IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2018/848 tal-Parlament Ewropew u tal-Kunsill tat-30 ta’ Mejju 2018 dwar il-produzzjoni organika u t-tikkettar ta’ prodotti organiċi u li jħassar ir-Regolament tal-Kunsill (KE) Nru 834/2007 (1), u b’mod partikolari l-Artikolu 33(6) tiegħu,

Billi:

(1)

L-Anness V tar-Regolament (UE) 2018/848 jistabbilixxi l-mudelli tal-logo tal-produzzjoni organika tal-Unjoni Ewropea li jista’ jintuża, inkluż mudell iswed u abjad. Madankollu, mudell kompletament invertit (in-negattiv) bl-abjad u bl-iswed b’linja esterna ta’ delimitazzjoni madwar il-logo jew mingħajrha mhuwiex awtorizzat b’mod espliċitu. L-Anness V tar-Regolament (UE) 2018/848 għandu jipprovdi b’mod espliċitu li mudell bħal dan huwa awtorizzat ukoll minħabba li jwieġeb għal ħtieġa teknika fuq il-post.

(2)

L-Anness V tar-Regolament (UE) 2018/848 jipprovdi l-kulur għal-logo tal-produzzjoni organika ħadra tal-Unjoni Ewropea bil-kulur ta’ referenza fiċ-ċart tal-kuluri Pantone u fil-mudell tal-kuluri CMYK, fejn jintużaw erba’ pjanċi tal-linka — “cyan”, maġenta, isfar u “key” (iswed). Ir-referenza ekwivalenti fil-mudell tal-kuluri RGB, fejn jintużaw tliet kuluri primarji addittivi, aħmar, aħdar u blu, jenħtieġ li tiġi pprovduta wkoll għal skopijiet diġitali.

(3)

L-Anness V tar-Regolament (UE) 2018/848 jipprevedi li tista’ tintuża linja esterna ta’ delimitazzjoni madwar il-logo meta l-logo jkun fuq sfond li jagħmilha diffiċli biex wieħed jarah. Sabiex jiġi żgurat li l-proporzjonijiet tar-relazzjoni bejn l-għoli u l-wisa’ jiġu rispettati, għandha dejjem tintuża linja esterna tad-delimitazzjoni meta l-logo jkun fuq sfond li jagħmilha diffiċli biex wieħed jarah.

(4)	Għalhekk jenħtieġ li r-Regolament (UE) 2018/848 jiġi emendat skont dan,

ADOTTAT DAN IR-REGOLAMENT: