(10)

F’Ġunju 2020, it-trasportaturi tal-ajru ċċertifikati fl-Armenja ġew inklużi fl-Anness A tar-Regolament (KE) Nru 474/2006, permezz tar-Regolament ta’ Implimentazzjoni tal-Kummissjoni (UE) 2020/736 (6).

(11)

Bħala parti mill-attivitajiet ta’ monitoraġġ kontinwu, il-Kummissjoni identifikat li t-trasportatur tal-ajru Aircompany Armenia tbiddel fl-isem u l-isem kummerċjali ġdid tiegħu huwa AIR DILIJANS.

(12)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li, fir-rigward tat-trasportaturi tal-ajru mill-Armenja, il-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni jenħtieġ li tiġi emendata biex it-trasportatur tal-ajru AIR DILIJANS jiġi inkluż fl-Anness A tar-Regolament (KE) Nru 474/2006, u biex Aircompany Armenia jitneħħa minn dak l-Anness.

(13)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fl-Armenja mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(14)

Qatt ma ġew inklużi trasportaturi tal-ajru ċċertifikati fl-Eġittu fl-Anness A jew B tar-Regolament (KE) Nru 474/2006.

(15)

Bħala parti mill-monitoraġġ kontinwu tal-awtorizzazzjonijiet ta’ TCO, maħruġa skont ir-Regolament (UE) Nru 452/2014, u bħala riżultat tal-analiżi tal-ispezzjonijiet fir-rampa mwettqa skont il-programm SAFA f’konformità mar-Regolament (UE) Nru 965/2012, it-trasportaturi tal-ajru ċċertifikati mill-Eġittu wrew għadd dejjem jikber ta’ tħassib dwar is-sikurezza. Ġew innutati sejbiet sinifikanti għal għadd ta’ trasportaturi tal-ajru Eġizzjani b’awtorizzazzjoni ta’ TCO. Barra minn hekk, l-awtorizzazzjoni ta’ TCO ta’ Almasria Universal Airlines ġiet sospiża għat-tieni darba f’perjodu ta’ sentejn għal raġunijiet ta’ sikurezza.

(16)

Fil-21 ta’ Ġunju 2023, il-Kummissjoni indirizzat ittra lill-Awtorità tal-Avjazzjoni Ċivili Eġizzjana (“ECAA”) fejn esprimiet it-tħassib tagħha dwar il-prestazzjoni tas-sikurezza tat-trasportaturi tal-ajru ċċertifikati mill-ECAA, u talbet sett ta’ dokumenti li jiddeskrivu l-organizzazzjoni u li juru l-kapaċitajiet ta’ sorveljanza u l-attivitajiet assoċjati tagħha.

(17)

Fit-13 ta’ Lulju 2023, l-ECAA pprovdiet l-ewwel sett ta’ informazzjoni u dokumentazzjoni dwar l-organizzazzjoni, il-persunal, it-taħriġ tal-ispetturi, il-proċeduri, il-manwali, kif ukoll ħarsa ġenerali lejn l-awditi mwettqa u ppjanati, u r-rappurtar tal-okkorrenzi, għall-perjodu 2020 – 2023.

(18)

Il-valutazzjoni tad-dokumenti, li saret bl-assistenza tal-esperti tal-Aġenzija, żvelat li l-ECAA ma pprovdietx l-informazzjoni kollha mitluba fir-rigward tar-rekwiżiti dwar l-għadd tal-persunal u dwar il-kwalifiki tal-persunal, tar-rekwiżiti tat-taħriġ tal-ispetturi, u tat-taħriġ mwettaq attwalment. Għalhekk, fil-5 ta’ Ottubru 2023 il-Kummissjoni indirizzat it-tieni ittra lill-ECAA għad-dokumenti u l-informazzjoni nieqsa, li sussegwentement waslet fit-13 ta’ Novembru 2023, u li bħalissa qed tiġi rieżaminata u analizzata. Il-Kummissjoni se torganizza laqgħa teknika mal-ECAA fl-ewwel kwart tal-2024.

(19)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fl-Eġittu.

(20)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fl-Eġittu mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(21)

Meta kwalunkwe informazzjoni pertinenti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, jista’ jkun li tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(22)

F’Diċembru 2015, it-trasportatur tal-ajru Iraqi Airways ġie inkluż fl-Anness A tar-Regolament (KE) Nru 474/2006, permezz tar-Regolament ta’ Implimentazzjoni (UE) 2015/2322 (7).

(23)

Fly Baghdad applika għal awtorizzazzjoni ta’ TCO fl-10 ta’ Frar 2022. L-Aġenzija vvalutat l-applikazzjoni għal TCO ta’ Fly Baghdad f’konformità mar-rekwiżiti kif stabbiliti fir-Regolament (UE) Nru 452/2014.

(24)

L-Aġenzija, fit-twettiq tal-valutazzjoni tagħha, qajmet tħassib dwar in-nuqqas ta’ kapaċità ta’ Fly Baghdad li jwieġeb għat-tħassib identifikat dwar is-sikurezza. B’mod partikolari, hija ddeterminat li Fly Baghdad ma kkontrollax u ma żgurax li l-ħinijiet tat-titjir, il-perjodi ta’ xogħol tat-titjir, il-perjodi ta’ xogħol u l-perjodi ta’ mistrieħ ippjanati u mwettqa jkunu fi ħdan il-limitazzjonijiet skont ir-regolamenti preskrittivi dwar il-ġestjoni tal-għeja stabbiliti mill-Iraq.

(25)

L-inabbiltà ta’ Fly Baghdad li jindirizza dan it-tħassib dwar is-sikurezza ġiet evidenzjata mis-sottomissjoni ta’ Pjan ta’ Azzjoni Korrettiva (“CAP”) inaċċettabbli biex jiġi indirizzat it-tħassib identifikat dwar is-sikurezza. Bħala tali, Fly Baghdad ma weriex konformità mal-istandards internazzjonali tas-sikurezza applikabbli assoċjati mat-tħassib identifikat dwar is-sikurezza. Għaldaqstant, l-Aġenzija kkonkludiet li valutazzjoni ulterjuri ma kinitx se twassal għall-ħruġ ta’ awtorizzazzjoni għall-Fly Baghdad, u li għalhekk din ma kinitx tissodisfa r-rekwiżiti applikabbli tar-Regolament (UE) Nru 452/2014. Għaldaqstant, fit-22 ta’ Diċembru 2022, għal raġunijiet ta’ sikurezza, l-Aġenzija rrifjutat l-applikazzjoni ta’ TCO ta’ Fly Baghdad.

(26)

Fil-11 ta’ Frar 2023, Fly Baghdad, f’konformità mal-Artikolu 109 tar-Regolament (UE) 2018/1139 tal-Parlament Ewropew u tal-Kunsill (8), ippreżenta appell kontra d-deċiżjoni tal-Aġenzija tat-22 ta’ Diċembru 2022 li tirrifjuta l-applikazzjoni ta’ Fly Baghdad għal awtorizzazzjoni ta’ TCO. Id-Deċiżjoni tas-7 ta’ Settembru 2023 tal-Bord tal-Appell tal-EASA, stabbilit skont l-Artikolu 105 tar-Regolament (UE) 2018/1139, ċaħdet l-appell ta’ Fly Baghdad bħala infondat, u b’hekk ikkonfermat il-validità tad-deċiżjoni tal-Aġenzija tat-22 ta’ Diċembru 2022.

(27)

Fl-20 ta’ April 2023, bħala parti mill-attivitajiet ta’ monitoraġġ kontinwu tal-Kummissjoni, saret laqgħa teknika li involviet lill-Kummissjoni, lill-Aġenzija, lill-Istati Membri, u lill-Awtorità tal-Avjazzjoni Ċivili tal-Iraq (“ICAA”). Matul dik il-laqgħa, il-Kummissjoni spjegat lill-ICAA li, abbażi tad-deċiżjoni negattiva meħuda mill-Aġenzija rigward l-applikazzjoni ta’ Fly Baghdad għal Awtorizzazzjoni ta’ TCO, it-trasportatur tal-ajru se jgħaddi minn rieżami ulterjuri mill-Kumitat għas-Sikurezza tal-Ajru tal-UE.

(28)

Fit-2 ta’ Ottubru 2023, il-Kummissjoni kitbet lill-ICAA u lill-Fly Baghdad biex tinforma liż-żewġ partijiet li l-każ ta’ Fly Baghdad kien tqiegħed fuq l-aġenda tal-laqgħa tal-14 sas-16 ta’ Novembru 2023 tal-Kumitat għas-Sikurezza tal-Ajru tal-UE, u li kemm l-ICAA kif ukoll Fly Baghdad se jingħataw l-opportunità li jinstemgħu quddiem il-Kumitat għas-Sikurezza tal-Ajru f’konformità mar-Regolament (KE) Nru 2111/2005.

(29)

Fil-15 ta’ Novembru 2023, l-ICAA u Fly Baghdad instemgħu quddiem il-Kumitat tas-Sikurezza tal-Ajru tal-UE. Fost elementi oħra, l-ICAA rrapportat li għandha r-responsabbiltà ta’ sorveljanza għal seba’ detenturi ta’ AOC, inkluż Fly Baghdad, fir-rigward tal-iżgurar tal-applikazzjoni u l-implimentazzjoni tal-istandards internazzjonali tas-sikurezza u tar-Regolamenti tal-Avjazzjoni Ċivili tal-Iraq, f’konformità mal-obbligi tal-Konvenzjoni tal-ICAO.

(30)

L-ICAA pprovdiet ukoll ħarsa ġenerali tal-politika u l-attivitajiet ta’ sorveljanza tagħha, filwaqt li enfasizzat l-awditi rilevanti ppjanati u mwettqa għal Fly Baghdad fl-2023. Barra minn hekk, l-ICAA pprovdiet sommarju tal-azzjonijiet ippjanati mmirati lejn it-tisħiħ tal-kapaċitajiet ta’ sorveljanza tagħha, b’mod partikolari permezz tal-użu ta’ servizzi ta’ esperti fl-oqsma tal-operazzjonijiet tat-titjir, l-ajrunavigabbiltà, u l-liċenzjar tal-persunal. B’attenzjoni speċifika għat-tħassib dwar is-sikurezza identifikat mill-Aġenzija bħala parti mill-proċess ta’ awtorizzazzjoni ta’ TCO tagħha, l-ICAA pprovdiet ħarsa ġenerali lejn kif investigat u qed tiżgura segwitu rilevanti, flimkien ma’ Fly Baghdad, biex jimplimenta l-azzjonijiet korrettivi xierqa.

(31)

Il-preżentazzjoni ta’ Fly Baghdad lill-Kumitat għas-Sikurezza tal-Ajru tal-UE ffukat fuq l-azzjonijiet meħuda minnu biex jindirizza t-tħassib dwar is-sikurezza identifikat mill-Aġenzija bħala parti mill-proċess ta’ awtorizzazzjoni ta’ TCO tagħha. Il-ħarsa ġenerali dettaljata kienet tinkludi informazzjoni relatata mal-analiżi tal-kawżi ewlenin tagħha u l-azzjonijiet konsegwenzjali meħuda f’termini tal-organizzazzjoni, tal-proċeduri, tat-taħriġ u tal-konformità. Filwaqt li esprimiet l-impenn ta’ Fly Baghdad għal titjib kontinwu tas-sikurezza, il-preżentazzjoni li indirizzat it-tħassib individwali dwar is-sikurezza ma pprovdietx biżżejjed evidenza tal-funzjonament dettaljat tas-sistema ta’ ġestjoni tas-sikurezza u tal-kwalità ta’ Fly Baghdad.

(32)

L-informazzjoni pprovduta minn Fly Baghdad ma kinitx biżżejjed fin-natura tagħha biex tindirizza bis-sħiħ it-tħassib dwar is-sikurezza li minnu ġiet konkluża d-deċiżjoni tal-Aġenzija li tirrifjuta l-awtorizzazzjoni ta’ TCO ta’ Fly Baghdad. Is-CAP ippreżentat minn Fly Baghdad, b’mod partikolari l-analiżi tal-kawżi ewlenin assoċjati, ma weriex il-kapaċità tat-trasportatur tal-ajru li jimplimenta miżuri xierqa biex jiżgura l-konformità mal-istandards internazzjonali tas-sikurezza.

(33)

Għalhekk, f’konformità mal-kriterji komuni stabbiliti fl-Anness tar-Regolament (KE) Nru 2111/2005, ġie vvalutat li jenħtieġ li l-lista tat-trasportaturi tal-ajru li huma soġġetti għal restrizzjonijiet operattivi fl-Unjoni tiġi emendata biex tinkludi t-trasportatur tal-ajru Fly Baghdad fl-Anness A tar-Regolament (KE) Nru 474/2006. Barra minn hekk, il-Kummissjoni beħsiebha twettaq żjara ta’ valutazzjoni tal-Unjoni fuq il-post fl-Iraq, bl-għajnuna tal-Aġenzija u bl-appoġġ tal-Istati Membri, biex tivverifika jekk iċ-ċertifikazzjoni u s-sorveljanza tat-trasportaturi tal-ajru min-naħa tas-ICAA humiex qed isiru b’konformità mal-istandards internazzjonali tas-sikurezza rilevanti. Din iż-żjara ta’ valutazzjoni tal-Unjoni fuq il-post se tiffoka fuq l-ICAA u t-trasportaturi tal-ajru magħżula ċċertifikati fl-Iraq.

(34)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fl-Iraq mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(35)

Meta kwalunkwe informazzjoni rilevanti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, jista’ jkun li tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(36)

F’Diċembru 2016, it-trasportaturi tal-ajru ċċertifikati fil-Każakistan tneħħew mill-Anness A tar-Regolament (KE) Nru 474/2006, permezz tar-Regolament ta’ Implimentazzjoni tal-Kummissjoni (UE) 2016/2214 (9), bl-eċċezzjoni ta’ Air Astana, li kien diġà tneħħa mill-Anness B tar-Regolament (KE) Nru 474/2006 fl-2015 permezz tar-Regolament ta’ Implimentazzjoni (UE) 2015/2322.

(37)

Fit-13 ta’ Ottubru 2023, bħala parti mill-attivitajiet ta’ monitoraġġ kontinwu tagħha, l-Kummissjoni, l-Aġenzija, l-Istati Membri u r-rappreżentanti tal-Kumitat tal-Avjazzjoni Ċivili tal-Każakistan (“CAC KZ”) u l-Amministrazzjoni tal-Avjazzjoni tal-Każakistan Joint Stock Company (“AAK”) kellhom laqgħa teknika.

(38)

Matul il-laqgħa, is-CAC KZ u l-AAK irrappurtaw dwar il-progress li sar fl-eżekuzzjoni u t-titjib tas-CAP tagħhom. Fid-19 ta’ Ottubru 2023, u għal darba oħra fis-7 ta’ Novembru 2023, l-AAK ipprovdiet lill-Kummissjoni b’informazzjoni biex tissostanzja l-affermazzjoni tagħha li hija indirizzat l-osservazzjonijiet u r-rakkomandazzjonijiet kollha. Skont id-dikjarazzjoni tagħhom, ħamsa u tletin minn dawn il-kwistjonijiet issa huma kkunsidrati bħala kompletament solvuti, tlieta parzjalment riżolti, u waħda għadha pendenti minħabba l-proċess ta’ implimentazzjoni fit-tul tagħha.

(39)

L-AAK introduċiet l-istruttura organizzattiva ġdida tagħha, allinjata mar-rekwiżiti tal-ICAO, u rrappurtat dwar il-progress li sar fit-tranżizzjoni tagħha biex issir organizzazzjoni li tiffinanzja lilha nnifisha permezz ta’ skema ta’ finanzjament ġdida stabbilita f’Lulju 2023.

(40)

F’termini tal-qafas leġiżlattiv tal-avjazzjoni tal-Każakistan, l-AAK u s-CAC KZ innotaw ir-reviżjoni tal-Liġi dwar l-Avjazzjoni Primarja, li ġiet adottata formalment f’Diċembru 2022. Wara l-adozzjoni ta’ din il-liġi, l-AAK ipproċediet biex tirrevedi erbgħa u erbgħin regolament sekondarju dwar l-avjazzjoni matul l-2023. Fiż-żmien tal-laqgħa, huma kienu involuti b’mod attiv fir-reviżjoni ta’ tlettax-il regolament sekondarju addizzjonali, li, skont id-dikjarazzjonijiet tagħhom, huma mistennija li jiġu aġġornati sa tmiem l-2023. Barra minn hekk, mill-bidu tal-2023 sad-data tal-laqgħa, l-AAK approvat għadd ta’ proċeduri u materjali ta’ gwida kemm ġodda kif ukoll aġġornati, li tnax minnhom irċevew approvazzjoni sħiħa u aktar minn ħmistax minnhom jinsabu fl-istadji finali tal-abbozzar tagħhom. Madankollu, għadu mhux ċar jekk ir-regolamenti sekondarji integrawx biss l-emendi reċenti għal-Liġi tal-Avjazzjoni Primarja, jew jekk ġewx aġġornati wkoll biex jiġu allinjati mal-aħħar emendi għall-Annessi tal-ICAO.

(41)

Filwaqt li matul il-laqgħa teknika ġew deliberati diversi kwistjonijiet u tħassib, ġie maqbul li jkun xieraq li ssir żjara ta’ valutazzjoni tal-Unjoni fuq il-post sabiex tiġi vverifikata l-implimentazzjoni effettiva tal-bidliet indikati. Intlaħaq qbil li tali żjara jenħtieġ li ssir fl-ewwel kwart tal-2024.

(42)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru mill-Każakistan.

(43)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Każakistan mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru kollha, skont ir-Regolament (UE) Nru 965/2012.

(44)

Meta kwalunkwe informazzjoni rilevanti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, jista’ jkun li tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(45)

Qatt ma ġew inklużi trasportaturi tal-ajru ċċertifikati fil-Kenja fl-Anness A jew B tar-Regolament (KE) Nru 474/2006.

(46)

F’Ġunju u Lulju 2022 seħħew għadd ta’ aċċidenti u inċidenti, li kienu jinvolvu inġenji tal-ajru rreġistrati fil-Kenja li joperaw titjiriet lejn ajruporti fis-Sudan t’Isfel. Iċ-ċirkostanzi ta’ dawn l-aċċidenti u inċidenti wasslu lill-Kummissjoni biex tindirizza ittra, fl-20 ta’ Settembru 2022, lill-Awtorità tal-Avjazzjoni Ċivili tal-Kenja (“KCAA”) li titlob informazzjoni dwar l-istatus ta’ dawn l-inġenji tal-ajru fir-Reġistru tal-Inġenji tal-Ajru tal-Kenja, it-trasportaturi tal-ajru u/jew il-lokaturi tagħhom, kif ukoll l-eżitu ta’ kwalunkwe rapport preliminari mill-investigazzjonijiet tal-aċċidenti.

(47)

Bħala segwitu għal din il-korrispondenza, il-Kummissjoni organizzat sejħa mad-Direttur Ġenerali tal-KCAA u s-servizzi tiegħu fil-31 ta’ Mejju 2023 biex tiġi diskussa u ċċarata n-natura tat-talba.

(48)

Fil-21 ta’ Ġunju 2023, il-Kummissjoni indirizzat ittra lill-KCAA u talbet sett ta’ dokumenti li jiddeskrivu l-organizzazzjoni u li juru l-kapaċitajiet ta’ sorveljanza u l-attivitajiet assoċjati tagħha fir-rigward tat-trasportaturi tal-ajru li ċċertifikat. Bħala parti minn din it-talba, il-Kummissjoni talbet speċifikament informazzjoni dwar is-sorveljanza effettiva tat-trasportaturi tal-ajru u tal-inġenji tal-ajru tagħha li joperaw barra mill-Kenja, b’mod partikolari fir-rigward taż-żewġ kumpaniji li l-inġenji tal-ajru tagħhom kienu involuti fl-aċċidenti u l-inċidenti ta’ Ġunju u Lulju 2022.

(49)

Fit-18 ta’ Lulju 2023, il-KCAA pprovdiet l-ewwel sett ta’ informazzjoni u dokumentazzjoni dwar l-organizzazzjoni, il-persunal, it-taħriġ tal-ispetturi, il-proċeduri, il-manwali, kif ukoll l-awditi mwettqa u ppjanati, u r-rappurtar tal-okkorrenzi, għall-perjodu 2020–2023.

(50)

Eżami dettaljat tal-informazzjoni u d-dokumenti riċevuti, li sar bl-għajnuna tal-esperti tal-Aġenzija, żvela li ċerti oqsma jeħtieġu dokumenti addizzjonali u kjarifika ulterjuri f’isem il-KCAA biex ikun hemm fehim ċar. Għalhekk, fil-5 ta’ Ottubru 2023 il-Kummissjoni indirizzat ittra ta’ segwitu fejn talbet id-dokumenti u l-informazzjoni nieqsa.

(51)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fil-Kenja.

(52)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Kenja mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(53)

Meta kwalunkwe informazzjoni pertinenti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, jista’ jkun li tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(54)

F’Diċembru 2013, it-trasportaturi tal-ajru ċċertifikati fin-Nepal ġew inklużi fl-Anness A tar-Regolament (KE) Nru 474/2006, permezz tar-Regolament ta’ Implimentazzjoni tal-Kummissjoni (UE) Nru 1264/2013 (10).

(55)

Bħala segwitu għad-deliberazzjonijiet tal-Kumitat għas-Sikurezza tal-Ajru tal-UE ta’ Mejju 2022, l-esperti mill-Kummissjoni, l-Aġenzija u l-Istati Membri wettqu żjara ta’ valutazzjoni tal-Unjoni fuq il-post fin-Nepal bejn il-11 u l-15 ta’ Settembru 2023 għand l-Awtorità tal-Avjazzjoni Ċivili tan-Nepal (“CAAN”), li kienet tinkludi l-kampjunar ta’ żewġ trasportaturi tal-ajru ċċertifikati fin-Nepal, jiġifieri Shree Airlines u Nepal Airlines.

(56)

Iż-żjara ta’ valutazzjoni ffukat l-attivitajiet tagħha fuq is-CAAN, fid-dawl tar-rwol u r-responsabbiltà tagħha għall-attivitajiet ta’ sorveljanza tat-trasportaturi tal-ajru ċċertifikati fin-Nepal. Il-valutazzjoni żvelat diskrepanzi bejn l-istruttura organizzattiva approvata u d-distribuzzjoni attwali tat-taqsimiet, tad-dipartimenti u tal-persunal. Din l-inkonsistenza tenfasizza l-ħtieġa għal reviżjoni komprensiva tal-istruttura organizzattiva biex tirrifletti b’mod aktar preċiż l-attivitajiet attwali u l-allokazzjoni tal-persunal. Reviżjoni bħal din hija kruċjali biex tiġi żgurata sistema ta’ sorveljanza tas-sikurezza robusta u effettiva li tkun f’konformità kemm mal-obbligi nazzjonali kif ukoll ma’ dawk internazzjonali, u fl-aħħar mill-aħħar ittejjeb l-effiċjenza operazzjonali u l-istandards tas-sikurezza tat-trasportaturi tal-ajru fin-Nepal.

(57)

Il-prattiki attwali tas-CAAN fir-rekwiżiti tal-Liċenzjar tal-Persunal u fis-sistemi tal-eżaminaturi tat-titjir juru nuqqas ta’ konformità mal-istandards internazzjonali tas-sikurezza, u għalhekk jeħtieġu l-allinjament urġenti tar-regolamenti tagħha ma’ tali standards, speċjalment fir-rigward tad-deżinjazzjonijiet tal-eżaminaturi fil-qasam tal-liċenzjar tal-ekwipaġġ tat-titjira. B’mod partikolari, in-nuqqas ta’ qafas robust għad-deżinjazzjoni u l-monitoraġġ tal-eżaminaturi u tal-għalliema tat-titjir fil-kuntest tal-operazzjonijiet bil-ħelikopters, jenfasizza l-ħtieġa li s-CAAN tistabbilixxi kriterji ċari, privileġġi, u mekkaniżmi ta’ sorveljanza effettivi għall-bdoti ta’ kontroll u eżaminaturi deżinjati. L-implimentazzjoni ta’ dawn il-miżuri se ttejjeb b’mod sinifikanti l-istandards tas-sikurezza u tal-kompetenza fis-settur tal-avjazzjoni fin-Nepal, filwaqt li tiżgura sorveljanza aktar konsistenti u affidabbli tal-professjonisti tal-avjazzjoni.

(58)

Barra minn hekk, il-valutazzjonijiet identifikaw diskrepanza fil-monitoraġġ u fid-dokumentazzjoni effettivi tat-taħriġ għar-rwoli tal-Ispettur tal-Liċenzjar tal-Persunal u tal-assistenti spetturi tas-CAAN.

(59)

Il-valutazzjoni nnutat ukoll diskrepanzi sinifikanti fid-Diviżjoni tal-Operazzjonijiet tat-Titjir tas-CAAN, b’mod partikolari fir-rigward tas-sorveljanza tal-għeja relatata mal-limitazzjonijiet tal-perjodi ta’ xogħol u l-iżgurar ta’ kontrolli komprensivi tal-konformità matul il-proċess tal-approvazzjoni. Dawn in-nuqqasijiet jindikaw ħtieġa urġenti li s-CAAN timplimenta protokolli robusti ta’ ġestjoni tal-għeja u ssaħħaħ il-proċessi ta’ evalwazzjoni teknika u ta’ approvazzjoni tagħhom. Barra minn hekk, in-nuqqas ta’ taħriġ u kwalifiki speċifiċi fost l-ispetturi, b’mod partikolari fir-rigward tal-klassifikazzjonijiet tat-tip għall-inġenji tal-ajru operati mit-trasportaturi tal-ajru, iqajjem tħassib dwar l-effettività tal-attivitajiet ta’ ċertifikazzjoni u sorveljanza tas-CAAN.

(60)

Il-valutazzjoni identifikat ukoll kwistjoni sistemika fl-approċċ tad-Diviżjoni tal-Operazzjonijiet tat-Titjir għar-rieżami, l-evalwazzjoni u l-validazzjoni tad-dokumentazzjoni dwar is-sikurezza tat-titjiriet u l-approvazzjonijiet speċifiċi tat-trasportaturi tal-ajru. Id-diskrepanzi osservati, bħan-nuqqasijiet ta’ konformità fir-rekwiżiti tas-Sistema għall-Prevenzjoni tal-Kolliżjonijiet tat-Traffiku (“TCAS”), il-kalkoli tal-fjuwil, u s-sorveljanza tal-limitazzjonijiet tal-ħin tat-titjir, għandhom impatt sinifikanti fuq is-sikurezza tat-titjiriet.

(61)

Id-Diviżjoni tal-Ispezzjoni tal-Ajrunavigabbiltà turi nuqqas ta’ maturità f’aspetti kritiċi bħall-kontroll tal-awditjar, il-kompletezza tal-programm ta’ taħriġ, u d-diliġenza tar-rieżami tad-dokumenti. Is-CAAN trid tindirizza dawn il-kwistjonijiet billi ssaħħaħ il-programm ta’ taħriġ u tadotta approċċ tal-awditjar aktar rigoruż, u jenħtieġ li tagħmel ħilitha għal tranżizzjoni lejn sistemi ta’ żamma tar-rekords diġitali aktar effiċjenti.

(62)

Minkejja l-oqsma identifikati għal titjib, id-diskussjonijiet mal-persunal tal-CAAN jindikaw impenn qawwi biex tissaħħaħ is-sistema ta’ sorveljanza tas-sikurezza tal-avjazzjoni tan-Nepal. Huwa kruċjali li s-CAAN tkompli trawwem dan l-impenn, tiżgura l-allinjament mal-istandards internazzjonali tas-sikurezza, u tindirizza b’mod effettiv l-isfidi operazzjonali u tas-sikurezza identifikati matul il-valutazzjoni.

(63)

Fit-13 ta’ Settembru 2023, Shree Airlines, stabbilit fl-1999, kien soġġett għal żjara ddedikata mit-tim ta’ valutazzjoni tal-Unjoni.

(64)

Shree Airlines jenħtieġ li jtejjeb b’mod sinifikanti s-Sistema ta’ Ġestjoni tas-Sikurezza (“SMS”) u l-politiki operazzjonali tiegħu biex ikun konformi mal-istandards internazzjonali tas-sikurezza u mal-leġiżlazzjoni tan-Nepal. Dan jinkludi r-reviżjoni tal-Manwal tal-Ġestjoni tas-Sikurezza (“SMM”), il-listi ta’ kontroll tal-awditjar, u l-indirizzar tan-nuqqasijiet fid-dokumentazzjoni u fil-proċeduri tal-manutenzjoni tiegħu, bħall-ineżattezzi fl-ordnijiet tax-xogħol u fil-kalibrazzjoni tat-tagħmir.

(65)

Il-kwistjonijiet operazzjonali u ta’ konformità tas-sikurezza ta’ Shree Airlines jestendu għal aspetti tal-ippjanar tat-titjiriet, il-ġestjoni tal-għeja tal-ekwipaġġ, u l-aderenza mar-rekwiżiti regolatorji fil-proċeduri tat-tneħħija tas-silġ, ir-rekwiżiti tat-TCAS, u l-Lista tat-Tagħmir Minimu għal tipi speċifiċi ta’ inġenji tal-ajru.

(66)

Barra minn hekk, in-nuqqasijiet osservati fil-ġestjoni tal-validità u l-kwalità taċ-ċertifikati tat-taħriġ, flimkien ma’ feedback mhux ċar jew skorrett tal-għalliema, jindikaw il-ħtieġa għal sistema aktar robusta biex jiġu mmonitorjati u mtejba l-kompetenzi tal-ekwipaġġ u l-effikaċja tat-taħriġ.

(67)

Fl-14 ta’ Settembru 2023, Nepal Airlines, stabbilit fl-1958, kien soġġett għal żjara ddedikata mit-tim ta’ valutazzjoni tal-Unjoni.

(68)

Il-valutazzjoni ta’ Nepal Airlines enfasizzat in-nuqqasijiet fl-SMS u fil-konformità operazzjonali tiegħu. Il-kwistjonijiet jinkludu l-identifikazzjoni u l-ġestjoni inadegwati tal-perikli, sejbiet ripetittivi f’awditi annwali, u listi ta’ kontroll tal-awditjar tal-kwalità li mhumiex dettaljati biżżejjed. Barra minn hekk, hemm tħassib dwar l-effettività tad-dipartiment tal-Assigurazzjoni tal-Kwalità, in-nuqqas ta’ reġistru komprensiv tal-perikli fl-Organizzazzjoni tal-Ġestjoni tal-Ajrunavigabbiltà Kontinwa u l-Organizzazzjoni tal-Manutenzjoni Approvata, u n-nuqqasijiet fl-analiżi tal-forza tax-xogħol.

(69)

Iż-żjara wriet l-isfidi għan-Nepal Airlines fiż-żamma tas-sorveljanza operazzjonali, bi kwistjonijiet evidenti f’diversi oqsma inklużi l-kompetenzi tat-taħriġ, il-limitazzjonijiet tal-ħin tat-titjir, il-ġestjoni tad-dokumenti, u l-monitoraġġ tal-konformità.

(70)

L-osservazzjonijiet li tqajmu matul iż-żjara ta’ valutazzjoni jissuġġerixxu li n-Nepal Airlines jeħtieġ reviżjoni sostanzjali tas-sistemi u l-proċessi tiegħu biex jikseb il-maturità meħtieġa fl-SMS tiegħu u jiżgura fehim u ġestjoni robusti tal-approvazzjonijiet tal-ajrunavigabbiltà u tas-sorveljanza operattiva tiegħu.

(71)

Abbażi tal-eżitu taż-żjara ta’ valutazzjoni tal-Unjoni fuq il-post, il-Kummissjoni stiednet lis-CAAN u lit-trasportaturi tal-ajru Shree Airlines u Nepal Airlines għal seduta ta’ smigħ quddiem il-Kumitat għas-Sikurezza tal-Ajru tal-UE fil-15 ta’ Novembru 2023.

(72)

Is-CAAN ippreżentat sommarju lill-Kumitat għas-Sikurezza tal-Ajru tal-UE li kien jinkludi ħarsa ġenerali lejn it-trasportaturi tal-ajru ċċertifikati fin-Nepal, l-għadd ta’ inġenji tal-ajru rreġistrati fin-Nepal, l-aħħar eżiti mill-awditu tal-Approċċ ta’ Monitoraġġ Kontinwu (CMA) tal-USOAP tal-ICAO, u l-progress tan-Nepal fit-titjib tal-punteġġi ta’ implimentazzjoni tal-USOAP tal-ICAO.

(73)

Rigward ir-rapport ta’ valutazzjoni tal-UE, is-CAAN tat dettalji dwar l-azzjonijiet meħuda immedjatament wara ż-żjara ta’ valutazzjoni tal-Unjoni fuq il-post. Dan kien jinkludi r-ristrutturar organizzattiv u l-iżvilupp ta’ Manwal ta’ Ġestjoni Integrata. L-azzjonijiet ewlenin enfasizzati kienu l-inklużjoni ta’ funzjoni ta’ monitoraġġ tal-konformità fid-dipartiment tal-awditjar u l-bidu tal-abbozzar ta’ Manwal tas-Sistema ta’ Ġestjoni tal-Kwalità.

(74)

Il-Kumitat għas-Sikurezza tal-Ajru tal-UE ġie infurmat dwar is-CAP tas-CAAN biex jindirizza l-kwistjonijiet li ġew innutati matul iż-żjara ta’ valutazzjoni tal-Unjoni fuq il-post. Il-CAAN wettqet analiżi tal-kawżi ewlenin għal kull osservazzjoni, b’azzjonijiet korrettivi immedjati u fit-tul. Madankollu, ma kienx ċar jekk il-prinċipji tal-analiżi fil-fond tal-kawżi ewlenin ġewx applikati b’mod konsistenti.

(75)

Il-Kummissjoni u l-Kumitat għas-Sikurezza tal-Ajru tal-UE rrikonoxxew u ħeġġew l-isforzi tas-CAAN, filwaqt li nnotaw l-importanza tal-appoġġ kontinwu tal-gvern tan-Nepal. Huma tennew l-impenn tagħhom li jkomplu jappoġġaw lis-CAAN fl-isforzi tagħha biex ittejjeb il-kapaċitajiet tagħha ta’ sorveljanza tas-sikurezza, filwaqt li nnotaw id-dedikazzjoni tad-Direttur Ġenerali għal tali żviluppi ulterjuri tas-CAAN.

(76)

Minkejja dawn l-isforzi, huwa meqjus li l-kapaċità tas-CAAN li tinforza l-istandards internazzjonali tas-sikurezza u tiżgura operazzjonijiet konformi mit-trasportaturi tal-ajru ċċertifikati tagħha mhijiex biżżejjed. L-evidenza, inklużi l-osservazzjonijiet miż-żjara ta’ valutazzjoni tal-Unjoni fuq il-post, tissuġġerixxi li l-kapaċitajiet tas-CAAN biex tissorvelja l-attivitajiet tal-avjazzjoni fin-Nepal mhumiex konformi mal-istandards internazzjonali minimi tas-sikurezza applikabbli. Dan wera l-ħtieġa għal aktar titjib fil-kapaċitajiet ta’ sorveljanza tas-CAAN, fil-ġestjoni tal-persunal, fit-taħriġ tal-persunal u fil-proċessi ta’ ċertifikazzjoni.

(77)

Shree Airlines ippreżenta ħarsa ġenerali komprensiva, li tagħti dettalji dwar il-flotta, ir-riżorsi u l-faċilitajiet attwali tiegħu. Huma kkondividew ukoll l-azzjonijiet korrettivi implimentati wara l-osservazzjonijiet miż-żjara ta’ valutazzjoni tal-Unjoni fuq il-post. Dan kien jinkludi l-eżiti tal-analiżi tal-kawżi ewlenin għal kull osservazzjoni li saret mit-tim ta’ valutazzjoni tal-Unjoni. Barra minn hekk, Shree Airlines iddeskriva s-CAP tiegħu li ġiet żviluppata minn dawn l-analiżijiet, filwaqt li speċifika kemm il-pjanijiet fuq terminu qasir kif ukoll dawk fit-tul.

(78)

L-informazzjoni pprovduta minn Shree Airlines naqset milli tindirizza bis-sħiħ it-tħassib dwar is-sikurezza enfasizzat matul iż-żjara ta’ valutazzjoni tal-Unjoni fuq il-post. Is-CAP ippreżentat minn Shree Airlines, b’mod partikolari l-analiżi tal-kawżi ewlenin assoċjati, ma weriet il-kapaċità tat-trasportatur tal-ajru li jimplimenta miżuri xierqa biex jiżgura l-konformità mal-istandards internazzjonali tas-sikurezza.

(79)

In-Nepal Airlines ta preżentazzjoni fil-fond li turi l-istorja tiegħu bħala trasportatur nazzjonali tal-bandiera tan-Nepal, flimkien mal-kapaċitajiet tal-flotta u tar-riżorsi tiegħu. Il-preżentazzjoni kopriet b’mod komprensiv l-azzjonijiet li ħa b’reazzjoni għall-osservazzjonijiet taż-żjara ta’ valutazzjoni tal-Unjoni fuq il-post. It-trasportatur tal-ajru ddettalja l-eżiti tal-analiżi tal-kawżi ewlenin imwettqa għal kull osservazzjoni u rakkomandazzjoni magħmula mit-tim ta’ valutazzjoni tal-Unjoni. Barra minn hekk, it-trasportatur tal-ajru ppreżenta s-CAP tiegħu.

(80)

Minkejja dawn l-isforzi, l-informazzjoni mibgħuta min-Nepal Airlines, filwaqt li kienet estensiva, ma ssodisfatx ir-rekwiżiti meħtieġa biex jiġu solvuti bis-sħiħ il-kwistjonijiet tas-sikurezza li jirriżultaw miż-żjara ta’ valutazzjoni tal-Unjoni fuq il-post. Is-CAP ippreżentat minn Nepal Airlines, b’mod partikolari l-analiżi tal-kawżi ewlenin assoċjati, ma weriet il-kapaċità tat-trasportatur tal-ajru li jimplimenta miżuri xierqa biex jiżgura l-konformità mal-istandards internazzjonali tas-sikurezza.

(81)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fin-Nepal.

(82)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fin-Nepal mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(83)

F’Marzu 2007, il-Pakistan International Airlines ġie inkluż fl-Anness B tar-Regolament (KE) Nru 474/2006 permezz tar-Regolament tal-Kummissjoni (KE) Nru 235/2007 (11) u sussegwentement tneħħa minn dak l-Anness f’Novembru 2007 permezz tar-Regolament tal-Kummissjoni (KE) Nru 1400/2007 (12).

(84)

Fl-1 ta’ Lulju 2020, il-Kummissjoni fetħet konsultazzjonijiet mal-Awtorità tal-Avjazzjoni Ċivili tal-Pakistan (“PCAA”) skont l-Artikolu 3(2) tar-Regolament tal-Kummissjoni (KE) Nru 473/2006 (13), abbażi tas-sospensjonijiet tal-awtorizzazzjoni ta’ TCO tat-trasportaturi tal-ajru Pakistan International Airlines u Vision Air, u ta’ dikjarazzjoni magħmula mill-Ministru tat-Trasport tal-Pakistan dwar liċenzji ta’ bdoti miksuba b’mezzi frodulenti fil-Pakistan.

(85)

F’dak il-kuntest, il-Kummissjoni, f’kooperazzjoni mal-Aġenzija u l-Istati Membri, organizzat għadd ta’ laqgħat tekniċi u ta’ informazzjoni mal-PCAA. Dawk id-diskussjonijiet iffukaw fuq l-isforzi mwettqa mill-PCAA fl-indirizzar tat-tħassib dwar is-sorveljanza tas-sikurezza identifikat mill-Kummissjoni u mill-esperti tal-Aġenzija, kif ukoll dak identifikat mill-ICAO matul iż-żjara tagħha fl-ambitu tal-USOAP li saret bejn id-29 ta’ Novembru u l-10 ta’ Diċembru 2021.

(86)

Fit-23 ta’ Awwissu 2023, il-Kummissjoni, l-Aġenzija, l-Istati Membri u r-rappreżentanti tal-PCAA kellhom laqgħa teknika oħra, li l-għan tagħha kien li l-PCAA tinforma dwar l-iżviluppi li seħħew mill-aħħar laqgħa teknika tal-25 ta’ Ottubru 2022 u turihom. Ta’ interess partikolari kienet l-informazzjoni relatata mal-adozzjoni tal-Ordinanza tal-Awtorità tal-Avjazzjoni Ċivili (2023), l-istatus tas-CAP tal-USOAP tal-ICAO, u l-azzjonijiet biex jiġi indirizzat it-tħassib tal-UE espress fi skambji preċedenti.

(87)

Abbażi ta’ dan, u b’riflessjoni tal-fehmiet ta’ Novembru 2022 tal-Kumitat għas-Sikurezza tal-Ajru tal-UE, il-Kummissjoni infurmat lill-PCAA li se twettaq, flimkien mal-Aġenzija u mal-Istati Membri, żjara ta’ valutazzjoni tal-Unjoni fuq il-post fil-Pakistan bejn is-27 u t-30 ta’ Novembru 2023 biex tivvaluta s-sitwazzjoni tal-PCAA f’termini tat-twettiq ta’ sorveljanza effettiva tas-sikurezza.

(88)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fil-Pakistan.

(89)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Pakistan mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(90)

Meta kwalunkwe informazzjoni rilevanti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, tista’ tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(91)

Għalhekk, ir-Regolament (KE) Nru 474/2006 jenħtieġ li jiġi emendat skont dan.

(92)

Minħabba l-implikazzjonijiet tas-sikurezza, l-Artikoli 5 u 6 tar-Regolament (KE) Nru 2111/2005 jagħrfu l-bżonn li jittieħdu deċiżjonijiet malajr u, meta jkun xieraq, b’urġenza. Għaldaqstant, huwa essenzjali li, sabiex jiġu mħarsa l-informazzjoni sensittiva kif ukoll il-pubbliku li jivvjaġġa, kwalunkwe deċiżjoni fil-kuntest tal-aġġornament tal-lista tat-trasportaturi tal-ajru li huma soġġetti għal projbizzjoni jew restrizzjoni fuq l-operat fl-Unjoni tiġi ppubblikata u tidħol fis-seħħ minnufih wara l-adozzjoni tagħha.

(93)

Il-miżuri previsti f’dan ir-Regolament huma skont l-opinjoni tal-Kumitat għas-Sikurezza tal-Ajru tal-UE stabbilit skont l-Artikolu 15 tar-Regolament (KE) Nru 2111/2005,