|
OPINJONI
|
|
Kumitat Ekonomiku u Soċjali Ewropew
|
|
Jiġu antiċipati t-tibdil strutturali u dak settorjali u nerġgħu nfasslu l-kulturi industrijali
|
|
_____________
|
|
Jiġi antiċipat it-tibdil strutturali u dak settorjali u nerġgħu nfasslu l-kulturi industrijali – lejn fruntieri ġodda ta’ rkupru u reżiljenza f’partijiet differenti tal-Ewropa
(Opinjoni fuq inizjattiva proprja)
|
|
|
|
CCMI/184
|
|
|
|
Relatur: Norbert KLUGE
Korelatur: Dirk JARRÉ
|
|
Deċiżjoni tal-Assemblea Plenarja
|
25/03/2021
|
|
Bażi legali
|
Artikolu 32(2) tar-Regoli ta' Proċedura
|
|
|
Opinjoni fuq inizjattiva proprja
|
|
Sezzjoni responsabbli
|
Kummissjoni Konsultattiva dwar il-Bidliet Industrijali (CCMI)
|
|
Adottata fis-sezzjoni
|
10/11/2021
|
|
Adottata fil-plenarja
|
08/12/2021
|
|
Sessjoni plenarja Nru
|
565
|
|
Riżultat tal-votazzjoni
(favur/kontra/astensjonijiet)
|
143/1/2
|
1.Konklużjonijiet u rakkomandazzjonijiet
1.1Li l-emissjonijiet tas-CO2 jitnaqqsu b’mill-inqas 55 % sal-2030: dan huwa l-għan vinkolanti u ta’ sfida tat-“tranżizzjoni ġusta” li jrid jitwettaq mill-politika tal-UE u mill-gvernijiet tal-Istati Membri tagħha, kif ukoll mill-kumpaniji fir-reġjuni fejn jgħixu u jaħdmu ċ-ċittadini Ewropej. Bħalissa, din l-ambizzjoni teħtieġ sforzi komuni biex jiġu antiċipati l-impatti fuq il-ħajja ekonomika u soċjali u biex jiġu identifikati strateġiji u miżuri korrispondenti.
1.2Il-KESE huwa konvint li l-Istrateġija Industrijali aġġornata tal-UE u l-pakkett “lesti għall-mira ta’ 55 %” ippreżentati mill-Kummissjoni Ewropea ser jappoġġjaw it-“tranżizzjoni ġusta”. F’dan ir-rigward, il-KESE jilqa’ l-Fond Soċjali għall-Klima l-ġdid biex jiġu bbilanċjati l-iżvantaġġi soċjali bħala parti mill-pakkett. Il-COVID-19 uriet ukoll il-ħtieġa ta’ aktar veloċità fit-tranżizzjoni lejn mudell soċjali, ekonomiku u industrijali aktar sostenibbli, aktar diġitali u aktar sod. B’mod partikolari, il-KESE jinnota li d-differenzi reġjonali u l-inugwaljanzi soċjali jaqdu rwol importanti f’dan ir-rigward.
1.3Dawn il-kwistjonijiet kollha diġà huma parti mill-aġenda ta’ politika (eż. il-Patt Ekoloġiku, l-ekonomija ċirkolari, it-tranżizzjoni ġusta, il-programmi strutturali, eċċ.), iżda mhumiex indirizzati b’mod integrat. Għalhekk, il-KESE jirrakkomanda li jitqiesu l-esperjenzi minn oqsma ta’ politika, nazzjonijiet u reġjuni differenti, li għandhom jiġu kkunsidrati fid-differenzi u l-ispeċifiċitajiet tagħhom.
1.4L-iżvilupp ta’ kundizzjonijiet ekwi fil-kompetizzjoni ekonomika huwa prerekwiżit. Dan jeħtieġ li jqis id-djalogu soċjali bejn l-imsieħba soċjali u d-djalogu ċivili għall-kokreazzjoni. Dan għandu jiffavorixxi l-ħolqien ta’ sett ta’ promoturi tal-UE li min-naħa tagħhom jistgħu jsaħħu s-sovranità ekonomika tal-UE.
1.5Mhux se jkun hemm “patt ekoloġiku” mingħajr “Patt soċjali” integrat. Konsegwentement, il-KESE jirrakkomanda li tissaħħaħ l-implimentazzjoni tal-Pilastru Ewropew tad-Drittijiet Soċjali. Dan huwa meqjus bħala l-boxxla tal-UE u tal-Istati Membri tagħha biex jittaffew l-effetti soċjali tal-bidla industrijali. Essenzjalment, dan huwa bbażat fuq id-djalogu soċjali u l-ftehimiet kollettivi, li jiffurmaw il-bażi għad-deċiżjonijiet tal-kumpanija fejn il-ħaddiema jkunu infurmati b’mod adegwat u l-interessi tagħhom jitqiesu permezz ta’ konsultazzjoni u, fejn xieraq, il-parteċipazzjoni fis-superviżjoni u l-ġestjoni tal-kumpaniji.
1.6Il-KESE jinnota li s-suċċessi ekonomiċi u ambjentali jinkisbu u jiġu implimentati primarjament fejn jgħixu n-nies. Dan huwa fejn l-isfidi mill-ħarsien tal-klima huma antiċipati u ffurmati b’mod konġunt. Dan huwa fejn jitfaċċaw ideat ġodda u jiġu ttrasformati industrijalment fi prodotti u servizzi kompetittivi globalment.
1.7Il-“perkorsi ta’ tranżizzjoni”, kif konċettwalizzati fl-Istrateġija Industrijali aġġornata tal-UE u diskussi mill-Forum Industrijali tal-UE, jipprovdu liċ-ċittadini tal-UE b’appoġġ u gwida. Madankollu, il-punti ta’ tluq speċifiċi fil-livell reġjonali jvarjaw ħafna u hemm bżonn ta’ strateġiji differenti biex jintlaħaq l-għan ġenerali. Għalhekk, il-KESE jistieden lill-Kummissjoni Ewropea tagħti attenzjoni partikolari lil dawn ir-rekwiżiti differenti meta tistabbilixxi l-qafas u tkejjel l-istrateġija industrijali tal-UE, sabiex tkun tista’ tindirizza b’mod flessibbli l-ħtiġijiet reġjonali u settorjali.
1.8Is-sussidjarjetà trid titqies fil-kapaċità tagħha li toħloq riżorsa b’saħħitha għat-“tranżizzjoni ġusta”. Ir-reġjuni u ż-żoni metropolitani jafu sew il-problemi u l-opportunitajiet tagħhom. Għal din ir-raġuni, il-KESE jirrikonoxxi li l-objettivi u l-prinċipji vinkolanti tal-politika industrijali Ewropea maqbula b’mod konġunt fil-livell tal-UE għandhom jiġu definiti b’mod ċar. Huwa importanti li wieħed ikun konxju li l-implimentazzjoni fir-reġjuni u ż-żoni metropolitani għandha tkun ibbażata fuq il-prinċipju tas-sussidjarjetà.
1.9Is-sitwazzjonijiet u l-kapaċitajiet biex jintlaħqu l-għanijiet klimatiċi, soċjali u ambjentali huma diverġenti ħafna. Filwaqt li xi industriji u kumpaniji jistgħu jilħqu l-għan b'mod aktar faċli, oħrajn jista' jkollhom aktar diffikultajiet biex jimxu 'l quddiem. Għalhekk, reġjuni aktar dgħajfa u ċerti industriji jirrikjedu attenzjoni speċjali u appoġġ speċifiku. Peress li l-għan ġenerali japplika għall-katina tal-valur kollha, huwa importanti li l-ewwel wieħed jikkonċentra fuq effetti aktar rapidi u bidliet bi skop usa'.
1.10Il-KESE jinnota li dan huwa l-prinċipju li bih il-kumpaniji jistgħu jerġgħu jiksbu l-kompetittività ekonomika u sostenibbli tagħhom, bl-għajnuna ta’ intraprendituri u maniġers impenjati u ħaddiema mħarrġa sew u tas-sengħa. L-SMEs jaqdu rwol importanti hawnhekk. L-aġenda tal-kapital uman hija prerekwiżit għat-tranżizzjoni b’suċċess tal-kumpaniji.
1.11L-Istati Membri għandhom isaħħu, bl-appoġġ loġistiku u finanzjarju tal-Unjoni Ewropea, l-investimenti pubbliċi strutturali u orjentati lejn il-proċess permezz ta’ servizzi ta’ interess ġenerali mmirati lejn it-titjib kontinwu tal-kundizzjonijiet li jiffavorixxu l-iżvilupp industrijali u soċjali, u li jistgħu jtejbu l-kapaċitajiet tal-awtoritajiet reġjonali u lokali biex jindirizzaw b’mod effettiv l-isfidi ambjentali, teknoloġiċi, ekonomiċi u soċjali.
1.12Il-KESE jirrakkomanda li l-Istrateġija Industrijali tal-UE għandha tantiċipa u tikkontrobilanċja ż-żieda fil-faqar u l-inugwaljanza peress li l-Patt Ekoloġiku jrid ikun akkumpanjat minn “patt soċjali” integrat. Għalhekk, ir-riżorsi għandhom jiġu diretti fejn huma l-aktar meħtieġa. Politika komprensiva tal-UE dwar is-sostenibbiltà għandha tagħmel aktar għall-ġustizzja u l-parteċipazzjoni fl-ekonomija, għall-benefiċċju tan-nies u tar-reġjuni
. Il-ħajja ċivili u tax-xogħol fl-Ewropa għandha ssegwi r-rekwiżit li tinħoloq sostenibbiltà bbażata fuq tkabbir inklużiv u sostenibbli, xogħol deċenti u ġustizzja soċjali.
1.13Il-KESE jappoġġja t-tranżizzjoni lejn ekonomija ċirkolari li twaqqaf l-ħela fl-użu ta’ riżorsi mhux rinnovabbli u tnaqqas id-dipendenzi internazzjonali. Din għandha tkun ukoll parti ewlenija mill-Istrateġija Industrijali tal-UE. Konsegwentement, il-kundizzjonijiet qafas għandhom jiġu modifikati biex jinħolqu vantaġġi kompetittivi għall-kumpaniji li jaderixxu mal-prinċipji ta’ ekonomija ċirkolari.
2.Tranżizzjoni ġusta bħala opportunità għall-irkupru u t-tkabbir industrijali
2.1Il-Patt Ekoloġiku jistabbilixxi għan ċar u politikament vinkolanti: b'mod ġenerali, fl-Ewropa għandu jinkiseb tnaqqis ta' 55 % fl-emissjonijiet ta' gassijiet serra sal-2030. Dan twettaq mill-miżuri "lesti għall-mira ta' 55 %" ippreżentati mill-Kummissjoni Ewropea f'Lulju 2021. Ma hemmx aktar lok għal interpretazzjoni hawnhekk. Sistema ta' kummerċ internazzjonali ġusta jeħtieġ li tiżgura li n-negozji jkunu jistgħu jibqgħu kompetittivi fil-livell globali filwaqt li jilħqu l-għanijiet tal-Patt Ekoloġiku. Dan jinkludi sistema ta' aġġustament tal-karbonju transfruntiera u transkontinentali. Dan joħloq inċentivi għall-imsieħba kummerċjali biex jidħlu fil-klabb tan-nazzjonijiet li jirrispettaw il-limiti tal-pjaneta.
2.2Il-pajjiżi barra mill-UE b'regolamenti ambjentali dgħajfa jżidu l-pressjoni fuq l-UE, li għandha regolamenti ambjentali komparattivament b'saħħithom. Dawn l-interazzjonijiet globali ma jridux iwasslu għal dumping ambjentali.
2.3Is-sitwazzjoni globali tista’ twassal għall-iżvilupp ta’ teknoloġiji sostenibbli ġodda li jikkapitalizzaw fuq il-punti b’saħħithom tal-Ewropa, bħall-kapaċità tagħha li timplimenta innovazzjoni inkrementali u radikali sabiex tforni lis-swieq tad-dinja bi prodotti b’kompetenzi tradizzjonali sabiex jiġu indirizzati sfidi ġodda. Dan jirrikjedi antiċipazzjoni bir-reqqa u viżjonarja tan-natura u tal-firxa tal-bidla u żieda sostanzjali fis-servizzi pubbliċi u soċjali biex jiġu indirizzati l-problemi soċjali bħall-possibbiltà ta' żieda fil-faqar, fil-persuni mingħajr dar, fl-esklużjoni tal-persuni b'diżabilità u l-minoranzi, tnaqqis fl-opportunitajiet għan-nisa u tnaqqis fit-taħriġ biex jiġi ffaċilitat id-dħul mill-ġdid fis-suq tax-xogħol.
2.4Analiżi statika tista' tikkonkludi li l-azzjoni skont il-Patt Ekoloġiku Ewropew, fuq medda qasira ta' żmien, tagħti vantaġġ lill-kompetituri f'pajjiżi b'miri klimatiċi inqas ambizzjużi fil-konfront tal-kumpaniji Ewropej li diġà jinsabu fi tranżizzjoni. Perspettiva dinamika tenfasizza li l-kumpaniji se jingħataw inċentivi biex jinnovaw b'mod inkrementali billi jagħmlu s-sistemi ta' produzzjoni tagħhom aktar effiċjenti fl-użu tal-enerġija, jaqilbu għal sorsi ta' enerġija rinnovabbli u jadottaw innovazzjonijiet xierqa. Filwaqt li l-UE hija b’mod ċar minn ta’ quddiem biex timmira li tiġġieled b’mod effettiv il-kriżi klimatika, l-użu rapidu ta’ materjali rinnovabbli jirrikjedi implimentazzjoni aktar ambizzjuża tal-ekonomija ċirkolari u r-reżiljenza tal-materja prima. It-tranżizzjoni li tirriżulta se taħdem biss jekk tingħata biżżejjed attenzjoni lid-dimensjoni soċjali ta' dan il-proċess. Il-prinċipji ta' tranżizzjoni ġusta tat-Trattat dwar il-Klima ta' Pariġi u l-Linji Gwida tal-ILO għal tranżizzjoni ġusta
joffru gwida f'dan ir-rigward. Għalhekk, il-prinċipji ta' tranżizzjoni ġusta jaġixxu bħala boxxla għall-miżuri ta' rkupru billi jistabbilixxu responsabbiltajiet ċari għall-partijiet ikkonċernati kollha biex jirrispettaw id-drittijiet tal-bniedem u dawk soċjali, il-valuri demokratiċi u l-istat tad-dritt bl-intenzjoni li ħadd ma jitħalla jibqa' lura.
2.5Fl-aħħar iżda mhux l-inqas, il-bidliet fuq din l-iskala u t-tagħlimiet miksuba mit-trasformazzjonijiet tal-passat jissuġġerixxu li huwa meħtieġ proċess ta' kokreazzjoni li jinvolvi politiċi, amministrazzjonijiet, imsieħba soċjali, organizzazzjonijiet tas-soċjetà ċivili, kumpaniji u membri tal-pubbliku fil-livelli kollha ta' governanza fl-UE u fi ħdan il-kumpaniji. L-isfruttar tal-kreattività u l-potenzjal innovattiv li għadhom ma ġewx sfruttati tan-nies li jgħixu fl-Ewropa se joħloq is-soluzzjonijiet meħtieġa biex jiġu indirizzati l-isfidi li ġejjin. Id-diversità tal-ideat hija sors imprezzabbli għall-innovazzjoni fis-setturi kollha tal-ekonomija li ser tavvanza b’mod sinifikanti l-progress tekniku-xjentifiku.
2.6L-esperjenzi tal-passat urew li bidliet ekonomiċi u soċjali li jirnexxu u dejjiema għandhom l-ogħla probabbiltà li jiġu implimentati jekk l-objettivi jiġu spjegati b'mod ċar, ir-responsabbiltajiet tad-diversi atturi involuti fil-proċess ta' trasformazzjoni jiġu ddeterminati fi strateġija preċiża u jintlaħaq qbil dwar il-proġett kollu, approvat u appoġġjat mill-forzi ewlenin tas-soċjetà. B’konsegwenza ta’ dan, il-forzi politiċi, il-partijiet ikkonċernati ekonomiċi u s-soċjetà ċivili jridu jaġixxu flimkien f’sistema ta’ djalogu soċjali effettiv, ftehimiet kollettivi u kondiviżjoni reċiproka tal-informazzjoni, konsultazzjoni u parteċipazzjoni ġenwina fil-proċessi tat-teħid tad-deċiżjonijiet u tal-kokreazzjoni.
2.7Id-djalogu soċjali fost l-imsieħba soċjali u d-djalogu ċivili li jinvolvi lill-partijiet ikkonċernati tas-soċjetà jistgħu jaqdu rwol partikolarment importanti fi proġetti li għandhom l-għan li jibbilanċjaw l-interessi soċjali, ekoloġiċi u ekonomiċi. Għalhekk, l-implimentazzjoni konkreta tal-Pilastru Ewropew tad-Drittijiet Soċjali hija indispensabbli.
3.Ir-reġjuni huma postijiet ewlenin tax-xogħol u tal-ħajja u jantiċipaw it-tibdil soċjoekonomiku – mhux biss ekosistemi
3.1Il-pandemija tal-COVID-19 kellha impatti differenti fuq ekosistemi differenti, kif tirrikonoxxi l-Kummissjoni Ewropea fil-Komunikazzjoni tagħha dwar l-Istrateġija Industrijali l-ġdida tal-UE. Din aċċellerat ukoll ix-xejriet eżistenti lejn id-diġitalizzazzjoni u d-dekarbonizzazzjoni, u żiedet ir-riskju li tissaħħaħ il-frammentazzjoni bejn ir-reġjuni minħabba livelli differenti ta' ġid ekonomiku u riżorsi li bihom għandu jsir investiment fit-trasformazzjoni tal-industriji. Għalhekk huwa essenzjali li l-Forum Industrijali, u l-perkorsi ta’ tranżizzjoni previsti, iqisu dawn l-effetti differenti.
3.2Huwa fl-interess tas-soċjetà ċivili Ewropea li jiġu żviluppati prospetti tajbin għall-impjiegi u l-introjtu għaċ-ċittadini f'reġjuni affettwati mit-trasformazzjoni industrijali. Għal dan, jeħtieġ li nifhmu l-punti tat-tluq differenti tad-diversi reġjuni u kif jistgħu jiġu ġġenerati interazzjonijiet pożittivi mill-kompetenzi industrijali eżistenti. L-integrazzjoni fi ktajjen tal-valur sinifikanti fil-livell globali u, b'mod partikolari, id-diversi aspetti li jikkontribwixxu għal tali ktajjen tal-valur jaqdu rwol importanti f'dan ir-rigward. L-approċċ tal-ekosistema tal-Kummissjoni Ewropea huwa bbażat fuq approċċ makropolitiku li jikklassifika l-industriji kollha fil-livell globali. Dan l-approċċ ma jqisx is-sitwazzjonijiet diverġenti jew l-interdipendenzi li jeżistu fid-diversi ekosistemi. Dan ma jirrappreżentax b'mod xieraq id-diversità tar-rekwiżiti fid-diversi reġjuni u jrid jiġi ssupplimentat minn perspettiva politika reġjonali.
3.3Il-Kummissjoni Ewropea bħalissa qed tiżviluppa indikaturi ewlenin tal-prestazzjoni li huma maħsuba biex juru s-suċċess tal-Istrateġija Industrijali tal-UE. Bħalissa, il-Kummissjoni qed tagħmel l-akbar enfasi fuq it-tkabbir ekonomiku u qed tinjora l-għanijiet stabbiliti fil-Patt Ekoloġiku Ewropew, il-bidliet li tirrikjedi t-tranżizzjoni lejn ekonomija ċirkolari, u d-dimensjoni soċjali tal-proċess ta' trasformazzjoni. Huwa ta’ importanza kbira li l-Istrateġija Industrijali tal-UE tirrikonoxxi u tapprezza b’mod ċar il-valur tal-ħiliet industrijali, il-potenzjal u l-kompetenzi disponibbli reġjonalment. Dan għandu jitqies b’mod xieraq. Inkella, enfasi limitata wisq fuq it-tkabbir ekonomiku u fuq il-miżuri u l-istrumenti assoċjati miegħu tista’ twassal biex jiġu injorati l-miri klimatiċi u l-opportunitajiet assoċjati mat-trasformazzjoni industrijali, u tista’ ddgħajjef l-ekonomija ċirkolari.
3.4Il-formulazzjoni tal-istrateġija industrijali u t-tfassil tal-politika f’dan l-ambitu jridu jqisu l-inċertezza u l-inprevedibbiltà. Il-politiki u l-perkorsi diverġenti mfassla għal sitwazzjonijiet individwali jridu jkunu flessibbli u jeħtieġ li jkunu bbażati fuq il-kompetenzi kollha disponibbli f'reġjun jew għal reġjun permezz ta' skambji ma' reġjuni u pajjiżi oħra. Il-ftuħ bħala riżorsa strateġika importanti huwa meħtieġ biex jiġi identifikat dak li huwa nieqes u dak li huwa meħtieġ b’mod immedjat.
3.5Il-bidliet industrijali għall-finijiet tal-protezzjoni tal-klima se jikkawżaw problemi soċjali serji sabiex jintlaħqu l-għanijiet tal-Patt Ekoloġiku fil-perjodu qasir li jifdal. Il-konsum ta’ riżorsi li jagħmlu ħsara lill-ambjent hija kwistjoni li għandha tiġi indirizzata u investigata sabiex tinstab soluzzjoni ġusta fil-livell soċjali u mil-lat tas-soċjetà kollha kemm hi.
3.6L-ekonomija ċirkolari tikkontribwixxi b’mod pożittiv għall-bidla industrijali, fir-reġjuni u tul il-ktajjen tal-provvista u tal-valur. Għalkemm l-ogħla valur miżjud jista' jinstab f'reġjuni bl-aktar industriji avvanzati, f'postijiet b'ekonomija bbażata fuq livell aktar baxx ta' għarfien u li tuża aktar enerġija, il-materjal jiġi prodott, pproċessat u jiddaħħal fl-ekonomija ċirkolari. Huwa evidenti li r-reġjuni aktar dgħajfa jistgħu jibbenefikaw aktar mill-ekonomija ċirkolari u jistgħu jsiru atturi ewlenin f'dan il-qasam.
3.7L-enfasi fuq is-suċċess tal-bidliet industrijali fil-livell reġjonali timplika b'mod ċar il-ħtieġa ta' rabtiet b'saħħithom, kollaborazzjoni mill-qrib u kondiviżjoni tal-kompetenza ma' reġjuni oħra, inkluż bejn il-fruntieri nazzjonali tal-Istati Membri tal-UE. Hemm sistema komprensiva ta' interazzjonijiet, li tinkludi b'mod ċar l-SMEs lokali li jinteraġixxu ma' kumpaniji transfruntiera.
3.8Il-kompetenzi industrijali reġjonali eżistenti waħedhom mhumiex effettivi bis-sħiħ fil-kuntest tal-bidla soċjoekonomika. Madankollu, dawn iridu u jistgħu jiġu żviluppati aktar billi jsir investiment fl-għarfien, fit-tagħmir u fil-persunal u jridu u jistgħu jsiru produttivi fl-ambitu tal-kundizzjonijiet mibdula. Dan ser iservi biex jinħolqu prodotti, servizzi, teknoloġiji u opportunitajiet ġodda. Dan, min-naħa tiegħu, ser iwassal għal kumpaniji ekonomikament stabbli b’impjiegi attraenti fir-reġjuni. Dan huwa preċiżament l-għan li l-Istrateġija Industrijali Ewropea teħtieġ li timmira għalih.
3.9Reġjun huwa definit b’mod wiesa’ mill-istrutturi industrijali tiegħu, mill-kumpaniji tiegħu, mill-forza tax-xogħol tiegħu, mill-kompetenzi taċ-ċittadini tiegħu, mill-kapaċitajiet tiegħu ta’ riċerka u żvilupp u mill-prodotti speċifiċi li l-kumpaniji tiegħu jimmanifatturaw jew jipproċessaw. Il-kompetenzi industrijali juru firxa wiesgħa ta’ partikolaritajiet storiċi.
Il-ktajjen tal-provvista u tal-valur għandhom effetti reġjonali differenti ħafna madwar l-Ewropa. Il-kuntest globali huwa importanti daqs l-organizzazzjoni fl-Ewropa iżda għandu effetti differenti. L-Industrija 4.0 u d-diġitalizzazzjoni kif ukoll it-teknoloġiji tal-informazzjoni u tal-komunikazzjoni ser ikollhom impatt sinifikanti iżda diverġenti ħafna fuq l-industriji u l-ekonomiji tal-Ewropa b’mod ġenerali. F’dan is-sens, il-fondi għall-innovazzjoni u l-iżvilupp ser isiru saħansitra aktar kruċjali biex jittaffew id-differenzi reġjonali.
3.10Il-fornituri li jippermettu bidliet industrijali, inklużi negozji ġodda u SMEs, jistgħu jkunu marbuta mal-klijenti tagħhom anki minn reġjuni anqas ċentrali u jistgħu jinħolqu impjiegi attraenti anki f’tali postijiet. B'mod partikolari, il-kumpaniji bbażati fuq l-għarfien jistgħu jagħmlu l-kontributi tagħhom għall-ktajjen tal-valur fil-biċċa l-kbira indipendentement mill-prossimità tagħhom għall-klijenti. Barra minn hekk, il-makkinarju ta' fabbriki fuq skala akbar spiss jista' jiġi ġestit mill-bogħod.
3.11L-approċċ tal-ekosistema tal-Kummissjoni Ewropea ma jkoprix il-livelli u l-aspetti rilevanti kollha. Huwa jenfasizza b'mod ċar l-importanza li l-iżviluppi ta' tranżizzjoni jiġu indirizzati wkoll minn perspettiva reġjonali, u li jiġi żgurat li l-kumpaniji – inklużi dawk mill-ekonomija soċjali – iservu bħala l-pedament għall-operazzjoni politika kollha. Huwa importanti li jintwera kif dan huwa relatat mal-ktajjen tal-valur u kif id-diversi komponenti tal-ekosistemi individwali jikkorrispondu ma' dawk ta' ekosistemi differenti.
4.Għażliet għal perkorsi ta’ tranżizzjoni li jsegwu approċċ olistiku għall-iżvilupp industrijali soċjoekonomiku
4.1Filwaqt li l-innovazzjoni hija assoċjata b'mod wiesa' ma' teknoloġiji ġodda jew ma' skoperti fir-riċerka xjentifika, jeżistu wkoll opportunitajiet biex jintużaw il-kompetenzi eżistenti bħala bażi għal prodotti u servizzi aħjar jew ġodda. It-teknoloġiji l-ġodda huma minsuġa ma' teknoloġiji tradizzjonali eżistenti. Hemm aktar eżempji ċari għal din ir-rabta bejn modi tradizzjonali stabbiliti sew ta' manifattura u innovazzjoni u modernizzazzjoni inkrementali tal-industriji: l-użu ta' materjal ġdid u eħfef mill-inġenji tal-ajru fil-vetturi, l-użu ta' materjali tal-karozzi eħfef, u l-applikazzjoni tal-bijoteknoloġija fid-disinn ta' strumenti jew servizzi mediċi ġodda.
4.2L-infrastrutturi avvanzati tal-ICT jaġixxu bħala xprunaturi għall-introduzzjoni ta' opportunitajiet ġodda u jgħinu biex jinħolqu soluzzjonijiet innovattivi u sostenibbli li jorbtu ma' pekuljaretajiet eżistenti fil-livell reġjonali. Pereżempju, l-użu ta' stampaturi 3D jipprovdi opportunitajiet għall-iżvilupp u d-disinn ta' prodott f'post wieħed u jagħmluh disponibbli fiżikament fejn ikun meħtieġ f'għadd ta' postijiet differenti. Dan jgħin biex jitnaqqsu l-impatti ambjentali relatati mat-trasport.
4.3Il-kunċetti tal-ekonomija soċjali jistgħu jaqdu rwol importanti fil-bidla soċjoekonomika billi joħolqu opportunitajiet ġodda ta' tagħlim, għajxien u impjieg, kif ukoll servizzi alternattivi u infrastrutturi ta' appoġġ fil-komunitajiet lokali, speċjalment għal gruppi żvantaġġjati u għal persuni f'riskju. Flimkien mas-servizzi ta' interess pubbliku ġenerali, dawn il-kunċetti għandhom potenzjal konsiderevoli biex iħejju b'mod kompetenti u effettiv lill-atturi tas-soċjetà u ekonomiċi għar-rekwiżiti u l-konsegwenzi tal-innovazzjoni u l-bidla, b'mod partikolari f'livell reġjonali.
4.4L-istrutturi pubbliċi għandhom responsabbiltà kbira fil-ħolqien tal-kundizzjonijiet li jippermettu l-bidla u l-iżvilupp billi jipprovdu servizzi ta’ interess ġenerali li huma aċċessibbli għall-atturi ekonomiċi kollha.
4.5Dan huwa wkoll parti mill-progress meħtieġ mas-servizzi ta' interess pubbliku, bħall-organizzazzjoni ta' aġenziji ta' taħriġ ulterjuri kontinwu għat-titjib tal-ħiliet meħtieġ tal-forza tax-xogħol, bil-għan li jittejbu l-kompetenzi tal-ħaddiema, u l-għajnuna lill-kumpaniji biex ilaħħqu mal-innovazzjoni u mal-bidla. B'konsegwenza ta' dan, il-ħaddiema tas-sengħa se jkunu stabbiliti wkoll aktar fir-reġjun u se jikkontribwixxu għat-tfassil tal-bidla strutturali u ekoloġika li għaddejja.
4.6Għall-industriji intensivi fl-enerġija, hemm ħafna soluzzjonijiet kondiviżi għad-dekarbonizzazzjoni u b'hekk il-possibbiltà ta' investimenti kondiviżi (eż. idroġenu nadif, użu mill-ġdid tal-qbid u l-ħżin tad-diossidu tal-karbonju). Iż-żieda fiċ-ċirkolarità u s-simbjożi industrijali huma wkoll aspetti importanti fid-dekarbonizzazzjoni tal-industrija u fit-tħejjija għal futur b'kumpaniji effiċjenti bi produttività qawwija.
5.L-importanza tas-swieq tax-xogħol reġjonali li jipprevedu xogħol deċenti f'kumpaniji tal-manifattura u tas-servizzi sostenibbli
5.1Jeħtieġ li jiġu mifhuma u analizzati b’mod profond ir-reġjuni, il-kumpaniji u l-prestazzjoni ekonomika tagħhom fir-rigward tal-kompetenzi fundamentali tagħhom fl-industriji u f’termini ta’ forza tax-xogħol. Dan jinkludi wkoll l-infrastruttura, il-post, l-allokazzjoni tar-riżorsi, l-ispirtu intraprenditorjali u l-istruttura istituzzjonali. Dan huwa importanti biex ikun hemm forza tax-xogħol bi kwalifiki għolja u biex jiġu antiċipati l-ħtiġijiet tal-ħiliet futuri biex jiġu evitati d-defiċits fil-ħiliet (eż. l-inġiniera).
5.2Il-kollaborazzjonijiet mal-universitajiet, inklużi dawk li jispeċjalizzaw fix-xjenza applikata, u l-istituzzjonijiet tar-riċerka jistgħu jkunu strumentali fil-ħolqien ta’ opportunitajiet industrijali ġodda li jistgħu jirriżultaw f’postijiet tax-xogħol ġodda f’negozji stabbiliti, f’kumpaniji multinazzjonali, f’SMEs u f’negozji ġodda.
5.3Fil-livell tal-bniedem, ir-reġjuni li jilqgħu u jintegraw b'mod faċli wasliet ġodda fi strutturi soċjoekonomiċi li jiffunzjonaw tajjeb jinsabu f'pożizzjoni vantaġġuża.
5.4Ir-reġjuni fejn forza tax-xogħol b'ħiliet għandha għeruq fondi fl-istrutturi soċjoekonomiċi u tħossha komda jistgħu jsiru wkoll il-post fejn jiġu stabbiliti industriji u kumpaniji b'valur miżjud għoli u dinamiċi bbażati fuq networks ta' kompetenza formali u informali effettivi. B'konsegwenza ta' dan, il-ħaddiema jikkontribwixxu b'mod kostitwenti għad-definizzjoni tal-kompetenzi industrijali innovattivi ta' reġjun u jgħinu b'mod fundamentali biex jappoġġjaw il-proċessi ta' modernizzazzjoni u trasformazzjoni.
5.5Il-ħiliet u l-kompetenzi speċifiċi tal-impjegati u t-titjib kontinwu tagħhom jistgħu jipprovdu l-bażi għar-ristrutturar u t-tibdil tal-mudelli tan-negozju, inklużi t-tkabbir futur u swieq ġodda. Meta l-opportunitajiet ta’ żvilupp reġjonali ma jiġux rikonoxxuti u ma jittiħidx benefiċċju minnhom, dan ta’ spiss iwassal għall-migrazzjoni kontinwa ’l barra tal-ħaddiema, li dejjem iddgħajjef il-kapaċitajiet u l-kompetenzi meħtieġa mir-reġjuni biex jiżviluppaw u jisfruttaw l-opportunitajiet maħluqa mill-Patt Ekoloġiku Ewropew.
Brussell, 8 ta' Diċembru 2021
Christa SCHWENG
Il-President tal-Kumitat Ekonomiku u Soċjali Ewropew
_____________