27.5.2021

Il-Ġurnal Uffiċjali tal-Unjoni Ewropea

L 186/1

REGOLAMENT (UE) 2021/840 TAL-PARLAMENT EWROPEW U TAL-KUNSILL

tal-20 ta’ Mejju 2021

li jistabbilixxi programm ta’ skambju, assistenza u taħriġ għall-protezzjoni tal-euro kontra l-iffalsifikar għall-perjodu 2021-2027 (il-programm “Pericles IV”), u li jħassar ir-Regolament (UE) Nru 331/2014

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 133 tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Bank Ċentrali Ewropew (1),

Filwaqt li jaġixxu f’konformità mal-proċedura leġiżlattiva ordinarja (2),

Billi:

(1)

L-Unjoni u l-Istati Membri intrabtu bl-objettiv li jistabbilixxu l-miżuri meħtieġa għall-użu tal-euro bħala munita unika. Dawk il-miżuri jinkludu l-protezzjoni tal-euro kontra l-iffalsifikar u l-frodi relatata biex tiġi żgurata l-effettività tal-ekonomija tal-Unjoni u tiġi assigurata s-sostenibbiltà tal-finanzi pubbliċi.

(2)

Ir-Regolament tal-Kunsill (KE) Nru 1338/2001 (3) jipprevedi skambji ta’ informazzjoni, kooperazzjoni u assistenza reċiproka, u b’ hekk jistabbilixxi qafas armonizzat għall-protezzjoni tal-euro. L-effetti ta’ dak ir-Regolament ġew estiżi bir-Regolament tal-Kunsill (KE) Nru 1339/2001 (4) għal dawk l-Istati Membri li ma adottawx l-euro bħala l-munita unika tagħhom, sabiex jiġi pprovdut livell ta’ protezzjoni ekwivalenti tal-euro madwar l-Unjoni.

(3)

L-azzjonijiet li għandhom l-għan li jippromwovu l-iskambji ta’ informazzjoni u ta’ persunal, l-assistenza teknika u xjentifika u t-taħriġ speċjalizzat jgħinu b’mod sinifikanti biex jipproteġu l-munita unika tal-Unjoni kontra l-iffalsifikar u l-frodi relatata u għalhekk biex jintlaħaq livell għoli u ekwivalenti ta’ protezzjoni madwar l-Unjoni, filwaqt li tintwera l-kapaċità tal-Unjoni li tindirizza l-kriminalità organizzata serja. Tali azzjonijiet jistgħu jgħinu wkoll biex jiġu indirizzati l-isfidi komuni fil-ġlieda kontra l-kriminalità organizzata, inkluż il-ħasil tal-flus.

(4)

Programm għall-protezzjoni tal-euro kontra l-iffalsifikar jikkontribwixxi biex tiżdied is-sensibilizzazzjoni taċ-ċittadini tal-Unjoni, filwaqt li jżid il-fiduċja tagħhom f’dik il-munita u jtejjeb il-protezzjoni tal-euro, speċjalment permezz tad-disseminazzjoni kontinwa tar-riżultati ta’ azzjonijiet appoġġati minn dak il-programm.

(5)	Il-protezzjoni b’saħħitha tal-euro kontra l-iffalsifikar hija komponent ewlieni ta’ ekonomija tal-Unjoni sigura u kompetittiva, u hija marbuta direttament mal-objettiv tal-Unjoni li ttejjeb il-funzjonament effiċjenti tal-unjoni ekonomika u monetarja.

(6)

Fl-imgħoddi, l-appoġġ għal tali azzjonijiet, permezz tad-Deċiżjonijiet tal-Kunsill 2001/923/KE (5) u 2001/924/KE (6), li ġew sussegwentement emendati u estiżi bid-Deċiżjonijiet tal-Kunsill 2006/75/KE (7), 2006/76/KE (8), 2006/849/KE (9) u 2006/850/KE (10) u r-Regolament (UE) Nru 331/2014 tal-Parlament Ewropew u tal-Kunsill (11), għamilha possibbli li jittejbu l-azzjonijiet tal-Unjoni u tal-Istati Membri fil-qasam tal-protezzjoni tal-euro kontra l-iffalsifikar. L-objettivi tal-programm għall-protezzjoni tal-euro kontra l-iffalsifikar għall-perjodi preċedenti inkisbu b’suċċess.

(7)

Fl-2017, il-Kummissjoni wettqet evalwazzjoni ta’ nofs it-terminu tal-programm ta’ azzjoni pluriennali stabbilit bir-Regolament (UE) Nru 331/2014 (il-programm‘Pericles 2020’), appoġġata minn rapport indipendenti. B’mod ġenerali, ir-rapport dwar il-Programm Pericles 2020kien pożittiv iżda esprima tħassib dwar l-għadd limitat ta’ awtoritajiet kompetenti li japplikaw għall-implimentazzjoni ta’ azzjonijiet taħt il-programm Pericles 2020 u l-kwalità tal-indikaturi ewlenin tal-prestazzjoni użati biex ikejlu r-riżultati tal-programm Pericles 2020. Fil-Komunikazzjoni tagħha lill-Parlament Ewropew u lill-Kunsill dwar l-evalwazzjoni ta’ nofs it-terminu tal-programm Pericles 2020 u l-evalwazzjoni ex ante tagħha fil-forma ta’ Dokument ta’ Ħidma tal-Persunal li akkumpanja l-proposta tagħha, il-Kummissjoni kkonkludiet, filwaqt li qieset il-konklużjonijiet u r-rakkomandazzjonijiet tal-evalwazzjoni ta’ nofs it-terminu, li l-kontinwazzjoni tal-programm Pericles 2020 lil hinn mill-2020 jenħtieġ li tkun appoġġata, minħabba l-valur miżjud tiegħu għall-Unjoni, l-impatt fit-tul tiegħu u s-sostenibbiltà tal-azzjonijiet tiegħu kif ukoll il-kontribut tiegħu għall-ġlieda kontra l-kriminalità organizzata.

(8)

Il-parir fl-evalwazzjoni ta’ nofs it-terminu kien li l-azzjonijiet iffinanzjati taħt il-programm Pericles 2020 jenħtieġ li jitkomplew, filwaqt li tiġi indirizzata l-ħtieġa li tiġi ssimplifikata l-preżentazzjoni tal-applikazzjonijiet, tiġi mħeġġa d-differenzjazzjoni tal-benefiċjarji u l-parteċipazzjoni tal-akbar għadd ta’ awtoritajiet kompetenti minn pajjiżi varji fl-attivitajiet tal-programm Pericles 2020, tkompli tingħata attenzjoni lit-theddid emerġenti u rikorrenti ta’ ffalsifikar, u jiġu ssimplifikati l-indikaturi ewlenin tal-prestazzjoni.

(9)

Ġew identifikati hotspots tal-iffalsifikar f’pajjiżi terzi u l-iffalsifikar tal-euro qed jakkwista dimensjoni internazzjonali li qed tikber. It-tisħiħ tal-kapaċitajiet u l-attivitajiet ta’ taħriġ li jinvolvu lill-awtoritajiet kompetenti ta’ pajjiżi terzi jenħtieġ għalhekk li jitqiesu bħala essenzjali biex tinkiseb protezzjoni effettiva tal-euro u jenħtieġ li jiġu mħeġġa aktar fil-kuntest tal-kontinwazzjoni tal-programm Pericles 2020.

(10)

Jenħtieġ li jiġi adottat programm ġdid għall-perjodu 2021-2027 (il-programm ‘Pericles IV’). Jenħtieġ li jiġi żgurat li l-programm Pericles IV ikun konsistenti u komplementari ma’ programmi u azzjonijiet rilevanti oħra. Jenħtieġ, għalhekk, li l-Kummissjoni twettaq il-konsultazzjonijiet kollha meħtieġa fir-rigward tal-evalwazzjoni tal-ħtiġijiet għall-protezzjoni tal-euro mal-partijiet prinċipali involuti, b’mod partikolari l-awtoritajiet nazzjonali kompetenti maħtura mill-Istati Membri, mill-Bank Ċentrali Ewropew (BĊE) u mill-Europol, fi dan il-kumitat imsemmi fir-Regolament (KE) Nru 1338/2001, partikolarment fir-rigward ta’ skambji, assistenza u taħriġ, għall-fini tal-applikazzjoni tal-programm Pericles IV. Barra minn hekk, jenħtieġ li l-Kummissjoni tuża l-esperjenza vasta tal-BĊE fir-rigward tat-twettiq ta’ taħriġ u l-għoti ta’ informazzjoni dwar l-iffalsifikar tal-karti tal-flus tal-euro meta tkun qed timplimenta l-programm Pericles IV.

(11)

Ir-regoli finanzjarji orizzontali adottati mill-Parlament Ewropew u mill-Kunsill abbażi tal-Artikolu 322 tat-Trattat dwar il-Funzjonament tal-Unjoni Ewropea (TFUE) japplikaw għal dan ir-Regolament. Dawk ir-regoli huma stipulati fir-Regolament (UE, Euratom) 2018/1046 tal-Parlament Ewropew u tal-Kunsill (12) (ir-‘Regolament Finanzjarju’) u jiddeterminaw b’mod partikolari l-proċedura għall-istabbiliment u l-implimentazzjoni tal-baġit permezz ta’ għotjiet, akkwist, premjijiet u implimentazzjoni indiretta, u jipprevedu kontrolli fuq ir-responsabbiltà tal-atturi finanzjarji. Ir-regoli adottati abbażi tal-Artikolu 322 TFUE jinkludu wkoll reġim ġenerali ta’ kondizzjonalità għall-protezzjoni tal-baġit tal-Unjoni.

(12)

Minħabba li l-objettivi ta’ dan ir-Regolament, jiġifieri li jiffaċilita l-kooperazzjoni fost l-Istati Membri u bejn il-Kummissjoni u l-Istati Membri sabiex l-euro jkun protett mill-iffalsifikar, mingħajr ma jiġu affettwati r-responsabbiltajiet tal-Istati Membri, u filwaqt li r-riżorsi jintużaw b’mod iktar effiċjenti milli kieku kienu jintużaw fil-livell nazzjonali, li jassisti lill-Istati Membri biex kollettivament jipproteġu l-euro u li jħeġġeġ l-użu ta’ strutturi komuni tal-Unjoni biex jiżdiedu l-kooperazzjoni u l-iskambju f’waqtu u komprensiv ta’ informazzjoni bejn l-awtoritajiet kompetenti, ma jistgħux jinkisbu suffiċjentement mill-Istati Membri, iżda jistgħu pjuttost jinkisbu aħjar fil-livell tal-Unjoni, l-Unjoni tista’ tadotta miżuri f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi.

(13)	Jenħtieġ li l-programm Pericles IV jiġi implimentat f’konformità mal-qafas finanzjarju pluriennali stipulat fir-Regolament tal-Kunsill (UE, Euratom) 2020/2093 (13).

(14)

Sabiex jiġu żgurati kondizzjonijiet uniformi għall-implimentazzjoni tal-programm Pericles IV, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li l-Kummissjoni tadotta programmi ta’ ħidma annwali li jistabbilixxu l-prijoritajiet, it-tqassim tal-baġit u l-kriterji ta’ evalwazzjoni għall-għotjiet għal azzjonijiet. Jenħtieġ li l-każijiet eċċezzjonali u debitament ġustifikati, fejn tkun meħtieġa żieda fir-rata tal-kofinanzjament sabiex l-Istati Membri jingħataw flessibbiltà ekonomika ikbar, biex b’hekk ikunu jistgħu jwettqu u jlestu proġetti biex jipproteġu u jissalvagwardjaw l-euro b’mod sodisfaċenti, ikunu parti mill-programmi ta’ ħidma annwali.

(15)	Dan ir-Regolament jistipula pakkett finanzjarju għall-programm Pericles IV li għandu jikkostitwixxi l-ammont ta’ referenza primarja, fit-tifsira tal-Punt 18 tal-Ftehim Interistituzzjonali tas-16 ta’ Diċembru 2020 (14), għall-Parlament Ewropew u għall-Kunsill matul il-proċedura baġitarja annwali.

(16)

Sabiex tiġi żgurata l-valutazzjoni effettiva tal-progress tal-programm Pericles IV lejn il-kisba tal-objettivi tiegħu, is-setgħa li jiġu adottati atti f’konformità mal-Artikolu 290 TFUE għandha tiġi ddelegata lill-Kummissjoni fir-rigward tal-emendar tal-Anness fir-rigward tal-indikaturi fejn jitqies meħtieġ għall-finijiet ta’ evalwazzjoni, kif ukoll biex dan ir-Regolament jiġi ssupplimentat b’dispożizzjonijiet dwar l-istabbiliment ta’ qafas ta’ monitoraġġ u evalwazzjoni. Huwa partikolarment importanti li l-Kummissjoni twettaq konsultazzjonijiet xierqa matul il-ħidma ta’ tħejjija tagħha, inkluż fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (15). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(17)

F’konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (16) u r-Regolamenti tal-Kunsill (KE, Euratom) Nru 2988/95 (17), (Euratom, KE) Nru 2185/96 (18) u (UE) 2017/1939 (19), l-interessi finanzjarji tal-Unjoni għandhom jiġu protetti permezz ta’ miżuri proporzjonati, inkluż miżuri relatati mal-prevenzjoni, id-detezzjoni, il-korrezzjoni u l-investigazzjoni ta’ irregolaritajiet, inkluż il-frodi, l-irkupru ta’ fondi mitlufa, imħallsa bi żball jew użati b’mod mhux korrett u, fejn xieraq, l-impożizzjoni ta’ sanzjonijiet amministrattivi. B’mod partikolari, f’konformità mar-Regolamenti (Euratom, KE) Nru 2185/96 u (UE, Euratom) Nru 883/2013, l-Uffiċċju Ewropew Kontra l-Frodi (OLAF) għandu s-setgħa li jwettaq investigazzjonijiet amministrattivi, inkluż kontrolli u spezzjonijiet fuq il-post, bil-ħsieb li jiġi stabbilit jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni.

L-Uffiċċju tal-Prosekutur Pubbliku Ewropew (UPPE) għandu s-setgħa, f’konformità mar-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffetwaw l-interessi finanzjarji tal-Unjoni, kif previst fid-Direttiva (UE) 2017/1371 tal-Parlament Ewropew u tal-Kunsill (20). F’konformità mar-Regolament Finanzjarju, kwalunkwe persuna jew entità li tirċievi fondi mill-Unjoni għandha tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti tal-Awdituri, u fir-rigward ta’ dawk l-Istati Membri li jipparteċipaw fil-kooperazzjoni msaħħa skont ir-Regolament (UE) 2017/1939, lill-UPPE, u tiżgura li kwalunkwe parti terza involuta fl-implimentazzjoni ta’ fondi tal-Unjoni tagħti drittijiet ekwivalenti.

(18)

Jenħtieġ li l-Kummissjoni tippreżenta lill-Parlament Ewropew u lill-Kunsill rapport ta’ evalwazzjoni ta’ nofs it-terminu dwar l-implimentazzjoni tal-programm Pericles IV u rapport ta’ evalwazzjoni finali dwar il-kisba tal-objettivi tiegħu. Skont il-paragrafi 22 u 23 tal-Ftehim Interistituzzjonali tat-13 ta’ April 2016 dwar Tfassil Aħjar tal-Liġijiet, jenħtieġ li l-Programm Pericles IV jiġi evalwat abbażi tal-informazzjoni miġbura f’konformità ma’ rekwiżiti speċifiċi ta’ monitoraġġ filwaqt li jevitaw piż amministrattiv, b’mod partikolari għall-Istati Membri, u regolamentazzjoni eċċessiva. Dawk ir-rekwiżiti, fejn xieraq, jistgħu jinkludu indikaturi li jistgħu jitkejlu bħala bażi għall-evalwazzjoni tal-effetti tal-programm Pericles IV fil-prattika.

(19)	Għalhekk jenħtieġ li r-Regolament (UE) Nru 331/2014 jitħassar.

(20)

Sabiex tiġi żgurata l-kontinwità fl-għoti ta’ appoġġ fil-qasam ta’ politika rilevanti u biex tkun tista’ ssir l-implimentazzjoni mill-bidu tal-qafas finanzjarju pluriennali 2021-2027, jenħtieġ li dan ir-Regolament jidħol fis-seħħ b’urġenza u jenħtieġ li japplika, b’effett retroattiv, mill-1 ta’ Jannar 2021,

ADOTTAW DAN IR-REGOLAMENT:

KAPITOLU I

DISPOŻIZZJONIJIET ĠENERALI

Artikolu 1

Suġġett

Dan ir-Regolament jistabbilixxi programm ta’ skambju, assistenza u taħriġ għall-protezzjoni tal-euro kontra l-iffalsifikar (il-programm ‘Pericles IV’), għall-perjodu mill-1 ta’ Jannar 2021 sal-31 ta’ Diċembru 2027.

Huwa jistipula l-objettivi tal-programm Pericles IV, il-baġit għall-perjodu 2021-2027, il-forom ta’ finanzjament tal-Unjoni u r-regoli biex jiġi pprovdut tali finanzjament.

Artikolu 2

Objettivi tal-programm

1. L-objettiv ġenerali tal-programm Pericles IV għandu jkun li jipprevjeni u jiġġieled kontra l-iffalsifikar u l-frodi relatata u jippreserva l-integrità tal-muniti u tal-karti tal-flus tal-euro, biex b’hekk isaħħaħ il-fiduċja taċ-ċittadini u tan-negozji fil-ġenwinità ta’ dawn il-muniti u l-karti tal-flus u għalhekk isaħħaħ il-fiduċja fl-ekonomija tal-Unjoni, filwaqt li jiżgura s-sostenibbiltà tal-finanzi pubbliċi.

2. L-objettiv speċifiku tal-programm Pericles IV għandu jkun li jipproteġi l-muniti u l-karti tal-flus tal-euro kontra l-iffalsifikar u frodi relatata, billi jappoġġa u jissupplimenta l-miżuri mwettqa minn Stati Membri u jassisti lill-awtoritajiet kompetenti nazzjonali u tal-Unjoni fl-isforzi tagħhom biex jiżviluppaw, bejniethom u mal-Kummissjoni, kooperazzjoni regolari u mill-qrib u skambju tal-aħjar prattiki, inkluż, fejn xieraq, pajjiżi terzi u organizzazzjonijiet internazzjonali.

Artikolu 3

Baġit

1. Il-pakkett finanzjarju għall-implimentazzjoni tal-programm Pericles IV għall-perjodu mill-1 ta’ Jannar 2021 sal-31 ta’ Diċembru 2027 għandu jkun ta’ EUR 6 193 284 fi prezzijiet attwali.

2. L-approprjazzjonijiet annwali għandhom jiġu awtorizzati mill-Parlament Ewropew u mill-Kunsill fil-limiti tal-qafas finanzjarju pluriennali.

3. L-ammont imsemmi fil-paragrafu 1 jista’ jintuża għal assistenza teknika u amministrattiva għall-implimentazzjoni tal-programm Pericles IV, bħal attivitajiet preparatorji, ta’ monitoraġġ, ta’ kontroll, ta’ awditjar u ta’ evalwazzjoni, inkluż sistemi tat-teknoloġija tal-informazzjoni korporattiva.

Artikolu 4

Implimentazzjoni u forom ta’ finanzjament tal-Unjoni

1. Il-programm Pericles IV għandu jiġi implimentat taħt ġestjoni diretta f’konformità mar-Regolament Finanzjarju.

2. Il-programm Pericles IV għandu jiġi implimentat mill-Kummissjoni f’kooperazzjoni mal-Istati Membri, permezz ta’ konsultazzjonijiet regolari fi stadji differenti tal-implimentazzjoni tal-programm Pericles IV, filwaqt li tiġi żgurata l-konsistenza mal-miżuri rilevanti meħuda minn entitajiet kompetenti oħra, b’mod partikolari l-BĊE u l-Europol, u tiġi evitata duplikazzjoni mhux meħtieġa tal-istess miżuri. Għal dak il-għan, meta tħejji l-programmi ta’ ħidma skont l-Artikolu 10, il-Kummissjoni għandha tqis l-attivitajiet eżistenti u ppjanati tal-BĊE u tal-Europol kontra l-iffalsifikar tal-euro u l-frodi relatata.

3. L-appoġġ finanzjarju taħt il-programm Pericles IV għall-azzjonijiet eliġibbli elenkati fl-Artikolu 6 għandu jieħu l-forma jew ta’ għotjiet jew ta’ akkwist pubbliku.

Artikolu 5

Azzjonijiet konġunti

1. L-azzjonijiet taħt il-Programm Pericles IV jistgħu jiġu organizzati b’mod konġunt mill-Kummissjoni u sħab oħra li jkollhom l-għarfien espert rilevanti, bħal:

(a)	il-banek ċentrali nazzjonali u l-BĊE;

(b)	iċ-Ċentri Nazzjonali ta’ Analiżi u ċ-Ċentri Nazzjonali ta’ Analiżi tal-Muniti;

(c)	iċ-Ċentru Tekniku u Xjentifiku Ewropew u z-zekki;

(d)	l-Europol, l-Eurojust u l-Interpol;

(e)

l-uffiċċji ċentrali nazzjonali kontra l-iffalsifikar previst fl-Artikolu 12 tal-Konvenzjoni Internazzjonali għas-Soppressjoni tal-Falsifikazzjoni tal-Muniti ffirmata f’Ġinevra fl-20 ta’ April 1929 (21) u aġenziji oħra speċjalizzati fil-prevenzjoni, id-detezzjoni u l-infurzar tal-liġi b’konnessjoni mal-iffalsifikar;

(f)	korpi speċjalizzati kkonċernati fil-qasam tat-teknoloġiji tad-duplikazzjoni u ċ-ċertifikazzjoni, stampaturi u inċiżuri;

(g)	korpi oħra għajr dawk imsemmija fil-punti (a) sa (f) li joffru għarfien espert speċifiku, inkluż, fejn xieraq, tali korpi minn pajjiżi terzi u b’mod partikolari minn Stati aderenti u minn pajjiżi kandidati; u

(h)	entitajiet privati li jkunu żviluppaw u pprovdew evidenza ta’ għarfien tekniku u timijiet li jispeċjalizzaw fid-detezzjoni ta’ karti tal-flus u ta’ muniti ffalsifikati.

2. Fejn l-azzjonijiet eliġibbli jkunu organizzati b’mod konġunt mill-Kummissjoni u mill-BĊE, l-Eurojust, l-Europol jew l-Interpol, l-infiq li jkun hemm għandhom jinqasmu bejniethom. Fi kwalunkwe każ, kull wieħed minnhom għandu jħallas l-ispejjeż tal-vjaġġi u tal-akkomodazzjoni tal-kelliema mistiedna tiegħu.

KAPITOLU II

ELIĠIBBILTÀ

Artikolu 6

Azzjonijiet eliġibbli

1. Il-programm Pericles IV għandu jipprovdi, skont il-kondizzjonijiet stabbiliti fil-programmi ta’ ħidma annwali msemmija fl-Artikolu 10, appoġġ finanzjarju għall-azzjonijiet li ġejjin:

(a)

skambju u disseminazzjoni ta’ informazzjoni, b’mod partikolari permezz tal-organizzazzjoni ta’ workshops, laqgħat u seminars, inkluż taħriġ, traineeships immirati u skambji ta’ persunal tal-awtoritajiet nazzjonali kompetenti u azzjonijiet simili oħra. L-iskambju ta’ informazzjoni għandu jkun, fost l-oħrajn, immirat lejn:

—	l-aħjar prattiki fil-prevenzjoni tal-iffalsifikar u l-frodi relatati mal-euro;

—	il-metodoloġiji għall-monitoraġġ u l-analiżi tal-impatt ekonomiku u finanzjarju tal-iffalsifikar;

—	it-tħaddim ta’ bażijiet ta’ data u sistemi ta’ twissija bikrija;

—	l-użu ta’ għodda ta’ detezzjoni, inkluż bl-għajnuna tal-kompjuter;

—	il-metodi ta’ inkjesta u ta’ investigazzjoni;

—	l-assistenza xjentifika, inkluż il-monitoraġġ ta’ żviluppi ġodda;

—	il-protezzjoni tal-euro barra l-Unjoni;

—	azzjonijiet ta’ riċerka;

—	il-forniment ta’ kompetenzi operazzjonali speċifiċi;

(b)

assistenza teknika, xjentifika u operazzjonali kif jidher meħtieġ bħala parti mill-programm Pericles IV, inkluż b’mod partikolari:

—

kwalunkwe miżura xierqa li tistabbilixxi riżorsi għat-tagħlim fil-livell tal-Unjoni, bħal handbook ta’ leġiżlazzjoni tal-Unjoni, bullettini ta’ informazzjoni, manwali prattiċi, glossarji u dizzjunarji, bażijiet ta’ data, speċjalment fil-qasam tal-assistenza xjentifika u l-għassa tat-teknoloġija, jew applikazzjonijiet tal-kompjuter li joffru appoġġ, bħas-software;

—	studji rilevanti b’dimensjoni multidixxiplinarja u tranżnazzjonali, inkluż ir-riċerka dwar karatteristiċi tas-sigurtà innovattivi;

—	l-iżvilupp ta’ strumenti u metodi tekniċi ta’ appoġġ li jiffaċilitaw l-azzjonijiet ta’ detezzjoni fil-livell tal-Unjoni;

—	l-appoġġ għall-kooperazzjoni f’operazzjonijiet li jinvolvu mill-inqas żewġ pajjiżi meta tali appoġġ ma jkunx jista’ jsir disponibbli minn programmi oħra tal-istituzzjonijiet u l-korpi tal-Unjoni;

(c)	ix-xiri ta’ tagħmir li għandu jintuża minn awtoritajiet ta’ pajjiżi terzi speċjalizzati kontra l-iffalsifikar għall-protezzjoni tal-euro kontra l-iffalsifikar, f’konformità mal-Artikolu 7(2).

2. Il-programm Pericles IV għandu jqis l-aspetti tranżnazzjonali u multidixxiplinarji tal-ġlieda kontra l-iffalsifikar billi jimmira lejn il-parteċipazzjoni tal-gruppi li ġejjin:

(a)	il-persunal tal-aġenziji involuti fid-detezzjoni tal-iffalsifikar u fil-ġlieda kontrih, b’mod partikolari l-korpi tal-pulizija, id-dwana u amministrazzjonijiet finanzjarji, skont il-funzjoni speċifika tagħhom fil-livell nazzjonali;

(b)	il-persunal tal-intelligence;

(c)	ir-rappreżentanti tal-banek ċentrali nazzjonali, taz-zekki, tal-banek kummerċjali u ta’ intermedjarji finanzjarji oħra, b’mod partikolari fir-rigward tal-obbligi ta’ istituzzjonijiet finanzjarji;

(d)	l-uffiċjali ġudizzjarji, l-avukati speċjalizzati u l-membri tal-ġudikatura f’dan il-qasam;

(e)	kwalunkwe grupp ta’ speċjalisti ieħor kkonċernat bħall-kmamar tal-kummerċ u tal-industrija jew strutturi komparabbli li kapaċi jipprovdu aċċess lill-intrapriżi żgħar u ta’ daqs medju, bejjiegħa bl-imnut u kumpaniji responsabbli għat-tranżitu ta’ flus kontanti.

3. Il-gruppi msemmija fil-paragrafu 2 jistgħu jinkludu parteċipanti minn pajjiżi terzi.

KAPITOLU III

GĦOTJIET

Artikolu 7

Għotjiet

1. L-għotjiet taħt il-programm Pericles IV għandhom jingħataw u jiġu ġestiti f’konformità mat-Titolu VIII tar-Regolament Finanzjarju.

2. Għall-azzjonijiet implimentati permezz ta’ għotjiet, ix-xiri ta’ tagħmir ma għandux ikun l-uniku komponent tal-ftehim ta’ għotja.

Artikolu 8

Rati ta’ kofinanzjament

Ir-rata ta’ kofinanzjament għall-għotjiet mogħtija taħt il-programm Pericles IV ma għandhiex taqbeż 75 % tal-ispejjeż eliġibbli. F’każijiet eċċezzjonali u debitament ġustifikati, definiti fil-programmi ta’ ħidma annwali msemmija fl-Artikolu 10, ir-rata ta’ kofinanzjament ma għandhiex taqbeż 90 % tal-ispejjeż eliġibbli.

Artikolu 9

Entitajiet eliġibbli

L-entitajiet eliġibbli għall-finanzjament taħt il-programm Pericles IV għandhom ikunu l-awtoritajiet nazzjonali kompetenti kif definiti fil-punt (b) tal-Artikolu 2 tar-Regolament (KE) Nru 1338/2001.

KAPITOLU IV

PROGRAMMAZZJONI, MONITORAĠĠ U EVALWAZZJONI

Artikolu 10

Programmi ta’ ħidma

1. Sabiex jiġi implimentat il-programm Pericles IV, il-Kummissjoni għandha tadotta l-programmi ta’ ħidma msemmija fl-Artikolu 110 tar-Regolament Finanzjarju.

2. Għall-għotjiet, flimkien mar-rekwiżiti stipulati fl-Artikolu 110 tar-Regolament Finanzjarju, il-programm ta’ ħidma għandu jispeċifika l-kriterji tal-għażla u tal-għoti essenzjali u r-rata massima possibbli ta’ kofinanzjament.

Artikolu 11

Eżerċitar tad-delega

1. Is-setgħa ta’ adozzjoni ta’ atti delegati tingħata lill-Kummissjoni soġġett għall-kondizzjonijiet stipulati f’dan l-Artikolu.

2. Is-setgħa ta’ adozzjoni ta’ atti delegati msemmija fl-Artikolu 12(2) tingħata lill-Kummissjoni mill-1 ta’ Jannar 2021 sal-31 ta’ Diċembru 2027.

3. Id-delega ta’ setgħa msemmija fl-Artikolu 12(2) tista’ tiġi rrevokata fi kwalunkwe mument mill-Parlament Ewropew jew mill-Kunsill. Deċiżjoni ta’ revoka għandha ttemm id-delega ta’ setgħa speċifikata f’dik id-deċiżjoni. Għandha ssir effettiva fil-jum wara l-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandha taffettwa l-validità tal-ebda att delegat li jkun diġà fis-seħħ.

4. Qabel ma tadotta att delegat, il-Kummissjoni għandha tikkonsulta l-esperti magħżula minn kull Stat Membru f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet.

5. Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

6. Att delegat adottat skont l-Artikolu 12(2) għandu jidħol fis-seħħ biss jekk ma tiġi espressa l-ebda oġġezzjoni mill-Parlament Ewropew jew mill-Kunsill fi żmien tliet xhur min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex sejrin joġġezzjonaw. Dan il-perjodu għandu jiġi estiż bi tliet xhur fuq l-inizjattiva tal-Parlament Ewropew jew tal-Kunsill.

Artikolu 12

Monitoraġġ

1. L-indikaturi għar-rappurtar dwar il-progress tal-programm Pericles IV lejn il-kisba tal-objettiv speċifiku stipulat fl-Artikolu 2 huma stabbiliti fl-Anness.

2. Biex tiġi żgurata l-valutazzjoni effettiva tal-progress tal-programm Pericles IV lejn il-kisba tal-objettivi tiegħu, il-Kummissjoni għandha s-setgħa li tadotta atti delegati, f’konformità mal-Artikolu 11, biex temenda l-Anness fir-rigward tal-indikaturi fejn hu meqjus li meħtieġ għall-finijiet tal-evalwazzjoni, u kif ukoll biex tissupplimenta dan ir-Regolament b’dispożizzjonijiet dwar l-istabbiliment ta’ qafas ta’ monitoraġġ u evalwazzjoni.

3. Il-Kummissjoni għandha tipprovdi informazzjoni annwali dwar ir-riżultati tal-programm Pericles IV lill-Parlament Ewropew, lill-Kunsill u lill-BĊE, filwaqt li tieħu kont tal-indikaturi kwantitattivi u kwalitattivi stabbiliti fl-Anness.

4. Il-pajjiżi parteċipanti u benefiċjarji oħra għandhom jipprovdu lill-Kummissjoni d-data u l-informazzjoni kollha meħtieġa biex jippermettu l-monitoraġġ u l-evalwazzjoni tal-programm Pericles IV.

Artikolu 13

Evalwazzjoni

1. Evalwazzjoni ta’ nofs it-terminu indipendenti tal-programm Pericles IV għandha titwettaq ladarba jkun hemm biżżejjed informazzjoni disponibbli dwar l-implimentazzjoni tal-programm Pericles IV, iżda mhux aktar tard minn erba’ snin wara l-bidu tal-implimentazzjoni tal-programm.

2. Fi tmiem l-implimentazzjoni tal-programm Pericles IV, iżda mhux aktar tard minn sentejn wara tmiem il-perjodu speċifikat fl-Artikolu 1, għandha titwettaq evalwazzjoni finali tal-programm Pericles IV mill-Kummissjoni.

3. Il-Kummissjoni għandha tikkomunika l-konklużjonijiet tal-evalwazzjonijiet, akkumpanjati mill-osservazzjonijiet tagħha, lill-Parlament Ewropew, lill-Kunsill u lill-BĊE.

KAPITOLU V

DISPOŻIZZJONIJIET TRANŻIZZJONALI U FINALI

Artikolu 14

Informazzjoni, komunikazzjoni u viżibilità

1. Ir-riċevituri ta’ finanzjament tal-Unjoni għandhom jirrikonoxxu l-oriġini ta’ dawk il-fondi u jiżguraw i l-viżibilità tal-finanzjament tal-Unjoni, b’mod partikolari meta jippromwovu l-azzjonijiet u r-riżultati tagħhom, billi jipprovdu informazzjoni mmirata koerenti, effettiva u proporzjonata lil diversi udjenzi, inkluż il-media u l-pubbliku

2. Il-Kummissjoni għandha timplimenta l-azzjonijiet ta’ informazzjoni u ta’ komunikazzjoni relatati mal-programm Pericles IV, u mal-azzjonijiet meħuda skont il-programm Pericles IV, u r-riżultati miksuba.

3. Ir-riżorsi finanzjarji allokati lill-programm Pericles IV għandhom jikkontribwixxu wkoll għall-komunikazzjoni korporattiva tal-prijoritajiet politiċi tal-Unjoni, sakemm dawk il-prijoritajiet ikunu relatati mal-objettivi msemmija fl-Artikolu 2.

Artikolu 15

Tħassir

Ir-Regolament (UE) Nru 331/2014 jitħassar b’effett mill-1 ta’ Jannar 2021.

Artikolu 16

Dispożizzjonijiet tranżizzjonali

1. Dan ir-Regolament ma għandux jaffettwa t-tkomplija jew il-modifika ta’ azzjonijiet li jkunu nbdew skont ir-Regolament (UE) Nru 331/2014, li għandhom ikomplu japplikaw għal dawk l-azzjonijiet sal-għeluq tagħhom.

2. Il-pakkett finanzjarju għall-programm Pericles IV jista’ jkopri wkoll l-ispejjeż tal-assistenza teknika u amministrattiva meħtieġa biex tkun żgurata t-transizzjoni bejn il-programm Pericles IV u l-miżuri adottati skont ir-Regolament (UE) Nru 331/2014.

Artikolu 17

Dħul fis-seħħ u applikazzjoni

Dan ir-Regolament għandu jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Huwa għandu japplika mill-1 ta’ Jannar 2021.

Dan ir-Regolament għandu jorbot fl-intier tiegħu u japplika direttament fl-Istati Membri f’konformità mat-Trattati.

Magħmul fi Brussell, l-20 ta’ Mejju 2021.

Għall-Parlament Ewropew

Il-President

D. M. SASSOLI

Għall-Kunsill

Il-President

A. P. ZACARIAS

(1) ĠU C 378, 19.10.2018, p. 2.

(2) Pożizzjoni tal-Parlament Ewropew tat-13 ta’ Frar 2019 (għadha mhijiex ippubblikata fil-Ġurnal Uffiċjali) u l-pożizzjoni tal-Kunsill fl-ewwel qari tat-13 ta’ April 2021 (għadha mhijiex ippubblikata fil-Ġurnal Uffiċjali). Pożizzjoni tal-Parlament Ewropew tat-18 ta’ Mejju 2021 (għadha mhijiex ippubblikata fil-Ġurnal Uffiċjali).

(3) Regolament tal-Kunsill (KE) Nru 1338/2001 tat-28 ta’ Ġunju 2001 li jistabbilixxi miżuri neċessarji għall-protezzjoni mill-iffalsifikar tal-euro (ĠU L 181, 4.7.2001, p. 6).

(4) Regolament tal-Kunsill (KE) Nru 1339/2001 tat-28 ta’ Ġunju 2001 li jestendi l-effetti tar-Regolament (KE) Nru 1338/2001 li jistabbilixxi l-miżuri neċessarji għall-protezzjoni tal-euro mill-iffalsifikar għal dawk l-Istati Membri li m’adottawx l-euro bħala l-munita unika tagħhom (ĠU L 181, 4.7.2001, p. 11).

(5) Deċiżjoni tal-Kunsill 2001/923/KE tas-17 ta’ Diċembru 2001 li tistabbilixxi programm ta’ skambju, assistenza u taħriġ għall-protezzjoni tal-euro kontra l-iffalsifikar (il-programm “Pericles”) (ĠU L 339, 21.12.2001, p. 50).

(6) Deċiżjoni tal-Kunsill 2001/924/KE tas-17 ta’ Diċembru 2001 li testendi l-effetti tad-Deċiżjoni li tistabbilixxi skambju, għajnuna u programm ta’ taħriġ għall-protezzjoni tal-euro kontra l-iffalsifikar (il-programm “Pericles”) għall-Istati Membri li għadhom m’adottawx l-euro bħala munita unika (ĠU L 339, 21.12.2001, p. 55).

(7) Deċiżjoni tal-Kunsill 2006/75/KE tat-30 ta’ Jannar 2006 li temenda u testendi d-Deċiżjoni 2001/923/KE li tistabbilixxi programm ta’ skambju, għajnuna u taħriġ għall-protezzjoni tal-euro kontra l-falsifikazzjoni (il-programm “Pericles”) (ĠU L 36, 8.2.2006, p. 40).

(8) Deċiżjoni tal-Kunsill 2006/76/KE tat-30 ta’ Jannar 2006 li testendi għall-Istati Membri mhux parteċipanti l-applikazzjoni tad-Deċiżjoni 2006/75/KE li temenda u testendi d-Deċiżjoni 2001/923/KE li tistabbilixxi programm ta’ skambju, għajnuna u taħriġ għall-protezzjoni tal-Euro kontra l-falsifikazzjoni (il-programm “Pericles”) (ĠU L 36, 8.2.2006, p. 42).

(9) Deċiżjoni tal-Kunsill 2006/849/KE tal-20 ta’ Novembru 2006 li temenda u testendi d-Deċiżjoni 2001/923/KE li tistabbilixxi programm ta’ skambju, assistenza u taħriġ għall-protezzjoni tal-euro mill-iffalsifikar (il-programm “Pericles”) (ĠU L 330, 28.11.2006, p. 28).

(10) Deċiżjoni tal-Kunsill 2006/850/KE tal-20 ta’ Novembru 2006 li testendi għall-Istati Membri li mhumiex parteċipanti l-applikazzjoni tad-Deċiżjoni 2006/849/KE li temenda u testendi d-Deċiżjoni 2001/923/KE li tistabbilixxi programm ta’ skambju, assistenza u taħriġ għall-protezzjoni tal-euro mill-iffalsifikar (il-programm “Pericles”) (ĠU L 330, 28.11.2006, p. 30).

(11) Regolament (UE) Nru 331/2014 tal-Parlament Ewropew u tal-Kunsill tal-11 ta’ Marzu 2014 li jistabbilixxi programm ta’ skambju, assistenza u taħriġ għall-protezzjoni tal-euro kontra l-iffalsifikar (il-programm “Pericles 2020”) u li jħassar id-Deċiżjonijiet tal-Kunsill 2001/923/KE, 2001/924/KE, 2006/75/KE, 2006/76/KE, 2006/849/KE u 2006/850/KE (ĠU L 103, 5.4.2014, p. 1).

(12) Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).

(13) Regolament tal-Kunsill (UE, Euratom) 2020/2093 tas-17 ta’ Diċembru 2020 li jistabbilixxi l-qafas finanzjarju pluriennali għas-snin mill-2021 sal-2027 (ĠU L 433 I, 22.12.2020, p. 11).

(14) Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda (ĠU L 433 I, 22.12.2020, p. 28).

(15) ĠU L 123, 12.5.2016, p. 1.

(16) Regolament (UE, Euratom) Nru 883/2013 tal-Parlament Ewropew u tal-Kunsill tal-11 ta’ Settembru 2013 dwar investigazzjonijiet immexxija mill-Uffiċċju Ewropew Kontra l-Frodi (OLAF) u li jħassar ir-Regolament tal-Parlament Ewropew u tal-Kunsill (KE) Nru 1073/1999 u r-Regolament tal- Kunsill (Euratom) Nru 1074/1999 (ĠU L 248, 18.9.2013, p. 1).

(17) Regolament tal-Kunsill (KE, Euratom) Nru 2988/95 tat-18 ta’ Diċembru 1995 dwar il-protezzjoni tal-interessi finanzjarji tal-Komunità Ewropea (ĠU L 312, 23.12.1995, p. 1).

(18) Regolament tal-Kunsill (Euratom, KE) Nru 2185/96 tal-11 ta’ Novembru 1996 dwar il-verifiki u l-ispezzjonijiet fuq il-post imwettqa mill-Kummissjoni sabiex tipproteġi l-interessi finanzjarji tal-Komunità Ewropea kontra l-frodi u irregolaritajiet oħra (ĠU L 292, 15.11.1996, p. 2).

(19) Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) (ĠU L 283, 31.10.2017, p. 1).

(20) Direttiva (UE) 2017/1371 tal-Parlament Ewropew u tal-Kunsill tal-5 ta’ Lulju 2017 dwar il-ġlieda kontra l-frodi tal-interessi finanzjarji tal-Unjoni permezz tal-liġi kriminali (ĠU L 198, 28.7.2017, p. 29).

(21) Serje ta’ Trattati tal-Lega tan-Nazzjonijiet Nru 2623 (1931), p. 372.

ANNESS

INDIKATURI GĦALL-EVALWAZZJONI TAL-PROGRAMM PERICLES IV

Il-programm Pericles IV ser jiġi mmonitorjat mill-qrib fuq il-bażi ta’ sett ta’ indikaturi maħsuba biex ikejlu, bi spejjeż u piżijiet amministrattivi minimi, sa fejn ikunu nkisbu l-objettivi ġenerali u speċifiċi tal-programm Pericles IV. Għal dan il-għan, ser tinġabar data fir-rigward tas-sett ta’ indikaturi ewlenin li ġejjin:

(a)	l-għadd ta’ euro foloz skoperti;

(b)	l-għadd ta’ workshops illegali sfrattati;

(c)	l-għadd ta’ awtoritajiet kompetenti li japplikaw għall-programm Pericles IV;

(d)	ir-rata ta’ sodisfazzjoni tal-parteċipanti fl-azzjonijiet iffinanzjati mill-programm Pericles IV; u

(e)	il-feedback tal-parteċipanti li jkunu diġà ħadu sehem f’azzjonijiet preċedenti tal-Pericles dwar l-impatt tal-programm Pericles IV fuq l-attivitajiet tagħhom fil-protezzjoni tal-euro kontra l-iffalsifikar.

Id-data u l-informazzjoni dwar l-indikaturi ewlenin tal-prestazzjoni għandhom jinġabru kull sena mill-Kummissjoni u mill-benefiċjarji tal-programm Pericles IV, kif ġej:

—	il-Kummissjoni għandha tiġbor id-data għall-għadd ta’ muniti u karti tal-flus foloz tal-euro;

—	il-Kummissjoni għandha tiġbor id-data għall-għadd ta’ workshops illegali sfrattati;

—	il-Kummissjoni għandha tiġbor id-data għall-għadd ta’ awtoritajiet kompetenti li japplikaw għall-programm Pericles IV;

—	il-Kummissjoni u l-benefiċjarji tal-programm Pericles IV għandhom jiġbru d-data fir-rigward tar-rata ta’ sodisfazzjoni tal-parteċipanti fl-azzjonijiet iffinanzjati mill-programm Pericles IV;

—	il-Kummissjoni u l-benefiċjarji tal-programm Pericles IV għandhom jiġbru d-data fir-rigward tal-feedback tal-parteċipanti li diġà ħadu sehem f’azzjonijiet preċedenti tal-Pericles dwar l-impatt tal-programm Pericles IV fuq l-attivitajiet tagħhom fil-protezzjoni tal-euro kontra l-iffalsifikar.

27.5.2021

Il-Ġurnal Uffiċjali tal-Unjoni Ewropea

L 186/12

REGOLAMENT DELEGAT TAL-KUMMISSJONI (UE) 2021/841

tad-19 ta’ Frar 2021

li jemenda r-Regolament Delegat (UE) Nru 640/2014 fir-rigward tar-regoli dwar in-nuqqas ta’ konformità fir-rigward tas-sistema għall-identifikazzjoni u r-reġistrazzjoni għall-annimali bovini, ovini u kaprini u dwar il-kalkolu tal-livell ta’ penali amministrattivi fir-rigward tal-annimali ddikjarati skont l-iskemi ta’ għajnuna għall-annimali jew il-miżuri ta’ appoġġ relatati mal-annimali

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1306/2013 tal-Parlament Ewropew u tal-Kunsill tas-17 ta’ Diċembru 2013 dwar il-finanzjament, il-ġestjoni u l-monitoraġġ tal-Politika Agrikola Komuni u li jħassar ir-Regolamenti tal-Kunsill (KEE) Nru 352/78, (KE) Nru 165/94, (KE) Nru 2799/98, (KE) Nru 814/2000, (KE) Nru 1290/2005 u (KE) Nru 485/2008 (1), u b’mod partikolari l-Artikoli 63(4), 64(6) u 77(7) tiegħu,

Billi:

(1)

L-Artikolu 30 tar-Regolament Delegat tal-Kummissjoni (UE) Nru 640/2014 (2) fih regoli biex jiġi stabbilit l-għadd ta’ annimali determinati għall-finijiet ta’ appoġġ akkoppjat u volontarju bbażat fuq applikazzjonijiet għall-għajnuna għall-bhejjem imrobbija skont skemi ta’ għajnuna għall-annimali jew appoġġ għall-iżvilupp rurali bbażat fuq talbiet għall-pagament skont miżuri ta’ appoġġ relatati mal-annimali. B’mod partikolari, jistabbilixxi regoli għal każijiet ta’ nuqqas ta’ konformità fir-rigward tas-sistema għall-identifikazzjoni u r-reġistrazzjoni għall-annimali bovini u għall-annimali ovini u kaprini. Ir-Regolament tal-Kunsill (KE) Nru 21/2004 (3) jistipula li l-Istati Membri għandhom jistabbilixxu sistema għall-identifikazzjoni u r-reġistrazzjoni tal-annimali ovini u kaprini. Peress li dik is-sistema ta’ identifikazzjoni u reġistrazzjoni fiha rekwiżiti simili għal dawk tas-sistema ta’ identifikazzjoni u reġistrazzjoni għall-annimali bovini kif stabbilit fir-Regolament (KE) Nru 1760/2000 tal-Parlament Ewropew u tal-Kunsill (4), huwa xieraq li jiġu allinjati r-regoli biex jitqiesu n-nuqqasijiet ta’ konformità relatati mas-sistema ta’ identifikazzjoni u reġistrazzjoni ta’ dawk it-tliet kategoriji ta’ annimali. F’dak il-kuntest, huwa xieraq li r-referenza għal “tikketti tal-widnejn” tinbidel b’referenza għal “mezz ta’ identifikazzjoni” f’konformità ma’ dawk iż-żewġ Regolamenti.

(2)

Filwaqt li tqis l-evoluzzjoni tas-sistema integrata ta’ amministrazzjoni u kontroll u għal raġunijiet ta’ simplifikazzjoni, huwa xieraq li jiġu adattati l-penali amministrattivi fir-rigward tal-iskemi ta’ għajnuna għall-annimali u l-miżuri ta’ appoġġ relatati mal-annimali stabbiliti fl-Artikolu 31 tar-Regolament Delegat (UE) Nru 640/2014 billi jiġu eżentati sa tliet annimali li jinstabu mhux determinati mill-applikazzjoni ta’ penali amministrattivi sakemm dawn ikunu jistgħu jiġu identifikati individwalment permezz ta’ identifikazzjoni jew dokumentazzjoni ta’ sostenn, u billi jiġi aġġustat il-livell ta’ penali li għandhom jiġu applikati jekk jinstab li ma jiġux determinati aktar minn tliet annimali.

(3)

B’konformità mal-Artikolu 53(4) tar-Regolament ta’ Delega tal-Kummissjoni (UE) Nru 639/2014 (5) meta l-miżura tal-appoġġ akkoppjat tkun tikkonċerna annimali bovini u/jew nagħaġ u mogħoż, l-Istati Membri għandhom jiddefinixxu bħala kundizzjoni għall-eliġibbiltà għall-appoġġ, ir-rekwiżiti għall-identifikazzjoni u għar-reġistrazzjoni tal-annimali previsti fir-Regolament (KE) Nru 1760/2000 jew fir-Regolament (KE) Nru 21/2004 rispettivament. Barra minn hekk, b’konformità ma’ dawk ir-Regolamenti, avvenimenti tal-annimali bħal twelid, imwiet u movimenti għandhom jiġu nnotifikati lill-bażi tad-data kompjuterizzata f’ċerti limiti ta’ żmien. In-nuqqas ta’ rispett ta’ dawk il-limiti ta’ żmien jitqies bħala nuqqas ta’ konformità fir-rigward tal-annimal ikkonċernat. Madankollu, sabiex tiġi żgurata l-proporzjonalità u mingħajr preġudizzju għal kundizzjonijiet oħra ta’ eliġibbiltà stabbiliti mill-Istat Membru, l-annimali bovini, ovini u kaprini jenħtieġ li jitqiesu bħala eliġibbli għall-għajnuna jew għall-appoġġ mingħajr l-applikazzjoni ta’ penali amministrattivi sakemm tkun saret notifika tard ta’ avveniment tal-annimali qabel il-bidu ta’ perjodu ta’ żamma jew qabel data ta’ referenza partikolari, kif stabbilit mill-Istat Membru skont l-Artikolu 53(4) tar-Regolament Delegat (UE) Nru 639/2014.

(4)	Għal raġunijiet ta’ ċarezza u simplifikazzjoni, jenħtieġ li l-formulazzjoni tal-Artikolu 31(3) tar-Regolament ta’ Delega (UE) Nru 640/2014 tiġi allinjata bejn is-sistema bbażata fuq il-pretensjonijiet u s-sistema mingħajr pretensjonijiet.

(5)	Għalhekk, ir-Regolament ta’ Delega (UE) Nru 640/2014 jenħtieġ li jiġi emendat skont dan.

(6)

Sabiex l-Istati Membri jkollhom biżżejjed żmien biex jaġġustaw is-sistemi tagħhom biex jimplimentaw ir-regoli emendati, dan ir-Regolament jenħtieġ li japplika fir-rigward tal-applikazzjonijiet għall-għajnuna, l-applikazzjonijiet għall-appoġġ u t-talbiet għall-pagament imressqa għas-snin tat-talba jew għall-perjodi tal-primjum li jibdew mill-1 ta’ Jannar 2021,

ADOTTAT DAN IR-REGOLAMENT:

Artikolu 1

Ir-Regolament ta’ Delega (UE) Nru 640/2014 huwa emendat kif ġej:

(1)

l-Artikolu 30 huwa emendat kif ġej:

(a)

il-paragrafu 4 huwa sostitwit b’dan li ġej:

“4. Fejn jinstabu każijiet ta’ nuqqas ta’ konformità fir-rigward tas-sistema għall-identifikazzjoni u r-reġistrazzjoni għall-annimali bovini, ovini u kaprini għandhom japplikaw dawn li ġejjin:

(a)

annimal bovin li jkun preżenti fl-impriża agrikola li jkun tilef waħda miż-żewġ mezzi ta’ identifikazzjoni għandu jiġi kkunsidrat bħala stabbilit sakemm ikun identifikat b’mod ċar u individwalment bl-elementi l-oħrajn tas-sistema għall-identifikazzjoni u r-reġistrazzjoni tal-annimali bovini msemmija fil-punti (b), (c) u (d) tal-ewwel paragrafu tal-Artikolu 3 tar-Regolament (KE) Nru 1760/2000;

(b)

annimal ovin jew kaprin li jkun preżenti fl-impriża agrikola li jkun tilef wieħed miż-żewġ mezzi ta’ identifikazzjoni għandu jiġi kkunsidrat bħala stabbilit, sakemm l-annimal jista’ xorta waħda jiġi identifikat permezz tal-ewwel mezz ta’ identifikazzjoni skont l-Artikolu 4(2)(a) tar-Regolament (KE) Nru 21/2004 u sakemm jiġu ssodisfati r-rekwiżiti l-oħrajn kollha tas-sistema għall-identifikazzjoni u r-reġistrazzjoni tal-annimali ovini u kaprini;

(c)

meta annimal bovin, ovin jew kaprin wieħed li jkun preżenti fl-impriża agrikola jkun tilef żewġ mezzi ta’ identifikazzjoni, għandu jiġi kkunsidrat bħala stabbilit, sakemm l-annimal jista’ xorta waħda jiġi identifikat individwalment mir-reġistru, mill-passaport tal-annimal, fejn rilevanti, mill-bażi tad-data jew mezz ieħor stabbilit fir-Regolament (KE) Nru 1760/2000 jew ir-Regolament (KE) Nru 21/2004 rispettivament u sakemm l-indokratur tal-annimali jkun jista’ jipprovdi evidenza li huwa kien diġà ħa azzjoni biex jirrimedja għas-sitwazzjoni qabel in-notifika tal-verifika fuq il-post;

(d)

meta n-nuqqas ta’ konformità li jinstab jirrigwarda entrati żbaljati fir-reġistru, fil-passaporti tal-bhejjem jew fil-bażi tad-data kompjuterizzata għall-annimali, iżda ma jkunx rilevanti għall-verifika tar-rispett tal-kundizzjonijiet ta’ eliġibbiltà għajr dawk imsemmija fl-Artikolu 53(4) tar-Regolament ta’ Delega (UE) Nru 639/2014 fil-qafas tal-iskema ta’ għajnuna jew tal-miżura ta’ appoġġ ikkonċernati, l-annimal ikkonċernat għandu jitqies biss bħala mhux stabbilit jekk jinstabu entrati żbaljati bħal dawn f’minn tal-inqas żewġ verifiki f’perjodu ta’ 24 xahar. Fil-każijiet l-oħra kollha, l-annimali kkonċernati għandhom jitqiesu bħala mhux stabbiliti wara l-ewwel sejba;

(e)

meta n-nuqqasijiet ta’ konformità misjuba jkunu relatati ma’ notifiki tard ta’ avvenimenti tal-annimali fil-bażi tad-data kompjuterizzata, l-annimal ikkonċernat għandu jitqies bħala ddeterminat jekk in-notifika tkun seħħet qabel il-bidu tal-perjodu taż-żamma jew qabel id-data ta’ referenza stabbilita skont l-Artikolu 53(4) tar-Regolament ta’ Delega (UE) Nru 639/2014.

L-entrati fis-sistema għall-identifikazzjoni u r-reġistrazzjoni tal-annimali bovini, ovini u kaprini u n-notifiki li jintbagħtulha jistgħu jiġu aġġustati fi kwalunkwe ħin f’każijiet ta’ żbalji evidenti rikonoxxuti mill-awtorità kompetenti.”;

(b)	jitħassar il-paragrafu 5;

(2)

l-Artikolu 31 huwa sostitwit b’dan li ġej:

“Artikolu 31

Penali amministrattivi fir-rigward ta’ annimali fil-qafas tal-iskemi ta’ għajnuna għall-annimali jew tal-miżuri ta’ appoġġ marbuta mal-annimali

1. L-ammont totali ta’ għajnuna jew appoġġ li għalih huwa intitolat il-benefiċjarju skont skema ta’ għajnuna għall-annimali jew miżura ta’ appoġġ relatata mal-annimali jew tip ta’ operazzjoni taħt tali miżura ta’ appoġġ għas-sena tat-talba kkonċernata għandu jitħallas abbażi tal-għadd ta’ annimali stabbilit skont l-Artikolu 30(3), dment li wara l-verifiki amministrattivi jew il-kontrolli fuq il-post:

(a)	mhux aktar minn tliet annimali jinstabu mhux determinati, u

(b)	annimali mhux determinati jistgħu jiġu identifikati individwalment bi kwalunkwe mezz stabbilit fir-Regolament (KE) Nru 1760/2000 jew ir-Regolament (KE) Nru 21/2004.

2. Jekk jinstabu aktar minn tliet annimali mhux determinati, l-ammont totali ta’ għajnuna jew ta’ appoġġ li jkun intitolat għalih il-benefiċjarju fil-qafas tal-iskema ta’ għajnuna jew tal-miżura ta’ appoġġ jew tat-tip ta’ operazzjoni fil-qafas ta’ tali miżura ta’ appoġġ, imsemmija fil-paragrafu 1 għas-sena tat-talba kkonċernata għandu jitnaqqas:

(a)	bil-perċentwal li għandu jiġi stabbilit f’konformità mal-paragrafu 3, jekk ma jkunx aktar minn 20 %;

(b)	bid-doppju tal-perċentwal li għandu jiġi stabbilit f’konformità mal-paragrafu 3, jekk ikun aktar minn 20 % iżda ma jkunx aktar minn 30 %.

Jekk il-perċentwal stabbilit f’konformità mal-paragrafu 3 ikun iżjed minn 30 %, l-ebda għajnuna jew appoġġ li għalihom kieku l-benefiċjarju jkun intitolat skont l-Artikolu 30(3) ma għandhom jingħataw fil-qafas tal-iskema ta’ għajnuna jew tal-miżura ta’ appoġġ jew tat-tip ta’ operazzjoni fil-qafas ta’ din il-miżura ta’ appoġġ għas-sena tat-talba kkonċernata.

Jekk il-perċentwal stabbilit skont il-paragrafu 3 ikun iżjed minn 50 %, l-ebda għajnuna jew appoġġ li għalihom kieku l-benefiċjarju jkun intitolat skont l-Artikolu 30(3) ma għandhom jingħataw fil-qafas tal-iskema ta’ għajnuna jew tal-miżura ta’ appoġġ jew tat-tip ta’ operazzjoni fil-qafas ta’ din il-miżura ta’ appoġġ għas-sena tat-talba kkonċernata. Barra minn hekk, il-benefiċjarju għandu jkun soġġett għal penali addizzjonali ta’ ammont li jkun daqs l-ammont li jikkorrispondi għad-differenza bejn l-għadd ta’ annimali ddikjarati u l-għadd ta’ annimali stabbiliti f’konformità mal-Artikolu 30(3). Jekk dak l-ammont ma jkunx jista’ jiġi paċut għalkollox matul it-tliet snin kalendarji ta’ wara s-sena kalendarja tas-sejba, f’konformità mal-Artikolu 28 tar-Regolament ta’ Implimentazzjoni (UE) Nru 908/2014, il-bilanċ pendenti għandu jiġi kkanċellat.

Għal speċijiet oħra għajr dawk imsemmija fl-Artikolu 30(4) ta’ dan ir-Regolament, l-Istati Membri jistgħu jiddeċiedu li jistabbilixxu għadd ta’ annimali li jkun differenti mill-livell limitu ta’ tliet annimali li huwa previst fil-paragrafi 1 u 2 ta’ dan l-Artikolu. Meta jistabbilixxu dak l-għadd, l-Istati Membri għandhom jiżguraw li jkun sostanzjalment ekwivalenti għal dak il-livell limitu, billi fost l-oħrajn iqisu l-unitajiet ta’ bhejjem u/jew l-ammont ta’ għajnuna jew ta’ appoġġ li jkun ingħata.

3. Sabiex jiġu stabbiliti l-perċentwali msemmija fil-paragrafu 2, l-għadd ta’ annimali ta’ skema ta’ għajnuna jew miżura ta’ appoġġ jew tip ta’ operazzjoni li jinstab li ma jkunx determinat għandu jiġi diviż bl-għadd ta’ annimali determinati għal dik l-iskema ta’ għajnuna jew miżura ta’ appoġġ jew tip ta’ operazzjoni taħt tali miżura ta’ appoġġ għas-sena tat-talba kkonċernata.

4. Meta l-kalkolu tal-ammont totali ta’ għajnuna jew ta’ appoġġ li jkun intitolat għalih il-benefiċjarju fil-qafas ta’ skema ta’ għajnuna jew ta’ miżura ta’ appoġġ jew ta’ tip ta’ operazzjoni fil-qafas ta’ tali miżura ta’ appoġġ għas-sena tat-talba kkonċernata jkun ibbażat fuq l-għadd ta’ jiem li fihom l-annimali li jissodisfaw il-kundizzjonijiet ta’ eliġibbiltà jkunu preżenti fl-azjenda, il-kalkolu tal-għadd ta’ annimali li jkunu nstabu mhux determinati kif imsemmi fil-paragrafu 2 għandu jkun ibbażat ukoll fuq l-għadd ta’ jiem li fihom dawk l-annimali jkunu preżenti fl-azjenda.”

Artikolu 2

Dħul fis-seħħ u applikazzjoni

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika fir-rigward tal-applikazzjonijiet għall-appoġġ u tat-talbiet għall-pagament sottomessi għas-snin tat-talba jew għall-perjodi tal-primjum li jibdew mill-1 ta’ Jannar 2021.

Dan ir-Regolament għandu jorbot fl-intier tiegħu u japplika direttament fl-Istat Membri kollha.

Magħmul fi Brussell, id-19 ta’ Frar 2021.

Għall-Kummissjoni

Il-President

Ursula VON DER LEYEN

(1) ĠU L 347, 20.12.2013, p. 549.

(2) Ir-Regolament ta’ Delega tal-Kummissjoni (UE) Nru 640/2014 tal-11 ta’ Marzu 2014 li jissupplimenta r-Regolament (UE) Nru 1306/2013 tal-Parlament Ewropew u tal-Kunsill fir-rigward tas-sistema integrata ta’ amministrazzjoni u kontroll u l-kundizzjonijiet għar-rifjut jew l-irtirar ta’ pagamenti u penali amministrattivi applikabbli għall-pagamenti diretti, l-appoġġ għall-iżvilupp rurali u l-kundizzjonalità (ĠU L 181, 20.6.2014, p. 48).

(3) Ir-Regolament tal-Kunsill (KE) Nru 21/2004 tas-17 ta’ Diċembru 2003 li jistabbilixxi sistema għall-identifikazzjoni u r-reġistrazzjoni tal-annimali ovini u kaprini u li jemenda r-Regolament (KE) Nru 1782/2003 u d-Direttivi 92/102/KEE u 64/432/KEE (ĠU L 5, 9.1.2004, p. 8).

(4) Ir-Regolament (KE) Nru 1760/2000 tal-Parlament Ewropew u tal-Kunsill tas-17 ta’ Lulju 2000 li jistabbilixxi sistema għall-identifikazzjoni u r-reġistrazzjoni tal-bhejjem tal-fart u dwar it-tikkettar tal-laħam taċ-ċanga u tal-prodotti tal-laħam taċ-ċanga u li jħassar ir-Regolament tal-Kunsill (KE) Nru 820/97 (ĠU L 204, 11.8.2000, p. 1).

(5) Ir-Regolament ta’ Delega tal-Kummissjoni (UE) Nru 639/2014 tal-11 ta’ Marzu 2014, li jissupplimenta r-Regolament (UE) Nru 1307/2013 tal-Parlament Ewropew u tal-Kunsill li jistabbilixxi regoli għall-pagamenti diretti lill-bdiewa skont skemi ta’ appoġġ fil-qafas tal-Politika Agrikola Komuni u li jemenda l-Anness X ta’ dak ir-Regolament (ĠU L 181, 20.6.2014, p. 1).

27.5.2021

Il-Ġurnal Uffiċjali tal-Unjoni Ewropea

L 186/16

REGOLAMENT TA’ IMPLIMENTAZZJONI TAL-KUMMISSJONI (UE) 2021/842

tas-26 ta’ Mejju 2021

li jemenda r-Regolament ta’ Implimentazzjoni (UE) Nru 307/2012 fir-rigward tar-rekwiżiti ta’ trasparenza u ta’ konfidenzjalità għall-valutazzjoni tar-riskju tal-UE ta’ sustanzi taħt skrutinju

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1925/2006 tal-Parlament Ewropew u tal-Kunsill tal-20 ta’ Diċembru 2006 dwar iż-żieda ta’ vitamini u minerali u ta’ ċerti sustanzi oħrajn mal-ikel (1), u b’mod partikolari l-Artikolu 8(6) tiegħu,

Billi:

(1)	Ir-Regolament (KE) Nru 1925/2006 jarmonizza r-regoli nazzjonali fl-Istati Membri dwar iż-żieda ta’ vitamini u minerali u ta’ ċerti sustanzi oħra mal-ikel.

(2)

Ir-Regolament ta’ Implimentazzjoni tal-Kummissjoni (UE) Nru 307/2012 (2) jistabbilixxi, b’mod partikolari, regoli ta’ implimentazzjoni għall-applikazzjoni tal-proċedura msemmija fl-Artikolu 8(4) u (5) tar-Regolament (KE) Nru 1925/2006 dwar il-valutazzjoni tas-sikurezza mill-Awtorità Ewropea dwar is-Sigurtà fl-Ikel (“l-Awtorità”) tas-sustanzi taħt skrutinju elenkati fil-Parti Ċ tal-Anness III tiegħu.

(3)

Ir-Regolament (UE) 2019/1381 tal-Parlament Ewropew u tal-Kunsill (3) emenda r-Regolament (KE) Nru 178/2002 tal-Parlament Ewropew u tal-Kunsill (4). Dawk l-emendi għandhom l-għan li jsaħħu t-trasparenza u s-sostenibbiltà tal-valutazzjoni tar-riskju tal-UE fl-oqsma kollha tal-katina alimentari fejn l-Awtorità tagħti valutazzjoni tar-riskju xjentifika.

(4)

L-emendi għar-Regolament (KE) Nru 178/2002 introduċew dispożizzjonijiet ġodda dwar, fost oħrajn, il-pariri ġenerali ta’ qabel is-sottomissjoni mill-persunal tal-Awtorità fuq talba ta’ applikant potenzjali u l-obbligu ta’ notifikazzjoni tal-istudji kkummissjonati jew imwettqa minn operaturi tan-negozji biex jappoġġaw applikazzjoni u l-konsegwenzi fil-każ tan-nuqqas ta’ konformità ma’ dak l-obbligu. L-emendi introduċew ukoll dispożizzjonijiet dwar id-divulgazzjoni pubblika mill-Awtorità, tad-data xjentifika, tal-istudji u ta’ informazzjoni oħra kollha li jappoġġaw l-applikazzjonijiet, bl-eċċezzjoni ta’ informazzjoni kunfidenzjali ġustifikata kif xieraq, minn kmieni fil-proċess tal-valutazzjoni tar-riskju, segwita minn konsultazzjoni ma’ partijiet terzi.

(5)

Għalkemm ir-Regolament (UE) 2019/1381 ma għandux dispożizzjonijiet rigward il-valutazzjoni tar-riskju ta’ sustanzi jew ta’ ingredjenti, li kienu ġew elenkati fl-Anness III tar-Regolament (KE) Nru 1925/2006, id-dispożizzjonijiet tiegħu huma ta’ rilevanza diretta għal dik il-proċedura, kif deskritt fl-Artikolu 8(4) u (5) tar-Regolament (KE) Nru 1925/2006. Dawn id-dispożizzjonijiet jirrigwardaw il-fażi ta’ qabel is-sottomissjoni, fir-rigward tal-parir ta’ qabel is-sottomissjoni u n-notifika tal-istudji kkummissjonati, kif ukoll il-fażi tal-valutazzjoni tar-riskju, fir-rigward tar-rekwiżiti tat-trasparenza u tal-kunfidenzjalità u tal-konsultazzjonijiet pubbliċi. Dawn jirregolaw prinċipalment proċessi bbażati fuq l-applikazzjoni li jibdew mill-operaturi tal-industrija tal-ikel.

(6)

Ir-Regolament (KE) Nru 1925/2006 jagħti rwol importanti biex juri s-sikurezza ta’ sustanza partikolari taħt skrutinju elenkata fil-Parti Ċ tal-Anness III tiegħu, mhux biss lill-operaturi tal-industrija tal-ikel, iżda wkoll lill-partijiet interessati oħra, bħall-organizzazzjonijiet tal-industrija jew tal-konsumatur. Għaldaqstant, l-evalwazzjoni ta’ sustanza taħt skrutinju ma teħtieġx is-sottomissjoni ta’ applikazzjoni minn applikant maħtur, iżda l-operaturi tan-negozju interessati kollha u partijiet interessati oħra jistgħu jissottomettu d-data u l-informazzjoni għal dak il-għan.

(7)

Huwa meħtieġ li jiġi żgurat li l-proċedura għall-valutazzjoni tar-riskju tas-sustanza taħt skrutinju elenkata fil-Parti Ċ tal-Anness III tar-Regolament (KE) Nru 1925/2006 hija rregolata mid-dispożizzjonijiet kumparabbli ma’ dawk fir-Regolament (UE) 2019/1381 kemm għall-fażijiet ta’ qabel is-sottomissjoni kif ukoll għall-valutazzjoni tar-riskju.

(8)

Fid-dawl ta’ dan ta’ hawn fuq, jenħtieġ li r-Regolament ta’ Implimentazzjoni (UE) Nru 307/2012 jiġi allinjat mal-emendi tar-Regolament (KE) Nru 178/2002 introdotti bir-Regolament (UE) 2019/1381, b’mod partikolari fir-rigward (i) tal-possibilità, prevista fl-Artikolu 32a, biex jintalab parir ta’ qabel is-sottomissjoni mill-persunal tal-Awtorità, kull meta l-Awtorità hija meħtieġa jew mitluba li tipprovdi opinjoni; (ii) l-obbligu, stabbilit fl-Artikolu 32b, biex l-Awtorità tiġi notifikata bl-istudji rilevanti; (iii) l-obbligu tal-Awtorità li tikkonsulta mal-partijiet terzi stabbilit fl-Artikolu 32c, (iv) l-obbligi fir-rigward tal-forma tas-sottomissjonijiet stabbiliti fl-Artikolu 39f, u (v) ir-regoli tal-kunfidenzjalità previsti fl-Artikolu 39.

(9)

Id-dispożizzjoni tal-Awtorità, fuq talba, ta’ parir ta’ qabel is-sottomissjoni dwar ir-regoli applikabbli għas-sottomissjoni tal-fajls, u l-kontenut meħtieġ għalih li juru s-sikurezza ta’ sustanza taħt skrutinju, elenkata fil-Parti Ċ tal-Anness III tar-Regolament (KE) Nru 1925/2006, tista’ ttejjeb il-kwalità tas-sottomissjonijiet, u għalhekk tipprovdi appoġġ għall-valutazzjoni tar-riskju. Madankollu, l-operaturi tan-negozji tal-ikel u kwalunkwe partijiet interessati oħra jaf ma jkunux jistgħu jagħmlu użu sħiħ mill-parir ta’ qabel is-sottomissjoni minħabba l-iskadenza tas-sottomissjoni tal-fajls tagħhom. Fl-interess tal-kwalità mtejba tal-valutazzjoni xjentifika, jenħtieġ li l-operaturi tan-negozji tal-ikel u partijiet interessati oħra jkunu jistgħu jitolbu parir ta’ qabel is-sottomissjoni għal sottomissjoni potenzjali, mill-ġurnata tal-adozzjoni ta’ opinjoni mill-Awtorità skont l-Artikolu 8(2)(b) tar-Regolament (KE) Nru 1925/2006, li jidentifika l-possibilità ta’ effetti ta’ ħsara għas-saħħa assoċjati mal-konsum ta’ sustanza, imma tibqa’ l-inċertezza xjentifika.

(10)

L-istudji li jeħtieġu juru s-sikurezza ta’ sustanza taħt skrutinju, elenkata fil-Parti Ċ tal-Anness III tar-Regolament (KE) Nru 1925/2006, iqisu għadd ta’ fatturi u għalhekk jistgħu jvarjaw b’mod sinifikanti. Li jiġi estiż il-perjodu għall-operaturi tan-negozji tal-ikel jew għall-partijiet ikkonċernati biex jissottomettu l-fajls minn 18-il xahar għal 24 xahar mid-data li fiha sustanza tkun ġiet elenkata fil-Parti Ċ tal-Anness III tar-Regolament (KE) Nru 1925/2006, jista’ jiffaċilita t-tħejjija u s-sottomissjoni tal-fajls, u għalhekk jipprovdi appoġġ għall-valutazzjoni tar-riskju.

(11)

Jenħtieġ li l-obbligu li jiġu notifikati l-istudji relevanti stabbiliti fl-Artikolu 32b tar-Regolament (KE) Nru 178/2002 japplika wkoll għall-operaturi tan-negozji tal-ikel jew għall-partijiet interessati li għandhom il-ħsieb li jissottomettu l-fajl għall-evalwazzjoni kif definit fl-Artikolu 2 tar-Regolament ta’ Implimentazzjoni (UE) Nru 307/2012. Madankollu, huwa meħtieġ adattament ulterjuri għall-proċedura tal-Artikolu 32b tar-Regolament (KE) Nru 178/2002. Il-konsegwenzi proċedurali previsti fl-Artikolu 32b tar-Regolament (KE) Nru 178/2002 f’każ ta’ nuqqas ta’ konformità mad-dispożizzjonijiet tiegħu jirriżultaw f’dewmien fil-valutazzjoni tal-fajl. Madankollu, minħabba t-terminu imperattiv ta’ erba’ snin preskritt mill-Artikolu 8(5) tar-Regolament (KE) Nru 1925/2006, id-dewmien fl-evalwazzjoni jista’ jfisser li t-terminu preskritt mhux se jitħares. Għaldaqstant, dawk il-konsegwenzi proċedurali mhumiex xierqa fil-kuntest tal-proċedura ta’ evalwazzjoni għal sustanzi mqiegħda fil-parti Ċ tal-Anness III tar-Regolament (KE) Nru 1925/2006 u jenħtieġ li ma jiġux previsti. Biex il-Kummissjoni tkun tista’ tieħu deċiżjoni dwar sustanza taħt skrutinju elenkata fil-Parti Ċ tal-Anness III tar-Regolament (KE) Nru 1925/2006 fl-iskadenza mitluba, jenħtieġ li jitqiesu biss il-fajls sottomessi f’24 xahar mid-data li fiha sustanza tkun ġiet elenkata f’dak l-Anness.

(12)

Ir-Regolament (UE) 2019/1381 għandu japplika mis-27 ta’ Marzu 2021. Għaldaqstant, sabiex jiġu żgurati ċ-ċertezza u ċ-ċarezza tad-dritt fir-rigward tar-rekwiżiti tat-trasparenza għall-proċedura skont l-Artikolu 8(4) tar-Regolament (KE) Nru 1925/2006 u biex tippermetti l-implimentazzjoni uniformi tar-rekwiżiti tat-trasparenza u tal-kunfidenzjalità għall-valutazzjoni tar-riskju tal-UE għas-setturi kkonċernati kollha, huwa meħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu. Għar-raġunijiet taċ-ċertezza tad-dritt, jenħtieġ li dan ir-Regolament japplika għal dawk il-fajls sottomessi lill-Awtorità minn dik id-data ’l quddiem.

(13)	Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Emendi għar-Regolament ta’ Implimentazzjoni (UE) Nru 307/2012

Ir-Regolament (UE) Nru 307/2012 huwa emendat kif ġej:

(1)

L-Artikolu 5 huwa sostitwit b’dan li ġej:

“Artikolu 5

Is-sustanza inkluża fil-Parti Ċ tal-Anness III tar-Regolament (KE) Nru 1925/2006

1. Sal-adozzjoni tal-formati standard tad-data skont l-Artikolu 39f tar-Regolament (KE) Nru 178/2002, l-Awtorità għandha biss tqis validu fajl li jiġi ppreżentat f’format elettroniku, li jippermetti it-tniżżil, l-istampar u t-tiftix tad-dokumenti.

Wara l-adozzjoni tal-formati standard tad-data, il-fajl għandu jiġi ppreżentat f’konformità ma’ dawk il-formati standard tad-data li għandhom jitqiesu validi.

Meta l-Awtorità tqis li fajl mhuwiex validu, għandha tgħarraf lill-operatur tal-kummerċ tal-ikel jew lill-parti interessata li ressqet il-fajl u lill-Kummissjoni, waqt li tindika r-raġunijiet għalfejn il-fajl mhuwiex meqjus validu.

2. Għall-finijiet tad-deċiżjoni msemmija fl-Artikolu 8(5) tar-Regolament (KE) Nru 1925/2006, l-Awtorità għandha tqis biss il-fajls sottomessi fi żmien 24 xahar mid-dħul fis-seħħ ta’ deċiżjoni li telenka sustanza fil-Parti Ċ tal-Anness III ta’ dak ir-Regolament, skont l-Artikolu 8(2) tiegħu.”;

(2)

jiddaħħlu l-Artikoli li ġejjin:

“Artikolu 5a

Pariri ta’ qabel is-sottomissjoni

Fuq talba ta’ operatur tal-kummerċ tal-ikel jew ta’ parti interessati oħra, il-persunal tal-Awtorità għandu jipprovdi parir dwar ir-regoli applikabbli għas-sottomissjoni ta’ fajl u l-kontenut meħtieġ għalih li għandu d-data xjentifika bl-għan li turi s-sikurezza ta’ sustanza elenkata fil-Parti Ċ tal-Anness III tar-Regolament (KE) Nru 1925/2006.

L-operaturi tal-kummerċ tal-ikel u partijiet interessati oħra jistgħu jitolbu parir ta’ qabel is-sottomissjoni għal sottomissjoni potenzjali, mill-ġurnata tal-adozzjoni ta’ opinjoni mill-Awtorità skont l-Artikolu 8(2) tar-Regolament (KE) Nru 1925/2006, li jidentifika l-possibilità ta’ effetti ta’ ħsara għas-saħħa assoċjati mal-konsum ta’ sustanza.

Tali parir ta’ qabel is-sottomissjoni għandu jingħata f’konformità mal-Artikolu 32a tar-Regolament (KE) Nru 178/2002, li għandu japplika mutatis mutandis.

Artikolu 5b

Notifika tal-istudji

1. L-operaturi tal-kummerċ tal-ikel u partijiet interessati oħra għandhom jinnotifikaw lill-Awtorità, mingħajr dewmien, bit-titlu, bil-kamp ta’ applikazzjoni, u bid-dati tal-bidu u tat-tlestija ppjanata ta’ kwalunkwe studju kkummissjonat jew imwettaq minnhom biex juru s-sikurezza ta’ sustanza elenkata fil-Parti Ċ tal-Anness III tar-Regolament (KE) Nru 1925/2006, kif ukoll bil-laboratorju jew bil-faċilitajiet oħra tal-ittestjar li jinsabu fl-Unjoni u li qed iwettqu dak l-istudju.

2. Il-laboratorji u faċilitajiet oħra tal-ittestjar li jinsabu fl-Unjoni għandhom ukoll, mingħajr dewmien, jinnotifikaw lill-Awtorità bit-titlu u bil-kamp ta’ applikazzjoni ta’ kwalunkwe studju kkummissjonat mill-operaturi tal-kummerċ tal-ikel u partijiet interessati oħra, imwettaq minn dawn il-laboratorji jew faċilitajiet oħra tal-ittestjar biex juru s-sikurezza ta’ sustanza elenkata fil-Parti Ċ tal-Anness III tar-Regolament (KE) Nru 1925/2006, bid-dati tal-bidu u tat-tlestija ppjanata tagħhom, kif ukoll b’isem l-operatur tal-kummerċ tal-ikel jew tal-parti interessata li kkummissjonat dak l-istudju.

3. L-Awtorità għandha tinkludi l-istudji nnotifikati f’konformità ma’ dan l-Artikolu fil-bażi tad-data msemmija fl-Artikolu 32b(1) tar-Regolament (KE) Nru 178/2002.

Artikolu 5c

Trasparenza

Meta l-Awtorità għandha tipprovdi opinjoni dwar sustanza taħt skrutinju elenkata fil-Parti Ċ tal-Anness III tar-Regolament (KE) Nru 1925/2006, abbażi ta’ fajl validu, din għandha:

(a)	tippubblika d-data sottomessa f’dak il-fajl f’konformità mal-Artikolu 38(1)(ċ) tar-Regolament (KE) Nru 178/2002, li għandu japplika mutatis mutandis’;

(b)	tikkonsulta mal-partijiet interessati u mal-pubbliku, skont l-Artikolu 32c(2) tar-Regolament (KE) Nru 178/2002, li għandu japplika mutatis mutandis, abbażi tal-verżjoni mhux kunfidenzjali tad-data sottomessa f’konformità ma’ dan ir-Regolament.

Artikolu 5d

Kunfidenzjalità

Mas-sottomissjoni ta’ fajl, l-operatur tal-kummerċ tal-ikel jew parti interessata oħra jistgħu jitolbu li ċerti partijiet tal-informazzjoni jew tad-data sottomessa tiġi trattata bħala kunfidenzjali.

Tali talba għall-kunfidenzjalità għandha tkun akkumpanjata minn ġustifikazzjoni verifikabbli li turi li d-divulgazzjoni ta’ tali informazzjoni jew ta’ data tagħmel ħsara sinifikanti fuq l-interessi ta’ min jagħmel it-talba, fis-sens tal-Artikolu 39(2) u (3) tar-Regolament (KE) Nru 178/2002, li għandu japplika mutatis mutandis.”

Artikolu 2

Dħul fis-seħħ u applikazzjoni

Dan ir-Regolament għandu jidħol fis-seħħ fit-tielet jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika għall-fajls sottomessi lill-Awtorità minn dik id-data.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-26 ta’ Mejju 2021.

Għall-Kummissjoni

Il-President

Ursula VON DER LEYEN

(1) ĠU L 404, 30.12.2006, p. 26.

(2) Ir-Regolament ta’ Implimentazzjoni tal-Kummissjoni (UE) Nru 307/2012 tal-11 ta’ April 2012 li jistabbilixxi regoli ta’ implimentazzjoni għall-applikazzjoni tal-Artikolu 8 tar-Regolament (KE) Nru 1925/2006 tal-Parlament Ewropew u tal-Kunsill dwar iż-żieda ta’ vitamini u minerali u ta’ ċerti sustanzi oħra mal-ikel (ĠU L 102, 12.4.2012, p. 2).

(3) Ir-Regolament (UE) 2019/1381 tal-Parlament Ewropew u tal-Kunsill tal-20 ta’ Ġunju 2019 dwar it-trasparenza u s-sostenibbiltà tal-valutazzjoni tar-riskju tal-UE fil-katina alimentari u li jemenda r-Regolament (KE) Nru 178/2002, (KE) Nru 1829/2003, (KE) Nru 1831/2003, (KE) Nru 2065/2003, (KE) Nru 1935/2004, (KE) Nru 1331/2008, (KE) Nru 1107/2009, (UE) 2015/2283 u d-Direttiva 2001/18/KE (ĠU L 231, 6.9.2019, p. 1).

(4) Ir-Regolament (KE) Nru 178/2002 tal-Parlament Ewropew u tal-Kunsill tat-28 ta’ Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta’ sigurtà tal-ikel (ĠU L 31, 1.2.2002, p. 1).

27.5.2021

Il-Ġurnal Uffiċjali tal-Unjoni Ewropea

L 186/20

REGOLAMENT TA’ IMPLIMENTAZZJONI TAL-KUMMISSJONI (UE) 2021/843

tas-26 ta’ Mejju 2021

li jġedded l-approvazzjoni tas-sustanza attiva cyazofamid f’konformità mar-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta’ prodotti għall-protezzjoni tal-pjanti, u li jemenda l-Anness tar-Regolament ta’ Implimentazzjoni tal-Kummissjoni (UE) Nru 540/2011

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1107/2009 tal-Parlament Ewropew u tal-Kunsill tal-21 ta’ Ottubru 2009 dwar it-tqegħid fis-suq ta’ prodotti għall-protezzjoni tal-pjanti u li jħassar id-Direttivi tal-Kunsill 79/117/KEE u 91/414/KEE (1), u b’mod partikolari l-Artikolu 20(1) tiegħu,

Billi:

(1)	Id-Direttiva tal-Kummissjoni 2003/23/KE (2) inkludiet il-cyazofamid bħala sustanza attiva fl-Anness I tad-Direttiva tal-Kunsill 91/414/KEE (3).

(2)	Is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)	L-approvazzjoni tas-sustanza attiva cyazofamid, kif stabbilita fil-Parti A tal-Anness tar-Regolament ta’ Implimentazzjoni (UE) Nru 540/2011, tiskadi fil-31 ta’ Lulju 2021.

(4)	Tressqet applikazzjoni għat-tiġdid tal-approvazzjoni tal-cyazofamid f’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) fil-perjodu ta’ żmien previst f’dak l-Artikolu.

(5)	L-applikant ressaq il-fajls addizzjonali meħtieġa f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet kompluta.

(6)	L-Istat Membru relatur ħejja abbozz tar-rapport dwar il-valutazzjoni tat-tiġdid f’konsultazzjoni mal-Istat Membru korelatur u ressqu lill-Awtorità Ewropea dwar is-Sigurtà fl-Ikel (“l-Awtorità”) u lill-Kummissjoni fit-23 ta’ Ġunju 2015.

(7)

L-Awtorità għamlet is-sommarju tal-fajl addizzjonali disponibbli għall-pubbliku. L-Awtorità ċċirkolat ukoll l-abbozz tar-rapport dwar il-valutazzjoni tat-tiġdid lill-applikant u lill-Istati Membri għall-kummenti tagħhom, u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fit-23 ta’ Mejju 2016, l-Awtorità kkomunikat lill-Kummissjoni l-konklużjoni tagħha (6) dwar jekk jistax ikun mistenni li l-cyazofamid jissodisfa l-kriterji tal-approvazzjoni previsti fl-Artikolu 4 tar-Regolament (KE) Nru 1107/2009. Wara mandat mill-Kummissjoni minħabba inċertezzi relatati ma’ artropodi mhux fil-mira, fit-28 ta’ Lulju 2020 l-Awtorità aġġornat il-konklużjoni tagħha (7). Il-Kummissjoni ppreżentat rapport tat-tiġdid dwar il-cyazofamid lill-Kumitat Permanenti dwar il-Pjanti, l-Annimali, l-Ikel u l-Għalf fit-3 ta’ Diċembru 2020 u abbozz ta’ Regolament fis-26 ta’ Jannar 2021.

(9)

Fir-rigward tal-kriterji biex jiġu identifikati l-proprjetajiet li jfixklu s-sistema endokrinali li daħħal ir-Regolament tal-Kummissjoni (UE) 2018/605 (8), fil-konklużjoni tagħha, l-Awtorità tindika li, abbażi tal-evidenza xjentifika, il-probabbiltà li l-cyazofamid ifixkel is-sistema endokrinali permezz tal-modalitajiet estroġeniċi, androġeniċi, tirojdoġeniċi jew sterojdoġeniċi hija remota ħafna. Abbażi tad-data disponibbli u tal-għarfien attwali miġbur fil-qosor fil-konklużjoni tal-Awtorità, ma ġie osservat l-ebda effett avvers li seta’ jkun relatat ma’ modalità ta’ azzjoni ta’ interferent endokrinali. Għalhekk, il-Kummissjoni tikkonkludi li l-cyazofamid ma jridx jitqies li għandu proprjetajiet li jfixklu s-sistema endokrinali.

(10)

Il-Kummissjoni stiednet lill-applikant iressaq il-kummenti tiegħu dwar il-konklużjoni tal-Awtorità u, f’konformità mat-tielet paragrafu tal-Artikolu 14(1) tar-Regolament ta’ Implimentazzjoni (UE) Nru 844/2012, dwar ir-rapporti tat-tiġdid. L-applikant ressaq il-kummenti tiegħu, li ġew eżaminati bir-reqqa.

(11)	Dwar użu rappreżentattiv wieħed jew aktar, ta’ mill-inqas prodott wieħed tal-protezzjoni tal-pjanti li fih is-sustanza attiva cyazofamid, ġie stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati.

(12)

Il-valutazzjoni tar-riskju għat-tiġdid tal-approvazzjoni tal-cyazofamid hija bbażata fuq għadd limitat ta’ użi rappreżentattivi, li madankollu ma jillimitawx l-użi li għalihom jistgħu jiġu awtorizzati l-prodotti għall-protezzjoni tal-pjanti li fihom il-cyazofamid. Għalhekk, jixraq li ma tinżammx ir-restrizzjoni għall-użu bħala fungiċida.

(13)	Għalhekk, jixraq li tiġġedded l-approvazzjoni tas-sustanza attiva cyazofamid.

(14)	Madankollu, f’konformità mal-Artikolu 14(1) tar-Regolament (KE) Nru 1107/2009, flimkien mal-Artikolu 6 tiegħu, u fid-dawl tal-għarfien xjentifiku u tekniku attwali, jeħtieġ jiġu previsti ċerti kundizzjonijiet. B’mod partikolari, jixraq li tintalab iktar informazzjoni konfermatorja.

(15)

Sabiex ikun hemm aktar fiduċja fil-konklużjoni li l-cyazofamid ma għandux proprjetajiet li jfixklu s-sistema endokrinali, jenħtieġ li l-applikant jipprovdi valutazzjoni aġġornata, f’konformità mal-punt 2.2(b) tal-Anness II tar-Regolament (KE) Nru 1107/2009, tal-kriterji stabbiliti fil-punti 3.6.5 u 3.8.2 tal-Anness II tar-Regolament (KE) Nru 1107/2009, kif emendat bir-Regolament (UE) 2018/605, u f’konformità mal-gwida għall-identifikazzjoni tal-interferenti endokrinali (9).

(16)	Għalhekk jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(17)

Ir-Regolament ta’ Implimentazzjoni tal-Kummissjoni (UE) 2020/869 (10) estenda l-perjodu ta’ approvazzjoni tal-cyazofamid sal-31 ta’ Lulju 2021 sabiex il-proċess ta’ tiġdid ikun jista’ jitlesta qabel ma jiskadi l-perjodu ta’ approvazzjoni għal dik is-sustanza attiva. Peress li d-data tad-dħul fis-seħħ ta’ dan ir-Regolament tkun qrib id-data tal-iskadenza tal-approvazzjoni tal-cyazofamid, jenħtieġ li dan ir-Regolament japplika mill-jum wara d-data tal-iskadenza tal-approvazzjoni tal-cyazofamid.

(18)	Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Tiġdid tal-approvazzjoni tas-sustanza attiva

L-approvazzjoni tas-sustanza attiva cyazofamid, kif speċifikata fl-Anness I, hija mġedda soġġetta għall-kundizzjonijiet stabbiliti f’dak l-Anness.

Artikolu 2

Emendi għar-Regolament ta’ Implimentazzjoni (UE) Nru 540/2011

L-Anness tar-Regolament ta’ Implimentazzjoni (UE) Nru 540/2011 huwa emendat f’konformità mal-Anness II ta’ dan ir-Regolament.

Artikolu 3

Dħul fis-seħħ u data ta’ applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Awwissu 2021.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-26 ta’ Mejju 2021.

Għall-Kummissjoni

Il-President

Ursula VON DER LEYEN

(1) ĠU L 309, 24.11.2009, p. 1.

(2) Id-Direttiva tal-Kummissjoni 2003/23/KE tal-25 ta’ Marzu 2003 biex temenda d-Direttiva tal-Kunsill 91/414/KEE sabiex tinkludi imazamox, oxasulfuron, ethoxysulfuron, foramsulfuron, oxadiargyl u cyazofamid bħala sustanzi attivi (ĠU L 81, 28.3.2003, p. 39).

(3) Id-Direttiva tal-Kunsill 91/414/KEE tal-15 ta’ Lulju 1991 li tikkonċerna t-tqegħid fis-suq ta’ prodotti għall-protezzjoni tal-pjanti (ĠU L 230, 19.8.1991, p. 1).

(4) Ir-Regolament ta’ Implimentazzjoni tal-Kummissjoni (UE) Nru 540/2011 tal-25 ta’ Mejju 2011 li jimplimenta r-Regolament (KE) Nru 1107/2009 tal-Parlament Ewropew u tal-Kunsill f’dak li għandu x’jaqsam mal-lista ta’ sustanzi attivi approvati (ĠU L 153, 11.6.2011, p. 1).

(5) Ir-Regolament ta’ Implimentazzjoni tal-Kummissjoni (UE) Nru 844/2012 tat-18 ta’ Settembru 2012 li jistabbilixxi d-dispożizzjonijiet meħtieġa għall-implimentazzjoni tal-proċedura ta’ tiġdid għas-sustanzi attivi, kif previst fir-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta’ prodotti għall-protezzjoni tal-pjanti (ĠU L 252, 19.9.2012, p. 26).

(6) EFSA Journal 2016;14(6):4503 [24 pp.]. Disponibbli online: www.efsa.europa.eu.

(7) Updated peer review of the pesticide risk assessment of the active substance cyazofamid; EFSA Journal 2020;18(9):6232.

(8) Ir-Regolament tal-Kummissjoni (UE) 2018/605 tad-19 ta’ April 2018 li jemenda l-Anness II tar-Regolament (KE) Nru 1107/2009 billi jistabbilixxi l-kriterji xjentifiċi biex jiġu ddeterminati l-proprjetajiet li jfixklu s-sistema endokrinali. (ĠU L 101, 20.4.2018, p. 33).

(9) L-ECHA (Aġenzija Ewropea għas-Sustanzi Kimiċi) u l-EFSA (l-Awtorità Ewropea dwar is-Sigurtà fl-Ikel) bl-appoġġ tekniku taċ-Ċentru Konġunt tar-Riċerka (JRC), Andersson N, Arena M, Auteri D, Barmaz S, Grigard E, Kienzler A, Lepr P, Lostia AM, Mun S, Parra Morte JM, Pellizzato F, Taraona J, Terrron A u Van der Linden S, 2018. Guidance for the identiﬁcation of endocrine disruptors in the context of Regulations (EU) No 528/2012 and (EC) No 1107/2009. EFSA Journal 2018;16(6):5311, 135 pp.

(10) Ir-Regolament ta’ Implimentazzjoni tal-Kummissjoni (UE) 2020/869 tal-24 ta’ Ġunju 2020 li jemenda r-Regolament ta’ Implimentazzjoni (UE) Nru 540/2011 fir-rigward tal-estensjoni tal-perjodi ta’ approvazzjoni tas-sustanzi attivi beflubutamid, benalaksil, benthiavalicarb, bifenazate, boscalid, bromossinil, captan, cyazofamid, dimethomorph, ethephon, etoxazole, famossadon, fenamiphos, flumjossażin, fluoxastrobin, folpet, formetanate, metribuzin, milbemectin, Paecilomyces lilacinus strain 251, fenmedifam, phosmet, pirimiphos-methyl, propamocarb, prothioconazole, u S-metolachlor (ĠU L 201, 25.6.2020, p. 7).

ANNESS I

Isem Komuni, Numri ta’ Identifikazzjoni

Isem tal-IUPAC

Purità (1)

Data tal-approvazzjoni

Skadenza tal-approvazzjoni

Dispożizzjonijiet speċifiċi

Cyazofamid

Nru CAS: 120116-88-3

Nru CIPAC: 653

4-chloro-2-cyano-N,N-dimethyl-5-p-tolylimidazole-1-sulfonamide

≥ 935 g/kg

01/08/2021

31/07/2036

Għall-implimentazzjoni tal-prinċipji uniformi kif imsemmija fl-Artikolu 29(6) tar-Regolament (KE) Nru 1107/2009, għandhom jitqiesu l-konklużjonijiet tar-rapport tat-tiġdid dwar il-cyazofamid, u b’mod partikolari l-Appendiċijiet I u II tiegħu.

F’din il-valutazzjoni ġenerali, l-Istati Membri għandhom jagħtu attenzjoni partikolari għal dawn li ġejjin:

(a)	l-ispeċifikazzjoni tal-materjal tekniku, kif immanifatturat b’mod kummerċjali;

(b)	l-impatt tal-ipproċessar fuq il-valutazzjoni tar-riskju għall-konsumatur;

(c)	il-protezzjoni ta’ artropodi li mhumiex fil-mira, inkluż il-ħanex.

L-applikant għandu jressaq informazzjoni konfermatorja lill-Kummissjoni, lill-Istati Membri u lill-Awtorità fir-rigward ta’ dawn li ġejjin:

1.	l-effett tal-proċessi tat-trattament tal-ilma fuq in-natura tar-residwi preżenti fl-ilma tal-wiċċ u fl-ilma ta’ taħt l-art, meta l-ilma tal-wiċċ jew l-ilma ta’ taħt l-art jiġi estratt biex jintuża għax-xorb.

2.	il-punti 3.6.5 u 3.8.2 tal-Anness II tar-Regolament (KE) Nru 1107/2009, kif emendat bir-Regolament tal-Kummissjoni (UE) 2018/605.

L-applikant għandu jressaq l-informazzjoni mitluba fil-punt 1 fi żmien sentejn mid-data tal-pubblikazzjoni, mill-Kummissjoni, ta’ dokument ta’ gwida dwar l-evalwazzjoni tal-effett tal-proċessi tat-trattament tal-ilma fuq in-natura tar-residwi li jinsabu fl-ilma tal-wiċċ u fl-ilma ta’ taħt l-art.

Fir-rigward tal-punt 2, l-applikant għandu jipprovdi valutazzjoni aġġornata tal-informazzjoni diġà mressqa u, fejn rilevanti, aktar informazzjoni biex jikkonferma n-nuqqas ta’ attività endokrinali sas-16 ta’ Ġunju 2023.

(1) Aktar dettalji dwar l-identità u l-ispeċifikazzjoni tas-sustanza attiva jinsabu fir-rapport tat-tiġdid.

ANNESS II

L-Anness tar-Regolament ta’ Implimentazzjoni tal-Kummissjoni (UE) Nru 540/2011 huwa emendat kif ġej:

(1)	fil-Parti A, titħassar l-entrata 46 dwar il-cyazofamid;

(2)

fil-Parti B, tiżdied l-entrata li ġejja:

Nru

Isem Komuni, Numri ta’ Identifikazzjoni

Isem tal-IUPAC

Purità (1)

Data tal-approvazzjoni

Skadenza tal-approvazzjoni

Dispożizzjonijiet speċifiċi

“146

Cyazofamid

Nru CAS: 120116-88-3

Nru CIPAC: 653

4-chloro-2-cyano-N,N-dimethyl-5-p-tolylimidazole-1-sulfonamide

≥ 935 g/kg

01/08/2021

31/07/2036

F’din il-valutazzjoni ġenerali, l-Istati Membri għandhom jagħtu attenzjoni partikolari għal dawn li ġejjin:

(a)	l-ispeċifikazzjoni tal-materjal tekniku, kif immanifatturat b’mod kummerċjali;

(b)	l-impatt tal-ipproċessar fuq il-valutazzjoni tar-riskju għall-konsumatur;

(c)	il-protezzjoni ta’ artropodi li mhumiex fil-mira, inkluż il-ħanex.

L-applikant għandu jressaq informazzjoni konfermatorja lill-Kummissjoni, lill-Istati Membri u lill-Awtorità fir-rigward ta’ dawn li ġejjin:

1.	l-effett tal-proċessi tat-trattament tal-ilma fuq in-natura tar-residwi preżenti fl-ilma tal-wiċċ u fl-ilma ta’ taħt l-art, meta l-ilma tal-wiċċ jew l-ilma ta’ taħt l-art jiġi estratt biex jintuża għax-xorb.

2.	il-punti 3.6.5 u 3.8.2 tal-Anness II tar-Regolament (KE) Nru 1107/2009, kif emendat bir-Regolament tal-Kummissjoni (UE) 2018/605.

(1) Aktar dettalji dwar l-identità u l-ispeċifikazzjoni tas-sustanza attiva jinsabu fir-rapport tat-tiġdid.

		ISSN 1977-074X
Il-Ġurnal Uffiċjali tal-Unjoni Ewropea		L 186

Edizzjoni bil-Malti	Leġiżlazzjoni	Volum 64 27 ta' Mejju 2021

Werrej		I Atti leġiżlattivi	Paġna
		REGOLAMENTI
	*	Regolament (UE) 2021/840 tal-Parlament Ewropew u tal-Kunsill tal-20 ta’ Mejju 2021 li jistabbilixxi programm ta’ skambju, assistenza u taħriġ għall-protezzjoni tal-euro kontra l-iffalsifikar għall-perjodu 2021-2027 (il-programm Pericles IV), u li jħassar ir-Regolament (UE) Nru 331/2014	1

	II Atti mhux leġiżlattivi
	REGOLAMENTI
*	Regolament Delegat tal-Kummissjoni (UE) 2021/841 tad-19 ta’ Frar 2021 li jemenda r-Regolament Delegat (UE) Nru 640/2014 fir-rigward tar-regoli dwar in-nuqqas ta’ konformità fir-rigward tas-sistema għall-identifikazzjoni u r-reġistrazzjoni għall-annimali bovini, ovini u kaprini u dwar il-kalkolu tal-livell ta’ penali amministrattivi fir-rigward tal-annimali ddikjarati skont l-iskemi ta’ għajnuna għall-annimali jew il-miżuri ta’ appoġġ relatati mal-annimali	12
*	Regolament ta’ Implimentazzjoni tal-Kummissjoni (UE) 2021/842 tas-26 ta’ Mejju 2021 li jemenda r-Regolament ta’ Implimentazzjoni (UE) Nru 307/2012 fir-rigward tar-rekwiżiti ta’ trasparenza u ta’ konfidenzjalità għall-valutazzjoni tar-riskju tal-UE ta’ sustanzi taħt skrutinju ( 1 )	16
*	Regolament ta’ Implimentazzjoni tal-Kummissjoni (UE) 2021/843 tas-26 ta’ Mejju 2021 li jġedded l-approvazzjoni tas-sustanza attiva cyazofamid f’konformità mar-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta’ prodotti għall-protezzjoni tal-pjanti, u li jemenda l-Anness tar-Regolament ta’ Implimentazzjoni tal-Kummissjoni (UE) Nru 540/2011 ( 1 )	20
	DEĊIŻJONIJIET
*	Deċiżjoni ta’ Implimentazzjoni tal-Kummissjoni (UE) 2021/844 tas-26 ta’ Mejju 2021 terminazzjoni ta’ proċediment antisussidji dwar importazzjonijiet ta’ ċerti prodotti ċatti b’laminazzjoni termali tal-ħadid, mhux illigat jew liga oħra tal-azzar li joriġinaw mit-Turkija	26
*	Deċiżjoni ta’ Implimentazzjoni tal-Kummissjoni (UE) 2021/845 tas-26 ta’ Mejju 2021 li temenda d-Deċiżjoni ta’ Implimentazzjoni (UE) 2019/1202 fir-rigward tad-determinazzjoni ta’ kif l-akkumulazzjonijiet tat-trab jaqbdu spontanjament	28

	Rettifika
*	Rettifika għar-Regolament ta’ Implimentazzjoni tal-Kummissjoni (UE) 2019/238 tat-8 ta’ Frar 2019 li jemenda r-Regolament (UE) Nru 37/2010 biex jikklassifika s-sustanza ovotransferrin fir-rigward tal-limitu massimu ta’ residwi tagħha ( ĠU L 39, 11.2.2019 )	32
*	Rettifika għar-Regolament ta’ Implimentazzjoni tal-Kummissjoni (UE) 2021/810 tal-20 ta’ Mejju 2021 li jemenda r-Regolament ta’ Implimentazzjoni (UE) 2021/2021/808 rigward id-dispożizzjonijiet tranżizzjonali għal ċerti sustanzi elenkati fl-Anness II tad-Deċiżjoni 2002/657/KE ( ĠU L 180, 21.5.2021 )	33


	(1) Test b'rilevanza għaż-ŻEE.