4.9.2015   

MT

Il-Ġurnal Uffiċjali tal-Unjoni Ewropea

L 232/1

(1)

Permezz ta’ ittra datata t-12 ta’ April 2010, għal raġunijiet ta’ ċertezza legali, il-Ġermanja nnotifikat lill-Kummissjoni b’injezzjonijiet ippjanati ta’ kapital f’Mitteldeutsche Flughafen AG (“MFAG”) u fi Flughafen Leipzig/Halle GmbH (“FLH”). Il-Ġermanja għarrfet ukoll lill-Kummissjoni li l-injezzjonijiet ta’ kapital notifikati huma soġġetti għall-approvazzjoni tagħha. Sadanittant, il-finanzjament tal-proġett se jsir permezz ta’ self mill-azzjonisti, li allegatament ingħata skont termini tas-suq.

(2)

Permezz ta’ ittri datati l-10 ta’ Ġunju 2010, is-26 ta’ Novembru 2010 u t-3 ta’ Marzu 2011, il-Kummissjoni talbet aktar informazzjoni dwar il-miżuri notifikati (inklużi l-kundizzjonijiet tas-self mill-azzjonisti). Fid-29 ta’ Settembru 2010, fl-4 ta’ Jannar 2011 u fis-26 ta’ April 2011 il-Ġermanja ppreżentat informazzjoni addizzjonali.

(3)

Permezz ta’ ittra datata l-15 ta’ Ġunju 2011, il-Kummissjoni għarrfet lill-Ġermanja bid-deċiżjoni tagħha li tibda l-proċedura prevista fl-Artikolu 108(2) tat-Trattat (“deċiżjoni tal-ftuħ”) fir-rigward tas-self mill-azzjonist u l-injezzjonijiet ta’ kapital favur l-FLG. Il-Ġermanja tat il-kummenti tagħha dwar id-deċiżjoni tal-ftuħ nhar il-15 ta’ Awwissu 2011.

(4)

Id-deċiżjoni tal-ftuħ tal-Kummissjoni ġiet ippubblikata f’Il-Ġurnal Uffiċjali tal-Unjoni Ewropea. (3) Il-Kummissjoni stiednet lill-partijiet interessati sabiex jgħaddu l-kummenti tagħhom dwar il-miżura inkwistjoni fi żmien xahar mid-data tal-pubblikazzjoni.

(5)

Il-Kummissjoni rċeviet ukoll kummenti dwar is-suġġett mingħand 34 parti interessata. Għaddiet dawn il-kummenti lill-Ġermanja fil-21 ta’ Novembru 2011. Il-Ġermanja ngħatat l-opportunità li twieġeb għal dawn il-kummenti fi żmien xahar. Il-Kummissjoni rċeviet l-osservazzjonijiet tal-Ġermanja fl-20 ta’ Diċembru 2011.

(6)

Fl-14 ta’ Marzu 2012, il-Kummissjoni bagħtet talba għal informazzjoni. Fis-26 ta’ April 2012, il-Kummissjoni rċeviet it-tweġiba mingħand il-Ġermanja.

(7)

Fil-15 ta’ Mejju 2012, fl-20 ta’ Lulju 2012 u fil-21 ta’ Diċembru 2012 il-Kummissjoni talbet aktar informazzjoni. Il-Ġermanja wieġbet permezz ta’ ittri datati t-28 ta’ Ġunju 2012, l-10 ta’ Settembru 2012, u l-15 ta’ Jannar 2013.

(8)

Fil-31 ta’ Marzu 2014, il-Kummissjoni adottat il-Linji Gwida tal-Avjazzjoni tal-2014 (4) li”jissostitwixxu l-Linji Gwida tal-Avjazzjoni tal-1994 (5) u tal-2005. (6). Fil-15 ta’ April 2014 ġie ppubblikat avviż f’Il-Ġurnal Uffiċjali tal-Unjoni Ewropea li stieden lill-Istati Membri u lill-partijiet interessati biex jippreżentaw kummenti dwar l-applikazzjoni tal-Linji Gwida tal-Avjazzjoni tal-2014, f’dan il-każ fi żmien xahar mid-data tal-pubblikazzjoni tal-Linji Gwida. (7)

(9)

Fl-14 ta’ April 2014 il-Kummissjoni talbet aktar informazzjoni dwar l-applikazzjoni tal-prinċipji komuni għall-valutazzjoni tal-kompatibbiltà tal-għajnuna fid-dawl tal-Linji Gwida tal-Avjazzjoni tal-2014. Il-Ġermanja wieġbet permezz ta’ ittra datata d-19 ta’ Mejju 2014, is-26 ta’ Mejju 2014, l-10 ta’ Lulju 2014 u l-11 ta’ Lulju 2014.

(10)

Permezz ta’ ittra datata s-17 ta’ Lulju 2014, il-Ġermanja qablet li din id-Deċiżjoni tiġi adottata u notifikata bl-Ingliż.

(11)

L-ajruport ta’ Leipzig/Halle jinsab fl-Istat Ħieles ta’ Sassonja fil-Ġermanja Ċentrali. L-ajruport huwa operat mill-FLH (8), li hija sussidjarja tal-MFAG (9). L-MFAG hija kumpanija azzjonarja b’tliet sussidjarji (l-FLH, l-Ajruport ta’ Dresden GmbH u PortGround GmbH).

(12)

Wara r-riunifikazzjoni tal-Ġermanja, twaqqaf pjan regolatorju għall-iżvilupp tal-ajruport. Dan il-pjan ippreveda l-bini ta’ sistema b’żewġ runways fil-ġejjieni. Fl-1997, ġiet approvata l-bini tar-runway tat-tramuntana. Fl-2004, l-azzjonisti ddeċidew li jiffinanzjaw il-bini tar-runway tan-nofsinhar. (10)

(13)

Wara li fl-2007 bdiet l-operazzjoni tar-runway tan-Nofsinhar, id-DHL Express irrilokat l-attivitajiet ċentrali Ewropej tagħha minn Brussell għal Leipzig. Minbarra d-DHL Express, Leipzig Halle jintuża wkoll minn Lufthansa Cargo u minn linji tal-ajru oħra li jittrasportaw il-merkanzija bl-ajru. B’riżultat ta’ dan, fl-2011 l-ajruport ta’ Leipzig/Halle sar it-tieni l-akbar ajruport li jittrasporta l-merkanzija bl-ajru (wara l-ajruport ta’ Frankfurt/Main) fil-Ġermanja. It-Tabella 1 tiġbor fil-qosor l-iżvilupp tat-trasport tal-passiġġieri u tal-merkanzija bl-ajru sa mill-2006.

Tabella 1

L-iżvilupp tat-trasport tal-passiġġieri u tal-merkanzija bl-ajru fl-ajruport ta’ Leipzig/Halle mill-2006 – 2013

(14)

L-għan tas-self mill-azzjonisti u tal-injezzjonijiet ta’ kapital huwa l-finanzjament tal-infrastruttura u tal-miżuri relatati mal-infrastruttura mqassra fit-Tabella 2 u jammontaw għal EUR 255,6 miljun.

Tabella 2

Ħarsa ġenerali lejn il-programm ta’ investiment fl-infrastruttura fl-ajruport ta’ Leipzig/Halle

(15)

M1 – Miżuri estensivi għat-tnaqqis tal-istorbju (inklużi l-akkwist ta’ art, rilokazzjoni, ippjanar li jakkumpanja l-konservazzjoni tal-pajsaġġ: skont id-deċiżjoni ta’ approvazzjoni tal-pjan għar-runway tan-Nofsinhar u għar-rampi tal-ajruport (11), l-ajruport ta’ Leipzig/Halle jrid jimplimenta miżuri għat-tnaqqis tal-istorbju fiż-żona ta’ protezzjoni għal matul il-lejl. Din iż-żona ta’ protezzjoni għal matul il-lejl suppost kellha tkopri żona ta’ madwar 211-il km2 b’madwar 6 000 dar residenzjali. Wara l-ewwel kalkolu ġdid taż-żona ta’ protezzjoni għal matul il-lejl li sar fl-aħħar ta’ Frar 2009, iż-żona inizjali ta’ protezzjoni kellha tiġi estiża b’madwar 4 000 dar residenzjali oħra.

(16)

M2 - Struttura għall-ittestjar tal-magni: bejn l-2007 u l-2008 inbniet struttura ġdida għall-ittestjar tal-magni fl-ajruport ta’ Leipzig/Halle. L-ajruport ta’ Leipzig/Halle jopera 24 siegħa kuljum, u għalhekk għandu joffri faċilitajiet biex isiru testijiet fuq il-magni tal-ajruplani kemm binhar kif ukoll matul il-lejl. L-istruttura għall-ittestjar tal-magni twaqqfet bħala struttura magħluqa biex jiġu limitati l-emissjonijiet akustiċi.

(17)

M3 – It-taxiway u l-pont li jaqsam ‘E7’: biex jittaffa l-piż fuq it-taxiways u fuq il-pontijiet li jaqsmu eżistenti u biex tiġi pprovduta alternattiva fil-każ ta’ inċidenti jew ħsarat, inbnew it-taxiway u l-pont li jaqsam ‘E7’ fin-naħa tal-lvant tal-ajruport. Għal raġunijiet tekniċi, dan il-proġett ta’ infrastruttura inqasam fi tliet proġetti sekondarji: il-pont li jaqsam (12), it-taxiway u t-tagħmir tekniku (dwal). Ix-xogħlijiet fuq il-proġett bdew fl-2008.

(18)

M4 – Estensjoni tar-runway tat-Tramuntana għat-tlugħ u għall-illandjar (spejjeż tal-ippjanar) mit-3 600 metru attwali tagħha għal 3 800 metru: l-għan tal-estensjoni tar-runway tat-Tramuntana huwa li jiġi żgurat li inġenji tal-ajru tal-merkanzija b’piż massimu waqt it-tlugħ (“MTOW”) ikunu jistgħu jitilqu mingħajr ebda restrizzjoni ta’ tagħbija. L-ippjanar ta’ dan il-proġett ta’ infrastruttura beda fl-2008.

(19)

M5 – Ikklerjar tas-sit bi tħejjija għall-bini tat-taxiway ‘Victor’, stazzjon ġdid għat-tifi tan-nar, il-ħangar I b’għanijiet multipli: l-istazzjon għat-tifi tan-nar u l-ħangar b’għanijiet multipli se jkollhom jitwaqqgħu u jinbnew mill-ġdid. Ix-xogħlijiet għall-bini mill-ġdid tal-ħangar I b’għanijiet multipli u fuq l-istazzjon għat-tifi tan-nar bdew f’Mejju 2009. Il-ħangar il-ġdid b’għanijiet multipli se jintuża għat-tagħmir għal servizzi li jingħataw fix-xitwa. Ix-xogħlijiet se jinkludu wkoll il-bini ta’ faċilità tat-taħriġ għat-taqsima tat-tifi tan-nar.

(20)

M6 – Taxiway parallela ‘Victor’: skont in-notifika, il-bini tat-taxiway ‘Victor’ bejn żewġ taxiways eżistenti hija essenzjali biex tkopri ż-żieda ulterjuri tal-kapaċitajiet fl-ajruport ta’ Leipzig/Halle u biex tkopri l-kapaċitajiet fin-naħa tal-Lbiċ tal-ajruport fl-eqqel ħinijiet u fil-każ ta’ kundizzjonijiet klimatiċi mil-Lvant.

(21)

M7 - Żoni addizzjonali għat-tneħħija tas-silġ: iż-żoni addizzjonali għat-tneħħija tas-silġ huma meħtieġa biex jiġi żgurat li t-tneħħija tas-silġ minn fuq l-inġenji tal-ajru ssir mingħajr xkiel u biex jiġi evitat dewmien minħabba infrastruttura inadegwata.

(22)

M8 – Ħeliport: fl-2008-2009, fl-ajruport ta’ Leipzig/Halle nħoloq spazju ta’ parkeġġ għall-ħelikopters billi ġiet adattata u mmarkata l-istruttura tas-superfiċje; jintuża bħala bażi għal operazzjonijiet ta’ salvataġġ u ta’ emerġenza bl-ajru.

(23)

M9.1 - Bini mill-ġdid tal-Punt ta’ Kontroll I: il-punt ta’ kontroll I irid jerġa’ jinbena sabiex ikun konformi mar-Regolament (KE) Nru 2320/2002 tal-Parlament Ewropew u tal-Kunsill (13). Dan se jkun il-bażi għall-attivitajiet kollha ta’ organizzazzjoni marbutin mas-sigurtà tal-ajruport (immaniġġjar tad-dritt ta’ passaġġ u taċ-ċwievet, taħriġ fis-sigurtà, kompiti maniġerjali), kontrolli (pereżempju tal-persuni u tal-merkanzija), u servizzi ta’ sigurtà (pereżempju servizzi għall-viżitaturi, VIP).

(24)

M9.2 - Bini funzjonali tas-sigurtà: bini ġdid tas-sigurtà se jintuża mill-pulizija federali, mill-pulizija reġjonali, mid-dwana u mis-Servizz Meteoroloġiku Ġermaniż.

(25)

M9.3 - Akkwist ta’ tagħmir tekniku: sabiex jadatta għall-infrastruttura l-ġdida, l-ajruport ta’ Leipzig/Halle għandu wkoll jakkwista tagħmir addizzjonali għal servizzi li jingħataw fix-xitwa u tagħmir addizzjonali għat-tifi tan-nar. Iċ-ċint tal-perimetru tal-ajruport se jkollu jiġi rikonfigurat b’detetturi u b’tagħmir diġitali ta’ sorveljanza bil-vidjo b’detezzjoni intelliġenti tal-moviment ukoll.

(26)

M9.4 - Farm għall-annimali: il-proġett jittratta t-twaqqif ta’ bini separat fl-ajruport għall-esportazzjoni/importazzjoni ta’ annimali minn pajjiżi terzi li se jkun fih installazzjonijiet veterinarji.

(27)

M10 - Tnaqqis addizzjonali tal-istorbju: fid-dawl tat-tkabbir previst speċjalment fit-traffiku tat-trasport tal-merkanzija bl-ajru fl-ajruport ta’ Leipzig/Halle, hekk kif l-ajruport jespandi huwa mistenni li fuq terminu medju jkun hemm il-ħtieġa ta’ miżuri ulterjuri għat-tnaqqis tal-istorbju (u xogħlijiet relatati).

(28)

M11 – Fażi 1 tal-iżvilupp tal-land side taż-żona tax-Xlokk: sal-2010 iż-żoni li jmissu man-naħa tal-Lvant tal-impjanti eżistenti tal-land side (il-ħangar u l-bini operattiv) fl-ajruport ta’ Leipzig/Halle se jitgħammru kompletament bl-elettriku u bi provvista tal-ilma, b’impjanti tal-ilma mormi u l-iskular tal-ilma tax-xita; ix-xogħlijiet bdew fl-2008. Ladarba r-roundabout eżistenti fit-terminal għat-trasbord tal-merkanzija bl-ajru titqabbad man-netwerk tat-toroq pubbliċi, se jkollhom jittieħdu miżuri addizzjonali għat-tnaqqis tal-istorbju.

(29)

M12 – Proċedura ta’ approvazzjoni tal-pjan għall-estensjoni tan-Nofsinhar: il-mira hi li fit-tul jiġu estiżi r-runway tan-Nofsinhar (3 600 metru) u r-rampa fl-ajruport ta’ Leipzig/Halle. Dan se jeħtieġ proċess ta’ approvazzjoni tal-pjan.

(30)

M13 – Espansjoni tar-rampa tat-Tramuntana: sal-2020 hemm il-pjan li jinbnew tnax-il stand addizzjonali. L-iżvilupp ta’ faċilitajiet tat-terminals fit-Tramuntana tal-ajruport se jagħmilha possibbli li tinkiseb distribuzzjoni aktar uniformi tal-movimenti tal-ajruplani bejn iż-żewġ runways.

(31)

M14 - Espansjoni tar-rampa tal-Lvant: il-fruntiera tar-rampa tal-Lvant se titmexxa lejn in-Nofsinhar sabiex jiġi żgurat li jkun hemm iż-żoni mingħajr ostakli meħtieġa għall-operazzjonijiet tar-runway. Ir-rampa tal-ajruport trid titqabbad ukoll mas-sistema tat-taxiway u mal-punti għat-tneħħija tas-silġ.

(32)

M15 - Adattament tal-infrastruttura: il-faċilitajiet tat-terminal fiż-żona tat-Tramuntana għandhom jiġu adattati biex jieħdu inkonsiderazzjoni r-rampa l-ġdida mibnija fiż-żona tat-tramuntana u l-funzjonijiet marbuta mal-merkanzija jiġu rrilokati lejn dik iż-żona. Għal dan il-għan, il-ħangar u l-funzjonijiet anċillari neċessarji għandhom jiġu addattati għal inġenji tal-ajru tal-kategorija F.

(33)

M16.1 - Estensjoni tal-ħangar fiż-żona tat-Tramuntana: din tinvolvi l-bini ta’ rampa ġdida fiż-żona tat-tramuntana fosthom ir-rilokazzjoni tal-funzjonijiet relatati mal-merkanzija lejn dik iż-żona u l-provvediment ta’ stands ta’ manutenzjoni.

(34)

M16.2 - Bini ta’ terminal ġdid tal-avjazzjoni u ħangar għall-ajruplani żgħar: se jkollu jinbena terminal ġdid tal-avjazzjoni u ħangar għall-inġenji żgħar tal-ajru. It-terminal tal-avjazzjoni preċedenti twaqqa’ meta nbniet ir-runway il-ġdida tan-Nofsinhar.

(35)

Id-deċiżjoni tal-ftuħ investigat dawn il-miżuri li ffinazjaw il-proġett ta’ investiment (jiġifieri l-infrastruttura u l-miżuri relatati mal-infrastruttura) fl-ajruport ta’ Leipzig/Halle:

(36)

Fir-rigward tal-miżuri infrastrutturali notifikati, il-Kummissjoni qajmet dubji dwar jekk dawn tabilħaqq jistgħux jitqiesu li jaqgħu taħt il-mandat tal-ordni pubblika u, għalhekk, kemm verament il-finanzjament tagħhom ma jikkostitwixxix għajnuna mill-Istat.

(37)

Il-Kummissjoni kkonkludiet li s-self mill-azzjonisti lill-MFAG u l-injezzjonijiet ta’ kapital fl-MFAG ma jikkostitwixxux għajnuna mill-Istat peress li t-tnejn huma maħsuba li jiġu trasferiti lill-FLH. L-MFAG tista’ titqies biss bħala veikolu għat-trasferiment ta’ fondi lill-FLH u, għalhekk, mhux bħala benefiċjarja tal-għajnuna nnifisha.

(38)

L-infrastruttura u l-proġetti relatati mal-infrastruttura ġew iffinanzjati l-ewwel permezz ta’ self mill-azzjonisti, li se jiġi konvertit f’kapital biss wara li dawn il-miżuri jiġu awtorizzati mill-Kummissjoni. Bejn l-2006 u l-2011 (14) l-ammont totali ta’ self mill-azzjonisti mogħti lill-FLH kien jammonta għal EUR […] miljun.

(39)

Il-kundizzjonijiet tas-self mill-azzjonisti fl-2006-2008 kienu determinati abbażi ta’ ftehim ta’ self bejn Sachsen LB u l-MFAG. Ir-rata bażi ta’ self hija l-EURIBOR tat-3-xhur flimkien ma’ marġni ta’ riskju ta’ […] punti bażi. Għas-sena 2009, ir-rata bażi ta’ self hija l-EURIBOR tat-3-xhur flimkien ma’ marġni ta’ riskju ta’ […] punti bażi. Għas-sena 2010 ir-rata bażi ta’ self hija l-EURIBOR tat-3-xhur flimkien ma’ marġni ta’ riskju ta’ […] punti bażi.

(40)

Fir-rigward tan-natura tal-għajnuna tas-self mill-azzjonisti favur l-FLH, il-Kummissjoni esprimiet dubji dwar jekk is-self min-naħa tal-azzjonisti tal-FLH kienx ingħata skont kundizzjonijiet li normalment setgħu jinkisbu fis-suq. B’mod partikulari fir-rigward tal-ftehimiet ta’ self komparabbli, il-Kummissjoni esprimiet dubji dwar jekk il-proposti indikattivi preżentati permezz ta’ ittra elettronika mingħajr l-intenzjoni li jsiru ftehimiet legalment vinkolanti ta’ self u mingħajr il-valutazzjoni sottostanti tal-probabbiltà ta’ inadempjenza u ta’ kollateralizzazzjoni jistgħux jitqiesu bħala valur referenzjarju affidabbli tas-suq.

(41)

Fin-nuqqas ta’ valur referenzjarju tas-suq, il-Kummissjoni bbażat il-valutazzjoni tagħha fuq l-indikatur stabbilit fil-Komunikazzjoni dwar ir-Rata Referenzjali tal-2008 (15). Fin-nuqqas ta’ klassifikazzjoni tal-FLH u l-kollaterali sottostanti, il-kundizzjonijiet tas-self mill-azzjonisti tal-FLH dehru aktar favorevoli mill-indikatur stabbilit mill-Kummissjoni għar-rata tas-suq fl-applikazzjoni tal-Komunikazzjoni dwar ir-Rata Referenzjali tal-2008.

(42)

L-element ta’ għajnuna possibbli jammonta għad-differenza bejn ir-rata tal-imgħax tas-suq u r-rata tal-imgħax attwali.

(43)

L-injezzjonijiet ta’ kapital fl-FLH, li l-għan tagħhom kien li jiffinanzjaw l-infrastruttura u l-miżuri relatati mal-infrastruttura (ara t-Tabella 2), huma soġġetti għall-approvazzjoni tal-Kummissjoni. Konsegwentement, huwa previst li s-self mill-azzjonisti tal-FLH jiġi konvertit f’ekwità biss wara l-awtorizzazzjoni tal-għajnuna.

(44)

L-ammont totali ta’ finanzjament immirat lejn ir-rimborż tal-ispejjeż tal-infrastruttura u tal-proġetti relatati mal-infrastruttura jammonta għal EUR 255,6 miljun. Total ta’ EUR 240,3 miljun għandu jiġi depożitat fil-fond ta’ riżerva ta’ kapital tal-MFAG u allokat sabiex jgħaddi lill-FLH sabiex tiżdied l-ekwità tagħha (jiġifieri r-riżerva ta’ kapital propja). Min-naħa tagħhom l-azzjonisti tal-FLH se jinjettaw l-ammont li jifdal direttament fil-fond ta’ riżerva ta’ kapital tal-FLH.

(45)

Skont il-Ġermanja, l-injezzjonijiet ta’ kapital se jsiru mingħajr ebda pjan sottostanti ta’ direzzjoni tan-negozju u prospetti għal profittabilità fit-tul.

(46)

Għalkemm uħud mill-proġetti ta’ infrastruttura li se jiġu ffinanzjati mill-injezzjonijiet ta’ kapital ippjanati diġà bdew, qabel ma bdew il-proġetti, f’kull każ l-azzjonist pubbliku ħabbar l-intenzjoni tiegħu li jiffinanzja dawk il-miżuri qabel ma jinbeda x-xogħol. L-injezzjonijiet ta’ kapital infushom għadhom ma sarux.

(47)

Fir-rigward tan-natura tal-għajnuna tal-injezzjonijiet ta’ kapital, il-Kummissjoni esprimiet dubji dwar jekk, fin-nuqqas ta’ xi aspettattiva fit-tul ta’ profittabilità, l-azzjonisti tal-FLH aġixxewx bħala operatur tal-ekonomija tas-suq. Għalhekk, il-Kummissjoni kellha dubji dwar jekk l-injezzjonijiet ta’ kapital jistgħux jitqiesu li ma jikkostitwixxux għajnuna mill-Istat.

(48)

Peress li s-self mill-azzjonisti tal-FLH u l-injezzjonijiet sussegwenti ta’ kapital jistgħu jikkostitwixxu għajnuna mill-Istat, il-Kummissjoni kellha teżamina jekk din l-għajnuna setgħetx tinstab li hija kompatibbli mas-suq intern abbażi tal-Artikolu 107(3)(c) tat-Trattat. F’dan ir-rigward, il-Linji Gwida tal-Avjazzjoni tal-2005 taw sommarju tal-prinċipji komuni għall-valutazzjoni tal-kompatibbiltà tal-għajnuna għall-finanzjament ta’ infrastruttura ta’ ajruport skont l-Artikolu 107(3)(c) tat-Trattat.

(49)

Fid-deċiżjoni tal-ftuħ, il-Kummissjoni kkonkludiet li f’dan il-każ huma sodisfatti ċerti kriterji stabbiliti fil-Linji Gwida tal-Avjazzjoni tal-2005. F’dan ir-rigward, il-Kummissjoni kkonkludiet li l-għajnuna sservi għan definit b’mod ċar ta’ interess komuni, b’mod partikolari peress li żżid il-konnettività tar-reġjun għas-servizzi tal-merkanzija u tħalli impatt pożittiv fuq l-iżvilupp lokali. Wara li kkunsidrat il-prospetti pożittivi dwar l-iżvilupp tal-ajruport, il-Kummissjoni kkonkludiet li fuq terminu medju l-ajruport għandu prospetti tajbin għall-użu, u li l-programm ta’ infrastruttura huwa neċessarju.

(50)

Madankollu, fid-deċiżjoni tal-ftuħ il-Kummissjoni esprimiet dubji dwar jekk il-miżuri infrastrutturali inkwistjoni humiex proporzjonati għall-għan stabbilit. Barra minn hekk, il-Kummissjoni esprimiet tħassib li mhux l-utenti kollha għandhom aċċess ugwali u mhux diskriminatorju għall-ajruport. Il-Kummissjoni qalet ukoll li, peress li l-FLH, bħala ajruport speċjalizzat fil-merkanzija, huwa f’kompetizzjoni ma’ ajruporti fi Stati Membri oħra, f’dan l-istadju ma tistax tikkonkludi li l-iżvilupp tal-kummerċ ma jiġix affettwat tant li jkun kontra l-interess komuni. Barra minn hekk, il-Kummissjoni kellha wkoll dubji dwar il-ħtieġa u l-proporzjonalità tal-għajnuna.

(51)

Konsegwentement, il-Kummissjoni esprimiet id-dubji tagħha dwar jekk il-finanzjament tal-miżuri notifikati jistgħux jitqiesu kompatibbli mas-suq intern skont l-Artikolu 107(3) tat-Trattat.

(52)

Il-Ġermanja bdiet il-kummenti tagħha b’aktar kjarifiki dwar il-kuntest tal-miżuri investigati. F’dan il-kuntest, il-Ġermanja affermat li t-Trattat tar-Riunifikazzjoni tal-1990 diġà kien ippreveda l-iżvilupp ulterjuri tal-ajruport ta’ Leipzig/Halle. Skont il-Ġermanja, kien twaqqaf pjan direttur għall-iżvilupp tal-ajruport u kien ġie deċiż li tiġi żviluppata sistema ta’ żewġ runways paralleli. Il-Ġermanja kompliet tispjega li l-bini tar-runway tat-Tramuntana kien approvat fl-1997 u bdiet topera fl-2000, filwaqt li l-bini tar-runway tan-Nofsinhar kien approvat fl-2004 u bdiet topera fl-2007.

(53)

F’dan l-isfond, il-Ġermanja affermat li minħabba s-sistema ta’ runways paralleli tagħha u r-rilokazzjoni ta’ diversi operaturi kbar tal-merkanzija bl-ajru, l-ajruport ta’ Leipzig/Halle seta’ jippożizzjona lilu nnifsu bħala t-tieni l-akbar ċentru tat-trasport tal-merkanzija bl-ajru fil-Ġermanja. F’dan il-kuntest, il-Ġermanja ddikjarat li mill-2010 l-ajruport kien kapaċi jafferma postu bħala wieħed mill-aktar ċentri importanti tat-trasbord tal-merkanzija bl-ajru fl-Ewropa. Il-Ġermanja żiedet ukoll li bħalissa hemm 133 kumpanija preżenti fl-ajruport, li fl-2010 kienu jħaddmu total ta’ 5 106 persuni (żieda ta’ 14,4 % meta mqabbla mal-2009).

(54)

Għalhekk, fil-fehma tal-Ġermanja, l-ajruport jixpruna l-iżvilupp ekonomiku fir-reġjun u għandu rwol importanti għall-impjiegi reġjonali. Il-Ġermanja saħqet li dan huwa kkonfermat ukoll minn żieda fid-dħul u fil-volumi ta’ merkanzija mmaniġġjata fl-ajruport: fil-perjodu bejn l-2005 u l-2009 id-dħul iġġenerat mill-FLH żdied minn EUR 47 miljun għal EUR 80 miljun. Fir-rigward tal-volumi ta’ merkanzija, il-Ġermanja qalet li meta mqabbel ma’ ajruporti oħra, Leipzig/Halle qed jirreġistra rati kostanti ta’ tkabbir (filwaqt li fl-2007 ġew ipproċessati 101 364 tunnellata ta’ merkanzija, fl-2008 din il-figura telgħet għal 442 453 tunnellata, 524 084 tunnellata fl-2009 u 663 059 tunnellata fl-2010). Sabiex issostni d-dikjarazzjoni tagħha, il-Ġermanja indikat li l-volum tat-trasport tal-merkanzija bl-ajru żdied bi 18,5 % fl-2009 u b’26,5 % fl-2010. Skont il-Ġermanja, hija mistennija żieda ulterjuri fil-volum tal-merkanzija. F’dan ir-rigward il-Ġermanja ċċarat li huwa mistenni li sal-2020 tiġi mmaniġġjata madwar 820 000 tunnellata ta’ merkanzija bl-ajru. (16) Madankollu, il-Ġermanja sostniet li, sal-2015 din il-previżjoni tkun diġà ntlaħqet (17).

(55)

Barra minn hekk, il-Ġermanja qalet li fl-aħħar snin l-ajruport kien ra żieda gradwali fl-għadd ta’ passiġġieri (minn 1 988 854 passiġġier fl-2002 għal 2 723 748 passiġġier fl-2007). Għad li, skont il-Ġermanja, kien hemm tnaqqis fit-traffiku tal-passiġġieri mill-2007 (2 352 827 passiġġier biss fl-2010), fuq perjodu medju/fit-tul, il-Ġermanja qed tistenna li sal-2020 it-traffiku tal-passiġġieri jitla’ għal 4,6 miljun passiġġier.

(56)

Il-Ġermanja qalet li għall-kuntrarju ta’ ħafna ajruporti oħra tal-Unjoni, bħat-tliet ajruporti ewlenin tal-merkanzija fil-Ġermanja, Frankfurt/Main, Cologne-Bonn u Munich, l-ajruport ta’ Leipzig/Halle għandu permess għal titjiriet billejl mingħajr ebda restrizzjoni għat-traffiku tal-merkanzija kummerċjali bl-ajru. Skont il-Ġermanja, din kienet waħda mir-raġunijiet għaliex l-ajruport għandu prospetti tajbin għall-ġejjieni. Il-Ġermanja osservat ukoll li permezz ta’ sentenza tal-4 ta’ April 2012, il-Qorti Federali Amministrattiva Ġermaniża (Bundesverwaltungsgericht) ikkonfermat il-projbizzjoni ta’ titjiriet billejl fl-ajruport ta’ Frankfurt/Main, l-akbar ċentru Ġermaniż tat-trasport tal-merkanzija bl-ajru. Il-Ġermanja qalet li għalhekk fl-ajruport ta’ Frankfurt/Main it-tluq u l-wasliet kienu kompletament projbiti bejn il-23:00 u l-5:00.

(57)

Il-Ġermanja ddikjarat ukoll li l-FLH ma setgħetx tiffinanzja l-miżuri infrastrutturali ppjanati mir-riżorsi tagħha stess. F’dan il-kuntest, il-Ġermanja enfasizzat li minħabba l-investiment b’lura minn żmien l-Eks-Repubblika Demokratika Ġermaniża, l-ajruport kellu jagħmel investimenti fi żmien ħafna iqsar meta mqabbel ma’ ajruporti li jinsabu fin-naħa tal-Punent tal-Ġermanja. Skont il-Ġermanja, b’mod partikolari, l-investimenti sinifikanti fuq terminu qasir ma jistgħux jiġu ffinanzjat mir-riżorsi proprji tal-FLH, peress li hemm differenza sostanzjali bejn il-volum tal-investiment (EUR 225,6 miljuni) u d-dħul annwali tal-ajruport (EUR 80 miljun fl-2009).

(58)

L-ewwel nett, il-Ġermanja fakkret li ma taqbilx mal-pożizzjoni tal-Kummissjoni li l-bini tal-infrastruttura ta’ ajruport tikkostitwixxi attività ekonomika. Għalhekk, il-Ġermanja ddikjarat li l-miżuri notifikati ma jikkostitwixxux għajnuna mill-Istat skont it-tifsira tal-Artikolu 107(1) tat-Trattat.

(59)

F’dan ir-rigward, il-Ġermanja sostniet li l-kunċett ta’ “impriża” skont it-tifsira tal-Artikolu 107(1) tat-Trattat ma japplikax għall-ajruporti, għall-inqas f’dak li jikkonċerna l-finanzjament tal-infrastruttura ta’ ajruport. Il-Ġermanja saħqet li t-twaqqif tal-infrastruttura ta’ ajruport ma kienx jikkostitwixxi attività ekonomika, iżda pjuttost miżura ġenerali ta’ trasport, u tal-politika reġjonali u ekonomika. Hija rreferiet għall-punt 12 tal-Linji Gwida tal-Avjazzjoni tal-1994 li jgħidu li “l-bini jew it-tkabbir ta’ proġetti ta’ infrastruttura […] jirrappreżentaw miżura ta’ politika ekonomika li ma tistax tiġi kkontrollata mill-Kummissjoni skont ir-regoli tat-Trattat dwar għajnuna mill-Istat. Deċiżjonijiet dwar l-iżvilupp tal-infrastruttura jaqgħu barra mill-kamp ta’ applikazzjoni ta’ din il-komunikazzjoni” u argumentat li l-Linji Gwida tal-Avjazzjoni tal-2005 ma biddlux dan il-punt.

(60)

Barra minn hekk, il-Ġermanja affermat li l-bini tal-infrastruttura ta’ ajruport ma tikkostitwixxix attività ekonomika minħabba li investitur privat ma kienx jidħol għal dik l-attività. F’dan ir-rigward, il-Ġermanja qalet li ma hemm l-ebda possibbiltà li l-investiment iħalli profitt, għaliex mhuwiex possibbli li l-ispejjeż ta’ bini jiġu rkuprati mingħand l-utenti tal-ajruport permezz ta’ tariffi tal-ajruport. Skont il-Ġermanja, dan huwa impossibbli minħabba li dawk l-imposti jeħtieġu awtorizzazzjoni mill-awtorità rilevanti tal-ajruport tal-Land rispettiv fejn jinsab l-ajruport u investituri privati ma għandhom ebda influwenza fuq il-livell tagħhom. Għalhekk, skont il-Ġermanja, dawk l-imposti ma jistgħux jiġu ffissati liberament mill-operatur fid-dawl ta’ konsiderazzjonijiet ekonomiċi u, fil-fatt, dawn jiġu stabbiliti mingħajr ebda rabta mal-kostijiet tal-investiment. Żoni li jinkrew għal skopijiet kummerċjali minbarra l-operat tal-linja tal-ajru huma irrelevanti, skont il-Ġermanja.

(61)

F’dak ir-rigward, il-Ġermanja kompliet tgħid li l-ispejjeż fissi tal-ajruporti marbuta mal-infrastruttura, mat-tagħmir u mal-operat huma ogħla mill-medja. Barra minn hekk, il-marġni ta’ manuvra tagħhom huwa limitat minn obbligi u minn kundizzjonijiet ġuridiċi stretti.

(62)

Il-Ġermanja qieset ukoll li r-referenzi għas-sentenza Aéroports de Paris  (18) u għas-sentenza Leipzig/Halle  (19) kienu irrelevanti. Fir-rigward tas-sentenza Aéroports de Paris, il-Ġermanja sostniet li s-sentenza ma tittrattax il-bini ta’ infrastrutturi ta’ ajruporti, iżda l-operat ta’ ajruport. Barra minn hekk, il-Ġermanja qieset li s-sentenza Aéroports de Paris ma tittrattax l-interpretazzjoni tal-kunċett ta’ “impriża” skont it-tifsira tal-Artikolu 107(1) tat-Trattat, iżda titratta ksur tal-projbizzjoni tal-abbuż ta’ pożizzjoni dominanti skont it-tifsira tal-Artikolu 102 tat-Trattat. Fir-rigward tas-sentenza Leipzig/Halle, il-Ġermanja qieset li s-sentenza tal-Qorti Ġenerali ma għandha l-ebda effett bħala preċedent fil-ġurisprudenza, peress li hija soġġetta għal appell.

(63)

Skont il-Ġermanja, anki jekk il-finanzjament ta’ miżuri infrastrutturali kien soġġett għar-regoli dwar l-għajnuna mill-Istat, xorta ma jikkostitwixxix għajnuna mill-Istat skont it-tifsira tal-Artikolu 107(1) tat-Trattat peress li l-finanzjament ta’ miżuri infrastrutturali kien prinċipalment jikkostitwixxi r-rimborż meħtieġ u proporzjonat tal-ispejjeż għat-twettiq tal-kompiti li jaqgħu taħt is-setgħat prerogattivi tal-Istat. F’dan ir-rigward, il-Ġermanja qalet li skont il-Linji Gwida tal-Avjazzjoni tal-2005, l-attivitajiet li normalment jaqgħu taħt ir-responsabbiltà tal-Istat fl-eżerċizzju tas-setgħat uffiċjali tiegħu bħala awtorità pubblika ma kinux ta’ xorta ekonomika u ma jaqgħux taħt il-kamp ta’ applikazzjoni tar-regoli dwar l-għajnuna mill-Istat.

(64)

Il-Ġermanja ddikjarat li, b’rabta mat-twettiq tal-kompiti li jaqgħu taħt il-mandat tal-ordni pubblika, il-prattika tal-Kummissjoni tal-inqas kienet tagħmel distinzjoni bejn il-kategoriji ta’ miżuri li ġejjin relatati mas-sigurtà: il-protezzjoni tat-traffiku tal-ajru kontra theddidiet esterni, bħal ħtif u atti oħra ta’ vjolenza kontra t-traffiku tal-ajru, il-protezzjoni tat-traffiku tal-ajru kontra riskji operazzjonali u l-protezzjoni ta’ partijiet terzi kontra riskji operazzjonali mit-traffiku tal-ajru. Skont il-Ġermanja, fir-rigward tal-protezzjoni tat-traffiku tal-ajru kontra riskji operazzjonali, l-operatur tal-ajruport għandu d-dmir li jġedded, jimmodernizza u jespandi l-infrastruttura tal-ajruport sabiex jiġu evitati perikli operazzjonali. Il-Ġermanja qalet li t-tielet kategorija ta’ miżuri tipikament tkopri l-protezzjoni ta’ partijiet terzi kontra l-ħsejjes tal-inġenji tal-ajru u effetti ambjentali oħra ta’ ħsara.

(65)

Fir-rigward tal-miżuri infrastrutturali differenti involuti, il-Ġermanja argumentat li dawn il-miżuri kienu prinċipalment jikkostitwixxu kumpens għat-twettiq ta’ attivitajiet li jaqgħu taħt il-mandat tal-ordni pubblika peress li l-miżuri kienu jipproteġu lil partijiet terzi kontra periklu operazzjonali mit-traffiku tal-ajru.

(66)

Fir-rigward tal-miżuri għat-tnaqqis tal-istorbju, il-Ġermanja qalet li fil-kuntest tal-proċedura ta’ approvazzjoni tal-pjan, se jkollhom jiġu installati miżuri għat-tnaqqis tal-istorbju f’madwar 10 000 dar residenzjali. Il-Ġermanja argumentat li skont id-dispożizzjonijiet tal-Gesetz zum Schutz gegen Fluglärm (Att dwar l-Istorbju mill-Inġenji tal-Ajru, “FluglärmG”) emendat dan l-aħħar, il-miżuri għat-tnaqqis tal-istorbju jkopru biss żona ta’ 78 km2 b’madwar 3 000 dar residenzjali u bi spejjeż li jammontaw għal EUR […] miljun. Madankollu, skont il-Ġermanja, l-FLH ma bbenefikatx minn din l-emenda tal-FluglärmG, u għadha tapplika żona ta’ protezzjoni aktar stretta. F’dan ir-rigward, il-Ġermanja affermat li l-ajruport ta’ Leipzig/Halle jrid iġarrab spejjeż ferm ogħla mill-kompetituri tiegħu (fil-Ġermanja u barra mill-Unjoni).

(67)

Barra minn hekk, l-ajruport akkwista wkoll proprjetajiet ta’ residenti li ġew affettwati ħażin u ħallashom kumpens. Barra minn hekk, il-Ġermanja qalet li l-ajruport wettaq ċerti attivitajiet ta’ konservazzjoni tan-natura sabiex jikkumpensa għall-attivitajiet ta’ bini tiegħu. Il-Ġermanja argumentat li dan kien maħsub biex jiġi evitat jew jitnaqqas l-impatt tal-ħoss tal-inġenji tal-ajru u tax-xogħol ta’ bini fuq partijiet terzi, u għalhekk kien funzjoni tal-ordni pubblika. Skont il-Ġermanja, il-protezzjoni ta’ partijiet terzi mill-istorbju, b’mod partikolari l-istorbju tal-inġenji tal-ajru, kienet waħda mid-dmirijiet u l-funzjonijiet uffiċjali u fundamentali tal-Istat.

(68)

Il-Ġermanja argumentat ukoll li l-faċilità għall-ittestjar tal-istorbju tal-magni, jiġifieri l-M2, tikkostitwixxi miżura tal-mandat tal-ordni pubblika. Qalet li l-limiti tal-istorbju stabbiliti fil-kuntest tad-deċiżjoni ta’ approvazzjoni tal-pjan għall-bini tar-runway tan-Nofsinhar setgħu jiġu sodisfatti binhar (mis-6:00 sal-22:00) mingħajr struttura magħluqa għall-ittestjar tal-magni. Madankollu, skont il-Ġermanja, fid-dawl tal-permess operazzjonali tal-31 ta’ Lulju 2007, l-ajruport kellu jwettaq testijiet fl-istruttura magħluqa għall-ittestjar anke binhar. Barra minn hekk, il-Ġermanja spjegat li t-testijiet fuq il-magni kienu meħtieġa fil-kuntest taż-żamma tas-sikurezza operazzjonali tal-inġenji tal-ajru u kieku jsiru billejl barra minn struttura magħluqa, jaqbżu l-limiti permessi tal-istorbju. Għalhekk, fil-fehma tal-Ġermanja, il-bini tal-faċilità għall-ittestjar tal-magni fil-forma ta’ bini magħluq isservi biex tipproteġi lir-residenti lokali minn kwalunkwe livelli inaċċettabbli ta’ storbju mill-inġenji tal-ajru.

(69)

Fir-rigward tal-miżura M3, il-Ġermanja argumentat li l-bini ta’ dawn l-elementi infrastrutturali taqa’ fil-mandat tal-ordni pubblika peress li kienet saret biex tipproteġi t-traffiku tal-ajru kontra perikli operazzjonali. Irrispettivament mill-volum ta’ traffiku li suppost jiġi mmaniġġjat fil-ġejjieni, il-ħoloq eżistenti tat-taxiway diġà ma kinux biżżejjed fl-imgħoddi biex jiġi ggarantit immaniġġjar sigur u bla xkiel tat-traffiku tal-ajru. Barra minn hekk, il-Ġermanja qalet li t-taxiway il-ġdida hija r-rotta ta’ aċċess ta’ emerġenza għat-taqsima tat-tifi tan-nar mill-istazzjon għat-tifi tan-nar tal-Lvant għaż-żona tat-Tramuntana tal-ajruport. Skont il-Ġermanja, anke kieku kienu applikabbli r-regoli dwar l-għajnuna mill-Istat, ta’ min ifakkar li wħud minn dawn l-ispejjeż tat-taxiway kienu relatati mad-dwal. Fir-rigward tad-dwal, il-Ġermanja indikat li fid-deċiżjoni Memmingen tagħha l-Kummissjoni kienet diġà ddeċidiet (20) li d-dawl jikkostitwixxi element ta’ gwida u ta’ kontroll għall-inġenji tal-ajru u għalhekk jista’ jiġi kklassifikat bħala attivitajiet li jaqgħu taħt il-mandat tal-ordni pubblika li ma jaqax fil-kamp ta’ applikazzjoni tar-regoli dwar l-għajnuna mill-Istat.

(70)

Skont il-Ġermanja, l-M4 se ssir ukoll biex jitwettqu l-attivitajiet li jaqgħu taħt il-mandat tal-ordni pubblika peress li raġunijiet ta’ kapaċità u ta’ sikurezza operattivi jitolbu li inġenji kbar tal-ajru li joperaw fl-MTOW permess tagħhom f’ċerti kundizzjonijiet klimatiċi jiġu pprovduti b’distanza addizzjonali għat-tlugħ, inkluż żona addizzjonali ta’ deċelerazzjoni f’każ li t-tlugħ jiġi abortit.

(71)

Fir-rigward tal-miżura M5, fil-fehma tal-Ġermanja, l-ikklerjar tas-sit qabel il-bini tat-taxiway Victor kien sar biex jitwettqu l-attivitajiet li jaqgħu taħt il-mandat tal-ordni pubblika peress li t-taxiway Victor kienet meħtieġa biex jiġi garantit operat sigur u biex jiġu evitati inċidenti, riskji relatati mas-sigurtà u impatt ambjentali negattiv. Skont il-Ġermanja, għall-kuntrarju tal-opinjoni tal-Kummissjoni, il-bini tat-taxiway Victor ma kinitx intiża biex iżżid il-kapaċità u, indirettament, il-fatturat. Il-Ġermanja qalet li din kienet inbniet għal raġunijiet ta’ sikurezza operazzjonali u ambjentali biss.

(72)

Barra minn hekk, skont il-Ġermanja, il-bini taż-żewġ stazzjonijiet ġodda għat-tifi tan-nar kienet saret biex jitwettqu l-attivitajiet li jaqgħu taħt il-mandat tal-ordni pubblika peress li skont il-prattika stabbilita tal-Kummissjoni, miżuri relatati mas-sikurezza kontra n-nirien, speċjalment il-bini u l-operat tal-istazzjonijiet għat-tifi tan-nar fl-ajruport u l-akkwist tat-tagħmir rilevanti, huma meqjusa li jaqgħu taħt il-mandat tal-ordni pubblika. Il-Ġermanja indikat li fl-ajruporti Ġermaniżi l-bini ta’ faċilità tat-tifi tan-nar normalment tiġi finanzjata minn fondi pubbliċi.

(73)

Barra minn hekk, skont il-Ġermanja, il-bini tal-ħangar b’għanijiet multipli kienet saret ukoll biex jitwettqu l-attivitajiet li jaqgħu taħt il-mandat tal-ordni pubblika peress li l-ħangar se jintuża biss għall-ħżin tat-tagħmir għal servizzi li jingħataw fix-xitwa u bħala kenn ta’ emerġenza. Il-Ġermanja spjegat li l-forniment ta’ bini għat-tagħmir għal servizzi li jingħataw fix-xitwa jikkostitwixxi funzjoni uffiċjali tal-Istat peress li jiggarantixxi l-operat sigur tal-ajruport matul il-perjodu tax-xitwa. Barra minn hekk, il-Ġermanja qalet li dan ippermetta li l-ajruport jissodisfa l-obbligu statutorju tiegħu li jopera l-ajruport fil-ħinijiet kollha.

(74)

Il-Ġermanja spjegat li l-forniment tal-kenn ta’ emerġenza jaqa’ taħt l-interess ġenerali peress li jservi biex jissalvagwardja l-ħajja tal-bniedem. Il-Ġermanja ċċitat id-dispożizzjonijiet tal-ICAO li jeħtieġu li l-operaturi ta’ ajruport jipprovdu spazju għall-kura ta’ persuni midruba u għall-ħżin ta’ katavri fil-każ ta’ emerġenza. Barra minn hekk, skont il-Ġermanja, il-ħangar b’għanijiet multipli jista’ jilqa’ wkoll passiġġieri li ma jkunux jistgħu jkomplu l-vjaġġ tagħhom minħabba fenomeni naturali (pereżempju l-isħaba tal-irmied fl-2010).

(75)

Barra minn hekk, il-Ġermanja saħqet li l-bini tal-ħangar il-ġdid kienet meħtieġa peress li ma kienx ikun possibbli li l-ħangar b’għanijiet multipli jiġi espandut li kieku tħalla fejn kien.

(76)

Fir-rigward tal-miżura M6, il-Ġermanja rreferiet għall-argumenti b’rabta ma’ M5. Barra minn hekk, il-Ġermanja qalet li l-bini tat-taxiway Victor kienet ġiet posposta.

(77)

Skont il-Ġermanja anke l-espansjoni taż-żoni għat-tneħħija tas-silġ (M7) kienet saret biex titwettaq funzjoni uffiċjali tal-Istat peress li l-faċilitajiet kienu meħtieġa għal raġunijiet ta’ sikurezza operazzjonali u ambjentali. Barra minn hekk, il-Ġermanja spjegat li ż-żoni addizzjonali għat-tneħħija tas-silġ ma kinux meħtieġa biex tiġi garantita kapaċità suffiċjenti fil-każ ta’ żieda fit-traffiku peress li l-ajruport ta’ Leipzig/Halle kien jiflaħ għal żieda fit-traffiku anke mingħajr żoni addizzjonali għat-tneħħija tas-silġ. Argumentat li l-espansjoni taż-żoni għat-tneħħija tas-silġ saret neċessarja minħabba l-esperjenzi matul l-operat tax-xitwa tal-2008/2009. Skont il-Ġermanja, il-faċilitajiet addizzjonali għat-tneħħija tas-silġ iservu biex tiġi garantita tneħħija mingħajr xkiel tas-silġ mill-inġenji tal-ajru u biex jiġi evitat dewmien ikkawżat minn infrastruttura inadegwata għat-tneħħija tas-silġ fl-ajruport. F’dan ir-rigward, il-Ġermanja sostniet li d-dewmien, min-naħa tiegħu, se jkollu impatt negattiv fuq l-ambjent, bħall-konsum tal-pitrolju, emissjonijiet dannużi u storbju.

(78)

Fir-rigward tal-miżura M8, il-Ġermanja argumentat li l-bini ta’ ħeliport jiffaċilita salvataġġi bl-ajru fl-ajruport u inġenerali.

(79)

Fir-rigward ta’ M 9.1, il-Ġermanja qalet li l-bini mill-ġdid tal-Punt ta’ Kontroll I kien assolutament meħtieġ fid-dawl tar-Regolament (KE) Nru 300/2008 tal-Parlament Ewropew u tal-Kunsill (21). Il-Ġermanja indikat li dan il-bini mill-ġdid taqa’ taħt il-mandat tal-ordni pubblika u li l-finanzjament tagħha kien limitat għall-ispejjeż imġarrba.

(80)

Barra minn hekk, il-Ġermanja hija wkoll tal-fehma li l-bini tal-bini tas-sigurtà funzjonali (M 9.2) kien jaqa’ taħt il-mandat tal-ordni pubblika u li l-finanzjament kien limitat għall-ispejjeż imġarrba. Il-Ġermanja qalet li l-bini funzjonali tas-sigurtà l-ġdid għen ukoll biex ikun hemm konformità mar-Regolament (KE) Nru 300/2008 u kien neċessarju biex jiġu ssodisfati l-ħtiġijiet tal-pulizija federali u reġjonali, tad-dwana u tas-Servizz Meteoroloġiku Ġermaniż.

(81)

Fir-rigward ta’ M 9.3 li tittratta l-akkwist ta’ tagħmir tekniku, jiġifieri l-akkwist ta’ tagħmir addizzjonali għal servizzi li jingħataw fix-xitwa, ta’ tagħmir addizzjonali għat-tifi tan-nar u r-restawrazzjoni taċ-ċint tal-perimetru tal-ajruport b’detetturi u b’tagħmir diġitali ta’ sorveljanza bil-vidjo, il-Ġermanja argumentat li t-tliet miżuri kienu jaqgħu taħt il-mandat tal-ordni pubblika.

(82)

Fir-rigward tat-tagħmir il-ġdid għal servizzi li jingħataw fix-xitwa, il-Ġermanja qalet li t-tagħmir kien jippermetti li r-runways jiġu kklerjati b’mod parallel, li jiżgura operat sigur tal-ajruport, u għalhekk jaqa’ taħt il-mandat tal-ordni pubblika.

(83)

Barra minn hekk, il-Ġermanja indikat li skont it-Taqsima 8 tal-Luftsicherheitsgesetz Ġermaniż (Att dwar is-Sigurtà tal-Avjazzjoni, “LuftSiG”), li implimenta r-Regolament (KE) Nru 300/2008, l-ajruport kellu jiġi mdawwar minn ċint tal-perimetru. Il-Ġermanja saħqet li, skont il-prattika stabbilita tal-Kummissjoni, l-infrastruttura tas-sigurtà tal-ajruport, bħal ċnut tal-perimetru, taqa’ taħt il-mandat tal-ordni pubbliku.

(84)

Fir-rigward tal-miżura M9.4 (jiġifieri l-kostruzzjoni ta’ bini ġdid għat-trasport tal-annimali li jinkludi faċilitajiet veterinarji), il-Ġermanja sostniet ukoll li t-twaqqif ta’ dan il-bini jaqa’ taħt il-mandat tal-ordni pubblika, peress li l-għan tiegħu kien li jiġi żgurat li ma jiddaħħal ebda mard tal-annimal jew mard ieħor fil-Ġermanja u fl-Unjoni.

(85)

Fir-rigward ta’ M12, il-Ġermanja qalet li sabiex it-traffiku tal-merkanzija jkun jista’ jiġi żviluppat aktar u biex jitnaqqas ir-riskju ta’ inċidenti fuq l-art, kien hemm bżonn tal-permess ta’ ppjanar.

(86)

Fir-rigward tal-M 11 u l-M13 sal-M16, il-Ġermanja indikat li fin-notifika tagħha ma kinitx iddikjarat li dawn il-miżuri kienu ġew implimentati biex jitwettqu attivitajiet li jaqgħu taħt il-mandat tal-ordni pubblika. Skont il-Ġermanja, dawn il-miżuri kienu jinkludu l-iżvilupp tal-land side taż-żona tax-Xlokk, l-espansjoni tar-rampa tat-Tramuntana, l-espansjoni tar-rampa tal-Lvant, l-adattament infrastrutturali fiż-żona tat-Tramuntana u miżuri infrastrutturali addizzjonali fiż-żona tat-Tramuntana.

(87)

Fir-rigward tal-finanzjament tal-miżuri infrastrutturali involuti, il-Ġermanja qalet li l-miżuri kienu ġew iffinanzjati permezz ta’ self mill-azzjonisti li kien ingħata b’kundizzjonijiet normali tas-suq u, għalhekk, ma jikkostitwixxix għajnuna mill-Istat skont l-Artikolu 107(1) tat-Trattat. Il-Ġermanja indikat li dan is-self għadu ma ġiex konvertit f’ekwità u li l-konverżjoni tas-self mill-azzjonisti hija soġġetta għal deċiżjoni ta’ approvazzjoni tal-Kummissjoni.

(88)

Il-Ġermanja ċċarat li s-self jingħata skont il-ħtiġijiet tal-bini u li l-ammont totali tiegħu jvarja kull xahar. Skont il-Ġermanja, is-self jibda fid-data li fiha jitħallas is-self. Il-Ġermanja kompliet tispjega li kull self jimmatura fl-aħħar tas-sena (31 ta’ Diċembru) li fiha jingħata. F’dan il-kuntest, il-Ġermanja qalet li imbagħad dan is-self ittawwal għal perjodu ieħor ta’ sena. Skont il-Ġermanja, huwa possibbli li t-tul ta’ żmien jiġi estiż diversi drabi sakemm tasal l-awtorizzazzjoni mistennija għall-injezzjonijiet ta’ kapital mill-Kummissjoni.

(89)

Il-Ġermanja kompliet tgħid li l-ammont tas-self u l-imgħax pagabbli huma dovuti fid-data finali (jiġifieri l-31 ta’ Diċembru ta’ kull sena), iżda d-durata tas-self tista’ tiġi estiża b’sena oħra. Barra minn hekk, il-Ġermanja argumentat li din il-possibilità ta’ estensjoni ppermettiet li s-self jiġi estiż sad-data li fiha l-Kummissjoni tieħu d-deċiżjoni finali tagħha.

(90)

Fir-rigward tar-rata tal-imgħax għal kull self, il-Ġermanja spjegat li din kienet ġiet stabbilita fuq il-bażi tal-EURIBOR applikabbli fil-mument li kienet qed tingħata kull parti tas-self flimkien ma’ marġni ta’ riskju. Skont il-Ġermanja, jekk self jingħata fl-1 ta’ Lulju d-durata tiegħu (sal-aħħar tas-sena) tkun ta’ sitt xhur u r-rata tal-imgħax tkun it-total tal-EURIBOR tas-6-xhur u marġni ta’ riskju. Il-Ġermanja kompliet tiċċara li jekk self jingħata fl-1 ta’ Mejju (tul ta’ 8 xhur sal-aħħar tas-sena) ir-rata bażi ta’ referenza tiġi kkalkolata billi jiġu interpolati r-rati EURIBOR tas-6-xhur u tad-9-xhur. Il-Ġermanja kompliet tiċċara li mix-xahar ta’ Jannar wara s-sena li fiha s-self ikun kien ġie estiż ir-rata valida tal-imgħax se tkun il-EURIBOR tat-12-il-xahar flimkien ma’ marġni ta’ riskju. Il-Ġermanja pprovdiet ħarsa ġenerali tal-ammonti akkumulati ta’ self u l-kundizzjonijiet kif imqassra fit-Tabella 3.

Tabella 3

Ħarsa ġenerali lejn is-self mill-azzjonisti tal-FLH 13.12.2006-1.1.2012

(91)

Fir-rigward tar-rati tal-marġni ta’ riskju, għas-snin 2006 sal-2008, il-Ġermanja qalet li kien intuża marġni ta’ riskju ta’ […] punti bażi. Il-Ġermanja ċċarat li din ir-rata kienet ġiet stabbilita billi tqabblu l-kundizzjonijiet tas-self tal-ftehimiet ta’ self li ġejjin:

(92)

Il-Ġermanja qalet li l-marġni medju tar-riskju kkalkolat żdied ‘il fuq għad-dritt minn punti bażi bħala medja għal […] punti bażi.

(93)

Fir-rigward tal-marġni ta’ riskju ta’ […] punti bażi stabbilit fl-2009, il-Ġermanja ċċarat li r-rata kienet ġiet determinata billi tqabblu l-kundizzjonijiet taż-żewġ offerti indikattivi minn Sachsen Bank u Nord LB tat-8 u tad-9 ta’ Jannar 2009 rispettivament, il-ftehimiet ta’ self bejn l-MFAG u s-Sachsen LB u l-Postbank tad-19/22 ta’ Awwissu 2003 u tat-28 ta’ Ġunju/15 ta’ Lulju 2007. Il-Ġermanja qalet li minħabba kunsiderazzjonijiet ta’ prudenza l-marġni kien żdied ‘il fuq għad-dritt minn […] punti bażi bħala medja għal […] punti bażi.

(94)

Skont il-Ġermanja, fl-2010 il-marġni ta’ riskju kien jammonta għal […] punti bażi. Barra minn hekk, il-Ġermanja spjegat li din il-figura ġiet determinata billi tqabblu ż-żewġ offerti indikattivi minn Sachsen LB (22) u minn Nord LB (23) tal-11 u tal-14 ta’ Jannar 2010 rispettivament, u l-ftehim ta’ self bejn l-MFAG u s-Sachsen LB tad-19/22 ta’ Awwissu 2003. Il-Ġermanja qalet li minħabba kunsiderazzjonijiet ta’ prudenza, il-marġni medju reġa’ ġie arrotondat ‘il fuq minn […] punti bażi bħala medja għal […] punti bażi.

(95)

Il-Ġermanja tispjega li fl-2011, il-marġni tal-imgħax użat kien jammonta għal […] punti bażi u li l-kalkolu kien ibbażat fuq tqabbil bejn żewġ offerti indikattivi minn Sachsen Bank u Nord LB tad-29 ta’ Ġunju 2011, u l-ftehimiet ta’ self bejn Postbank u l-MFAG datati t-28 ta’ Ġunju/il-15 ta’ Lulju 2007, u bejn Sachsen LB u l-MFAG datati d-19/22 ta’ Awwissu 2003. Skont il-Ġermanja, il-marġni kkalkolat reġa’ żdied ‘il fuq għad-dritt minn […] punti bażi bħala medja għal […] punti bażi.

(96)

Il-Ġermanja qalet li fl-opinjoni tagħha l-konformità tas-self mill-azzjonisti tal-FLH mas-suq għandha tiġi vvalutata abbażi ta’ komparaturi tas-suq u mhux abbażi tal-Komunikazzjoni dwar ir-Rata Referenzjali tal-2008.

(97)

Barra minn hekk, il-Ġermanja argumentat li l-ftehim ta’ self bejn l-MFAG u s-Sachsen LB tad-19/22 ta’ Awwissu 2003 kien tabilħaqq jikkostitwixxi valur referenzjarju adattat biex jiġi identifikat il-livell tas-suq tar-rati tal-imgħax għas-self mill-azzjonisti. Il-Ġermanja ċaħdet l-argument li l-ftehim ta’ self bejn l-MFAG u s-Sachsen LB ma kienx bażi adattata għal valutazzjoni komparattiva għaliex kien ġie konkluż ma’ benefiċjarju differenti, jiġifieri l-MFAG u mhux l-FLH. Il-Ġermanja indikat li l-Kummissjoni nnifisha qieset lill-MFAG sempliċiment bħala mezz għat-trasferiment ta’ fondi lill-FLH u mhux bħala benefiċjarja nnifisha tal-għajnuna. Il-Ġermanja spjegat li l-ftehim dwar il-kontroll, u t-trasferiment tal-qligħ u tat-telf bejn l-MFAG u l-FLH kien jobbliga lill-FLH biex titrasferixxi l-profitti kollha tagħha lill-MFAG u kien jirrikjedi li l-MFAG tkopri t-telf kollu tal-FLH, u b’hekk il-qligħ/telf nett annwali għall-FLH dejjem kien żero. Bħala konsegwenza, il-marġni tal-imgħax mogħti lill-kumpanija tal-grupp dejjem kien ekwivalenti għall-marġni tal-imgħax mogħti lill-kumpanija prinċipali u viċi versa.

(98)

Skont il-Ġermanja, minkejja li l-ftehim ta’ self kien sar fl-2003, kien fih self ta’ riportament fit-tul sal-2013 b’imgħax iffissat għal 3 xhur kull darba. F’dan ir-rigward, il-Ġermanja qalet li għalhekk il-marġni ta’ riskju ta’ […] punti bażi kien applikabbli bejn l-2006 u l-2008 u xorta jkun japplika llum. Barra minn hekk, il-Ġermanja ma qablitx mal-argument tal-Kummissjoni li Sachsen LB kienet biss kapaċi toffri l-marġni tal-imgħax ta’ […] punti bażi minħabba tnaqqis fil-livell tal-imgħax ipprovdut permezz tal-finanzjament mill-BEI, li huwa wkoll skorrett. Skont il-Ġermanja, il-finanzjament mill-BEI ma kellu l-ebda influwenza fuq id-determinazzjoni tal-marġni tal-imgħax ta’ […] punti bażi.

(99)

Il-Ġermanja ċaħdet ukoll l-osservazzjoni tal-Kummissjoni li l-ftehim ta’ self bejn Postbank u l-MFAG ma setax jintuża bħala valur referenzjarju. Ġie konkluż għall-benefiċċju tal-FLH, ma kienx ġie miftiehem fi żmien differenti, u l-ħlas ma kienx soġġett għal kundizzjonijiet speċifiċi. Barra minn hekk, il-Ġermanja argumentat li l-offerta vinkolanti ta’ finanzjament minn Sachsen LB u Nord LB datata s-16 ta’ Mejju 2007 kienet valur referenzjarju adattat.

(100)

Barra minn hekk, b’referenza għall-argument tal-Kummissjoni li kienet iddubitat jekk il-proposti indikattivi li ġew ippreżentati permezz ta’ ittra elettronika mingħajr l-intenzjoni li jsiru ftehimiet ta’ self legalment vinkolanti setgħux jitqiesu bħala valur referenzjarju affidabbli tas-suq (24), il-Ġermanja qalet li Nord LB u Sachsen Bank it-tnejn kellhom relazzjonijiet kummerċjali twila mal-MFAG u kienu nżammu regolarment informati dwar is-sitwazzjoni ekonomika tal-FLH u tal-MFAG, u għalhekk il-proposti indikattivi kienu bbażati fuq valutazzjoni bir-reqqa tar-riskju.

(101)

Barra minn hekk, il-Ġermanja indikat li anke jekk in-natura tas-self bħala konformi mas-suq jew l-ekwivalenti tal-għajnuna tas-self jew it-tnejn kellhom jiġu ttestjati skont il-Komunikazzjoni tal-2008 dwar ir-Rata Referenzjali, ma jkun hemm ebda għajnuna mill-Istat. Il-Ġermanja saħqet li l-metodu l-ġdid biex tiġi kkalkolata r-rata referenzjali kien japplika biss mill-1 ta’ Lulju 2008. Bħala konsegwenza, fil-każ ta’ ftehimiet ta’ self konklużi qabel din id-data, trid tiġi applikata l-Komunikazzjoni preċedenti dwar ir-Rata Referenzjali.

(102)

Il-Ġermanja tikkonferma li l-FLH ma ġietx ikklassifikata minn aġenziji pubbliċi tal-klassifikazzjoni tal-kreditu. Minkejja dan, il-Ġermanja qalet li hemm xi indikazzjonijiet tal-affidabbiltà kreditizja tagħha. Il-Ġermanja kompliet tgħid li l-azzjonist ewlieni tal-FLH huwa l-MFAG, li huwa sid 94 % tal-ishma fl-FLH. Skont il-Ġermanja, peress li hemm Ftehim dwar il-Qsim ta’ Telf u ta’ Qligħ bejn l-MFAG u l-FLH mis-6 ta’ Diċembru 2000, li jobbliga lill-MFAG tkopri kwalunkwe telf tal-FLH, il-klassifikazzjoni tal-FLH għandha tal-anqas tkun l-istess (jew ogħla) mill-klassifikazzjoni tal-kumpanija prinċipali tagħha l-MFAG.

(103)

Il-Ġermanja qalet li l-MFAG ma ġietx klassifikata minn aġenziji pubbliċi tal-klassifikazzjoni tal-kreditu. Minkejja dan, il-Ġermanja tipprovdi xi klassifikazzjonijiet bankarji interni għall-MFAG. Il-Ġermanja qalet li fl-2006 Nord LB kien ikklassifika lill-MFAG b’nota ta’ klassifikazzjoni ta’ […] fuq l-iskala tal-klassifikazzjoni interna tiegħu (bi probabbiltà ta’ inadempjenza ta’ […] %) li tikkorrispondi għal klassifikazzjoni ta’ […] sa […] fuq l-iskala ta’ klassifikazzjoni ta’ Standard & Poor’s, […] sa […] fuq Moody’s u […] sa […] fuq ta’ Fitch. Il-Ġermanja kompliet tgħid li l-MFAG ilha f’din il-kategorija ta’ klassifikazzjoni mill-2006. Il-Ġermanja ċċarat ukoll li fit-2 ta’ Awwissu 2011 u fl-20 ta’ April 2012 rispettivament, din il-valutazzjoni ġiet ikkonfermata minn Nord LB. Barra minn hekk, il-Ġermanja qalet li anke d-Deutsche Kreditbank AG (DKB) kien ipprovda l-indikazzjoni tal-klassifikazzjoni tiegħu, li fiha jikkonferma li, abbażi tar-rapporti finanzjarji tal-MFAG għas-sena 2006, il-kumpanija ġiet assenjata klassifikazzjoni ta’ […] fuq l-iskala tal-klassifikazzjoni interna tal-bank, li tikkorrispondi għal klassifikazzjoni ta’ […] minn Standard & Poor u ta’ […] minn Moody’s.

(104)

It-Tabella 4 tiġbor fil-qosor il-klassifikazzjonijiet assenjati lill-MFAG mill-2006 sal-2012 (il-perjodu taħt konsiderazzjoni).

Tabella 4

Il-klassifikazzjoni tal-MFAG bejn l-2006-2012

(…) (25)

(105)

Fir-rigward tal-kollateralizzazzjoni tas-self u l-LGD, il-Ġermanja ċċarat li s-self jingħata mill-azzjonisti tal-FLH fil-forma ta’ finanzjament tranżitorju li jfisser li għandu jiġi konvertit f’kapital wara l-awtorizzazzjoni tal-Kummissjoni. F’dan ir-rigward, il-Ġermanja kompliet tiċċara li din hija r-raġuni għaliex is-self mhuwiex kollateralizzat.

(106)

Il-Ġermanja sostniet li m’hemm l-ebda modalitajiet speċifiċi għal ħlas lura għas-self mill-azzjonisti peress li kien ġie preżunt li s-self jiġi konvertit f’ekwità, u għalhekk, ma kien se jsir l-ebda ħlas lura. Skont il-Ġermanja, fil-każ li s-self ma jiġix konvertit f’ekwità minħabba li il-Kummissjoni ma tkunx approvat il-finanzjament tal-miżuri infrastrutturali, skont it-Taqsima 488 (3) tad-Deutsches Bürgerliches Gesetzbuch (Kodiċi Ċivili Ġermaniża), ftehim ta’ self jista’ jiġi terminat fi żmien 3 xhur. It-terminazzjoni tal-ftehim twassal għall-maturità tal-ammont tas-self bl-imgħaxijiet.

(107)

Il-Ġermanja targumenta li għalkemm is-self mhuwiex kollateralizzat, l-LGD tal-FLH għandu jitqies li tal-anqas ikun anqas minn […] % u anke viċin […] % minħabba li l-valur tal-assi tal-FLH (jiġifieri EUR […] miljun fl-2010) jaqbeż il-valur tal-obbligazzjonijiet (EUR […] miljun fl-2010). Skont il-Ġermanja, fil-każ ta’ falliment, l-assi tal-FLH se jkunu biżżejjed biex ikopru dawn il-pretensjonijiet.

(108)

Il-Ġermanja qalet li l-assi tal-FLH, li jikkonsistu minn proprjetà ta’ art, bini, stallazzjonijiet tekniċi, u magni fost oħrajn, m’huma mirhuna bl-ebda mod lejn l-azzjonisti tagħha jew kredituri esterni.

(109)

Fir-rigward tal-injezzjonijiet ta’ kapital għall-bini tal-ajruport, il-Ġermanja saħqet li t-test tal-operatur tal-ekonomija tas-suq (“test tal-MEO”) ma kienx applikabbli peress li l-bini tal-ajruport kienet tikkostitwixxi miżura ġenerali tal-politika ekonomika li ma taqax fl-ambitu ta’ kontroll tal-għajnuna mill-Istat.

(110)

Il-Ġermanja sostniet li anki jekk il-finanzjament tal-miżuri ppjanati kien jikkostitwixxi għajnuna mill-Istat, ikun kompatibbli mas-suq intern peress li jissodisfa l-kundizzjonijiet stabbiliti fil-punt 61 tal-Linji Gwida tal-Avjazzjoni tal-2005. Wara d-dħul fis-seħħ tal-Linji Gwida tal-Avjazzjoni tal-2014, il-Ġermanja sostniet li l-għajnuna tkun kompatibbli wkoll mal-prinċipji komuni kif stabbiliti fit-Taqsima 5 ta’ dawk il-Linji Gwida.

(111)

Il-Ġermanja qalet li l-finanzjament tal-investimenti inkwistjoni jservi objettiv definit sew ta’ interess komuni.

(112)

F’dan ir-rigward, il-Ġermanja sostniet li s-settur tat-trasport tal-merkanzija bl-ajru, b’mod partikolari l-merkanzija espress, qed juri rati konsiderevoli ta’ tkabbir b’mod partikulari fl-ajruport ta’ Leipzig/Halle (bejn l-2007 u l-2010 il-volum ta’ merkanzija żdied minn 101 364 tunnellata għal 663 059 tunnellata). Il-Ġermanja kompliet id-dikjarazzjoni tagħha billi ċċarat li t-trasportaturi tal-merkanzija bl-ajru qed jespandu l-kapaċitajiet operazzjonali tagħhom. Skont il-Ġermanja, it-tliet ċentri prinċipali għall-ġarr tal-merkanzija bl-ajru, Frankfurt/Main, Munich u Cologne/Bonn, qed jiffaċċjaw restrizzjonijiet fuq il-kapaċità fuq titjiriet billejl. Il-Ġermanja tasserixxi wkoll li, skont sentenza tal-4 ta’ April 2012, l-Ajruport ta’ Frankfurt/Main ma jibqax iwettaq operazzjonijiet ta’ titjiriet billejl. Għalhekk, fil-fehma tal-Ġermanja, l-FLH tgħin biex tnaqqas il-konġestjoni f’ajruporti oħra tal-merkanzija fil-Ġermanja.

(113)

Fir-rigward tal-kontribut tal-ajruport għall-konnettività tar-reġjun, il-Ġermanja qalet li l-proġett previst ilu jagħmel parti mill-istrateġija għall-iżvilupp ta’ ajruport inkluża fil-Pjan Ġenerali tan-Netwerk Trans-Ewropew (Orizzont 2020) mill-2004 bħala “Punt li jgħaqqdu l-Komunità””. Skont il-Ġermanja, l-ajruport jinsab fir-reġjun tal-Ġermanja Ċentrali (qrib ħames rotot prinċipali tan-netwerk Trans-Ewropew tat-trasport u tal-passaġġi Pan-Ewropej) u jinsab fil-punt fejn jiltaqgħu żewġ awtostradi li jgħaqqdu flimkien it-Tramuntana u n-Nofsinhar tal-Ewropa (jiġifieri l-Awtostrada federali A 9) u l-Ewropa tal-Punent u l-Ewropa tal-Lvant (jiġifieri l-Awtostrada federali A 14) b’aċċess għal netwerk ferrovjarju u tat-toroq. Barra minn hekk, il-Ġermanja ċċarat li l-aċċess għan-netwerk ferrovjarju u tat-toroq jiffaċilita trasport aktar effiċjenti tal-merkanzija. Barra minn hekk, il-Ġermanja qalet li l-proġett huwa konformi mal-“iżvilupp ta’ netwerk Ewropew integrat tat-trasport bl-ajru“ kif stabbilit fil-punt 12 tal-pjan ta’ azzjoni għall-kapaċità, l-effiċjenza u s-sikurezza tal-ajruporti fl-Ewropa (26) li jinnota li “ikun xieraq li tinħeles il-kapaċità rieqda li teżisti fl-ajruporti reġjonali, dejjem sakemm l-Istati Membri jirrispettaw l-istrumenti ġuridiċi Komunitarji marbuta mal-għajnuniet mill-Istat”.

(114)

Il-Ġermanja sostniet ukoll li l-implimentazzjoni tal-proġett se jkollha impatt pożittiv fuq ir-reġjun kollu u se tinfluwenza b’mod sinifikanti l-iżvilupp ekonomiku u soċjali tiegħu. Skont il-Ġermanja, b’mod partikolari l-proġett ta’ investiment, se jtejjeb l-aċċess għar-reġjun u jżid l-attrazzjoni tiegħu għall-investituri u għall-viżitaturi. F’dan ir-rigward, il-Ġermanja argumentat li l-proġett ta’ investiment se jkollu wkoll impatt pożittiv fuq l-impjiegi. Sabiex issostni dan l-argument, il-Ġermanja affermat li r-rata tal-qgħad fir-reġjun ta’ Sachsen tammonta għal 10,3 % u f’Saxony-Anhalt għal 11,2 %, li huma ogħla mill-medja Ġermaniża ta’ 6,9 %.

(115)

Għalhekk, il-Ġermanja sostniet li l-għajnuna mill-Istat isservi objettiv definit sew ta’ interess komuni.

(116)

Il-Ġermanja sostniet li ebda investitur privat mhu se jkun interessat jiffinanzja dawn il-miżuri infrastrutturali. F’dan ir-rigward, il-Ġermanja qalet li l-ajruport ta’ Leipzig/Halle qed ibati minħabba l-investiment storikament b’lura. Barra minn hekk, skont il-Ġermanja l-miżuri jikkonċernaw investimenti infrastrutturali fit-tul li jindirizzaw il-ħtiġijiet tal-ajruport fid-dawl taż-żieda futura fit-trasport tal-merkanzija. Il-Ġermanja targumenta, mingħajr ma tipprovdi evidenza, li l-miżuri la huma sproporzjonati fid-daqs, u lanqas ma jinvolvu spiża sproporzjonata. Fl-opinjoni tal-Ġermanja, tnaqqis ulterjuri fil-finanzjament mill-Istat mhuwiex possibbli peress li infrastruttura ta’ dan il-kobor ma tistax tiġi ffinanzjata mir-riżorsi proprji tal-operaturi tal-ajruport.

(117)

Il-Ġermanja qajmet ukoll l-argument li d-dħul mis-servizzi tal-ajruport ma jkoprix l-ispejjeż tal-bini tal-infrastruttura u sostanzjat dan l-argument fuq bażi ta’ diskrepanza tal-likwidità u valutazzjoni kontrofattwali.

(118)

Għalhekk, il-Ġermanja hija tal-opinjoni li l-għajnuna se ġġib titjib materjali għall-proġett ta’ investiment li s-suq innifsu ma jagħtix u li hemm il-ħtieġa ta’ intervent mill-Istat.

(119)

Il-Ġermanja sostniet li l-għajnuna se tkun miżura adegwata ta’ għajnuna. F’dan ir-rigward, il-Ġermanja ssostni li minħabba l-post tal-ajruport fl-Eks-Repubblika Demokratika Ġermaniża, l-ajruport ibati minn investiment b’lura u jrid iwettaq investimenti sostanzjali f’perjodu ta’ żmien iqsar meta mqabbel ma’ ajruporti oħra.

(120)

Barra minn hekk, skont il-Ġermanja, il-miżuri infrastrutturali ma kinux isiru mingħajr l-għajnuna mill-Istat. Biex issostni dan, il-Ġermanja ddikjarat li fl-2005, il-grupp MFAG kien iġġenera dħul ta’ EUR 83,8 sa 118-il miljun u l-FLH EUR 47 sa 80 miljun. Għalhekk, fl-opinjoni tal-Ġermanja, il-volum tal-investiment ta’ EUR 255,625 miljun huwa aktar minn darbtejn sa 3 darbiet id-dħul konsolidat tal-MFAG u aktar minn 3 sa 5 darbiet id-dħul tal-FLH matul il-perjodu li fih kienu ġew deċiżi l-proġetti ta’ infrastruttura.

(121)

Fl-aħħar nett, il-Ġermanja qalet li l-proporzjon bejn il-volum tad-dħul u tal-investiment juri li l-impriżi kkonċernati ma kinux iwettqu dawn il-miżuri mingħajr finanzjament pubbliku.

(122)

Fir-rigward tal-effett ta’ inċentiv, il-Ġermanja indikat li l-ammont u l-intensità tal-għajnuna mill-Istat tal-miżuri infrastrutturali involuti kienu ġustifikati. Il-Ġermanja qalet li l-miżuri infrastrutturali ma kinux isiru mingħajr il-finanzjament mill-Istat (ara t-Taqsima 3.4.3).

(123)

Għall-kuntrarju tal-fehma tal-Kummissjoni, il-Ġermanja indikat li l-fatt li wħud mill-proġetti ta’ investiment diġà kienu tlestew ma jnaqqasx l-effett ta’ inċentiv peress li l-azzjonisti diġà kienu ħadu l-impenji tagħhom għall-finanzjament qabel ma bdew jiġu implimentati l-miżuri infrastrutturali. Skont il-Ġermanja, id-dikjarazzjoni tal-Kummissjoni li l-proġetti ta’ infrastruttura jistgħu jrendu xi dħul apprezzabbli mill-kapital hija ċertament żbaljata fir-rigward tan-natural tal-miżuri inkwistjoni u hija wkoll f’konflitt mal-prattika preċedenti tal-Kummissjoni dwar it-teħid ta’ deċiżjonijiet. Skont il-Ġermanja, f’diversi okkażjonijiet il-Kummissjoni diġà kienet irrikonoxxiet li normalment dawn it-tip ta’ miżuri ma jrendu l-ebda dħul apprezzabbli mill-kapital.

(124)

Skont il-Ġermanja, il-proporzjonalità tal-miżuri infrastrutturali tista’ wkoll tiġi dedotta mill-fatt li dawn jgħinu biex titnaqqas il-konġestjoni f’ajruporti Ġermaniżi oħra tal-merkanzija.

(125)

Barra minn hekk, il-Ġermanja qalet li l-ammont u l-intensità tal-finanzjament kienu ristretti għall-minimu assolut meħtieġ għat-twettiq tal-miżuri infrastrutturali. Skont il-Ġermanja, l-ispejjeż kienu stabbiliti bil-quddiem billi nkisbu stimi tal-ispejjeż u pjanijiet preliminari. Barra minn hekk, il-Ġermanja sostniet li, kuntrarju għad-dikjarazzjoni tal-Kummissjoni, l-ajruport ma setax iżid id-dħul tiegħu billi jżid it-tariffi tal-ajruport. Fil-fehma tal-Ġermanja, dan huwa l-każ għaliex ħafna mill-investimenti huma relatati ma’ miżuri infrastrutturali li fuqhom ma tista’ tiġi imposta l-ebda imposta separata.

(126)

Barra minn hekk, il-Ġermanja qalet li ġeneralment ma kienx possibbli li l-ispejjeż ta’ investiment għall-bini ta’ infrastruttura ta’ ajruport jiġu koperti billi jiżdiedu t-tariffi għall-utenti tal-ajruport. Il-Ġermanja argumentat li peress li t-tariffi tal-ajruport kienu ġew approvati mill-awtorità rilevanti tal-ajruport tal-Land rispettiv fejn jinsab l-ajruport konċernat, il-kostijiet ta’ investiment għall-bini tal-infrastruttura tal-ajruport ma setgħux jingħaddew lill-utenti tal-infrastruttura bid-diskrezzjoni tal-operatur. Skont il-Ġermanja, kull żieda ulterjuri fit-tariffi ajruportwali tal-ajruport ta’ Leipzig/Halle ma tkunx konformi mas-suq u għalhekk ma tkunx infurzabbli fir-rigward tal-linji tal-ajru li jużaw l-ajruport. Skont il-Ġermanja, ta’ min ifakkar li t-tariffi tal-FLH diġà huma ogħla mil-livell tas-soltu tas-suq.

(127)

Barra minn hekk, il-Ġermanja targumenta li l-intensità ta’ għajnuna prevista kienet ġustifikata. Skont il-Ġermanja, l-ammont previst ta’ fondi pubbliċi biss jista’ jiggarantixxi li l-investimenti jsiru sal-limitu u fil-perjodu ta’ żmien meħtieġ. Il-Ġermanja qalet li l-impossibbiltà li miżuri infrastrutturali ta’ ajruport reġjonali ta’ dan it-tip jiġu finanzjati privatament intweriet biżżejjed kemm mill-prattika tat-teħid ta’ deċiżjonijiet tal-Kummissjoni u mill-fatt li ma hemm l-ebda każ magħruf li fih investituri privati ffinanzjaw miżuri bħal dawn a spejjeż tagħhom stess.

(128)

Il-Ġermanja argumentat li l-Kummissjoni ripetutament u spiss approvat intensitajiet ta’ għajnuna sa 100 %. Skont il-Ġermanja, fil-każ ta’ investimenti simili għall-investimenti inkwistjoni, il-prattika tal-Kummissjoni wriet li dawn l-investimenti jrid ikollhom intensità ta’ għajnuna ta’ mill-inqas 75 % sabiex jitwettqu.

(129)

Il-Ġermanja qalet li peress li l-FLH kienet inbniet fl-interess pubbliku tal-Ġermanja, il-miżuri infrastrutturali ma kienu bbażati fuq ebda pjan ta’ direzzjoni tan-negozju, kalkolu tal-profittabilità jew dikjarazzjonijiet finanzjarji.

(130)

Fuq talba tal-Kummissjoni, il-Ġermanja pprovdiet kalkoli tad-diskrepanza tal-likwidità kif jidher fil-qosor fit-Tabella 5 u fit-Tabella 6.

Tabella 5

Kalkolu tad-diskrepanza tal-likwidità – Xenarju I – Investimenti ffinanzjati permezz ta’ injezzjonijiet ta’ kapital li saru fl-2014

Tabella 6

Kalkolu tad-diskrepanza tal-likwidità – Xenarju II – Investimenti finanzjati permezz ta’ injezzjonijiet ta’ kapital li saru fl-istess ħin flimkien mal-investimenti

(131)

Fir-rigward tal-evitar tal-effetti negattivi bla bżonn fuq il-kompetizzjoni u fuq il-kummerċ bejn l-Istati Membri, il-Ġermanja enfasizzat li l-bilanċ ġenerali tal-miżuri infrastrutturali fl-ajruport ta’ Leipzig/Halle kien se jkun pożittiv u l-miżuri ma kienx se jkollhom effett negattiv bla bżonn fuq il-kummerċ u fuq il-kompetizzjoni bejn l-Istati Membri. F’dan ir-rigward, il-Ġermanja sostniet li l-miżuri infrastrutturali inkwistjoni huma ta’ natura mhux espansjonarja u m’għandhom l-ebda effett fuq il-volum tat-traffiku. Il-Ġermanja indikat li f’deċiżjonijiet oħra l-Kummissjoni kienet diġà rrikonoxxiet li l-miżuri li ma kinux espansjonarji fin-natura tagħhom ma għandhom l-ebda impatt materjali fuq il-kompetizzjoni bejn l-ajruporti.

(132)

Il-Ġermanja qasmet il-kompetituri potenzjali tal-FLH fi tliet kategoriji prinċipali: (i) ajruporti fl-inħawi tal-ajruport ta’ Leipzig/Halle, (ii) ajruporti Ġermaniżi oħra tal-merkanzija u (iii) ajruporti ewlenin tal-merkanzija tal-Unjoni.

(133)

Fir-rigward tal-ajruporti fil-viċinanza ta’ Leipzig/Halle, il-Ġermanja nnotat li l-ebda wieħed minn dawn l-ajruporti ma jispeċjalizza fit-trasport tal-merkanzija bl-ajru. Barra minn hekk, il-Ġermanja sostniet li l-ebda wieħed mill-ajruporti li ġejjin, bħall-ajruport ta’ Altenburg-Nobitz, ta’ Berlin Brandenburg, ta’ Dresden, ta’ Erfurt, ta’ Hof, ta’ Magdeburg, ta’ Magdeburg-Cochstedt u ta’ Praga, ma kienu f’kompetizzjoni reali ma’ Leipzig/Halle. Biex issostni dan, il-Ġermanja qalet li għal xi wħud minn dawn l-ajruporti d-distanzi ġeografiċi kienu kbar wisq, l-ajruporti kienu jinsabu f’reġjuni ekonomiċi differenti, iż-żoni ta’ lħuq kienu pjuttost differenti jew l-ajruporti kienu ta’ daqs żgħir ħafna.

(134)

Fir-rigward tal-ajruporti Ġermaniżi oħra tal-merkanzija, il-Ġermanja qalet li l-kompetizzjoni tal-ajruport ta’ Leipzig/Halle kienet limitata peress li ċ-ċentri Ġermaniżi ewlenin tat-trasport tal-merkanzija bl-ajru (Frankfurt am Main, Munich u Cologne/Bonn), li kienu f’kompetizzjoni ma’ Leipzig/Halle, kellhom restrizzjonijiet fuq il-kapaċità jew restrizzjonijiet fuq titjiriet bil-lejl.

(135)

Skont il-Ġermanja, lanqas ma kien hemm sovrappożizzjoni kompetittiva ma’ ajruporti oħra tal-merkanzija tal-Unjoni, jiġifieri Brussell u Vatry. F’dan ir-rigward, il-Ġermanja qalet li minħabba l-pożizzjoni ċentrali tiegħu f’nofs l-Ewropa, l-ajruport ta’ Leipzig/Halle huwa l-uniku li jservi kemm l-Ewropa tal-Punent kif ukoll tal-Lvant, iżda la Brussell u lanqas Vatry ma kienu fil-pożizzjoni li jiggarantixxu aċċess suffiċjenti għas-swieq dejjem aktar importanti tal-Ewropa Ċentrali u tal-Lvant. Fir-rigward tal-ajruport ta’ Vatry, il-Ġermanja rrilevat li Vatry kien ajruport żgħir ħafna u li fl-2010 il-volum tat-trasport tal-merkanzija bl-ajru tal-ajruport ta’ Leipzig/Halle kien pereżempju aktar minn 80 darba akbar mill-volum tat-trasport tal-merkanzija bl-ajru fl-ajruport ta’ Vatry. Barra minn hekk, skont il-Ġermanja, Vatry ma jgawdix l-istess konnessjonijiet tajbin għan-netwerk ferrovjarju u tat-toroq bħall-ajruport ta’ Leipzig/Halle. Fir-rigward tal-ajruport ta’ Brussell, il-Ġermanja argumentat li filwaqt li fl-aħħar snin l-ajruport ta’ Leipzig/Halle kien ra żieda fil-volum ta’ merkanzija, fuq l-istess perjodu l-ajruport ta’ Brussell kien ra tnaqqis. Barra minn hekk, skont il-Ġermanja, l-ajruport ta’ Brussell kien soġġett għal restrizzjoni sinifikanti fuq titjiriet billejl u għalhekk il-kompetizzjoni kienet limitata.

(136)

Barra minn hekk, il-Ġermanja qalet li, għall-kuntrarju tal-opinjoni tal-Kummissjoni, l-utenti potenzjali kollha kellhom aċċess ugwali u mhux diskriminatorju għall-infrastruttura tal-ajruport. Skont il-Ġermanja, l-utenti individwali tal-ajruport ma rċevew ebda ribassi mhux ġustifikati abbażi tal-volum. Barra minn hekk, fil-fehma tal-Ġermanja, il-kwistjoni ta’ aċċess ugwali u mhux diskriminatorju għall-ajruport diġà kienet ġiet indirizzata mill-Kummissjoni fid-deċiżjoni preċedenti tagħha dwar il-finanzjament tal-ajruport ta’ Leipzig/Halle. (31)

(137)

Konsegwentement, il-Ġermanja hija tal-opinjoni li l-għajnuna mill-Istat, jekk fil-fatt hija tali, tista’ titqies kompatibbli mas-suq intern.

(138)

Fis-26 ta’ Ottubru 2011, l-MFAG flimkien mal-FLH ippreżentat kummenti dwar id-deċiżjoni tal-ftuħ. Il-kummenti tal-MFAG huma ġeneralment fuq l-istess nota tal-kummenti tal-Ġermanja.

(139)

L-MFAG kompliet tgħid li l-bini ta’ infrastruttura fl-ajruport ta’ Leipzig/Halle ma jikkostitwixxix attività ekonomika. Għalhekk, skont l-MFAG il-finanzjament inkwistjoni ma jaqax fil-kamp ta’ applikazzjoni tal-Artikolu 107(1) tat-Trattat. F’dan ir-rigward, l-MFAG sostniet li investitur privat ma kienx iwettaq il-miżuri inkwistjoni u xorta jibqa’ ma jwettaqhomx. Għalhekk, l-MFAG qalet li m’hemmx suq għall-infrastruttura tal-ajruporti. F’dan il-kuntest, l-MFAG kompliet tgħid li l-ajruporti mhumiex kapaċi jiffinanzjaw l-investimenti infrastrutturali tagħhom huma stess. L-MFAG kienet imħassba li l-applikazzjoni tar-regoli dwar l-għajnuna mill-Istat għal infrastruttura ta’ ajruport se twassal għal tnaqqis fl-investimenti fl-infrastruttura tal-ajruporti.

(140)

L-MFAG qalet ukoll li l-ajruport ta’ Leipzig/Halle ġie żviluppat fl-interess pubbliku u li t-test tal-MEO mhuwiex applikabbli għall-finanzjament ta’ infrastruttura ta’ ajruport. F’dan ir-rigward, l-MFAG sostniet li fl-Unjoni ma kienx hemm każ wieħed ta’ investitur privat li bena jew li żviluppa b’mod sostanzjali ajruport mir-riżorsi tiegħu stess. Għalhekk, skont l-MFAG, minflok ma tuża t-test tal-MEO, il-Kummissjoni trid tivvaluta jekk l-infrastruttura hijiex offruta lill-utenti tagħha kollha b’mod miftuħ u mhux diskriminatorju. L-MFAG kompliet tgħid li dan huwa l-każ fl-ajruport ta’ Leipzig/Halle. Għalhekk, skont l-MFAG, il-miżuri infrastrutturali ma kinux ġew ibbażati fuq pjan ta’ direzzjoni tan-negozju jew fuq prospetti ta’ profittabilità fit-tul.

(141)

Barra minn hekk, l-MFAG kompliet tiċċara li l-bini tal-ajruport kienet għenet biex jiġu segwiti l-miri tal-politika reġjonali u biex tappoġġa reġjun ekonomikament żvantaġġat. L-MFAG saħqet li din hija responsabbiltà tipika tal-Istat u li ma tistax issir minn investituri privati, u għalhekk ma tistax tiġi valutata skont ir-regoli dwar l-għajnuna mill-Istat.

(142)

L-MFAG kompliet targumenta li anke kieku – quod non – il-finanzjament ta’ infrastruttura inġenerali jikkostitwixxi attività ekonomika, il-miżuri inkwistjoni jaqgħu taħt il-mandat tal-ordni pubblika, u għalhekk ma jikkostitwixxux għajnuna mill-Istat.

(143)

Fir-rigward ta’ attivitajiet li jaqgħu taħt il-mandat tal-ordni pubbliku, l-MFAG qalet li l-Kummissjoni għandha tiddistingwi bejn il-protezzjoni tat-trasport bl-ajru kontra theddidiet esterni, il-protezzjoni tat-traffiku tal-ajru kontra theddidiet operazzjonali, u l-protezzjoni ta’ partijiet terzi kontra theddidiet operazzjonali tat-traffiku tal-ajru. F’dan ir-rigward, l-MFAG qalet li l-protezzjoni kontra theddidiet operazzjonali u l-protezzjoni tad-drittijiet ta’ partijiet terzi għandhom jitqiesu li jaqgħu taħt il-mandat tal-ordni pubblika. L-MFAG qalet li fil-prattika tat-teħid tad-deċiżjonijiet tagħha l-Kummissjoni kienet qieset miżuri fil-qasam tal-protezzjoni kontra n-nirien, tan-navigazzjoni bl-ajru u tal-kontroll tat-traffiku tal-ajru, b’mod partikolari d-Deutscher Wetterdienst (Servizz Meteoroloġiku tal-Ġermanja) u d-Deutsche Flugsicherung (Navigazzjoni bl-Ajru tal-Ġermanja) bħala li jaqgħu taħt il-mandat tal-ordni pubblika.

(144)

Skont l-MFAG, is-self mill-azzjonisti kien ingħata skont termini tas-suq. L-MFAG qalet li l-klassifikazzjonijiet tal-MFAG minn Nord LB u minn Deutsche Kreditbank AG għandhom jittieħdu inkonsiderazzjoni. F’dan ir-rigward, l-MFAG iċċarat li n-Nord LB d-Deutsche Kreditbank AG kienu kklassifikaw lill-MFAG u lill-FLH fil-kategorija ta’ klassifikazzjoni […] bi probabbiltà medja ta’ inadempjenza ta’ […] %. L-MFAG iċċarat ukoll li l-kategorija ta’ klassifikazzjoni […] hija komparabbli mal-kategorija ta’ klassifikazzjoni esterna ta’ Standard&Poor’s ta’ […] sa […] ta’ Moody’s ta’ […] sa […] u ta’ Fitch ta’ […] sa […].

(145)

L-MFAG kompliet tgħid li s-self mill-azzjonisti tal-FLH huwa wkoll ferm kollateralizzat. Barra minn hekk, l-MFAG iċċarat li s-self tal-FLH se jintuża biex jiffinanzja investimenti infrastrutturali sostenibbli. L-MFAG iċċarat ukoll li l-assi tal-FLH mhumiex mirhuna ma xi ipoteki (“Grundpfandrechte”). Għalhekk, l-MFAG hija tal-fehma li minħabba l-klassifikazzjoni tajba ħafna u l-livell għoli ta’ kollateralizzazzjoni l-marġni tar-riskju għandu jiġi stabbilit f’massimu ta’ […] punti bażi.

(146)

Peress li l-marġni tar-riskju tas-self tal-FLH huma stabbiliti bejn […] u […] punti bażi, l-MFAG hija tal-fehma li s-self huwa skont termini tas-suq u ma jinvolvix għajnuna mill-Istat.

(147)

L-MFAG hija tal-fehma li fi kwalunkwe każ l-injezzjonijiet ta’ kapital huma kompatibbli mas-suq intern.

(148)

L-MFAG qalet li l-ajruport ta’ Leipzig/Halle għandu impatt pożittiv kbir fuq l-impjiegi fir-reġjun b’5 100 impjegat (inklużi l-impjegati tal-MFAG, tal-linji tal-ajru, tar-ristoranti, tal-impriżi tal-forniment tal-ikel, tal-awtoritajiet pubbliċi, u ta’ impriżi oħra) li jaħdmu direttament fl-ajruport u madwar 8 100 impjegat indirett.

(149)

Barra minn hekk, l-MFAG saħqet li fid-dawl tar-restrizzjonijiet fuq il-kapaċità u r-restrizzjonijiet fuq it-titjiriet bil-lejl f’ajruporti oħra (bħal Frankfurt/Main, Munich, Berlin, Düsseldorf, u Ħamburg), l-ajruport ta’ Leipzig/Halle għandu rwol importanti f’termini ta’ tnaqqis tal-konġestjoni ta’ dawn l-ajruporti Ġermaniżi l-oħra, u għalhekk jikkontribwixxi għas-sigurtà tal-provvista għall-Ġermanja kollha.

(150)

Fir-rigward tan-natura mhux diskriminatorja tat-tariffi tal-ajruport, l-MFAG qalet li l-iskeda tat-tariffi tal-ajruport fl-ajruport ta’ Leipzig/Halle ma tfasslitx biex tiffavorixxi linja tal-ajru waħda biss u l-linji tal-ajru kollha jintalbu jħallsu l-istess imposti ta’ llandjar. Għalhekk, skont l-MFAG, l-infrastruttura tintuża mill-utenti kollha tagħha b’mod uniformi u mhux diskriminatorju.

(151)

Fir-rigward tan-neċessità tal-għajnuna u l-effett ta’ inċentiv tagħha, l-MFAG qalet li l-miżuri ma kinux isiru mingħajr is-self mill-azzjonisti jew l-injezzjonijiet ta’ kapital. Skont l-MFAG, is-somma totali tal-investiment ta’ EUR 225,6 miljuni tirrapreżenta darbtejn jew tliet darbiet il-fatturat medju tal-MFAG u aktar minn ħames darbiet il-fatturat annwali medju tal-FLH fil-perjodu li fih ġew deċiżi l-proġetti ta’ infrastruttura. Skont l-MFAG, il-fatt li l-miżuri diġà twettqu parzjalment ma jeskludix il-preżenza tal-effett ta’ inċentiv peress li dawn il-miżuri saru biss wara li ġew riċevuti l-garanziji ta’ finanzjament u d-deċiżjonijiet tal-azzjonisti pubbliċi, li pprovdew ukoll il-finanzjament interim permezz tas-self min-naħa tal-azzjonisti.

(152)

L-MFAG qalet li l-miżuri inkwistjoni ma fixklux il-kompetizzjoni b’mod negattiv. Barra minn hekk, l-MFAG qieset li ma hemm l-ebda impatt negattiv fuq l-ajruport ta’ Brussell jew fuq l-ajruport ta’ Vatry. Skont l-MFAG, l-ajruport ta’ Brussell ibati minn restrizzjonijiet fuq titjiriet bil-lejl, li kienu r-raġuni għaliex id-DHL iddeċidiet li timxi lejn Leipzig/Halle fuq terminu twil. Fir-rigward ta’ Vatry, l-MFAG qalet li, skont artikoli fl-istampa, l-attività tal-merkanzija f’dan l-ajruport hija limitata ħafna (sempliċiment madwar 5 sa 6 titjiriet fil-ġimgħa).

(153)

L-ADV bagħtet il-kummenti tagħha dwar id-deċiżjoni tal-ftuħ fis-27 ta’ Ottubru 2011. Il-kummenti tal-ADV huma kompletament konformi mal-kummenti tal-MFAG. L-ADV indikat li l-ajruport ta’ Leipzig/Halle huwa importanti għall-iżvilupp reġjonali.

(154)

Id-DFS ippreżentat il-kummenti tagħha permezz ta’ ittra datata t-28 ta’ Ottubru 2011.

(155)

Id-DFS qalet li l-proġetti infrastrutturali M3 sa M8 u M10 (ara t-Tabella 2) jikkontribwixxu għall-immaniġġjar sigur u bla xkiel tat-traffiku tal-ajru fl-ajruport ta’ Leipzig/Halle. F’dan ir-rigward, id-DFS qalet li l-M3 għenet biex jittaffa l-piż fuq it-taxiways u fuq il-pontijiet li jaqsmu, l-M5 kienet meħtieġa b’urġenza biex jiġi żgurat li ma jkun hemm ebda ostakli għat-taxiing fil-parti tan-Nofsinhar tal-ajruport, u l-M8 isservi bħala l-bażi għal salvataġġ bl-ajru u għal operazzjonijiet ta’ emerġenza. Id-DFS kompliet tgħid li l-M10 se tgħin lill-ħidma tad-DFS skont it-Taqsima 29b (2) tal-Luftverkehrsgesetz (Att dwar it-Trasport bl-Ajru, “LuftVG”) fil-ħidma għall-protezzjoni tal-pubbliku kontra storbju irraġonevoli.

(156)

Landkreis Nordsachsen ippreżentat il-kummenti tagħha permezz ta’ ittra datata s-27 ta’ Ottubru 2011.

(157)

Il-Landkreis Nordsachen qalet li l-ajruport kien impetu importanti għall-iżvilupp ekonomiku u għall-impjiegi fir-reġjun. Barra minn hekk, Landkreis Nordsachsen osservat li għal raġunijiet storiċi l-ajruport għandu ħtieġa akbar ta’ aktar investimenti minn ajruporti Ġermaniżi oħra. Iddikjarat li l-kunċett ta’ attivitajiet li jaqgħu taħt il-mandat tal-ordni pubblika għandu jiġi interpretat b’mod usa’.

(158)

Il-Landkreis Nordsachsen kompliet tgħid li t-tariffi tal-ajruport mhumiex biżżejjed biex jiffinanzjaw l-investimenti meħtieġa. Fil-fehma tagħha l-injezzjonijiet ippjanati ta’ kapital kellhom effett ta’ inċentiv. Il-Landkreis Nordsachsen ikkonkludiet il-kummenti tagħha bid-dikjarazzjoni li mingħajr il-finanzjament l-ajruport ma kienx ikun jista’ jimplimenta l-proġett ta’ infrastruttura.

(159)

Il-Belt ta’ Dresden, azzjonista minoritarja fl-MFAG, ippreżentat il-kummenti tagħha fit-28 ta’ Ottubru 2011. Il-kummenti tal-Belt ta’ Dresden kienu konformi mal-kummenti tal-MFAG u tal-Landkreis Nordsachsen.

(160)

Il-Belt ta’ Dresden qalet li l-ajruport huwa l-akbar impjegatur fir-reġjun, li jimpjega direttament 5 100 persuna. Għalhekk, il-Belt ta’ Dresden saħqet li l-ajruport huwa stimulu ekonomiku importanti għar-reġjun. Barra minn hekk, il-Belt ta’ Dresden argumentat li minħabba l-permess għal titjiriet bil-lejl, l-ajruport ta’ Leipzig/Halle għandu rwol importanti fit-tnaqqis tal-konġestjoni f’ajruporti Ġermaniżi oħra.

(161)

Il-Belt ta’ Dresden qalet li l-ispejjeż ta’ investiment f’infrastruttura ta’ ajruport ma jistgħux jiġu kompletament iffinanzjati permezz ta’ tariffi ajruportwali mill-utenti tal-ajruport. Kompliet tgħid li storikament l-iżvilupp tal-ajruporti kien ġeneralment iffinanzjat minn fondi pubbliċi. Barra minn hekk, skont il-Belt ta’ Dresden, fil-Ġermanja t-tariffi tal-ajruport ma jiġux stabbiliti liberament mill-operaturi tal-ajruport, iżda jridu jiġu uffiċjalment approvati mill-awtoritajiet pubbliċi.

(162)

Il-Belt ta’ Dresden qalet ukoll li l-miżuri infrastrutturali fl-ajruport ta’ Leipzig/Halle ma affettwawx b’mod mhux xieraq is-suq intern peress li l-ajruporti Ġermaniżi u barranin kollha f’kompetizzjoni kienu qed joperaw qrib il-kapaċità sħiħa, filwaqt li l-ajruport ta’ Vatry bilkemm jitħaddem.

(163)

Fit-28 ta’ Ottubru 2011 il-Kummissjoni rċeviet il-kummenti tal-Belt ta’ Leipzig, li hija azzjonista fl-MFAG. Il-kummenti tal-Belt ta’ Leipzig kienu kompletament konformi mal-kummenti tal-Belt ta’ Dresden u tal-MFAG.

(164)

Fis-27 ta’ Ottubru 2011 l-EAT, kumpanija tat-trasport tal-merkanzija bl-ajru bbażata fl-ajruport ta’ Leipzig/Halle, ippreżentat il-kummenti tagħha dwar id-deċiżjoni tal-ftuħ. L-EAT qalet li hija sussidjarja 100 % ta’ Deutsche Post AG u tuża l-ajruport ta’ Leipzig/Halle bħala ċ-ċentru prinċipali tagħha.

(165)

L-EAT qalet li sa fejn taf hi l-utenti potenzjali kollha għandhom aċċess ugwali u mhux diskriminatorju għall-infrastruttura. L-EAT kompliet tiċċara li dan huwa appoġġjat b’mod partikulari mis-sistema trasparenti ta’ pprezzar li tapplika għall-utenti kollha.

(166)

Il-Lufthansa Cargo ppreżentat il-kummenti tagħha fis-26 ta’ Ottubru 2011. Il-kummenti tagħha huma kompletament konformi mal-kummenti tal-EAT. Il-Lufthansa Cargo kkonfermat li l-utenti potenzjali kollha għandhom aċċess ugwali u mhux diskriminatorju għall-ajruport.

(167)

Emons Spedition ippreżentat il-kummenti tagħha fit-18 ta’ Ottubru 2011. Il-kummenti ta’ Emons huma kompletament konformi ma’ tal-EAT. Emons saħqet li l-finanzjament pubbliku tat-titjib fl-infrastruttura tal-ajruport huwa essenzjali għall-ajruporti u l-utenti tal-ajruport.

(168)

Spero Logistics Europe ppreżentat il-kummenti tagħha fit-28 ta’ Ottubru 2011. Il-kummenti ta’ Spero huma kompletament konformi mal-kummenti tal-EAT u ta’ Emons Spedition.

(169)

Spero qalet ukoll li l-permess biex jiġu operati titjiriet billejl huwa ta’ importanza partikolari għat-trasport tal-merkanzija bl-ajru. Spero ċċarat li hija ddeċidiet li tibbaża l-operazzjonijiet tagħha f’Leipzig/Halle minħabba l-pożizzjoni ġeografika tiegħu (fiċ-ċentru tal-Ewropa, joffri aċċess għall-akbar suq Ewropew, u ħin iqsar ta’ titjiriet lejn l-Asja).

(170)

Fil-25 ta’ Ottubru 2011, id-Deutsch Russische Wirtschaftsallianz (“Wirtschaftsallianz”) sostniet li l-iżvilupp tal-ajruport huwa essenzjali għat-tkabbir ekonomiku fir-reġjun.

(171)

Il-Wirtschaftsallianz qalet li l-ajruport ta’ Leipzig/Halle kien importanti fil-kuntest tal-proġett SALIS stabbilit għal trasport speċjali meħtieġ għall-operazzjonijiet tan-NATO fl-Afganistan. Il-Wirtschaftsallianz argumentat li l-kundizzjonijiet għall-implimentazzjoni ta’ dan il-proġett kienu attwalment disponibbli biss f’Leipzig. Il-Wirtschaftsallianz kompliet tiċċara li dan jikkonċerna b’mod partikolari r-rekwiżiti ta’ sigurtà skont id-Direttivi tan-NATO, liċenzja operattiva 24/7, runways ta’ 3 000 metru, żoni suffiċjenti ta’ ħażna u ta’ tagħbija, u kapaċità ta’ manutenzjoni teknika għall-ajruplani Russi użati fil-proġett SALIS.

(172)

Il-Kummissjoni rċeviet ukoll kummenti mingħand Skyline Air Services, Netzwerk Logistik Leipzig-Halle e.V., Kühne+Nagel, Jet-Speed, Jade Cargo, Baring, Air Cargo Club Deutschland, Aerologic, u mingħand Volga-Dnepr. Il-kummenti tagħhom kienu kompletament konformi mal-kummenti tal-EAT, u saħqu fuq l-importanza tal-ajruport ta’ Leipzig/Halle għall-iżvilupp u għall-aċċessibbiltà reġjonali.

(173)

Il-Germanwings, is-sussidjarja ta’ Deutsche Lufthansa AG, ippreżentat il-kummenti tagħha fis-26 ta’ Ottubru 2011.

(174)

Il-Germanwings qalet li l-bini u l-iżvilupp tal-infrastruttura tal-ajruport ma setgħux jiġu kompletament iffinanzjati mit-tariffi tal-ajruport. Il-Germanwings spjegat li proporzjon kbir ħafna tal-miżuri identifikati fid-deċiżjoni tal-ftuħ kienu relatati ma’ miżuri ta’ sikurezza tal-ajru jew ma’ miżuri li jimplimentaw regoli dwar is-sikurezza. Il-Germanwings kompliet tgħid li dawn il-miżuri ma jaqgħux fil-kamp ta’ applikazzjoni tar-regoli dwar l-għajnuna mill-Istat.

(175)

Il-Germanwings saħqet li l-Kummissjoni għandha tqis is-sitwazzjoni speċifika tal-ajruport ta’ Leipzig/Halle u l-investimenti b’lura fl-infrastruttura tal-ajruport minħabba r-riunifikazzjoni tal-Ġermanja.

(176)

Barra minn hekk, il-Germanwings qalet li l-infrastruttura fl-ajruport ta’ Leipzig/Halle hija disponibbli għall-utenti potenzjali kollha mingħajr ebda diskriminazzjoni jew trattament preferenzjali de facto għal linja tal-ajru waħda.

(177)

Il-Kummissjoni rċeviet kummenti wkoll mingħand Austrian Airlines, Alltours, Bundesverband der Deutsche Luftverkehrswirtschaft, Deutscher Reise Verband, u mingħand Bundesverband der Deutschen Tourismuswirtschaft. Il-kummenti tagħhom kienu kompletament konformi mal-kummenti tal-Germanwings.

(178)

Il-BMW ippreżentat il-kummenti tagħha permezz ta’ ittra datata s-27 ta’ Ottubru 2011.

(179)

Il-BMW qalet li l-ajruport ta’ Leipzig/Halle huwa importanti għall-industrija lokali u għandu effetti esterni pożittivi fuq ir-reġjun u fuq l-impriżi stabbiliti. Il-BMW kompliet tgħid li l-Kummissjoni għandha tqis l-investiment b’lura fl-ajruport ta’ Leipzig/Halle qabel ir-riunifikazzjoni tal-Ġermanja. Minħabba l-importanza tal-ajruport għar-reġjun, il-BWM tqis li l-finanzjament pubbliku għandu jitqies kompatibbli.

(180)

L-EADS ippreżentat il-kummenti tagħha dwar id-deċiżjoni tal-ftuħ permezz ta’ ittra datata s-27 ta’ Ottubru 2011.

(181)

L-EADS indikat li l-ajruport ta’ Leipzig/Halle huwa importanti ħafna għall-ekonomija tar-reġjun u kien fattur ewlieni fid-deċiżjoni tal-EADS biex tistabbilixxi s-sussidjarja tagħha f’dan ir-reġjun.

(182)

L-EEX, kumpanija fil-kummerċ tal-enerġija li għandha l-kwartieri ġenerali tagħha f’Leipzig, ippreżentat il-kummenti tagħha fis-27 ta’ Ottubru 2011.

(183)

L-EEX qalet li l-ajruport ta’ Leipzig/Halle kien importanti ħafna għar-reġjun u għall-impjegati tal-EEX. L-EEX kompliet tgħid li ma tara l-ebda possibbiltà li tissostitwixxi lill-FLH billi tuża ajruporti Ewropej oħra bħala alternattiva.

(184)

L-IHK ippreżentat il-kummenti tagħha fis-26 ta’ Ottubru 2014.

(185)

L-IHK qalet li hemm interdipendenzi pożittivi li jirriżultaw mill-kompetizzjoni fis-suq tal-ajruporti tal-Unjoni. F’dan ir-rigward l-IHK qalet li titjib infrastrutturali f’post wieħed għandu wkoll impatt pożittiv fuq ajruporti oħra. F’dan is-sens, l-IHK kompliet tgħid li l-effetti pożittivi tan-netwerk tal-programm ta’ infrastruttura fl-ajruport ta’ Leipzig/Halle kienu predominanti. Fl-opinjoni tal-IHK hemm bżonn li jiġu kkunsidrati d-dgħufija strutturali tar-reġjun u l-investimenti b’lura fil-Ġermanja tal-Lvant. Fl-aħħar nett, l-IHK qalet li mingħajr investiment pubbliku inizjali, kien inkonċepibbli li jsiru investimenti estensivi ta’ segwitu mis-settur privat.

(186)

Il-Kummissjoni rċeviet ukoll kummenti mingħand Handwerkskammer zu Leipzig, Industrie- und Handelskammer zu Leipzig, Wirtschaftsinitiative Mitteldeutschland, u mingħand Leipziger Messe. Dawn il-kummenti kienu kompletament konformi mal-kummenti tal-BMW u tal-EADS.

(187)

L-inizjattiva taċ-ċittadini ppreżentat il-kummenti tagħha fl-24 ta’ Awwissu 2011.

(188)

L-inizjattiva taċ-ċittadini qalet li l-membri tagħha kienu nnotaw li r-runway tan-nofsinhar tintuża kważi esklussivament mid-DHL. Skont l-inizjattiva taċ-ċittadini d-DHL kienet kważi l-uniku utent tar-runway u taż-żona tax-Xlokk tal-ajruport. L-inizjattiva spjegat li fid-dawl tal-użu intensiv ta’ din l-infrastruttura mid-DHL, ma setax jiġi preżunt li l-investimenti kienu relatati mat-trasport tal-passiġġieri.

(189)

Il-Ġermanja bdiet l-osservazzjonijiet tagħha billi qalet li l-34 kumment minn partijiet terzi kienu jappoġġjaw l-implimentazzjoni tal-miżuri nnotifikati.

(190)

Il-Ġermanja qalet li l-kummenti tal-partijiet terzi kkonfermaw il-fehma tagħha li l-miżuri infrastrutturali inkwistjoni jaqgħu taħt il-mandat tal-ordni pubbliku. F’dan il-kuntest, il-Ġermanja saħqet li d-DFS enfasizzat li M3 sa M8 u M10 kienu jikkostitwixxu miżuri li kienu saru fl-eżerċizzju ta’ responsabbiltajiet governattivi. Il-Ġermanja enfasizzat ukoll li għadd ta’ partijiet terzi kienu argumentaw li r-regoli dwar l-għajnuna mill-Istat ma kinux applikabbli għall-miżuri inkwistjoni.

(191)

Barra minn hekk, il-Ġermanja indikat li l-kummenti juru biċ-ċar li l-finanzjament pubbliku huwa konformi mal-kriterji skont l-Artikolu 107(3) tat-Trattat. Il-Ġermanja qalet li b’mod partikolari l-ibliet, l-awtoritajiet lokali u l-kmamar tal-kummerċ kif ukoll l-impriżi li jinsabu fir-reġjun enfasizzaw l-importanza ekonomika u reġjonali tal-ajruport. Skont il-Ġermanja, għalhekk ma kienx hemm dubju li l-bini u l-operazzjoni tal-ajruport jaqdu objettiv definit b’mod ċar ta’ interess komuni. Barra minn hekk, il-Ġermanja argumentat li l-kummenti ta’ partijiet terzi kkonfermaw ukoll il-ħtieġa u l-proporzjonalità tal-finanzjament pubbliku.

(192)

Fir-rigward tal-possibilità ta’ impatt negattiv bla bżonn fuq il-kompetizzjoni u l-kummerċ, il-Ġermanja indikat li la l-ajruport ta’ Vatry u lanqas ta’ Brussell ma kienu ppreżentaw kummenti dwar id-deċiżjoni tal-ftuħ. Skont il-Ġermanja, dan juri li l-ebda wieħed minn dawn l-ajruporti ma kien imħasseb dwar xi impatt negattiv tal-miżuri inkwistjoni. Il-Ġermanja indikat li din il-fehma kienet appoġġjata wkoll minn partijiet terzi oħra, bħal Lufthansa Cargo, Austrian Airlines, Germanwings u Jade Cargo. Il-Ġermanja kompliet tgħid li Alltours, Deutscher Reise Verband, BARING u Aircargo Club Deutschland qalu wkoll li ma hemm l-ebda sovrappożizzjoni kompetittiva ta’ żoni ta’ qbid bejn l-ajruport ta’ Leipzig/Halle u ta’ Brussell jew ta’ Vatry.

(193)

Fir-rigward tal-ħtieġa ta’ aċċess ugwali u mhux diskriminatorju għall-ajruport, il-Ġermanja indikat li l-kummenti minn partijiet terzi jikkonfermaw li t-tariffi tal-ajruport kienu ġew stabbiliti b’mod mhux diskriminatorju.

(194)

Skont l-Artikolu 107(1) tat-Trattat “kull għajnuna, ta’ kwalunkwe forma, mogħtija minn Stat Membru jew permezz ta’ riżorsi tal-Istat, li twassal għal distorsjoni jew theddida ta’ distorsjoni għall-kompetizzjoni billi tiffavorixxi ċerti impriżi jew ċerti produtturi għandha, sa fejn tolqot il-kummerċ bejn l-Istati Membri, tkun inkompatibbli mas-suq intern.”

(195)

Il-kriterji stabbiliti fl-Artikolu 107(1) tat-Trattat huma kumulattivi. Għalhekk, sabiex jiġi stabbilit jekk il-miżuri inkwistjoni jikkostitwixxux għajnuna mill-Istat skont it-tifsira tal-Artikolu 107(1) tat-Trattat, dawk il-miżuri jridu jissodisfaw il-kundizzjonijiet li ġejjin:

(196)

Fir-rigward tal-eżistenza jew in-nuqqas ta’ eżistenza ta’ għajnuna mill-Istat, l-ewwel irid jiġi stabbilit jekk il-benefiċjarju huwiex involut f’attività ekonomika, u b’hekk jistax jitqies bħala impriża skont it-tifsira tal-Artikolu 107(1) tat-Trattat. (32)

(197)

F’dan ir-rigward, il-Ġermanja sostniet li l-kunċett ta’ “impriża” skont it-tifsira tal-Artikolu 107(1) tat-Trattat ma japplikax għall-ajruporti, għall-anqas għal dak li jikkonċerna l-finanzjament ta’ infrastruttura ta’ ajruport reġjonali. Il-Ġermanja kienet tal-fehma li l-bini ta’ din l-infrastruttura mhijiex attività ekonomika, iżda miżura ġenerali li ssegwi kunsiderazzjonijiet ta’ trasport, tal-politika ekonomika u reġjonali. Barra minn hekk, il-Ġermanja affermat li l-bini ta’ infrastruttura ta’ ajruport ma tikkostitwixxix attività ekonomika għaliex investitur privat ma kienx jidħol għal dik l-attività. F’dak ir-rigward, il-Ġermanja kompliet tgħid li l-ispejjeż fissi tal-ajruporti relatati mal-infrastruttura, mat-tagħmir u mal-operat huma ogħla mill-medja. Barra minn hekk, il-marġni ta’ manuvra tagħhom huwa limitat minħabba obbligi u kundizzjonijiet ġuridiċi stretti. Il-Ġermanja qieset ukoll li r-referenzi għas-sentenza Aéroports de Paris u għas-sentenza Leipzig/Halle huma irrelevanti għall-miżuri inkwistjoni. Fir-rigward tas-sentenza Aéroports de Paris, il-Ġermanja sostniet li s-sentenza ma tikkonċernax il-bini ta’ infrastrutturi ta’ ajruport, iżda l-operat ta’ ajruport. Barra minn hekk, il-Ġermanja qieset li s-sentenza Aéroports de Paris ma tikkonċernax l-interpretazzjoni tal-kunċett ta’ “impriża” skont it-tifsira tal-Artikolu 107(1) tat-Trattat, iżda tikkonċerna ksur tal-projbizzjoni tal-abbuż ta’ pożizzjoni dominanti skont it-tifsira tal-Artikolu 102 tat-Trattat. Fir-rigward tas-sentenza Leipzig/Halle, il-Ġermanja qieset li s-sentenza tal-Qorti Ġenerali ma għandha l-ebda effett bħala preċedent fil-ġurisprudenza, peress li hija soġġetta għal appell.

(198)

Fir-rigward tal-kunċett ta’ “impriża”, irid jiġi indikat li l-Qorti tal-Ġustizzja konsistentement iddefinixxiet impriżi bħala entitajiet involuti f’attività ekonomika, irrispettivament mill-istatus ġuridiku jew mis-sjieda tagħhom u mill-mod kif ikunu ffinanzjati (33). Kull attività li tikkonsisti fl-offerta ta’ oġġetti u servizzi f’suq hija attività ekonomika (34). In-natura ekonomika ta’ attività fiha nnifisha ma tiddependix fuq jekk l-attività tiġġenerax profitti (35).

(199)

F’Aéroports de Paris  (36), il-Qorti ddeċidiet li l-operat ta’ ajruport li jikkonsisti fil-forniment ta’ servizzi tal-ajruport lil-linji tal-ajru u lil fornituri varji tas-servizz tikkostitwixxi attività ekonomika. Fis-sentenza tagħha fil-Kawża Leipzig/Halle airport  (37), il-Qorti Ġenerali ċċarat li l-operat ta’ ajruport huwa attività ekonomika, li minnha l-bini tal-infrastruttura tal-ajruport tagħmel parti inseparabbli.

(200)

Il-Kummissjoni tfakkar li fis-sentenza tagħha Leipzig/Halle airport, il-Qorti Ġenerali sostniet li, mis-sena 2000, l-applikazzjoni tar-regoli dwar l-għajnuna mill-Istat għall-finanzjament tal-infrastruttura ta’ ajruport ma setgħetx tibqa’ tiġi eskluża (38). Konsegwentement, mid-data tas-sentenza f’Aéroports de Paris (12 ta’ Diċembru 2000), l-operat u l-bini tal-infrastruttura ta’ ajruport iridu jiġu kkunsidrati bħala kompitu li jaqa’ fil-kamp ta’ applikazzjoni tal-kontroll tal-għajnuna mill-Istat.

(201)

Fis-sentenza tagħha Leipzig/Halle airport. il-Qorti Ġenerali ddeċidiet ukoll li mhuwiex rilevanti jekk il-bini jew l-estensjoni ta’ infrastruttura tal-ajruport tippruvax tilħaq għanijiet tal-politika reġjonali, ekonomika jew tat-trasport. Skont każistika stabbilita mhuwiex rilevanti liema għanijiet qed jiġu segwiti minn miżuri speċifiċi iżda pjuttost x’effetti jikkawżaw (39).

(202)

Barra minn hekk, fis-sentenza tagħha Leipzig/Halle airport, il-Qorti Ġenerali kkonfermat li l-eżistenza ta’ suq għal infrastruttura ta’ ajruport tidher mill-fatt li l-Ajruport ta’ Leipzig Halle kien qed jikkompeti ma’ ajruporti reġjonali oħra, b’mod partikolari ma’ Vatry (Franza) u ma’ Brussell (il-Belġju) biex isir iċ-ċentru Ewropew għat-trasport tal-merkanzija bl-ajru tad-DHL.

(203)

Skont il-każistika għandu jitqies ukoll li, għall-fini tal-valutazzjoni tan-natura ekonomika tal-attivitajiet tal-operatur ta’ ajruport fil-kuntest tal-finanzjament pubbliku ta’ miżuri ta’ żvilupp infrastrutturali, ma hemm l-ebda raġuni biex l-attività tal-bini jew tat-tkabbir tal-infrastruttura tiġi diżassoċjata mill-użu sussegwenti tagħha. (40)

(204)

Barra minn hekk, fis-sentenza tagħha Leipzig/Halle airport, il-Qorti Ġenerali ddeċidiet li: “ir-runways huma elementi essenzjali għall-attivitajiet ekonomiċi mmexxija minn operatur ta’ ajruport. Il-bini ta’ runways jippermetti, għaldaqstant, lil ajruport sabiex iwettaq l-attività ekonomika prinċipali tiegħu jew fil-każijiet meta jkun jirrigwarda l-bini ta’ runway addizzjonali jew ta’ estensjoni ta’ runway eżistenti, jippermettilu li jiżviluppaha.”

(205)

Fid-dawl tal-każistika ċċitata fil-premessi 196 u 204, il-Kummissjoni tosserva li l-infrastruttura, li hija s-suġġett ta’ din id-Deċiżjoni, jew se tiġi operata direttament fuq bażi kummerċjali mill-FLH, l-operatur tal-ajruport, jew indirettament se tappoġġja u tippermetti l-operat kummerċjali tal-ajruport fis-sħuħija tiegħu.

(206)

F’dan ir-rigward, il-Kummissjoni tosserva li, skont il-liġi Ġermaniża, b’mod partikolari l-[…], it-tariffi jridu jiġu stabbiliti mill-operatur tal-ajruport u jiġu ppreżentati għall-approvazzjoni tal-Ministeru Federali tat-Trasport. Il-Kummissjoni tinnota li t-tariffi tal-ajruport jiġu stabbiliti mill-operaturi tal-ajruport fil-limiti regolatorji biex tiġi evitata kwalunkwe diskriminazzjoni inġusta bejn l-utenti tal-ajruport u l-possibilità ta’ abbużi ta’ pożizzjoni dominanti min-naħa tal-operatur tal-ajruport. Madankollu, il-Kummissjoni tqis li dan ma jipprekludix lill-operaturi tal-ajruport milli jistabbilixxu l-livell tat-tariffi tal-ajruport filwaqt li jqisu l-investimenti meħtieġa u l-ispejjeż tiegħu. B’mod partikolari dan ġie kkonfermat mill-ħtiġijiet ta’ […] u […] tal-[…]

(207)

Il-Kummissjoni tkompli tinnota li l-bini u l-iżvilupp tal-infrastruttura soġġetta għal din id-Deċiżjoni, se jippermettu li l-FLH iżżid il-kapaċità tagħha u l-attività ekonomika tagħha bħala operatur tal-Ajruport ta’ Leipzig/Halle. L-FLH, l-operatur tal-ajruport, tipprovdi servizzi tal-ajruport bi ħlas, li jirriżulta, b’mod partikolari, minn tariffi tal-ajruport, iżda wkoll minn dħul ieħor relatat mal-isfruttament tal-infrastruttura u l-provvista ta’ servizzi anċillari, bħal pereżempju l-kiri ta’ ħangars, li għandu jitqies bħala ħlas għall-provvediment ta’ servizzi mogħtija.

(208)

Għalhekk, il-Kummissjoni tqis li l-infrastruttura soġġetta għal din id-Deċiżjoni hija infrastruttura kummerċjalment sfruttabbli. Għalhekk l-FLH hija impriża skont it-tifsira tal-Artikolu 107(1) tat-Trattat.

(209)

Madanakollu, mhux l-attivitajiet kollha tal-ajruport huma neċessarjament ta’ natura ekonomika (41). Billi l-klassifikazzjoni ta’ entità bħala impriża hija dejjem relatata ma’ attività speċifika, hemm bżonn li ssir distinzjoni bejn l-attivitajiet ta’ ajruport partikolari u li jiġi stabbilit kemm dawk l-attivitajiet huma ta’ natura ekonomika. Jekk ajruport iwettaq kemm attivitajiet ekonomiċi kif ukoll attivitajiet mhux ekonomiċi, huwa għandu jitqies bħala impriża biss fir-rigward ta’ dawk tal-ewwel.

(210)

Il-Qorti sostniet li l-attivitajiet li normalment jaqgħu taħt ir-responsabbiltà tal-Istat fl-eżerċizzju tas-setgħat uffiċjali tiegħu bħala awtorità pubblika mhumiex ta’ natura ekonomika u ġeneralment ma jaqgħux fil-kamp ta’ applikazzjoni tar-regoli għall-għajnuna mill-Istat. (42) F’ajruport, attivitajiet bħall-kontroll tat-traffiku tal-ajru, il-pulizija, id-dwana, it-tifi tan-nar u attivitajiet neċessarji għas-salvagwardja tal-avjazzjoni ċivili kontra atti ta’ interferenza illegali u l-investimenti relatati mal-infrastruttura u t-tagħmir neċessarju biex jitwettqu dawn l-attivitajiet huma ġeneralment meqjusa bħala ta’ natura mhux ekonomika. (43)

(211)

Il-finanzjament pubbliku ta’ tali attivitajiet mhux ekonomiċi ma jikkostitwixxix għajnuna mill-Istat, iżda jrid ikun strettament limitat biex jikkumpensa għall-ispejjeż li dawn jikkawżaw u ma jistax jintuża biex jiffinanzja attivitajiet oħra (44). Kull kumpens żejjed possibbli mill-awtoritajiet pubbliċi tal-kostijiet imġarrba fir-rigward ta’ attivitajiet mhux ekonomiċi jista’ jikkostitwixxi għajnuna mill-Istat. Barra minn hekk, jekk ajruport ikun, flimkien mal-attivitajiet ekonomiċi tiegħu, involut f’attivitajiet mhux ekonomiċi, hija meħtieġa kontabbiltà separata tal-kostijiet sabiex jiġi evitat kwalunkwe trasferiment ta’ fondi pubbliċi bejn l-attivitajiet ekonomiċi u mhux ekonomiċi.

(212)

Finanzjament pubbliku ta’ attivitajiet mhux ekonomiċi ma jridx iwassal għal diskriminazzjoni bla bżonn bejn l-ajruporti. Fil-fatt, hija każistika stabbilita li hemm vantaġġ meta l-awtoritajiet pubbliċi jeħilsu lil impriżi mill-kostijiet inerenti għall-attivitajiet ekonomiċi tagħhom (45). Għaldaqstant, meta skont ċerta ordni ġuridika jkun normali li l-ajruporti jkollhom iġorru ċerti kostijiet inerenti għall-operat tagħhom, filwaqt li ajruporti ċivili ma jagħmlux dan, dawn tal-aħħar jistgħu jingħataw vantaġġ, kemm jekk dawn il-kostijiet ikunu relatati ma’ attività, li ġeneralment hi kkunsidrata ta’ natura mhux ekonomika, kif ukoll jekk le.

(213)

Għalhekk, fid-dawl tal-premessi 209 u 212, il-Kummissjoni għandha tanalizza n-natura tal-miżuri infrastrutturali soġġetti għal din id-Deċiżjoni li jsiru fl-ajruport ta’ Leipzig/Halle.

(214)

Il-Ġermanja affermat li l-miżuri notifikati M1 sa M11 jittrattaw attivitajiet li jaqgħu taħt il-mandat tal-ordni pubbliku u li l-finanzjament ta’ dawn l-attivitajiet huwa strettament limitat għal-limitu tal-ispejjeż meħtieġa għal dawn il-miżuri. Għalhekk, il-Ġermanja kienet tal-fehma li dawn l-ispejjeż ma jaqgħux fil-kamp ta’ applikazzjoni tar-regoli dwar l-għajnuna mill-Istat. F’dan ir-rigward, il-Ġermanja affermat li l-miżuri M1 sa M11 jaqgħu f’waħda minn dawn il-kategoriji li ġejjin:

(215)

Fir-rigward ta’ miżuri relatati mas-sikurezza operazzjonali, il-Kummissjoni tqis li l-iżgurar ta’ operazzjonijiet siguri fl-ajruport huwa parti normali mill-attività ekonomika tal-operat ta’ ajruport (47). F’dan il-kuntest, ta’ min jinnota li anke l-ispejjeż relatati ma’ rekwiżiti u standards regolatorji ma jistgħux jitqiesu li jaqgħu taħt il-mandat tal-ordni pubblika. Soġġetti għal reviżjoni aktar dettaljata fir-rigward tal-attivitajiet u l-ispejjeż individwali, il-Kummissjoni ssib li l-miżuri mfassla biex jiżguraw is-sigurtà tal-operazzjonijiet fl-ajruport ma jikkostitwixxux attivitajiet li jaqgħu taħt il-mandat tal-ordni pubblika. Kull impriża li tkun tixtieq topera f’suq partikolari trid tiżgura s-sigurtà tal-installazzjonijiet (għall-ajruporti dawn huma pereżempju r-runways, it-taxiways u r-rampi tal-ajruport), u trid tiżgura wkoll konformità ma’ standards regolatorji.

(216)

Fir-rigward tar-runways, it-taxiways u r-rampi tal-ajruport, il-Kummissjoni tqis li dawn huma elementi essenzjali għall-attivitajiet ekonomiċi mmexxija minn operatur ta’ ajruport. Għalhekk, il-bini ta’ runways, taxiways u rampi tal-ajruport jippermetti lil operatur ta’ ajruport jeżerċita l-attività ekonomika ewlenija tiegħu.

(217)

Fir-rigward tal-miżuri skont it-Taqsima 8 tal-LuftSiG, il-kontroll tat-traffiku tal-ajru, is-servizzi meteoroloġiċi u t-taqsima tat-tifi tan-nar jistgħu, fil-prinċipju, jitqiesu li jikkostitwixxu attivitajiet li jaqgħu taħt il-mandat tal-ordni pubblika.

(218)

Fir-rigward tal-qafas ġuridiku applikabbli, il-Ġermanja sostniet li għat-taqsima tat-tifi tan-nar ma hemm l-ebda norma ġuridika li strettament timponi dawn l-ispejjeż fuq l-operatur ta’ ajruport. Barra minn hekk, il-Kummissjoni tosserva li r-remunerazzjoni tal-ispejjeż għal taqsima tat-tifi tan-nar taqa’ fil-kompetenza ġuridika tal-Länder u li ġeneralment dawn l-ispejjeż jitħallsu mill-awtoritajiet reġjonali rilevanti. Ir-rimunerazzjoni ta’ dawn l-ispejjeż hija limitata sal-punt meħtieġ biex jiġu koperti dawn l-ispejjeż.

(219)

Fir-rigward tal-kontroll tat-traffiku tal-ajru u s-servizzi meteoroloġiċi, il-Kummissjoni tinnota li t-Taqsima 27(d) u t-Taqsima 27(f) tal-LuftVG jipprovdu li l-ispejjeż relatati mat-Taqsima 27(c) tal-LuftVG jiġu koperti mill-Istat għal għadd ta’ ajruporti speċifiċi. L-ajruporti huma eliġibbli għal kopertura tal-ispejjeż bħala “ajruporti rikonoxxuti” skont it-Taqsima 27(d) u t-Taqsima 27(f) tal-LuftVG jekk il-Ministeru Federali tat-Trasport ikun irrikonoxxa ħtieġa minħabba raġunijiet ta’ sigurtà u interessi relatati mal-politika tat-trasport (48). L-ajruporti Ġermaniżi li ma ġewx rikonoxxuti mhumiex eliġibbli għall-kopertura tal-ispejjeż skont it-Taqsima 27(d) u t-Taqsima 27(f) tal-LuftVG u, għalhekk, fil-prinċipju, għandhom jassumu l-ispejjeż relatati mal-miżuri previsti fit-Taqsima 27(c) tal-LuftVG huma nfushom. Dawn l-ispejjeż huma inerenti għall-operat tal-ajruporti. Peress li xi ajruporti jridu jġarrbu dawn l-ispejjeż huma stess, filwaqt li ajruporti oħra le, dawn tal-aħħar jistgħu jingħataw vantaġġ, anki jekk il-miżuri ta’ kontroll u ta’ sikurezza tal-ajru kif ukoll is-servizzi meteoroloġiċi jistgħu jitqiesu li mhumiex ekonomiċi. L-ajruport ta’ Leipzig/Halle ġie rikonoxxut bħala ajruport tali u, għalhekk, huwa eliġibbli għall-kopertura tal-ispejjeż skont it-Taqsima 27(d) u t-Taqsima 27(f) tal-LuftVG. L-ajruporti l-oħra jridu jassumu dawn l-ispejjeż huma stess. Għalhekk, il-kopertura tal-ispejjeż tal-ajruport ta’ Leipzig/Halle relatati ma’ miżuri ta’ kontroll tal-ajru u ta’ sikurezza kif ukoll għal servizzi meteoroloġiċi skont it-Taqsima 27(d) u t-Taqsima 27(f) tal-LuftVG tagħti vantaġġ lill-ajruport ta’ Leipzig/Halle.

(220)

Fir-rigward tal-miżuri skont it-Taqsima 8 tal-LuftSiG, jidher li l-Ġermanja tqis li l-ispejjeż kollha relatati mal-miżuri preskritti fih jistgħu jitħallsu mill-awtoritajiet pubbliċi rilevanti. Madankollu, il-Kummissjoni tinnota li skont it-Taqsima 8(3) tal-LuftSiG jistgħu jiġu rimborżati biss l-ispejjeż relatati mal-forniment u l-manutenzjoni ta’ spazji u ta’ postijiet meħtieġa għat-twettiq tal-attivitajiet skont it-Taqsim 5 tal-LuftSiG. L-ispejjeż l-oħra kollha jridu jitħallsu mill-operatur tal-ajruport. Għalhekk, peress li l-finanzjament pubbliku mogħti lill-FHL ħeles lil din l-impriża minn spejjeż li kellha ssostni skont it-Taqsima 8(3) tal-LuftSiG, dak il-finanzjament pubbliku mhuwiex eżentat minn skrutinju skont ir-regoli tal-Unjoni dwar l-għajnuna mill-Istat. Xorta waħda, irrispettivament mill-klassifikazzjoni legali ta’ dawk l-ispejjeż bħala li jaqgħu taħt il-mandat tal-ordni pubbliku jew le, intwera li, taħt il-qafas ġuridiku applikabbli, dawn għandhom jitħallsu mill-operatur tal-ajruport. Għaldaqstant, fejn l-Istat għandu jħallas dawk l-ispejjeż, l-operatur tal-ajruport ikun inħeles minn spiża li normalment kien ikollu jġarrab.

(221)

Fid-dawl tal-kunsiderazzjonijiet fil-premessi 215 u 220, il-Kummissjoni tqis li huwa xieraq li toħroġ konklużjonijiet aktar speċifiċi dwar l-ispejjeż ta’ investiment li allegatament jaqgħu taħt il-mandat tal-ordni pubbliku.

(222)

Il-Ġermanja sostniet li l-miżuri M1, M2 u M10 jaqgħu taħt il-mandat tal-ordni pubbliku, minħabba li huma mmirati biex jipproteġu lil partijiet terzi kontra riskji operazzjonali tat-trasport bl-ajru, bħall-protezzjoni tas-sidien tad-djar u tal-ambjent mill-effetti ta’ tniġġis akustiku.

(223)

Il-Kummissjoni tqis li l-ispejjeż relatati mal-miżuri M1, M2 u M10 jikkostitwixxu spejjeż normali li impriża jkollha ġġarrab sabiex tibni installazzjonijiet li jkunu konformi ma’ ċerti standards regolatorji. Barra minn hekk, dawn il-miżuri ma jistgħux jiġu diżassoċjati mill-attività ekonomika tal-ajruport. Eżempju ta’ dan huwa partikularment muri mill-fatt li mingħajr dawn il-miżuri l-ajruport ma jitħalliex jopera titjiriet bil-lejl u ma jitħalliex jikkonċentra fuq in-negozju tal-merkanzija bl-ajru b’rabta mad-deċiżjoni ta’ approvazzjoni tal-pjan għall-bini tar-runway tan-Nofsinhar fl-ajruport ta’ Leipzig/Halle u l-istrateġija ta’ espansjoni tiegħu.

(224)

Għalhekk, il-Kummissjoni tqis li l-miżuri M1, M2 u M10 ma jistgħux jitqiesu li jaqgħu taħt il-mandat tal-ordni pubblika.

(225)

F’dan il-każ l-estensjoni tar-runway ġiet ippjanata sabiex jiġi żgurat li l-inġenji tal-ajru tal-merkanzija b’MTOW għoli jistgħu jitilqu mingħajr ebda restrizzjoni fuq it-tagħbija, filwaqt li l-estensjoni tar-rampa għandha tipprovdi distribuzzjoni aħjar tal-movimenti tat-titjiriet. Barra minn hekk, fir-rigward tat-taxiways, il-Kummissjoni tinnota li f’ajruport, it-taxiways jgħaqqdu lir-runways mar-rampi, mal-ħangars, mat-terminals u ma’ faċilitajiet oħra. Dawn il-konnessjonijiet jippermettu lill-ajruplan li jitlaq minn fuq ir-runway, u jippermetti lil ajruplan ieħor jillandja jew jitlaq. Għalhekk, it-taxiways u l-pontijiet li jaqsmu huma intrinsikament marbuta mar-runways li għalihom l-operatur tal-ajruport jirċievi tariffi. Barra minn hekk, l-information pprovduta mill-Ġermanja tikkonferma li, fid-dawl tal-volum u tal-flussi tat-traffiku, dawn il-miżuri huma essenzjali. Kieku ma sarux il-binijiet, l-ajruport ma kienx jibbenefika miż-żieda mistennija fil-flussi tat-traffiku jew il-volum attwali tal-flussi tat-traffiku kien ikollu jitnaqqas sabiex jiġi żgurat l-operat sigur tal-inġenji tal-ajru. Il-Kummissjoni tqis li dan ma jikkontradixxix il-fatt li ċertu numru ta’ taxiways u pontijiet li jaqsmu jistgħu jintużaw biss b’mod sigur għal volum limitat ta’ traffiku.

(226)

F’dan ir-rigward, il-Kummissjoni tfakkar li r-runways, it-taxiways u r-rampi tal-ajruport huma elementi essenzjali għall-attivitajiet ekonomiċi li fihom ikun involut operatur ta’ ajruport. Għalhekk il-bini ta’ runways, taxiways u rampi tal-ajruport jippermetti lill-operatur ta’ ajruport jeżerċita l-attività ekonomika ewlenija tiegħu u ma jistax jiġi diżassoċjat minn din l-attività ekonomika.

(227)

Il-Kummissjoni tosserva li l-miżuri M3, M4, M5, M6, M12, M 13, M14, M15 u M16 jittieħdu fuq bażi kummerċjali mill-operatur tal-ajruport. Għalhekk huma infrastrutturi li jistgħu jiġu sfruttati b’mod kummerċjali, u ma jistgħux jitqiesu li jaqgħu taħt il-mandat tal-ordni pubblika.

(228)

Il-Kummissjoni tosserva li l-miżura M 11 tinvolvi t-tagħmir ta’ bini eżistenti bi provvista tal-elettriku u tal-ilma, b’impjanti tal-ilma mormi u l-iskular tal-ilma tax-xita, kif ukoll miżuri għat-tnaqqis addizzjonali tal-istorbju.

(229)

Fid-dawl tal-valutazzjoni li saret fil-premessi 215 u 220, dawn il-miżuri ma jittrattawx attivitajiet li normalment jaqgħu taħt ir-responsabbiltà tal-Istat fl-eżerċizzju tas-setgħat uffiċjali tiegħu bħala awtorità pubblika. Pjuttost jikkontribwixxu għat-titjib tal-infrastruttura li tintuża għal skopijiet kummerċjali u, għalhekk, jinvolvu attività ekonomika u, għalhekk, ma jistgħux jitqiesu li jaqgħu taħt il-mandat tal-ordni pubbliku.

(230)

Fir-rigward tal-istazzjon għat-tifi tan-nar u t-tagħmir għat-tifi tan-nar, kif iddikjarat fil-premessa (218), din l-attività tista’ ġeneralment titqies li taqa’ taħt il-mandat tal-ordni pubblika.

(231)

Rigward il-qafas ġuridiku, il-Ġermanja sostniet li fir-rigward tal-istazzjon għat-tifi tan-nar u t-tagħmir għat-tifi tan-nar ma hemm l-ebda norma ġuridika li strettament timponi dawn l-ispejjeż fuq l-operatur tal-ajruport. Barra minn hekk, il-Kummissjoni tosserva li r-rimunerazzjoni tal-ispejjeż għall-istazzjon ġdid għat-tifi tan-nar u għat-tagħmir għat-tifi tan-nar taqa’ fil-kompetenza ġuridika tal-Länder u li ġeneralment dawn l-ispejjeż jitħallsu mill-awtoritajiet reġjonali rilevanti, kif sostniet il-Ġermanja. Ir-rimunerazzjoni ta’ dawn l-ispejjeż hija limitata sal-punt meħtieġ biex jiġu koperti dawn l-ispejjeż.

(232)

Għalhekk, l-ispejjeż ta’ bini li għandhom x’jaqsmu mal-istazzjon ġdid għat-tifi tan-nar u l-ispejjeż għax-xiri ta’ tagħmir għat-tifi tan-nar jistgħu jitqiesu li jaqgħu taħt il-mandat tal-ordni pubbliku.

(233)

Fir-rigward tal-ħangar b’għanijiet multipli, il-Ġermanja affermat li dan jaqa’ taħt il-mandat tal-ordni pubblika, għaliex f’każ ta’ emerġenza jintuża bħala kenn ta’ emerġenza. Skont il-Ġermanja, l-ispejjeż għall-bini ta’ dan il-ħangar jaqa’ wkoll taħt il-mandat tal-ordni pubblika, minħabba li bħalissa jintuża għall-ħżin ta’ tagħmir għal servizzi li jingħataw fix-xitwa meħtieġa għall-operat sigur tal-ajruport matul ix-xitwa.

(234)

Fir-rigward tal-bini tal-ħangar b’għanijiet multipli fl-ajruport ta’ Leipzig/Halle, il-Kummissjoni tosserva li dan il-bini jista’ jintuża għal skopijiet differenti. Barra minn hekk, kif diġà ntqal fil-premessa 215, l-ispejjeż tat-tagħmir għal servizzi li jingħataw fix-xitwa (M9.3) meħtieġa għall-operat sigur tal-ajruport huma spejjeż normali tat-tmexxija ta’ negozju u ma jistgħux jitqiesu li jaqgħu taħt il-mandat tal-ordni pubbliku. Konsegwentement, il-Kummissjoni tqis li anke l-ispejjeż tal-bini tal-ħangar b’għanijiet multipli ma jaqgħux fil-kamp ta’ applikazzjoni tal-mandat politiku.

(235)

Madankollu, din is-sejba ma tipprekludix lill-Ġermanja milli f’sitwazzjonijiet ta’ emerġenza tafda lill-ajruport b’kompiti speċifiċi li jaqgħu taħt is-Servizzi ta’ Interess Ekonomiku Ġenerali.

(236)

Il-Ġermanja targumenta li ż-żoni addizzjonali għat-tneħħija tas-silġ huma meħtieġa għall-operazzjoni sigura u f’waqtha tal-inġenji tal-ajru fl-ajruport. Skont il-Ġermanja, l-estensjoni taż-żoni eżistenti għat-tneħħija tas-silġ hija neċessarja minħabba t-traffiku dejjem jiżdied fl-ajruport sabiex jiġi evitat dewmien tat-titjiriet skedati. Barra minn hekk, il-Ġermanja tisħaq li d-dħul mis-servizzi tat-tneħħija tas-silġ ipprovduti mill-ajruport ma jkoprux l-ispejjeż tat-twaqqif tal-infrastruttura.

(237)

L-ewwel nett, il-Kummissjoni tinnota li l-fatt jekk attività tħallix qligħ jew le mhuwiex deċiżiv għall-kunċett ta’ attività ekonomika (49). It-tieni nett, il-Kummissjoni tinnota li s-servizzi tat-tneħħija tas-silġ jingħataw bi ħlas lil-linji tal-ajru. Huma servizzi essenzjali li kull ajruport jipprovdi bħala parti mill-attività ekonomika tiegħu. Aktar ma jingħataw servizzi bħal dawk aktar titjiriet ikunu jistgħu jitilqu mill-ajruport, u b’hekk l-ajruport ikun jista’ jżid id-dħul tiegħu.

(238)

Bħala konsegwenza, il-Kummissjoni tqis li s-servizzi tat-tneħħija tas-silġ huma intrinsikament marbuta mal-isfruttament ekonomiku ta’ ajruport, u ma jistgħux jiġu diżassoċjati minn din l-attività, u b’hekk iridu jitqiesu bħala attivitajiet ekonomiċi.

(239)

Il-miżura tkopri t-twaqqif ta’ spazju għall-parkeġġ tal-ħelikopters li se jintuża biss bħala bażi għas-servizzi ta’ salvataġġ bl-ajru.

(240)

Il-Kummissjoni tqis li l-ħolqien ta’ ħeliport jiffaċilita s-salvataġġ bl-ajru. Għalhekk, il-forniment ta’ ħeliport għal servizzi ta’ salvataġġ jista’ jitqies li jaqa’ taħt il-mandat tal-ordni pubbliku. Il-kumpens irid ikun strettament marbut mal-ispejjeż ta’ dawn is-servizzi.

(241)

Il-miżuri addizzjonali ta’ infrastruttura jinkludu l-bini mill-ġdid tal-punt ta’ kontroll I, il-kostruzzjoni ta’ bini funzjonali tas-sigurtà biex jiġu ssodisfati l-ħtiġijiet tal-pulizija federali u reġjonali, id-dwana, farm għall-annimali u ċ-ċint tal-perimetru tal-ajruport (li jinkludi sistema diġitali ta’ sorveljanza bil-vidjo u b’ditekters tal-moviment). Skont il-Ġermanja dawn il-miżuri huma neċessarji għas-salvagwardja tal-avjazzjoni ċivili kontra atti ta’ interferenza illegali u għalhekk jaqgħu fil-kamp ta’ applikazzjoni tat-Taqsima 8 tal-LuftSiG.

(242)

Rigward il-miżuri skont it-Taqsima 8 tal-LuftSiG, jidher li l-Ġermanja tqis li l-ispejjeż kollha relatati mal-miżuri preskritti fih jistgħu jiġġarrbu mill-awtoritajiet pubbliċi rilevanti. Madankollu, il-Kummissjoni tinnota li skont it-Taqsima 8(3) tal-LuftSiG jistgħu jiġu rimborżati biss l-ispejjeż relatati mal-forniment u l-manutenzjoni ta’ spazji u ta’ postijiet meħtieġa għat-twettiq tal-attivitajiet skont it-Taqsima 5 tal-LuftSiG. L-ispejjeż l-oħra kollha għandhom jiġġarrbu mill-operatur tal-ajruport. Għalhekk, sal-punt li l-finanzjament pubbliku mogħti lill-FLH jeħles lil din l-impriża minn spejjeż li kellha ssostni skont it-Taqsima 8(3) tal-LuftSiG, dak il-finanzjament pubbliku mhuwiex eżentat mill-iskrutinju skont ir-regoli tal-Unjoni dwar l-għajnuna mill-Istat.

(243)

Fir-rigward tal-ispejjeż relatati mal-użu tal-bini tas-sigurtà funzjonali mis-Servizz Meteoroloġiku Ġermaniż, il-Kummissjoni tinnota li t-Taqsima 27(f) tal-LuftVG tirregola li l-ispejjeż relatati mat-Taqsima 27(c) tal-LuftVG jiġu koperti mill-Istat għal għadd ta’ ajruporti speċifiċi. L-ajruporti jkunu eliġibbli għall-kopertura tal-ispejjeż bħala “ajruporti rikonoxxuti“ skont it-Taqsima 27(f) tal-LuftVG jekk il-Ministeru Federali tat-Trasport ikun irrikonoxxa neċessità minħabba raġunijiet ta’ sigurtà u interessi relatati mal-politika tat-trasport. L-ajruporti Ġermaniżi li ma jkunux ġew rikonoxxuti mhumiex eliġibbli għall-kopertura tal-ispejjeż skont it-Taqsima 27(f) tal-LuftVG u għalhekk, fil-prinċipju, għandhom iġarrbu huma stess l-ispejjeż relatati mal-miżuri previsti fit-Taqsima 27(c) tal-LuftVG. Dawn l-ispejjeż huma inerenti għall-operat tal-ajruporti. Peress li xi ajruporti jridu jġarrbu dawn l-ispejjeż huma stess filwaqt li ajruporti oħra le, dawn tal-aħħar jistgħu jkunu ngħataw vantaġġ, anki jekk is-Servizz Meteoroloġiku Ġermaniż jista’ jiġi meqjus bħala mhux ekonomiku. L-ajruport ta’ Leipzig/Halle ġie rikonoxxut bħala tali ajruport u b’hekk huwa eliġibbli għall-kopertura tal-ispejjeż skont it-Taqsima 27(f) tal-LuftVG. L-ajruporti l-oħra għandhom iġarrbu dawn l-ispejjeż huma stess. Għalhekk, il-kopertura tal-ispejjeż tal-ajruport ta’ Leipzig/Halle relatati mas-servizzi meteoroloġiċi skont it-Taqsima 27(f) tal-LuftVG tagħti vantaġġ lill-ajruport ta’ Leipzig/Halle.

(244)

Fid-dawl tas-sejbiet fit-Taqsima 6.1.1, l-FLH hija impriża skont it-tifsira tal-Artikolu 107(1) tat-Trattat.

(245)

Fir-rigward tal-konklużjoni fit-Taqsima 6.1.2, il-finanzjament tal-miżuri li ġejjin ma jistax jitqies li jaqa’ taħt il-mandat tal-ordni pubblika: M1 akkwist ta’ art, rilokazzjoni, tnaqqis tal-istorbju u ppjanar li jakkumpanja l-konservazzjoni tal-pajsaġġ, M2 struttura għall-ittestjar tal-magni, M3 it-taxiway u l-pont li jaqsam “E7”, M4 estensjoni tar-runway tat-tramuntana (spejjeż tal-ippjanar), M5 ikklerjar tas-sit bi tħejjija għall-bini tat-taxiway “Victor”, M5 ħangar b’għanijiet multipli, M6 taxiway parallela “Victor”, M7 żoni addizzjonali għat-tneħħija tas-silġ, M9.3 tagħmir għal servizzi li jingħataw fix-xitwa, M10 tnaqqis addizzjonali tal-istorbju, M11 Fażi 1 tal-iżvilupp tal-land side taż-żona tax-Xlokk, M12 proċedura ta’ approvazzjoni tal-pjan għall-estensjoni tan-Nofsinhar (ir-runway u r-rampa tal-ajruport), M13 espansjoni tar-rampa tat-Tramuntana, M14 espansjoni tar-rampa tal-Lvant, M15 adattament tal-infrastruttura, u M16 miżuri addizzjonali ta’ infrastruttura, bħall-estensjoni tal-ħangar tat-Tramuntana u l-bini ta’ terminal ġdid tal-avjazzjoni u ta’ ħangar għall-ajruplani żgħar. Il-finanzjament ta’ dawn l-attivitajiet jippermetti lil operatur tal-ajruport li jeżerċita l-attività ekonomika ewlenija tiegħu u ma jistax jiġi diżassoċjat minn din l-attività.

(246)

Fir-rigward ta’ M5 stazzjon ġdid għat-tifi tan-nar, M9 tagħmir għat-tifi tan-nar u M8 ħeliport, il-Kummissjoni tqis li dawn il-miżuri jistgħu jitqiesu li jaqgħu taħt il-mandat tal-ordni pubblika (ara t-Taqsima 6.1.2).

(247)

Fir-rigward ta’ M9 miżuri addizzjonali ta’ infrastruttura, bħall-bini mill-ġdid tal-punt ta’ kontroll I, il-kostruzzjoni ta’ bini funzjonali tas-sigurtà biex jiġu sodisfatti l-ħtiġijiet tal-pulizija federali u reġjonali, id-dwana, farm għall-annimali u ċ-ċint tal-perimetru tal-ajruport (li jinkludi sistema diġitali ta’ sorveljanza bil-vidjo u b’detetturi tal-moviment), il-Kummissjoni tqis li dawn l-attivitajiet jistgħu jaqgħu taħt il-mandat tal-ordni pubblika. Madankollu, sakemm dawn il-miżuri jaqgħu taħt it-Taqsima 8(3) tal-LuftSiG, skont din id-dispożizzjoni tal-liġi Ġermaniża jistgħu jiġu rimborżati biss l-ispejjeż relatati mal-forniment u l-manutenzjoni ta’ spazji u postijiet meħtieġa għat-twettiq tal-attivitajiet skont it-Taqsima 5 tal-LuftSiG. L-ispejjeż l-oħra kollha għandhom jiġġarrbu mill-operatur tal-ajruport. Għalhekk, diment li l-finanzjament pubbliku mogħti lill-FLH b’hekk jeħles lil din l-impriża minn spejjeż li kellha ġġarrab skont it-Taqsima 8(3) tal-LuftSiG, dak il-finanzjament pubbliku mhuwiex eżentat mill-iskrutinju taħt ir-regoli tal-Unjoni dwar l-għajnuna mill-Istat.

(248)

Fir-rigward tal-ispejjeż relatati mal-użu tal-bini tas-sigurtà funzjonali mis-Servizz Meteoroloġiku Ġermaniż (relatati ma’ M9), għar-raġunijiet fil-premessa 243 l-Kummissjoni tqis li l-kopertura tal-ispejjeż tal-ajruport ta’ Leipzig/Halle relatati mas-servizzi meteoroloġiċi skont it-Taqsima 27(f) tal-LuftVG tagħti tagħti vantaġġ lill-ajruport ta’ Leipzig/Halle, anki jekk is-Servizz Meteoroloġiku Ġermaniż jista’ jitqies bħala mhux ekonomiku.

(249)

Qabel ma jiġi vvalutat jekk is-self min-naħa tal-azzjonisti favur l-FLH jikkostitwixxix għajnuna mill-Istat, hemm bżonn li jiġi stabbilit jekk is-self mill-azzjonisti u l-injezzjonijiet ta’ kapital għandhomx jitqiesu bħala miżuri separati jew bħala miżura waħda.

(250)

L-evidenza turi li ż-żewġ operazzjonijiet kienu ġew deċiżi fl-istess żmien, bħala parti minn pjan usa’ biex jiġi ffinanzjat it-titjib tal-infrastruttura tal-ajruport, u li l-azzjonisti tal-FLH kellhom l-intenzjoni li jikkonvertu s-self tagħhom f’ekwità. Madankollu, il-Ġermanja ddikjarat li l-injezzjonijiet ta’ kapital ma ngħatawx b’mod irrevokabbli u li l-FLH ma għandha l-ebda intitolament dirett għaż-żieda fil-kapital.

(251)

F’dawn iċ-ċirkustanzi, il-Kummissjoni tqis li s-self mill-azzjonisti u l-injezzjonijiet ta’ kapital jistgħu jitqiesu bħala miżuri separati.

(252)

Sabiex jiġi verifikat jekk impriża bbenefikatx minn vantaġġ ekonomiku li rriżulta mill-għoti ta’ self b’termini privileġġjati, il-Kummissjoni tapplika l-kriterju tal-“prinċipju ta’ mutwanti tal-ekonomija tas-suq”. Skont dak il-prinċipju, obbligazzjonijiet li jitpoġġew għad-dispożizzjoni ta’ kumpanija mill-Istat, direttament jew indirettament, f’ċirkostanzi li jikkorrispondu għall-kundizzjonijiet normali tas-suq, ma għandhomx jitqiesu bħala għajnuna mill-Istat (50).

(253)

F’dan il-każ, il-Kummissjoni trid tevalwa jekk il-kundizzjonijiet tas-self mill-azzjonisti (ara t-Tabella 3) mogħti lill-FLH jagħtuhiex vantaġġ ekonomiku, li l-impriża benefiċjarja ma kinitx tikseb f’kundizzjonijiet normali tas-suq.

(254)

Il-Ġermanja hija tal-fehma li l-“prinċipju ta’ mutwanti tal-ekonomija tas-suq“ kien ġie rispettat bis-sħiħ peress li s-self mill-azzjonisti kien ingħata bil-kundizzjonijiet tas-suq. Sabiex tiġġustifika l-kundizzjonijiet tas-self inkwistjoni, il-Ġermanja tqabbel il-kundizzjonijiet tas-self mill-azzjonisti mal-kundizzjonijiet ipprovduti minn banek oħra (ara l-argumenti mogħtija fit-Taqsimiet 3.3.1 u 3.3.2).

(255)

Skont il-prattika ta’ teħid ta’ deċiżjonijiet tagħha, sabiex tiddetermina jekk il-finanzjament ivvalutat kienx ingħata f’kundizzjonijiet favorevoli, il-Kummissjoni tista’ – fin-nuqqas ta’ indikaturi oħra – tqabbel ir-rata tal-imgħax fuq is-self inkwistjoni mar-rata referenzjali tal-Kummissjoni. Ir-rata referenzjali tal-Kummissjoni tiġi stabbilita skont il-metodoloġija stabbilita fil-Komunikazzjoni dwar ir-Rata Referenzjali tal-2008.

(256)

Il-Komunikazzjoni dwar ir-Rata Referenzjali tal-2008 tistabbilixxi metodu biex jiġu stabbiliti rati ta’ referenza u ta’ skont li jiġu applikati bħala indikatur għar-rata tas-suq. Madankollu, minħabba li r-rata referenzjali tal-Kummissjoni hija indikatur, fejn f’każ speċifiku l-Kummissjoni jkollha indikaturi oħra tar-rata tal-imgħax li l-mutwatarju jista’ jikseb fuq is-suq, tista’ tibbaża l-valutazzjoni tagħha fuq dawk l-indikaturi.

(257)

Sabiex tkun tista’ tivvaluta l-kundizzjonijiet tas-self mill-azzjonisti, il-Kummissjoni għandha l-ewwel tivvaluta l-affidabbiltà tal-kreditu tal-FLH.

(258)

L-FLH ma tiġix ikklassifikata minn aġenzija tal-klassifikazzjoni tal-kreditu. Madankollu l-Ġermanja targumenta li minħabba l-ftehimiet tat-trasferiment tal-qligħ u tat-telf li ġew konklużi bejn l-FLH u l-MFAG, għandha titqies il-klassifikazzjoni tal-kumpaniji prinċipali.

(259)

Il-Kummissjoni tosserva li, skont il-liġi Ġermaniża, matul iż-żmien li fih kien jeżisti l-ftehim tat-trasferiment tal-qligħ u tat-telf, l-MFAG tibqa’ responsabbli għal kull self ikkuntrattat mill-FLH, anke jekk il-ftehim jiġi sussegwentement revokat.

(260)

Fuq dik il-bażi, il-Kummissjoni hija tal-fehma li l-klassifikazzjoni tal-FLH għandha tal-anqas tkun il-klassifikazzjoni tal-kumpanija prinċipali tagħha, l-MFAG.

(261)

Barra minn hekk l-MFAG ma ġietx ikklassifikata minn aġenziji tal-klassifikazzjoni tal-kreditu. Madankollu l-Ġermanja pprovdiet xi klassifikazzjonijiet interni tal-banek għall-MFAG, kif jidher fil-qosor fit-Tabella 4.

(262)

Fid-dawl tal-premessi 257 sa 261, il-Kummissjoni tqis li l-FLH għandha tal-anqas l-inqas klassifikazzjoni tal-MFAG, jiġifieri ta’ […] fuq l-iskala ta’ klassifikazzjoni ta’ Standard & Poor fl-2006 u ta’ […] fuq l-iskala ta’ klassifikazzjoni ta’ Standard & Poor mill-2007 sal-2012.

(263)

Jekk is-self mill-azzjonisti inkwistjoni jista’ jitqies bħala kollateralizzat ħafna, f’każijiet bħal dawn il-prattika tas-suq tissuġġerixxi li l-klassifikazzjoni tal-istrument ta’ dejn (il-“klassifikazzjoni tal-ħruġ”) inkwistjoni tiżdied b’talja waħda meta mqabbla mal-klassifikazzjoni tal-emittent. (51) Għalhekk, il-Kummissjoni trid tistabbilixxi t-telf fil-każ ta’ inadempjenza (52) (“LGD”) tas-self mill-azzjonisti inkwistjoni.

(264)

Peress li s-self kien intenzjonat li jkun biss faċilità ta’ finanzjament tranżitorju fuq terminu qasir, ma kienx ġie kollateralizzat. Madanakollu, il-Ġermanja argumentat li l-LGD għandu tal-anqas inkun inqas minn 30 %, minħabba li l-valur tal-assi tal-FLH (EUR […] miljun fl-2010), li mhumiex mirhuna, jaqbeż il-valur tal-obbligazzjonijiet (EUR […] miljun fl-2010).

(265)

F’dan ir-rigward, il-Kummissjoni tinnota li l-valur kontabilistiku tal-assi mhuwiex biżżejjed biex issir stima tal-valur tal-likwidazzjoni fil-każ ta’ insolvenza jew falliment tal-ajruport. Fid-dokument ippubblikat mill-Kumitat ta’ Basel dwar is-Superviżjoni Bankarja f’Ġunju 2006 ġie rakkomandat li l-LGD għal pretensjonijiet superjuri fuq korporattivi li ma jkunux garantiti minn kollateral rikonoxxut għandu jitqies li huwa madwar 45 % (53). Għalhekk skont il-Komunikazzjoni dwar ir-Rata Referenzjali tal-2008 is-self mill-azzjonisti inkwistjoni għandu livell “normali” ta’ kollateralizzazzjoni b’LGD fil-kategorija tan-nofs (30 % < LGD < 60 %).

(266)

Għalhekk il-Kummissjoni tqis li l-livell ta’ kollateralizzazzjoni mhuwiex biżżejjed biex jippermetti li l-klassifikazzjoni tal-impriża tiżdied b’livell wieħed.

(267)

Sabiex tivvaluta jekk is-self mill-azzjonisti tal-FLH kienx konformi mal-kundizzjonijiet tas-suq, il-Kummissjoni wettqet valutazzjoni komparattiva b’indikaturi tas-suq ibbażata fuq firxa ta’ swap ta’ inadempjenza ta’ kreditu (CDS).

(268)

F’konformità mal-metodoloġija li fuqha hija bbażata l-Komunikazzjoni dwar ir-Rata Referenzjali tal-2008, il-Kummissjoni hija tal-fehma li rati tal-imgħax tas-self jistgħu jitqiesu li huma konformi mal-kundizzjonijiet tas-suq meta s-self jiġi pprezzat b’rata daqs jew ogħla minn rata normattiva definita mill-formula li ġejja:

Rata normattiva = rata bażi + marġni ta’ riskju + tariffa

(269)

Ir-rata bażi tirrappreżenta l-ispejjeż għall-banek talli jipprovdu likwidità (spiża ta’ finanzjament). Fil-każ ta’ finanzjament b’rata fissa (jiġifieri meta r-rata tal-imgħax tiġi ffissata għal kemm idum is-self), xieraq li r-rata bażi tiġi determinata abbażi tar-rati ta’ swap (54) b’maturità u valuta li jikkorrispondu mal-maturità u l-valuta tad-dejn. Il-marġni ta’ riskju jikkumpensa lill-mutwanti għar-riskji marbuta mal-finanzjament speċifiku tad-dejn, b’mod partikolari r-riskju ta’ kreditu. Il-marġni ta’ riskju jista’ jinkiseb minn kampjun xieraq ta’ firxiet ta’ CDS (55) relatata ma’ entitajiet ta’ referenza (bħal bonds tal-kumpanija) bi klassifikazzjoni simili għas-self għall-FLH. Fl-aħħar nett, jidher xieraq li jiżdiedu 10-20 punt bażi bħala approssimazzjoni għat-tariffi bankarji li ġeneralment il-kumpaniji jkollhom iħallsu (56).

(270)

Il-Kummissjoni tqis li l-miżuri ta’ finanzjament ivvalutati ma jirrapreżentawx self tipiku. Għall-fini tal-valutazzjoni attwali qed jiġi preżunt li s-self qed jingħata bħala faċilità ċirkolanti ta’ kreditu, li tiġġedded kull sena b’kundizzjonijiet ġodda ta’ rati tal-imgħax. Konsegwentement, il-maturità tiġi preżunta li hija ta’ sena.

(271)

Is-self jingħata b’rata bażi varjabbli bil-EURIBOR ta’ sena bħala rata referenzjali. Il-valutazzjoni tal-marġni ta’ riskju tista’ ssir abbażi ta’ kampjun ta’ firxa ta’ CDS għal kull żmien rilevanti. It-Tabella 7 tagħti sommarju tal-għadd ta’ osservazzjonijiet (kumpaniji bi klassifikazzjoni tal-FLH mill-industriji kollha, minbarra l-istituzzjonijiet finanzjarji u l-gvern) u l-firxiet korrispondenti ta’ CDS.

Tabella 7

Ħarsa ġenerali lejn l-osservazzjonijiet ta’ kumpaniji bi klassifikazzjoni tal-FLH

(272)

Il-marġni ta’ riskju tar-rata normattiva jiġi stabbilit abbażi ta’ firxiet medji peżati ta’ CDS tat-tieni Kwart (ara t-Tabella 7).

(273)

It-Tabella 8 tqabbel ir-rata tal-imgħax attwali li tintalab għas-self mill-azzjonisti vvalutat u r-rata normattiva.

Tabella 8

Ħarsa ġenerali komparattiva lejn ir-rata attwali tal-FLH u r-rata normattiva

(274)

Skont il-prattika tas-suq ir-rata normattiva stabbilita abbażi tal-firxiet ta’ CDS trid tqis tariffa bankarja ta’ madwar […] punti bażi. (57) Sabiex wieħed jasal għal stima konservattiva, fil-każ inkwistjoni qed tiżdied tariffa bankarja ta’ […] punti bażi.

(275)

Il-Kummissjoni tqis li r-riżultati fit-Tabella 8 jagħtu indikazzjoni li fil-fatt is-self kien konformi mal-kundizzjonijiet tas-suq. F’dan ir-rigward, il-Kummissjoni tinnota li fis-snin kollha – ħlief fl-2009 – ir-rata attwali tal-FLH kienet ogħla mir-rata normattiva. Madankollu, ir-rata attwali tal-imgħax inqas fl-2009 ġiet ikkumpensata mir-rati ogħla bejn l-2010 u l-2012 fuq volumi akbar ta’ self mill-azzjonisti.

(276)

Barra minn hekk, il-Kummissjoni tosserva li dawn ir-riżultati ġew ikkonfermati wkoll mill-valutazzjoni komparattiva għas-self elenkata mill-Ġermanja fit-Taqsimiet 3.3.1 u 3.3.2.

(277)

Fid-dawl tal-kunsiderazzjonijiet fit-Taqsima 6.2.1 u 6.2.2, il-Kummissjoni tqis li s-self mill-azzjonisti tal-FLH kien ingħata bit-termini tas-suq, u għalhekk ma jikkostitwixxix għajnuna mill-Istat skont it-tifsira tal-Artikolu 107(1) tat-Trattat.

(278)

Sabiex jikkostitwixxu għajnuna mill-Istat, il-miżuri inkwistjoni jridu jkunu ffinanzjati mir-riżorsi tal-Istat u d-deċiżjoni biex tingħata l-miżura għandha tkun imputabbli lill-Istat.

(279)

Il-kunċett ta’ għajnuna mill-Istat japplika għal kull vantaġġ mogħti permezz ta’ riżorsi tal-Istat mill-Istat innifsu jew minn xi korp intermedjarju li jaġixxi permezz ta’ setgħat mogħtija lilu (58). Għall-applikazzjoni tal-Artikolu 107(1) tat-Trattat, ir-riżorsi ta’ awtoritajiet lokali huma riżorsi tal-Istat (59).

(280)

Il-Qorti ddeċidiet ukoll li jekk miżura tingħata direttament mill-Istat jew minn korpi pubbliċi jew privati stabbiliti jew maħtura minnu sabiex jamministraw il-miżura huwa irrelevanti biex tiġi meqjusa għajnuna mill-Istat (60).

(281)

F’dan il-każ, il-miżuri rilevanti, jiġifieri l-injezzjonijiet ta’ kapital favur l-FLH, f’parti minnhom se jingħataw direttament mill-baġit tal-awtoritajiet lokali (il-Land Sachsen-Anhalt, Freistaat Sachsen u l-bliet u l-muniċipalitajiet rilevanti) u f’parti minnhom permezz tal-finanzjament mogħti mill-baġit tal-awtoritajiet lokali, li se jgħaddi permezz tal-MFAG, bħala korp intermedjarju, fl-FLH. F’dan il-kuntest, il-Kummissjoni tinnota li l-fondi mgħoddija permezz tal-MFAG kienu ġew allokati mill-awtoritajiet lokali biex jiġu trasferiti lill-FLH.

(282)

Għalhekk, f’kull ħin l-Istat eżerċita kontroll dirett jew indirett fuq ir-riżorsi inkwistjoni. Għalhekk, il-Kummissjoni tqis li l-miżuri rilevanti ġew iffinanzjati permezz ta’ riżorsi tal-Istat. Id-deċiżjoni biex jingħataw dawn ir-riżorsi tal-Istat hija imputabbli wkoll lill-awtoritajiet pubbliċi, peress li l-azzjonista pubbliku tal-FLH qabel li jipprovdi injezzjonijiet ta’ kapital.

(283)

Vantaġġ skont it-tifsira tal-Artikolu 107(1) tat-Trattat huwa kull benefiċċju ekonomiku li impriża ma kinitx tikseb fil-kundizzjonijiet tas-suq normali, jiġifieri fin-nuqqas ta’ intervent mill-Istat (61). L-effett tal-miżura fuq l-impriża biss huwa rilevanti, la l-kawża u lanqas l-objettiv tal-intervent tal-Istat (62). Kull meta s-sitwazzjoni finanzjarja ta’ impriża titjieb bħala riżultat ta’ intervent mill-Istat, ikun hemm vantaġġ.

(284)

Il-Kummissjoni tfakkar ukoll li “kapital li jitpoġġa għad-dispożizzjoni ta’ kumpanija mill-Istat, direttament jew indirettament, f’ċirkostanzi li jikkorrispondu mal-kundizzjonijiet normali tas-suq, m’għandux jitqies bħala għajnuna mill-Istat” (63). F’dan il-każ, sabiex jiġi stabbilit jekk il-finanzjament pubbliku tal-ajruport ta’ Leipzig/Halle jagħtix lill-FLH vantaġġ li ma kintix tikseb fil-kundizzjonijiet normali tas-suq, il-Kummissjoni għandha tqabbel l-imġiba tal-awtoritajiet pubbliċi li qed jipprovdu l-għotjiet diretti ta’ investiment u l-injezzjonijiet ta’ kapital ma’ dik ta’ MEO ggwidat minn prospetti ta’ profittabilità fit-tul (64).

(285)

Il-valutazzjoni ma għandhiex tqis ir-riperkussjonijiet pożittivi fuq l-ekonomija tar-reġjun fejn hemm l-ajruport, peress li l-Qorti ċċarat li l-mistoqsija rilevanti għall-applikazzjoni tat-test ta’ MEO hija jekk “f’ċirkostanzi simili azzjonist privat, wara li jkun ikkunsidra il-prevedibbiltà li jagħmel profitt u wara li jinsa kull kunsiderazzjoni marbuta mal-politika reġjonali, soċjali u settorjali, kienx jissottoskrivi l-kapital inkwistjoni” (65).

(286)

Fis-sentenza ta’ Stardust Marine, il-Qorti qalet li “[…] sabiex ikun eżaminat jekk l-Istat adottax jew le l-aġir ta’ investitur prudenti li jopera f’ekonomija tas-suq, hemm bżonn li wieħed iqiegħed lilu nnifsu fil-kuntest tal-perjodu li matulu twettqu l-miżuri ta’ appoġġ finanzjarju sabiex tkun evalwata r-razzjonalità ekonomika tal-kondotta tal-Istat, u għalhekk m’għandha ssir ebda valutazzjoni bbażata fuq sitwazzjoni sussegwenti” (66).

(287)

Barra minn hekk, fil-kawża EDF, il-Qorti ddikjarat li “[…] biex jintwera li, qabel jew waqt l-għoti tal-vantaġġ, l-Istat Membru ħa dik id-deċiżjoni bħala azzjonist, mhuwiex biżżejjed li wieħed jistrieħ fuq valutazzjonijiet ekonomiċi li jkunu saru wara l-għoti tal-vantaġġ, fuq konstatazzjoni retrospettiva li l-investiment li jkun sar mill-Istat Membru kkonċernat kienx fil-fatt profitabbli, jew fuq ġustifikazzjonijiet ulterjuri waqt l-azzjoni effettivament magħżula” (67).

(288)

Sabiex tkun tista’ tapplika t-test tal-MEO, il-Kummissjoni għandha tpoġġi lilha nnifisha fiż-żmien meta kienet ittieħdet kull deċiżjoni biex jingħataw fondi pubbliċi lill-FLH. Il-Kummissjoni trid tibbaża wkoll il-valutazzjoni tagħha fuq l-informazzjoni u s-suppożizzjonijiet, li kienu għad-dispożizzjoni tal-awtoritajiet lokali rilevanti fiż-żmien, meta kienet ttieħdet id-deċiżjoni dwar l-injezzjonijiet ta’ kapital inkwistjoni.

(289)

Il-Ġermanja saħqet ukoll li l-infrastruttura hija meħtieġa għall-ħolqien tal-impjiegi (5 106 impjieg jiddependu direttament fuq l-ajruport). Madankollu, il-Kummissjoni tosserva li meta jkun qed isir it-test ta’ MEO, il-kunsiderazzjonijiet soċjali u reġjonali ma jistgħux jittieħdu in kunsiderazzjoni.

(290)

F’dan il-każ partikolari fir-rigward tal-infrastruttura u l-investimenti relatati mal-infrastruttura, il-Ġermanja tidher li qed tikkontesta l-applikabbiltà tat-test tal-MEO.

(291)

Il-Ġermanja argumentat li t-test tal-MEO ma jistax jiġi applikat għal infrastruttura tat-trasport minħabba li m’hemmx investituri privati komparabbli. Skont il-Ġermanja, l-investituri privati ma għandhom l-ebda interess fl-ajruporti, speċjalment fejn ikun hemm il-ħtieġa li jsiru investimenti kbar. F’dan il-kuntest, il-Ġermanja sostniet li dan ikun ifisser li l-investimenti li operaturi privati ma jidħlux għalihom awtomatikament jaqgħu barra mill-kamp ta’ applikazzjoni tar-regoli dwar l-għajnuna mill-Istat.

(292)

Il-Kummissjoni ma tistax taqbel ma’ din l-opinjoni tal-Ġermanja. It-test tal-MEO ma jistax jiġi eskluż sempliċiment għaliex is-settur privat ma jipparteċipax fil-finanzjament ta’ infrastrutturi ta’ ajruporti. Sitwazzjoni ekonomika diffiċli ma tippermettix li l-investitur pubbliku li ma jaġixxix b’mod prudenti kif kieku kien jagħmel investitur privat fl-istess sitwazzjoni. F’dan il-kuntest, il-Kummissjoni tinnota li l-każistika tal-Qorti tal-Ġustizzja tal-Unjoni Ewropea ċċarat li l-investiment f’attivitajiet ekonomiċi li ma kienx isir minn investituri privati li joperaw f’ekonomija tas-suq fih elementi ta’ għajnuna mill-Istat (68).

(293)

Il-Ġermanja mhijiex tal-fehma li l-azzjonisti tal-FLH aġixxew bħala MEO meta ddeċidew li jżidu l-kapital proprju tal-ajruport u jikkonvertu s-self mill-azzjonisti f’ekwità. Il-Kummissjoni tinnota li l-Ġermanja qalet li ż-żidiet fil-kapital kienu saru mingħajr pjan ta’ direzzjoni tan-negozju sottostanti u mingħajr prospetti għal profittabilità fit-tul.

(294)

Minkejja l-inċertezzi inerenti u sinifikanti b’rabta mal-proġett, bħan-natura fit-tul tal-proġett ta’ investiment (madwar 50 sena), la kien hemm pjan ta’ direzzjoni tan-negozju ex ante, u lanqas analiżi tas-sensittività ta’ xi suppożizzjonijiet sottostanti ta’ profittabilità. Dan mhuwiex konformi mat-tip ta’ analiżi li investitur prudenti kien jagħmel għal proġett ta’ dan il-kobor.

(295)

Fuq din il-bażi, il-Kummissjoni ssib li l-injezzjonijiet ta’ kapital mill-azzjonisti pubbliċi u mill-MFAG lill-FLH taw lil din tal-aħħar vantaġġ ekonomiku (sakemm l-għotjiet ta’ investiment ma kinux purament marbuta ma’ attivitajiet li jaqgħu taħt il-mandat tal-ordni pubblika kif ġie konkluż fit-Taqsima 6.1.2).

(296)

Biex miżura tal-Istat taqa’ taħt il-kamp ta’ applikazzjoni tal-Artikolu 107(1) tat-Trattat, trid tiffavorixxi lil “ċerti impriżi jew ċerti produtturi”. Għalhekk, dawk il-miżuri biss li jiffavorixxu lil impriżi li jagħtu vantaġġ b’mod selettiv jaqgħu taħt il-kunċett ta’ għajnuna mill-Istat.

(297)

Fil-każ preżenti, l-injezzjonijiet ta’ kapital jibbenefikaw biss lill-FLH. Għalhekk, il-miżura hija selettiva skont it-tifsira tal-Artikolu 107(1) tat-Trattat.

(298)

Meta l-għajnuna mogħtija minn Stat Membru ssaħħaħ il-pożizzjoni ta’ impriża meta mqabbla ma’ impriżi oħra li jkunu qed jikkompetu fis-suq intern, din tal-aħħar trid titqies li ġiet affettwata minn dik l-għajnuna (69). Il-vantaġġ ekonomiku li se jingħata mill-injezzjonijiet ta’ kapital lill-operatur tal-ajruport isaħħaħ il-pożizzjoni ekonomika tiegħu, peress li l-operatur tal-ajruport se jkun jista’ jwaqqaf in-negozju tiegħu mingħajr ma jġarrab l-ispejjeż inerenti tal-investiment.

(299)

Kif ġie vvalutat fit-Taqsima 6.1.1, l-operat ta’ ajruport huwa attività ekonomika. Minn naħa, il-kompetizzjoni sseħħ bejn l-ajruporti biex jattiraw linji tal-ajru u t-traffiku tal-ajru korrispondenti (passiġġieri u merkanzija), u, min-naħa l-oħra, bejn l-operaturi ta’ ajruporti, li jistgħu jikkompetu bejniethom biex jiġu fdati bl-immaniġġjar ta’ ajruport partikulari. Barra minn hekk, il-Kummissjoni tenfasizza li, speċjalment fir-rigward ta’ burdnara, linji tal-ajru speċjalizzati fit-trasport tal-merkanzija bl-ajru u anke linji tal-ajru tal-passiġġieri u operaturi charter, anki ajruporti li ma jkunux jinsabu fl-istess żoni ta’ lħuq u fi Stati Membri differenti jistgħu ikunu f’kompetizzjoni ma’ xulxin biex jattiraw lil dawk il-linji tal-ajru.

(300)

Il-Qrati Ġenerali kkonfermaw li l-ajruport ta’ Leipzig/Halle huwa f’kompetizzjoni ma’ ajruporti fi Stati Membri oħra, b’mod partikolari mal-ajruport ta’ Brussell (il-Belġju) u ta’ Vatry (Franza) speċjalment fir-rigward ta’ titjiriet ta’ merkanzija (70). Barra minn hekk, attwalment l-ajruport ta’ Leipzig/Halle jimmaniġġja 890 000 tunnellata ta’ merkanzija bl-ajru u huwa t-tieni l-akbar ajruport tal-merkanzija fil-Ġermanja.

(301)

Il-Ġermanja sostniet li l-kompetizzjoni tal-ajruport ta’ Leipzig/Halle ma’ ajruporti Ġermaniżi oħra tat-trasport tal-merkanzija bl-ajru kienet limitata peress li ċ-ċentri Ġermaniżi ewlenin tat-trasport tal-merkanzija bl-ajru (Frankfurt am Main, Munich u Cologne/Bonn), li kienu f’kompetizzjoni mal-ajruport, kellhom restrizzjonijiet fuq il-kapaċità jew restrizzjonijiet fuq titjiriet bil-lejl.

(302)

Skont il-Ġermanja, lanqas ma kien hemm xi sovrappożizzjoni kompetittiva mal-ajruporti Ewropej l-oħra tal-merkanzija, prinċipalment ma’ Brussell u ma’ Vatry. Fir-rigward tal-ajruport ta’ Vatry, il-Ġermanja rrilevat li Vatry kien ajruport żgħir ħafna u li fl-2010 il-volum tat-trasport tal-merkanzija bl-ajru tal-ajruport ta’ Leipzig/Halle kien aktar minn 80 darba akbar mill-volum tat-trasport tal-merkanzija bl-ajru fl-ajruport ta’ Vatry. Fir-rigward tal-ajruport ta’ Brussell, il-Ġermanja saħqet li filwaqt li fl-aħħar snin l-ajruport ta’ Leipzig/Halle kien esperjenza żieda fil-volum tal-merkanzija, fuq l-istess perjodu l-ajruport ta’ Brussell kien esperjenza tnaqqis. Barra minn hekk, skont il-Ġermanja, l-ajruport ta’ Brussell kien soġġett għal tnaqqis sinifikanti fuq titjiriet billejl u għalhekk il-kompetizzjoni kienet limitata.

(303)

Mill-preżentazzjoni ta’ partijiet terzi, il-Kummissjoni tosserva li l-ajruport ta’ Leipzig/Halle jintuża minn trasportaturi internazzjonali differenti tal-merkanzija bl-ajru, bħal Wirtschaftsallianz għall-proġett SALIS, Jade Cargo, Volga-Dnepr Group, Baring eċċ. Barra minn hekk, l-ajruport ta’ Leipzig/Halle huwa ċ-ċentru Ewropew tad-DHL. Il-miżuri infrastrutturali notifikati jinvolvu estensjoni ulterjuri tal-infrastruttura tal-ajruport biex isservi ajruplani akbar mingħajr ebda restrizzjonijiet ta’ MTOW. F’dan ir-rigward, il-Kummissjoni tosserva wkoll li l-ajruport jopera żewġ runways (ir-runway tan-Nofsinhar u tat-Tramuntana b’tul ta’ 3 600 metru).

(304)

Skont dan li ntqal, il-Kummissjoni tqis li l-vantaġġ ekonomiku possibbli li l-FLH tista’ tirċievi minn injezzjonijiet ta’ kapital biex jiffinanzjaw il-proġetti differenti ta’ infrastruttura ta’ żvilupp u ta’ estensjoni fl-ajruport ta’ Leipzig/Halle isaħħaħ il-pożizzjoni tagħha fir-rigward tal-kompetituri tagħha fis-suq ta’ fornituri ta’ servizzi ajruportwali tal-Unjoni, b’mod partikolari fir-rigward tal-merkanzija.

(305)

Għalhekk, il-Kummissjoni tqis li l-finanzjament pubbliku li qed jiġi eżaminat iwassal għal distorsjoni jew jhedded li joħloq distorsjoni fil-kompetizzjoni u jaffettwa l-kummerċ bejn l-Istati Membri.

(306)

Fid-dawl tal-kunsiderazzjonijiet fil-premessi 278 sa 305, il-Kummissjoni tqis li l-finanzjament pubbliku mogħti lill-FLH fil-forma ta’ injezzjonijiet ta’ kapital jikkostitwixxi għajnuna mill-Istat skont it-tifsira tal-Artikolu 107(1) tat-Trattat.

(307)

Skont l-Artikolu 108(3) tat-Trattat, l-Istati Membri jridu jinnotifikaw kull pjan ta’ għoti jew modifika tal-għajnuna, u ma jistgħux idaħħlu fis-seħħ il-miżuri proposti qabel ma dik il-proċedura ta’ notifika ikollha deċiżjoni finali.

(308)

Peress li l-injezzjonijiet ta’ kapital huma soġġetti għal deċiżjoni tal-Kummissjoni u kienu għadhom ma tpoġġewx għad-dispożizzjoni tal-FLH, il-Kummissjoni tqis li l-Ġermanja kienet irrispettat il-projbizzjoni tal-Artikolu 108(3) tat-Trattat (71).

(309)

Peress li l-injezzjonijiet ta’ kapital fl-FLH jikkostitwixxu għajnuna mill-Istat, il-Kummissjoni jkollha teżamina jekk din l-għajnuna identifikata fil-premessa 306 tistax titqies kompatibbli mas-suq intern.

(310)

L-Artikolu 107(3) tat-Trattat jipprevedi ċerti eżenzjonijiet għar-regola ġenerali stabbilita fl-Artikolu 107(1) tat-Trattat li l-għajnuna mill-Istat mhijiex kompatibbli mas-suq intern. L-għajnuna inkwistjoni tista’ tiġi vvalutata abbażi tal-Artikolu 107(3)(c) tat-Trattat, li jistipula li: “għajnuna maħsuba sabiex tiffaċilita l-iżvilupp ta’ ċerti attivitajiet jew ta’ ċerti reġjuni ekonomiċi, basta dik l-għajnuna ma tfixkilx il-kundizzjonijiet tal-kummerċ sa grad li jkun kuntrarju għall-interess komuni”, tista’ titqies kompatibbli mas-suq intern.

(311)

F’dan ir-rigward, il-Linji Gwida tal-Avjazzjoni tal-2014 jiffurmaw qafas li fuqu jiġi vvalutat jekk għajnuna lil ajruporti skont l-Artikolu 107(3)(c) tat-Trattat tistax tiġi dikjarata kompatibbli.

(312)

Skont il-Linji Gwida tal-Avjazzjoni tal-2014, il-Kummissjoni se tapplika l-prinċipji stabbiliti f’dawn il-linji gwida għall-miżuri ta’ għajnuna għall-investiment notifikati kollha li fir-rigward tagħhom hija mitluba biex tieħu deċiżjoni mill-4 ta’ April 2014, anke fejn il-proġetti kienu ġew notifikati qabel dik id-data (72).

(313)

Fil-premessa 308 il-Kummissjoni diġà kkonkludiet li l-injezzjonijiet diretti u annwali ta’ kapital ma jikkostitwixxux għajnuna illegali mill-Istat li ngħatat qabel l-4 ta’ April 2014.

(314)

Madankollu, f’dan il-każ il-Kummissjoni tosserva li l-ajruport ta’ Leipzig/Halle b’aktar minn 800 000 tunnellata huwa ajruport speċjalizzat tal-merkanzija. Il-Kummissjoni tosserva wkoll li l-miżuri inkwistjoni huma relatati mal-istrateġija ta’ espansjoni tal-ajruport biex jidħol fis-suq tal-merkanzija.

(315)

Skont il-punt 29 tal-Linji Gwida tal-Avjazzjoni tal-2014, il-Kummissjoni għad m’għandhiex biżżejjed esperjenza biex tivvaluta l-kompatibbiltà tal-għajnuna lil ajruporti speċjalizzati fit-trasport tal-merkanzija biex tippreżenta fil-qosor il-prattika tagħha fil-forma ta’ kriterji speċifiċi ta’ kompatibbiltà. Għal dawn il-kategoriji ta’ impriżi, il-Kummissjoni se tapplika l-prinċipji komuni ta’ kompatibbiltà kif stabbilit fit-Taqsima 5 tal-Linji Gwida tal-Avjazzjoni tal-2014 permezz ta’ analiżi skont il-każ.

(316)

Sabiex jiġi vvalutat jekk miżura ta’ għajnuna mill-Istat tistax titqies bħala kompatibbli mas-suq intern skont l-Artikolu 107(3)(c) tat-Trattat, il-Kummissjoni ġeneralment tanalizza jekk it-tifsila tal-miżura tal-għajnuna tiżgurax li l-impatt pożittiv favur objettiv ta’ interess komuni jisboqx l-effetti negattivi potenzjali tiegħu fuq il-kummerċ u l-kompetizzjoni.

(317)

Il-Komunikazzjoni dwar il-Modernizzazzjoni tal-Għajnuna mill-Istat (73) talbet għall-identifikazzjoni u d-definizzjoni tal-prinċipji komuni applikabbli għall-valutazzjoni tal-kompatibbiltà tal-miżuri kollha ta’ għajnuna mwettqa mill-Kummissjoni. Miżura ta’ għajnuna titqies kompatibbli mas-suq intern skont l-Artikolu 107(3) tat-Trattat diment li jiġu ssodisfati l-kundizzjonijiet kumulattivi li ġejjin:

(318)

Miżura ta’ għajnuna mill-Istat għandu jkollha objettiv ta’ interess komuni skont l-Artikolu 107(3) tat-Trattat. Għajnuna għall-investiment lill-ajruporti ġeneralment titqies li tikkontribwixxi għall-kisba ta’ objettiv ta’ interess komuni, jekk (i) jew iżżid il-mobilità u l-konnettività tar-reġjuni billi tistabbilixxi punti ta’ aċċess għal titjiriet intra-Unjoni; jew (ii) tiġġieled il-konġestjoni tat-traffiku tal-ajru f’ajruporti ċentrali ewlenin tal-Unjoni; jew (iii) tiffaċilita l-iżvilupp reġjonali.

(319)

L-injezzjonijiet ta’ kapital soġġetti għal din id-Deċiżjoni huma mmirati lejn il-finanzjament ta’ miżuri infrastrutturali fl-ajruport ta’ Leipzig/Halle, ajruport speċjalizzat fit-trasport tal-merkanzija bl-ajru. Kif sostniet il-Ġermanja, is-settur tat-trasport tal-merkanzija bl-ajru, b’mod partikolari merkanzija express, qed juri rati konsiderevoli ta’ tkabbir. Il-Ġermanja kompliet tgħid li t-tliet ċentri prinċipali għall-ġarr ta’ merkanzija bl-ajru fil-Ġermanja, fi Frankfurt/Main, f’Munich u f’Cologne/Bonn, qed jiffaċċjaw restrizzjonijiet fuq il-kapaċità ta’ titjiriet bil-lejl. F’dan ir-rigward, il-Ġermanja qalet li, skont is-sentenza tal-Qorti Federali Amministrattiva Ġermaniża tal-4 ta’ April 2012, l-Ajruport ta’ Frankfurt Main ma jistax ikompli jwettaq operazzjonijiet ta’ titjir bil-lejl. Bħala konsegwenza, il-Ġermanja qalet li l-FLH tgħin biex tiġi evitata kriżi serja fil-kapaċità tal-merkanzija bl-ajru fil-Ġermanja.

(320)

Il-Ġermanja kompliet tgħid li l-proġett previst ilu jagħmel parti mill-istrateġija għall-iżvilupp tal-ajruport li tinsab fil-Pjan Ġenerali tan-Netwerk Trans-Ewropew tat-Trasport (Orizzont 2020) mill-2004 bħala “Punt ta’ konnessjoni tal-Komunità. L-ajruport ta’ Leipzig/Halle jinsab fir-reġjun tal-Ġermanja Ċentrali (qrib ħames rotot prinċipali tan-netwerk Trans-Ewropew tat-trasport u tal-passaġġi Pan-Ewropej) u jinsab fil-punt fejn jiltaqgħu żewġ awtostradi li jgħaqqdu flimkien it-Tramuntana u n-Nofsinhar tal-Ewropa (jiġifieri l-Awtostrada federali A 9) u l-Ewropa tal-Punent u l-Ewropa tal-Lvant (jiġifieri l-Awtostrada federali A 14) b’aċċess għal netwerk ferrovjarju u tat-toroq.

(321)

Barra minn hekk, skont il-Ġermanja, minħabba l-pożizzjoni tiegħu fiċ-ċentru tal-Ewropa u b’suq ta’ madwar 7 miljun persuna f’periferija ta’ 100 km mill-ajruport u l-pożizzjoni tiegħu viċin infrastruttura ferrovjarja u tat-toroq, l-ajruport għandu potenzjal kbir għal tkabbir. Kif iddikjarat fil-premessa 319, is-settur tat-trasport tal-merkanzija bl-ajru qed juri rati sostanzjali ta’ tkabbir (jiġifieri bejn l-2007 u l-2011 ir-rata medja tat-tkabbir tat-trasport internazzjonali tal-passiġġieri kien ta’ madwar 5,0 % u fil-qasam tal-ġarr ta’ merkanzija ta’ 4,3 %) (74). Madankollu, il-kapaċitajiet attwali tal-ajruport qed jiffaċċjaw restrizzjonijiet fuq titjiriet billejl (ara l-premessa 319).

(322)

Kif issemma fil-premessa 319, huwa mistenni li l-ajruport se jesperjenza żieda gradwali iżda sinifikanti fit-traffiku tal-merkanzija. Fir-rigward tal-volumi tal-merkanzija, il-Ġermanja qalet li, meta mqabbel ma’ ajruporti oħra, Leipzig/Halle qed jirreġistra rati kostanti ta’ tkabbir (fejn fl-2007 ġiet ipproċessata 101 364 tunnellata ta’ merkanzija, din il-figura telgħet għal 442 453 tunnellata fl-2008, 524 084 tunnellata fl-2009 u 663 059 tunnellata fl-2010). Sabiex tikkomplimenta d-dikjarazzjoni tagħha, il-Ġermanja indikat li l-volum tat-trasport tal-merkanzija bl-ajru żdied bi 18,5 % fl-2009 u b’26,5 % fl-2010. Skont il-Ġermanja, kienet mistennija żieda ulterjuri fil-volum tal-merkanzija. F’dan ir-rigward il-Ġermanja ċċarat li sal-2020 huwa previst li tiġi mmaniġġjata madwar 820 000 tunnellata ta’ merkanzija bl-ajru. (75) Madankollu, il-Ġermanja sostniet li, sal-2015 din il-previżjoni tkun diġà ntlaħqet. (76) Fil-ġejjieni hija prevista żieda ulterjuri fl-operazzjonijiet tat-traffiku tal-merkanzija, b’mod partikulari fir-rigward ta’ aktar restrizzjonijiet fuq titjiriet billejl f’ajruporti Ġermaniżi oħra (jiġifieri Frankfurt Main u oħrajn).

(323)

Il-Kummissjoni tinnota li l-implimentazzjoni tal-proġett se jkollha impatt pożittiv fuq ir-reġjun kollu u se tinfluwenza b’mod pożittiv l-iżvilupp ekonomiku u soċjali tiegħu. Il-Ġermanja sostniet li dak iż-żmien kien hemm 133 kumpanija preżenti fl-ajruport, li fl-2010 kienu jimpjegaw total ta’ 5 106 persuna (żieda ta’ 14,4 % meta mqabbla mal-2009). Il-Ġermanja kompliet tgħid li b’mod partikulari l-proġett ta’ investiment se jtejjeb l-aċċess għar-reġjun u jżid l-attraenza tiegħu għall-investituri u għall-viżitaturi. Il-Kummissjoni tinnota li dan kien sostnut ukoll mill-osservazzjonijiet tal-partijiet terzi (ara t-Taqsima 4). Barra minn hekk, dan għandu jħalli impatt pożittiv fuq l-impjiegi meta wieħed iżomm f’moħħu li l-qgħad huwa sinifikament ogħla fir-reġjun ta’ Leipzig/Halle (il-qgħad fir-reġjun ta’ Sachsen jammonta għal 10,3 %, f’Saxony-Anhalt għal 11,2 %) mill-medja nazzjonali (ta’ 6,9 %).

(324)

Għalhekk il-Kummissjoni tista’ tikkonkludi li l-bini u l-operat tal-infrastruttura jservu objettiv definit b’mod ċar ta’ interess komuni, jiġifieri l-iżvilupp ta’ ajruport b’komponent kbir ta’ trasport tal-merkanzija bl-ajru konformi mal-politika tal-Unjoni f’dan ir-rigward, filwaqt li jitqiesu l-aspetti reġjonali u l-fatt li f’dan il-każ il-kriterju ta’ kompatibbiltà huwa sodisfatt.

(325)

Miżura ta’ intervent mill-Istat trid tkun immirata lejn sitwazzjoni li fiha l-għajnuna tista’ ġġib titjib materjali li s-suq innifsu ma jistax jikseb, pereżempju billi jiġi rimedjat falliment tas-suq jew jiġi indirizzat tħassib dwar l-ekwità jew il-koeżjoni.

(326)

Il-Ġermanja sostniet li l-ajruport ta’ Leipzig/Halle jbati minn investiment storikament b’lura. Il-Ġermanja kienet tal-fehma li l-finanzjament huwa limitat għall-minimu meħtieġ u legalment previst, kemm f’termini tal-ammont ta’ għajnuna kif ukoll l-intensità tal-għajnuna. Barra minn hekk, skont il-Ġermanja l-miżuri jikkonċernaw investimenti infrastrutturali fit-tul li jindirizzaw il-ħtiġijiet tal-ajruport fid-dawl taż-żieda futura fit-trasport tal-merkanzija u tal-passiġġieri. Il-Ġermanja argumentat li l-miżuri mhumiex sproporzjonati fid-daqs u lanqas ma jinvolvu spiża sproporzjonata. Il-Ġermanja qalet li, wara ppjanar bir-reqqa bil-quddiem u stimi tal-ispejjeż, l-ispejjeż tnaqqsu għal livell minimu. Fl-opinjoni tal-Ġermanja, tnaqqis ulterjuri tal-finanzjament mill-Istat mhuwiex possibbli peress li infrastruttura ta’ dan il-kobor ma tistax tiġi finanzjata mill-operaturi tal-ajruporti mir-riżorsi tagħhom stess.

(327)

Il-Ġermanja qajmet l-argument li d-dħul mis-servizzi ma jkoprix l-ispejjeż tal-bini tal-infrastruttura u sostanzjat dan l-argument abbażi ta’ diskrepanza tal-likwidità u valutazzjoni kontrofattwali.

(328)

Il-Kummissjoni tikkonkludi li l-għajnuna se ġġib titjib materjali għall-proġett ta’ investiment li s-suq innifsu ma jistax jikseb u li hemm il-ħtieġa ta’ intervent mill-Istat.

(329)

Il-miżura ta’ għajnuna trid tkun għodda politika xierqa li tindirizza l-objettiv ta’ interess komuni.

(330)

Kif ġie spjegat fit-Taqsima 6.5.2.2, il-Ġermanja wriet li l-finanzjament tal-proġett permezz ta’ injezzjonijiet ta’ kapital huwa strument xieraq biex titjieb il-kundizzjoni tal-infrastruttura fl-ajruport ta’ Leipzig/Halle. L-ebda forma oħra ta’ għajnuna anqas distortiva ma kienet se tassigura l-finanzjament tax-xogħlijiet infrastrutturali meħtieġa.

(331)

Il-Kummissjoni tikkonkludi li l-miżura ta’ għajnuna inkwistjoni hija strument politiku adegwat.

(332)

L-għajnuna għandha tbiddel l-imġiba tal-impriżi kkonċernati b’tali mod li dawn jinvolvu ruħhom f’attività addizzjonali li kieku ma jkunux jistgħu jwettqu mingħajr l-għajnuna jew li kieku jkunu jistgħu jagħmlu biss b’mod ristrett jew differenti.

(333)

L-ewwel nett, ix-xogħlijiet fuq investiment individwali jistgħu’ jibdew biss wara li tkun ġiet ippreżentata applikazzjoni lill-awtorità awtorizzanti. Jekk ix-xogħlijiet jibdew qabel ma tkun ġiet ippreżentata applikazzjoni lill-awtorità awtorizzanti, kwalunkwe għajnuna mogħtija fir-rigward ta’ dak l-investiment individwali ma titqiesx kompatibbli mas-suq intern.

(334)

Il-Ġermanja sostniet li x-xogħlijiet ma kinux bdew qabel ġiet ippreżentata l-applikazzjoni lill-awtorità awtorizzanti. Għalhekk, il-Kummissjoni tista’ tikkonkludi li dan il-kriterju huwa ssodisfat.

(335)

It-tieni nett, proġett ta’ investiment f’ajruport jista’ jkun ekonomikament attraenti fih innifsu. Għalhekk, jeħtieġ li jkun verifikat li l-investiment ma kienx isir, jew ma kienx isir sa dak il-punt, mingħajr għajnuna mill-Istat. Jekk dan ikun ikkonfermat, il-Kummissjoni se tikkunsidra li miżura ta’ għajnuna għandha effett ta’ inċentiv.

(336)

L-effett tal-inċentiv huwa identifikat permezz ta’ analiżi kontrofattwali, bit-tqabbil tal-livelli tal-attività intiża bl-għajnuna u mingħajr l-għajnuna.

(337)

Fejn l-ebda kontrofattwal speċifiku ma jkun magħruf, l-effett ta’ inċentiv jista’ jiġi preżunt meta jkun hemm diskrepanza tal-likwidità tal-kost kapitali, jiġifieri, meta fuq il-bażi tal-pjan ta’ direzzjoni tan-negozju, ikun jista’ jintwera li hemm differenza bejn il-flussi ta’ flus pożittivi u dawk negattivi (inklużi spejjeż ta’ investiment f’assi kapitali fissi) matul il-ħajja tal-investiment f’termini tal-valur preżenti nett (77).

(338)

F’dan il-każ, il-Ġermanja ppreżentat kalkolu ta’ diskrepanza tal-likwidità li jidentifika diskrepanza tal-likwidità ta’ mill-inqas EUR 142,1 miljuni (ara t-Tabella 5 u t-Tabella 6). Barra minn hekk, valutazzjoni tax-xenarju kontrofattwali turi li jekk l-investimenti infrastrutturali jiġu kompletament iffinanzjati permezz tas-self, l-ajruport ma jkunx jiflaħ jipprovdi l-finanzjament neċessarju.

(339)

Għalhekk, il-Kummissjoni tista’ tikkonkludi li l-għajnuna għall-investiment għandha effett ta’ inċentiv.

(340)

L-ammont tal-għajnuna jrid ikun limitat għall-minimu meħtieġ sabiex jinduċi l-investiment addizzjonali jew l-attività fiż-żona kkonċernata.

(341)

Biex għajnuna għall-investiment lill-ajruporti tkun proporzjonali hija trid tkun limitata għall-kostijiet żejda (nett ta’ dħul żejjed) li jirriżultaw mit-twettiq tal-proġett megħjun/l-attività megħjuna minflok il-proġett/l-attività alternattivi li l-benefiċjarju kien jidħol għalihom fix-xenarju kontrafattwali, jiġifieri li kieku ma rċeviex l-għajnuna. Meta ma jkun magħruf l-ebda kontrofattwal speċifiku, sabiex ikun proporzjonat, l-ammont ta’ għajnuna ma għandux jaqbeż id-diskrepanza tal-likwidità tal-proġett ta’ investiment (l-hekk imsejħa “diskrepanza tal-likwidità tal-kost kapitali”), li tiġi determinata fuq il-bażi ta’ pjan ta’ direzzjoni tan-negozju ex ante bħala l-valur preżenti nett tad-differenza bejn il-flussi tal-flus pożittivi u dawk negattivi (inkluż spejjeż ta’ investiment) matul il-ħajja tal-investiment. Għall-għajnuna għall-investiment, il-pjan tan-negozju għandu jkopri l-perjodu tal-utilizzazzjoni ekonomika tal-assi.

(342)

L-intensità tal-għajnuna xorta waħda ma tistax taqbeż id-diskrepanza attwali fil-finanzjament tal-proġett ta’ investiment.

(343)

Kif ġie ddikjarat fit-Taqsimiet 6.5.2.2 u 6.5.2.3, il-Ġermanja ppreżentat kalkolu komplimentari tad-diskrepanza tal-likwidità għall-proġett notifikat li jammonta għal EUR 142,1 miljun li jiġġustifika intensità tal-għajnuna ta’ 75 % (ara t-Tabella 6) diment li l-injezzjonijiet ta’ kapital ikunu ġew injettat fl-istess ħin mal-investimenti mwettqa. Madankollu, peress li l-injezzjonijiet ta’ kapital se jsiru biss wara l-approvazzjoni tal-Kummissjoni fl-2014, id-diskrepanza tal-likwidità identifikata mill-Ġermanja tammonta għal EUR 166,9 miljun li tiġġustifika intensità tal-għajnuna ta’ 88,1 % (ara t-Tabella 5).

(344)

Fin-nuqqas ta’ limitu għall-intensitajiet massimi tal-għajnuna permissibbli f’ajruporti tal-merkanzija, l-intensità tal-għajnuna hija limitata għad-diskrepanza tal-likwidità tal-proġett ta’ investiment. Għalhekk, il-Kummissjoni tista’ tikkonkludi li l-ammont tal-għajnuna huwa proporzjonat u limitat għall-minimu.

(345)

L-effetti negattivi tal-għajnuna għandhom ikunu limitati biżżejjed, sabiex il-bilanċ ġenerali tal-miżura jkun pożittiv.

(346)

Sabiex tkun limitata ulterjorment kull distorsjoni, l-ajruport, inkluż kwalunkwe investiment li għalih tingħata l-għajnuna, irid ikun miftuħ għall-utenti potenzjali kollha u ma jistax ikun iddedikat għal utent speċifiku wieħed. Fil-każ ta’ limitazzjoni fiżika tal-kapaċità, l-allokazzjoni għandha ssir fuq il-bażi ta’ kriterji pertinenti, oġġettivi, trasparenti u nondiskriminatorji.

(347)

Il-Ġermanja sostniet li l-bilanċ globali tal-effetti tal-miżuri fuq il-kompetizzjoni u fuq il-kummerċ bejn l-Istati Membri huwa pożittiv. F’dan ir-rigward, il-Ġermanja l-ewwel ikkonfermat li l-utenti potenzjali kollha (il-linji tal-ajru u t-trasportaturi tal-merkanzija bl-ajru) se jkollhom aċċess għall-infrastruttura l-ġdida fuq bażi ugwali u nondiskriminatorja.

(348)

Imbagħad, il-Ġermanja sostniet li l-miżuri infrastrutturali inkwistjoni huma ta’ natura mhux espansjonarja. Fir-rigward ta’ xi effett potenzjali fuq il-kompetituri tal-ajruport ta’ Leipzig/Halle, il-Ġermanja qalet li l-ajruporti fil-viċinanza ta’ Leipzig/Halle ma kinux speċjalizzati fit-trasport tal-merkanzija bl-ajru. Barra minn hekk, fir-rigward tal-ajruport ta’ Altenburg-Nobitz, ta’ Berlin Brandenburg, ta’ Dresden, ta’ Erfurt, ta’ Hof, ta’ Magdeburg, ta’ Magdeburg-Cochstedt u ta’ Praga, il-Ġermanja qalet li għal xi wħud minn dawn l-ajruporti d-distanzi ġeografiċi kienu kbar wisq, l-ajruporti kienu jinsabu f’reġjuni ekonomiċi differenti, iż-żoni ta’ qbid kienu pjuttost differenti jew l-ajruporti kienu ta’ daqs żgħir ħafna.

(349)

Rigward l-ajruporti Ġermaniżi l-oħra tal-merkanzija, il-Ġermanja qalet li l-kompetizzjoni tal-ajruport ta’ Leipzig/Halle kienet limitata peress li ċ-ċentri Ġermaniżi ewlenin tat-trasport tal-merkanzija bl-ajru (Frankfurt am Main, Munich u Cologne/Bonn), li kienu f’kompetizzjoni ma’ Leipzig/Halle, kellhom restrizzjonijiet fuq il-kapaċità jew restrizzjonijiet fuq titjiriet billejl.

(350)

Skont il-Ġermanja, ma kien hemm ukoll l-ebda sovrappożizzjoni kompetittiva mal-ajruporti Ewropej l-oħra tal-merkanzija, prinċipalment ma’ Brussell u ma’ Vatry. Dwar l-ajruport ta’ Vatry, il-Ġermanja rrilevat li Vatry kien ajruport żgħir ħafna u li fl-2010 il-volum tat-trasport tal-merkanzija bl-ajru tal-ajruport ta’ Leipzig/Halle kien aktar minn 80 darba akbar mill-volum tat-trasport tal-merkanzija bl-ajru fl-ajruport ta’ Vatry. Rigward l-ajruport ta’ Brussell, il-Ġermanja argumentat li, filwaqt li fl-aħħar snin l-ajruport ta’ Leipzig/Halle kien esperjenza żieda fil-volum ta’ merkanzija, fuq l-istess perjodu l-ajruport ta’ Brussell kien esperjenza tnaqqis. Barra minn hekk, skont il-Ġermanja, l-ajruport ta’ Brussell kien soġġett għal restrizzjoni sinifikanti fuq titjiriet bil-lejl u għalhekk il-kompetizzjoni kienet limitata.

(351)

Għalhekk, il-Kummissjoni tista’ tikkonkludi li l-effetti negattivi tal-għajnuna huma limitati biżżejjed. Konsegwentement, il-Kummissjoni tista’ tikkonkludi li l-kriterju ta’ kompatibbiltà huwa ssodisfat.

(352)

Il-Ġermanja hija mfakkra dwar l-obbligi ta’ trasparenza fir-rigward tal-pubblikazzjoni tad-dettalji tal-għajnuna mogħtija, kif spjegat fit-Taqsima 8.2 tal-Linji gwida tal-avjazzjoni tal-2014.

(353)

Għalhekk, il-Kummissjoni tqis li f’dan il-każ il-kundizzjonijiet komuni kollha għall-kompatibbiltà skont l-Artikolu 107(3)(c) tat-Trattat huma ssodisfati.

(354)

Fid-dawl tal-valutazzjoni magħmula, il-Kummissjoni tikkonkludi li fuq il-bażi tal-Artikolu 107(3)(c) tat-Trattat il-miżura hija kompatibbli mas-suq intern sakemm tkun limitata għall-finanzjament tad-diskrepanza tal-likwidità tal-proġett ta’ investiment.

(355)

Fid-dawl tas-sejbiet fit-Taqsima 6.1.1, l-FLH hija impriża skont it-tifsira tal-Artikolu 107(1) tat-Trattat. Skont il-valutazzjoni fit-Taqsima 6.1.2, il-Kummissjoni tqis li l-finanzjament tal-miżuri M5 stazzjon ġdid għat-tifi tan-nar, M9 tagħmir għat-tifi tan-nar u M8 ħeliport jista’ jitqies li jaqa’ taħt il-mandat tal-ordni pubbliku. Skont il-valutazzjoni fit-Taqsima 6.1.2, il-finanzjament tal-miżuri l-oħra kollha ma jistax jiġi eżentat mill-iskrutinju skont ir-regoli tal-Unjoni dwar l-għajnuna mill-Istat.

(356)

Skont il-kunsiderazzjonijiet fit-Taqsima 6.2.1, il-Kummissjoni tqis li s-self mill-azzjonisti tal-FLH kien ingħata bit-termini tas-suq, u għalhekk ma jikkostitwixxix għajnuna mill-Istat skont it-tifsira tal-Artikolu 107(1) tat-Trattat.

(357)

Fid-dawl tal-kunsiderazzjonijiet fit-Taqsima 6.3, il-Kummissjoni tqis li l-finanzjament pubbliku mogħti lill-FLH fil-forma ta’ injezzjonijiet ta’ kapital jikkostitwixxi għajnuna mill-Istat skont it-tifsira tal-Artikolu 107(1) tat-Trattat. Peress li l-injezzjonijiet ta’ kapital huma soġġetti għal deċiżjoni tal-Kummissjoni u ma tpoġġewx għad-dispożizzjoni tal-FLH, il-Kummissjoni tqis li l-Ġermanja kienet irrispettat il-projbizzjoni tal-Artikolu 108(3) tat-Trattat.

(358)

Skont il-valutazzjoni fit-Taqsima 6.5, il-Kummissjoni tqis li f’dan il-każ il-kundizzjonijiet komuni kollha għall-kompatibbiltà skont l-Artikolu 107(3)(c) tat-Trattat ġew issodisfati. Għalhekk, il-Kummissjoni tikkonkludi li dawk il-miżuri huma kompatibbli mas-suq intern fuq il-bażi tal-Artikolu 107(3)(c) tat-Trattat sakemm ikunu limitati għall-finanzjament tad-diskrepanza tal-likwidità tal-proġett ta’ investiment.

(359)

Il-Kummissjoni tosserva li, fis-17 ta’ Ġunju 2014, il-Ġermanja infurmat lill-Kummissjoni li qed taċċetta eċċezzjonalment li din id-deċiżjoni tiġi adottata bl-Ingliż,

4.9.2015   

MT

Il-Ġurnal Uffiċjali tal-Unjoni Ewropea

L 232/43

(1)

B’Deċiżjoni tal-11 ta’ Diċembru 2013 (“id-Deċiżjoni”), tribunal tal-arbitraġġ (“it-Tribunal”) stabbilit taħt il-patroċinju taċ-Ċentru Internazzjonali għas-Soluzzjoni ta’ Tilwim dwar Investiment (“ICSID”) fil-Kawża Micula a.o. vs ir-Rumanija  (3) ta kumpens favur il-ħames rikorrenti (l-aħwa Viorel u Ioan Micula u l-kumpaniji S.C. European Food S.A., S.C. Starmill S.R.L., u S.C. Multipack, li huma kollha proprjetà tal-aħwa Micula; kollettivament, “ir-rikorrenti”) kontra r-Rumanija fl-ammont ta’ RON 376 433 229 (madwar EUR 82 miljun (4)) għan-nuqqas tar-Rumanija li tassigura trattament ġust u ekwu tal-investimenti tar-rikorrenti, li kien jammonta għal ksur, min-naħa tar-Rumanija, tal-Artikolu 2(3) tal-Ftehim bejn il-Gvern tar-Renju tal-Isvezja u l-Gvern tar-Rumanija dwar il-Promozzjoni u l-Protezzjoni Reċiproka tal-Investimenti (“il-BIT”) (5). Barra minn hekk, it-Tribunal iddeċieda li għandu jkun dovut imgħax fuq dik is-somma sakemm ir-Rumanija timplimenta b’mod sħiħ id-Deċiżjoni. Sal-11 ta’ Diċembru 2013, l-ammont totali hekk dovut mir-Rumanija lir-rikorrenti kien jammonta għal RON 791 882 452 (madwar EUR 178 miljun (6)).

(2)

B’ittra tal-31 ta’ Jannar 2014, is-servizzi tal-Kummissjoni infurmaw lill-awtoritajiet Rumeni li kwalunkwe implimentazzjoni jew eżekuzzjoni tad-Deċiżjoni tkun tikkostitwixxi għajnuna ġdida u tkun trid tiġi notifikata lill-Kummissjoni.

(3)

Fl-20 ta’ Frar 2014, l-awtoritajiet Rumeni infurmaw lis-servizzi tal-Kummissjoni li kienu implimentaw b’mod parzjali d-Deċiżjoni billi paċew porzjon mill-kumpens mogħti mit-Tribunal lir-rikorrenti kontra t-taxxi dovuti minn wieħed mir-rikorrenti, jiġifieri S.C. European Food S.A, lill-awtoritajiet Rumeni. Id-dejn tat-taxxa paċut b’dan il-mod kien jammonta għal RON 337 492 864 (madwar EUR 76 miljun (7)). Ir-Rumanija fittxet ukoll kjarifika mingħand is-servizzi tal-Kummissjoni dwar il-possibbiltà ta’ ħlas tal-ammont pendenti lil persuna fiżika (l-aħwa Viorel u Ioan Micula jew kwalunkwe persuna fiżika oħra li lilha tista’ tiġi assenjata t-talba).

(4)

Fit-12 ta’ Marzu 2014, is-servizzi tal-Kummissjoni talbu aktar informazzjoni mingħand ir-Rumanija dwar l-implimentazzjoni jew l-eżekuzzjoni ulterjuri previsti tad-Deċiżjoni, li r-Rumanija pprovdiet b’ittra tas-26 ta’ Marzu 2014.

(5)

Fl-1 ta’ April 2014, is-servizzi tal-Kummissjoni infurmaw lill-awtoritajiet Rumeni dwar il-possibbiltà li tinħareġ inġunzjoni ta’ sospensjoni sabiex ikun assigurat li ma titħallas l-ebda għajnuna inkompatibbli ulterjuri mill-Istat u talbu l-kummenti tar-Rumanija dwar dan. B’ittra tas-7 ta’ April 2014, ir-Rumanija ddikjarat li ma xtaqitx tikkummenta dwar il-possibbiltà li l-Kummissjoni toħroġ inġunzjoni ta’ sospensjoni.

(6)

B’ittra tas-26 ta’ Mejju 2014, il-Kummissjoni infurmat lir-Rumanija bid-deċiżjoni tagħha li toħroġ inġunzjoni ta’ sospensjoni (“l-inġunzjoni ta’ sospensjoni”) skont l-Artikolu 11(1) tar-Regolament tal-Kunsill (KE) Nru 659/1999 (8), li tobbliga lir-Rumanija tissospendi kwalunkwe azzjoni li tista’ twassal għall-implimentazzjoni jew l-eżekuzzjoni tal-parti tad-Deċiżjoni li kienet għadha ma tħallsitx, billi dak ikun jikkostitwixxi ħlas ta’ għajnuna illegali mill-Istat, sakemm il-Kummissjoni tkun ħadet deċiżjoni finali dwar il-kompatibbiltà ta’ dik l-għajnuna mill-Istat mas-suq intern.

(7)

B’ittra datata l-1 ta’ Ottubru 2014, il-Kummissjoni infurmat lir-Rumanija li hija kienet iddeċidiet li tibda l-proċedura stabbilita fl-Artikolu 108(2) tat-Trattat (“id-deċiżjoni ta’ ftuħ”) fir-rigward tal-implimentazzjoni parzjali tad-Deċiżjoni mir-Rumanija li seħħet fil-bidu tal-2014 (9) kif ukoll fir-rigward ta’ kwalunkwe implimentazzjoni jew eżekuzzjoni ulterjuri tad-Deċiżjoni.

(8)

Id-deċiżjoni tal-Kummissjoni li tibda l-proċedura kienet ippubblikata f’Il-Ġurnal Uffiċjali tal-Unjoni Ewropea  (10) fis-7 ta’ Novembru 2014. Permezz ta’ dik id-deċiżjoni, il-Kummissjoni stiednet lill-partijiet interessati sabiex jissottomettu l-kummenti tagħhom.

(9)

Ir-Rumanija ssottomettiet il-kummenti tagħha dwar id-deċiżjoni ta’ ftuħ fis-26 ta’ Novembru 2014. Ir-rikorrenti ssottomettew kummenti bħala parti interessata fit-8 ta’ Diċembru 2014, wara r-rifjut, min-naħa tal-Kummissjoni, tat-talba tagħhom biex ikollhom perjodu ta’ żmien itwal disponibbli sabiex jissottomettu l-kummenti tagħhom. Il-kummenti tar-rikorrenti ntbagħtu lir-Rumanija, li ngħatat l-opportunità biex tirreaġixxi; l-osservazzjonijiet tar-Rumanija dwar il-kummenti tar-rikorrenti waslu fis-27 ta’ Jannar 2015.

(10)

Ir-rikorrenti talbu aċċess ukoll għall-korrispondenza bil-miktub kollha bejn il-Kummissjoni u r-Rumanija li kien hemm fil-fajl tal-każ. It-talba kienet rifjutata fid-19 ta’ Diċembru 2014 u r-rifjut kien affermat fit-2 ta’ Marzu 2015.

(11)

B’ittri tad-9 u l-11 ta’ Marzu 2015, l-awtoritajiet Rumeni infurmaw lill-Kummissjoni li, fil-perjodu mill-5 ta’ Frar sal-25 ta’ Frar 2015, l-eżekutur maħtur mill-Qorti qabad ammont addizzjonali ta’ RON 9 197 482 mill-Ministeru tal-Finanzi u li sar ħlas volontarju tal-ammont li kien fadal (jiġifieri RON 466 760 066) (11), mill-Ministeru tal-Finanzi, f’kont imblukkat miftuħ f’isem il-ħames rikorrenti.

(12)

Fl-1 ta’ Frar 1995, daħal fis-seħħ il-Ftehim Ewropew ta’ assoċjazzjoni (“EA”) bejn il-Komunità Ewropea (il-“Komunità”) u l-Istati Membri tagħha, minn naħa, u r-Rumanija, min-naħa l-oħra. (12) L-għan tal-EA kien li jipprepara lir-Rumanija għall-adeżjoni fl-Unjoni. L-Artikolu 64(1)(iii) tal-EA ddikjara bħala inkompatibbli mal-funzjonament xieraq tal-EA kwalunkwe għajnuna pubblika li twassal għal distorsjoni jew thedded li twassal għal distorsjoni tal-kompetizzjoni billi tiffavorixxi ċerti impriżi jew il-produzzjoni ta’ ċerti prodotti sa fejn dawn jistgħu jaffettwaw il-kummerċ bejn l-Unjoni u r-Rumanija. Skont l-Artikolu 64(2) tal-EA, kwalunkwe prattika kuntrarja għal dan l-Artikolu kellha tiġi valutata “fuq il-bażi ta’ kriterji li joħorġu mill-applikazzjoni tar-regoli tal-Artikoli 85, 86 u 92 tat-Trattat li jistabbilixxi l-Komunità Ekonomika Ewropea” (issal-Artikoli 101, 102 u 107 tat-Trattat). Din ir-referenza dinamika għall-“kriterji li joħorġu mill-applikazzjoni tar-regoli” tirreferi għar-regoli kollha tal-Unjoni dwar l-għajnuna mill-Istat, inklużi dawk li jirregolaw l-għoti ta’ għajnuna reġjonali mill-Istat. (13) Minbarra l-obbligu sostantiv sabiex tikkonforma mad-dritt tal-Unjoni dwar l-għajnuna mill-Istat, l-Artikoli 69 u 71 tal-EA obbligaw lir-Rumanija tarmonizza l-leġislazzjoni domestika tagħha mal-acquis communautaire, li jsemmi b’mod espliċitu d-dritt tal-Unjoni dwar il-kompetizzjoni u b’hekk id-dritt tal-Unjoni dwar l-għajnuna mill-Istat li jifforma parti minnu. Għalhekk, l-EA obbliga lir-Rumanija, u r-Rumanija impenjat ruħha li tikkonforma mal-korp kollu tad-dritt tal-Unjoni dwar l-għajnuna mill-Istat. Barra minn hekk, l-EA kien parti mill-ordni legali domestiku wara li ġie ratifikat bil-liġi 20/1993 mill-Parlament nazzjonali u ppubblikat fil-Ġurnal Uffiċjali nazzjonali fit-12 ta’ April 1993 (14).

(13)

Sabiex tikkonforma mal-obbligu ta’ armonizzazzjoni tagħha skont l-EA, ir-Rumanija għaddiet il-Liġi Nru 143/1999 dwar l-għajnuna mill-Istat (“liġi dwar l-għajnuna mill-Istat”) fl-1999, li daħlet fis-seħħ fl-1 ta’ Jannar 2000. Dik il-liġi kienet tinkludi l-istess definizzjoni ta’ għajnuna mill-Istat bħal dik kontenuta fl-Artikolu 64 tal-EA u skont id-dritt tal-Unjoni. Dik il-liġi ħatret ukoll lill-Kunsill Rumen għall-Kompetizzjoni (15) u lill-Uffiċċju Rumen għall-Kompetizzjoni (16) bħala l-awtoritajiet ta’ sorveljanza nazzjonali tagħha dwar l-għajnuna mill-Istat, responsabbli sabiex jivvalutaw il-kompatibbiltà tal-għajnuna mill-Istat mogħtija mir-Rumanija lill-impriżi (17) u stabbiliet il-proċedura li għandha tiġi segwita għan-notifika u l-awtorizzazzjoni ta’ għajnuna mill-Istat li kienet immudellata fuq l-Artikolu 108 tat-Trattat.

(14)

Fit-2 ta’ Ottubru 1998, ir-Rumanija ppromulgat l-Ordinanza Governattiva ta’ Emerġenza 24/1998 (“EGO 24”), li tagħti lil ċerti investituri f’reġjuni żvantaġġati sensiela ta’ inċentivi, fosthom:

(15)

Il-Gvern Rumen iddeċieda liema reġjuni għandhom jiġu kklassifikati bħala żvantaġġati u għal kemm żmien, sa massimu ta’ 10 snin. B’deċiżjoni tal-25 ta’ Marzu 1999, il-Gvern iddikjara ż-żona tal-minjieri ta’ Ștei-Nucet, fil-kontea ta’ Bihor, bħala reġjun żvantaġġat għal 10 snin, effettivi fl-1 ta’ April 1999.

(16)

Fil-15 ta’ Mejju 2000, il-Kunsill Rumen għall-Kompetizzjoni adotta d-Deċiżjoni Nru 244/2000, li fiha sab li diversi mill-inċentivi offruti taħt l-EGO 24 kienu jgħawġu l-kompetizzjoni. Huwa qies li l-“[e]żenzjoni mid-dazju doganali fuq il-materja prima hija kkunsidrata bħala għajnuna mill-Istat għal skopijiet operattivi … li twassal għal tfixkil tal-kompetizzjoni” u ddeċieda li “ir-rimborż tad-dazji doganali fuq il-materja prima impurtata, il-parts tal-bdil u/jew il-komponenti neċessarji għal skopijiet ta’ produzzjoni proprja fi ħdan żona … għandha titħassar”. Dik id-deċiżjoni kienet adottata b’riżultat tan-notifika mill-aġenzija nazzjonali għall-iżvilupp reġjonali (il-konċedent tal-għajnuna taħt l-EGO 24) lill-Kunsill għall-Kompetizzjoni, skont il-Liġi Nru 143/1999, tal-modifiki previsti fl-EGO 24 inklużi fl-abbozz ta’ Ordinanza Governattiva ta’ Emerġenza 75/2000 (“EGO 75”). Fost modifiki oħra nnotifikati, il-leġiżlatur Rumen ippreveda s-sostituzzjoni tar-rimborż tad-dazji doganali skont l-Artikolu 6(1)(b) tal-EGO 24 (il-Faċilità għall-Materja Prima) b’eżenzjoni mid-dazji doganali fuq materja prima, parts tal-bdil u/jew komponenti impurtati neċessarji għal skopijiet ta’ produzzjoni proprja. Fid-Deċiżjoni Nru 244/2000, il-Kunsill għall-Kompetizzjoni ta awtorizzazzjoni kondizzjonali għall-abbozz tal-EGO 75, bil-kundizzjoni li jkunu ssodisfati l-kundizzjonijiet li ġejjin: (i) il-faċilitajiet skont l-Artikolu 6(1)(b) tal-EGO 24 għandhom jiġu revokati u l-emenda prevista biex ir-rimborż tad-dazji doganali jiġi sostitwit b’eżenzjoni mid-dazji doganali għandha tiġi rtirata u (ii) l-emendi previsti fl-Artikolu 6(1)(c) tal-EGO 24 (il-Faċilità għat-Taxxa fuq il-Profitt) ikunu limitati biss għall-profitt li jerġa’ jiġi investit.

(17)

Fl-1 ta’ Lulju 2000, daħlet fis-seħħ l-EGO 75. Madankollu, l-EGO 75, kif adottata, ma kinitx tikkonforma mal-kundizzjonijiet tal-Kunsill għall-Kompetizzjoni sabiex tirrevoka l-Faċilità għall-Materja Prima u sabiex tirtira l-emenda prevista għaliha. Minflok, hija emendat l-Artikolu 6(1)(b) tal-EGO 24 billi ssostitwiet ir-rifużjoni fuq id-dazji doganali taħt il-Faċilità għall-Materja Prima b’eżenzjoni fuq id-dazji doganali fuq il-materja prima impurtata bi ksur dirett tad-Deċiżjoni Nru 244/2000.

(18)

Il-Kunsill għall-Kompetizzjoni sfida n-nuqqas ta’ implimentazzjoni tad-deċiżjoni tiegħu quddiem il-Qorti tal-Appell ta’ Bukarest, li madankollu warrbet l-applikazzjoni fis-26 ta’ Jannar 2001 bħala inammissibbli (18). L-inammissibbiltà kienet ibbażata fuq il-fatt li l-EGO 75 kienet ikkunsidrata bħala miżura leġislattiva u mhux amministrattiva, li l-Kunsill għall-Kompetizzjoni ma setax jikkontesta l-legalità tagħha skont il-Liġi Nru 143/1999 u li kwalunkwe kunflitt bejn id-dispożizzjonijiet legali kellu jiġi solvut mill-gvern u l-Parlament mingħajr interferenza mill-qrati. Il-Qorti Għolja tal-Kassazzjoni tal-Ġustizzja tar-Rumanija ċaħdet l-appell tal-Kunsill għall-Kompetizzjoni kontra d-deċiżjoni tal-Qorti tal-Appell tad-19 ta’ Frar 2002 bħala inammissibbli għal raġunijiet simili (19).

(19)

Fi Frar 2000, ir-Rumanija bdiet it-taħditiet għall-adeżjoni fl-Unjoni. Il-politika dwar il-kompetizzjoni, li tinkludi l-konformità mar-regoli tal-Unjoni dwar l-għajnuna mill-Istat, kienet tifforma parti minn dawk in-negozjati. Fil-kuntest ta’ dawk in-negozjati, il-Pożizzjoni Komuni tal-Unjoni tal-21 ta’ Novembru 2001 innotat li “hemm numru ta’ skemi ta’ għajnuna inkompatibbli eżistenti kif ukoll ġodda li ma nġabux konformi mal-acquis”, inklużi “faċilitajiet ipprovduti taħt l-[EGO 24 u l-EGO 75]” (20).

(20)

Fil-31 ta’ Awwissu 2004, ir-Rumanija ħassret l-inċentivi kollha pprovduti taħt l-EGO 24, kif emendata bl-EGO 75, ħlief il-Faċilità għat-Taxxa fuq il-Profitt. Ir-revoka tal-inċentivi skont l-EGO 24 daħlet fis-seħħ fit-22 ta’ Frar 2005. Ir-rapport li jakkumpanja l-att li jħassar l-EGO 24, kif emendat bl-EGO 75, spjega: “Sabiex jiġu ssodisfati l-kriterji fir-regoli Komunitarji dwar l-għajnuna mill-Istat, u anki sabiex jitlestew in-negozjati skont il-Kapitolu Nru 6 – Politika dwar il-Kompetizzjoni, huwa neċessarju li jiġu eliminati l-forom kollha ta’ għajnuna mill-Istat fil-leġislazzjoni nazzjonali li mhumiex kompatibbli mal-acquis communautaire f’dan il-qasam u, f’dan ir-rigward, huwa propost li jitneħħew […] id-dispożizzjonijiet tal-Artikolu 6 paragrafu (1), l-ittra (b), l-ittra (d) u l-ittra (e) tal-Ordinanza Governattiva ta’ Emerġenza Nru 24/1998 dwar iż-żoni żvantaġġati […]” (21).

(21)

Ir-rikorrenti għamlu ċerti investimenti fiż-żona ta’ Ștei-Nucet, Kontea ta’ Bihor, ir-Rumanija, fil-bidu tas-snin 2000. Fl-1 ta’ Ġunju 2000, S.C. European Food S.A. kisbet ċertifikat ta’ investitur permanenti, filwaqt li S.C. Starmill S.R.L. u S.C. Multipack kisbu ċ-ċertifikati ta’ investitur permanenti (“PIC”) tagħhom fis-17 ta’ Mejju 2002, u b’hekk dawk il-kumpaniji saru eliġibbli sabiex jibbenefikaw mill-iskema stabbilita bl-EGO 24, kif emendata bl-EGO 75, għall-investimenti magħmula minnhom minn dawk id-dati ‘l quddiem fir-reġjun ta’ Ștei-Nucet, kontea ta’ Bihor, fir-Rumanija.

(22)

Fl-2003, ir-Rumanija u l-Isvezja kkonkludew il-BIT, li ta lill-investituri ta’ kull pajjiż (inkluż għall-investimenti li jkunu għamlu qabel id-dħul fis-seħħ tal-BIT (22)) ċerti protezzjonijiet meta jinvestu fil-pajjiż l-ieħor. Fost affarijiet oħra, il-BIT iggarantixxa t-trattament ġust u ekwu tal-investimenti koperti fl-Istat ospitanti, li ġie interpretat bħala li jinkludi wkoll il-protezzjoni tal-aspettattivi leġittimi tal-investituri. Huwa kien jippermetti wkoll lill-investituri li jibdew proċedimenti quddiem tribunal tal-arbitraġġ internazzjonali jekk iħossu li d-drittijiet tagħhom skont il-BIT ġew miksura mill-Istat ospitanti. Billi l-aħwa Micula għandhom ċittadinanza Svediża, huma sostnew li l-investimenti tagħhom fir-Rumanija kienu koperti mill-BIT.

(23)

Fit-28 ta’ Lulju 2005, u b’reazzjoni għar-revoka tal-inċentivi għall-investiment taħt l-EGO 24, ir-rikorrenti talbu l-istabbiliment ta’ tribunal tal-arbitraġġ skont id-dispożizzjonijiet tal-BIT għas-soluzzjoni ta’ tilwim. B’deċiżjoni tal-24 ta’ Settembru 2008, it-Tribunal sab li t-talbiet tar-rikorrenti kienu ammissibbli. Ir-rikorrenti inizjalment kienu talbu l-istabbiliment mill-ġdid tal-inċentivi għall-investiment skont l-EGO 24 li kienu ġew revokati mit-22 ta’ Frar 2005. Madankollu, matul il-proċedimenti, ir-rikorrenti rtiraw parzjalment it-talba tagħhom fl-2009 u minflok talbu kumpens għad-danni li rriżultaw mir-revoka tal-inċentivi skont l-EGO 24. Ir-rikorrenti allegaw li, bir-revoka tal-inċentivi, ir-Rumanija kienet kisret l-aspettattivi leġittimi tagħhom li dawk l-inċentivi jkunu disponibbli, fis-sustanza, sal-1 ta’ April 2009. Għalhekk, skont ir-rikorrenti, ir-Rumanija kienet kisret l-obbligu tagħha ta’ trattament ġust u ekwu dovut lilhom bħala investituri Svediżi skont l-Artikolu 2(3) tal-BIT.

(24)

Matul il-proċedimenti tal-arbitraġġ, il-Kummissjoni intervjeniet bħala amicus curiae. Fl-intervent tagħha, ippreżentat fl-20 ta’ Lulju 2009, il-Kummissjoni spjegat li l-inċentivi skont l-EGO 24 kienu: “inkompatibbli mar-regoli Komunitarji dwar l-għajnuna reġjonali. B’mod partikolari, l-inċentivi ma kinux jirrispettaw ir-rekwiżiti tal-liġi Komunitarja rigward l-ispejjeż eliġibbli u l-intensitajiet tal-għajnuna. Barra minn hekk, il-faċilitajiet kienu jikkostitwixxu għajnuna operatorja, li hija pprojbita bir-regoli dwar l-għajnuna reġjonali”.

(25)

Il-Kummissjoni osservat ukoll li “kwalunkwe deċiżjoni li terġa’ tistabbilixxi l-privileġġi aboliti mir-Rumanija, jew li tikkumpensa lir-rikorrenti għat-telf ta’ dawk il-privileġġi, twassal għall-għoti ta’ għajnuna ġdida li ma tkunx kompatibbli mat-Trattat tal-KE”. Hija avżat ukoll lit-Tribunal li l-“eżekuzzjoni ta’ [kwalunkwe deċiżjoni li titlob li r-Rumanija terġa’ tistabbilixxi skemi ta’ investiment li nstabu li mhumiex kompatibbli mas-suq intern matul in-negozjati tal-adeżjoni] għalhekk ma tistax isseħħ jekk din tmur kontra r-regoli tal-politika tal-UE dwar l-għajnuna mill-Istat”.

(26)

Fid-Deċiżjoni tal-11 ta’ Diċembru 2013, it-Tribunal sab li bir-revoka tal-inċentivi skont l-EGO 24, ir-Rumanija “kisret l-aspettattivi leġittimi tar-Rikorrenti fir-rigward tad-disponibbiltà tal-inċentivi skont l-EGO 24” sal-1 ta’ April 2009. (23) It-Tribunal ikkonkluda wkoll li, bl-eċċezzjoni taż-żamma tal-obbligi tal-investituri skont l-EGO 24 wara r-revoka tal-inċentivi rilevanti, “Ir-revoka tal-inċentivi min-naħa tar-Rumanija kienet azzjoni raġonevoli fl-insegwiment ta’ politika razzjonali.” (24) Madankollu, it-Tribunal kompla jiddikjara li (25): “Din il-konklużjoni ma tnaqqasx mill-argument tat-Tribunal […] aktar ‘il fuq li r-Rumanija mminat l-aspettattivi leġittimi tar-Rikorrenti fir-rigward tad-disponibbiltà kontinwa tal-inċentivi sal-1 ta’ April 2009. Minħabba f’hekk, l-azzjonijiet tar-Rumanija, għalkemm fil-biċċa l-kbira kienu xierqa u mfassla b’mod strett sabiex tiġi segwita politika razzjonali, ma kinux ġusti jew ekwi fir-rigward tar-Rikorrenti.”

It-Tribunal ikkonkluda l-analiżi tiegħu billi ddikjara li (26): “[B]ir-revoka tal-inċentivi skont l-EGO 24 qabel l-1 ta’ April 2009, ir-Rumanija ma aġixxietx b’mod mhux raġonevoli jew b’mala fede (ħlief li r-[Rumanija] aġixxiet b’mod mhux raġonevoli billi żammet l-obbligi tal-investituri wara li tterminat l-inċentivi). It-Tribunal, madankollu, jikkonkludi b’maġġoranza li r-Rumanija kisret l-aspettattivi leġittimi tar-Rikorrenti li dawk l-inċentivi kienu se jkunu disponibbli, sostanzjalment fl-istess forma, sal-1 ta’ April 2009. Ir-Rumanija naqset ukoll li taġixxi b’mod trasparenti billi naqset milli tinforma fil-ħin lir-Rikorrenti li r-reġim kien se jiġi tterminat qabel id-data ta’ skadenza ddikjarata tiegħu. Minħabba f’hekk, it-Tribunal isib li r-Rumanija naqset milli “tassigura trattament ġust u ekwu tal-investimenti” tar-Rikorrenti skont it-tifsira tal-Artikolu 2(3) tal-BIT”.

(27)

It-Tribunal iddeċieda wkoll li r-Rumanija kellha tħallas id-danni lir-rikorrenti (27). B’kollox, it-Tribunal ta lir-rikorrenti RON 376 433 229 flimkien mal-imgħax. Id-danni huma komposti kif ġej: it-Tribunal sab li r-Rumanija kellha tħallas RON 85,1 miljun (28) lir-rikorrenti f’danni għaż-żieda fil-prezz taz-zokkor (li għall-importazzjoni tiegħu r-rikorrenti kellhom iħallsu dazji doganali wara r-revoka tal-Faċilità għall-Materja Prima), RON 17,5-il miljun (29) f’danni għaż-żieda fil-prezz ta’ materja prima għajr iz-zokkor u l-PET (30), RON 18,1-il miljun (31) f’danni għat-telf tal-abilità li jaħżnu għal quddiem iz-zokkor bi prezzijiet aktar baxxi, u RON 255,7 miljun (32) f’danni għall-profitt mitluf li jirriżulta mill-bejgħ mitluf ta’ prodotti lesti. Barra minn hekk, it-Tribunal ordna lir-Rumanija tħallas imgħax (ROBOR u 5 %), ikkalkulat mill-1 ta’ Marzu 2007 fir-rigward taż-żieda fil-prezz taz-zokkor u materja prima oħra, mill-1 ta’ Novembru 2009 fir-rigward tat-telf tal-abilità li jaħżnu iz-zokkor għal quddiem, u mill-1 ta’ Mejju 2008 fir-rigward tal-profitti mitlufa. Fid-data tad-Deċiżjoni, il-prinċipal u l-imgħax dovuti lir-rikorrenti kienu jammontaw għal RON 791 882 452, kif jidher fit-Tabella.

Danni u mgħax kif mogħtija lir-rikorrenti bid-Deċiżjoni

(28)

Fit-18 ta’ April 2014, ir-Rumanija ppreżentat applikazzjoni għall-annullament tad-Deċiżjoni abbażi tal-Artikolu 52 tal-Konvenzjoni dwar is-Soluzzjoni ta’ Tilwim dwar Investimenti bejn l-Istati u ċ-Ċittadini ta’ Stati Oħra tat-18 ta’ Marzu 1965 (“Konvenzjoni dwar l-ICSID”) quddiem kumitat ad hoc. Minħabba r-regoli proċedurali applikabbli għal dawk il-proċedimenti, ir-Rumanija ma pprovdietx lill-Kummissjoni l-applikazzjoni tagħha. Madankollu, deher ċar li fl-applikazzjoni tagħha, ir-Rumanija talbet ukoll lill-kumitat ad hoc jordna s-sospensjoni tal-infurzar tad-Deċiżjoni sakemm il-kumitat jiddeċiedi dwar l-applikazzjoni għall-annullament. B’ittra tat-18 ta’ Awwissu 2014, ir-Rumanija infurmat lill-Kummissjoni li b’ordni tas-7 ta’ Awwissu 2014, il-kumitat ad hoc issospenda l-infurzar tad-Deċiżjoni bil-kundizzjoni li r-Rumanija tiddepożita, fi żmien xahar, l-assigurazzjonijiet li ġejjin: “Ir-Rumanija timpenja ruħha mingħajr kundizzjonijiet (inklużi dawk relatati mal-Liġi jew deċiżjonijiet tal-[UE]) li tagħmel il-pagament sħiħ tal-obbligu finanzjarju tagħha impost bid-Deċiżjoni fil-Kawża tal-ICSID Nru ARB/05/20 - u dovut lir-Rikorrenti - sakemm id-Deċiżjoni ma tkunx annullata - wara n-notifika tad-Deċiżjoni dwar l-annullament”.

(29)

Fuq talba tar-Rumanija, il-Kummissjoni spjegat lir-Rumanija li hija ma setgħetx tipprovdi l-impenn inkondizzjonat li se tħallas il-kumpens mogħti lir-Rikorrenti skont id-Deċiżjoni anki jekk dak kien jinvolvi ksur tal-obbligi tagħha skont id-dritt tal-Unjoni u irrispettivament minn kwalunkwe deċiżjoni tal-Kummissjoni. Ir-Rumanija wieġbet f’dan ir-rigward lill-kumitat ad hoc li neħħa s-sospensjoni tal-infurzar tad-Deċiżjoni mis-7 ta’ Settembru 2014.

(30)

Fil-15 ta’ Ottubru 2014, il-Kummissjoni ssottomettiet applikazzjoni lill-kumitat ad hoc għall-awtorizzazzjoni biex tintervjeni bħala parti mhux litiganti fil-proċedimenti ta’ annullament. L-awtorizzazzjoni biex tintervjeni ngħatat mill-kumitat ad hoc fl-4 ta’ Diċembru 2014 u l-Kummissjoni ssottomettiet is-sommarju tal-fatti amicus curiae tagħha f’dawk il-proċedimenti fid-9 ta’ Jannar 2015.

(31)

L-awtoritajiet Rumeni infurmaw ukoll lis-servizzi tal-Kummissjoni dwar il-proċedimenti nazzjonali introdotti mir-rikorrenti sabiex jinfurzaw id-deċiżjoni. Fi Frar 2014, Viorel Micula l-ewwel introduċa l-proċedimenti tal-qorti bil-għan li tiġi rikonoxxuta d-deċiżjoni abbażi tal-Kodiċi Ċivili Proċedurali Ġdid (l-Artikoli 1124-1132) (33). Fis-7 ta’ Mejju 2014, il-Kummissjoni intervjeniet f’dawk il-proċedimenti skont l-Artikolu 23a(2) tar-Regolament (KE) Nru 659/1999. Madankollu, Viorel Micula rtira l-azzjoni tiegħu fit-28 ta’ Mejju 2014 u għalhekk ma ngħatat l-ebda sentenza. B’mod separat, fit-18 ta’ Marzu 2014, l-erba’ rikorrenti l-oħra (S.C. European Food S.A., S.C. Starmill S.R.L., S.C. Multipack, u s-Sur Ion Micula) bdew proċedimenti tal-qorti fir-Rumanija bil-għan li tiġi infurzata d-Deċiżjoni skont l-Artikolu 54 tal-Konvenzjoni dwar l-ICSID li titlob il-ħlas ta’ 80 % tal-ammont pendenti (jiġifieri RON 301 146 583) u l-imgħax korrispondenti.

(32)

Fl-24 ta’ Marzu 2014, it-Tribunal ta’ Bukarest ippermetta l-eżekuzzjoni tad-Deċiżjoni kif mitlub mill-erba’ rikorrenti fid-dawl tal-fatt li, fuq il-bażi tal-Artikolu 54 tal-Konvenzjoni dwar l-ICSID li kienet ratifikata mir-Rumanija u hija parti mill-ordni legali domestiku, id-Deċiżjoni hija att direttament infurzabbli u trid tiġi ttrattata bħala sentenza domestika finali, u b’hekk elimina l-bżonn tal-proċedura għar-rikonoxximent tad-Deċiżjoni fuq il-bażi tal-Kodiċi Ċivili Proċedurali Ġdid Rumen (l-Artikoli 1123-1132) (34). Fit-30 ta’ Marzu 2014, eżekutur beda l-proċedura tal-infurzar billi ta lill-Ministeru tal-Finanzi Rumen skadenza ta’ 6 xhur biex iħallas lill-erba’ rikorrenti 80 % tad-Deċiżjoni flimkien mal-imgħax u spejjeż oħra.

(33)

Ir-Rumanija kkontestat l-eżekuzzjoni tad-Deċiżjoni quddiem it-Tribunal ta’ Bukarest u talbet għal miżuri interim, jiġifieri s-sospensjoni tal-eżekuzzjoni sakemm il-Kawża tkun ġiet deċiża fuq il-merti tagħha. (35) Fl-14 ta’ Mejju 2014, il-Qorti ta’ Bukarest issospendiet temporanjament l-eżekuzzjoni tad-Deċiżjoni sakemm tkun ittieħdet deċiżjoni dwar il-merti tal-oġġezzjoni tar-Rumanija u t-talba sabiex tiġi sospiża l-eżekuzzjoni. Fis-26 ta’ Mejju 2014, il-Kummissjoni intervjeniet f’dawk il-proċedimenti skont l-Artikolu 23a(2) tar-Regolament (KE) Nru 659/1999. Il-Kummissjoni stiednet lit-Tribunal ta’ Bukarest sabiex jissospendi u jħassar l-eżekuzzjoni tad-Deċiżjoni. B’mod alternattiv, il-Kummissjoni stiednet lit-Tribunal ta’ Bukarest biex jirreferi mistoqsija preliminari lill-Qorti tal-Ġustizzja tal-Unjoni Ewropea (“QtĠ-UE”).

(34)

Fit-23 ta’ Settembru 2014, it-Tribunal ta’ Bukarest, fil-Kawża dwar il-miżuri interim, neħħa s-sospensjoni u ċaħad it-talba tar-Rumanija għal sospensjoni tal-eżekuzzjoni tad-Deċiżjoni. Ir-raġuni ewlenija għal dak ir-rifjut kienet it-tneħħija tas-sospensjoni tal-infurzar tad-Deċiżjoni mill-kumitat ad hoc tal-ICSID fis-7 ta’ Settembru 2014 (ara l-premessa 29). Fit-30 ta’ Settembru 2014, ir-Rumanija ddeċidiet li tappella mid-deċiżjoni tat-Tribunal ta’ Bukarest tat-23 ta’ Settembru 2014 (36). Fit-13 ta’ Ottubru 2014, it-Tribunal ta’ Bukarest irrifjuta t-talba biex jibgħat mistoqsijiet preliminari lill-QtĠ-UE fuq il-bażi tal-Artikolu 267 tat-Trattat. Fis-17 ta’ Ottubru 2014, fl-isfond tad-deċiżjoni tal-Kummissjoni tal-1 ta’ Ottubru 2014 li tiftaħ il-proċedura ta’ investigazzjoni formali, fil-kuntest tal-Kawża Nru 15755/3/2014 quddiem it-Tribunal ta’ Bukarest, ir-Rumanija reġgħet talbet miżuri interim fil-forma tas-sospensjoni tal-eżekuzzjoni tad-Deċiżjoni.

(35)

Minkejja l-obbligu tal-awtoritajiet kollha Rumeni, inkluża l-ġudikatura, sabiex jikkonformaw mad-deċiżjonijiet tal-Kummissjoni tas-26 ta’ Mejju 2014 u tal-1 ta’ Ottubru 2014, l-eżekutur maħtur mit-Tribunal ta’ Bukarest ħareġ ordnijiet fil-31 ta’ Ottubru 2014 sabiex jinqabdu l-kontijiet tal-Ministeru tal-Finanzi tar-Rumanija u titfittex l-eżekuzzjoni ta’ 80 % tad-Deċiżjoni. B’riżultat tal-ittri ta’ sekwestru maħruġa mill-eżekutur, xi partijiet mill-kontijiet bankarji u tat-teżor tal-istat tal-Ministeru tal-Finanzi bħalissa huma ffriżati.

(36)

Fl-24 ta’ Novembru 2014, it-Tribunal ta’ Bukarest irrifjuta wkoll l-azzjoni prinċipali tar-Rumanija kontra l-ordni ta’ eżekuzzjoni tal-24 ta’ Marzu 2014, inkluża t-talba għall-miżuri interim tas-17 ta’ Ottubru 2014. Fl-14 ta’ Jannar 2015, ir-Rumanija appellat mid-deċiżjoni tat-Tribunal ta’ Bukarest (37). Fl-24 ta’ Frar 2015, il-Qorti tal-Appell ta’ Bukarest neħħiet id-deċiżjoni tat-Tribunal ta’ Bukarest tat-23 ta’ Settembru 2014 u ssospendiet l-eżekuzzjoni sakemm jiġi deċiż l-appell kontra d-deċiżjoni tat-Tribunal ta’ Bukarest tal-24 ta’ Novembru 2014. Il-Kummissjoni ddeċidiet li tfittex l-awtorizzazzjoni biex tintervjeni f’dawk il-proċedimenti tal-appell fuq il-bażi tal-Artikolu 23a(2) tar-Regolament (KE) Nru 659/1999.

(37)

Fil-5 ta’ Jannar 2015, l-eżekutur maħtur mill-Qorti qabad RON 36 484 232 (madwar EUR 8,1 miljun (38)) mill-Ministeru tal-Finanzi tar-Rumanija. Minn din is-somma, l-eżekutur suċċessivament ittrasferixxa RON 34 004 232 (madwar EUR 7,56 miljun) f’partijiet indaqs lil tlieta mill-ħames rikorrenti, u żamm il-bqija bħala kumpens għall-ispejjeż tal-eżekuzzjoni. Bejn il-5 ta’ Frar u l-25 ta’ Frar 2015, l-eżekutur maħtur mill-Qorti qabad RON 9 197 482 (madwar EUR 2 miljun) (39) oħra mill-Ministeru tal-Finanzi. Fid-9 ta’ Marzu 2015, il-Ministeru tal-Finanzi ttrasferixxa b’mod volontarju l-ammont li kien fadal ta’ RON 472 788 675 (madwar EUR 106,5 miljun (40)) (inklużi l-ispejjeż tal-eżekutur maħtur mill-Qorti li kienu jammontaw għal RON 6 028 608) f’kont imblukkat f’isem il-ħames rikorrenti biex jimplimenta d-Deċiżjoni. Madankollu, il-ħames rikorrenti jistgħu jiġbdu l-flus biss jekk il-Kummissjoni tiddeċiedi li l-għajnuna mill-Istat mogħtija fuq il-bażi tad-Deċiżjoni tkun kompatibbli mas-suq intern.

(38)

Il-Kummissjoni skopriet ukoll li s-Sur Viorel Micula beda wkoll azzjoni kontra r-Rumanija quddiem il-Qorti Distrettwali tal-Istati Uniti għad-Distrett ta’ Columbia (41). Dak il-każ huwa pendenti. Il-Kummissjoni beħsiebha tapplika għall-awtorizzazzjoni biex tippreżenta sommarju tal-fatti amicus curiae f’dawk il-proċedimenti. Is-Sur Viorel Micula beda wkoll aktar proċedimenti ta’ infurzar kontra r-Rumanija quddiem il-qrati Rumeni fit-3 ta’ Ottubru 2014, iżda dik it-talba kienet rifjutata mit-Tribunal ta’ Bukarest fit-3 ta’ Novembru 2014.

(39)

Il-miżura li qed tiġi valutata hija l-ħlas tal-kumpens mogħti mit-Tribunal lir-rikorrenti bis-saħħa tad-Deċiżjoni, bl-implimentazzjoni jew bl-eżekuzzjoni ta’ dik id-Deċiżjoni, flimkien mal-imgħax li akkumula minn meta nħarġet dik id-Deċiżjoni.

(40)

Kif innotat fil-premessa 3, ir-Rumanija diġà ħallset b’mod parzjali dak il-kumpens fil-bidu tal-2014 billi paċiet id-djun tat-taxxa dovuti minn wieħed mir-rikorrenti, S.C. European Food S.A., lill-Istat Rumen. Id-djun tat-taxxa paċuti b’dan il-mod jammontaw għal RON 337 492 864 (madwar EUR 76 miljun (42)).

(41)

Kif innotat fil-premessa 37, l-eżekutur maħtur mill-qorti qabad RON 45 681 714 (madwar EUR 10,17 miljun (43)) mill-Ministeru tal-Finanzi tar-Rumanija biex jesegwixxi d-Deċiżjoni. Barra minn hekk, l-awtoritajiet Rumeni ttrasferew l-ammont li kien fadal ta’ RON 472 788 675 (madwar EUR 106,5 miljun (44)) (inklużi l-ispejjeż tal-eżekutur maħtur mill-qorti li jammontaw għal RON 6 028 608) f’kont imblukkat f’isem il-ħames rikorrenti.

(42)

Skont l-awtoritajiet Rumeni, id-deċiżjoni tal-arbitraġġ kienet implimentata b’mod sħiħ.

(43)

Fid-deċiżjoni ta’ ftuħ, il-Kummissjoni waslet għall-konklużjoni preliminari li l-ħlas tal-kumpens mogħti mit-Tribunal lir-rikorrenti, permezz tal-implimentazzjoni jew l-eżekuzzjoni tad-Deċiżjoni, jikkostitwixxi għajnuna mill-Istat fis-sens tal-Artikolu 107(1) tat-Trattat. Din il-konklużjoni preliminari hija bbażata fuq is-sejbiet preliminari li:

(44)

Il-Kummissjoni mbagħad stabbiliet li l-applikazzjoni tar-regoli dwar l-għajnuna mill-Istat f’dan il-każ ma taffettwax id-drittijiet u l-obbligi protetti bl-Artikolu 351 tat-Trattat. Il-Kummissjoni sabet ukoll li l-ħlas tal-kumpens lir-rikorrenti jkun jikkostitwixxi għajnuna ġdida, billi l-implimentazzjoni jew l-eżekuzzjoni tad-Deċiżjoni jseħħu wara l-adeżjoni tar-Rumanija fl-Unjoni, u li ma kienx importanti li xi wħud mill-ispejjeż li l-miżura de facto tirrimborża kienu mġarrba mir-rikorrenti qabel l-adeżjoni. Fl-aħħar nett, il-Kummissjoni waslet għall-konklużjoni preliminari li l-ħlas tal-kumpens mogħti mit-Tribunal lir-rikorrenti, permezz tal-implimentazzjoni jew l-eżekuzzjoni tad-Deċiżjoni, ma jkunx kompatibbli mas-suq intern, billi ma jissodisfax il-kundizzjonijiet applikabbli tal-kompatibbiltà għall-għajnuna reġjonali.

(45)

Ir-Rumanija l-ewwel nett tirrimarka li, skont l-Artikolu 54(1) tal-Konvenzjoni dwar l-ICSID, li r-Rumanija saret parti fiha fl-1975, kull Stat parti “għandu jirrikonoxxi deċiżjoni mogħtija skont din il-Konvenzjoni bħala vinkolanti u jinforza l-obbligi finanzjarji imposti b’dik id-deċiżjoni fi ħdan it-territorji tiegħu daqs li kieku kienet sentenza finali ta’ qorti f’dak l-Istat”. Ir-Rumanija targumenta li l-konsegwenza ta’ din il-klawsola hija li kull Stat parti għandu obbligu li jirrikonoxxi u jinforza deċiżjoni ta’ arbitraġġ tal-ICSID li l-eżekuzzjoni tagħha ma tkunx ġiet sospiża skont ir-regoli tal-Konvenzjoni dwar l-ICSID, u meta ma jkun hemm l-ebda possibbiltà ta’ appell kontra tali deċiżjoni quddiem il-qrati nazzjonali.

(46)

It-tieni, ir-Rumanija tisħaq li l-gvern Rumen huwa marbut li jikkonforma mal-kostituzzjoni Rumena, li tipprojbih milli jinfluwenza b’mod mhux xieraq lill-imħallfin nazzjonali rigward il-kwistjoni ta’ jekk jinfurzawx jew le d-Deċiżjoni. Hija tisħaq li l-qorti nazzjonali ddeċidiet b’mod awtonomu li d-diversi atti maħruġa mill-Kummissjoni fl-2014 ma setgħux jissospendu l-infurzar tad-Deċiżjoni skont il-liġi Rumena. Ir-Rumanija targumenta wkoll li, filwaqt li skont il-kostituzzjoni Rumena, id-dritt tal-Unjoni ġeneralment jieħu preċedenza fuq il-liġi nazzjonali Rumena (ordinarja), id-dritt tal-Unjoni ma jistax jannulla l-kostituzzjoni Rumena nnifisha.

(47)

It-tielet, ir-Rumanija ssostni li l-kumpens mogħti mit-Tribunal lir-rikorrenti m’għandux jiġi ttrattat bħala għajnuna ġdida mhux kompatibbli, iżda bħala kumpens għad-danni fis-sens tal-ġurisprudenza Asteris. Ir-Rumanija toġġezzjona, b’mod partikolari, għall-applikazzjoni tal-ġurisprudenza Lucchini għall-każ preżenti, fejn targumenta li l-isfond fattwali jiddistingwi l-każ preżenti minn dak li l-QtĠ-UE ddeċidiet dwaru f’Lucchini  (45).

(48)

Fl-aħħar nett, ir-Rumanija tenfasizza ripetutament il-kunflitt ikkonfermat fil-każ preżenti bejn l-obbigi tar-Rumanija skont il-Konvenzjoni dwar l-ICSID u skont id-dritt tal-Unjoni. Hija ssostni li sakemm ikun ġie stabbilit f’livell tal-ICSID jekk għandhiex tieħu preċedenza l-Konvenzjoni dwar l-ICSID jew id-dritt tal-Unjoni, l-implimentazzjoni jew l-eżekuzzjoni ta’ deċiżjoni tal-ICSID m’għandhomx jitqiesu bħala li jikkostitwixxu għajnuna illegali mill-Istat.

(49)

L-unika parti interessata li ssottomettiet osservazzjonijiet dwar id-deċiżjoni ta’ ftuħ kienu r-rikorrenti fil-proċedimenti tal-arbitraġġ li wasslu għad-Deċiżjoni. Ir-rikorrenti jikkontestaw is-sejbiet preliminari kontenuti fid-deċiżjoni ta’ ftuħ. B’mod partikolari, huma jagħmlu osservazzjonijiet rigward (i) l-isfond tal-każ u (ii) l-allegata deskrizzjoni skorretta tal-miżura; huma jargumentaw li (iii) ma hemm l-ebda kunflitt bejn ir-regoli tal-Unjoni dwar l-għajnuna mill-Istat u l-BITs intra-UE; huma jsostnu li (iv) l-implimentazzjoni jew l-eżekuzzjoni tad-Deċiżjoni ma tikkostitwix għajnuna mill-Istat jew (v) għall-inqas mhux għajnuna ġdida; huma jsostnu li jekk tkun ikkaratterizzata bħala għajnuna (vi) l-implimentazzjoni jew l-eżekuzzjoni tad-Deċiżjoni tkun għajnuna kompatibbli; huma jsostnu li (vii) il-protezzjoni tal-aspettattivi leġittimi tipprojbixxi lill-Kummissjoni milli tadotta deċiżjoni negattiva; u fl-aħħar nett jargumentaw li (viii) il-Kummissjoni trid tieħu passi sabiex tinvolvi b’mod xieraq lir-rikorrenti fil-proċedura tal-investigazzjoni.

(50)

Ir-rikorrenti jispjegaw li wara l-waqgħa tar-reġim komunista fl-1989, ir-Rumanija sabet ruħha fi stat ta’ privazzjoni ekonomika kbira. Is-sitwazzjoni kienet tali li meta r-Rumanija bdiet il-proċess tal-adeżjoni fl-Unjoni Ewropea fl-1995, hija kienet ‘il bogħod milli tissodisfa l-kriterji tal-adeżjoni fl-Unjoni. Sabiex jaċċellera l-iżvilupp ekonomiku u jnaqqas id-differenzi reġjonali, il-gvern Rumen stabbilixxa qafas għall-iżvilupp reġjonali u ftit wara adotta l-EGO 24 biex jinċentiva l-investimenti mis-settur privat f’reġjuni żvantaġġati. L-inċentivi tal-EGO 24 kienu mmirati biss għal investituri li joħolqu impjiegi fl-aktar reġjuni żvantaġġati f’wieħed mill-iżjed pajjiżi foqra fl-Ewropa. F’dan il-kuntest, ir-rikorrenti jenfasizzaw b’mod partikolari li l-EGO 24 mhux biss ipprovdiet vantaġġi lill-investituri, iżda imponiet ukoll obbligi, bħall-obbligu li joħolqu l-impjiegi u jimpjegaw ħaddiema li qabel kienu qiegħda, jiżviluppaw u jipproduċu materjali ġodda f’reġjun żvantaġġat, iżommu l-uffiċċju prinċipali tal-kumpaniji stabbiliti ġodda fir-reġjun żvantaġġat, u l-obbligu li japplikaw għal u jirċievu PIC.

(51)

Ir-rikorrenti jispjegaw ukoll li l-kumpaniji tagħhom kisbu PICs bejn is-sena 2000 u l-2002 talli investew fil-Kontea ta’ Bihor. Skont it-termini ta’ dawk il-PICs, li kienu validi sal-1 ta’ April 2009, ir-rikorrenti impenjaw ruħhom li jżommu l-investimenti tagħhom għad-“doppju tal-perjodu taż-żmien li fih [ir-rikorrenti] kienu jgawdu l-vantaġġi” stabbiliti bl-EGO 24. Permezz tal-investimenti tagħhom, ir-rikorrenti jsostnu li ħolqu madwar 9 000 impjieg ġdid, li 7 000 minnhom għadhom jeżistu sal-lum. Ir-rikorrenti jsostnu wkoll li l-investimenti tagħhom wasslu għal effetti konsegwenzjali sinifikanti fir-reġjun. Il-konklużjoni li r-rikorrenti jiġbdu minn dawn l-osservazzjonijiet hija li permezz tal-investimenti tagħhom, huma kkontribwew sabiex itaffu t-tbatija kkawżata mill-kundizzjonijiet ekonomiċi ħżiena fir-reġjun tal-Kontea ta’ Bihor u tejbu l-kwalità tal-ħajja f’dak ir-reġjun.

(52)

Rigward il-liġijiet dwar l-għajnuna mill-Istat li kien hemm fis-seħħ fir-Rumanija qabel l-adeżjoni tagħha fl-Unjoni, ir-rikorrenti jargumentaw li billi l-EGO 24 kienet stabbilita qabel daħlet fis-seħħ il-Liġi Nru 143/1999, l-EGO 24 kienet għajnuna eżistenti għall-finijiet ta’ dik il-liġi u ma kellhiex għalfejn tiġi awtorizzata mill-Kunsill għall-Kompetizzjoni. Ir-rikorrenti jfakkru wkoll li filwaqt li l-Kunsill għall-Kompetizzjoni pprova jirrikuża l-EGO 75 fil-qrati Rumeni, huwa ma kkontestax il-kompatibbiltà tal-EGO 24 mal-Liġi Nru 143/1999. Ir-rikorrenti jfakkru wkoll li, bl-eċċezzjoni tal-Pożizzjoni Komuni tal-UE tal-21 ta’ Novembru 2001, l-ebda dikjarazzjoni maħruġa mill-Unjoni matul il-proċess tal-adeżjoni ma identifikat b’mod speċifiku l-EGO 24 bħala problematika mill-perspettiva ta’ għajnuna mill-Istat.

(53)

Fl-aħħar nett, ir-rikorrenti jsostnu li kwalunkwe nuqqas ta’ implimentazzjoni sħiħa tad-Deċiżjoni, jew l-irkupru tal-parti li diġà ġiet implimentata permezz tat-tpaċija tad-djun tat-taxxa tar-rikorrenti kontra l-kumpens dovut, ikun diżastruż għar-rikorrenti u r-reġjun, billi jipperikola eluf ta’ impjiegi u jdawwar lura l-iżvilupp ekonomiku li seħħ fir-reġjun.

(54)

Ir-rikorrenti jargumentaw li d-deċiżjoni ta’ ftuħ mhijiex konsistenti meta tidentifika l-miżura rilevanti. B’referenza għall-premessi 25 u 26 tad-deċiżjoni ta’ ftuħ, ir-rikorrenti jisħqu li, filwaqt li l-Kummissjoni tgħid li qiegħda tinvestiga biss l-implimentazzjoni jew l-eżekuzzjoni tad-Deċiżjoni, fir-realtà hija qiegħda tikkontesta l-iskema sottostanti tal-EGO 24. Ir-rikorrenti jsostnu wkoll li, fi kwalunkwe każ, qatt ma ġie stabbilit b’mod validu li l-EGO 24 kienet tammonta għal għajnuna inkompatibbli mill-Istat.

(55)

Filwaqt li jsostnu wkoll li d-deċiżjoni ta’ ftuħ ma tikkaratterizzax sewwa d-Deċiżjoni, ir-rikorrenti jargumentaw li d-Deċiżjoni tat kumpens biss għad-danni li jirriżultaw mill-ksur tal-BIT min-naħa tar-Rumanija u ma tirreplikax il-benefiċċji tal-EGO 24. Fil-fatt, skont ir-rikorrenti, it-Tribunal ma tax kumpens għar-revoka qabel iż-żmien tal-inċentivi tal-EGO 24 per se, iżda pjuttost li l-miżuri li nstabu li qegħdin jiksru l-BIT huma li r-Rumanija aġixxiet b’mod mhux raġonevoli billi (i) żammet sħiħ l-obbligu tal-investitur skont l-EGO 24 minkejja li rrevokat tista’ tgħid il-benefiċċji kollha tagħha, (ii) billi mminat l-aspettattivi leġittimi tar-rikorrenti fir-rigward tad-disponibbiltà kontinwa tal-inċentivi skont l-EGO 24, u (iii) billi ma kinitx trasparenti biżżejjed mar-rikorrenti.

(56)

Ir-rikorrenti jsostnu wkoll li d-deċiżjoni ta’ ftuħ hija bbażata fuq is-suppożizzjoni li l-EGO 24 kienet tikkostitwixxi għajnuna inkompatibbli, u li din is-suppożizzjoni hija difettuża minħabba li l-kompatibbiltà tal-EGO 24 bħala għajnuna reġjonali qatt ma ġiet determinata b’mod validu.

(57)

B’referenza għall-premessi 51 sa 55 tad-deċiżjoni ta’ ftuħ, ir-rikorrenti jsostnu li d-dispożizzjonijiet tad-dritt tal-Unjoni li jittrattaw l-obbligi tal-Istati Membri skont il-liġi internazzjonali, mhumiex rilevanti f’dan il-każ billi ma hemm l-ebda kunflitt bejn id-dritt tal-Unjoni dwar l-għajnuna mill-Istat u l-BIT. Essenzjalment, ir-rikorrenti jargumentaw li kwalunkwe kunflitt huwa eskluż mill-fatt li l-proċedimenti ta’ arbitraġġ inkwistjoni nbdew qabel ma r-Rumanija aderiet fl-Unjoni. L-obbligu tar-Rumanija li timplimenta d-Deċiżjoni jingħad li jieqaf mill-mument li fih seħħ l-allegat ksur tal-BIT, jiġifieri qabel l-adeżjoni tar-Rumanija fl-Unjoni, u għalhekk mhuwiex affettwat mid-dritt tal-Unjoni.

(58)

Ir-rikorrenti jsostnu li l-implimentazzjoni jew l-eżekuzzjoni tad-Deċiżjoni mir-Rumanija ma tikkostitwix għajnuna mill-Istat fis-sens tal-Artikolu 107(1) tat-Trattat.

(59)

L-ewwel nett, filwaqt li ma jikkontestawx il-kwalifika ta’ S.C. European Food S.A., S.C. Starmill S.R.L., u S.C. Multipack bħala impriżi, ir-rikorrenti jsostnu li ma jistax jingħad li Ioan u Viorel Micula nfushom huma involuti f’attivitajiet ekonomiċi. B’mod partikolari, il-fatt li l-aħwa Micula għandhom ishma f’diversi impriżi jingħad li mhuwiex suffiċjenti biex jikkwalifika lilhom infushom bħala impriżi. Ir-rikorrenti jsostnu wkoll li t-tliet kumpaniji hawn fuq imsemmija u l-aħwa Micula ma jistgħux jiġu ttrattati bħala unità ekonomika unika, billi l-interessi tal-aħwa mhumiex l-istess bħal dawk tal-kumpaniji.

(60)

It-tieni, ir-rikorrenti jenfasizzaw li l-implimentazzjoni tad-Deċiżjoni ma tagħtihomx vantaġġ. Huma jargumentaw li l-miżuri li jservu sabiex jiġu ssodisfati l-obbligi legali, bħall-pagament tal-kumpens għad-danni, ma jikkostitwux trattament preferenzjali tal-impriżi. F’dan il-kuntest, ir-rikorrenti jsostnu li l-Kummissjoni ma tistax tibbaża fuq id-dikjarazzjoni tal-Avukat Ġenerali Colomer f’Atzeni, billi dik il-Kawża kienet tirrigwarda danni mħallsa lil benefiċjarju b’kumpens għall-irkupru ta’ għajnuna inkompatibbli li diġà kienet tħallset. Ir-rikorrenti jsostnu li, b’kuntrast, huma ma kienu tħallsu l-ebda għajnuna mill-Istat, wisq anqas għajnuna illegali mill-Istat, u għalhekk huma differenti minn Atzeni. Bl-istess mod, ir-rikorrenti jsostnu li l-Kawża preżenti ma tistax titqies l-istess bħall-kawżi msemmija fid-deċiżjoni ta’ ftuħ fejn klawsoli fil-kuntratt li jindennizzaw lill-benefiċjarji għall-irkupru ta’ għajnuna inkompatibbli mill-Istat tqiesu li jikkostitwixxu għajnuna mill-Istat huma stess.

(61)

Ir-rikorrenti jsostnu wkoll li l-implimentazzjoni jew l-eżekuzzjoni tad-Deċiżjoni taqa’ preċiżament taħt il-ġurisprudenza Asteris. Huma jargumentaw li r-raġunament wara l-ġurisprudenza Asteris, kif ukoll kawżi bħal Denkavit  (46) u ThyssenKrupp  (47), huwa li l-pagament tad-danni mhuwiex fid-diskrezzjoni tal-Istati Membri, u għalhekk ma jistax jikkwalifika bħala għajnuna mill-Istat. L-impenji tar-Rumanija skont il-BIT huma sostnuti wkoll li huma espressjoni tar-regoli ġenerali tar-responsabbiltà li għalihom tapplika l-ġurisprudenza Asteris. Rigward l-argument tal-Kummissjoni li l-ġurisprudenza Asteris ma tapplikax għad-danni mogħtija abbażi ta’ BITs intra-UE kkunsidrati bħala inkompatibbli mad-dritt tal-Unjoni, ir-rikorrenti jsostnu li kwalunkwe inkompatibbiltà bħal din ma tirrendix mingħajr effett id-Deċiżjoni mogħtija abbażi ta’ tali BIT. Barra minn hekk, l-implimentazzjoni jew l-eżekuzzjoni tad-Deċiżjoni ma tistax titqies li tagħti għajnuna mill-Istat “mill-bieb ta’ wara”, billi d-Deċiżjoni ma terġax tistabbilixxi l-iskema abolita tal-EGO 24; pjuttost, id-Deċiżjoni jingħad li tagħti d-danni għad-deċiżjoni awtonoma tar-Rumanija li, fost affarijiet oħra, iżżomm piż mhux raġonevoli impost fuq ir-rikorrenti.

(62)

Ir-rikorrenti jsostnu ukoll li l-argumenti tal-Kummissjoni rigward l-inkompatibbiltà tal-BIT mad-dritt tal-Unjoni huma irrilevanti, billi t-tilwima li wasslet għall-proċedimenti ta’ arbitraġġ u finalment għad-Deċiżjoni, qamet qabel l-adeżjoni tar-Rumanija fl-Unjoni. Filwaqt li jargumentaw li l-argumentazzjoni tal-Kummissjoni fid-deċiżjoni ta’ ftuħ hija bbażata fuq ir-rabta, b’mod żbaljat, tal-implimentazzjoni/eżekuzzjoni tad-Deċiżjoni mal-inkompatibbiltà tal-iskema tal-EGO 24, ir-rikorrenti jerġgħu jsostnu li fi kwalunkwe każ, id-Deċiżjoni ma tatx id-danni abbażi tad-deċiżjoni tar-Rumanija li tikkonforma mar-regoli tal-Unjoni dwar l-għajnuna mill-Istat.

(63)

Ir-rikorrenti jikkontestaw ukoll li d-deċiżjoni tal-QtĠ-UE f’Lucchini, li l-Kummissjoni għamlet referenza għaliha fid-deċiżjoni ta’ ftuħ, għandha xi rilevanza għall-Kawża preżenti. Fl-opinjoni tagħhom, Lucchini tistabbilixxi biss li d-dispożizzjonijiet tal-liġi nazzjonali ma jistgħux ifixklu l-irkupru ta’ għajnuna mhux kompatibbli, u ma għandha l-ebda rilevanza għall-implimentazzjoni/eżekuzzjoni ta’ deċiżjoni ta’ arbitraġġ li tagħti d-danni għall-ksur ta’ BIT.

(64)

It-tielet, rigward l-imputabbiltà tal-implimentazzjoni/eżekuzzjoni tad-Deċiżjoni lir-Rumanija, ir-rikorrenti jargumentaw li l-valutazzjoni tal-Kummissjoni ma tistax tistrieħ fuq l-imputabbiltà tal-EGO 24 innifisha. Barra minn hekk huma jsostnu li l-implimentazzjoni/eżekuzzjoni ta’ deċiżjoni tal-ICSID hija konsegwenza awtomatika u involontarja tal-obbligi tar-Rumanija skont il-Konvenzjoni dwar l-ICSID. Skont ir-rikorrenti, kwalunkwe att involontarju mhuwiex imputabbli lill-Istat u ma jistax jikkostitwixxi għajnuna mill-Istat. Huma jenfasizzaw ukoll li d-deċiżjonijiet tal-ICSID mhumiex miftuħa għal valutazzjoni mill-qrati nazzjonali u l-infurzar tagħhom ma jistax jiġi imblukkat għal raġunijiet ta’ ordni pubbliku domestiku jew inkompatibbiltà mad-dritt tal-Unjoni.

(65)

Ir-rikorrenti jargumentaw ukoll li l-obbligi tar-Rumanija skont il-Konvenzjoni dwar l-ICSID ma kinux affettwati mis-sħubija sussegwenti tar-Rumanija fl-Unjoni. Huma jispjegaw li billi l-allegat ksur tal-BIT u l-bidu tal-proċedimenti seħħew qabel l-adeżjoni tar-Rumanija fl-Unjoni, id-dritt tal-UE mhuwiex applikabbli għall-Kawża preżenti.

(66)

Ir-raba’, fir-rigward tas-selettività, ir-rikorrenti jsostnu li l-implimentazzjoni/eżekuzzjoni tad-Deċiżjoni mhijiex selettiva, billi l-BITs u l-Konvenzjoni dwar l-ICSID jistabbilixxu sistema ta’ responsabbiltà ġenerali li tapplika bl-istess mod għal kull investitur. Għalhekk, id-danni mogħtija taħt din is-sistema, mhumiex selettivi. F’dan il-kuntest, ir-rikorrenti jikkwotaw ukoll dikjarazzjoni allegatament magħmula mill-Kummissjoni li l-“BITs, għalkemm jagħtu benefiċċju billi jassiguraw drittijiet ta’ proprjetà barra l-pajjiż, teknikament ma jistgħux jikkwalifikaw bħala għajnuna mill-Istat projbita mill-Artikolu 107(1) [tat-Trattat] billi l-benefiċċju ma jiffavorix ċerti impriżi jew il-produzzjoni ta’ ċerti prodotti iżda jingħata b’mod ġenerali lill-investituri kollha, irrispettivament mis-settur li joperaw fih.”

(67)

Fl-aħħar nett, ir-rikorrenti ma jaqblux li l-implimentazzjoni tad-Deċiżjoni tista’ tfixkel il-kompetizzjoni u taffettwa l-kummerċ bejn l-Istati Membri. Huma jsostnu li r-raġunament kontenut fid-deċiżjoni ta’ ftuħ ma jistax japplika għall-aħwa Micula, li allegatament ma huma involuti fl-ebda attività ekonomika, bil-konsegwenza li kwalunkwe pagament lilhom ma jistax ifixkel il-kompetizzjoni jew jaffettwa l-kummerċ bejn l-Istati Membri. B’mod aktar ġenerali, ir-rikorrenti jargumentaw li l-implimentazzjoni tad-Deċiżjoni ma tagħtix vantaġġ lir-rikorrenti, u għalhekk jista’ jiġi eskluż kwalunkwe effett fuq il-kompetizzjoni jew il-kummerċ.

(68)

Ir-rikorrenti ma jaqblux ukoll mal-karatterizzazzjoni tal-implimentazzjoni/eżekuzzjoni tad-Deċiżjoni bħala għajnuna ġdida. Huma jinnotaw li l-uniċi avvenimenti li seħħew wara l-adeżjoni tar-Rumanija kienu l-adozzjoni tad-Deċiżjoni nnifisha u l-eżekuzzjoni tagħha. B’mod partikolari, l-eżekuzzjoni, min-naħa tar-Rumanija, tingħad li hija biss konsegwenza awtomatika tad-Deċiżjoni, pjuttost milli r-riżultat ta’ deċiżjoni separata. Skont ir-rikorrenti, il-mumenti rilevanti kienu l-promulazzjoni tal-EGO 24, il-ħruġ tal-PICs lir-rikorrenti, jew mhux aktar tard mill-konklużjoni tal-BIT. Ir-rikorrenti jibbażaw ukoll fuq il-ġurisprudenza u l-prassi tal-Kummissjoni dwar il-garanziji tal-Gvern (li skonthom, il-mument rilevanti huwa meta tingħata l-garanzija, mhux meta tiġi invokata jew jinħarġu l-pagamenti) sabiex jargumentaw li fejn il-kumpens jitħallas abbażi ta’ impenn inkluż fi ftehim internazzjonali, id-data tal-konklużjoni ta’ dak il-ftehim għandha titqies bħala determinanti.

(69)

Ir-rikorrenti l-ewwel nett isostnu li meta l-Kummissjoni tkun qiegħda tinvestiga għajnuna mhux innotifikata, u l-Istat Membru kkonċernat ma jressaq l-ebda argument dwar kompatibbiltà, il-Kummissjoni għandha l-obbligu li tikkunsidra jekk l-għajnuna tistax tkun kompatibbli skont xi regola jew linja gwida applikabbli, jekk ikun meħtieġ billi titlob aktar informazzjoni mingħand l-Istat Membru jew il-benefiċjarju.

(70)

Rigward l-analiżi preliminari tal-kompatibbiltà kontenuta fid-deċiżjoni ta’ ftuħ, ir-rikorrenti jsostnu li din hija kunċettwalment difettuża billi tapplika l-Linji gwida kurrenti dwar l-Għajnuna Reġjonali (‘RAG’) għall-implimentazzjoni/eżekuzzjoni tad-Deċiżjoni, minkejja li huwa evidenti għall-aħħar li l-implimentazzjoni/eżekuzzjoni tad-Deċiżjoni ma hija motivata mill-ebda objettiv ta’ żvilupp reġjonali. Fl-opinjoni tar-rikorrenti, u waqt li jerġgħu jenfasizzaw li d-deċiżjoni ta’ ftuħ tassumi b’mod żbaljat li l-implimentazzjoni tad-Deċiżjoni terġa’ tistabbilixxi b’mod retroattiv l-EGO 24, l-unika għajnuna li setgħet ingħatat kienu l-benefiċċji skont l-iskema tal-EGO 24. L-EGO 24 għalhekk kellha tiġi valutata skont ir-RAG tal-1998, li bihom suppost kellhom jinstabu kompatibbli.

(71)

Ir-rikorrenti mbagħad isostnu li qatt ma kien hemm deċiżjoni formali valida li tistabbilixxi li l-EGO 24 tikkostitwixxi għajnuna inkompatibbli mill-Istat. Id-deċiżjoni tal-Kunsill Rumen għall-Kompetizzjoni (id-Deċiżjoni Nru 244) li tiddenunzja l-EGO 24, kienet, skont ir-rikorrenti, difettuża, billi ma vvalutatx il-kompatibbiltà u naqset milli tipprovdi raġunament għas-sejbiet tagħha. Barra minn hekk, ir-rikorrenti argumentaw li l-adozzjoni tal-EGO 75, li rriaffermat l-EGO 24, mill-gvern Rumen, ikkanċellat id-deċiżjoni tal-Kunsill għall-Kompetizzjoni. Huma jargumentaw ukoll li r-rifjut tal-kontestazzjonijiet tal-Kunsill għall-Kompetizzjoni kontra l-EGO 75 quddiem il-qrati Rumeni hija prova ulterjuri li l-EGO 24 u l-EGO 75 ħadu preċedenza fuq id-deċiżjoni tal-Kunsill għall-Kompetizzjoni.

(72)

Ir-rikorrenti jsostnu wkoll li l-Kummissjoni ma kellha u ma għandha l-ebda kompetenza sabiex tivvaluta l-EGO 24, anki b’mod inċidentali. Il-partijiet rilevanti tal-EGO 24 kienu revokati qabel l-adeżjoni tar-Rumanija fl-Unjoni. Sa fejn id-Deċiżjoni titqies li terġa’ tistabbilixxi għajnuna mogħtija skont l-EGO 24, ir-rikorrenti għalhekk isostnu li l-Kummissjoni ma għandha l-ebda kompetenza ta’ valutazzjoni. F’dan il-kuntest, huma jirreferu wkoll għad-deċiżjoni tal-Kummissjoni fil-Kawża dwar l-għajnuna mill-Istat N 380/2004, fejn il-Kummissjoni sabet li l-implimentazzjoni ta’ deċiżjoni ta’ arbitraġġ wara l-adeżjoni, li kienet ingħatat qabel l-adeżjoni u kienet tirrigwarda esklussivament perjodi ta’ qabel l-adeżjoni, ma kinitx tikkostitwixxi għajnuna ġdida.

(73)

Fl-aħħar nett, ir-rikorrenti jargumentaw li l-EGO 24 u inċentivi individwali taħt l-EGO 24 kienu kompatibbli mas-suq intern skont ir-RAG applikabbli tal-1998, minħabba li kienu ssodisfati l-kundizzjonijiet kollha tal-kompatibbiltà. F’dan il-kuntest, huma jsostnu, l-ewwel nett, li l-EGO 24 tista’ fil-fatt titqies bħala għajnuna kompatibbli għall-investiment, pjuttost milli għajnuna operatorja, u, it-tieni, anki jekk titqies bħala għajnuna operatorja, l-EGO 24 xorta kienet kompatibbli.

(74)

Ir-rikorrenti jsostnu li deċiżjoni tal-Kummissjoni li ssib li l-implimentazzjoni jew l-eżekuzzjoni tad-Deċiżjoni tmur kontra r-regoli dwar l-għajnuna mill-Istat, tikser l-aspettattivi leġittimi tar-rikorrenti. Huma jargumentaw li l-Unjoni inkoraġġiet espressament lir-Rumanija biex tikkonkludi BITs mal-Istati Membri qabel l-adeżjoni tar-Rumanija; li l-Kummissjoni għadha tappoġġja l-konklużjoni ta’ BITs; li r-rikorrenti strieħu fuq l-aspettattiva tagħhom li l-proċedimenti ta’ arbitraġġ se jippermettulhom li jirċievu kumpens għad-dannu kkawżat mid-deċiżjoni tar-Rumanija li żżomm l-obbligi kollha tal-investituri skont l-EGO 24; u li ma hemm l-ebda interess pubbliku prevalenti sabiex jitwarrbu l-aspettattivi leġittimi tar-rikorrenti.

(75)

Fl-aħħar nett, ir-rikorrenti jsostnu li, skont il-ġurisprudenza, il-partijiet interessati “għandhom biss dritt li jiġu involuti fil-proċedura amministrattiva sa fejn ikun xieraq fid-dawl taċ-ċirkustanzi tal-każ inkwistjoni” (48). Bl-argument li r-Rumanija naqset milli tinvolvi b’mod xieraq lir-rikorrenti fil-proċedura dwar l-għajnuna mill-Istat, li allegatament poġġa lir-rikorrenti fi żvantaġġ partikolari, ir-rikorrenti jwissu li n-nuqqas, min-naħa tal-Kummissjoni, li tippermetti lir-rikorrenti li jiddefendu b’mod xieraq l-interessi tagħhom billi tinvolvihom b’mod aktar sħiħ fil-proċedura, jista’ jdgħajjef id-deċiżjoni finali tal-Kummissjoni. Ir-rikorrenti jikkonkludu billi jinnotaw li l-prattika tal-Kummissjoni f’kawżi dwar għajnuna mill-Istat, b’mod ġenerali ma tħarisx b’mod suffiċjenti d-drittijiet proċedurali tal-allegati benefiċjarji u, billi tonqos milli tipprovdi rimedju effettiv, tmur kontra l-Artikolu 6(1) tal-Konvenzjoni Ewropea dwar id-Drittijiet tal-Bniedem u l-Artikolu 47 tal-Karta tad-Drittijiet Fundamentali tal-UE.

(76)

Fit-tweġiba tagħha għall-kummenti ppreżentati mir-rikorrenti, ir-Rumanija l-ewwel nett tirrifjuta l-argument li Ioan u Viorel Micula ma setgħux huma nfushom jitqiesu li jikkostitwixxu impriżi għall-finijiet tal-applikazzjoni tal-liġi tal-UE dwar l-għajnuna mill-Istat. Ir-Rumanija targumenta li l-ħames rikorrenti għandhom pjuttost jitqiesu bħala unità ekonomika waħda, billi l-aħwa Micula jeżerċitaw kontroll dirett jew indirett fuq ir-rikorrenti korporattivi. Sabiex tappoġġja din l-affermazzjoni, ir-Rumanija fost l-oħrajn tispjega li matul in-negozjati bejn ir-Rumanija u r-rikorrenti, li seħħew wara li nħarġet id-Deċiżjoni, l-aħwa Micula ħadu deċiżjoni formali f’isem it-tliet rikorrenti korporattivi.

(77)

It-tieni, ir-Rumanija tirribatti t-tentattiv tar-rikorrenti li jiċħdu r-rabta bejn ir-revoka tal-inċentivi tal-EGO 24 u l-għoti tad-danni bid-Deċiżjoni. Hija ssostni li mid-Deċiżjoni jidher ċar li l-valur tad-danni kien stabbilit mit-Tribunal fuq il-bażi tal-vantaġġi ekonomiċi li r-rikorrenti kienu jiksbu kieku nżammew l-inċentivi.

(78)

It-tielet, rigward l-allegazzjoni tar-rikorrenti li ma kinux u mhumiex qegħdin jiġu involuti b’mod xieraq fl-investigazzjoni dwar l-għajnuna mill-Istat, ir-Rumanija tiċħad li ma bagħtitx mill-ewwel id-deċiżjoni ta’ ftuħ lir-rikorrenti. Hija ssostni wkoll li r-Rumanija ma għandha l-ebda obbligu legali li tinvolvi lir-rikorrenti b’mod aktar sħiħ milli huwa u kien il-każ.

(79)

L-Artikolu 107(1) tat-Trattat jistipula li “għajnuna, ta’ kwalunkwe forma, mogħtija minn Stat Membru jew permezz ta’ riżorsi tal-Istat, li twassal għal distorsjoni jew theddida ta’ distorsjoni għall-kompetizzjoni billi tiffavorixxi ċerti impriżi jew ċerti prodotti għandha, sa fejn tolqot il-kummerċ bejn l-Istati Membri, tkun inkompatibbli mas-suq intern”. Għalhekk, miżura tikkostitwixxi għajnuna mill-Istat jekk jiġu ssodisfati l-ebda kundizzjonijiet kumulattivi li ġejjin:

(80)

Il-Kummissjoni tisħaq li l-kunċett ta’ għajnuna mill-Istat huwa kunċett oġġettiv u legali definit direttament mit-Trattat. L-istabbiliment ta’ jekk miżura partikolari tikkostitwix għajnuna mill-Istat ma tiddependix fuq l-intenzjonijiet jew il-ġustifikazzjonijiet tal-Istati Membri meta jagħtuha, iżda fuq l-effetti tal-miżura inkwistjoni (49).

(81)

Il-QtĠ-UE ddefiniet b’mod konsistenti l-impriżi bħala entitajiet involuti f’attività ekonomika, irrispettivament mill-istatus ġuridiku tagħhom u l-mod kif jiġu ffinanzjati (50). Il-klassifikazzjoni ta’ entità partikolari għalhekk tiddependi kompletament fuq in-natura tal-attivitajiet tagħha.

(82)

Entitajiet ġuridiċi separati jistgħu jitqiesu li jiffurmaw unità ekonomika waħda għall-finijiet tal-applikazzjoni tar-regoli dwar l-għajnuna mill-Istat. L-unità ekonomika mbagħad titqies li hija l-impriża rilevanti. Kif diġà sostniet il-QtĠ-UE, “fid-dritt tal-kompetizzjoni, it-terminu ‘impriża’ jrid jinftiehem bħala li jindika unità ekonomika […] anki jekk fil-liġi dik l-unità ekonomika tikkonsisti minn diversi persuni, fiżiċi jew ġuridiċi (51).” Sabiex tistabbilixxi jekk diversi entitajiet jiffurmawx unità ekonomika, il-QtĠ-UE tħares lejn l-eżistenza ta’ sehem kontrollanti jew rabtiet funzjonali, ekonomiċi jew organiċi (52).

(83)

Ir-rikorrenti fil-proċedimenti ta’ arbitraġġ li wasslu għad-Deċiżjoni huma l-aħwa Ioan Micula u Viorel Micula u tliet kumpaniji tagħhom (S.C. European Food S.A., S.C. Starmill S.R.L., u S.C. Multipack). Huwa evidenti li t-tliet kumpaniji huma involuti f’attivitajiet ekonomiċi, billi jispeċjalizzaw fil-manifattura industrijali ta’ prodotti tal-ikel, prodotti tat-tħin, u imballaġġ tal-plastik, rispettivament. It-tliet kumpaniji għalhekk jikkostitwixxu impriżi. Din il-karatterizzazzjoni mhijiex ikkontestata mir-rikorrenti.

(84)

Ir-rikorrenti madankollu jsostnu li l-aħwa Micula nfushom ma jistgħux, bħala persuni fiżiċi, jitqiesu li jikkostitwixxu impriżi għall-finijiet tal-Artikolu 107(1) tat-Trattat, u li għalhekk il-fondi mħallsa lilhom fl-implimentazzjoni jew l-eżekuzzjoni tad-Deċiżjoni, ma jikkostitwux għajnuna mill-Istat. B’mod partikolari, l-interessi tal-aħwa Micula jingħad li ma jikkoinċidux ma’ dawk tat-tliet rikorrenti korporattivi.

(85)

Il-Kummissjoni madankollu ssib li t-tliet kumpaniji u l-aħwa Micula, flimkien jikkostitwuxxu unità ekonomika unika għall-finijiet tal-applikazzjoni tar-regoli dwar l-għajnuna mill-Istat. Din l-unità ekonomika għalhekk hija kkunsidrata bħala l-impriża rilevanti.

(86)

Din is-sejba hija bbażata l-ewwel nett fuq il-fatt li l-aħwa Micula għandhom, direttament jew indirettament, is-sjieda prattikament esklussiva tat-tliet rikorrenti korporattivi, li juri interess kontrollanti fuq dawk il-kumpaniji.

(87)

It-tieni, din is-sejba tqis li r-rikorrenti korporattivi jiffurmaw parti minn grupp akbar ta’ kumpaniji, il-European Food and Drinks Group (“EFDG”). Matul il-proċedimenti tal-arbitraġġ, l-aħwa Micula talbu wkoll kumpens għal kumpaniji oħra li jiffurmaw parti mill-EFDG li allegatament sofrew telf b’riżultat tal-azzjonijiet tar-Rumanija li wasslu għall-proċedimenti. Fil-fatt, flok talbu u kkwantifikaw telf separat għal kull rikorrent korporattiv u ż-żewġ rikorrenti individwali, ir-rikorrenti bbażaw l-applikazzjoni tagħhom għall-kumpens fuq it-telf allegatament sofrut mill-EFDG kollu. Wara li eżamina l-istruttura tas-sjieda tal-EFDG u stabbilixxa li l-aħwa Micula, direttament jew indirettament, kienu jippossiedu mill-anqas 99,96 % tal-kumpaniji kollha fl-EFDG li għalihom l-aħwa Micula talbu d-danni (dawn huma European Drinks S.A., Rieni Drinks S.A., Scandic Distilleries S.A., Transilvania General Import-Export S.R.L., West Leasing S.R.L), it-Tribunal aċċetta dan l-approċċ u ppermetta lir-rikorrenti li jfittxu l-kumpens għat-telf tal-EFDG kollu (53). Din l-imġiba tar-rikorrenti matul il-proċedimenti tal-arbitraġġ u d-deċiżjonijiet korrispondenti tat-Tribunal juru li l-aħwa Micula u t-tliet rikorrenti korporattivi, kif ukoll il-kumpaniji hawn fuq imsemmija li jiffurmaw parti mill-EFDG, jiffurmaw unità ekonomika unika b’interess ekonomiku uniku.

(88)

It-tielet, il-karatterizzazzjoni tal-aħwa Micula u l-kumpaniji tagħhom bħala unità ekonomika waħda hija rinforzata ulterjorment mill-mod kif id-Deċiżjoni eventwalment tathom il-kumpens. Pjuttost milli qassmet il-kumpens individwalment lil kull wieħed mill-ħames rikorrenti, id-Deċiżjoni tathom il-kumpens “b’mod kollettiv” abbażi ta’ “intitolament komuni”. Il-fatt li l-ħames rikorrenti flimkien (jiġifieri, inklużi r-rikorrenti korporattivi) talbu lit-Tribunal jagħti l-kumpens kollu biss lill-aħwa Micula juri li r-rikorrenti korporattivi ma għandhom l-ebda awtonomija fir-rigward tal-aħwa Micula. It-Tribunal finalment ippermetta lil kull rikorrent jirkupra l-ammont sħiħ tal-kumpens mogħti, u mbagħad li jqassam il-kumpens bejn ir-rikorrenti kif iħoss xieraq, irrispettivament mid-danni attwalment imġarrba minn kull rikorrent.

(89)

Il-konklużjoni ta’ hawn fuq mhijiex affettwata mill-argument tar-rikorrenti li l-Kawża preżenti trid tiġi distinta mis-sentenza f’Hydrotherm, billi l-persuna fiżika f’dik il-Kawża kienet sieħeb personalment responsabbli għall-obbligi finanzjarji tad-diversi kumpaniji li magħhom kienet ikkunsidrata li tikkostitwixxi unità ekonomika unika, filwaqt li l-aħwa Micula mhumiex personalment responsabbli b’dan il-mod. Bi tweġiba, il-Kummissjoni tfakkar li fil-paragrafi rilevanti tas-sentenza tagħha fil-Kawża dwar Hydrotherm, il-QtĠ-UE ma semmietx ir-responsabbiltà personali tal-persuna fiżika inkwistjoni; pjuttost, il-QtĠ-UE llimitat ruħha li tirrimarka li l-persuna fiżika inkwistjoni “għandha kontroll sħiħ” tal-kumpaniji inkwistjoni (54). Kif diġà ssemma, bis-saħħa tas-sjieda tagħhom, l-aħwa Micula wkoll għandhom kontroll sħiħ fuq ir-rikorrenti korporattivi, u fil-fatt il-kumpaniji rilevanti l-oħra tal-EFDG.

(90)

Kuntrarju għall-affermazzjonijiet tar-rikorrenti, il-Kummissjoni tikkunsidra wkoll li l-loġika li fuqha hija bbażata s-sentenza Cassa di Risparmio di Firenze tapplika bl-istess mod f’din il-kawża. F’dik is-sentenza, il-QtĠ-UE rrikonoxxiet li attività ekonomika tista’ tiġi eżerċitata minn entità direttament jew indirettament, permezz tal-kontroll ta’ operatur bħala parti minn unità ekonomika li huma jiffurmaw flimkien. Għalkemm il-QtĠ-UE tirrikonoxxi li s-sempliċi fatt ta’ pussess ta’ ishma, anki parteċipazzjonijiet azzjonarji kontrollanti, mhuwiex suffiċjenti sabiex attività tal-entità li jkollha dawk l-ishma tiġi kkaratterizzata bħala ekonomika meta din twassal biss għall-eżerċizzju tad-drittijiet marbuta mal-istatus ta’ azzjonist jew membru, kif ukoll ir-riċeviment ta’ dividendi, li jkunu sempliċement il-frott tas-sjieda ta’ assi, huwa ċar li s-sitwazzjoni preżenti hija differenti. Fil-fatt, skont il-QtĠ-UE, “korp li jżomm ishma ta’ kontroll f’kumpannija, jeżerċita effettivament dan il-kontroll waqt li jipparteċipa direttament jew indirettament fl-amministrazzjoni tagħhom għandu jiġi kkunsidrat bħala li jagħmel parti mill-attività ekonomika eżerċitata mill-impriża kkontrollata (55).” Il-QtĠ-UE kienet ikkonċernata wkoll tirrimarka li s-“sempliċi separazzjoni ta’ impriża f’żewġ entitajiet differenti” ma tistax tkun suffiċjenti biex jiġu evitati r-regoli dwar l-għajnuna mill-Istat (56). Dan ir-raġunament japplika wkoll meta waħda miż-żewġ entitajiet ikkonċernati tkun persuna fiżika. Inkella l-għoti ta’ għajnuna lil persuna fiżika li tkun l-azzjonist kontrollanti ta’ impriża ma jitqiesx li jikkostitwixxi għajnuna mill-Istat, minkejja li l-persuna fiżika tista’ tuża dik l-għajnuna għall-benefiċċju tal-impriżi li tikkontrolla. Fil-fatt, fil-Kawża preżenti, ma tista’ tagħmel l-ebda differenza għall-finijiet tal-applikazzjoni tar-regoli dwar l-għajnuna mill-Istat, jekk il-kumpens mogħti kollettivament lill-ħames rikorrenti kollha mit-Tribunal jitħallasx lill-aħwa Micula jew lill-kumpaniji tagħhom.

(91)

Fl-aħħar nett, il-Kummissjoni ssib li l-aħwa Micula u t-tliet rikorrenti korporattivi flimkien jiffurmaw unità ekonomika unika li tikkostitwixxi impriża għall-finijiet tal-applikazzjoni tal-Artikolu 107(1) tat-Trattat. Il-kumpaniji l-oħra tal-EFDG li għall-allegat telf tagħhom l-aħwa Micula ngħataw kumpens bis-saħħa tad-Deċiżjoni (European Drinks S.A., Rieni Drinks S.A., Scandic Distilleries S.A., Transilvania General Import-Export S.R.L., West Leasing S.R.L) (57) ukoll jiffurmaw parti minn din l-unità ekonomika unika. Il-benefiċjarja finali tal-miżura ta’ għajnuna hija din l-unità ekonomika unika, iffurmata mill-ħames rikorrenti u dawk il-kumpaniji tal-EFDG.

(92)

Vantaġġ, kif meħtieġ mill-Artikolu 107(1) tat-Trattat, huwa kwalunkwe benefiċċju ekonomiku li impriża ma kinitx tikseb f’kundizzjonijiet normali tas-suq, jiġifieri fin-nuqqas ta’ intervent mill-Istat (58). Il-forma preċiża tal-miżura mhijiex rilevanti sabiex jiġi stabbilit jekk din tagħtix vantaġġ ekonomiku lill-impriża. Il-kunċett ta’ vantaġġ jinkludi, pereżempju, is-sitwazzjonijiet kollha fejn l-impriżi jinħelsu mill-ispejjeż inerenti tal-attivitajiet ekonomiċi tagħhom.

(93)

Permezz tad-Deċiżjoni, it-Tribunal ta lir-rikorrenti kumpens ta’ RON 376 433 229 flimkien mal-imgħax, kontra r-Rumanija. Sabiex wieħed jifhem b’mod sħiħ għaliex l-implimentazzjoni jew l-eżekuzzjoni tad-Deċiżjoni tagħti vantaġġ ekonomiku lir-rikorrenti, qabelxejn huwa utli li wieħed jeżamina fuq liema bażi t-Tribunal iddeċieda li għandu jingħata kumpens lir-rikorrenti f’dik id-Deċiżjoni.

(94)

Wara li kien iddeċieda li r-Rumanija kienet kisret il-BIT, it-Tribunal spjega li d-danni kellhom jingħataw fuq il-bażi tal-prinċipju li “ir-rikorrent irid jitpoġġa lura fil-pożizzjoni li ‘b’kull probabbiltà’ kien ikun fiha li ma kienx għad-dannu internazzjonali (59).” Huwa spjega wkoll li seta’ jiġi kkumpensat permezz tad-danni dak it-telf biss li huwa każwalment marbut mal-att li jikkostitwixxi d-dannu internazzjonali, u li “il-ksur kollu tal-BIT allegat mir-Rikorrenti jirriżulta mill-istess fatt: ir-revoka qabel iż-żmien tal-inċentivi tal-[EGO 24] jew b’rabta diretta ma’ dik ir-revoka qabel iż-żmien (60).” Fil-valutazzjoni tal-kumpens preċiż dovut lir-rikorrenti, it-Tribunal ikkunsidra jekk fil-fatt iġġarrabx telf u jekk kienx relatat direttament mar-revoka tal-iskema ta’ inċentivi. Pereżempju, fir-rigward tad-danni mogħtija għaż-żieda fil-prezz taz-zokkor, it-Tribunal sostna (61): “Kemm l-eżistenza tad-dannu kif ukoll ir-rabta kawżali bejn ir-revoka tal-inċentivi u d-dannu sofrut kienu ppruvati b’mod adegwat. Ma hemm l-ebda kontestazzjoni li, b’riżultat tar-revoka tal-Inċentiv għall-Materja Prima, ir-Rikorrenti kienu meħtieġa jħallsu ammont aktar għaz-zokkor li xtraw wara Frar 2005”.

(95)

Fid-dawl ta’ dawn il-konsiderazzjonijiet, huwa ċar li permezz tal-implimentazzjoni jew l-eżekuzzjoni tad-Deċiżjoni, ir-Rumanija tagħti lir-rikorrenti ammont li jikkorrispondi eżattament għall-vantaġġi previsti taħt l-iskema abolita tal-EGO 24 mill-mument li ġiet revokata (22 ta’ Frar 2005) sal-iskadenza skedata tagħha (1 ta’ April 2009). B’mod aktar preċiż, l-implimentazzjoni jew l-eżekuzzjoni tad-Deċiżjoni de facto tirrimborża d-dazji doganali ċċarġjati fuq iz-zokkor u materja prima oħra impurtati bejn it-22 ta’ Frar 2005 u l-31 ta’ Marzu 2009, kif ukoll id-dazji doganali ċċarġjati fuq iz-zokkor impurtat li r-rikorrenti kienu jevitaw kieku kellhom l-opportunità li jaħżnu għal quddiem iz-zokkor qabel l-iskadenza skedata tal-faċilitajiet tal-EGO 24 fil-31 ta’ Marzu 2009. Barra minn hekk, sabiex jassigura li r-rikorrenti jibbenefikaw b’mod sħiħ minn ammont korrispondenti għal dak tal-iskema abolita u “jitpoġġa lura fil-pożizzjoni li b” kull probabbiltà’ kien ikun fiha”, it-Tribunal ta wkoll imgħax u kumpens għall-allegati opportunità mitlufa u l-profitt mitluf (62). Fil-fatt, l-implimentazzjoni jew l-eżekuzzjoni tad-Deċiżjoni terġa’ tistabbilixxi s-sitwazzjoni li r-rikorrenti, b’kull probabbiltà, kienu jkunu fiha kieku qatt ma ġiet revokata l-iskema tal-EGO 24.

(96)

Għalhekk, l-implimentazzjoni jew l-eżekuzzjoni tad-Deċiżjoni tagħti lir-rikorrenti vantaġġ ekonomiku li mhuwiex disponibbli b’mod ieħor fis-suq. L-ewwel, l-ispejjeż tal-materja prima, bħala inputs għall-prodotti finali, jikkostitwixxu spejjeż operatorji ordinarji tal-impriżi, u l-ħelsien minn parti mill-ispejjeż operatorji ordinarji tagħhom jagħtihom vantaġġ ċar. It-tieni, l-għoti ta’ kumpens lir-rikorrenti għall-profitti mitlufa minħabba li kellhom jerfgħu l-ispejjeż operatorji proprji tagħhom huma stess, ukoll jikkostitwixxi vantaġġ ekonomiku li mhuwiex disponibbli f’kundizzjonijiet normali tas-suq u fin-nuqqas tad-Deċiżjoni; f’kundizzjonijiet normali tas-suq, l-impriża kien ikollha terfa’ hija stess l-ispejjeż inerenti fl-attività ekonomika tagħha u għalhekk ma kinitx tiġġenera dawn il-profitti. It-tielet, il-pagament tal-imgħax lir-rikorrenti fuq ħlasijiet li allegatament kienu dovuti fl-imgħoddi, iżda li huma nfushom iridu jkunu kwalifikati bħala li jagħtu vantaġġ, jagħti vantaġġ separat u addizzjonali. Għal darba oħra, f’kundizzjonijiet normali tas-suq u fin-nuqqas tad-Deċiżjoni, l-impriża kien ikollha terfa’ l-ispejjeż operatorji ordinarji tagħha, ma kinitx tiġġenera l-allegati profitti mitlufa, u għalhekk ma kinitx tkun kapaċi tiġbed imgħax fuq dan il-kapital. Fil-fatt, bir-revoka tal-iskema tal-EGO 24, ir-Rumanija reġgħet stabbiliet il-kundizzjonijiet normali tal-kompetizzjoni fis-suq li joperaw fih ir-rikorrenti, u kwalunkwe tentattiv sabiex ir-rikorrenti jiġu kkumpensati għall-konsegwenzi tar-revoka tal-inċentivi tal-EGO 24, jagħti vantaġġ li mhuwiex disponibbli f’dawk il-kundizzjonijiet normali tas-suq.

(97)

It-tentattivi tar-rikorrenti sabiex jisseparaw l-għoti tal-kumpens mir-revoka tal-inċentivi tal-EGO 24 mhumiex konvinċenti. Ir-rikorrenti jargumentaw: “[F]il-każ preżenti, it-Tribunal tal-ICSID ikkonkluda li d-deċiżjoni ta’ konformità mar-regoli tal-UE dwar l-għajnuna mill-Istat kienet tikkonforma mal-obbligi tar-Rumanija skont il-BIT u ma tax danni lir-Rikorrenti fuq din il-bażi. Minflok, it-Tribunal tal-ICSID ta danni għall-imġiba ħażina tal-Istat Rumen li kienet tikkonsisti fiż-żamma tal-obbligi imposti fir-rigward tal-EGO 24 wara l-irtirar tal-iskema u l-imġiba mhux trasparenti lejn l-investituri”.

(98)

Din id-deskrizzjoni tad-Deċiżjoni mhijiex preċiża u fi kwalunkwe każ tonqos milli tikkunsidra l-effetti tal-implimentazzjoni/eżekuzzjoni tad-Deċiżjoni. Diġà ġie rrimarkat li t-Tribunal qies li l-allegat ksur tal-BIT kollu rriżulta minn “ir-revoka qabel iż-żmien tal-inċentivi jew b’rabta diretta ma’ dik ir-revoka qabel iż-żmien”, (63) u ta d-danni għat-telf li rriżulta direttament mir-revoka tal-iskema ta’ inċentivi. It-Tribunal diġà ġie kkwotat ukoll li qal li (64): “[B]ir-revoka tal-inċentivi skont l-EGO 24 qabel l-1 ta’ April 2009, ir-Rumanija ma aġixxietx b’mod mhux raġonevoli jew b’mala fede (ħlief li r-[Rumanija] aġixxiet b’mod mhux raġonevoli billi żammet l-obbligi tal-investituri wara li tterminat l-inċentivi). It-Tribunal, madankollu, jikkonkludi b’maġġoranza li r-Rumanija kisret l-aspettattivi leġittimi tar-Rikorrenti li dawk l-inċentivi kienu se jkunu disponibbli, sostanzjalment fl-istess forma, sal-1 ta’ April 2009. Ir-Rumanija naqset ukoll li taġixxi b’mod trasparenti billi naqset milli tinforma fil-ħin lir-Rikorrenti li r-reġim kien se jiġi tterminat qabel id-data ta’ skadenza skedata tiegħu. Minħabba f’hekk, it-Tribunal isib li r-Rumanija naqset milli ‘tassigura trattament ġust u ekwu tal-investimenti’ tar-Rikorrenti skont it-tifsira tal-Artikolu 2(3) tal-BIT.”

(99)

Fid-dawl ta’ din il-konklużjoni, ma jistax jiġi sostnut, kif jagħmlu r-rikorrenti, li t-Tribunal sab li d-deċiżjoni tar-Rumanija li tikkonforma mar-regoli tal-Unjoni dwar l-għajnuna mill-Istat billi tirrevoka l-EGO 24 ma kinitx tikser il-BIT, jew li ma tatx danni fuq dik il-bażi. (65) Il-Kummissjoni tinnota li bil-ġustifikazzjoni tad-deċiżjoni tiegħu li jagħti kumpens għaż-żieda fil-prezzijiet u t-telf tal-abilità ta’ ħażna għal quddiem, kif ukoll għall-profitti mitlufa, it-Tribunal irrefera biss għad-danni mġarrba mir-rikorrenti b’riżultat tar-revoka tal-inċentivi tal-EGO 24 (66). B’mod partikolari, it-Tribunal ma rreferiex għal, jew ta danni addizzjonali fuq il-bażi tas-sejba tiegħu li r-Rumanija aġixxiet b’mod raġonevoli meta żammet l-obbligi tal-investituri skont l-EGO 24 u naqset milli taġixxi b’mod trasparenti.

(100)

Kuntrarju għas-sottomissjoni tar-rikorrenti, il-preżenza ta’ vantaġġ mhijiex prekluża wkoll mill-fatt li l-ħlas tal-kumpens mogħti mit-Tribunal lir-rikorrenti permezz tal-implimentazzjoni jew l-eżekuzzjoni tad-Deċiżjoni jinvolvi ħlas ta’ kumpens għad-danni. Il-mistoqsija ċentrali f’dan ir-rigward hija jekk il-prinċipji stabbiliti fis-sentenza tal-QtĠ-UE dwar Asteris  (67) humiex applikabbli għal dan il-każ. Fis-sentenza tagħha f’Asteris, il-QtĠ-UE spjegat li l-għajnuna mill-Istat “hija fundamentalment differenti fin-natura legali tagħha mid-danni li l-awtoritajiet nazzjonali kompetenti jistgħu jkunu ordnati jħallsu lil individwi b’kumpens għad-dannu li jkunu kkawżaw lil dawk l-individwi (68).” Ir-rikorrenti jargumentaw li l-Kawża preżenti taqa’ eżattament taħt din il-ġurisprudenza, u li kwalunkwe tentattiv mill-Kummissjoni biex tiddistingwi l-Kawża dwar Asteris minn din mhuwiex konvinċenti. Il-Kummissjoni ma taqbilx ma’ din il-pożizzjoni.

(101)

Il-Kummissjoni tosserva, l-ewwel nett, li l-Kawża dwar Asteris ħarġet minn kuntest ferm differenti mill-Kawża preżenti. Fl-ewwel kawża, il-QtĠ-UE tat sentenza bi tweġiba għal referenza għal deċiżjoni preliminari minn qorti Griega li biha l-QtĠ-UE kienet mitluba tippronunzja ruħha dwar il-ġurisdizzjoni tal-qrati tal-Istati Membri sabiex jikkunsidraw talbiet għad-danni ppreżentati minn individwi kontra l-awtoritajiet nazzjonali fir-rigward tan-nuqqas ta’ pagament tal-għajnuna skont il-politika agrikola komuni tal-Unjoni. In-nuqqas ta’ pagament tal-għajnuna ma kienx ir-riżultat ta’ wegħda miksura mill-awtoritajiet Griegi li jagħtu dik l-għajnuna, iżda pjuttost il-konsegwenza tal-inklużjoni ta’ żbalji tekniċi mill-Kummissjoni f’regolament. L-impriżi affettwati diġà kienu ppreżentaw azzjoni għad-danni kontra l-Kummissjoni quddiem il-QtĠ-UE, li kienet irrifjutata bħala bla bażi. Bi tweġiba għar-referenza għal deċiżjoni preliminari, il-QtĠ-UE fis-sentenza tagħha speċifikat li billi qabel kienet irrifjutat l-azzjoni għad-danni kontra l-Kummissjoni, kwalunkwe azzjoni għad-danni kontra l-Istat Grieg trid tkun għal raġunijiet differenti mill-azzjoni kontra l-Kummissjoni li hija rrifjutat, jiġifieri azzjoni żbaljata tal-awtoritajiet Griegi nfushom. B’mod partikolari, il-QtĠ-UE ma qalitx li l-għoti ta’ danni daqs ammont ta’ għajnuna illegali mill-Istat, imwiegħda iżda mhux imħallsa, ma jammontax għal għajnuna mill-Istat huwa stess. Għalhekk, mis-sentenza dwar Asteris ma jirriżultax li kull għoti tad-danni awtomatikament ikun barra mill-kamp ta’ applikazzjoni tad-dritt tal-Unjoni dwar l-għajnuna mill-Istat, kif donnhom qegħdin jargumentaw ir-rikorrenti. Pjuttost, f’każijiet ta’ responsabbiltà bbażati fuq l-imġiba żbaljata tal-awtoritajiet nazzjonali, ma jingħata l-ebda vantaġġ lil impriża meta dik ir-responsabbiltà tassigura biss li l-parti li sofriet id-dannu tingħata dak li għandha dritt għalih, l-istess bħal kwalunkwe impriża oħra, skont ir-regoli ġenerali tar-responsabbiltà ċivili f’dak l-Istat Membru. Il-kumpens mogħti skont dawk ir-regoli ġenerali tar-responsabbiltà ċivili huwa differenti mill-għajnuna mill-Istat billi ma jistax iwassal biex l-individwu li sofra d-dannu jkun aktar sinjur wara li jirċievi l-kumpens.

(102)

It-tieni, biex il-kumpens ma jaqax taħt ir-regoli tal-Unjoni dwar l-għajnuna mill-Istat skont il-ġurisprudenza Asteris, huwa jrid ikun ibbażat fuq regola ġenerali tal-kumpens. (69) Fil-każ preżenti, il-kumpens ingħata lir-rikorrenti abbażi ta’ BIT intra-UE li l-Kummissjoni tikkunsidra bħala invalidu mill-adeżjoni tar-Rumanija fl-Unjoni. Il-Kummissjoni b’mod konsistenti ħadet il-pożizzjoni li l-BITs intra-UE, bħall-BIT li fuqu r-rikorrenti qegħdin jibbażaw it-talba tagħhom (70), huma kuntrarji għad-dritt tal-Unjoni billi mhumiex kompatibbli mad-dispożizzjonijiet tat-Trattati tal-Unjoni u għalhekk għandhom jitqiesu bħala invalidi. (71) Il-Kummissjoni kemm-il darba għamlet din l-opinjoni magħrufa lill-Istati Membri, inkluż lill-Istati Membri inkwistjoni.

(103)

It-tielet, il-Kummissjoni tinnota li l-għan tad-Deċiżjoni huwa li tikkumpensa lill-applikanti għall-inċentivi li r-Rumanija kienet wegħdithom taħt l-EGO 24 (modifikati bl-EGO 75) iżda li kienet meħtieġa tabolixxi mill-Unjoni sabiex ittemm il-proċess tan-negozjati għall-adeżjoni tagħha fl-Unjoni. Għalhekk, b’kuntrast mal-każ ta’ Asteris, ir-raġuni għaliex l-applikanti qegħdin jitolbu kumpens f’dan il-każ hija minħabba li kienu mċaħħda mill-inċentivi li r-Rumanija wegħdithom bi ksur tal-obbligi tagħha skont l-Artikolu 64 tal-Ftehim Ewropew ta’ assoċjazzjoni u l-Liġi Nru 143/1999 kif interpretata bid-Deċiżjoni Nru 244/2000 tal-Kunsill Rumen għall-Kompetizzjoni li ma tingħatax għajnuna illegali mill-Istat. Madankollu, kif spjega l-Avukat Ġenerali Ruiz-Jarabo Colomer (72), għoti ta’ danni daqs it-total tal-ammonti ta’ għajnuna li kienu previsti li jingħataw, ikun jikkostitwixxi għotja indiretta ta’ għajnuna mill-Istat misjuba li hija illegali u inkompatibbli mas-suq intern. Billi segwiet dik il-linja, il-Qorti Ġenerali qieset li l-klawsoli ta’ indennizz għall-irkupru tal-għajnuna mill-Istat jikkostitwixxu għajnuna mill-Istat (73). Barra minn hekk, fis-sentenza f’Lucchini, il-QtĠ-UE sostniet li qorti nazzjonali kienet impedita milli tapplika l-liġi nazzjonali fejn l-applikazzjoni ta’ dik il-liġi jkollha l-effett li “ma tapplikax id-dritt komunitarju u tagħmel impossibbli l-irkupru ta’ għajnuna mogħtija mill-Istat bi ksur tad-dritt Komunitarju” (74).

(104)

It-tentattivi tar-rikorrenti sabiex jiddistingwu dawk il-kawżi mill-Kawża preżenti mhumiex konvinċenti. Li jgħodd mhuwiex li l-fatti preċiżi ta’ dawk il-kawżi huma differenti minn dawk tal-Kawża preżenti, iżda l-prinċipju li jinforma dawk il-kawżi, jiġifieri li l-liġi nazzjonali, inklużi l-arranġamenti tar-responsabbiltà skont il-liġi nazzjonali, ma tistax tiġi applikata meta l-applikazzjoni tagħha tfixkel l-applikazzjoni tad-dritt tal-Unjoni dwar l-għajnuna mill-Istat u finalment tirriżulta fl-għoti ta’ għajnuna illegali mill-Istat. Għalhekk, il-Kawża dwar Asteris ma teżentax id-danni mogħtija bħala kumpens għall-irkupru ta’ għajnuna illegali mill-Istat jew għan-nuqqas ta’ riċeviment ta’ għajnuna illegali mill-Istat. Il-Kummissjoni tqis li dak l-istess prinċipju japplika meta r-responsabbiltà toħroġ minn trattat skont il-liġi internazzjonali konkluż bejn żewġ Stati Membri (bħal BIT intra-UE) li l-applikazzjoni tiegħu twassal għall-għoti ta’ għajnuna mill-Istat. Meta l-għoti ta’ effett lil trattat intra-UE minn Stat Membru jfixkel l-applikazzjoni tad-dritt tal-Unjoni, dak l-Istat Membru jrid jirrispetta d-dritt tal-Unjoni billi d-dritt primarju tal-Unjoni, bħall-Artikoli 107 u 108 tat-Trattat, jieħu preċedenza fuq l-obbligi internazzjonali ta’ dak l-Istat Membru.

(105)

L-argument tar-rikorrenti li qatt ma kien hemm deċiżjoni formali valida li tistabbilixxi li l-EGO 24 tikkostitwixxi għajnuna illegali mill-Istat jew li dawk l-inċentivi ma kinux kompatibbli mas-suq intern, mhuwiex rilevanti f’dan ir-rigward, billi hija l-implimentazzjoni/eżekuzzjoni tad-Deċiżjoni u mhux l-inċentivi għall-investiment imwiegħda bl-EGO 24, li tikkostitwixxi l-miżura kkontestata u tifforma l-bażi tad-Deċiżjoni preżenti. Fil-fatt, meta jitqies li l-EGO 24 kienet abolita fit-22 ta’ Frar 2005 u li ma tħallset l-ebda għajnuna skont dik il-leġislazzjoni wara dik id-data, la l-Kunsill Rumen għall-Kompetizzjoni u lanqas il-Kummissjoni ma setgħu jikkonkludu f’deċiżjoni formali li l-EGO 24 wasslet għal għajnuna inkompatibbli mill-Istat fil-perjodu bejn it-22 ta’ Frar 2005 sal-1 ta’ April 2009, li huwa l-perjodu li għalih id-Deċiżjoni tagħti kumpens lir-rikorrenti.

(106)

Għal dik l-istess raġuni, ma hemmx bżonn ukoll li l-Kummissjoni tadotta deċiżjoni formali li ssib l-eżistenza ta’ għajnuna mill-Istat f’każijiet fejn qorti nazzjonali jew tribunal tal-arbitraġġ jagħtu kumpens kontra Stat Membru għall-irtirar ta’ miżura ta’ għajnuna. L-Artikolu 107(1) tat-Trattat fih projbizzjoni ġenerali fuq l-għoti ta’ għajnuna “ta’ kwalunkwe forma” mill-Istat. Il-forma preċiża tal-miżura għalhekk mhijiex rilevanti sabiex jiġi stabbilit jekk tagħtix vantaġġ ekonomiku lill-impriża (75). Għalhekk, jekk l-għajnuna mill-Istat tingħata permezz tal-implimentazzjoni jew l-eżekuzzjoni ta’ sentenza jew deċiżjoni, li l-Kummissjoni tqis li huwa l-każ fir-rigward tad-Deċiżjoni, huwa fir-rigward ta’ dik l-implimentazzjoni jew l-eżekuzzjoni li l-Kummissjoni trid turi li l-kundizzjonijiet kumulattivi tal-Artikolu 107(1) tat-Trattat huma ssodisfati u li dik l-għajnuna mhijiex kompatibbli mas-suq intern.

(107)

Fi kwalunkwe każ, il-Kummissjoni tfakkar li l-Kunsill Rumen għall-Kompetizzjoni, diversi Pożizzjonijiet Komuni tal-Unjoni u l-Gvern Rumen wara r-revoka tal-EGO 24, kollha kkonkludew li l-EGO 24 wasslet għal għajnuna illegali mill-Istat skont il-Ftehim Ewropew ta’ assoċjazzjoni, id-Deċiżjoni Nru 4/2000 tal-Kunsill ta’ Assoċjazzjoni UE-Rumanija, il-Liġi Nru 143/99 u l-acquis communautaire. Barra minn hekk, id-Deċiżjoni Nru 244/2000 tal-Kunsill Rumen għall-Kompetizzjoni qatt ma ġiet ikkontestata jew annullata, iżda biss injorata mil-leġiżlatur Rumen permezz tal-adozzjoni tal-EGO 75 kontra d-dispożizzjonijiet tal-Liġi Nru 143/1999 dwar l-għajnuna mill-Istat u għalhekk bi ksur tal-obbligi tiegħu skont il-Ftehim Ewropew ta’ assoċjazzjoni u d-Deċiżjoni Nru 4/2000 tal-Kunsill ta’ Assoċjazzjoni UE-Rumanija. L-Unjoni mbagħad insistiet li r-Rumanija tikkonforma ma’ dik id-deċiżjoni, l-obbligi tagħha skont il-Ftehim Ewropew ta’ assoċjazzjoni u l-acquis communautaire fil-kuntest tan-negozjati tal-adeżjoni, li tal-aħħar għamlet billi ħassret l-EGO 24.

(108)

Għar-raġunijiet ta’ hawn fuq, il-Kummissjoni tikkonkludi li l-ħlas tal-kumpens mogħti mit-Tribunal lir-rikorrenti permezz tal-implimentazzjoni jew l-eżekuzzjoni tad-Deċiżjoni jikkostitwixxi vantaġġ ekonomiku favur ir-rikorrenti li ma kinux jiksbu f’kundizzjonijiet normali tas-suq.

(109)

Mhux il-miżuri kollha li jagħtu vantaġġ ekonomiku lil impriża jikkostitwixxu Għajnuna mill-Istat, iżda dawk biss li jagħtu vantaġġ ekonomiku b’mod selettiv lil ċerti impriżi jew kategoriji ta’ impriżi jew lil ċerti setturi ekonomiċi.

(110)

Id-Deċiżjoni tagħti kumpens biss lir-rikorrenti. Għalhekk billi tħallas dak il-kumpens, permezz tal-implimentazzjoni jew l-eżekuzzjoni tad-Deċiżjoni, ir-Rumanija tagħti vantaġġ biss lir-rikorrenti. Il-miżura għalhekk hija selettiva.

(111)

Barra minn hekk, kif joħroġ mis-sentenza dwar Asteris, il-kumpens għad-danni ma tibbenefikax minnu b’mod selettiv impriża individwali biss sakemm dak il-kumpens joħroġ mill-applikazzjoni ta’ regola ġenerali tal-liġi għar-responsabbiltà tal-gvern li kull individwu jista’ jinvoka, sabiex jiġi eskluż li kwalunkwe kumpens mogħti jagħti benefiċċju selettiv lil ċerti gruppi fis-soċjetà. Il-miżura kkontestata, li toħroġ mill-applikazzjoni tad-dispożizzjonijiet tal-BIT, ma tikkonformax ma’ dan ir-rekwiżit għar-raġunijiet kollha fil-każ preżenti.

(112)

L-ewwel nett, il-BIT jagħti biss dan id-dritt ta’ kumpens lil ċertu grupp ta’ investituri, jiġifieri, lil investituri taż-żewġ Stati Membri koperti bil-BIT intra-UE, jiġifieri l-Isvezja u r-Rumanija. Għalhekk, mhux kull investitur tal-Unjoni fl-istess sitwazzjoni jista’ juża dak il-BIT biex jitlob danni li jikkorrispondu għall-inċentivi mwiegħda taħt l-iskema ta’ għajnuna abolita tal-EGO 24, iżda investituri ta’ ċerta nazzjonalità biss. Għalhekk, sa fejn il-ħlas ta’ kumpens mogħti lil investitur skont BIT jammonta għall-għoti ta’ vantaġġ, il-vantaġġ huwa selettiv. Rigward l-argument tar-rikorrenti li l-karattru ġenerali tal-benefiċċji pprovduti bil-BITs qabel kien rikonoxxut mill-Kummissjoni (ara l-premessa 66), id-dikjarazzjoni kkwotata mir-rikorrenti b’appoġġ għal dik it-talba fil-fatt mhijiex dikjarazzjoni tal-Kummissjoni, iżda silta minn studju ppreparat minn kuntrattur estern għad-Dipartiment tal-Politika tad-Direttorat Ġenerali għall-Politiki Esterni tal-Parlament Ewropew. It-tieni, sabiex jitneħħa kwalunkwe dubju dwar is-sjieda tal-opinjonijiet espressi f’dan l-istudju, huwa jinkludi dikjarazzjoni ta’ ċaħda ta’ responsabbiltà li tispeċifika li l-awtur iġorr ir-responsabbiltà unika għalihom u li huma ma jirriflettux il-pożizzjoni uffiċjali tal-Parlament Ewropew. Id-dikjarazzjoni magħmula f’dan ir-rapport ma tistax tiġi imputata lill-Kummissjoni u mhijiex rilevanti għal din il-kawża.

(113)

It-tieni, il-miżura kkontestata tikkumpensa lill-applikanti għar-revoka tal-inċentivi għall-investiment li minnhom infushom huma ta’ natura selettiva. Fil-fatt, l-inċentivi offruti taħt l-EGO 24 kienu disponibbli biss għal impriżi li jinvestu f’ċerti reġjuni. Għalhekk, il-kumpens mogħti mit-Tribunal lir-rikorrenti għandu fih innifsu jitqies bħala selettiv billi jikkorrispondi għall-vantaġġi mwiegħda taħt l-EGO 24 abolita.

(114)

Fi kwalunkwe każ, il-Kummissjoni tqis li l-BIT li abbażi tiegħu t-Tribunal ta l-kumpens lir-rikorrenti ma baqax validu mal-adeżjoni tar-Rumanija fl-Unjoni, u għalhekk ma jistax jitqies li jifforma l-bażi għal regola ġenerali tal-liġi għar-responsabbiltà tal-gvern li kull investitur jista’ juża.

(115)

Għar-raġunijiet kollha ta’ hawn fuq, il-Kummissjoni tikkonkludi li l-implimentazzjoni jew l-eżekuzzjoni tad-Deċiżjoni tagħti vantaġġ selettiv lir-rikorrenti.

(116)

Vantaġġi mogħtija direttament jew indirettament permezz ta’ riżorsi tal-Istat biss jistgħu jikkostitwixxu għajnuna mill-Istat fis-sens tal-Artikolu 107(1) tat-Trattat. Fil-każ preżenti, ir-Rumanija diġà implimentat parzjalment id-Deċiżjoni billi paċiet parti mill-kumpens mogħti mit-Tribunal lir-rikorrenti kontra t-taxxi dovuti minn wieħed mir-rikorrenti lill-Istat Rumen. Barra minn hekk l-eżekutur maħtur mill-qorti qabad fondi mill-kontijiet tal-Istat biex jissodisfa t-talbiet pendenti tar-rikorrenti skont id-Deċiżjoni. Il-pagamenti diretti mill-baġit tal-Istat, it-telf ta’ introjtu mill-Istat bit-tħassir tat-taxxi dovuti, jew it-tħassir ta’ assi oħra tal-Istat (bħal ishma f’impriżi oħra jew it-trasferiment tal-assi maqbuda) lir-rikorrenti, sew jekk magħmula b’mod volontarju jew permezz ta’ eżekuzzjoni ordnata mill-qorti, kollha għandhom jitqiesu bħala miżuri ffinanzjati permezz ta’ riżorsi tal-Istat.

(117)

Biex vantaġġ selettiv jikkostitwixxi għajnuna fis-sens tal-Artikolu 107(1) tat-Trattat, huwa jrid ikun, fost affarijiet oħra, imputabbli lill-Istat (76). Fil-każ preżenti, ir-rikorrenti jsostnu li billi l-implimentazzjoni tad-Deċiżjoni hija “konsegwenza awtomatika u involontarja tal-obbligi tar-Rumanija skont il-Konvenzjoni dwar l-ICSID, hija b’mod ċar mhux imputabbli lill-Istat, u għalhekk ma tistax tikkostitwixxi għajnuna mill-Istat”. Il-punt prinċipali tal-argument tar-rikorrenti huwa li billi r-Rumanija għandha obbligu skont il-liġi internazzjonali li timplimenta d-Deċiżjoni, li tagħmel dan mhuwiex imputabbli lill-Istat. Il-Kummissjoni ma taqbilx ma’ dan ir-raġunament u tikkunsidra l-miżura bħala imputabbli lir-Rumanija għar-raġunijiet li ġejjin.

(118)

Il-Kummissjoni fil-bidu tinnota li l-qbil volontarju tar-Rumanija li tidħol fil-BIT, b’mod partikolari l-Artikolu 7 tiegħu, ħoloq il-kundizzjonijiet għall-vantaġġ selettiv li jirriżulta mid-Deċiżjoni kif spjegat fil-premessi 110 et seq.

(119)

Barra minn hekk, jekk ir-Rumanija timplimenta b’mod volontarju d-Deċiżjoni billi tħallas il-kumpens mogħti mit-Tribunal lir-rikorrenti, ma hemm l-ebda dubju li dik l-azzjoni tkun imputabbli lill-Istat Rumen. Hu x’inhu, dak huwa l-każ għall-porzjon tal-kumpens mogħti lir-rikorrenti bid-Deċiżjoni li r-Rumanija paċiet kontra t-taxxi dovuti minn wieħed mir-rikorrenti, jiġifieri S.C. European Food S.A, lill-awtoritajiet Rumeni. Dak huwa l-każ ukoll meta r-Rumanija ddeċidiet li tħallas volontarjament il-kumpens pendenti mogħti mit-Tribunal.

(120)

Fl-aħħar nett, kull azzjoni tal-organi Statali tar-Rumanija hija imputabbli lir-Rumanija. Dawk l-organi Statali jinkludu l-gvern tal-Istat Membru u awtoritajiet pubbliċi oħra. B’mod partikolari, anki l-qrati nazzjonali ta’ Stat u l-eżekuturi u l-marixxalli maħtura mill-qorti għandhom jitqiesu bħala organi ta’ dak l-Istat u għalhekk huma marbuta skont l-Artikolu 4(3) tat-Trattat dwar l-Unjoni Ewropea bl-obbligu tagħhom ta’ kooperazzjoni sinċiera fir-rigward tal-Unjoni. Għalhekk, l-azzjonijiet tal-qrati domestiċi u tal-eżekuturi u l-marixxalli maħtura mill-qorti huma imputabbli lill-Istat Rumen, sabiex jekk ir-Rumanija tkun sfurzata tikkumpensa lir-rikorrenti skont id-Deċiżjoni bl-azzjoni tal-qrati jew l-eżekuturi u l-marixxalli maħtura mill-qorti tagħha, dik l-azzjoni tkun imputabbli wkoll lill-Istat Rumen. Id-dritt tal-Unjoni jirrikonoxxi biss eżenzjoni dejqa minn dan il-prinċipju ġenerali tal-imputabbiltà: miżura ma tkunx imputabbli lil Stat Membru jekk dak l-Istat Membru jkun obbligat bid-dritt tal-Unjoni li jimplimenta dik il-miżura mingħajr l-ebda diskrezzjoni. F’dak il-każ, il-miżura toħroġ minn att tal-leġislatura tal-Unjoni u ma tkunx imputabbli lill-Istat. Madankollu, m’hemmx dubju li r-Rumanija mhijiex obbligata bid-dritt tal-Unjoni li timplimenta d-Deċiżjoni. Kwalunkwe deċiżjoni ta’ implimentazzjoni jew eżekuzzjoni tad-Deċiżjoni, sew jekk tittieħed mill-gvern Rumen jew mill-qrati domestiċi tar-Rumanija, għalhekk hija imputabbli lill-Istat Rumen.

(121)

Fid-dawl ta’ dan ta’ hawn fuq, il-Kummissjoni tikkonkludi li l-miżura hija imputabbli lir-Rumanija.

(122)

Miżura mogħtija mill-Istat titqies li twassal għal distorsjoni jew thedded li twassal għal distorsjoni tal-kompetizzjoni meta tkun probabbli li ttejjeb il-pożizzjoni kompetittiva tal-benefiċjarju meta mqabbel ma’ impriżi oħra li jikkompeti magħhom (77). Għar-raġunijiet prattiċi kollha, għalhekk tiġi preżunta distorsjoni tal-kompetizzjoni fis-sens tal-Artikolu 107 tat-Trattat malli l-Istat jagħti vantaġġ finanzjarju lil impriża f’settur liberalizzat fejn hemm, jew jista’ jkun hemm, kompetizzjoni. Vantaġġ mogħti lil impriża, li wassal għal distorsjoni tal-kompetizzjoni, normalment ikun probabbli wkoll li jaffettwa l-kummerċ bejn l-Istati Membri. Il-kummerċ bejn l-Istati Membri jkun affettwat meta miżura ssaħħaħ il-pożizzjoni kompetittiva tal-impriża benefiċjarja meta mqabbel ma’ impriżi oħra li jikkompetu f’kummerċ intra-Komunitarju (78).

(123)

Il-Kummissjoni diġà kkonkludiet (ara l-premessa 81 u dawk sussegwenti) li r-rikorrenti flimkien jiffurmaw unità ekonomika unika, li min-naħa tagħha tifforma l-impriża rilevanti għall-finijiet tal-applikazzjoni tar-regoli tal-Unjoni dwar l-għajnuna mill-Istat. Dik l-impriża hija attiva f’suq liberalizzat, billi tikkompeti ma’ impriżi oħra. Il-Kummissjoni kkonkludiet ukoll li l-ħlas tal-kumpens lir-rikorrenti, bl-implimentazzjoni jew l-eżekuzzjoni tad-Deċiżjoni, itejjeb il-pożizzjoni kompetittiva tagħhom meta mqabbel ma’ impriżi oħra li magħhom jikkompetu, li ma rċevewx kumpens simili għall-irtirar tal-għajnuna illegali mill-Istat. Il-kumpens previst mid-Deċiżjoni huwa bbażat fuq ammont li jikkorrispondi għad-dazji doganali ċċarġjati fuq il-materja prima, il-profitti mitlufa u l-imgħax fuq is-somma totali tad-danni mogħtija. L-ispejjeż tal-materja prima, bħala inputs għall-prodotti finali, jikkostitwixxu spejjeż operatorji ordinarji tal-impriżi. Il-ħelsien tal-applikanti minn parti mill-ispejjeż operatorji ordinarji jagħtihom vantaġġ kompetittiv ċar, bħalma jagħmel il-kumpens lill-applikanti għall-profitti mitlufa u l-pagament tal-imgħax. Ir-rikorrenti huma involuti fil-manifattura ta’ prodotti tal-ikel, prodotti tat-tħin, u imballaġġ tal-plastik. Jeżisti suq liberalizzat għal dawk il-prodotti kollha, u għalhekk kwalunkwe vantaġġ mogħti lir-rikorrenti huwa probabbli li jwassal għal distorsjoni għall-kompetizzjoni. Billi l-prodotti magħmula prinċipalment mir-rikorrenti jistgħu u fil-fatt jiġu nnegozjati b’mod estensiv bejn l-Istati Membri, huwa ċar li kwalunkwe vantaġġ mogħti lir-rikorrenti huwa probabbli wkoll li jaffettwa l-kummerċ bejn l-Istati Membri.

(124)

Il-Kummissjoni tinnota li l-argumenti tar-rikorrenti li jiċħdu d-distorsjoni tal-kompetizzjoni sempliċement jirrepetu l-affermazzjonijiet li l-aħwa Micula ma jistgħux jitqiesu bħala impriżi u li l-implimentazzjoni tad-Deċiżjoni ma tagħti l-ebda vantaġġ lir-rikorrenti. Iż-żewġ affermazzjonijiet diġà ġew indirizzati b’mod estensiv aktar ‘il fuq (ara l-premessi 81 et seq u 92 et seq) u m’għandhomx bżonn aktar kummenti.

(125)

Għar-raġunijiet ta’ hawn fuq, il-Kummissjoni tqis li l-ħlas tal-kumpens mogħti mit-Tribunal lir-rikorrenti jammonta għal għajnuna mill-Istat għall-finijiet tal-Artikolu 107(1) tat-Trattat.

(126)

L-Artikolu 351 tat-Trattat jipprovdi li “[i]d-drittijiet u l-obbligi li jirriżultaw minn ftehim konklużi […] għal Stati li jingħaqdu, qabel id-data tal-adeżjoni, bejn Stat Membru wieħed jew aktar u Stat mhux membru wieħed jew aktar, m’għandhomx jintlaqtu mid-dispożizzjonijiet tat-Trattati.” Fil-każ preżenti, id-drittijiet u l-obbligi li jibbażaw fuqhom ir-rikorrenti huma dawk li joħorġu mill-BIT.

(127)

Mill-mod kif inhu miktub l-Artikolu 351 tat-Trattat huwa ċar li dan ma japplikax fil-każ preżenti, billi l-BIT huwa trattat konkluż bejn żewġ Stati Membri tal-Unjoni, l-Isvezja u r-Rumanija, u mhux trattat “bejn Stat Membru wieħed jew aktar u Stat mhux membru wieħed jew aktar”. Għalhekk, l-applikazzjoni tal-liġi dwar l-għajnuna mill-Istat fil-każ preżenti ma taffettwax id-drittijiet u l-obbligi protetti bl-Artikolu 351 tat-Trattat.

(128)

F’dan il-kuntest, il-Kummissjoni tfakkar li skont id-dritt tal-Unjoni japplikaw regoli differenti għall-BITs intra-UE, fuq naħa, u l-BITs konklużi bejn Stat Membru tal-Unjoni u pajjiż terz, fuq in-naħa l-oħra. Fil-każ tal-BITs intra-UE, il-Kummissjoni tqis li tali ftehimiet imorru kontra d-dritt tal-Unjoni, mhumiex kompatibbli mad-dispożizzjonijiet tat-Trattati tal-Unjoni u għalhekk għandhom jitqiesu bħala mhux validi. B’kuntrast, il-BITs konklużi bejn Stat Membru tal-Unjoni u pajjiż terz huma regolati bir-Regolament (UE) Nru 1219/2012 tal-Parlament Ewropew u tal-Kunsill (79) li jistabbilixxi arranġamenti tranżizzjonali għal ftehimiet bilaterali bejn l-Istati Membri u pajjiżi terzi sakemm dawk l-arranġamenti jiġu progressivament sostitwiti bi ftehimiet tal-Unjoni dwar l-istess suġġett, fid-dawl tal-kompetenza esklużiva tal-Unjoni fir-rigward tal-politika kummerċjali komuni li taħtha jaqa’ l-investiment dirett barrani (80).

(129)

Ir-Rumanija hija wkoll parti għall-Konvenzjoni multilaterali dwar l-ICSID, li aderiet fiha qabel l-adeżjoni tagħha fl-Unjoni. Madankollu, billi l-ebda Parti Kontraenti ta’ pajjiż terz għall-Konvenzjoni dwar l-ICSID ma hija parti għall-BIT involut fil-proċedimenti preżenti, l-Artikolu 351 mhuwiex rilevanti għal dan il-każ.

(130)

L-Artikolu 107(1) tat-Trattat jipprovdi li l-għajnuna mill-Istat, fil-prinċipju, mhijiex kompatibbli mas-suq intern. Sakemm miżura ta’ għajnuna ma tkunx iddikjarata bħala kompatibbli mas-suq intern mill-Kummissjoni, l-Istati Membri huma pprojbiti milli jdaħħlu fis-seħħ miżuri ta’ għajnuna mill-Istat. Skont l-Artikolu 108(3) tat-Trattat, Stat Membru jrid jinforma lill-Kummissjoni dwar kwalunkwe pjan biex jibdel jew jagħti għajnuna u m’għandux idaħħal fis-seħħ il-miżura proposta tiegħu sakemm il-Kummissjoni tieħu deċiżjoni finali dwar il-kompatibbiltà ta’ dik il-miżura mas-suq intern.

(131)

L-obbligu li ma tiddaħħal fis-seħħ l-ebda miżura ta’ għajnuna mingħajr deċiżjoni finali mill-Kummissjoni dwar il-kompatibbiltà ta’ dik il-miżura ta’ għajnuna japplika biss, naturalment, għal miżuri ta’ għajnuna mdaħħla fis-seħħ wara d-dħul fis-seħħ tat-Trattat għall-Istat Membru kkonċernat. Għar-Rumanija, it-Trattat daħal fis-seħħ fl-1 ta’ Jannar 2007.

(132)

Ir-rikorrenti ma jaqblux li l-implimentazzjoni jew l-eżekuzzjoni tad-Deċiżjoni tikkostitwixxi “għajnuna ġdida” fis-sens tal-Artikolu 1(c) tar-Regolament (KE) Nru 659/1999. Huma jsostnu li anki jekk il-valutazzjoni tal-Kummissjoni hija korretta quod non u l-implimentazzjoni jew l-eżekuzzjoni tad-Deċiżjoni tikkostitwixxi għajnuna, id-data tal-għoti ta’ dik l-għajnuna tkun l-għoti inizjali tal-benefiċċji skont l-EGO 24 lir-rikorrenti, li seħħ fl-2000 u fl-2002 u għalhekk qabel l-adeżjoni tar-Rumanija fl-Unjoni. Skont ir-rikorrenti, l-aħħar mument li jista’ jitqies bħala d-data tal-għoti huwa d-dħul fis-seħħ tal-BIT, u li fuqu hija bbażata d-Deċiżjoni, u li daħal fis-seħħ fl-2003.

(133)

Il-Kummissjoni ma taqbilx mar-rikorrenti u tqis li l-ħlas tal-kumpens mogħti mit-Tribunal lir-rikorrenti, permezz tal-implimentazzjoni jew l-eżekuzzjoni tad-Deċiżjoni, jammonta għal għajnuna ġdida u għalhekk huwa soġġett għall-mekkaniżmu ta’ kontroll sħiħ tal-għajnuna mill-Istat stabbilit fl-Artikoli 107 u 108 tat-Trattat. Skont il-ġurisprudenza tal-QtĠ-UE, l-għajnuna trid titqies li tingħata fiż-żmien li jingħata dritt inkondizzjonat lill-benefiċjarju sabiex jirċeviha skont ir-regoli nazzjonali applikabbli. (81) Lanqas l-adozzjoni tal-EGO 24 fit-2 ta’ Ottubru 1998, jew id-deżinjazzjoni ta’ Ștei-Nucet, kontea ta’ Bihor, bħala reġjun żvantaġġat għal 10 snin (effettiva fl-1 ta’ April 1999), jew l-għoti ta’ ċertifikati ta’ investitur permanenti lil S.C. European Food S.A. (fl-1 ta’ Ġunju 2000) u S.C. Starmill S.R.L. u S.C. Multipack (fis-17 ta’ Mejju 2002) ma jagħtu lir-rikorrenti dritt inkondizzjonat li jiksbu l-Faċilità għall-Materja Prima sal-1 ta’ April 2009. Pjuttost, id-dritt għal dik il-Faċilità nkiseb biss minn kumpanija eliġibbli għall-għajnuna skont l-iskema stabbilita bl-EGO 24:

(134)

Billi l-iskema stabbilita bl-EGO 24, kif modifikata bl-EGO 75, kienet revokata fit-22 ta’ Frar 2005, ma seta’ jinkiseb id-dritt għall-għajnuna mill-ebda kumpanija wara dik id-data skont il-qafas regolatorju nazzjonali billi tiġi impurtata materja prima fir-Rumanija biex tiġi integrata fil-produzzjoni interna. Għalhekk, it-talba tal-applikanti għal kumpens mill-Istat Rumen toħroġ biss mid-Deċiżjoni flimkien mal-liġi domestika Rumena li tagħtiha effett legali fl-ordni legali domestiku tar-Rumanija. Billi d-Deċiżjoni ngħatat u tirriskja li tiġi implimentata jew esegwita wara l-adeżjoni tar-Rumanija fl-Unjoni, id-dritt inkondizzjonat skont il-liġi domestika Rumena għar-riċeviment tal-kumpens mogħti mit-Tribunal, li jirriżulta mir-ratifika tal-Konvenzjoni dwar l-ISCID li tintegrah fl-ordni legali domestiku tar-Rumanija u b’hekk tagħti lid-Deċiżjoni effett legali fl-ordni legali domestiku tar-Rumanija, ingħata lir-rikorrenti biss wara l-adeżjoni tar-Rumanija fl-Unjoni.

(135)

F’dan ir-rigward huwa importanti wkoll li jiġi nnotat li d-Deċiżjoni tagħti lir-rikorrenti kumpens f’ammont li jikkorrispondi għall-vantaġġi previsti skont il-Faċilità għall-Materja Prima abolita tal-iskema tal-EGO 24 mill-mument li dik il-leġislazzjoni kienet revokata (22 ta’ Frar 2005) sal-allegata skadenza skedata tagħha (1 ta’ April 2009). Dak il-perjodu jinkludi ftit aktar minn 49 xahar, li matul il-biċċa l-kbira tagħhom (27 xahar), ir-Rumanija kienet membru sħiħ tal-Unjoni direttament soġġetta għad-dixxiplina dwar l-għajnuna mill-Istat kif stipulata fit-Trattat. Barra minn hekk, id-Deċiżjoni tagħti lir-rikorrenti kumpens għall-opportunità mitlufa li jaħżnu għal quddiem iz-zokkor fl-2009, fuq is-suppożizzjoni li t-telf konness sar bejn il-31 ta’ Marzu 2009 u l-1 ta’ Lulju 2010. Dan l-allegat telf għalhekk sar kollu wara l-adeżjoni tar-Rumanija fl-Unjoni fl-2007. Fl-aħħar nett, it-Tribunal ta kumpens għall-profitti mitlufa, billi kkunsidra l-allegat telf imġarrab bejn l-1 ta’ Jannar 2005 u l-31 ta’ Awwissu 2011. Dak il-perjodu jinkludi 80 xahar, li matul il-biċċa l-kbira tagħhom (56 xahar), ir-Rumanija kienet membru sħiħ tal-Unjoni direttament soġġetta għad-dixxiplina dwar l-għajnuna mill-Istat kif stipulata fit-Trattat.

(136)

Fl-aħħar nett, l-iskema ta’ inċentivi tal-EGO 24 mhijiex imsemmija fl-Anness V, kapitolu 2, Nru 1 tal-Att ta’ Adeżjoni tar-Rumanija fl-Unjoni, li jelenka b’mod eżawrjenti l-miżuri ta’ għajnuna mill-Istat li jkunu kkunsidrati bħala għajnuna eżistenti mal-adeżjoni tar-Rumanija fl-Unjoni (83)  (84).

(137)

Il-fatt li la l-Att ta’ Adeżjoni u lanqas it-Trattat ma kienu applikabbli għar-Rumanija fiż-żmien meta r-Rumanija allegatament kisret l-obbligi tagħha skont il-BIT billi rrevokat l-iskema ta’ għajnuna stabbilita bl-EGO 24 jew meta r-rikorrenti ressqu t-talbiet tagħhom skont il-BIT quddiem it-Tribunal, huwa irrilevanti. Ir-rikorrenti fl-ebda punt ma kisbu dritt inkondizzjonat għall-ħlas tal-kumpens mogħti mit-Tribunal, li huwa l-miżura li qiegħda tiġi kkunsidrata. Huwa biss meta t-Tribunal stabbilixxa li kien hemm ksur tal-Artikolu 2(3) tal-BIT billi ta d-Deċiżjoni fil-11 ta’ Diċembru 2013, flimkien mal-liġi domestika Rumena li tagħti effett legali fl-ordni legali domestiku tar-Rumanija lid-Deċiżjoni, li r-rikorrenti rċevew dritt inkondizzjonat għal dak il-kumpens li huma setgħu jinfurzaw kontra r-Rumanija. Dik id-data kienet wara l-adeżjoni tar-Rumanija fl-Unjoni Ewropea.

(138)

Il-każ tar-rikorrenti għalhekk mhuwiex komparabbli mad-deċiżjoni tal-Kummissjoni fil-Kawża N 380/04 li għaliha jirreferu. Il-Kawża N 380/04 kienet tirrigwarda kuntratt konkluż bejn il-kumpanija Latvijas Gāze (“LG”) u l-Latvja 1997. Meta nqalgħet tilwima bejn LG u l-Latvja fuq l-obbligi ta’ din tal-aħħar skont il-kuntratt, inbdew proċedimenti ta’ arbitraġġ kummerċjali fi Stokkolma skont ir-regoli tal-UNCITRAL. It-tribunal tal-arbitraġġ stabbilit għal dawk il-proċedimenti, fid-19 ta’ Ġunju 2003 iddeċieda li l-Latvja kellha tħallas kumpens lil LG għall-perjodu mill-10 ta’ Jannar 2001 sal-10 ta’ Marzu 2003. Il-Latvja ma kkonformatx mad-deċiżjoni tal-arbitraġġ qabel l-adeżjoni tagħha fl-Unjoni fl-1 ta’ Mejju 2004 u nnotifikat l-implimentazzjoni prevista ta’ dik id-deċiżjoni lill-Kummissjoni wara l-adeżjoni. Fid-deċiżjoni tagħha, il-Kummissjoni osservat li l-obbligu ta’ kumpens irriżulta fuq il-bażi tal-kuntratt tal-1997, li l-kumpens mogħti mit-tribunal tal-arbitraġġ kien jirrigwarda fl-intier tiegħu perjodu qabel l-adeżjoni tal-Latvja, u li d-deċiżjoni ta’ arbitraġġ innifisha nħarġet qabel l-adeżjoni tal-Latvja fl-Unjoni. Fuq din il-bażi, il-Kummissjoni kkonkludiet li “il-pagament […] tad-danni mogħtija mit-Tribunal […] jikkostitwixxi sempliċement att ta’ implimentazzjoni ta’ miżura li mmaterjalizzat kompletament qabel l-adeżjoni” u li l-implimentazzjoni tad-deċiżjoni ta’ arbitraġġ tal-2003 ma tistax titqies li tikkostitwixxi “għajnuna ġdida”. Barra minn hekk, id-deċiżjoni tal-Kummissjoni fil-Kawża N 380/04 innifisha turi li hija ma ppreġudikatx l-analiżi ta’ pagamenti futuri possibbli skont il-kuntratt li kienu jirrigwardaw perjodi ta’ wara l-adeżjoni, u b’hekk ftit illimitat l-approċċ magħżul għall-fatti speċifiċi nnotifikati mil-Latvja.

(139)

B’kuntrast, fil-każ preżenti, l-obbligu ta’ kumpens joħroġ mid-Deċiżjoni, li ngħatat fl-2013, il-kumpens mogħti mit-Tribunal lir-rikorrenti jirrigwarda fil-biċċa l-kbira l-perjodu ta’ wara l-adeżjoni tar-Rumanija fl-Unjoni u d-Deċiżjoni nnifisha nħarġet kważi seba’ snin wara li r-Rumanija ssieħbet fl-Unjoni. Fl-aħħar nett, id-deċiżjoni fil-Kawża N 380/04 hija differenti b’mod ċar mill-każ preżenti billi fl-ewwel każ ma kien hemm l-ebda indikazzjoni li bl-implimentazzjoni jew l-eżekuzzjoni tad-deċiżjoni b’arbitraġġ tal-2003, LG kienet se tikseb għajnuna illegali mill-Istat li l-Latvja kienet wiegħdet li tagħti kuntrarju għall-obbligi tagħha dwar l-għajnuna mill-Istat bħala pajjiż kandidat li se jissieħeb fl-Unjoni.

(140)

Il-Kummissjoni għalhekk issib li l-ħlas tal-kumpens mogħti mit-Tribunal lir-rikorrenti jikkostitwixxi għajnuna ġdida u li dik il-miżura tista’ tiddaħħal fis-seħħ biss jekk u wara li l-Kummissjoni tkun awtorizzatha skont ir-regoli dwar l-għajnuna mill-Istat.

(141)

Il-kumpens mogħti mit-Tribunal diġà ġie parzjalment imħallas mir-Rumanija lir-rikorrenti permezz tat-tpaċija ta’ ċerti djun tat-taxxa dovuti minn wieħed mir-rikorrenti, S.C. European Food S.A., lill-Istat Rumen. Billi dik l-implimentazzjoni parzjali tad-Deċiżjoni ma kinitx innotifikata lill-Kummissjoni mir-Rumanija, il-miżura ddaħħlet fis-seħħ b’mod illegali bi ksur tal-Artikolu 108(3) tat-Trattat. Kwalunkwe pagament ulterjuri tal-kumpens mogħti mit-Tribunal, bl-implimentazzjoni jew l-eżekuzzjoni tad-Deċiżjoni, li l-Kummissjoni jew ma tafx bih jew li jista’ jseħħ wara l-adozzjoni ta’ din id-Deċiżjoni, għall-istess raġunijiet ikun jikkostitwixxi wkoll ksur tal-obbligu tar-Rumanija li tikkonforma mal-Artikolu 108(3) tat-Trattat.

(142)

Mill-bidu, il-Kummissjoni tfakkar li meta tkun qiegħda tiġi valutata l-kompatibbiltà ta’ miżura mas-suq intern skont l-Artikoli 107(2) u 107(3) tat-Trattat, l-oneru tal-provi huwa r-responsabbiltà prinċipali tal-Istat Membru (85). F’dan il-kuntest, il-Kummissjoni tfakkar ukoll li miżura ta’ għajnuna mill-Istat ma tistax tiġi ddikjarata bħala kompatibbli mas-suq intern, jekk tinvolvi ksur inseparabbli ta’ dispożizzjonijiet speċifiċi oħra tat-Trattat (86). Fil-preżent, ir-Rumanija ma ppreżentat l-ebda argument li jista’ jiġġustifika l-miżura skont l-Artikoli 107(2) u 107(3) tat-Trattat. Madankollu, għall-benefiċċju tal-kompletezza, il-Kummissjoni tħoss li huwa xieraq li twettaq valutazzjoni tal-kompatibbiltà fuq inizjattiva proprja tagħha.

(143)

Ir-rikorrenti jsostnu li l-miżura tikkostitwixxi għajnuna reġjonali kompatibbli. Fuq il-bażi tal-Artikolu 107(3)(a) u 107(3)(c) tat-Trattat, il-Kummissjoni tista’ tikkunsidra bħala kompatibbli mas-suq intern għajnuna mill-Istat sabiex tippromwovi l-iżvilupp ekonomiku ta’ ċerti żoni żvantaġġati fi ħdan l-Unjoni. Il-kundizzjonijiet li fihom għajnuna għall-promozzjoni tal-iżvilupp reġjonali tista’ titqies bħala kompatibbli mas-suq intern huma stabbiliti fil-Linji gwida dwar l-għajnuna reġjonali mill-Istat għall-perjodu 2014–2020 (“RAG 2014”). Il-premessa 188 ta’ dawk il-Linji gwida tispjega li dawn japplikaw għall-valutazzjoni tal-kompatibbiltà tal-għajnuna reġjonali kollha maħsuba biex tingħata wara t-30 ta’ Ġunju 2014. Dan ifisser li l-għajnuna reġjonali mogħtija b’mod illegali jew l-għajnuna reġjonali maħsuba sabiex tingħata qabel l-1 ta’ Lulju 2014 għandha tiġi valutata skont il-Linji gwida dwar l-għajnuna reġjonali nazzjonali għall-perjodu 2007-2013 (87) (“RAG 2007”).

(144)

Kif spjegat fil-premessa 134, ir-rikorrenti ngħataw dritt inkondizzjonat għall-għajnuna meta nħarġet id-Deċiżjoni fil-11 ta’ Diċembru 2013, flimkien mal-liġi domestika Rumena li tagħti effett legali fl-ordni legali domestiku tar-Rumanija lid-Deċiżjoni, jiġifieri, qabel id-dħul fis-seħħ tar-RAG 2014. Għalhekk, il-ħlas tal-kumpens mogħti mit-Tribunal lir-rikorrenti għandu jiġi valutat skont ir-RAG 2007.

(145)

F’dawk il-linji gwida, il-Kummissjoni tistabbilixxi li għajnuna reġjonali mmirata sabiex tnaqqas l-ispejjeż kurrenti ta’ impriża, tikkostitwixxi għajnuna operatorja u mhux se titqies bħala kompatibbli mas-suq intern, sakemm ma tingħatax f’ċirkustanzi eċċezzjonali biex tindirizza diffikultajiet speċifiċi ffaċċjati minn impriżi f’reġjuni żvantaġġati li jaqgħu fi ħdan il-kamp ta’ applikazzjoni tal-Artikolu 107(3)(a) tat-Trattat. (88)

(146)

Fil-każ preżenti, il-kumpens mogħti mit-Tribunal lir-rikorrenti jirreferi għat-telf direttament marbut mar-revoka tal-inċentivi tal-EGO 24 u huwa mmirat biex ipoġġi lill-benefiċjarju fil-pożizzjoni li “b’kull probabbiltà” kien isib ruħu fiha kieku ma kinux revokati l-inċentivi tal-EGO 24. Fil-fatt, l-implimentazzjoni tad-deċiżjoni terġa’ tistabbilixxi s-sitwazzjoni li r-rikorrenti, b’kull probabbiltà, kienu jkunu fiha kieku r-Rumanija ma rrevokatx l-EGO 24. Billi l-vantaġġi mogħtija taħt l-EGO 24 kienu marbuta mal-ispejjeż rikorrenti tar-rikorrenti u ma kinux marbuta ma’ investiment inizjali, dawk il-vantaġġi kienu jikkostitwixxu għajnuna operatorja. Għalhekk, it-tqegħid tal-benefiċjarju fil-pożizzjoni li kien ikun fiha kienu ma kinux revokati l-inċentivi tal-EGO 24 u għalhekk il-kumpens għat-telf marbut ma’ din ir-revoka, jikkostitwixxi għajnuna operatorja. Kif spjegat fil-premessi 92 et seq, il-pagament tal-kumpens mogħti mit-Tribunal lir-rikorrenti, fir-realtà b’mod retroattiv, inaqqas l-ispejjeż operatorji mġarrba minnhom fit-twettiq tal-attività ekonomika tagħhom f’kundizzjonijiet tas-suq normali.

(147)

Skont il-punti 76, 77 u 79 tar-RAG 2007, l-għajnuna operatorja ġeneralment hija pprojbita, u tista’ tingħata biss b’mod eċċezzjonali f’reġjuni tal-Artikolu 107(3)(a) bil-kundizzjoni li:

(148)

L-attivitajiet ekonomiċi li jibbenefikaw mill-implimentazzjoni tad-Deċiżjoni jinsabu f’żona li taqa’ taħt il-kamp ta’ applikazzjoni tal-Artikolu 107(3)(a) tat-Trattat, kif stabbilit mill-Kummissjoni fid-deċiżjoni tal-mappa tal-għajnuna reġjonali għar-Rumanija għas-snin 2007-2013 (89) u għas-snin 2014-2020 (90).

(149)

Madankollu, il-Kummissjoni ma tarax kif il-ħlas tal-kumpens mogħti lir-rikorrenti huwa ġustifikat f’termini tal-kontribut għall-iżvilupp reġjonali taż-żoni kkonċernati. L-għajnuna operatorja li tirriżulta minn dak il-pagament mhijiex immirata sabiex tikkontribwixxi għall-objettiv ta’ ekwità komuni kif meħtieġ skont l-Artikolu 107(3)(a) tat-Trattat, iżda sempliċement biex tikkumpensa lill-benefiċjarju għat-telf imġarrab mir-revoka tal-EGO 24 qabel id-data ta’ skadenza prevista tagħha. Dan jirriżulta fi flus b’xejn għar-rikorrenti mingħajr l-ebda impatt pożittiv għall-iżvilupp tar-reġjun.

(150)

Mhuwiex biżżejjed li l-attività ekonomika tkun qiegħda f’“żona” sabiex jiġi preżunt li l-miżura hija proporzjonali għall-iżvantaġġi li tkun qiegħda tfittex li ttaffi, billi l-ewwel nett irid jintwera x’inhuma dawn l-iżvantaġġi u t-tieni, kif dawn joħolqu ostakolu għall-iżvilupp tar-reġjun ikkonċernat. Fin-nuqqas ta’ kwalunkwe prova, il-Kummissjoni ma setgħetx tidentifika l-iżvantaġġi speċifiċi li l-miżuri ta’ għajnuna kienu se jfittxu li jtaffu.

(151)

Il-ħlas tal-kumpens mogħti mit-Tribunal lir-rikorrenti huwa ta’ natura temporanja, billi m’għandux effetti wara li titlesta l-implimentazzjoni jew l-eżekuzzjoni tad-Deċiżjoni. Madankollu, mhuwiex limitat għal ċertu porzjon ta’ spejjeż predefiniti, billi dak il-kumpens huwa mmirat sabiex jassigura li jiġi kopert it-telf kollu mġarrab mir-rikorrenti.

(152)

Fid-dawl ta’ dan ta’ hawn fuq, il-Kummissjoni tqis li l-ħlas tal-kumpens mogħti mit-Tribunal lir-rikorrenti ma jikkonformax mar-RAG 2007 u għalhekk ma jistax jiġi ddikjarat bħala kompatibbli mas-suq intern. Billi ma hija applikabbli l-ebda bażi oħra ta’ kompatibbiltà, il-Kummissjoni tqis li l-kompatibbiltà tal-miżura ta’ għajnuna ma ġietx stabbilita.

(153)

L-analiżi ta’ hawn fuq tindika li l-ħlas tal-kumpens mogħti mit-Tribunal lir-rikorrenti jammonta għall-għoti ta’ għajnuna inkompatibbli ġdida li mhijiex kompatibbli mat-Trattat. Il-Kummissjoni jiddispjaċiha li r-Rumanija diġŕ ħallset parzjalment dak il-kumpens billi paċiet djun tat-taxxa dovuti minn wieħed mir-rikorrenti, S.C. European Food S.A., lill-Istat Rumen kontra parti minn dak il-kumpens, kif ukoll bl-azzjoni meħuda mill-eżekutur maħtur mill-qorti.

(154)

Skont it-Trattat u l-ġurisprudenza stabbilita tal-QtĠ-UE, il-Kummissjoni hija kompetenti biex tiddeċiedi li l-Istat Membru kkonċernat irid jabolixxi jew jibdel l-għajnuna meta jsib li mhijiex kompatibbli mas-suq intern (91). Il-Qorti sostniet ukoll b’mod konsistenti li l-obbligu ta’ Stat Membru li jabolixxi għajnuna kkunsidrata mill-Kummissjoni bħala mhux kompatibbli mas-suq intern, huwa maħsub sabiex terġa’ tiġi stabbilita s-sitwazzjoni li kienet teżisti qabel (92). F’dan il-kuntest, il-Qorti sostniet li dak l-objettiv jintlaħaq ladarba l-benefiċjarju jkun ħallas lura l-ammonti mogħtija permezz ta’ għajnuna illegali, u b’hekk iċedi l-vantaġġ li kien gawda fuq il-kompetituri tiegħu fis-suq, u terġa’ tiġi stabbilita s-sitwazzjoni ta’ qabel il-pagament tal-għajnuna (93). Billi jsegwi dik il-ġurisprudenza, l-Artikolu 14(1) tar-Regolament (KE) Nru 659/1999 jipprovdi li “fejn jittieħdu deċiżjonijiet negattivi f’każijiet ta’ għajnuna illegali, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa sabiex jirkupra l-għajnuna mill-benefiċjarju. […]”

(155)

Ir-rikorrenti jsostnu li huma kellhom aspettattiva leġittima li l-inċentivi mogħtija bl-EGO 24 kienu legali u li setgħu jibbenefikaw minn dawk l-inċentivi sal-iskadenza skedata tagħhom fl-1 ta’ April 2009. F’dak ir-rigward, il-Kummissjoni tosserva li l-Artikolu 14(1) tar-Regolament (KE) Nru 659/1999 jispeċifika wkoll li “[i]l-Kummissjoni m’għandhiex teħtieġ ir-rkupru tal-għajnuna jekk dan ikun kuntrarju għal prinċipju ġenerali tal-liġi tal-[Unjoni].” Il-prinċipju tal-protezzjoni tal-aspettattivi leġittimi kien rikonoxxut mill-QtĠ-UE bħala li jikkostitwixxi tali prinċipju ġenerali tad-dritt tal-Unjoni. Il-Kummissjoni ma tqisx, madankollu, li r-rikorrenti jistgħu jippretendu tali aspettattiva leġittima.

(156)

Skont il-ġurisprudenza tal-QtĠ-UE, ħlief f’ċirkustanzi eċċezzjonali, l-impriżi li lilhom tkun ingħatat għajnuna ma jistgħux, fil-prinċipju, ikollhom aspettattiva leġittima li l-għajnuna hija legali sakemm din ma tkunx ingħatat f’konformità mal-proċedura stabbilita fl-Artikolu 108(3) tat-Trattat. Fil-ġurisprudenza aktar riċenti tagħha, il-QtĠ-UE ddikjarat li fin-nuqqas ta’ assigurazzjonijiet suffiċjentement preċiżi li jirriżultaw minn azzjoni pożittiva meħuda mill-Kummissjoni, li għandha l-kompetenza esklużiva sabiex tawtorizza l-għoti ta’ għajnuna mill-Istat mill-Istati Membri tal-Unjoni, li jwasslu lill-benefiċjarju biex jemmen li l-miżura ma tikkostitwix għajnuna mill-Istat, l-ebda ċirkustanza eċċezzjonali ma tista’ tiġġustifika l-applikazzjoni tal-prinċipju tal-protezzjoni tal-aspettattivi leġittimi sabiex jiġi evitat l-irkupru jekk dik il-miżura ta’ għajnuna ma kinitx innotifikata lill-Kummissjoni (94). Fil-fatt, hija ġurisprudenza stabbilita li l-prinċipju tal-protezzjoni tal-aspettattivi leġittimi ma jistax jintuża kontra dispożizzjoni preċiża tad-dritt tal-Unjoni u li l-imġiba ta’ awtorità nazzjonali responsabbli għall-applikazzjoni tad-dritt tal-Unjoni, li taġixxi bi ksur ta’ dak id-dritt, ma tistax toħloq aspettattivi leġittimi min-naħa ta’ operatur ekonomiku li huwa se jibbenefika minn trattament li jmur kontra dak id-dritt (95). Operatur ekonomiku diliġenti jrid jiġi preżunt li kapaċi jistabbilixxi jekk kinitx segwita dik il-proċedura (96).

(157)

Il-Kummissjoni tinnota li, fir-rigward tal-kumpens mogħti mit-Tribunal lir-rikorrenti, kellu jkun ċar mingħajr l-ebda dubju għar-rikorrenti anki qabel ma ngħataw dik l-għajnuna bl-adozzjoni tad-Deċiżjoni, flimkien mal-liġi domestika Rumena li tagħti effett legali lid-Deċiżjoni fl-ordni legali domestiku tar-Rumanija, li l-Kummissjoni kienet tqis li l-ħlas ta’ dak il-kumpens iwassal għal għajnuna mill-Istat li hija illegali u mhux kompatibbli. Dik il-pożizzjoni kienet ikkomunikata b’mod ċar lit-Tribunal fl-20 ta’ Lulju 2009 u kkomunikata lir-rikorrenti.

(158)

Rigward l-affermazzjoni tar-rikorrenti li huma kellhom aspettattiva leġittima li l-EGO 24 kienet legali u kienet se tibqa’ fis-seħħ sal-1 ta’ April 2009, il-Kummissjoni tfakkar, bħala kwistjoni preliminari, li huwa l-pagament tal-kumpens mogħti mit-Tribunal lir-rikorrenti u mhux l-EGO 24, li jifforma l-bażi għal din id-Deċiżjoni. Madankollu, il-Kummissjoni żżid, għall-benefiċċju tal-kompletezza, li r-rikorrenti ma jistgħux b’mod ġustifikat jitolbu aspettattiva leġittima rigward il-validità u l-eżistenza ssoktata ta’ dik l-iskema sal-1 ta’ April 2009. Rigward dik l-iskema, ma kinitx il-Kummissjoni, iżda l-Kunsill Rumen għall-Kompetizzjoni, li, bis-saħħa tad-Deċiżjoni Nru 4/2000 tal-Kunsill ta’ Assoċjazzjoni UE-Rumanija u l-Liġi Rumena Nru 143/1999 dwar l-għajnuna mill-Istat, kien responsabbli għall-monitoraġġ u l-awtorizzazzjoni tal-għoti ta’ għajnuna mill-Istat qabel l-adeżjoni tar-Rumanija fl-Unjoni. F’dak ir-rigward, il-Kummissjoni tinnota li l-EGO 24 kienet innotifikata lill-Kunsill Rumen għall-Kompetizzjoni fid-dawl tal-modifiki previsti mill-EGO 75 u li l-Kunsill Rumen għall-Kompetizzjoni, bid-Deċiżjoni tiegħu Nru 244/2000 tal-15 ta’ Mejju 2000, sab li dawk l-inċentivi jikkostitwixxu għajnuna inkompatibbli mill-Istat. Kien wara l-adozzjoni ta’ dik id-deċiżjoni, fl-1 ta’ Ġunju 2000, li S.C. European Food S.A kisbet il-PIC tagħha, li għamilha eliġibbli biex tikseb għajnuna mill-Istat skont l-iskema stabbilita bl-EGO 24 kif spjegat fil-premessa 133. Madankollu, dak ma jfissirx li l-għajnuna ngħatat f’dik id-data, kif spjegat fil-premessa 134.

(159)

Minn dan isegwi li fiż-żmien li S.C. European Food S.A ngħatat l-għajnuna illegali mill-Istat prevista bl-EGO 24, li fi kwalunkwe każ huwa wara l-1 ta’ Ġunju 2000, hija kellha tkun taf bid-deċiżjoni tal-Kunsill Rumen għall-Kompetizzjoni tal-15 ta’ Mejju 2000 li ddikjarat l-inċentivi tal-EGO 24 bħala għajnuna inkompatibbli mill-Istat. Barra minn hekk, hija kellha tkun taf ukoll bil-Ftehim Ewropew ta’ assoċjazzjoni, li daħal fis-seħħ fl-1 ta’ Jannar 1995, u l-Liġi Rumena Nru 143/1999 dwar l-għajnuna mill-Istat, li daħlet fis-seħħ fl-1 ta’ Jannar 2000, li t-tnejn kienu jipprojbixxu lir-Rumanija milli tagħti għajnuna mill-Istat u taw is-setgħa lill-Kunsill Rumen għall-Kompetizzjoni biex jawtorizza l-għoti ta’ għajnuna ġdida mill-Istat. Fin-nuqqas ta’ tali awtorizzazzjoni mill-Kunsill għall-Kompetizzjoni u skont il-ġurisprudenza tal-QtĠ-UE, li kienet tapplika bis-saħħa tal-Artikolu 64 tal-Ftehim Ewropew ta’ assoċjazzjoni tal-1995, l-Artikolu 1 tar-Regoli ta’ Implimentazzjoni għad-Deċiżjoni Nru 4/2000 tal-Kunsill ta’ Assoċjazzjoni UE-Rumanija u l-acquis communautaire, S.C. European Food S.A qatt ma seta’ jkollha aspettattiva leġittima li l-inċentivi mogħtija bl-EGO 24 kienu jikkostitwixxu għajnuna kompatibbli mill-Istat, irrispettivament mill-azzjonijiet sussegwenti tal-Gvern Rumen wara l-adozzjoni tad-Deċiżjoni Nru 244/2000. L-istess raġunament ovvjament japplika għal Multipack u Starmill, li kisbu biss il-PICs tagħhom fis-17 ta’ Mejju 2002, sentejn wara li kienet adottata d-Deċiżjoni Nru 244/2000. Għalhekk, ir-rikorrenti lanqas biss jistgħu jsostnu aspettattiva leġittima li l-iskema tal-EGO 24 kienet tikkostitwixxi għajnuna legali mill-Istat, li l-Kummissjoni tqis bħala irrelevanti għall-finijiet tad-Deċiżjoni preżenti.

(160)

Għalhekk, kwalunkwe pagament tal-kumpens mogħti mit-Tribunal lir-rikorrenti jrid jiġi rkuprat mir-Rumanija billi dak il-pagament jikkostitwixxi għajnuna mill-Istat li hija illegali u inkompatibbli. Billi l-ħames rikorrenti, flimkien mal-kumpaniji rilevanti l-oħra tal-EFDG jikkostitwixxu unità ekonomika unika (ara l-premessa 91), il-ħames rikorrenti u l-kumpaniji rilevanti l-oħra tal-EFDG għandhom ikunu flimkien responsabbli biex iħallsu lura lill-Istat Rumen l-għajnuna mill-Istat riċevuta minn kwalunkwe wieħed minnhom. Skont l-Artikolu 14(2) tar-Regolament (KE) Nru 659/1999, l-għajnuna li għandha tiġi rkuprata skont deċiżjoni ta’ rkupru għandha tinkludi l-imgħax b’rata xierqa ffissata mill-Kummissjoni. L-imgħax għandu jkun pagabbli mid-data li fiha l-għajnuna illegali kienet għad-dispożizzjoni tal-benefiċjarju sad-data tal-irkupru tagħha. L-Artikolu 14(3) tar-Regolament (KE) Nru 659/1999 jipprovdi li l-irkupru għandu jsir mingħajr dewmien u skont il-proċeduri taħt il-liġi nazzjonali tal-Istat Membru kkonċernat, bil-kundizzjoni li dawn jippermettu l-eżekuzzjoni immedjata u effettiva tad-deċiżjoni tal-Kummissjoni. F’dan ir-rigward u fil-każ ta’ proċedura quddiem il-qrati nazzjonali, l-Istati Membri kkonċernati għandhom jieħdu l-passi kollha neċessarja li jkunu disponibbli fis-sistemi legali rispettivi tagħhom, inklużi miżuri provviżorji, mingħajr preġudizzju għad-dritt tal-Unjoni.

(161)

F’dan ir-rigward il-Kummissjoni tosserva li r-Rumanija diġà paċiet l-ammont ta’ RON 337 492 864 (madwar EUR 76 miljun (97)) kontra d-djun tat-taxxa dovuti minn wieħed mir-rikorrenti, S.C. European Food S.A. Il-Kummissjoni tosserva wkoll li fil-5 ta’ Jannar 2015, l-eżekutur maħtur mill-qorti qabad RON 36 484 232 (madwar EUR 8,1 miljun (98)) mill-Ministeru tal-Finanzi tar-Rumanija u sussegwentement ittrasferixxa RON 34 004 232 (madwar EUR 7,56 miljun) f’partijiet indaqs lil tlieta mill-ħames rikorrenti, u żamm il-bqija bħala kumpens għall-ispejjeż tal-eżekuzzjoni. Bejn il-5 ta’ Frar u l-25 ta’ Frar 2015, l-eżekutur maħtur mill-qorti qabad RON 9 197 482 (madwar EUR 2 miljun) (99) oħra mill-kontijiet tal-bank tal-Ministeru tal-Finanzi. Barra minn hekk, il-Kummissjoni tieħu nota tal-fatt li l-awtoritajiet Rumeni ttrasferew b’mod volontarju RON 472 788 675 (madwar EUR 106,5 miljun (100)) (inklużi l-ispejjeż tal-eżekutur maħtur mill-qorti li jammontaw għal RON 6 028 608) f’kont imblukkat f’isem il-ħames rikorrenti. Dawn l-ammonti, kif ukoll kwalunkwe pagament ieħor lir-rikorrenti li seħħ jew li se jseħħ bi twettiq tad-Deċiżjoni, iridu jiġu rkuprati mir-Rumanija. Għalhekk, il-Kummissjoni

(a)

l-ammont totali ta’ għajnuna riċevuta minn kull entità msemmija fl-Artikolu 1 ta’ din id-Deċiżjoni;

(b)

deskrizzjoni dettaljata tal-miżuri diġà meħuda u ppjanati sabiex tikkonforma ma’ din id-Deċiżjoni;

(c)

dokumenti li juru li l-benefiċjarji kienu ordnati jħallsu lura l-għajnuna.

—

il-miżuri ta’ għajnuna mdaħħla fis-seħħ qabel l-10 ta’ Diċembru 1994;

—

il-miżuri ta’ għajnuna elenkati fl-Appendiċi għal dan l-Anness;

—

il-miżuri ta’ għajnuna li qabel id-data tal-adeżjoni kienu valutati mill-awtorità għall-monitoraġġ tal-għajnuna mill-Istat tal-Istat Membru ġdid u nstabu li kienu kompatibbli mal-acquis, u li għalihom il-Kummissjoni ma qajmet l-ebda oġġezzjoni abbażi ta’ dubji serji dwar il-kompatibbiltà tal-miżura mas-suq komuni, skont il-proċedura stabbilita fil-paragrafu 2.