15.6.2007

MT

Il-Ġurnal Uffiċjali ta’ l-Unjoni Ewropea

L 155/1

---

REGOLAMENT TAL-KUMMISSJONI (KE) Nru 655/2007

ta' l-14 ta’ Ġunju 2007

li jistabbilixxi l-valuri fissi ta' l-importazzjoni għad-determinazzjoni tal-prezz ta' dħul ta' ċertu frott u ħaxix

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kummissjoni (KE) Nru 3223/94 ta' l-21 ta' Diċembru 1994 dwar regoli dettaljati għall-applikazzjoni ta' l-arranġamenti dwar l-importazzjoni tal-frott u l-ħxejjex (1), u b'mod partikolari l-Artikolu 4(1) tiegħu,

Billi:

(1)

Fl-applikazzjoni tal-konklużjonijiet tan-negozjati kummerċjali multilaterali tal-Laqgħa ta' l-Urugwaj, il-Regolament (KE) Nru 3223/94 jistipula l-kriterji għall-istabbiliment mill-Kummissjoni tal-valuri fissi ta' l-importazzjoni minn pajjiżi terzi, għall-prodotti u għall-perjodi msemmijin fl-Anness tiegħu.

(2)	Fl-applikazzjoni tal-kriterji msemmija hawn fuq, il-valuri fissi ta' l-importazzjoni għandhom ikunu ffissati fil-livelli msemmija fl-Anness ta' dan ir-Regolament,

ADOTTAT DAN IR-REGOLAMENT:

Artikolu 1

Il-valuri fissi ta' l-importazzjoni msemmija fl-Artikolu 4 tar-Regolament (KE) Nru 3223/94 huma stabbiliti kif inhu indikat fit-tabella ta' l-Anness.

Artikolu 2

Dan ir-Regolament għandu jidħol fis-seħħ fil-15 ta’ Ġunju 2007.

---

(1)  ĠU L 337, 24.12.1994, p. 66. Regolament kif emendat l-aħħar bir-Regolament (KE) Nru 386/2005 (ĠU L 62, 9.3.2005, p. 3).

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/3

---

REGOLAMENT TAL-KUMMISSJONI (KE) Nru 656/2007

ta’ l-14 ta’ Ġunju 2007

li jemenda r-Regolament (KE) Nru 586/2001 dwar l-implimentazzjoni tar-Regolament tal-Kunsill (KE) Nru 1165/98 li jikkonċerna l-istatistika fit-terminu l-qasir rigward id-definizzjoni ta’ Raggruppamenti Industrijali Prinċipali (MIGs)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1165/98 tad-19 ta’ Mejju 1998 dwar statistika fit-terminu l-qasir (1), u b’mod partikolari l-Artikolu 3 u l-Artikolu 17(c) tiegħu,

Billi:

(1)	Id-definizzjoni ta’ Main Industrial Groupings (MIGS) stabbilita fir-Regolament tal-Kummissjoni (KE) Nru 586/2001 (2) hija msejsa fuq il-klassifika statistikali ta’ l-attivitajiet ekonomiċi fil-Komunità Ewropea (NACE) (3).

(2)	Ġiet introdotta verżjoni ġdida ta’ NACE (NACE Rev 2) bir-Regolament (KE) Nru 1893/2006, li tispeċifika wkoll li l-istatistika fit-terminu l-qasir irregolata bir-Regolament (KE) Nru 1165/98 għandha tiġi prodotta skond l-NACE Rev. 2 mill-1 ta’ Jannar 2009 ’l quddiem.

(3)	Il-miżuri stipulati f’dan ir-Regolament huma bi qbil ma’ l-opinjoni tal-Kumitat tal-Programm Statistiku,

ADOTTAT DAN IR-REGOLAMENT:

Artikolu 1

Ir-Regolament (KE) Nru 586/2001 huwa emendat kif ġej:

(1)	Fl-Artikoli 1 u 2 ir-referenzi kollha lil “NACE Rev. 1” huma ssostitwiti b’ “NACE Rev. 2”.

(2)	Fl-Artikolu 3 il-kliem “mhux aktar tard minn tliet xhur wara li r-Regolament preżenti jidħol fis-seħħ” huma sostitwiti bil-kliem “mill-1 ta’ Jannar 2009”;

(3)	L-Anness huwa sostitwit bit-test fl-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

Għandu jkun jgħodd mill-1 ta’ Jannar 2009.

---

(1)  ĠU L 162, 5.6.1998, p. 1. Ir-Regolament kif l-aħħar emendat bir-Regolament (KE) Nru 1893/2006 tal-Parlament Ewropew u tal-Kunsill, (ĠU L 393, 30.12.2006, p. 1).

(2)  ĠU L 86, 27.3.2001, p. 11.

(3)  ĠU L 293, 24.10.1990, p. 1.

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/7

---

REGOLAMENT TAL-KUMMISSJONI (KE) Nru 657/2007

ta’ l-14 ta’ Ġunju 2007

li jimplimenta r-Regolament tal-Kunsill (KE) Nru 1165/98 li jikkonċerna l-istatistika għal żmien qasir fir-rigward tat-twaqqif ta’ skemi ta’ kampjuni Ewropej

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1165/98 tad-19 ta’ Mejju 1998 li jikkonċerna l-istatistika għal żmien qasir (1), u b’mod partikolari l-Artikolu 17(j) tiegħu,

Billi:

(1)	Ir-Regolament (KE) Nru 1165/98 jistabbilixxi qafas komuni għall-produzzjoni ta’ statistika Komunitarja għal żmien qasir dwar iċ-ċiklu tal-kummerċ.

(2)

Ir-Regolament (KE) Nru 1158/2005 tal-Parlament Ewropew u tal-Kunsill tas-6 ta’ Lulju 2005 li jemenda r-Regolament tal-Kunsill (KE) Nru 1165/98 li jikkonċerna l-istatistika għal żmien qasir (2) impona obbligazzjoni fuq l-Istati Membri biex jagħtu indikatur ġdid (prezzijiet ta’ importazzjoni fis-settur ta’ l-industrija) u biex jibagħtu data dwar indikaturi mhux domestiċi skond id-distinzjoni fiż-żona ta’ l-euro u fiż-żona mhux ta’ l-euro. Minħabba f’hekk, setgħu nħolqu spejjeż sostanzjali għas-sistemi ta’ statistika nazzjonali.

(3)

Ir-Regolament (KE) Nru 1158/2005 introduċa l-possibilità li jiġu stabbiliti skemi ta’ kampjuni Ewropej sabiex jitnaqqsu l-ispejjeż tas-sistemi ta’ statistika nazzjonali, sabiex jiġi żgurat li r-rekwiżiti ta’ data Ewropej ikunu sodisfatti u sabiex il-Kummissjoni (l-Eurostat) tkun tista’ tipproduċi stimi Ewropej kredibbli għall-indikaturi kkonċernati.

(4)	Il-miżuri previsti f’dan ir-Regolment huma skond l-opinjoni tal-Kumitat tal-Programm ta’ l-Istatistika,

ADOTTAT DAN IR-REGOLAMENT:

Artikolu 1

Skemi ta’ kampjuni Ewropej jistgħu jiġu applikati meta tkun qed tinġabar l-istatistika li tiddistingwi bejn iż-żona ta’ l-euro u ż-żona mhux ta’ l-euro għat-tliet fatturi varjabbli li ġejjin speċifikati fl-Anness A tar-Regolament (KE) Nru 1165/98:

Fatturi varjabbli	Isem
132	Ordnijiet ġodda mhux domestiċi
312	Il-prezzijiet tal-produzzjoni (output) tas-suq mhux domestiku
340	Il-prezzijiet ta’ l-importazzjoni

Artikolu 2

Stati Membri li jipparteċipaw fl-iskemi ta’ kampjuni Ewropej imsemmija fl-Artikolu 1 għandhom jibagħtu data lill-Kummissjoni (l-Eurostat) mill-anqas għall-attivitajiet NACE Rev. 1.1, għall-fatturi varjabbli Nri 132 u 312, u prodotti CPA, u għall-fattur varjabbli Nru 340, speċifikati fl-Anness.

Artikolu 3

Stati Membri li jipparteċipaw fl-iskema ta’ kampjuni Ewropea għall-fattur varjabbli Nru 340 jistgħu jillimitaw l-ambitu tad-data mibgħuta għal dak il-fattur varjabbli għall-importazzjoni ta’ prodotti minn pajjiżi fiż-żona mhux ta’ l-euro.

Artikolu 4

It-termini ta’ l-iskemi ta’ kampjuni Ewropej stipulati fl-Anness jistgħu jiġu adattati skond tibdiliet fis-sena ta’ bażi jew fis-sistema ta’ klassifikazzjoni jew tibdiliet strutturali importanti fiż-żona ta’ l-euro.

Artikolu 5

Kull membru ġdid taż-żona ta’ l-euro jista’ jidħol kwalunkwe skema ta’ kampjuni Ewropea msemmija fl-Artikolu 1, u dan meta jingħaqad maż-żona ta’ l-euro. Il-Kummissjoni, wara konsultazzjoni ma’ l-Istat Membru kkonċernat, għandha tispeċifika l-attivitajiet NACE u l-prodotti CPA li għandu jintbagħat data dwarhom, sabiex l-Istat Membru jikkonforma mar-Regolament (KE) Nru 1168/98 fil-qafas ta’ l-iskemi ta’ kampjuni Ewropej.

Artikolu 6

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

---

(1)  ĠU L 162, 5.6.1998, p. 1. Ir-Regolament kif emendat l-aħħar bir-Regolament (KE) Nru 1893/2006 tal-Parlament Ewropew u tal-Kunsill (ĠU L 393, 30.12.2006, p. 1).

(2)  ĠU L 191, 22.7.2005, p. 1.

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/10

---

REGOLAMENT TAL-KUMMISSJONI (KE) Nru 658/2007

ta’ l-14 ta’ Ġunju 2007

li jikkonċerna l-penalitajiet finanzjarji għall-ksur ta’ ċerti obbligi fir-rigward ta’ awtorizzazzjoni għat-tqegħid fis-suq li ingħataw skond ir-Regolament (KE) Nru 726/2004 tal-Parlament Ewropew u tal-Kunsill

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 726/2004 tal-Parlament Ewropew u tal-Kunsill tal-31 ta’ Marzu 2004 li jistabbilixxi proċeduri Komunitarji għall-awtorizzazzjoni u s-sorveljanza ta’ prodotti mediċinali għall-użu mill-bniedem u veterinarju u li jistabbilixxi l-Aġenzija Ewropea għall-Mediċini (1), u b’mod partikolari l-ewwel subparagrafu ta’ l-Artikolu 84(3) tiegħu,

Billi:

(1)

Sabiex jiżgura l-infurzar ta’ ċerti obbligi marbuta ma’ awtorizzazzjoni għat-tqegħid fis-suq għal prodotti mediċinali mogħtija skond ir-Regolament (KE) Nru 726/2004, l-Artikolu 84 ta’ dak ir-Regolament jagħti s-setgħa lill-Kummissjoni, fuq talba ta’ l-Aġenzija Ewropea għall-Mediċini, minn hawn ’il quddiem imsejħa “l-Aġenzija”, li timponi penalitajiet finanzjarji lid-detenturi ta’ awtorizzazzjoni għat-tqegħid fis-suq.

(2)

Il-ksur ta’ l-obbligi stabbiliti fir-rigward ta’ awtorizzazzjoni għat-tqegħid fis-suq mogħtija skond ir-Regolament (KE) Nru 726/2004 li jistgħu jwasslu għall-applikazzjoni ta’ piena finanzjarja għandhom jikkonċernaw il-kontenut ta’ l-awtorizzazzjoni għat-tqegħid fis-suq u r-rekwiżiti ta’ wara it-tqegħid fis-suq marbuta ma’ l-awtorizzazzjoni għat-tqegħid fis-suq, inkluż ir-rekwiżiti tal-liġi Komunitarja relatati mal-farmakoviġilanza u s-sorveljanza tas-suq.

(3)

Barra minn hekk, fid-dawl ta’ dak li jipprovdi l-Artikolu 84(1) tar-Regolament (KE) Nru 726/2004, li taħtu l-Istati Membri għandhom jiddeterminaw il-penalitajiet li għandhom jiġu applikati għall-ksur tad-dispożizzjonijiet ta’ dak ir-Regolament jew tar-Regolamenti adottati skond l-imsemmi Regolament u li jieħdu l-miżuri neċessarji għall-implimentazzjoni tagħhom, l-azzjoni fuq livell Komunitarju għandha tittieħed biss f’każi fejn ikunu involuti l-interessi tal-Komunità. B’dak il-mod, l-infurzar effettiv tar-Regolament (KE) Nru 726/2004 jkun żgurat permezz ta’ ġestjoni xierqa tar-riżorsi disponibbli fuq livell Komunitarju u nazzjonali.

(4)

B’riżultat tas-sistema ta’ awtorità parallela f’dak li għandu x’jaqsam mas-sorveljanza u l-infurzar min-naħa tal-Komunità u l-Istati Membri fir-rigward ta’ l-awtorizzazzjoni għat-tqegħid fis-suq mogħtija skond ir-Regolament (KE) Nru 726/2004, id-dispożizzjonijiet ta’ dan ir-Regolament jistgħu jiġu infurzati b’mod effettiv biss fil-qafas ta’ kooperazzjoni mill-qrib, skond l-Artikolu 10 tat-Trattat, bejn l-Istati Membri, l-Aġenzija u l-Kummissjoni. Għal dak il-għan huwa neċessarju li jiġu stabbiliti arranġamenti għall-konsultazzjoni u l-kooperazzjoni bejniethom.

(5)

Huwa xieraq li, għall-fini li jingħataw bidu u jitmexxew il-proċeduri ta’ ksur u l-kwantifikazzjoni tal-penalitajiet finanzjarji, l-Aġenzija u l-Kummissjoni għandhom jikkunsidraw kwalunkwe’ proċedura ta’ Stat Membru kontra l-istess detentur ta’ l-awtorizzazzjoni għat-tqegħid fis-suq u li tkun ibbażata fuq l-istess raġunijiet legali u l-istess fatti.

(6)

Sabiex ikun żgurat it-twettiq effettiv ta’ l-istadju ta’ l-inkjesta ta’ l-allegat ksur, l-Aġenzija u l-Kummissjoni għandhom ikunu jistgħu jirrikorru għand l-awtoritajiet kompetenti ta’ l-Istati Membri, stabbiliti bħala l-awtoritajiet ta’ sorveljanza tal-prodotti mediċinali awtorizzati permezz tal-proċedura ċentralizzata tar-Regolament (KE) Nru 726/2004, biex iwettqu l-miżuri meħtieġa għall-inkjesta u biex jiksbu informazzjoni dwar ksur li jidħol fi ħdan l-ambitu ta’ dan ir-Regolament. Għal dan il-għan, huwa xieraq li l-awtoritajiet ta’ sorveljanza jwettqu attivitajiet ta’ spezzjoni u sorveljanza li għalihom huma kompetenti skond id-dispożizzjonijiet tar-Regolament (KE) Nru 726/2004, tad-Direttiva 2001/82/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità rigward il-prodotti mediċinali veterinarji (2) u tad-Direttiva 2001/83/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (3) u tad-dispożizzjonijiet li jimplimentawhom.

(7)

L-obbligi marbuta ma’ l-awtorizzazzjoni għat-tqegħid fis-suq mogħtija skond ir-Regolament (KE) Nru 726/2004 li jidħlu fi ħdan l-ambitu ta’ dan ir-Regolament għandhom ikunu infurzati permezz ta’ żewġ tipi ta’ penalitajiet finanzjarji: multi u pagamenti perjodiċi ta’ penali. L-ammont massimu għaż-żewġ kategoriji għandu jiġi stabbilit.

(8)

Id-deċiżjoni li tniedi proċedura fil-każ ta’ ksur taħt dan ir-Regolament għandha tittieħed mill-Aġenzija, li għandha l-ewwel tinforma lill-Kummissjoni u l-Istati Membri. Matul l-inkjesta, l-Aġenzija għandu jkollha s-setgħa li titlob li tiġi pprovduta informazzjoni tali sabiex tkun tista’ tiskopri kwalunkwe’ ksur u għandu jkollha l-kooperazzjoni ta’ l-awtoritajiet kompetenti nazzjonali. Kwalunkwe’ setgħa ta’ sorveljanza konċessa lill-Aġenzija permezz tal-liġi Komunitarja fir-rigward ta’ l-awtorizzazzjoni għat-tqegħid fis-suq għal prodotti mediċinali mogħtija skond ir-Regolament (KE) Nru 726/2004 tista’ tintuża mill-Aġenzija matul l-inkjesta dwar ksur.

(9)

Id-deċiżjonijiet tal-Kummissjoni fl-impożizzjoni ta’ penalitajiet għandhom ikunu bbażati fuq l-inkjesta ta’ l-Aġenzija, fuq l-osservazzjonijiet tad-detentur ta’ l-awtorizzazzjoni għat-tqegħid fis-suq li jkun suġġett għall-proċedura ta’ ksur u, fejn xieraq, fuq informazzjoni oħra mressqa lilha. Kwalunkwe’ setgħa ta’ sorveljanza konċessa lill-Kummissjoni permezz tal-liġi Komunitarja fir-rigward ta’ l-awtorizzazzjoni għat-tqegħid fis-suq għal prodotti mediċinali mogħtija skond ir-Regolament (KE) Nru 726/2004 tista’ tintuża mill-Kummissjoni fl-istadju tat-teħid tad-deċiżjonijiet ta’ proċedura ta’ ksur.

(10)	Huwa xieraq li d-deċiżjonijiet li jimponu penalitajiet jkunu bbażati esklussivament fuq objezzjonijiet li d-detentur ta’ l-awtorizzazzjoni għat-tqegħid fis-suq ikun seta’ jikkummenta dwarhom.

(11)	Il-penalitajiet imposti għandhom ikunu effettivi, proporzjonati u dissważivi, waqt li jqisu ċ-ċirkostanzi tal-każ speċifiku.

(12)

Jidher li huwa xieraq li tkun provduta proċedura xierqa f’każi fejn il-Kummissjoni jkollha l-ħsieb li timponi multa għan-nuqqas, min-naħa tad-detentur ta’ l-awtorizzazzjoni għat-tqegħid fis-suq suġġett għall-proċedura ta’ ksur, li jikkonforma mat-talba għall-informazzjoni li tkun saret mill-Aġenzija jew mill-Kummissjoni.

(13)

Meta tkun qed twettaq proċedura f’każ ta’ ksur, l-Aġenzija jew il-Kummissjoni għandha tiżgura li jkunu rispettati d-drittijiet tad-difiża u tal-prinċipju tal-kunfidenzjalità skond il-prinċipji ġenerali tal-liġi, u l-ġurisprudenza tal-Qorti tal-Ġustizzja tal-Komunitajiet Ewropej. B’mod partikolari, id-detentur ta’ l-awtorizzazzjoni għat-tqegħid fis-suq li jkun suġġett għall-proċedura ta’ ksur għandu jkollu d-dritt li jiġi mismugħ mill-Aġenzija matul l-istadju ta’ l-inkjesta u mill-Kummissjoni ladarba din tkun notifikata b’dikjarazzjoni ta’ oġġezzjonijiet, kif ukoll li jkollu aċċess għall-fajl kompilat mill-Aġenzija u mill-Kummissjoni. Filwaqt li l-Kummissjoni għandha tkun intitolata li tordna lid-detenturi ta’ awtorizzazzjoni għat-tqegħid fis-suq sabiex jipprovdu l-informazzjoni meħtieġa u d-dokumenti relatati ma’ l-allegat ksur, għandu jkun rispettat ukoll id-dritt għas-silenzju f’sitwazzjonijiet fejn id-detentur ikun ordnat li jipprovdi tweġibiet li jistgħu jinvolvu ammissjoni min-naħa tiegħu ta’ l-eżistenza ta’ ksur, kif żviluppat mill-Qorti tal-Ġustizzja.

(14)	Sabiex tkun żgurata ċ-ċertezza legali fit-twettiq tal-proċedura ta’ ksur, huwa neċessarju li jkunu stabbiliti regoli dettaljati għall-komputazzjoni ta’ limiti ta’ żmien u perjodi ta’ limitazzjoni għall-impożizzjoni u l-infurzar tal-penalitajiet.

(15)	Id-deċiżjonijiet li jimponu l-penalitajiet għandhom ikunu infurzati skond l-Artikolu 256 tat-Trattat u huma suġġetti għal reviżjoni mill-Qorti tal-Ġustizzja.

(16)	Dan ir-Regolament jirrispetta d-drittijiet fundamentali u josserva l-prinċipji rikonoxxuti b’mod partikolari mill-Karta tad-Drittijiet Fundamentali ta’ l-Unjoni Ewropea.

(17)	Il-miżuri previsti f’dan ir-Regolament huma skond l-opinjoni tal-Kumitat Permanenti dwar il-Prodotti Mediċinali għall-Użu mill-Bniedem u l-Kumitat Permanenti għall-Prodotti Mediċinali Veterinarji,

ADOTTAT DAN IR-REGOLAMENT:

KAPITOLU I

DISPOŻIZZJONIJIET ĠENERALI

Artikolu 1

Is-suġġett ewlieni u l-ambitu

Dan ir-Regolament jistabbilixxi regoli li jikkonċernaw l-applikazzjoni ta’ penalitajiet finanzjarji lid-detenturi ta’ awtorizzazzjonijiet għat-tqegħid fis-suq, mogħtija taħt ir-Regolament (KE) Nru 726/2004, fir-rigward ta’ ksur ta’ l-obbligi li ġejjin, f’każi fejn il-ksur konċernat jista’ jkollu implikazzjonijiet sinifikanti fuq is-saħħa pubblika fil-Komunità, jew fejn ikollu dimensjoni Komunitarja għaliex iseħħ jew ikollu l-effetti tiegħu f’iktar minn Stat Membru wieħed, jew fejn ikunu involuti interessi oħra tal-Komunità:

(1)

il-kompletezza u l-preċiżjoni tad-dettalji u d-dokumenti kontenuti f’applikazzjoni għal awtorizzazzjoni għat-tqegħid fis-suq taħt ir-Regolament (KE) Nru 726/2004, jew ta’ kwalunkwe’ dokument jew data oħra mressqa lill-Aġenzija Ewropea għall-Mediċini stabbilita b’dak ir-Regolament, minn hawn ‘il quddiem imsejħa “l-Aġenzija”, skond l-obbligi stabbiliti f’dak ir-Regolament;

(2)

il-kondizzjonijiet u r-restrizzjonijiet inklużi fl-awtorizzazzjoni għat-tqegħid fis-suq u li jikkonċernaw il-forniment jew l-użu ta’ prodotti mediċinali, kif imsemmi fl-Artikolu 9(4)(b), it-tieni subparagrafu ta’ l-Artikolu 10(1), l-Artikolu 34(4)(ċ) u t-tieni subparagrafu ta’ l-Artikolu 35(1) tar-Regolament (KE) Nru 726/2004;

(3)	il-kondizzjonijiet u r-restrizzjonijiet inklużi fl-awtorizzazzjoni għat-tqegħid fis-suq fir-rigward ta’ l-użu mingħajr periklu u effettiv tal-prodott mediċinali, kif imsemmi fl-Artikolu 9(4)(ċ), l-Artikolu 10(1), l-Artikolu 34(4)(d) u l-Artikolu 35(1) tar-Regolament (KE) Nru 726/2004;

(4)

l-introduzzjoni ta’ kull varjazzjoni neċessarja għat-termini ta’ awtorizzazzjoni għat-tqegħid fis-suq sabiex jiġi kkunsidrat il-progress tekniku u xjentifiku u jippermetti li l-prodotti mediċinali jkunu manifatturati u iċċekjati permezz ta’ metodi xjentifiċi ġeneralment aċċettati, kif imsemmi fl-Artikolu 16(1) u l-Artikolu 41(1) tar-Regolament (KE) Nru 726/2004;

(5)

li tipprovdi kull informazzjoni ġdida li tista’ tinvolvi varjazzjoni fit-termini ta’ awtorizzazzjoni għat-tqegħid fis-suq, in-notifika ta’ kwalunkwe’ projbizzjoni jew restrizzjoni imposta mill-awtoritajiet kompetenti ta’ kwalunkwe pajjiż fejn jinbiegħ il-prodott mediċinali, jew il-provvista ta’ kwalunkwe’ informazzjoni li tista’ tinfluwenza l-evalwazzjoni tar-riskji u l-benefiċċji tal-prodott, kif imsemmi fl-Artikolu 16(2) u l-Artikolu 41(4) tar-Regolament (KE) Nru 726/2004;

(6)	li tipprovdi, fuq talba ta’ l-Aġenzija, ta’ kwalunkwe’ data li turi li l-bilanċ tar-riskji u benefiċċju ikun għadu favorevoli, kif imsemmi fl-Artikolu 16(2) u l-Artikolu 41(4) tar-Regolament (KE) Nru 726/2004;

(7)	l-osservanza ta’ residwi fil-każ ta’ prodotti mediċinali veterinarji, kif imsemmi fl-Artikolu 41(2) u (3) tar-Regolament (KE) Nru 726/2004;

(8)	it-tqegħid fis-suq skond il-kontenut fis-sommarju tal-karatteristiċi tal-prodott u tat-tikkettjar u fil-fuljett ta’ tagħrif tal-prodott mediċinali skond kif imsemmi fl-awtorizzazzjoni għat-tqegħid fis-suq;

(9)	l-obbligi speċifiċi li jissemmew fl-Artikolu 14(7) tar-Regolament (KE) Nru 726/2004 jew fi kwalunkwe’ dispożizzjoni oħra adottata skond l-istess Regolament;

(10)	il-proċeduri speċifiċi li jissemmew fl-Artikolu 14(8) u l-Artikolu 39(7) tar-Regolament (KE) Nru 726/2004;

(11)

in-notifika lill-Aġenzija bid-dati tat-tqegħid fis-suq attwali tal-prodott u d-data meta l-prodott għandu jieqaf milli jitqiegħed fis-suq, u li tipprovdi lill-Aġenzija bid-data dwar il-volum tal-bejgħ u l-volum ta’ preskrizzjonijiet tal-prodott, kif imsemmi fl-Artikolu 13(4) u l-Artikolu 38(4) tar-Regolament (KE) Nru 726/2004;

(12)	il-persuna kkwalifikata kif xieraq biex tkun responsabbli għall-farmakoviġilanza, kif imsemmi fl-Artikolu 23 u l-Artikolu 48 tar-Regolament (KE) Nru 726/2004;

(13)	ir-reġistrar u r-rapportar ta’ reazzjonijiet negattivi u serji suspettati u, fil-każ ta’ prodotti mediċinali veterinarji, ta’ reazzjonijiet negattivi għall-bniedem, kif imsemmi fl-Artikolu 24(1) u l-Artikolu 49(1) tar-Regolament (KE) Nru 726/2004;

(14)

ir-rapportar ta’ reazzjonijiet avversi gravi u mhux mistennija, it-trasferiment suspettat ta’ aġenti infettivi perikolużi u, fil-każ ta’ prodotti mediċinali veterinarji, ir-reazzjonijiet li jistgħu jkunu perikolużi għall-bniedem, kif imsemmi fl-Artikolu 24(2) u l-Artikolu 49(2) tar-Regolament (KE) Nru 726/2004;

(15)	reġistrazzjonijiet tar-reazzjonijiet ħżiena kollha suspettati u għandhom jintbagħtu f’forma ta’ rapport perjodiku ta’ aġġornament dwar is-sigurtà, kif imsemmi fl-Artikolu 24(3) u l-Artikolu 49(3) tar-Regolament (KE) Nru 726/2004;

(16)	il-komunikazzjoni lill-pubbliku ta’ informazzjoni relatata mal-kwestjonijiet dwar il-farmakoviġilanza, kif jissemma fl-Artikolu 24(5) u l-Artikolu 49(5) tar-Regolament (KE) Nru 726/2004;

(17)	il-ġbir u l-evalwazzjoni ta’ data speċifika dwar il-farmakoviġilanza, kif imsemmi fir-raba’ paragrafu ta’ l-Artikolu 26 u r-raba’ paragrafu ta’ l-Artikolu 51 tar-Regolament (KE) Nru 726/2004.

Artikolu 2

Il-komplementarjetà tal-proċeduri

Għall-fini tal-bidu u t-twettiq tal-proċedura ta’ ksur provduta fil-Kapitolu II, l-Aġenzija u l-Kummissjoni għandhom jikkunsidraw kwalunkwe’ proċedura ta’ ksur ta’ Stat Membru kontra l-istess detentur ta’ l-awtorizzazzjoni għat-tqegħid fis-suq u li tkun ibbażata fuq l-istess raġunijiet legali u l-istess fatti.

Artikolu 3

Il-kooperazzjoni bejn l-awtoritajiet kompetenti ta’ l-Istati Membri

1.   L-awtoritajiet kompetenti ta’ l-Istati Membri għandhom jipprovdu għajnuna lill-Aġenzija u lill-Kummissjoni sabiex jippermettulhom li jwettqu d-dmirijiet tagħhom taħt dan ir-Regolament.

2.   L-informazzjoni provduta mill-awtoritajiet kompetenti nazzjonali bħala rispons għal talba min-naħa ta’ l-Aġenzija jew il-Kummissjoni taħt dan ir-Regolament għandha tintuża mill-Aġenzija u mill-Kummissjoni għall-għanijiet li ġejjin biss:

(a)	bħala evidenza għall-fini ta’ l-applikazzjoni ta’ dan ir-Regolament;

(b)	għat-twettiq ta’ xogħol fdati lilhom għall-awtorizzazzjoni u s-sorveljanza ta’ prodotti mediċinali taħt ir-Regolament (KE) Nru 726/2004.

Artikolu 4

L-oneru tal-prova

Fi kwalunkwe’ proċedura ta’ ksur skond dan ir-Regolament, l-oneru tal-prova ta’ ksur għandu jkun f’idejn il-Kummissjoni.

KAPITOLU II

IL-PROĊEDURA TA’ KSUR

SEZZJONI 1

L-inkjesta

Sotto-sezzjoni 1

Il-bidu ta’ proċedura

Artikolu 5

Il-bidu ta’ proċedura ta’ f’każ ta’ ksur

1.   L-Aġenzija tista’ tibda l-proċedura f’każ ta’ ksur fuq inizjattiva tagħha stess jew wara talba minn xi Stat Membru.

L-Aġenzija għandha tinforma lill-Kummissjoni li hija għandha l-intenzjoni li tibda l-proċedura f’każ ta’ ksur.

2.   L-Aġenzija għandha tibda l-proċedura f’każ ta’ ksur biss wara li tkun infurmat lill-Istati Membri.

Artikolu 6

It-talba għall-informazzjoni

Qabel il-bidu ta’ proċedura f’każ ta’ ksur, l-Aġenzija tista’ titlob kull informazzjoni relatata ma’ l-allegat ksur mingħand id-detentur konċernat ta’ l-awtorizzazzjoni għat-tqegħid fis-suq.

L-Aġenzija għandha tiddikjara l-għan tat-talba u l-fatt li qed issir skond dan ir-Regolament, u tindika l-limitu ta’ żmien għas-sottomissjoni tat-tweġiba min-naħa tad-detentur ta’ l-awtorizzazzjoni għat-tqegħid fis-suq, li għandu jkun ta’ mill-inqas erba’ ġimgħat.

Fejn it-talba hija risposta għal talba minn Stat Membru skond l-Artikolu 5(1), dak l-Istat Membru għandu jkun infurmat mill-Aġenzija.

Artikolu 7

In-notifika

L-Aġenzija għandha tibgħat notifika bil-miktub dwar il-bidu ta’ proċedura f’każ ta’ ksur lid-detentur ta’ l-awtorizzazzjoni għat-tqegħid fis-suq konċernat, lill-Istati Membri u lill-Kummissjoni.

In-notifika għandha tistabbilixxi l-allegazzjonijiet kontra d-detentur ta’ l-awtorizzazzjoni għat-tqegħid fis-suq, filwaqt li tispeċifika d-dispożizzjoni li tkun allegatament ġiet miksura, u l-evidenza li fuqha jkunu bbażati dawk l-allegazzjonijiet.

Għandha tavża lid-detentur ta’ l-awtorizzazzjoni għat-tqegħid fis-suq li jistgħu jiġu imposti multi jew ħlasijiet perjodiċi ta’ penalitajiet.

Sotto-sezzjoni 2

Il-miżuri ta’ l-inkjesta

Artikolu 8

It-talbiet mill-Aġenzija

1.   L-Aġenzija tista’ titlob lid-detentur ta’ l-awtorizzazzjoni għat-tqegħid fis-suq biex jipprovdi spjegazzjonijiet orali jew bil-miktub, jew li jipprovdi dettalji jew dokumenti.

It-talbiet għandhom ikunu indirizzati bil-miktub lid-detentur ta’ l-awtorizzazzjoni għat-tqegħid fis-suq. L-Aġenzija għandha tiddikjara l-bażi legali u l-iskop tat-talba, għandha tistabbilixxi limitu ta’ żmien li fih għandha tiġi pprovduta l-informazzjoni, li għandu jkun ta’ mill-inqas erba’ ġimgħat, u għandha tinforma lid-detentur ta’ l-awtorizzazzjoni għat-tqegħid fis-suq dwar il-multi provduti fl-Artikolu 19(1)(a) u (b) fir-rigward ta’ nuqqas ta’ konformità mat-talbiet jew fir-rigward ta’ forniment ta’ informazzjoni żbaljata jew li tista’ tiżgwida.

2.   L-Aġenzija tista’ titlob lill-awtoritajiet kompetenti nazzjonali biex jikkooperaw fl-inkjesta bil-modi li ġejjin:

(a)	billi jwettqu kwalunkwe mill-kompiti fdati lill-awtoritajiet ta’ sorveljanza mill-Artikoli 19(1) u 44(1) tar-Regolament (KE) Nru 726/2004;

(b)	billi jwettqu spezzjonijiet jew miżuri oħra ta’ sorveljanza skond l-Artikoli 111 sa 115 tad-Direttiva 2001/83/KE u l-Artikoli 80, 81 u 82 tad-Direttiva 2001/82/KE.

It-talbiet għandhom ikunu indirizzati bil-miktub u għandhom jiddikjaraw il-bażi legali u l-iskop tat-talba. Il-limitu ta’ żmien għas-sottomissjoni tat-tweġiba jew għat-twettiq tal-miżura ta’ inkjesta għandu jkun determinat bi ftehim bejn l-Aġenzija u l-awtorità kompetenti nazzjonali li lilha tkun indirizzata t-talba, filwaqt li jitqiesu ċ-ċirkostanzi speċifiċi tal-każ.

3.   L-Aġenzija tista’ titlob lil kwalunkwe’ persuna naturali jew legali biex tipprovdi informazzjoni relatata ma’ l-allegat ksur.

It-talbiet għandhom ikunu indirizzati bil-miktub u għandhom jiddikjaraw il-bażi legali u l-iskop tat-talba, u għandhom jistabbilixxu limitu ta’ żmien li fih għandha tkun provduta l-informazzjoni, li għandu jkun ta’ mill-inqas erba’ ġimgħat.

Artikolu 9

Id-dritt għas-smigħ

Qabel ma jiġi adottat ir-rapport provdut fl-Artikolu 10, l-Aġenzija għandha tistieden lid-detentur ta’ l-awtorizzazzjoni għat-tqegħid fis-suq biex iressaq l-osservazzjonijiet tiegħu bil-miktub.

Dan għandha tagħmlu bil-miktub, u għandha tindika l-limitu ta’ żmien għas-sottomissjoni ta’ dawn l-osservazzjonijiet, li għandu jkun ta’ mill-inqas erba’ ġimgħat.

Sotto-sezzjoni 3

Ir-rapport

Artikolu 10

Il-kontenut u l-limitu ta’ żmien

1.   L-Aġenzija għandha tipprovdi lill-Kummissjoni, lill-Istati Membri u lid-detentur ta’ l-awtorizzazzjoni għat-tqegħid fis-suq b’rapport li jiġbor is-sejbiet kollha fid-dawl ta’ l-inkjesta mwettqa skond din is-Sezzjoni.

2.   Fejn l-Aġenzija tiskopri li d-detentur ta’ l-awtorizzazzjoni għat-tqegħid fis-suq ikun wettaq ksur kif imsemmi fl-Artikolu 1, ir-rapport għandu jinkludi wkoll evalwazzjoni taċ-ċirkostanzi tal-każ speċifiku skond il-kriterji stabbiliti fl-Artikolu 18(2) u talba lill-Kummissjoni għall-applikazzjoni tal-penalitajiet finanzjarji.

3.   L-Aġenzija għandha tadotta r-rapport tagħha sa mhux aktar tard minn 18-il xahar wara n-notifika tal-bidu tal-proċedura skond l-Artikolu 7 jew sa sena wara n-notifika min-naħa tal-Kummissjoni tar-ritorn tal-fajl skond l-Artikolu 15.

SEZZJONI 2

L-istadju tat-teħid tad-deċiżjoni

Sotto-sezzjoni 1

Il-proċedura

Artikolu 11

Id-dikjarazzjoni ta’ l-oġġezzjonijiet

1.   Fejn, wara talba mill-Aġenzija skond l-Artikolu 10(2), il-Kummissjoni tiddeċiedi li tkompli bil-proċedura f’każ ta’ ksur, din għandha tinnotifika dikjarazzjoni ta’ l-oġġezzjonijiet bil-miktub lid-detentur ta’ l-awtorizzazzjoni għat-tqegħid fis-suq li tkun tinkludi dan li ġej:

(a)	l-allegazzjonijiet kontra d-detentur ta’ l-awtorizzazzjoni għat-tqegħid fis-suq, inkluż indikazzjoni preċiża ta’ liema dispożizzjoni ġiet allegatament miksura, u l-evidenza li fuqha jkunu bbażati dawk l-allegazzjonijiet;

(b)	avviż li jistgħu jiġu imposti multi jew ħlasijiet perjodiċi ta’ penalitajiet.

2.   Fejn, fi żmien 18-il xahar minn meta tkun irċeviet it-talba mill-Aġenzija, il-Kummissjoni ma tkunx innotifikat dikjarazzjoni ta’ l-oġġezzjonijiet, din għandha tipprovdi lid-detentur ta’ l-awtorizzazzjoni għat-tqegħid fis-suq b’dikjarazzjoni spjegattiva.

Artikolu 12

Id-dritt għat-tweġiba

1.   Meta tinnotifika d-dikjarazzjoni ta’ l-oġġezzjonijiet, il-Kummissjoni għandha tistabbilixxi limitu ta’ żmien li fi ħdanu d-detentur ta’ l-awtorizzazzjoni għat-tqegħid fis-suq ikun jista’ jissottometti l-osservazzjonijiet tiegħu bil-miktub lill-Kummissjoni fuq id-dikjarazzjoni ta’ l-oġġezzjonijiet.

Dak il-limitu ta’ żmien għandu jkun ta’ mill-inqas erba’ ġimgħat.

Il-Kummissjoni m’għandhiex tkun obbligata li tikkunsidra l-osservazzjonijiet bil-miktub li jkunu waslu wara l-iskadenza ta’ dak il-limitu ta’ żmien.

2.   Id-detentur ta’ l-awtorizzazzjoni għat-tqegħid fis-suq jista’ jehmeż ma’ l-osservazzjonijiet bil-miktub tiegħu, dikjarazzjonijiet minn persuni oħra li jistgħu jikkorroboraw xi aspett ta’ dawk l-osservazzjonijiet bil-miktub.

Artikolu 13

Is-Seduta orali

1.   Fejn id-detentur ta’ l-awtorizzazzjoni għat-tqegħid fis-suq jitlob hekk fl-osservazzjonijiet bil-miktub tiegħu, il-Kummissjoni għandha tagħtih l-opportunità li jiżviluppa l-argumenti tiegħu f’seduta orali.

Id-data tas-seduta orali għandha tkun stabbilita mill-Kummissjoni.

2.   Fejn meħtieġ, il-Kummissjoni tista’ tistieden lill-awtoritajiet kompetenti nazzjonali jew lil kwalunkwe’ persuna oħra biex tieħu sehem fis-seduta orali.

3.   Is-seduta orali m’għandhiex tkun pubblika. Kull persuna tista’ tinstema’ separatament jew fil-preżenza ta’ persuni oħra li jkunu mistiedna li jattendu, filwaqt li jiġi kkunsidrat l-interess leġittimu tad-detenturi ta’ l-awtorizzazzjoni għat-tqegħid fis-suq u ta’ persuni oħra għall-ħarsien tas-sigriet tan-negozju tagħhom u ta’ informazzjoni kunfidenzjali oħra.

Artikolu 14

Ir-rikjesti għall-informazzjoni

1.   Wara li tirċievi talba mill-Aġenzija skond l-Artikolu 10(2) u qabel l-adozzjoni tad-deċiżjoni li tissemma fl-Artikolu 16, il-Kummissjoni tista’ fi kwalunkwe’ ħin titlob lid-detentur ta’ l-awtorizzazzjoni għat-tqegħid fis-suq biex jipprovdi spjegazzjonijiet orali jew bil-miktub, jew li jipprovdi dettalji jew dokumenti relatati mal-ksur allegat.

It-talbiet għandhom ikunu indirizzati bil-miktub lid-detentur ta’ l-awtorizzazzjoni għat-tqegħid fis-suq. Il-Kummissjoni għandha tiddikjara l-bażi legali u l-iskop tat-talba, għandha tiddetermina limitu ta’ żmien stipulat sabiex tiġi provduta l-informazzjoni, li għandu jkun ta’ mill-inqas erba’ ġimgħat, u għandha tinforma lid-detentur ta’ l-awtorizzazzjoni għat-tqegħid fis-suq dwar il-multi provduti fl-Artikolu 19(1)(ċ) u (d) fir-rigward tan-nuqqas ta’ konformità mat-talbiet jew fir-rigward tal-forniment ta’ informazzjoni żbaljata jew li tista’ tiżgwida.

2.   Il-Kummissjoni tista’ titlob lill-Aġenzija, lill-awtoritajiet kompetenti nazzjonali jew lil xi persuna fiżika jew ġuridika oħra biex tipprovdi informazzjoni relatata mal-ksur allegat.

It-talbiet għandhom jiġu indirizzati bil-miktub u għandhom jiddikjaraw il-bażi legali u l-iskop tat-talba. Fejn it-talba tkun indirizzata lill-Aġenzija jew lil xi awtorità kompetenti nazzjonali, il-limitu ta’ żmien stipulat għall-proviżjoni ta’ l-informazzjoni għandu jkun stabbilit mill-Kummissjoni wara konsultazzjoni ma’ l-Aġenzija jew l-awtorità kompetenti nazzjonali li lilha tkun indirizzata t-talba, filwaqt li jitqiesu ċ-ċirkostanzi speċifiċi tal-każ. Fejn it-talba tkun indirizzata lil xi persuni fiżika jew ġuridika oħra, hija għandha tistablixxi limitu ta’ żmien li fih għandha tiġi provduta l-informazzjoni, li għandu jkun ta’ mill-inqas erba’ ġimgħat.

Artikolu 15

Perjodu ġdid ta’ inkjesta

1   Fejn, wara li tikkunsidra r-rapport ta’ l-Aġenzija, l-osservazzjonijiet tad-detentur ta’ l-awtorizzazzjoni għat-tqegħid fis-suq u, skond il-każ, xi informazzjoni oħra mressqa quddiemha, il-Kummissjoni tqis li tkun meħtieġa informazzjoni addizzjonali sabiex titkompla l-proċedura, din tista’ tirritorna l-fajl tal-każ lill-Aġenzija għal perjodu ġdid ta’ inkjesta.

Il-Kummissjoni għandha tindika b’mod ċar lill-Aġenzija l-punti ewlenin li din għandha teżamina ulterjorment u, jekk xieraq, tissuġġerixxi miżuri possibbli ta’ inkjesta għal dak il-għan.

2.   Is-sotto-sezzjonijiet 2 u 3 tas-Sezzjoni 1 għandhom japplikaw għat-twettiq tal-perijodu ġdid ta’ inkjesta.

Sotto-sezzjoni 2

Id-deċiżjoni u l-penalitajiet finali

Artikolu 16

Forom ta’ penalitajiet finanzjarji u ammonti massimi

1.   Fejn, wara l-proċedura prevista fis-Sotto-sezzjoni 1, il-Kummissjoni ssib li d-detentur ta’ l-awtorizzazzjoni għat-tqegħid fis-suq wettaq, intenzjonalment jew b’mod negliġenti, ksur kif stipolat fl-Artikolu 1, din tista’ tadotta deċiżjoni li timponi multa li ma taqbiżx il-5 % tal-qligħ tad-detentur fil-Komunità fis-sena finanzjarja preċedenti.

2.   Fejn id-detentur ta’ l-awtorizzazzjoni għat-tqegħid fis-suq ma jkunx temm il-ksur, il-Kummissjoni tista’, fid-deċiżjoni msemmija fil-paragrafu 1, timponi ħlasijiet perjodiċi ta’ penalitajiet għal kull ġurnata li ma jkunux jaqbżu t-2,5 % tal-qligħ medju ta’ kuljum tad-detentur fil-Komunità fis-sena finanzjarja preċedenti.

Il-ħlasijiet perjodiċi ta’ penalitajiet jistgħu jiġu imposti għal perjodu li jiddekorri mid-data tan-notifika ta’ dik id-deċiżjoni sat-tmiem tal-ksur.

3.   Għall-finijiet tal-paragrafi 1 u 2, is-sena finanzjarja preċedenti tirreferi għas-sena finanzjarja li tippreċedi d-data tad-deċiżjoni li tissemma fil-paragrafu 1.

Artikolu 17

Id-deċiżjoni

1.   Id-deċiżjoni provduta fl-Artikolu 16 għandha tkun ibbażata esklussivament fuq raġunijiet li dwarhom id-detentur ta’ l-awtorizzazzjoni għat-tqegħid fis-suq ikun seta’ jikkummenta.

2.   Il-Kummissjoni għandha tinforma lid-detentur ta’ l-awtorizzazzjoni għat-tqegħid fis-suq dwar ir-rimedji ġudizzjarji disponibbli.

3.   Il-Kummissjoni għandha tikkomunika l-adozzjoni tad-deċiżjoni lill-Aġenzija u lill-Istati Membri.

4.   Meta tippubblika d-dettalji tad-deċiżjoni tagħha skond it-tieni subparagrafu ta’ l-Artikolu 84(3) tar-Regolament (KE) Nru 726/2004, il-Kummissjoni għandha tikkunsidra l-interess leġittimu tad-detentur ta’ l-awtorizzazzjoni għat-tqegħid fis-suq u ta’ persuni oħra fil-ħarsien tas-sigrieti tan-negozju tagħhom.

Artikolu 18

Il-prinċipji li jirregolaw l-applikazzjoni u l-kwantifikazzjoni tal-penalitajiet finanzjarji

1.   Meta tiġi biex tiddetermina jekk timponiex piena finanzjarja u biex tiddetermina l-piena finanzjarja xierqa, il-Kummissjoni għandha tkun iggwidata mill-prinċipji ta’ effettività, proporzjonalità u dissważività.

2.   F’kull każ, il-Kummissjoni għandha tqis, fejn rilevanti, iċ-ċirkostanzi li ġejjin:

(a)

is-serjetà u l-effetti tal-ksur, u, b’mod partikolari, dawn li ġejjin: (i) il-mod li bih il-ksur jaffettwa ħażin id-drittijiet, is-sigurtà u l-benesseri tal-pazjenti; (ii) l-effetti tiegħu fuq is-saħħa u l-welfare ta’ l-annimali u l-impatt fuq is-sidien ta’ l-annimali; (iii) jekk il-ksur jippreżentax jew jistax jippreżenta riskju għas-saħħa pubblika, għas-saħħa ta’ l-annimali jew għall-ambjent; (iv) il-gravità tal-ksur f’relazzjoni mas-saħħa pubblika, is-saħħa ta’ l-annimali u l-ambjent;

(b)

fuq naħa waħda, il-buona fede tad-detentur ta’ l-awtorizzazzjoni għat-tqegħid fis-suq fl-interpretazzjoni u t-twettiq ta’ l-obbligi marbuta ma’ l-awtorizzazzjonijiet għall-bejgħ mogħtija skond ir-Regolament (KE) Nru 726/2004 jew, fuq in-naħa l-oħra, kwalunkwe prova ta’ għemil qarrieqi intenzjonat min-naħa tad-detentur ta’ l-awtorizzazzjoni għat-tqegħid fis-suq;

(ċ)

fuq naħa waħda, il-grad ta’ diliġenza u kooperazzjoni muri mid-detentur ta’ l-awtorizzazzjoni għat-tqegħid fis-suq fl-iskoperta tal-ksur u l-applikazzjoni ta’ azzjoni korrettiva, jew matul il-proċedura ta’ ksur jew, fuq in-naħa l-oħra, kwalunkwe tfixkil mid-detentur ta’ l-awtorizzazzjoni għat-tqegħid fis-suq għall-iskoperta tal-ksur u t-twettiq tal-proċedura ta’ ksur, jew kwalunkwe nuqqas ta’ konformità min-naħa tad-detentur ta’ l-awtorizzazzjoni għat-tqegħid fis-suq fir-rigward tat-talbiet magħmula mill-Aġenzija, il-Kummissjoni jew awtorità kompetenti nazzjonali fl-applikazzjoni ta’ dan ir-Regolament;

(d)	il-qligħ tal-prodott mediċinali konċernat;

(e)	il-ħtieġa li jkunu adottati miżuri proviżorji mill-Kummissjoni jew azzjoni urġenti minn xi Stat Membru skond l-Artikoli 20 jew 45 tar-Regolament (KE) Nru 726/2004 bħala konsegwenza tal-ksur;

(f)	ir-repetizzjoni, il-frekwenza jew it-tul tal-ksur min-naħa ta’ dak id-detentur ta’ l-awtorizzazzjoni għat-tqegħid fis-suq;

(ġ)	sanzjonijiet preċedenti, inklużi penalitajiet, imposti fuq l-istess detentur ta’ l-awtorizzazzjoni għat-tqegħid fis-suq.

3.   Meta tiġi biex tiddetermina l-ammont tal-piena finanzjarja, il-Kummissjoni għandha tikkunsidra kwalunkwe’ piena diġà imposta fuq id-detentur ta’ l-awtorizzazzjoni għat-tqegħid fis-suq fuq livell nazzjonali fuq il-bażi ta’ l-istess raġunijiet legali u l-istess fatti.

SEZZJONI 3

In-nuqqas ta’ kooperazzjoni

Artikolu 19

Il-penalitajiet finanzjarji

1.   Permezz ta’ deċiżjoni, il-Kummissjoni tista’ timponi fuq id-detenturi ta’ l-awtorizzazzjoni għat-tqegħid fis-suq multi li ma jaqbżux iż-0.5 % tal-qligħ tagħhom fil-Komunità fis-sena finanzjarja preċedenti fejn, b’mod intenzjonali jew negliġenti:

(a)	ma jkunux ikkonformaw ma’ miżura ta’ inkjesta adottata skond l-Artikolu 8(1);

(b)	ikunu pprovdew informazzjoni mhux korretta jew li tiżgwida bħala tweġiba għal miżura ta’ inkjesta adottata skond l-Artikolu 8(1);

(ċ)	ma jkunux ikkonformaw ma’ talba għal informazzjoni skond l-Artikolu 14;

(d)	ikunu pprovdew informazzjoni mhux korretta jew li tiżgwida bħala tweġiba għal talba għall-informazzjoni skond l-Artikolu 14.

2.   Fejn in-nuqqas ta’ kooperazzjoni tad-detentur ta’ l-awtorizzazzjoni għat-tqegħid fis-suq jibqa’ sejjer, il-Kummissjoni tista’, fid-deċiżjoni li tissemma fil-paragrafu 1, timponi ħlasijiet perjodiċi ta’ penalitajiet għal kull ġurnata li ma jaqbżux iż-0,5 % tal-qligħ medju ta’ kuljum tad-detentur ta’ l-awtorizzazzjoni għat-tqegħid fis-suq fil-Komunità fis-sena finanzjarja preċedenti.

Il-ħlasijiet perjodiċi ta’ penalitajiet jistgħu jiġu imposti għal perjodu li jiddekorri mid-data tan-notifikazzoni ta’ dik id-deċiżjoni sat-tmiem tan-nuqqas ta’ kooperazzjoni.

3.   Għall-fini tal-paragrafi 1 u 2, is-sena finanzjarja preċedenti tirreferi għas-sena finanzjarja li tippreċedi d-data tad-deċiżjoni li tissemma fil-paragrafu 1.

Artikolu 20

Il-proċedura

Meta l-Kummissjoni jkollha l-intenzjoni li tadotta deċiżjoni kif imsemmi fl-Artikolu 19(1), hija għandha l-ewwel tinnotifika bil-miktub lid-detentur ta’ l-awtorizzazzjoni għat-tqegħid fis-suq, filwaqt li tistabbilixxi limitu ta’ żmien stipulat sabiex id-detentur ta’ l-awtorizzazzjoni għat-tqegħid fis-suq ikun jista’ jressaq quddiem il-Kummissjoni l-osservazzjonijiet tiegħu bil-miktub. Dak il-limitu ta’ żmien għandu jkun ta’ mill-inqas erba’ ġimgħat.

Il-Kummissjoni m’għandhiex tkun obbligata li tikkunsidra l-osservazzjoni bil-miktub li tirċievi wara l-iskadenza ta’ dak il-limitu ta’ żmien.

KAPITOLU III

L-AĊĊESS GĦALL-FAJL, IR-RAPPREŻENTAZZJONI, IL-KUNFIDENZJALITÀ U D-DISPOŻIZZJONIJIET TEMPORALI

Artikolu 21

L-Aċċess għall-fajl

Wara n-notifika skond l-Artikolu 7, id-detentur ta’ l-awtorizzazzjoni għat-tqegħid fis-suq għandu jkollu d-dritt, fuq talba tiegħu, li jkollu aċċess għad-dokumenti u għall-materjal l-ieħor miġbur mill-Aġenzija u mill-Kummissjoni li jservu bħala prova ta’ l-allegat ksur.

Dokumenti miksuba permezz ta’ aċċess għall-fajl għandhom jintużaw biss għall-fini ta’ proċeduri ġudizzjarji jew amministrattivi għall-applikazzjoni ta’ dan ir-Regolament.

Artikolu 22

Ir-rappreżentazzjoni legali

Id-detentur ta’ l-awtorizzazzjoni għat-tqegħid fis-suq għandu jkollu d-dritt għal rappreżentazzjoni legali matul il-proċedura ta’ ksur.

Artikolu 23

Il-kunfidenzjalità u s-segretezza professjonali

1.   Mingħajr preġudizzju għall-iskambju u l-użu ta’ informazzjoni previst fl-Artikolu 3, proċedura f’każ ta’ ksur għandha titwettaq bla ħsara għall-prinċipji ta’ kunfidenzjalità u ta’ segretezza professjonali. L-Aġenzija u l-Kummissjoni, l-uffiċjali, l-impjegati u persuni oħra li jaħdmu taħt is-sorveljanza tagħhom m’għandhomx jiżvelaw informazzjoni miksuba jew skambjata minnhom skond dan ir-Regolament u informazzjoni tat-tip kopert mill-obbligu ta’ segretezza professjonali u l-kunfidenzjalità.

2.   Mingħajr preġudizzju għad-dritt ta’ l-aċċess għall-fajl tal-każ, id-detentur ta’ l-awtorizzazzjoni għat-tqegħid fis-suq m’għandux ikollu aċċess għal sigrieti tan-negozju, informazzjoni kunfidenzjali jew dokumenti interni miżmuma mill-Aġenzija, il-Kummissjoni jew xi Stat Membru.

3.   Kwalunkwe’ persuna li tressaq informazzjoni jew osservazzjonijiet skond l-Artikoli 8, 9, 12 jew 14 għandha b’mod ċar tidentifika kwalunkwe materjal meqjus bħala kunfidenzjali, billi tagħti raġunijiet, u tipprovdi verżjoni separata mhux kunfidenzjali tad-data stabbilita mill-Aġenzija jew mill-Kummissjoni.

4.   Mingħajr preġudizzju għall-paragrafu 3, l-Aġenzija u l-Kummissjoni jistgħu jitolbu lil persuni li jressqu informazzjoni jew osservazzjonijiet skond dan ir-Regolament biex jidentifikaw id-dokumenti jew partijiet mid-dokumenti li huma jikkunsidraw li fihom sigrieti tan-negozju jew informazzjoni kunfidenzjali oħra li tappartjeni lilhom.

L-Aġenzija u l-Kummissjoni jistgħu wkoll jitolbu lid-detenturi ta’ l-awtorizzazzjoni għat-tqegħid fis-suq u lil persuni oħra biex jidentifikaw kwalunkwe parti minn rapport ta’ l-Aġenzija, minn dikjarazzjoni ta’ oġġezzjonijiet jew minn deċiżjoni adottata mill-Kummissjoni li fil-fehma tagħhom tkun tinkludi sigrieti tan-negozju.

L-Aġenzija u l-Kummissjoni jistgħu jistabbilixxu limitu ta’ żmien stipulat li fih id-detentur ta’ l-awtorizzazzjoni għat-tqegħid fis-suq u persuni oħra għandhom:

(a)	jissostanzjaw it-talba tagħhom għall-kunfidenzjalità fir-rigward ta’ kull dokument individwali jew parti minn dokument, dikjarazzjoni jew parti minn dikjarazzjoni;

(b)	jipprovdu lill-Kummissjoni b’verżjoni mhux kunfidenzjali tad-dokumenti jew tad-dikjarazzjonijiet, li fihom is-siltiet kunfidenzjali jkunu mħassra;

(ċ)	jipprovdu deskrizzjoni konċiża ta’ kull parti mill-informazzjoni mħassra.

Il-limitu ta’ żmien imsemmi fit-tielet subparagrafu għandu jkun ta’ mill-inqas ġimagħtejn.

5.   Jekk id-detentur ta’ l-awtorizzazzjoni għat-tqegħid fis-suq jew persuni oħra jonqsu milli jkunu konformi mal-paragrafi 3 u 4, il-Kummissjoni tista’ tassumi li l-informazzjoni jew l-osservazzjonijiet konċernati ma jinkludux informazzjoni kunfidenzjali.

Artikolu 24

L-applikazzjoni tal-limiti ta’ żmien

1.   Il-limiti ta’ żmien stabbiliti f’dan ir-Regolament għandhom jiddekorru mill-ġurnata ta’ wara li tkun riċevuta komunikazzjoni jew li din titwassal bl-idejn.

Fil-każ ta’ komunikazzjoni mid-detentur ta’ l-awtorizzazzjoni għat-tqegħid fis-suq, għall-finijiet tal-limiti ta’ żmien stipulati ikun biżżejjed li l-komunikazzjoni tintbagħat bil-posta reġistrata qabel ma jkun skada l-limitu ta’ żmien rilevanti.

2.   Fejn il-limitu ta’ żmien ikun jiskadi s-Sibt, il-Ħadd jew f’festa pubblika, dan għandu jkun estiż sa tmiem il-ġurnata ta’ xogħol suċċessiva.

3.   Fl-iffissar tal-limiti ta’ żmien provduti fl-Artikoli 6, 8(1), 12(1) u 14(1), l-Aġenzija u l-Kummissjoni, skond x’ikun il-każ, għandhom iqisu kemm iż-żmien meħtieġ għall-preparazzjoni tas-sottomissjoni kif ukoll l-urġenza tal-każ.

4.   Fejn xieraq u fuq talba rraġunata magħmula qabel l-iskadenza tal-limitu ta’ żmien oriġinali, il-limiti ta’ żmien jistgħu jkunu estiżi.

Artikolu 25

Perjodi ta’ limitazzjoni għall-impożizzjoni ta’ penalitajiet finanzjarji

1.   Id-dritt tal-Kummissjoni li tadotta deċiżjoni li timponi piena finanzjarja skond l-Artikolu 16 għandu jiskadi wara ħames snin.

Fil-każ tal-penalitajiet finanzjarji provduti fl-Artikolu 19, id-dritt tal-Kummissjoni li tadotta deċiżjoni li timponi tali piena għandu jiskadi wara tliet snin.

Iż-żmien għandu jibda jiddekorri mill-ġurnata li fiha jitwettaq il-ksur. Madankollu, fil-każ ta’ ksur kontinwu u ripetut, iż-żmien għandu jibda jiddekorri mill-ġurnata li fiha jintemm l-ksur.

2.   Kwalunkwe azzjoni meħuda mill-Aġenzija jew mill-Kummissjoni għall-fini ta’ l-inkjesta jew ta’ proċediment ta’ ksur għandha tinterrompi l-perjodi ta’ limitazzjoni stabbiliti fil-paragrafu 1. Il-perjodu ta’ limitazzjoni għandu jiġi interrott b’effett mid-data li fiha tkun notifikata l-azzjoni lid-detentur ta’ l-awtorizzazzjoni għat-tqegħid fis-suq.

3.   Kull interruzzjoni għandha twassal biex iż-żmien jerġa’ jibda mill-bidu. Madankollu, il-perjodu ta’ limitazzjoni għandu jiskadi mhux aktar tard mill-jum li fih ikun għadda perjodu ekwivalenti għal darbtejn dak tal-perjodu ta’ limitazzjoni mingħajr ma l-Kummissjoni tkun imponiet piena finanzjarja. Il-perjodu għandu jkun estiż biż-żmien li matulu l-limitazzjoni tkun sospiża skond il-paragrafu 4.

4.   Il-perjodu ta’ limitazzjoni għall-irkupru ta’ penalitajiet finanzjarji għandu jkun sospiż għat-tul ta’ żmien li fih id-deċiżjoni tal-Kummissjoni tkun is-suġġett ta’ proċeduri pendenti quddiem il-Qorti tal-Ġustizzja tal-Komunitajiet Ewropej.

Artikolu 26

Il-perjodi ta’ limitazzjoni għall-ġbir tal-penalitajiet finanzjarji

1.   Id-dritt li tinbeda proċedura ta’ rkupru għandu jiskadi sena wara li d-deċiżjoni skond l-Artikolu 16 jew l-Artikolu 19 tkun saret finali.

2.   Il-perjodu ta’ limitazzjoni għall-irkupru tal-penalitajiet finanzjarji għandu jkun interrot minn kwalunkwe azzjoni tal-Kummissjoni jew ta’ xi Stat Membru, li jaġixxi fuq talba tal-Kummissjoni, maħsuba biex tinforza l-ħlas tal-piena.

3.   Kull interruzzjoni għandha terġa’ tibda d-dekorrenza taż-żmien mill-bidu.

4.   Il-perjodu ta’ limitazzjoni għall-infurzar tal-penalitajiet finanzjarji għandu jkun sospiż sakemm:

(a)	ikun permess żmien għall-ħlas;

(b)	ikun sospiż l-infurzar tal-ħlas skond deċiżjoni tal-Qorti tal-Ġustizzja tal-Komunitajiet Ewropej.

KAPITOLU IV

DISPOŻIZZJONIJIET FINALI

Artikolu 27

Dispożizzjoni tranżitorja

Fil-każ ta’ ksur li beda qabel id-dħul fis-seħħ tiegħu, dan ir-Regolament għandu japplika għall-parti tal-ksur li ssir wara dik id-data.

Artikolu 28

Id-dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

---

(1)  ĠU L 136, 30.4.2004, p. 1. Ir-Regolament kif emendat bir-Regolament (KE) Nru 1901/2006 (ĠU L 378, 27.12.2006, p. 1).

(2)  ĠU L 311, 28.11.2001, p. 1. Id-Direttiva kif emendata bid-Direttiva 2004/28/EC (OJ L 136, 30.4.2004, p. 58).

(3)  ĠU L 311, 28.11.2001, p. 67. Id-Direttiva kif emendata l-aħħar bir-Regolament (KE) Nru 1901/2006 (ĠU L 378, 27.12.2006, p. 1).

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/20

---

REGOLAMENT TAL-KUMMISSJONI (KE) Nru 659/2007

ta’ l-14 ta’ Ġunju 2007

li jiftaħ u jipprovdi għall-amministrazzjoni ta’ kwoti tariffarji għall-importazzjoni ta’ barrin, baqar u erieħ minbarra dawk għall-qtil, ta’ ċerti razez ta’ l-Alpi u tal-muntanji

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1254/1999 tas-17 ta’ Mejju 1999 dwar l-organizzazzjoni komuni tas-suq taċ-ċanga u l-vitella (1), u b’mod partikolari l-ewwel subparagrafu ta’ l-Artikolu 32(1) tiegħu,

Billi,

(1)	Fil-qafas ta’ l-Organizzazzjoni Dinjija tal-Kummerċ, il-Komunità impenjat ruħha li tiftaħ kwoti tariffarji għall-importazzjoni ta’ barrin, baqar u erieħ minbarra dawk għall-qtil, ta’ ċerti razez ta’ l-Alpi u tal-muntanji.

(2)	Huwa meħtieġ li jiġu stipulati regoli dettaljati għall-ftuħ u l-amministrazzjoni ta’ dawn il-kwoti tariffarji għall-importazzjoni għall-perjodu li jibda mill-1 ta’ Lulju sat-30 ta’ Ġunju tas-sena ta’ wara.

(3)

Skond l-Artikolu 29(1) tar-Regolament (KE) Nru 1254/1999, l-importazzjonijiet fil-Komunità għandhom ikunu soġġetti għal-liċenzji ta’ l-importazzjoni. Madankollu, huwa xieraq li dawn il-kwoti tariffarji għall-importazzjoni jkunu amministrati billi d-drittijiet ta’ l-importazzjoni jkunu attribwiti bħala l-ewwel pass u l-ħruġ ta’ liċenzji ta’ importazzjoni bħala t-tieni pass, kif stabbilit fl-Artikolu 6(3) tar-Regolament tal-Kummissjoni (KE) Nru 1301/2006 tal-31 ta’ Awwissu 2006 li jistabbilixxi r-regoli komuni dwar l-amministrazzjoni tal-kwoti tariffarji għall-importazzjoni ta’ prodotti agrikoli mmexxija minn sistema ta’ liċenzji ta’ importazzjoni (2). B’dan il-mod, l-operaturi li kisbu d-drittijiet ta’ l-importazzjoni għandhom ikunu kapaċi jiddeċiedu matul il-perjodu tal-kwota tariffarja għall-importazzjoni, il-waqt meta jixtiequ japplikaw għal liċenzji ta’ importazzjoni, fid-dawl tal-flussi reali tagħhom tal-kummerċ. F’kull każ, ir-Regolament (KE) Nru 1301/2006 jillimita l-perjodu tal-validità tal-liċenzji sa l-aħħar jum tal-perjodu tal-kwota tariffarja għall-importazzjoni.

(4)

Għandhom jiġu stipulati regoli dwar is-sottomissjoni ta’ l-applikazzjonijiet u l-informazzjoni li għandha tingħata fl-applikazzjonijiet u fil-liċenzji, fejn meħtieġ biż-żieda ta’ deroga jew permezz tagħha, minn ċerti dispożizzjonijiet tar-Regolament tal-Kummissjoni (KE) Nru 1445/95 tas-26 ta’ Ġunju 1995 dwar regoli għall-applikazzjoni ta’ liċenzji ta’ importazzjoni u ta’ esportazzjoni fis-settur tal-laħam taċ-ċanga u l-vitella u li jħassar ir-Regolament (KEE) Nru 2377/80 (3) u r-Regolament tal-Kummissjoni (KE) Nru 1291/2000 tad-9 ta’ Ġunju 2000 li jistabbilixxi regoli dettaljati komuni għall-applikazzjoni tas-sistema tal-liċenzji ta’ l-importazzjoni u ta’ l-esportazzjoni u ta’ ċertifikati ta’ iffissar bil-quddiem għal prodotti agrikoli (4).

(5)

Ir-Regolament (KE) Nru 1301/2006 jistabbilixxi b’mod partikolari d-dispożizzjonijiet dettaljati dwar l-applikazzjonijiet tad-drittijiet ta’ l-importazzjoni, l-istatus ta’ l-applikanti, u l-ħruġ ta’ liċenzji ta’ l-importazzjoni. Id-dispożizzjonijiet ta’ dak ir-Regolament għandhom japplikaw, mill-1 ta’ Lulju 2007, għal dawk il-liċenzji ta’ l-importazzjoni maħruġa skond dan ir-Regolament, mingħajr preġudizzju għall-kundizzjonijiet addizzjonali stipulati f’dan ir-Regolament.

(6)

Sabiex tiġi evitata l-ispekulazzjoni, il-kwantitajiet disponibbli fi ħdan il-kwoti tariffarji għall-importazzjoni għandhom isiru aċċessibbli għall-operaturi sabiex dawn ikunu jistgħu juru li huma ġenwinament jimpurtaw kwantitajiet ta’ skala sinifikanti minn pajjiżi terzi. Għalhekk, sabiex tkun żgurata ġestjoni effiċjenti, il-kummerċjanti kkonċernati għandhom ikunu meħtieġa li jkunu impurtaw minimu ta’ 25 annimal matul kull wieħed miż-żewġ perjodi ta’ referenza msemmija fl-Artikolu 5 tar-Regolament (KE) Nru 1301/2006, sakemm konsenja ta’ 25 annimal tista’ titqies bħala konsenja vijabbli kummerċjalment. Minbarra dan, għal raġunijiet amministrattivi, l-Istati Membri għandhom jitħallew jaċċettaw kopji ċċertifikati tad-dokumenti li jippruvaw l-eżistenza tal-kummerċ ma’ pajjiżi terzi.

(7)	Barra dan, għandha tiġi ffissata garanzija għad-drittijiet ta’ l-importazzjoni. Il-liċenzji ta’ l-importazzjoni m’għandhomx ikunu trasferibbli u l-liċenzji għandhom jinħarġu lill-kumerċjanti għal dawk il-kwantitajiet li għalihom kienu allokati drittijiet ta’ importazzjoni.

(8)

Sabiex l-operaturi jiġu obbligati japplikaw għal-liċenzji ta’ l-importazzjoni għad-drittijiet ta’ l-importazzjoni kollha allokati, għandu jiġi stabbilit li l-preżentazzjoni ta’ applikazzjoni għal liċenzja għall-kwantitajiet allokati tikkostitwixxi, fir-rigward tal-garanzija fuq id-drittijiet ta’ l-importazzjoni, rekwiżit primarju fi ħdan it-tifsira tar-Regolament tal-Kummissjoni (KEE) Nru 2220/85 tat-22 ta’ Lulju 1985 li jistabbilixxi r-regoli komuni dettaljati sabiex tiġi applikata s-sistema tal-garanziji għall-prodotti agrikoli (5).

(9)

L-Artikolu 82 tar-Regolament tal-Kunsill (KEE) Nru 2913/92 tat-12 ta’ Ottubru 1992 li jistabbilixxi l-Kodiċi Doganali tal-Komunità (6) jipprovdi għal sorveljanza tad-dwana fuq merkanzija rilaxxata għal moviment ħieles b’rata ta’ dazju ridotta skond l-użu aħħari tagħha. L-annimali impurtati skond il-kwoti tariffarji għall-importazzjoni li jipprovdi għalihom dan ir-Regolament għandhom ikunu monitorjati għal ċertu perjodu sabiex jiġi żgurat li ma jinqatlux matul dak il-perjodu.

(10)	Għal dan il-għan, għandha tkun iddepożitata garanzija, li l-ammont tagħha għandu jkopri d-differenza bejn id-dazju tat-Tariffa Komuni tad-Dwana (CCT) u d-dazju mnaqqas li jkun japplika fid-data tar-rilaxx għaċ-ċirkolazzjoni ħielsa ta’ l-annimali kkonċernati.

(11)

Għal raġunijiet ta’ ċarezza, ir-Regolament tal-Kummissjoni (KE) Nru 1081/1999 tas-26 ta’ Mejju 1999 jiftaħ u li jipprovdi għall-amministrazzjoni ta’ kwoti ta’ tariffi għal importazzjonijiet ta’ barrin, baqar u erieħ ta’ ċerti razez ta’ l-Alpi u tal-muntanji li jħassar ir-Regolament (KE) Nru 1012/98 u jimmodifika r-Regolament (KE) Nru 1143/98 (7) minbarra dawk għall-qtil, gћandu gћalhekk jiġi abrogat u ssostitwit b’Regolament ġdid mill-1 ta’ Lulju 2007.

(12)	Il-miżuri previsti f’dan ir-Regolament huma skond l-opinjoni tal-Kumitat tal-Ġestjoni taċ-Ċanga u l-Vitella,

ADOTTAT DAN IR-REGOLAMENT:

Artikolu 1

Il-kwoti ta’ tariffi għal importazzjonijiet ta’ barrin, baqar u erieħ ta’ ċerti razez ta’ l-Alpi u tal-muntanji minbarra dawk għall-qtil imsemmija fl-Anness I b’dan huma miftuħa kull sena għall-perjodu mill-1 ta’ Lulju sat-30 ta’ Ġunju tas-sena ta’ wara (‘il-perjodi ta’ kwoti ta’ tariffi għal importazzjonijiet’)

Il-kwoti tariffarji għandhom ikollhom in-numru ta’ l-ordni 09.4196 u 09.4197.

Artikolu 2

1.   Għall-għanijiet ta’ dan ir-Regolament, l-annimali kif hemm imsemmija fl-Artikolu 1 għandhom minbarra dawk għall-qtil, meta ma jinqatlux fi żmien erba’ xhur mid-data ta’ aċċettazzjoni tad-dikjarazzjoni ta’ ħruġ għal ċirkolazzjoni ħielsa.

Jistgħu jingħataw derogi f’każijiet li għalihom tkun ingħatat prova xierqa ta’ force majeure.

2.   Sabiex jikkwalifikaw għall-kwota ta’ tariffa għal importazzjoni koperta bin-numru ta’ l-ordni 09.4197, għandhom jiġu ppreżentati dawn id-dokumenti li ġejjin:

(a)	għal barrin: ċertifikat ta’ razza pura,

(b)	għall-baqar u l-erieħ: ċertifkat ta’ razza pura jew ċertifkat ta’ reġistrazzjoni f’reġistru tar-razza li jiċċertifika l-purità tar-razza.

Artikolu 3

1.   Il-kwoti tariffarji għall-importazzjoni msemmija fl-Anness I għandhom ikunu amministrati billi d-drittjiet ta’ l-importazzjoni jkunu attribwiti bħala l-ewwel pass u l-ħruġ tal-liċenzji ta’ l-importazzjoni bħala t-tieni pass.

2.   Għandhom japplikaw ir-Regolamenti (KE) Nru 1445/95, (KE) Nru 1291/2000 u (KE) Nru 1301/2006, għajr meta pprovdut xorta oħra f’dan ir-Regolament.

Artikolu 4

1.   Għall-għanijiet ta’ l-applikazzjoni ta’ l-Artikolu 5 tar-Regolament (KE) Nru 1301/2006, l-applikanti għandhom juru li impurtaw ta’ l-anqas 25 annimal koperti mill-kodiċi NM 0102 90 matul kull wieħed miż-żewġ perjodi ta’ referenza msemmija f’dak l-Artikolu.

L-Istati Membri jistgħu jaċċettaw bħala evidenza tal-kummerċ ma’ pajjiżi terzi kopji tad-dokumenti msemmija fit-tieni paragrafu ta’ l-Artikolu 5 tar-Regolament (KE) Nru 1301/2006, iċċertifikat kif xieraq mill-awtorità kompetenti għall-ħruġ.

2.   Kumpanija ffurmata mill-għaqda ta’ kumpaniji kull waħda b’importazzjoni ta’ referenza konformi mal-kwantità minima msemmija fil-paragrafu 1 ta’ dan l-Artikolu, tista’ tuża dawk l-importazzjonijiet ta’ referenza bħala evidenza ta’ kummerċ.

Artikolu 5

1.   L-applikazzjonijiet għal drittijiet ta’ l-importazzjoni għandhom jiġu ippreżentati mhux iktar tard mis-13:00, ħin ta’ Brussell, fl-20 ta’ Ġunju ta’ qabel il-perjodu tal-kwota tariffarja għall-importazzjoni.

2.   Garanzija ta’ EUR 3 għal kull ras relatata mad-drittijiet ta’ l-importazzjoni għandha tiġi ppreżentata lill-awtorità kompetenti flimkien ma’ l-applikazzjoni għad-drittijiet ta’ l-importazzjoni.

3.   Sa mhux aktar tard mill-16:00, ħin ta’ Brussell, fil-ħames jum ta’ ħidma wara tmiem il-perjodu għas-sottomissjoni ta’ l-applikazzjonijiet imsemmija f’paragrafu 1, l-Istati Membri għandhom jinnotifikaw lill-Kummissjoni dwar il-kwantitajiet totali li saret applikazzjoni għalihom għal kull numru ta’ ordni.

Artikolu 6

1.   Id-drittijiet ta’ l-importazzjoni għandhom jingħataw mis-seba’ u mhux aktar tard mis-sittax-il ġurnata ta’ ħidma wara tmiem il-perjodu għan-notifiki msemmija fl-Artikolu 5(3).

2.   Jekk l-applikazzjoni tal-koeffiċjent ta’ l-allokazzjoni msemmi fl-Artikolu 7(2) tar-Regolament (KE) Nru 1301/2006 tirriżulta f’inqas drittijiet ta’ l-importazzjoni għall-allokazzjoni milli tressqu applikazzjonijiet għalihom, il-garanzija ppreżentata skond l-Artikolu 5(2) ta’ dan ir-Regolament, għandha tkun irrilaxxata proporzjonalment mingħajr dewmien.

Artikolu 7

1.   Ir-rilaxx għaċ-ċirkolazzjoni ħielsa tal-kwantitajiet mogħtija skond il-kwoti msemmija fl-Anness I huma soġġetti għall-preżentazzjoni ta’ liċenzja ta’ l-importazzjoni.

2.   L-applikazzjonijiet għal-liċenzja ta’ l-importazzjoni għandhom ikopru l-kwantità totali allokata. Dan l-obbligu għandu jikkostitwixxi rekwiżit primarju skond it-tifsira ta’ l-Artikolu 20(2) tar-Regolament (KEE) Nru 2220/85.

Artikolu 8

1.   L-applikazzjonijiet għal-liċenzja ta’ l-importazzjoni għandhom jiġu ppreżentati biss ma’ l-Istat Membru fejn l-applikant applika u kiseb drittijiet ta’ l-importazzjoni li jaqgħu taħt il-kwoti msemmija fl-Anness I.

Kull ħruġ tal-liċenzja ta’ importazzjoni għandu jirriżulta fi tnaqqis li jikkorrispondi mad-drittijiet ta’ l-importazzjoni li nkisbu u l-garanzija ppreżentata skond l-Artikolu 5(2) għandha tkun rilaxxata b’mod proporzjonali mingħajr dewmien.

2.   Il-liċenzji ta’ l-importazzjoni għandhom jinħarġu f’isem l-operatur li jkun kiseb id-drittijiet ta’ l-importazzjoni.

3.   L-applikazzjonijiet għal-liċenzji ta’ importazzjoni u l-liċenzji ta’ importazzjoni għandu jkun fihom:

(a)	f’kaxxa 8, il-pajjiż ta’ l-oriġini;

(b)	fil-kaxxa 16, wieħed jew diversi kodiċijiet NM mogħtija fl-Anness I;

(c)	f’kaxxa 20, in-numru ta’ l-ordni tal-kwota u waħda mill-annotazzjonijiet elenkati fl-Anness II.

Artikolu 9

Permezz ta’ deroga mill-Artikolu 9(1) tar-Regolament (KE) Nru 1291/2000, id-drittijiet derivati mil-liċenzji ta’ importazzjoni maħruġa skond dan ir-Regolament m’għandhomx ikunu trasferibbli.

Artikolu 10

1.   L-annimali importati għandhom ikunu mmonitorjati skond l-Artikolu 82 tar-Regolament (KEE) Nru 2913/92 sabiex jiġi żgurat li ma jkunux maqtula fi żmien erba’ xhur mill-ħruġ tagħhom għaċ-ċirkolazzjoni ħielsa.

2.   Sabiex ikun żgurat li l-obbligu msemmi fil-paragrafu 1 li ma jinqatlux annimali importati jkun osservat u li dazji mhux imħallsa jkunu miġbura meta ma jkunx hemm konformità ma’ l-obbligu, l-importaturi għandhom jiddepożitaw garanzija ma’ l-awtoritajiet tad-dwana kompetenti. Il-garanzija għandha tkun daqs id-differenza bejn id-dazji tad-dwana preskritti fit-Tariffa Doganali Komuni u d-dazji msemmija fl-Anness I applikabbli fid-data tal-ħruġ tagħhom għaċ-ċirkolazzjoni ħielsa ta’ l-annimali in kwistjoni.

3.   Il-garanziji stipulati fil-paragrafu 2 għandhom jiġu rrilaxxati minnufih fejn tiġi ppreżentata prova lill-awtoritajiet tad-dwana konċernati li l-annimali:

(a)	ma nqatlux fi żmien l-erba’ xhur ta’ wara d-data tal-ħruġ tagħhom għaċ-ċirkolazzjoni ħielsa, jew

(b)	inqatlu f’dak il-perjodu għal raġunijiet ta’ force majeure jew għal raġunijiet ta’ saħħa jew li mietu minħabba mard jew minħabba inċident.

Artikolu 11

Ir-Regolament (KE) Nru 1081/1999 huwa rrevokat.

Artikolu 12

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali ta’ l-Unjoni Ewropea.

Madankollu, l-Artikolu 11 għandu japplika mill-1 ta’ Lulju 2007.

---

(1)  ĠU L 160, 26.6.1999, p. 21. Ir-Regolament kif emendat l-aħħar bir-Regolament (KE) Nru 1913/2005 (ĠU L 307, 25.11.2005, p. 2).

(2)  ĠU L 238, 1.9.2006, p. 13. Ir-Regolament kif emendat bir-Regolament (KE) Nru 289/2007 (ĠU L 78, 17.3.2007, p. 17).

(3)  ĠU L 143, 27.6.1995, p. 35. Ir-Regolament kif emendat l-aħħar bir-Regolament (KE) 586/2007 (ĠU L 139, 31.5.2007, p. 5).

(4)  ĠU L 152, 24.6.2000, p. 1. Ir-Regolament kif emendat l-aħħar bir-Regolament (KE) Nru 1913/2006 (ĠU L 365, 21.12.2006, p. 52).

(5)  ĠU L 205, 3.8.1985, p. 5. Ir-Regolament kif emendat l-aħħar bir-Regolament (KE) Nru 1913/2006.

(6)  ĠU L 302, 19.10.1992, p. 1. Ir-Regolament kif emendat l-aħħar bir-Regolament (KE) 1791/2006 (ĠU L 363, 20.12.2006, p. 1).

(7)  ĠU L 131, 27.5.1999, p. 15. Ir-Regolament kif l-aħħar emendat bir-Regolament (KE) Nru 1965/2006 (ĠU L 408, 30.12.2006, p. 26, ikkoreġut bil-ĠU L 47, 16.2.2007, p. 21).

---

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/26

---

REGOLAMENT TAL-KUMMISSJONI (KE) Nru 660/2007

ta' l-14 ta’ Ġunju 2007

li jistabbilixxi r-rifużjonijiet għall-esportazzjoni fis-settur tal-ħalib u l-prodotti tal-ħalib

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1255/1999 tas-17 ta' Mejju 1999 dwar l-organizzazzjoni komuni tas-suq tal-ħalib u tal-prodotti tal-ħalib (1), u partikolarment l-Artikolu 31(3) tiegħu,

Billi:

(1)	L-Artikolu 31(1) tar-Regolament (KE) Nru 1255/1999 jipprevedi li d-differenza bejn il-prezzijiet tal-prodotti msemmija fl-Artikolu 1 ta' dan ir-Regolament fis-suq dinji u dak tal-Komunità jistgħu jiġu koperti minn rifużjonijiet fuq l-esportazzjoni.

(2)	Fid-dawl tal-qagħda attwali tas-suq fis-settur tal-ħalib u l-prodotti tal-ħalib, ma għandhomx ikunu stabbiliti r-rifużjonijiet għall-esportazzjoni.

(3)	Il-Kumitat ta' Ġestjoni tal-Ħalib u l-Prodotti tal-Ħalib għadu ma ħariġx opinjoni fiż-żmien stabbilit mill-president tiegħu,

ADOTTAT DAN IR-REGOLAMENT:

Artikolu 1

Ir-rifużjonijiet għall-esportazzjoni previsti mill-Artikolu 31 tar-Regolament (KE) Nru 1255/1999 mhux se jingħataw għall-prodotti u bl-ammonti indikati fl-Anness ta' dan ir-Regolament.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 160, 26.6.1999, p. 48. Ir-Regolament kif emendat l-aħħar bir-Regolament (KE) Nru 1913/2005 (ĠU L 307, 25.11.2005, p. 2).

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/30

---

REGOLAMENT TAL-KUMMISSJONI (KE) NRU 661/2007

ta' l-14 ta’ Ġunju 2007

li ma jalloka l-ebda rifużjoni għall-esportazzjoni tal-butir fil-qafas tas-sejħa permanenti għall-offerti regolata bir-Regolament (KE) Nru 581/2004

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1255/1999 tas-17 ta' Mejju 1999 dwar l-organizzazzjoni komuni tas-suq tal-ħalib u tal-prodotti tal-ħalib (1), u partikolarment l-Artikolu 31(3), it-tielet inċiż tiegħu,

Billi:

(1)	Ir-Regolament tal-Kummissjoni (KE) Nru 581/2004 tas-26 ta’ Marzu 2004 li jiftaħ stedina permanenti għall-offerti dwar ir-rifużjoni ta’ l-esportazzjoni li tikkonċerna ċerti tipi ta' butir (2), jipprovdi proċedura għal sejħa permanenti għall-offerti.

(2)

Skond l-Artikolu 5(2) tar-Regolament tal-Kummissjoni (KE) Nru 580/2004 tas-26 ta' Marzu 2004, li jistabbilixxi l-proċedura għall-offerti li tikkonċerna r-rifużjonijiet għall-esportazzjoni ta’ ċerti prodotti tal-ħalib (3) u wara li ġew eżaminati l-offerti mressqa bi tweġiba għas-sejħa għall-offerti, jeħtieġ li ma tiġi allokata l-ebda rifużjoni għall-esportazzjoni għall-perjodu ta' sottomissjoni li jintemm fit-12 ta’ Ġunju 2007.

(3)	Il-Kumitat ta' Ġestjoni tal-ħalib u l-prodotti tal-ħalib għadu ma ħariġx opinjoni fiż-żmien stabbilit mill-president tiegħu,

ADOTTAT DAN IR-REGOLAMENT:

Artikolu 1

Fil-qafas tas-sejħa permanenti għall-offerti stabbilita bir-Regolament (KE) Nru 581/2004 għall-perjodu ta' sottomissjoni li jintemm fit-12 ta’ Ġunju 2007, l-ebda rifużjoni ma hija allokata għall-prodotti u għad-destinazzjonijiet imsemmija fl-Artikolu 1(1) tar-Regolament imsemmi.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 160, 26.6.1999, p. 48. Regolament kif emendat l-aħħar bir-Regolament tal-Kummissjoni (KE) Nru 1913/2005 (ĠU L 307, 25.11.2005, p. 2).

(2)  ĠU L 90, 27.3.2004, p. 64. Regolament kif emendat l-aħħar bir-Regolament (KE) Nru 276/2007 (ĠU L 76, 16.3.2007, p. 16).

(3)  ĠU L 90, 27.3.2004, p. 58. Regolament kif emendat l-aħħar bir-Regolament (KE) Nru 128/2007 (ĠU L 41, 13.2.2007, p. 6).

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/31

---

REGOLAMENT TAL-KUMMISSJONI (KE) Nru 662/2007

ta’ l-14 ta’ Ġunju 2007

li jiddefinixxi r-rifużjonijiet ta' l-esportazzjoni għaz-zokkor abjad u għaz-zokkor mhux ipproċessat esportat fl-istat naturali tiegħu

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 318/2006 ta' l-20 ta' Frar 2006 fuq organizzazzjoni komuni tas-swieq fis-settur taz-zokkor (1), u b'mod partikolari l-Artikolu 33(2), it-tieni inċiż, tiegħu;

Billi:

(1)	Skond l-Artikolu 32 tar-Regolament (KE) Nru 318/2006, id-differenza bejn il-prezzijiet għall-prodotti msemmija fl-Artikolu 1(1)(b) tar-Regolament imsemmi fis-suq dinji u f'dak tal-Komunità tista' tiġi koperta b'rifużjoni ta' l-esportazzjoni.

(2)	Fid-dawl tal-qagħda attwali tas-suq fis-settur taz-zokkor, jeħtieġ li jiġu definiti rifużjonijiet ta' l-esportazzjoni, f'konformità mar-regoli u ma' ċerti kriterji pprovduti fl-Artikoli 32 u 33 tar-Regolament (KE) Nru 318/2006.

(3)	L-ewwel inċiż ta' l-Artikolu 33(2) tar-Regolament (KE) Nru 318/2006 jipprovdi li r-rifużjonijiet jistgħu jkunu differenti skond id-destinazzjonijiet, meta dan ikun iġġustifikat mill-qagħda tas-suq dinji jew mill-esiġenzi speċifiċi ta' ċerti swieq.

(4)	Jistgħu jingħataw rifużjonijiet biss fuq prodotti li jkunu awtorizzati għall-moviment ħieles fil-Komunità u li jissodisfaw il-kundizzjonijiet tar-Regolament (KE) Nru 318/2006.

(5)	Il-miżuri pprovduti f'dan ir-Regolament huma konformi ma' l-opinjoni tal-Kumitat ta' Ġestjoni taz-zokkor,

ADOTTAT DAN IR-REGOLAMENT:

Artikolu 1

Il-prodotti li jgawdu minn rifużjonijiet ta' l-esportazzjoni pprovduti fl-Artikolu 32 tar-Regolament (KE) Nru 318/2006 u l-ammonti ta' dawn ir-rifużjonijiet huma definiti fl-Anness ma' dan ir-Regolament.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 58, 28.2.2006, p. 1. Regolament kif emendat l-aħħar mir-Regolament tal-Kummissjoni (KE) Nru 247/2007 (ĠU L 69, 9.3.2007, p. 3).

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/33

---

REGOLAMENT TAL-KUMMISSJONI (KE) Nru 663/2007

ta' l-14 ta’ Ġunju 2007

li jiffissa l-ammont massimu tar-rifużjoni għall-esportazzjoni taz-zokkor abjad fil-qafas tas-sejħa permanenti għall-offerti pprovduta mir-Regolament (KE) Nru 958/2006

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 318/2006 ta' l-20 ta' Frar 2006 fuq organizzazzjoni komuni tas-swieq fis-settur taz-zokkor (1), u b'mod partikolari l-Artikolu 33(2), it-tieni subparagrafu, u t-tielet subparagrafu, punt b) tiegħu,

Billi:

(1)	Ir-Regolament tal-Kummissjoni (KE) Nru 958/2006 tat-28 ta' Ġunju 2006 dwar sejħa miftuħa permanenti għall-offerti għas-sena tas-suq 2006/2007 għad-determinazzjoni ta' rifużjonijiet għall-esportazzjoni taz-zokkor abjad (2) jirrikjedi li jsiru sejħiet għall-offerti parzjali.

(2)

F'konformità ma' l-Artikolu 8(1) tar-Regolament (KE) Nru 958/2006, u wara eżami ta' l-offerti mressqa b'risposta għas-sejħa għall-offerti parzjali li tintemm fl-14 ta’ Ġunju 2007, jeħtieġ li jiġi ffissat ammont massimu għar-rifużjoni ta' l-esportazzjoni għas-sejħa għall-offerti parzjali kkonċernata.

(3)	Il-miżuri pprovduti f'dan ir-Regolament huma konformi ma' l-opinjoni tal-Kumitat ta' Ġestjoni taz-zokkor,

ADOTTAT DAN IR-REGOLAMENT:

Artikolu 1

Għas-sejħa għall-offerti parzjali li tintemm fl-14 ta’ Ġunju 2007, l-ammont massimu tar-rifużjoni ta' l-esportazzjoni għall-prodott imsemmi fl-Artikolu 1(1) tar-Regolament (KE) Nru 958/2006 huwa ffissat għal 38,778 EUR/100 kg.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 58, 28.2.2006, p. 1. Regolament kif l-aħħar emendat bir-Regolament (KE) Nru 247/2007 (ĠU L 69, 9.3.2007, p. 3).

(2)  ĠU L 175, 29.6.2006, p. 49. Ir-Regolament kif emendat bir-Regolament (KE) Nru 203/2007 (ĠU L 61, 28.2.2007, p. 3).

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/34

---

REGOLAMENT TAL-KUMMISSJONI (KE) Nru 664/2007

ta' l-14 ta’ Ġunju 2007

li jiffissa l-ammont massimu tar-rifużjoni għall-esportazzjoni taz-zokkor abjad fil-qafas tas-sejħa permanenti għall-offerti pprovduta mir-Regolament (KE) Nru 38/2007

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 318/2006 ta' l-20 ta' Frar 2006 fuq organizzazzjoni komuni tas-swieq fis-settur taz-zokkor (1), u b'mod partikolari l-Artikolu 33(2), it-tieni subparagrafu, u t-tielet subparagrafu, punt b) tiegħu,

Billi:

(1)

Ir-Regolament tal-Kummissjoni (KE) Nru 38/2007 tas-17 ta' Jannar 2007 li jiftaħ sejħa permanenti għall-offerti għall-bejgħ mill-ġdid għall-esportazzjoni taz-zokkor miżmum mill-aġenziji ta' l-intervent tal-Belġju, tar-Repubblika Ċeka, ta' Spanja, ta' l-Irlanda, ta' l-Italja, ta' l-Ungerija, tal-Polonja, tas-Slovakkja u ta' l-Iżvezja (2), jirrikjedi li jsiru sejħiet għall-offerti parzjali.

(2)

F'konformità ma' l-Artikolu 4(1) tar-Regolament (KE) Nru 38/2007, u wara eżami ta' l-offerti mressqa b'risposta għas-sejħa għall-offerti parzjali li tintemm fit-13 ta’ Ġunju 2007, jeħtieġ li jiġi ffissat ammont massimu għar-rifużjoni ta' l-esportazzjoni għas-sejħa għall-offerti parzjali kkonċernata.

(3)	Il-miżuri pprovduti f'dan ir-Regolament huma konformi ma' l-opinjoni tal-Kumitat ta' Ġestjoni taz-zokkor,

ADOTTAT DAN IR-REGOLAMENT:

Artikolu 1

Għas-sejħa għall-offerti parzjali li tintemm fit-13 ta’ Ġunju 2007, l-ammont massimu tar-rifużjoni ta' l-esportazzjoni għall-prodott imsemmi fl-Artikolu 1(1) tar-Regolament (KE) Nru 38/2007 huwa ffissat għal 435,00 EUR/tunnellata.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 58, 28.2.2006, p. 1. Ir-Regolament kif emendat bir-Regolament tal-Kummissjoni (KE) Nru 247/2007 (ĠU L 69, 9.3.2007, p. 3).

(2)  ĠU L 11, 18.1.2007, p. 4. Ir-Regolament kif emendat bir-Regolament (KE) Nru 203/2007 (ĠU L 61, 28.2.2006, p. 3).

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/35

---

REGOLAMENT TAL-KUMMISSJONI (KE) Nru 665/2007

ta' l-14 ta’ Ġunju 2007

li jemenda r-rati ta' rifużjoni applikabbli għal ċertu prodotti tal-ħalib esportati bħala prodotti mhux koperti minn Anness I tat-Trattat

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1255/1999 tas-17 ta’ Mejju 1999 dwar l-organizzazzjoni komuni tas-swieq tal-ħalib u s-settur tal-prodotti tal-ħalib (1), u b’mod partikolari l-Artikolu 31(3) tiegħu,

Billi:

(1)	Ir-rati tar-rifużjonijiet applikabbli mill-25 ta' Mejju 2007 għall-prodotti elenkati fl-Anness, esportati bħala prodotti mhux koperti minn Anness I tat-Trattat, kienu stipulati mir-Regolament tal-Kummissjoni (KE) Nru 570/2007 (2).

(2)	Mill-applikazzjoni tar-regoli u l-kriterji li jinsabu fir-Regolament (KE) Nru 570/2007 għall-informazzjoni bħalissa disponibbli lill-Kummissjoni jsegwi li r-rifużjonijiet ta’ l-esportazzjoni applikabbli bħalissa għandhom jiġu mmodifikati kif muri fl-Anness t’hawnhekk,

ADOTTAT DAN IR-REGOLAMENT:

Artikolu 1

Ir-rati ta’ rifużjoni stipulati mir-Regolament (KE) Nru 570/2007 huma permezz ta’ dan immodifikati kif muri fl-Anness t’hawnhekk.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 160, 26.6.1999, p. 48. Regolament kif emendat l-aħħar bir-Regolament tal-Kummissjoni (KE) Nru 1913/2005 (ĠU L 307, 25.11.2005, p. 2).

(2)  ĠU L 133, 25.5.2007, p. 18.

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/37

---

REGOLAMENT TAL-KUMMISSJONI (KE) Nru 666/2007

ta’ l-14 ta’ Ġunju 2007

li jemenda r-rati ta’ rifużjonijiet applikabbli għal ċerti prodotti mis-settur taz-zokkor esportati bħala merkanzija mhux koperti minn Anness I tat-Trattat

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 318/2006 ta' l-20 ta’ Frar 2006 dwar l-organizzazzjoni komuni tas-swieq fis-settur taz-zokkor (1), u b’mod partikolari l-Artikolu 33(2)(a) u (4) tiegħu,

Billi:

(1)	Ir-rati tar-rifużjonijiet applikabbli mill-25 ta' Mejju 2007 għall-prodotti li qegħdin imniżżla fl-Anness, esportati bħala merkanzija mhux koperti minn Anness I tat-Trattat, kienu stipulati mir-Regolament tal-Kummissjoni (KE) Nru 571/2007 (2).

(2)	Mill-applikazzjoni tar-regoli u l-kriterji li jinsabu fir-Regolament (KE) Nru 571/2007 għall-informazzjoni li hemm attwalment disponibbli għand il-Kummissjoni, isegwi li r-rifużjonijiet għall-esportazzjoni attwalment applikabbli għandhom jiġu modifikati kif muri f’dan l-Anness,

ADOTTAT DAN IR-REGOLAMENT:

Artikolu 1

Ir-rati ta’ rifużjonijiet stipulati mir-Regolament (KE) Nru 571/2007 huma għalhekk modifikati kif muri f’dan l-Anness.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 58, 28.2.2006, p. 1. Regolament kif emendat bir-Regolament tal-Kummissjoni (KE) Nru 247/2007 (ĠU L 69, 9.3.2007, p. 3).

(2)  ĠU L 133, 25.5.2007, p. 21.

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/39

---

REGOLAMENT TAL-KUMMISSJONI (KE) Nru 667/2007

ta’ l-14 ta’ Ġunju 2007

li jistipula r-rati tar-rifużjonijiet applikabbli għal ċertu ċereali u prodotti tar-ross esportati f’forma ta’ prodotti mhux koperti bl-Anness I tat-Trattat

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1784/2003 tad-29 ta’ Settembru 2003 dwar l-organizzazzjoni komuni tas-suq taċ-ċereali (1), b’mod partikolari l-Artikolu13(3) tiegħu,

Wara li kkunsidrat ir-Regolament tal-Kunsill (KE) Nru 1785/2003 tad-29 ta’ Settembru 2003 dwar l-organizzazzjoni komuni tas-suq tar-ross (2), b’mod partikolari l-Artikolu 14(3) tiegħu,

Billi:

(1)

L-Artikolu 13(1) tar-Regolament (KE) Nru 1784/2003 u Artikolu 14(1) tar-Regolament (KE) Nru 1785/2003 jipprovdu li d-differenza bejn kwotazzjonijiet jew prezzijiet fis-suq dinji għall-prodotti mniżżla fl-Artikolu 1 ta’ kull wieħed minn dawn ir-Regolamenti u l-prezzijiet fi ħdan il-Komunità jistgħu jiġi koperti b’rifużjoni ta’ l-esportazzjoni.

(2)

Ir-Regolament tal-Kummissjoni (KE) Nru 1043/2005 tat-30 Ġunju 2005 li jimplimenta r-Regolament tal-Kunsill (KE) Nru 3448/93 dwar is-sistema għall-għoti ta’ rifużjonijiet fuq l-esportazzjoni fuq ċerti prodotti agrikoli esportati bħala prodotti mhux koperti bl-Anness I tat-Trattat, u l-kriterji biex jiġi stipulat l-ammont ta’ dawn ir-rifużjonijiet (3), jispeċifikaw il-prodotti li għalihom trid tiġi stipulata rata ta’ rifużjoni, biex tiġi applikata fejn dawn il-prodotti jiġu esportati bħala prodotti elenkati fl-Anness III għar-Regolament (KE) Nru 1784/2003 jew fl-Anness IV tar-Regolament (KE) Nru 1785/2003 kif xieraq.

(3)	Bi qbil ma’ l-ewwel paragrafu ta’ l-Artikolu 14 tar-Regolament (KE) Nru 1043/2005 , ir-rata tar-rifużjoni għal kull 100 kilogramm għal kull wieħed mill-prodotti bażiċi inkwistjoni rid tiġi stipulata kull xahar.

(4)

L-obbligi li għandhom x’jaqsmu mar-rifużjonijiet li jistgħu jingħataw għall-esportazzjoni ta’ prodotti agrikoli li għandhom x’jaqsmu ma’ prodotti mhux koperti bl-Anness I għat-Trattat jistgħu jkunu fil-perikolu jekk jiġu stipulati bil-quddiem rati għoljin ta’ rifużjoni. Għalhekk huwa neċessarju li jittieħdu miżuri ta’ prekawzjoni f’sitwazzjonijiet bħal dawn mingħajr, madankollu, ma titfixkel il-konklużjoni tal-kuntratti tat-tul. L-istipular ta’ rata ta’ rifużjoni speċifika għall-istipular bil-quddiem tar-rifużjonijiet hija miżura biex jintlaħqu dawn l-oġġettivi varji.

(5)

Jekk jittieħed inkonsiderazzjoni il-ftehim bejn il-Komunità Ewropea u l-Istati Uniti ta’ l-Amerika fuq l-esportazzjoni komunitarja ta’ prodotti ta’ l-għaġin għall-Istati Uniti, approvata mid-Deċiżjoni tal-Kunsill 87/482/KEE (4), huwa meħtieg li tinħoloq differenza bejn ir-rifużjonijiet fuq prodotti li jaqgħu taħt kodiċi NM 1902 11 00 u 1902 19 skond id-destinazzjoni tagħhom.

(6)

Insegwitu għall-Artikolu 15(2) u (3) tar-Regolament (KE) Nru 1043/2005, rata mnaqqsa ta’ rifużjoni fuq l-esportazzjoni trid tiġi stipulata, billi tieħu inkonsiderazzjoni l-ammont tar-rifużjoni applikabbli, insegwitu għar-regolament tal-Kummissjoni (KEE) Nru 1722/93 (5), fuq il-prodott bażiku inkwistjoni, użat waqt il-perjodu assumat tal-manifattura tal-prodotti.

(7)

L-ispirti huma kkunsidrati inqas sensittivi għall-prezz taċ-ċereali użati fil-manifattura tagħhom. Madankollu, il-Protokoll 19 ta’ l-Att ta’ l-Adeżjoni tar-Renju Unit, l-Irlanda u d-Danimarka jipprovdi li l-miżuri neċessarji jridu jiġu deċiżi biex jiffaċilitaw l-użu taċ-ċereali tal-Komunità fil-manifattura ta’ l-ispirti miksuba miċ-ċereali. Għaldaqstant, huwa meħtieġ li tiġi adottata r-rata ta’ rifużjoni applikata għaċ-ċereali esportati bħala spirti.

(8)	Il-Kumitat ta' Ġestjoni taċ-ċereali għadu ma tax opinjoni fiż-żmien stabbilit mill-President tiegħu,

ADOTTAT DAN IR-REGOLAMENT:

Artikolu 1

Ir-rati tar-rifużjoni applikabbli għall-prodotti bażiċi elenkati fl-Anness A tar-Regolament (KE) Nru 1043/2005 u fl-Artikolu 1 tar-Regolament (KE) Nru 1784/2003 jew fl-Artikolu 1(1) tar-Regolament (KE) Nru 3072/95, u esportati f’forma ta’ prodotti elenkati fl-Anness III tar-Regolament (KE) Nru 1784/2003 jew fl-Anness B tar-Regolament (KE) Nru 3072/95 rispettivament, huma stipulati kif inhu maħsub fl-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fil-15 ta’ Ġunju 2007.

---

(1)  ĠU L 270, 21.10.2003, p. 78. Regolament kif emendat bir-Regolament tal-Kummissjoni (KE) Nru 1154/2005 (ĠU L 187, 19.7.2005, p. 11).

(2)  ĠU L 270, 21.10.2003, p 96. Regolament kif emendat bir-Regolament tal-Kummissjoni (KE) Nru 797/2006 (ĠU L 144, 31.5.2006, p. 1).

(3)  ĠU L 172, 5.7.2005, p. 24. Regolament kif emendat bir-Regolament tal-Kummissjoni (KE) Nru 447/2007 (ĠU L 106, 24.4.2007, p. 31).

(4)  ĠU L 275, 29.9.1987, p. 36.

(5)  ĠU L 159, 1.7.1993, p. 112. Regolament kif emendat l-aħħar bir-Regolament (KE) Nru 1584/2004 (ĠU L 280, 31.8.2004, p. 11).

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/43

---

REGOLAMENT TAL-KUMMISSJONI (KE) Nru 668/2007

ta' l-14 ta’ Ġunju 2007

li jiddefinixxi r-rifużjonijiet għall-esportazzjoni tal-ġuleppijiet u ċerti prodotti oħra fis-settur taz-zokkor esportati fl-istat naturali tagħhom

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 318/2006 ta' l-20 ta' Frar 2006 dwar l-organizzazzjoni komuni tas-swieq fis-settur taz-zokkor (1), u b'mod partikolari l-Artikolu 33(2), it-tieni inċiż tiegħu;

Billi:

(1)	Skond l-Artikolu 32 tar-Regolament (KE) Nru 318/2006, id-differenza bejn il-prezzijiet, għall-prodotti msemmija fl-Artikolu 1(1)(c)(d) u (g) ta' l-imsemmi Regolament, tas-suq dinji u dak Komunitarju tista' tiġi koperta b'rifużjoni għall-esportazzjoni.

(2)	Fid-dawl tal-qagħda attwali tas-suq fis-settur taz-zokkor, jeħtieġ li jiġu definiti r-rifużjonijiet għall-esportazzjoni, b'konformità mar-regoli u ma' ċerti kriterji stipulati fl-Artikoli 32 u 33 tar-Regolament (KE) Nru 318/2006.

(3)	L-ewwel inċiż ta' l-Artikolu 33(2) tar-Regolament (KE) Nru 318/2006 jipprovdi li r-rifużjonijiet jistgħu jkunu differenti skond id-destinazzjonijiet, meta dan ikun iġġustifikat minħabba l-qagħda tas-suq dinji jew il-ħtiġijiet speċifiċi ta' ċerti swieq.

(4)

Ir-rifużjonijiet jistgħu jingħataw biss fir-rigward tal-prodotti awtorizzati li jiċċirkolaw b'mod ħieles fil-Komunità u li jissodisfaw il-kondizzjonijiet tar-Regolament (KE) Nru 951/2006 tat-30 ta' Ġunju 2006 li jistipula regoli dettaljati għall-applikazzjoni tar-Regolament (KE) Nru 318/2006 f'dak li għandu x'jaqsam mal-kummerċ fis-settur taz-zokkor ma' pajjiżi terzi (2).

(5)

In-negozjati fil-qafas ta' l-arranġamenti Ewropej bejn il-Komunità Ewropea u r-Rumanija u l-Bulgarija għandhom l-għan partikolari li jilliberalizzaw il-kummerċ tal-prodotti rregolati mill-organizzazzjoni komuni tas-suq ikkonċernat. Jeħtieġ għalhekk li jitneħħew ir-rifużjonijiet għall-esportazzjoni għal dawn iż-żewġ pajjiżi.

(6)	Il-miżuri pprovduti f'dan ir-Regolament huma konformi ma' l-opinjoni tal-Kumitat ta' Ġestjoni taz-zokkor,

ADOTTAT DAN IR-REGOLAMENT:

Artikolu 1

1.   Il-prodotti li jgawdu mir-rifużjonjiet għall-esportazzjoni pprovduti fl-Artikolu 32 tar-Regolament (KE) Nru 318/2006 u l-ammonti ta' dawn ir-rifużjonijiet huma speċifikati fl-Anness għal dan ir-Regolament, peress li jissodisfaw il-kundizzjonijiet rikjesti fil-paragrafu 2 ta' dan l-Artikolu.

2.   Sabiex il-prodotti jkunu eleġibbli għal rifużjoni skond il-paragrafu 1, iridu jissodisfaw ir-rekwiżiti rilevanti, stipulati fl-Artikoli 3 u 4 tar-Regolament (KE) Nru 951/2006.

Artikolu 2

Dan ir-Regolament għandu jidħol fis-seħħ fil-15 ta’ Ġunju 2007.

---

(1)  ĠU L 58, 28.2.2006, p. 1. Regolament hekk kif emendat bir-Regolament tal-Kummissjoni (KE) Nru 247/2007 (ĠU L 69, 9.3.2007, p. 3).

(2)  ĠU L 178, 1.7.2006, p. 24. Ir-Regolament kif emendat bir-Regolament (KE) Nru 2031/2006 (ĠU L 414, 30.12.2006, p. 43).

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/45

---

REGOLAMENTTAL-KUMMISSJONI (KE) Nru 669/2007

ta’ l-14 ta’ Ġunju 2007

li jemenda r-Regolament (KE) Nru 195/2007 li jiftaħ ix-xiri tal-butir f’ċerti Stati Membri bejn l-1 ta’ Marzu u l-31 ta’ Awissu 2007

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunita’ Ewropea,

Wara li kkunsidrat ir-Regolament tal-Kunsill (KE) Nru 1255/1999 tas-17 ta’ Mejju 1999 dwar l-organizazzjoni komuni tas-suq tal-ħalib u tal-prodotti tal-ħalib (1),

Wara li kkunsidrat ir-Regolament tal-Kummissjoni (KE) Nru 2771/1999 tas-16 ta’ Diċembru 1999 dwar regoli dettaljati għall-applikazzjoni tar-Regolament tal-Kunsill (KE) Nru 1255/1999 f’dak li jikkonċerna l-miżuri ta’ intervent fis-suq tal-butir u tal-krema tal-ħalib (2), u b’mod partikolari l-Artikolu 2 tiegħu,

Billi:

(1)	Ir-Regolament tal-Kummissjoni (KE) Nru 195/2007 (3) stabbilixxa l-lista ta’ l-Istati Membri li fihom ix-xiri tal-butir infetaħ, b’konformità ma’ l-Artikolu 6(1) tar-Regolament (KE) Nru 1255/1999.

(2)

Skond l-aħħar informazzjoni mibgħuta mill-Portugall, il-Kummissjoni stabbiliet li l-prezzijiet tas-suq għall-butir kienu ugwali jew aktar mit-92 % tal-prezz ta’ l-intervent għal ġimgħatejn konsekuttivi. Għalhekk huwa meħtieġ li x-xiri ta’ l-intervent jiġi sospiż f’dak l-Istat Membru. Għaldaqstant il-Portugall, għandu jitneħħa mil-lista misjuba fir-Regolament (KE) Nru 195/2007.

(3)	Għaldaqstant jeħtieġ li r-Regolament (KE) Nru 195/2007 jiġi emendat kif ġej,

ADDOTAT DAN IR-REGOLAMENT:

Artikolu 1

L-Artikolu 1 tar-Regolament (KE) Nru 195/2007 huwa ssostitwit bit-test segwenti:

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  GU L 160, 26.6.1999, p. 48. Ir-Regolament kif emendat l-aħħar bir-Regolament (KE) Nru 1913/2005 (GU L 307, 25.11.2005, p. 2).

(2)  GU L 333, 24.12.1999, p. 11. Ir-Regolament kif emendat l-aħħar bir-Regolament (KE) Nru 2107/2005 (GU L 337, 22.12.2005, p. 20).

(3)  ĠU L 59, 27.2.2007, p. 62. Ir-Regolament kif emendat l-aħħar bir-Regolament (KE) Nru 354/2007 (GU L 90, 30.3.2007, p. 47).

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/46

---

REGOLAMENT TAL-KUMMISSJONI (KE) Nru 670/2007

ta’ l-14 ta’ Ġunju 2007

li jiffissa r-rifużjonijiet fuq l-esportazzjoni ta' prodotti pproċessati minn ċereali u ross

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1784/2003 tad-29 ta' Settembru 2003 dwar l-organizzazzjoni komuni tas-suq fiċ-ċereali (1), u partikolarment l-Artikolu 13(3) tiegħu,

Wara li kkunsidrat ir-Regolament tal-Kunsill (KE) Nru 1785/2003 tad-29 ta' Settembru 2003 dwar l-organizzazzjoni komuni tas-suq fir-ross (2), u partikolarment l-Artikolu 14(3) tiegħu,

Billi:

(1)

Skond l-Artikolu 13 tar-Regolament (KE) Nru 1784/2003 u l-Artikolu 14 tar-Regolament (KE) Nru 1785/2003, id-differenza bejn il-kwotazzjonijiet jew il-prezzijiet fuq is-suq dinji tal-prodotti msemmija fl-Artikolu 1 ta' dan ir-Regolament u l-prezzijiet ta' dawn il-prodotti fil-Komunità jistgħu jkunu koperti minn rifużjoni fuq l-esportazzjoni.

(2)

Skond l-Artikolu 14 tar-Regolament (KE) Nru 1785/2003, ir-rifużjonijiet għandhom jiġu ffissati billi jitqiesu s-sitwazzjoni u t-tendenzi tal-futur, minn naħa, id-disponibbiltà ta' ċereali, ross u ross miksur kif ukoll prezzhom fuq is-suq tal-Komunità u, min-naħa l-oħra, il-prezzijiet taċ-ċereali, ross, ross miksur u prodotti tas-suq taċ-ċereali fuq is-suq dinji. Skond dawn l-istess artikoli, huwa importanti wkoll li s-swieq taċ-ċereali u tar-ross jkunilhom garantit ekwilibriju u żvilupp naturali għal dak li għandu x'jaqsam ma' prezzijiet u kummerċ u, minbarra dan, li jitqies l-aspett ekonomiku ta' l-esportazzjonijiet proposti u li ma jkunx hemm tfixkil fis-suq tal-Komunità.

(3)	L-Artikolu 2 tar-Regolament tal-Kummissjoni (KE) Nru 1518/95 (3) dwar is-sistema ta' importazzjoni u ta' esportazzjoni ta' prodotti pproċessati miċ-ċereali u mir-ross, iddefinixxa l-kriterji speċfiċi li għandhom jitqiesu għall-kalkolu tar-rifużjoni għal dawn il-prodotti.

(4)

Ir-rifużjoni li għandha tingħata fir-rigward ta' ċerti prodotti pproċessati għandha tvarja skond il-kontenut ta' rmied, fibra nejja, tegument, proteini, xaħam u kontenut ta' lamtu tal-prodott individwali kkonċernat, dan il-kontenut jkun indikatur partikolarment tajjeb tal-kwantità ta' bażi effettivament inkorporata fil-prodott ipproċessat.

(5)

Fil-preżent, mhemmx bżonn li tiġi stabbilita rifużjoni fuq l-esportazzjoni għall-majokk u għeruq u tuberi tropikali oħra jew dqiq miksuba minnhom, meta tikkonsidra l-aspett ekonomiku ta' l-esportazzjoni proposta u b'mod partikolari in-natura u l-oriġini ta' dawn il-prodotti. Għal ċerti prodotti pproċessati abbażi ta' ċereali, il-parteċipazzjoni insinifikanti tal-Komunità fil-kummerċ dinji ma tagħmilhiex neċessarja li attwalment tiġi ffissata rifużjoni fuq l-esportazzjoni.

(6)	Is-sitwazzjoni tas-suq dinji u r-rekwiżiti speċifiċi ta' ċerti swieq jistgħu jeħtieġu li tkun varjata r-rifużjoni għal ċerti prodotti, skond għal fejn huma ddestinati.

(7)	Ir-rifużjoni għandha tiġi ffissata darba fix-xahar. Din tista' tinbidel matul dan il-perjodu.

(8)

Ċerti prodotti pproċessati mill-qamħirrum jistgħu jgħaddu minn trattament termiku u wara dan it-trattament tista' tingħata rifużjoni li ma tikkorrispondix mal-kwalità tal-prodott. Għalhekk, għandu jkun speċifikat li fuq dawk il-prodotti li jkollhom lamtu ġelatinizzat minn qabel, l-ebda rifużjoni fuq l-esportazzjoni ma għandha tingħata.

(9)	Il-Kumitat ta' Ġestjoni taċ-ċereali għadu ma tax opinjoni fiż-żmien stabbilit mill-President tiegħu,

ADOTTAT DAN IR-REGOLAMENT:

Artikolu 1

Ir-rifużjonijiet fuq l-esportazzjoni tal-prodotti msemmija fl-Artikolu 1 tar-Regolament (KE) Nru 1518/95 huma ffissati fl-Anness ta' dan ir-Regolament.

Artikolu 2

Dan ir-Regolament jidħol fis-seħħ fil-15 ta’ Ġunju 2007.

---

(1)  ĠU L 270, 21.10.2003, p. 78. Regolament emendat bir-Regolament tal-Kummissjoni (KE) Nru 1154/2005 (ĠU L 187, 19.7.2005, p. 11).

(2)  ĠU L 270, 21.10.2003, p. 96. Regolament emendat l-aħħar bir-Regolament tal-Kummissjoni (KE) Nru 1549/2004 (ĠU L 280, 31.8.2004, p. 13).

(3)  ĠU L 147, 30.6.1995, p. 55. Regolament emendat l-aħħar bir-Regolament (KE) Nru 2993/95 (ĠU L 312, 23.12.1995, p. 25).

---

---

15.6.2007

MT

Il-Ġurnal Uffiċjali ta’ l-Unjoni Ewropea

L 155/49

---

DIRETTIVA TAL-KUMMISSJONI 2007/34/KE

ta’ l-14 ta’ Ġunju 2007

li temenda, għall-għanijiet ta’ l-aġġustament tagħha għal progress tekniku, id-Direttiva tal-Kunsill 70/157/KEE fir-rigward tal-livell permissibbli ta’ ħoss u tas-sistema ta’ l-egżost tal-vetturi bil-mutur

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 70/156/KEE tas-6 ta’ Frar 1970 dwar l-approssimazzjoni tal-liġijiet ta’ l-Istati Membri li għandhom x’jaqsmu ma’ l-approvazzjoni tat-tip ta’ vetturi bil-mutur u l-karrijiet tagħhom (1), u partikolarment it-tieni inċiż ta’ l-Artikolu 13(2) tagħha,

Wara li kkunsidrat id-Direttiva tal-Kunsill 70/157/KEE relatata ma’ l-approssimazzjoni tal-liġijiet ta’ l-Istati Membri li jirigwardaw il-livell permissibbli tal-ħoss u tas-sistema ta’ l-egżost tal-vetturi bil-mutur (2), u b’mod partikolari l-Artikolu 3 tagħha,

Billi:

(1)

Id-Direttiva 70/157/KEE hija waħda mid-Direttivi separati fil-kuntest tal-proċedura ta’ l-approvazzjoni tat-tip tal-Komunità stipulata fid-Direttiva 70/156/KEE. Id-dispożizzjonijiet tad-Direttiva 70/156/KEE marbuta ma’ sistemi, komponenti u unitajiet tekniċi separati għall-vetturi għalhekk japplikaw għad-Direttiva 70/157/KEE.

(2)

Minn mindu daħlet fis-seħħ id-Direttiva 70/157/KEE tas-6 ta’ Frar 1970, il-limiti tal-ħoss għal vetturi bil-mutur tnaqqsu bosta drabi, l-aktar darba riċenti fl-1995. Dan l-aħħar tnaqqis ma kellux l-effetti mistennija u l-istudji sussegwenti wrew li l-metodu tal-kejl m’għadux jirrifletti l-imġiba reali tad-dinja tas-sewqan. Għalhekk meħtieġ li jiddaħħal ċiklu ġdid ta’ testijiet u li jitqarrbu l-kondizzjonijiet tas-sewqan għat-twettiq tat-test ta’ l-istorbju lejn l-operat reali tad-dinja tas-sewqan. Iċ-ċiklu ġdid ta’ testijiet jinsab fir-Regolament UN/ECE Nru 51, is-serje 02 ta’ emendi (3).

(3)

Matul perjodu tranżizzjonali, it-test attwali kif ukoll it-test ġdid għandhom jitwettqu għall-approvazzjoni tat-tip u r-riżultati taż-żewġ testijiet għandhom jiġu rrappurtati lill-Kummissjoni. Dan għandu jippermetti lill-Kummissjoni sabiex tikseb id-data meħtieġa għat-twaqqif tal-valuri xierqa tal-limiti għall-metodu ġdid ta’ kejl li għandu jieħu post il-protokoll eżistenti tat-test. Il-metodu attwali għandu jissokta jkun mitlub sabiex tinkiseb l-approvazzjoni tat-tip u l-metodu l-ġdid għandu jintuża għal għanijiet ta’ monitoraġġ. Wara l-perjodu tranżizzjonali, il-protokoll tat-test kif adattat għat-test il-ġdid għandu jsir l-uniku kejl mitlub sabiex tingħata l-approvazzjoni tat-tip.

(4)

Sabiex jittieħdu f’kunsiderazzjoni l-emendi l-aktar riċenti għar-Regolamenti UN/ECE Nri 51 u 59, li l-Komunità diġà saret parti tagħhom, huwa xieraq li tiġi adattata d-Direttiva 70/157/KEE għall-progress tekniku billi tiġi allinjata mar-rekwiżiti tekniċi ta’ dawn ir-regolamenti. Dan huwa importanti, b’mod partikolari, sabiex tinkiseb il-proċedura mandatorja ta’ monitoraġġ ta’ l-emissjonijiet ta’ l-istorbju tal-vetturi bil-mutur stipulata fir-Regolament UN/ECE Nru 51 għall-għanijiet ta’ l-approvazzjoni tat-tip. Jekk ma jseħħx dan, id-Direttiva taqa’ lura meta mqabbla mar-Regolament f’dak li għandu x’jaqsam ma’ l-avvanz tekniku.

(5)

Skond l-Artikolu 3 tad-Direttiva 70/157/KEE, il-miżuri previsti f’din id-Direttiva ma jbiddlux ir-rekwiżiti stipulati fil-punti 5.2.2.1 u 5.2.2.5 ta’ l-Anness I għad-Direttiva 70/157/KEE. F’dak li għandu x’jaqsam ma’ l-istruttura l-ġdida ta’ l-Annessi, jeħtieġ li jiġu adattati n-numerazzjoni u r-referenzi speċifikati f’dawn il-punti. Sabiex tiġi żgurata r-rabta mad-dispożizzjonijiet l-oħra tal-leġiżlazzjoni tal-Komunità, huwa xieraq ukoll li tiġi prevista korrelazzjoni bejn in-numerazzjoni attwali u dik ġdida.

(6)	Il-miżuri previsti f’din id-Direttiva huma skond l-opinjoni tal-Kumitat dwar Aġġustament għall-Progress Tekniku,

ADOTTAT DIN ID-DIRETTIVA:

Artikolu 1

1.   Id-Direttiva 70/157/KEE hija emendata kif ġej:

(a)	L-Anness I jinbidel bit-test stipulat fl-Anness I għal din id-Direttiva;

(b)	L-Anness II jinbidel bit-test stipulat fl-Anness II għal din id-Direttiva;

(c)	L-Anness III jinbidel bit-test stipulat fl-Anness III għal din id-Direttiva;

(d)	L-Anness IV huwa mħassar.

2.   Ir-referenzi għall-punti 5.2.2.1. u 5.2.2.5. ta’ l-Anness I għad-Direttiva 70/157/KEE għandhom jiġu interpretati bħala referenzi għall-punti 2.1 u 2.2 ta’ l-Anness I, kif mibdula b’din id-Direttiva.

Artikolu 2

B’effett mis-6 ta’ Lulju 2008 u sas-6 ta’ Lulju 2010 l-vettura li għandha tingħata approvazzjoni tat-tip għandha tkun soġġetta għat-test stipulat fl-Anness 10 tar-Regolament UN/ECE Nru 51 għal għanijiet ta’ monitoraġġ biss. Ir-riżultati ta’ dan it-test għandhom jiżdiedu mad-dokumenti stipulati fl-Appendiċi 1 u 2 ta’ l-Anness I għad-Direttiva 70/157/KEE kif emendata minn din id-Direttiva, b’konformità ma’ l-Anness 9 tar-Regolament UN/ECE Nru 51. L-Istat Membru kkonċernat għandu jibgħat tali dokumenti ta’ tagħrif lill-Kummissjoni. Dawn l-obbligi ma jaffettwawx każijiet ta’ estensjoni ta’ approvazzjonijiet eżistenti skond din id-Direttiva. Għall-għan ta’ din il-proċedura ta’ monitoraġġ vettura mhijiex meqjusa li hija tip ġdid jekk il-vettura hija differenti biss fir-rigward tal-paragrafi 2.2.1. u 2.2.2. tar-Regolament UN/ECE Nru 51.

Artikolu 3

1.   L-Istati Membri għandhom jadottaw u jippubblikaw, sal-5 ta’ Lulju 2008 l-aktar tard, il-liġijiet, ir-regolamenti, u d-dispożizzjonijiet amministrattivi meħtieġa sabiex jikkonformaw ma’ din id-Direttiva. Għandhom jikkomunikaw minnufih lill-Kummissjoni t-test ta’ dawk id-dispożizzjonijiet u t-tabella ta’ korrelazzjoni bejn dawk id-dispożizzjonijiet u din id-Direttiva.

Huma għandhom japplikaw dawk id-dispożizzjonijiet mis-6 ta’ Lulju 2008.

Meta l-Istati Membri jadottaw dawk id-dispożizzjonijiet, għandu jkollhom riferenza għal din id-Direttiva jew għandhom ikunu akkumpanjati b’tali referenza fl-okkażjoni tal-pubblikazzjoni uffiċjali tagħhom. L-istati Membri għandhom jistabbilixxu kif trid issir referenza tali.

2.   L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li jadottaw fil-qasam kopert minn din id-Direttiva.

Artikolu 4

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha fil-Ġurnal Uffiċjali ta’ l-Unjoni Ewropea.

Artikolu 5

Din id-Direttiva hija indirizzata lill-Istati Membri.

---

(1)  ĠU L 42, 23.2.1970, p. 1. Id-Direttiva kif emendata l-aħħar mid-Direttiva 2006/96/KE (ĠU L 363, 20.12.2006, p. 81).

(2)  ĠU L 42, 23.2.1970, p. 16. Id-Direttiva kif emendata l-aħħar bid-Direttiva 2006/96/KE.

(3)  ĠU L 137, 30.5.2007, p. 68.

---

---

---

---