(1)

Il-kanċellazzjoni ta’ żewġ lanċji ta’ Soyuz miċ-Ċentru Spazjali tal-Guyana f’April u Settembru 2022 u d-dewmien imħabbar ta’ Ariane-6 jagħmluha neċessarju li l-Unjoni ssib alternattivi sabiex terġa’ tibda b’mod urġenti l-illanċjar tas-satelliti Galileo. Dan huwa kruċjali biex jiġi żgurat it-tħaddim xieraq tas-sistema Galileo, li hija parti mill-Programm Spazjali tal-Unjoni stabbilit bir-Regolament (UE) 2021/696 tal-Parlament Ewropew u tal-Kunsill (1).

(2)

L-Unjoni għandha kooperazzjoni fit-tul mal-Istati Uniti dwar in-navigazzjoni bis-satellita. Il-Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ Galileo u tal-GPS u applikazzjonijiet relatati bejn il-Komunità Ewropea u l-Istati Membri tagħha, minn naħa waħda, u l-Istati Uniti tal-Amerka, min-naħa l-oħra (2) daħal fis-seħħ fit-12 ta’ Diċembru 2011.

(3)

Fit-23 ta’ Novembru 2023, il-Kunsill awtorizza l-ftuħ ta’ negozjati f’isem l-Unjoni bil-ħsieb li jiġi konkluż ftehim bejn l-Unjoni u l-Istati Uniti li jistabbilixxi l-proċeduri ta’ sigurtà għall-illanċjar ta’ satelliti Galileo mit-territorju tal-Istati Uniti.

(4)

In-negozjati għall-Ftehim bejn l-Unjoni Ewropea u l-Istati Uniti tal-Amerika li jistabbilixxi proċeduri ta’ sigurtà għall-illanċjar tas-satelliti Galileo mit-territorju tal-Istati Uniti (il-“Ftehim”) tlestew b’suċċess.

(5)

Il-Ftehim bejn l-Unjoni Ewropea u l-Gvern tal-Istati Uniti tal-Amerika dwar is-sigurtà ta’ informazzjoni klassifikata (3) ser japplika għal informazzjoni klassifikata tal-UE pprovduta lill-Istati Uniti.

(6)

Il-Ftehim jenħtieġ li jiġi ffirmat, soġġett għall-konklużjoni tiegħu f’data aktar tard. Minħabba l-importanza tal-fattur taż-żmien fl-illanċjar tas-satelliti Galileo, jenħtieġ li l-Ftehim jiġi applikat fuq bażi proviżorja, sakemm jitlestew il-proċeduri neċessarji għad-dħul fis-seħħ tiegħu,