(1)

Il-kunċett ta’ “tranżazzjoni” fl-Artikolu 22(1) tar-Regolament (UE) 2023/1114 huwa indifferenti fir-rigward tat-tip ta’ kartieri użati mill-pagatur jew mill-prenditur biex tinbeda jew tiġi riċevuta tranżazzjoni assoċjata mal-użu ta’ token irreferenzjat ma’ assi bħala mezz ta’ skambju. Għaldaqstant, biex tiġi speċifikata l-metodoloġija msemmija fl-Artikolu 22(6) tar-Regolament (UE) 2023/1114, huwa meħtieġ li jitqies li r-rapportar fl-Artikolu 22(1), il-punt (d), ta’ dak ir-Regolament jenħtieġ li jinkludi tranżazzjonijiet bejn kartieri ta’ kustodja kif ukoll tranżazzjonijiet bejn kartiera ta’ kustodja, minn naħa waħda, u kartiera mhux ta’ kustodja jew tipi oħra ta’ indirizzi ta’ reġistru distribwit li mhumiex ikkontrollati minn detentur ta’ token irreferenzjat ma’ assi jew minn fornitur ta’ servizzi tal-kriptoassi, min-naħa l-oħra. It-tranżazzjonijiet bejn kartieri mhux ta’ kustodja, jew bejn kartieri mhux ta’ kustodja u tipi oħra ta’ indirizzi ta’ reġistru distribwit li mhumiex ikkontrollati minn detentur ta’ token irreferenzjat ma’ assi jew minn fornitur ta’ servizzi tal-kriptoassi, jenħtieġ li ma jiġux inklużi fil-kamp ta’ applikazzjoni tar-rapportar fl-Artikolu 22(1), il-punt (d), tar-Regolament (UE) 2023/1114, filwaqt li jitqies li l-emittenti jista’ ma jkollhomx l-informazzjoni meħtieġa biex jirrapportaw tali tranżazzjonijiet skont dawk id-dispożizzjonijiet. Dak jenħtieġ li jkun mingħajr preġudizzju għall-obbligi ta’ rapportar tal-emittenti fir-rigward ta’ tali tranżazzjonijiet skont l-Artikolu 22(1), il-punt (c), tar-Regolament (UE) 2023/1114 u r-Regolament ta’ Implimentazzjoni tal-Kummissjoni (UE) 2024/2902 (2).

(2)

Skont l-Artikolu 22(1), it-tieni subparagrafu, tar-Regolament (UE) 2023/1114, it-tranżazzjonijiet assoċjati mal-użi bħala mezz ta’ skambju huma biss tranżazzjonijiet li jwasslu għal bidla fil-persuna fiżika jew ġuridika intitolata għat-token irreferenzjat ma’ assi. Dan japplika anki meta s-sid benefiċjarju skont it-tifsira tal-punt (6) tal-Artikolu 3 tad-Direttiva (UE) 2015/849 tal-Parlament Ewropew u tal-Kunsill (3) jibqa’ l-istess, u irrispettivament minn jekk dawk it-tranżazzjonijiet jiġux saldati fir-reġistru distribwit (“on-chain”) jew barra mir-reġistru distribwit (“off-chain”). Għaldaqstant, għall-fini tar-rapportar skont l-Artikolu 22(1), il-punt (d), tar-Regolament (UE) 2023/1114, id-data li għandha tiġi rrapportata mill-emittent lill-awtorità kompetenti jenħtieġ li ma tinkludix trasferimenti ta’ token irreferenzjat ma’ assi bejn indirizzi jew kontijiet differenti tal-istess persuna.

(3)

It-tielet subparagrafu tal-Artikolu 22(1) tar-Regolament (UE) 2023/1114 jipprevedi li ċerti tranżazzjonijiet ma għandhomx jitqiesu bħala assoċjati mal-użi ta’ tokens irreferenzjati ma’ assi bħala mezz ta’ skambju. B’mod partikolari, kif iċċarat fil-premessa 61 ta’ dak ir-Regolament, it-tranżazzjonijiet assoċjati mal-użi ta’ tokens irreferenzjati ma’ assi bħala mezz ta’ skambju huma dawk it-tranżazzjonijiet assoċjati ma’ pagamenti ta’ djun inkluż fil-kuntest ta’ tranżazzjonijiet ma’ negozjanti u jenħtieġ li ma jinkludux tranżazzjonijiet assoċjati ma’ funzjonijiet u servizzi ta’ investiment, bħal mezz ta’ skambju għal fondi jew kriptoassi oħra, sakemm ma jkunx hemm evidenza li t-token irreferenzjat ma’ assi jintuża għas-saldu ta’ tranżazzjonijiet fi kriptoassi oħrajn. Għalhekk, huwa meħtieġ li jiġi speċifikat aktar it-tip ta’ tranżazzjonijiet li għandhom jiġu rrapportati skont l-Artikolu 22(1), il-punt (d), tar-Regolament (UE) 2023/1114.

(4)

Jenħtieġ li l-emittent jistma l-għadd u l-valur tat-tranżazzjonijiet assoċjati mal-użi ta’ token irreferenzjat ma’ assi bħala mezz ta’ skambju kif imsemmi fl-Artikolu 22(1), il-punt (d), tar-Regolament (UE) 2023/1114 billi jnaqqas mill-għadd u mill-valur totali tat-tranżazzjonijiet saldati fit-token irreferenzjat ma’ assi, matul it-trimestru rilevanti, it-tranżazzjonijiet fejn it-token irreferenzjat ma’ assi jiġi skambjat ma’ fondi jew ma’ kriptoassi oħra mal-emittent jew ma’ fornitur ta’ servizzi tal-kriptoassi, tranżazzjonijiet fejn it-token irreferenzjat ma’ assi jintuża bħala kollateral għall-fini tat-twettiq ta’ tranżazzjonijiet bi strumenti finanzjarji u tranżazzjonijiet fejn it-token irreferenzjat ma’ assi jintuża għas-saldu ta’ kuntratt derivattiv. Barra minn hekk, l-emittent jista’ jnaqqas ukoll tranżazzjonijiet oħrajn bit-token irreferenzjat ma’ assi meta l-emittent ikollu motivi raġonevoli biex jassumi li l-iskop tat-tranżazzjonijiet rispettivi ma jkunx li jsir ħlas għal oġġetti jew servizzi, dment li l-emittent ikun jista’ juri lill-awtorità kompetenti, fuq talba, li kellu motivi raġonevoli biex jassumi li dawk it-tranżazzjonijiet ma humiex relatati mal-użu tat-token irreferenzjat ma’ assi biex isir ħlas għal oġġetti jew servizzi.

(5)

Jenħtieġ li t-tranżazzjonijiet assoċjati mal-użi ta’ token irreferenzjat ma’ assi bħala mezz ta’ skambju jinkludu wkoll tranżazzjonijiet fejn kriptoassi wieħed jew aktar li jkunu differenti mit-token irreferenzjat ma’ assi jintużaw biex jitħallsu oġġetti u servizzi, dment li dawk it-tranżazzjonijiet jiġu saldati fit-token irreferenzjat ma’ assi. Dak jista’ jinkludi, pereżempju, każijiet fejn token irreferenzjat ma’ assi jintuża bħala assi tranżitorju għas-saldu ta’ tranżazzjonijiet bi kriptoassi differenti mit-token irreferenzjat ma’ assi, fejn l-iskop ta’ dik it-tranżazzjoni jkun li jsir ħlas għal oġġetti jew servizzi, u każijiet fejn token irreferenzjat ma’ assi jintuża bħala assi tranżitorju għas-saldu ta’ tranżazzjoni li tinvolvi żewġ kriptoassi differenti mit-token irreferenzjat ma’ assi, fejn l-għan ta’ dik it-tranżazzjoni jkun li jsir ħlas għal oġġetti jew servizzi. B’kuntrast ma’ dan, tranżazzjonijiet fejn il-partijiet ikunu jixtiequ jinnegozjaw jew jiskambjaw żewġ kriptoassi distinti differenti mit-token irreferenzjat ma’ assi u jaqblu li jsaldaw it-tranżazzjoni bl-użu ta’ token irreferenzjat ma’ assi, mingħajr ma l-iskop tat-tranżazzjoni sottostanti jkun li jsir ħlas għal oġġetti jew servizzi, jenħtieġ li ma jaqgħux fil-kamp ta’ applikazzjoni tar-rapportar fl-Artikolu 22(1), il-punt (d), tar-Regolament (UE) 2023/1114.

(6)

Jenħtieġ li l-emittent jiddetermina għal kull tranżazzjoni fil-kamp ta’ applikazzjoni tal-Artikolu 22(1), il-punt (d), tar-Regolament (UE) 2023/1114, iż-żona tal-munita unika li għaliha jenħtieġ li tiġi rrapportata dik it-tranżazzjoni. It-tranżazzjonijiet imsemmija fl-Artikolu 22(1), il-punt (d), ta’ dak ir-Regolament jenħtieġ li jkopru tranżazzjonijiet fejn kemm il-pagatur kif ukoll il-prenditur jkunu jinsabu fl-istess żona ta’ munita unika fl-Unjoni.

(7)

Sabiex jiġi żgurat li l-għadd medju trimestrali u l-valur aggregat medju tat-tranżazzjonijiet għal kull jum jiġu stmati abbażi ta’ data affidabbli u soda u sabiex tittejjeb il-kwalità tar-rapportar, jenħtieġ li l-emittent ikollu sistemi u proċeduri fis-seħħ li jippermettulu jirrikonċilja d-data riċevuta mill-fornitur ta’ servizzi tal-kriptoassi tal-prenditur jew, fil-każ ta’ tranżazzjonijiet minn kartiera ta’ kustodja għal kartiera mhux ta’ kustodja, id-data riċevuta mill-fornitur ta’ servizzi tal-kriptoassi tal-pagatur, skont l-Artikolu 22(3) tar-Regolament (UE) 2023/1114 u r-Regolament ta’ Implimentazzjoni (UE) 2024/2902 mad-data disponibbli għall-emittent minn sorsi oħra, inkluża, fejn applikabbli, data tranżazzjonali disponibbli fir-reġistru distribwit.

(8)

F’konformità mal-Artikolu 58(3) tar-Regolament (UE) 2023/1114, id-dispożizzjonijiet tal-Artikoli 22 u 23, u l-Artikolu 24(3) ta’ dak ir-Regolament għandhom japplikaw ukoll għat-tokens tal-flus elettroniċi denominati f’munita li mhijiex munita uffiċjali ta’ Stat Membru. Għaldaqstant, jenħtieġ li dan ir-Regolament japplika wkoll mutatis mutandis għal tali tokens tal-flus elettroniċi.

(9)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea.

(10)

L-Awtorità Bankarja Ewropea wettqet konsultazzjonijiet pubbliċi miftuħin dwar l-abbozz ta’ standards tekniċi regolatorji li dan ir-Regolament huwa bbażat fuqu, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (4),

(1)

“żona ta’ munita unika” tfisser pajjiż wieħed jew aktar li għandhom l-istess munita uffiċjali;

(2)

“kartiera ta’ kustodja” tfisser indirizz tal-kartiera tal-kriptoassi fejn fornitur ta’ servizzi tal-kriptoassi jiżgura s-salvagwardja jew il-kontroll, f’isem il-klijent tiegħu, tal-kriptoassi jew tal-mezzi ta’ aċċess għal tali kriptoassi, fejn applikabbli fil-forma ta’ ċwievet kriptografiċi privati;

(3)

“kartiera mhux ta’ kustodja” tfisser indirizz tal-kartiera tal-kriptoassi fejn l-utent jikkontrolla l-mezzi ta’ aċċess għall-kriptoassi, fejn applikabbli fil-forma ta’ ċwievet kriptografiċi privati.