(1)

Ir-Regolament (UE) 2019/1021 jimplimenta l-impenji tal-Unjoni skont il-Konvenzjoni ta’ Stokkolma tal-2001 dwar il-Pollutanti Organiċi Persistenti (2) (“il-Konvenzjoni”) u skont il-Protokoll għall-Konvenzjoni tal-1979 dwar it-Tniġġis Transkonfini u fit-Tul tal-Arja fuq Pollutanti Organiċi Persistenti (3) (“il-Protokoll”).

(2)

L-Anness A tal-Konvenzjoni fih lista ta’ sustanzi kimiċi. Kull Parti għall-Konvenzjoni għandha tipprojbixxi s-sustanzi kimiċi fil-lista u/jew tieħu l-miżuri legali u amministrattivi meħtieġa biex telimina l-produzzjoni, l-użu, l-importazzjoni u l-esportazzjoni tagħhom.

(3)

Waqt il-11-il laqgħa tagħha, li saret bejn l-1 u t-12 ta’ Mejju 2023, il-Konferenza tal-Partijiet għall-Konvenzjoni ddeċidiet, skont l-Artikolu 8(9) tal-Konvenzjoni, li temenda l-Anness A tal-Konvenzjoni biex tinkludi l-UV–328 f’dak l-Anness b’eżenzjonijiet speċifiċi. L-Unjoni appoġġjat l-inklużjoni tal-UV–328 fl-Anness A b’eżenzjonijiet speċifiċi kif stipulat fid-Deċiżjoni tal-Kunsill (UE) 2023/1006 (4).

(4)

Għalhekk jenħtieġ li anki l-Parti A tal-Anness I tar-Regolament (UE) 2019/1021, li fiha lista tas-sustanzi elenkati fil-Konvenzjoni u fil-Protokoll, kif ukoll is-sustanzi li hemm elenkati biss fil-Konvenzjoni, tiġi emendata biex tinkludi l-UV–328.

(5)

L-UV–328 huwa inkluż fl-Anness XIV tar-Regolament (UE) Nru 1907/2006 tal-Parlament Ewropew u tal-Kunsill (5), bl-aħħar data tal-applikazzjoni fis-27 ta’ Mejju 2022 u data tat-terminazzjoni fis-27 ta’ Novembru 2023. Ma tressqet l-ebda applikazzjoni għal awtorizzazzjoni. Fin-nuqqas ta’ awtorizzazzjoni skont ir-Regolament (UE) Nru 1907/2006, l-UV–328 ma jistax jintuża fl-UE, iżda xorta jista’ jiġi importat f’oġġetti.

(6)

L-ECHA għamlet sejħa għal informazzjoni mill-31 ta’ Mejju sat-18 ta’ Awwissu 2023. Il-kummenti li ġew ippreżentati jaqblu mal-ħtieġa għall-eżenzjonijiet speċifiċi inklużi fid-Deċiżjoni SC-11/11 tal-Konferenza tal-Partijiet għall-Konvenzjoni, pereżempju għall-vetturi motorizzati għall-użu fuq l-art, għas-separaturi mekkaniċi f’tubi għall-ġbir tad-demm, għall-polarizzaturi, għall-karta fotografika, u għall-ispare parts.

(7)

Sabiex tista’ ssir l-importazzjoni ta’ ċerti oġġetti li fihom l-UV–328 sakemm din is-sustanza tiġi sostitwita kompletament, ċerti eżenzjonijiet speċifiċi inklużi fid-deċiżjoni SC-11/11 jenħtieġ li jingħataw fl-Unjoni għal perjodu ta’ 5 snin fir-rigward tat-tqegħid fis-suq tal-UV–328 f’ċerti oġġetti u tal-użu ta’ oġġetti bħal dawn li fihom l-UV–328. Dan jikkonċerna l-oġġetti li ġejjin: is-separaturi mekkaniċi fit-tubi tal-ġbir tad-demm, il-film taċ-ċelluloża trijaċetil fil-polarizzaturi, u l-karta fotografika. Jenħtieġ li jingħataw ukoll eżenzjonijiet għal oġġetti f’vetturi motorizzati għall-użu fuq l-art. Il-vetturi motorizzati għall-użu fuq l-art jinkludu l-karozzi, il-muturi, il-vetturi motorizzati għall-agrikoltura u għall-kostruzzjoni, u t-trakkijiet industrijali, inklużi l-vetturi motorizzati koperti mir-Regolamenti (UE) 2018/858 (6), (UE) Nru 167/2013 (7) u (UE) Nru 168/2013 (8) tal-Parlament Ewropew u tal-Kunsill.

(8)

Barra minn hekk, jenħtieġ li jingħataw ukoll eżenzjonijiet għall-oġġetti li ġejjin, li huma miksijin b’taħlitiet li fihom l-UV–328: vetturi motorizzati għall-użu fuq l-art, magni tal-inġinerija, vetturi tat-trasport bil-ferrovija, u strutturi kbar tal-azzar b’kisi li jiflaħ għall-istrapazz. Barra minn hekk, jenħtieġ li, f’konformità mad-deċiżjoni SC-11/11, tingħata wkoll eżenzjoni għat-tqegħid fis-suq u l-użu ta’ spare parts għal ċerti applikazzjonijiet fejn l-UV–328 kien inizjalment użat fil-produzzjoni tagħhom.

(9)

L-Artikolu 3 tar-Regolament (UE) 2019/1021 jipprojbixxi l-manifattura, it-tqegħid fis-suq, u l-użu ta’ sustanzi elenkati fl-Anness I ta’ dak ir-Regolament, kemm jekk waħedhom, f’taħlitiet, jew f’oġġetti. F’dan ir-rigward, jenħtieġ li jiġi ċċarat li l-oġġetti li fihom il-UV–328 u li huma prodotti jew introdotti fis-suq skont eżenzjoni stabbilita fl-Anness I ta’ dak ir-Regolament u li kienu diġà qed jintużaw fid-data ta’ skadenza tal-eżenzjoni rilevanti, jitħallew ikomplu jintużaw wara dik id-data.

(10)

Permezz tal-mekkaniżmu ta’ feedback pubbliku ġiet ipprovduta informazzjoni li ħafna inġenji tal-ajru li għandhom jiġu kkonsenjati lil-linji tal-ajru tal-UE fil-5 snin li ġejjin u l-ispare parts għal inġenji tal-ajru bħal dawn fihom l-UV–328. Sabiex jiġu evitati konsegwenzi serji għal-linji tal-ajru tal-UE, jenħtieġ li tingħata eżenzjoni li tippermetti l-konsenja kontinwa ta’ tali inġenji tal-ajru u spare parts għall-inġenji tal-ajru.

(11)

Biex jissaħħu l-applikazzjoni u l-infurzar fl-Unjoni tal-Artikolu 3(1) tar-Regolament (UE) 2019/1021, jenħtieġ li jiġi stabbilit valur limitu għall-UV–328 li jfeġġ bħala kontaminant traċċa mhux intenzjonat fis-sustanzi, fit-taħlitiet, jew fl-oġġetti. Sabiex il-laboratorji jkunu jistgħu jtejbu l-akkuratezza tal-metodi analitiċi rilevanti u biex tiġi żgurata l-applikazzjoni uniformi u adegwata tagħhom, jenħtieġ li l-limitu tal-kontaminanti traċċa mhux intenzjonat jiġi stabbilit għal 100 mg/kg mad-dħul fis-seħħ ta’ dan ir-Regolament, għal 10 mg/kg sentejn wara d-dħul fis-seħħ, u għal 1 mg/kg 4 snin wara d-dħul fis-seħħ.

(12)

Għaldaqstant, ir-Regolament (UE) 2019/1021 jenħtieġ li jiġi emendat kif xieraq,