(1)

Għall-imazalil, il-limiti massimi ta' residwu (MRLs) ġew stabbiliti fl-Anness II u l-Parti B tal-Anness III tar-Regolament (KE) Nru 396/2005.

(2)

L-Awtorità Ewropea dwar is-Sigurtà fl-Ikel (“l-Awtorità”) ressqet opinjoni motivata dwar l-MRLs eżistenti għall-imazalil f'konformità mal-Artikolu 12(1) tar-Regolament (KE) Nru 396/2005 (2). Hija rrakkomandat li jitbaxxew l-MRLs għall-patata, it-tadam, il-ħbub tax-xgħir, il-ħbub tal-ħafur, il-ħbub tas-segala u l-ħbub tal-qamħ. Għal ċerti prodotti oħrajn hija rrakkomandat li jiżdied il-livell tal-MRLs eżistenti.

(3)

L-Awtorità kkonkludiet li fir-rigward ta' ċerti MRLs, xi informazzjoni ma kinitx disponibbli u li kienet meħtieġa aktar konsiderazzjoni mill-maniġers tar-riskju. Mill-perspettiva tal-ġestjoni tar-riskji, huwa xieraq li jiġu stabbiliti MRLs fl-Anness II tar-Regolament (KE) Nru 396/2005 fil-livell eżistenti jew fil-livell identifikat mill-Awtorità għall-frott taċ-ċitru, il-frawli, it-tut, il-lampun, il-qargħa bagħli, il-bettieħ u l-muskoli, it-tessut tax-xaħam, il-fwied u l-kliewi tal-ħnieżer, tal-bovini u tal-ekwini, kif ukoll il-ħalib tal-bhejjem tal-ifrat u l-ħalib taż-żwiemel, billi għal dawk il-prodotti, kienet disponibbli informazzjoni limitata u l-Awtorità dderivat MRLs li ma jqajmux tħassib dwar il-protezzjoni tal-konsumatur. Dawk l-MRLs se jiġu riveduti; ir-rieżami se jqis l-informazzjoni disponibbli fi żmien sentejn mill-pubblikazzjoni ta' dan ir-Regolament. Minn perspettiva ta' ġestjoni tar-riskju, huwa xieraq li jiġu stabbiliti MRLs fl-Anness II tar-Regolament (KE) Nru 396/2005 fil-limitu speċifiku ta' determinazzjoni jew fl-MRL prestabbilit kif stabbilit fl-Artikolu 18(1)(b) tar-Regolament (KE) Nru 396/2005 għall-frott taż-żerriegħa, il-kaki, il-banana u l-bżar ħelu/kapsikum, billi, għal dawk il-prodotti, l-ebda informazzjoni ma kienet disponibbli li minnha l-Awtorità setgħet tikseb MRLs li ma jqajmux tħassib dwar il-protezzjoni tal-konsumatur.

(4)

L-awtorità indikat li l-MRLs derivati għall-imazalil fil-grejpfrut, fil-larinġ, fit-tuffieħ, fil-lanġas, fil-banana, fil-patata u fil-fwied tal-bovini, kif ukoll il-limitu massimu ta' residwi tal-Codex (CXL) li fuqhom huwa bbażat l-MRL tal-UE għan-naspli, jistgħu jqajmu tħassib dwar il-protezzjoni tal-konsumatur. Filwaqt li qieset l-informazzjoni addizzjonali disponibbli għall-grejpfrut, għal-larinġ u għall-patata, hija dderivat MRLs alternattivi għall-grejpfrut, għal-larinġ, għall-patata u għall-fwied tal-bovini li ma jqajmux dan it-tħassib. Fir-rigward tal-MRLs għat-tuffieħ, il-lanġas, in-naspli u l-banana, l-Awtorità indikat li l-maniġers tar-riskju jistgħu jikkunsidraw li jissettjawhom fil-limitu speċifiku ta' determinazzjoni jew fuq l-MRL prestabbilit skont l-Artikolu 18(1)(b) tar-Regolament (KE) Nru 396/2005.

(5)

L-awtorità pproponiet definizzjonijiet riveduti tar-residwu. Jixraq li d-definizzjonijiet tar-residwu jinbidlu kif xieraq.

(6)

B'mod indipendenti mir-reviżjoni tal-MRL imwettqa skont l-Artikolu 12(1) tar-Regolament (KE) Nru 396/2005, tressqet applikazzjoni skont l-Artikolu 6 ta' dak ir-Regolament biex jiġu mmodifikati l-MRLs eżistenti għall-imażalil fi frott taċ-ċitru, tuffieħ, lanġas, banana u patata u fi prodotti li joriġinaw mill-annimali.

(7)

Skont l-Artikolu 8 tar-Regolament (KE) Nru 396/2005, dawn l-applikazzjonijiet ġew ivvalutati mill-Istati Membri kkonċernati u r-rapporti ta' valutazzjoni tressqu lill-Kummissjoni.

(8)

F'konformità mal-Artikolu 10 tar-Regolament (KE) Nru 396/2005, l-Awtorità vvalutat l-applikazzjoni u r-rapport ta' evalwazzjoni, u eżaminat b'mod partikolari r-riskji għall-konsumaturi u, fejn rilevanti, għall-annimali u tat l-opinjoni motivata (3) tagħha dwar l-MRLs proposti. Għaddiet dik l-opinjoni lill-applikanti, lill-Kummissjoni u lill-Istati Membri u ppubblikatha.

(9)

Fl-opinjoni motivata tagħha, l-Awtorità kkonkludiet skont l-Artikolu 10 tar-Regolament (KE) Nru 396/2005 li l-MRLs għall-użi maħsuba ma setgħux jiġu emendati qabel ma titlesta l-valutazzjoni tar-riskju għall-metaboliti tal-pjanti R014821, FK-772 u FK-284 fir-rigward tal-ġenotossiċità u t-tossiċità ġenerali. Ikkonkludiet ukoll li ċerta informazzjoni identifikata bħala mhux disponibbli fir-reviżjoni tal-MRL imwettqa skont l-Artikolu 12(1) ta' dak ir-Regolament tressqet mal-applikazzjoni skont l-Artikolu 6 ta' dak ir-Regolament.

(10)

Minħabba l-adozzjoni tal-opinjoni motivata skont l-Artikolu 10 tar-Regolament (KE) Nru 396/2005 wara l-adozzjoni tal-opinjoni motivata skont l-Artikolu 12(1) ta' dak ir-Regolament u n-natura orizzontali tat-tħassib dwar it-tossiċità identifikat għall-metaboliti tal-imazalil R014821, FK-772 u FK-284, il-Kummissjoni talbet lill-Awtorità biex taġġorna l-opinjoni motivata tagħha dwar l-MRLs eżistenti għall-imazalil skont l-Artikolu 43 tar-Regolament (KE) Nru 396/2005.

(11)

L-Awtorità ressqet opinjoni motivata (4) li taġġorna r-reviżjoni tal-MRLs eżistenti għall-imazalil fuq il-bażi tal-informazzjoni tossikoloġika ġdida.

(12)

F'dik l-opinjoni motivata, l-Awtorità dderivat l-istess MRLs bħal dawk fl-opinjoni motivata tagħha skont l-Artikolu 12 tar-Regolament (KE) Nru 396/2005, ħlief għall-frott taċ-ċitru, għall-bettieħ u għall-prodotti li joriġinaw mill-annimali. Għal dawn il-prodotti, ma pproponietx MRLs, għaliex ma setgħetx tiffinalizza l-valutazzjoni tal-proprjetajiet tossikoloġiċi tal-metabolit R014821.

(13)

Ir-Regolament ta' Implimentazzjoni tal-Kummissjoni (UE) Nru 705/2011 (5) ġedded l-approvazzjoni tal-imazalil skont l-Artikolu 13(2) tar-Regolament (KE) Nru 1107/2009 tal-Parlament Ewropew u tal-Kunsill (6). Filwaqt li fil-valutazzjoni tar-riskju ta' qabel l-adozzjoni ta' dak ir-Regolament, l-Awtorità kienet identifikat inċertezzi rigward il-proprjetajiet tossikoloġiċi tal-metabolit R014821 (7), il-kundizzjonijiet tal-approvazzjoni ma kinux ristretti f'dan ir-rigward fl-istadju tal-ġestjoni tar-riskju. Tagħrif addizzjonali dwar il-proprjetajiet tossikoloġiċi tal-metabolit R014821 sottomess mal-applikazzjoni skont l-Artikolu 6 tar-Regolament (KE) Nru 396/2005 ma indirizzax għal kollox dawk l-inċertezzi iżda lanqas ma wassal għal żieda fil-livell ta' tħassib. Minn perspettiva ta' ġestjoni tar-riskju, huwa konsistenti u xieraq li jiġu stabbiliti MRLs għal dawk il-prodotti li għalihom l-Awtorità fl-opinjoni motivata tagħha skont l-Artikolu 12 tar-Regolament (KE) Nru 396/2005 idderivat MRLs li ma jqajmux tħassib dwar il-protezzjoni tal-konsumaturi fl-Anness II tar-Regolament (KE) Nru 396/2005 fil-livell eżistenti jew fil-livell identifikat mill-Awtorità.

(14)

Is-CXLs eżistenti ġew ikkunsidrati fl-opinjonijiet motivati tal-Awtorità. Is-CXLs li huma sikuri għall-konsumaturi fl-Unjoni ġew ikkunsidrati għall-iffissar tal-MRL.

(15)

Fir-rigward ta' prodotti li fuqhom mhux awtorizzat l-użu tal-prodott għall-protezzjoni tal-pjanti kkonċernat, u li għalihom ma jeżistu l-ebda tolleranzi tal-importazzjoni jew CXLs, jenħtieġ li l-MRLs jiġu stabbiliti fil-limitu speċifiku ta' kwantifikazzjoni jew jenħtieġ li japplika l-MRL prestabbilit, kif stipulat fl-Artikolu 18(1)(b) tar-Regolament (KE) Nru 396/2005.

(16)

Il-Kummissjoni kkonsultat lil-laboratorji ta' referenza tal-Unjoni Ewropea dwar ir-residwi tal-pestiċidi fir-rigward tal-bżonn li jiġu adattati ċerti limiti ta' determinazzjoni. Dawk il-laboratorji kkonkludew li għal ċerti prodotti, l-iżvilupp tekniku jirrikjedi li jiġu stabbiliti limiti speċifiċi ta' determinazzjoni.

(17)

Abbażi tal-opinjonijiet motivati tal-Awtorità u filwaqt li jitqiesu l-fatturi rilevanti tas-suġġett ikkunsidrat, il-modifiki xierqa tal-MRLs jissodisfaw ir-rekwiżiti tal-Artikolu 14(2) tar-Regolament (KE) Nru 396/2005.

(18)

Is-sħab kummerċjali tal-Unjoni ġew ikkonsultati dwar l-MRLs il-ġodda permezz tal-Organizzazzjoni Dinjija tal-Kummerċ u l-kummenti tagħhom tqiesu.

(19)

Għalhekk, jenħtieġ li r-Regolament (KE) Nru 396/2005 jiġi emendat skont dan.

(20)

Sabiex il-prodotti jkunu jistgħu jiġu kkummerċjalizzati, ipproċessati u kkunsmati b'mod normali, jenħtieġ li dan ir-Regolament jipprevedi arranġament tranżizzjonali għall-prodotti li jkunu ġew prodotti qabel il-modifika tal-MRLs u li għalihom jintwera li jinżamm livell għoli ta' protezzjoni tal-konsumaturi.

(21)

Jenħtieġ li jitħalla jgħaddi perjodu raġonevoli ta' żmien qabel ma jibdew japplikaw l-MRLs immodifikati, sabiex l-Istati Membri, il-pajjiżi terzi u l-operaturi tan-negozji tal-ikel jingħataw biżżejjed żmien biex iħejju ruħhom ħalli jkunu konformi mar-rekwiżiti l-ġodda li jirriżultaw mill-modifika tal-MRLs.

(22)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Wieħed mill-objettivi ewlenin tar-Regolament (KE) Nru 300/2008 huwa li jipprovdi l-bażi għal interpretazzjoni komuni tal-Anness 17 (l-Anness dwar is-Sigurtà) tal-Konvenzjoni dwar l-Avjazzjoni Ċivili Internazzjonali (2) tas-7 ta' Diċembru 1944, l-10 edizzjoni, 2017 li għaliha l-Istati Membri kollha tal-UE huma firmatarji.

(2)

Il-mezzi biex jintlaħqu l-objettivi huma (a) l-istabbiliment ta' regoli komuni u ta' standards bażiċi komuni dwar is-sigurtà tal-avjazzjoni u (b) mekkaniżmi għall-monitoraġġ tal-konformità.

(3)

L-iskop tal-emenda tal-leġiżlazzjoni ta' implimentazzjoni huwa li jiġu appoġġati l-Istati Membri fl-iżgurar tal-konformità sħiħa mal-aktar emenda reċenti (l-Emenda 16) tal-Anness 17 tal-Konvenzjoni dwar l-Avjazzjoni Ċivili Internazzjonali, li introduċiet standards ġodda skont il-Kapitolu 3.1.4 relatat mal-organizzazzjoni nazzjonali u l-awtorità xierqa u l-Kapitolu 4.9.1 relatat mal-miżuri preventivi taċ-ċibersigurtà.

(4)

Bit-traspożizzjoni ta' dawn l-istandards fil-leġiżlazzjoni ta' implimentazzjoni dwar is-sigurtà tal-avjazzjoni mifruxa fl-UE kollha, se jiġi żgurat li l-awtoritajiet xierqa jistabbilixxu u jimplimentaw proċeduri biex, kif xieraq u b'mod prattiku u f'waqtu, jikkondividu informazzjoni rilevanti biex jgħinu lil awtoritajiet u aġenziji nazzjonali oħra, operaturi tal-ajruporti, trasportaturi tal-ajru u entitajiet oħra kkonċernati, iwettqu valutazzjonijiet effettivi tar-riskju tas-sigurtà relatati mal-operazzjonijiet tagħhom u b'dak il-mod jappoġġaw lil dawn l-entitajiet fit-twettiq ta' valutazzjonijiet effettivi tar-riskju tas-sigurtà relatati, fost l-oħrajn, maċ-ċibersigurtà u jimplimentaw miżuri li jindirizzaw it-theddid ċibernetiku.

(5)

Id-Direttiva (UE) 2016/1148 tal-Parlament Ewropew u tal-Kunsill dwar miżuri għal livell għoli komuni ta' sigurtà tan-netwerks u tas-sistemi tal-informazzjoni madwar l-Unjoni (id-Direttiva NIS) tistabbilixxi miżuri bil-ħsieb li jinkiseb livell għoli komuni ta' sigurtà tan-netwerks u tas-sistemi tal-informazzjoni fl-Unjoni (3) sabiex jitjieb il-funzjonament tas-suq intern. Il-miżuri li jirriżultaw mid-Direttiva NIS u dan ir-Regolament jenħtieġ li jiġu kkoordinati fil-livelli nazzjonali sabiex jiġu evitati l-lakuni u d-duplikazzjonijiet tal-obbligi.

(6)

Għalhekk, jenħtieġ li r-Regolament ta' Implimentazzjoni tal-Kummissjoni (UE) 2015/1998 (4) jiġi emendat skont dan.

(7)

Il-miżuri previsti f'dan ir-Regolament huma skont l-opinjoni tal-Kumitat dwar is-Sigurtà tal-Avjazzjoni Ċivili stabbilit skont l-Artikolu 19(1) tar-Regolament (KE) Nru 300/2008,

(1)

Il-Kummissjoni Ewropea (“il-Kummissjoni”) ddeċidiet fuq inizjattiva tagħha, skont l-Artikoli 13(3) u 14(5) tar-Regolament (UE) 2016/1036, li tinvestiga ċ-ċirkomvenzjoni possibbli tal-miżuri antidumping imposti fuq importazzjonijiet ta' perossosulfati (persulfati) li joriġinaw mir-Repubblika tal-Poplu taċ-Ċina u biex tagħmel importazzjonijiet bħal dawn soġġetti għal reġistrazzjoni.

(2)

Il-prodott ikkonċernat mill-evażjoni possibbli huwa perossosulfati (persulfati), inkluż il-potassju perossimonosulfat sulfat, li bħalissa jaqa' taħt il-kodiċijiet NM 2833 40 00 u ex 2842 90 80 (TARIC 2842908020), u li joriġina mir-Repubblika Popolari taċ-Ċina (“il-prodott ikkonċernat”).

(3)

Il-prodott li qed jiġi investigat għal ċirkomvenzjoni possibbli huwa l-istess bħal dak definit fil-premessa preċedenti, li attwalment jaqa' taħt l-istess kodiċijiet bħall-prodott ikkonċernat, importat taħt il-kodiċi addizzjonali TARIC A820 (“il-prodott li qed jiġi investigat”).

(4)

Il-miżuri li bħalissa huma fis-seħħ u possibbilment qed jiġu evitati huma l-miżuri antidumping imposti mir-Regolament ta' Implimentazzjoni tal-Kunsill (UE) Nru 1343/2013 (2). Reviżjoni ta' skadenza li tikkonċerna dawn il-miżuri nbdiet fis-17 ta' Diċembru 2018 u għadha pendenti (3).

(5)

L-investigazzjoni preżenti ta' ċirkomvenzjoni possibbli ta' miżuri eżistenti hija bbażata fuq evidenza suffiċjenti li l-miżuri antidumping fis-seħħ qed jiġu evitati permezz ta' riorganizzazzjoni ta' xejriet u mezzi ta' bejgħ tal-prodott ikkonċernat.

(6)

Il-miżuri fis-seħħ ivarjaw minn 24,5 % sa 71,8 %. Wieħed mill-produtturi esportaturi, ABC Chemicals Co Shanghai (“ABC”), huwa soġġett għal dazju ta' 0 %. L-istatistika tal-importazzjoni turi bidla fix-xejra tal-kummerċ wara l-impożizzjoni tad-dazju antidumping definittiv fuq il-prodott ikkonċernat. Dik l-istatistika turi wkoll li l-importazzjonijiet Ċiniżi issa deħlin prinċipalment fl-Unjoni permezz tal-ABC. Madankollu, l-evidenza li għandha l-Kummissjoni turi li l-ABC ma għadux jipproduċi l-prodott ikkonċernat. Barra minn hekk, jidher li l-liċenzja tal-produzzjoni tal-ABC ġiet irtirata f'Lulju 2017, li ma nħarġet l-ebda liċenzja ġdida, u li l-kumpanija hija kategorizzata bħala intrapriża ta' distribuzzjoni, mhux bħala manifattur.

(7)

Jidher li ma hemm l-ebda raġuni valida jew ġustifikazzjoni ekonomika għal din l-allokazzjoni ta' esportazzjonijiet għajr id-dazju eżistenti ta' 0 % għall-ABC.

(8)

Barra minn hekk, il-Kummissjoni għandha biżżejjed evidenza li l-effetti ta' rimedju tal-miżuri antidumping eżistenti fuq il-prodott ikkonċernat qed jiġu mminati kemm fil-kwantità kif ukoll fil-prezz. L-importazzjonijiet ta' volumi sinifikanti tal-prodott investigat jidher li ħadu post l-importazzjonijiet tal-prodott ikkonċernat. Barra minn hekk, il-Kummissjoni għandha biżżejjed evidenza li turi li l-importazzjonijiet tal-prodott li qed jiġi investigat qed isiru bi prezzijiet aktar baxxi mill-prezz mhux dannuż stabbilit fl-investigazzjoni li wasslet għall-miżuri eżistenti.

(9)

Fl-aħħarnett, il-Kummissjoni kisbet biżżejjed evidenza li l-prezzijiet tal-prodott investigat qed jiġu ddumpjati fir-rigward tal-valur normali stabbilit qabel.

(10)

Jekk il-prattiki ta' ċirkumvenzjoni li huma koperti bl-Artikolu 13 tar-Regolament bażiku, għajr dawk imsemmija hawn fuq, jiġu identifikati fl-andament tal-investigazzjoni, l-investigazzjoni tista' tkopri dawn il-prattiki wkoll.

(11)

Fid-dawl ta' dan ta' hawn fuq, il-Kummissjoni kkonkludiet li teżisti biżżejjed evidenza biex tiġġustifika l-bidu ta' investigazzjoni skont l-Artikolu 13(3) tar-Regolament bażiku u li tagħmel l-importazzjonijiet tal-prodotti li qed jiġu investigati soġġetti għal reġistrazzjoni, b'konformità mal-Artikolu 14(5) tar-Regolament bażiku.

(12)

L-awtoritajiet tar-Repubblika Popolari taċ-Ċina se jiġu nnotifikati bil-bidu tal-investigazzjoni.

(13)

Sabiex ikun hemm amministrazzjoni tajba, jenħtieġ li jiġu ddikjarati l-limiti ta' żmien li fihom:

(14)

Ta' min jiġbed l-attenzjoni għall-fatt li l-eżerċitar tad-drittijiet proċedurali stipulati fir-Regolament bażiku jiddependi mill-fatt li l-partijiet jippreżentaw lilhom infushom fil-limiti ta' żmien indikati fl-Artikolu 3 ta' dan ir-Regolament.

(15)

Sabiex tikseb l-informazzjoni li tqis meħtieġa għall-investigazzjoni tagħha, il-Kummissjoni se tibgħat kwestjonarju lill-ABC, li huwa mistieden iwieġeb għal dak il-kwestjonarju fil-limitu ta' żmien stabbilit fl-Artikolu 3(2) ta' dan ir-Regolament.

(16)

Il-partijiet interessati jridu jippreżentaw ruħhom billi jikkuntattjaw lill-Kummissjoni fil-limitu taż-żmien stabbilit fl-Artikolu 3(1) ta' dan ir-Regolament.

(17)

Il-partijiet kollha inkluż l-industrija tal-Unjoni, l-importaturi u kwalunkwe assoċjazzjoni rilevanti huma mistiedna jippreżentaw l-opinjonijiet tagħhom bil-miktub u jipprovdu evidenza ta' sostenn dment li dawn is-sottomissjonijiet isiru fi żmien l-iskadenza prevista fl-Artikolu 3(2). Barra minn hekk, il-Kummissjoni tista' tisma' lill-partijiet, bil-kundizzjoni li jagħmlu talba bil-miktub u juru li hemm raġunijiet partikolari għalfejn jenħtieġ li jinstemgħu.

(18)

Skont l-Artikolu 14(5) tar-Regolament bażiku, l-importazzjonijiet tal-prodott li qed jiġi investigat għandhom ikunu soġġetti għal reġistrazzjoni sabiex ikun żgurat li, jekk l-investigazzjoni tikkonkludi li jkun hemm ċirkomvenzjoni, ikun jista' jiġi impost ammont xieraq ta' dazji antidumping mid-data li fiha tkun ġiet imposta r-reġistrazzjoni ta' importazzjonijiet bħal dawn.

(19)

Ir-responsabilità għall-ġejjieni tista' toħroġ mis-sejbiet tal-investigazzjoni. Bit-tagħrif disponsibbli f'dan l-istadju, b'mod partikolari l-indikazzjoni li ċerti kumpaniji attwalment soġġetti għad-dazju residwu ta' 71,8 % (kodiċi addizzjonali TARIC A999) jew kumpaniji soġġetti għal rata ta' dazju individwali qed ibigħu l-prodotti tagħhom permezz tal-ABC (li huwa soġġett għal dazju ta' 0 %), l-ammont ta' responsabbiltà eventwali fil-futur huwa stabbilit fil-livell tad-dazju residwu, jiġifieri 71,8 % ad valorem fuq il-valur ta' importazzjoni CIF tal-prodott li qed jiġi investigat, importat taħt il-kodiċi addizzjonali TARIC A820.

(20)

Jekk xi parti interessata tirrifjuta l-aċċess jew ma tipprovdix it-tagħrif meħtieġ fil-limiti ta' skadenza stipulati, jew tfixkel b'mod sinifikanti l-investigazzjoni, is-sejbiet, pożittivi jew negattivi, jistgħu jsiru fuq il-bażi tal-fatti disponibbli, skont l-Artikolu 18 tar-Regolament bażiku.

(21)

Jekk jinstab li xi parti interessata tkun ipprovdiet tagħrif falz jew qarrieq, it-tagħrif ma għandux jitqies u jista' jsir użu mill-fatti disponibbli b'mod konformi mal-Artikolu 18 tar-Regolament bażiku.

(22)

Jekk parti interessata ma tikkooperax jew tikkoopera parzjalment biss u s-sejbiet għalhekk ikunu bbażati fuq il-fatti disponibbli skont l-Artikolu 18 tar-Regolament bażiku, ir-riżultat jista' jkun anqas favorevoli għal dik il-parti milli kieku tkun ikkooperat.

(23)

L-investigazzjoni se tintemm, skont l-Artikolu 13(3) tar-Regolament bażiku, fi żmien disa' xhur mid-data li fiha jidħol fis-seħħ dan ir-Regolament.

(24)

Ta' min jinnota li kwalunkwe data personali miġbura f'din l-investigazzjoni sejra tiġi ttrattata skont ir-Regolament (UE) 2018/1725 tal-Parlament Ewropew u tal-Kunsill (4) dwar il-protezzjoni ta' persuni fiżiċi fir-rigward tal-ipproċessar ta' data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta' tali data.

(25)

Avviż dwar il-protezzjoni tad-data li jinforma lill-individwi kollha dwar l-ipproċessar tad-data personali fil-qafas tal-attivitajiet tad-difiża tal-kummerċ tal-Kummissjoni huwa disponibbli fuq is-sit web tad-DĠ Kummerċ: http://ec.europa.eu/trade/policy/accessing-markets/trade-defence/”

(26)

Il-partijiet jistgħu jitolbu l-intervent tal-Uffiċjal tas-Seduta fi proċedimenti kummerċjali. L-Uffiċjal tas-Seduta jeżamina t-talbiet għall-aċċess għall-fajl, it-tilwim fir-rigward tal-kunfidenzjalità tad-dokumenti, it-talbiet għal estensjoni tal-iskadenzi u kull talba oħra dwar id-drittijiet tad-difiża tal-partijiet u tal-partijiet terzi li jistgħu jfeġġu matul il-proċediment.

(27)

L-Uffiċjal tas-Seduta jista' jorganizza seduti ta' smigħ u jagħmilha ta' medjatur bejn il-parti/jiet u s-servizzi tal-Kummissjoni sabiex jiżgura li d-drittijiet tad-difiża tal-partijiet jkunu qed jiġu eżerċitati bis-sħiħ.

(28)

Jenħtieġ li t-talba għal seduta ta' smigħ mal-Uffiċjal tas-Seduta ssir bil-miktub u jenħtieġ li tispeċifika r-raġunijiet għat-talba. L-Uffiċjal tas-Seduta jeżamina r-raġunijiet għat-talbiet. Jenħtieġ li dawn is-seduti ta' smigħ isiru biss jekk il-kwistjonijiet ma jkunux ġew solvuti mas-servizzi tal-Kummissjoni fi żmien debitu.

(29)

Kull talba trid tiġi ppreżentata fi żmien raġonevoli u f'qasir żmien sabiex ma xxekkilx l-andament tajjeb tal-proċedimenti. Għal dan il-għan, il-partijiet għandhom jitolbu l-intervent tal-Uffiċjal tas-Seduta minn kmieni kemm jista' jkun, wara li jseħħ il-każ li jiġġustifika tali intervent. Fil-prinċipju, l-iskedi ta' żmien stabbiliti fl-Artikolu 3 ta' dan ir-Regolament sabiex jintalbu seduti ta' smigħ mas-servizzi tal-Kummissjoni japplikaw mutatis mutandis għal talbiet għal seduti ta' smigħ mal-Uffiċjal tas-Seduta. Meta t-talbiet għal seduti ta' smigħ jiġu ppreżentati lil hinn mill-iskedi ta' żmien rilevanti, l-Uffiċjal tas-Seduta jeżamina wkoll ir-raġunijiet għalfejn tali talbiet saru daqshekk tard, in-natura tal-kwistjonijiet imqajma u l-impatt ta' dawn il-kwistjonijiet fuq id-drittijiet tad-difiża, filwaqt li jqis kif dovut l-interessi ta' amministrazzjoni tajba u t-tlestija tal-investigazzjoni fil-ħin.

(30)

Għal aktar tagħrif u dettalji ta' kuntatt, il-partijiet jistgħu jikkonsultaw il-paġni tal-Internet tal-Uffiċjal tas-Seduta fuq il-websajt tad-Direttorat Ġenerali għall-Kummerċ: http://ec.europa.eu/trade/trade-policy-and-you/contacts/hearing-officer/,

(1)

Wara notifika preċedenti, li sussegwentement ġiet irtirata (2), l-awtoritajiet Netherlandiżi informaw lill-Kummissjoni bil-posta elettronika tal-25 ta' Marzu 2019 (3), skont l-Artikolu 19(3) tar-Regolament (KE) Nru 1008/2008, bil-ħsieb tagħhom li jistabbilixxu ċerti regoli dwar id-distribuzzjoni tat-traffiku għall-ajruporti ta' Amsterdam Schiphol u Amsterdam Lelystad fin-Netherlands (minn hawn 'il quddiem l-Ajruport ta' Schiphol jew Schiphol, jew l-Ajruport ta' Lelystad jew Lelystad, rispettivament) bl-adozzjoni tal-Abbozz tal-Ordni Ministerjali u l-Abbozz tal-Ordni tal-Ministru għall-Infrastruttura u l-Ilma. Bil-posta elettronika tad-29 ta' Marzu 2019 (4), l-awtoritajiet Netherlandiżi ppreżentaw verżjoni emendata tal-Abbozz tal-Ordni Ministerjali u tal-Abbozz tal-Ordni tal-Ministru għall-Infrastruttura u l-Ilma (5), flimkien mal-elementi l-oħra li diġà kienu inklużi fin-notifika tal-25 ta' Marzu 2019.

(2)

L-informazzjoni ppreżentata b'dan il-mod mill-awtoritajiet Netherlandiżi kienet tinkludi erba' studji bħala annessi: (1) Id-domanda għall-kapaċità f'Schiphol fl-2023; (2) Id-domanda għall-kapaċità f'Schiphol fl-2030; (3) In-negozjar sekondarju f'Schiphol (6) u (4) L-operazzjonijiet maqsuma tal-linji tal-ajru.

(3)

Il-Kummissjoni ppubblikat sommarju tar-regoli maħsuba dwar id-distribuzzjoni tat-traffiku f'Il-Ġurnal Uffiċjali tal-Unjoni Ewropea fit-12 ta' April 2019 (7) u stiednet lill-partijiet interessati jippreżentaw il-kummenti tagħhom.

(4)

Permezz tal-ittri tat-3 ta' Lulju 2019 (8) u tal-11 ta' Lulju 2019 (9), l-awtoritajiet Netherlandiżi ressqu emenda għan-notifika, bil-għan li jitqies it-tħassib li tqajjem mis-servizzi tal-Kummissjoni. Permezz tal-istess ittra datata l-11 ta' Lulju 2019 kif ukoll permezz tal-posta elettronika datata s-16 ta' Lulju 2019 (10), l-awtoritajiet Netherlandiżi nnotifikaw elementi fattwali ulterjuri rilevanti għan-notifika, rigward l-aċċessibbiltà tal-ajruporti, kif ukoll l-intenzjonijiet ta' dawk l-awtoritajiet rigward il-perjodu ta' żmien li fih l-ajruport ta' Lelystad ikun miftuħ għal operazzjonijiet kummerċjali.

(5)

L-abbozz tat-TDR għad-distribuzzjoni tat-traffiku bejn l-ajruporti ta' Schiphol u Lelystad jikkonsisti mill-elementi li ġejjin:

(6)

“Titjiriet ta' trasferiment” u “titjiriet minn punt għal ieħor” għandhom jiġu ddefiniti permezz ta' Ordni tal-Ministru għall-Infrastruttura u l-Ilma. Barra minn hekk, għandhom jiġu stabbiliti regoli dwar il-kriterji li għandhom jiġu ssodisfati minn dawn it-titjiriet. It-titjiriet għandhom jiġu kklassifikati kull sentejn skont dawk il-kriterji, u kwalunkwe klassifikazzjoni ġdida għandha titħabbar mill-inqas sena qabel ma tidħol fis-seħħ. Abbozz ta' Ordni bbażat fuq din is-setgħa jifforma parti mill-miżura nnotifikata [ara l-premessi 13 sa 21 ta' hawn taħt].

(7)

L-abbozz tat-TDR ma jirrikjedix li l-jiem u l-ħinijiet tal-kapaċità li tintuża fl-Ajruport ta' Lelystad, minn naħa waħda, u tas-slots rilevanti fl-Ajruport ta' Schiphol, min-naħa l-oħra, li jiġu ttrasferiti, jingħataw lura jew li jintużaw b'mod differenti skont ir-regola deskritta fil-premessa 5(b) ta' hawn fuq għandhom jikkorrispondu.

(8)

Trasportatur tal-ajru li jiddependi fuq l-Artikolu 2(2) tal-abbozz tad-Digriet [jiġifieri r-regola deskritta fil-premessa 5(b) ta' hawn fuq] għandu jinforma lill-Ministru, lill-koordinatur tas-slots u, fejn applikabbli, lit-trasportatur tal-ajru riċevitur dwar dan, filwaqt li jiddikjara liema slots fl-Ajruport ta' Schiphol huma kkonċernati. Meta jinforma lill-Ministru, it-trasportatur tal-ajru għandu juri li r-rekwiżiti deskritti fl-Artikolu 2(5) tal-abbozz tad-Digriet [il-premessa 5(c) ta' hawn fuq] ġew issodisfati.

(9)

Skont l-Artikolu 3(1) tal-abbozz tad-Digriet, is-slots storiċi koperti mill-Artikolu 2(2) tiegħu [deskritti fil-premessa (5)(b) ta' hawn fuq] għandhom jintużaw esklussivament għal titjiriet ta' trasferiment.

(10)

Il-paragrafi 2, 3 u 4 tal-Artikolu 3 tal-abbozz tal-Ordni Ministerjali jżidu d-dispożizzjonijiet li ġejjin:

(11)

Skont l-Artikolu 2(3) u (4) tal-abbozz tal-Ordni Ministerjali, il-prijorità msemmija fl-Artikolu 2(2) tiegħu [il-premessa 5(b) ta' hawn fuq] tapplika għal żewġ segmenti ta' slots fl-ajruport ta' Lelystad, jiġifieri sa, u inklużi, 10 000 slot u minn 10 001 sa 25 000 slot.

(12)

Skont l-Artikolu 7 tiegħu, id-Digriet jidħol fis-seħħ f'data li għandha tiġi stipulata minn Deċiżjoni rjali, bl-eċċezzjoni tal-Artikolu 2(4), li tidħol fis-seħħ mill-jum li fih il-Kummissjoni Ewropea tapprova dan il-paragrafu partikolari skont sottomissjoni separata skont l-Artikolu 19(3) tar-Regolament (KE) Nru 1008/2008 u tkun ippubblikat id-deċiżjoni tagħha f'Il-Ġurnal Uffiċjali tal-Unjoni Ewropea.

(13)

L-abbozz tal-Ordni tal-Ministru jiddefinixxi “titjiriet ta' trasferiment” b'referenza għad-destinazzjoni ta' kull titjira. Il-kriterji huma dawn li ġejjin:

(14)

L-Anness 1 tal-abbozz tal-Ordni jelenka d-destinazzjonijiet li jikkorrispondu għal dawk il-kriterji.

(15)

Skont l-Artikolu 1(3) tal-abbozz tal-Ordni, destinazzjoni mhux inkluża fl-Anness 1 se titqies bħala “destinazzjoni ta' trasferiment” għal perjodu mitlub, sa massimu ta' ħames snin, jekk linja tal-ajru tkun tista' tissostanzja lill-Ministru ex ante li d-destinazzjoni se tinqeda mit-titjiriet tagħha b'perċentwal medju ta' trasferiment ta' mill-inqas 10 % għall-għadd mitlub ta' staġuni.

(16)

Skont l-Artikolu 1(4) tal-abbozz tal-Ordni, linja tal-ajru tista', fi kwalunkwe każ, tissodisfa r-rekwiżit stabbilit fil-paragrafu 3 billi turi li destinazzjoni qed tinqeda minn titjiriet b'perċentwal medju ta' trasferiment ta' mill-inqas 10 % imkejjel matul il-ħames snin kalendarji ta' qabel it-talba msemmija fil-paragrafu 3, f'ajruport fl-Unjoni Ewropea.

(17)

Id-destinazzjonijiet li se jitqiesu bħala destinazzjoni ta' trasferiment skont il-paragrafu 3, se jiġu ppubblikati fil-Gazzetta tal-Gvern.

(18)

L-abbozz tal-Ordni tal-Ministru jelenka wkoll, fl-Anness 2, id-destinazzjonijiet indikati bħala “titjiriet minn punt għal ieħor” abbażi tal-kriterji li ġejjin:

(19)

L-Artikolu 3 tal-abbozz ta' Ordni jikkonċerna r-regoli dwar il-valutazzjoni tal-evidenza tal-perċentwal ta' trasferiment rilevanti għall-applikazzjoni tal-Ordni.

(20)

Skont l-Artikolu 3(1), kwalunkwe data verifikabbli relatata mal-perċentwal ta' trasferiment ta' titjiriet u destinazzjonijiet tista' tiġi ppreżentata lill-Ministru u se titqies meta t-titjiriet jiġu nnominati bħala titjiriet ta' trasferiment jew titjiriet minn punt għal ieħor.

(21)

L-Artikolu 3(2) jistipula li, fi kwalunkwe każ, fir-rigward tad-data msemmija fil-paragrafu 1, il-passiġġieri li jaslu fl-Ajruport ta' Schiphol u jitilqu, fi żmien 24 siegħa mill-wasla tagħhom, lejn destinazzjoni oħra li ma tkunx minn fejn tkun oriġinat it-titjira preċedenti, se jitqiesu bħala passiġġieri fi tranżitu.

(22)

Skont l-awtoritajiet Netherlandiżi, l-objettiv tal-abbozz tat-TDR huwa li jagħti privileġġ lit-titjiriet ta' trasferiment fir-rigward tal-allokazzjoni tal-kapaċità fl-Ajruport ta' Schiphol. In-netwerk estensiv ta' destinazzjonijiet interkontinentali ma setax jinqeda kieku Schiphol ma kienx ċentru kontinentali u interkontinentali. Iż-żewġ funzjonijiet, li jaqdu d-destinazzjonijiet interkontinentali u li joperaw f'netwerk Ewropew għall-passiġġieri fi tranżitu, huma inseparabbli u flimkien jiffurmaw il-funzjoni ta' ċentru kontinentali u interkontinentali ta' Schiphol.

(23)

Il-kuntest ta' dan l-objettiv huwa l-limitu ta' 500 000 moviment fis-sena fl-ajruport ta' Schiphol sa tmiem l-2020, stabbilit fil-“Ftehim ta' Alders”. Dak il-ftehim intlaħaq fl-2008 bejn il-partijiet ikkonċernati (jiġifieri l-industrija tal-avjazzjoni, l-awtoritajiet pubbliċi u r-residenti). L-għan tiegħu huwa li jikseb bilanċ bejn it-tkabbir tas-settur tal-avjazzjoni u l-vijabbiltà u s-sikurezza u s-sostenibbiltà ambjentali.

(24)

Il-limitu ta' 500 000 moviment fis-sena fl-Ajruport ta' Schiphol kien diġà ntlaħaq fl-2018. B'konsegwenza ta' dan, l-awtoritajiet Netherlandiżi huma tal-fehma li l-kapaċità disponibbli biex jiġi ttrasferit it-traffiku fl-ajruport ta' Schiphol tista' tiżdied biss billi jiġi ddistribwit it-traffiku bejn dak l-ajruport u l-ajruport ta' Lelystad, b'dan tal-aħħar ikun jista' jakkomoda t-traffiku li ma jkollux bżonn kundizzjonijiet u faċilitajiet bħal dawk disponibbli fl-ajruport ta' Schiphol.

(25)

Għal dan il-għan, l-Ajruport ta' Lelystad jakkomoda t-traffiku minn punt għal ieħor li jiġi mill-Ajruport ta' Schiphol, u b'hekk itejjeb il-funzjoni tat-trasferiment ta' dan l-aħħar ajruport.

(26)

L-abbozz tat-TDR ma jisforzax lit-trasportaturi tal-ajru jirrilokaw it-titjiriet tagħhom minn Schiphol, iżda minflok jiddependi fuq inċentivi għar-rilokazzjoni tat-traffiku minn punt għal ieħor.

(27)

Skont l-awtoritajiet Netherlandiżi, il-miżura notifikata għandha titqies fl-isfond tal-importanza ekonomika u strateġika kbira li jinżammu ċentri ewlenin fl-Unjoni. Skont l-awtoritajiet Netherlandiżi, l-Ajruport ta' Schiphol huwa wieħed mill-akbar ċentri fil-parti tal-Majjistral tal-Unjoni, u pilastru ewlieni għall-ekonomija u l-konnettività tan-Netherlands. Fl-2017, 48,6 miljun passiġġier mill-ibliet Ewropej ivvjaġġaw minn/lejn l-Ajruport ta' Schiphol, u 31 % minnhom ġew ittrasferiti għal titjira oħra f'Schiphol. Barra minn hekk, 19,7 miljun passiġġier mhux Ewropew ivvjaġġaw minn/lejn Schiphol. Minn dawk il-passiġġieri, madwar 60 % kienu passiġġieri fi tranżitu. L-awtoritajiet Netherlandiżi jirreferu għall-importanza rikonoxxuta mill-Kummissjoni Ewropea fir-rigward tal-eżistenza ta' ċentri ewlenin fit-territorju tal-UE fil-politika esterna tagħha dwar l-avjazzjoni (12).

(28)

L-awtoritajiet Netherlandiżi jqisu li netwerk Ewropew tar-rotot minn Schiphol li jaqdi d-destinazzjonijiet kontinentali u interkontinentali huwa essenzjali biex jinżamm u jiġi żviluppat dan iċ-ċentru b'saħħtu tal-UE. Huma jemmnu li l-funzjoni taċ-ċentru ta' Schiphol hija interess pubbliku essenzjali li għandu jinżamm u jissaħħaħ (13). Dan huwa importanti minħabba l-vulnerabilità taċ-ċentru għal tnaqqis fin-netwerk tar-rotot kontinentali u interkontinentali.

(29)

Skont l-awtoritajiet Netherlandiżi, din il-vulnerabilità hija dovuta b'mod aktar speċifiku għall-fatt li s-suq domestiku, f'termini ta' passiġġieri li jgħixu fin-Netherlands, għat-traffiku interkontinentali u ta' trasferiment huwa żgħir. It-tieni, hija meħtieġa infrastruttura speċjalizzata għat-trasportaturi li jwettqu traffiku interkontinentali u ta' trasferiment, li għalihom f'ċerti sitwazzjonijiet, bħal titjiriet ta' riskju, ma tkun teżisti l-ebda alternattiva raġonevoli oħra f'ajruport ieħor li jinsab fin-Netherlands. It-tielet, l-awtoritajiet Netherlandiżi jsostnu li jekk l-ajruport jitlef il-funzjoni ta' ċentru tiegħu, il-kapaċità tas-sits u l-frekwenzi jbatu għal snin sħaħ.

(30)

L-awtoritajiet Netherlandiżi jirreferu wkoll għall-pakkett komprensiv ta' miżuri li ġie adottat biex jiġi implimentat l-hekk imsejjaħ “approċċ ibbilanċjat” stabbilit mir-Regolament (UE) Nru 598/2014 tal-Parlament Ewropew u tal-Kunsill (14). L-awtoritajiet Netherlandiżi jispjegaw li dawk il-miżuri huma riflessi fil-“Ftehim ta' Alders” tal-2008, imsemmi hawn fuq, u ġew ikkonfermati mill-ġdid fil-White Paper dwar l-Avjazzjoni Netherlandiża (2009), fl-Aġenda ta' Azzjoni ta' Schiphol (2016) u fil-Ftehim ta' Koalizzjoni (2017).

(31)

Kif imsemmi hawn fuq, il-limitu ta' 500 000 moviment ta' inġenji tal-ajru f'Schiphol diġà ntlaħaq fl-2018. Barra minn hekk, skont l-awtorità Netherlandiża, il-kapaċità disponibbli fl-Ajruport ta' Eindhoven ġiet assorbita malajr minn traffiku addizzjonali li ma ġiex ittrasferit mill-Ajruport ta' Schiphol. Ma kienx hemm biżżejjed inċentivi għat-trasportaturi tal-ajru li ċċaqilqu lejn Eindhoven biex jagħtu lura fuq inizjattiva tagħhom stess is-slots ta' Schiphol lill-koordinatur tas-slots.

(32)

F'dan l-isfond, l-awtoritajiet Netherlandiżi jqisu li l-pakkett ta' miżuri jeħtieġ li jiġi żviluppat u implimentat ulterjorment. Din l-implimentazzjoni hija strutturata madwar għadd ta' elementi, jiġifieri: (a) il-viżjoni fit-tul tat-trasport bl-ajru; (b) miżura ta' sikurezza; (c) miżuri tal-ispazju tal-ajru; (d) miżuri operazzjonali; (e) miżuri għat-tnaqqis ta' inkonvenjenzi; (f) miżuri ta' sostenibbiltà u (g) miżuri ta' selettività.

(33)

It-TDR jagħmlu parti minn pjan usa' ta' żvilupp tal-Ajruport ta' Lelystad b'kapaċità massima ta' 45 000 moviment ta' inġenji tal-ajru fis-sena. Din il-kapaċità se tintlaħaq f'żewġ stadji: l-ewwel stadju se jkun ta' 25 000 moviment fis-sena, li għandu jintlaħaq madwar l-2033. Fil-ftuħ tal-Ajruport ta' Lelystad fl-2020, l-ajruport se jakkomoda massimu annwali ta' 4 000 qtugħ mill-art u nżul l-art. Dan l-għadd huwa mistenni li jiżdied għal massimu ta' 7 000 fl-2021 u għal 10 000 fl-2022. It-tieni stadju se jippermetti li jintlaħaq tkabbir sa 45 000 moviment annwali sal-2043.

(34)

L-awtoritajiet Netherlandiżi jqisu li r-rekwiżiti stabbiliti fl-Artikolu 19 tar-Regolament (KE) Nru 1008/2008 ġew issodisfati.

(35)

L-awtoritajiet Netherlandiżi wettqu konsultazzjoni bbażata fuq l-Internet dwar l-abbozz tat-TDR bejn is-16 ta' Jannar u s-6 ta' Frar 2019. Il-memorandum ta' spjegazzjoni u l-istudji rilevanti ġew ippubblikati wkoll għall-benefiċċju tal-partijiet ikkonċernati. It-tħassib ewlieni dwar l-abbozz tat-TDR li rriżulta mill-konsultazzjoni kien: (a) il-proporzjonalità tiegħu fir-rigward tal-kapaċità limitata fl-ajruport ta' Lelystad li tillimita l-opportunitajiet kummerċjali tat-trasportaturi tal-ajru, (b) l-impatt diskriminatorju possibbli tiegħu fuq it-tip ta' traffiku u l-identità tat-trasportaturi tal-ajru, u (c) id-distribuzzjoni tal-forzi tas-suq.

(36)

L-awtoritajiet Netherlandiżi jenfasizzaw li, wara l-konsultazzjoni mal-partijiet ikkonċernati, huma rrevedew l-abbozz tat-TDR f'għadd ta' oqsma: (a) l-introduzzjoni ta' “dispożizzjoni kontra l-użu ħażin”, biex jiġi żgurat li jintlaħaq l-objettiv li tiżdied il-konnettività internazzjonali; (b) it-trattament speċifiku tat-“titjiriet ta' riskju”, jiġifieri titjiriet minn ċerti destinazzjonijiet li jirrikjedu kontroll doganali sħiħ mal-wasla fin-Netherlands u li konsegwentement għandhom jiġu akkomodati fl-Ajruport ta' Schiphol; u (c) kjarifiki rigward l-informazzjoni meħtieġa biex jiġi ssostanzjat is-sehem tat-trasferiment ta' destinazzjoni ġdida.

(37)

Fir-rigward tal-aċċessibbiltà u l-infrastruttura, l-awtoritajiet Netherlandiżi jqisu li ż-żewġ ajruporti jaqdu lil Amsterdam u l-konurbazzjoni ta' Randstad, u li d-distanza bejn iż-żewġ ajruporti hija ta' 57 km bl-awtostrada A6 u tista' tiġi koperta f'90 minuta. Iż-żewġ ajruporti huma kollegati wkoll bit-trasport pubbliku. Il-ħin tal-vjaġġ bil-ferrovija bejn l-Istazzjon Ċentrali ta' Lelystad u l-Istazzjon Ċentrali ta' Amsterdam huwa ta' 38 minuta, u dak bejn l-Istazzjon Ċentrali ta' Lelystad u Schiphol huwa ta' 42 minuta. Il-vjaġġ mill-Istazzjon Ċentrali ta' Lelystad lejn l-Ajruport ta' Lelystad jieħu 15-il minuta bix-xarabank. Ladarba jinfetaħ l-Ajruport ta' Lelystad, se jiġi introdott servizz ta' shuttle bus bejn l-Istazzjon Ċentrali ta' Lelystad u l-Ajruport ta' Lelystad li jieħu 10 minuti. Skont l-iskedi tat-titjiriet tal-ajruport, ix-shuttle bus se titlaq kull 30 minuta. Barra minn hekk, kien diġà ġie deċiż li l-awtostrada A6 lejn l-Ajruport ta' Lelystad titwessa' minn żewġ korsiji għal tliet korsiji u li mill-2021 jinbena ħruġ mill-ajruport.

(38)

L-awtoritajiet Netherlandiżi jindikaw li l-Ajruport ta' Lelystad joffri s-servizzi meħtieġa u huwa adattat għall-ġestjoni tat-traffiku tal-KAT C tal-ICAO/EASA (15). Barra minn hekk, huma disponibbli erba' pożizzjonijiet ta' parkeġġ. Il-kontroll tat-traffiku tal-ajru se jkun żgurat permezz ta' LVNL. L-ajruport se jipprovdi servizzi fuq l-art u servizzi ta' mmaniġġjar tal-passiġġieri. L-ajruport mhux se jkun miftuħ għal titjiriet ta' billejl, u l-ebda faċilità ma ġiet maħsuba għal operazzjonijiet ta' titjiriet ta' merkanzija u għal titjiriet interkontinentali b'inġenji kbar tal-ajru.

(39)

L-awtoritajiet Netherlandiżi jqisu li l-abbozz tat-TDR ma jippreġudikax b'mod inġust l-opportunitajiet kummerċjali, billi, b'mod partikolari, it-trasportaturi tal-ajru m'għandhom l-ebda obbligu li jirrilokaw l-operat tagħhom minn Schiphol lejn Lelystad. Barra minn hekk, id-destinazzjonijiet kollha jistgħu jinqdew mill-Ajruport ta' Lelystad, u l-iskeda ta' bejn is-6:00 u l-23:00 (ħin lokali) tippermetti l-flessibbiltà biex jintuża l-perjodu kollu.

(40)

Skont l-awtoritajiet Netherlandiżi, l-abbozz tat-TDR jipprevedi l-possibbiltà li t-trasportaturi tal-ajru jiżviluppaw rotot ġodda. Meta trasportatur tal-ajru jkun jista' jissostanzja li se jopera lejn destinazzjoni ġdida mill-Ajruport ta' Schiphol b'titjiriet li jkollhom sehem ta' mill-inqas 10 % ta' passiġġieri fi tranżitu, tali destinazzjoni se titqies bħala parti mil-lista ta' destinazzjonijiet ta' trasferiment.

(41)

L-awtoritajiet Netherlandiżi jissottomettu l-istudju li sar mill-konsulent, SEO Amsterdam Economics. L-istudju huwa maħsub biex jgħin lill-awtoritajiet Netherlandiżi jistabbilixxu l-aktar limitu xieraq għad-definizzjoni ta' titjira bħala titjira ta' trasferiment, sabiex jinkiseb bilanċ bejn l-objettiv li jitnaqqas l-impatt fuq is-suq u tittejjeb l-effikaċja tar-regola. L-analiżi tinkludi l-għadd totali ta' destinazzjonijiet u l-movimenti ta' inġenji tal-ajru, il-movimenti u r-rotot tal-inġenji tal-ajru affettwati fir-rigward ta' kull linja tal-ajru li bħalissa qed topera mill-ajruport ta' Schiphol. L-istudju jeżamina l-effetti ta' limiti differenti fuq l-ilħuq tal-objettiv tal-miżura u l-possibbiltà li d-diversi trasportaturi tal-ajru jagħmlu użu minnha bil-għan li jiksbu prijorità fl-Ajruport ta' Lelystad.

(42)

Fir-rigward ta' parteċipanti ġodda, il-kriterji tar-Regolament dwar is-Slots se japplikaw mill-ftuħ tal-Ajruport ta' Lelystad għat-traffiku kummerċjali, bil-fehim li l-Ajruport ta' Lelystad se jkun ajruport ikkoordinat minn dak il-mument. Mingħajr preġudizzju għall-applikazzjoni ta' dawk il-kriterji, l-abbozz tat-TDR jistabbilixxi prijorità fl-allokazzjoni tas-slots fl-Ajruport ta' Lelystad għat-trasportaturi li jkunu għamlu użu mill-Artikolu 2(2) tad-Digriet.

(43)

L-abbozz tat-TDR ma jinvolvi l-ebda diskriminazzjoni diretta jew indiretta bejn it-trasportaturi tal-ajru għal raġunijiet ta' nazzjonalità u identità jew bejn id-destinazzjonijiet. L-abbozz tat-TDR huwa bbażat fuq kriterji oġġettivi u t-trasportaturi kollha tal-ajru li joperaw lejn destinazzjoni speċifika huma ttrattati b'mod ugwali, mingħajr diskriminazzjoni. L-abbozz tat-TDR ma jobbligax lit-trasportaturi tal-ajru jittrasferixxu t-titjiriet mill-ajruport ta' Schiphol lejn l-ajruport ta' Lelystad.

(44)

L-awtoritajiet Netherlandiżi jindikaw li d-differenza bejn id-destinazzjonijiet ma timplikax per se xi diskriminazzjoni. Id-differenza tista' tiġi ġġustifikata b'mod oġġettiv, abbażi tal-għanijiet leġittimi tal-kwalità tan-netwerk u l-promozzjoni tal-funzjonijiet ta' ċentru ta' Schiphol.

(45)

L-awtoritajiet Netherlandiżi jqisu li l-abbozz tat-TDR huwa proporzjonat. L-Ajruport ta' Lelystad se jkun ajruport ikkoordinat mill-ftuħ tiegħu għall-operazzjonijiet kummerċjali u l-prijorità stabbilita fit-TDR se tiġi applikata wara l-applikazzjoni tal-kriterji ta' prijorità tar-Regolament dwar is-Slots. Ladarba l-ajruport ta' Lelystad ikun laħaq livell ta' 10 000 moviment ta' titjiriet fis-sena, se ssir evalwazzjoni tat-TDR sabiex jiġu vvalutati l-impatti tagħhom. Ir-regola ta' prijorità tiġi estiża għal segment ulterjuri ta'15 000 moviment ta' titjiriet (u għalhekk għal total ta' 25 000 moviment ta' titjiriet fis-sena) biss jekk tali estensjoni tiġi approvata mill-Kummissjoni.

(46)

L-awtoritajiet Netherlandiżi jqisu li r-regoli nnotifikati fihom salvagwardji li jiżguraw li t-TDR jilħqu l-għanijiet tagħhom fil-ġejjieni.

(47)

Skont l-awtoritajiet Netherlandiżi, il-miżura ma tmurx lil hinn minn dak li huwa meħtieġ biex jintlaħaq l-objettiv stabbilit, peress li r-regola tapplika biss għall-kapaċità ta' Schiphol li tinkiseb permezz ta' din il-miżura, u mhux għal kwalunkwe kapaċità oħra disponibbli għall-ewwel darba/reċentement fl-Ajruport ta' Schiphol.

(48)

Skont l-awtoritajiet Netherlandiżi, it-trasparenza tal-abbozz tat-TDR hija żgurata mill-forma ġuridika li tintgħażel, jiġifieri Ordni Ministerjali u Ordni tal-Ministru għall-Infrastruttura u l-Ilma.

(49)

Fl-aħħar nett, l-awtoritajiet Netherlandiżi jikkonkludu li l-abbozz tat-TDR mhuwiex inkompatibbli mar-Regolamenti (KEE) Nru 95/93 u (KE) Nru 1008/2008. Ir-Regolament dwar is-Slots se jiġi rrispettat bis-sħiħ. Il-fatt li TDR jistgħu jintervjenu fil-mod ta' kif jintużaw is-slots jidher mid-deċiżjonijiet preċedenti tal-Kummissjoni.

(50)

Bi tweġiba għall-pubblikazzjoni ta' sommarju tal-emendi maħsuba f'Il-Ġurnal Uffiċjali tal-Unjoni Ewropea, il-Kummissjoni rċeviet kummenti minn 10 ċittadini u 5 trasportaturi tal-ajru u ajruport wieħed bħala partijiet interessati, li l-parti l-kbira tagħhom xtaqu jibqgħu anonimi.

(51)

Il-biċċa l-kbira tal-partijiet interessati sostnew li l-miżura hija diskriminatorja: l-abbozz tat-TDR huwa bbażat fuq distinzjoni fundamentali bejn “titjiriet ta' trasferiment” u “titjiriet minn punt għal ieħor”. Il-limitu ta' 10 % ta' passiġġieri fi tranżitu mhuwiex ibbażat fuq kriterji oġġettivi, u jqis biss l-informazzjoni dwar il-passiġġieri fi tranżitu pprovduta mill-ajruport. Il-partijiet interessati qajmu d-diffikultà li tiġi pprovduta data biex tiġġustifika l-perċentwal ta' passiġġieri fi tranżitu u n-nuqqas ta' kriterji pprovduti mill-awtoritajiet Netherlandiżi dwar kif għandhom juru dak il-perċentwal, li jagħmel il-miżura inapplikabbli.

(52)

Barra minn hekk, il-partijiet interessati jsostnu li l-abbozz tat-TDR għandu effetti diskriminatorji fir-rigward tat-trasportaturi tal-ajru, billi huma biss il-Grupp KLM (16), l-alleanza tagħha tal-Linja tal-Ajru SkyTeam (17) u s-sħab tal-codeshare li se jibbenefikaw mill-abbozz tat-TDR minħabba d-distinzjoni bejn id-destinazzjonijiet. Id-definizzjoni ta' “titjira ta' trasferiment” tikkorrispondi għal kważi 86 % tad-destinazzjonijiet tal-Grupp KLM. Bl-iffissar ta' dawn ir-regoli, ċerti mudelli ta' negozju, bħall-mudell bi prezz baxx u tal-btajjel, huma limitati fil-possibbiltajiet tagħhom biex ikabbru n-negozju. Għalhekk, il-partijiet interessati jqisu li l-abbozz tat-TDR mhuwiex oġġettiv u proporzjonat, u jmur lil hinn minn dak li huwa meħtieġ biex jintlaħaq objettiv potenzjalment leġittimu.

(53)

Il-partijiet interessati jsostnu wkoll li l-abbozz tat-TDR għandu effetti diskriminatorji b'rabta mad-destinazzjonijiet, billi huwa de facto ta' benefiċċju għad-destinazzjonijiet tal-grupp KLM, li se jkunu jistgħu jiżdiedu mill-Ajruport ta' Schiphol u mill-Ajruport ta' Lelystad. Madankollu, billi kważi 86 % (18) tad-destinazzjonijiet tal-Grupp KLM huma nnominati bħala “titjiriet ta' trasferiment”, dawn se jkunu jistgħu jkomplu jiżdiedu f'dawn ir-rotot, u jiftħu rotot ġodda. Barra minn hekk, l-abbozz tat-TDR jirriżulta fil-prattika f'sitwazzjoni fejn it-trasportaturi tal-ajru se jkunu jeħtieġu jikkompetu mal-Grupp KLM/Sky Team f'dawk id-destinazzjonijiet fejn il-pożizzjoni tal-Grupp KLM/SkyTeam hija l-aktar b'saħħitha minħabba t-traffiku li jwassal lill-passiġġieri fl-Ajruport ta' Schiphol.

(54)

Il-partijiet interessati jqisu wkoll li l-kundizzjonijiet tal-Artikolu 19 tar-Regolament (KE) Nru 1008/2008 ma ġewx issodisfati. L-ajruporti rregolati mill-abbozz tat-TDR ma jaqdux l-istess konurbazzjoni, peress li skont il-partijiet interessati: “(i) hemm żoni agrikoli u naturali kbar u miftuħa (Natura 2000) bejn Amsterdam u Lelystad, u għalhekk, mhijiex żona mibnija kontinwament; (ii) b'madwar 80 000 abitant, Lelystad hija kbira wisq biex tifforma parti minn agglomerazzjoni”. Fil-livell amministrattiv, iż-żewġt ibliet huma koperti biss mill-istess gvern fil-livell nazzjonali.

(55)

Barra minn hekk, qed jiġi sostnut li l-Ajruport ta' Lelystad bħalissa ma jissodisfax ir-rekwiżiti b'rabta ma' infrastruttura tat-trasport adegwata u ta' servizzi tat-trasport pubbliku, speċifikament f'ċerti perjodi ta' żmien tal-jum (is-6:00 ta' filgħodu u l-11:00 ta' filgħaxija) fejn ma teżisti l-ebda konnessjoni tat-trasport pubbliku suffiċjenti. Barra minn hekk, fl-aktar sigħat intensivi, it-trasferiment bejn iż-żewġ ajruporti jirrikjedi aktar minn 90 minuta. Il-limitazzjoni tal-għadd ta' movimenti fl-Ajruport ta' Lelystad (4 000 fl-2020) u l-fatt li l-ajruport mhuwiex miftuħ għat-trasportaturi tal-ajru speċjalizzati fit-traffiku minn punt għal ieħor li attwalment m'għandhomx slots fl-Ajruport ta' Schiphol, tippreġudika l-opportunitajiet kummerċjali tagħhom.

(56)

Xi partijiet interessati jsostnu li l-abbozz tat-TDR imur kontra r-Regolament dwar is-Slots minħabba li dan ir-regolament jippermetti biss li jingħataw prijoritajiet fl-allokazzjoni tas-slots permezz ta' regoli lokali, u li t-TDR ma jistgħux joħolqu prijoritajiet. Barra minn hekk, ir-Regolament dwar is-Slots ma jippermettix li s-slots ikunu marbuta mad-destinazzjonijiet.

(57)

Il-parti l-kbira tal-partijiet interessati jirreferu għall-impatt tal-istorbju li se jkollu l-iżvilupp ulterjuri tal-Ajruport ta' Lelystad, minħabba li l-ispazju tal-ajru tan-Netherlands huwa mimli u minħabba l-ħtieġa li jiġi evitat li t-traffiku tal-ajru minn ajruport wieħed jinterferixxi mat-traffiku mill-ieħor. Il-partijiet interessati jattribwixxu din is-sitwazzjoni għad-dewmien li ħadu l-awtoritajiet Netherlandiżi sabiex jikklassifikaw mill-ġdid l-ispazju tal-ajru. Għalhekk, hemm restrizzjoni fuq it-titjiriet lejn l-Ajruport ta' Lelystad li għandhom jittajru fil-baxx, u b'konsegwenza ta' dan iżidu l-livelli tal-istorbju. Barra minn hekk, qed tiġi ddubitata l-importanza ekonomika tal-funzjoni ta' ċentru tal-Ajruport ta' Schiphol, b'referenza għar-rapport tal-Kunsilli Ambjentali u tal-Infrastruttura.

(58)

Barra minn hekk, il-partijiet interessati jirreferu għall-impatt li jħallu inġenji tal-ajru kbar fuq siti protetti (speċijiet selvaġġi, b'mod partikolari l-għasafar), u r-responsabbiltà tal-awtoritajiet Netherlandiżi li jevitaw miżuri li jiddeterjoraw il-kundizzjonijiet f'ħabitats naturali.

(59)

Ħafna mill-partijiet interessati jqisu li l-abbozz tat-TDR għandu impatt sinifikanti fil-qasam tas-sostenibbiltà ambjentali. Abbażi ta' Valutazzjoni tal-Impatt Ambjentali (VIA) li saret fl-2014, l-awtoritajiet Netherlandiżi taw permess għall-bini u mbagħad għall-operat tal-Ajruport ta' Lelystad. Madankollu, ċerta data meħtieġa biex jiġu kkalkolati l-impatti possibbli kienet żbaljata (bħat-tip ta' inġenju tal-ajru u l-livelli assoċjati tal-istorbju).

(60)

Il-Kummissjoni ma rċeviet l-ebda kumment mingħand il-partijiet interessati fejn juru l-appoġġ tagħhom għall-abbozz tat-TDR.

(61)

L-Artikolu 19(1) tar-Regolament (KE) Nru 1008/2008 jistipula li l-eżerċitar tad-drittijiet tat-traffiku għandu jkun soġġett għar-regoli ppubblikati tal-Unjoni, nazzjonali, reġjonali u lokali relatati mas-sikurezza, is-sigurtà, il-protezzjoni tal-ambjent u l-allokazzjoni ta' slots.

(62)

L-Artikolu 19(2) jistipula li Stat Membru, wara konsultazzjoni mal-partijiet interessati u mingħajr diskriminazzjoni bejn id-destinazzjonijiet fl-Unjoni u għal raġunijiet tan-nazzjonalità jew tal-identità tat-trasportaturi tal-ajru, jista' jirregola d-distribuzzjoni tat-traffiku tal-ajru bejn l-ajruporti li jissodisfaw il-kundizzjonijiet li ġejjin:

(63)

Id-distribuzzjoni tat-traffiku tal-ajru bejn l-ajruporti kkonċernati għandha tirrispetta l-prinċipji tal-proporzjonalità u tat-trasparenza, u għandha tkun ibbażata fuq kriterji oġġettivi.

(64)

L-Artikolu 19(3) tar-Regolament (KE) Nru 1008/2008 jistipula li Stat Membru kkonċernat għandu jinforma lill-Kummissjoni bil-ħsieb tiegħu li jirregola d-distribuzzjoni tat-traffiku tal-ajru jew li jibdel regola eżistenti dwar id-distribuzzjoni tat-traffiku. Dan jipprovdi wkoll li l-Kummissjoni għandha teżamina l-applikazzjoni tal-Artikolu (1) u (2) u, fi żmien sitt xhur minn meta tirċievi l-informazzjoni mill-Istat Membru, u wara li tkun ikkonsultat mal-Kumitat imsemmi fl-Artikolu 25 tar-Regolament għandha tiddeċiedi jekk l-Istat Membru jistax japplika l-miżuri. Skont l-istess dispożizzjoni, il-Kummissjoni għandha tippubblika d-deċiżjoni tagħha f'Il-Ġurnal Uffiċjali tal-Unjoni Ewropea u l-miżuri ma għandhomx jiġu applikati qabel il-pubblikazzjoni tal-approvazzjoni tal-Kummissjoni.

(65)

Skont l-Artikolu 19(2) tar-Regolament (KE) Nru 1008/2008, l-adozzjoni ta' deċiżjoni li tqassam it-traffiku tal-ajru bejn l-ajruporti tirrikjedi “konsultazzjoni mal-partijiet interessati” minn qabel. L-awtoritajiet Netherlandiżi ppubblikaw l-abbozz tat-TDR bil-possibbiltà li l-partijiet interessati, inklużi t-trasportaturi tal-ajru u l-ajruporti kkonċernati, jesprimu l-fehmiet tagħhom bejn is-16 ta' Jannar u s-6 ta' Frar 2019. L-emendi sussegwenti għall-abbozz tat-test, li jsiru bil-għan li jiġi nnotifikat lill-Kummissjoni, huma limitati sabiex jitqies ċertu tħassib li jitqajjem mill-partijiet ikkonċernati.

(66)

Minn dan jirriżulta li l-Awtoritajiet Netherlandiżi ssodisfaw ir-rekwiżit ta' konsultazzjoni minn qabel mal-partijiet interessati.

(67)

Fl-ewwel subparagrafu tiegħu, l-Artikolu 19(2) tar-Regolament (KE) Nru 1008/2008 jistabbilixxi għadd ta' rekwiżiti sabiex sett ta' ajruporti jkunu eliġibbli għad-distribuzzjoni tat-traffiku.

(68)

Fir-rigward tal-ewwel subparagrafu tal-Artikolu 19(2)(a) tar-Regolament (KE) Nru 1008/2008, l-awtoritajiet Netherlandiżi jiddikjaraw li l-ajruporti jaqdu lill-konurbazzjoni ta' Randstad. Skont l-Artikolu 2(22) ta' dak ir-Regolament, “konurbazzjoni” tfisser żona urbana li tinkludi għadd ta' bliet jew irħula li, permezz tat-tkabbir tal-popolazzjoni u l-espansjoni, ingħaqdu fiżikament sabiex jiffurmaw żona waħda mibnija kontinwament. Il-konurbazzjoni ta' Randstat tinsab fil-Punent ċentrali tan-Netherlands u tikkonsisti primarjament mill-erba' l-akbar bliet Netherlandiżi (Amsterdam, Rotterdam, The Hague u Utrecht) u l-inħawi ta' madwarhom. Din tikkostitwixxi konurbazzjoni fis-sens tad-definizzjoni msemmija hawn fuq u hija moqdija miż-żewġ ajruporti. Il-fatt li ċerti żoni agrikoli jinsabu bejn iż-żona mibnija u l-ajruport ta' Lelystad huwa irrilevanti għall-finijiet tar-rekwiżit stabbilit fl-ewwel subparagrafu tal-Artikolu 19(2)(a) tar-Regolament (KE) Nru 1008/2008.

(69)

Fir-rigward tal-ewwel subparagrafu tal-Artikolu 19(2)(b) tar-Regolament, il-Kummissjoni tinnota li l-ajruporti jkunu moqdija minn infrastrutturi adegwati tat-trasport li jipprovdu, sa fejn ikun possibbli, konnessjoni diretta li tagħmilha possibbli li wieħed jasal l-ajruport fi żmien 90 minuta inkluż, fejn ikun meħtieġ, fuq bażi transkonfinali. Kemm l-Ajruport ta' Schiphol kif ukoll l-Ajruport ta' Lelystad jistgħu jintlaħqu bit-triq mill-erba' bliet kollha tal-konurbazzjoni kważi kompletament permezz tal-awtostradi. Skont l-awtoritajiet Netherlandiżi, il-ħin tal-ivvjaġġar jibqa' fi żmien 90 minuta mill-erba' bliet kollha tal-konurbazzjoni. Minħabba d-daqs tal-konurbazzjoni, l-aċċess għal ajruport wieħed pjuttost milli l-ieħor jista' jkun aktar faċli, skont il-post inizjali tal-vjaġġatur. Madankollu, dan il-fatt ma jeskludix il-konformità mal-Artikolu 19(2)(b) tar-Regolament (KE) Nru 1008/2008. Barra minn hekk, filwaqt li f'kundizzjonijiet partikolari tat-traffiku jista' ma jkunx possibbli li jintlaħaq ajruport wieħed jew l-ieħor fi żmien 90 minuta, l-inċertezzi ta' dan it-tip huma inevitabbli f'dan il-kuntest u ma jipprevjenux li jiġi ssodisfat wieħed mir-rekwiżiti ta' dik id-dispożizzjoni, jiġifieri li tali konnessjoni tiġi pprovduta “sa fejn ikun possibbli” (19).

(70)

Bl-istess mod, l-ajruport ta' Schiphol huwa moqdi b'konnessjoni ferrovjarja, kif inhu l-istazzjon ta' Lelystad, li minnu se tiġi stabbilita shuttle bus lejn l-Ajruport ta' Lelystad fi żmien xieraq (ara l-premessa sussegwenti ta' din id-Deċiżjoni). Pereżempju, l-awtoritajiet Netherlandiżi jżidu li l-ħin tal-ivvjaġġar bil-ferrovija bejn l-Istazzjon Ċentrali ta' Lelystad, minn naħa waħda, u l-Istazzjon Ċentrali ta' Amsterdam u l-Ajruport ta' Schiphol min-naħa l-oħra huwa ta' 42 u 38 minuta rispettivament, filwaqt li l-vjaġġ bix-xarabank bejn l-Istazzjon Ċentrali ta' Lelystad u l-Ajruport ta' Lelystand se jieħu 10 minuti.

(71)

Bħala konklużjoni jista' jitqies li r-rekwiżiti tal-ewwel subparagrafu tal-Artikolu 19(2)(b) tar-Regolament (KE) Nru 1008/2008 ġew issodisfati.

(72)

L-ewwel subparagrafu tal-Artikolu 19(2)(c) tar-Regolament (KE) Nru 1008/2008 jirrikjedi li l-ajruporti kkonċernati jkunu kollegati ma' xulxin u ma' Amsterdam u l-konurbazzjoni tagħha permezz ta' trasport pubbliku frekwenti, affidabbli u effiċjenti. Il-konnessjonijiet ferrovjarji eżistenti jippermettu lill-passiġġieri jilħqu l-ajruport ta' Schiphol u l-Istazzjon Ċentrali ta' Lelystad permezz ta' servizzi ferrovjarji frekwenti u affidabbli. Għalhekk, fir-rigward tal-Ajruport ta' Lelystad, l-issodisfar tar-rekwiżit imsemmi hawn fuq jiddependi biss fuq l-istabbiliment ta' servizz xieraq tax-xarabank bejn l-Istazzjon Ċentrali ta' Lelystad u l-Ajruport ta' Lelystad. Skont l-awtoritajiet Netherlandiżi, dan is-servizz se jkun ġie stabbilit fil-ħin tal-ftuħ tal-Ajruport ta' Lelystad għal operazzjonijiet kummerċjali, fejn ix-xarabanks se joperaw lejn l-ajruport b'intervalli ta' tletin minuta. Għalhekk, ir-rekwiżit stabbilit fl-Artikolu 19(2)(c) għandu jitqies bħala ssodisfat.

(73)

Skont l-ewwel subparagrafu tal-Artikolu 19(2)(d) tar-Regolament (KE) Nru 1008/2008, l-ajruporti jipprovdu s-servizzi meħtieġa lit-trasportaturi tal-ajru. B'mod partikolari, l-ajruport ta' Lelystad huwa adattat għall-ġestjoni tat-traffiku tal-KAT C tal-ICAO/EASA inklużi inġenji tal-ajru bħall-Boeing 737 u l-Airbus A320/321. Dan se jkun miftuħ għat-traffiku bejn is-6:00 u l-23:00. L-ajruport se jipprevedi servizzi fuq l-art u servizzi ta' mmaniġġjar tal-passiġġieri, kif isir normalment għal dan it-tip ta' ajruport.

(74)

Bl-istess mod, l-abbozz tat-TDR ma jippreġudikax b'mod inġust l-opportunitajiet kummerċjali tat-trasportaturi tal-ajru, skont l-ewwel subparagrafu tal-Artikolu 19(2)(d) tar-Regolament (KE) Nru 1008/2008. Minbarra l-fatti msemmija fil-premessa (73) ta' hawn fuq, il-Kummissjoni tinnota li kwalunkwe trasferiment lejn l-Ajruport ta' Lelystad isir fuq bażi volontarja, peress li l-abbozz tat-TDR ma jipprevedix obbligu għal dan l-effett. Is-slots irrinunzjati fl-Ajruport ta' Schiphol jistgħu jibqgħu jintużaw mill-istess trasportatur tal-ajru jew grupp ta' trasportaturi tal-ajru għal titjira lejn destinazzjoni ta' trasferiment minn dak l-ajruport, jew tabilħaqq minn trasportatur ieħor jekk jiġu rritornati lejn il-pool tas-slots. Il-fatt li l-Ajruport ta' Lelystad huwa riżervat bi prijorità għat-traffiku speċifiku ttrasferit mill-ajruport ta' Schiphol ma jistax jitqies bħala li jippreġudika b'mod inġust l-opportunitajiet kummerċjali tat-trasportaturi tal-ajru li jkun beħsiebhom jużaw l-ajruport ta' Lelystad mingħajr tali trasferiment. Din ir-restrizzjoni tinsab fin-natura ta' dan l-abbozz tat-TDR, bil-ħsieb li ttaffi r-restrizzjonijiet fuq il-kapaċità fl-ajruport ta' Schiphol permezz tat-trasferiment volontarju tat-traffiku lejn l-ajruport ta' Lelystad (20). Il-kwistjoni dwar jekk din is-sitwazzjoni hijiex kompatibbli, b'mod partikolari, mal-prinċipju tal-proporzjonalità hija vvalutata aktar 'l isfel [ara Taqsima 5.2.2 ta' din id-deċiżjoni].

(75)

Ir-rekwiżiti stabbiliti fl-Artikolu 19(2) tar-Regolament (KE) Nru 1008/2008, li għandhom x'jaqsmu mal-proporzjonalità, it-trasparenza, il-karattru oġġettiv tal-kriterji applikati kif ukoll man-nondiskriminazzjoni, jimplikaw li t-traffiku jista' jitqassam biss bejn l-ajruporti abbażi ta' għanijiet leġittimi, madankollu mingħajr ma tiġi llimitata l-għażla tal-Istati Membri fir-rigward ta' kwalunkwe għan aktar speċifiku.

(76)

Minħabba t-termini tal-Artikolu 7 tal-abbozz tad-Digriet, din id-deċiżjoni hija limitata għad-distribuzzjoni tat-traffiku fil-limiti ta' 10 000 slot ta' prijorità fl-ajruport ta' Lelystad skont l-Artikolu 2(2) u (3) tal-abbozz tad-Digriet.

(77)

L-objettiv invokat mill-awtoritajiet Netherlandiżi b'appoġġ għall-abbozz ta' miżura tagħhom jikkonsisti fit-titjib tar-rwol tal-Ajruport ta' Schiphol bħala wieħed miċ-ċentri ewlenin fl-Unjoni, f'ċirkostanzi li fihom dak l-ajruport ikun laħaq il-limitu tal-kapaċità ta' 500 000 moviment ta' titjiriet fis-sena, stabbilit permezz tal-ftehim ta' Alders [ara l-premessa 24 ta' hawn fuq]. Dan huwa wieħed minn dawk l-objettivi li jistgħu jiġu segwiti b'mod leġittimu skont l-Artikolu 19 tar-Regolament (KE) Nru 1008/2008. F'deċiżjonijiet preċedenti bbażati fuq l-Artikolu 8(1) tar-Regolament tal-Kunsill (KEE) Nru 2408/92 (21), jiġifieri Id-Deċiżjonijiet tal-Kummissjoni 95/259/KE (22), 98/710/KE (23) u 2001/163/KE (24) kif ukoll fil-Komunikazzjoni tagħha “Il-Politika Esterna tal-UE dwar l-Avjazzjoni - Nindirizzaw l-Isfidi tal-Futur”, (25) il-Kummissjoni rrikonoxxiet il-leġittimità ta' politika attiva dwar l-ippjanar tal-ajruporti, dment li tkun tikkonforma mal-prinċipji ġenerali tad-dritt tal-Unjoni. Tali politika dwar l-ippjanar tista' tqis firxa kbira ta' fatturi li jitqiesu mill-awtoritajiet kompetenti bħala li jkollhom prijorità. Il-miżuri konkreti li għandhom jittieħdu għall-implimentazzjoni tal-politika dwar l-ippjanar tal-ajruporti jistgħu jvarjaw ukoll bejn ajruporti differenti. Stat Membru jista' b'mod leġittimu jkun jixtieq li jippromwovi l-iżvilupp ta' ajruport wieħed fit-territorju tiegħu għad-detriment tal-ajruporti l-oħra li jinsabu fih. F'tali każ, l-impożizzjoni ta' restrizzjonijiet fuq l-aċċess għal dawk l-ajruporti l-oħra waħedha tista' tikkostitwixxi mezz raġonevoli biex jiġi segwit dak l-objettiv. Madankollu, il-prinċipji tal-proporzjonalità, tat-trasparenza u tan-nondiskriminazzjoni stabbiliti fl-Artikolu 19(2) tar-Regolament (KE) Nru 1008/2008 jeħtieġ li jiġu rrispettati fir-rigward tar-regoli preċiżi maħsuba biex ikomplu jiżviluppaw tali objettiv leġittimu.

(78)

Ir-regoli li tressqu mill-awtoritajiet Netherlandiżi huma maħsuba biex joħolqu l-possibbiltajiet għas-sostituzzjoni ta' ċerti titjiriet fl-ajruport ta' Schiphol permezz ta' titjiriet oħra, li jkunu adattati aħjar biex itejbu Schiphol bħala ajruport ċentrali. Għal dan il-għan, dawn jiddistingwu bejn “titjiriet ta' trasferiment” u “titjiriet minn punt għal ieħor”. Skont l-abbozz tat-TDR, destinazzjoni tiġi elenkata bħala “titjira ta' trasferiment” jekk, bħala medja, mill-inqas 10 % tal-passiġġieri li jtiru mill-Ajruport ta' Schiphol lejn dik id-destinazzjoni jkunu niżlu qabel fl-Ajruport ta' Schiphol, matul il-perjodi ta' referenza msemmija ta' ħames snin, bil-kundizzjoni li jkunu ġew operati iktar minn għaxar titjiriet fis-sena fit-tliet snin qabel il-pubblikazzjoni tal-klassifikazzjoni.

(79)

Min-naħa l-oħra, “titjiriet minn punt għal ieħor” huma kkaratterizzati minn perċentwal medju ta' trasferiment tat-titjiriet kollha mill-Ajruport ta' Schiphol lejn id-destinazzjoni li jitqies bħala inqas minn 10 % matul il-perjodu msemmi ta' ħames snin kalendarji, bil-kundizzjoni li jkunu ġew operati iktar minn għaxar titjiriet fis-sena fit-tliet snin qabel il-pubblikazzjoni tal-klassifikazzjoni.

(80)

L-Artikolu 19(2) tar-Regolament (KE) Nru 1008/2008 ma jeskludix il-ħolqien ta' tali limiti għad-distribuzzjoni tat-traffiku bejn l-ajruporti. Il-livell ta' limitu li jintgħażel biex jiġi ddeterminat jekk destinazzjoni tinvolvix għadd kritiku ta' passiġġieri fi tranżitu fl-ajruport, jista' fil-prinċipju jkun kapaċi jidderieġi t-traffiku rilevanti lejn l-ajruport rispettiv u mhux neċessarjament imur lil hinn minn dak li huwa meħtieġ għal dak il-għan.

(81)

Madankollu, sabiex jiġi żgurat li tali limiti jwasslu għal riżultati proporzjonati, skont it-tieni subparagrafu tal-Artikolu 19(2) tar-Regolament (KE) Nru 1008/2008, jeħtieġ li jkunu bbażati fuq valutazzjoni oġġettiva dwar jekk jistgħux jilħqu l-għan inkwistjoni u kif għandhom jagħmlu dan, jiġifieri f'dan il-każ li l-Ajruport ta' Schiphol jiġi ppreservat u żviluppat bħala ċentru. Għal dan il-għan, l-Istati Membri għandhom grad ta' diskrezzjoni. Minħabba li limiti differenti jistgħu jwasslu għal effetti differenti, l-Istat Membru kkonċernat għandu jeżamina bir-reqqa dawn l-effetti qabel ma jadotta limitu partikolari.

(82)

L-istudju li sar minn SEO Amsterdam Economics (26) jikkonkludi li “limiti baxxi ta' trasferiment iwasslu għal distorsjoni limitata fis-suq, filwaqt li limiti akbar iwasslu għal eżitu aktar selettiv kif ukoll aktar effettiv”. L-istudju jadotta limitu ta' 10 % bħala punt tat-tluq u jqabbel l-effetti ta' limiti alternattivi. F'każ li t-TDR jirreferu għal dan il-limitu, it-titjiriet tal-KLM ikunu jikkostitwixxu titjiriet minn punt għal ieħor sa punt sostanzjali, jiġifieri sa kważi […] movimenti tal-inġenji tal-ajru ([…] rotot) fis-sena. Limitu baxx ħafna (4 % jew inqas) ma jirriżultax f'differenza kbira għall-KLM […], filwaqt li speċjalment it-trasportaturi tat-turisti jkunu affettwati b'mod sostanzjali. Meta mqabbla ma' limitu ta' 10 % dawn jitilfu l-opportunitajiet li jiksbu prijorità fl-ajruport ta' Lelystad bil-għan li t-traffiku jitmexxa hemmhekk. B'limitu ta' 8 % jew inqas, il-KLM ikun affettwat biss moderatament meta mqabbel max-xenarju ta' 10 %, […]. F'każ li l-limitu jiġi stabbilit għal 15 %, il-KLM jaqa' taħt it-TDR b'mod ferm akbar (aktar minn […] moviment addizzjonali tal-inġenji tal-ajru), jiġifieri f'termini assoluti lil hinn mil-linji tal-ajru kollha li l-bażi tagħhom hija l-Ajruport ta' Schiphol. B'limitu ta' 15 %, madwar […] % tat-titjiriet ta' Transvia mill-Ajruport ta' Schiphol jikkwalifikaw bħala titjiriet ta' trasferiment, filwaqt li b'limitu baxx ħafna, jiġifieri 2 %, ikunu jikkwalifikaw aktar minn […] % tat-titjiriet ta' Transavia mill-ajruport ta' Schiphol, li jimplika li l-linja tal-ajru taqdi għadd relattivament kbir ta' destinazzjonijiet bi ftit destinazzjonijiet biss jagħtu lok għal titjiriet ta' trasferiment. Fir-rigward ta' kompetituri oħra, l-istudju juri li kważi […] % tat-traffiku ġġenerat mill-Easyjet fl-Ajruport ta' Schiphol jilħaq il-limitu ta' 15 %. B'limitu f'dan il-livell, Tuifly u Corendon ikollhom l-inqas opportunitajiet biex jiksbu prijorità fl-ajruport ta' Lelystad bil-għan li t-traffiku jitmexxa hemmhekk, fost it-trasportaturi kollha li jużaw l-Ajruport ta' Schiphol bħala bażi tas-servizz.

(83)

Fid-dawl ta' din l-analiżi, l-awtoritajiet Netherlandiżi kienu intitolati jikkonkludu li limitu ta' 10 % jistabbilixxi bilanċ xieraq. Għal 2 % tal-movimenti attwali fl-ajruport ta' Schiphol, dan joffri l-possibilità li t-titjiriet “minn punt għal ieħor” jiġu ttrasferiti lejn l-ajruport ta' Lelystad, b'sostituzzjoni sussegwenti fl-ajruport ta' Schiphol permezz ta' “titjiriet ta' trasferiment”. Għadd ta' trasportaturi tal-ajru se jkunu jistgħu jibbenefikaw mit-termini tiegħu b'ċertezza (27).

(84)

F'dan ir-rigward, il-limitu jista' jitqies bħala kapaċi li jilħaq l-għan stabbilit, u ma jmurx lil hinn minn dak li huwa meħtieġ għal dak l-objettiv.

(85)

Fir-rigward tal-elementi l-oħra tal-Abbozz tat-TDR, huwa mfakkar, l-ewwel nett, li kwalunkwe trasferiment ta' titjiriet mill-Ajruport ta' Schiphol lejn l-Ajruport ta' Lelystad huwa ta' natura volontarja. It-tieni, il-prijorità mogħtija lit-trasportaturi kkonċernati fl-ajruport ta' Lelystad, maħsuba biex iżżid il-possibbiltà li jseħħ tali trasferiment, hija limitata għal 10 000 slot. Estensjoni possibbli għal 25 000 slot se tiġi deċiża separatament wara evalwazzjoni u se tapplika biss b'approvazzjoni ġdida mill-Kummissjoni. It-tielet, l-Artikolu 3 tal-Abbozz tad-Digriet jiżgura li l-prijorità li tingħata b'dan il-mod tkun disponibbli biss għat-trasportaturi li jikkontribwixxu għat-titjib tal-Ajruport ta' Schiphol bħala ajruport ċentrali, l-objettiv aħħari tal-abbozz tat-TDR, jiġifieri bis-saħħa tal-konverżjoni tas-slots bil-għan li jintużaw esklussivament għat-titjiriet ta' trasferiment. Speċifikament, il-paragrafi 2 sa 4 tal-Artikolu 3 jiżguraw li t-TDR jilħqu l-objettiv tagħhom indipendentement mill-mobilità tas-slot (disponibbli skont ir-Regolament dwar is-Slots) u indipendentement mill-bidliet fl-għadd ġenerali tas-slots li jkollu t-trasportatur jew il-grupp ta' trasportaturi kkonċernati.

(86)

Il-kriterji kollha stabbiliti fl-abbozz tat-TDR huma oġġettivi u trasparenti.

(87)

L-Artikolu 19(2) tar-Regolament (KE) Nru 1008/2008 jirrikjedi li kwalunkwe regola dwar id-distribuzzjoni tat-traffiku tkun eżentata mid-diskriminazzjoni bejn id-destinazzjonijiet fl-Unjoni u mid-diskriminazzjoni għal raġunijiet ta' nazzjonalità jew identità tat-trasportaturi tal-ajru. Dawn iż-żewġ projbizzjonijiet huma espressjonijiet tal-prinċipju ġenerali ta' trattament indaqs. Skont il-ġurisprudenza konsistenti tal-Qorti Ewropea tal-Ġustizzja (28), dan il-prinċipju jirrikjedi li sitwazzjonijiet komparabbli ma jkunux ittrattati b'mod differenti u sitwazzjonijiet differenti ma jkunux ittrattati bl-istess mod sakemm tali trattament ma jkunx iġġustifikat b'mod oġġettiv.

(88)

L-abbozz tat-TDR jiddistingwi bejn “titjiriet minn punt għal ieħor” u “titjiriet ta' trasferiment” biss sa fejn jirrigwarda l-fakultà li l-movimenti jiġu ttrasferiti mill-ajruport ta' Schiphol lejn l-Ajruport ta' Lelystad, filwaqt li dan l-aħħar ajruport jibbenefika minn grad ta' prijorità. Minbarra t-“titjiriet ta' riskju” li għal raġunijiet ta' sigurtà jistgħu jiġu mmaniġġjati biss fl-Ajruport ta' Schiphol, din id-distinzjoni hija marbuta b'mod inseparabbli mal-objettiv leġittimu li jiġi kkonsolidat l-Ajruport ta' Schiphol bħala ajruport ċentrali. Kif spjegat hawn fuq, l-abbozz tat-TDR jista' jikkontribwixxi għal dan l-objettiv u ma jmurx lil hinn minn dak li huwa meħtieġ għal dawk il-finijiet, u bħala tali l-kriterji li jirriżultaw huma ta' natura oġġettiva. B'riżultat ta' dan, id-distinzjoni tista' titqies iġġustifikata oġġettivament u ma tistax titqies bħala diskriminatorja fiha nnifisha.

(89)

F'dan il-kuntest, il-Kummissjoni tinnota li l-kriterji stabbiliti mill-awtoritajiet Netherlandiżi bil-għan li ssir distinzjoni bejn iż-żewġ tipi differenti ta' destinazzjonijiet jiżguraw li d-destinazzjonijiet kollha li għandhom l-istess effett fuq l-Ajruport ta' Schiphol bħala ċentru jiġu ttrattati bl-istess mod.

(90)

Dan japplika wkoll għal destinazzjonijiet li mhumiex inklużi fl-Anness 1 tal-Abbozz tal-Ordni minħabba l-fatt li ma jilħqux il-limitu ta' 10 % ta' passiġġieri fi tranżitu abbażi tal-informazzjoni li s'issa kienet disponibbli għall-awtoritajiet Netherlandiżi. It-trasportaturi jistgħu fil-fatt jiksbu t-trattament ta' waħda jew aktar minn dawk id-destinazzjonijiet bħala destinazzjonijiet ta' trasferiment abbażi ta' data rilevanti, inklużi previżjonijiet xierqa u inkluża data li tappartjeni għal ajruporti Ewropej oħra (ara l-Artikolu 1(3) u (4) u l-Artikolu 3 tal-abbozz tal-ordni) (29). It-termini ta' dawk ir-regoli huma tali li joffru l-akbar firxa ta' possibilitajiet għat-trasportaturi biex jissostanzjaw id-dikjarazzjonijiet tagħhom f'dan ir-rigward, inkluż pereżempju permezz tal-użu ta' data dwar l-awtokonnessjoni (30), jew data li tinġabar mill-ajruport.

(91)

B'riżultat ta' dan, jista' jiġi konkluż li l-abbozz tat-TDR ma jurix diskriminazzjoni bejn id-destinazzjonijiet fl-Unjoni.

(92)

Il-kriterji ddefiniti biex issir distinzjoni bejn id-destinazzjonijiet, li huma ta' natura oġġettiva, filwaqt li jitqies l-għan segwit mill-miżura, jiżguraw li ma jkun hemm l-ebda diskriminazzjoni fuq il-bażi tan-nazzjonalità jew tal-identità tat-trasportatur tal-ajru. It-trasportaturi tal-ajru kollha huma ttrattati bl-istess mod abbażi tal-istess kriterji.

(93)

Kif spjegat fid-dettall hawn fuq, l-Artikolu 3 tal-abbozz tad-Digriet jiżgura li l-prijorità li tingħata fl-Ajruport ta' Lelystad tkun disponibbli biss għat-trasportaturi li jikkontribwixxu għat-titjib tal-Ajruport ta' Schiphol bħala ajruport ċentrali, l-objettiv aħħari tal-abbozz tat-TDR, jiġifieri bis-saħħa tal-konverżjoni ta' slots bil-għan li jintużaw esklussivament għat-titjiriet ta' trasferiment.

(94)

Skont l-Artikolu 19(1) tar-Regolament (KE) Nru 1008/2008, l-eżerċitar tad-drittijiet tat-traffiku huwa soġġett għar-regoli applikabbli tal-Unjoni, b'mod partikolari, relatati mal-allokazzjoni tas-slots. Din il-kwistjoni bħalissa hija indirizzata fir-Regolament dwar is-Slots.

(95)

Skont l-awtoritajiet Netherlandiżi, l-analiżi li twettqet skont l-Artikolu 3 tar-Regolament dwar is-Slots turi li se jkun hemm nuqqas fil-kapaċità f'Lelystad mill-mument tal-operazzjonijiet kummerċjali stabbiliti f'dak l-ajruport. Konsegwentement, dan se jintgħażel bħala ajruport ikkoordinat skont dik id-dispożizzjoni.

(96)

L-allokazzjoni tas-slots f'ajruporti kkoordinati għandha tkun konformi mad-dispożizzjonijiet l-oħra ta' dak ir-Regolament, b'mod partikolari l-Artikoli 8 sa 10 tiegħu.

(97)

L-Artikolu 2(2) tal-abbozz tad-Digriet jispeċifika li l-prijorità prevista fih hija “mingħajr preġudizzju għar-Regolament dwar is-Slots”. B'riżultat ta' dan, kif spjegat fin-nota ta' spjegazzjoni tal-Abbozz tad-Digriet, dan se japplika biss fil-każ ta' talbiet li jibqgħu konfliġġenti wara l-applikazzjoni tal-kriterji applikabbli b'mod ġenerali stabbiliti f'dak ir-Regolament.

(98)

F'dan ir-rigward, issir referenza għall-Artikolu 10(6) tar-Regolament dwar is-Slots. Skont dik id-dispożizzjoni, il-prijorità stabbilita hemmhekk favur parteċipanti ġodda f'ajruport ikkoordinat hija “mingħajr preġudizzju għall-Artikolu 8(1) tar-Regolament (KEE) Nru 2408/92”. L-Artikolu 8(1) tar-Regolament (KEE) Nru 2408/92 ġie sostitwit bl-Artikolu 19(2) tar-Regolament (KE) Nru 1008/2008, li huwa l-bażi ġuridika attwali għall-istabbiliment (u l-valutazzjoni tal-Kummissjoni) tar-regoli dwar id-distribuzzjoni tat-traffiku. B'riżultat ta' dan, il-prijorità tista' tiġi adattata fil-kuntest tad-distribuzzjoni tat-traffiku stabbilita skont l-Artikolu 19(2) tar-Regolament (KE) Nru 1008/2008, dment li tali adattament ikun limitat għal dak li huwa strettament meħtieġ sabiex jintlaħaq l-objettiv tar-regoli inkwistjoni dwar id-distribuzzjoni tat-traffiku.

(99)

F'dan il-każ, ir-regola ta' prijorità stipulata fl-Artikolu 2(2) tal-abbozz tad-Digriet tibda tapplika biss wara li jkunu ġew applikati l-kriterji ta' prijorità tar-Regolament dwar is-Slots, u hija limitata għas-slots li s'issa huma koperti mir-regoli, li jikkorrispondu għal 10 000 moviment (31). Dan l-adattament tal-prijorità ma jmurx lil hinn minn dak li huwa meħtieġ biex jintlaħaq l-objettiv tal-abbozz tat-TDR u huwa għalhekk kompatibbli mar-Regolament dwar is-Slots.

(100)

Bl-istess mod, ir-regola stipulata fl-Artikolu 3 tal-abbozz tad-Digriet li bih l-islots li kienu soġġetti għall-Artikolu 2(2) fl-Ajruport ta' Schiphol jistgħu jintużaw biss għal titjiriet ta' trasferiment hija inerenti fid-distribuzzjoni tat-traffiku u tabilħaqq karatteristika tipika ta' kwalunkwe tali distribuzzjoni. Għalhekk għandha titqies kompatibbli bl-istess mod mar-Regolament dwar is-Slots.

(101)

Il-Kummissjoni tinnota li l-uniku għan tal-valutazzjoni li għandha ssir skont l-Artikolu 19 tar-Regolament (KE) Nru 1008/2008 huwa r-regola nazzjonali li “tirregola d-distribuzzjoni tat-traffiku tal-ajru” [l-ewwel subparagrafu tal-Artikolu 19(3)]. Fir-rigward tal-konformità mal-paragrafu 1 ta' dak l-Artikolu, il-fatt li l-Ajruport ta' Lelystad se jiftaħ għall-operazzjonijiet kummerċjali f'xi żmien partikolari, kif ukoll id-daqs ta' dan il-ftuħ f'termini ta' operazzjonijiet possibbli, huma l-kundizzjonijiet meħtieġa għal dik id-distribuzzjoni tat-traffiku. Dawn l-elementi ma jiffurmawx parti mid-distribuzzjoni nnifisha. It-termini tad-distribuzzjoni tat-traffiku stess ma jista' jkollhom l-ebda inċidenza negattiva fuq il-konformità mar-regoli tal-Unjoni dwar is-“sikurezza”, is-“sigurtà” u l-“protezzjoni tal-ambjent” kif imsemmija fl-Artikolu 19(1) tar-Regolament (KE) Nru 1008/2008. B'riżultat ta' dan, ma jirriżulta l-ebda tħassib dwar l-inkompatibbiltà ma' din id-dispożizzjoni fir-rigward ta' dawk l-elementi.

(102)

Bħala konklużjoni, abbażi ta' valutazzjoni tal-fatti u s-suppożizzjonijiet li jinsabu fin-notifika tal-awtoritajiet Netherlandiżi, il-Kummissjoni tqis li r-regoli maħsuba dwar id-distribuzzjoni tat-traffiku huma kompatibbli mal-Artikolu 19 tar-Regolament (KE) Nru 1008/2008.