(1)

Xi fatturi-K fit-tifsira tal-Artikolu 4(1), il-punt (26), tar-Regolament (UE) 2019/2033 ma jeħtiġux speċifikazzjonijiet ulterjuri peress li dak ir-Regolament jelabora fid-dettall il-metodi għall-kejl tagħhom. Dan huwa l-każ tal-fattur-K tar-“riskju tal-pożizzjoni netta” (K-NPR), li huwa derivat mir-Regolament (UE) Nru 575/2013 tal-Parlament Ewropew u tal-Kunsill (2), kif ukoll tal-fattur-K tar-“riskju tal-konċentrazzjoni” (K-CON) u tal-fattur-K tal-“inadempjenza tal-kontroparti tan-negozjar” (K-TCD), li jużaw applikazzjoni simplifikata tar-rekwiżiti korrispondenti skont dak ir-Regolament. Madankollu, f’każijiet oħra bħal “assi mmaniġġjati” (AUM), “flus tal-klijenti miżmuma” (CMH), “ordnijiet tal-klijenti mmaniġġjati” (COH), “assi ssalvagwardjati u amministrati” (ASA) u “fluss tan-negozjar ta’ kuljum” (DTF), il-metodi għall-kejl tal-fatturi tagħhom jistgħu jiġu kjarifikati aktar.

(2)

L-attività kollha mwettqa minn ditta tal-investiment jenħtieġ li tkun koperta mill-fatturi-K ħalli r-riskji jiġu riflessi b’mod adegwat. Meta jitqies li aġent marbut huwa persuna fiżika jew ġuridika li taġixxi biss f’isem ċerta ditta tal-investiment u taħt ir-responsabbiltà sħiħa u inkondizzjonata ta’ dik id-ditta tal-investiment, hemm bżonn li jiġi żgurat li kwalunkwe attività tal-aġent marbut tkun inkluża fil-fatturi-K tal-AUM, l-ASA, l-CMH u l-COH ta’ ditta tal-investiment.

(3)

Is-servizz ta’ investiment tal-“konsulenza dwar investimenti” imsemmi fil-punt 5 tat-Taqsima A tal-Anness I tad-Direttiva 2014/65/UE tal-Parlament Ewropew u tal-Kunsill (3) huwa distint minn “konsulenza lill-impriżi dwar l-istruttura tal-kapital, l-istrateġija industrijali u materji relatati u l-konsulenza u s-servizzi li għandhom x’jaqsmu mal-fużjonijiet u x-xiri ta’ impriżi” imsemmi fil-punt 3 tat-Taqsima B tal-Anness I ta’ dik id-Direttiva. F’dan l-isfond u wkoll abbażi tad-definizzjoni tal-“parir dwar l-investiment ta’ natura kontinwa” fl-Artikolu 4(1), il-punt 21, tar-Regolament (UE) 2019/2033, fejn is-servizz anċillari msemmi hawn fuq mhuwiex inkluż, huwa meħtieġ li jiġi speċifikat li kwalunkwe assi mmaniġġjati relatati ma’ dak is-servizz anċillari jenħtieġ li jiġu esklużi għall-finijiet tal-kalkolu tal-K-AUM.

(4)

Sabiex jiġi żgurat kejl konsistenti tal-AUM u tal-ASA meta jiġi kkalkulat il-K-AUM u l-K-ASA, l-istrumenti finanzjarji jenħtieġ li jiġu vvalutati bil-valur ġust tagħhom skont l-istandards tal-kontabbiltà applikabbli, sabiex ikun jista’ jiġi rifless il-valur tas-suq tal-istrumenti finanzjarji, fejn disponibbli.

(5)

Peress li l-kalibrazzjoni tal-koeffiċjent CMH fit-Tabella 1 tal-Artikolu 15 tar-Regolament (UE) 2019/2033 diġà tqis ir-riskju għall-klijenti assoċjat mal-ġestjoni tal-flus, jenħtieġ li l-ammonti inklużi fil-kejl tas-CMH ma jiġux inklużi fil-kejl tal-AUM. Barra minn hekk, sabiex jiġi evitat kwalunkwe għadd doppju fil-kalkolu tar-rekwiżiti kapitali, jenħtieġ li l-ammonti diġà kkunsidrati għall-kejl tas-CMH ma jiġux inklużi fil-kejl tal-ASA.

(6)

Id-definizzjoni tas-CMH fl-Artikolu 4(1), il-punt 28, tar-Regolament (UE) 2019/2033 flimkien mal-premessa (24) ta’ dak ir-Regolament jiċċaraw l-ammonti li jenħtieġ li jiġu kkunsidrati għall-kejl tas-CMH. Għalhekk, huwa biżżejjed li jiġu speċifikati aktar l-aspetti operazzjonali li jifdal tal-metodu għall-kejl tas-CMH bil-ħsieb li tiġi żgurata r-robustezza taċ-ċifri tas-CMH, b’mod partikolari billi tiġi evitata d-dipendenza żejda fuq ir-rappurtar estern u billi ssir enfasi fuq ir-rekords u ċ-ċifri kontabilistiċi interni tad-ditta tal-investiment użati għar-rikonċiljazzjoni interna.

(7)

Il-metodi għall-kejl tal-ammonti li jridu jiġu inklużi bħala riċeviment u trażmissjoni tal-ordnijiet u l-eżekuzzjoni tal-ordnijiet fis-COH jenħtieġ li jinkludu regoli speċifiċi għall-każ fejn il-prezzijiet tas-suq ma jkunux disponibbli faċilment minħabba li ma jkunux jinsabu fl-ordnijiet. Huwa meħtieġ li jiġu riflessi d-differenzi bejn il-każ ta’ eżekuzzjoni ta’ ordnijiet u l-każ ta’ riċeviment u trasmissjoni, peress li l-prezzijiet u ż-żmien li fih l-ordnijiet jenħtieġ li jiġu rreġistrati għall-kejl tas-COH jistgħu jvarjaw f’kull każ. Barra minn hekk, fil-każ ta’ riċeviment u trażmissjoni ta’ ordnijiet, b’mod partikolari, l-ordnijiet trażmessi huma referenza aħjar għal dan il-għan milli huma l-ordnijiet riċevuti, peress li dawn tal-aħħar jistgħu ma jiġux trażmessi.

(8)

Peress li s-servizz ta’ investiment tar-“riċezzjoni u t-trażmissjoni tal-ordnijiet b’rabta ma’ strument jew strumenti finanzjarji” imsemmi fil-punt 1 tat-Taqsima A tal-Anness I tad-Direttiva 2014/65/UE huwa distint mill-attivitajiet ta’ investiment tat-“Tħaddim ta’ Faċilitajiet Multilaterali jew Organizzati tan-Negozjar — MTFs, OTFs” imsemmija fil-punti 8 u 9 tagħha, huwa meħtieġ li jiġi ċċarat li l-interessi tax-xiri u l-bejgħ miġburin flimkien f’MTFs u OTFs operati mid-ditta tal-investiment iridu ma jiġux inklużi fil-kalkolu tal-K-COH tan-negoji fi flus jew tad-derivattivi K-COH.

(9)

Peress li r-rekwiżiti kapitali għad-ditti tal-investiment skont ir-Regolament (UE) 2019/2033 huma bbażati fuq il-fatturi-K li jkopru s-servizzi u l-attivitajiet kollha inklużi fl-Anness I tad-Direttiva 2014/65/UE, huwa meħtieġ li jiġu stabbiliti regoli għall-adattament ta’ dawk il-metodi f’dawk il-każijiet fejn inkella jista’ jseħħ għadd doppju. Dan huwa l-każ, b’mod partikolari, ta’ ċerti servizzi anċillari li jistgħu jitwettqu biss flimkien mas-servizzi u mal-attivitajiet elenkati fl-Anness I, it-Taqsima A, ta’ dik id-Direttiva. Għalhekk, ordnijiet relatati mas-servizz anċillari msemmija fl-Anness I, it-Taqsima B, il-punt 3, tad-Direttiva 2014/65/UE (konsulenza lill-impriżi dwar l-istruttura tal-kapital, l-istrateġija industrijali u materji relatati u l-konsulenza u s-servizzi li għandhom x’jaqsmu mal-fużjonijiet u x-xiri ta’ impriżi), li huma relatati ma’ konsulenza dwar tranżazzjonijiet bejn investituri, fil-każ ta’ finanzjament korporattiv jew tranżazzjonijiet ta’ ekwità privata, iridu ma jiġux inklużi fil-kejl tal-AUM, u lanqas f’dak tas-COH, peress li dawk il-fatturi-K diġà jqisuhom.

(10)

Ir-Regolament (UE) 2019/2033 jipprevedi żewġ koeffiċjenti differenti għall-kejl tas-COH fit-Tabella 1 tal-Artikolu 15 tiegħu, wieħed għan-negozjar fi flus u wieħed separat għad-derivattivi. Jenħtieġ li jiġu pprovduti aktar kjarifiki dwar kif jiġu allokati n-negozji bejn iż-żewġ klassijiet ta’ strumenti u dwar il-metodu ta’ valutazzjoni li jrid jintuża f’kull każ. B’mod partikolari, jenħtieġ li d-derivattivi jiġu inklużi fil-kejl tal-fatturi-K abbażi tal-valur nozzjonali u tan-negozjar fi flus bil-valur tas-suq minħabba li l-koeffiċjenti tal-fatturi-K huma kkalibrati fuq dik il-bażi.

(11)

Huwa meħtieġ li jiġi speċifikat il-kalkolu tal-ammont nozzjonali ta’ derivattiv minħabba li r-Regolament (UE) 2019/2033 ma fihx regoli dwar kif jiġi kkalkulat. Minħabba li l-Artikolu 29(3) tar-Regolament (UE) 2019/2033 jistabbilixxi regoli dwar kif jiġi kkalkulat l-ammont nozzjonali tad-derivattivi għall-finijiet tal-kalkolu tat-TCD, u sabiex tiġi żgurata l-konsistenza fil-kejl tat-TCD u tad-DTF, jenħtieġ li dawk ir-regoli għall-kejl tal-ammont nozzjonali ta’ derivattiv japplikaw ukoll għall-kejl tad-DTF.

(12)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea (EBA).

(13)

L-EBA wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqu huwa bbażat dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (4). L-EBA kkonsultat ukoll lill-Awtorità Ewropea tat-Titoli u s-Swieq qabel ma ppreżentat l-abbozz tal-istandards tekniċi li fuqu huwa bbażat dan ir-Regolament,

(1)

Kontijiet segregati huma definiti fil-punt (49) tal-Artikolu 4(1) tar-Regolament (UE) 2019/2033 għall-finijiet tat-Tabella 1 fl-Artikolu 15(2) ta’ dak ir-Regolament. Sabiex id-ditti tal-investiment ikunu jistgħu japplikaw koeffiċjenti aktar baxxi għall-kalkolu tar-rekwiżit ta’ kapital “flus tal-klijenti miżmuma”, meta l-flus tal-klijenti jinżammu f’kontijiet segregati, jenħtieġ li l-kunċett ta’ kontijiet segregati jiġi speċifikat bħala li jħaddan il-kundizzjonijiet, li jiżguraw il-protezzjoni tal-flus tal-klijenti f’każ ta’ falliment ta’ ditta tal-investiment. Billi dawk il-kundizzjonijiet huma stabbiliti fl-Artikolu 2(1) tad-Direttiva Delegata tal-Kummissjoni (UE) 2017/593 (2), huwa xieraq li ssir referenza għall-istess kundizzjonijiet għall-finijiet tal-ispeċifikazzjoni tal-kunċett ta’ kontijiet segregati skont dan ir-Regolament. Għalhekk, jenħtieġ li dan ir-Regolament jistabbilixxi sett ta’ rekwiżiti simili bħal dawk stabbiliti fl-Artikolu 2(1) tad-Direttiva Delegata (UE) 2017/593.

(2)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea.

(3)

L-Awtorità Bankarja Ewropea wettqet konsultazzjonijiet pubbliċi miftuħin dwar l-abbozz tal-istandards tekniċi regolatorji li dan ir-Regolament huwa bbażat fuqhom, analizzat l-ispejjeż u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3),

(1)

Ir-Regolament (UE) Nru 236/2012 jistabbilixxi l-obbligu ta’ notifika lill-awtoritajiet kompetenti dwar pożizzjonijiet bin-nieqes netti sinifikanti fir-rigward tal-kapital azzjonarju maħruġ ta’ kumpanija li għandha ishma ammessi għan-negozjar f’ċentru tan-negozjar tal-Unjoni, meta l-pożizzjoni tilħaq jew taqa’ taħt il-livell limitu ta’ notifika rilevanti. Huwa meħtieġ li l-Kummissjoni timmonitorja jekk tali livell limitu ta’ notifika rilevanti jibqax xieraq fid-dawl tal-iżviluppi fis-swieq finanzjarji u tivvaluta jekk ikunx meħtieġ li dak il-limitu jiġi mmodifikat skont l-Artikolu 5(4) ta’ dak ir-Regolament.

(2)

Fil-bidu tal-2020, pressjoni sostanzjali fuq il-bejgħ u volatilità mhux tas-soltu li tirriżulta mit-tifqigħa globali tal-COVID-19 wasslet għal spirali sinifikanti ’l isfel fil-prezzijiet li jaffettwaw lill-emittenti mis-setturi kollha madwar is-swieq finanzjarji. L-awtoritàEwropea tat-Titoli u s-Swieq (ESMA) għamlet użu mis-setgħat ta’ intervent tagħha f’ċirkostanzi eċċezzjonali biex tnaqqas temporanjament il-livell limitu ta’ notifika rilevanti għal pożizzjonijiet bin-nieqes netti sinifikanti f’ishma, sabiex ittejjeb kemm l-attività ta’ monitoraġġ tal-ESMA kif ukoll tar-regolaturi ta’ tali pożizzjonijiet, tiddetermina jekk azzjonijiet aktar stretti jistgħux ikunu xierqa u jkunu jistgħu jirreaġixxu malajr.

(3)

Peress li l-livell limitu ta’ notifika rilevanti aktar baxx għal pożizzjonijiet bin-nieqes netti sinifikanti f’ishma, li ilu fis-seħħ għal tnax-il xahar konsekuttivi u, minħabba kundizzjonijiet tas-suq parzjalment imtejba, ma setax jiġi estiż aktar bħala miżura ta’ emerġenza, huwa xieraq li jiġi vvalutat l-impatt ta’ tali miżura u jiġi ddeterminat jekk għandhiex issir permanenti billi jinbidel il-livell limitu eżistenti. F’dak ir-rigward, il-Kummissjoni tqis l-opinjoni li (2)l-ESMA ħarġet fit-13 ta’ Mejju 2021.

(4)

L-iżviluppi reċenti fis-swieq finanzjarji osservati mill-Kummissjoni, bħall-instabbiltà kkawżata mit-tifqigħa globali tal-COVID-19, li wasslet għal rikors aktar frekwenti għal miżuri ta’ emerġenza dwar il-bejgħ bin-nieqes mir-regolaturi u l-ESMA, kif ukoll ir-riskju dejjem jikber ta’ investituri fil-livell tal-konsumatur li jkunu involuti fi prezzijiet qosra, enfasizzaw l-importanza li tinġabar intelligence addizzjonali f’pożizzjonijiet bin-nieqes netti sinifikanti f’ishma fuq bażi permanenti, li hija kritika għal skopijiet ta’ sorveljanza tas-suq. F’dak ir-rigward, l-opinjoni tal-ESMA vvalutat li l-livell limitu ta’ notifika rilevanti aktar baxx tejjeb b’mod sinifikanti t-trasparenza u l-monitoraġġ ta’ pożizzjonijiet bin-nieqes netti sinifikanti f’ishma fil-livell individwali, settorjali u fis-suq kollu, li rriżulta f’żieda fl-effiċjenza regolatorja. L-ESMA qieset ukoll li l-ispejjeż marġinali għall-implimentazzjoni mill-parteċipanti fis-suq għandhom ikunu negliġibbli, meta wieħed iqis li ilhom japplikaw tali livell limitu għal diversi xhur. Barra minn hekk, il-Kummissjoni tqis li l-inċertezza fir-rigward tal-obbligu ta’ rappurtar regolatorju għandha tiġi evitata u r-regoli u l-obbligi f’dan ir-rigward għandhom ikunu stabbli. Fuq dik il-bażi, u filwaqt li jitqiesu r-rakkomandazzjonijiet stabbiliti fl-opinjoni tal-ESMA, li l-Kummissjoni taqbel magħhom, huwa xieraq li jiġi emendat il-livell limitu ta’ notifika rilevanti attwali u jiġi stabbilit b’mod permanenti għal 0,1 %.

(5)

Għaldaqstant, jenħtieġ li r-Regolament (UE) Nru 236/2012 jiġi emendat skont dan,

(1)

Id-deni Afrikan tal-ħnieżer huwa marda virali infettiva li taffettwa l-annimali porċini miżmuma u selvaġġi u jista’ jkollu impatt qawwi fuq il-popolazzjoni tal-annimali kkonċernata u l-profittabbiltà tat-trobbija tal-annimali, u b’hekk jikkawża tfixkil għall-movimenti ta’ kunsinni ta’ dawk l-annimali u għall-prodotti tagħhom fl-Unjoni u għall-esportazzjonijiet lejn pajjiżi terzi.

(2)

Fil-każ ta’ tifqigħa tad-deni Afrikan tal-ħnieżer f’annimali porċini selvaġġi jkun hemm riskju serju li din il-marda tinxtered fuq annimali porċini selvaġġi oħra u f’azjendi li jżommu l-annimali porċini.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1)(a), (b) u (c) tar-Regolament (UE) 2016/429, u ddefinit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari l-Artikoli 63 sa 66 tar-Regolament Delegat (UE) 2020/687 jipprevedu ċerti miżuri li jridu jittieħdu fil-każ ta’ konferma uffiċjali tat-tifqigħa ta’ marda tal-kategorija A f’annimali selvaġġi, inkluż id-deni Afrikan tal-ħnieżer f’annimali porċini selvaġġi. B’mod notevoli, dawn id-dispożizzjonijiet jipprevedu l-istabbiliment ta’ żona infettata u projbizzjonijiet fuq il-moviment tal-annimali selvaġġi tal-ispeċi elenkata u l-prodotti li joriġinaw minn dawn l-annimali.

(4)

Ir-Regolament ta’ Implimentazzjoni tal-Kummissjoni (UE) 2021/605 (4) jistipula miżuri speċjali għall-kontroll tal-mard fir-rigward tad-deni Afrikan tal-ħnieżer. B’mod partikolari, fil-każ tat-tifqigħa ta’ din il-marda f’annimali porċini selvaġġi f’żona ta’ Stat Membru, l-Artikolu 3(b) ta’ dak ir-Regolament ta’ Implimentazzjoni jipprevedi l-istabbiliment ta’ żona infettata f’konformità mal-Artikolu 63 tar-Regolament Delegat (UE) 2020/687. Minbarra dan, l-Artikolu 6 ta’ dak ir-Regolament ta’ Implimentazzjoni jipprevedi li dik iż-żona trid tiġi elenkata bħala żona ristretta II fil-Parti II tal-Anness I tiegħu u li ż-żona infettata, stabbilita f’konformità mal-Artikolu 63 tar-Regolament Delegat (UE) 2020/687, tiġi aġġustata mingħajr dewmien biex tinkludi mill-inqas iż-żona ristretta II. Il-miżuri ta’ kontroll speċjali għad-deni Afrikan tal-ħnieżer stipulati fir-Regolament ta’ Implimentazzjoni (UE) 2021/605 jinkludu, fost l-oħrajn, projbizzjonijiet fuq il-moviment tal-kunsinni ta’ annimali porċini miżmuma fiż-żoni ristretti II u l-prodotti minnhom barra dawn iż-żoni ristretti.

(5)

L-Italja informat lill-Kummissjoni bis-sitwazzjoni attwali tad-deni Afrikan tal-ħnieżer fit-territorju tagħha, wara li din il-marda faqqgħet f’annimali porċini selvaġġi fir-reġjun ta’ Piemonte, b’konferma fis-6 ta’ Jannar 2022. Għaldaqstant, l-awtorità kompetenti ta’ dak l-Istat Membru hija meħtieġa tistabbilixxi żona infettata f’konformità mar-Regolament Delegat (UE) 2020/687 u mar-Regolament ta’ Implimentazzjoni (UE) 2021/605.

(6)

Sabiex jiġi evitat kwalunkwe tfixkil bla bżonn fil-kummerċ fl-Unjoni u sabiex tiġi evitata l-impożizzjoni ta’ ostakoli mhux ġustifikati għall-kummerċ minn pajjiżi terzi, jeħtieġ li fil-livell tal-Unjoni tiġi identifikata ż-żona infettata għad-deni Afrikan tal-ħnieżer fl-Italja f’kollaborazzjoni ma’ dak l-Istat Membru.

(7)

Biex jiġi evitat aktar tixrid tad-deni Afrikan tal-ħnieżer, waqt li ż-żona tal-Italja milquta mit-tifqigħa reċenti tkun elenkata bħala żona ristretta II fil-Parti II tal-Anness I tar-Regolament ta’ Implimentazzjoni (UE) 2021/605, il-miżuri ta’ kontroll speċjali għad-deni Afrikan tal-ħnieżer stipulati fih, li japplikaw għall-moviment tal-kunsinni ta’ annimali porċini miżmuma f’żoni ristretti II u l-prodotti minnhom barra dawn iż-żoni, għandhom japplikaw ukoll għall-movimenti ta’ dawn il-kunsinni miż-żona infettata stabbilita fl-Italja wara t-tifqigħa reċenti, minbarra l-miżuri stipulati fl-Artikoli 63 sa 66 tar-Regolament Delegat (UE) 2020/687.

(8)

Għalhekk, iż-żona infettata għandha tkun elenkata fl-Anness ta’ dan id-Deċiżjoni u għandha tkun soġġetta għall-miżuri ta’ kontroll speċjali għad-deni Afrikan tal-ħnieżer li japplikaw għaż-żoni ristretti II stipulati fir-Regolament ta’ Implimentazzjoni (UE) 2021/605. Madankollu, minħabba din is-sitwazzjoni epidemjoloġika ġdida tad-deni Afrikan tal-ħnieżer u b’kont meħud taż-żieda fir-riskju immedjat li din il-marda tkompli tinxtered, il-movimenti tal-kunsinni ta’ annimali porċini miżmuma u l-prodotti minnhom lejn Stati Membri oħra u lejn pajjiżi terzi miż-żona infettata ma għandhomx ikunu awtorizzati f’konformità ma’ dak ir-Regolament ta’ Implimentazzjoni. Din id-Deċiżjoni għandha tistabbilixxi wkoll id-durata ta’ kemm din iż-żona għandha tibqa’ elenkata.

(9)

Għaldaqstant, għall-mitigazzjoni tar-riskji li jirriżultaw mit-tifqigħa reċenti tad-deni Afrikan tal-ħnieżer f’annimali porċini selvaġġi fl-Italja, il-movimenti tal-kunsinni ta’ annimali porċini miżmuma fiż-żona infettata u l-prodotti minnhom lejn Stati Membri oħra u pajjiżi terzi ma għandhomx ikunu awtorizzati mill-Italja sad-data tal-iskadenza ta’ din id-Deċiżjoni.

(10)

Minħabba l-urġenza tas-sitwazzjoni epidemjoloġika fl-Unjoni fir-rigward tat-tixrid tad-deni Afrikan tal-ħnieżer, huwa importanti li l-miżuri stipulati f’din id-Deċiżjoni ta’ Implimentazzjoni japplikaw malajr kemm jista’ jkun.

(11)

Konsegwentement, sakemm il-Kumitat Permanenti dwar il-Pjanti, l-Annimali, l-Ikel u l-Għalf jagħti l-opinjoni tiegħu, iż-żona infettata fl-Italja għandha tiġi stabbilita minnufih u tiġi elenkata fl-Anness ta’ din id-Deċiżjoni u tiġi ffissata d-durata tal-elenkar.

(12)

Din id-Deċiżjoni għandha tiġi rieżaminata fil-laqgħa li jmiss tal-Kumitat Permanenti dwar il-Pjanti, l-Annimali, l-Ikel u l-Għalf,