(1)

Skont l-Artikolu 11(1) tar-Regolament (UE) Nru 1380/2013, l-Istati Membri għandhom is-setgħa li fl-ilmijiet tagħhom jadottaw il-miżuri ta’ konservazzjoni tas-sajd li huma meħtieġa għall-konformità mal-obbligi tagħhom skont l-Artikolu 6 tad-Direttiva tal-Kunsill 92/43/KEE (“id-Direttiva dwar il-Ħabitats”) (2), skont l-Artikolu 4 tad-Direttiva 2009/147/KE tal-Parlament Ewropew u tal-Kunsill (“id-Direttiva dwar l-Għasafar”) (3) u skont l-Artikolu 13(4) tad-Direttiva 2008/56/KE tal-Parlament Ewropew u tal-Kunsill (“id-Direttiva Kwadru dwar l-Istrateġija Marina”) (4).

(2)

L-Artikolu 6 tad-Direttiva dwar il-Ħabitats jeħtieġ li għaż-Żoni Speċjali ta’ Konservazzjoni l-Istati Membri jistabbilixxu l-miżuri ta’ konservazzjoni meħtieġa li jikkorrispondu mar-rekwiżiti ekoloġiċi ta’ dawk it-tipi ta’ ħabitats naturali u ta’ speċijiet li jinsabu fis-siti kif elenkati fl-Annessi ta’ dik id-Direttiva.

(3)

L-Artikolu 4 tad-Direttiva dwar l-Għasafar jeħtieġ li l-Istati Membri jistabbilixxu miżuri speċjali ta’ konservazzjoni li jikkonċernaw il-ħabitat tal-ispeċijiet imsemmija fl-Anness I tagħha. Jeħtieġ ukoll li l-Istati Membri jieħdu miżuri simili ta’ konservazzjoni għall-ispeċijiet migratorji li jiġu b’mod regolari li mhumiex elenkati fl-Anness I tagħha.

(4)

Skont l-Artikolu 13(4) tad-Direttiva Kwadru dwar l-Istrateġija Marina, l-Istati Membri jeħtieġu jadottaw programmi ta’ miżuri biex jiksbu jew iżommu status ambjentali tajjeb, li jinkludu miżuri ta’ protezzjoni spazjali li jikkontribwixxu għal networks koerenti u rappreżentattivi ta’ żoni marini protetti, u jkopru b’mod adegwat id-diversità tal-ekosistemi kostitwenti, bħal żoni speċjali ta’ konservazzjoni skont id-Direttiva dwar il-Ħabitats, bħal żoni ta’ protezzjoni speċjali skont id-Direttiva dwar l-Għasafar, u bħal żoni marini protetti kif miftiehma mill-Unjoni jew mill-Istati Membri kkonċernati fil-qafas ta’ ftehimiet internazzjonali jew reġjonali li għalihom ikunu partijiet.

(5)

Meta Stat Membru jqis li jeħtieġ li jiġu adottati miżuri għall-konformità mal-obbligi tiegħu skont il-leġiżlazzjoni ambjentali tal-Unjoni u Stati Membri oħra jkollhom interess ta’ ġestjoni dirett fis-sajd li se jiġi affettwat minn tali miżuri, il-Kummissjoni għandha s-setgħa li tadotta dawn il-miżuri permezz ta’ atti delegati wara rakkomandazzjoni konġunta ppreżentata mill-Istati Membri.

(6)

Ir-Regolament Delegat tal-Kummissjoni (UE) 2017/118 (5) jistabbilixxi miżuri ta’ konservazzjoni f’ċerti żoni marini protetti fil-Kattegat u fiż-żona marina protetta ta’ Bratten fil-Baħar tat-Tramuntana.

(7)

Fit-2 ta’ Frar 2021, wara li kkonsultaw mal-Kunsill Konsultattiv tal-Baħar tat-Tramuntana, id-Danimarka, l-Iżvezja u l-Ġermanja ppreżentaw żewġ rakkomandazzjonijiet konġunti għall-ġestjoni tas-sajd f’ċerti żoni tal-Kattegat lill-Kummissjoni. Id-Danimarka ressqet rakkomandazzjoni konġunta biex tipproteġi qiegħ il-baħar artab u l-istrutturi tal-iskoll mis-sajd b’irkapti mobbli tal-kuntatt mal-qiegħ f’sitt żoni tad-Direttiva Kwadru dwar l-Istrateġija Marina (MSFD) u f’sit wieħed ta’ Natura 2000 fil-parti Daniża tal-Kattegat. L-Iżvezja ppreżentat rakkomandazzjoni konġunta biex tipproteġi speċijiet u tipi ta’ ħabitats sensittivi billi tippermetti biss ċerti rkapti tas-sajd f’erba’ żoni marini protetti fil-parti Żvediża tal-Kattegat.

(8)

F’Ottubru 2021, permezz ta’ proċedura bil-miktub il-Kummissjoni ppreżentat dawn il-miżuri lil grupp ta’ esperti magħmul minn rappreżentanti tal-Istati Membri.

(9)

Il-Kumitat Xjentifiku, Tekniku u Ekonomiku għas-Sajd (“STECF”) analizza dawn ir-rakkomandazzjonijiet konġunti u kkonkluda (6) li l-miżuri jirrappreżentaw pass pożittiv ’il quddiem lejn il-minimizzazzjoni tal-impatti negattivi tal-attivitajiet tas-sajd fuq il-ħabitats ikkonċernati. Dawn ir-rakkomandazzjonijiet konġunti huma mistennija wkoll li jikkontribwixxu għall-protezzjoni adegwata ta’ speċijiet u ta’ tipi ta’ ħabitats deżinjati u sensittivi u l-funzjonijiet ekoloġiċi assoċjati fiż-żoni marini protetti.

(10)

Il-miżuri proposti mid-Danimarka għandhom l-għan li jipprojbixxu l-irkapti mobbli tal-kuntatt mal-qiegħ fiż-żoni deżinjati. L-STECF ikkonkluda (7) li l-projbizzjoni ta’ dan l-irkaptu f’dawn il-ħabitats vulnerabbli tagħti aktar protezzjoni ta’ qiegħ il-baħar artab u tal-istrutturi tal-iskoll (tip ta’ ħabitat 1170) mill-impatt tal-attivitajiet tas-sajd, u b’hekk tikkontribwixxi biex jintlaħqu l-miri ambjentali.

(11)

Il-miżuri proposti mill-Iżvezja għandhom l-għan li jiddeżinjaw żoni tas-sajd ristretti u żoni fejn l-operazzjonijiet tas-sajd ikunu pprojbiti. L-STECF ikkonkluda (8) li l-impatt tal-irkapti tas-sajd proposti f’żoni tas-sajd ristretti x’aktarx li jkun żgħiru li l-miżuri proposti se jkunu pass pożittiv ’il quddiem lejn il-minimizzazzjoni tal-impatti negattivi tal-attivitajiet tas-sajd fuq il-ħabitats ikkonċernati. Il-Kummissjoni tinnota wkoll li l-Istati Membri impenjaw ruħhom fir-rakkomandazzjoni konġunta li jipproponu aktar aġġustamenti u li jirrestrinġu s-sajd bl-għeżula jekk dan jitqies meħtieġ.

(12)

L-Istati Membri ssuġġerew miżuri ta’ kontroll u ta’ infurzar ibbażati fuq l-użu ta’ sistema ta’ identifikazzjoni awtomatika (“AIS”) għal żoni speċifiċi. L-STECF ikkonkluda (9) li l-AIS għandha tkun biżżejjed biex jitwettaq monitoraġġ f’ħin reali f’dawn iż-żoni.

(13)

Jenħtieġ li r-Regolament Delegat (UE) 2017/118 jiġi emendat biex jinkludi t-tartarun tal-par Skoċċiż (SPR) fid-definizzjoni ta’ rkaptu mobbli tal-kuntatt mal-qiegħ. L-SPR tħalla barra bi żball mir-rakkomandazzjonijiet konġunti ppreżentati mid-Danimarka fl-2015 u fl-2016 biex jiġi pprojbit l-użu ta’ rkapti mobbli tal-kuntatt mal-qiegħ fiż-Żoni 1. L-Istati Membri talbu lill-Kummissjoni tikkoreġi din l-ommissjoni.

(14)

Ir-Regolament Delegat (UE) 2017/118 u r-rakkomandazzjoni konġunta ppreżentata mid-Danimarka jkopru biss l-irkapti tal-kuntatt mal-qiegħ li huma mobbli. Għalhekk, għal raġunijiet ta’ ċarezza, it-terminu “mobbli” jenħtieġ li jiddaħħal fid-definizzjoni tal-irkapti tal-kuntatt mal-qiegħ li jipprevedi dan ir-Regolament.

(15)

Għalhekk, jenħtieġ li r-Regolament Delegat (UE) 2017/118 jiġi emendat skont dan.

(16)

Dan ir-Regolament Delegat huwa mingħajr preġudizzju għall-ħtieġa ta’ miżuri ta’ konservazzjoni addizzjonali meħtieġa għall-konformità mad-dispożizzjonijiet rilevanti u mal-pożizzjoni tal-Kummissjoni rigward il-konformità tal-Istati Membri interessati mal-obbligi tagħhom skont il-leġiżlazzjoni ambjentali rilevanti tal-Unjoni,

(1)

Il-Kummissjoni eżaminat it-talba ta’ tal-Greċja għall-approvazzjoni ta’ emenda fl-Ispeċifikazzjoni tal-Prodott ta’ Indikazzjoni Ġeografika Protetta “Επανομή” (Epanomi), f’konformità mal-Artikolu 105 tar-Regolament (UE) Nru 1308/2013.

(2)

Il-Kummissjoni ppubblikat it-talba għall-approvazzjoni tal-emenda għall-Ispeċifikazzjoni tal-Prodott skont l-Artikolu 97(3) tar-Regolament (UE) Nru 1308/2013, f’Il-Ġurnal Uffiċjali tal-Unjoni Ewropea (2).

(3)

Il-Kummissjoni ma rċeviet l-ebda dikjarazzjoni ta’ oppożizzjoni f’konformità mal-Artikolu 98 tar-Regolament (UE) Nru 1308/2013.

(4)

Għalhekk jenħtieġ li l-emenda fl-Ispeċifikazzjoni tal-Prodott tiġi approvata f’konformità mal-Artikolu 99 tar-Regolament (UE) Nru 1308/2013.

(5)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,

(1)

Abbażi tad-definizzjoni ta’ aġġustament għar-riskju ta’ kreditu stabbilita fil-punt (95) tal-Artikolu 4(1) tar-Regolament (UE) Nru 575/2013, huwa biss it-telf ta’ kreditu mistenni rifless fl-aġġustamenti speċifiċi għar-riskju ta’ kreditu magħmula mill-istituzzjoni li żżomm l-iskopertura inadempjenti li jista’ jiġi kontabilizzat fl-assenjazzjoni ta’ ponderazzjoni tar-riskju għall-finijiet tal-Artikolu 127(1) ta’ dak ir-Regolament. Madankollu, it-telf ta’ kreditu kkontabilizzat fil-prezz tat-tranżazzjoni tal-iskopertura inadempjenti, li l-istituzzjoni tal-bejgħ iżżomm bħala telf realizzat, ma jistax jiġi rikonoxxut wara l-bejgħ mill-istituzzjoni akkwirenti. B’riżultat ta’ dan, il-piż tar-riskju applikabbli applikat għall-iskopertura inadempjenti jista’ jinbidel wara l-bejgħ ta’ dik l-iskopertura, anki jekk il-prezz tat-tranżazzjoni jkun jinkorpora skont ta’ ammont ugwali għall-aġġustamenti speċifiċi għar-riskju ta’ kreditu għal telf ta’ kreditu mistenni rreġistrat mill-istituzzjoni tal-bejgħ qabel il-bejgħ. Din is-sitwazzjoni toħloq impediment regolatorju għall-ħolqien ta’ swieq sekondarji għal skoperturi inadempjenti, peress li l-misallinjament potenzjali bejn il-piżijiet tar-riskju applikati għall-iskopertura inadempjenti mill-istituzzjoni tal-bejgħ u mill-istituzzjoni akkwirenti rispettivament jista’ jrendi t-tranżazzjoni inqas attraenti għall-istituzzjoni akkwirenti u għalhekk joħloq ostakli bla bżonn għall-istituzzjonijiet ta’ kreditu biex ineħħu l-iskoperturi inadempjenti mill-karti tal-bilanċ tagħhom.

(2)

Sabiex titqies ukoll il-possibbiltà li l-pandemija tal-COVID-19 tista’ tirriżulta f’żieda fil-livelli ta’ skoperturi inadempjenti fl-istituzzjonijiet ta’ kreditu, ikun tajjeb li jitneħħa kull impediment regolatorju għall-ħolqien ta’ swieq sekondarji għal skoperturi inadempjenti. Għalhekk hemm bżonn li jiġi żgurat li l-aġġustamenti speċifiċi għar-riskju ta’ kreditu rikonoxxuti għall-finijiet tal-Artikolu 127(1) tar-Regolament (UE) Nru 575/2013 jinkorporaw kull skont fi prezz tat-tranżazzjoni ta’ skopertura inadempjenti li l-istituzzjoni akkwirenti ma tkunx irrikonoxxiet billi żżid il-kapital tal-Grad 1 ta’ Ekwità Komuni. B’mod partikolari, sabiex jiġi evitat li jkun hemm xi rikonoxximent doppju mhux dovut tat-tnaqqis potenzjali fil-livell ta’ telf mistenni mill-istituzzjoni akkwirenti wara x-xiri kemm fuq il-kapital tal-Grad 1 ta’ Ekwità Komuni ta’ dik l-istituzzjoni kif ukoll għall-finijiet tad-determinazzjoni tal-piż tar-riskju f’konformità mal-Artikolu 127(1) tar-Regolament (UE) Nru 575/2013, f’każ ta’ rivalutazzjoni tal-iskopertura inadempjenti li sseħħ wara x-xiri tagħha, jenħtieġ li l-iskont ma jibqax jinkorpora l-parti tal-ammont ta’ rivalutazzjoni tal-iskopertura inadempjenti li tkun ġiet rikonoxxuta bħala li żżid il-kapital tal-Grad 1 ta’ Ekwità Komuni tal-istituzzjoni.

(3)

Għaldaqstant, jenħtieġ li r-Regolament ta’ Delega tal-Kummissjoni (UE) Nru 183/2014 (2) jiġi emendat skont dan.

(4)

Dan ir-Regolament huwa bbażat fuq l-abbozz ta’ standards tekniċi regolatorji ppreżentat lill-Kummissjoni mill-Awtorità Bankarja Ewropea.

(5)

L-Awtorità Bankarja Ewropea wettqet konsultazzjonijiet pubbliċi miftuħin dwar l-abbozz ta’ standards tekniċi regolatorji li dan ir-Regolament huwa bbażat fuqu, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 (3).

(1)

Skont l-ewwel subparagrafu tal-Artikolu 53(1) tar-Regolament (UE) Nru 1151/2012, il-Kummissjoni eżaminat it-talba tal-Italja għall-approvazzjoni ta’ emenda fl-ispeċifikazzjoni tal-prodott tad-denominazzjoni ta’ oriġini protetta “Taleggio” li ġiet irreġistrata skont ir-Regolament tal-Kummissjoni (KE) Nru 1107/96 (2).

(2)

Billi l-emenda kkonċernata mhix minuri skont it-tifsira tal-Artikolu 53(2) tar-Regolament (UE) Nru 1151/2012, il-Kummissjoni ppubblikat it-talba biex issir emenda f’Il-Ġurnal Uffiċjali tal-Unjoni Ewropea, kif stipulat fl-Artikolu 50(2)(a) ta’ dak ir-Regolament (3).

(3)

Billi l-Kummissjoni ma rċeviet l-ebda dikjarazzjoni ta’ oppożizzjoni f’konformità mal-Artikolu 51 tar-Regolament (UE) Nru 1151/2012, jenħtieġ li l-emenda fl-Ispeċifikazzjoni tal-Prodott tiġi approvata,

(1)

Skont l-ewwel subparagrafu tal-Artikolu 53(1) tar-Regolament (UE) Nru 1151/2012, il-Kummissjoni eżaminat it-talba tal-Italja għall-approvazzjoni ta’ emenda fl-Ispeċifikazzjoni tal-Prodott tad-Denominazzjoni ta’ Oriġini Protetta “Monte Etna” li ġiet irreġistrata skont ir-Regolament tal-Kummissjoni (KE) Nru 1491/2003 (2).

(2)

Billi l-emenda kkonċernata mhix minuri skont it-tifsira tal-Artikolu 53(2) tar-Regolament (UE) Nru 1151/2012, il-Kummissjoni ppubblikat it-talba biex issir emenda f’Il-Ġurnal Uffiċjali tal-Unjoni Ewropea, kif stipulat fl-Artikolu 50(2)(a) ta’ dak ir-Regolament (3).

(3)

Billi l-Kummissjoni ma rċeviet l-ebda dikjarazzjoni ta’ oppożizzjoni f’konformità mal-Artikolu 51 tar-Regolament (UE) Nru 1151/2012, jenħtieġ li l-emenda fl-Ispeċifikazzjoni tal-Prodott tiġi approvata,

(1)

F’konformità mal-ewwel sottoparagrafu tal-Artikolu 53(1), tar-Regolament (UE) Nru 1151/2012, il-Kummissjoni eżaminat l-applikazzjoni tal-Italja għall-approvazzjoni ta’ emenda tal-Ispeċifikazzjoni tal-Prodott tal-Indikazzjoni Ġeografika Protetta “Radicchio di Verona”, irreġistrata skont ir-Regolament tal-Kummissjoni (KE) Nru 98/2009 (2).

(2)

Billi l-emenda kkonċernata mhix minuri skont it-tifsira tal-Artikolu 53(2) tar-Regolament (UE) Nru 1151/2012, il-Kummissjoni ppubblikat it-talba biex issir emenda f’Il-Ġurnal Uffiċjali tal-Unjoni Ewropea, kif stipulat fl-Artikolu 50(2)(a) ta’ dak ir-Regolament (3).

(3)

Billi l-Kummissjoni ma rċeviet l-ebda dikjarazzjoni ta’ oppożizzjoni f’konformità mal-Artikolu 51 tar-Regolament (UE) Nru 1151/2012, jenħtieġ li l-emenda fl-Ispeċifikazzjoni tal-Prodott tiġi approvata,

(1)

F’konformità mal-Artikolu 50(2)(a) tar-Regolament (UE) Nru 1151/2012, l-applikazzjoni tal-Iżvezja għar-reġistrazzjoni tal-isem “Äkta Gränna Polkagrisar” ġiet ippubblikata f’Il-Ġurnal Uffiċjali tal-Unjoni Ewropea (2).

(2)

Ma ġiet innotifikata l-ebda dikjarazzjoni ta’ oppożizzjoni lill-Kummissjoni skont l-Artikolu 51 tar-Regolament (UE) Nru 1151/2012, għalhekk jenħtieġ li l-isem “Äkta Gränna Polkagrisar” jiġi rreġistrat,

(1)

Ir-Regolament ta’ Implimentazzjoni tal-Kummissjoni (UE) 2019/2072 (2) jistabbilixxi l-lista ta’ pesti ta’ kwarantina fl-Unjoni mhux magħrufa li jseħħu fit-territorju tal-Unjoni, fil-Parti A tal-Anness II. Ir-Regolament ta’ Implimentazzjoni (UE) 2019/2072 għandu l-għan li jipprevjeni d-dħul, l-istabbiliment u t-tixrid ta’ tali pesti ta’ kwarantina fit-territorju tal-Unjoni, billi jistabbilixxi rekwiżiti speċjali, fl-Anness VII tiegħu, għall-introduzzjoni fit-territorju tal-Unjoni ta’ ċerti pjanti, prodotti mill-pjanti u oġġetti oħra.

(2)

Thaumatotibia leucotreta (Meyrick) (“il-pest speċifikat”) huwa elenkat fil-Parti A tal-Anness II tar-Regolament ta’ Implimentazzjoni (UE) 2019/2072 bħala pest ta’ kwarantina fl-Unjoni, li mhuwiex magħruf li jeżisti fl-Unjoni. Huwa elenkat ukoll bħala pest ta’ prijorità fl-Anness tar-Regolament Delegat tal-Kummissjoni (UE) 2019/1702 (3). Il-pest speċifikat huwa polifagu u ġie interċettat fuq għadd ta’ pjanti ospitanti waqt il-kontrolli fil-fruntieri tat-territorju tal-Unjoni.

(3)

Jeżistu rekwiżiti speċifiċi għall-importazzjoni tal-frott ta’ Capsicum (L.), Citrus L., għajr għal Citrus aurantiifolia (Christm.) Swingle u Citrus limon (L.) Osbeck, tal-frott ta’ Prunus persica (L.) Batsch u ta’ Punica granatum L. biex it-territorju tal-Unjoni jitħares minn pesti speċifiċi (4). Citrus L. hija kategorija li tkopri l-frott ta’ Citrus sinensis Pers.

(4)

Skont ir-rekwiżiti eżistenti tal-importazzjoni, jeħtieġ li qabel il-kummerċ tiġi kkomunikata l-informazzjoni dwar il-ħelsien tal-pajjiż, il-ħelsien taż-żona mill-pest speċifikat, u l-użu ta’ approċċ ibbażat fuq is-sistemi u kull trattament ta’ wara l-ħsad flimkien mal-evidenza dokumentarja tal-effettività ta’ dawk ir-rekwiżiti. Din l-informazzjoni jenħtieġ li tippermetti evalwazzjoni aktar faċli tal-effettività tar-rekwiżiti speċjali attwali. Dik l-effettività jenħtieġ li titkejjel skont l-għadd ta’ nuqqasijiet ta’ konformità minħabba l-pest speċifikat fuq il-komoditajiet ospitanti importati.

(5)

Peress li waqt il-kontrolli fil-fruntieri tat-territorju tal-Unjoni, għadhom iseħħu nuqqasijiet ta’ konformità tal-kunsinni mar-rekwiżiti speċifiċi tal-importazzjoni minħabba l-preżenza tal-pest speċifikat fuq il-komoditajiet ospitanti, huwa ġġustifikat li jiġu emendati r-rekwiżiti speċjali stabbiliti fl-Anness VII tar-Regolament ta’ Implimentazzjoni (UE) 2019/2072. B’mod partikolari, ir-rekwiżiti speċjali relatati mal-ħelsien mill-pest tal-post tal-produzzjoni, mal-użu ta’ trattamenti ta’ wara l-ħsad u mal-approċċ ibbażat fuq is-sistemi, jenħtieġ li jiġu emendati biex joffru garanziji aħjar tal-ħelsien mill-pesti tal-prodotti tal-frott ikkummerċjalizzati.

(6)

L-emendar tar-rekwiżiti speċjali huwa bbażat fuq l-informazzjoni xjentifika u teknika tal-analiżi tar-riskju tal-pesti mwettqa mill-Organizzazzjoni Ewropea u Mediterranja għall-Protezzjoni tal-Pjanti (“EPPO”), huwa bbażat fuq il-valutazzjonijiet tar-riskju tal-komoditajiet imwettqa mill-Awtorità Ewropea dwar is-Sigurtà fl-Ikel fuq il-frott ta’ Citrus spp. importat mill-Iżrael (5) u mill-Afrika t’Isfel (6), huwa bbażat fuq il-letteratura xjentifika rilevanti, u fuq il-kummenti li waslu minn pajjiżi terzi wara konsultazzjoni fl-Organizzazzjoni Dinjija tal-Kummerċ (il-Ftehim dwar il-Miżuri Sanitarji u Fitosanitarji).

(7)

L-approvazzjoni rispettiva tal-faċilitajiet, tar-rekwiżiti għall-faċilitajiet tat-trattament, tal-monitoraġġ, l-awditjar, il-proċeduri ta’ dokumentazzjoni u ż-żamma tar-rekords tat-trattament applikat jenħtieġ li jiġu żgurati, sabiex jiġu ggarantiti s-sikurezza u t-traċċabbiltà fitosanitarji.

(8)

Bħalissa, ir-rekwiżiti stabbiliti fl-Anness VII tar-Regolament ta’ Implimentazzjoni (UE) 2019/2072 għall-frott ta’ Citrus L huma applikabbli wkoll għal Citrus sinensis Pers. Abbażi tad-data dwar in-nuqqas ta’ konformità minħabba l-preżenza tal-pest speċifikat fuq il-frott ta’ Citrus, il-frott ta’ Citrus sinensis Pers. jenħtieġ li jkun soġġett għal rekwiżiti separati, u mhux għall-istess rekwiżiti bħal frott ieħor ta’ Citrus L. Dan huwa importanti sabiex ikun iżjed żgur li dan ikun ħieles mill-pest speċifikat. Tali rekwiżiti jenħtieġ li jinkludu approċċ ibbażat fuq is-sistemi b’reġim speċifiku ta’ trattament kiesaħ, possibbilment bi stadju ta’ tkessiħ minn qabel sabiex tiġi żgurata l-ikbar probabbiltà possibbli ta’ ħelsien mill-pesti.

(9)

Sabiex l-awtoritajiet kompetenti u l-operaturi professjonisti jkunu jistgħu jadattaw għall-approċċ ibbażat fuq is-sistemi, għal Citrus sinensis Pers., jenħtieġ li sal-31 ta’ Diċembru 2022 jiġi previst rekwiżit alternattiv u temporanju ta’ approċċ ibbażat fuq is-sistemi, li jinkludi stadju ta’ tkessiħ minn qabel tal-polpa tal-frott sa 5 °C, segwit minn trattament kiesaħ għal mill-inqas 25 jum f’temperatura stabbilita bejn –1 °C u + 2 °C.

(10)

Fil-każ ta’ Citrus sinensis Pers., meta t-trattament kiesaħ jiġi applikat waqt it-trasport tal-frott ikkonċernat, jenħtieġ li jinżammu r-rekords tal-applikazzjoni ta’ dak it-trattament, u li dawn ikunu disponibbli meta jintalbu.

(11)

Jenħtieġ li dan ir-Regolament jidħol fis-seħħ u japplika malajr kemm jista’ jkun sabiex ir-rekwiżiti msaħħa, li jżidu l-protezzjoni tal-Unjoni kontra dan il-pest, jiġu implimentati fl-iqsar żmien, sabiex jitqiesu l-kunsinni tal-frott speċifikat fi triqthom lejn l-Unjoni fiż-żmien tad-dħul fis-seħħ ta’ dan ir-Regolament.

(12)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Il-verżjoni tal-lingwa Ċeka tar-Regolament ta’ Implimentazzjoni (UE) 2015/1502 (2) fiha żball fl-Anness, it-Taqsima 2.1.2 (L-għoti ta’ prova tal-identità u l-verifika (persuna fiżika)), ir-ringiela li tikkonċerna l-livell ta’ Assigurazzjoni “Għoli”, il-kolonna “Elementi meħtieġa”, il-punt 1(c) fir-rigward tal-identifikazzjoni tal-livell ta’ assigurazzjoni meħtieġ.

(2)

L-verżjoni tal-lingwa Ċeka tar-Regolament ta’ Implimentazzjoni (UE) 2015/1502 għalhekk jenħtieġ li tiġi kkoreġuta kif xieraq. Il-verżjonijiet lingwistiċi l-oħra mhumiex affettwati.

(3)

Il-miżuri previsti f’dan ir-Regolament huma skont l-opinjoni tal-Kumitat imsemmi fl-Artikolu 48 tar-Regolament (UE) Nru 910/2014,

(1)

Ir-Regolament (UE) 2015/2283 jipprevedi li l-ikel il-ġdid awtorizzat biss u inkluż fil-lista tal-Unjoni tal-ikel ġdid jista’ jitqiegħed fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni ta’ ikel ġdid.

(3)

Fit-22 ta’ Jannar 2020, il-kumpanija “Sabinsa Europe GmbH” (“l-applikant”) ippreżentat applikazzjoni għall-awtorizzazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex tqiegħed it-tetraidrokurkuminojdi fis-suq tal-Unjoni bħala ikel ġdid. It-tetraidrokurkuminojdi jiġu prodotti bl-idroġenizzazzjoni tal-kurkuminojdi estratti mir-riżomi tal-pjanta taż-żagħfran tal-Indja (Curcuma longa L.). L-applikant talab li t-tetraidrokurkuminojdi jintużaw f’livelli li ma jaqbżux il-300 mg kuljum, fis-supplimenti tal-ikel kif hemm iddefinit fid-Direttiva 2002/46/KE tal-Parlament Ewropew u tal-Kunsill (3), maħsuba għall-popolazzjoni adulta, minbarra n-nisa tqal u dawk li jkunu qed ireddgħu.

(4)

Fit-22 ta’ Jannar 2020, lill-Kummissjoni l-applikant talabha wkoll il-protezzjoni tad-data proprjetarja għad-data analitika (4), għal test reversiv (5), għal assaġġ tal-mikronukleu in vitro (6), għal studju tat-tossiċità orali subkronika ta’ 90 jum, u għal test tal-iskrinjar tat-tossiċità riproduttiva/tal-iżvilupp fir-rodituri (7), li kienu ġew sottomessi b’appoġġ tal-applikazzjoni.

(5)

Fid-29 ta’ Lulju 2020, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) twettaq valutazzjoni tat-tetraidrokurkuminojdi bħala ikel ġdid.

(6)

Fis-27 ta’ Ottubru 2021, l-Awtorità adottat l-opinjoni xjentifika tagħha “Safety of tetrahydrocurcuminoids from turmeric (Curcuma longa L.) as a novel food pursuant to Regulation (UE) 2015/2283” (8) f’konformità mal-Artikolu 11 tar-Regolament (UE) 2015/2283.

(7)

Fl-opinjoni xjentifika tagħha, l-Awtorità kkonkludiet li t-tetraidrokurkuminojdi huma sikuri fil-kundizzjonijiet tal-użu proposti, għall-popolazzjonijiet fil-mira proposti, f’livelli li ma jaqbżux il-140 mg kuljum. L-Awtorità ddikjarat ukoll li dan il-konsum, għalkemm aktar baxx mil-livell ta’ 300 mg kuljum propost mill-applikant, jipprovdi Marġni ta’ Espożizzjoni (“MoE”) adegwat għal-Livelli identifikati Bla Effett Ħażin Osservat (“NOAELs”) mit-tossiċità subkronika u mill-istudji dwar it-tossiċità riproduttiva/tal-iżvilupp. Għalhekk, dik l-opinjoni xjentifika tagħti biżżejjed raġunijiet biex jiġi stabbilit li t-tetraidrokurkuminojdi meta jintużaw f’livelli li ma jaqbżux il-140 mg kuljum fis-supplimenti tal-ikel maħsuba għall-popolazzjoni adulta, minbarra n-nisa tqal u li qed ireddgħu, jissodisfaw il-kundizzjonijiet biex jitqiegħdu fis-suq f’konformità mal-Artikolu 12(1) tar-Regolament (UE) 2015/2283.

(8)

Fl-opinjoni xjentifika tagħha, l-Awtorità għamlet l-osservazzjoni li l-konklużjoni tagħha dwar is-sikurezza ta’ dan l-ikel il-ġdid kienet ibbażata fuq id-data analitika, fuq it-test reversiv, fuq l-assaġġ tal-mikronukleu in vitro, fuq l-istudju tat-tossiċità orali subkronika ta’ 90 jum, u fuq it-test tal-iskrinjar tat-tossiċità riproduttiva/tal-iżvilupp fir-rodituri, li jinsabu fil-fajl tal-applikant, u li mingħajrhom ma kinitx tkun tista’ tivvaluta l-ikel il-ġdid u tasal għall-konklużjoni tagħha.

(9)

Il-Kummissjoni talbet lill-applikant jiċċara aktar il-ġustifikazzjoni pprovduta fir-rigward tal-pretensjoni proprjetarja tiegħu fuq dawk l-istudji u t-testijiet u biex jiċċara t-talba tiegħu li jkollu d-dritt esklużiv ta’ referenza għalihom f’konformità mal-Artikolu 26(2)(b) tar-Regolament (UE) 2015/2283.

(10)

L-applikant iddikjara li meta ppreżenta l-applikazzjoni kellu d-drittijiet proprjetarji u esklussivi ta’ referenza għad-data analitika, għat-test reversiv, għall-assaġġ tal-mikronukleu in vitro, għall-istudju tat-tossiċità subkronika orali ta’ 90 jum u għat-test tal-iskrinjar tat-tossiċità riproduttiva/tal-iżvilupp fir-rodituri, u li l-partijiet terzi ma jistgħux jaċċessaw, jużaw jew jirreferu b’mod legali għal dik id-data.

(11)

Il-Kummissjoni vvalutat l-informazzjoni kollha pprovduta mill-applikant u qieset li huma wrew b’mod sostanzjali t-twettiq tar-rekwiżiti stabbiliti fl-Artikolu 26(2) tar-Regolament (UE) 2015/2283. Għalhekk, id-data analitika, it-test reversiv, l-assaġġ tal-mikronukleu in vitro, u l-istudju tat-tossiċità subkronika orali ta’ 90 jum u t-test tal-iskrinjar tat-tossiċità riproduttiva/tal-iżvilupp fir-rodituri, jenħtieġ li jiġu protetti f’konformità mal-Artikolu 27(1) tar-Regolament (UE) 2015/2283. Għaldaqstant jenħtieġ li l-applikant biss ikun awtorizzat iqiegħed it-tetraidrokurkuminojdi fis-suq fl-Unjoni matul perjodu ta’ ħames snin mid-dħul fis-seħħ ta’ dan ir-Regolament.

(12)

Madankollu, ir-restrizzjoni tal-awtorizzazzjoni tat-tetraidrokurkuminojdi, u tar-referenza għad-data xjentifika li tinsab fil-fajl tal-applikant għall-użu tiegħu biss ma twaqqafx lil applikanti sussegwenti milli japplikaw għal awtorizzazzjoni għat-tqegħid fis-suq tal-istess ikel ġdid, dment li l-applikazzjoni tagħhom tissejjes fuq informazzjoni miksuba legalment li tappoġġa t-tali awtorizzazzjoni.

(13)

Huwa xieraq li l-inklużjoni tat-tetraidrokurkuminojdi bħala ikel ġdid fil-lista tal-Unjoni tal-ikel ġdid ikun fiha l-informazzjoni msemmija fl-Artikolu 9(3) tar-Regolament (UE) 2015/2283. Il-kurkuminojdi mhux idroġenati u/jew il-kurkumina ilhom fjintużaw fis-supplimenti tal-ikel fis-suq tal-Unjoni minn qabel il-15 ta’ Mejju 1997. Il-kurkumina u l-kurkuminojdi jiġu metabolizzati fil-ġisem permezz tal-istess mogħdijiet metaboliċi li jimmetabolizzaw it-tetraidrokurkuminojdi. Peress li ma jistax jiġi eskluż li l-konsum tal-kurkuminojdi mill-użu kkombinat tat-tnejn jirriżulta f’MoE li huwa aktar baxx mill-MoE stabbilit mill-Awtorità, jeħtieġ li l-konsumaturi jiġu infurmati li s-supplimenti tal-ikel li fihom it-tetraidrokurkuminojdi ma għandhomx jittieħdu fl-istess ġurnata li jittieħdu s-supplimenti tal-ikel li fihom il-kurkumina u/jew il-kurkuminojdi.

(14)

Jenħtieġ li t-tetraidrokurkuminojdi jiddaħħlu fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470. Għaldaqstant jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat skont dan.

(15)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Fit-23 ta’ Ġunju 2014, il-Kunsill adotta d-Deċiżjoni 2014/386/PESK (1).

(2)

L-Unjoni ma tirrikonoxxix l-annessjoni illegali tal-Krimea u Sevastopol mill-Federazzjoni Russa u tibqa’ tikkundannaha bħala ksur tad-dritt internazzjonali. L-Unjoni għadha soda fl-impenn tagħha għas-sovranità u l-integrità territorjali tal-Ukrajna fi ħdan il-fruntieri tagħha rikonoxxuti internazzjonalment u tibqa’ ddedikata għall-implimentazzjoni sħiħa tal-politika tagħha ta’ nonrikonoxximent.

(3)

Abbażi ta’ rieżami tad-Deċiżjoni 2014/386/PESK, jenħtieġ li l-miżuri restrittivi stabbiliti fiha jiġġeddu sat-23 ta’ Ġunju 2023.

(4)

Għalhekk jenħtieġ li d-Deċiżjoni 2014/386/PESK tiġi emendata skont dan,

(1)

L-influwenza tat-tjur b’livell patoġeniku għoli (HPAI) hija marda virali infettiva tal-għasafar u tista’ tħalli impatt serju fuq il-profittabbiltà tat-trobbija tat-tjur li jikkawża tfixkil fil-kummerċ fl-Unjoni u tfixkil fl-esportazzjoni lejn pajjiżi terzi. Il-viruses tal-HPAI jistgħu jinfettaw lill-għasafar migratorji, li mbagħad jistgħu jxerrdu dawn il-viruses fuq distanzi twal waqt il-migrazzjoni tagħhom fil-ħarifa u fir-rebbiegħa. Għalhekk, il-preżenza tal-viruses HPAI fl-għasafar selvaġġi hija theddida kontinwa għall-introduzzjoni diretta u indiretta ta’ dawn il-viruses fl-azjendi li jżommu t-tjur jew l-għasafar tat-trobbija. Fil-każ ta’ tifqigħa tal-HPAI, hemm riskju li l-aġent tal-marda jinfirex f’azjendi oħra li jżommu t-tjur jew l-għasafar tat-trobbija.

(2)

Ir-Regolament (UE) 2016/429 jistabbilixxi qafas leġiżlattiv ġdid għall-prevenzjoni u l-kontroll tal-mard li huwa trażmissibbli lill-annimali jew lill-bnedmin. L-HPAI jidħol fid-definizzjoni ta’ marda elenkata f’dak ir-Regolament, u hu soġġett għar-regoli dwar il-prevenzjoni u l-kontroll tal-mard stabbiliti fih. Barra minn hekk, ir-Regolament Delegat tal-Kummissjoni (UE) 2020/687 (2) jissupplimenta r-Regolament (UE) 2016/429 fir-rigward tar-regoli dwar il-prevenzjoni u l-kontroll ta’ ċertu mard elenkat, inkluż il-miżuri għall-kontroll tal-mard għall-HPAI.

(3)

Id-Deċiżjoni ta’ Implimentazzjoni tal-Kummissjoni (UE) 2021/641 (3) ġiet adottata fil-qafas tar-Regolament (UE) 2016/429, u tistabbilixxi l-miżuri għall-kontroll tal-mard marbutin mat-tifqigħat tal-HPAI.

(4)

B’mod aktar partikolari, id-Deċiżjoni ta’ Implimentazzjoni (UE) 2021/641 tipprevedi li ż-żoni ta’ protezzjoni, iż-żoni ta’ sorveljanza u ż-żoni ristretti l-oħrajn stabbiliti mill-Istati Membri wara t-tifqigħat tal-HPAI, f’konformità mar-Regolament Delegat (UE) 2020/687, għandhom jinkludu mill-inqas iż-żoni elenkati bħala żoni ta’ protezzjoni, żoni ta’ sorveljanza u żoni ristretti oħrajn fl-Anness ta’ dik id-Deċiżjoni ta’ Implimentazzjoni.

(5)

L-Anness tad-Deċiżjoni ta’ Implimentazzjoni (UE) 2021/641 ġie emendat riċentement bid-Deċiżjoni ta’ Implimentazzjoni tal-Kummissjoni (UE) 2022/898 (4), wara t-tifqigħat tal-HPAI fit-tjur jew fl-għasafar tat-trobbija fl-Ungerija, fin-Netherlands u fis-Slovakkja li kienu jeħtieġu jiġu riflessi f’dak l-Anness.

(6)

Mid-data tal-adozzjoni tad-Deċiżjoni ta’ Implimentazzjoni (UE) 2022/898, il-Ġermanja, l-Ungerija u n-Netherlands innotifikaw lill-Kummissjoni b’tifqigħat ġodda tal-HPAI fi stabbilimenti li jżommu t-tjur jew l-għasafar tat-trobbija, li jinsabu kemm fiż-żoni elenkati fl-Anness ta’ dik id-Deċiżjoni ta’ Implimentazzjoni kif ukoll barra minnhom.

(7)

Barra minn hekk, il-Kroazja nnotifikat lill-Kummissjoni dwar tifqigħa tal-HPAI fi stabbiliment fejn kienu jinżammu t-tjur jew l-għasafar tat-trobbija fil-Kontea ta’ Osjecko-Baranjska f’dak l-Istat Membru.

(8)

Barra minn hekk, il-Bulgarija nnotifikat lill-Kummissjoni dwar tifqigħa tal-HPAI fi stabbiliment fejn kienu jinżammu t-tjur jew l-għasafar tat-trobbija fil-Provinċja ta’ Dobrich f’dak l-Istat Membru.

(9)

It-tifqigħa kkonfermata fil-Kroazja tinsab qrib ħafna l-fruntiera mal-Ungerija u l-awtoritajiet kompetenti ta’ dawk l-Istati Membri kkollaboraw kif xieraq rigward l-istabbiliment taż-żona ta’ sorveljanza meħtieġa, f’konformità mar-Regolament Delegat (UE) 2020/687, għax iż-żona ta’ sorveljanza testendi fit-territorju tal-Ungerija.

(10)

L-awtoritajiet kompetenti tal-Bulgarija, tal-Ġermanja, tal-Kroazja, tal-Ungerija u tan-Netherlands ħadu l-miżuri neċessarji għall-kontroll tal-mard meħtieġa f’konformità mar-Regolament Delegat (UE) 2020/687, inkluż l-istabbiliment ta’ żoni ta’ protezzjoni u ta’ sorveljanza madwar dawk it-tifqigħat.