MEMORANDUM TA’ SPJEGAZZJONI
1.KUNTEST TAL-ATT DELEGAT
1.1.Sfond ġenerali
Ir-Regolament (UE) 2017/1129 tal-Parlament Ewropew u tal-Kunsill (ir-Regolament dwar il-Prospett) għandu jiġi applikat fl-21 ta’ Lulju 2019. Dan joħloq sett ġdid u armonizzat ta’ regoli li jgħin lill-kumpaniji biex jiġbru flus fis-swieq kapitali biex jinvestu u jikbru u fl-istess ħin jgħin lill-investituri jieħdu deċiżjonijiet aħjar u aktar infurmati. Jagħti wkoll is-setgħa u jirrikjedi li l-Kummissjoni tistabbilixxi wħud mid-dettalji tar-regoli l-ġodda.
Ir-riforma tar-rekwiżiti tal-prospett hija komponent importanti tal-pjan ta’ azzjoni għall-bini ta’ Unjoni tas-Swieq Kapitali (pjan ta’ azzjoni tas-CMU). Dan ir-Regolament Delegat jikkontribwixxi għat-tlestija tal-pjan ta’ azzjoni, kif stipulat fil-komunikazzjoni mill-Kummissjoni dwar ir-rieżami ta’ nofs it-terminu tal-Unjoni tas-Swieq Kapitali.
L-objettivi ewlenin tar-riforma tar-regoli tal-prospett huma li:
·tiffaċilita l-ġbir ta’ fondi fis-swieq kapitali billi tnaqqas il-burokrazija u tagħmel il-prospetti inqas ta’ piż għall-emittenti;
·tiġi żgurata l-protezzjoni tal-investituri;
·tixpruna l-konverġenza superviżorja fil-livell tal-UE billi tarmonizza l-iskrutinju u l-approvazzjoni tal-prospetti fl-Istati Membri kollha.
Ir-regoli l-ġodda se jgħinu wkoll biex jitneħħew il-piżijiet u biex jiġu pprovduti prospetti iqsar, informazzjoni aħjar u aktar konċiża għall-investituri, u reġim rapidu għall-kumpaniji li jirrikorru għas-swieq kapitali ta’ spiss.
1.2.Objettivi tar-Regolament Delegat
L-objettivi ta’ dan ir-Regolament Delegat huma li tiġi stabbilita l-informazzjoni li l-emittenti jridu jinkludu fil-prospett (għat-tipi kollha ta’ prospetti), li jkun imfassal bħala dokument uniku jew bħala dokumenti separati, u li jiżguraw li l-awtoritajiet kompetenti nazzjonali tal-UE u l-kumpaniji li jagħmlu offerta għall-pubbliku jew li jfittxu li jkollhom it-titoli tagħhom innegozjati fi swieq regolati jkunu jistgħu jinterpretaw u japplikaw it-teknikalitajiet tar-regoli l-ġodda tal-prospett b’mod konsistenti. Ir-regolament jagħti dettalji u jiċċara l-punti li ġejjin tal-qafas ta’ politika stabbilit fir-Regolament dwar il-Prospett:
·il-format tal-prospett, il-prospett bażi u t-termini finali, u l-informazzjoni speċifika li trid tiġi inkluża fi prospett;
·il-lista tal-kontenut imnaqqsa u l-format standard tal-prospett tat-Tkabbir tal-UE u s-sommarju speċifiku tiegħu, filwaqt li wieħed iżomm f’moħħu li l-Prospett tat-Tkabbir tal-UE huwa maħsub biex jiffaċilita l-aċċess għas-swieq kapitali għall-SMEs filwaqt li jiżgura l-fiduċja tal-investituri;
·l-informazzjoni mnaqqsa li trid tiġi inkluża fil-prospett simplifikat għal ħruġ sekondarju, filwaqt li titqies il-ħtieġa li jiġi ffaċilitat il-ġbir ta’ fondi mis-swieq kapitali u l-importanza li jitnaqqas il-kost tal-kapital;
·l-informazzjoni minima li trid tiġi inkluża fid-dokument ta’ reġistrazzjoni universali, filwaqt li titqies il-ħtieġa li jiġi żgurat li jkun fiha l-informazzjoni kollha meħtieġa dwar l-emittent sabiex tintuża b’mod ugwali għall-offerta sussegwenti għall-pubbliku jew l-ammissjoni għall-kummerċ f’suq regolat ta’ titoli ta’ ekwità jew mingħajr ekwità;
·il-kriterji għall-iskrutinju tal-prospetti, b’mod partikolari l-kompletezza, il-komprensibbiltà u l-konsistenza tal-informazzjoni mogħtija, u l-proċeduri għall-approvazzjoni tal-prospetti, bl-għan li tinħoloq ġabra unika ta’ regoli li tiżgura implimentazzjoni konsistenti fl-UE kollha;
·kriterji ta’ skrutinju għad-dokument tar-reġistrazzjoni universali u l-emendi tiegħu, u l-proċeduri għall-approvazzjoni, l-iffaljar u r-rieżami tagħhom. Fir-rigward tal-kundizzjonijiet għat-telf tal-istatus ta’ emittent frekwenti, il-kundizzjonijiet stabbiliti fl-Artikolu 9(11) tar-Regolament dwar il-Prospett tqiesu li diġà huma eżawrjenti. Għalhekk, ma ġew stabbiliti l-ebda kundizzjonijiet addizzjonali f’dan ir-Regolament Delegat.
1.3.Sfond ġuridiku
Skont l-Artikolu 31 tal-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet, dan ir-Regolament Delegat jingħaqad flimkien f’att wieħed sitt setgħat tar-Regolament dwar il-Prospett, jiġifieri l-Artikoli 9(14), 13(1), 13(2), 14(3), 15(2) u 20(11). Ir-Regolament dwar il-Prospett, espressament jew mill-kuntest (l-Artikolu 13(1)), jirrikjedi li l-Kummissjoni tadotta atti delegati dwar dawn il-punti sal-21 ta’ Jannar 2019. Setgħat oħra għall-adozzjoni ta’ atti delegati mogħtija mill-Kunsill u mill-Parlament ma għandhomx skadenza u jistgħu jiġu adottati fi stadju aktar tard.
Ir-Regolament dwar il-Prospett jagħti wkoll is-setgħa lill-Awtorità Ewropea tat-Titoli u s-Swieq (ESMA) biex tiżviluppa abbozzi ta’ Standards Tekniċi Regolatorji. Dan se jkun is-suġġett ta’ regolamenti delegati futuri.
2.KONSULTAZZJONIJIET QABEL L-ADOZZJONI TAL-ATT
Il-Kummissjoni tat mandat lill-ESMA biex tipprovdi pariri tekniċi dwar atti delegati possibbli dwar il-prospett. Fid-29 ta’ Frar 2017, il-persunal tal-Kummissjoni talab b’mod formali għal parir tekniku mill-ESMA. Fis-6 ta’ Lulju 2017, l-ESMA ppubblikat tliet dokumenti ta’ konsultazzjoni fir-rigward tal-pariri tekniċi tagħha dwar dan l-att delegat u rċeviet 128 tweġiba għall-konsultazzjoni li kienet miftuħa sat-28 ta’ Settembru 2017. L-ESMA tat il-parir tekniku tagħha fit-28 ta' Marzu 2018. Dan ir-Regolament Delegat huwa bbażat fuq dan il-parir tekniku.
Barra mill-pubblikazzjoni tal-Pjan Direzzjonali għal din l-inizjattiva għal skopijiet ta’ feedback, il-persunal tal-Kummissjoni organizza laqgħat mal-partijiet ikkonċernati biex jiddiskutu l-miżuri delegati futuri matul l-2017 u l-2018, pereżempju f’sessjoni ta’ ħidma apposta f’Marzu 2017. Fil-laqgħa tal-Grupp ta’ Esperti tal-Kumitat Ewropew tat-Titoli (EGESC) f’Ġunju 2018, il-miżuri delegati ġew diskussi bejn l-esperti tal-Istati Membri, b’osservaturi mill-Parlament Ewropew. Dan il-proċess ta' konsultazzjoni wassal għal kunsens wiesa' dwar l-abbozz tar-Regolament Delegat.
Wara l-konsultazzjoni interna li seħħet f’Lulju 2018, u biex iqis il-feedback li wasal, il-persunal tal-Kummissjoni rreveda r-Regolament Delegat bl-għan li jissimplifika l-kontenut tiegħu, itejjeb l-istruttura tiegħu u jagħmel l-abbozzar aktar ċar u aktar sod ġuridikament. Barra minn hekk, ġew esplorati xi opportunitajiet addizzjonali biex il-prospett tat-Tkabbir UE isir eħfef. Dawn li ġejjin huma xi bidliet ewlenin li saru fir-Regolament Delegat:
·biex jiġi żgurat li l-prospett tat-Tkabbir tal-UE jilħaq l-objettiv li jkun eħfef tassew mill-prospett sħiħ għat-trawwim tal-ġbir ta’ fondi permezz tas-swieq kapitali tal-SMEs, ġew introdotti opportunitajiet addizzjonali biex il-prospett tat-Tkabbir tal-UE isir eħfef kemm għat-titoli ta’ ekwità kif ukoll għat-titoli mingħajr ekwità mingħajr ma tiġi kompromessa l-protezzjoni tal-investitur, f’konformità mal-objettivi stabbiliti fir-Regolament dwar il-Prospett;
·l-abbozzar tar-Regolament Delegat ġie mtejjeb u allinjat aħjar mal-att primarju. Pereżempju, referenzi għal ishma, dejn u titoli derivattivi inklużi fil-parir tekniku tal-ESMA inbidlu għal referenzi għal titoli ta’ ekwità u mingħajr ekwità kif definit fir-Regolament dwar il-Prospett;
·it-tabella tal-kombinazzjoni inkluża fil-parir tekniku tal-ESMA tneħħiet u l-kontenut tagħha ġie żviluppat fid-dispożizzjonijiet operattivi;
·il-persunal tal-Kummissjoni ċċara li minbarra l-lista ta’ kriterji armonizzati għall-iskrutinju tal-prospetti, l-awtoritajiet kompetenti nazzjonali jistgħu jwettqu kriterji ta’ skrutinju addizzjonali fejn meħtieġ għall-finijiet ta’ protezzjoni tal-investituri;
·l-Annessi tar-Regolament Delegat, li jistabbilixxu l-informazzjoni li trid tiġi inkluża fit-tipi differenti ta’ prospetti inġabru f’5 taqsimiet differenti skont it-tip ta’ dokumenti li jikkostitwixxu l-prospett li tirrelata miegħu l-informazzjoni (pereż. dokumenti ta’ reġistrazzjoni u noti dwar it-titoli);
·biex jitjiebu ċ-ċarezza u l-konsistenza, l-Annessi dwar il-prospett simplifikat għall-ħruġ sekondarju, li fil-parir tekniku tal-ESMA kienu qed ikopru t-tipi kollha ta’ titoli, ġew diżaggregati biex issir distinzjoni bejn it-titoli tal-ekwità u dawk mingħajr ekwità, f’konformità mal-prospett għall-ħruġ primarju;
·il-prospett għal riċevuti depożitorji maħruġa fuq ishma, li b’parir tekniku tal-ESMA kien jidher bħala dokument uniku, inqasam f’dokument ta’ reġistrazzjoni u nota dwar it-titoli għal tali titoli, f’konformità mat-tipi l-oħra kollha ta’ prospetti;
·ir-rwol tal-awtoritajiet nazzjonali kompetenti u tal-emittenti ġie ċċarat fir-rigward tal-każ ta’ emittenti li għandhom storja finanzjarja kumplessa.
Wara li pprovda aġġornament bil-fomm dwar is-sitwazzjoni attwali tal-ħidma ta’ reviżjoni waqt il-laqgħa tal-EGESC f’Settembru 2018, il-persunal tal-Kummissjoni ppubblika verżjoni riveduta tar-Regolament Delegat fuq il-portal tar-Regolamentazzjoni Aħjar għal perjodu ta’ feedback ta’ 4 ġimgħat matul Diċembru 2018. B’kollox, 16-il parti kkonċernata wieġbu għal din il-konsultazzjoni. Sabiex il-persunal tal-Kummissjoni jkun jista’ jwettaq analiżi dettaljata tal-feedback komprensiv riċevut, jinkorpora xi wħud mill-bidliet proposti u jkollu l-att rivedut tradott, l-adozzjoni tar-Regolament Delegat kellha tiġi posposta għall-bidu ta’ Marzu 2019.
3.ELEMENTI ĠURIDIĊI TAL-ATT DELEGAT
Kapitolu I: definizzjonijiet
Dan il-kapitolu jistabbilixxi definizzjonijiet biex tiġi spjegata t-terminoloġija użata fl-artikoli u fl-annessi tar-Regolament Delegat.
Kapitolu II Kontenut tal-prospett
Dan il-kapitolu jistabbilixxi l-informazzjoni speċifika li trid tiġi inkluża fid-dokument ta’ reġistrazzjoni (inkluż id-dokument tar-reġistrazzjoni universali) u fin-nota dwar it-titoli tal-prospett u l-informazzjoni addizzjonali li tista’ tkun meħtieġa li tiġi inkluża skont it-tip ta’ emittent, il-ħruġ u t-titoli li jkun marbut magħhom l-prospett.
Kapitolu III: Format tal-prospett
Dan il-kapitolu jistabbilixxi l-format tal-prospett, il-prospett bażi u t-termini finali, kif ukoll ir-rekwiżiti relatati mas-sommarju tal-prospett.
Kapitolu IV: Il-prospett tat-Tkabbir tal-UE
Dan il-kapitolu jindirizza l-kontenut, il-format u s-sekwenza tal-prospett tat-Tkabbir tal-UE, flimkien mal-kontenut u l-format tas-sommarju speċifiku tiegħu. B'mod partikolari:
·Il-format standardizzat tal-prospett tat-Tkabbir tal-UE taħt ir-reġim ta’ divulgazzjoni proporzjonata huwa mfassal biex ikun faċli għall-emittenti biex jikkompletawh, jagħmilha eħfef, jgħin biex jiġu minimizzati l-ispejjeż għall-SMEs u jiffaċilita l-aċċess tagħhom għall-finanzjament filwaqt li jiżgura l-fiduċja tal-investituri;
·is-sommarju speċifiku tal-prospett tat-Tkabbir tal-UE jeħtieġ biss l-informazzjoni rilevanti diġà inkluża fil-prospett ta’ Tkabbir tal-UE u huwa iqsar mis-sommarji għat-tipi l-oħra kollha ta’ prospetti.
Kapitolu V: Skrutinju u approvazzjoni tal-prospett u rieżami tad-dokument tar-reġistrazzjoni universali
Dan il-kapitolu jindirizza:
·il-kriterji għall-iskrutinju tal-prospetti, b’mod partikolari l-kompletezza, il-komprensibbiltà u l-konsistenza tal-informazzjoni mogħtija, u l-proċeduri għall-approvazzjoni tal-prospetti. Dan ir-Regolament Delegat għandu l-għan li joħloq ġabra unika ta’ regoli li tista’ tiġi implimentata b’mod konsistenti fl-UE kollha. Il-kriterji ta’ skrutinju jippermettu lill-awtoritajiet kompetenti jieħdu approċċ proporzjonat għall-iskrutinju tal-prospetti, abbażi taċ-ċirkostanzi speċifiċi tal-emittent u tal-ħruġ.
·kriterji għall-iskrutinju tad-dokument tar-reġistrazzjoni universali u l-emendi tiegħu, u l-proċeduri għall-approvazzjoni, l-iffaljar u r-rieżami ta’ dawn id-dokumenti. Dawn il-kriterji jqisu l-fatt li l-objettivi u l-kriterji tar-rieżami ex post tad-dokument tar-reġistrazzjoni universali huma allinjati ma’ dawk tal-iskrutinju ex ante u għandhom x’jaqsmu mal-kompletezza, il-konsistenza u l-komprensibbiltà tal-informazzjoni pprovduta mill-emittent.
Kapitolu VI: Dispożizzjonijiet finali
Dan il-kapitolu jipprovdi għat-tħassir tar-Regolament tal-Kummissjoni eżistenti u d-dħul fis-seħħ tar-Regolament Delegat fl-21 ta’ Lulju 2019, li se jikkoinċidi mad-dħul fis-seħħ tal-biċċa l-kbira tad-dispożizzjonijiet tar-Regolament dwar il-Prospett.
REGOLAMENT DELEGAT TAL-KUMMISSJONI (UE) .../...
ta’ 14.3.2019
li jissupplimenta r-Regolament (UE) 2017/1129 tal-Parlament Ewropew u tal-Kunsill fir-rigward tal-format, il-kontenut, l-iskrutinju u l-approvazzjoni tal-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat, u li jħassar ir-Regolament tal-Kummissjoni (KE) Nru 809/2004
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2017/1129 tal-Parlament Ewropew u tal-Kunsill tal-14 ta’ Ġunju 2017 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat, u li jħassar id-Direttiva 2003/71/KE, u b’mod partikolari l-Artikolu 9(14), il-paragrafi (1) u (2) tal-Artikolu 13, l-Artikoli 14(3), 15(2) u 20(11) tiegħu,
Billi:
(1)Ir-Regolament (UE) 2017/1129 jistipula rekwiżiti li jridu jiġu osservati meta jitfasslu l-prospetti. Ir-rekwiżiti li jikkonċernaw l-iskrutinju, ir-rieżami, l-approvazzjoni u l-iffaljar tad-dokument tar-reġistrazzjoni universali u kwalunkwe emenda għalih, ir-rekwiżiti li jikkonċernaw il-format tal-prospett, il-prospett bażi u t-termini finali, l-informazzjoni speċifika li trid tiddaħħal fi prospett, l-informazzjoni minima li trid tiddaħħal fid-dokument ta’ reġistrazzjoni universali, l-informazzjoni mnaqqsa li trid tiġi inkluża taħt ir-reġim ta’ divulgazzjoni ssimplifikata għal ħruġ ta’ titoli sekondarju, il-kontenut imnaqqas, il-format standardizzat u s-sekwenza tal-prospett tat-Tkabbir tal-UE, il-kontenut imnaqqas u l-format standardizzat tas-sommarju speċifiku u l-iskrutinju u l-approvazzjoni tal-prospetti kollha jeħtieġu li jiġu speċifikati.
(2)Il-kontenut u l-format ta’ prospett jiddependu fuq varjetà ta’ fatturi, bħat-tip ta’ emittent, it-tip ta’ titolu, it-tip ta’ ħruġ ta’ titoli kif ukoll l-involviment possibbli ta’ parti terza bħala garanti u l-kwistjoni jekk hemmx ammissjoni jew le għall-kummerċ. Għalhekk mhuwiex xieraq li jiġu stipulati l-istess rekwiżiti għat-tipi kollha ta’ prospetti. Minflok jneħtieġ li jiġu stipulati rekwiżiti ta’ informazzjoni speċifiċi u jenħtieġ li jiġu kkombinati skont dawn il-fatturi u t-tip ta’ prospett. Madankollu dan jenħtieġ li ma jipprevjenix lil emittent, offerent jew persuna li titlob ammissjoni għal kummerċ f’suq regolat biex fil-prospett tipprovdi l-aktar informazzjoni komprensiva disponibbli.
(3)Sabiex jiżguraw ċertezza ġuridika u jżidu t-trasparenza għall-investituri, l-emittenti jenħtieġ li jiddikjaraw fid-dokument tar-reġistrazzjoni universali tagħhom jekk id-dokument tar-reġistrazzjoni universali ġiex approvat mill-awtorità kompetenti jew jekk ġiex sempliċiment iffalajt u ppubblikat mingħajr approvazzjoni preċedenti.
(4)Ir-rekwiżiti ta’ informazzjoni mnaqqsa għal ħruġ sekondarju jenħtieġ li jirriflettu l-ispeċifiċitajiet tat-titoli ta’ ekwità u mingħajr ekwità.
(5)Intrapriżi ta’ investiment kollettiv tat-tip magħluq isewgu objettivi tal-investiment speċifiċi u jistgħu jiġu soġġetti għal restrizzjonijiet tal-investiment speċifiċi. Għalhekk, id-dokumenti ta’ reġistrazzjoni għal dawn l-intrapriżi jenħtieġ li jiġu soġġetti għal rekwiżiti ta’ informazzjoni speċifiċi.
(6)Minħabba r-rabta indiretta bejn l-investitur u l-ishma sottostanti tar-riċevuti depożitorji, huwa importanti li l-investitur jiġi infurmat dwar l-emittent tal-ishma sottostanti. Għalhekk, il-prospett għar-riċevuti depożitorji jenħtieġ li jkun fih, minbarra informazzjoni dwar ir-riċevuta depożitorja u l-emittent tar-riċevuta depożitorja, informazzjoni dwar l-ishma sottostanti u l-emittent ta’ dawn l-ishma sottostanti.
(7)L-informazzjoni fil-prospetti għal titoli mingħajr ekwità jenħtieġ li tiġi adattata għal-livell tal-għarfien u l-għarfien espert ta’ kull tip ta’ investitur. Għalhekk, il-prospetti għal titoli mingħajr ekwità li fihom jistgħu jinvestu l-investituri fil-livell tal-konsumatur jenħtieġ li jiġu soġġetti għal rekwiżiti ta’ informazzjoni aktar komprensivi u distinti minn prospetti għal titoli mingħajr ekwità li huma riżervati għal investituri kwalifikati.
(8)L-obbligu li jiġi prodott prospett japplika għal titoli mingħajr ekwità maħruġa minn pajjiżi terzi u l-awtoritajiet reġjonali u lokali tagħhom f’każijiet fejn dawn l-entitajiet jixtiequ jagħmlu offerta pubblika ta’ titoli fl-Unjoni jew jixtiequ li t-titoli tagħhom jiġu ammessi għall-kummerċ f’suq regolat. Minħabba n-natura partikolari ta’ dawn l-entitajiet pubbliċi, jenħtieġ li jiġu stipulati rekwiżiti ta’ informazzjoni speċifiċi.
(9)L-investituri jenħtieġ li jkunu jistgħu jifhmu s-sitwazzjoni ta’ emittent bi storja finanzjarja kumplessa u l-effetti mistennija ta’ tranżazzjoni li tinvolvi impenn finanzjarju sinifikanti. Għalhekk, għal dan il-għan, dawn l-emittenti jenħtieġ li jkunu meħtieġa jinkludu informazzjoni addizzjonali fil-prospett.
(10)Meta titoli jkunu skambjabbli ma’, jew konvertibbli f’ishma li diġà huma ammessi għall-kummerċ f’suq regolati, l-azzjonisti u l-investituri normalment diġà jkollhom l-informazzjoni dwar l-ishma sottostanti ta’ dawn it-titoli. Għalhekk huwa biżżejjed li mal-prospett tiżdied dikjarazzjoni li tistabbilixxi t-tip tas-sehem sottostanti u d-dettalji ta’ fejn tista’ tinkiseb informazzjoni dwar is-sehem sottostanti.
(11)L-investituri jistgħu jkunu jridu jinvestu f’titoli li huma skambjabbli jew konvertibbli f’ishma li jinħarġu jew se jinħarġu mill-emittent ta’ dawn it-titoli jew minn entità li tappartjeni għall-grupp ta’ dan l-emittent u li għadhom ma ġewx ammessi għall-kummerċ f’suq regolat. Dawn l-investituri jenħtieġ li jkollhom l-istess informazzjoni dwar il-kapaċità tal-emittent tal-ishma sottostanti li jkompli l-operazzjonijiet tiegħu u dwar il-pożizzjoni ta’ dejn tiegħu meta mqabbel mal-kapitalizzazzjoni bħall-investituri li investew f’dawn l-ishma direttament. Għalhekk, il-prospett jenħtieġ li jkun fih dikjarazzjoni tal-kapital operatorju kif ukoll dikjarazzjoni tal-kapitalizzazzjoni u l-pożizzjoni ta’ dejn tal-emittent tal-ishma sottostanti.
(12)Titoli ta’ derivattivi jinvolvu riskji partikolari għall-investituri, minħabba li pereżempju t-telf jista’ jkun ogħla mill-investiment li jkun sar u minħabba li s-sottostanti mhux dejjem jiġi ammess għall-kummerċ f’suq regolat u għalhekk informazzjoni dwar dak sottostanti tista’ ma tkunx disponibbli. Xi titoli mingħajr ekwità, bħal bonds strutturati, jinkorporaw ukoll ċerti elementi ta’ titoli ta’ derivattiva. Konsegwentement, in-nota dwar it-titoli jenħtieġ li jkun fiha informazzjoni addizzjonali dwar is-sottostanti ta’ titolu derivattiv jew dwar il-komponent derivattiv tat-titolu mingħajr ekwità u, fejn applikabbli, dikjarazzjoni dwar it-telf potenzjali li l-investituri jistgħu jiffaċċjaw.
(13)Meta l-prostett bażi jitfassal għal titoli marbuta jew garantiti b’assi sottostanti, dak il-prospett bażi jenħtieġ li jkun fih l-informazzjoni kollha dwar it-tip ta’ assi sottostanti fejn dan l-assi sottostanti jkun magħruf fid-data tal-approvazzjoni tal-prospett bażi. Madankollu il-kundizzjonijiet tas-suq jistgħu jibdlu l-għażla tal-assi sottostanti f’xi kategorija ta’ assi sottostanti. Għalhekk, it-termini finali tal-prospett bażi biss jenħtieġ li jkun fihom dettalji speċifiċi dwar dan l-assi sottostanti.
(14)Il-garanziji huma maħsuba biex jiżguraw li l-pagamenti relatati mat-titolu jiġu ssodisfati kif dovut. Minħabba d-diversità potenzjali fil-garanziji, jenħtieġ li jiġu stipulati rekwiżiti ta’ informazzjoni ċari relatati man-natura u l-ambitu ta’ dawn il-garanziji.
(15)Il-format tal-prospett, il-prospett bażi u t-termini finali jenħtieġ li jiġu speċifikati billi tiġi ddeterminata l-ordni li fiha jenħtieġ li tiġi divulgata l-informazzjoni meħtieġa. Madankollu, minħabba l-karattru bi skop multiplu tad-dokument tar-reġistrazzjoni universali, l-emittenti li jagħżlu li jfasslu u jippubblikaw dokument tar-reġistrazzjoni universali kull sena finanzjarja jenħtieġ li jingħataw aktar flessibilità fir-rigward tal-ordni ta’ informazzjoni li jenħtieġ li tiġi pprovduta fid-dokument tar-reġistrazzjoni universali.
(16)Filwaqt li l-prospett bażi jenħtieġ li jkun fih l-informazzjoni kollha disponibbli meta jitfassal dan il-prospett bażi, jenħtieġ li jkun possibbli li jitħallew spazji vojta fir-rigward ta’ informazzjoni speċifika li ssir disponibbli biss fi stadju aktar tard u li jenħtieġ li tinstab fit-termini finali, jew tiġi inkluża lista ta’ din l-informazzjoni nieqsa.
(17)Mhux dejjem ikun meħtieġ li jiġi inkluż sommarju fil-prospett. Madankollu, dan jenħtieġ li ma jipprevjenix l-inklużjoni ta’ taqsima ta’ ħarsa ġenerali fil-prospett. Sabiex tiġi evitata l-konfużjoni fost l-investituri, taqsima ta’ ħarsa ġenerali bħal din madankollu jenħtieġ li ma tissejjaħx sommarju, sakemm din ma tkunx tikkonforma mar-rekwiżiti kollha għas-sommarji.
(18)Il-prospett tat-tkabbir tal-UE huwa maħsub biex itaffi l-piż amministrattiv, b’mod partikolari għall-SMEs. Għalhekk huwa xieraq li l-abbozzar tal-prospetti tat-tkabbir tal-UE jiġi ssimplifikat billi tiġi stipulata ordni fissa li fiha jenħtieġ li tiġi ppreżentata l-informazzjoni. Madankollu, sabiex jiġi żgurat li l-informazzjoni tiġi ppreżentata b’mod li huwa koerenti u konsistenti mal-mudelli kummerċjali differenti, jenħtieġ li tiġi permessa flessibilità fir-rigward tal-ordni tal-punti tal-informazzjoni f’kull taqsima tal-prospett tat-tkabbir tal-UE.
(19)Sabiex ikun hemm lok għal flessibilità u biex jitħeġġeġ l-użu tal-prospett tat-tkabbir tal-UE, jenħtieġ li jkun possibbli li l-prospett dwar it-tkabbir tal-UE jkun magħmul minn dokumenti separati. Sabiex jiġi evitat ir-riskju ta’ informazzjoni duplikata, minn naħa waħda, jenħtieġ li jiġu stipulati rekwiżiti ta’ informazzjoni dettaljati separati għad-dokument ta’ reġistrazzjoni speċifiku u min-naħa l-oħra, għan-nota dwar it-titoli speċifika, u jenħtieġ li jiġu adattati għat-tip ta’ titoli kkonċernati, billi tinħoloq differenza bejn titoli ta’ ekwità u mingħajr ekwità
(20)Is-sommarju speċifiku tal-prospett tat-Tkabbir tal-UE jenħtieġ li jipprovdi lill-investituri l-informazzjoni ewlenija meħtieġa biex jiddeċiedu liema offerti ta’ titotli jridu jistudjaw aktar billi jirrieżaminaw il-prospett kollu kemm hu. Għalhekk dan jenħtieġ li juri l-karatteristiċi essenzjali ta’, u r-riskji assoċjati mal-emittent u t-titoli offruti u jkun fih it-termini u l-kundizzjonijiet ġenerali tal-offerta. Madankollu, minħabba li s-sommarju speċifiku huwa biss introduzzjoni għall-prospett tat-Tkabbir tal-UE u jrid jinqara flimkien mal-partijiet l-oħra tiegħu, il-kontenut tas-sommarju speċifiku jenħtieġ li jkun konsistenti ma’ dawk il-partijiet l-oħra. Sabiex jiġi żgurat li d-daqs tas-sommarju speċifiku jitfassal skont id-daqs imnaqqas tal-prospett tat-tkabbir tal-UE, it-tul tas-sommarju jenħtieġ li jkun ristrett.
(21)Sabiex jiġi żgurat li l-awtoritajiet kompetenti japplikaw standards armonizzati madwar l-Unjoni meta jiskrutinizzaw il-prospetti, u b’mod partikolari l-kompletezza, il-komprensibilità u l-konsistenza tal-informazzjoni fl-abbozzi tal-prospetti, jenħtieġ li jiġu stipulati kriterji għall-iskrutinju tal-prospett. Dawn il-kriterji jenħtieġ li jiġu applikati għall-abbozzi tal-prospett kollu u kwalunkwe waħda mill-partijiet konstitwenti tiegħu, inkluż id-dokument tar-reġistrazzjoni universali u kwalunkwe emenda u suppliment għall-prospett.
(22)Jenħtieġ li jiġi żgurat livell għoli ta’ protezzjoni tal-investitur. Għalhekk, l-awtoritajiet kompetenti jenħtieġ li jitħallew jikkunsidraw, fejn ikun meħtieġ, kriterji addizzjonali għall-iskrutinju tal-kompletezza, il-komprensibilità u l-konsistenza tal-abbozzi tal-prospetti sabiex jadattaw dan l-iskrutinju għall-karatteristiċi speċifiċi ta’ prospett.
(23)Xi emittenti huma involuti f’attivitajiet kummerċjali speċifiċi ħafna li jeħtieġu għarfien profond tal-attivitajiet ikkonċernati sabiex ikollhom fehim sħiħ tat-titoli maħruġa minn dawn l-emittenti. Dan ikun japplika pereżempju fil-każ ta’ kumpanija tal-proprjetà li tista’ tkun meħtieġa tiddivulga rapport ta’ valwazzjoni li jipprovdi d-dettalji rilevanti kollha fir-rigward tal-proprjetajiet materjali meħtieġa għall-finijiet tal-valwazzjoni. L-awtoritajiet kompetenti għandhom għalhekk ikunu jistgħu jieħdu approċċ proporzjonat u jeħtieġu, fejn xieraq, li dawk l-emittenti speċjalizzati jinkludu fil-prospett informazzjoni speċifika u adattata dwar dawk l-attivitajiet li tmur lil hinn mill-informazzjoni meħtieġa minn emittenti mhux speċjalisti.
(24)Minħabba l-evoluzzjoni rapida tas-swieq tat-titoli, hemm il-possibbiltà li ċerti tipi ta’ titoli li mhumiex koperti mill-Annessi ta’ dan ir-Regolament jiġu offruti lill-pubbliku jew jiġu ammessi għall-kummerċ. F’każ bħal dan, sabiex l-investituri jkunu jistgħu jieħdu deċiżjoni infurmata dwar l-investiment, l-awtoritajiet kompetenti jenħtieġ li jiddeċiedu f’konsultazzjoni mal-emittent, l-offerent jew il-persuna li titlob l-ammissjoni għall-kummerċ f’suq regolat liema informazzjoni jenħtieġ li tkun inkluża fil-prospett.
(25)Sabiex tiżdied l-effiċjenza fil-proċess tat-tfassil tal-prospett u jiġu eliminati piżijiet bla bżonn, huwa xieraq li jitħallew barra l-punti ta’ informazzjoni stipulati fl-Annessi ta’ dan ir-Regolament li ma jkunux rilevanti għall-emittent jew għat-titoli li jkunu qed jiġu offruti jew ammessi għall-kummerċ f’suq regolat.
(26)L-iskrutinju u l-approvazzjoni tal-prospetti huma proċess iterattiv. Bħala tali, id-deċiżjoni tal-awtorità kompetenti li tapprova l-abbozz tal-prospett tista’ tinvolvi diversi ċikli ta’ analiżi tal-abbozz tal-prospett u t-titjib sussegwenti mill-emittent, l-offerent jew il-persuna li titlob l-ammissjoni għall-kummerċ f’suq regolat biex jiġi żgurat li l-abbozz tal-prospett jissodisfa l-istandards tal-kompletezza, il-komprensibbiltà u l-konsistenza. Sabiex tiġi pprovduta ċertezza dwar il-proċess ta’ approvazzjoni, huwa meħtieġ li jiġi speċifikat liema dokumenti jenħtieġ li jiġu pprovduti lill-awtoritajiet kompetenti fl-istadji differenti tal-proċess ta’ approvazzjoni.
(27)Għal raġunijiet ta’ effiċjenza, l-awtoritajiet kompetenti jenħtieġ li jkunu permessi jwettqu skrutinju aktar ħafif meta abbozz ta’ prospett jirreplika informazzjoni li diġà tkun ġiet skrutinizzata jew rieżaminata.
(28)Sabiex l-awtoritajiet kompetenti jkunu jistgħu jfittxu termini jew kliem speċifiku fid-dokumenti sottomessi u b’hekk jiżguraw proċess ta’ skrutinju effiċjenti u f’waqtu tal-prospetti, l-abozz ta’ prospetti u l-informazzjoni ta’ akkumpanjament jenħtieġ li jiġu sottomessi f’format elettroniku li tkun tista’ ssir tiftixa fih u permezz ta’ mezzi elettroniċi aċċettabbli għall-awtorità kompetenti.
(29)L-emittenti, l-offerenti jew il-persuni li jitolbu ammissjoni għall-kummerċ f’suq regolat jenħtieġ li jkunu jistgħu juru lill-awtorità kompetenti kif indirizzaw kwistjonijiet innotifikati minn din l-awtorità. Għalhekk, kull abozz tal-prospett sottomess lill-awtorità kompetenti, bl-eċċezzjoni tal-ewwel abbozz, jenħtieġ li jkun fih kemm verżjoni bil-kummenti li tindika b’mod ċar it-tibdil kollu li jkun sar fl-abbozz sottomess preċedentement, u verżjoni nadifa fejn tibdil bħal dan ma jiġix indikat.
(30)Sabiex jiġi mminimizzat dewmien fil-proċess ta’ skrutinju, l-awtoritajiet kompetenti jenħtieġ li jkunu jistgħu jidentifikaw malajr rekwiżiti ta’ informazzjoni li mhumiex applikabbli jew rilevanti. Għal dan l-għan, l-awtoritajiet kompetenti jenħtieġ li jiġu infurmati dwar l-informazzjoni li ma ġietx inkluża fl-abbozz tal-prospett.
(31)Sabiex jiġi ffaċilitat it-tfassil ta’ prospett u b’hekk biex jiġi ffaċilitat il-ġbir tal-kapital minn intrapriżi stabbiliti fl-Unjoni, u sabiex jiġi żgurat li jiġu applikati standards komuni meta jiġu skrutinizzati u approvati l-prospetti, ir-rekwiżiti kollha relatati mal-format, il-kontenut, l-iskrutinju u l-approvazzjoni tal-prospetti jenħtieġ li jiġu stipulati f’Regolament wieħed.
(32)Peress li dan ir-Regolament Delegat jissostitwixxi r-Regolament tal-Kummissjoni (KE) Nru 809/2004, dan tal-aħħar sar obsolet u għalhekk jenħtieġ li jitħassar.
(33)Għal raġunijiet ta’ koerenza, l-applikazzjoni ta’ dan ir-Regolament jenħtieġ li tiġi diferita sad-data tal-applikazzjoni tar-Regolament (UE) 2017/1129,
ADOTTAT DAN IR-REGOLAMENT:
KAPITOLU I
DEFINIZZJONIJIET
Artikolu 1
Definizzjonijiet
Għall-finijiet ta’ dan ir-Regolament, għandhom japplikaw id-definizzjonijiet li ġejjin:
(a)“titoli garantiti b’assi” tfisser titoli mingħajr ekwità li jew:
(i)jirrappreżentaw interess f’assi, inkluż kwalunkwe dritt maħsub biex jiżgura s-servizzjar ta’ dawn l-assi, ir-riċevuta jew ir-riċevuta f’waqtha minn detenturi ta’ dawn l-assi tal-ammonti pagabbli skont dawn l-assi;
(ii)huma garantiti b’assi u t-termini tat-titoli jipprevedu pagamenti kkalkulati b’referenza għal dawn l-assi;
(b)“suq ekwivalenti ta’ pajjiż terz” tfisser suq ta’ pajjiż terz li tqies bħala ekwivalenti għal suq regolat skont ir-rekwiżiti stabbiliti fit-tielet u fir-raba’ subparagrafi tal-Artikolu 25(4) tad-Direttiva 2014/65/UE tal-Parlament Ewropew u tal-Kunsill;
(c)“stima tal-profitt” tfisser tbassir tal-profitt għal perjodu finanzjarju li jkun skada u li għalih ikunu għadhom ma ġewx ippubblikati r-riżultati;
(d)“tbassir tal-profitt” tfisser dikjarazzjoni li espressament jew b’implikazzjni tindika ċifra jew ċifra minima jew massima għal-livell proababbli ta’ profitti jew telf għal perjodi finanzjarji attwali jew futuri, jew fiha data li minnha jista’ jsir kalkolu ta’ ċifra bħal din għal profitti jew telf futur, anki jekk ma tissemma l-ebda ċifra partikolari u l-kelma “profitt” ma tintużax;
(e)“tibdil gross sinifikanti” tfisser varjazzjoni ta’ aktar minn 25 % ta’ indikatur wieħed jew aktar tad-daqs tal-kummerċ tal-emittent.
KAPITOLU II
KONTENUT TAL-PROSPETT
Taqsima 1
Informazzjoni minima li trid tiġi inkluża fid-dokumenti ta’ reġistrazzjoni
Artikolu 2
Dokument tar-reġistrazzjoni għat-titoli tal-ekwità
Għal titoli ta’ ekwità, id-dokument tar-reġistrazzjoni għandu jkun fih l-informazzjoni msemmija fl-Anness 1 ta’ dan ir-Regolament, sakemm ma jitfassalx skont l-Artikoli 9, 14 jew 15 tar-Regolament (UE) 2017/1129.
Artikolu 3
Dokument ta’ reġistrazzjoni universali
Dokument tar-reġistrazzjoni li jitfassal skont l-Artikolu 9 tar-Regolament (UE) 2017/1129 għandu jkun fih l-informazzjoni msemmija fl-Anness 2 ta’ dan ir-Regolament.
Artikolu 4
Dokument tar-reġistrazzjoni għal ħruġ sekondarju ta’ titoli tal-ekwità
Dokument tar-reġistrazzjoni speċifiku għal titoli ta’ ekwità li jitfassal skont l-Artikolu 14 tar-Regolament (UE) 2017/1129, għandu jkun fih l-informazzjoni msemmija fl-Anness 3 ta’ dan ir-Regolament.
Artikolu 5
Dokument ta’ reġistrazzjoni għal unitajiet ta’ impriżi ta’ investiment kollettiv tat-tip magħluq
Għal unitajiet maħruġa minn intrapriżi ta' investiment kollettiv tat-tip magħluq, id-dokument ta’ reġistrazzjoni għandu jkun fih l-informazzjoni msemmija fl-Anness 4.
Artikolu 6
Dokument tar-reġistrazzjoni għal rċevuti depożitorji maħruġa fuq ishma
Għal riċevuti depożitorji maħruġa fuq ishma, id-dokument tar-reġistrazzjoni għandu jkun fih l-informazzjoni msemmija fl-Anness 5.
Artikolu 7
Dokument tar-reġistrazzjoni għat-titoli mingħajr ekwità fil-livell tal-konsumatur
Għal titoli mingħajr ekwità minbarra dawk imsemmija fl-Artikolu 8(2) ta’ dan ir-Regolament, id-dokument ta’ reġistazzjoni għandu jkun fih l-informazzjoni msemmija fl-Anness 6 ta’ dan ir-Regolament, sakemm ma jitfassalx skont l-Artikoli 9, 14 jew 15 tar-Regolament (UE) 2017/1129 jew ikun fih l-informazzjoni msemmija fl-Annessi 1 ta’ dan ir-Regolament.
Artikolu 8
Dokument tar-reġistrazzjoni għat-titoli mingħajr ekwità fil-livell ta’ operatur
1.Għal titoli mingħajr ekwità msemmija fil-paragrafu 2, id-dokument ta’ reġistrazzjoni għandu jkun fih l-informazzjoni msemmija fl-Anness 7 ta’ dan ir-Regolament, sakemm ma jitfassalx skont l-Artikoli 9, 14 jew 15 tar-Regolament (UE) 2017/1129 jew ikun fih l-informazzjoni msemmija fl-Anness 1 jew 6 ta’ dan ir-Regolament.
2.Ir-rekwiżit imsemmi fil-paragrafu 1 għandu japplika għal titoli mingħajr ekwità li jikkonformaw ma’ waħda mill-kundizzjonijiet li ġejjin:
(a)għandhom ikun għall-kummerċ biss f’suq regolat, jew f’porzjon speċifiku tiegħu, u li għalih jista’ jkollhom aċċess biss investituri kwalifikati għall-finijiet ta’ kummerċ f’titoli bħal dawn;
(b)ikollhom denominazzjoni għal kull unità ta’ inqas minn EUR 100 000 jew, meta ma jkun hemm l-ebda denominazzjoni individwali, ikunu jistgħu jinkisbu biss mal-ħruġ għal mhux inqas minn EUR 100 000 għal kull titolu.
Artikolu 9
Dokument tar-reġistrazzjoni għal ħruġ sekondarju ta’ titoli mingħajr ekwità
Dokument tar-reġistrazzjoni speċifiku għal titoli mingħajr ekwità li jitfassal skont l-Artikolu 14 tar-Regolament (UE) 2017/1129, għandu jkun fih l-informazzjoni msemmija fl-Anness 8 ta’ dan ir-Regolament dment li ma jkunx fih l-informazzjoni msemmija fl-Anness 3 ta’ dan ir-Regolament.
Artikolu 10
Dokument tar-reġistrazzjoni għat-titoli ggarantiti b’assi
B’deroga mill-Artikoli 7 u 8, dokument ta’ reġistrazzjoni li jitfassal għal titoli garantiti b’assi, għandu jkun fih l-informazzjoni msemmija fl-Anness 9.
Artikolu 11
Dokument tar-reġistrazzjoni għal titoli mingħajr ekwità maħruġa minn pajjiżi terzi u mill-awtoritajiet reġjonali u lokali tagħhom
B’deroga mill-Artikoli 7 u 8, dokument tar-reġistrazzjoni li jitfassal għal titoli mingħajr ekwità maħruġa minn pajjiżi terzi jew mill-awtoritajiet reġjonali jew lokali tagħhom, għandu jkun fih l-informazzjoni msemmija fl-Anness 10.
Taqsima 2
Informazzjoni minima li għandha tiġi inkluża fin-noti dwar it-titoli
Artikolu 12
Nota dwar it-titoli għal titoli ta’ ekwità jew unitajiet maħruġa minn intrapriża ta’ investiment kollettiv tat-tip magħluq
Għal titoli ta’ ekwità jew unitajiet maħruġa minn intrapriża ta’ investiment kollettiv tat-tip magħluq, in-nota dwar it-titoli għandu jkun fiha l-informazzjoni msemmija fl-Anness 11 ta’ dan ir-Regolament, sakemm ma titfassalx skont l-Artikoli 14 jew 15 tar-Regolament (UE) 2017/1129.
Artikolu 13
Nota dwar it-titoli għal ħruġ sekondarju għal titoli ta’ ekwità jew unitajiet maħruġa minn intrapriża ta’ investiment kollettiv tat-tip magħluq
Nota dwar it-titoli speċifika għal it-titoli tal-ekwità jew unitajiet maħruġa minn intrapriża ta’ investiment kollettiv tat-tip magħluq li titfassal skont l-Artikolu 14 tar-Regolament (UE) 2017/1129, għandu jkun fiha l-informazzjoni msemmija fl-Anness 12 ta’ dan ir-Regolament.
Artikolu 14
Nota dwar it-titoli għal rċevuti depożitorji maħruġa fuq ishma
Għal riċevuti depożitorji maħruġa fuq ishma, in-nota dwar it-titoli għandu jkun fiha l-informazzjoni msemmija fl-Anness 13.
Artikolu 15
Nota dwar it-titoli għal titoli mingħajr ekwità fil-livell ta’ konsumatur
Għal titoli mingħajr ekwità minbarra dawk imsemmija fl-Artikolu 8(2) ta’ dan ir-Regolament, in-nota dwar it-titoli għandu jkun fiha l-informazzjoni msemmija fl-Anness 14 ta’ dan ir-Regolament, sakemm nota dwar it-titoli speċifika ma titfassalx skont l-Artikoli 14 jew 15 tar-Regolament (UE) 2017/1129.
Artikolu 16
Nota dwar it-titoli għal titoli mingħajr ekwità fil-livell ta’ operatur
Għal titoli mhux ta’ ekwità msemmija fl-Artikolu 8(2) ta’ dan ir-Regolament, in-nota dwar it-titoli għandu jkun fiha l-informazzjoni msemmija fl-Anness 15 ta’ dan ir-Regolament, dment li ma jkunx fiha l-informanzzjoni msemmija fl-Anness 14 ta’ dan ir-Regolament jew dment li nota dwar it-titoli speċifika ma tkunx tfasslet skont l-Artikoli 14 jew 15 tar-Regolament (UE) 2017/1129.
Artikolu 17
Nota dwar it-titoli għal ħruġ sekondarju ta’ titoli mingħajr ekwità
Nota dwar it-titoli speċifika għal titoli mingħajr ekwità li titfassal skont l-Artikolu 14 tar-Regolament (UE) 2017/1129, għandu jkun fiha l-informazzjoni msemmija fl-Anness 16 ta’ dan ir-Regolament.
Taqsima 3
Informazzjoni addizzjonali li għandha tiġi inkluża fil-prospett
Artikolu 18
Storja finanzjarja kumplessa u impenn finanzjarju sinifikanti tal-emittenti ta’ titoli ta’ ekwità
1.Meta l-emittent ta’ titolu ta’ ekwità jkollu storja finanzjarja kumplessa, jew ikun għamel impenn finanzjarju sinifikanti, informazzjoni addizzjonali fir-rigward ta’ entità għajr l-emittent għandha tiġi inkluża fil-prospett, kif imsemmi fil-paragrafu 2.
2.Fir-rigward ta’ entità, għajr l-emittent, informazzjoni addizzjonali għandha tkun l-informazzjoni kollha msemmija fl-Annessi 1 u 20 ta’ dan ir-Regolament li l-investituri jkunu jeħtieġu biex jagħmlu valutazzjoni informata kif imsemmi fl-Artikolu 6(1) u fl-Artikolu 14(2) tar-Regolament (UE) 2017/1129, bħallikieku dik l-entità kienet l-emittent tat-titolu ta’ ekwità.
Tali informazzjoni addizzjonali għandha tiġi preċeduta minn spjegazzjoni ċara dwar għaliex dik l-informazzjoni hija meħtieġa biex l-investituri jagħmlu valutazzjoni informata u għandha tispeċifika l-effetti tal-istorja finanzjarja kumplessa jew tal-impenn finanzjarju sinifikanti fuq l-emittent jew fuq in-negozju tal-emittent.
3.Għall-finijiet tal-paragrafu 1, emittent għandu jitqies bħala li jkollu storja finanzjarja kumplessa meta jiġu ssodisfati l-kondizzjonijiet li ġejjin kollha:
(a)fil-ħin tat-tfassil tal-prospett, l-informazzjoni msemmija fl-Annessi rilevanti ma tirrappreżentax b’mod preċiż l-impenn tal-emittent;
(b)in-nuqqas ta’ preċiżjoni msemmija fil-punt (a) taffettwa l-kapaċità tal-investituri li jagħmlu valutazzjoni infurmata kif imsemmi fl-Artikolu 6(1) u fl-Artikolu 14(2) tar-Regolament (UE) 2017/1129;
(c)l-investituri jkunu jeħtieġu informazzjoni addizzjonali dwar entità minbarra l-emittent biex jagħmlu valutazzjoni infurmata kif imsemmi fl-Artikolu 6(1) u l-Artikolu 14(2) tar-Regolament (UE) 2017/1129.
4.Għall-finijiet tal-paragrafu 1, impenn finanzjarju sinifikanti huwa ftehim vinkolanti biex issir tranżazzjoni li aktarx tagħti bidu għal varjazzjoni ta’ aktar minn 25 % fil-konfront ta’ indikatur wieħed jew aktar tad-daqs tan-negozju tal-emittent.
Artikolu 19
Titoli li huma skambjabbli jew konvertibbli f’ishma
1.Meta titoli jkunu skambjabbli għal jew konvertibbli f’ishma li huma ammessi għall-kummerċ f’suq regolat, in-nota dwar it-titoli għandha jkun fiha bħala informazzjoni addizzjonali l-informazzjoni msemmija fil-punt 2.2.2 tal-Anness 17.
2.Meta titoli jkunu skambjabbli għal jew konvertibbli f’ishma li huma maħruġa jew li se jinħarġu mill-emittent jew minn entità li tappartjeni lil grupp ta’ dak l-emittent u li mhumiex ammessi għall-kummerċ f’suq regolat, in-nota dwar it-titoli għandu jkun fiha wkoll l-informazzjoni addizzjonali li ġejja:
(a)l-informazzjoni msemmija fil-punti 3.1 u 3.2 tal-Anness 11 fir-rigward ta’ dak l-emittent jew ta’ dik l-entità li tappartjeni għall-grupp tal-emittent;
(b)l-informazzjoni msemmija fl-Anness 18 fir-rigward tas-sehem sottostanti.
3.Meta titoli jkunu skambjabbli għal jew konvertibbli f’ishma li huma maħruġa jew li se jinħarġu minn emittent terz u li mhumiex ammessi għall-kummerċ f’suq regolat, in-nota dwar it-titoli għandha jkun fiha bħala informazzjoni addizzjonali l-informazzjoni msemmija fl-Anness 18.
Artikolu 20
Titoli li joħolqu obbligi ta’ pagament jew ta’ konsenja marbuta ma’ assi sottostanti
1.Għal titoli minbarra dawk imsemmija fl-Artikolu 19 li jagħtu d-dritt ta’ sottoskrizzjoni jew akkwist ta’ ishma li huma jew li sejrin jinħarġu mill-emittent jew minn entità li tappartjeni lil grupp ta’ dak l-emittent u li huma ammessi għall-kummerċ f’suq regolat, in-nota dwar it-titoli għandha jkun fiha bħala informazzjoni addizzjonali l-informazzjoni msemmija fl-Anness 17.
2.Għal titoli minbarra dawk imsemmija fl-Artikolu 19 li jagħtu d-dritt ta’ sottoskrizzjoni jew akkwist ta’ ishma li huma jew li sejrin jinħarġu mill-emittent jew minn entità li tappartjeni lil grupp ta’ dak l-emittent u li mhumiex ammessi għall-kummerċ f’suq regolat, in-nota dwar it-titoli għandha jkun fiha l-informazzjoni addizzjonali l-ġejja:
(a)l-informazzjoni msemmija fl-Anness 17 ħlief għall-informazzjoni msemmija fil-punt 2.2.2 ta’ dak l-Anness;
(b)l-informazzjoni msemmija fl-Anness 18 fir-rigward tas-sehem sottostanti.
3.Għal titoli minbarra dawk imsemmija fl-Artikolu 19 li huma marbuta ma’ sottostanti għajr ishma msemmija fil-paragrafi 1 u 2 ta’ dan l-Artikolu, in-nota dwar it-titoli għandha jkun fiha bħala informazzjoni addizzjonali l-informazzjoni msemmija fl-Anness 17.
Artikolu 21
Titoli ggarantiti b’assi
Għal titoli ggarantiti b’assi, in-noti dwar it-titoli għandu jkun fihom ukoll l-informazzjoni addizzjonali msemmija fl-Anness 19.
Artikolu 22
Garanziji
Għal titoli mingħajr ekwità li jinkludu garanziji, in-noti dwar it-titoli għandu jkun fihom ukoll l-informazzjoni addizzjonali msemmija fl-Anness 21.
Artikolu 23
Kunsens
Meta l-emittent jew il-persuna responsabbli biex tfassal prospett jagħtu kunsens biex jintuża kif imsemmi fit-tieni subparagrafu tal-Artikolu 5(1) tar-Regolament (UE) 2017/1129, il-prospett għandu jkun fih l-informazzjoni addizzjonali li ġejja:
(a)l-informazzjoni msemmija fil-punti 1 u 2A tal-Anness 22 ta’ dan ir-Regolament fejn ingħata kunsens lil intermedju finanzjarju speċifiku wieħed jew aktar;
(b)l-informazzjoni msemmija fil-punti 1 u 2B tal-Anness 22 ta’ dan ir-Regolament fejn ingħata kunsens lill-intermedji finanzjarji kollha.
KAPITOLU III
FORMAT TAL-PROSPETT
Artikolu 24
Format ta’ prospett
1.Meta prospett jitfassal bħala dokument uniku, dan għandu jkun magħmul mill-elementi li ġejjin stabbiliti fl-ordni li ġejja:
(a)werrej;
(b)sommarju, fejn ikun meħtieġ mill-Artikolu 7 tar-Regolament (UE) 2017/1129;
(c)il-fatturi ta’ riskju msemmija fl-Artikolu 16 tar-Regolament (UE) 2017/1129;
(d)kwalunkwe informazzjoni oħra msemmija fl-Annessi ta’ dan ir-Regolament li għandha tiġi inkluża f’dan il-prospett.
L-emittent, l-offerent jew il-persuna li titlob ammissjoni għall-kummerċ f’suq regolat jistgħu jiddeċiedu l-ordni li fiha tiġi stabbilita l-informazzjoni msemmija fl-Annessi ta’ dan ir-Regolament fil-prospett.
2.Fejn prospett jitfassal bħala dokumenti separati, id-dokument ta’ reġistrazzjoni u n-nota dwar it-titoli għandhom ikunu magħmulin mill-elementi li ġejjin stabbiliti fl-ordni li ġejja:
(a)werrej;
(b)il-fatturi ta’ riskju msemmija fl-Artikolu 16 tar-Regolament (UE) 2017/1129;
(c)kwalunkwe informazzjoni oħra msemmija fl-Annessi ta’ dan ir-Regolament li għandha tiġi inkluża f’dan id-dokument ta’ reġistrazzjoni jew din in-nota dwar it-titoli.
L-emittent, l-offerent jew il-persuna li titlob ammissjoni għall-kummerċ f’suq regolat jistgħu jiddeċiedu l-ordni li fiha tiġi stabbilita l-informazzjoni msemmija fl-Annessi ta’ dan ir-Regolament fid-dokument ta’ reġistrazzjoni u fin-nota dwar it-titoli.
3.Meta dokument ta’ reġistrazzjoni jitfassal fil-forma ta’ dokument ta’ reġistrazzjoni universali, l-emittent jista’ jinkludi l-fatturi ta’ riskju msemmija fil-punt (b) tal-paragrafu 2 mal-informazzjoni msemmija fil-punt (c) ta’ dan il-paragrafu dment li dawn il-fatturi ta’ riskju jibqgħu identifikabbli bħala taqsima waħda.
4.Meta jintuża dokument tar-reġistrazzjoni universali għall-finijiet tal-Artikolu 9(12) tar-Regolament (UE) 2017/1129, l-informazzjoni li tinsab f’dak id-dokument tar-reġistrazzjoni universali għandha tiġi ppreżentata f’konformità ma’ [UP jekk jogħġbok daħħal referenza għar-Regolament Delegat tal-Kummissjoni tas-17.12.2018 li jissupplimenta d-Direttiva 2004/109/KE tal-Parlament Ewropew u tal-Kunsill dwar l-istandards tekniċi regolatorji dwar l-ispeċifikazzjoni ta’ format elettroniku uniku tar-rappurtar].
5.Meta l-ordni tal-informazzjoni msemmija fil-punt (d) tal-paragrafu 1 u fil-punt (c) tal-paragrafu 2 tkun differenti mill-ordni li fiha din l-informazzjoni hija ppreżentata fl-Annessi ta’ dan ir-Regolament, l-awtoritajiet kompetenti jistgħu jitolbu li tiġi pprovduta lista ta’ kontroreferenzi li jindikaw il-punti ta’ dawn l-Annessi li dik l-informazzjoni tikkorrispondi magħhom.
Il-lista ta’ kontroreferenzi msemmija fl-ewwel subparagrafu għandha tidentifika kwalunkwe punt stabbilit fl-Annessi ta’ dan ir-Regolament li ma ġietx inkluża fl-abbozz tal-prospett minħabba n-natura jew it-tip ta’ emittent, titolu, offerta jew ammissjoni għall-kummerċ.
6.Meta ma tintalabx lista ta’ kontroreferenzi skont il-paragrafu 5 jew ma tkunx sottomessa volontarjament mill-emittent, l-offerent jew il-persuna li titlob l-ammissjoni għall-kummerċ f’suq regolat, fil-marġni tal-abbozz tal-prospett għandu jiġi indikat għal liema informazzjoni fl-abbozz tal-prospett jikkorrispondu l-punti ta’ informazzjoni rilevanti stipulati fl-Annessi ta’ dan ir-Regolament.
Artikolu 25
Format ta’ prospett bażi
1.Prospett bażi li jitfassal bħala dokument uniku għandu jkun magħmul mill-elementi li ġejjin stabbiliti fl-ordni li ġejja:
(a)werrej;
(b)deskrizzjoni ġenerali tal-programm ta’ offerta;
(c)il-fatturi ta’ riskju msemmija fl-Artikolu 16 tar-Regolament (UE) 2017/1129;
(d)kwalunkwe informazzjoni oħra msemmija fl-Annessi ta’ dan ir-Regolament li għandha tiġi inkluża fil-prospett bażi.
L-emittent, l-offerent jew il-persuna li titlob ammissjoni għall-kummerċ f’suq regolat jistgħu jiddeċiedu l-ordni li fiha tidher l-informazzjoni msemmija fl-Annessi ta’ dan ir-Regolament fil-prospett bażi.
2.Meta prospett bażi jitfassal bħala dokumenti separati, id-dokument ta’ reġistrazzjoni u n-nota dwar it-titoli għandhom ikunu magħmulin mill-elementi li ġejjin stabbiliti fl-ordni li ġejja:
(a)werrej;
(b)fin-nota dwar it-titoli, deskrizzjoni ġenerali tal-programm ta’ offerta;
(c)il-fatturi ta’ riskju msemmija fl-Artikolu 16 tar-Regolament (UE) 2017/1129;
(d)kwalunkwe informazzjoni oħra msemmija fl-Annessi ta’ dan ir-Regolament li għandha tiġi inkluża fid-dokument ta’ reġistrazzjoni u fin-nota dwar it-titoli.
L-emittent, l-offerent jew il-persuna li titlob ammissjoni għall-kummerċ f’suq regolat jistgħu jiddeċiedu l-ordni li fiha tiġi stabbilita l-informazzjoni msemmija fl-Annessi ta’ dan ir-Regolament fid-dokument ta’ reġistrazzjoni u fin-nota dwar it-titoli.
3.Emittent, offerent jew persuna li titlob ammissjoni għall-kummerċ f’suq regolat jistgħu jiġbru f’dokument uniku wieħed żewġ prospetti bażi jew aktar.
4.Meta dokument ta’ reġistrazzjoni jitfassal fil-forma ta’ dokument ta’ reġistrazzjoni universali, l-emittent jista’ jinkludi l-fatturi ta’ riskju msemmija fil-punt (c) tal-paragrafu 2 mal-informazzjoni msemmija fil-punt (c) ta’ dan il-paragrafu dment li dawn il-fatturi ta’ riskju jibqgħu identifikabbli bħala taqsima waħda.
5.Meta jintuża dokument tar-reġistrazzjoni universali għall-finijiet tal-Artikolu 9(12) tar-Regolament (UE) 2017/1129, l-informazzjoni li tinsab f’dak id-dokument tar-reġistrazzjoni universali għandha tiġi ppreżentata f’konformità ma’ [UP jekk jogħġbok daħħal referenza għar-Regolament Delegat tal-Kummissjoni tas-17.12.2018 li jissupplimenta d-Direttiva 2004/109/KE tal-Parlament Ewropew u tal-Kunsill dwar l-istandards tekniċi regolatorji dwar l-ispeċifikazzjoni ta’ format elettroniku uniku tar-rappurtar].
6.Meta l-ordni tal-informazzjoni msemmija fil-punt (d) tal-paragrafi 1 u 2 tkun differenti mill-ordni li fiha din l-informazzjoni hija ppreżentata fl-Annessi ta’ dan ir-Regolament, l-awtoritajiet kompetenti jistgħu jitolbu li tiġi pprovduta lista ta’ kontroreferenzi li jindikaw il-punti ta’ dawn l-Annessi li l-informazzjoni tikkorrispondi magħhom.
Il-lista ta’ kontroreferenzi msemmija fl-ewwel subparagrafu għandha tidentifika kwalunkwe punt stabbilit fl-Annessi ta’ dan ir-Regolament li ma ġietx inkluża fl-abbozz tal-prospett minħabba n-natura jew it-tip ta’ emittent, titolu, offerta jew ammissjoni għall-kummerċ.
7.Meta ma tintalabx lista ta’ kontroreferenzi skont il-paragrafu 6 jew ma tkunx sottomessa volontarjament mill-emittent, l-offerent jew il-persuna li titlob l-ammissjoni għall-kummerċ f’suq regolat, fil-marġni tal-abbozz tal-prospett bażi għandu jiġi indikat għal liema informazzjoni fl-abbozz tal-prospett bażi jikkorrispondu l-punti ta’ informazzjoni rilevanti stipulati fl-Annessi ta’ dan ir-Regolament.
Artikolu 26
Informazzjoni li għandha tiġi inkluża fil-prospett bażi u t-termini finali
1.L-informazzjoni li ssir referenza għaliha bħala “Kategorija A” fl-Annessi 14 sa 19 u 27 ta’ dan ir-Regolament għandha tiġi inkluża fil-prospett bażi.
2.L-informazzjoni li ssir referenza għaliha bħala “Kategorija B” fl-Annessi 14 sa 19 u 27 ta’ dan ir-Regolament għandha tiġi inkluża fil-prospett bażi, ħlief għad-dettalji ta’ din l-informazzjoni li ma jkunux magħrufa meta ssir l-approvazzjoni ta’ dan il-prospett bażi. Dawn id-dettalji għandhom jiddaħħlu fit-termini finali.
3.L-informazzjoni msemmija bħala “Kategorija C” fl-Annessi 14 sa 19 u 27 ta’ dan ir-Regolament għandha tiddaħħal fit-termini finali, sakemm ma tkunx magħrufa fil-ħin tal-approvazzjoni tal-prospett bażi, f’liema każ tista’ tiddaħħal f’dak il-prospett bażi minflok.
4.Minbarra l-informazzjoni msemmija fil-paragrafi 2 u 3 ta’ dan l-Artikolu, it-termini finali jistgħu jinkludu biss l-informazzjoni msemmija fl-Anness 28 ta’ dan ir-Regolament. Il-forma tat-termini finali msemmija fl-Artikolu 8(2)(a) tar-Regolament (UE) 2017/1129 għandha tindika liema mill-informazzjoni msemmija fl-Anness 28 ta’ dan ir-Regolament għandha tiġi ddeterminata fit-termini finali.
5.It-termini finali ma għandhomx jikkontradixxu l-informazzjoni inkluża fil-prospett bażi.
Artikolu 27
Sommarju tal-prospett
1.Taqsima ta’ ħarsa ġenerali inkluża fi prospett għandha tuża biss it-terminu “sommarju” jekk jikkonforma mar-rekwiżiti stipulati fl-Artikolu 7 tar-Regolament (UE) 2017/1129.
2.Meta s-sommarju tal-prospett ikun se jiġi ssupplimentat skont l-Artikolu 23 tar-Regolament (UE) 2017/1129, l-informazzjoni l-ġdida għandha tiġi integrata fis-sommarju ta’ dak il-prospett b’tali mod li l-investituri jkunu jistgħu jidentifikaw il-bidliet faċilment. L-informazzjoni l-ġdida għandha tiġi integrata fis-sommarju tal-prospett jew billi jiġi prodott sommarju ġdid jew billi jiġi ssupplimentat is-sommarju oriġinali.
KAPITOLU IV
IL-PROSPETT TAT-TKABBIR TAL-UE
Artikolu 28
Dokument tar-reġistrazzjoni tat-Tkabbir tal-UE għat-titoli tal-ekwità
Dokument tar-reġistrazzjoni speċifiku għal titoli ta’ ekwità li jitfassal skont l-Artikolu 15 tar-Regolament (UE) 2017/1129, għandu jkun fih l-informazzjoni msemmija fl-Anness 24 ta’ dan ir-Regolament.
Artikolu 29
Dokument tar-reġistrazzjoni tat-Tkabbir tal-UE għat-titoli mingħajr ekwità
Dokument tar-reġistrazzjoni speċifiku għal titoli mingħajr ekwità li jitfassal skont l-Artikolu 15 tar-Regolament (UE) 2017/1129, għandu jkun fih l-informazzjoni msemmija fl-Anness 25 ta’ dan ir-Regolament.
Artikolu 30
Nota dwar it-titoli tat-Tkabbir tal-UE għat-titoli tal-ekwità
Nota dwar it-titoli speċifika għal titoli tal-ekwità li titfassal skont l-Artikolu 15 tar-Regolament (UE) 2017/1129, għandu jkun fiha l-informazzjoni msemmija fl-Anness 26 ta’ dan ir-Regolament.
Artikolu 31
Nota dwar it-titoli tat-Tkabbir tal-UE għat-titoli mingħajr ekwità
Nota dwar it-titoli speċifika għal titoli mingħajr ekwità li titfassal skont l-Artikolu 15 tar-Regolament (UE) 2017/1129, għandu jkun fiha l-informazzjoni msemmija fl-Anness 27 ta’ dan ir-Regolament.
Artikolu 32
Format tal-prospett tat-Tkabbir tal-UE
1.Prospett tat-Tkabbir tal-UE li jitfassal bħala dokument uniku għandu jkun fih l-elementi li ġejjin fl-ordni li ġejja:
(a)werrej;
(b)fejn applikabbli, l-informazzjoni kollha inkorporata b’referenza skont l-Artikolu 19 tar-Regolament (UE) 2017/1129;
(c)is-sommarju speċifiku;
(d)meta l-prospett tat-Tkabbir tal-UE jitfassal fil-forma ta’ prospett bażi, deskrizzjoni ġenerali tal-programm tal-offerta;
(e)l-informazzjoni msemmija fit-taqsima 1 tal-Anness 24 jew fit-taqsima 1 tal-Anness 25 ta’ dan ir-Regolament, skont it-tip ta’ titoli;
(f)l-informazzjoni msemmija fit-taqsima 2 tal-Anness 24 jew fit-taqsima 2 tal-Anness 25 ta’ dan ir-Regolament, skont it-tip ta’ titoli;
(g)meta titoli ta’ ekwità jinħarġu minn emittent b’kapitalizzazzjoni tas-suq ta’ aktar minn EUR 200 000 000, l-informazzjoni msemmija fit-taqsima 2 tal-Anness 26 ta’ dan ir-Regolament;
(h)l-informazzjoni msemmija fit-taqsima 3 tal-Anness 24 u fit-taqsima 3 tal-Anness 26, jew l-informazzjoni msemmija fit-taqsima 3 tal-Anness 25 u fit-taqsima 2 tal-Anness 27, skont it-tip ta’ titoli;
(i)l-informazzjoni msemmija fit-taqsima 4 tal-Anness 26 jew fit-taqsima 3 tal-Anness 27 ta’ dan ir-Regolament, skont it-tip ta’ titoli;
(j)l-informazzjoni msemmija fit-taqsima 5 tal-Anness 26 jew fit-taqsima 4 tal-Anness 27 ta’ dan ir-Regolament, skont it-tip ta’ titoli;
(k)l-informazzjoni msemmija fit-taqsima 4 tal-Anness 24 jew fit-taqsima 4 tal-Anness 25, skont it-tip ta’ titoli;
(l)l-informazzjoni msemmija fit-taqsima 5 tal-Anness 24 jew fit-taqsima 5 tal-Anness 25 ta’ dan ir-Regolament, skont it-tip ta’ titoli;
(m)l-informazzjoni msemmija fit-taqsima 6 tal-Anness 24 jew fit-taqsima 6 tal-Anness 25 ta’ dan ir-Regolament, skont it-tip ta’ titoli;
(n)meta titoli mingħajr ekwità jinkludu garanziji, l-informazzjoni msemmija fit-taqsima 5 tal-Anness 27 ta’ dan ir-Regolament;
(o)l-informazzjoni msemmija fit-taqsima 7 tal-Anness 24 jew fit-taqsima 7 tal-Anness 25 ta’ dan ir-Regolament, skont it-tip ta’ titoli.
2.Meta prospett tat-Tkabbir tal-UE jitfassal bħala dokumenti separati, id-dokument ta’ reġistrazzjoni tat-Tkabbir tal-UE u n-noti dwar it-titoli tat-Tkabbir tal-UE għandu jkun fihom l-elementi li ġejjin fl-ordni li ġejja:
(a)dokument ta’ reġistrazzjoni tat-Tkabbir tal-UE:
(i)werrej;
(ii)fejn applikabbli, l-informazzjoni kollha inkorporata b’referenza skont l-Artikolu 19 tar-Regolament (UE) 2017/1129;
(iii)kwalunkwe informazzjoni oħra msemmija fl-Anness 24 jew 25 ta’ dan ir-Regolament li, skont it-tip ta’ titoli, trid tiġi inkluża fid-dokument ta’ reġistrazzjoni tat-Tkabbir tal-UE billi tiġi segwita l-ordni tat-taqsimiet stabbiliti f’dawk l-Annessi.
(b)Nota dwar it-titoli tat-Tkabbir tal-UE:
(i)werrej;
(ii)fejn applikabbli, l-informazzjoni kollha inkorporata b’referenza skont l-Artikolu 19 tar-Regolament (UE) 2017/1129;
(iii)deskrizzjoni ġenerali tal-programm, fil-każ ta’ prospett bażi;
(iv)kwalunkwe informazzjoni oħra msemmija fl-Anness 26 jew 27 ta’ dan ir-Regolament, skont it-tip ta’ titoli, li għandha tiġi inkluża fin-nota dwar it-titoli tat-Tkabbir tal-UE billi tiġi segwita l-ordni tat-taqsimiet stabbiliti f’dawk l-Annessi.
3.Prospett tat-Tkabbir tal-UE mfassal jew bħala dokument uniku jew bħala dokumenti separati jista’ jieħu l-forma ta’ prospett bażi.
4.L-SMEs, l-emittenti u l-offerenti msemmija fl-Artikolu 15(1) tar-Regolament (UE) 2017/1129 għandhom isegwu l-ordni tat-taqsimiet tal-Annessi ta’ dan ir-Regolament. Madankollu, dawn jistgħu jiddevjaw mill-ordni tal-punti ta’ informazzjoni f’dawn it-taqsimiet.
Artikolu 33
Sommarju speċifiku għall-prospett tal-UE tat-Tkabbir
1.Is-sommarju speċifiku għall-prospett tat-Tkabbir tal-UE għandu jipprovdi l-informazzjoni ewlenija li jeħtieġu l-investituri biex jifhmu n-natura u r-riskji tal-emittent, tal-garanti u tat-titoli li qegħdin jiġu offruti.
2.Il-kontenut tas-sommarju speċifiku għandu jkun preċiż, ġust, ċar u li ma jiżgwidax.
3.Is-sommarju speċifiku għandu jkun konsistenti mal-partijiet l-oħra tal-prospett tat-Tkabbir tal-UE.
4.Is-sommarju speċifiku għandu jitfassal bħala dokument qasir miktub b’mod konċiż u għandu jkollu tul massimu ta’ sitt paġni ta’ daqs A4 meta jkun stampat. Is-sommarju speċifiku għandu:
(a)jiġi ppreżentat u strutturat b’mod li jkun faċli biex jinqara, bl-użu ta’ tipa li tinqara;
(b)jkun miktub b’lingwa ċara, mhux teknika u konċiża li tiffaċilita l-fehim tal-informazzjoni u l-komprensibbiltà tiegħu mill-investituri.
L-ewwel subparagrafu għandu japplika wkoll fejn l-informazzjoni tiġi ppreżentata f’format tabulari.
5.Is-sommarju speċifiku għandu jkun fih l-informazzjoni msemmija fl-Anness 23 ta’ dan ir-Regolament.
6.Is-sommarju speċifiku m’għandux ikun fih kontroreferenzi għal partijiet oħra tal-prospett tat-Tkabbir tal-UE jew jinkorpora informazzjoni b’referenza.
7.Is-sommarju speċifiku jista’ juża sottointestaturi biex jippreżenta l-informazzjoni msemmija fit-taqsimiet 2, 3, u 4 tal-Anness 22 ta’ dan ir-Regolament.
8.In-numru totali tal-fatturi ta’ riskju msemmija fil-punti 2.3.1, 3.3(d) u 3.4.1 tal-Anness 23 ta’ dan ir-Regolament u inklużi fis-sommarju speċifiku m’għandux jaqbeż il-15.
9.Meta t-titoli jkunu soġġetti wkoll għar-Regolament (UE) Nru 1286/2014 tal-Parlament Ewropew u tal-Kunsill, l-awtorità kompetenti tal-Istat Membru lokali tista’ teħtieġ lill-SMEs, lill-emittenti u lill-offerenti msemmija fl-Artikolu 15(1) tar-Regolament (UE) 2017/1129 biex jissostitwixxu l-informazzjoni msemmija f’taqsima 3 tal-Anness 23 ta’ dan ir-Regolament bl-informazzjoni stabbilita fil-punti (c) sa (i) tal-Artikolu 8(3) tar-Regolament (UE) Nru 1286/2014.
10.Meta s-sostituzzjoni msemmija fil-paragrafu 9 ma tkunx meħtieġa mill-awtorità kompetenti tal-Istat Membru lokali, l-SMEs, l-emittenti u l-offerenti msemmija fl-Artikolu 15(1) tar-Regolament (UE) 2017/1129, jistgħu jissostitwixxu l-informazzjoni msemmija fit-taqsima 3 tal-Anness 23 ta’ dan ir-Regolament bl-informazzjoni stabbilita fil-punti (c) sa (i) tal-Artikolu 8(3) tar-Regolament (UE) Nru 1286/2014.
11.Meta l-informazzjoni msemmija fil-paragrafi 9 u 10 tiġi sostitwita, din għandha tiġi inkluża bħala taqsima distinta tas-sommarju speċifiku u dik it-taqsima għandha tiġi identifikata b’mod ċar bħala li tinkudi l-informazzjoni stabbilita fil-punti (c) sa (i) tal-Artikolu 8(3) tar-Regolament (UE) Nru 1286/2014.
12.It-tul massimu tas-sommarju speċifiku msemmi fil-paragrafu 4 għandu jiġi estiż bi:
(a)paġna addizzjonali waħda ta’ karta daqs A4 fejn is-sommarju speċifiku jkun fih informazzjoni dwar il-garanzija marbuta mat-titoli;
(b)żewġ paġni addizzjonali ta’ karta daqs A4 fejn is-sommarju speċifiku jkopri bosta titoli li huma differenti biss f’dettalji limitati ħafna bħall-prezz tal-ħruġ jew id-data tal-maturità;
(c)tliet faċċati addizzjonali ta’ karta ta’ daqs A4 fejn ikun hemm sostituzzjoni ta’ informazzjoni kif imsemmi fil-paragrafi 9 u 10.
Għall-finijiet tal-punt (c), jistgħu jintużaw tliet paġni addizzjonali ta’ karta daqs A4 għal kull titolu fejn is-sommarju speċifiku jkopri bosta titoli li huma differenti biss f’dettalji limitati ħafna bħall-prezz tal-ħruġ jew id-data tal-maturità.
Artikolu 34
Supplimenti għas-sommarju speċifiku għall-prospett tat-Tkabbir tal-UE
Meta s-sommarju speċifiku tal-prospett tat-Tkabbir tal-UE ikun se jiġi ssupplimentat skont l-Artikolu 23 tar-Regolament (UE) 2017/1129, l-informazzjoni l-ġdida għandha tiġi integrata fis-sommarju speċifiku ta’ dak il-prospett tat-Tkabbir tal-UE b’tali mod li l-investituri jkunu jistgħu jidentifikaw il-bidliet faċilment. L-informazzjoni l-ġdida għandha tiġi integrata fis-sommarju speċifiku tal-prospett tat-Tkabbir tal-UE jew billi jinkiteb sommarju speċifiku ġdid jew billi jiġi ssupplimentat is-sommarju speċifiku oriġinali.
KAPITOLU V
SKRUTINJU U APPROVAZZJONI TAL-PROSPETT U RIEŻAMI TAD-DOKUMENT TAR-REĠISTRAZZJONI UNIVERSALI
Artikolu 35
Ambitu tal-iskrutinju
Għall-finijiet tal-iskrutinju tal-prospett u r-rieżami tad-dokument tar-reġistrazzjoni universali, ir-referenzi għall-prospett għandhom ifissru l-prospett jew kwalunkwe waħda mill-partijiet kostitwenti tiegħu, inkluż dokument tar-reġistrazzjoni universali sew jekk jiġix sottomess għall-approvazzjoni jew iffajljat mingħajr approvazzjoni minn qabel u kwalunkwe emenda għalih kif ukoll supplimenti tal-prospett.
Artikolu 36
Kriterji għall-iskrutinju tal-kompletezza tal-informazzjoni fil-prospett
1.Għall-finijiet tal-iskrutinju tal-kompletezza tal-informazzjoni f’abbozz ta’ prospett, l-awtoritajiet kompetenti għandhom jikkunsidraw dan kollu li ġej:
(a)jekk l-abbozz tal-prospett huwiex imfassal skont ir-Regolament (UE) 2017/1129 u dan ir-Regolament, skont it-tip ta’ emittent, it-tip ta’ ħruġ, it-tip ta’ titolu u t-tip ta’ offerta jew ammissjoni għall-kummerċ;
(b)jekk l-emittent għandux storja finanzjarja kumplessa jew jekk għamilx impenn finanzjarju sinifikanti, kif imsemmi fl-Artikolu 18.
2.Għall-finijiet tal-punt (b) tal-paragrafu 1, l-awtoritajiet kompetenti jistgħu jeħtieġu li l-emittent jinkludi, jimmodifika jew ineħħi informazzjoni minn abbozz ta’ prospett, filwaqt li jqis dan li ġej:
(a)it-tip ta’ titoli;
(b)l-informazzjoni li diġà hija inkluża fil-prospett u l-eżistenza u l-kontenut ta’ informazzjoni li diġà hija inkluża fi prospett tal-entità minbarra l-emittent, kif ukoll il-prinċipji ta’ kontabilità u awditjar applikabbli;
(c)in-natura ekonomika tat-tranżazzjonijiet li permrezz tagħhom l-emittent akkwista, jew uża, l-intrapriża tiegħu jew kwalunkwe parti minnha, u n-natura speċifika ta’ dik l-intrapriża;
(d)jekk l-emittent jistax jikseb informazzjoni bi sforz raġonevoli dwar l-entità minbarra l-emittent.
Artikolu 37
Kriterji għall-iskrutinju tal-komprensibilità tal-informazzjoni fil-prospett
1.Għall-finijiet tal-iskrutinju tal-komprensibbiltà tal-informazzjoni f’abbozz ta’ prospett, l-awtoritajiet kompetenti għandhom jikkunsidraw dan kollu li ġej:
(a)jekk l-abbozz ta’ prospett għandux werrej ċar u dettaljat;
(b)jekk l-abbozz ta’ prospett huwiex ħieles minn ripetizzjonijiet mhux meħtieġa;
(c)jekk l-informazzjoni relatata hijiex miġbura flimkien;
(d)jekk l-abbozz ta’ prospett jużax daqs tat-tipa li jinqara faċilment;
(e)jekk l-abbozz ta’ prospett għandux struttura li tippermetti lill-investituri jifhmu l-kontenut tiegħu;
(f)jekk l-abbozz ta’ prospett jiddefinixxix il-komponenti tal-formuli matematiċi u, fejn applikabbli, jiddeskrivix b’mod ċar l-istruttura tal-prodott;
(g)jekk l-abbozz ta’ prospett huwiex miktub b’lingwa sempliċi;
(h)jekk l-abbozz ta’ prospett jiddeskrivix b’mod ċar in-natura tal-operazzjonijiet tal-emittent u l-attivitajiet prinċipali tiegħu;
(i)jekk l-abbozz ta’ prospett jispjegax terminoloġija speċifika għall-kummerċ jew l-industrija.
Madankollu, l-awtoritajiet kompetenti ma għandhomx ikunu meħtieġa jikkunsidraw il-punti (g), (h) u (i) meta abbozz ta’ prospett se jintuża esklussivament għall-għanijiet ta’ ammissjoni għall-kummerċ f'suq regolat ta’ titoli mingħajr ekwità li mhuwiex meħtieġ sommarju għalihom mill-Artikolu 7 tar-Regolament (UE) 2017/1129.
2.Għall-finijiet tal-ewwel paragrafu, l-awtoritajiet kompetenti jistgħu, fuq bażi ta’ każ b’każ u minbarra l-informazzjoni msemmija fl-Artikolu 7 tar-Regolament (UE) 2017/1129 u l-Artikolu 33 ta’ dan ir-Regolament, jeħtieġu li ċerta informazzjoni pprovduta fl-abbozz ta’ propsett tiġi inkluża fis-sommarju.
Artikolu 38
Kriterji għall-iskrutinju tal-konsistenza tal-informazzjoni fil-prospett
Għall-finijiet tal-iskrutinju tal-konsistenza tal-informazzjoni f’abbozz ta’ prospett, l-awtorità kompetenti għandha tikkunsidra dan kollu li ġej:
(a)jekk l-abbozz ta’ prospett huwiex ħieles minn diskrepanzi sinifikanti bejn il-partijiet differenti ta’ informazzjoni pprovduti fih, inkluż kwalunkwe informazzjoni inkorporata b’referenza;
(b)jekk kwalunkwe riskju materjali u speċifiku divulgat xi mkien ieħor fl-abbozz ta’ prospett huwiex inkluż fit-taqsima tal-fatturi ta’ riskju;
(c)jekk l-informazzjoni fis-sommarju hijiex f’konformità mal-informazzjoni li tinsab fi bnadi oħra fl-abbozz ta’ prospett;
(d)jekk kwalunkwe ċifra dwar l-użu tar-rikavati tikkorrispondix mal-ammont tar-rikavati li jinġabar u jekk l-użu divulgat tar-rikavati huwiex f’konformità mal-istrateġija divulgata tal-emittent;
(e)jekk id-deskrizzjoni tal-emittent fir-rieżami operattiv u finanzjarju, l-informazzjoni finanzjarja storika, id-deskrizzjoni tal-attività tal-emittent u d-deskrizzjoni tal-fatturi ta’ riskji humiex konsistenti;
(f)jekk id-dikjarazzjoni tal-kapital operatorju, hijiex f’konformità mal-fatturi ta’ riskju, ir-rapport tal-awditur, l-użu tar-rikavati u l-istrateġija divulgati tal-emittent u kif se tiġi ffinanzjata dik l-istrateġija.
Artikolu 39
Skrutinju tal-informazzjoni fil-prospett ta’ emittenti speċjalisti
L-awtoritajiet kompetenti jistgħu jeħtieġu li tiġi inkluża informazzjoni addizzjonali fil-prospett abbażi tal-attivitajiet tal-emittenti speċjalisti li jaqgħu taħt waħda mill-kategoriji stabbiliti fl-Anness 29.
Artikolu 40
Kriterji addizzjonali għall-iskrutinju tal-kompletezza, tal-konsistenza u tal-komprensibbiltà tal-informazzjoni fil-prospett
Meta jkun meħtieġ għall-protezzjoni tal-investitur, l-awtorità kompetenti tista’ tapplika kriterji minbarra dawk stipulati fl-Artikoli 36, 37 u 38 għall-għanijiet tal-iskrutinju tal-kompletezza, il-komprensibilità u l-konsistenza tal-informazzjoni fl-abbozz ta’ prospett.
Artikolu 41
Approċċ proporzjonat fl-iskrutinju ta’ abbozzi ta’ prospetti u rieżami tad-dokument tar-reġistrazzjoni universali
1.Meta l-ewwel abbozz ta’ prospett li jiġi ppreżentat lil awtorità kompetenti jkun sostanzjalment simili għal prospett li l-istess awtorità kompetenti tkun diġà approvat, u meta dak l-abbozz tal-prospett jenfasizza l-bidliet kollha magħmula lil dak il-prospett approvat, l-awtorità kompetenti għandha tkun meħtieġa biss li tapplika l-kriterji stabbiliti fl-Artikoli 36, 37 u 38 biex tiskrutinizza dawk il-bidliet u kwalunkwe informazzjoni oħra affettwata minnhom.
2.Għall-finijiet ta’ skrutinju ta’ dokument tar-reġistrazzjoni universali ppreżentat mingħajr approvazzjoni minn qabel li jkun diġà ġie rieżaminat, jew emenda għal tali dokument, l-awtoritajiet kompetenti għandhom ikunu meħtieġa biss japplikaw il-kriterji stabbiliti fl-Artikolu 36, 37 u 38 għal dawk il-partijiet tad-dokument tar-reġistrazzjoni universali jew l-emenda li ma tkunx ġiet rieżaminata.
3.Meta l-ewwel abbozz ta’ prospett li jinkorpora informazzjoni b’referenza għal dokument li jkun ġie approvat skont ir-Regolament (UE) 2017/1129 jew skont id-dispożizzjonijiet nazzjonali li jittrasponu d-Direttiva 2003/71/KE tal-Parlament Ewropew u tal-Kunsill, l-awtoritajiet kompetenti għandhom ikunu meħtieġa biss jikkunsidraw il-kriterji stipulati fl-Artikolu 38 ta’ dan ir-Regolament biex jiskrutinizzaw din l-informazzjoni.
4.Meta jiġu applikati l-paragrafi 1, 2 jew 3, l-awtoritajiet kompetenti għandhom jitolbu lill-emittent, lill-offerent jew lill-persuna li titlob għall-ammissjoni għall-kummerċ f’suq regolat biex tikkonferma li l-informazzjoni kollha fl-abbozz finali tal-prospett jew tad-dokument tar-reġistrazzjoni universali tkun aġġornata u jkun fiha l-informazzjoni kollha msemmija fl-Annessi ta’ dan ir-Regolament applikabbli għal dan il-prospett jew dokument tar-reġistrazzjoni universali.
5.Meta abbozzi sussegwenti tal-prospett jitressqu lill-awtorità kompetenti, dik l-awtorità kompetenti għandha tkun meħtieġa biss li tapplika l-kriterji stabbiliti fl-Artikoli 36, 37 u 38 għal bidliet magħmula fl-abbozz preċedenti u għal kwalunkwe informazzjoni oħra affettwata minn dawk il-bidliet.
Artikolu 42
Sottomissjoni ta’ applikazzjoni għall-approvazzjoni ta’ abbozz ta’ prospett jew l-iffaljar ta’ dokument tar-reġistrazzjoni universali jew tal-emendi għalih
1.L-abbozzi kollha tal-prospett għandhom jiġu sottomessi lill-awtorità kompetenti f’format elettroniku li tkun tista’ ssir tiftixa fihom u permezz ta’ mezzi elettroniċi.
Meta jiġi sottomess l-ewwel abbozz tal-prospett, l-emittent, l-offerent jew il-persuna li titlob ammissjoni għall-kummerċ f’suq regolat għandhom jipprovdu lill-awtorità kompetenti b’punt ta’ kuntatt għall-awtorità kompetenti biex tippreżenta n-notifiki kollha bil-miktub u permezz ta’ mezzi elettroniċi.
2.L-informazzjoni li ġejja għandha tiġi sottomessa wkoll lill-awtorità kompetenti f’format elettroniku li tkun tista’ ssir tiftixa fihom u permezz ta’ mezzi elettroniċi:
(a)il-lista ta’ kontroreferenzi, fejn mitluba mill-awtorità kompetenti skont l-Artikolu 24(5) ta’ dan ir-Regolament, jew meta ppreżentata fuq inizjattiva proprja;
(b)meta ma tintalabx lista ta’ kontroreferenzi, dokument li jidentifika kwalunkwe punt stipulat fl-Annessi ta’ dan ir-Regolament li, minħabba n-natura jew it-tip tal-emittent, tat-titoli, tal-offerta jew tal-ammissjoni għall-kummerċ, ma jkunx ġie inkluż fl-abbozz tal-prospett;
(c)kwalunkwe informazzjoni li hija inkorporata fil-prospett b’referenza kif imsemmi fl-Artikolu 19 tar-Regolament (UE) 2017/1129, sakemm tali informazzjoni ma tkunx diġà ġiet approvata minn jew iffaljata mal-istess awtorità kompetenti f’format elettroniku li jippermetti li jsir tiftix;
(d)kwalunkwe talba motivata lill-awtorità kompetenti li tawtorizza l-ommissjoni ta’ informazzjoni mill-prospett kif imsemmi fl-Artikolu 18 tar-Regolament (UE) 2017/1129;
(e)kwalunkwe talba lill-awtorità kompetenti biex issir notifika kif imsemmi fl-Artikolu 25(1) tar-Regolament (UE) 2017/1129;
(f)kwalunkwe talba lill-awtorità kompetenti biex issir notifika kif imsemmi fl-Artikolu 26(2) tar-Regolament (UE) 2017/1129;
(g)appendiċi kif imsemmi fl-Artikolu 26(4) tar-Regolament (UE) 2017/1129, sakemm ma jkunx meħtieġ sommarju skont it-tieni subparagrafu tal-Artikolu 7(1) ta’ dak ir-Regolament;
(h)konferma li, sa fejn jaf l-emittent, l-informazzjoni regolata kollha li kienet meħtieġa li tiġi divulgata skont id-dispożizzjonijiet nazzjonali li jittrasponu d-Direttiva 2004/109/KE tal-Parlament Ewropew u tal-Kunsill fejn applikabbli, u skont ir-Regolament (UE) Nru 596/2014 tal-Parlament Ewropew u tal-Kunsill, ġiet iffaljata u ppubblikata skont dawn l-atti matul l-aħħar 18-il xahar jew matul il-perjodu minn meta beda l-obbligu li tiġi divulgata dik l-informazzjoni regolata, liema huwa l-iqsar, meta l-emittent ikun qiegħed jissottometti għal approvazzjoni abbozz ta’ dokument tar-reġistrazzjoni universali jew jiffalja dokument tar-reġistrazzjoni universali mingħajr approvazzjoni preċedenti u qed jipprova jikseb l-istatus ta’ emittent frekwenti;
(i)meta dokument ta’ reġistrazzjoni universali jiġi ffaljat mingħajr approvazzjoni minn qabel, spjegazzjoni dwar kif ġiet ikkunsidrata talba għal emenda jew informazzjoni supplimentari kif imsemmi fit-tieni subparagrafu tal-Artikolu 9(9) tar-Regolament (UE) 2017/1129 fid-dokument ta’ reġistrazzjoni universali;
(j)kwalunkwe informazzjoni oħra mitluba mill-awtorità kompetenti għall-finijiet tal-iskrutinju u l-approvazzjoni tal-prospett jew l-iskrutinju, ir-rieżami u l-approvazzjoni tad-dokument tar-reġistrazzjoni universali.
3.Meta dokument tar-reġistrazzjoni universali li jiġi ffaljat mingħajr approvazzjoni minn qabel ikun annotat fil-marġni skont l-Artikolu 24(6), dan għandu jkun akkumpanjat minn verżjoni identika mingħajr annotazzjonijiet fil-marġini.
4.Meta dokument ta’ reġistrazzjoni universali jiġi ffaljat mingħajr approvazzjoni minn qabel jew meta dokument ta’ reġistrazzjoni universali jiġi emendat, l-informazzjoni msemmija fil-punti (a), (b), (c), (d), (h) u (i) tal-paragrafu 2 għandha tiġi ppreżentata fil-ħin li d-dokument ta’ reġistrazzjoni universali jiġi ffaljat mal-awtorità kompetenti filwaqt li l-informazzjoni msemmija fil-punt (j) tal-paragrafu 2 għandha tiġi ppreżentata matul il-proċess ta’ rieżami. Fil-każijiet l-oħra kollha, l-informazzjoni msemmija fil-paragrafu 2 għandha tiġi sottomessa flimkien mal-ewwel abbozz tal-prospett sottomess lill-awtorità kompetenti jew matul il-proċess tal-iskrutinju.
5.Meta emittent frekwenti jinforma lill-awtorità kompetenti li jkun beħsiebu jissottometti applikazzjoni għall-approvazzjoni ta’ abbozz ta’ prospett skont it-tieni sentenza tal-ewwel subparagrafu tal-Artikolu 20(6) tar-Regolament (UE) 2017/1129, dak l-emittent frekwenti għandu jagħmel dan bil-miktub u b’mezzi elettroniċi.
L-informazzjoni msemmija fl-ewwel subparagrafu għandha tindika l-Annessi ta’ dan ir-Regolament rilevanti għal dak l-abbozz tal-prospett.
Artikolu 43
Tibdil f’abbozz ta’ prospett matul il-proċedura ta’ approvazzjoni
1.Kull verżjoni tal-abbozz ta’ prospett sottomessa wara l-ewwel abbozz tal-prospett għandha tenfasizza t-tibdil kollu li jkun sar fl-abbozz preċedenti u għandha tiġi akkumpanjata minn abbozz mhux immarkat. L-awtoritajiet kompetenti għandhom jaċċettaw estratti mmarkati tal-abbozz tal-prospett preċedenti meta jkunu saru biss bidliet limitati.
2.Fejn l-awtoritajiet kompetenti, skont l-Artikolu 45(2) ta’ dan ir-Regolament, ikunu nnotifikaw lill-emittent, lill-offerent jew lil-persuna li titlob ammissjoni għall-kummerċ f’suq regolat li l-abbozz tal-prospett ma jilħaqx l-istandards ta’ kompletezza, komprensibbiltà u konsistenza kif imsemmi fl-Artikolu 20(4) tar-Regolament (UE) 2017/1129, l-abbozz tal-prospett sussegwentement sottomess għandu jkun akkumpanjat minn spjegazzjoni dwar kif ġew indirizzati l-kwistjonijiet pendenti nnotifikati mill-awtoritajiet kompetenti.
3.Meta t-tibdil li jkun sar f’abbozz ta’ prospett ikun awtospjegatorju jew jindirizza b’mod ċar il-kwistjonijiet pendenti nnotifikati mill-awtorità kompetenti, indikazzjoni ta’ fejn sar it-tibdil biex jindirizza dawn il-kwistjonijiet pendenti għandha titqies bħala spjegazzjoni suffiċjenti għall-finijiet tal-paragrafu 2.
Artikolu 44
Sottomissjoni għal approvazzjoni tal-abbozz finali tal-prospett
1.L-abbozz finali tal-prospett għandu jitressaq għall-approvazzjoni flimkien mal-informazzjoni kollha msemmija fl-Artikolu 42(2) li tkun inbidlet meta mqabbla mas-sottomissjoni ta’ qabel, bl-eċċezzjoni tal-informazzjoni msemmija fil-punti (a) u (h) ta’ dak l-Artikolu. L-abbozz finali tal-prospett m’għandux jiġi annotat fil-marġni.
2.Fejn ma jkun sar l-ebda tibdil fl-informazzjoni msemmija fl-Artikolu 42(2), l-emittent, l-offerent jew il-persuna li jitolbu ammissjoni għall-kummerċ f’suq regolat għandhom jikkonfermaw dan bil-miktub u b’mezzi elettroniċi.
Artikolu 45
Konferma tar-riċevuta ta’ applikazzjoni għall-approvazzjoni ta’ abbozz ta’ prospett, jew tal-iffaljar ta’ dokument tar-reġistrazzjoni universali jew ta’ emenda fih, u l-ipproċessar ta’ applikazzjoni għall-approvazzjoni ta’ abbozz ta’ prospett
1.L-awtoritajiet kompetenti għandhom jirrikonoxxu li rċevew l-applikazzjoni inizjali għall-approvazzjoni ta’ abbozz ta’ prospett jew tal-iffaljar ta’ dokument tar-reġistrazzjoni universali kif imsemmi fit-tieni subparagrafu tal-Artikolu 9(2) tar-Regolament (UE) 2017/1129, jew ta’ emenda f’dak id-dokument tar-reġistrazzjoni universali bil-miktub u b’mezzi elettroniċi kemm jista’ jkun malajr u mhux aktar tard minn tmiem it-tieni jum tax-xogħol wara l-wasla tal-applikazzjoni jew l-iffaljar.
Malli tirċievi l-applikazzjoni inizjali għall-approvazzjoni ta’ abbozz ta’ prospett u tal-iffaljar ta’ dokument tar-reġistrazzjoni universali, jew ta’ emenda għalih, l-awtorità kompetenti għandha tinforma lill-emittent, lill-offerent, jew lill-persuna li titlob l-ammissjoni għall-kummerċ f’suq regolat b’dan li ġej:
(a)in-numru ta’ referenza tal-applikazzjoni jew tal-iffaljar;
(b)il-punt ta’ kuntatt fl-awtorità kompetenti li jistgħu jiġu indirizzati lilu domandi dwar l-applikazzjoni jew l-iffaljar.
2.Meta l-abbozz tal-prospett ma jissodisfax l-istandards ta’ kompletezza, komprensibbiltà u konsistenza meħtieġa għall-approvazzjoni tiegħu jew fejn ikunu meħtieġa bidliet jew informazzjoni supplimentari, l-awtoritajiet kompetenti għandhom jinformaw lill-emittent, lill-offerent jew lill-persuna li titlob l-ammissjoni għall-kummerċ f’suq regolat tiegħu bil-miktub u b’mezzi elettroniċi.
Meta d-dokument tar-reġistrazzjoni universali msemmi fit-tieni subparagrafu tal-Artikolu 9(2) tar-Regolament (UE) 2017/1129, jew emenda għal dak id-dokument ta’ reġistrazzjoni universali, ma jissodisfax l-istandards ta’ kompletezza, komprensibbiltà u konsistenza, jew meta jkunu meħtieġa emendi jew informazzjoni supplimentari, l-awtoritajiet kompetenti għandhom jinfurmaw lill-emittent dwar dan bil-miktub u b’mezzi elettroniċi. Fejn in-nuqqas irid jiġi indirizzat mingħajr dewmien żejjed, kif meħtieġ mit-tielet subparagrafu tal-Artikolu 9(9) tar-Regolament (UE) 2017/1129, l-awtorità kompetenti għandha tinforma lill-emittent dwar dan.
3.L-awtorità kompetenti għandha tinnotifika lill-emittent, lill-offerent jew lill-persuna li titlob ammissjoni għall-kummerċ f’suq regolat dwar id-deċiżjoni tagħha fir-rigward tal-approvazzjoni tal-abbozz tal-prospett bil-mitkub u permezz ta’ mezzi elettroniċi malajr kemm jista’ jkun u mhux aktar tard minn tmiem il-jum tax-xogħol ta’ dak inhar li tittieħed id-deċiżjoni.
KAPITOLU VI
DISPOŻIZZJONIJIET FINALI
Artikolu 46
Tħassir
Ir-Regolament (KE) Nru 809/2004 huwa mħassar.
Artikolu 47
Dħul fis-seħħ u applikazzjoni
Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan għandu japplika mill-21 ta’ Lulju 2019.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, 14.3.2019
Għall-Kummissjoni
Il-President
Jean-Claude JUNCKER