REGOLAMENT TA’ IMPLIMENTAZZJONI TAL-KUMMISSJONI (UE) 2026/824

tal-14 ta’ April 2026

li jikkoreġi r-Regolament ta’ Implimentazzjoni (UE) 2025/854 fir-rigward tad-definizzjoni tar-residwi għall-fosetil-Al u l-lista tal-prodotti bażiċi li għandhom jiġu analizzati għall-katjoni tat-trimetil-sulfonju

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 396/2005 tal-Parlament Ewropew u tal-Kunsill tat-23 ta’ Frar 2005 dwar il-livelli massimi ta’ residwu ta’ pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE (1), u b’mod partikolari l-Artikolu 29(2) tiegħu,

Billi:

(1)

Ir-Regolament ta’ Implimentazzjoni tal-Kummissjoni (UE) 2025/854 (2) għandu l-għan li jiżgura l-konformità mal-livelli massimi ta’ residwi tal-pestiċidi u li jivvaluta l-esponiment tal-konsumatur għar-residwi tal-pestiċidi. Għal dak l-għan, dak ir-Regolament jistabbilixxi programm ta’ kontroll u l-għadd ta’ kampjuni li għandhom jittieħdu għal kull Stat Membru.

(2)

Il-parti C tal-Anness I tar-Regolament ta’ Implimentazzjoni (UE) 2025/854 fiha żewġ żbalji li jaffettwaw is-sustanza tad-dispożizzjonijiet ikkonċernati. L-ewwel nett, fir-rigward tal-fosetil-Al, id-definizzjoni l-ġdida tar-residwi għall-infurzar prevista mir-Regolament tal-Kummissjoni (UE) 2024/2619 (3) ma ġietx ikkunsidrata. It-tieni nett, huwa indikat b’mod żbaljat li l-katjon tat-trimetil-sulfonju għandu jiġi analizzat fil-basal u fuqu fl-2027, minflok fl-2026.

(3)	Għalhekk jenħtieġ li r-Regolament ta’ Implimentazzjoni (UE) 2025/854 jiġi kkoreġut kif xieraq.

(4)	Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Ir-Regolament ta’ Implimentazzjoni (UE) 2025/854 huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-14 ta’ April 2026.

Għall-Kummissjoni

Il-President

Ursula VON DER LEYEN

(2) Ir-Regolament ta’ Implimentazzjoni tal-Kummissjoni (UE) 2025/854 tas-7 ta’ Mejju 2025 dwar programm koordinat ta’ kontroll pluriennali tal-Unjoni għall-2026, l-2027 u l-2028 biex tiġi żgurata l-konformità mal-livelli massimi ta’ residwi tal-pestiċidi, u biex jiġi vvalutat l-esponiment tal-konsumaturi għar-residwi tal-pestiċidi fl-ikel li joriġina mill-pjanti u mill-annimali, u fuqu, u li jħassar ir-Regolament ta’ Implimentazzjoni (UE) 2024/989 (ĠU L, 2025/854, 8.5.2025, ELI: http://data.europa.eu/eli/reg_impl/2025/854/oj).

(3) Ir-Regolament tal-Kummissjoni (UE) 2024/2619 tat-8 ta’ Ottubru 2024 li jemenda l-Annessi II u III tar-Regolament (KE) Nru 396/2005 tal-Parlament Ewropew u tal-Kunsill fir-rigward tal-livelli massimi ta’ residwi għall-fosetil, għall-fosfonati tal-potassju u għall-fosfonat tad-disodju f’ċerti prodotti jew fuqhom (ĠU L, 2024/2619, 9.10.2024, ELI:http://data.europa.eu/eli/reg/2024/2619/oj).