MEMORANDUM TA’ SPJEGAZZJONI
1.KUNTEST TAL-ATT DELEGAT
L-Iskema ta’ Preferenzi Tariffarji Ġeneralizzati tal-UE ilha mill-1971 tgħin lill-pajjiżi fil-fażi tal-iżvilupp fl-isforzi tagħhom biex inaqqsu l-faqar u jippromwovu l-governanza tajba u l-iżvilupp sostenibbli billi tipprovdi aċċess preferenzjali għas-suq tal-Unjoni u, bħala konsegwenza, tgħinhom jiġġeneraw aktar dħul permezz tal-kummerċ internazzjonali. Ir-Regolament (UE) Nru 978/2012 tal-Parlament Ewropew u tal-Kunsill 1 (“Ir-Regolament SĠP”) jipprovdi l-qafas legali għall-implimentazzjoni tal- Iskema ta’ Preferenzi Tariffarji Ġeneralizzati (“SĠP”). Din tfasslet biex tikkonċentra is-SĠP fuq il-pajjiżi fil-fażi tal-iżvilupp li l-iktar qegħdin fil-bżonn: il-pajjiżi l-anqas żviluppati u pajjiżi oħra bi dħul baxx jew medju-baxx, bħala rifless tax-xenarju preżenti ekonomiku u kummerċjali globali.
Il-lista ta’ prodotti li fuqhom se japplikaw il-preferenzi tariffarji għall-arranġament ġenerali tas-SĠP hija stabbilita mill-Anness V tar-Regolament SĠP. Din il-lista hija bbażata fuq in-Nomenklatura Magħquda (“NM”). L-Artikolu 6(2) tar-Regolament SĠP jipprevedi li l-Kummissjoni għandha tingħata s-setgħa li tadotta atti delegati biex temenda l-Anness V sabiex tinkorpora tibdil li jkun sar meħtieġ bl-emendi li jkunu saru għan-NM.
Il-lista ta’ prodotti li fuqhom għandhom japplikaw il-preferenzi tariffarji taħt l-arranġament ta’ inċentiv speċjali għal żvilupp sostenibbli u governanza tajba huwa stabbilit mill-Anness IX tar-Regolament SĠP. Din il-lista hija bbażata fuq in-NM. L-Artikolu 11(2) tar-Regolament SĠP jipprevedi li l-Kummissjoni għandha tingħata s-setgħa li tadotta atti delegati biex temenda l-Anness IX biex tqis emendi li jkunu saru fin-NM li jaffettwaw il-prodotti elenkati f’dak l-Anness.
In-NM kif stabbilit bir-Regolament tal-Kunsill (KEE) Nru 2658/87 ġie emendat bir-Regolament ta’ Implimentazzjoni tal-Kummissjoni (UE) 2016/1821, li daħal fis-seħħ fl-1 ta’ Jannar 2017. L-Anness V u l-Anness IX tar-Regolament SĠP għalhekk jinħtieġ li jiġi emendat biex tiġi żgurata l-konsistenza mal-lista ta’ prodotti fin-NM.
2.KONSULTAZZJONIJIET QABEL L-ADOZZJONI TAL-ATT
F'konformità mal-paragrafu 4 tal-Fehim Komuni bejn il-Parlament Ewropew, il-Kunsill u l-Kummissjoni dwar l-Atti Delegati, saru konsultazzjonijiet xierqa u trasparenti, inkluż fil-livell tal-esperti, dwar dan l-att delegat. Il-Grupp ta’ Esperti tal-Kummissjoni dwar l-Iskema Ġeneralizzata ta’ Preferenzi ġie kkonsultat bil-kitba fl-1 ta’ Settembru 2017.
3.ELEMENTI ĠURIDIĊI TAL-ATT DELEGAT
L-Artikolu 6(1) tar-Regolament (UE) Nru 978/2012 (ir-Regolament SĠP) jirreferi għal-lista ta’ prodotti fl-Anness V li fuqhom għandhom japplikaw il-preferenzi tariffarji għall-arranġament ġenerali tas-SĠP msemmi fl-Artikolu 1(2)(a) tar-Regolament SĠP.
L-Artikolu 6(2) tar-Regolament SĠP jipprevedi li l-Kummissjoni għandha tingħata s-setgħa li tadotta atti delegati biex temenda l-Anness V sabiex tinkorpora tibdil li jkun sar meħtieġ bl-emendi li jkunu saru għan-Nomenklatura Magħquda.
L-Artikolu 11(1) tar-Regolament SĠP jipprevedi li l-prodotti li japplikaw għalihom il-preferenzi tariffarji taħt l-arranġament speċjali ta’ inċentivi għal żvilupp sostenibbli u governanza tajba msemmi fl-Artikolu 1(2)(b) tar-Regolament SĠP jitniżżlu fl-Anness IX.
L-Artikolu 11(2) tar-Regolament SĠP jipprevedi li l-Kummissjoni għandha tingħata s-setgħa li tadotta atti delegati biex temenda l-Anness IX biex tqis emendi li jkunu saru fin-NM li jaffettwaw il-prodotti elenkati f’dak l-Anness.
In-NM kif stabbilit bir-Regolament tal-Kunsill (KEE) Nru 2658/87 ġie emendat bir-Regolament ta’ Implimentazzjoni tal-Kummissjoni (UE) 2016/1821, li daħal fis-seħħ fl-1 ta’ Jannar 2017.
L-Anness V u l-Anness IX tar-Regolament SĠP għalhekk jinħtieġ li jiġi emendat biex tiġi żgurata l-konsistenza mal-lista ta’ prodotti fin-NM.
REGOLAMENT DELEGAT TAL-KUMMISSJONI (UE) .../...
ta’ 14.12.2017
li jemenda l-Annessi V u IX tar-Regolament (UE) Nru 978/2012 tal-Parlament Ewropew u tal-Kunsill li japplika skema ta’ preferenzi tariffarji ġeneralizzati
IL-KUMMISSJONI EWROPEA,