(1)

Wara d-dħul fis-seħħ tat-Trattat ta’ Lisbona, l-investiment barrani dirett huwa inkluż fil-lista tal-kwistjonijiet li jaqgħu taħt il-politika kummerċjali komuni. Skont l-Artikolu 3(1), il-punt (e), tat-Trattat dwar il-Funzjonament tal-Unjoni Ewropea (TFUE), l-Unjoni għandha kompetenza esklużiva fir-rigward tal-politika kummerċjali komuni.

(2)

Fl-Opinjoni 2/15 tas-16 ta’ Mejju 2017, il-Qorti tal-Ġustizzja tal-Unjoni Ewropea (QĠUE) iċċarat id-diviżjoni tal-kompetenzi bejn l-Unjoni u l-Istati Membri fil-kuntest tal-Ftehim ta’ Kummerċ Ħieles bejn l-Unjoni Ewropea u r-Repubblika ta’ Singapore (2), fejn iddikjarat li t-tneħħija tat-tilwim mill-ġuriżdizzjoni tal-qrati tal-Istati Membri ma tistax tkun ta’ natura purament anċillari u, għalhekk, ma tistax tiġi stabbilita mingħajr l-approvazzjoni tal-Istati Membri. Il-QĠUE ċċarat il-proċedura għall-konklużjoni ta’ ftehimiet imħallta fl-Opinjoni 1/19 tas-6 ta’ Ottubru 2021 dwar il-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza kontra n-nisa u l-vjolenza domestika (Konvenzjoni ta’ Istanbul).

(3)

Skont id-Deċiżjoni tal-Kunsill (UE) 2024/2118 (3), il-Konvenzjoni tan-Nazzjonijiet Uniti dwar it-Trasparenza f’Arbitraġġ ibbażat fuq Trattat bejn l-Investituri u l-Istat (“il-Konvenzjoni”) ġiet iffirmata f’isem l-Unjoni fis-7 ta’ Lulju 2024, soġġetta għall-konklużjonijiet tagħha f’data aktar tard.

(4)

Huwa mixtieq li kemm jista’ jkun jiġu applikati r-Regoli tal-Kummissjoni tan-Nazzjonijiet Uniti dwar il-Liġi Internazzjonali tal-Kummerċ (UNICITRAL) dwar it-Trasparenza f’Arbitraġġ ibbażat fuq Trattat bejn l-Investituri u l-Istat (“ir-Regoli”) għas-soluzzjoni tat-tilwim bejn l-investituri u l-Istat. Fir-rigward tal-Unjoni, ir-Regoli jenħtieġ li japplikaw għat-Trattat tal-Karta tal-Enerġija (4).

(5)

Qed tittieħed nota li t-tieni n-nota ta’ qiegħ il-paġna tal-Artikolu 1 tar-Regoli tfisser li l-Unjoni, meta taġixxi ta’ intimat, għandha tapplika l-Artikolu 7, il-paragrafu 5, tar-Regoli, sabiex tipprevjeni l-iżvelar ta’ informazzjoni li l-Unjoni tqis li tmur kontra l-interessi essenzjali ta’ sigurtà ta’ Stat Membru.

(6)

Jenħtieġ li l-Unjoni ma tapplikax ir-Regoli meta taġixxi ta’ intimat fil-każ ta’ tilwima mibdija f’konformità mat-Trattat tal-Karta tal-Enerġija kontra Stat Membru li mhux parti għall-konvenzjoni, sakemm ma jiġix miftiehem mod ieħor mal-Istat Membru kkonċernat.

(7)

Il-Konvenzjoni tenħtieġ li tiġi approvata f’isem l-Unjoni.

(8)

F’konformità mat-Trattati, il-Kummissjoni jenħtieġ li tati l-approvazzjoni tagħha li l-Unjoni tkun marbuta mill-Konvenzjoni,