REGOLAMENT DELEGAT TAL-KUMMISSJONI (UE) 2023/2724

tas-27 ta’ Settembru 2023

li jemenda u li jikkoreġi r-Regolament ta’ Delega (UE) Nru 134/2014 fir-rigward ta’ ċerti referenzi għar-Regolamenti tal-Kummissjoni Ekonomika għall-Ewropa tan-Nazzjonijiet Uniti (NU/KEE) u d-disponibbiltà ta’ ċerti gassijiet puri

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 168/2013 tal-Parlament Ewropew u tal-Kunsill tal-15 ta’ Jannar 2013 dwar l-approvazzjoni u s-sorveljanza tas-suq ta’ vetturi b’żewġ jew tliet roti u kwadriċikli (1), u b’mod partikolari l-Artikolu 23(12) tiegħu,

Billi:

(1)

Sabiex jitqiesu l-aħħar aġġornamenti tar-Regolamenti Nri 9 (2), 41 (3), 63 (4) u 92 (5) tal-Kummissjoni Ekonomika għall-Ewropa tan-Nazzjonijiet Uniti (NU/KEE) dwar l-emissjonijiet tal-ħoss għall-vetturi tal-kategorija L, li jinkludu kamp ta’ applikazzjoni mwessa’ tad-dispożizzjonijiet addizzjonali dwar l-emissjonijiet tal-ħoss biex jirriflettu iktar mill-qrib it-tħaddim urban u extra-urban tal-muturi fid-dinja reali, jeħtieġ li l-Anness I tar-Regolament ta’ Delega tal-Kummissjoni (UE) Nru 134/2014 (6) jiġi emendat biex jinkludi referenza għall-aħħar serje ta’ emendi għal dawk ir-Regolamenti tan-NU/KEE.

(2)

Sabiex jitnaqqas il-piż amministrattiv għall-awtoritajiet nazzjonali u għall-manifatturi, jenħtieġ li d-data tal-applikazzjoni tal-aħħar serje ta’ emendi għar-Regolamenti Nru 9, 41, 63 u 92 tan-NU/KEE tiġi allinjata mal-applikazzjoni tar-rekwiżiti Euro 5+ introdotti fir-Regolament ta’ Implimentazzjoni tal-Kummissjoni (UE) 2020/239 (7).

(3)

Il-gwerra ta’ aggressjoni tar-Russja kontra l-Ukrajna interrompiet il-provvista tal-gass tal-elju, li huwa essenzjali biex jinkiseb l-idroġenu ppurifikat meħtieġ għat-twettiq tal-ittestjar tal-emissjonijiet tal-egżost. Minħabba s-sitwazzjoni attwali u l-fatt li n-nitroġenu diġà jintuża bħala gass inerti alternattiv għall-elju kemm għall-vetturi ħfief għall-passiġġieri kif ukoll għall-vetturi kummerċjali u għall-vetturi tqal, jeħtieġ li n-nitroġenu jiġi inkluż fir-Regolament ta’ Delega (UE) Nru 134/2014 bħala gass fakultattiv fit-taħlita biex jinkiseb l-idroġenu ppurifikat.

(4)

Ir-Regolament (UE) Nru 168/2013 għamel referenza żbaljata għar-regolament tan-NU/KEE dwar ir-rekwiżiti tal-ħoss applikabbli għall-vetturi tal-kategoriji L4e u L6e-A. Dan l-iżball ġie sussegwentement ikkoreġut, iżda l-bidla korrispondenti ma ġietx introdotta fir-Regolament ta’ Delega (UE) Nru 134/2014. Għalhekk, jenħtieġ li t-Tabella 8-1 fl-Anness IX ta’ dak ir-Regolament tiġi kkoreġuta biex tirrifletti l-bidliet li diġà ġew introdotti fir-Regolament (UE) Nru 168/2013.

(5)

Hemm żball f’wieħed mill-fatturi tal-potenza użati fl-ekwazzjoni fl-Appendiċi 2.2, il-punt 3.3, tal-Anness X mar-Regolament Delegat (UE) Nru 134/2014. Din l-ekwazzjoni jenħtieġ li tkun l-istess bħal dik li ssir referenza għaliha fl-Appendiċi 2.1, il-punt 3.3, tal-Anness X ma’ dak ir-Regolament. Għal raġunijiet ta’ ċertezza tad-dritt, dan l-iżball jenħtieġ li jiġi kkoreġut.

(6)	Għalhekk, jenħtieġ li r-Regolament ta’ Delega (UE) Nru 134/2014 jiġi emendat u kkoreġut skont dan,

ADOTTAT DAN IR-REGOLAMENT:

Artikolu 1

Emenda għar-Regolament ta’ Delega (UE) Nru 134/2014

L-Annessi I, II u V tar-Regolament ta’ Delega (UE) Nru 134/2014 huma emendati f’konformità mal-Anness I ta’ dan ir-Regolament.

Artikolu 2

Korrezzjonijiet tar-Regolament ta’ Delega (UE) Nru 134/2014

L-Annessi VI, IX u X tar-Regolament ta’ Delega (UE) Nru 134/2014 huma kkoreġuti f’konformità mal-Anness II ta’ dan ir-Regolament.

Artikolu 3

Dispożizzjonijiet tranżizzjonali

1. Dan ir-Regolament ma għandux jinvalida xi approvazzjoni tat-tip tal-UE mogħtija lil vetturi jew lil sistemi, komponenti jew unitajiet tekniċi separati sa XX ta’ xahar XXXX, sakemm ir-rekwiżiti rilevanti li japplikaw għal tali vetturi, sistemi, komponenti jew unitajiet tekniċi separati ma jkunux ġew modifikati, jew ikunu ġew miżjuda rekwiżiti ġodda b’dan ir-Regolament.

2. L-awtoritajiet tal-approvazzjoni għandhom ikomplu jagħtu estensjonijiet tal-approvazzjonijiet tat-tip tal-UE msemmija fil-paragrafu 1.

Artikolu 4

Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri.

Magħmul fi Brussell, is-27 ta’ Settembru 2023.

Għall-Kummissjoni

Il-President

Ursula VON DER LEYEN

(1) ĠU L 60, 2.3.2013, p. 52.

(2) Ir-Regolament Nru 9 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi li jikkonċernaw l-approvazzjoni ta’ vetturi tal-kategorija L2, L4 u L5 fir-rigward tal-emissjoni tal-ħoss [2018/1704] (ĠU L 290, 16.11.2018, p. 1).

(3) Ir-Regolament Nru 41 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi li jikkonċernaw l-approvazzjoni ta’ muturi fir-rigward tal-istorbju [2023/320] (ĠU L 43, 13.2.2023, p. 14).

(4) Ir-Regolament Nru 63 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi li jikkonċernaw l-approvazzjoni ta’ vetturi tal-kategorija L1 fir-rigward tal-emissjoni tal-ħoss [2018/1705] (ĠU L 290, 16.11.2018, p. 28).

(5) Ir-Regolament Nru 92 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi dwar l-approvazzjoni ta’ sistemi tas-silenzjar tal-egżost ta’ sostituzzjoni mhux oriġinali (NORESS) għall-vetturi tal-kategoriji L1, L2, L3, L4 u L5 fir-rigward tal-emissjoni tal-ħoss [2018/1707] (ĠU L 290 16.11.2018, p. 162).

(6) Ir-Regolament ta’ Delega tal-Kummissjoni (UE) Nru 134/2014 tas-16 ta’ Diċembru 2013 li jissupplimenta r-Regolament (UE) Nru 168/2013 tal-Parlament Ewropew u tal-Kunsill rigward ir-rekwiżiti ta’ prestazzjoni ambjentali u tal-unità ta’ propulsjoni u li jemenda l-Anness V tiegħu (ĠU L 53, 21.2.2014, p. 1).

(7) Ir-Regolament ta’ Implimentazzjoni tal-Kummissjoni (UE) 2020/239 tal-20 ta’ Frar 2020 li jemenda r-Regolament ta’ Implimentazzjoni (UE) Nru 901/2014 fir-rigward tal-adattament tal-mudelli għall-proċeduri tal-approvazzjoni tat-tip għal vetturi b’żewġ jew tliet roti u kwadriċikli għar-rekwiżiti tal-passi ambjentali Euro 5 u Euro 5+ (ĠU L 48, 21.2.2020, p. 6).

ANNESS I

L-Annessi I, II u V mar-Regolament Delegat (UE) Nru 134/2014 huma emendati kif ġej:

l-Anness I huwa sostitwit b’dan li ġej:

“ANNESS I

Lista tar-Regolamenti tan-NU/KEE msemmija fl-Artikolu 4(1)

Regolament NU/KEE Nru	Suġġett	Serje ta’ emendi	Referenza tal-ĠU	Applikabbiltà	Obbligatorju għal tipi ġodda	Obbligatorju għat-tipi eżistenti
9	Emissjonijiet ta’ storbju minn muturi bis-sidecars u t-triċikli	07	ĠU L 290, 16.11.2018, p. 1.	L2e, L4e, L5e, L6e, L7e	1.1.2024	1.1.2025
41	Emissjonijiet ta’ storbju mill-muturi	04	ĠU L 317, 14.11.2012, p. 1	L3e	1.1.2016	1.1.2017
41	Emissjonijiet ta’ storbju mill-muturi	05	ĠU L 43, 13.2.2023, p. 14.	L3e	1.1.2024	1.1.2025
63	Emissjonijiet ta’ storbju mill-mopeds	02	ĠU L 290, 16.11.2018, p. 28.	L1e	1.1.2024	1.1.2025
92	Emissjonijiet ta’ storbju minn sistemi tas-silenzjar tal-egżost ta’ sostituzzjoni mhux oriġinali għall-muturi, għall-mopeds u għall-vetturi bi tliet roti	02	ĠU L 221, 8.9.2023, p. 55		1.1.2024	1.1.2025
Nota ta’ spjegazzjoni: Il-fatt li sistema jew komponent hija/huwa inkluż(a) f’din il-lista ma jfissirx li l-installazzjoni tagħha/tiegħu hija obbligatorja. Madankollu, għal ċerti komponenti, ir-rekwiżiti ta’ installazzjoni obbligatorja huma stabbiliti f’annessi oħra ta’ dan ir-Regolament.

ANNESS II

L-Annessi VI, IX u X mar-Regolament Delegat (UE) Nru 134/2014 huma kkoreġuti kif ġej:

fl-Anness VI, l-Appendiċi 1, il-punt 2.7.6 huwa sostitwit b’dan li ġej:

“2.7.6.

It-tibdil tal-gerijiet jenħtieġ li jsir skont il-gwida stabbilita fil-punt 4.5.5 tal-Anness II. Inkella, tista’ tintuża gwida pprovduta mill-manifattur lill-konsumatur jekk tkun approvata mill-awtorità tal-approvazzjoni.”;

fl-Anness IX, it-Tabella 8-1 hija sostitwita b’dan li ġej:

“Tabella 8-1

Sottokategoriji ta’ vetturi tal-kategorija L u r-regolamenti applikabbli tan-NU/KEE fir-rigward tar-rekwiżiti tal-ħoss

(Sotto)kategorija ta’ vetturi	Isem il-kategorija ta’ vetturi	Proċedura tat-test applikabbli
L1e-A	Rota motorizzata	Regolament Nru 63 tan-NU/KEE
L1e-B	Moped b’żewġ roti vmax ≤ 25 km/h
L1e-B	Moped b’żewġ roti vmax ≤ 45 km/h
L2e	Moped bi tliet roti	Regolament Nru 9 tan-NU/KEE
L3e	Mutur b’żewġ roti Ċilindrata ≤ 80 cm3	Regolament Nru 41 tan-NU/KEE
	Mutur b’żewġ roti 80 cm3 < Ċilindrata ≤ 175 cm3
	Mutur b’żewġ roti Ċilindrata > 175 cm3
L4e	Mutur b’żewġ roti bis-sidecar	Regolament Nru 9 tan-NU/KEE”
L5e-A	Triċiklu
L5e-B	Triċiklu kummerċjali
L6e-A	Quad tat-triq ħafif
L6e-B	Quadri-mobile ħafif
L7e-A	Quad tat-triq tqil
L7e-B	Quad tqil għal kull tip ta’ art
L7e-C	Quadri-mobile tqil

3.	fl-Anness X, l-Appendiċi 2.2, il-punt 3.3, l-ekwazzjoni Ap2.2-2 hija sostitwita b’dan li ġej: “Ekwazzjoni Ap2.2-2: ”.

”;

fl-Anness II, il-punt 5.2.3.6.1 huwa sostitwit b’dan li ġej:

“5.2.3.6.1.

Gassijiet puri

Il-gassijiet puri li ġejjin għandhom ikunu disponibbli, jekk meħtieġ, għall-kalibrazzjoni u għat-tħaddim:

Nitroġenu ppurifikat: (purità: ≤ 1 ppm C1, ≤ 1 ppm CO, ≤ 400 ppm CO2, ≤ 0,1 ppm NO);

Arja sintetika ppurifikata: (purità: ≤ 1 ppm C1, ≤ 1 ppm CO, ≤ 400 ppm CO2, ≤ 0,1 ppm NO); kontenut tal-ossiġenu bejn 18 u 21 fil-mija skont il-volum;

Ossiġenu ppurifikat: (purità > 99,5 fil-mija skont il-vol. tal-O2);

Idroġenu ppurifikat (u taħlita li jkun fiha l-elju jew in-nitroġenu): (purità ≤ 1 ppm C1, ≤ 400 ppm CO2, kontenut tal-idroġenu bejn 39 u 41 fil-mija skont il-volum);

Monossidu tal-karbonju: (purità minima ta’ 99,5 fil-mija);

Propan: (purità minima ta’ 99,5 fil-mija).”;

fl-Anness V, l-Appendiċi 3, il-punt 4.7.1.(b) huwa sostitwit b’dan li ġej:

“(b)	fjuwil gassuż użat mill-analizzatur tal-idrokarburi (40 ± 2 % idroġenu, u bbilanċjar tal-elju jew tan-nitroġenu b’inqas minn 1 ppm ta’ C1 ta’ idrokarburi ekwivalenti, inqas minn 400 ppm ta’ CO2);”