Kumitat Ekonomiku u Soċjali Ewropew
INT/870
Appoġġ finanzjarju għat-tagħmir ta’ kontroll doganali
OPINJONI
Kumitat Ekonomiku u Soċjali Ewropew
Proposta għal Regolament tal-Parlament Ewropew u tal-Kunsill li jistabbilixxi l-istrument ta’ appoġġ finanzjarju għat-tagħmir ta’ kontroll doganali bħala parti mill-Fond għall-Ġestjoni Integrata tal-Fruntieri
[COM(2018) 474 final - 2018/0258(COD)]
Relatur: Antonello PEZZINI
|
Konsultazzjoni
|
Parlament Ewropew, 02/07/2018
Kunsill, 04/07/2018
|
|
Bażi legali
|
Artikoli 114(1) u 304 tat-Trattat dwar il-Funzjonament tal-Unjoni Ewropea
|
|
|
|
|
Sezzjoni kompetenti
|
Sezzjoni Speċjalizzata għas-Suq Uniku, il-Produzzjoni u l-Konsum
|
|
Adottata fis-sezzjoni
|
02/10/2018
|
|
Adottata fil-plenarja
|
17/10/2018
|
|
Sessjoni plenarja Nru
|
538
|
|
Riżultat tal-votazzjoni
(favur/kontra/astensjonijiet)
|
200/0/5
|
1.Konklużjonijiet u rakkomandazzjonijiet
1.1Il-Kumitat Ekonomiku u Soċjali Ewropew iqis li, fid-dawl tal-problemi li qed jiżdiedu marbutin mal-kontroll fil-fruntieri esterni tal-Unjoni, huwa essenzjali li tiġi implimentata sistema li tkun kapaċi tgħaqqad il-protezzjoni tal-individwi u s-sigurtà tal-fruntieri flimkien mal-istabbiliment ta' rabtiet kummerċjali produttivi ma' pajjiżi terzi.
1.2Din hija waħda mill-isfidi l-kbar li l-Unjoni Ewropea trid twieġeb għaliha, u l-KESE jqis li l-Pakkett dwar il-Ġestjoni tal-Fruntieri, li tfassal għall-baġit pluriennali li jmiss tal-UE, jirrappreżenta l-ewwel pass pożittiv.
1.3Il-KESE jqis li huwa essenzjali li jiġu pprovduti livelli għoljin ta' kwalità u ta' innovazzjoni tat-tagħmir doganali lill-Unjoni, sabiex jiġu mħarsa l-kultura soċjali kif ukoll l-interessi soċjali, ambjentali, ekonomiċi u finanzjarji tal-Istati Membri, li jieħdu l-forma:
-fil-ġlieda, li għadha mhix effettiva, kontra l-kummerċ illegali;
-fit-tnaqqis fil-piż u fis-semplifikazzjoni tal-prattiki tal-kummerċ legali;
-fis-salvagwardja tas-sigurtà tas-suq intern tal-UE;
-fil-protezzjoni tal-ambjent u tas-saħħa taċ-ċittadini;
-fir-rispett tad-drittijiet fundamentali tal-ħaddiema;
-fil-ħarsien tal-interessi tal-konsumatur;
-fl-aħjar ġestjoni tar-riskji doganali;
-fl-irkupru tad-dazji.
1.4Il-Kumitat jemmen li huwa importanti wkoll li għall-istrument il-ġdid:
-jiġu żgurati prijoritajiet li jkun hemm tagħmir fil-fruntieri li jkun soġġett għal pressjoni ta' kontroll ikbar, bħal dik marittima;
-jitħaffef ix-xogħol tat-tim ta' valutazzjoni li joperaw f'dan il-kamp ta' applikazzjoni;
-jiġi ggarantit tqassim ġeografika ġust;
-tiġi rrispettata l-proporzjonalità, marbuta mal-flussi tal-merkanzija u tal-persuni, f'sinerġija mal-Fond għas-Sigurtà.
1.5Il-Kumitat japprezza l-isforz tal-Kummissjoni, indirizzat kemm biex jittejbu l-kontrolli tal-fruntieri tal-UE, kif ukoll biex jiżdiedu l-fondi u l-istrumenti meħtieġa, bil-għan li jiġu żgurati kontrolli doganali innovattivi u ta' kwalità, u applikazzjoni, kemm jista' jkun uniformi, tal-leġislazzjoni doganali, applikata fl-uffiċċji li joperaw fil-fruntieri esterni.
1.6Il-Kumitat iqis li l-allokazzjoni finanzjarja tal-istrument il-ġdid mhijiex suffiċjenti fir-rigward tal-għanijiet li jixtieq jilħaq, li, barra minn hekk, għandhom jinkludu: it-tagħmir ta' kontroll tas-sigurtà tas-saħħa tal-pjanti u l-istrumenti għall-ispettrografija avvanzata tal-kontejners tal-merkanzija.
1.7Barra minn hekk, il-Kumitat iqis li huwa importanti li, fi żminijiet kemm jista' jkun qosra, tiġi żgurata l-provvista ta' tagħmir fl-uffiċċji tal-fruntieri li jaffaċċjaw iktar pressjonijiet ta' kontroll, bħal dawk marittimi, li għalihom għandha tingħata prijorità fit-tqassim tal-għotjiet. Barra minn hekk ikun xieraq li l-istrument il-ġdid jipprevedi l-istabbiliment ta’ riżerva ta’ intervent rapidu għat-tixrid ta’ tagħmir ġdid, bil-possibbiltà ta’ reviżjoni, fl-istess ħin, tal-lista ta’ tagħmir diġà aċċettat.
1.8Il-Kumitat jitlob biex tiġi assigurata trasparenza massima għall-programmi ta’ ħidma annwali u l-mekkaniżmi għall-attribuzzjoni tal-għotjiet, ġestiti direttament mill-Kummissjoni.
1.9Il-KESE jirrakkomanda li jkun hemm koordinazzjoni mill-qrib, b'mod partikolari mal-programm Dwana, maħsub biex jiffinanzja serje sħiħa ta' infrastrutturi u sistemi tat-teknoloġija tal-informazzjoni, fosthom id-diġitalizzazzjoni tal-interazzjoni bejn l-operaturi kummerċjali u s-servizzi doganali, mal-Orizzont Ewropa u ma' fondi xierqa oħra.
1.10Il-Kumitat jitlob li, fuq perjodu ta' żmien medju, jiġi ppreżentat lilu r-rapport dwar il-kisbiet u dwar il-funzjonament tal-istrument il-ġdid, akkumpanjat minn analiżi li tkun ibbażata fuq indikaturi kwalitattivi u kwantitattivi.
1.11L-idea li, fi żminijiet xierqa, tiġi żviluppata bażi lingwistika komuni dwar it-temi rikorrenti fil-lingwa tal-uffiċċji doganali, b'analoġija għal dak li għandu x'jaqsam mal-kontrolluri tat-titjiriet, jagħmel l-implimentazzjoni tant mixtieqa ta' sistema doganali Ewropea waħda u omoġenea iktar faċli.
1.11.1Il-KESE jirrakkomanda li tiġi aġġornata minnufih il-firxa ta’ tagħmir doganali, biex jittieħed kont tal-evoluzzjoni tal-Internet tal-oġġetti, iċ-ċibersigurtà, it-traċċabbiltà diġitali u l-applikazzjonijiet teknoloġiċi l-aktar avvanzati sabiex jiġu aċċellerati t-tixrid u taħriġ aġġornat għall-użu tagħhom.
1.11.2Bl-istess mod, ikun xieraq li jiġu żviluppati oqfsa ta’ taħriġ komuni bbażati fuq il-“Qafas tal-kompetenzi tad-dwani tal-UE”, li għandu l-għan li jarmonizza u jgħolli l-istandards tal-prestazzjoni doganali madwar l-UE.
1.11.3Sadanittant, huwa importanti li jiġu stabbiliti standards u protokolli komuni, permezz tal-possibbiltà ta’ mandat lill-organizzazzjonijiet tal-istandardizzazzjoni Ewropej, biex jakkumpanjaw il-materjali u t-tagħmir mogħtija u maħsuba għad-dwana.
2.
Introduzzjoni
2.1Il-proposta tal-Kummissjoni għall-baġit li jmiss tal-2021-2027 hija li jiġu triplikati l-fondi għall-ġestjoni tal-fruntieri tal-Unjoni Ewropea: fondi allokati għat-tisħiħ tal-fruntieri, biex tittejjeb il-mobbiltà tal-oġġetti, tas-servizzi u tal-persuni, inklużi l-migranti. Skont il-proposta tal-eżekuttiv tal-UE, l-allokazzjoni finanzjarja ta' EUR 13-il biljun attwali għandha tiżdied għal EUR 34,9 biljun.
2.2Il-Kummissjoni għandha l-ħsieb li toħloq fond ġdid u separat għall-ġestjoni integrata tal-fruntieri. L-Aġenzija Ewropea għall-Gwardja tal-Fruntiera u tal-Kosta (Frontex) se tkompli tissaħħaħ permezz ta' korp permanenti ġdid ta' madwar 10 000 gwardjan u permezz ta' iktar finanzjamenti, sabiex jittejjeb il-kontroll tad-dwana u biex jissaħħaħ it-tagħmir ta' kontroll. Se jinħoloq Fond ġdid għall-Ġestjoni Integrata tal-Fruntieri (IBMF), b'valur li jaqbeż id-EUR 9,3 biljun.
2.2.1Dawn l-investimenti se jservu biex: tissaħħaħ il-Frontex; jitwettqu kontrolli sistematiċi fil-fruntieri; jiġu stabbiliti sistemi ġodda tat-teknoloġija tal-informazzjoni fuq skala kbira u interoperabbli; u titnieda sistema li tirregola d-dħul fil-fruntieri u l-ħruġ minnhom.
2.3Il-fond il-ġdid tal-IBMF għandu jinkludi tliet strumenti separati: l-ewwel wieħed, għal "Ġestjoni integrata tal-fruntieri u tal-viża" – IGFV; it-tieni mogħni b’EUR 1,3 biljun, għall-perjodu 2021-2027, għal "Tagħmir ta' kontroll doganali" – CCE, li għandu jikkontribwixxi għall-istabbiliment ta' kontrolli doganali adegwati u ekwivalenti fl-uffiċċji differenti tal-fruntieri.
2.3.1Dan il-Fond huwa maħsub għall-akkwist ta' tagħmir, għal kontrolli doganali moderni u affidabbli, għall-manutenzjoni tagħhom u għall-aġġornament tagħhom.
2.4Wara 50 sena minn meta daħlet fis-seħħ, jiġifieri fl-1 ta' Lulju 1968, l-unjoni doganali stabbilixxiet lilha nfisha bħala pilastru insostitwibbli tas-suq uniku, li jipproteġi l-fruntieri tal-UE u jipproteġi liċ-ċittadini minn merkanzija pprojbita u perikoluża, bħal armi u drogi, u minn merkanzija ffalsifikata, filwaqt li, barra minn hekk, tiffavorixxi tkabbir kostanti tas-sehem tal-kummerċ globali: fl-2017, id-dwana tal-UE nnegozjat 16 % tal-kummerċ globali.
2.5Sabiex jiggarantixxu l-funzjonament bla xkiel tal-unjoni doganali, l-Istati Membri tal-UE jużaw sett komuni ta' normi, ibbażat fuq il-kodiċi tad-dwani tal-unjoni. Dan il-kodiċi ġie adottat fl-2013 u implimentat mill-2016 fl-Istati Membri kollha tal-UE. Sa mill-2016, il-Kodiċi jirrappreżenta l-qafas legali l-ġdid biex jamministra l-importazzjoni, l-esportazzjoni, it-tranżitu u l-ħażna ta’ merkanzija fi tranżitu fit-territorju doganali u f’rabtiet ma’ pajjiżi terzi.
2.5.1Barra minn hekk, id-dwana tapplika aktar minn 60 liġi mhux strettament doganali li jikkonċernaw, fost l-oħrajn:
-il-prodotti b’użu doppju, għal użu kemm ċivili kif ukoll militari;
-l-armi tan-nar;
-il-prekursuri tad-droga;
-il-movimenti ta’ munita fi flus;
-id-drittijiet dwar proprjetà intellettwali;
-is-saħħa pubblika;
-is-sikurezza tal-prodotti;
-il-protezzjoni tal-konsumatur;
-il-protezzjoni tal-ispeċijiet selvaġġi;
-il-protezzjoni tal-ambjent.
2.6Il-KESE dejjem kien jemmen li "unjoni doganali effiċjenti tkun conditio sine qua non tal-proċess tal-integrazzjoni Ewropea, sabiex tiġi żgurata ċirkolazzjoni ħielsa tal-merkanzija, sikura u trasparenti, bl-ikbar ħarsien tal-konsumatur u l-ambjent u ġlieda effikaċi u konsistenti kontra l-frodi u l-kuntrabandu fit-territorju kollu tal-Unjoni".
2.7Bl-istess mod, il-Kumitat enfasizza l-ħtieġa u l-importanza ta' "l-introduzzjoni ta’ miżuri ta’ modernizzazzjoni, bħas-semplifikazzjoni tal-leġislazzjoni doganali u l-ilħiq ta' sistemi doganali interoperattivi kompjuterizzati, sabiex jitħaffu l-prattiki kummerċjali u l-koordinament imsaħħaħ tal-attivitajiet ta’ prevenzjoni u protezzjoni".
2.8Fl-2012, il-Kunsill Ewropew diġà kien semma' leħnu dwar il-ħtieġa li tittejjeb il-governanza interna tal-unjoni doganali u dwar l-opportunità ta' kooperazzjoni flimkien ma' aġenziji oħra u mas-settur privat, sabiex jiġi pprovdut l-aħjar servizz għall-operaturi; u fil-konklużjonijiet tal-Kunsill ta' Ġunju 2014, huwa rrakkomanda li tittejjeb il-valutazzjoni tal-prestazzjonijiet, fejn iddefinixxa xi setturi, u talab li jiġu elaborati indikaturi ewlenin xierqa tal-prestazzjoni.
2.9Fil-konklużjonijiet tiegħu tat-23 ta' Marzu 2017 dwar il-finanzjament doganali, il-Kunsill stieden lill-Kummissjoni "tevalwa l-possibbiltà tal-finanzjament tal-ħtiġijiet ta' tagħmir tekniku minn programmi finanzjarji futuri tal-Kummissjoni u ttejjeb il-koordinazzjoni, u l-kooperazzjoni bejn l-Awtoritajiet Doganali u awtoritajiet oħrajn tal-infurzar tal-liġi għal skopijiet ta' finanzjament".
2.10Min-naħa tiegħu, il-Parlament Ewropew, fir-riżoluzzjoni tiegħu tas-7 ta' April 2017, indika li "l-effiċjenza tal-proċeduri doganali hi kruċjali mhux biss biex jiġi ffaċilitat il-kummerċ, iżda wkoll biex tiġi infurzata l-liġi b'mod effikaċi u mtejjeb, fir-rigward tal-kontrafazzjoni u tal-kuntrabandu ta' prodotti suġġetti għas-sisa li jidħlu fl-UE" li "s-servizzi doganali huma f'nofs triq bejn il-moviment garantit tal-merkanzija li jipproteġi lill-konsumaturi fi ħdan l-UE u l-implimentazzjoni tad-dispożizzjonijiet tal-ftehimiet kummerċjali".
3.
Il-proposti tal-Kummissjoni
3.1Permezz ta' Regolament, għandu jiġi propost strument finanzjarju ġdid għat-tagħmir ta' kontroll doganali, fil-kamp ta' applikazzjoni ta' Fond għall-Ġestjoni Integrata tal-Fruntieri (IBMF) li għandu jintuża għal-linja baġitarja "Ġestjoni tal-migrazzjoni u tal-fruntieri", bil-għan li jiġi pprovdut appoġġ imsaħħaħ għall-Istati Membri, sabiex tiġi ggarantita l-ekwivalenza meta jkunu qed jitwettqu kontrolli doganali fl-unjoni doganali kollha, u fejn jiġu kkoreġuti l-iżbilanċi li jeżistu bejn l-uffiċċji doganali li jinsabu fl-Istati Membri differenti.
3.2L-istrument il-ġdid ta' finanzjament, permezz ta' allokazzjoni ta' EUR 1,3 biljun għall-2021-2027, għandu l-ħsieb li jkopri t-tagħmir doganali maħsub għall-erba' tipi ta' fruntieri (fuq l-art, marittima, tal-ajruport u postali).
3.3Il-finanzjament se jkun disponibbli għall-Istati Membri kollha u ser jiġu valutati l-ħtiġijiet ta’ kull tip ta’ fruntiera. It-Tim ta' Esperti tal-Fruntieri tal-Art tal-Lvant u tax-Xlokk tad-Dwana (CELBET), li jiġbor flimkien il-11-il Stat Membru kompetenti għall-fruntieri fuq l-art tal-UE, diġà nieda x-xogħlijiet f'dan is-settur, filwaqt li tipi ta' fruntieri oħra daqt se jagħtu bidu għall-attivitajiet, b'mod li l-ħtiġijiet tal-Istati jkunu jistgħu jiġu vvalutati u l-fondi jkunu jistgħu jitqassmu malli l-istrument jidħol fis-seħħ fl-2021, għas-27 Stat Membru.
3.4L-objettivi msemmija għandhom jirriżultaw f'koordinazzjoni u f'ċertezza ġuridika ikbar, f'iktar effikaċja jew komplementarjetà, b'approċċ ċentralizzat, permezz tal-ġestjoni diretta: għandhom jiġu previsti għotjiet għall-Istati Membri sa massimu ta' 80 % tal-ispejjeż ammissibbli, bħala appoġġ għall-akkwist, il-manutenzjoni u l-evoluzzjoni tat-tagħmir ta' kontroll doganali, f'konformità ma' standards iddefiniti minn qabel, għall kull tip ta' fruntiera.
3.5L-istrument huwa marbut mill-qrib mal-programm il-ġdid Dwana, li l-istrumenti ta’ kollaborazzjoni tiegħu se jintużaw għall-valutazzjoni tal-ħtiġijiet, f’termini ta’ tagħmir ta’ superviżjoni doganali innovattiv u, fejn ikun hemm bżonn, ta’ taħriġ “konġunt” tal-persunal tad-dwana, għal użu aħjar tat-tagħmir stess.
4.
Kummenti ġenerali
4.1Il-KESE huwa konvint ħafna li, fid-dawl tal-isfidi li qed jiżdiedu tal-kontroll fil-fruntieri esterni tal-Unjoni, huwa essenzjali li tiġi implimentata sistema valida li tkun kapaċi tgħaqqad il-protezzjoni tal-individwi, l-ekonomija soċjali tas-suq, is-sigurtà tal-produzzjoni u tal-kummerċ sostenibbli bejn l-Istati Membri u l-iskambji ma' pajjiżi terzi.
4.2Il-Kumitat apprezza l-isforz tal-Kummissjoni Ewropea biex jiżdiedu l-fondi u l-istrumenti ta' intervent, bil-għan li jissaħħu l-kontrolli fil-fruntieri esterni u sabiex jiġu żgurati kontrolli doganali innovattivi u ta' kwalità, fil-kamp ta' applikazzjoni tat-tisħiħ tal-unjoni doganali.
4.3Madankollu, il-KESE jqis li l-allokazzjoni finanzjarja ta' EUR 1,3 biljun, li hija ddedikata għall-istrument il-ġdid – li tilħaq kważi EUR 186 miljun fis-sena – xejn mhija suffiċjenti, u din l-allokazzjoni tirrappreżenta inqas minn tletin fil-mija ta' dik prevista għall-2021-2017 għall-kompiti ġenerali tal-fruntieri u tal-migrazzjoni, li tilħaq l-EUR 34,9 biljun.
4.4Il-Kumitat iqis li huwa importanti wkoll li:
-jiġu żgurati prijoritajiet li jkun hemm tagħmir fil-fruntieri li jkun soġġett għal pressjoni ta' kontroll ikbar, bħal dik marittima;
-jitħaffef ix-xogħol tat-tim ta' valutazzjoni li joperaw f'dan il-kamp ta' applikazzjoni;
-jiġi ggarantit tqassim ġeografika ġust;
-tiġi rrispettata l-proporzjonalità, marbuta mal-flussi tal-merkanzija u tal-persuni, f'komplementarjetà mal-Fond għas-Sigurtà.
4.4.1Il-KESE jqis li huwa fundamentali li jiġu żgurati livelli ta' kwalità u ta' innovazzjoni tat-tagħmir doganali, sabiex jiġu protetti bl-aħjar mod il-kultura soċjali kif ukoll l-interessi ekonomiċi u finanzjarji tal-Unjoni u tal-Istati Membri, permezz ta':
-il-ġlieda, li għadha mhix effettiva, kontra l-kummerċ illegali;
-it-tnaqqis fil-piż u s-semplifikazzjoni tal-konformità marbuta mal-kummerċ legali;
-is-salvagwardja tas-sigurtà tas-suq intern tal-UE;
-il-protezzjoni tal-ambjent u tas-saħħa taċ-ċittadini;
-ir-rispett tad-drittijiet tal-ħaddiema;
-il-protezzjoni tal-konsumatur;
-il-ġestjoni tar-riskji;
-l-irkupru tad-dazji.
4.5Il-Kumitat jitlob li jiġi assigurat it-tixrid massimu tal-programmi ta’ ħidma annwali u tal-azzjonijiet previsti, kif ukoll il-mekkaniżmi tal-attribuzzjoni tal-għotjiet ġestiti mill-Kummissjoni, fejn jiġu favoriti il-pools ta’ xiri ta’ apparat, li għandhom ikunu innovattivi.
4.6Il-KESE jirrakkomanda li jkun hemm koordinazzjoni mill-qrib mal-programm Dwana, maħsub biex jiffinanzja infrastrutturi u sistemi tat-teknoloġija tal-informazzjoni, fosthom id-diġitalizzazzjoni tal-interazzjoni bejn l-operaturi kummerċjali u s-servizzi doganali u mal-programm Orizzont, li huwa utli biex jiġu identifikati t-tekniki innovattivi fil-kontroll doganali.
5.
Kummenti speċifiċi
5.1Filwaqt li wieħed iqis li kull sena jiġu ġestiti aktar minn 200 miljun UEG, jiġifieri aktar minn 10 miljun kontenitur, huwa diffiċli ħafna biex jitwettqu verifiki puntwali f’ħafna fruntieri marittimi u stradali. Għalhekk ikun xieraq li nibbażaw fuq kontrolli tul mogħdijiet, permezz ta’ reviżjoni tal-materjali tal-istruttura tal-kontenituri, li tippermetti drones ta’ rikonjizzjoni permezz tas-sistema Galileo.
5.2Ikun xieraq li tiġi aġġornata l-Konvenzjoni ta’ Ġinevra tal-1972 u l-istandards ISO tal-1967, li twieldu qabel seħħew il-bidliet kbar tas-seklu XXI, bl-emerġenza tal-globalizzazzjoni u l-fenomenu dejjem jikber – u llum inkwetanti – tal-iffalsifikar.
5.3Jeħtiep li tiġi aġġornata, mingħajr dewmien, il-firxa tat-tagħmir doganali – Għodod ta’ Tagħmir – b’mod li titqies l-immedjatezza tal-evoluzzjoni tal-Internet tal-oġġetti, iċ-ċibersigurtà, it-traċċabilità diġitali u l-applikazzjonijiet teknoloġiċi dejjem aktar avvanzati, biex jitħaffef it-tixrid u t-taħriġ aġġornat għall-użu infurmat tagħhom permezz tal-Qafas tal-Kompetenza Doganali tal-Unjoni Ewropea (European Union Customs Competency Framework – EU Customs CFW). F’dan ir-rigward, ikun importanti li l-istrument il-ġdid ta’ appoġġ finanzjarju jipprevedi għall-kostituzzjoni ta’ riżerva ta’ intervent bikri għat-tixrid ta’ tagħmir innovattiv, bir-reviżjoni fl-istess waqt tal-lista ta’ tagħmir aċċettati.
Brussell, 17 ta’ Ottubru 2018
Luca Jahier
Il-President tal-Kumitat Ekonomiku u Soċjali Ewropew
_____________