FTEHIM

ta' Koperazzjoni Xjentifika u Teknoloġika bejn il-Komunità Ewropea u l-Gvern tar-Repubblika tal-Korea

IL-KOMUNITÀ EWROPEA

(minn hawn 'il quddiem “il-Komunità”) u

L-GVERN TAR-REPUBBLIKA TAL-KOREA

(minn hawn 'il quddiem “il-Korea”),

(minn hawn 'il quddiem imsemmija flimkien “il-Partijiet”);

JIKKUNSIDRAW li l-Komunità u l-Korea qed jaħdmu fuq attivitajiet ta' riċerka, ta' żvilupp teknoloġiku u ta' dimostrazzjoni f'għadd ta' oqsma ta' interess komuni, u konxji ta' l-espansjoni rapida tal-konoxxenza xjentifika u l-kontribut pożittiv ta' din ta' l-aħħar fil-promozzjoni tal-koperazzjoni bilaterali u internazzjonali;

XEWQANA li jwessgħu l-ambitu tal-koperazzjoni xjentifika u teknoloġika f'għadd ta' oqsma ta' interess komuni permezz tal-ħolqien ta' sħubija produttiva għal finijiet paċifiċi u benefiċċji reċiproċi;

JINNUTAW li koperazzjoni bħal din u l-applikazzjoni tar-riżultati tagħha sejrin jagħtu kontribut għall-iżvilupp ekonomiku u soċjali tal-Partijiet; kif ukoll

XEWQANA li jistabbilixxu qafas formali sabiex jimplimentaw l-attivitajiet globali ta' koperazzjoni li sejrin isaħħu l-koperazzjoni bejn il-Partijiet fix-“xjenza u teknoloġija”;

FTIEHMU KIF ĠEJ:

Artikolu 1

Għan u Prinċipji

1.   Il-Partijiet għandhom jinkoraġġixxu, jiżviluppaw u jiffaċilitaw attivitajiet ta' koperazzjoni taħt dan il-Ftehim fl-oqsma tax-xjenza u tat-teknoloġija għal finijiet paċifiċi, konformement ma' dan il-Ftehim u l-liġijiet u r-regolamenti taż-żewġ Partijiet.

2.   L-attivitajiet ta' koperazzjoni taħt dan il-Ftehim għandhom isiru abbżi tal-prinċipji li ġejjin:

(a)	Kontributi u benefiċċji reċiproċi u ekwi;

(b)	Aċċess reċiproku għall-programmi, proġetti u faċilitajiet ta' riċerka u żvilupp teknoloġiku ta' kull Parti min-naħa ta' riċerkaturi viżitanti tal-Parti l-oħra;

(ċ)	Skambju f'waqtu ta' informazzjoni li tista' tikkonċerna attivitajiet ta' koperazzjoni;

(d)	Il-promozzjoni ta' soċjetà msejsa fuq il-konoxxenza għall-benefiċċju ta' l-iżvilupp ekonomiku u soċjali tal-Partijiet; u

(e)	Il-protezzjoni tad-drittijiet tal-proprjetà intellettwali skond l-Anness II ma' dan il-Ftehim.

Artikolu 2

Definizzjonijiet

Għall-finijiet ta' dan il-Ftehim, l-espressjoni

1)	“attivitajiet diretti ta' koperazzjoni” tfisser attivitajiet diretti ta' koperazzjoni bejn il-Partijiet

2)

“attivitajiet indiretti ta' koperazzjoni” tfisser attivitajiet bejn entitajiet legali stabbiliti fil-Korea u fil-Komunità permezz tal-parteċipazzjoni ta' entitajiet legali Koreani fil-Programm Kwadru tal-Komunità skond l-Artikolu 166 tat-Trattat li jistabbilixxi l-Komunità Ewropea (minn hawn 'il quddiem “il-Programm Kwadru”) u l-parteċipazzjoni reċiproka ta' l-entitajiet legali stabbiliti fil-Komunità fi programmi jew proġetti Koreani ta' riċerka f'oqsma ta' xjenza u ta' teknoloġija simili għal dawk koperti mill-Programm Kwadru;

3)	“attivitajiet ta' koperazzjoni” tinkludi kemm attivitajiet diretti kif ukoll attivitajiet indiretti;

4)	“entità legali” tfisser kwalunkwe persuna fiżika jew ġuridika maħluqa skond il-liġi nazzjonali tal-post ta' l-istabbiliment tagħha jew skond il-liġi Komunitarja, li jkollha personalità ġuridika u li jkollha d-drittijiet u tkun suġġetta għal obbligi ta' kwalunkwe tip f'isimha stess.

Artikolu 3

Attivitajiet ta' koperazzjoni

1.   L-attivitajiet diretti ta' koperazzjoni taħt dan il-Ftehim jistgħu jinkludu:

(a)	Laqgħat ta' diversi forom, inklużi dawk bejn esperti, għad-diskussjoni u l-iskambju ta' l-informazzjoni dwar suġġetti xjentifiċi u teknoloġiċi ta' natura ġenerali jew speċifika, u għall-identifikazzjoni ta' proġetti u programmi ta' riċerka u żvilupp li jistgħu jsiru abbażi ta' koperazzjoni;

(b)	L-iskambju ta' informazzjoni dwar attivitajiet, linji politiċi, prattika, liġijiet u regolamenti dwar ir-riċerka u l-iżvilupp;

(ċ)	Żjajjar u skambji ta' xjenzati, staff tekniku u esperti oħra dwar suġġetti ġenerali jew speċifiċi;

(d)	L-implimentazzjoni ta' proġetti u programmi ta' koperazzjoni li jista' jiddeċiedi dwarhom il-Kumitat Konġunt imsemmi fl-Artikolu 6, skond il-liġijiet u r-regolamenti rispettivi tal-Partijiet; u

(e)	Forom oħra ta' attivitajiet fl-oqsma tax-xjenza u t-teknoloġija, li jista' jiddeċiedi dwarhom il-Kumitat Konġunt imsemmi fl-Artikolu 6, skond il-liġijiet u r-regolamenti rispettivi tal-Partijiet.

2.   Għall-fini ta' l-iżvilupp ta' attivitajiet indiretti ta' koperazzjoni, u suġġett għall-Annessi ma' dan il-Ftehim, kwalunkwe entità legali stabbilita fil-Korea jew fil-Komunità tista' tieħu sehem fi programmi jew proġetti ta' riċerka li toperahom il-Parti l-oħra u li jkunu miftuħa għall-entitajiet legali tagħha, skond il-liġijiet u r-regolamenti rispettivi tal-Partijiet.

Artikolu 4

Proċeduri ta' Implimentazzjoni

1.   Il-Partijiet jistgħu jikkonkludu bejniethom arranġamenti għall-implimentazzjoni li jistipulaw id-dettalji u l-proċeduri ta' l-attivitajiet ta' koperazzjoni taħt dan il-Ftehim.

2.   Kull Parti tista' tiddelega l-implimentazzjoni ta' attivitajiet ta' koperazzjoni xjentifika u teknoloġika tal-Partijiet lil istituzzjonijiet speċifiċi għall-implimentazzjoni diretta jew għall-appoġġ ta' l-attivitajiet ta' koperazzjoni xjentifika u teknoloġika bejn il-Partijiet.

3.   L-attivitajiet ta' koperazzjoni xjentifika u teknoloġika li ma jkunux imsejsa fuq ftehim speċifiċi li jkunu ġew inkoraġġiti, żviluppati u ffaċilitati mill-Partijiet, u li jkunu nbdew iżda ma ntemmux sad-data tad-dħul fis-seħħ ta' dan il-Ftehim, għandhom jiġu inkorporati f'dan il-Ftehim minn dik id-data.

Artikolu 5

Titjib tal-Koperazzjoni

1.   Kull Parti għandha tagħmel ħilitha sabiex tagħti lill-entitajiet legali li jwettqu attivitajiet ta' koperazzjoni taħt dan il-Ftehim il-faċilitajiet potenzjali kollha bil-għan li jiffaċilitaw ix-xogħol u ż-żjajjar tar-riċerkaturi li jieħdu sehem f'dawn l-attivitajiet ta' koperazzjoni, flimkien mad-dħul fit-territorju tagħha u l-ħruġ minnu ta' materjali, data u tagħmir maħsub għall-użu f'dawn l-attivitajiet ta' koperazzjoni.

2.   Fir-rigward ta' l-attivitajiet ta' koperazzjoni taħt dan il-Ftehim, il-Partijiet jistgħu jippermettu, jekk ikun il-każ u għal finijiet paċifiċi, il-parteċipazzjoni ta' riċerkaturi u organizzazzjonijiet mis-setturi kollha tar-riċerka, inkluż is-settur privat.

Artikolu 6

Kumitat Konġunt

1.   Il-koordinazzjoni u l-faċilitazzjoni ta' l-attivitajiet ta' koperazzjoni taħt dan il-Ftehim għandhom isiru, f'isem il-Korea, mill-Ministeri tal-Korea responsabbli għax-Xjenza u t-Teknoloġija, u f'isem il-Komunità, mis-servizzi tal-Kummissjoni tal-Komunitajiet Ewropej (id-Direttorat Ġenerali għax-Xjenza, ir-Riċerka u l-Iżvilupp), li għandhom jaġixxu bħala aġenti eżekuttivi.

2.   Sabiex tiġi żgurata l-implimentazzjoni effikaċi ta' dan il-Ftehim, l-aġenti eżekuttivi għandhom jistabbilixxu Kumitat Konġunt ta' Koperazzjoni Xjentifika u Teknoloġika (minn hawn 'il quddiem “il-Kumitat Konġunt”). Il-Kumitat Konġunt għandu jkun magħmul minn rappreżentanti uffiċjali ta' kull Parti, u jkun taħt il-presidenza konġunta ta' rappreżentanti taż-żewġ Partijiet. Il-Kumitat Konġunt għandu jistabbilixxi r-regoli ta' proċedura tiegħu bi qbil komuni.

3.   Il-funzjonijiet tal-Kumitat Konġunt għandhom ikunu:

1)	L-iskambju ta' fehmiet u tagħrif dwar kwistjonijiet tal-politika xjentifika u teknoloġika;

2)	Ir-reviżjoni u d-diskussjoni ta' l-attivitajiet u l-kisbiet tal-koperazzjoni taħt dan il-Ftehim;

3)	Il-ħruġ ta' rakkomandazzjonijiet lill-Partijiet rigward l-implimentazzjoni ta' dan il-Ftehim, li jistgħu jinkludu l-identifikazzjoni u l-proposta ta' l-attivitajiet ta' koperazzjoni taħt dan il-Ftehim u l-inkoraġġiment ta' l-implimentazzjoni tagħhom;

4)	It-tħejjija, għall-Partijiet, ta' rapport dwar l-istatus, il-kisbiet u l-effikaċja ta' l-attivitajiet ta' koperazzjoni taħt dan il-Ftehim. Dan ir-rapport għandu jintbagħat lill-Kumitat Konġunt bejn l-UE u l-Korea taħt il-Ftehim Kwadru għall-Kummerċ u l-Koperazzjoni.

4.   Id-Deċiżjonijiet tal-Kumitat Konġunt għandhom jintlaħqu bi qbil komuni.

5.   L-ispejjeż tal-parteċipanti fil-laqgħat tal-Kumitat Konġunt, bħall-ispejjeż ta' l-ivvjaġġar u ta' l-alloġġ, għandhom jitħallsu mill-Partijiet rispettivi. Kwalunkwe spiża oħra assoċjata ma' dawn il-laqgħat għandhom jitħallsu mill-Parti ospitanti.

6.   Il-Kumitat Konġunt għandu jiltaqa' b'alternanza fil-Korea u fil-Komunità, fi żminijiet miftiehma bi qbil komuni, preferibbilment kull sena.

Artikolu 7

Finanzjament

1.   L-implimentazzjoni ta' dan il-Ftehim għandha tkun suġġetta għad-disponibbiltà ta fondi approprjati u għal-liġijiet u r-regolamenti applikabbli ta' kull Parti.

2.   L-ispejjeż ta' l-attivitajiet ta' koperazzjoni taħt dan il-Ftehim għandhom jitħallsu skond deċiżjonijiet bi qbil komuni.

3.   Meta skemi speċifiċi ta' koperazzjoni ta' Parti waħda jagħtu appoġġ finanzjarju lill-parteċipanti mill-Parti l-oħra, kwalunkwe għotja u kwalunkwe kontribut finanzjajru jew divers minn Parti waħda lill-parteċipanti tal-Parti l-oħra b'appoġġ għal dawk l-attivitajiet għandu jingħata eżenzjoni mit-taxxa u mid-dwana skond il-liġijiet u r-regolamenti relevanti fis-seħħ fit-territorji ta' kull Parti, fiż-żmien li jsiru tali għotjiet u kontributi finanzjajri jew diversi.

Artikolu 8

Id-Drittijiet ta' l-Informazzjoni u tal-Proprjetà Intellettwali

1.   L-informazzjoni xjentifika u teknoloġika li ma tkun proprjetà ta' ħadd u li toħroġ minn attivitajiet ta' koooperazzjoni diretta tista' titqiegħed għad-dispożizzjoni tal-pubbliku min-naħa ta' kwalunkwe Parti, permezz tal-kanali abitwali u skond il-proċeduri ġenerali tagħha.

2.   Id-drittijiet tal-proprjetà intellettwali u d-drittijiet oħra tal-proprjetà li jinħalqu jew jiġu introdotti matul l-attivitajiet ta' koooperazzjoni taħt dan il-Ftehim għandhom jiġu ttrattati konformement mad-dispożizzjonijiet ta' l-Anness II ma' dan il-Ftehim.

Artikolu 9

Applikazzjoni Territorjali

Dan il-Ftehim għandu japplika, minn naħa waħda, għat-territorji li fihom japplika t-Trattat li jistabbilixxi l-Komunità Ewropea u skond il-kundizzjonijiet stabbiliti f'dak it-Trattat, u, min-naħa l-oħra, fit-Territorju tal-Korea. Dan ma għandux iżomm milli jsiru attivitajiet ta' koperazzjoni fl-ibħra internazzjonali, fl-ispazju, jew fit-territorju ta' pajjiżi terzi, skond il-liġi internazzjonali.

Artikolu 10

Riżoluzzjoni ta' Disputi

1.   Id-dispożizzjonijiet ta' dan il-Ftehim għandhom ikunu bla ħsara għad-drittijiet u l-obbligi ta' ftehim eżistenti u/jew futuri dwar il-koperazzjoni bejn il-Partijiet jew bejn il-Gvernijiet ta' kwalunkwe Stat Membru tal-Komunità u l-Gvern tal-Korea.

2.   Il-kwistjonijiet jew disputi kollha dwar l-interpretazzjoni jew l-implimentazzjoni ta' dan il-Ftehim għandhom jiġu riżolti permezz ta' konsultazzjoni bejn il-Partijiet.

Artikolu 11

Annessi

L-Anness I (dwar it-termini u l-kundizzjonijiet tal-parteċipazzjoni) u II (dwar id-drittijiet tal-proprjetà intellettwali) jikkostitwixxu parti integranti minn dan il-Ftehim.

Artikolu 12

Dħul fis-Seħħ u Terminazzjoni

1.   Dan il-ftehim għandu jidħol fis-seħħ fid-data li fiha l-Partijiet jiskambjaw noti diplomatiċi li permezz tagħhom jgħarrfu lil xulxin bit-tlestija tal-proċeduri interni rispettivi tagħhom li jkunu meħtieġa għad-dħul fis-seħħ ta' dan il-Ftehim.

2.   Dan il-Ftehim għandu jibqa' fis-seħħ għal ħames snin, u jibqa' fis-seħħ wara dik id-data sakemm ma jiġix terminat minn Parti jew l-oħra.

3.   Fi tmiem il-perjodu inizjali ta' ħames snin, jew fi kwalunkwe waqt ieħor warajh, dan il-Ftehim jista' jiġi terminat permezz ta' l-għoti lill-Parti l-oħra ta' notifika bil-miktub, talanqas sitt xhur minn qabel.

4.   Kull Parti tista' tevalwa l-impatt u l-attivitajiet ta' dan il-Ftehim kull ħames snin. Kull Parti għandha tagħmel ħilitha kollha sabiex tiffaċilita l-evalwazzjoni li tkun qed issir mill-Parti l-oħra, u l-Parti li tagħmel l-evalwazzjoni għandha tgħarraf lill-Parti l-oħra bir-riżultati ta' l-evalwazzjoni.

5.   Dan il-Ftehim jista' jiġi emendat bil-qbil komuni tal-Partijiet, permezz ta' l-iskambju ta' noti diplomatiċi. L-emendi għandhom jidħlu fis-seħħ bl-użu ta' l-istess proċedura msemmija fil-paragrafu 1, sakemm il-Partijiet ma jiftehmux mod ieħor.

6.   It-terminazzjoni ta' dan il-Ftehim għandu jkun mingħajr ħsara la għall-attivitajiet ta' koperazzjoni li jkunu nbdew taħt dan il-Ftehim u li ma jkunux waslu għal tmiemhom fil-waqt tat-terminazzjoni ta' dan il-ftehim, u lanqas għal kwalunkwe dritt jew obbligu speċifiċi maħluqa konformement ma' l-Annessi tal-Ftehim.