(1)

Il-metoflutrin ġie inkluż fl-Anness I tad-Direttiva 98/8/KE tal-Parlament Ewropew u tal-Kunsill (2) bħala sustanza attiva għall-użu fil-prodotti bijoċidali tat-tip ta’ prodott 18. Skont l-Artikolu 86 tar-Regolament (UE) Nru 528/2012, ġie għalhekk ikkunsidrat bħala approvat skont dak ir-Regolament sat-30 ta’ April 2021 soġġett għall-kundizzjonijiet stabbiliti fl-Anness I tad-Direttiva 98/8/KE.

(2)

Fil-25 ta’ Ottubru 2019, ġiet sottomessa applikazzjoni f’konformità mal-Artikolu 13(1) tar-Regolament (UE) Nru 528/2012 għat-tiġdid tal-approvazzjoni tal-metoflutrin għall-użu fil-prodotti bijoċidali tat-tip ta’ prodott 18 (“l-applikazzjoni”).

(3)

Fil-15 ta’ Ottubru 2020, l-awtorità kompetenti li tevalwa tal-Irlanda infurmat lill-Kummissjoni li kienet iddeċidiet, skont l-Artikolu 14(1) tar-Regolament (UE) Nru 528/2012, li kienet meħtieġa evalwazzjoni sħiħa tal-applikazzjoni. Skont l-Artikolu 8(1) ta’ dak ir-Regolament, l-awtorità kompetenti li tevalwa għandha twettaq evalwazzjoni sħiħa tal-applikazzjoni fi żmien 365 jum mill-validazzjoni tagħha.

(4)

L-awtorità kompetenti li tevalwa tista’, skont il-każ, tirrikjedi li l-applikant jipprovdi biżżejjed data biex titwettaq l-evalwazzjoni, f’konformità mal-Artikolu 8(2) tar-Regolament (UE) Nru 528/2012. F’dak il-każ, il-perjodu ta’ 365 jum jiġi sospiż għal perjodu li ma jistax jaqbeż il-180 jum b’kollox, sakemm ma tkunx iġġustifikata sospensjoni itwal minħabba n-natura tad-data mitluba jew minħabba ċirkostanzi eċċezzjonali.

(5)

Fi żmien 270 jum minn meta tirċievi rakkomandazzjoni mill-awtorità kompetenti li tevalwa, l-Aġenzija Ewropea għas-Sustanzi Kimiċi (“l-Aġenzija”) għandha tħejji opinjoni dwar it-tiġdid tal-approvazzjoni tas-sustanza attiva u tissottomettiha lill-Kummissjoni f’konformità mal-Artikolu 14(3) tar-Regolament (UE) Nru 528/2012.

(6)

Id-Deċiżjoni ta’ Implimentazzjoni tal-Kummissjoni (UE) 2021/327 (3) ipposponiet id-data tal-iskadenza tal-approvazzjoni tal-metoflurin għall-użu fil-prodotti bijoċidali tat-tip ta’ prodott 18 (“l-approvazzjoni”) għall-31 ta’ Ottubru 2023, sabiex ikun hemm biżżejjed żmien għall-eżami tal-applikazzjoni.

(7)

Id-Deċiżjoni ta’ Implimentazzjoni tal-Kummissjoni (UE) 2023/1086 (4) ipposponiet mill-ġdid id-data tal-iskadenza tal-approvazzjoni għall-31 ta’ Ottubru 2024 minħabba l-ħtieġa li l-awtorità kompetenti li tevalwa tivvaluta d-data addizzjonali mitluba mill-applikant.

(8)

Fit-13 ta’ Frar 2024, l-awtorità kompetenti li tevalwa infurmat lill-Kummissjoni li hija meħtieġa estensjoni addizzjonali tal-approvazzjoni minħabba dewmien fl-evalwazzjoni tal-applikazzjoni. L-awtorità kompetenti li tevalwa ssottomettiet ir-rapport ta’ valutazzjoni tat-tiġdid lill-Aġenzija fis-7 ta’ Marzu 2024.

(9)

Għaldaqstant, għal raġunijiet li ma humiex fil-kontroll tal-applikant, l-approvazzjoni x’aktarx li se tiskadi qabel ma tittieħed deċiżjoni dwar it-tiġdid tagħha. Għalhekk jixraq li d-data tal-iskadenza tal-approvazzjoni tiġi posposta ulterjorment għal perjodu ta’ żmien biżżejjed biex ikun jista’ jiġi ffinalizzat l-eżami tal-applikazzjoni. Wara li tqiesu l-limiti ta’ żmien għat-tħejjija u s-sottomissjoni mill-Aġenzija tal-opinjoni tagħha u ż-żmien meħtieġ biex il-Kummissjoni tiddeċiedi jekk iġġeddidx l-approvazzjoni, jenħtieġ li d-data tal-iskadenza tiġi posposta għat-30 ta’ April 2026.

(10)

Wara l-posponiment ulterjuri tad-data tal-iskadenza tal-approvazzjoni, il-metoflutrin jibqa’ approvat għall-użu fil-prodotti bijoċidali tat-tip ta’ prodott 18 soġġett għall-kundizzjonijiet stabbiliti fl-Anness I tad-Direttiva 98/8/KE,