestatura u s-subintestatura li ġejjin:
|
10 |
In-Noti ta’ Spjega għan-NM (ĠU 2015, C 76, p. 1), adottati skont l-Artikolu 9(1) tar-Regolament Nru 2658/87, fil-parti dwar il-Kapitolu 30 ta’ din in-nomenklatura, jipprovdu, taħt “Ġenerali”, li, “[i]d-deskrizzjoni ta’ prodott bħala medikament f’leġislazzjoni tal-Unjoni Ewropea (ħlief dak relatat speċifikament għal klassifikazzjoni fin-Nomenklatura Magħquda) jew fil-leġislazzjoni nazzjonali tal-Pajjiżi Membri, jew fi kwalunkwe farmakopoeia oħra, m’hijiex il-fattur li jiddeċiedi sa fejn hija kkonċernata l-klassifikazzjoni f’dan il-kapitlu”. |
11 |
Il-Kapitolu 38 li jinsab ukoll fit-Taqsima VI tat-tieni parti tan-NM, intitolat “Diversi prodotti kimiċi”, fin-nota 1 tiegħu jistabbilixxi: “Dan il-kapitlu ma jkoprix:
[…]
[…]” |
12 |
Dan il-kapitolu jinkludi, b’mod partikolari, l-intestatura u s-subintestaturi li ġejjin:
|
In-Noti ta’ Spjega tas-SA
13 |
In-Noti ta’ Spjega tas-SA dwar l-intestatura 3808, li għalihom jirreferu n-Noti ta’ Spjega tan-NM dwar is-subintestaturi 38089110 sa 38089190 jistipulaw: “[…] Din l-intestatura tkopri ġabra ta’ prodotti (minbarra dawk li għandhom in-natura ta’ prodotti mediċinali għall-mediċina tal-bniedem jew dik veterinarja fis-sens tan-Nri 3003 jew 3004) maħsuba sabiex jinqerdu l-ġermi patoġeni, l-insetti (nemus, dud, ħanfus, wirdien, eċċ.), il-ħażiż u l-moffa, il-ħaxix ħażin, ir-rodituri, l-għasafar, eċċ.; il-prodotti maħsuba biex inaffru l-parassiti jew li jservu għad-diżinfezzjoni taż-żerriegħa huma inklużi wkoll f’din l-intestatura. […] Il-prodotti tan-Nru 3808 jistgħu jinqasmu kif ġej: 1. L-insettiċidi B’insettiċidi, wieħed jifhem mhux biss il-prodotti maħsuba sabiex jinqatlu l-insetti iżda wkoll il-prodotti li għandhom effett ripulsiv fuq dawn tal-aħħar jew effett ta’ attrazzjoni. Il-prodotti jippreżentaw ruħhom f’diversi forom bħal bexx jew blokok (biex jinqered id-dud), żjut u bsaten (kontra n-nemus), trab (kontra n-nemel), strippi (kontra d-dubbien), diatomit jew kartun imxarrab bis-cyanoġen (kontra l-bergħud u l-furrax). […] Din l-intestatura tinkludi wkoll prodotti intiżi għall-ġlieda kontra l-akaridi (akariċidi), il-molluski, in-nematodi (nematoċidi), ir-rodituri (rodentiċidi), l-għasafar (aviċidi) u l-annimali l-oħra ta’ jikkawżaw ħsara (prodotti intiżi sabiex jiġu miġġielda l-qalfat, il-predaturi, eċċ.). […]” [traduzzjoni mhux uffiċjali] |
14 |
In-Noti ta’ Spjega tas-SA għall-intestatura 3004(e) jeskludu minnha “[i]l-preparazzjonijiet insettiċidi, diżinfettanti, eċċ. tan-Nru 3808 li ma humiex ippreżentati għall-użu profilattiku fil-mediċina tal-bniedem jew dik veterinarja”. [traduzzjoni mhux uffiċjali] |
Ir-Regolament (KE) Nru 455/2007
15 |
L-Artikolu 1 tar-Regolament tal-Kummissjoni (KE) Nru 455/2007 tal‑25 ta’ April 2007 dwar il-klassifikazzjoni ta’ ċerti merkanziji fin-Nomenklatura Maqgħuda (ĠU 2008, L 56M, p. 335), jipprovdi: “L-oġġetti deskritti fil-kolonna 1 tat-tabella mniżżla fl-Anness għandhom ikunu kklassifikati fi ħdan in-Nomenklatura Magħquda taħt il-kodiċi tan-NM indikat fil-kolonna 2 ta’ dik it-tabella.” |
16 |
It-tabella mniżżla fl-anness ta’ dan ir-regolament hija kif ġej:
|
Il-kawża prinċipali u d-domanda preliminari
17 |
Fis‑27 ta’ Mejju 2015, Samohýl ippreżentat applikazzjoni għal BTI, dwar il-klassifikazzjoni tal-prodott imsemmi “Bob Martin Clear 50 mg — soluzzjoni spot‑on għall-qtates” (iktar ’il quddiem il-“prodott inkwistjoni”). Hija talbet li dan il-prodott jiġi kklassifikat fis-subintestatura tariffarja 30049000 tan-NM, li tipprevedi eżenzjoni mid-dazji doganali. |
18 |
Dan il-prodott kien is-suġġett ta’ awtorizzazzjoni ta’ tqegħid fis-suq bħala prodott mediċinali għall-użu veterinarju. Huwa maħsub għall-qtates, jiġi applikat fuq il-ġilda u huwa intiż sabiex jittratta l-infestazzjonijiet mill-bergħud, li jmut f’24 siegħa mill-applikazzjoni, u l-qurdien, li jmut fi 48 siegħa jew matul il-ġimgħa li fiha jkun ġie applikat. Dan huwa pprovdut f’pipetti ta’ 0.5 ml, li kull waħda minnhom fiha 50 mg tal-ingredjent attiv fipronil kif ukoll l-eċċipjenti butilidrossianisol E320, butilidrossitoluen E321, alkoħol benżiliku u dietileniku monoetiletere. |
19 |
Skont id-dokument “Sunt tal-karatteristiċi tal-prodott”, li tirreferi għalih il-qorti tar-rinviju, il-prodott inkwistjoni jaqa’ taħt il-grupp farmakoterapewtiku “antiparassitiċi esterni għal użu topiku”. Hemmhekk, il-fipronil huwa deskritt bħala insettiċida (effett insettiċidu fuq il-bergħud) u akariċida (effett akariċidu fuq il-qurdien). |
20 |
Fl‑24 ta’ Ġunju 2015, iz-Celní úřad pro Olomoucký kraj (l-Amministrazzjoni Doganali għar-Reġjun ta’ Olomouc, ir-Repubblika Ċeka) (iktar ’il quddiem l-“amministrazzjoni doganali”) ħarġet BTI li tikklassifika l-prodott inkwistjoni fis-subintestatura tariffarja 38089190 tan-NM, bħala insettiċida, billi applikat b’analoġija r-Regolament Nru 455/2007. Din l-amministrazzjoni qieset li l-klassifikazzjoni ta’ dan il-prodott fis-subintestatura tariffarja 30049000 tan-NM, mitluba minn Samohýl, ma setgħetx tintuża, peress li l-imsemmi prodott ma kienx prodott mediċinali, fis-sens tal-intestatura tariffarja 3004 tan-NM. |
21 |
Peress li appell amministrattiv ippreżentat kontra din id-deċiżjoni ġie miċħud, fis‑17 ta’ Awwissu 2015, mid-Direttorat Ġenerali tad-Dwana, Samohýl ippreżentat rikors quddiem il-qorti tar-rinviju, li, permezz ta’ deċiżjoni tas‑16 ta’ Mejju 2017, annullat id-deċiżjoni tas‑17 ta’ Awwissu 2015 u bagħtet il-kawża lura lil dan id-Direttorat Ġenerali. |
22 |
Fis‑17 ta’ Mejju 2018, l-amministrazzjoni doganali ħarġet BTI ġdida, li permezz tagħha l-prodott inkwistjoni tqiegħed mill-ġdid fis-subintestatura tariffarja 38089190 tan-NM, bħala insettiċida. L-appell amministrattiv ippreżentat kontra din id-deċiżjoni ġie miċħud, fil‑11 ta’ Settembru 2018, mid-Direttorat Ġenerali tad-Dwana. |
23 |
Għalhekk, Samohýl ippreżentat rikors kontra d-deċiżjoni ta’ ċaħda quddiem il-qorti tar-rinviju, billi sostniet li l-eżitu tal-kawża kien jiddependi mill-kwistjoni tal-klassifikazzjoni tariffarja ta’ prodott li fih l-ingredjent attiv imsejjaħ fipronil. Hija esponiet li, meta hija kienet talbet lill-amministrazzjoni doganali tikklassifika l-prodott “Moxiclear 400 + 100 mg”, intiż għall-klieb milquta jew esposti għar-riskju ta’ infestazzjonijiet parassitarji mħallta, li huwa paragunabbli mal-prodott inkwistjoni f’din il-kawża, dan il-prodott kien ġie kklassifikat fis-subintestatura tariffarja 30049000 tan-NM, mingħajr eżami tal-effetti profilattiċi u terapewtiċi tiegħu. |
24 |
Il-qorti tar-rinviju tippreċiża li l-mertu tal-kawża jirrigwarda l-kwistjoni dwar jekk il-prodott inkwistjoni jistax jiġi ddefinit bħala “prodott mediċinali” fid-dawl tal-leġiżlazzjoni doganali. Hija tirreferi għal “opinjonijiet tad-duttrina veterinarja Franċiża matul il-perijodu ta’ bejn l-2008 u l-2009 (École nationale vétérinaire de Toulouse et de Lyon, Laboratoire de parasitologie et de mycologie médicale de Lyon)”, ippreżentati minn Samohýl, li minnhom jirriżulta li l-prodott inkwistjoni huwa prodott ġeneriku identiku għall-prodott Frontline prodott wara l-iskadenza tal-perijodu tal-privattiva ta’ dan tal-aħħar, li għandu l-istess kompożizzjoni u indikazzjoni bħall-prodott inkwistjoni u li huwa suġġett għall-istess awtorizzazzjoni ta’ tqegħid fis-suq, bħala prodott mediċinali għal użu veterinarju. Din il-qorti tesponi, minn naħa, li l-ingredjent attiv tal-Frontline, bħal dak tal-prodott inkwistjoni, huwa l-fipronil, u, min-naħa l-oħra, li l-Frontline għandu effetti kurattivi u preventivi, fis-sens li huwa jittratta l-infezzjoni mill-membri tal-ektoparassiti billi joqtolhom. Hija tirrileva wkoll li, fi Franza, inħarġu BTI għal merkanzija li ġġib l-isem kummerċjali Frontline, li ġiet kollha kklassifikata fl-intestatura tariffarja 3808 tan-NM skont ir-Regolament Nru 455/2007. |
25 |
Il-qorti tar-rinviju tikkonstata li minn provi dokumentali ċerti jirriżulta li l-prodott inkwistjoni għandu effetti profilattiċi, jiġifieri li huwa intiż sabiex ixekkel it-tfaċċar ta’ bergħud jew ta’ qurdien fuq l-annimal u sabiex jipprevjeni l-mard li joriġina mit-titqiba ta’ dawn il-parassiti. Hija żżid li, mingħajr il-qerda inizjali tal-parassiti, il-manifestazzjonijiet sekondarji tal-infestazzjoni minnhom ma jistgħux jiġu ttrattati. Minn dan hija tiddeduċi li dan il-prodott ma għandux jiġi kklassifikat fl-intestatura tariffarja 3808 tan-NM, bħala insettiċida, iżda fl-intestatura tariffarja 3004, b’mod iktar partikolari fis-subintestatura 30049000 tan-NM, bħala prodott mediċinali. |
26 |
F’dan il-kuntest, il-Krajský soud v Ostravě (il-Qorti Reġjonali ta’ Ostrava, ir-Repubblika Ċeka) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domanda preliminari li ġejja: “Il-prodott bl-isem ‘Bob Martin Clear 50 mg […] – spot-on pro kočky” li jiġi fil-forma ta’ pipetti (0.5 ml), li fih l-ingredjent attiv Fipronil (50 mg f’kull pipetta) u l-eċċipjenti butilidrossianisol E 320, butilidrossitoluen E 321, alkoħol benżiliku u dietileniku monoetiletere, għandu jiġi kklassifikat taħt l-intestatura 3004 jew taħt l-intestatura 3808 tan-[NM]?” |
Fuq id-domanda preliminari
27 |
Permezz tad-domanda tagħha, il-qorti tar-rinviju tistaqsi, essenzjalment, jekk in-NM għandhiex tiġi interpretata fis-sens li prodott li jikkonsisti f’soluzzjoni intiża għall-qtates, li għandha tiġi applikata b’mod lokali fuq il-ġilda (spot-on) permezz ta’ pipetti (0.5 ml) u li fih l-ingredjent attiv imsejjaħ fipronil (50 mg f’kull pipetta) kif ukoll eċċipjenti, bħall-butilidrossianisol E320, il-butilidrossitoluen E321, l-alkoħol benżiliku u d-dietileniku monoetiletere, jaqa’ taħt l-intestatura tariffarja 3004 ta’ din in-nomenklatura, bħala prodott mediċinali, jew taħt l-intestatura tariffarja 3808 tagħha, bħala insettiċida. |
28 |
Għandu l-ewwel nett jiġi enfasizzat li, meta quddiem il-Qorti tal-Ġustizzja jitressaq rinviju għal deċiżjoni preliminari dwar il-klassifikazzjoni tariffarja, ir-rwol tagħha huwa iktar li tagħti kjarifika lill-qrati nazzjonali dwar il-kriterji li l-implimentazzjoni tagħhom tippermetti lil dawn tal-aħħar jikklassifikaw korrettement il-prodotti inkwistjoni fin-NM iktar milli twettaq hija stess din il-klassifikazzjoni. Fil-fatt, il-klassifikazzjoni tal-merkanzija inkwistjoni tirriżulta minn konstatazzjoni purament fattwali li ma hijiex il-Qorti tal-Ġustizzja li għandha twettaqha fil-kuntest ta’ rinviju għal deċiżjoni preliminari (ara s-sentenza tal‑15 ta’ Mejju 2019, Korado, C‑306/18, EU:C:2019:414, punt 33 u l-ġurisprudenza ċċitata, kif ukoll id-digriet tat‑3 ta’ Diċembru 2020, Siebenburgisches Nugat, C‑99/20, mhux ippubblikat, EU:C:2020:993, punt 25 u l-ġurisprudenza ċċitata). |
29 |
Imbagħad, hija ġurisprudenza stabbilita li, fl-interess taċ-ċertezza legali u tal-faċilità tal-kontrolli, il-kriterju deċiżiv għall-klassifikazzjoni tariffarja tal-merkanzija għandu jitfittex, b’mod ġenerali, fil-karatteristiċi u l-proprjetajiet oġġettivi tagħha, kif iddefiniti mill-formulazzjoni tal-intestatura tan-NM u tan-noti tat-taqsimiet jew tal-kapitoli. (ara, b’mod partikolari, is-sentenzi tat‑12 ta’ Lulju 2012, TNT Freight Management (Amsterdam), C‑291/11, EU:C:2012:459, punt 30; tad‑19 ta’ Diċembru 2019, Amoena, C‑677/18, EU:C:2019:1142, punt 40, u tas‑26 ta’ Marzu 2020, Pfizer Consumer Healthcare, C‑182/19, EU:C:2020:243, punt 37). |
30 |
Fl-aħħar nett, il-Qorti tal-Ġustizzja ddeċidiet repetutament li, minkejja l-fatt li huma ma għandhomx saħħa vinkolanti, in-Noti ta’ Spjega tan-NM u tas-SA jikkostitwixxu strumenti importanti sabiex tiġi żgurata applikazzjoni uniformi tat-tariffa doganali komuni u jipprovdu, bħala tali, elementi validi għall-interpretazzjoni tagħha (ara, b’mod partikolari, is-sentenza tal‑15 ta’ Mejju 2019, Korado, C‑306/18, EU:C:2019:414, punt 35 u l-ġurisprudenza ċċitata, kif ukoll id-digriet tat‑3 ta’ Diċembru 2020, Siebenburgisches Nugat, C‑99/20, mhux ippubblikat, EU:C:2020:993, punt 28 u l-ġurisprudenza ċċitata). |
31 |
Fir-rigward, l-ewwel nett, tal-intestatura tariffarja 3004 tan-NM, għandu jitfakkar, minn naħa, li sabiex prodotti jiġu kklassifikati fil-Kapitolu 30 tan-NM, li taħtu taqa’ din l-intestatura, għandu jitfittex jekk dawn għandhomx profil terapewtiku jew profilattiku ddefiniti b’mod ċar, li l-effett tiegħu jikkonċentra fuq funzjonijiet preċiżi tal-organiżmu tal-annimal, jew saħansitra jekk dawn jistgħux jiġu applikati fil-prevenzjoni jew fit-trattament ta’ marda jew ta’ kundizzjoni. Min-naħa l-oħra, jista’ jiġi kklassifikat fil-Kapitolu 30 tan-NM prodott li, minħabba l-karatteristiċi u l-proprjetajiet oġġettivi tiegħu, huwa naturalment iddestinat għal użu mediku (ara, f’dan is-sens, is-sentenza tat‑30 ta’ April 2014, Nutricia, C‑267/13, EU:C:2014:277, punti 20 u 21 u l-ġurisprudenza ċċitata). |
32 |
F’dan il-każ, mid-deċiżjoni tar-rinviju jirriżulta li l-prodott inkwistjoni huwa intiż għall-qerda tal-parassiti, jiġifieri l-bergħud u l-qurdien, tal-qtates. Huwa jiġi applikat lokalment fuq il-ġilda (spot-on). Ir-rata ta’ assorbiment tal-ingredjent attiv ta’ dan il-prodott, il-fipronil, hija dgħajfa fil-qattus. Skont is-“Sunt tal-karatteristiċi tal-prodott”, il-prodott inkwistjoni jaqa’ taħt il-grupp farmakoterapewtiku “antiparassitiċi esterni għal użu topiku”. Barra minn hekk, dan id-dokument tal-aħħar jiddeskrivi l-fipronil bħala insettiċida u akariċida li jaġixxi bl-inibizzjoni tal-kumpless GABA, li jwassal għal attività mhux ikkontrollata tas-sistema nervuża tal-insetti u tal-akaridi u għall-mewt tagħhom. |
33 |
Il-qorti tar-rinviju tirrileva li l-prodott inkwistjoni jista’ jkollu effett preventiv kontra l-mard marbut mal-preżenza ta’ bergħud u ta’ qurdien fuq il-ġisem tal-qattus. Madankollu, din l-istess qorti tippreċiża li dan il-prodott ma għandux effetti terapewtiċi, iżda jwassal għall-qerda inizjali tal-parassiti, li mingħajrha l-manifestazzjonijiet sekondarji tal-infestazzjoni minn dawn tal-aħħar ma jkunux jistgħu jiġu ttrattati. |
34 |
F’dan ir-rigward, il-Kummissjoni tenfasizza li l-ingredjent attiv tal-prodott inkwistjoni, il-fipronil, jeżerċita l-effett tiegħu fuq l-annimal fuq is-superfiċji, billi joqtol biss il-parassiti esterni li jistgħu jġorru magħhom diversi mard. |
35 |
B’hekk, jidher li l-effett preventiv tad-diversi infezzjonijiet potenzjali trażmessi mill-parassiti huwa sekondarju meta mqabbel mal-effett insettiċidu u akariċidu tal-prodott inkwistjoni. Dan l-effett preventiv għalhekk ma jistax jiġi konfuż mal-effetti terapewtiċi jew profilattiċi li jikkaratterizzaw lill-prodotti li jaqgħu taħt l-intestatura tariffarja 3004 tan-NM. |
36 |
Fir-rigward tal-argument ippreżentat minn Samohýl quddiem il-qorti tar-rinviju, ibbażat fuq il-fatt li l-prodott “Moxiclear 400 + 100 mg” ġie kklassifikat fl-intestatura tariffarja 3004 tan-NM, bħala prodott mediċinali, mid-deċiżjoni tar-rinviju jirriżulta li l-prodott “Moxiclear 400 + 100 mg” fih l-ingredjenti attivi imidakloprid u mossidettin, iżda mhux il-fipronil, u li huwa intiż għall-klieb li jsofru minn infestazzjonijiet parassitarji mħallta ta’ natura interna jew esterna, jew esposti għar-riskju ta’ tali infestazzjonijiet. Fl-osservazzjonijiet bil-miktub tagħha, il-Kummissjoni tippreċiża li l-ingredjent attiv mossidettin jiġi assorbit mill-ġilda tal-annimal u li, ladarba assorbit, huwa jiġi lliberat fl-organiżmu kollu, fejn jaġixxi kontra diversi parassiti interni, b’mod partikolari dawk li jattakkaw is-sistema tad-demm, is-sistema diġestiva jew il-pulmun. |
37 |
F’dawn iċ-ċirkustanzi, hija l-qorti tar-rinviju li għandha tivverifika jekk, kif isostnu l-Gvern Ċek u l-Kummissjoni, il-prodott inkwistjoni jistax jitqies li għandu profil terapewtiku jew profilattiku ddefinit b’mod ċar, li l-effett tiegħu jiffoka fuq funzjonijiet preċiżi tal-organiżmu tal-annimal, fis-sens tal-ġurisprudenza ċċitata fil-punt 31 ta’ din is-sentenza. |
38 |
F’dan ir-rigward, għandu jitfakkar, minn naħa, li, skont in-Noti ta’ Spjega tas-SA dwar l-intestatura tariffarja 3004, huma esklużi minnha l-preparazzjonijiet insettiċidi, diżinfettanti, u oħrajn, li jaqgħu taħt l-intestatura tariffarja 3808, li ma humiex ippreżentati għal użi profilattiċi fil-mediċina tal-bniedem jew veterinarja. Min-naħa l-oħra, il-Qorti tal-Ġustizzja diġà ddeċidiet li l-fatt li prodotti jibbenefikaw, fl-Istati Membri li fihom huma kkummerċjalizzati, minn awtorizzazzjoni ta’ tqegħid fis-suq bħala prodotti mediċinali ma għandux valur determinanti għall-klassifikazzjoni tagħhom fil-Kapitolu 30 tan-NM (ara, f’dan is-sens, is-sentenza tal‑15 ta’ Diċembru 2016, LEK, C‑700/15, EU:C:2016:959, punt 36 u l-ġurisprudenza ċċitata). |
39 |
Fit-tieni lok, fir-rigward tal-intestatura 3808 tan-NM, għandu jiġi rrilevat li, skont l-Artikolu 1 tar-Regolament Nru 455/2007, hija kklassifikata taħt is-subintestatura tariffarja 38089190 tan-NM il-preparazzjoni deskritta fil-punt 1 tal-kolonna 1 tat-tabella li tinsab fl-anness ta’ dan ir-regolament, li tikkonsisti f’soluzzjoni alkoħolika ppakkjata f’pipetti għall-bejgħ bl-imnut, komposta minn fipronil (ISO) 10 g, mill-butilidrossianisol (BHA, E 320) 0,02 g, mill-butilidrossitoluen (BHT, E 321) 0,01 g u mill-eċċipjent q.s.p. 100 ml. Dan il-punt 1 jippreċiża, barra minn hekk, li din il-preparazzjoni, li fiha ingredjent li għandu attività insettiċida u akariċida kontra l-parassiti bħall-bergħud, il-qurdien u l-furrax, jintuża esternament fuq l-annimali domestiċi, jiġifieri l-klieb u l-qtates. |
40 |
F’dan ir-rigward għandu jitfakkar li regolament ta’ klassifikazzjoni għandu portata ġenerali inkwantu ma japplikax għal operatur partikolari iżda b’mod ġenerali għall-prodotti identiċi għal dak li ġie eżaminat mill-kumitat tal-kodiċi doganali. L-applikazzjoni b’analoġija ta’ regolament ta’ klassifikazzjoni, bħalma huwa r-Regolament Nru 455/2007, għall-prodotti paragunabbli ma’ dawk imsemmija minn dan ir-regolament tiffavorixxi interpretazzjoni koerenti tan-NM kif ukoll l-ugwaljanza fit-trattament tal-operaturi (ara, f’dan is-sens, is-sentenza tal‑4 ta’ Marzu 2015, Oliver Medical, C‑547/13, EU:C:2015:139, punti 55 u 57 u l-ġurisprudenza ċċitata). |
41 |
F’dan il-każ, mid-deċiżjoni tar-rinviju jirriżulta li l-prodott inkwistjoni fih l-istess konċentrazzjoni ta’ ingredjent attiv fipronil bħall-preparazzjoni msemmija fil-punt 1 tal-kolonna 1 tat-tabella li tinsab fl-Anness tar-Regolament Nru 455/2007. Dan fih ukoll l-eċċipjenti butilidrossianisol u butilidrossitoluen. Għalhekk, il-prodott inkwistjoni jidher, minħabba l-kompożizzjoni tiegħu, paragunabbli mal-imsemmija preparazzjoni. |
42 |
Din l-evalwazzjoni hija kkorroborata mill-motivazzjoni tar-Regolament Nru 455/2007, li għandha tittieħed inkunsiderazzjoni sabiex jiġi ddeterminat il-kamp ta’ applikazzjoni tiegħu (ara, f’dan is-sens, is-sentenza tad‑19 ta’ Diċembru 2019, Amoena, C‑677/18, EU:C:2019:1142, punt 31 u l-ġurisprudenza ċċitata). |
43 |
Fil-fatt, jirriżulta qabelxejn mill-kolonna 3 tat-tabella li tinsab fl-anness tar-Regolament Nru 455/2007 li l-klassifikazzjoni tal-preparazzjoni deskritta fil-punt 1 tal-kolonna 1 ta’ din it-tabella hija ddeterminata b’mod partikolari mill-“kliem tal-kodiċi NM 3808, 380891 u 38089190”. Issa, din is-subintestatura tal-aħħar issemmi l-“insettiċidi”“oħrajn” apparti dawk ibbażati fuq piretrojdi, idrokarboni klorinati, karbamati jew komposti ta’ organofosfru. Sussegwentement, hemm riferiment għan-“Noti ta’ Spjega tas-SA dwar l-intestatura 3808 u s-subintestaturi 380891 sa 380899”, li jippreċiżaw li, b’insettiċidi, hemm lok li wieħed jifhem il-prodotti maħsuba sabiex jinqatlu l-insetti u li dawn il-prodotti jiġu f’diversi forom. Fl-aħħar nett, l-imsemmija motivazzjoni tindika li “[i]l-preparazzjoni [msemmija fil-punt 1 tal-kolonna 1 tat-tabella li tinsab fl-Anness tar-Regolament Nru 455/2007] ma hijiex intiża għal użu terapewtiku jew profilattiku, fis-sens tal-intestatura 3004”. [traduzzjoni mhux uffiċjali] |
44 |
Issa, ir-raġunijiet li għalihom il-preparazzjoni deskritta fil-punt 1 tal-kolonna 1 tat-tabella li tinsab fl-Anness tar-Regolament Nru 455/2007 ġiet ikklassifikata fis-subintestatura tariffarja 38089190 tan-NM huma trasponibbli għall-prodott inkwistjoni. Fil-fatt, bla ħsara għall-verifiki li għandha twettaq il-qorti tar-rinviju, dan il-prodott jidher li jinkludi, fi proporzjonijiet identiċi, l-istess ingredjent attiv bħal dak li jidħol fil-kompożizzjoni tal-preparazzjoni, kif ukoll l-istess eċċipjenti bħal din tal-aħħar. Barra minn hekk, mid-deċiżjoni tar-rinviju jirriżulta li l-prodott inkwistjoni għandu l-istess funzjoni u l-istess użu bħal dawk ta’ din il-preparazzjoni, jiġifieri funzjoni insettiċida u akariċida kontra l-parassiti bħalma huma l-bergħud u l-qurdien u użu topiku estern fuq l-annimali domestiċi, jiġifieri l-qtates. |
45 |
Fid-dawl tal-kunsiderazzjonijiet ta’ hawn fuq, ir-risposta li għandha tingħata għad-domanda magħmula għandha tkun li n-NM għandha tiġi interpretata fis-sens li prodott li jikkonsisti f’soluzzjoni intiża għall-qtates, li għandha tiġi applikata b’mod lokali fuq il-ġilda (spot-on) permezz ta’ pipetti (0.5 ml) u li fiha l-ingredjent attiv imsejjaħ fipronil (50 mg f’kull pipetta) kif ukoll eċċipjenti, bħall-butilidrossianisol E320, il-butilidrossitoluen E321, l-alkoħol benżiliku u d-dietileniku monoetiletere, jaqa’, bla ħsara għall-evalwazzjoni mill-qorti tar-rinviju tal-elementi fattwali kollha li għandha quddiemha, taħt l-intestatura tariffarja 3808 ta’ din in-nomenklatura, bħala “insettiċida”. |
Dwar l-ispejjeż
46 |
Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, minbarra dawk tal-imsemmija partijiet, ma jistgħux jitħallsu lura. |
Għal dawn il-motivi, Il-Qorti tal-Ġustizzja (Id-Disa’ Awla) taqta’ u tiddeċiedi: |
In-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana, fil-verżjoni tiegħu li tirriżulta mir-Regolament ta’ Implimentazzjoni tal-Kummissjoni (UE) Nru 1101/2014 tas-16 ta’ Ottubru 2014, għandha tiġi interpretata fis-sens li prodott li jikkonsisti f’soluzzjoni intiża għall-qtates, li għandha tiġi applikata b’mod lokali fuq il-ġilda (spot-on) permezz ta’ pipetti (0.5 ml) u li fiha l-ingredjent attiv imsejjaħ fipronil (50 mg f’kull pipetta) kif ukoll eċċipjenti, bħall-butilidrossianisol E320, il-butilidrossitoluen E321, l-alkoħol benżiliku u d-dietileniku monoetiletere, jaqa’, bla ħsara għall-evalwazzjoni mill-qorti tar-rinviju tal-elementi fattwali kollha li għandha quddiemha, taħt l-intestatura tariffarja 3808 ta’ din in-nomenklatura, bħala “insettiċida”. |
Firem |
( *1 ) Lingwa tal-kawża: iċ-Ċek.