DEĊIŻJONI TA’ IMPLIMENTAZZJONI TAL-KUMMISSJONI
ta'30.7.2025
li jistabbilixxi regoli dettaljati għall-applikazzjoni tar-Regolament (UE) 2024/1679 tal-Parlament Ewropew u tal-Kunsill fir-rigward tal-implimentazzjoni tal-proġett transfruntier ta’ Lyon-Turin dwar il-Kuritur Ewropew tat-Trasport tal-Mediterran
(It-testi bit-Taljan u bil-Franċiż biss huma awtentiċi)
IL-KUMMISSJONI EWROPEA,
Wara li kkunsidra/kkunsidrat/kkunsidraw it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2024/1679 tal-Parlament Ewropew u tal-Kunsill tat-13 ta’ Ġunju 2024 dwar Linji gwida tal-Unjoni għall-iżvilupp tan-network trans-Ewropew tat-trasport, li jemenda r-Regolament (UE) 2021/1153 u r-Regolament (UE) Nru 913/2010 u li jħassar ir-Regolament (UE) 1315/2013, u b’mod partikolari l-Artikolu 55(2) tiegħu,
Billi:
(1)Kif enfasizzat mill-Pjanijiet ta’ Ħidma għall-Kuritur tal-Mediterran, il-proġett transfruntier Lyon-Turin (il-“proġett”) għandu rwol kruċjali fl-iżgurar tal-funzjonament tal-kuritur b’konnessjoni interoperabbli u effiċjenti madwar l-Alpes, bejn Franza u l-Italja, għat-trasport tal-merkanzija u tal-passiġġieri bil-ferrovija.
(2)Id-dekarbonizzazzjoni tat-trasport permezz tal-ħolqien tal-kundizzjonijiet għal bidla modali ambizzjuża tat-trasport tal-merkanzija u tal-passiġġieri fuq distanzi twal lejn modi ta’ trasport effiċjenti fl-użu tal-enerġija, hija objettiv ta’ politika ewlieni tal-Unjoni u f’konformità mal-objettivi tal-Unjoni lejn il-ġlieda kontra t-tibdil fil-klima.
(3)F’dan il-kuntest, it-trawwim tat-trasport ferrovjarju tal-merkanzija u tal-passiġġieri huwa prijorità ċara tal-politika tat-trasport tal-Unjoni, kif deskritt mill-Istrateġija għal Mobilità Sostenibbli u Intelliġenti u prijorità li ilha teżisti fl-iżvilupp tan-network TEN-T.
(4)Permezz tat-tlestija tal-linja ferrovjarja Lyon-Turin, il-Kuritur Ewropew tat-Trasport tal-Mediterran u s-sezzjoni transfruntiera transalpina tiegħu se jkunu mgħammra b’infrastruttura tat-trasport ferrovjarju moderna, sikura u effiċjenti fl-użu tal-enerġija li tikkontribwixxi għal bidla modali.
(5)Ir-rabta transfruntiera bejn Lyon u Turin hija elenkata bħala rabta transfruntiera identifikata minn qabel fil-Kuritur Ewropew tat-Trasport tal-Mediterran eliġibbli għall-finanzjament tal-Unjoni taħt il-Faċilità Nikkollegaw l-Ewropa fil-Parti III tal-Anness tar-Regolament (UE) 2021/1153 tal-Parlament Ewropew u tal-Kunsill.
(6)Tliet trattati bilaterali u protokoll addizzjonali wieħed bejn Franza u l-Italja jirregolaw u jippjanaw il-proġett fi ħdan il-qafas politiku, legali u finanzjarju miftiehem. Ftehim bilaterali ieħor għal trasferimenti transfruntier ta’ materjal għall-kostruzzjoni tal-proġett ġie ffirmat fl-4 ta’ Awwissu 2023.
(7)Il-pjan ta’ Ħidma għall-Kuritur tal-Mediterran jenfasizza l-ħtieġa li tiġi żgurata t-tlestija tal-proġett fl-intier tiegħu, li jinkludi l-mina bażi transfruntiera kif ukoll il-linji ta’ aċċess bejn in-nodi urbani identifikati minn qabel ta’ Lyon u Turin.
(8)Is-sezzjonijiet kollha tal-proġett huma essenzjali għall-funzjonament tajjeb tal-Kuritur Ewropew tat-Trasport tal-Mediterran. Dawn se jiġu ppjanati f’konformità mal-istandards stabbiliti fl-Artikoli 16 u 18 tar-Regolament (UE) 2024/1679.
(9)Il-proġett huwa investiment transfruntier kumpless fit-tul li jinvolvi lil Franza, l-Italja u r-reġjuni ġirien rispettivi tagħhom ta’ Auvergne Rhône Alpes u Piemonte. Huwa wkoll ta’ benefiċċju għal Stati Membri oħra, li jiddependu fuq konnessjoni moderna bejn Franza u l-Italja madwar l-Alpi.
(10)Il-proġett jimplika l-ħolqien ta’ infrastruttura ġdida u t-titjib ta’ dik eżistenti. Sabiex tiġi appoġġata l-implimentazzjoni kkoordinata u f’waqtha tal-proġett, jeħtieġ li jiġu adottati dispożizzjonijiet li jistabbilixxu deskrizzjoni ta’ azzjonijiet u ta’ skeda ta’ żmien għall-implimentazzjoni tagħhom. Il-proġett huwa impenn fit-tul li jeħtieġ l-ippjanar ta’ investimenti f’diversi ċikli baġitarji kemm fil-livell nazzjonali kif ukoll f’dak tal-Unjoni. Se jgħin biex jintlaħqu l-objettivi transfruntiera tal-Pjan ta’ Ħidma għall-Kuritur Ewropew tat-Trasport tal-Mediterran, inkluż il-kostruzzjoni ta’ linji ta’ aċċess li se jiżguraw it-tranżitu ta’ 24 miljun tunnellata ta’ merkanzija fis-sena u 1.5 miljun passiġġier fis-sena.
(11)Franza u l-Italja diġà wettqu azzjonijiet sinifikanti bħal studji u xogħlijiet infrastrutturali. Dawk l-azzjonijiet jinkludu l-kostruzzjoni kontinwa tal-mina bażi fiż-żewġ pajjiżi (mill-31 ta’ Ottubru 2024), fejn ġew skavati 38.6 km ta’ galleriji, li minnhom 14.7 km mill-mina bażi), l-ippjanar tal-linji ta’ aċċess fit-territorju Taljan, l-ippjanar tal-modernizzazzjoni tal-linja ferrovjarja konvenzjonali Ambérieu — Saint-Jean-de-Maurienne mill-2027 b’baġit iddedikat ta’ EUR 700 miljun, u l-modernizzazzjoni li għaddejja tal-linja ferrovjarja konvenzjonali bejn Bussoleno-Avigliana. Fir-rigward tal-linji ferrovjarji l-ġodda Franċiżi, digriet tat-13 ta’ Awwissu 2013 iddikjara li x-xogħlijiet kienu fl-interess pubbliku, l-allinjament dettaljat ferrovjarju ġie approvat. L-istudji avant-projet détaillé (APD), kofinanzjati mill-Kummissjoni, Franza u l-awtoritajiet reġjonali Franċiżi se jitnedew fl-2025.
(12)L-identifikazzjoni ċara tal-azzjonijiet meħtieġa biex jitlesta l-proġett u l-iskeda taż-żmien għall-implimentazzjoni tagħhom hija importanti wkoll sabiex tiġi maħsuba u mtejba bis-sħiħ id-disponibbiltà tal-finanzjament tal-Unjoni, nazzjonali u reġjonali. Il-kofinanzjament tal-Unjoni jagħti spinta essenzjali fuq it-teħid tad-deċiżjonijiet fil-livell nazzjonali u reġjonali biex jiġu implimentati l-azzjonijiet. Għalhekk, huwa importanti li jiġu identifikati l-azzjonijiet li jifdal li huma meħtieġa għat-tlestija sħiħa tal-proġett, sabiex ir-riżorsi tal-Unjoni jkunu jistgħu jiġu sfruttati fil-livell massimu, f’konformità mal-ippjanar u mar-rati ta’ kofinanzjament applikabbli b’mod rispettiv, flimkien mar-riżorsi finanzjarji disponibbli fil-livell nazzjonali u dak reġjonali. Skont ir-Regolament (UE) 2021/1153, it-taqsimiet kollha tal-proġett huma eliġibbli għall-finanzjament tal-Unjoni (sa massimu ta’ 55 % għall-mina bażi u 50 % għal-linji ta’ aċċess). L-azzjonijiet li jifdal iridu juru livell għoli ta’ integrazzjoni fl-ippjanar u l-implimentazzjoni tal-azzjonijiet u jkunu konformi mal-kriterji tal-għoti stabbiliti fl-Artikolu 14 tar-Regolament (UE) 2021/1153. Jenħtieġ għalhekk li r-riżorsi finanzjarji jiġu ottimizzati bis-sħiħ bl-isforzi massimi tal-partijiet kollha involuti.
(13)Il-Ftehim bejn il-Gvern tar-Repubblika Franċiża u l-Gvern tar-Repubblika Taljana għall-kostruzzjoni u l-operat ta’ linja ferrovjarja ġdida Lyon-Turin u l-protokoll addizzjonali jispeċifikaw il-kost iċċertifikat tal-mina bażi transfruntiera u, wara li titnaqqas il-kontribuzzjoni tal-Unjoni u l-parti ffinanzjata mill-pedaġġi, il-koeffiċjent tal-allokazzjoni tal-kostijiet ta’ 57.9 % għall-Italja u 42.1 % għal Franza. Kwalunkwe kostijiet addizzjonali se jiġu allokati b’mod ugwali bejn l-Italja u Franza. Il-Protokoll addizzjonali jipprevedi wkoll il-possibbiltà ta’ rivalutazzjoni monetarja u l-evoluzzjoni tal-kostijiet tal-fatturi tal-produzzjoni tax-xogħlijiet.
(14)Il-kumpanija Franko-Taljana Tunnel Euralpin Lyon Turin, bħala entità binazzjonali, hija responsabbli għall-ġestjoni u l-kostruzzjoni tas-sezzjoni transfruntiera tal-proġett. Il-maniġers tal-infrastruttura nazzjonali ta’ Franza u tal-Italja rispettivament huma responsabbli għall-kostruzzjoni tar-rotot ta’ aċċess.
(15)Sabiex jiġi mmonitorjat il-progress li jkun qed isir fl-implimentazzjoni tal-proġett, Franza u l-Italja jenħtieġ li jipprovdu lill-Kummissjoni b’rapporti regolari dwar il-kwistjoni, li jkollhom x’jaqsmu mat-taqsimiet li jkunu jinsabu fit-territorji rispettivi tagħhom, u għandhom javżawha b’kull dewmien li kien hemm.
(16)Skont l-Artikolu 6(1) tar-Regolament (UE) 2024/1679, l-Istati Membri għandhom jieħdu miżuri xierqa biex jiżviluppaw in-network ewlieni sal-31 ta’ Diċembru 2030. Dan l-obbligu, madankollu, huwa soġġett għall-kundizzjonijiet stabbiliti fl-Artikolu 8(5) ta’ dak ir-Regolament, li jenfasizza li l-eżekuzzjoni ta’ proġetti ta’ interess komuni hija kontinġenti fuq fatturi bħall-grad ta’ maturità tagħhom, il-konformità kemm mal-proċeduri legali tal-Unjoni kif ukoll ma’ dawk nazzjonali, u d-disponibbiltà ta’ riżorsi finanzjarji, mingħajr preġudizzju għall-impenn finanzjarju ta’ Stat Membru jew tal-Unjoni.
(17)L-iskeda ta’żmien tal-implimentazzjoni jenħtieġ li tkun mingħajr preġudizzju għall-ilħuq tar-rekwiżiti stabbilita fil-liġi internazzjonali u mid-dritt tal-Unjoni, inklużi d-dispożizzjonijiet dwar il-ħarsien tal-ambjent u tas-saħħa tal-bniedem. L-iskeda ta’ żmien jenħtieġ li tippermetti lill-Istati Membri jippjanaw u jtejbu bis-sħiħ id-disponibbiltà tal-finanzjament, mingħajr ma jiġi ppreġudikat l-impenn finanzjarju ta’ Stat Membru jew tal-Unjoni. Jenħtieġ li f’ebda ċirkostanza ma tikkomprometti l-istandards tal-Unjoni u tal-Istati Membri għall-ħarsien tal-ambjent u għall-parteċipazzjoni tal-pubbliku.
(18)Mingħajr preġudizzju għall-Artikolu 54(3) tar-Regolament (UE) 2024/1679], huwa xieraq li r-rieżami ta’ din id-deċiżjoni jibda sa tmiem l-2026, biex jirrifletti b’mod preċiż l-istat tal-ippjanar u l-kostruzzjoni tal-azzjonijiet elenkati fl-Artikolu 2.
(19)Franza u l-Italja approvaw il-miżuri previsti f’din id-Deċiżjoni.
(20)Il-miżuri previsti f’din id-Deċiżjoni huma f’konformità mal-opinjoni tal-Kumitat stabbilit fl-Artikolu 61(1) tar-Regolament (UE) 2024/1679,
ADOTTAT DIN ID-DEĊIŻJONI:
Artikolu 1
Suġġett
Din id-Deċiżjoni tistabbilixxi l-azzjonijiet u l-iskeda għall-implimentazzjoni tal-proġett ferrovjarju transfruntier u l-linji ta’ aċċess relatati tiegħu li jgħaqqdu n-nodi urbani ta’ Lyon u Turin (il-“proġett”), kif ukoll id-dispożizzjonijiet ta’ governanza relatati.
Artikolu 2
Azzjonijiet
Franza u l-Italja għandhom jiżguraw l-implimentazzjoni tal-azzjonijiet li ġejjin skont l-iskeda stabbilita fl-Artikolu 3:
(a)is-sezzjoni transfruntiera tal-mina flimkien mal-istazzjonijiet ta’ konnessjoni ta’ Saint Jean de Maurienne u Susa.
(b)linji ta’ aċċess fit-territorju Taljan, magħmula minn:
(I)titjib tal-linja konvenzjonali eżistenti — is-sezzjoni Bussoleno-Avigliana:
–Lott 1: Ir-realizzazzjoni ta’ installazzjonijiet teknoloġiċi ġodda għall-ġestjoni tat-traffiku fis-sezzjoni Bussoleno-Avigliana;
–Lott 2: L-eliminazzjoni ta’ żewġ passaġġi invell f’Borgone Susa;
–Lott 3: L-implimentazzjoni tal-Ispeċifikazzjonijiet Tekniċi għall-Interoperabbiltà għal Persuni b’Mobbiltà Mċekkna fl-istazzjonijiet ta’ Sant’Ambrogio, Borgone u Bruzolo;
–Lott 4: Il-kostruzzjoni ta’ żewġ binarji ta’ prijorità b’moduli twal 750 m, waħda f’Condove u waħda Bruzolo;
–Lott 5: L-adattament tas-sistema tal-provvista tal-enerġija tal-linja permezz tal-kostruzzjoni ta’ żewġ substazzjonijiet elettriċi ġodda, wieħed f’Avigliana u wieħed f’Borgone;
–Lott 6: Id-demolizzjonita’ 281 munzelli tal-linja elettrika primarja 66 kV;
–Lott 7: Il-mitigazzjoni akustika;
–Lott 8: tinvolvi s-sostituzzjoni sħiħa tal-linja tat-trazzjoni elettrika attwali, dik standard Rete Ferroviaria Italiana, bejn l-istazzjonijiet Bussoleno u Avigliana b’sezzjoni ta’ 540 sq mm u ż-żieda ta’ feeder ta’ rinfurzar ta’ 230 sq mm, meħtieġa għat-tħaddim korrett tal-linja skont it-traffiku ferrovjarju futur ippjanat;
(ii)
il-kostruzzjoni tal-linja l-ġdida is-sezzjoni ta’ Avigliana-Orbassano;
(iii)
riarranġament tal-marshalling yard ta’ Orbassano inkluża l-ġunzjoni tan-Nofsinhar;
(iv)
il-konnettività fin-nodu urban ferrovjarju ta’ Turin:
–it-tlestija tal-bypass tal-ferrovija ta’ Turin, is-sezzjoni ta’ Porta Susa-Stura;
–it-titjib tal-linja ta’ veloċità għolja bejn Porta Susa u Porta Nuova, linja ġdida indipendenti b’żewġ binarji twila 4.5 km, u l-kostruzzjoni ta’ għadd ta’ waqfiet ġodda fis-sistema ferrovjarja ta’ Turin;
–it-tħaffif tal-linja Turin-Ġenova;
–it-titjib infrastrutturali u teknoloġiku tan-nodu urban ferrovjarju ta’ Turin u l-linji relatati, u t-tiġdid tas-sistemi ċentralizzati ta’ ġestjoni taċ-ċirkolazzjoni jew l-inserzjoni ta’ sistemi ċentralizzati ġodda ta’ ġestjoni taċ-ċirkolazzjoni;
–bypass ferrovjarju ġdid minn Orbassano sa Settimo Torinese — fażi 1b “Gronda Merci”.
(c)linji ta’ aċċess fit-territorju Franċiż magħmula minn:
(i)
it-titjib tal-linja konvenzjonali eżistenti Ambérieu-Saint-Jean-de-Maurienne;
(ii) il-konnettività fi ħdan l-agglomerazzjoni ta’ Lyon — il-bypass ferrovjarju ta’ Lyon bejn Saint-Pierre-de-Chandieu u Dagneux;
(iii) il-kostruzzjoni tal-linja l-ġdida bejn Lyon u Saint-Jean-de-Maurienne:
–linja ferrovjarja mħallta tal-passiġġieri u tal-merkanzija bejn Grenay u Avressieux;
–linja ferrovjarja ġdida tal-merkanzija bejn Avressieux u Montmélian;
–linja ferrovjarja ġdida tal-merkanzija bejn Montmélian u Saint-Jean-de-Maurienne.
Artikolu 3
Skeda ta’ żmien
1.L-iskeda ta’ żmien għall-azzjonijiet imsemmija fl-Artikolu 2, il-punt (a), għandha tkun din li ġejja:
(a)Fl-2025: bidu ta’ skavar mekkanizzat tal-ewwel lott Franċiż tal-mina bażi (sit ta’ kostruzzjoni operazzjonali 7) — Franza.
(b)bejn it-tmiem tal-2026 u l-bidu tal-2027: bidu ta’ skavar mekkanizzat tal-lottijiet l-oħra tal-mina bażi (siti ta’ kostruzzjoni operazzjonali 3-4-5-6) — Franza u l-Italja.
(c)sal-2028: tmiem tax-xogħlijiet ċivili fis-sezzjoni tad-dħul — Saint Martin La Porte (sit ta’ kostruzzjoni operazzjonali 8) — Franza.
(d)sal-2027: proposta għall-għoti ta’ kuntratt ta’ installazzjonijiet ferrovjarji u mhux ferrovjarji (sit ta’ kostruzzjoni operazzjonali 12) — Franza u l-Italja.
(e)sal-2028: bidu tal-iskavar tal-mina tal-interkonnessjoni bil-metodu tradizzjonali f’Bussoleno (sit ta’ kostruzzjoni operazzjonali 1) — l-Italja.
(f)sal-2029: bidu tax-xogħlijiet ċivili fl-istazzjon internazzjonali ta’ Susa (sit ta’ kostruzzjoni operazzjonali 2) — l-Italja.
(g)sal-2030: tmiem tax-xogħlijiet ċivili taċ-ċentru ta’ skambju multimodali fl-istazzjon internazzjonali ta’ Saint-Jean-de-Maurienne (sit ta’ kostruzzjoni operazzjonali 9) — Franza.
(h)sal-2031: tlestija tal-iskavar tal-mina bażi fuq in-naħa Franċiża u dik Taljana (siti ta’ kostruzzjoni operazzjonali 3-4-5-6-7-8) — Franza u l-Italja.
(i)sal-2031: tlestija tal-istazzjon internazzjonali ta’ Saint-Jean-de Maurienne b’infrastruttura anċillari relatata; bidu tal-kostruzzjoni tat-tagħmir tal-istazzjon internazzjonali ta’ Susa (siti ta’ kostruzzjoni operazzjonali 9 u 2) — Franza u l-Italja.
(j)Sal-31 ta’ Diċembru 2032: tlestija tal-infrastruttura ferrovjarja għat-traffiku mħallat, f’konformità mal-parametri tat-TEN-T stabbiliti fir-Regolament (UE) Nru 1679/2024 — Franza u l-Italja.
(k)Sal-2033: installazzjoni operazzjonali Livell 2 tal-ERTMS — Franza u l-Italja.
2.L-iskeda ta’ żmien għall-azzjonijiet imsemmija fl-Artikolu 2, il-punt (b), għandha tkun din li ġejja:
(a)it-titjib tas-sezzjoni eżistenti tal-linja konvenzjonali Bussoleno-Avigliana: tmiem ix-xogħlijiet bejn l-2026 u l-2032.
(b)kostruzzjoni tal-linja l-ġdida Avigliana-Orbassano:
(I)valutazzjoni ambjentali u permessi miksuba bejn l-2024 u l-2025;
(II)bidu tax-xogħlijiet sal-2026;
(III)tmiem tax-xogħlijiet sal-2033.
(c)riarranġament tal-marshalling yard ta’ Orbassano inkluża n-Nofsinhar tal-Ġunzjoni, l-ewwel fażi, in-naħa ta’ Turin, sal-2026.
(d)il-konnettività fin-nodu urban ferrovjarju ta’ Turin:
i)
Is-sezzjoni ta’ Porta Susa-Stura: konkluż sa 98 % (tlestija mistennija sal-2025)
(ii)
Is-sezzjoni ta’ Porta Susa-Porta Nuova: tlestija sal-2028;
(iii) Il-linja ta’ Turin-Genoa: sal-2027 (l-ewwel fażi):
–it-tlestija tal-adattament teknoloġiku tas-sistemi tas-Subsistema CCS tas-sezzjoni Trofarello-Alessandria bil-kostruzzjoni tal-ACCM-SCCM f’fażijiet sekondarji;
–tlestija tal-ACC tal-istazzjon ta’ Villafranca;
–tlestija tal-ACC il-ġdid ta’ Asti.
3.L-iskeda ta’ żmien għall-azzjonijiet imsemmija fl-Artikolu 2, il-punt (c), għandha tkun din li ġejja:
(a)titjib tal-linja konvenzjonali eżistenti bejn Ambérieu u Saint-Jean-de-Maurienne:
(i) studji preliminari, inkluża analiżi soċjoekonomika sa nofs l-2025;
(ii) il-bidu tax-xogħlijiet fuq l-ewwel operazzjonijiet sal-2027;
(iii) studji tad-disinn sal-aħħar tal-2028;
(iv) proċeduri amministrattivi għall-akkwist tal-art sa tmiem l-2028;
(v) il-valutazzjoni ambjentali sal-aħħar tal-2028;
(vi) l-istudji finali sal-aħħar tal-2029;
(vii) it-tmiem tax-xogħlijiet sal-2033:
–modifika tal-aċċess għall-pjattaforma Aiton
–titjib fil-kapaċità f’Aix-les-Bains
–titjib fil-kapaċità f’Chambéry
–separazzjoni tal-grad f’Montmélian
–żgurar tal-Lac du Bourget
–żgurar ta’ passaġġi invell
–rinfurzar ta’ Installazzjonijiet fissi għat-Trazzjoni Elettrika.
(b)il-konnettività fi ħdan l-agglomerazzjoni ta’ Lyon — il-bypass ferrovjarju ta’ Lyon bejn Saint-Pierre-de-Chandieu u Dagneux:
(i) studji dettaljati tad-disinn sa tmiem l-2027
(ii) valutazzjoni ambjentali
(iii) studji finali
(iv) akkwist tal-art f’konformità mal-iskeda tal-istudju u tal-kostruzzjoni
(v) xogħlijiet
(c)kostruzzjoni tal-linji l-ġodda bejn Lyon u Saint-Jean-de-Maurienne f’konformità mal-parametri tal-“grand gabarit” bħala x-xenarju ewlieni esplorat f’dan l-istadju:
(i) studji dettaljati tad-disinn dwar l-operazzjonijiet li ġejjin, inklużi analiżi soċjoekonomika u studji relatati ma’ xogħlijiet ta’ rikonjizzjoni sa nofs l-2028 (aċċessi Franċiżi għall-mina ferrovjarja ta’ Lyon-Torino — studji dettaljati — APD):
–linja mħallta bejn Grenay u Avressieux;
–titjib fl-istazzjon Ambérieu;
–linja ferrovjarja ġdida tal-merkanzija bejn Avressieux u Montmélian inkluża mina tal-merkanzija b’binarju wieħed taħt il-massif ta’ Chartreuse, li għaliha se jitwettqu studji dettaljati tad-disinn b’mod parallel mal-kostruzzjoni tal-istrutturi ta’ rikonjizzjoni;
–irduppjar tal-konnessjoni fl-istazzjon ta’ Montmélian;
–linja ferrovjarja ġdida tal-merkanzija bejn Montmélian u Saint-Jean-de-Maurienne inklużi mini tal-merkanzija b’binarju wieħed taħt il-massif ta’ Belledonne u l-massif ta’ Glandon, li għalihom se jitwettqu studji dettaljati tad-disinn b’mod parallel mal-kostruzzjoni tal-istrutturi ta’ rikonjizzjoni;
(ii) Valutazzjoni ambjentali
(iii) Kostruzzjoni tal-istrutturi ta’ rikonjizzjoni
(iv) Studji finali
(v) Akkwist tal-art f’konformità mal-iskeda tal-istudju u tal-kostruzzjoni
(vi) Xogħlijiet
Artikolu 4
Governanza
Il-koordinatur Ewropew għall-Kuritur Ewropew tat-Trasport tal-Mediterran u rappreżentant tal-Kummissjoni għandhom jiġu mistiedna jipparteċipaw bħala osservaturi fil-laqgħat tal-Bord tad-Diretturi tal-Mina Euralpin Lyon Turin kif ukoll fil-laqgħat tal-Kummissjoni Intergovernattiva Lyon-Turin (CIG).
Artikolu 5
Rappurtar
Mill-inqas darba fis-sena, Franza u l-Italja għandhom jibagħtu rapport lill-Kummissjoni u lill-Koordinatur Ewropew għall--Kuritur Ewropew tat-Trasport tal-Mediterran dwar il-progress li jkun qed isir fl-implimentazzjoni tal-azzjonijiet imsemmijin fl-Artikolu 2, u għandhom javżawhom b’kull dewmien li kien hemm, filwaqt li jispeċifikaw ir-raġunijiet għal dan id-dewmien u l-miżuri korrettivi li jkunu ħadu b’rabta ma’ dan. Għal dan il-għan, meta jkun xieraq Franza u l-Italja jistgħu jużaw il-kontenut tar-rapporti annwali dwar l-istatus li għandhom jintbagħtu fil-kuntest tal-Ftehimiet tal-Għotja tal-Faċilità Nikkollegaw l-Ewropa.
Artikolu 6
Rieżami
Il-Kummissjoni għandha tibda rieżami tal-azzjonijiet u tal-iskeda ta’ żmien imsemmija fl-Artikoli 2 u 3 sa tmiem l-2026.
Artikolu 7
Destinatarji
Din id-Deċiżjoni hija indirizzata lir-Repubblika Franċiza u lir-Repubblika Taljana.
Magħmul fi Brussell, 30.7.2025
Għall-Kummissjoni
Apostolos TZITZIKOSTAS
Membru tal-Kummissjoni