MEMORANDUM TA’ SPJEGAZZJONI
1.KUNTEST TAL-ATT DELEGAT
Din id-Direttiva Delegata tal-Kummissjoni temenda, għall-finijiet ta’ adattament għall-progress tekniku, l-Anness III tad-Direttiva 2011/65/UE tal-Parlament Ewropew u tal-Kunsill dwar ir-restrizzjoni tal-użu ta’ ċerti sustanzi perikolużi fit-tagħmir elettriku u elettroniku (tfassil mill-ġdid) 1 (id-Direttiva RoHS 2) fir-rigward ta’ eżenzjoni għal applikazzjonijiet speċifiċi li fihom iċ-ċomb.
Id-Direttiva RoHS 2 tirrestrinġi l-użu ta’ ċerti sustanzi perikolużi fit-tagħmir elettriku u elettroniku. Id-Direttiva RoHS 2 daħlet fis-seħħ fil-21 ta’ Lulju 2011.
Is-sustanzi ristretti huma elenkati fl-Anness II tad-Direttiva RoHS 2; filwaqt li r-restrizzjoni fuq iċ-ċomb, il-merkurju, il-kadmju, il-kromju eżavalenti, il-bifenili polibromurati u l-eteri tad-difenil polibromurati qed tiġi infurzata sal-lum, ir-restrizzjoni fuq id-di-(2-etileżil)ftalat (DEHP), il-benżilbutilftalat (BBP), il-ftalat tad-dibutil (DBP) u l-ftalat tad-diisobutil (DIBP) għandha tiġi applikata mit-22 ta’ Lulju 2019. L-Annessi III u IV tad-Direttiva RoHS 2 jelenkaw il-materjali u l-komponenti tat-tagħmir elettriku u elettroniku (EEE) għal applikazzjonijiet speċifiċi eżentati mir-restrizzjoni fuq is-sustanzi mogħtija fl-Artikolu 4(1) tad-Direttiva RoHS 2.
L-Artikolu 5 jipprevedi l-adattament għall-progress xjentifiku u tekniku (l-inklużjoni, it-tiġdid, l-emendi u t-tħassir tal-eżenzjonijiet) tal-Annessi III u IV. Għall-eżenzjonijiet li jridu jiġu inklużi fl-Annessi III u IV, skont l-Artikolu 5(1)(a), irid jiġi stipulat li l-inklużjoni ma ddgħajjifx il-protezzjoni tal-ambjent u tas-saħħa li jagħti r-Regolament (KE) Nru 1907/2006 u li tiġi ssodisfata xi waħda mill-kundizzjonijiet li ġejjin: it-tneħħija jew is-sostituzzjoni tagħhom permezz ta’ bidliet fid-disinn jew fil-materjali u l-komponenti li ma jkunux jeħtieġu l-materjali jew is-sustanzi elenkati fl-Anness II ma tkunx prattikabbli mil-lat xjentifiku jew tekniku; l-affidabbiltà tas-sostituti mhijiex żgurata; jew it-total tal-impatti negattivi fuq l-ambjent, is-saħħa u s-sikurezza tal-konsumatur ikkawżati mis-sostituzzjoni x’aktarx li jkun ogħla mit-total tal-benefiċċji tagħhom għall-ambjent, għas-saħħa u għas-sikurezza tal-konsumatur.
Barra minn hekk, l-Artikolu 5(1) jistipula li l-Kummissjoni Ewropea (il-Kummissjoni) għandha tinkludi materjali u komponenti tal-EEE għal applikazzjonijiet speċifiċi fil-listi tal-Annessi III u IV permezz ta’ atti delegati individwali f’konformità mal-Artikolu 20. L-Artikolu 5(3) u l-Anness V jistabbilixxu l-proċedura għall-preżentazzjoni ta’ applikazzjonijiet għall-għoti, għat-tiġdid jew għar-revoka ta’ eżenzjoni.
2.KONSULTAZZJONIJIET QABEL L-ADOZZJONI TAL-ATT
Bħala konsegwenza tad-dispożizzjonijiet mogħtija fl-Artikolu 5(3) u fl-Anness V li jippermettu lill-partijiet ikkonċernati japplikaw għal eżenzjoni mir-restrizzjonijiet fuq is-sustanzi, minn meta ġiet ippubblikata d-Direttiva RoHS 2 il-Kummissjoni rċeviet bosta 2 talbiet kemm għall-għoti ta’ eżenzjonijiet ġodda kif ukoll għat-tiġdid ta’ eżenzjonijiet eżistenti.
Fil-11 ta’ Novembru 2014 il-Kummissjoni rċeviet applikazzjoni għat-tiġdid tal-eżenzjoni 13(a) tal-Anness III fir-rigward tal-użu taċ-ċomb fi ħġieġ abjad użat għal applikazzjonijiet ottiċi.
Sabiex issir evalwazzjoni tal-applikazzjoni għal eżenzjoni, il-Kummissjoni nediet studju biex twettaq il-valutazzjoni teknika u xjentifika meħtieġa, li kien jinkludi konsultazzjoni online miftuħa 3 ta’ tmien ġimgħat mal-partijiet ikkonċernati 4 dwar l-applikazzjoni. Waqt il-konsultazzjoni mal-partijiet ikkonċernati ma waslu l-ebda kontribuzzjonijiet.
Ir-rapport finali li jinkludi l-valutazzjoni tal-applikazzjoni ġie ppubblikat 5 ; u l-partijiet ikkonċernati ġew notifikati b’dan. Il-paġna tal-proġett hija aċċessibbli permezz tal-paġna web tal-Europa 6 .
Sussegwentement, il-Kummissjoni kkonsultat il-grupp ta’ esperti tal-Istati Membri għall-atti delegati skont id-Direttiva RoHS 2. Proposta ta’ emenda għall-Anness III tad-Direttiva RoHS intbagħtet fis-17 ta’ Marzu 2016 bl-informazzjoni ġenerali kollha meħtieġa, u l-esperti ġew mistiedna jikkummentaw dwar il-proposta fil-laqgħa tad-19 ta’ April 2016. Il-grupp ta’ esperti appoġġja b’mod unanimu l-proposta biex jiġi eżentat iċ-ċomb fi ħġieġ abjad użat għal applikazzjonijiet ottiċi għal ħames snin mid-data ta’ skadenza oriġinali tal-eżenzjoni 13(a). Skont il-Linji Gwida għal Regolamentazzjoni Aħjar, l-abbozz tal-Att Delegat ġie ppubblikat fuq il-Portal għal Regolamentazzjoni Aħjar għal perjodu ta’ erba’ ġimgħat li matulu l-pubbliku jista’ jippreżenta r-reazzjonijiet tiegħu. Waslu tliet kummenti. Kollha kemm huma esprimew appoġġ għall-adozzjoni tal-abbozz tal-Att Delegat. Il-passi kollha meħtieġa skont l-Artikolu 5(3) sa (7) twettqu. Il-Kunsill u l-Parlament ġew notifikati bl-attivitajiet rilevanti.
Ir-rapport finali enfasizza b’mod partikolari l-informazzjoni teknika li ġejja (ara r-rapport fin-nota ta’ qiegħ il-paġna5):
Il-ħġieġ b’bażi ta’ ċomb jintuża peress li għandu kombinazzjonijiet uniċi ta’ proprjetajiet u karatteristiċi, bħall-prestazzjoni tat-trażmissjoni tad-dawl, id-dispersjoni ottika, il-konduttività termali, il-birefrazzjoni u oħrajn.
Il-ħġieġ ottiku mingħajr ċomb ta’ disinni alternattivi jeżisti fil-forma ta’ ħġieġ mingħajr ċomb, lentijiet tal-plastik u tagħmir b’disinn alternattiv. Madankollu, dawk l-alternattivi ma jistgħux jipprevedu bosta karatteristiċi u l-kombinazzjonijiet tagħhom meta mqabbel mal-ħġieġ b’bażi ta’ ċomb.
F’każijiet fejn is-sejba ta’ sostituti kienet relattivament sempliċi, dan diġà seħħ u qed jintużaw is-sostituti. L-alternattivi għall-applikazzjonijiet li fadal għadhom mhumiex disponibbli. Għalhekk is-sostituzzjoni għall-medda sħiħa tal-applikazzjonijiet mhijiex possibbli b’mod ġenerali.
Ir-riżultati tal-evalwazzjoni għall-kategoriji 1 sa 7 u għall-kategorija 10 juru li mill-inqas wieħed mill-kriterji rilevanti speċifikati fl-Artikolu 5(1)(a) jiġi ssodisfat bit-talba għal eżenzjoni fir-rigward tal-entrata 13(a) fl-Anness III meta fformulata bħala “Iċ-ċomb fi ħġieġ abjad użat għal applikazzjonijiet ottiċi”, u t-tiġdid għalhekk huwa ġġustifikat. Peress li għall-applikazzjonijiet ikkonċernati ma hemmx alternattivi affidabbli biżżejjed disponibbli llum jew li huma mistennija jitqiegħdu fis-suq fil-ġejjieni qarib, u filwaqt li jitqies ir-ritmu tipiku tal-innovazzjoni f’dan is-settur, il-perjodu ta’ validità ta’ ħames snin tal-eżenzjoni mhux mistenni li jkollu impatti negattivi fuq l-innovazzjoni. Għal kategoriji oħrajn għajr il-kategoriji 1 sa 7 u l-kategorija 10, l-eżenzjoni attwali tibqa’ tgħodd skont il-perjodi ta’ validità stabbiliti fl-Artikolu 5(2). L-eżenzjoni speċifika ma ddgħajjifx il-protezzjoni tal-ambjent u tas-saħħa li jagħti r-Regolament (KE) Nru 1907/2006 (REACH), f’konformità mal-Artikolu 5 tad-Direttiva 2011/65/UE.
3.ELEMENTI LEGALI TAL-ATT DELEGAT