Opinjoni tal-Kumitat Ekonomiku u Soċjali Ewropew

Proposta għal Regolament tal-Kunsill li jistabbilixxi l-istrument ta’ Azzjoni għas-Sigurtà tal-Ewropa (SAFE) permezz tat-tisħiħ tal-industrija tad-difiża Ewropea

(COM(2025) 122 final)

(C/2025/5156)

Relatur:

Maurizio MENSI

Korelatur:

Jan PIE

Konsulenti	Alberto DAL FERRO (konsulent għar-relatur, Grupp III) Vassilis THEODOSOPOULOS (konsulent għall-korelatur, Kategorija 1)
Konsultazzjoni	KE, 13.5.2025
Bażi legali	Artikoli 114 u 304 tat-Trattat dwar il-Funzjonament tal-Unjoni Ewropea
Dokumenti tal-Kummissjoni Ewropea	COM(2025) 122 final
Għanijiet ta’ Żvilupp Sostenibbli (SDGs) rilevanti	SDG 9 — Industrija, innovazzjoni u infrastruttura SDG 16 — Paċi, ġustizzja u istituzzjonijiet b’saħħithom
Sezzjoni kompetenti	Kummissjoni Konsultattiva dwar il-Bidliet Industrijali (CCMI)
Adozzjoni fis-sezzjoni	10.7.2025
Adozzjoni fis-sessjoni plenarja	16.7.2025
Sessjoni plenarja Nru	598
Riżultat tal-votazzjoni (favur/kontra/astensjonijiet)	180/5/7

1. RAKKOMANDAZZJONIJIET

Il-Kumitat Ekonomiku u Soċjali Ewropew (KESE)

1.1

jenfasizza li l-implimentazzjoni tal-istrument ta’ Azzjoni għas-Sigurtà tal-Ewropa (“SAFE”) irid ikun iggwidat mill-prinċipji minquxa fit-Trattat dwar l-Unjoni Ewropea, u permezz tiegħu l-UE għandha tikkontribwixxi wkoll għall-paċi, is-sigurtà u l-protezzjoni taċ-ċittadini tagħha, kif ukoll għar-rispett tal-prinċipji tal-Karta tan-Nazzjonijiet Uniti;

1.2	jenfasizza li l-istrument SAFE għandu jikkontribwixxi biex jiżdied l-investiment fil-Bażi Industrijali u Teknoloġika tad-Difiża Ewropea (EDTIB) u biex jitnaqqsu d-dipendenzi, sabiex jissaħħu l-libertà ta’ azzjoni u s-sigurtà tal-provvista tal-Ewropa f’dan il-qasam;

1.3

jirrakkomanda li l-Istati Membri b’mod urġenti jagħmlu użu massimu mis-SAFE, f’konformità mas-sitwazzjonijiet finanzjarji rispettivi tagħhom u b’mod koordinat, u jqisu l-finanzjament attraenti tiegħu u l-faċilitazzjonijiet li jakkumpanjawh, kif ukoll li l-investimenti fil-kuntest tal-istrument SAFE (eż. għall-mobbiltà militari) jistgħu jikkontribwixxu wkoll għall-kompetittività u l-objettivi ċivili;

1.4	jisħaq fuq l-importanza li l-investiment jiġi ffukat fuq il-ħtiġijiet ta’ kapaċità ewlenin identifikati, fi ħdan qafas tal-UE, mill-Istati Membri u li dan l-investiment jiġi orjentat lejn l-EDTIB;

1.5	jissottolinja l-ħtieġa li jiġu indirizzati l-ħtiġijiet urġenti tal-Istati Membri u fl-istess ħin jissaħħu wkoll l-prontezza tad-difiża tal-UE u l-kompetittività tal-EDTIB u li tiġi ssalvagwardjata l-libertà ta’ azzjoni futura tal-Istati Membri;

1.6

jappoġġja bil-qawwa li l-prinċipju ta’ preferenza Ewropea jiġi inkorporat fl-istrument (eż. fil-każ ta’ sottoskrizzjoni żejda), u li jiġi rifless fir-rekwiżit għal grad sostanzjali ta’ kontenut tal-UE u, għal prodotti kumplessi (kategorija 2), anke l-kapaċità li jiddeċiedu, mingħajr restrizzjonijiet minn pajjiżi terzi, dwar id-definizzjoni, l-adattament u l-evoluzzjoni tad-disinn tal-prodott (il-prinċipju tal-“awtorità tad-disinn”); u jissuġġerixxi li, għal prodotti inqas kumplessi (kategorija 1) li għalihom il-kwistjoni tal-awtorità tad-disinn tkun rilevanti, jiġu pprovduti inċentivi għall-akkwist ta’ prodotti fejn din l-awtorità tkun fl-Ewropa;

1.7	jiddispjaċih li l-missili, il-protezzjoni tal-infrastruttura kritika u ċ-ċibernetika mhumiex inklużi bħala prodotti tal-kategorija 2, li għalihom l-awtorità tad-disinn għandha tkun fl-Ewropa;

1.8

jisħaq li l-parteċipazzjoni fl-istrument SAFE minn pajjiżi mhux tal-UE — u l-industriji rispettivi tagħhom — apparti l-Ukrajna u l-pajjiżi taż-ŻEE-EFTA, trid tkun miftuħa biss għal imsieħba tal-istess fehma li ffirmaw “sħubija għas-sigurtà u d-difiża” mal-UE, u li kwalunkwe parteċipazzjoni minn industriji ta’ pajjiżi terzi ma għandhiex iddgħajjef l-objettiv ewlieni tal-istrument, jiġifieri t-tisħiħ tal-EDTIB u t-tnaqqis tad-dipendenzi minn fornituri mhux Ewropej;

1.9

jilqa’ l-inklużjoni a priori kemm tan-Norveġja kif ukoll tal-Ukrajna u l-industriji rispettivi tagħhom f’akkwisti komuni fil-kuntest tal-istrument SAFE, kif ukoll l-iffirmar tas-Sħubija għas-Sigurtà u d-Difiża bejn l-UE u r-Renju Unit, li ser tippermetti l-parteċipazzjoni tar-Renju Unit fl-akkwist komuni fil-kuntest tal-istrument SAFE;

1.10	jissottolinja li l-istrument SAFE għandu jservi bħala punt tat-tluq għall-mobilizzazzjoni ta’ riżorsi addizzjonali u jistieden lill-Istati Membri jieħdu azzjoni urġenti f’dan ir-rigward.

2. NOTI TA’ SPJEGAZZJONI

Argumenti b’appoġġ għar-rakkomandazzjoni 1.1

2.1.

Il-paċi u s-sigurtà huma l-pedamenti li jippermettu lill-UE tirrispetta l-valuri ewlenin tagħha — il-libertà, id-demokrazija, id-drittijiet tal-bniedem, u l-istat tad-dritt — u fl-istess ħin tigura l-istabbiltà, il-prosperità u l-benesseri taċ-ċittadini tagħha. Mingħajrhom, il-progress fil-ġustizzja, l-iżvilupp ekonomiku u l-koeżjoni soċjali jkun impossibbli.

2.2.

Illum, l-UE qed tiffaċċja xenarju ġeopolitiku drammatikalment deterjorat hekk kif il-gwerra tar-Russja fl-Ukrajna tpoġġi f’dubju l-arkitettura tas-sigurtà tal-kontinent u tesponi vulnerabbiltajiet fl-arkitettura tad-difiża tagħha. Fl-istess ħin, l-Istati Uniti qed jaċċelleraw it-tbegħid strateġiku tagħhom mill-impenji transatlantiċi tradizzjonali, u dan iġiegħel lin-nazzjonijiet Ewropej jikkunsidraw mill-ġdid id-dipendenza tagħhom mit-tmexxija tal-Istati Uniti u jaċċelleraw l-isforzi lejn awtonomija strateġika akbar.

2.3.

F’dan l-isfond, l-inizjattivi tal-UE dwar l-industrija tad-difiża jridu jsaħħu b’mod urġenti l-kapaċità tal-UE u tal-Istati Membri tagħha li jissalvagwardjaw il-paċi u s-sigurtà. Fl-istess ħin, inizjattivi bħal dawn għandhom jevitaw il-militarizzazzjoni u jkunu parti minn approċċ olistiku għas-sigurtà u r-reżiljenza li jintegra l-komponenti industrijali, teknoloġiċi u tas-soċjetà flimkien mal-kapaċità militari.

Argumenti b’appoġġ għar-rakkomandazzjoni 1.2

2.4.

Din l-Opinjoni tas-CCMI bdiet titfassal ftit wara li l-KESE rċieva l-konsultazzjoni għar-Regolament SAFE. Meta l-abbozz ġie ffinalizzat, ir-Regolament kien diġà ġie adottat mill-Kunsill. Għalhekk, l-enfasi tal-Opinjoni mxiet lejn il-passi li jmiss fl-implimentazzjoni tal-istrument SAFE. Dawn huma mifhuma li jinkludu l-espressjoni ta’ interess mill-Istati Membri biex jibbenefikaw minn self mill-istrument SAFE (sal-aħħar ta’ Lulju 2025), is-sottomissjoni (sal-aħħar ta’ Novembru 2025) u l-valutazzjoni tat-talbiet tal-Istati Membri għal assistenza finanzjarja u l-pjani rispettivi ta’ investiment, l-iffirmar ta’ ftehimiet ta’ self, u l-iżborż tas-self (sal-aħħar ta’ Diċembru 2030).

2.5.

L-objettiv ġenerali tal-istrument SAFE, bħala parti mill-pakkett dwar il-prontezza tad-difiża għall-2030, għandu jkun li tissaħħaħ il-prontezza tad-difiża tal-UE u tal-Istati Membri tagħha. Dan jeħtieġ it-tisħiħ tas-sigurtà tal-provvista u l-libertà ta’ azzjoni, jiġifieri l-kapaċità li l-forzi armati Ewropej jiġu pprovduti b’mod affidabbli bit-tagħmir li jeħtieġu, b’mod partikolari fi żmien ta’ gwerra, u fl-istess ħin jiġi żgurat li dan it-tagħmir ikun jista’ jintuża kollu kemm hu kif meħtieġ.

2.6.

Il-prontezza tad-difiża ma tistax tkun limitata għas-sempliċi pussess ta’ ċertu tagħmir. B’mod kruċjali, teħtieġ ukoll il-kapaċità li żżomm, issewwi u, fi żminijiet ta’ kunflitt, tipproduċi/tissostitwixxi tali tagħmir bl-ammont u l-veloċità mitluba; il-kapaċità u l-libertà li timmodifikah u taġġornah, kif meħtieġ; u l-libertà li tużah u, meta adegwat, tittrasferixxih lill-alleati u lill-imsieħba mingħajr restrizzjonijiet bla bżonn. Din il-kapaċità u l-libertà jistgħu jiġu żgurati biss permezz ta’ industrija tad-difiża indiġena robusta u innovattiva li tkun kapaċi tiżviluppa, timmanifattura u ssostni l-ispettru sħiħ tal-prodotti meħtieġa.

2.7.

Sabiex tissaħħaħ il-prontezza tad-difiża fl-UE, l-istrument SAFE għalhekk irid irawwem investiment akbar fl-EDTIB, u jgħin sabiex jitnaqqsu d-dipendenzi minn fornituri minn pajjiżi terzi li forsi ma jkunux jistgħu jfornu b’mod affidabbli lill-forzi armati Ewropej, jew ikunu lesti biss li jagħmlu dan b’termini li jkunu ta’ detriment għall-interessi Ewropej.

Argumenti b’appoġġ għar-rakkomandazzjoni 1.3

2.8.

Il-Kunsill Ewropew enfasizza l-ħtieġa li tkompli tiżdied b’mod sostanzjali n-nefqa fuq is-sigurtà u d-difiża tal-Ewropa. Madankollu, diversi Stati Membri jiffaċċjaw restrizzjonijiet fiskali li jillimitaw il-kapaċità tagħhom li jagħmlu dan, waqt li l-kostijiet tas-self għoljin u mhux uniformi jkomplu jikkumplikaw dawn l-isforzi u jirriskjaw li jsaħħu d-disparitajiet strutturali fl-prontezza tad-difiża madwar l-UE.

2.9.

F’dan l-isfond, l-Istati Membri għandhom b’mod urġenti jieħdu vantaġġ sħiħ mill-istrument SAFE. Permezz tal-kundizzjonijiet attraenti ta’ finanzjament u l-faċilitajiet li jakkumpanjawh, l-istrument joffri mekkaniżmu li jappoġġja lill-Istati Membri, b’mod partikolari dawk bi spazju fiskali aktar limitat, biex jipparteċipaw f’akkwist konġunt fil-qasam tad-difiża. Dan jista’ jikkontribwixxi għal kontribut kondiviż għall-kapaċitajiet tad-difiża tal-Ewropa, u fl-istess ħin tiġi żgurata s-sostenibbiltà fit-tul tal-investimenti fis-settur tad-difiża. Fl-istess ħin, għandu jiġi enfasizzat li l-investimenti f’ċerti oqsma ta’ kapaċità deżinjati jistgħu jikkontribwixxu wkoll għall-objettivi ċivili (eż. l-investiment fl-infrastruttura tat-trasport b’użu doppju u l-assi taħt il-mobbiltà militari jistgħu jindirizzaw l-isfidi relatati mal-mobbiltà transfruntiera b’mod aktar wiesa’).

Argumenti b’appoġġ għar-rakkomandazzjoni 1.4

2.10.

L-iffukar tal-investiment fis-settur tad-difiża fl-UE fuq il-ħtiġijiet ewlenin tal-kapaċitajiet, identifikati b’mod kollettiv mill-Istati Membri, jiżgura li r-riżorsi skarsi jiġu allokati b’mod koerenti, konsistenti u mingħajr duplikazzjoni u ineffiċjenzi bla bżonn biex jiġu indirizzati l-aktar ħtiġijiet tas-sigurtà komuni u l-prijoritajiet strateġiċi urġenti.

2.11.

L-orjentazzjoni ta’ dan l-investiment lejn l-EDTIB ser jiġġenera benefiċċji sostanzjali għall-gvernijiet, il-forzi armati u s-soċjetajiet Ewropej, inkluż lil hinn mill-mument attwali. B’mod partikolari, dan ser iżid il-kompetittività, il-produzzjoni u l-kapaċità tal-innovazzjoni tal-EDTIB, u b’hekk jittejbu s-sigurtà tal-provvista, l-awtonomija teknoloġika u l-libertà tal-azzjoni, kif ukoll ikun hemm kontribut għall-impjiegi, il-ħiliet u d-dħul mit-taxxa.

Argumenti b’appoġġ għar-rakkomandazzjoni 1.5

2.12.

Minħabba għexieren ta’ snin ta’ nuqqas ta’ investiment fid-difiża, l-EDTIB illum jaf ma tkunx kapaċi tissodisfa bis-sħiħ il-ħtiġijiet kollha tal-forzi armati tal-Ewropa bir-ritmu jew bil-volumi meħtieġa. Minħabba l-ħtieġa urġenti li tissaħħaħ il-kapaċità tad-difiża fl-UE fl-istess ħin li tkompli tiġi appoġġjata l-Ukrajna, xi materjal meħtieġ fuq perjodu qasir jista’ jkollu jinkiseb barra mill-pajjiż.

2.13.

L-indirizzar tal-ħtiġijiet fuq perjodu qasir, madankollu, m’għandux jimmina l-objettiv maqbul li tissaħħaħ il-prontezza tal-EDTIB u l-libertà ta’ azzjoni tal-Ewropa fit-tul. Dan ikun il-każ speċjalment jekk prodotti avvanzati u kumplessi (kategorija 2) jiġu akkwistati barra mill-pajjiż, minħabba l-importanza strateġika tagħhom, is-sofistikazzjoni teknoloġika, u l-ħajja twila fis-servizz. Id-distinzjoni bejn dawn il-prodotti, minn naħa, u l-oġġetti konsumabbli jew inqas kumplessi (kategorija 1), min-naħa l-oħra, kif ukoll it-tfassil tal-kriterji ta’ eliġibbiltà għal kull kategorija, tagħmilha possibbli li jinstab bilanċ bejn iż-żewġ imperattivi.

Argumenti b’appoġġ għar-Rakkomandazzjoni 1.6

2.14.

Sabiex jiġi żgurat li l-investimenti taħt l-istrument SAFE jiġu, kemm jista’ jkun, orjentati lejn l-EDTIB, huwa essenzjali li jiġi applikat il-prinċipju tal-preferenza Ewropea li jinsab fir-Regolament. Dan japplika mhux biss għall-kumpaniji (il-post u l-kontroll), iżda wkoll għall-prodotti akkwistati.

2.15.

Fir-rigward tal-prodotti, livell sostanzjali ta’ kontenut magħmul fl-UE huwa r-rekwiżit bażi, biex jiġi żgurat li sehem sinifikanti tal-valur ġenerali joriġina mill-EDTIB.

2.16.

Għall-prodotti tal-kategorija 2, minħabba n-natura strateġika tagħhom, huwa essenzjali li jkun hemm awtorità Ewropea tad-disinn bħala rekwiżit addizzjonali, jiġifieri l-kapaċità li tiddeċiedi, mingħajr restrizzjonijiet imposti minn pajjiżi terzi jew entitajiet ta’ pajjiżi terzi, dwar id-definizzjoni, l-adattament u l-evoluzzjoni tad-disinn tal-prodott. Dan huwa partikolarment importanti biex jiġi żgurat li, jekk ikun meħtieġ, il-manifatturi Ewropej ikollhom id-dritt li jissostitwixxu komponenti minn pajjiżi terzi li jistgħu jillimitaw il-libertà tal-utenti Ewropej li joperaw jew jittrasferixxu t-tagħmir tagħhom kif jeħtieġu.

2.17.

Fir-rigward tal-prodotti tal-kategorija 1, in-nuqqas ta’ rekwiżit tal-awtorità tad-disinn jista’ jipprovdi lill-Istati Membri bil-flessibbiltà biex jissodisfaw id-domanda urġenti. Fl-istess ħin, għandu jsir kull sforz biex jiġu akkwistati prodotti li għalihom l-awtorità tad-disinn tkun f’idejn Ewropej. Il-KESE jiddispjaċih li l-istrument SAFE ma jipprovdix inċentivi, bħal kundizzjonijiet ta’ finanzjament imtejba, biex jitħeġġu sforzi bħal dawn.

Argumenti b’appoġġ għar-Rakkomandazzjoni 1.7

2.18.

Il-missili jikkostitwixxu kapaċità militari kritika u strateġikament importanti, kif muri mill-gwerra li għaddejja fl-Ukrajna. Il-protezzjoni tal-infrastruttura kritika u s-soluzzjonijiet ċibernetiċi jinvolvu prodotti kumplessi u mhux konsumabbli li huma vitali għas-sigurtà u r-reżiljenza tal-infrastrutturi, tas-sistemi u tad-data militari u ċivili. Għalhekk huma vitali għall-istabbiltà u r-reżiljenza tas-soċjetajiet, l-ekonomiji u l-istituzzjonijiet tagħna, kif ukoll biex jippermettu azzjoni militari effettiva fl-oqsma kollha. Għalhekk, kellhom jiġu kklassifikati taħt il-kategorija 2, sabiex l-awtorità tad-disinn għal prodotti bħal dawn tkun ukoll fl-Ewropa, biex tkun tista’ tadattahom skont il-ħtiġijiet u t-teknoloġiji li qed jevolvu u biex tissostitwixxi komponenti problematiċi minn pajjiżi terzi, jekk ikun meħtieġ.

Argumenti b’appoġġ għar-Rakkomandazzjoni 1.8

2.19.

Il-KESE jilqa’ l-flessibbiltà dwar l-għadd u l-kategoriji ta’ pajjiżi parteċipanti fl-akkwist komuni, kif ukoll il-ftuħ lejn pajjiżi terzi. Il-kooperazzjoni ma’ msieħba tal-istess fehma tista’ tkun ta’ benefiċċju reċiproku, peress li tista’ tikkontribwixxi għall-aggregazzjoni tad-domanda, l-interoperabbiltà, l-ekonomiji ta’ skala, u l-investiment fl-EDTIB.

2.20.

Fl-istess ħin, huma biss il-pajjiżi li ma jiksrux l-interessi tad-difiża u tas-sigurtà tal-UE jew tal-Istati Membri tagħha, u li huma allinjati mill-qrib mal-valuri tal-UE u l-politika estera, ta’ sigurtà u ta’ difiża komuni tagħha, li għandhom jibbenefikaw mill-parteċipazzjoni f’din l-inizjattiva.

2.21.

Għalkemm il-parteċipazzjoni ta’ pajjiżi terzi tal-istess fehma fl-akkwist konġunt tista’ tkun ta’ benefiċċju jekk tkun konformi mal-interessi tas-sigurtà tal-UE u tal-Istati Membri tagħha, il-parteċipazzjoni tal-industriji ta’ dawn il-pajjiżi f’attivitajiet iffinanzjati mill-istrument SAFE tista’ timmina l-kompetittività tal-EDTIB, u b’hekk l-objettiv ewlieni tal-istrument, jekk ma jiġix ġestit bir-reqqa. Bħala tali, il-parteċipazzjoni industrijali ta’ pajjiżi terzi għandha tkun strutturata b’mod li jissalvagwardja l-interessi industrijali Ewropej.

Argumenti b’appoġġ għar-Rakkomandazzjoni 1.9

2.22.

In-Norveġja hija sieħeb strateġiku tal-UE, minħabba l-prossimità ġeografika tagħha, l-industrija avvanzata tad-difiża, u l-impenn kondiviż tagħha għas-sigurtà Ewropea. Diġà huwa sieħeb sħiħ fil-programmi tad-difiża tal-UE u jikkontribwixxi għalihom. L-Ukrajna hija kandidat għall-adeżjoni li s-sigurtà tagħha hija strettament interkonnessa ma’ dik tal-UE u li ser tibqa’ fuq quddiem nett tad-difiża Ewropea għall-futur prevedibbli. L-industrija tad-difiża reżiljenti u innovattiva tagħha tista’ tikkontribwixxi wkoll b’mod sinifikanti għall-kompetittività u l-istat ta’ preparatezza tad-difiża tal-Ewropa. Il-parteċipazzjoni, b’mod awtomatiku, taż-żewġ pajjiżi u l-industriji rispettivi tagħhom f’akkwisti komuni taħt l-istrument SAFE hija għalhekk strateġikament kruċjali.

2.23.

L-UE u r-Renju Unit jikkondividu l-istorja, il-valuri u l-istituzzjonijiet demokratiċi, kif ukoll l-interessi ġeopolitiċi u tas-sigurtà li huma marbuta mill-qrib. Hekk kif l-Ewropa tassumi dejjem aktar ir-responsabbiltà għad-difiża tagħha stess, l-UE u r-Renju Unit ser ikollhom jingħaqdu flimkien biex jilħqu l-għanijiet komuni tagħhom. Dan jinkludi l-bini ta’ bażi industrijali tad-difiża li kapaċi tiżviluppa u tipproduċi l-ispettru sħiħ ta’ kapaċitajiet u li fl-istess ħin tnaqqas ukoll id-dipendenza mill-Istati Uniti. Is-Sħubija għas-Sigurtà u d-Difiża ffirmata dan l-aħħar bejn l-UE u r-Renju Unit tippermetti l-parteċipazzjoni tar-Renju Unit fl-akkwist komuni fil-kuntest tal-istrument SAFE u tista’ tiġġenera benefiċċji reċiproċi sostanzjali f’termini ta’ finanzjament, aggregazzjoni tad-domanda u interoperabbiltà.

Argumenti b’appoġġ għar-rakkomandazzjoni 1.10

2.24.

Minkejja li l-istrument SAFE għandu baġit sostanzjali, il-ħtiġijiet ta’ prontezza tal-UE u tal-Istati Membri tagħha huma stmati li huma konsiderevolment akbar. Minħabba l-ambjent mhux favorevoli ta’ sigurtà, dawn il-ħtiġijiet iridu jiġu indirizzati b’mod urġenti, b’mod partikolari għall-Istati Membri direttament esposti għal theddid militari. Għalhekk, x’aktarx li tkun meħtieġa aktar azzjoni fil-livell tal-UE f’dan ir-rigward.

2.25.

Sabiex tiġi promossa s-solidarjetà Ewropea u jiġu żgurati l-effiċjenza u l-effettività fl-allokazzjoni tar-riżorsi skarsi li jridu jappoġġjaw l-objettivi varji kollha tal-UE, ir-riżorsi addizzjonali mobilizzati fil-livell tal-UE fil-qasam tad-difiża għandhom jibnu fuq l-approċċ tal-istrument SAFE u l-prinċipji ta’ investiment “flimkien u fl-Ewropa” biex jiġu ssodisfati l-ħtiġijiet kondiviżi. Għal inizjattivi futuri, għandha tiġi kkunsidrata wkoll il-possibbiltà ta’ finanzjament permezz ta’ għotjiet, fejn adegwat.

Brussell, is-16 ta’ Lulju 2025.

Il-President

tal-Kumitat Ekonomiku u Soċjali Ewropew

Oliver RÖPKE