(1)

Fil-31 ta’ Marzu 2020, il-Kunsill adotta d-Deċiżjoni (PESK) 2020/472, li stabbiliet u nediet operazzjoni militari tal-Unjoni Ewropea fil-Mediterran (EUNAVFOR MED IRINI).

(2)

Skont l-Artikolu 8(2) tad-Deċiżjoni (PESK) 2020/472, il-Kunsill awtorizza lill-Kumitat Politiku u ta’ Sigurtà (KPS) biex jieħu d-deċiżjonijiet dwar il-ħatra tal-Kmandant tal-Forza tal-UE għal EUNAVFOR MED IRINI.

(3)

Fis-26 ta’ Settembru 2023, il-KPS adotta d-Deċiżjoni (PESK) 2023/2078 (2), li taħtar il-Komodor Konstantinos BAKALAKOS bħala Kmandant tal-EUNAVFOR MED IRINI mill-1 ta’ Ottubru 2023.

(4)

Fid-29 ta’ Frar 2024, l-awtoritajiet militari Taljani pproponew il-ħatra tal-Kaptan tal-Forza Navali Armando Paolo SIMI biex jieħu post il-Komodor Konstantinos BAKALAKOS bħala Kmandant tal-Forza tal-UE għal EUNAVFOR MED IRINI. Il-Kmandant tal-Operazzjoni tal-UE appoġġa dik il-ħatra proposta.

(5)

Fis-6 ta’ Marzu 2024, il-Kumitat Militari tal-UE (EUMC) appoġġa r-rakkomandazzjoni magħmula mill-awtoritajiet militari Taljani u qabel li l-Kaptan tal-Forza Navali Armando Paolo SIMI jinħatar bħala Kmandant tal-Forza tal-UE għal EUNAVFOR MED IRINI. Il-President tal-EUMC indika li l-Kaptan tal-Forza Navali Armando Paolo SIMI huwa mistenni li jiġi promoss għall-Kontrammirall mal-ħatra tiegħu bħala Kmandant tal-Forza tal-UE. Il-Kmandant tal-Operazzjoni tal-UE indika li d-data tal-ħatra jenħtieġ li tkun il-5 ta’ April 2024.

(6)

Jenħtieġ li tittieħed deċiżjoni dwar il-ħatra tal-Kontrammirall Armando Paolo SIMI bħala Kmandant tal-Forza tal-UE tal-EUNAVFOR MED IRINI.

(7)

Jenħtieġ li d-Deċiżjoni (PESK) 2023/2078 titħassar,