(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti ta’ tali awtorizzazzjoni. L-Artikolu 10(2) ta’ dan ir-Regolament jipprevedi l-valutazzjoni mill-ġdid ta’ addittivi awtorizzati skont id-Direttiva tal-Kunsill 82/471/KEE (2).

(2)

Il-likwidu konċentrat tal-L-liżina (bażi), il-likwidu konċentrat tal-monoidroklorur tal-L-liżina, il-monoidroklorur tal-L-liżina, teknikament pur, u s-sulfat tal-L-liżina prodotti permezz tal-fermentazzjoni b’ Corynebacterium glutamicum ġie awtorizzat mingħajr limitu ta’ żmien skont id-Direttiva 82/471/KEE bid-Direttiva tal-Kummissjoni 88/485/KEE (3). Dawn l-addittivi tal-għalf mbagħad ġew irreġistrati fir-Reġistru tal-addittivi tal-għalf bħala prodotti eżistenti, b’konformità mal-Artikolu 10(1) tar-Regolament (KE) Nru 1831/2003.

(3)

F’konformità mal-Artikolu 10(2) tar-Regolament (KE) Nru 1831/2003 flimkien mal-Artikolu 7 tiegħu, tressqu applikazzjonijiet għall-evalwazzjoni mill-ġdid tal-likwidu konċentrat tal-L-liżina (bażi), tal-likwidu konċentrat tal-monoidroklorur tal-L-liżina, tal-monoidroklorur tal-L-liżina, teknikament pur, u tas-sulfat tal-L-liżina prodotti bil-fermentazzjoni ta’ Corynebacterium glutamicum bħala addittivi fll-għalf għall-ispeċijiet kollha tal-annimali. Tressqu wkoll applikazzjonijiet għall-awtorizzazzjoni tal-likwidu konċentrat tal-L-liżina (bażi), tal-likwidu konċentrat tal-monoidroklorur tal-L-liżina, tal-monoidroklorur tal-L-liżina, teknikament pur, u tas-sulfat tal-L-liżina għall-ispeċijiet kollha tal-annimali skont l-Artikolu 7 tar-Regolament (KE) Nru 1831/2003. Ma’ dawn l-applikazzjonijiet kien hemm ukoll id-dettalji u d-dokumenti meħtieġa skont l-Artikolu 7(3) ta’ dan ir-Regolament.

(4)

L-applikazzjonijiet jikkonċenaw l-awtorizzazzjoni tal-likwidu konċentrat tal-L-liżina (bażi), tal-likwidu konċentrat tal-monoidroklorur tal-L-liżina, tal-monoidroklorur tal-L-liżina, teknikament pur, u tas-sulfat tal-L-liżina bħala addittivi fl-għalf għall-ispeċijiet kollha tal-annimali, biex jiġu kklassifikati fil-kategorija tal-addittivi “addittivi nutrittivi”.

(5)

Fl-opinjonijiet tagħha tal-11 ta’ Settembru 2013 (4), tat-28 ta’ Ottubru 2014 (5), tal-10 ta’ Marzu 2015 (6), tas-16 ta’ Ġunju 2015 (7), tat-2 ta’ Diċembru 2015 (8), tad-19 ta’ April 2016 (9), tat-28 ta’ Novembru 2018 (10) , (11), u tat-3 ta’ April 2019 (12), l-Awtorità Ewropea dwar is-Sigurtà fl-Ikel (“l-Awtorità”), taħt il-kundizzjonijiet tal-użu proposti, kkonkludiet li l-likwidu konċentrat tal-L-liżina (bażi) prodott permezz tal- Escherichia coli FERM BP-10941, tal-Escherichia coli FERM BP-11355, tal-Corynebacterium glutamicum KCCM 11117P, tal-Corynebacterium glutamicum NRRL B-50547, tal-Corynebacterium glutamicum NRRL B-50775 u tal-Corynebacterium glutamicum KCCM 10227, il-likwidu konċentrat tal-monoidroklorur tal-L-liżina prodott permezz tal-Escherichia coli FERM BP-10941 u tal-Escherichia coli FERM BP-11355, u l-monoidroklorur tal-L-liżina, teknikament pur, prodott permezz tal-Escherichia coli FERM BP-10941, tal-Escherichia coli FERM BP-11355, tal-Escherichia coli CGMCC 3705, tal-Escherichia coli CGMCC 7.57, tal-Corynebacterium glutamicum NRRL B-50547, tal-Corynebacterium glutamicum NRRL B-50775, tal-Corynebacterium glutamicum KCCM 11117P u tal-Corynebacterium glutamicum KCCM 10227, u tas-sulfat tal-L-liżina prodott permezz tal-Corynebacterium glutamicum KCCM 10227 u tal-Corynebacterium glutamicum DSM 24990 m’għandhomx effetti ħżiena fuq is-saħħa tal-annimali, is-sikurezza tal-konsumaturi jew l-ambjent. Is-sikurezza tal-addittivi prodotti mill-mikroorganiżmu ġenetikament modifikat, b’mod partikolari mill-Corynebacterium glutamicum NRRL B-50547, hija soġġetta għall-kundizzjoni li l-proċess ta’ manifattura jitwettaq billi jiġi żgurat li ma jkun hemm l-ebda DNA rikombinanti tar-razza tal-produzzjoni preżenti fil-prodott finali. L-awtorità ddikjarat ukoll li l-erba’ forom tal-L-liżina jenħtieġ li jitqiesu bħala perikolużi għall-utenti tal-addittivi, b’mod partikolari meta jittieħdu man-nifs. Xi wħud mill-forom jenħtieġ li jitqiesu wkoll li huma kemxejn irritanti għall-għajnejn jew korrużivi għall-ġilda u l-għajnejn. Għalhekk, il-Kummissjoni tqis li jenħtieġ li jittieħdu miżuri protettivi xierqa sabiex jiġu evitati effetti avversi fuq is-saħħa tal-bniedem, b’mod partikolari fir-rigward tal-utenti tal-addittivi. L-Awtorità kkonkludiet ukoll li l-addittivi huma sors effikaċi tal-amminoaċidu L-liżina għall-ispeċijiet kollha tal-annimali u li sabiex ikunu effikaċi fir-ruminanti daqs kemm huma effikaċi fl-ispeċijiet mhux ruminanti, jenħtieġ li l-addittivi ikunu protetti mid-degradazzjoni fil-kirxa. L-Awtorità ma tqisx li hemm bżonn ta’ rekwiżiti speċifiċi għas-sorveljanza ta’ wara t-tqegħid fis-suq. Hija vverifikat ukoll ir-rapport dwar il-metodu ta’ analiżi tal-addittivi tal-għalf fl-għalf u l-ilma, li tressaq mil-Laboratorju ta’ Referenza mwaqqaf permezz tal-Artikolu 21 tar-Regolament (KE) Nru 1831/2003.

(6)

L-ismijiet “likwidu konċentrat tal-L-liżina (bażi)” u “likwidu konċentrat tal-monoidroklorur tal-L-liżina” jenħtieġ li jinbidlu għal “L-liżina bażi, likwidu” u “monoidroklorur tal-L-liżina, likwidu” billi l-kontenut minimu ta’ L-liżina ta’ dawk l-addittivi huwa biss ta’ 50 % u 22 % rispettivament.

(7)

Il-valutazzjoni tal-likwidu konċentrat tal-L-liżina (bażi), tal-likwidu konċentrat tal-monoidroklorur tal-L-liżina, tal-monoidroklorur tal-L-liżina, teknikament pur, u tas-sulfat tal-L-liżina prodotti permezz ta’ fermentazzjoni ma’ Corynebacterium glutamicum spp jew Escherichia coli spp kif imsemmi fil-premessa (5) juri li l-kundizzjonijiet għall-awtorizzazzjoni, kif previst fl-Artikolu 5 tar-Regolament (KE) Nru 1831/2003, huma ssodisfati. Għaldaqstant, l-użu ta’ dawn is-sustanzi jenħtieġ li jiġi awtorizzat kif speċifikat fl-Anness ta’ dan ir-Regolament.

(8)

Billi r-raġunijiet ta’ sikurezza ma jeħtiġux l-applikazzjoni immedjata tal-modifiki fil-kundizzjonijiet tal-awtorizzazzjoni tal-likwidu konċentrat tal-L-liżina (bażi), tal-likwidu konċentrat tal-monoidroklorur tal-L-liżina, tal-monoidroklorur tal-L-liżina, teknikament pur, u tas-sulfat tal-L-liżina prodotti permezz ta’ fermentazzjoni ma’ Corynebacterium glutamicum, huwa xieraq li jingħata perjodu tranżitorju biex il-partijiet interessati jkunu jistgħu jħejju ruħhom biex jissodisfaw ir-rekwiżiti l-ġodda li jirriżultaw mill-awtorizzazzjoni.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti ta’ tali awtorizzazzjoni. L-Artikolu 10(2) ta’ dak ir-Regolament jipprevedi l-evalwazzjoni mill-ġdid ta’ addittivi awtorizzati skont id-Direttiva tal-Kunsill 70/524/KEE (2).

(2)

Il-molibdat tas-sodju kien awtorizzat mingħajr limitu ta’ żmien bħala addittiv tal-għalf għall-ispeċijiet kollha tal-annimali skont id-Direttiva 70/524/KEE. Din is-sustanza wara ddaħħlet fir-Reġistru tal-addittivi tal-għalf bħala prodott eżistenti, skont l-Artikolu 10(1) tar-Regolament (KE) Nru 1831/2003.

(3)

F’konformità mal-Artikolu 10(2) tar-Regolament (KE) Nru 1831/2003, flimkien mal-Artikolu 7 tiegħu, tressqet applikazzjoni għall-evalwazzjoni mill-ġdid tal-molibdat diidrat tas-sodju bħala addittiv tal-għalf għan-nagħaġ.

(4)

L-applikant talab li l-molibdat diidrat tas-sodju jiġi klassifikat fil-kategorija tal-addittivi “addittivi nutrittivi”. L-applikazzjoni kienet akkumpanjata mid-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(5)

Fl-opinjoni tagħha tat-23 ta’ Jannar 2019 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li fil-kundizzjonijiet tal-użu proposti, l-molibdat diidrat tas-sodju ma jħallix effetti ħżiena fuq is-saħħa tal-annimali, is-sikurezza tal-konsumatur jew fuq l-ambjent. Hija kkonkludiet ukoll li l-addittiv huwa kkunsidrat bħala irritant tal-ġilda u tal-għajnejn. Għalhekk, il-Kummissjoni tqis li jenħtieġ li jittieħdu miżuri protettivi xierqa sabiex jiġu evitati effetti avversi fuq is-saħħa tal-bniedem, b’mod partikolari fir-rigward tal-utenti tal-addittiv. Barra minn hekk, l-Awtorità kkonkludiet li s-supplimentazzjoni tal-molibdenu fl-għalf tan-nagħaġ b’molibdat diidrat tas-sodju hija meqjusa bħala effettiva sabiex jiġi garantit bilanċ adegwat mar-ram, meta l-proporzjon tar-ram u tal-molibdenu fid-dieta huwa fil-medda 3–10. L-Awtorità ma tqisx li hemm bżonn ta’ rekwiżiti speċifiċi għas-sorveljanza ta’ wara t-tqegħid fis-suq. Hija vverifikat ukoll ir-rapport dwar il-metodu ta’ analiżi tal-addittiv tal-għalf fl-għalf, li tressaq mil-Laboratorju ta’ Referenza mwaqqaf permezz tal-Artikolu 21 tar-Regolament (KE) Nru 1831/2003.

(6)

Il-valutazzjoni tal-molibdat diidrat tas-sodju turi li l-kundizzjonijiet għall-awtorizzazzjoni, kif previsti fl-Artikolu 5 tar-Regolament (KE) Nru 1831/2003, ġew issodisfati.

(7)

Billi l-applikazzjoni immedjata tal-modifiki fil-kundizzjonijiet tal-awtorizzazzjoni għas-sustanza molibdat diidrat tas-sodju mhijiex meħtieġa minħabba raġunijiet ta’ sikurezza, jixraq li jingħata perjodu tranżizzjonali biex il-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mill-awtorizzazzjoni.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Ir-Regolament (KE) Nru 1272/2008 tal-Parlament Ewropew u tal-Kunsill (2) jipprevedi klassifikazzjoni armonizzata tas-sustanzi bħala karċinoġeniċi, mutaġeniċi jew tossiċi għar-riproduzzjoni (CMR) abbażi ta’ valutazzjoni xjentifika mwettqa mill-Kumitat dwar il-Valutazzjoni tar-Riskji tal-Aġenzija Ewropea għas-Sustanzi Kimiċi. Is-sustanzi huma kklassifikati bħala sustanzi CMR tal-kategorija 1 A, sustanzi CMR tal-kategorija 1B jew sustanzi CMR tal-kategorija 2 skont il-livell tal-evidenza tal-proprjetajiet CMR tagħhom.

(2)

L-Artikolu 15 tar-Regolament (KE) Nru 1223/2009 jipprevedi li huwa pprojbit li s-sustanzi klassifikati bħala sustanzi CMR tal-kategorija 1 A, tal-kategorija 1B jew tal-kategorija 2 fil-Parti 3 tal-Anness VI tar-Regolament (KE) Nru 1272/2008 (is-sustanzi CMR) jintużaw fil-prodotti kożmetiċi. Madankollu, sustanza CMR tista’ tintuża fil-prodotti kożmetiċi meta jintlaħqu l-kundizzjonijiet stabbiliti fit-tieni sentenza tal-Artikolu 15(1) jew fit-tieni subparagrafu tal-Artikolu 15(2) tar-Regolament (KE) Nru 1223/2009.

(3)

Sabiex tiġi implimentata b’mod uniformi l-projbizzjoni tas-sustanzi CMR fis-suq intern, ħalli tiġi żgurata ċ-ċertezza tad-dritt, b’mod partikolari għall-operaturi ekonomiċi u għall-awtoritajiet kompetenti nazzjonali u sabiex jiġi żgurat livell għoli tal-protezzjoni tas-saħħa tal-bniedem, jenħtieġ li s-sustanzi CMR kollha jiġu inklużi fil-lista ta’ sustanzi pprojbiti fl-Anness II tar-Regolament (KE) Nru 1223/2009 u, fejn rilevanti, jitħassru mil-listi ta’ sustanzi ristretti jew awtorizzati fl-Annessi III u V ta’ dak ir-Regolament. Meta jintlaħqu l-kundizzjonijiet stabbiliti fit-tieni sentenza tal-Artikolu 15(1) jew fit-tieni subparagrafu tal-Artikolu 15(2) tar-Regolament (KE) Nru 1223/2009, jenħtieġ li l-listi ta’ sustanzi ristretti jew awtorizzati fl-Annessi III u V ta’ dak ir-Regolament jiġu emendati skont dan.

(4)

Is-sustanzi kollha li ġew ikklassifikati bħala sustanzi CMR skont ir-Regolament (KE) Nru 1272/2008 fl-1 ta’ Diċembru 2018, meta r-Regolament tal-Kummissjoni (UE) 2017/776 (3) sar applikabbli, kienu maħsuba biex jiġu koperti mir-Regolament tal-Kummissjoni (UE) 2019/831 (4). Dan ir-Regolament ikopri s-sustanzi klassifikati bħala sustanzi CMR permezz tar-Regolament tal-Kummissjoni (UE) 2018/1480 (5), li se japplika mill-1 ta’ Mejju 2020.

(5)

Fir-rigward tas-sustanza aċidu 2-idrossi-benżojku, bl-isem “Salicylic acid” fin-Nomenklatura Internazzjonali tal-Ingredjenti Kożmetiċi (INCI), li ġiet ikklassifikata bħala sustanza CMR tal-kategorija 2, tressqet talba għall-applikazzjoni tat-tieni sentenza tal-Artikolu 15(1) tar-Regolament (KE) Nru 1223/2009 u ġie stabbilit li l-kundizzjoni prevista f’dik id-dispożizzjoni ġiet issodisfata.

(6)

L-aċidu saliċiliku u l-imluħ tiegħu huma attwalment elenkati fl-annotazzjoni 3 tal-Anness V tar-Regolament (KE) Nru 1223/2009 bħala preservattivi permessi f’prodotti kożmetiċi f’konċentrazzjoni sa 0,5 % (aċidu).

(7)

L-aċidu saliċiliku huwa elenkat ukoll fl-annotazzjoni 98 tal-Anness III tar-Regolament (KE) Nru 1223/2009 bħala sustanza ristretta, permessa biss meta tintuża għal skopijiet oħra għajr il-preservazzjoni, f’prodotti tax-xagħar li jitlaħalħu f’konċentrazzjoni ta’ mhux aktar minn 3,0 % u f’prodotti oħra f’konċentrazzjoni sa 2,0 %.

(8)

F’konformità mat-tieni sentenza tal-Artikolu 15(1) tar-Regolament (KE) Nru 1223/2009, sustanza klassifikata bħala sustanza CMR tal-kategorija 2 tista’ tintuża fil-prodotti kożmetiċi meta s-sustanza tkun ġiet ivvalutata mill-Kumitat Xjentifiku dwar is-Sikurezza tal-Konsumatur (SCCS) u jkun instab li l-użu tagħha f’prodotti bħal dawn huwa sikur.

(9)

Fil-21 ta’ Diċembru 2018, l-SCCS ħareġ opinjoni xjentifika dwar l-aċidu saliċiliku (6) (“l-opinjoni tal-SCCS”) li kkonkludiet li, abbażi tad-data disponibbli, is-sustanza hija sikura għall-konsumaturi meta tintuża bħala preservattiv fil-prodotti kożmetiċi f’konċentrazzjoni sa 0,5 % (aċidu) meta wieħed iqis ir-restrizzjonijiet attwali tagħha fis-seħħ. L-opinjoni tal-SCCS ma tapplika għal ebda prodott orali, u lanqas ma tapplika għal prodotti li jistgħu jiġu sprejjati li jistgħu jwasslu għall-espożizzjoni tal-pulmuni tal-konsumatur permezz tan-nifs.

(10)

L-SCCS ikkonkluda wkoll li l-aċidu saliċiliku huwa sikur meta jintuża għal skopijiet oħra għajr il-preservazzjoni b’konċentrazzjoni ta’ mhux aktar minn 3,0 % għal prodotti tax-xagħar li jitlaħalħu u sa 2,0 % għal prodotti oħra, meta wieħed iqis ir-restrizzjonijiet attwali tiegħu fis-seħħ, għajr għall-applikazzjonijiet tal-lotion tal-ġisem, tal-eye shadow, tal-mascara, tal-eyeliner, tal-lipstick u tad-deodoranti roll on. L-opinjoni tal-SCCS ma tapplika għal ebda prodott orali, u lanqas ma tapplika għal prodotti li jistgħu jiġu sprejjati li jistgħu jwasslu għall-espożizzjoni tal-pulmuni tal-konsumatur permezz tan-nifs.

(11)

Fl-aħħar nett, l-SCCS ikkonkluda li l-aċidu saliċiliku huwa irritant tal-għajnejn li jista’ jikkawża ħsara serja lill-għajnejn u enfasizza li bħalissa għaddejjin testijiet speċifiċi biex jiġi vvalutat jekk l-aċidu saliċiliku għandux proprjetajiet li jfixklu s-sistema endokrinali u li, skont l-eżitu ta’ dawn it-testijiet, jista’ jkun hemm bżonn li jiġu kkunsidrati l-proprjetajiet potenzjali ta’ tħarbit endokrinali tal-aċidu saliċiliku fil-kożmetiċi.

(12)

Fid-dawl tal-klassifikazzjoni tal-aċidu saliċiliku bħala sustanza CMR tal-kategorija 2 u bħala irritant għall-għajnejn li jista’ jikkawża ħsara serja lill-għajnejn u flimkien mal-opinjoni tal-SCCS, jenħtieġ li s-sustanza tiġi awtorizzata bħala preservattiv fil-prodotti kożmetiċi f’konċentrazzjoni sa 0,5 % (aċidu), meta wieħed iqis ir-restrizzjonijiet attwali tagħha, ħlief għal prodotti orali u għal applikazzjonijiet li jistgħu jwasslu għall-espożizzjoni tal-pulmuni tal-utent aħħari permezz tan-nifs. Fir-rigward ta’ użu għal skopijiet oħra għajr il-preservazzjoni, jenħtieġ li tkun awtorizzata wkoll fil-prodotti tax-xagħar li jitlaħalħu f’konċentrazzjoni sa 3,0 % u f’prodotti oħra ħlief għall-applikazzjonijiet tal-lotion tal-ġisem, tal-eye shadow, tal-mascara, tal-lipstick u tad-deodoranti roll on f’konċentrazzjoni sa 2,0 %. Jenħtieġ li fl-ebda każ ma jiġi awtorizzat biex jintuża f’applikazzjonijiet li jistgħu jwasslu għall-espożizzjoni tal-pulmuni tal-utent finali permezz tan-nifs. Meta wieħed iqis il-konklużjoni tal-SCCS li l-aċidu saliċiliku huwa irritant għall-għajnejn, ir-restrizzjoni u l-kundizzjoni attwali li jiddikjaraw li s-sustanza m’għandhiex tintuża f’prodotti għal tfal taħt it-tliet snin, ħlief għal xampus, jenħtieġ li jiġu mmodifikati sabiex ikopru l-prodotti kollha għat-tfal taħt it-tliet snin. Ir-restrizzjonijiet stabbiliti fl-Anness III tar-Regolament (KE) Nru 1223/2009 u l-kundizzjonijiet stabbiliti fl-Anness V ta’ dak ir-Regolament jenħtieġ li jiġu adattati skont dan.

(13)

Fir-rigward tas-sustanzi l-oħra kollha għajr l-aċidu saliċiliku li ġew ikklassifikati bħala sustanzi CMR skont ir-Regolament (KE) Nru 1272/2008 bir-Regolament (UE) 2018/1480, ma tressqet l-ebda talba għall-użu fil-prodotti kożmetiċi permezz ta’ eċċezzjoni. L-ebda waħda minn dawk is-sustanzi mhi attwalment ristretta jew awtorizzata fl-Annessi III jew V tar-Regolament (KE) Nru 1223/2009. Erbgħa minn dawk is-sustanzi bħalissa huma elenkati fl-Anness II ta’ dak ir-Regolament. Is-sustanzi li mhumiex diġà elenkati fl-Anness II tar-Regolament (KE) Nru 1223/2009 jenħtieġ li jiżdiedu mal-lista ta’ sustanzi pprojbiti fil-prodotti kożmetiċi f’dak l-Anness.

(14)

Is-sustanza 8-idrossikinolina; kinolin-8-ol, bl-isem INCI “Oxyquinoline”, ġiet ikklassifikata bħala sustanza CMR tal-kategorija 1B bir-Regolament (UE) 2017/776 filwaqt li s-sulfat tagħha, is-sustanza sulfat tal-bis (8-idrossikinolinju), bl-isem INCI “Oxyquinoline sulphate” ma ġietx ikklassifikata bħala sustanza CMR. Iż-żewġ sustanzi ġew elenkati fl-annotazzjoni 395 tal-Anness II tar-Regolament (KE) Nru 1223/2009 fiż-żmien meta bdiet tapplika l-klassifikazzjoni tal-ossikinolina bħala sustanza CMR u ġew ipprojbiti għall-użu fil-prodotti kożmetiċi ħlief taħt il-kundizzjonijiet stipulati fl-annotazzjoni 51 tal-Anness III ta’ dak ir-Regolament. Billi ġiet ikklassifikata bħala sustanza CMR, kien jenħtieġ li l-ossikinolina titneħħa mill-annotazzjoni 51 tal-Anness III tar-Regolament (KE) Nru 1223/2009. Bir-Regolament (UE) 2019/831, madankollu l-annotazzjoni 51 tħassret bi żball fl-intier tagħha, inkluża r-referenza għal dik l-annotazzjoni fl-annotazzjoni 395 tal-Anness II tar-Regolament (KE) Nru 1223/2009. Sabiex tiġi riflessa b’mod korrett il-projbizzjoni tal-ossikinolina fil-prodotti kożmetiċi abbażi tal-klassifikazzjoni tagħha bħala sustanza CMR, jenħtieġ li l-annotazzjoni 51 tiġi introdotta mill-ġdid għal dik is-sustanza fl-Anness III tar-Regolament (KE) Nru 1223/2009 u l-annotazzjoni 395 fl-Anness II ta’ dak ir-Regolament jenħtieġ li tiġi adattata skont dan.

(15)

Is-sustanza metil-fenil diammina, bl-isem tal-INCI “Diaminotoluene”, ġiet miżjuda mal-lista ta’ sustanzi pprojbiti fl-Anness II tar-Regolament (KE) Nru 1223/2009 permezz tar-Regolament (UE) 2019/831 bħala l-annotazzjoni 1507. Madankollu, dik l-annotazzjoni ma tikkorrispondix għal sustanza speċifika iżda għal grupp ta’ sustanzi li fosthom 4-metil-m-fenilen diammina u 2-metil-m-fenilen diammina biss, u t-taħlita u l-massa ta’ reazzjoni ta’ dawk iż-żewġ sustanzi ġew ikklassifikati bħala sustanzi CMR skont ir-Regolament (KE) Nru 1272/2008. Fost dawk is-sustanzi CMR, 4-metil-m-fenilenediammina, 2-metil-m-fenilenediammina u taħlita ta’ dawk iż-żewġ sustanzi diġà jinabu elenkati bħala l-annotazzjonijiet 364, 413 u 1144 fl-Anness II tar-Regolament (KE) Nru 1223/2009 filwaqt li s-sustanza massa ta’ reazzjoni ta’ 4-metil-m-fenilenediammina u ta’ 2-metil-m-fenilenediammina għadha ma ġietx ipprojbita għall-użu fil-kożmetiċi. Għalhekk jenħtieġ li tiġi emendata l-annotazzjoni 1507 fl-Anness II tar-Regolament (KE) Nru 1223/2009 biex tkopri biss dik is-sustanza. Billi s-sustanzi CMR 4-metil-m-fenilenediammina, 2-metil-m-fenilenediammina kif ukoll it-taħlita ta’ dawk iż-żewġ sustanzi u r-reazzjoni ta’ massa ta’ dawk is-sustanzi jiffurmaw parti mill-grupp usa ta’ sustanzi ristretti elenkati bħala l-annotazzjoni 9 fl-Anness III tar-Regolament (KE) Nru 1223/2009, l-annotazzjonijiet korrispondenti fl-Anness II inkluża l-annotazzjoni 1507 kif emendata, kellhom jiġu esklużi mill-annotazzjoni 9. Għalhekk jenħtieġ li l-annotazzjoni 9 tal-Anness III tar-Regolament (KE) Nru 1223/2009 tiġi adattata skont dan.

(16)

Barra minn hekk, 19-il sustanza jew gruppi ta’ sustanzi kklassifikati bħala sustanzi CMR permezz tar-Regolament tal-Kummissjoni (UE) 2016/1179 (7), li saru applikabbli fl-1 ta’ Marzu 2018, bi żball ma ġewx inklużi fir-Regolament (UE) 2019/831, minkejja l-fatt li ma ġiet ippreżentata l-ebda talba għall-użu f’prodotti kożmetiċi għal dawk is-sustanzi jew gruppi ta’ sustanzi. Bħalissa l-ebda waħda minn dawk is-sustanzi mhi ristretta jew awtorizzata fl-Annessi III jew V tar-Regolament (KE) Nru 1223/2009. Tmintax (18) minn dawk is-sustanzi jew gruppi ta’ sustanzi bħalissa mhumiex elenkati fl-Anness II tar-Regolament (KE) Nru 1223/2009 u għalhekk jenħtieġ li jiġu inklużi fil-lista ta’ sustanzi pprojbiti fil-prodotti kożmetiċi f’dak l-Anness II. Waħda mis-sustanzi, jiġifieri l-oktaborat tad-disodju anidru, tappartjeni għall-grupp ta’ sustanzi diġà elenkati bħala l-annotazzjoni 1396 fl-Anness II tar-Regolament (KE) Nru 1223/2009 u jenħtieġ li tiġi inkluża f’dik l-annotazzjoni. Għalhekk jenħtieġ li l-annotazzjoni 1396 tiġi adattata skont dan.

(17)

Għalhekk, jenħtieġ li r-Regolament (KE) Nru 1223/2009 jiġi emendat u kkoreġut skont dan.

(18)

L-emendi għar-Regolament (KE) Nru 1223/2009 huma bbażati fuq il-klassifikazzjonijiet tas-sustanzi rilevanti bħala sustanzi CMR permezz tar-Regolament (UE) 2018/1480 u għalhekk jenħtieġ li japplikaw mill-istess data ta’ dawk il-klassifikazzjonijiet.

(19)

Sabiex jiġi evitat kwalunkwe nuqqas ta’ kontinwità u ta’ inċertezza legali għall-operaturi ekonomiċi, il-korrezzjoni tal-iżball introdott bir-Regolament (UE) 2019/831 fir-rigward tas-sustanza sulfat tal-ossikinolina jenħtieġ li tapplika b’mod retroattiv mid-data tad-dħul fis-seħħ ta’ dak ir-Regolament.

(20)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Prodotti Kożmetiċi,

(1)

Fis-26 ta’ Jannar 2015, fil-5 ta’ Frar 2015 u fit-23 ta’ Ġunju 2015, il-Kunsill adotta d-Deċiżjonijiet (UE) 2015/116 (1), (UE) 2015/190 (2) u (UE) 2015/994 (3) li jaħtru l-membri u l-membri supplenti fil-Kumitat tar-Reġjuni għall-perijodu mis-26 ta’ Jannar 2015 sal-25 ta’ Jannar 2020.

(2)

Konsegwentement għal tmiem il-mandat tas-Sur Vito SANTARSIERO, sar vakanti s-siġġu ta’ membru supplenti fil-Kumitat tar-Reġjuni.

(1)

Permezz ta’ ittra tat-30 ta’ Diċembru 2005, l-Associazione Bancaria Italiana (“ABI” jew “l-ilmentatur”) ressqet ilment quddiem il-Kummissjoni rigward diversi miżuri li jibbenifikaw mill-attivitajiet bankarji tal-Poste Italiane SpA (“Poste Italiane” jew “PI”). B’mod partikolari, il-Kummissjoni ġiet infurmata li, skont ftehim bejn ir-Repubblika tal-Italja (“l-Italja”) u l-PI, l-Italja ser tirrimunera l-fondi miġbura fil-kontijiet kurrenti postali tal-PI u ddepożitati mat-Teżor Taljan (“it-Teżor”) b’rata ta’ imgħax ta’ madwar 4 %, filwaqt li l-PI tirrimunera l-kontijiet kurrenti postali b’rata ta’ madwar 1 % (il-“miżura”). Il-firxa bejn ir-rata tad-depożitu (jiġifieri r-rata tal-imgħax li tħallas il-PI lid-detenturi tal-kontijiet kurrenti postali) u r-rati tas-self (jiġifieri r-rata tal-imgħax li tirċievi l-PI mit-Teżor għall-fondi ddepożitati ma’ tal-aħħar) tkun ogħla mill-firxa “tas-suq” rilevanti u, b’hekk, tikkostitwixxi għajnuna mill-Istat fil-fehma tal-ilmentatur.

(2)

Permezz ta’ ittra tas-7 ta’ Frar 2006, il-Kummissjoni bagħtet sensiela ta’ mistoqsijiet lill-Italja relatati mar-rimunerazzjonijiet imħallsa fuq il-kontijiet kurrenti postali. L-Italja wieġbet għal dawn il-mistoqsijiet f’ittra tal-21 ta’ April 2006. Fit-30 ta’ Marzu 2006 saret laqgħa mal-Italja u mal-PI.

(3)

Permezz tal-ittra tas-26 ta’ Settembru 2006, il-Kummissjoni għarrfet lill-Italja li hija ddeċidiet li tibda l-proċedura stipulata fl-Artikolu 108(3) tat-Trattat dwar il-Funzjonament tal-Unjoni Ewropea (“TFUE”) fir-rigward tal-miżura. Il-Kummissjoni stiednet lill-partijiet interessati sabiex iressqu l-kummenti tagħhom dwar il-miżura. (2)

(4)

Permezz ta’ deċiżjoni tas-16 ta’ Lulju 2008 (3) (“id-Deċiżjoni tal-2008”), il-Kummissjoni kkonkludiet li r-rimunerazzjoni mogħtija mill-Italja kienet tammonta għal għajnuna mill-Istat inkompatibbli mas-suq intern, u ordnat l-irkupru immedjat tagħha.

(5)

Fl-4 ta’ Diċembru 2008, il-PI ressqet rikors quddiem il-Qorti Ġenerali bl-għan li tiġi annullata d-Deċiżjoni tal-2008.

(6)

Permezz tas-sentenza tat-13 ta’ Settembru 2013 fil-kawża T-525/08 (4), il-Qorti Ġenerali annullat id-Deċiżjoni tal-2008 (“is-sentenza tal-2013”).

(7)

Fit-30 ta’ Ottubru 2014, ġiet ippubblikata sejħa għall-offerti fuq is-sit elettroniku tal-Kummissjoni (5) sabiex jitwettaq rapport li janalizza u jqabbel ir-rendiment tal-investimenti possibbli tal-fondi miġbura mill-PI permezz tal-offerta tal-kontijiet kurrenti postali għall-perjodu 2005-2007.

(8)

Fid-19 ta’ Diċembru 2014, il-kuntratt ingħata lill-Università ta’ Perugia. Ir-rapport ġie konkluż f’Novembru 2015.

(9)

Il-PI hija l-fornitur tas-servizz postali universali fl-Italja, li jipprovdi servizz ta’ interess ekonomiku ġenerali, jiġifieri l-obbligu tas-servizz postali universali (6), skont it-tieni Direttiva Postali (7) u r-regolamenti dwar is-servizz postali universali. Fil-preżent, is-servizzi finanzjarji mhumiex inklużi fil-mandat tas-servizz ta’ interess ekonomiku ġenerali li hija fdata bih il-PI.

(10)

Minbarra li tipprovdi servizzi postali ewlenin, il-PI toffri prodotti integrati, kif ukoll servizzi ta’ komunikazzjoni, loġistiċi u finanzjarji madwar l-Italja kollha.

(11)

L-attivitajiet bankarji tal-PI jitwettqu permezz ta’ diviżjoni integrata kompletament imsejħa BancoPosta.

(12)

Bejn l-2005 u l-2007, l-Italja kienet l-azzjonist ewlieni tal-PI, b’sehem ta’ 65 %, filwaqt li Cassa Depositi e Prestiti (“CDP”) kienet azzjonist minoritarju tal-PI b’sehem ta’ 35 %. Is-CDP kienet parti mill-Amministrazzjoni Pubblika sakemm ġiet ittrasformata f’kumpanija b’responsabbiltà limitata fl-aħħar tal-2003. Mill-2003, anki bit-trasferiment ta’ 30 % tal-kapital azzjonarju tas-CDPs lil 65 fondazzjoni bankarja (8), is-CDP għadha taħt il-kontroll tal-Italja. Fiż-żmien meta ġiet implimentata l-miżura, il-PI kienet ukoll taħt il-kontroll tal-Italja.

(13)

Il-miżura vvalutata tikkonċerna r-rimunerazzjoni tal-fondi miġbura minn Poste Italiane fuq il-kontijiet kurrenti postali u li ġew iddepożitati mat-Teżor fit-tliet snin mill-2005 sal-2007.

(14)

L-obbligu li jiġu ddepożitati l-fondi mat-Teżor (“l-Obbligu”) (9) kien stipulat fil-Liġi Nru 266 tat-23 ta’ Diċembru 2005 (10) (“il-Liġi tal-2005”), filwaqt li r-rimunerazzjoni ngħatat permezz ta’ konvenzjoni bejn l-Italja u PI, li ġiet adottata fit-23 ta’ Frar 2006 (“il-Konvenzjoni”).

(15)

Wara digriet fil-5 ta’ Diċembru 2003 (11), ir-relazzjoni bejn il-PI u t-Teżor tista’ tiġi deskritta permezz taċ-ċart li ġejja:

(16)

Il-Liġi tal-2005 stabbilixxiet li l-imgħaxijiet finanzjarji mħallsa lill-PI għad-depożiti mat-Teżor kellhom jiġu definiti bejn l-Italja u l-PI skont il-parametri tas-suq.

(17)

Wara l-Liġi tal-2005, il-Konvenzjoni ddefinixxiet il-mekkaniżmi konkreti għall-istabbiliment tar-rati tal-imgħax għal perjodu ta’ tliet snin; hija daħlet fis-seħħ fl-4 ta’ April 2006 (12) b’effett retroattiv mill-1 ta’ Jannar 2005. Ir-rata tal-imgħax annwali ġiet essenzjalment ikkalkolata bħala l-medja ppeżata tal-qligħ mill-bonds tal-Gvern Taljan (13) fi 30 sena (80 %) u f’10 snin (10 %), kif ukoll mill-kambjali tat-Teżor ta’ tnax-il xahar (14) (10 %). Ir-rati annwali tat-titoli tal-gvern u tal-bonds tat-Teżor użati bħala referenza fil-Konvenzjoni nkisbu fuq il-bażi tal-medja sempliċi tal-24 valur tal-kwotazzjoni rreġistrati fl-ewwel jum u fil-15-il jum ta’ kull xahar mill-MTS SpA (il-kumpanija li tipprovdi n-negozjar elettroniku bl-ingrossa tal-bonds tal-Gvern Taljan u titoli oħrajn għal terminu fiss). B’hekk, id-dispożizzjoni dwar l-iffissar mill-ġdid tal-parametri kull 15-il jum iddeterminat in-natura varjabbli tal-indiċjar. Barra minn hekk, f’każ ta’ bidliet sinifikanti fil-kurva tar-rati (pereżempju bidla fir-relazzjoni bejn ir-rati għal żmien twil u dawk għal żmien qasir), PI tista’ tirrevedi l-iskema tal-kalkolu. Il-Konvenzjoni tista’ tiġi rrevokata minn kwalunkwe parti fl-aħħar ta’ kull sena b’avviż minn qabel ta’ 6 xhur.

(18)

Ir-rata ta’ imgħax fis-snin 2005, 2006 u 2007 kienet tammonta għal 3,9 %, 4,25 % u 4,7 %, rispettivament.

(19)

Bis-saħħa tal-Liġi Nru 296 tas-27 ta’ Diċembru 2006 (“il-Liġi tal-2006”) (15), l-Italja mmodifikat il-Liġi tal-2005. Il-Liġi tal-2006 iddefinixxiet qafas ta’ investiment ġdid: ir-rekwiżit li PI tiddepożita l-fondi miġbura fuq il-kontijiet kurrenti postali li jappartjenu għall-klijenti privati (jiġifieri li ma jappartjenux lill-Amministrazzjoni Pubblika) ġie abolit u dawk il-fondi kellhom jiġu investiti mill-PI f’bonds tal-Gvern fiż-żona tal-Euro (16). Skont il-Liġi tal-2006, il-qafas ta’ investiment ġdid ġie implimentat gradwalment matul l-2007 u tlesta sal-aħħar ta’ dik is-sena.

(20)

Fid-deċiżjoni tal-2008, il-Kummissjoni kkonkludiet li l-miżura vvalutata, (jiġifieri r-rimunerazzjoni mogħtija mit-Teżor lil PI skont il-Konvenzjoni) kienet tikkostitwixxi għajnuna mill-Istat inkompatibbli mas-suq intern, u ordnat l-irkupru immedjat u effikaċi tagħha.

(21)

Sabiex tiġi stabbilita l-eżistenza ta’ vantaġġ skont it-tifsira tal-Artikolu 107(1) tat-TFUE fid-Deċiżjoni tal-2008, il-Kummissjoni qabblet ir-rata tal-imgħax imħallsa mit-Teżor lill-PI skont il-Konvenzjoni (“ir-rata tal-Konvenzjoni”) mar-rata tal-imgħax kien iħallas mutwatarju privat prudenti fuq is-suq f’sitwazzjoni simili (“ir-rata mogħtija lill-mutwatarju privat prudenti”).

(22)

Kif ġie spjegat fil-premessa 119 tad-Deċiżjoni tal-2008, fid-definizzjoni tar-rimunerazzjoni tad-depożiti, mutwatarju privat prudenti jkun ikkunsidra essenzjalment l-elementi li ġejjin:

(23)

Fir-rigward tal-ammonti grossi tal-fondi ddepożitati, il-Kummissjoni kkunsidrat fid-Deċiżjoni tal-2008 li dawn kienu jammontaw għal total ta’ EUR 35 biljun, li huwa ammont sinifikanti ta’ flus minn sellief wieħed. Madankollu, il-Kummissjoni osservat li d-depożitu minn PI lit-Teżor jirrappreżenta biss 2,8 % tal-ammont pendenti tat-titoli tal-Gvern mill-aħħar tal-2005. Barra minn hekk, il-ħruġ tal-bonds tal-Gvern Taljan kien ġie eċċessivament sottoskritt matul dak il-perjodu. Għalhekk, ma kien hemm l-ebda indikazzjoni ta’ nuqqas ta’ fondi fis-suq u li d-depożitu tal-PI kien strumentali sabiex jingħeleb tali nuqqas (il-premessa 124 tad-Deċiżjoni tal-2008).

(24)

Fir-rigward tal-istabbiltà tal-fondi ddepożitati, il-Kummissjoni kienet tal-fehma li 10 % tad-depożiti fil-kontijiet kurrenti postali jistgħu jitqiesu bħala volatili u 90 % jistgħu jitqiesu bħala stabbli (il-premessa 133 tad-Deċiżjoni tal-2008).

(25)

Fir-rigward tat-tul medju/il-maturità tad-depożiti, il-Kummissjoni għamlet distinzjoni bejn il-ġestjoni attiva tal-fondi, li kienet tkun possibbli fin-nuqqas tal-Konvenzjoni, u l-ġestjoni passiva tal-fondi, li tirriżulta mill-Obbligu. Mutwatarju privat prudenti kellu jistenna li l-Obbligu kien ikollu jinbidel fi żmien massimu ta’ ħames snin u kien ikollu jikkunsidra dan meta tiġi ddeterminata r-rata tas-self. F’qafas ta’ ġestjoni attiva tal-fondi, il-Kummissjoni ddikjarat li l-maturità medja tal-ammont globali tal-fondi miġbura fuq il-kontijiet postali kienet ftit inqas minn ħames snin. Għaldaqstant, mutwatarju privat prudenti kellu jibbaża r-rimunerazzjoni tas-suq tal-parti stabbli tad-depożiti fuq il-qligħ ta’ bond ta’ ħames snin (minflok il-qligħ ta’ 10 snin jew 30 sena, kif meħtieġ mill-Konvenzjoni). F’dak li għandu x’jaqsam mal-parti volatili tad-depożiti, mutwatarju privat prudenti kien ikollu jibbaża r-rimunerazzjoni fuq il-kambjali tat-Teżor ta’ tliet xhur (minflok il-kambjali tat-Teżor ta’ 12-il xahar, kif meħtieġ mill-Konvenzjoni).

(26)

Fir-rigward tar-riskji finanzjarji relatati mad-depożiti mill-kontijiet kurrenti postali, il-Kummissjoni osservat li r-riskju tal-likwidità nġarr kompletament mill-mutwatarju (jiġifieri t-Teżor) u mhux mill-PI. Skont il-Konvenzjoni, jekk id-depożitanti jkunu rtiraw flushom mill-kontijiet kurrenti postali, it-Teżor ikollu jipprovdi l-fondi meħtieġa għall-istess ammont lil PI.

(27)

Il-Kummissjoni kkonkludiet (il-premessa 178 tad-Deċiżjoni tal-2008) li r-rata tal-Konvenzjoni qabżet ir-rata mogħtija lill-mutwatarju privat prudenti b’1,09 % fl-2005, 0,65 % fl-2006 u 0,47 % fl-2007. Għalhekk, il-Kummissjoni kkonkludiet li l-miżura kienet tikkostitwixxi għajnuna mill-Istat skont it-tifsira tal-Artikolu 107(1) tat-TFUE.

(28)

Ad abundatiam, fil-valutazzjoni tagħha, il-Kummissjoni eżaminat il-possibbiltajiet ta’ investimenti alternattivi ssuġġeriti mill-Italja bħala disponibbli għall-PI fin-nuqqas tal-Obbligu, b’mod partikolari l-investimenti magħmula mill-PI bil-fondi miġbura permezz tal-attivitajiet ta’ assigurazzjoni tagħha, Poste Vita SpA, u l-istrateġiji alternattivi għall-ġestjoni attiva tal-fondi. F’dan il-kuntest, il-Kummissjoni analizzat jekk dawn l-investimenti alternattivi kinux jipprovdu lill-PI b’rendiment simili jew ogħla minn dak stabbilit mill-Konvenzjoni.

(29)

Il-Kummissjoni kkonkludiet li dawn l-investimenti alternattivi ma kinux jipprovdu lill-PI b’rendimenti simili jew ogħla minn dak stabbilit mill-Konvenzjoni, minn perspettiva ta’ riskju/redditu.

(30)

Permezz tas-sentenza tal-2013, il-Qorti Ġenerali annullat id-Deċiżjoni tal-2008.

(31)

Il-Qorti Ġenerali sostniet li l-eżistenza ta’ differenza pożittiva bejn ir-rata tal-Konvenzjoni u r-rata mogħtija lill-mutwatarju privat prudenti ma kinitx biżżejjed sabiex turi vantaġġ għal PI.

(32)

Il-Qorti Ġenerali osservat li r-rata mogħtija lill-mutwatarju privat prudenti kienet stmata mill-Kummissjoni abbażi tal-erba’ parametri deskritti fil-premessa 22 tad-deċiżjoni preżenti. F’dawn iċ-ċirkostanzi, il-Qorti Ġenerali kkonkludiet li r-rata mogħtija lill-mutwatarju privat prudenti ma kinitx tikkostitwixxi rata tas-suq (17).

(33)

Il-Qorti Ġenerali nnotat li anki jekk ir-rata mogħtija lill-mutwatarju privat prudenti ma kinitx fil-livell tar-rata tas-suq, il-PI tibbenefika minn vantaġġ biss jekk ir-rata tal-Konvenzjoni tkun ogħla mir-redditu li l-PI setgħet tikseb b’mod raġonevoli fin-nuqqas tal-Obbligu.

(34)

Il-Qorti Ġenerali ddeterminat li l-Kummissjoni ma setgħetx tikkonkludi li l-miżura kienet ta’ benefiċċju għal PI mingħajr ma turi b’mod attiv li, fin-nuqqas tal-Obbligu, il-PI ma setgħetx tikseb redditu ogħla billi tinvesti d-depożiti mill-kontijiet kurrenti postali meta mqabbla mar-rata tal-Konvenzjoni.

(35)

Il-Qorti Ġenerali kkonkludiet li l-Kummissjoni kienet għamlet żball evidenti fid-Deċiżjoni tal-2008 billi kkonkludiet li l-miżura kienet vantaġġjuża għall-PI abbażi tad-differenza pożittiva bejn ir-rata tal-Konvenzjoni u r-rata mogħtija lill-mutwatarju privat prudenti.

(36)

Il-Qorti Ġenerali qieset ir-raġunijiet imressqa mill-Kummissjoni sabiex tikkontesta r-rilevanza tal-elementi ppreżentati mill-Italja bħala mhux issostanzjati biżżejjed.

(37)

Il-Qorti Ġenerali nnotat ukoll li l-Kummissjoni kienet ivvalutat, ad abundatiam, ir-redditi miksuba mill-investimenti magħmula minn PI bil-fondi miġbura permezz tal-attivitajiet ta’ assigurazzjoni tagħha u r-redditi ġġenerati fil-qafas ta’ strateġija ta’ ġestjoni attiva tal-fondi, u kienet ikkonkludiet li tali strateġiji ta’ investimenti alternattivi ma kinux jiġġeneraw rati ta’ mgħax simili għal, jew ogħla minn, dawk stabbiliti mill-Konvenzjoni matul il-perjodu rilevanti, minn perspettiva ta’ riskju/redditu.

(38)

Il-Qorti Ġenerali vvalutat jekk il-konklużjoni tal-Kummissjoni, abbażi tal-valutazzjoni tagħha tal-istrateġiji ta’ investimenti alternattivi proposti mill-Italja, li l-miżura kienet tikkostitwixxi għajnuna mill-Istat, kinitx korretta.

(39)

Il-Qorti Ġenerali sostniet li l-miżati għall-ġestjoni marbuta mal-kontijiet kurrenti postali u mal-prodotti tal-assigurazzjoni ma kinux rilevanti għat-tqabbil tar-redditi ġġenerati mir-rata tal-Konvenzjoni mal-istrateġiji ta’ investimenti alternattivi. Konsegwentement, il-Qorti sostniet li l-Kummissjoni żbaljat meta naqqset dawk il-miżati, kif ukoll li t-tqabbil bejn ir-rata tal-Konvenzjoni u r-redditi “kkalkolati b’mod nett” ta’ dawk il-miżati għall-ġestjoni marbuta ma’ prodotti tal-assigurazzjoni ma kienx rilevanti għall-valutazzjoni ta’ jekk il-miżura kinitx tikkostitwixxi għajnuna mill-Istat.

(40)

Fir-rigward tal-istrateġija tal-ġestjoni attiva tal-fondi, il-Qorti Ġenerali ddikjarat li l-Kummissjoni ma setgħetx tagħmel tqabbil sinifikanti bejn ir-rata tal-Konvenzjoni u r-redditu tal-istrateġija tal-ġestjoni attiva tal-fondi billi tiffoka fuq perjodu limitat ta’ tliet snin, li ma kienx rappreżentattiv tar-redditi miksuba mill-istrateġija tal-ġestjoni attiva tal-fondi.

(41)

Barra minn hekk, il-Qorti Ġenerali sostniet li l-qligħ kapitali huwa parametru importanti tal-istrateġiji tal-ġestjoni attiva tal-fondi u, għalhekk, jenħtieġ li ma jitħalliex barra minn analiżi tal-kompatibbiltà tal-miżura mas-suq intern. Il-Kummissjoni kienet sostniet li l-qligħ kapitali jenħtieġ li jitħalla barra mill-analiżi, minħabba li ma setax ikun previst ex ante u, b’riżultat ta’ dan, ir-redditi ġġenerati minn strateġija ta’ ġestjoni attiva tal-fondi wara li jitnaqqas dak il-qligħ kapitali kienu aktar baxxi mir-rata tal-Konvenzjoni jew mir-rata mogħtija lill-mutwatarju privat prudenti.

(42)

Il-Qorti Ġenerali sostniet li l-fatt li r-redditi ġġenerati mill-istrateġija ta’ ġestjoni attiva tal-fondi, wara li jitnaqqas il-qligħ kapitali, kienu aktar baxxi mir-rata tal-Konvenzjoni ma kienx rilevanti sabiex tiġi stabbilita l-eżistenza ta’ vantaġġ skont it-tifsira tal-Artikolu 107(1) tat-TFUE.

(43)

Il-Qorti Ġenerali sostniet li l-konklużjoni tal-Kummissjoni fid-Deċiżjoni tal-2008 li, fin-nuqqas tal-Obbligu, il-PI ma kinitx tkun tista’ tikseb redditi ugwali għal, jew ogħla mir-rata tal-Konvenzjoni, kienet ibbażata fuq informazzjoni żbaljata jew skorretta.

(44)

Għalhekk, il-Qorti Ġenerali annullat id-Deċiżjoni tal-2008. Is-sentenza tal-2013 ma ġietx appellata.

(45)

Fl-ittra tagħha tas-27 ta’ Diċembru 2006, l-ABI ressqet il-kummenti li ġejjin:

(46)

Fl-ittri tagħha tal-31 ta’ Ottubru 2006, tad-29 ta’ Diċembru 2006, tas-16 ta’ Frar 2007, tat-30 ta’ Marzu 2007, tat-2 ta’ April 2007, tal-1 ta’ Ġunju 2007, tas-27 ta’ Novembru 2007, tad-29 ta’ Frar 2008, tas-7 ta’ Marzu 2008 u tat-23 ta’ April 2008, l-Italja ppreżentat diversi argumenti.

(47)

L-ewwel nett, l-Italja fakkret li l-Liġi tal-2005 u l-Konvenzjoni speċifikaw li l-imgħax finanzjarju mħallas lill-PI kellu jiġi stabbilit skont il-parametri tas-suq. Skont l-Italja, ma kien derivat l-ebda vantaġġ minn dak l-imgħax.

(48)

It-tieni nett, l-Italja sostniet li l-kontijiet kurrenti postali għandhom jitqabblu biss mal-kontijiet kurrenti bankarji mill-2001, meta tnieda l-prodott il-ġdid “Conto BancoPosta”. Qabel l-2001, l-ammonti depożitati mat-Teżor kienu jvarjaw, pereżempju, kien hemm tnaqqis sinifikanti fid-depożiti tal-kontijiet kurrenti fl-aħħar tas-snin disgħin (1990s), b’mod partikolari bejn l-1996 u l-1997, li rriżulta mill-adozzjoni tal-Liġi Nru 662 tat-23 ta’ Diċembru 1996, li imponiet l-għeluq tal-kontijiet użati mit-Teżor sabiex iħallas il-pensjonijiet tal-Istat. Dan l-għeluq wassal għal tnaqqis fid-depożiti ta’ madwar EUR 11-il biljun (mill-1 ta’ Jannar 1997). Skont l-Italja, huwa diffiċli li wieħed jidentifika l-kawża eżatta ta’ dawn il-varjazzjonijiet, minħabba fatturi politiċi eżoġeni u l-fatt li l-PI kienet istituzzjoni pubblika f’dak iż-żmien. Wara t-trasformazzjoni tal-PI f’kumpanija pubblika fl-1998, l-ammonti ddepożitati mat-Teżor żdiedu b’mod regolari u kostanti.

(49)

L-Italja ddikjarat li l-Konvenzjoni bejn it-Teżor u l-PI rregolat ir-relazzjoni finanzjarja tagħhom b’mod trasparenti. Minn naħa, il-Konvenzjoni kellha tul ta’ tliet snin u ma kinitx bla limitu fiż-żmien; min-naħa l-oħra, il-Konvenzjoni pprevediet il-possibbiltà li kwalunkwe parti tirrevoka l-kuntratt jekk il-kundizzjonijiet tas-suq ma jibqgħux jiggarantixxu l-konsistenza tal-mekkaniżmu tal-kalkolu tar-rimunerazzjoni tad-depożitu.

(50)

Skont l-Italja, l-għażla ta’ rata tal-imgħax varjabbli għall-Konvenzjoni għenet sabiex tiġi żgurata l-konformità ma’ rata tal-konformità mas-suq. B’mod partikolari, ir-rata tal-imgħax varjabbli kienet tirrappreżenta rata ġusta għat-Teżor minħabba li kienet tinvolvi spejjeż għat-Teżor f’konformità mal-ispejjeż ta’ sorsi ta’ finanzjament alternattivi, pereżempju, dejn għal perjodu ta’ żmien medju/twil.

(51)

L-Italja tiddikjara li, mill-2007, il-PI adottat approċċ konservattiv għall-ġestjoni attiva tal-fondi tagħha, li huwa differenti minn dak tal-Konvenzjoni, minħabba li jippermetti lil PI tibni portafoll ibbażat fuq allokazzjoni tal-assi f’konformità mal-objettivi u l-istrateġija finanzjarja tal-kumpanija.

(52)

L-Italja informat lill-Kummissjoni li l-liġi li tesiġi li l-PI għandha tiddepożita mat-Teżor il-fondi miġbura fuq il-kontijiet kurrenti postali tħassret f’Diċembru 2006 mil-Liġi tal-2006. Skont din il-liġi, il-fondi miġbura fuq il-kontijiet kurrenti postali tal-klijenti privati ġew investiti mill-PI fil-bonds tal-Gvern fiż-żona tal-euro (ara l-premessa 19). Il-liġi l-ġdida kienet maħsuba sabiex tipprovdi lill-PI b’awtonomija finanzjarja akbar.

(53)

B’appoġġ għall-pożizzjoni tagħha dwar l-istabbiltà tal-fondi ddepożitati, l-Italja ppreżentat ir-riżultati ta’ żewġ mudelli: il-mudelli statistiċi interni elaborati minn PI u l-mudell elaborat minn PI u mill-kumpanija ta’ konsulenza …], kellhom l-għan li jidentifikaw ix-xejra prudenzjali tal-fondi miġbura fuq il-kontijiet kurrenti postali.

(54)

Il-mudelli interni kienu bbażati fuq l-analiżi tad-devjazzjoni ta’ kuljum tal-ammonti ta’ fondi miġbura fuq il-kontijiet kurrenti postali u l-ammonti medji, bl-użu biss tax-xejriet storiċi tal-kontijiet kurrenti. Il-mudelli juru xejra dejjem tikber fl-ammonti ddepożitati mat-Teżor (il-fondi miġbura fuq il-kontijiet tal-klijenti privati jirrappreżentaw madwar 75 % tal-fondi totali miġbura fuq il-kontijiet kurrenti postali). Il-parti stabbli tad-depożiti turi xejra li qed tikber u tirrappreżenta 90 % tad-depożitu medju totali (minn 85 % fl-2002 għal 92 % fl-2006). Bl-istess mod, il-mudelli interni jistabbilixxu parti volatili tad-depożiti, li niżlet għal madwar 10 %.

(55)

Il-mudell …], li l-Italja tqis li huwa konservattiv ħafna, wera li t-tul tan-numru totali ta’ kontijiet kurrenti postali kien differenti mit-tul ta’ kont kurrenti postali wieħed. Jekk xi klijenti fil-fatt ikunu ddeċidew li jagħlqu l-kontijiet tagħhom minn jum għall-ieħor, l-effett fuq l-ammonti totali ta’ fondi miġbura minn PI kien marġinali minħabba n-numru kbir ta’ klijenti, il-fatt li d-depożitu medju fuq dawk il-kontijiet kien baxx u li d-depożiti tal-klijenti l-ġodda essenzjalment issostitwixxew id-depożiti tal-klijenti li telqu.

(56)

It-tip ta’ mudell prudenzjali żviluppat minn […] intuża minn diversi banek Taljani fil-kuntest tal-ġestjoni attiva tal-likwidità tagħhom, fil-mument tal-Konvenzjoni, sabiex jiġi determinat it-tul ta’ żmien tal-kontijiet kurrenti tagħhom, u mbagħad sabiex dak it-tul ta’ żmien jiġi rifless f’portafoll ta’ investiment korrispondenti bħala parti mill-ġestjoni tal-attiv/passiv (“ALM”) tagħhom. Dak il-mudell prudenzjali ntuża mill-PI sabiex tidentifika t-tul ta’ żmien tal-fondi miġbura fuq il-kontijiet kurrenti postali (proprjetà ta’ persuni privati (20)) matul il-perjodu 2005-2006, meta PI kienet obbligata li tiddepożita l-fondi kollha mat-Teżor (il-ġestjoni passiva tal-likwidità), u għall-perjodu wara l-1 ta’ Jannar 2007, meta l-fondi miġbura fuq il-kontijiet kurrenti postali ta’ klijenti privati bdew jiġu investiti minn PI f’bonds tal-Gvern fiż-żona tal-Euro (il-ġestjoni attiva tal-likwidità).

(57)

Skont l-Italja, fil-kuntest tal-ġestjoni passiva tal-likwidità ta’ PI, il-mudell …] kellu l-għan li jikkwantifika t-tul ta’ żmien tal-partijiet stabbli u volatili tad-depożiti identifikati mill-mudelli interni abbażi tal-volatilità storika tal-kontijiet kurrenti postali u tal-imġiba probabilistika tad-detenturi tal-kontijiet. Speċifikazzjoni ta’ mudell partikolari (21) indikat li madwar żewġ terzi tal-fondi kellhom tul ta’ żmien twil ħafna u terz kellhom tul ta’ żmien li jvarja minn 0 sa 10 snin. Konsegwentement, il-portafoll tal-investiment korrispondenti kien ikollu ħajja medja ta’ 4,1 snin u durata Macaulay (22) ta’ 3,2 snin. Fi speċifikazzjoni ta’ mudell alternattiv (23), il-portafoll tal-investiment korrispondenti ser ikollu ħajja medja ta’ 4,9 snin u durata Macaulay ta’ 3,8 snin (24).

(58)

Skont l-Italja, fil-kuntest tal-ġestjoni attiva tal-likwidità tal-PI, il-mudell …] appoġġja lill-PI fid-definizzjoni tal-aħjar allokazzjoni tal-assi. Abbażi ta’ ipoteżijiet prudenzjali ħafna, huwa indikat li kien raġonevoli li l-PI tadotta allokazzjoni tal-assi b’ħajja medja ta’ bejn 4 u 5 snin.

(59)

Fir-rigward tal-ispejjeż marbuta mal-ġbir u d-depożiti tal-fondi li jirriżultaw mill-kontijiet kurrenti postali tal-klijenti tal-PI, l-Italja tindika li s-sistema analitika ta’ kontabbiltà tal-PI tippermetti li jiġu ddeterminati l-ispejjeż tal-attività tal-PI kollha kemm hi, u mhux skont il-prodott. L-Italja ddikjarat li l-marġnijiet tal-PI kienu aktar baxxi mill-marġnijiet korrispondenti fis-settur bankarju.

(60)

L-Italja ddikjarat li l-Konvenzjoni ppermettiet li l-PI tingħata r-rimunerazzjoni abbażi tar-rendimenti tal-bonds tat-Teżor, l-istrument ta’ finanzjament ewlieni disponibbli għall-Italja.

(61)

B’mod partikolari, il-Konvenzjoni ppermettiet li l-PI tingħata rimunerazzjoni abbażi ta’ rati fit-tul, li kienu konformi mal-perjodu ta’ żmien li fih għandhom jinġabru l-fondi fuq il-kontijiet kurrenti postali. Il-Konvenzjoni pproteġiet ukoll lit-Teżor kontra kundizzjonijiet ħżiena tas-suq, billi dan ippermettielha li tirrevoka l-Konvenzjoni li saret inkonsistenti mal-ispiża ta’ sorsi alternattivi ta’ finanzjament.

(62)

Abbażi ta’ tqabbil bejn ir-rata prevista mill-Konvenzjoni u l-ispejjeż ta’ finanzjament tat-Teżor, l-Italja sostniet li l-ispiża tal-finanzjament għal perjodu ta’ żmien medju/twil tat-Teżor kienet konformi mar-rata stabbilita mill-Konvenzjoni.

(63)

Barra minn hekk, (i) ir-rata ta’ rimunerazzjoni stabbilita fil-Konvenzjoni hija indiċjata mal-parametri marbuta mad-dejn pubbliku tal-Italja (titoli tal-gvern) li jikkostitwixxu l-aktar referenza xierqa għall-ispejjeż ta’ finanzjament tat-Teżor; (ii) l-istabbiltà tal-finanzjament, kif ivverifikata permezz tal-mudelli statistiċi u l-Obbligu impost fuq il-PI, tagħmel l-investimenti permanenti għall-parti l-kbira (mingħajr ma tikkunsidra miżuri speċifiċi ta’ sikurezza – bħall-possibbiltà ta’ rtirar bikri, it-terminu ta’ tliet snin tar-relazzjoni – li jipproteġu lit-Teżor minn bidliet mhux previsti fis-suq); (iii) ir-riskju tal-likwidità preżunt mit-Teżor huwa limitat fir-rigward tal-istabbiltà pprovata tal-finanzjament postali, li jkun indiċja 10 % ta’ tali finanzjament għall-parametri għal perjodu ta’ żmien qasir.

(64)

Fir-rigward tal-element fit-tul tar-rata tas-self (90 %, magħmul minn (i) l-10 % marbut mar-rendiment tal-bonds tal-Gvern Taljan għal 10 snin, u (ii) it-80 % marbut mar-rendiment tal-bonds tal-Gvern Taljan għal 30 sena), l-Italja qieset li l-Obbligu kien differenti minn obbligu li jsir investiment dirett fil-bonds tal-Gvern Taljan, fejn il-bonds tal-Gvern Taljan ikunu jistgħu jintgħażlu liberament u jiġu mmaniġġjati liberament.

(65)

Ir-rata tas-self kienet konformi mas-suq minħabba li l-fondi ddepożitati mat-Teżor kellhom tul ta’ żmien twil. Dan kien dovut għall-fatt li l-Obbligu ma kienx limitat fiż-żmien, kif ukoll għall-istabbiltà tal-fondi miġbura fuq il-kontijiet kurrenti postali tal-klijenti tal-PI u ddepożitati mat-Teżor. Barra minn hekk, l-Italja qieset li l-Obbligu pprekluda lill-PI milli tapplika ġestjoni attiva u potenzjalment aktar vantaġġjuża tal-finanzjament. Fin-nuqqas tal-Obbligu, l-Italja ssostni li l-PI setgħet investiet 10 % tal-likwidità tagħha f’bonds għal perjodu ta’ żmien qasir u 90 % f’bonds għal perjodu ta’ żmien twil.

(66)

Fir-rigward tal-konformità tas-suq tar-rata tal-imgħax imħallsa lill-PI, l-Italja pprovdiet l-opinjoni tal-awdituri tal-PI u ittri ta’ konfort minn banek privati u konsulenti. L-awdituri ta’ PI ddikjaraw li, minħabba l-karatteristiċi u r-rati ta’ tkabbir tagħhom, il-fondi miġbura fuq il-kontijiet kurrenti postali kienu stabbli. Il-banek privati u l-konsulenti (25) qablu li r-redditi miksuba mill-PI fuq il-fondi miġbura fuq il-kontijiet kurrenti postali u ddepożitati mat-Teżor kienu simili għar-redditi tas-suq li setgħet tikseb PI permezz tal-implimentazzjoni ta’ strateġiji xierqa ta’ investiment u ġestjoni tar-riskji.

(67)

L-Italja tqis li r-rimunerazzjoni miksuba mill-PI fuq il-fondi ddepożitati mat-Teżor kienet konformi mar-rimunerazzjoni miksuba minn Poste Vita fuq il-fondi investiti minnha. L-Italja ssostni li l-poloz tal-assigurazzjoni tal-ħajja huma prodotti li jistgħu jitqiesu bħala komparabbli mal-kontijiet kurrenti postali u li r-rata medja tal-imgħax fuq ir-rikavat investit ta’ dawk il-prodotti (pereżempju Posta Più) kienet ta’ 4,68 % matul il-perjodu 2002-2006, li tikkorrispondi għar-rata tal-Konvenzjoni (4,55 %).

(68)

L-Italja tqis li l-kontijiet kurrenti postali u l-poloz tal-assigurazzjoni tal-ħajja kienu prodotti finanzjarji komparabbli minħabba li l-kontijiet postali kienu prodotti għal perjodu ta’ żmien qasir, iżda de facto kienu simili għall-istrumenti finanzjarji għal perjodu ta’ żmien medju, b’kapital u redditu minimi garantiti.

(69)

Skont l-Italja, l-istrateġija ALM ta’ La Banque Postale (Franza) kienet ibbażata fuq l-istess tip ta’ mudell statistiku użat minn PI, matul il-perjodu vvalutat.

(70)

Dak il-mudell statistiku jidentifika l-fondi stabbli u volatili miġbura fuq il-kontijiet kurrenti postali. Il-fondi stabbli jiġu investiti f’bonds fiż-żona tal-OECD u l-fondi volatili jiġu investiti f’bonds ta’ strumenti għal perjodu ta’ żmien qasir. Abbażi ta’ dan il-mudell, fl-2005, ir-redditu fuq l-investiment tal-kontijiet kurrenti ta’ La Banque Postale kien ta’ 4,4 % (vs it-3,9 % previst mill-Konvenzjoni).

(71)

B’mod aktar speċifiku, l-eżempju ta’ La Banque Postale wera li huwa possibbli li jkun hemm redditi ogħla fuq l-investiment minn dawk stabbiliti mill-Konvenzjoni bl-użu ta’ ALM prudenzjali għal tul ta’ żmien medju ta’ 5 snin.

(72)

Sabiex turi li r-rimunerazzjoni stabbilita mill-Konvenzjoni ma tat l-ebda vantaġġ lill-PI, l-Italja pprovdiet lill-Kummissjoni bi studju li tmexxa minn …]

(73)

L-Istudju …] żviluppa l-analiżi li ġejja:

(74)

Fir-rigward tat-tqabbil bejn ir-rimunerazzjoni tad-depożiti tat-Teżor u r-rimunerazzjoni offruta mill-istrateġiji ta’ ġestjoni attiva tal-fondi, l-Italja spjegat li tqabbil bħal dan kellu jsir fuq perjodu ta’ żmien sinifikanti – 10 snin – sabiex jitqies ċiklu ekonomiku sħiħ. Din kienet ir-raġuni għaliex […] qabbel ir-redditu tal-Konvenzjoni mar-redditi minn strateġiji alternattivi matul perjodu ta’ 10 snin u mhux matul perjodu iqsar. Għalhekk, meta r-rati tal-imgħax jiżdiedu, il-portafolli b’rati fissi għandhom tendenza li jkollhom prestazzjoni aktar baxxa meta mqabbla mal-portafolli b’rati varjabbli, filwaqt li l-oppost seħħ fil-każ ta’ rati tal-imgħax li jonqsu.

(75)

Skont l-Italja, matul perjodu ta’ 10 snin, il-portafolli tal-investiment ibbażati fuq rati varjabbli jistgħu jitqabblu mal-portafolli ta’ investiment ibbażati fuq rati fissi, minħabba l-kumpens ta’ qligħ kapitali u telf kapitali. Fil-fatt, matul perjodu ta’ 10 snin, ir-redditi ta’ portafolli b’rati fissi għandhom it-tendenza li jkunu konformi mar-redditi ta’ portafolli b’rati varjabbli. Jidher b’mod ċar li l-ġestjoni attiva tal-fondi tipprovdi redditi aħjar mill-investimenti passivi (“parametriċi”) bħall-Konvenzjoni (eż. ir-redditu tal-valutazzjoni komparattiva b’tul ta’ żmien ta’ 5 snin użata minn …] huwa konformi mar-redditu tal-Konvenzjoni, li t-tul ta’ żmien tiegħu huwa ferm itwal)

(76)

Barra minn hekk, skont l-Italja, il-Kummissjoni għandha tiddistingwi bejn riskju għal perjodu ta’ żmien qasir u dak għal perjodu ta’ żmien twil. Billi huwa veru li l-valur tat-titoli b’rata fissa b’tul ta’ żmien ta’ 10 snin jista’ jvarja ħafna fuq perjodu ta’ żmien qasir, matul il-perjodu kollu ta’ 10 snin, il-bonds b’rata fissa jagħtu rata ta’ redditu affidabbli ħafna (minħabba li fissa). Kollox ma’ kollox, matul perjodu ta’ 10 snin, ir-redditi tal-portafolli b’rata fissa għandhom it-tendenza li jkunu konformi mar-redditi tal-portafolli b’rata varjabbli, b’dawn tal-aħħar fil-fatt ikunu aktar riskjużi (minħabba li huma soġġetti għal bidliet annwali fir-redditu tal-imgħax).

(77)

Barra minn hekk, strateġiji ta’ investiment alternattivi reali li huma flessibbli u li jistgħu jkunu bbażati fuq l-istrumenti finanzjarji kollha possibbli offruti mis-suq, joffru possibbiltà akbar ta’ riżultati aħjar minn investimenti passivi bħall-Konvenzjoni.

(78)

Barra minn hekk, l-Italja enfasizzat li, fil-mument tal-konklużjoni tal-Konvenzjoni mat-Teżor, ix-xejra tar-rati tal-imgħax fil-ġejjieni ma kinitx magħrufa. Skont l-Italja, l-għażla li jintużaw parametri varjabbli għall-Konvenzjoni kienet ekonomikament razzjonali, minħabba li kienet ġusta għaż-żewġ partijiet: il-PI u t-Teżor. L-għażla li l-Konvenzjoni tiġi riveduta wara tliet snin u li titħassar kull sena ppermettiet lil kwalunkwe waħda miż-żewġ partijiet li tirtira mill-ftehim f’każ li r-rimunerazzjoni tkun saret inġusta jew inkonsistenti, minħabba r-rati tal-imgħax tas-suq li qed jevolvu.

(79)

L-Istudju […] juri wkoll li l-Obbligu ġġenera spejjeż ta’ opportunità u riskji għall-PI billi llimita l-ispettru tal-għażla ta’ investiment tiegħu. Id-depożitu mat-Teżor kien marbut esklussivament mar-riskju ta’ kreditu tal-Italja, li waqqaf lil PI milli tfittex opportunità ta’ investiment diversifikata fis-suq tal-bonds tal-Gvern Ewropew. Barra minn hekk, tali riskju ta’ kreditu kien aggravat mir-riskju tal-likwidità minħabba n-natura fit-tul tal-maturità tad-depożitu mingħajr drittijiet ta’ tifdija bikrija.

(80)

L-Italja tiġġustifika l-komparabbiltà tal-mekkaniżmu tal-Konvenzjoni (abbażi ta’ rati tal-imgħax varjabbli) mal-mudelli kwantitattivi użati minn […] li għandhom l-għan li jagħtu prova tal-benefiċċju ta’ ġestjoni attiva tal-assi (abbażi ta’ rati tal-imgħax fissi) billi tiddikjara li hija prattika tas-soltu għall-operaturi tas-suq li jinnegozjaw f’bonds u, mill-2007, għal PI, li jipprevedu investimenti b’rati tal-imgħax fissi. Huma jsostnu wkoll li t-tqabbil bejn il-mekkaniżmu tal-Konvenzjoni u l-mudelli kwantitattivi użati minn RBS għandu jiġi analizzat fid-dawl tat-tqabbil bejn ġestjoni passiva u attiva tal-fondi, aktar milli bejn żewġ mekkaniżmi ta’ rimunerazzjoni bbażati fuq rati tal-imgħax fissi u varjabbli.

(81)

Fl-aħħar nett, l-Italja ssostni li l-mekkaniżmu tal-Konvenzjoni bbażat fuq rimunerazzjoni għal perjodu ta’ żmien qasir għall-komponent volatili tal-fondi ddepożitati mat-Teżor jistma b’mod adegwat ir-riskju reali tal-likwidità mġarrab mit-Teżor.

(82)

Skont l-Italja, ir-rata fuq id-depożitu mat-Teżor ma setgħetx tkun rata għal perjodu ta’ żmien qasir (eż. rata tal-imgħax tal-kambjali tat-Teżor ta’ 12-il xahar) minħabba l-istabbiltà tad-depożiti.

(83)

L-Italja indikat li, l-użu tal-2005 (kif sar mill-ABI) bħala sena ta’ referenza, irriżulta f’analiżi mhux xierqa minħabba li l-2005 kienet is-sena meta r-rati tal-imgħax fuq il-kambjali tat-Teżor għal perjodu ta’ żmien qasir kienu l-aktar baxxi.

(84)

Fir-rigward tat-tqabbil li sar mill-ABI mar-rimunerazzjoni miksuba minn CDP fuq il-likwidità tagħha ddepożitata mat-Teżor (rimunerazzjoni ugwali għal rata varjabbli ta’ sitt xhur ikkalkolata bħala l-medja aritmetika sempliċi tar-rendiment gross fuq il-kambjali tat-Teżor ta’ sitt xhur u tal-indiċi Rendistato ta’ kull xahar), l-Italja ssostni li s-CDP ma tistax titqabbel ma’l-PI, minħabba li hija kumpanija differenti f’termini ta’ struttura, attivitajiet, objettivi tan-negozju, operazzjonijiet, organizzazzjoni u politiki ta’ investiment. L-Italja ssostni wkoll li, minħabba li l-indiċi Rendistato ta’ kull xahar jirrappreżenta rata fuq perjodu ta’ żmien medju/twil, l-ABI tikkontradixxi lilha nnifisha meta tqis li l-likwidità tal-PI ddepożitata mat-Teżor għandha tiġi rrimunerata skont parametri għal perjodu ta’ żmien qasir.

(85)

L-Italja ssostni wkoll li l-uniċità tad-depożiti tat-Teżor tagħha għamlitha diffiċli li jiġi identifikat strument wieħed ta’ sostituzzjoni. Madankollu, minħabba l-istabbiltà tal-kontijiet kurrenti postali, id-depożitu ta’ dawn il-fondi mat-Teżor jista’ jitqabbel mal-fondi miġbura permezz ta’ bonds fit-tul għall-parti l-kbira tagħhom. L-istabbiltà tal-kontijiet kurrenti postali għamlet tqabbil mal-kambjali tat-Teżor għal perjodu ta’ żmien qasir (ta’ 12-il xahar) irrilevanti.

(86)

Sabiex jiġi aċċertat jekk miżura tikkostitwixxix għajnuna skont it-tifsira tal-Artikolu 107(1) tat-TFUE, il-Kummissjoni trid tiddetermina (i) jekk il-miżura tingħatax mill-Istat jew permezz ta’ riżorsi tal-Istat; (ii) jekk il-miżura tagħtix vantaġġ ekonomiku; (iii) jekk il-miżura hijiex kapaċi tfixkel il-kompetizzjoni billi tiffavorixxi b’mod selettiv lil ċerti impriżi jew il-produzzjoni ta’ ċerti oġġetti; u fl-aħħar nett, (iv) jekk il-miżura taffettwax il-kummerċ bejn l-Istati Membri. Dawn il-kundizzjonijiet kollha jridu jiġu ssodisfati sabiex miżura tikkostitwixxi għajnuna mill-Istat skont it-tifsira tal-Artikolu 107(1) tat-TFUE.

(87)

Permezz tas-sentenza tal-2013, il-Qorti Ġenerali annullat id-Deċiżjoni tal-2008. B’mod partikolari, il-Qorti qieset li l-Kummissjoni kienet għamlet żball evidenti billi kkonkludiet li l-miżura kienet tikkostitwixxi għajnuna mill-Istat, abbażi tad-differenza pożittiva bejn ir-rata tal-Konvenzjoni u r-rata mogħtija lill-mutwatarju privat prudenti. Sabiex turi li l-miżura tabilħaqq tagħti tali vantaġġ ekonomiku, il-Kummissjoni kellha turi b’mod ċar li, fin-nuqqas tal-Obbligu, il-PI ma setgħetx b’mod raġonevoli tikseb redditu ogħla minn jew daqs ir-rata tal-Konvenzjoni billi tinvesti d-depożiti mill-kontijiet kurrenti postali fis-suq.

(88)

Għaldaqstant, din il-valutazzjoni tindirizza jekk ingħatax vantaġġ ekonomiku u, fin-nuqqas ta’ dan, il-miżura ma tammontax għal għajnuna mill-Istat skont it-tifsira tal-Artikolu 107(1) tat-TFUE.

(89)

Il-Kummissjoni tqis li t-tqabbil bejn il-Konvenzjoni u l-investimenti alternattivi disponibbli għal PI fin-nuqqas tal-Obbligu għandu jqis b’mod adegwat ir-riskju tal-investimenti u l-interazzjonijiet tagħhom mar-riskji li jirriżultaw mill-obbligazzjonijiet tal-PI (jiġifieri d-depożiti aggregati tal-klijenti), minn perspettiva integrata tal-ġestjoni tal-attiv/passiv. Imbagħad, it-tqabbil għandu jitwettaq jew bejn ir-redditu disponibbli skont il-Konvenzjoni u r-redditu tal-investimenti li jkollhom livell ta’ riskju simili għal dak tal-Konvenzjoni, jew inkella bejn ir-redditi aġġustati għar-riskji.

(90)

Il-Kummissjoni tfakkar ukoll li l-analiżi tal-vantaġġ possibbli mogħti mill-Konvenzjoni lill-PI għandha ssir ex ante. L-istima tar-redditi disponibbli taħt l-investimenti alternattivi għandha ssir f’konformità mal-informazzjoni disponibbli għall-partijiet fil-mument li tkun għaddiet il-Konvenzjoni.

(91)

Il-Kummissjoni l-ewwel irrieżaminat it-tqabbil sottomess mill-Italja, kif ġie spjegat fil-qosor fit-Taqsima 3.2.7. L-Italja sostniet li l-investimenti alternattivi, li setgħu kienu disponibbli għall-PI fin-nuqqas tal-Obbligu, offrew redditi simili jew ogħla mill-Konvenzjoni u li dan wera li l-Konvenzjoni ma kienet tinvolvi l-ebda vantaġġ għall-PI. Il-Kummissjoni sabet li ma kienx ipprovat li dawn l-investimenti alternattivi proposti huma komparabbli mal-Konvenzjoni minn perspettiva tar-riskju. B’riżultat ta’ dan, dawn ma jistgħux jifformaw bażi għall-valutazzjoni deskritta mill-Qorti Ġenerali, minħabba li ma jippermettux li ssir konklużjoni sinifikanti dwar jekk il-PI bbenefikatx mill-Konvenzjoni.

(92)

Barra minn hekk, l-Italja sostniet li n-nuqqas ta’ kwalunkwe vantaġġ ex ante għal PI rriżulta mill-għażla – li kienet disponibbli kemm għal PI kif ukoll għall-Istat – li l-Konvenzjoni titħassar kull sena, f’każ li r-rimunerazzjoni ma tkunx ġusta (ara l-premessa 78). Madankollu, il-Kummissjoni kkunsidrat li din l-għażla ma kienet teskludi l-ebda vantaġġ potenzjali għal PI. L-għażla ma kinitx tkopri l-ewwel sena u ma kien hemm l-ebda obbligu għall-Italja li teżerċitaha, anki jekk kien ikun konvenjenti li tagħmel dan, fis-snin ta’ wara.

(93)

Abbażi ta’ dak li ntqal hawn fuq, il-Kummissjoni tikkonkludi li l-argumenti mressqa mill-Italja mhumiex biżżejjed sabiex tasal għal konklużjoni sinifikanti dwar jekk il-Konvenzjoni pprovdietx vantaġġ għall-PI jew le. Il-Kummissjoni mbagħad applikat il-valutazzjoni deskritta mill-Qorti Ġenerali f’dan il-każ. Għal dan l-għan, il-Kummissjoni stmat ir-redditi/riskji mistennija offruti minn ġabra komprensiva ta’ strateġiji alternattivi ta’ investiment, disponibbli fin-nuqqas tal-Obbligu. Għall- appoġġ tekniku dwar dawn il-kwistjonijiet, il-Kummissjoni għażlet l-Università ta’ Perugia permezz ta’ proċess ta’ sejħa għall-offerti, li l-esperti tagħha pproduċew rapport f’Novembru 2015 (“ir-Rapport tal-Esperti”).

(94)

Ir-Rapport tal-Esperti jeżamina l-investiment magħmul mill-PI skont l-Obbligu, li r-redditu tagħha huwa rregolat mill-Konvenzjoni, kif ukoll l-istrateġiji potenzjali ta’ investiment alternattiv tas-suq, li setgħu ġew ikkunsidrati minn PI fin-nuqqas tal-Obbligu għall-perjodu 2005-2007 għall-fondi miġbura permezz tal-kontijiet kurrenti postali. Ir-Rapport jistma wkoll il-profili tar-riskji u l-benefiċċji rispettivi bl-użu biss tal-informazzjoni disponibbli għal PI fiż-żmien tal-investiment.

(95)

Ir-Rapport tal-Esperti jissimula kif l-obbligazzjonijiet tal-PI (jiġifieri d-depożiti) huma mistennija li jevolvu maż-żmien. Billi dawn l-obbligazzjonijiet huma pretensjonijiet tad-depożitanti, il-PI tista’ biss tinvesti dak li d-depożitanti ma jirtirawx. B’konsegwenza ta’ dan, l-esperti jistmaw l-hekk imsejħa mudelli ta’ obbligazzjoni (“liability patterns” - LP) li jimmudellaw l-ammont ta’ fondi li mistennija jkunu disponibbli għall-PI matul ċertu perjodu ta’ żmien, li b’hekk il-PI tkun tista’ tinvesti. Għal dik l-istima, ir-Rapport tal-Esperti jiddistingwi l-komponenti stabbli tal-obbligazzjonijiet mill-komponenti volatili. Il-komponenti stabbli biss jistgħu jiġu investiti f’assi b’maturità għal perjodu ta’ żmien qasir jew twil skont l-LP stmat.

(96)

Ir-Rapport tal-Esperti jikkunsidra żewġ mudelli ta’ obbligazzjoni – l-LP1 u l-LP2 - li huma differenti minn xulxin fil-mod ta’ kif jiġi ttrattat il-komponent stabbli tad-depożiti (jiġifieri l-parti li ma tiġix irtirata matul it-30 sena li jmiss skont is-suppożizzjonijiet tal-immudellar). Fiż-żewġ xenarji, ir-Rapport tal-Esperti jassumi li l-ammont totali tal-fondi miġbura ser jonqos fiż-żmien minħabba l-irtirar tad-depożiti tal-kontijiet kurrenti. L-LP1 jalloka flussi ta’ ħruġ b’maturità mmudellata ta’ aktar minn 30 sena b’mod proporzjonali matul perjodu ta’ 30 sena. L-LP2 jalloka l-flussi ta’ ħruġ kollha b’maturità mmudellata ta’ aktar minn 30 sena għall-fluss ta’ ħruġ fit-tletin (30) sena. Skont is-suppożizzjonijiet tar-Rapport tal-Esperti, id-differenza hija sinifikanti, hekk kif bejn wieħed u ieħor 60 % tad-depożiti kollha għandhom dati għall-flussi ta’ ħruġ immudellati lil hinn minn 30 sena. Fuq dik il-bażi, skont l-LP1, il-flussi ta’ ħruġ iseħħu regolarment bejn sena u 30 sena, filwaqt li skont l-LP2, 40 % biss tal-flussi ta’ ħruġ iseħħu bejn sena u 30 sena u 60 % jseħħu biss fit-tletin (30) sena.

(97)

Fir-rigward tal-mistoqsija dwar liema miż-żewġ mudelli ta’ obbligazzjoni jippreżenta suppożizzjoni aktar xierqa, ir-Rapport tal-Esperti jsostni li l-mudell ta’ obbligazzjoni inqas konservattiv l-LP2 huwa aktar xieraq. Sabiex jappoġġja din il-konklużjoni, ir-Rapport tal-Esperti jisħaq li l-PI hija differenti minn bank kummerċjali tipiku sal-punt li (i) il-PI ma kinitx soġġetta għar-regolament prudenzjali applikabbli għall-banek u b’hekk għar-rekwiżit ta’ livell kapitali ogħla għal investimenti fit-tul; u li (ii) l-PI ma tkunx esposta għall-istess riskju ta’ kriżi kbira ħafna ta’ rtirar u likwidità bħal bank tipiku, minħabba li l-PI hija meqjusa minn parti kbira tal-investituri bħala li hija l-istess bħall-Italja. Ir-Rapport tal-Esperti jsostni li din il-perċezzjoni hija konsistenti mal-aspettattiva li, f’każ ta’ kriżi ta’ likwidità, l-Italja tkun imġiegħla tiffinanzja kwalunkwe pożizzjoni ta’ insolvenza tal-PI sabiex jiġi evitat effett ta’ kontaġju li jwassal għal deterjorament tal-affidibbiltà kreditizja tal-istokk kollu tad-dejn pubbliku.

(98)

Il-Kummissjoni tinnota li r-Rapport tal-Esperti jissuġġerixxi li l-fondi ddepożitati mill-PI fuq il-kont tat-Teżor de facto ma kinux għal perjodu ta’ żmien qasir fin-natura tagħhom. Kien issuġġerit perjodu b’terminu qasir tal-fondi mill-ABI, li sostniet li r-rimunerazzjoni tad-depożitu tat-Teżor kellha tikkorrispondi għan-natura tagħha għal perjodu ta’ żmien qasir (ara l-premessa 45). Fl-istess ħin, il-Kummissjoni tfakkar li n-natura fit-tul tal-fondi ddepożitati mill-PI mat-Teżor, kif ivvalutata fir-Rapport tal-Esperti, mhijiex biżżejjed sabiex jiġi stabbilit in-nuqqas ta’ għajnuna mill-Istat. Skont il-valutazzjoni meħtieġa skont id-deċiżjoni tal-2013, huwa meħtieġ tqabbil sinifikanti tar-redditi/riskju kemm skont l-Obbligu kif ukoll mingħajr l-Obbligu, sabiex jiġi ddeterminat b’mod effettiv jekk il-miżura tatx vantaġġ lill-PI.

(99)

Għaldaqstant, ir-Rapport tal-Esperti jibni mudell dinamiku tar-rata tal-imgħax li jippermetti l-kalkolu tal-prezzijiet tal-bonds abbażi tal-mudell tal-kurva tar-rendiment tar-rata tal-imgħax fi kwalunkwe punt fil-ġejjieni. Ir-Rapport jikkunsidra tliet xenarji tar-rati tal-imgħax: rati tal-imgħax stazzjonarji (stabbli), li jiżdiedu u li jonqsu, meta mqabbla mal-kurva tar-rendiment li tipprevali fiż-żmien tal-Konvenzjoni.

(100)

Ir-Rapport tal-Esperti mbagħad jeżamina l-karatteristiċi tar-riskji u tar-redditu tal-investiment reali mwettaq mill-PI skont l-Obbligu u li r-redditu tiegħu huwa rregolat mill-Konvenzjoni. Hawnhekk, ir-riskju - li huwa kompletament dovut għall-bidliet fir-rata tal-imgħax li għandhom impatt fuq il-prezzijiet tal-bonds użati għall-kalkolu tar-rata ta’ rimunerazzjoni xierqa skont il-Konvenzjoni - huwa baxx ħafna. Fil-fatt, il-livell ta’ riskju huwa ta’ 0,11 %, 0,17 % u 0,06 % taħt ix-xenarji tar-rati stazzjonarji, li jiżdiedu u li jonqsu, rispettivament.

(101)

Fir-rigward tal-istrateġiji ta’ investiment disponibbli, il-PI setgħet tinvesti biss f’bonds bi grad ta’ investiment fiż-żona tal-Euro fil-mument tal-investiment. B’mod korrispondenti, l-esperti jikkunsidraw strateġiji bbażati fuq bonds tal-Gvern Taljan b’maturitajiet differenti u strateġija li tuża l-bonds tal-Gvern fiż-żona tal-Euro għat-tqabbil.

(102)

Meta jeżamina l-istrateġiji ta’ investiment disponibbli, ir-Rapport tal-Esperti jikkunsidra żewġ riskji ewlenin: ir-riskju li jirriżulta minn distakk bejn il-maturitajiet tal-assi tal-PI (il-bonds tal-Gvern Taljan) u l-obbligazzjonijiet tagħha (id-depożiti), u r-riskju ta’ inadempjenza sovrana mill-Italja.

(103)

Id-distakk jew id-diskrepanza bejn il-maturitajiet tal-assi u tal-obbligazzjonijiet joħolqu riskju ta’ likwidità (jiġifieri r-riskju li l-PI ma jkollhiex mezzi likwidi biżżejjed sabiex tissodisfa t-talbiet għal irtirar mid-depożitanti fi żmien partikolari). Madankollu, dak ir-riskju ta’ likwidità jkun limitat meta jkun faċli li jinbiegħu l-assi (jiġifieri l-bonds tal-Gvern Taljan). Li kieku l-PI kellha tbigħ dawk il-bonds qabel ma jimmaturaw, il-prezz tas-suq ikun xprunat mir-rata tal-imgħax prevalenti f’dak iż-żmien, sabiex b’hekk il-PI tkun vulnerabbli għar-riskju tar-rata tal-imgħax, li jwassal għal qligħ jew telf kapitali potenzjali. Dan ir-riskju huwa mmudellat b’mod espliċitu fir-Rapport tal-Esperti.

(104)

Fir-rigward tar-riskju ta’ inadempjenza sovrana, ir-Rapport tal-Esperti jirrimarka li l-PI għandha wkoll ir-riskju sovran ta’ inadempjenza mill-Italja skont il-Konvenzjoni. Għalhekk, ir-Rapport tal-Esperti jqis li l-użu ta’ bonds tal-Gvern Taljan fil-mudell jippermetti l-istess riskju sovran fiż-żewġ strateġiji u jippreżenta tqabbil simili u ugwali mingħajr immudellar espliċitu.

(105)

Ir-Rapport tal-Esperti janalizza ħames strateġiji differenti:

(106)

Il-ħames strateġiji ta’ investiment huma simulati fir-Rapport tal-Esperti. Għall-istrateġiji kollha ħlief għall-istrateġija tal-bonds tal-Gvern fiż-żona tal-Euro, il-profil tar-riskji u tar-redditi jiġi stmat taħt it-tliet xenarji differenti tar-rati tal-imgħax: rati stazzjonarji, li jiżdiedu u li jonqsu.

(107)

Fl-aħħar nett, ir-Rapport tal-Esperti jeżamina liema strateġija ta’ investiment implimentat PI meta l-fondi ġew rilaxxati mill-Obbligu fl-2007. Ir-Rapport juri li l-fondi ġew investiti f’bonds tal-Gvern fiż-żona tal-Euro għal ħames snin u, għal darba oħra, dawn jipprovdu r-riskju u r-redditu ta’ tali investiment abbażi tal-mudell tagħhom. Ir-Rapport tal-Esperti jikkonkludi li l-istrateġija kienet subottimali minħabba li twassal għal redditu aktar baxx b’riskju ogħla (0,65 %) minn dak li seta’ jinkiseb kieku ġiet segwita waħda mill-istrateġiji ta’ investiment alternattivi.

(108)

Wara li jistmaw il-profili tar-riskju u tar-redditu għall-istrateġiji tal-investiment kollha, l-esperti mbagħad jużaw it-teorija tal-ipprezzar tal-portafoll sabiex jiddeterminaw jekk l-investiment li kellha tagħmel PI skont l-Obbligu u li r-redditu tiegħu kien irregolat mill-Konvenzjoni, tax effettivament tax vantaġġ ekonomiku lill-PI (jiġifieri jekk ir-redditu riċevut skont il-Konvenzjoni, wara li jitqies ir-riskju tal-investiment, kienx ikun ogħla mir-redditi li setgħu jinkisbu f’livelli ta’ riskju ekwivalenti f’investimenti alternattivi).

(109)

Għal dak il-għan, ir-Rapport tal-Esperti għaqqad il-karatteristiċi tar-riskji u tar-redditi tal-investimenti alternattivi kollha disponibbli f’funzjoni ta’ investiment waħda li tesprimi r-redditu tas-suq li jista’ jinkiseb bħala funzjoni tar-riskju meħud. Jekk il-karatteristiċi tar-riskji u tar-redditi tal-Konvenzjoni jkunu ’l fuq minn dik il-funzjoni (jiġifieri jekk skont il-Konvenzjoni, il-PI jkollha tikseb redditu ogħla għar-riskju ekwivalenti minn dak disponibbli fis-suq), allura jkun meħtieġ li jiġi konkluż li kien hemm vantaġġ.

(110)

Abbażi ta’ dawn il-kunsiderazzjonijiet, ir-rapport jikkonkludi li bl-użu biss tal-LP1, il-mudell ta’ obbligazzjoni konservattiva, u biss skont l-aspettattiva ta’ rati tal-imgħax li jiżdiedu, li l-Konvenzjoni pprovdiet redditu ogħla lill-PI. F’dan ix-xenarju, meta jitqies il-fatt li l-PI aktar tard kienet lesta li taċċetta riskju ta’ 0,65 %, il-vantaġġ jammonta għal 0,29 punt perċentwali biss. Taħt l-LP2, ma jingħata l-ebda vantaġġ fi kwalunkwe xenarju tar-rati tal-imgħax.

(111)

Il-Kummissjoni ssib li xi xenarji huma aktar plawsibbli minn oħrajn fir-rigward ta’ suppożizzjonijiet jew interpretazzjonijiet speċifiċi li saru fir-Rapport tal-Esperti. B’mod partikolari, il-Kummissjoni ma taqbilx mal-użu tal-mudell tal-obbligazzjoni LP2.

(112)

Il-Kummissjoni tinnota li r-rapport tal-esperti qed juża biss l-informazzjoni disponibbli qabel il-konklużjoni tal-Konvenzjoni, kif mitlub fis-sentenza tal-2013, bl-eċċezzjoni tar-referenza għal-livell ta’ riskju ta’ 0,65 % aċċettat minn PI wara t-tmiem tal-Obbligu. Il-Kummissjoni ma taqbilx mal-użu ta’ 0,65 % bħala l-livell ta’ riskju xieraq sabiex jiġi stmat ir-redditu mistenni fin-nuqqas tal-Obbligu.

(113)

L-ewwel nett, l-għażla tal-mudell tal-obbligazzjoni għandha impatt importanti fuq ir-redditu mistenni tal-istrateġiji ta’ investiment differenti. Kif iddikjarat fil-premessi 96-97, hemm differenzi sinifikanti fir-rigward tas-suppożizzjonijiet dwar il-flussi ta’ ħruġ tad-depożiti li jirriżultaw mill-għażla tal-LP1 jew l-LP2. It-tul ta’ żmien medju tad-depożiti ta’ PI - jiġifieri ż-żmien medju ponderat sabiex dawk id-depożiti jinżammu disponibbli - ivarja b’mod sinifikanti bejn wieħed u ieħor bejn disa’ snin u erbatax-il sena, rispettivament, taħt l-LP1 u l-LP2.

(114)

Il-Kummissjoni tinnota li t-tul ta’ żmien kemm taħt l-LP1 kif ukoll taħt l-LP2 jaqbeż it-tul ta’ żmien massimu ta’ ħames snin irrakkomandat mill-Awtorità Bankarja Ewropea (“EBA”) sabiex timmudella obbligazzjonijiet li ma jimmaturawx bħad-depożiti.

(115)

Il-Kummissjoni vvalutat il-kwistjoni tat-tul ta’ żmien medju tad-depożiti tal-PI li għandu jintuża għall-valutazzjoni meħtieġa skont id-deċiżjoni tal-2013. Hija tqis li l-LP2 jidher li huwa ottimist iżżejjed fir-rigward taż-żamma medja mistennija tad-depożiti tal-klijenti. Madankollu, it-tul ta’ żmien tad-depożiti tal-klijenti tal-PI jista’ fil-prattika jaqbeż il-ħames snin irrakkomandati mill-EBA, kif propost mir-Rapport tal-Esperti. Fil-valutazzjoni tagħha, il-Kummissjoni bbilanċjat il-kunsiderazzjonijiet li ġejjin:

(116)

Abbażi ta’ dak li ntqal hawn fuq, il-Kummissjoni taċċetta l-LP1 bħala suppożizzjoni realistika sabiex tiġi ddeterminata l-istrateġija ta’ investiment prudenti li kienet issegwi l-PI fin-nuqqas tal-Obbligu matul il-perjodu rilevanti.

(117)

Barra minn hekk, il-Kummissjoni tfakkar li r-Rapport tal-Esperti ddikjara li r-rata mistennija tal-Konvenzjoni hija ogħla mir-redditu mistenni tal-istrateġiji ta’ investiment alternattivi, taħt ix-xenarju tar-rata dejjem tiżdied biss, b’0,29 punt perċentwali (ara l-premessa 110). Madankollu, tali 0,29 punti perċentwali ġew ikkalkolati billi tqabbel ir-redditu tas-suq mistenni f’livell ta’ riskju ta’ 0,65 %, filwaqt li r-redditu taħt il-Konvenzjoni wera livell ta’ riskju ta’ 0,17 % taħt ix-xenarju tar-rata li dejjem tiżdied.

(118)

Il-Kummissjoni ma ssib l-ebda raġuni ġustifikabbli sabiex tqabbel ir-redditi f’livelli ta’ riskju differenti, b’mod partikolari minħabba li l-livell ta’ riskju applikat ta’ 0,65 % kien ikkalkolat fir-Rapport tal-Esperti billi ġiet ikkunsidrata l-istrateġija ta’ investiment li l-PI eventwalment implimentat wara li kien irrevokat l-Obbligu (ara l-premessa 104). Tali kunsiderazzjoni ma tidhirx li hija addattata sabiex tintuża f’metodoloġija li għandha tqis biss l-informazzjoni li kienet disponibbli fuq perspettiva ex ante.

(119)

Għalhekk, il-livell ta’ riskju użat sabiex jiġi kkalkolat ir-redditu tas-suq li jista’ jinkiseb għal tqabbil mar-rata skont il-Konvenzjoni għandu jkun l-istess bħar-riskju tal-Konvenzjoni, jiġifieri 0,11 %, 0,17 % u 0,06 % taħt ix-xenarji tar-rati stazzjonarji, li jiżdiedu u li jonqsu, rispettivament.

(120)

Abbażi ta’ dan, il-Kummissjoni tinnota li għall-LP1, il-vantaġġ mistenni skont il-Konvenzjoni fix-xenarju tar-rati li jiżdiedu għalhekk ikun ta’ madwar 0,5 punti perċentwali, minflok 0,29 punt perċentwali. Għar-rati stazzjonarji u li jonqsu, ir-redditi tas-suq li jistgħu jinkisbu jkomplu jkunu akbar mir-redditu skont il-Konvenzjoni, b’madwar 0,15-il punt perċentwali għar-rati stazzjonarji u 0,4 punti perċentwali għar-rati li jonqsu.

(121)

Ir-rata mistennija skont il-Konvenzjoni hija aktar baxxa mir-redditu mistenni tal-istrateġiji ta’ investiment alternattivi, f’xenarju b’rati stazzjonarji u f’livelli ta’ riskju simili, fin-nuqqas tal-Obbligu. B’riżultat ta’ dan, ir-rata skont il-Konvenzjoni ma kienet tinvolvi l-ebda vantaġġ immedjat għal PI.

(122)

Il-Kummissjoni ma għandha l-ebda element sabiex tassumi li l-PI jew l-Italja setgħu b’mod raġonevoli jistennew xejra ta’ rata speċifika fiż-żmien meta ġiet konkluża l-Konvenzjoni. Għaldaqstant, permezz tal-applikazzjoni tal-istess probabbiltà għat-tliet xenarji tar-rati (jiġifieri r-rati li jonqsu, stazzjonarji u li jiżdiedu), ir-rata mistennija skont il-Konvenzjoni hija marġinalment aktar baxxa mir-redditu mistenni tal-istrateġiji ta’ investiment alternattivi, f’livelli ta’ riskju simili, fin-nuqqas tal-Obbligu. B’riżultat ta’ dan, il-Konvenzjoni ma tat l-ebda vantaġġ lill-PI.

(123)

Abbażi ta’ dan, il-Kummissjoni tikkonkludi li l-evidenza mhijiex biżżejjed sabiex tagħti prova li l-PI bbenifikat minn vantaġġ skont il-Konvenzjoni.

(1)

Is-sustanza attiva IPBC iddaħħlet fl-Anness I tad-Direttiva 98/8/KE tal-Parlament Ewropew u tal-Kunsill (2) biex tintuża fi prodotti bijoċidali tat-tip ta’ prodott 8, u b’hekk skont l-Artikolu 86 tar-Regolament (UE) Nru 528/2012 hija meqjusa li hi approvata skont dak ir-Regolament soġġett għall-ispeċifikazzjonijiet u għall-kundizzjonijiet stipulati fl-Anness I ta’ dik id-Direttiva.

(2)

L-approvazzjoni tal-IPBC għall-użu fi prodotti bijoċidali tat-tip ta’ prodott 8 se tiskadi fit-30 ta’ Ġunju 2020. Fl-20 ta’ Diċembru 2018 ġiet ippreżentata applikazzjoni skont l-Artikolu 13(1) tar-Regolament (UE) Nru 528/2012 għat-tiġdid tal-approvazzjoni tal-IPBC.

(3)

Fil-11 ta’ April 2019, l-awtorità kompetenti li tevalwa tad-Danimarka infurmat lill-Kummissjoni li kienet iddeċidiet, skont l-Artikolu 14(1) tar-Regolament (UE) Nru 528/2012, li kienet meħtieġa evalwazzjoni sħiħa tal-applikazzjoni. Skont l-Artikolu 8(1) tar-Regolament (UE) Nru 528/2012, l-awtorità kompetenti li tevalwa trid twettaq evalwazzjoni sħiħa tal-applikazzjoni fi żmien 365 jum mill-validazzjoni tagħha.

(4)

Skont l-Artikolu 8(2) ta’ dak ir-Regolament, l-awtorità kompetenti li tevalwa tista’, jekk ikun hemm il-bżonn, titlob li l-applikant jipprovdi biżżejjed data għat-twettiq tal-evalwazzjoni. F’dak il-każ, il-perjodu ta’ 365 jum jiġi sospiż għal perjodu li b’kollox ma jistax jaqbeż total ta’ 180 jum sakemm ma tkunx iġġustifikata sospensjoni itwal minħabba t-tip ta’ data li tintalab jew minħabba ċirkostanzi eċċezzjonali.

(5)

Fi żmien 270 jum minn meta tirċievi rakkomandazzjoni mill-awtorità kompetenti li tevalwa, l-Aġenzija Ewropea għas-Sustanzi Kimiċi (“l-Aġenzija”) trid tħejji opinjoni dwar it-tiġdid tal-approvazzjoni tas-sustanza attiva skont l-Artikolu 14(3) tar-Regolament (UE) Nru 528/2012 u tippreżentaha lill-Kummissjoni.

(6)

Għaldaqstant, għal raġunijiet li mhumiex fil-kontroll tal-applikant, l-approvazzjoni tal-IPBC għall-użu fi prodotti bijoċidali tat-tip ta’ prodott 8 x’aktarx li se tiskadi qabel ma tittieħed deċiżjoni dwar it-tiġdid tagħha. Għalhekk jixraq li tiġi posposta d-data tal-iskadenza tal-approvazzjoni tal-IPBC għall-użu fi prodotti bijoċidali tat-tip ta’ prodott 8 għal perjodu ta’ żmien twil biżżejjed biex ikun jista’ jsir l-istudju tal-applikazzjoni. Meta wieħed iqis il-perjodi ta’ żmien permessi għall-evalwazzjoni mill-awtorità kompetenti li tevalwa u għat-tħejjija u għall-preżentazzjoni tal-opinjoni mill-Aġenzija, jixraq li tiġi posposta d-data tal-iskadenza tal-approvazzjoni sal-31 ta’ Diċembru 2022.

(7)

Minbarra d-data tal-iskadenza tal-approvazzjoni, jeħtieġ li l-IPBC għall-użu fi prodotti bijoċidali tat-tip ta’ prodott 8 jibqa’ approvat soġġett għall-ispeċifikazzjonijiet u għall-kundizzjonijiet stipulati fl-Anness I tad-Direttiva 98/8/KE,

(1)

Id-Direttiva 91/68/KEE tistabbilixxi l-kundizzjonijiet tas-saħħa tal-annimali li jirregolaw il-kummerċ tan-nagħaġ u tal-mogħoż fl-Unjoni. Din tistabbilixxi l-kundizzjonijiet li skonthom l-Istati Membri jew ir-reġjuni tagħhom jistgħu jiġu rikonoxxuti li huma uffiċjalment ħielsa mill-bruċellożi (B. melitensis) fir-rigward tal-merħliet tan-nagħaġ u tal-mogħoż.

(2)

Id-Deċiżjoni tal-Kummissjoni 93/52/KEE (3) tipprevedi li r-reġjuni tal-Istati Membri mniżżla fl-Anness II tagħha huma rikonoxxuti li huma uffiċjalment ħielsa mill-bruċellożi (B. melitensis) fir-rigward tal-merħliet tan-nagħaġ u tal-mogħoż, skont il-kundizzjonijiet stabbiliti fid-Direttiva 91/68/KEE.

(3)

Spanja ressqet lill-Kummissjoni dokumentazzjoni li turi li l-Komunità Awtonoma ta’ Murcia, il-Provinċja ta’ Toledo tal-Komunità Awtonoma ta’ Castilla-La Mancha u l-Provinċji ta’ Huelva, Sevilla u Cordoba tal-Komunità Awtonoma ta’ Andalusia jissodisfaw il-kundizzjonijiet stabbiliti fid-Direttiva 91/68/KEE biex ikunu rikonoxxuti li huma uffiċjalment ħielsa mill-bruċellożi (B. melitensis) fir-rigward tal-merħliet tan-nagħaġ u tal-mogħoż.

(4)

Wara l-evalwazzjoni ta’ dik id-dokumentazzjoni ta’ sostenn, il-Komunità Awtonoma ta’ Murcia, il-Provinċja ta’ Toledo tal-Komunità Awtonoma ta’ Castilla-La Mancha u l-Provinċji ta’ Huelva, Sevilla u Cordoba tal-Komunità Awtonoma ta’ Andalusia għandhom jiġu rikonoxxuti li huma uffiċjalment ħielsa mill-bruċellożi (B. melitensis) fir-rigward tal-merħliet tan-nagħaġ u tal-mogħoż.

(5)

Għaldaqstant, jenħtieġ li l-Anness II tad-Deċiżjoni 93/52/KEE jiġi emendat skont dan.

(6)

Id-Direttiva 64/432/KEE tapplika għall-kummerċ ta’ annimali bovini u porċini fl-Unjoni. Din tistipula l-kundizzjonijiet li skonthom Stat Membru jew reġjun tiegħu jista’ jiġi ddikjarat uffiċjalment ħieles mill-bruċellożi fir-rigward tal-merħliet ta’ annimali bovini.

(7)

L-Artikolu 2 tad-Deċiżjoni tal-Kummissjoni 2003/467/KE (4) jipprevedi li r-reġjuni ta’ Stati Membri mniżżla fil-Kapitolu 2 tal-Anness II tagħha jiġu ddikjarati uffiċjalment ħielsa mill-bruċellożi fir-rigward tal-merħliet ta’ annimali bovini.

(8)

Spanja ppreżentat lill-Kummissjoni dokumentazzjoni li turi li l-Komunità Awtonoma ta’ Aragona u l-provinċja ta’ Leon tal-Komunità Awtonoma ta’ Castilla Y Leon jissodisfaw il-kundizzjonijiet stabbiliti fid-Direttiva 64/432/KEE biex ikunu rikonoxxuti li huma reġjuni uffiċjalment ħielsa mill-bruċellożi fir-rigward tal-merħliet ta’ annimali bovini.

(9)

Wara l-evalwazzjoni ta’ dik id-dokumentazzjoni ta’ sostenn, il-Komunità Awtonoma ta’ Aragona u l-Provinċja ta’ Leon tal-Komunità Awtonoma ta’ Castilla Y Leon għandhom ikunu rikonoxxuti li huma uffiċjalment ħielsa mill-bruċellożi fir-rigward tal-merħliet ta’ annimali bovini.

(10)

Għalhekk jenħtieġ li l-Anness II tad-Deċiżjoni 2003/467/KE jiġi emendat skont dan.

(11)

L-Artikolu 10 tad-Direttiva 64/432/KEE jipprevedi li meta Stat Membru jqis li t-territorju tiegħu, jew parti minnu, ikun ħieles mill-marda ta’ Aujeszky, jenħtieġ li dan jippreżenta d-dokumentazzjoni ta’ sostenn xierqa lill-Kummissjoni. L-istess Artikolu jipprevedi wkoll li jistgħu jintalbu garanziji addizzjonali għall-kummerċ intra-UE tal-annimali porċini.

(12)

L-Artikolu 9 tad-Direttiva 64/432/KEE jipprevedi li Stat Membru li għandu programm ta' kontroll nazzjonali obbligatorju għall-marda ta' Aujeszky għal parti mit-territorju tiegħu, jista' jippreżenta l-programm tiegħu lill-Kummissjoni għall-approvazzjoni. L-istess Artikolu jipprevedi wkoll li jistgħu jintalbu garanziji addizzjonali għall-kummerċ intra-UE tal-annimali porċini.

(13)

Id-Deċiżjoni tal-Kummissjoni 2008/185/KE (5) tistabbilixxi garanziji addizzjonali għall-moviment tal-ħnieżer bejn l-Istati Membri. Dawk il-garanziji huma marbuta mal-klassifikazzjoni tal-Istati Membri jew tar-reġjuni tagħhom skont l-istatus tal-mard tagħhom għall-marda ta' Aujeszky.

(14)

L-Anness I tad-Deċiżjoni 2008/185/KE jelenka l-Istati Membri jew ir-reġjuni tagħhom li huma ħielsa mill-marda ta’ Aujeszky.

(15)

L-Italja ressqet quddiem il-Kummissjoni dokumentazzjoni li turi konformità għar-Reġjun ta’ Friuli Venezia Giulia mal-kundizzjonijiet stabbiliti fid-Deċiżjoni 2008/185/KE sabiex jiġi rikonoxxut li huwa ħieles mill-marda ta’ Aujeszky.

(16)

Wara l-evalwazzjoni ta’ dik id-dokumentazzjoni ta’ sostenn, ir-Reġjun ta’ Friuli Venezia Giulia għandu jiġi rikonoxxut li huwa ħieles mill-marda ta’ Aujeszky

(17)

Għalhekk, jenħtieġ li l-Anness I tad-Deċiżjoni 2008/185/KE jiġi emendat skont dan.

(18)

L-Anness II tad-Deċiżjoni 2008/185/KE jelenka l-Istati Membri jew ir-reġjuni tagħhom li għandhom fis-seħħ programmi ta’ kontroll nazzjonali approvati għall-eradikazzjoni tal-marda ta’ Aujeszky.

(19)

L-Italja ppreżentat lill-Kummissjoni dokumentazzjoni ta' sostenn għall-approvazzjoni tal-programmi ta' kontroll tagħha għall-eradikazzjoni tal-marda ta' Aujeszky għar-reġjun tal-Piemonte u r-reġjun tal-Umbria u biex dawn ir-reġjuni jiġu elenkati kif dovut fl-Anness II tad-Deċiżjoni 2008/185/KE.

(20)

Wara l-evalwazzjoni tad-dokumentazzjoni ta’ sostenn, għandhom jiġu approvati l-programmi ta’ kontroll għall-eradikazzjoni tal-marda ta’ Aujeszky għar-reġjun tal-Piemonte u r-reġjun tal-Umbria.

(21)

Għalhekk jenħtieġ li l-Anness II tad-Deċiżjoni 2008/185/KE jiġi emendat skont dan.

(22)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf.

(1)

L-Artikoli 7b u 7c u l-Anness IV tad-Direttiva 98/70/KE u l-Artikoli 17 u 18 u l-Anness V tad-Direttiva 2009/28/KE jistipulaw kriterji simili ta’ sostenibbiltà għall-bijokarburanti u għall-bijolikwidi, u proċeduri simili għall-verifika tal-konformità tal-bijokarburanti u tal-bijolikwidi ma’ dawk il-kriterji.

(2)

Meta l-bijokarburanti u l-bijolikwidi jkunu jridu jitqiesu għall-finijiet imsemmija fl-Artikolu 17(1)(a), (b) u (c) tad-Direttiva 2009/28/KE, jenħtieġ li l-Istati Membri jesiġu li l-operaturi ekonomiċi juru li l-bijokarburanti u l-bijolikwidi jikkonformaw mal-kriterji ta’ sostenibbiltà stabbiliti fl-Artikolu 17(2) sa (5) ta’ dik id-Direttiva.

(3)

Għall-finijiet tal-Artikolu 17(2) tad-Direttiva 2009/28/KE, il-Kummissjoni tista’ tiddeċiedi li l-iskemi volontarji nazzjonali jew internazzjonali li jistabbilixxu l-istandards għall-produzzjoni tal-prodotti tal-bijomassa fihom data preċiża, u/jew juru li l-konsenji tal-bijokarburanti jew tal-bijolikwidi jikkonformaw mal-kriterji ta’ sostenibbiltà stabbiliti fl-Artikolu 17(3), (4) u (5), u/jew li l-ebda materjal ma ġie mmodifikat jew imwarrab intenzjonalment sabiex il-konsenja jew parti minnha tkun tista’ taqa’ taħt l-Anness IX. Meta operatur ekonomiku jagħti provi jew jipprovdi data miksuba skont skema volontarja rikonoxxuta mill-Kummissjoni, sa fejn dan ikun previst bid-deċiżjoni tar-rikonoxximent, jenħtieġ li Stat Membru ma jesiġix li l-fornitur jipprovdi evidenza ulterjuri ta’ konformità mal-kriterji ta’ sostenibbiltà.

(4)

It-talba għar-rikonoxximent tal-iskema “Universal Feed Assurance Scheme” turi li l-konsenji tal-bijokarburanti huma konformi mal-kriterji ta’ sostenibbiltà stabbiliti fid-Direttivi 98/70/KE u 2009/28/KE ġiet ippreżentata lill-Kummissjoni fl-14 ta’ Ġunju 2019. L-iskema li hija bbażata fil-Confederation House, East of England Showground, Peterborough, PE2 6XE, ir-Renju Unit, tkopri ingredjenti tal-għalf u għalf kompost kif ukoll għelejjel kombinabbli. Din l-iskema tkopri l-istadji tal-kummerċ, tat-trasport u tal-ħżin tal-materja prima agrikola mill-għatba tal-azjenda s’għand l-ewwel proċessur, u tiddependi fuq skemi volontarji oħrajn rikonoxxuti mill-Kummissjoni għall-istadji l-oħra. B’hekk, hija fir-responsabbiltà tal-“Universal Feed Assurance Scheme” li tiżgura li r-rikonoxximent maħruġ mill-Kummissjoni dwar dawk l-iskemi li bihom topera b’mod konġunt jibqa’ validu matul il-perjodu kollu tal-kooperazzjoni. Ladarba tiġi rrikonoxxuta, l-iskema se tkun disponibbli fil-pjattaforma ta’ trasparenza stabbilita skont id-Direttiva 2009/28/KE.

(5)

Waqt il-valutazzjoni tal-“Universal Feed Assurance Scheme” il-Kummissjoni sabet li din tkopri b’mod adegwat il-kriterji kollha tas-sostenibbiltà stabbiliti fid-Direttivi 98/70/KE u 2009/28/KE, għajr għall-Artikolu 7b(2) tad-Direttiva 98/70/KE u l-Artikolu 17(2) tad-Direttiva 2009/28/KE. Madanakollu, l-istess valutazzjoni tagħti data preċiża dwar elementi li l-operaturi ekonomiċi li jkunu jinsabu iktar ‘l isfel fil-katina tal-kustodja jeħtieġu biex juru li huma konformi mal-Artikolu 7b(2) tad-Direttiva 98/70/KE u mal-Artikolu 17(2) tad-Direttiva 2009/28/KE, filwaqt li tuża metodu ta’ bilanċ tal-massa li huwa konformi mar-rekwiżiti tal-Artikolu 7c(1) tad-Direttiva 98/70/KE u l-Artikolu 18(1) tad-Direttiva 2009/28/KE.

(6)

Mill-valutazzjoni tal-“Universal Feed Assurance Scheme” irriżulta li din tilħaq standards adegwati ta’ affidabbiltà, ta’ trasparenza u ta’ awditjar indipendenti, kif ukoll li tikkonforma mar-rekwiżiti metodoloġiċi stabbiliti fl-Anness IV tad-Direttiva 98/70/KE u fl-Anness V tad-Direttiva 2009/28/KE.

(7)

Il-miżuri previsti f’din id-Deċiżjoni huma skont l-opinjoni tal-Kumitat dwar is-Sostenibbiltà tal-Bijokarburanti u l-Bijolikwidi,

(1)

Id-Deċiżjoni ta’ Implimentazzjoni tal-Kummissjoni 2013/764/UE (3) tistabbilixxi miżuri ta’ kontroll tas-saħħa tal-annimali marbutin mad-deni Afrikan tal-ħnieżer f’ċerti Stati Membri. Dawk il-miżuri jinkludu projbizzjonijiet fuq id-dispaċċ ta’ kunsinni ta’ ħnieżer domestiċi u prodotti tal-ħnieżer minn ċerti żoni. Il-miżuri ta’ kontroll tas-saħħa tal-annimali stabbiliti f’dik id-Deċiżjoni ta’ Implimentazzjoni japplikaw b’mod parallel għal dawk stabbiliti fid-Direttiva tal-Kunsill 2001/89/KE (4), u huma maħsuba biex jiġġieldu t-tixrid tad-deni Afrikan tal-ħnieżer b’mod partikolari fil-livell tal-Unjoni.

(2)

Id-Deċiżjoni ta’ Implimentazzjoni 2013/764/UE tipprevedi wkoll derogi mill-projbizzjoni fuq id-dispaċċ ta’ ħnieżer ħajjin minn ċerti żoni, soġġett għall-konformità ma’ għadd ta’ kundizzjonijiet.

(3)

Jenħtieġ li l-perjodu ta’ applikazzjoni tal-miżuri previsti fid-Deċiżjoni ta’ Implimentazzjoni 2013/764/UE jqis l-epidemjoloġija tad-deni klassiku tal-ħnieżer u wkoll l-effikaċja tal-miżuri tas-saħħa tal-annimali applikati mill-Istati Membri elenkati fl-Anness tad-Deċiżjoni ta’ Implimentazzjoni 2013/764/UE mal-leġiżlazzjoni tal-Unjoni. Għalhekk, minħabba s-sitwazzjoni epidemjoloġika attwali fl-Unjoni u fil-pajjiżi terzi ġirien u l-isforzi meħtieġa biex tiġi miġġielda dik il-marda, filwaqt li fl-istess ħin ma jiġux imposti restrizzjonijiet mhux meħtieġa fuq il-kummerċ, jenħtieġ li l-perjodu ta’ applikazzjoni tad-Deċiżjoni ta’ Implimentazzjoni 2013/764/UE jiġi estiż.

(4)

Billi huwa importanti li jkun hemm kontinwità tal-miżuri kontra d-deni klassiku tal-ħnieżer fil-livell tal-Unjoni fid-dawl tal-epidemija attwali ta’ dik il-marda, jenħtieġ li l-estensjoni tal-perjodu ta’ applikazzjoni tad-Deċiżjoni ta’ Implimentazzjoni 2013/764/UE tqis li r-Regolament (UE) 2016/429 tal-Parlament Ewropew u tal-Kunsill (5), li jipprevedi miżuri ta’ salvagwardja fil-każ ta’ mard tal-annimali, japplika mill-21 ta’ April 2021.

(5)

Barra minn hekk, b’kont meħud tal-effettività tal-miżuri ġenerali applikati fil-Kroazja skont id-Direttiva 2001/89/KE, is-sorveljanza u l-miżuri fis-seħħ kif ippreżentati lill-Kumitat Permanenti dwar il-Pjanti, l-Annimali, l-Ikel u l-Għalf, iż-żoni kollha fil-Kroazja li bħalissa huma elenkati fl-Anness tad-Deċiżjoni ta’ Implimentazzjoni 2013/764/UE, jenħtieġ li issa jitneħħew mil-lista ta’ dak l-Anness, minħabba s-sitwazzjoni epidemjoloġika favorevoli tal-marda f’dak l-Istat Membru.

(6)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Ir-Regolament ta’ Delega tal-Kummissjoni (UE) Nru 1062/2014 (2) jistabbilixxi lista ta’ sustanzi attivi eżistenti li jridu jiġu evalwati biex possibbilment jiġu approvati għall-użu fil-prodotti bijoċidali. Dik il-lista tinkludi ż-żeolit tar-ram tal-fidda (Nru KE: n.a., Nru CAS: 130328-19-7).

(2)

Iż-żeolit tar-ram tal-fidda ġie evalwat għall-użu fil-prodotti tat-tip ta’ prodott 2, diżinfettanti u alkaċidi li mhumiex maħsuba biex jiġu applikati direttament fuq il-bnedmin jew l-annimali, u fil-prodotti tat-tip ta’ prodott 7, preservattivi għall-pellikoli, kif deskritt fl-Anness V tar-Regolament (UE) Nru 528/2012.

(3)

L-Iżvezja nħatret bħala l-Istat Membru relatur u l-awtorità kompetenti tagħha ssottomettiet ir-rapporti tal-valutazzjoni flimkien mal-konklużjonijiet tagħha lill-Aġenzija Ewropea għas-Sustanzi Kimiċi fit-12 ta’ Ġunju 2017.

(4)

Fis-17 ta’ Ottubru 2018, il-Kumitat dwar il-Prodotti Bijoċidali fformula l-opinjoni tal-Aġenżija Ewropea għas-Sustanzi Kimiċi (3), f’konformità mal-Artikolu 7(2) tar-Regolament ta’ Delega (UE) Nru 1062/2014, wara li tqiesu l-konklużjonijiet tal-awtorità kompetenti tal-evalwazzjoni.

(5)

Skont dawk l-opinjonijiet, il-prodotti bijoċidali tat-tipi ta’ prodott 2 u 7 li fihom żeolit tar-ram tal-fidda jistgħu ma jkunux mistennija li jissodisfaw il-kriterji stabbiliti fl-Artikolu 19(1)(b) tar-Regolament (UE) Nru 528/2012 peress li ma ntwerietx effikaċja suffiċjenti.

(6)

Filwaqt li jitqiesu l-opinjonijiet tal-Aġenzija Ewropea għas-Sustanzi Kimiċi, mhuwiex xieraq li jiġi approvat iż-żeolit tar-ram tal-fidda għall-użu fil-prodotti bijoċidali tat-tipi ta’ prodott 2 u 7, peress li l-kundizzjonijiet stabbiliti fl-Artikolu 4(1) tar-Regolament (UE) Nru 528/2012 mhumiex issodisfati.

(7)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Prodotti Bijoċidali,