(1)

Ir-Regolament ta’ Implimentazzjoni tal-Kummissjoni (UE) 2019/2072 (2) jistabbilixxi kundizzjonijiet uniformi fir-rigward tal-miżuri protettivi kontra l-pesti tal-pjanti. L-Annessi III, IX u X ta’ dak ir-Regolament ta’ Implimentazzjoni jistabbilixxu l-lista taż-żoni protetti u tal-pesti ta’ kwarantina fiż-żoni protetti rispettivi, il-lista ta’ pjanti, prodotti mill-pjanti u oġġetti oħra, li joriġinaw minn pajjiżi terzi jew fit-territorju tal-Unjoni, li l-introduzzjoni tagħhom f’ċerti żoni protetti hija pprojbita, u l-lista ta’ pjanti, prodotti mill-pjanti u oġġetti oħra li għandhom jiġu introdotti fiż-żoni protetti jew jinġarru fihom u r-rekwiżiti speċjali korrispondenti għaż-żoni protetti.

(2)

Ċerti partijiet tat-territorju tas-Slovenja ġew rikonoxxuti bħala żona protetta fir-rigward tal-Erwinia amylovora (Burrill) Winslow et al. Is-Slovenja issa talbet, f’konformità mal-Artikolu 35(2) tar-Regolament (UE) 2016/2031, li jiġi rtirat l-istatus tat-territorju kollu tagħha bħala żona protetta fir-rigward ta’ dak il-pest ta’ kwarantina f’żona protetta. Għalhekk jenħtieġ li t-territorju kollu tas-Slovenja ma jibqax jiġi rikonoxxut bħala żona protetta fir-rigward tal-Erwinia amylovora (Burrill) Winslow et al., u l-entrata rilevanti fl-Anness III tar-Regolament ta’ Implimentazzjoni (UE) 2019/2072 jenħtieġ li titneħħa.

(3)

Fil-każ tal-Italja, ċerti partijiet tat-territorju tal-Lombardia ġew rikonoxxuti bħala żona protetti fir-rigward tal-Erwinia amylovora (Burr.) Winsl. et al. Fl-2023, L-Italja ressqet informazzjoni li turi li l-Erwinia amylovora (Burr.) Winsl. et al. issa hija stabbilita fil-komuni ta’ Fara Gera d’Adda u Pontirolo Nuovo fil-provinċja ta’ Bergamo, fil-komun ta’ Montevecchia fil-provinċja ta’ Lecco u fil-komuni ta’ Ceriano Laghetto u Cogliate fil-provinċja ta’ Monza u Brianza. Għaldaqstant, jenħtieġ li dawk iż-żoni ma jibqgħux rikonoxxuti bħala parti miż-żona protetta fir-rigward tal-Erwinia amylovora (Burr.) Winsl. et al. fil-Lombardia u jenħtieġ li jitħassar mill-entrata relevanti fit-tabella fl-Anness III tar-Regolament ta’ Implimentazzjoni (UE) 2019/2072.

(4)

Barra minn hekk, l-Italja talbet li l-komuni ta’ Acquanegra Sul Chiese, Asola, Bozzolo, Canneto sull’Oglio, Casalromano, Marcaria, Mariana Mantovana, Redondesco, Rivarolo Mantovano u San Martino dall’Argine fil-provinċja ta’ Mantova fil-Lombardia jiġu rikonoxxuti bħala żona protetta fir-rigward tal-Erwinia amylovora (Burrill) Winslow et al. Abbażi ta’ stħarriġiet li saru fl-2020, fl-2021 u fl-2022, l-Italja ressqet evidenza li l-Erwinia amylovora (Burrill) Winslow et al. ma tinstabx f’dawk it-territorji, minkejja l-eżistenza ta’ kundizzjonijiet favorevoli għad-dħul, l-istabbiliment u t-tixrid tagħha. Madankollu, jenħtieġ li jsiru aktar stħarriġiet biex jiġi kkonfermat in-nuqqas kontinwu ta’ dak il-pest ta’ kwarantina fiż-żoni protetti f’dawk il-komuni. Għaldaqstant, il-komuni ta’ Acquanegra Sul Chiese, Asola, Bozzolo, Canneto sull’Oglio, Casalromano, Marcaria, Mariana Mantovana, Redondesco, Rivarolo Mantovano u San Martino dall’Argine fil-provinċja ta’ Mantova fil-Lombardia jenħtieġ li jiġu rikonoxxuti bħala żona protetta temporanja fir-rigwrad tal-Erwinia amylovora (Burrill) Winslow et al. sat-30 ta’ April 2026.

(5)

Ċerti partijiet tat-territorju tas-Slovakkja ġew rikonoxxuti bħala żona protetta fir-rigward tal-Erwinia amylovora (Burrill) Winslow et al. Issa, is-Slovakkja talbet, f’konformità mal-Artikolu 35(2) tar-Regolament (UE) 2016/2031, li jiġi rtirat l-istatus tat-territorju kollu tagħha bħala żona protetta fir-rigward ta’ dak il-pest ta’ kwarantina f’żona protetta. Għaldaqstant, jenħtieġ li t-territorju kollu tas-Slovakkja ma jibqax jiġi rikonoxxut bħala żona protetta fir-rigward tal-Erwinia amylovora (Burrill) Winslow et al., u l-entrata rilevanti fl-Anness III tar-Regolament ta’ Implimentazzjoni (UE) 2019/2072 jenħtieġ li titneħħa.

(6)

Ir-Renju Unit fir-rigward tal-Irlanda ta’ Fuq (3) ġie rikonoxxut bħala żona protetta temoranja fir-rigward tal-Xanthomonas arboricola pv. pruni (Smith) Vauterin et al., Liriomyza huidobrensis (Blanchard), Liriomyza trifolii (Burgess) u Thaumetopoea processionea L. sat-30 ta’ April 2023. Abbażi tar-riżultati tal-istħarriġ ipprovduti mir-Renju Unit fir-rigward tal-Irlanda ta’ Fuq fl-2020, fl-2021 u fl-2022, jidher li l-Irlanda ta’ Fuq għadha ħielsa minn dawk il-pesti ta’ kwarantina f’żona protetta. Għaldaqstant, jenħtieġ li jissokta mingħajr limitu ta’ żmien ir-rikonoxximent tar-Renju Unit fir-rigward tal-Irlanda ta’ Fuq bħala żona protetta fir-rigward tal-Xanthomonas arboricola pv. pruni (Smith) Vauterin et al., Liriomyza huidobrensis (Blanchard), Liriomyza trifolii (Burgess) u Thaumetopoea processionea L.

(7)

It-territorju taċ-Ċekja ġie rikonoxxut bħala żona protetta fir-rigward tal-Cryphonectria parasitica (Murrill) Barr. Iċ-Ċekja issa talbet, f’konformità mal-Artikolu 35(2) tar-Regolament (UE) 2016/2031, li jiġi rtirat l-istatus tat-territorju tagħha bħala żona protetta fir-rigward ta’ dak il-pest ta’ kwarantina f’żona protetta. Għaldaqstant, jenħtieġ li ċ-Ċekja ma tibqax tiġi rikonoxxuta bħala żona protetta fir-rigward tal-Cryphonectria parasitica (Murrill) Barr., u jenħtieġ li titneħħa l-entrata rilevanti fl-Anness III tar-Regolament ta’ Implimentazzjoni (UE) 2019/2072.

(8)

L-Irlanda ġiet rikonoxxuta bħala żona protetta temporanja, fir-rigward tat-Thaumetopoea pityocampa Denis & Schiffermüller, sat-30 ta’ April 2023. Abbażi tar-riżultati tal-istħarriġ ipprovduti minn dak l-Istat Membru fl-2020, fl-2021 u fl-2022, jidher li għadha ħielsa minn dak il-pest ta’ kwarantina f’żona protetta. Għaldaqstant, jenħtieġ li r-rikonoxximent tal-Irlanda bħala żona protetta fir-rigward tat-Thaumetopoea pityocampa Denis & Schiffermüller jitkompla mingħajr limitu ta’ żmien.

(9)

Għall-finijiet ta’ konsistenza mal-emendi tal-Anness III tar-Regolament ta’ Implimentazzjoni (UE) 2019/2072, li jelenka ż-żoni protetti u l-pesti ta’ kwarantina fiż-żoni protetti rispettivi, jenħtieġ li jsiru l-bidliet korrispondenti fl-Annessi IX u X ta’ dak ir-Regolament ta’ Implimentazzjoni, li jelenkaw il-pjanti, il-prodotti mill-pjanti u oġġetti oħra li l-introduzzjoni tagħhom f’ċerti żoni protetti hija pprojbita u l-pjanti, il-prodotti mill-pjanti u oġġetti oħra, li jkunu se jiġu introdotti f’żoni protetti, jew jinġarru fihom skont rekwiżiti speċjali, rispettivament.

(10)

Il-Canton ta’ Valais fl-Iżvizzera ġie rikonoxxut bħala żona ħielsa mill-Erwinia amylovora (Burrill) Winslow et al., u bħala tali ssemma bħala oriġini possibbli għall-esportazzjoni lejn iż-żoni protetti rispettivi fl-Unjoni ta’ kaxxi tan-naħal u pjanti ospitanti tal-Erwinia amylovora (Burrill) Winslow et al. fit-tabella, il-punti 3 u 9, tal-Anness X tar-Regolament ta’ Implimentazzjoni (UE) 2019/2072. L-Iżvizzera issa infurmat lill-Kummissjoni li kienet irtirat l-istatus tal-Canton ta’ Valais bħala żona ħielsa mill-Erwinia amylovora (Burrill) Winslow et al. Għaldaqstant il-Canton ta’ Valais ma għadux jissodisfa r-rekwiżiti għaż-żoni li minnhom il-kaxxi tan-naħal u l-pjanti ospitanti tal-Erwinia amylovora (Burrill) Winslow et al. jistgħu jiġu esportati lejn iż-żoni protetti rispettivi fl-Unjoni u għalhekk jenħtieġ li jitħassru mit-tabella, il-punti 3 u 9, tal-Anness X ta’ dak ir-Regolament ta’ Implimentazzjoni.

(11)

Għaldaqstant jenħtieġ li l-Annessi III, IX u X tar-Regolament ta’ Implimentazzjoni (UE) 2019/2072 jiġu emendati kif jixraq.

(12)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Ir-Regolament (UE) 2016/429 jipprovdi li biex jidħlu fl-Unjoni, il-konsenji tal-annimali, tal-prodotti ġerminali u tal-prodotti li joriġinaw mill-annimali jridu jkunu ġejjin minn pajjiż terz jew minn territorju, jew minn żona jew kompartiment tiegħu, elenkati f’konformità mal-Artikolu 230(1) ta’ dak ir-Regolament.

(2)

Ir-Regolament Delegat tal-Kummissjoni (UE) 2020/692 (2) jistabbilixxi r-rekwiżiti tas-saħħa tal-annimali li trid tinżamm il-konformità magħhom għad-dħul fl-Unjoni ta’ konsenji ta’ ċerti speċijiet u kategoriji tal-annimali, tal-prodotti ġerminali u tal-prodotti li joriġinaw mill-annimali li jkunu ġejjin minn pajjiżi terzi jew territorji jew żoni tagħhom, jew minn kompartimenti tagħhom fil-każ tal-annimali tal-akkwakultura.

(3)

Ir-Regolament ta’ Implimentazzjoni tal-Kummissjoni (UE) 2021/404 (3) jistabbilixxi l-listi ta’ pajjiżi terzi, territorji, żoni jew kompartimenti tagħhom, li minnhom huwa permess id-dħul fl-Unjoni tal-ispeċijiet u l-kategoriji tal-annimali, tal-prodotti ġerminali u tal-prodotti li joriġinaw mill-annimali li jaqgħu fil-kamp ta’ applikazzjoni tar-Regolament Delegat (UE) 2020/692.

(4)

B’mod aktar partikolari, l-Annessi V u XIV tar-Regolament ta’ Implimentazzjoni (UE) 2021/404 jistabbilixxu l-listi ta’ pajjiżi terzi, territorji, jew żoni tagħhom awtorizzati għad-dħul fl-Unjoni rispettivament, ta’ konsenji tal-pollam, tal-prodotti ġerminali tal-pollam, tal-laħam frisk u l-prodotti tal-laħam tal-pollam u tal-għasafar tal-kaċċa.

(5)

Ir-Renju Unit innotifika lill-Kummissjoni dwar tliet tifqigħat tal-influwenza avjarja b’patoġeniċità għolja (HPAI) fil-pollam, fiż-żoni amministrattivi ta’ Aberdeenshire fl-Iskozja, u Cheshire u Staffordshire fl-Ingilterra, li ġew ikkonfermati fl-10 ta’ Settembru 2023, fit-8 ta’ Settembru 2023 u fis-7 ta’ Settembru 2023, rispettivament, b’analiżi tal-laboratorju (RT-PCR).

(6)

Wara dawk it-tifqigħat riċenti tal-HPAI, l-awtoritajiet veterinarji tar-Renju Unit stabbilew żoni ristretti ta’ mill-anqas 10 km madwar l-istabbilimenti affettwati u implimentaw politika ta’ qerda biex jikkontrollaw il-preżenza tal-HPAI u jillimitaw it-tixrid ta’ dik il-marda.

(7)

Ir-Renju Unit ssottometta informazzjoni lill-Kummissjoni dwar is-sitwazzjoni epidemjoloġika fit-territorju tiegħu u dwar il-miżuri li ħa biex jipprevjeni aktar tixrid tal-HPAI.

(8)

Dik l-informazzjoni ġiet evalwata mill-Kummissjoni. Il-Kummissjoni tqis li, fid-dawl tas-sitwazzjoni tas-saħħa tal-annimali fiż-żoni bir-restrizzjonijiet stabbiliti mill-awtoritajiet veterinarji tar-Renju Unit, id-dħul fl-Unjoni ta’ konsenji tal-pollam, tal-prodotti ġerminali tal-pollam, u tal-laħam frisk tal-pollam u tal-għasafar tal-kaċċa minn dawk iż-żoni jenħtieġ li jiġi sospiż, biex jiġi protett l-istatus tas-saħħa tal-annimali tal-Unjoni.

(9)

L-Istati Uniti pprovdew informazzjoni aġġornata lill-Kummissjoni dwar is-sitwazzjonijiet epidemjoloġiċi fit-territorji tagħhom fir-rigward tal-HPAI li wasslu għas-sospensjoni tad-dħul fl-Unjoni ta’ ċerti prodotti, kif stabbilit fl-Annessi V u XIV tar-Regolament ta’ Implimentazzjoni (UE) 2021/404.

(10)

L-Istati Uniti ssottomettew informazzjoni aġġornata dwar is-sitwazzjoni epidemjoloġika fit-territorju tagħhom b’rabta ma’ tliet tifqigħat tal-HPAI fi stabbilimenti tal-pollam fl-istat ta’ New York, li ġew ikkonfermati bejn il-25 ta’ Lulju 2023 u t-3 ta’ Awwissu 2023.

(11)

L-Istati Uniti ssottomettew ukoll informazzjoni dwar il-miżuri li ħadu biex jipprevjenu aktar tixrid tal-HPAI. B’mod partikolari, wara dawn it-tifqigħat ta’ dik il-marda, l-Istati Uniti implimentaw politika ta’ qerda biex jikkontrollaw u jillimitaw it-tixrid ta’ dik il-marda, u lestew ukoll ir-rekwiżit tat-tindif u tad-diżinfezzjoni wara l-implimentazzjoni tal-politika ta’ qerda fl-istabbilimenti tal-pollam infettati fit-territorji tagħhom.

(12)

Il-Kummissjoni evalwat l-informazzjoni sottomessa mill-Istati Uniti. Il-Kummissjoni tqis li l-Istati Uniti pprovdew garanziji xierqa li s-sitwazzjoni tas-saħħa tal-annimali li wasslet għas-sospensjonijiet, ma għadhiex tirrappreżenta theddida għas-saħħa tal-annimali jew għas-saħħa pubblika fl-Unjoni, u li għaldaqstant jenħtieġ li jiġi awtorizzat mill-ġdid id-dħul fl-Unjoni tal-komoditajiet tal-pollam miż-żoni kkonċernati tal-Istati Uniti li minnhom kien ġie sospiż id-dħul fl-Unjoni.

(13)

Għalhekk, jenħtieġ li l-Annessi V u XIV tar-Regolament ta’ Implimentazzjoni (UE) 2021/404 jiġu emendati biex titqies is-sitwazzjoni epidemjoloġika attwali fir-rigward tal-HPAI fir-Renju Unit u fl-Istati Uniti.

(14)

Filwaqt li titqies is-sitwazzjoni epidemjoloġika attwali fir-Renju Unit fir-rigward tal-HPAI u biex ikun evitat tfixkil bla bżonn fil-kummerċ mal-Istati Uniti, l-emendi li jridu jsiru fl-Annessi V u XIV tar-Regolament ta’ Implimentazzjoni (UE) 2021/404 permezz ta’ dan ir-Regolament jenħtieġ li jsiru effettivi b’urġenza.

(15)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Skont l-Artikolu 5(1) tad-Deċiżjoni (PESK) 2022/2444, il-Kunsill awtorizza lill-Kumitat Politiku u ta' Sigurtà (KPS) biex jieħu d-deċiżjonijiet rilevanti dwar il-ħatra tal-Kmandant tal-Forza tal-Missjoni EUMPM Niger (il-"Kmandant tal-Forza tal-Missjoni tal-UE").

(2)

Fl-14 ta' Marzu 2023, il-KPS adotta d-Deċiżjoni (PESK) 2023/614 (2) li taħtar lill-Kurunell Antonio D'AGOSTINO bħala Kmandant tal-Forza tal-Missjoni tal-UE għall-EUPM Niger.

(3)

Fis-17 ta' Awwissu 2023, l-awtoritajiet militari Taljani pproponew il-ħatra tal-Kurunell Antonio STASI biex jieħu post il-Kurunell Antonio D'AGOSTINO bħala l-Kmandant tal-Forza tal-Missjoni tal-UE mid-19 ta' Settembru 2023.

(4)

Fit-23 ta' Awwissu 2023, il-Kmandant tal-Missjoni għall-EUMPM Niger appoġġa din il-proposta.

(5)

Fit-23 ta' Awwissu 2023, il-Kumitat Militari tal-UE rrakkomanda li l-Kurunell Antonio STASI jinħatar bħala l-Kmandant tal-Forza tal-Missjoni tal-UE mid-19 ta' Settembru 2023.

(6)

Jenħtieġ li tittieħed deċiżjoni dwar il-ħatra tal-Kurunell Antonio STASI bħala l-Kmandant tal-Forza tal-Missjoni tal-UE mid-19 ta' Settembru 2023 u jenħtieġ li d-Deċiżjoni (PESK) 2023/614 titħassar,

(1)

Skont l-Artikolu 5(1) tad-Deċiżjoni (PESK) 2021/1143, il-Kunsill awtorizza lill-Kumitat Politiku u ta’ Sigurtà (KPS) jieħu d-deċiżjonijiet dwar il-kontroll politiku u d-direzzjoni strateġika ta’ EUTM Mozambique, inkluż id-deċiżjonijiet rilevanti dwar il-ħatra ta’ Kmandanti tal-Forza tal-Missjoni tal-UE għal EUTM Mozambique.

(2)

Il-KPS bid-Deċiżjoni (PESK) 2022/1482 (2) ħatar lill-Komodor Rogério Paulo FIGUEIRA MARTINS de BRITO bħala Kmandant tal-Forza tal-Missjoni tal-UE għall-Missjoni ta’ Taħriġ Militari tal-UE fil-Mozambique (EUTM Mozambique).

(3)

Fl-14 ta’ Lulju 2023, l-awtoritajiet Portugiżi pproponew lill-Brigadier Ġeneral João CARLOS de BASTOS JORGE GONÇALVES biex jieħu post il-Komodor Rogério Paulo FIGUEIRA MARTINS de BRITO bħala l-Kmandant tal-Forza tal-Missjoni tal-UE għall-EUTM Mozambique mill-15 ta’ Settembru 2023.

(4)

Fis-27 ta’ Lulju 2023, il-Kmandant tal-Missjoni tal-UE appoġġa din il-proposta.

(5)

Fil-31 ta’ Lulju 2023, il-Kumitat Militari tal-UE rrakkomanda li l-Brigadier Ġeneral João CARLOS de BASTOS JORGE GONÇALVES jinħatar bħala Kmandant tal-Forza tal-Missjoni tal-UE għall-EUTM Mozambique mill-15 ta’ Settembru 2023.

(6)

Jenħtieġ li tittieħed deċiżjoni dwar il-ħatra tal-Brigadier Ġeneral João CARLOS de BASTOS JORGE GONÇALVES bħala Kmandant tal-Forza tal-Missjoni tal-UE għall-EUTM Mozambique mill-15 ta’ Settembru 2023 u jenħtieġ li titħassar id-Deċiżjoni (PESK) 2022/1482,