(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni ta’ preparat ta’ 6-fitażi prodott minn Aspergillus oryzae DSM 33737. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

L-applikazzjoni tikkonċerna l-awtorizzazzjoni ta’ preparat ta’ 6-fitażi prodott minn Aspergillus oryzae DSM 33737 bħala addittiv tal-għalf għall-pollam kollu, għas-Suidae kollha u għall-ħut bil-pinen kollu, u titlob li dan jiġi kklassifikat fil-kategorija “addittivi żootekniċi” u fil-grupp funzjonali “sustanzi li jsaħħu d-diġestibbiltà”.

(4)

Fl-opinjoni tagħha tal-1 ta’ Frar 2024 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-preparat ta’ 6-fitażi prodott minn Aspergillus oryzae DSM 33737 huwa sikur għall-pollam kollu, għas-Suidae kollha u għall-ħut bil-pinen kollu fl-ogħla livell ta’ użu propost ta’ 4 000 FYT/kg ta’ għalf komplet, kif ukoll għall-konsumaturi u għall-ambjent. L-Awtorità kkonkludiet ukoll li l-preparat ta’ 6-fitażi prodott minn Aspergillus oryzae DSM 33737, fil-formulazzjonijiet finali tal-addittiv, mhuwiex irritant tal-ġilda. Iż-żewġ formulazzjonijiet tal-addittiv mhumiex irritanti għall-għajnejn, filwaqt li ż-żewġ formulazzjonijiet solidi huwa meqjusa irritanti għall-għajnejn. L-Awtorità ma setgħetx tikkonkludi dwar is-sensitizzazzjoni tal-ġilda tal-formulazzjoni finali tal-addittiv. Minħabba n-natura proteinaċa tas-sustanza attiva (6-fitażi), l-addittiv jitqies bħala sensitizzatur respiratorju. Madankollu, aktarx li ma jkunx hemm esponiment mill-inalazzjoni. L-Awtorità kkonkludiet ukoll li l-preparat ta’ 6-fitażi prodott minn Aspergillus oryzae DSM 33737 għandu potenzjal li jkun effikaċi fil-pollam kollu tas-simna u mrobbi għall-bajd jew għar-riproduzzjoni u fis-Suidae tar-riproduzzjoni kollha fil-livell ta’ użu minimu propost ta’ 200 FYT/kg ta’ għalf komplet u fil-ħut bil-pinen kollu fil-livell ta’ użu minimu propost ta’ 1 000 FYT/kg ta’ għalf komplet u ngħatat awtorizzazzjoni għall-użu fl-għalf għal dawk l-ispeċijiet bir-Regolament ta’ Implimentazzjoni tal-Kummissjoni (UE) 2024/2177 (3). Minħabba nuqqas ta’ data suffiċjenti, l-Awtorità ma setgħetx tikkonkludi dwar l-effikaċja għall-pollam tal-bajd u tar-riproduzzjoni, u għas-Suidae tas-simna jew imrobbija għar-riproduzzjoni. Wara l-valutazzjoni tad-data l-ġdida li tressqet mill-applikant, fl-opinjoni tagħha tat-18 ta’ Settembru 2025 (4), l-Awtorità kkonkludiet li l-addittiv għandu l-potenzjal li jkun effikaċi fl-ispeċijiet kollha tal-pollam u tal-porċini fil-livell tal-użu minimu propost ta’ 200 FYT/kg ta’ għalf komplet. L-Awtorità ma qisitx li hemm il-ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq. L-Awtorità vverifikat ukoll ir-rapport dwar il-metodu ta’ analiżi tal-addittiv tal-għalf fl-għalf, li ġie ppreżentat mil-Laboratorju ta’ Referenza stabbilit bir-Regolament (KE) Nru 1831/2003.

(5)

Fid-dawl ta’ dan ta’ hawn fuq, il-Kummissjoni tqis li l-preparat ta’ 6-fitażi prodott minn Aspergillus oryzae DSM 33737 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-użu ta’ dak il-preparat jiġi awtorizzat għall-pollam tal-bajd jew tar-riproduzzjoni, għad-driefeġ tal-ispeċijiet porċini, għall-ispeċijiet porċini tas-simna jew imrobbija għar-riproduzzjoni. Barra minn hekk, il-Kummissjoni tqis li jenħtieġ li jittieħdu miżuri protettivi xierqa biex jiġu evitati l-effetti negattivi fuq is-saħħa tal-utenti tal-addittiv.

(6)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,