(1)

Skont il-punt (13) tal-Artikolu 287 tad-Direttiva 2006/112/KE, Malta tista’ teżenta mit-taxxa fuq il-valur miżjud (“VAT”) tliet kategoriji ta’ persuni taxxabbli: dawk li l-fatturat annwali tagħhom ma jkunx ogħla minn EUR 37 000 jekk l-attività ekonomika tkun tikkonsisti prinċipalment fil-provvista tal-merkanzija; dawk li l-fatturat annwali tagħhom ma jkunx ogħla minn EUR 24 300 jekk l-attività ekonomika tkun tikkonsisti prinċipalment fil-provvista ta’ servizzi b’valur miżjud baxx (inputs għoljin); u dawk li l-fatturat annwali tagħhom ma jkunx ogħla minn EUR 14 600 f’każijiet oħrajn, jiġifieri dawk li jipprovdu servizz b’valur miżjud għoli (inputs baxxi).

(2)

Permezz tad-Deċiżjoni ta’ Implimentazzjoni tal-Kunsill (UE) 2018/279 (2) Malta ġiet awtorizzata tapplika, sal-31 ta’ Diċembru 2024, miżura speċjali li tidderoga mill-punt (13) tal-Artikolu 287 tad-Direttiva 2006/112/KE biex teżenta mill-VAT lil persuni taxxabbli li l-attività ekonomika tagħhom tkun tikkonsisti prinċipalment fil-provvista ta’ servizzi b’valur miżjud għoli (inputs baxxi) u li l-fatturat annwali tagħhom ma jkunx ogħla minn EUR 20 000.

(3)

Permezz ta’ ittra rreġistrata mal-Kummissjoni fl-20 ta’ Ottubru 2020, Malta talbet awtorizzazzjoni biex tapplika, sal-31 ta’ Diċembru 2024, miżura ta’ deroga mill-punt (13) tal-Artikolu 287 tad-Direttiva 2006/112/KE, li tippermetti lil Malta teżenta mill-VAT lil persuni taxxabbli li l-attività ekonomika tagħhom tikkonsisti prinċipalment fil-provvista ta’ servizzi b’valur miżjud baxx (inputs għoljin), jew fil-provvista ta’ servizzi b’valur miżjud għoli (inputs baxxi) u li l-fatturat annwali tagħhom mhuwiex ogħla minn EUR 30 000 (il-“miżura ta’ deroga”). Il-Kummissjoni talbet aktar informazzjoni relatata mat-talba, li ġiet ipprovduta permezz ta’ ittra rreġistrata mal-Kummissjoni fid-9 ta’ Novembru 2020.

(4)

F’konformità mat-tieni subparagrafu tal-Artikolu 395(2) tad-Direttiva 2006/112/KE, il-Kummissjoni, permezz ta’ ittra datata s-17 ta’ Diċembru 2020, bagħtet it-talba ta’ Malta lill-Istati Membri l-oħra. Permezz ta’ ittra datata t-18 ta’ Diċembru 2020, il-Kummissjoni nnotifikat lil Malta li kellha l-informazzjoni kollha li hija kkunsidrat bħala meħtieġa biex tqis it-talba.

(5)

Minħabba li ż-żieda fil-livell limitu hija mistennija li tnaqqas l-obbligi tal-VAT u b’hekk il-piż amministrattiv u l-ispejjeż tal-konformità għall-impriżi ż-żgħar, u li tissimplifika l-ġbir tal-VAT għall-awtoritajiet tat-taxxa, u minħabba li l-impatt fuq id-dħul totali mill-VAT ta’ Malta miġbur fl-istadju tal-aħħar konsum huwa negliġibbli, jenħtieġ li Malta tiġi awtorizzata tapplika l-miżura ta’ deroga.

(6)

Il-miżura ta’ deroga ma jkollhiex effett negattiv fuq ir-riżorsi proprji tal-Unjoni li jakkumulaw mill-VAT minħabba li Malta ser twettaq kalkolu ta’ kumpens f’konformità mal-Artikolu 6 tar-Regolament tal-Kunsill (KEE, Euratom) Nru 1553/89 (3).

(7)

Jenħtieġ li l-awtorizzazzjoni biex tiġi applikata l-miżura ta’ deroga tkun limitata fiż-żmien. Jenħtieġ li l-limitu ta’ żmien ikun biżżejjed biex tkun tista’ ssir evalwazzjoni tal-effettività u tal-adegwatezza tal-livell limitu. Barra minn hekk, l-Artikolu 287 tad-Direttiva 2006/112/KE tħassar bid-Direttiva tal-Kunsill (UE) 2020/285 (4), li tistabbilixxi regoli tal-VAT aktar sempliċi għall-impriżi ż-żgħar, b’effett mill-1 ta’ Jannar 2025. Għalhekk, huwa adatt li Malta tiġi awtorizzata tapplika l-miżura ta’ deroga sal-31 ta’ Diċembru 2024.

(8)

Għalhekk jenħtieġ li d-Deċiżjoni ta’ Implimentazzjoni (UE) 2018/279 titħassar,

(1)

Fid-19 ta’ Ġunju 2020, f’konformità mal-ewwel subparagrafu tal-Artikolu 55(1) tar-Regolament (UE) Nru 528/2012, il-Bord Estonjan għas-Saħħa (“l-awtorità kompetenti”) adotta deċiżjoni li tippermetti t-tqegħid fis-suq u l-użu tal-prodott bijoċidali Biobor JF għat-trattament antimikrobiku tat-tankijiet tal-fjuwil u tas-sistemi tal-fjuwil tal-inġenji tal-ajru (“l-azzjoni”) sas-16 ta’ Diċembru 2020. F’konformità mat-tieni subparagrafu tal-Artikolu 55(1) ta’ dak ir-Regolament, l-awtorità kompetenti għarrfet lill-Kummissjoni u lill-awtoritajiet kompetenti tal-Istati Membri l-oħra bl-azzjoni u bil-ġustifikazzjoni tagħha.

(2)

Skont it-tagħrif li tat l-awtorità kompetenti, l-azzjoni kienet meħtieġa sabiex titħares is-saħħa pubblika. Il-kontaminazzjoni mikrobijoloġika tat-tankijiet tal-fjuwil u tas-sistemi tal-fjuwil tal-inġenji tal-ajru tista’ twassal għall-funzjonament ħażin tal-magni ta’ inġenji tal-ajru, u tipperikola l-ajrunavigabbiltà tagħhom, u b’hekk tipperikola s-sikurezza tal-passiġġieri u tal-ekwipaġġ. Il-pandemija tal-COVID-19 u r-restrizzjonijiet fuq it-titjiriet li rriżultaw minnha wasslu biex bosta inġenji tal-ajru kellhom jibqgħu pparkjati temporanjament. L-immobbiltà tal-inġenji tal-ajru hija fattur aggravanti tal-kontaminazzjoni mikrobijoloġika.

(3)

Il-Biobor JF fih 2,2’-(1-metiltrimetilenediossi)bis-(4-metil-1,3,2-diossaborinan) (numru CAS 2665-13-6) u 2,2’-ossibis (4,4,6-trimetil-1,3,2-diossaborinan) (numru CAS 14697-50-8), li huma sustanzi attivi għall-użu fil-prodotti bijoċidali tat-tip ta’ prodott 6 bħala preservattivi tal-prodotti waqt il-ħżin, kif iddefinit fl-Anness V tar-Regolament (UE) Nru 528/2012. Billi dawk is-sustanzi attivi mhumiex elenkati fl-Anness II tar-Regolament ta’ Delega tal-Kummissjoni (UE) Nru 1062/2014 (2), mhumiex inklużi fil-ħidma tal-evalwazzjoni sistematika tas-sustanzi attivieżistenti kollha li jinsabu fil-prodotti bijoċidali msemmija fir-Regolament (UE) Nru 528/2012. Għalhekk, l-Artikolu 89 ta’ dak ir-Regolament ma japplikax għalihom u jridu jiġu vvalutati u approvati qabel ma jistgħu jiġu awtorizzati fil-livell nazzjonali wkoll il-prodotti bijoċidali li jkun fihom dawk is-sustanzi attivi.

(4)

Fis-16 ta’ Diċembru 2020, il-Kummissjoni rċeviet talba motivata mingħand l-awtorità kompetenti biex tiġi estiża l-azzjoni f’konformità mat-tielet subparagrafu tal-Artikolu 55(1) tar-Regolament (UE) Nru 528/2012. It-talba motivata saret minħabba tħassib li s-sikurezza tat-trasport bl-ajru tista’ tibqa’ pperikolata minħabba l-kontaminazzjoni mikrobijoloġika tat-tankijiet u tas-sistemi tal-fjuwil tal-inġenji tal-ajru wara s-16 ta’ Diċembru 2020, u fuq l-argument li l-Biobor JF huwa essenzjali biex tiġi kkontrollata din il-kontaminazzjoni mikrobijoloġika.

(5)

Skont it-tagħrif li tat l-awtorità kompetenti, l-uniku prodott bijoċidali alternattiv irrakkomandat mill-manifatturi tal-inġenji tal-ajru u tal-magni għat-trattament tal-kontaminazzjoni mikrobijoloġika (il-Kathon™ FP 1.5) ġie rtirat mis-suq f’Marzu tal-2020 minħabba anomaliji serji fl-imġiba tal-magni li ġew osservati wara t-trattament b’dak il-prodott.

(6)

It-trattament mekkaniku tal-kontaminazzjoni mikrobijoloġika tat-tankijiet tal-fjuwil tal-inġenji tal-ajru u tas-sistemi tal-fjuwil mhux dejjem ikun possibbli u l-proċeduri tal-avjazzjoni miftiehma jeħtieġu t-trattament bi prodott bijoċidali anki meta t-tindif mekkaniku jkun possibbli. Barra minn hekk, it-trattament mekkaniku jesponi lill-ħaddiema għal gassijiet tossiċi u għalhekk jenħtieġ li jiġi evitat.

(7)

Skont it-tagħrif li għandha l-Kummissjoni, il-manifattur tal-Biobor JF ħa passi biex il-prodott jiġi awtorizzat b’mod regolari, u fil-futur qarib mistennija titressaq applikazzjoni għall-approvazzjoni tas-sustanzi attivi li fih. L-approvazzjoni tas-sustanzi attivi u l-awtorizzazzjoni sussegwenti tal-prodott bijoċidali jkunu jikkostitwixxu soluzzjoni permanenti għall-futur, iżda biex dawk il-proċeduri jitlestew, jieħdu ħafna żmien.

(8)

In-nuqqas ta’ kontroll tal-kontaminazzjoni mikrobijoloġika tat-tankijiet tal-fjuwil u tas-sistemi tal-fjuwil tal-inġenji tal-ajru jista’ jipperikola s-sikurezza tat-trasport bl-ajru, u dak il-periklu ma jistax jitrażżan sew bl-użu ta’ prodott bijoċidali ieħor jew b’mezzi oħra. Għalhekk jixraq li l-awtorità kompetenti titħalla testendi l-azzjoni.

(9)

Billi l-azzjoni skadiet fis-16 ta’ Diċembru 2020, jenħtieġ li din id-Deċiżjoni jkollha effett retroattiv.

(10)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Prodotti Bijoċidali,

(1)

Ir-Regolament (UE) 2017/625 jistabbilixxi regoli għat-twettiq ta’ kontrolli uffiċjali u attivitajiet uffiċjali oħra, inkluż għall-għażla u l-ħatra ta’ ċentri ta’ referenza tal-Unjoni Ewropea għat-trattament xieraq tal-annimali. Iċ-ċentri ta’ referenza tal-Unjoni Ewropea għall-attivitajiet orizzontali jappoġġaw it-trattament xieraq tal-annimali tal-Kummissjoni u tal-Istati Membri fil-qasam tar-rekwiżiti tat-trattament xieraq tal-annimali, li huwa msemmi fl-Artikolu 1(2)(f) tar-Regolament (UE) 2017/625.

(2)

Ir-Regolament ta’ Implimentazzjoni tal-Kummissjoni (UE) Nru 2018/329 (2) ħatar ċentru ta’ referenza tal-Unjoni Ewropea għat-trattament xieraq tal-annimali li, skont il-programm ta’ ħidma tiegħu, jiffoka fuq il-ħnieżer, u r-Regolament ta’ Implimentazzjoni tal-Kummissjoni (UE) Nru 2019/1685 (3) ħatar ċentru ta’ referenza tal-Unjoni Ewropea għat-trattament xieraq tal-annimali għat-tjur u għal annimali żgħar oħra tar-razzett.

(3)

Sussegwentement, f’konformità mal-Artikolu 95 tar-Regolament (UE) 2017/625, il-Kummissjoni wettqet proċess ta’ għażla pubblika permezz ta’ sejħa għall-għażla u l-ħatra ta’ ċentru ta’ referenza tal-Unjoni Ewropea għat-trattament xieraq tal-annimali għar-ruminanti u għall-ekwini.

(4)

Il-Kumitat tal-evalwazzjoni u tal-għażla maħtur għall-proċess tal-għażla msemmi fil-premessa 3 ikkonkluda li l-konsorzju mmexxi mill-Università Żvediża tax-Xjenzi Agrikoli u miċ-Ċentru Żvediż għat-Trattament Xieraq tal-Annimali (l-Iżvezja), u magħmul ukoll mill-Università tar-Riżorsi Naturali u x-Xjenzi tal-Ħajja (l-Awstrija), minn Ellinikos Georgikos Organismos-Dimitra/l-Istitut tar-Riċerka Veterinarja (il-Greċja), mill-Istitut Nazzjonali għall-Agrikoltura, l-Ikel u l-Ambjent (Franza), mill-Kulleġġ Universitarju ta’ Dublin (l-Irlanda) u mill-Instituto Zooprofilattico Sperimentale dell’Abruzzo e del Molise “G. Caporale” (l-Italja) (il-konsorzju), jikkonforma mar-rekwiżiti stipulati fl-Artikolu 95(3) tar-Regolament (UE) 2017/625 u jenħtieġ li jkun responsabbli għall-kompiti stabbiliti fl-Artikolu 96 ta’ dak ir-Regolament, fir-rigward tar-ruminanti u tal-ekwini.

(5)

Għalhekk, jenħtieġ li l-konsorzju jinħatar bħala ċ-Ċentru ta’ Referenza tal-Unjoni Ewropea għat-trattament xieraq tal-annimali għar-ruminanti u għall-ekwini, u se jkun responsabbli għall-kompiti ta’ appoġġ inklużi fil-programmi ta’ ħidma annwali jew pluriennali taċ-ċentri ta’ referenza tal-Unjoni Ewropea. Jeħtieġ li dawn il-programmi ta’ ħidma jiġu stabbiliti f’konformità mal-objettivi u mal-prijoritajiet tal-programmi ta’ ħidma rilevanti adottati mill-Kummissjoni f’konformità mal-Artikolu 36 tar-Regolament (UE) Nru 652/2014 tal-Parlament Ewropew u tal-Kunsill (4).

(6)

L-Artikolu 95(2)(b) tar-Regolament (UE) 2017/625 jirrikjedi li l-ħatra ta’ Ċentru ta’ Referenza tal-Unjoni Ewropea għat-trattament xieraq tal-annimali tkun limitata fiż-żmien jew riveduta regolarment. Għalhekk, jenħtieġ li l-ħatra taċ-Ċentru ta’ Referenza tal-Unjoni Ewropea għat-trattament xieraq tal-annimali għar-ruminanti u għall-ekwini, tiġi riveduta kull ħames snin.

(7)

Jenħtieġ li ċ-Ċentru ta’ Referenza tal-Unjoni Ewropea maħtur għat-trattament xieraq tal-annimali għar-ruminanti u għall-ekwini, jingħata żmien biżżejjed biex iħejji l-programm ta’ ħidma tiegħu għall-perjodu baġitarju li jmiss. Għalhekk, jenħtieġ li din id-Deċiżjoni tapplika mill-1 ta’ Ġunju 2021.