(1)

Ir-Regolament tal-Kunsill (UE) 2022/1369 (1) għandu l-għan li jnaqqas b’mod volontarju, u jekk neċessarju b’mod obbligatorju, id-domanda tal-gass tal-Unjoni, li jiffaċilita l-mili tal-faċilitajiet għall-ħżin tal-gass u li jiżgura tħejjija aħjar għal kwalunkwe interruzzjoni ulterjuri tal-provvista. Ir-Regolament (UE) 2022/1369 ġie adottat abbażi tal-Artikolu 122(1) tat-Trattat dwar il-Funzjonament tal-Unjoni Ewropea (“TFUE”) fid-dawl tal-kriżi imminenti tal-provvista tal-gass ikkawżata mill-invażjoni Russa mhux provokata u mhux ġustifikata fl-Ukrajna fi Frar 2022 u l-ħtieġa li l-Unjoni tirreaġixxi b’miżuri temporanji fi spirtu ta’ solidarjetà bejn l-Istati Membri.

(2)

Skont ir-Regolament (UE) 2022/1369, l-Istati Membri kellhom jagħmlu l-aħjar sforzi tagħhom biex inaqqsu l-konsum tal-gass tagħhom bi 15 % fil-perjodu mill-1 ta' Awwissu 2022 sal-31 ta' Marzu 2023. F’każ li l-miżuri volontarji tat-tnaqqis fid-domanda ma jkunux biżżejjed biex jindirizzaw ir-riskju ta’ skarsezza serja fil-provvista, il-Kunsill, filwaqt li jaġixxi fuq proposta tal-Kummissjoni, ingħata s-setgħa li jiddikjara allert tal-Unjoni, li jiskatta l-obbligu ta’ tnaqqis obbligatorju fid-domanda. F’dawn l-aħħar xhur, l-Istati Membri ħadmu bil-għaqal u adottaw miżuri li għandhom l-għan li jnaqqsu d-domanda rispettiva tagħhom għall-gass bi 15 %, fi spirtu ta’ solidarjetà. Dan diġà rriżulta fi tnaqqis effettiv ta’ iktar minn 15 % fid-domanda għall-gass madwar l-Unjoni minn Awwissu 2022 sa Jannar 2023.

(3)

Madankollu, għad hemm diffikultajiet serji għas-sigurtà tal-provvista tal-enerġija. Is-sitwazzjoni globali fis-suq tal-gass ma tjibitx minn Frar 2022 sal-lum, u l-Unjoni għadha tiddependi fuq ċerti volumi ta’ gass Russu biex tissodisfa d-domanda kumplessiva tagħha għall-gass, minkejja t-tnaqqis fid-domanda miksub skont ir-Regolament (UE) 2022/1369. It-tnaqqis fid-domanda għall-enerġija għaċ-ċittadini tal-Unjoni ġie evitat matul is-sena li għaddiet bis-saħħa ta’ miżuri effettivi għall-mili mill-ġdid tal-ħażniet u tnaqqis fid-domanda. Madankollu, 11-il Stat Membru għadhom qed jiddikjaraw twissija bikrija u wieħed minnhom livell ta’ allert f’konformità mar-Regolament (UE) 2017/1938 tal-Parlament Ewropew u tal-Kunsill (2). Għalhekk, peress li l-prezzijiet tal-gass għadhom eċċezzjonalment għoljin u peress li s-sitwazzjoni tal-provvista globali ma tjibitx minn Awwissu 2022 meta ġie adottat ir-Regolament (UE) 2022/1369 sal-lum, hemm ħtieġa urġenti biex jiġu estiżi l-miżuri li għenu biex titrażżan il-kriżi, speċjalment it-tnaqqis kontinwu fid-domanda. Kieku kellhom jitwaqqfu l-miżuri tat-tnaqqis fid-domanda, dan il-waqfien jikkawża bidliet fis-sitwazzjoni stabbli iżda fraġli li l-Unjoni kisbet sal-lum, u jipperikola r-reżiljenza tagħha li jirreaġixxi għal żviluppi futuri possibbli, fosthom il-waqfien totali tal-importazzjonijiet mir-Russja. Għalhekk huwa ta' importanza kbira li jkompli jiġi evitat l-esponiment tal-Unjoni għal skarsezza tal-gass u għal volatilità għolja tal-prezzijiet.

(4)

Minħabba t-tnaqqis sinifikanti fl-importazzjonijiet tal-gass Russu mill-pipelines matul is-sena li għaddiet, il-kapaċità tal-Unjoni li terġa’ timla l-ħażniet attwalment naqset b’mod konsiderevoli, inkluż meta mqabbla mas-sitwazzjoni fis-sajf tal-2022. Minkejja l-fatt li l-kriżi tal-enerġija bdiet fl-2022, l-Unjoni setgħet timporta madwar 60 bcm ta’ gass mir-Russja biex timla l-faċilitajiet ta' ħżin matul dik is-sena, inkluż permezz tal-pipeline NordStream 1. Madankollu, matul is-sajf tal-2022, ir-Russja interrompiet u eventwalment waqqfet għalkollox il-provvisti tal-gass permezz ta' dak il-pipeline, li saritlu ħsara minn atti ta’ sabotaġġ qawwijin f'Settembru 2022 tant li attwalment ma jista’ jittrasporta l-ebda gass u mhux se jkun jista’ jagħmel dan fil-futur prevedibbli. B'kunsiderazzjoni tal-livelli attwali ta’ importazzjonijiet tal-gass mill-pipelines, l-Unjoni se tirċievi biss massimu ta’ 20 bcm ta’ importazzjonijiet mill-pipelines Russi, dejjem jekk dawk l-importazzjonijiet mhux affidabbli ma jiġux interrotti għalkollox. Għalhekk, hemm riskju serju li jkun hemm skarsezzi tal-gass fl-Unjoni matul ix-xitwa tal-2023-2024.

(5)

Dawn id-diffikultajiet serji huma aggravati minn għadd ta’ riskji addizzjonali u fatturi ġodda, inkluż l-irpiljar fid-domanda Asjatika għall-gass naturali likwifikat (LNG) li jnaqqas id-disponibbiltà tal-gass fis-suq globali tal-gass, il-kundizzjonijiet tat-temp li reċentement komplew jiddeterjoraw, u b’hekk affettwaw il-ħżin tal-enerġija idroelettrika u l-produzzjoni nukleari minħabba livelli baxxi tal-ilma, żviluppi tekniċi ġodda li l-livell ta’ inċertezza fir-rigward tad-disponibbiltà tal-produzzjoni nukleari eżistenti, u li jeħtieġu jirrikorru iktar għall-ġenerazzjoni tal-enerġija li taħdem bil-gass, u iktar possibbiltà ta’ interruzzjonijiet fil-provvista tal-gass, inkluż il-waqfien totali tal-importazzjonijiet tal-gass mir-Russja.

(6)

Dawn id-diffikultajiet serji persistenti u ġodda jaffettwaw il-kapaċità tal-Unjoni li tissodisfa d-domanda għall-gass, b’mod partikolari l-mili fil-ħin u b’mod effiċjenti tal-faċilitajiet tal-ħżin taħt l-art għax-xitwa tal-2023-2024, kif ukoll l-adegwatezza bejn il-provvista u d-domanda matul ix-xitwa tal-2023-2024.

(7)

F’konformità mar-Regolament (UE) 2022/1369, il-Kummissjoni wettqet rieżami ta’ dak ir-Regolament u r-riżultati tiegħu nġabru fil-qosor f'-rapport ippreżentat mill-Kummissjoni lill-Kunsill. Ir-rapport janalizza xenarji differenti, b’estensjoni u mingħajr estensjoni tal-isforzi għat-tnaqqis fid-domanda skont ir-Regolament (UE) 2022/1369, inkluż estensjoni ta’ seba’ xhur minn April sa Ottubru 2023, estensjoni ta’ tmien xhur minn Awwissu 2023 sa Marzu 2024, u estensjoni ta’ sena minn April 2023 sa Marzu 2024. Ir-rapport jikkonkludi li mingħajr tnaqqis kontinwu fid-domanda, il-livelli tal-ħażniet jilħqu biss 69 bcm sa tmiem Ottubru 2023, li huwa ferm taħt il-mira ta’ 90 % (89,4 bcm) għall-1 ta’ Novembru stabbilit fir-Regolament (UE) 2017/1938 u li l-livelli tal-ħażniet se jiġu eżawriti għalkollox sa Frar 2024.

(8)

Fir-rigward tax-xenarji differenti vvalutati fir-rapport, f’każ ta’ estensjoni ta’ seba’ xhur minn April sa Ottubru 2023, il-faċilitajiet ta' ħżin ikunu mtlew biżżejjed sa tmiem is-sajf tal-2023 (95 bcm sa tmiem Ottubru 2023, u b’hekk tintlaħaq il-mira ta’ 90 %). Madankollu, minħabba li d-domanda għall-gass, anke fi xtiewinormali, hija d-doppju ta’ dik fis-sajf, il-faċilitajiet ta' ħżin ikunu ġew eżawriti kważi għalkollox sa tmiem ix-xitwa tal-2023-2024 (9 bcm sa tmiem Marzu 2024). Dan jimplika tħassib serju ħafna fir-rigward tas-sigurtà tal-provvista u jagħmilha diffiċli ħafna li l-faċilitajiet ta' ħżin jimtlew biżżejjed għax-xitwa ta’ wara. F’każ ta’ estensjoni ta’ tmien xhur minn Awwissu 2023 sa Marzu 2024, il-faċilitajiet ta' ħżin jimtlew bil-mod wisq, u b'hekk jilħqu 80 bcm biss sa tmiem Ottubru 2023, li huwa ferm inqas mill-mira, u l-livelli tal-ħażniet kieku jonqsu għal inqas minn 30 % sa tmiem ix-xitwa tal-2023-2024 (inqas minn 28 bcm), u dan jikkawża tħassib serju fir-rigward tas-sigurtà tal-provvista u jagħmilha diffiċli li l-faċilitajiet ta' ħżin jimtlew biżżejjed għax-xitwa ta’ wara. Huwa biss f’każ ta’ estensjoni ta’ sena bi tnaqqis kontinwu fid-domanda ta’ 15 % minn April 2023 sa Marzu 2024, li l-livelli tal-ħażniet ikunu jissodisfaw il-mira tal-ħżin tal-1 ta’ Novembru 90 % u jilħqu d-89,4 bcm sal-1 ta’ Novembru 2023, fejn l-Istati Membri jkunu fit-triq it-tajba għal provvista żgurata tal-gass għax-xitwa tal-2023-2024 b’43 bcm maħżuna fil-livell tal-Unjoni sa tmiem Marzu 2024.

(9)

Fid-dawl ta' dawk ix-xenarji, ir-rapport jikkonkludi li huwa neċessarju tnaqqis kontinwu fid-domanda ta’ 15 % fuq perjodu ta’ 12-il xahar sa tmiem Marzu 2024 sabiex jiġi żgurat li l-Istati Membri jkunu jistgħu jikkonformaw mal-mira tal-ħżin ta’ 90 % stabbilita fir-Regolament (UE) 2017/1938, li hija kruċjali għas-sigurtà tal-provvista tal-gass, u biex tiġi evitata kwalunkwe interruzzjoni fil-provvista matul ix-xitwa tal-20223-2024.

(10)

Filwaqt li l-Istati Membri kapaċi jiddeċiedu liema miżuri huma l-iktar xierqa biex jiżguraw li l-miri tal-ħżin jintlaħqu, dan ma jistax jinkiseb mingħajr miżuri ta’ tnaqqis fid-domanda. Ir-rapport jikkonkludi li m'hemmx biżżejjed volumi ta’ gass fis-suq biex jiġi ssodisfat dak l-obbligu fl-Istati Membri kollha. Dan ifisser li mhux l-Istati Membri kollha huma fiżikament kapaċi jimlew il-faċilitajiet ta' ħżin għal livelli adegwati, u dan se jirriżulta f’diffikultajiet serji għas-sigurtà tal-provvista tal-gass sa tmiem ix-xitwa tal-2023-2024.

(11)

Ir-rapport jindika wkoll li huwa meħtieġ tnaqqis fil-konsum tal-gass proporzjonat għal dak previst fir-Regolament (UE) 2022/1369 matul il-perjodu mill-1 ta’ April 2023 sal-31 ta’ Marzu 2024. It-tnaqqis estiż meħtieġ ikun jikkorrispondi għal tnaqqis ta’ 15 % għall-perjodu mill-1 ta’ April 2023 sal-31 ta' Marzu 2024 meta mqabbel ma’ perjodu ta’ referenza mill-1 ta’ April 2017 sal-31 ta’ Marzu 2022. L-estensjoni tal-miżuri ta’ tnaqqis fid-domanda u l-estensjoni tal-perjodu tat-tnaqqis jipprovdu wkoll il-flessibbiltà fis-suq sabiex irażżan il-volatilità tal-prezz tal-gass u jipprevjeni żidiet qawwija fil-prezzijiet bħal dawk osservati fl-2022.

(12)

Minħabba l-bilanċ magħfus attwali bejn il-provvista u d-domanda, anke interruzzjoni moderata għall-provvista tal-gass jista’ jkollha impatt drammatiku fuq is-suq tal-gass u tista' toħloq ħsara serja u dejjiema lill-ekonomija u liċ-ċittadini tal-Unjoni. L-obbligu tal-mili tal-ħażniet tal-gass japplika sakemm ma tiġix iddikjarata emerġenza reġjonali jew tal-Unjoni f’konformità mar-Regolament (UE) 2017/1938. Għalhekk, interruzzjoni f’daqqa ta’ 10 % tal-importazzjonijiet tal-gass mill-pipelines lejn l-Unjoni twassal biex jiġu imposti miżuri iżolati drastiċi fuq l-Istati Membri biex jikkonformaw mal-obbligu tal-mili tal-ħażniet tagħhom jew twassal biex tiġi ddikjarata emerġenza reġjonali jew tal-Unjoni, sakemm ma jitkompliex it-tnaqqis ikkoordinat volontarju fid-domanda. Tali tkomplija tat-tnaqqis ikkoordinat fid-domanda mill-Istati Membri kollha fi spirtu ta’ solidarjetà hija essenzjali għall-mili mill-ġdid tal-kapaċitajiet tal-ħżin b’mod effiċjenti u bi tfixkil minimu fis-suq, li jibqa’ kruċjali għas-sigurtà tal-provvista tal-gass qabel ix-xitwa tal-2023-2024.

(13)

L-estensjoni tar-Regolament (UE) 2022/1369 tikkostitwixxi miżura ta’ emerġenza b’rispons għad-diffikultajiet serji persistenti u ġodda fil-provvista tal-enerġija li jirrappreżentaw riskju ta’ kriżi imminenti u li jeħtieġu li l-perjodu tat-tnaqqis fid-domanda għall-gass jiġi adattat kemm sabiex jiġi estiż it-tnaqqis volontarju fid-domanda għall-gass, kif ukoll sabiex tiġi żgurata l-possibbiltà li jiġi ddikjarat allert tal-Unjoni u jiskatta t-tnaqqis obbligatorju korrispondenti fid-domanda għall-gass wara Marzu 2023.

(14)

Il-kriżi attwali qed tesponi lill-Unjoni kollha għal riskji ta’ skarsezza tal-enerġija u għal prezzijiet għoljin tal-enerġija. Peress li l-Unjoni hija suq uniku, skarsezza tal-gass fi Stat Membru wieħed ikollha konsegwenzi serji fl-Istati Membri l-oħra kollha minħabba l-iskarsezza fiżika fil-provvista tal-gass, il-volatilità tal-prezzijiet jew it-tfixkil tal-ktajjen industrijali li jirriżultaw minn interruzzjonijiet possibbli ta’ industriji speċifiċi fi Stat Membru. Barra minn hekk, fi spirtu ta’ solidarjetà, l-Istati Membri kollha jistgħu jikkontribwixxu biex ikomplu jnaqqsu r-riskji ta’ skarsezza tal-enerġija u jistgħu jrażżnu l-volatilità tal-prezzijiet tal-gass billi jnaqqsu d-domanda tagħhom. L-impatt pożittiv ta’ dan l-ispirtu ta’ solidarjetà żdied b’mod konsiderevoli matul is-sena li għaddiet bl-iżvilupp ta’ kapaċitajiet ġodda ta’ interkonnessjoni lejn il-Lvant u ta' kapaċitajiet addizzjonali ta’ importazzjoni tal-LNG li jikkollegaw aħjar lill-Istati Membri mal-faċilitajiet tar-rigassifikazzjoni tal-LNG, fiżikament jew virtwalment. Għalhekk, it-tkomplija ta' azzjoni kkoordinata permezz ta' miżuri meħuda fil-livell tal-Unjoni biex tonqos id-domanda tkun ta' ġid għall-Istati Membri kollha billi tnaqqas ir-riskju ta' impatt aktar sostanzjali fuq l-ekonomiji tagħhom.

(15)

Il-ħtieġa li tittieħed azzjoni hija urġenti peress li l-istaġun tal-mili tal-faċilitajiet ta' ħżin jibda f’April. Minħabba d-diffikultajiet serji persistenti u ġodda deskritti hawn fuq, in-nuqqas ta’ estensjoni fil-ħin tat-tnaqqis ikkoordinat fid-domanda qabel il-mili tal-faċilitajiet ta' ħżin ikollu effetti immedjati fuq it-trajettorji għall-mili tal-faċilitajiet ta' ħżin, fuq il-kundizzjonijiet tas-suq li jkollhom impatt fuq is-sigurtà tal-provvista u fuq il-volatilità tal-prezzijiet.

(16)

L-Artikolu 122(1) tat-TFUE jippermetti lill-Kunsill jiddeċiedi, fuq proposta tal-Kummissjoni u fi spirtu ta’ solidarjetà bejn l-Istati Membri, dwar il-miżuri xierqa għas-sitwazzjoni ekonomika, b’mod partikolari jekk ikun hemm diffikultajiet serji fil-provvista ta’ ċerti prodotti, b’mod partikolari fil-qasam tal-enerġija. Fid-dawl tal-kunsiderazzjonijiet ta’ hawn fuq, il-kriżi attwali fil-provvista tal-gass, prodott tal-enerġija, tikkostitwixxi sitwazzjoni ta’ dan it-tip. Għaldaqstant, estensjoni temporanja tar-Regolament (UE) 2022/1369 kif ukoll emendi mmirati għalih huma neċessarji bħala rispons għas-sitwazzjoni attwali fi spirtu ta’ solidarjetà bejn l-Istati Membri. Għalhekk hu ġġustifikat li l-Artikolu 122(1) tat-TFUE jkun il-bażi legali ta' dan ir-Regolament.

(17)

Id-dispożizzjonijiet tar-Regolament (UE) 2022/1369 li jagħrfu ċ-ċirkostanzi nazzjonali speċifiċi fil-każ ta' tnaqqis obbligatorju fid-domanda skattat minn allert tal-Unjoni jibqgħu japplikaw. L-Istati Membri jibqgħu jkunu jistgħu jillimitaw temporanjament it-tnaqqis obbligatorju fid-domanda meta Stat Membru jiffaċċa kriżi tal-elettriku, kif imsemmi fir-Regolament (UE) 2019/941 tal-Parlament Ewropew u tal-Kunsill (3). Xenarju bħal dan jista' jinkludi limitazzjoni proporzjonali għal żieda sinifikanti fl-użu tal-gass għall-ġenerazzjoni tal-enerġija, meħtieġa biex jiġi esportat sostanzjalment aktar elettriku lejn Stat Membru ġar, minħabba ċirkostanzi eċċezzjonali, bħal disponibbiltà baxxa ta' enerġija idroelettrika jew nukleari fl-Istat Membru kkonċernat, jew fl-Istat Membru ġar li lejh jiġi esportat sostanzjalment aktar elettriku. Dik il-limitazzjoni m'għandhiex taqbeż il-volum ta' gass li jikkorrispondi għall-esportazzjonijiet addizzjonali msemmija hawn fuq. Jenħtieġ li l-Istati Membri jqisu dik il-limitazzjoni meta jirrapportaw id-diżaggregazzjoni tagħhom tal-konsum tal-gass għal kull settur.

(18)

Jenħtieġ li l-Istati Membri li jintroduċu miżuri sinifikanti ta' dekarbonizzazzjoni billi jaqilbu mill-faħam għall-gass fit-tisħin distrettwali jkunu jistgħu jnaqqsu dawk il-volumi tal-gass mill-obbligu tagħhom ta' tnaqqis fid-domanda dment li dawk il-volumi ta' gass ikunu direttament attribwibbli għall-bidla mill-faħam għall-gass.

(19)

Jenħtieġ li l-Istati Membri jirrapportaw lill-Kummissjoni mill-inqas kull xahrejn dwar il-konsum ta' gass tagħhom, mhux aktar tard mill-15-il jum tax-xahar ta' wara, permezz tal-Eurostat. Sabiex jipprovdu ċifri aġġornati, l-Istati Membri huma mħeġġa jirrapportaw il-konsum tal-gass tagħhom sabiex jiġi vvalutat it-tnaqqis fid-domanda kull xahar. Jekk jiġi ddikjarat allert tal-Unjoni, jenħtieġ li r-rapportar isir kull xahar. Sabiex jiġu mmirati aħjar il-miżuri għal tnaqqis fid-domanda u jittejjeb il-monitoraġġ tal-konsum tal-gass, l-Istati Membri huma mħeġġa jinkludu fir-rapport tagħhom diżaggregazzjoni tal-konsum tal-gass għal kull settur, inkluż l-input tal-gass għall-ġenerazzjoni tal-elettriku u tas-sħana, għall-konsum tal-gass fl-industrija u għall-konsum tal-gass fl-unitajiet domestiċi u fis-servizzi, skont id-definizzjonijiet u l-konvenzjonijiet tal-istatistika stabbiliti fir-Regolament (KE) Nru 1099/2008 tal-Parlament Ewropew u tal-Kunsill (4).

(20)

F’konformità mar-Regolament (UE) 2022/1369, il-Kummissjoni għandha twettaq rieżami li abbażi tas-sejbiet tiegħu l-Kummissjoni hija intitolata li tipproponi estensjoni tal-perjodu ta’ applikazzjoni ta’ dak ir-Regolament. Sabiex titqies l-estensjoni ulterjuri tal-perjodu ta' applikazzjoni tar-Regolament (UE) 2022/1369, jenħtieġ li tiġi stabbilita data ġdida tar-rieżami għall-1 ta’ Marzu 2024.

(21)

Il-miżuri estiżi u mmodifikati ta’ tnaqqis fid-domanda jenħtieġ li jkunu temporanji u jenħtieġ li jibqgħu fis-seħħ sa tmiem ix-xitwa tal-2023-2024. Abbażi tar-rieżami l-ġdid li għandu jitwettaq sal-1 ta’ Marzu 2024, jekk ikun xieraq, jenħtieġ li l-Kummissjoni tkun tista’ tipproponi l-estensjoni tal-perjodu ta’ applikazzjoni tagħhom.

(22)

Dan ir-Regolament għandu jidħol fis-seħħ fl-1 ta' April 2023 sabiex jiġi żgurat tnaqqis kontinwu fid-domanda ta’ 15 % fuq perjodu ta’ 12-il xahar mill-1 ta' April 2023 sal-31 ta' Marzu 2024 u sabiex l-operaturi ekonomiċi, l-Istati Membri u l-Kummissjoni jkunu jistgħu jieħdu l-miżuri neċessarji biex jilħqu dak l-objettiv.

(23)

Minħabba li l-objettiv ta' dan ir-Regolament ma jistax jinkiseb b'mod suffiċjenti mill-Istati Membri, iżda jista' pjuttost jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta' sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(24)

Għalhekk, ir-Regolament (UE) 2022/1369 jenħtieġ li jiġi emendat skont dan,

(1)

Il-Partijiet 2 sa 5 tal-Anness I tar-Regolament (KE) Nru 1272/2008 fihom kriterji armonizzati għall-klassifikazzjoni tas-sustanzi, tat-taħlitiet u ta’ ċerti oġġetti fil-klassijiet ta’ periklu u fid-differenzjazzjonijiet ta’ dawk il-klassijiet ta’ periklu u jistabbilixxu dispożizzjonijiet dwar kif għandhom jiġu ssodisfati dawk il-kriterji, kif ukoll ir-rekwiżiti korrispondenti tat-tikkettar. Il-Parti 3 tal-Anness I tar-Regolament (KE) Nru 1272/2008 fiha kriterji dwar il-perikli għas-saħħa u l-Parti 4 ta’ dak l-Anness fiha kriterji dwar il-perikli ambjentali.

(2)

Il-Patt Ekoloġiku Ewropew (2) jistabbilixxi l-għan li jiġu protetti aħjar is-saħħa tal-bniedem u l-ambjent bħala parti minn approċċ ambizzjuż biex jiġi indirizzat it-tniġġis mis-sorsi kollha u biex nimxu lejn ambjent ħieles mit-tossiċità.

(3)

Il-ħtieġa li tiġi stabbilita identifikazzjoni legalment vinkolanti tal-perikli tal-interferenti endokrinali, abbażi tad-definizzjoni stabbilita mill-Organizzazzjoni Dinjija tas-Saħħa fl-2002 (3) u abbażi tal-kriterji diġà żviluppati għall-prodotti għall-protezzjoni tal-pjanti (4) u l-prodotti bijoċidali (5), u biex tiġi applikata fil-leġiżlazzjoni kollha tal-Unjoni, hija enfasizzata fil-Komunikazzjoni tal-Kummissjoni “Strateġija tas-sustanzi kimiċi għas-sostenibbiltà lejn ambjent ħieles mit-tossiċità” (6). Dik il-Komunikazzjoni tindika wkoll il-ħtieġa li jiġu inklużi klassijiet u kriterji ta’ perikli ġodda fir-Regolament (KE) Nru 1272/2008 sabiex jiġu indirizzati bis-sħiħ it-tossiċità ambjentali, il-persistenza, il-mobbiltà u l-bijoakkumulazzjoni.

(4)

Il-Kummissjoni wettqet valutazzjoni tal-impatt dwar iż-żieda ta’ klassijiet u kriterji ta’ periklu ġodda fir-Regolament (KE) Nru 1272/2008, li kienet tinkludi konsultazzjoni pubblika miftuħa, kif ukoll konsultazzjoni mal-partijiet ikkonċernati. Il-Kummissjoni kkonsultat ukoll mal-grupp ta’ esperti tal-Aġenzija Ewropea għas-Sustanzi Kimiċi dwar sustanzi kimiċi persistenti, bijoakkumulattivi u tossiċi, mal-awtoritajiet kompetenti għar-REACH u għas-CLP (CARACAL), kif ukoll mas-sottogrupp dwar l-interferenti endokrinali ta’ dak il-grupp ta’ esperti, dwar il-klassijiet u l-kriterji ta’ periklu ġodda għall-klassifikazzjoni u t-tikkettar ta’ sustanzi u taħlitiet, u qieset il-pariri xjentifiċi tagħhom.

(5)

Abbażi tal-esperjenza u l-għarfien xjentifiku akbar miksuba fl-identifikazzjoni tas-sustanzi bħala sustanzi ta’ tħassib għoli ħafna minħabba l-proprjetajiet tagħhom li jfixklu s-sistema endokrinali, kif ukoll fl-identifikazzjoni tas-sustanzi bħala PBT (persistenti, bijoakkumulattivi, tossiċi), vPvB (persistenti ħafna, bijoakkumulattivi ħafna), PMT (persistenti, mobbli, tossiċi) u vPvM (persistenti ħafna, mobbli ħafna) skont ir-Regolament (KE) Nru 1907/2006 tal-Parlament Ewropew u tal-Kunsill (7), huwa meħtieġ li r-Regolament (KE) Nru 1272/2008 jiġi adattat għall-progress tekniku u xjentifiku billi jiġu introdotti klassijiet u kriterji ta’ periklu ġodda. Il-kriterji xjentifiċi li magħhom għandha tiġi vvalutata l-evidenza disponibbli għall-klassifikazzjoni f’dawk il-klassijiet ta’ periklu jenħtieġ li jkunu jirriflettu l-istat attwali tax-xjenza.

(6)

Is-sustanzi u t-taħlitiet bi proprjetajiet li jfixklu s-sistema endokrinali joħolqu tħassib għas-saħħa pubblika u għall-ambjent. Ġie pprovat li t-tfixkil fis-sistema endokrinali jista’ jwassal għal ċerti disturbi fil-bnedmin, fost l-oħrajn malformazzjonijiet konġenitali, disturbi fl-iżvilupp, fis-sistema riproduttiva jew fl-iżvilupp newroloġiku, kanċer, dijabete u obeżità, u li dawk id-disturbi għandhom inċidenza għolja u li qed tiżdied kemm fit-tfal kif ukoll fl-adulti. Intwera wkoll li l-proprjetajiet li jfixklu s-sistema endokrinali jistgħu jaffettwaw b’mod negattiv il-popolazzjonijiet tal-annimali.

(7)

L-esperjenza turi li s-sustanzi u t-taħlitiet bi proprjetajiet PBT jew vPvB jirrappreżentaw tħassib serju ħafna. Dawn ma jitkissrux faċilment fl-ambjent u għandhom it-tendenza li jakkumulaw f’organiżmi ħajjin fix-xibka alimentari kollha. L-akkumulazzjoni ta’ dawk is-sustanzi fl-ambjent hija diffiċli li titreġġa’ lura, minħabba li l-konċentrazzjoni ambjentali tagħhom ma tonqosx faċilment bit-tnaqqis tal-emissjonijiet tagħhom, u l-effetti ta’ din l-akkumulazzjoni spiss ikunu diffiċli li jitbassru fit-tul. Barra minn hekk, ċerti sustanzi PBT u vPvB li jgħaddu minn trasport fuq distanzi twal għandhom il-potenzjal li jikkontaminaw iż-żoni verġni remoti. Ladarba dawk is-sustanzi jiġu rilaxxati fl-ambjent, l-esponiment għalihom huwa diffiċli li jitreġġa’ lura, li jwassal għal esponiment kumulattiv kemm tal-annimali kif ukoll tal-bnedmin permezz tal-ambjent.

(8)

Is-sustanzi PMT u vPvM joħolqu tħassib billi, minħabba l-persistenza għolja tagħhom flimkien ma’ mobbiltà għolja li hija konsegwenza tal-potenzjal baxx tagħhom ta’ adsorbiment, huma jistgħu jidħlu fiċ-ċiklu tal-ilma, inkluż fl-ilma tax-xorb, u jinxterdu fuq distanzi twal. Ħafna sustanzi PMT u vPvM jitneħħew biss parzjalment mill-proċessi tat-trattament tal-ilma mormi u jistgħu saħansitra jitkissru permezz tal-aktar proċessi ta’ purifikazzjoni avvanzati fil-faċilitajiet għat-trattament tal-ilma tax-xorb. Tali tneħħija mhux kompluta flimkien ma’ emissjonijiet ġodda jfissru li l-konċentrazzjoni ta’ dawk is-sustanzi PMT u vPvM fl-ambjent tiżdied maż-żmien. Ladarba jiġu rilaxxati fl-ambjent, huwa diffiċli li l-esponiment għas-sustanzi PMT u vPvM jitreġġa’ lura, u dan iwassal għal esponiment kumulattiv kemm tal-annimali kif ukoll tal-bnedmin permezz tal-ambjent. Kwalunkwe effett minn din l-iskopertura huwa imprevedibbli fit-tul.

(9)

Fid-dawl taż-żieda fl-għarfien xjentifiku u fl-esperjenza miksuba fl-identifikazzjoni tal-interferenti endokrinali għas-saħħa tal-bniedem u għall-ambjent, kif ukoll tas-sustanzi u t-taħlitiet PBT, vPvB, PMT u vPvM, huwa xieraq li jiġu introdotti klassijiet ta’ periklu u rekwiżiti għat-tikkettar għal dawk is-sustanzi u t-taħlitiet u l-kriterji xjentifiċi korrispondenti biex jiġu identifikati.

(10)

Il-livell ta’ evidenza fir-rigward tal-proprjetajiet li jfixklu s-sistema endokrinali jista’ jkun ta’ saħħa xjentifika differenti. Għalhekk, huwa xieraq li jinħolqu żewġ kategoriji ta’ interferenti endokrinali: interferenti endokrinali magħrufa jew preżunti (il-kategorija 1) u interferenti endokrinali suspettati (il-kategorija 2), kemm għas-saħħa tal-bniedem kif ukoll għall-ambjent.

(11)

Meta tiżviluppa gwida dwar l-applikazzjoni tal-kriterji tal-interferenti endokrinali, l-Aġenzija Ewropea għas-Sustanzi Kimiċi tista’ tibbenefika mill-esperjenza miksuba mill-implimentazzjoni tal-leġiżlazzjoni dwar il-prodotti għall-protezzjoni tal-pjanti u l-prodotti bijoċidali u ġustifikazzjonijiet xjentifiċi oħrajn, sabiex jiġu pprovduti linji gwida li jiċċaraw liema effetti li ma jwasslux għal eżiti kroniċi għas-saħħa tal-bniedem u għall-ambjent jistgħu jaqgħu barra mid-definizzjoni ta’ “effett negattiv”.

(12)

Il-proprjetajiet intrinsiċi tas-sustanzi u t-taħlitiet PBT u vPvB juru similaritajiet, iżda jvarjaw sostanzjalment fir-rigward tal-kriterju tat-tossiċità. Għalhekk, huwa xieraq li tinħoloq klassi ta’ periklu ġdida, b’divrenzjar, filwaqt li jiġu stabbiliti regoli komuni għall-valutazzjoni xjentifika tal-proprjetajiet intrinsiċi relatati mal-persistenza u l-bijoakkumulazzjoni.

(13)

Il-proprjetajiet intrinsiċi tas-sustanzi u t-taħlitiet PMT u vPvM juru similaritajiet, iżda jvarjaw sostanzjalment fir-rigward tal-kriterju tat-tossiċità. Għalhekk, huwa xieraq li tinħoloq klassi ta’ periklu ġdida, b’divrenzjar, filwaqt li jiġu stabbiliti regoli komuni għall-valutazzjoni xjentifika tal-proprjetajiet intrinsiċi relatati mal-persistenza u l-mobbiltà.

(14)

Sabiex tkun tista’ ssir klassifikazzjoni adegwata tas-sustanzi u t-taħlitiet bħala PBT u vPvB, kemm jekk irreġistrati skont ir-Regolament (KE) Nru 1907/2006, kif ukoll jekk le, jenħtieġ li l-kriterji eżistenti għall-identifikazzjoni tas-sustanzi PBT u vPvB stabbiliti fit-Taqsima 1 tal-Anness XIII tar-Regolament (KE) Nru 1907/2006 jiġu inklużi fir-Regolament (KE) Nru 1272/2008. F’dan ir-rigward, kwalunkwe introduzzjoni ta’ kategoriji ta’ periklu għall-PBT u għall-vPvB fir-Regolament (KE) Nru 1272/2008 ma tkunx xierqa fid-dawl tal-livell għoli ta’ saħħa xjentifika tal-evidenza meħtieġa biex jiġu ssodisfati l-kriterji tal-PBT u tal-vPvB — li jirriflettu dawk li sa issa huma stipulati fl-Anness XIII tar-Regolament (KE) Nru 1907/2006. Barra minn hekk, l-informazzjoni dwar l-iskrinjar stipulata f’dak l-Anness, li għandha titqies meta jsir l-iskrinjar għall-proprjetajiet P, vP, B, vB u T, isservi skop differenti mill-identifikazzjoni u l-klassifikazzjoni tal-perikli. Barra minn hekk, l-iżvilupp ta’ kriterji għal aktar kategoriji ta’ periklu bbażati fuq dik l-informazzjoni dwar l-iskrinjar iwassal għal klassifikazzjoni żejda u sovrapożizzjonijiet sinifikanti mal-klassifikazzjoni ambjentali eżistenti. Għalhekk, ma jkunx xieraq li jiġu introdotti kategoriji ta’ periklu addizzjonali għall-PBT u għall-vPvB fir-Regolament (KE) Nru 1272/2008.

(15)

Il-kriterji ta’ klassifikazzjoni għal M/vM jirrigwardjaw, b’mod partikolari, il-valur log Koc (koeffiċjent tal-adsorbiment tal-ħamrija). Il-valur Koc huwa l-koeffiċjent tal-partizzjoni organika tal-karbonju-ilma u jirrifletti l-kapaċità ta’ sustanza li tiġi adsorbita fuq il-frazzjoni organika ta’ kompartimenti ambjentali solidi bħall-ħamrija, il-ħama u s-sediment u, għalhekk, huwa relatat b’mod invers mal-potenzjal tas-sustanzi li jidħlu fl-ilma ta’ taħt l-art. Għalhekk, huwa xieraq li l-kriterju tal-mobbiltà jiġi vvalutat mal-valur log Koc ta’ sustanza, Koc baxx li jimplika mobbiltà għolja.

(16)

Il-previżjoni ta’ klassijiet ta’ periklu ġodda tinvolvi l-introduzzjoni ta’ dawk il-klassijiet b’isimhom, id-dikjarazzjonijiet ta’ periklu rispettivi tagħhom u l-kodiċijiet tal-kategorija ta’ periklu rispettivi tagħhom. Għalhekk, huwa meħtieġ li dawk il-klassijiet ta’ periklu, id-dikjarazzjonijiet ta’ periklu u l-kodiċijiet tal-kategoriji jiġu inklużi fl-Annessi I, III u VI tar-Regolament (KE) Nru 1272/2008. Jeħtieġ li jiġu inklużi “dikjarazzjonijiet tal-EUH” — (dikjarazzjonijiet ta’ periklu tal-UE) — u jenħtieġ li jiffunzjonaw bħala “Dikjarazzjonijiet-H” (dikjarazzjonijiet ta’ periklu “ewlenin”).

(17)

Il-pittogrammi huma għodda essenzjali għall-komunikazzjoni tal-informazzjoni dwar il-periklu. Jenħtieġ li jiżdiedu mal-informazzjoni dwar il-periklu tal-klassijiet ta’ periklu l-ġodda, meta jiġu adottati fl-UNGHS sabiex tiġi evitata interferenza mal-użu tal-pittogrammi eżistenti li jkopru l-perikli attwali. F’każ li jinħolqu pittogrammi ġodda għal dawn il-klassijiet ta’ periklu ġodda, jenħtieġ li l-ewwel jiġu miftiehma fl-UNGHS sabiex ikunu jistgħu japplikaw għall-membri kollha tal-UNGHS.

(18)

Sabiex jiġi żgurat li l-fornituri tas-sustanzi u tat-taħlitiet ikollhom żmien biex jadattaw għar-rekwiżiti l-ġodda ta’ klassifikazzjoni u tikkettar, jenħtieġ li d-dispożizzjonijiet dwar l-applikazzjoni differita tal-obbligu li s-sustanzi u t-taħlitiet jiġu kklassifikati u ttikkettati f’konformità ma’ dan ir-Regolament jiġu inklużi fl-Anness I tar-Regolament (KE) Nru 1272/2008. Jenħtieġ li dak l-Anness jipprevedi wkoll il-possibbiltà li s-sustanzi u t-taħlitiet li diġà jitqiegħdu fis-suq qabel it-tmiem ta’ dak il-perjodu ta’ differiment, ikomplu jitqiegħdu fis-suq mingħajr ma jiġu kklassifikati u ttikkettati f’konformità ma’ dan ir-Regolament, sabiex jiġi evitat piż addizzjonali fuq il-fornituri ta’ sustanzi u taħlitiet.

(19)

F’konformità mad-dispożizzjonijiet tranżizzjonali stabbiliti fir-Regolament (KE) Nru 1272/2008 li jippermettu l-applikazzjoni tad-dispożizzjonijiet il-ġodda fi stadju aktar bikri fuq bażi volontarja, jenħtieġ li l-fornituri jkollhom il-possibbiltà li japplikaw id-dispożizzjonijiet il-ġodda dwar il-klassifikazzjoni u t-tikkettar qabel id-data tal-applikazzjoni tal-obbligi li s-sustanzi u t-taħlitiet jiġu kklassifikati u ttikkettati f’konformità ma’ dan ir-Regolament.

(20)

Għalhekk, jenħtieġ li r-Regolament (KE) Nru 1272/2008 jiġi emendat kif xieraq,

(1)

Fl-20 ta’ Diċembru 2018, Veltek Associates Inc. Europe issottomettiet lill-Aġenzija Ewropea għas-Sustanzi Kimiċi (“l-Aġenzija”) applikazzjoni f’konformità mal-Artikolu 43(1) tar-Regolament (UE) Nru 528/2012 għal awtorizzazzjoni tal-Unjoni ta’ familja ta’ prodotti bijoċidali bl-isem ta’ “HYPO-CHLOR Product Family” tat-tip ta’ prodott 2, kif deskritt fl-Anness V ta’ dak ir-Regolament, u pprovdiet konferma bil-miktub li l-awtorità kompetenti ta’ Franza qablet li tevalwa l-applikazzjoni. L-applikazzjoni ġiet irreġistrata bin-numru tal-każ BC-EF047438-44 fir-Reġistru tal-Prodotti Bijoċidali.

(2)

L-“HYPO-CHLOR Product Family” fih il-kloru attiv irrilaxxat mill-ipoklorit tas-sodju bħala s-sustanza attiva, li hija inkluża fil-lista tal-Unjoni ta’ sustanzi attivi approvati msemmija fl-Artikolu 9(2) tar-Regolament (UE) Nru 528/2012 għat-tip ta’ prodott 2.

(3)

Fl-24 ta’ Awwissu 2021, l-awtorità kompetenti tal-evalwazzjoni ssottomettiet, f’konformità mal-Artikolu 44(1) tar-Regolament (UE) Nru 528/2012, rapport ta’ valutazzjoni u l-konklużjonijiet tal-evalwazzjoni tagħha lill-Aġenzija.

(4)

Fit-23 ta’ Marzu 2022, l-Aġenzija ressqet l-opinjoni tagħha (2) lill-Kummissjoni, inkluż l-abbozz tas-sommarju tal-karatteristiċi tal-prodott bijoċidali (“SPC”) tal-“HYPO-CHLOR Product Family” u r-rapport finali tal-valutazzjoni dwar il-familja ta’ prodotti bijoċidali f’konformità mal-Artikolu 44(3) tar-Regolament (UE) Nru 528/2012.

(5)

L-opinjoni kkonkludiet li l-“HYPO-CHLOR Product Family” hija familja ta’ prodotti bijoċidali skont it-tifsira tal-Artikolu 3(1), il-punt (s) tar-Regolament (UE) Nru 528/2012, li hija eliġibbli għall-awtorizzazzjoni tal-Unjoni f’konformità mal-Artikolu 42(1) ta’ dak ir-Regolament u li, soġġett għall-konformità mal-abbozz tal-SPC, tissodisfa l-kundizzjonijiet stabbiliti fl-Artikolu 19(1) u (6) ta’ dak ir-Regolament.

(6)

Fit-12 ta’ April 2022, l-Aġenzija bagħtet lill-Kummissjoni l-abbozz tal-SPC fil-lingwi uffiċjali kollha tal-Unjoni f’konformità mal-Artikolu 44(4) tar-Regolament (UE) Nru 528/2012.

(7)

Il-Kummissjoni taqbel mal-opinjoni tal-Aġenzija u għalhekk tqis li jixraq li tagħti awtorizzazzjoni tal-Unjoni għall-“HYPO-CHLOR Product Family”.

(8)

Fl-opinjoni tagħha, l-Aġenzija tirrakkomanda li d-detentur tal-awtorizzazzjoni jwettaq test tal-istabbiltà tal-ħżin fit-tul f’temperatura ambjentali għall-prodotti fil-meta-SPC 2 A u 2B fl-imballaġġ kummerċjali li fih il-prodotti se jitqiegħdu fis-suq, bħala kundizzjoni fl-awtorizzazzjoni. Jenħtieġ li t-test jindirizza l-proprjetajiet fiżiċi, kimiċi u tekniċi relevanti tal-prodotti, kemm qabel kif ukoll wara l-ħżin biex tiġi kkonfermata ħajja fuq l-ixkaffa ta’ 24 xahar. Il-Kummissjoni taqbel ma’ dik ir-rakkomandazzjoni u tqis li s-sottomissjoni tar-riżultati ta’ dak it-test jenħtieġ li tkun kundizzjoni marbuta mat-tqegħid fis-suq u mal-użu tal-familja ta’ prodotti bijoċidali “HYPO-CHLOR Product Family” skont l-Artikolu 22(1) tar-Regolament (UE) Nru 528/2012. Il-Kummissjoni tqis ukoll li l-fatt li d-data għandha tiġi pprovduta wara li tkun ingħatat l-awtorizzazzjoni, ma jaffettwax il-konklużjoni dwar l-issodisfar tal-kundizzjoni skont l-Artikolu 19(1), il-punt (d), ta’ dak ir-Regolament abbażi tad-data eżistenti.

(9)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Prodotti Bijoċidali,

(1)

Ir-Regolament tal-Kummissjoni (KE) Nru 1484/95 (3) stabbilixxa regoli dettaljati għall-implimentazzjoni ta’ sistema ta’ dazji addizzjonali fuq l-importazzjoni u ffissa l-prezzijiet rappreżentattivi fis-setturi tal-laħam tat-tjur u tal-bajd u għall-albumina tal-bajd.

(2)

Minn kontroll regolari tad-data, li abbażi tagħha jiġu stabbiliti l-prezzijiet rappreżentattivi għall-prodotti tas-setturi tal-laħam tat-tjur u tal-bajd u għall-albumina tal-bajd, jirriżulta li jenħtieġ li jiġu emendati l-prezzijiet rappreżentattivi għall-importazzjonijiet ta’ ċerti prodotti filwaqt li jitqiesu l-varjazzjonijiet fil-prezzijiet skont l-oriġini.

(3)

Għalhekk, jenħtieġ li r-Regolament (KE) Nru 1484/95 jiġi emendat skont dan.

(4)

Biex ikun żgurat li din il-miżura tapplika kemm jista’ jkun malajr wara li d-data aġġornata ssir disponibbli, jenħtieġ li dan ir-Regolament jidħol fis-seħħ fil-jum tal-pubblikazzjoni tiegħu,

(1)

Il-livelli massimi ta’ residwi (MRLs) għall-kloridażon, għall-fenpropimorf u għat-tralkossidim ġew stabbiliti fl-Anness II tar-Regolament (KE) Nru 396/2005. L-MRLs għall-bromopropilat ġew stabbiliti fl-Anness II u fil-Parti B tal-Anness III ta’ dak ir-Regolament skont il-prodott. L-MRLs għall-imażakwin ġew stabbiliti fil-Parti A tal-Anness III ta’ dak ir-Regolament.

(2)

Il-bromopropilat qatt ma ġie approvat fl-Unjoni bħala sustanza attiva fil-prodotti għall-protezzjoni tal-pjanti. L-MRLs għal dik is-sustanza huma stabbiliti fil-limitu tad-detezzjoni analitika (LOD). Għalhekk, jenħtieġ li jiġu mċaqalqa fl-Anness V tar-Regolament (KE) Nru 396/2005.

(3)

L-approvazzjonijiet tas-sustanzi attivi kloridażon u imażakwin skadew fil-31 ta’ Diċembru 2018, dawk tal-fenpropimorf u tat-tralkossidim skadew fit-30 ta’ April 2019 (2).

(4)

L-awtorizzazzjonijiet kollha eżistenti għall-prodotti għall-protezzjoni tal-pjanti li fihom is-sustanzi attivi kloridażon, fenpropimorf, imażakwin u tralkossidim ġew revokati. Għalhekk, huwa xieraq li jitħassru l-MRLs eżistenti stabbiliti għal dawk is-sustanzi attivi fl-Annessi II u III tar-Regolament (KE) Nru 396/2005 f’konformità mal-Artikolu 17 ta’ dak ir-Regolament flimkien mal-Artikolu 14(1), il-punt (a) u (2) tiegħu. Xi MRLs jistgħu jinżammu, b’mod partikolari dawk li huma bbażati fuq rikjesti ta’ tolleranza għall-importazzjoni li huma sikuri għall-konsumaturi u dawk li huma bbażati fuq limiti massimi ta’ residwi tal-Codex (“CXLs”), li ma ġewx stabbiliti abbażi ta’ użi obsoleti tal-Unjoni, u li huma sikuri għall-konsumaturi.

(5)

L-MRL għall-fenpropimorf fil-banana jikkorrispondi għal rikjesta ta’ tolleranza għall-importazzjoni mill-Venezwela u huwa sikur għall-konsumaturi (3). L-MRLs għall-fenpropimorf fix-xgħir, fil-ħafur, fis-segala, fil-qamħ, fl-għeruq tal-pitravi taz-zokkor, fit-tessuti kollha mill-mammiferi u fil-ħalib jikkorrispondu għas-CXLs li huma sikuri għall-konsumaturi (4). Dawk l-MRLs jenħtieġ li jinżammu fil-livelli eżistenti f’konformità mal-Artikolu 3(2), il-punt (g) u l-Artikolu 14(2), il-punti (a), (c) u (e) tar-Regolament (KE) Nru 396/2005. Għall-prodotti l-oħra kollha, jixraq li l-MRLs eżistenti stabbiliti għall-fenpropimorf fl-Anness II tar-Regolament (KE) Nru 396/2005 jitbaxxew għal-LODs f’konformità mal-Artikolu 14(1), il-punt (a), flimkien mal-Artikolu 17 ta’ dak ir-Regolament.

(6)

Il-Kummissjoni kkonsultat mal-laboratorji ta’ referenza tal-Unjoni Ewropea dwar ir-residwi tal-pestiċidi rigward il-ħtieġa li jiġu adattati ċerti LODs. Dawk il-laboratorji rrakkomandaw LODs li jistgħu jinkisbu b’mod analitiku għas-sustanzi u l-prodotti kollha.

(7)

Is-sħab kummerċjali tal-Unjoni ġew ikkonsultati dwar l-MRLs il-ġodda permezz tal-Organizzazzjoni Dinjija tal-Kummerċ, u tqiesu l-kummenti tagħhom.

(8)

Għalhekk, ir-Regolament (KE) Nru 396/2005 jenħtieġ li jiġi emendat skont dan.

(9)

Għas-sustanzi attivi kollha koperti minn dan ir-Regolament, biex ikun hemm lok għall-kummerċjalizzazzjoni, l-ipproċessar u l-konsum normali tal-prodotti, dan ir-Regolament jenħtieġ li ma japplikax għall-prodotti li ġew prodotti fl-Unjoni jew li ġew importati fl-Unjoni qabel ma jibdew japplikaw l-MRLs modifikati u li għalihom l-informazzjoni turi li jinżamm livell għoli ta’ protezzjoni tal-konsumaturi.

(10)

Jenħtieġ li jitħalla jgħaddi perjodu raġonevoli ta’ żmien qabel ma jibdew japplikaw l-MRLs modifikati, sabiex l-Istati Membri, il-pajjiżi terzi u l-operaturi tan-negozji tal-ikel jingħataw biżżejjed żmien biex iħejju ruħhom ħalli jkunu konformi mar-rekwiżiti l-ġodda li jirriżultaw mill-modifika tal-MRLs.

(11)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,