RAKKOMANDAZZJONI TAL-BANK ĊENTRALI EWROPEW

tas-16 ta’ Lulju 2021

lill-Kunsill tal-Unjoni Ewropea dwar l-awdituri esterni ta’ Banka Slovenije

(BĊE/2021/28)

(2021/C 299/01)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra l-Istatut tas-Sistema Ewropea ta’ Banek Ċentrali u tal-Bank Ċentrali Ewropew, u b’mod partikolari l-Artikolu 27.1 tiegħu,

Billi:

(1)	Il-kontijiet tal-Bank Ċentrali Ewropew (BĊE) u tal-banek ċentrali nazzjonali tal-Istati Membri li l-munita tagħhom hija l-euro huma vverifikati minn awdituri esterni indipendenti rrakkomandati mill-Kunsill Governattiv tal-BĊE u approvati mill-Kunsill tal-Unjoni Ewropea.

(2)	Il-mandat tal-awdituri esterni attwali tal-Banka Slovenije, Ernst & Young revizija, poslovno svetovanje, d.o.o., intemm wara l-verifika għas-sena finanzjarja 2020. Huwa għalhekk meħtieġ li jinħatru awdituri esterni mis-sena finanzjarja 2021 ’il quddiem.

(3)	Banka Slovenije għażel lil PricewaterhouseCoopers, podjetje za revizijo in druge finančno računovodske storitve, d. o. o. bħala l-awdituri esterni tiegħu għas-snin finanzjarji 2021 sa 2023,

ADOTTA DIN IR-RAKKOMANDAZZJONI:

Huwa rrakkomandat illi PricewaterhouseCoopers, podjetje za revizijo in druge finančno računovodske storitve, d. o. o. għandhom jinħatru bħala l-awdituri esterni ta’ Banka Slovenije għas-snin finanzjarji 2021 sa 2023.

RAKKOMANDAZZJONI TAL-BANK ĊENTRALI EWROPEW

tas-16 ta’ Lulju 2021

lill-Kunsill tal-Unjoni Ewropea dwar l-awdituri esterni tal-Banco de España

(BĊE/2021/29)

(2021/C 299/02)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra l-Istatut tas-Sistema Ewropea ta’ Banek Ċentrali u tal-Bank Ċentrali Ewropew, u b’mod partikolari l-Artikolu 27.1 tiegħu,

Billi:

(1)	Il-kontijiet tal-Bank Ċentrali Ewropew (BĊE) u tal-banek ċentrali nazzjonali tal-Istati Membri li l-munita tagħhom hija l-euro huma vverifikati minn awdituri esterni indipendenti rrakkomandati mill-Kunsill Governattiv tal-BĊE u approvati mill-Kunsill tal-Unjoni Ewropea.

(2)

Fl-2018, il-Banco de España għażel lil Mazars Auditores, S.L.P. - Mazars, S.A. bħala l-awdituri esterni tiegħu għas-snin finanzjarji 2018 sa 2020, bl-opzjoni li l-mandat jiġi estiż sas-snin finanzjarji 2021 sa 2022, u l-Kunsill Governattiv tal-BĊE kien irrakkomanda dik il-ħatra kif ukoll l-opzjoni li l-mandat jiġi estiż għas-snin finanzjarji 2021 u 2022 (1).

(3)	Il-mandat tal-awdituri esterni attwali tal-Banco de España, Mazars Auditores, S.L.P. - Mazars, S.A., intemm wara l-awditu tas-sena finanzjarja 2020. Għalhekk jenħtieġ li jinħatru awdituri esterni għas-snin finanzjarji 2021 u 2022.

(4)

Il-Banco de España biħsiebu jestendi l-mandat ta’ Mazars Auditores, S.L.P. - Mazars, S.A. għas-snin finanzjarji 2021 u 2022 kif previst mir-Rakkomandazzjoni BĊE/2018/22 u l-premessi tad-Deċiżjoni tal-Kunsill (UE) 2018/1518 (2). Din l-estensjoni hija possibbli skont l-arranġamenti kuntrattwali bejn il-Banco de España u Mazars Auditores, S.L.P. - Mazars, S.A.,

ADOTTA DIN IR-RAKKOMANDAZZJONI:

Huwa rrakkomandat li l-assoċjazzjoni temporanja ta’ impriżi Mazars Auditores, S.L.P. - Mazars, S.A. għandhom jinħatru bħala l-awdituri esterni tal-Banco de España għas-snin finanzjarji 2021 u 2022.

---

(1)  Rakkomandazzjoni BĊE/2018/22 tal-Bank Ċentrali Ewropew tas-6 ta’ Settembru 2018 lill-Kunsill tal-Unjoni Ewropea dwar l-awdituri esterni tal-Banco de España (ĠU C 325, 14.9.2018, p. 1).

(2)  Deċiżjoni tal-Kunsill (UE) 2018/1518 tad-9 ta’ Ottubru 2018 li temenda d-Deċiżjoni 1999/70/KE dwar l-awdituri esterni tal-banek ċentrali nazzjonali, fir-rigward tal-awdituri esterni tal-Banco de España (ĠU L 256, 12.10.2018, p. 63).

KOMUNIKAZZJONI TAL-KUMMISSJONI

Pjan ta’ Implimentazzjoni Pluriennali għas-sistema tas-Single Window Marittima Ewropea

(2021/C 299/03)

1.   Skop ta’ dan id-dokument

L-Artikolu 19 tar-Regolament dwar sistema ta’ Single Window Marittima Ewropea (EMSWe) (1) jirrikjedi li l-Kummissjoni tadotta pjan ta’ implimentazzjoni pluriennali (MIP) u li tirrevedih kull sena wara konsultazzjonijiet xierqa mal-esperti tal-Istati Membri (2). L-għan tal-MIP huwa li jiffaċilita l-implimentazzjoni f’waqtha tar-Regolament u li jipprovdi mekkaniżmi tal-kontroll tal-kwalità u proċeduri għall-iskjerament, iż-żamma u l-aġġornament tal-modulu tal-interfaċċa armonizzata u l-elementi armonizzati relatati l-oħrajn tal-EMSWe.

2.   Sfond

Ir-Regolament dwar l-EMSWe iħassar d-Direttiva 2010/65/UE dwar il-formalitajiet ta’ rapportar u, filwaqt li jibni fuq is-single windows nazzjonali marittimi eżistenti (MNSWs), jistabbilixxi sistema komuni u interoperabbli għar-rapportar ta’ informazzjoni minn bastimenti lejn ix-xatt matul waqfa f’port. B’mod partikolari, jagħti s-setgħa lill-Kummissjoni li tiddefinixxi sett ta’ data armonizzat li jkopri l-obbligi kollha ta’ rapportar u li tiżviluppa u żżomm interfaċċi u servizzi komuni għall-MNSWs. Huwa jibda japplika mill-15 ta’ Awwissu 2025.

2.1.   Setgħat delegati

L-Artikolu 3 tar-Regolament dwar l-EMSWe jagħti s-setgħa lill-Kummissjoni li tadotta atti delegati biex:

—	temenda l-Anness tar-Regolament, li jelenka l-obbligi ta’ rapportar skont il-leġiżlazzjoni tal-UE, internazzjonali u nazzjonali, u b’rabta ma’ waqfa f’port; u

—	tissupplimenta r-Regolament billi tistabbilixxi u temenda s-sett ta’ data tal-EMSWe (il-lista sħiħa tal-elementi tad-data meħtieġa skont l-obbligi ta’ rapportar).

L-ewwel tali att delegat għandu jiġu adottat sal-15 ta’ Awwissu 2021. Oħrajn se jsegwu meta l-Anness u/jew is-sett ta’ data jkollhom jiġu emendati. Minħabba l-possibbiltà ta’ bidliet frekwenti fil-leġiżlazzjoni rilevanti, huwa mistenni li tali atti jiġu adottati b’mod regolari. Skont l-Artikolu 4(3) tar-Regolament dwar l-EMSWe, l-emendi għas-sett ta’ data tal-EMSWe jistgħu jiġu introdotti biss darba fis-sena, ħlief f’każijiet debitament iġġustifikati. L-attività li tirriżulta mill-eżerċitar tas-setgħat delegati ġiet mifruxa mal-proġetti li ġejjin:

Tabella 1

Proġetti taħt ir-responsabbiltà tal-Kummissjoni li jirriżultaw minn dispożizzjonijiet delegati

Proġett	Skadenza
Stabbiliment tas-sett ta’ data tal-EMSWe	Q3 2021
Emenda tas-sett ta’ data tal-EMSWe	2023 (indikattiv)

Tabella 2

Ir-riżultati tanġibbli li jirriżultaw mis-setgħat delegati

Riżultat tanġibbli	Skadenza
Att delegat li jistabbilixxi s-sett ta’ data tal-EMSWe u li jemenda l-Anness	Q3 2021
Att(i) delegat(i) li jemenda(w) is-sett ta’ data tal-EMSWe u/jew l-Anness	2023 (indikattiv)
Rapport lill-Parlament Ewropew u lill-Kunsill dwar l-użu tas-setgħat delegati	Q4 2022

Għall-ħidma preparatorja dwar l-atti delegati, il-Kummissjoni se tikkonsulta lis-sottogrupp ta’ esperti tal-EMSWe tal-Grupp ta’ Tmexxija ta’ Livell Għoli għall-Governanza tas-Sistema u s-Servizzi Marittimi Diġitali (HLSG) (3) u possibbilment partijiet ikkonċernati oħrajn.

2.2.   Setgħat ta’ implimentazzjoni

Ir-Regolament dwar l-EMSWe jagħti setgħat ta’ implimentazzjoni lill-Kummissjoni, f’diversi każijiet jistabbilixxi skadenza għall-adozzjoni sa Q3 2021, b’mod partikolari biex jippermetti l-iżvilupp f’waqtu tal-komponenti u jagħti lill-Istati Membri biżżejjed żmien biex jippjanaw l-aġġustamenti meħtieġa għall-MNSWs tagħhom. Fejn rilevanti, dawn l-iskadenzi jidhru fit-Tabella 3.

Tabella 3

Ippjanar indikattiv għall-adozzjoni ta’ atti ta’ implimentazzjoni

Att ta’ implimentazzjoni	Skadenza
Att ta’ implimentazzjoni li jelenka l-informazzjoni dwar id-dikjarazzjoni fil-qosor tad-dħul (ENS) li għandha tkun magħmula disponibbli għall-MNSWs (4)	Q3 2021
Att(i) ta’ implimentazzjoni dwar interfaċċi u elementi oħrajn tal-MNSWs (5)	Q3 2021
Att ta’ implimentazzjoni dwar sistema komuni ta’ ġestjoni tar-reġistru tal-utenti u ta’ aċċess (6)	Q3 2021
Att(i) ta’ implimentazzjoni dwar il-bażijiet ta’ data tal-EMSWe (7)	Q3 2021
Att ta’ implimentazzjoni li jiddefinixxi d-data soġġetta għal mekkaniżmi ta’ użu mill-ġdid tad-data  (8)	2023 (indikattiv)
Att ta’ implimentazzjoni dwar il-bażi tad-data tal-kundizzjonijiet sanitarji fuq il-vapuri (9)	2024 (indikattiv)
Att ta’ implimentazzjoni dwar servizz komuni ta’ indirizzar (10)	Q2 2024

3.   Strateġija ta’ konsultazzjoni mal-partijiet ikkonċernati

Huwa importanti ħafna li waqt il-ħidma preparatorja tagħha, il-Kummissjoni twettaq konsultazzjonijiet xierqa, inkluż fil-livell tal-esperti, f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar Regolamentazzjoni Aħjar.

Konsultazzjoni interna

Il-konsultazzjoni interna ma’ servizzi oħrajn tal-Kummissjoni se tiġi żgurata mill-grupp ta’ tmexxija legali u tal-politika tal-EMSWe, li se jiġi kkonsultat dwar kull stadju importanti maġġuri tal-proġett jew meta jkun meħtieġ aġġornament maġġuri, jew mill-anqas darbtejn fis-sena.

Stati Membri

Fit-tħejjija ta’ atti delegati, jenħtieġ li l-Kummissjoni tiżgura li l-esperti tal-Istati Membri u l-komunità tan-negozji jiġu kkonsultati b’mod trasparenti, u minn qabel sew. F’dan il-kuntest, hija tikkonsulta lis-sottogrupp ta’ esperti tal-EMSWe tal-HLSG, li fih l-Istati Membri se jkunu rrappreżentati minn esperti fi kwistjonijiet marittimi u mill-koordinaturi nazzjonali għall-EMSWe. Il-ħidma se tiġi allokata fost it-timijiet tematiċi ta’ esperti fuq suġġetti speċifiċi, eż. data, interfaċċi u bażijiet tad-data. Għall-proġetti relatati mal-użu ta’ SafeSeaNet u l-bażijiet tad-data komuni tal-EMSWe, se jiġi kkonsultat ukoll is-sottogrupp ta’ SafeSeaNet tal-HLSG.

Il-fatt li l-kamp ta’ applikazzjoni tar-Regolament dwar l-EMSWe jkopri diversi formalitajiet doganali għall-ħruġ u d-dħul jesiġi li l-awtoritajiet doganali jkunu involuti kif xieraq. Fejn meħtieġ, il-Kummissjoni se tikkonsulta lill-gruppi ta’ esperti doganali rilevanti, bħall-Grupp ta’ Koordinazzjoni tad-Dwana Elettronika u l-Grupp ta’ Negozju Doganali (kif ġestit mid-DĠ TAXUD). Jistgħu jiġu organizzati laqgħat konġunti tas-sottogrupp ta’ esperti tal-EMSWe u dan tal-aħħar għal dan il-għan.

Il-Kummissjoni se twettaq konsultazzjonijiet kif stabbilit hawn fuq fi stadju bikri xieraq meta tħejji abbozzi ta’ atti ta’ implimentazzjoni li għandhom jiġu ppreżentati lill-Kumitat għat-Trasport u l-Faċilitazzjoni tal-Kummerċ Diġitali għall-opinjoni tiegħu.

Il-Kummissjoni se tiżgura li l-awtoritajiet tal-Istati Membri jiġu kkonsultati f’kull stadju tal-implimentazzjoni. L-Istati Membri huma responsabbli għall-koordinazzjoni fil-livell nazzjonali. Huma jridu jiżguraw ukoll konsultazzjoni xierqa mal-partijiet ikkonċernati nazzjonali għall-implimentazzjoni nazzjonali tal-EMSWe.

Partijiet ikkonċernati oħrajn

Il-Kummissjoni se tiżgura li l-assoċjazzjonijiet tal-industrija jipparteċipaw fil-gruppi ta’ esperti bħala osservaturi. Barra minn hekk, hija tista’ torganizza sessjonijiet ta’ ħidma dwar aspetti speċifiċi tal-implimentazzjoni, sabiex tiġbor il-fehmiet u l-feedback mill-partijiet ikkonċernati ewlenin fis-settur marittimu.

4.   Arkitettura tal-IT tal-EMSWe

L-EMSWe tikkonsisti f’komponenti tal-IT ċentrali u nazzjonali. L-MNSWs huma kkomplementati b’modulu tal-interfaċċa armonizzata tar-rapportar (RIM) għall-komunikazzjoni minn sistema għal sistema, interfaċċa grafika tal-utent (GUI), reġistru komuni tal-utenti u sistema ta’ ġestjoni tal-aċċess, bażijiet tad-data komuni u servizz komuni ta’ indirizzar (CAS).

L-Illustrazzjoni turi l-arkitettura ta’ livell għoli tal-EMSWe fi Stat Membru, inkluż l-interazzjonijiet tal-MNSW mal-operaturi ekonomiċi u mas-sistemi tal-awtoritajiet.

Il-komponent ċentrali tal-EMSWe huwa l-MNSW, pjattaforma teknika stabbilita u mħaddma fuq livell nazzjonali biex tirċievi, tiskambja u tibgħat informazzjoni elettronika f’konformità mal-obbligi ta’ rapportar (l-Artikolu 2(3) tar-Regolament dwar l-EMSWe).

Il-partijiet, il-komponenti u l-mekkaniżmi ta’ skambju komuni huma elenkati hawn taħt:

Tabella 4

Lista indikattiva ta’ partijiet, komponenti u mekkaniżmi komuni tal-EMSWe

Elementi	Deskrizzjoni	Artikoli
1	Single Window Nazzjonali Marittima (MNSW)	Artikolu 2(3)
2	Interfaċċa grafika tal-utent (GUI)	Artikoli 2(9), 6(4)
3	Modulu tal-interfaċċa tar-rapportar armonizzat (RIM)	Artikolu 2(4), 6(1)
4	Reġistru komuni tal-utenti	Artikolu 12(1)
5	Sistema komuni ta’ ġestjoni tal-aċċess tal-utenti	Artikolu 12(1), (2), (3)
6	Servizz Komuni ta’ Indirizzar (CAS)	Artikolu 2(10)
7	Bażi tad-data dwar il-vapuri tal-EMSWe	Artikolu 14
8	Bażi tad-data komuni ta’ lokalizzazzjoni	Artikolu 15
9	Bażi tad-data komuni dwar il-hazmat	Artikolu 16
10	Bażi tad-data komuni tal-kundizzjonijiet sanitarji fuq il-vapuri	Artikolu 17
11	SafeSeaNet (sistema ta’ SSN nazzjonali u ta’ SSN ċentrali)	Artikolu 8(4)
12	Dispożizzjonijiet addizzjonali għad-dwana	Artikolu 11(1), (2)
13	Dikjaranti	Artikolu 2(11)
14	Fornituri ta’ servizzi tad-data	Artikolu 2(13)
15	Mezzi oħra ta’ rapportar	Artikolu 7
16	Fornituri ta’ servizzi portwarji	Artikolu 2(15)

5.   L-iżvilupp u l-aġġornament ta’ elementi armonizzati

Modulu tal-interfaċċa tar-rapportar armonizzat (RIM)

Ir-Regolament dwar l-EMSWe jirrikjedi li l-Kummissjoni, f’kooperazzjoni mill-qrib mal-Istati Membri, tiżviluppa sa Q3 2022 ir-RIM (11) armonizzat għal komunikazzjoni minn sistema għal sistema. Il-pjan għandu jadotta l-ewwel att ta’ implimentazzjoni li jistabbilixxi l-ispeċifikazzjonijiet funzjonali u tekniċi tar-RIM fl-2021.

F’kollaborazzjoni mill-qrib mal-Istati Membri, il-Kummissjoni tista’ tipproduċi wkoll gwida għall-implimentazzjoni tal-messaġġi li tiddeskrivi l-iskambji ta’ informazzjoni bejn l-utenti u r-RIM. L-ipproċessar tal-informazzjoni bejn l-MNSWs u l-awtoritajiet rilevanti jibqa’ r-responsabbiltà tal-Istati Membri.

Wara l-ewwel rilaxx, mistenni fi Q3 2022, ir-RIM se jiġi aġġornat, fejn meħtieġ, qabel id-data tal-applikazzjoni tar-Regolament dwar l-EMSWe (15 ta’ Awwissu 2025) u minn hemm ’il quddiem. Ladarba l-ispeċifikazzjonijiet tar-RIM ikunu ġew adottati, u f’konformità mal-punti (a), (d) u (h) fl-Artikolu 19 tar-Regolament, il-Kummissjoni tistabbilixxi skadenzi indikattivi għal:

—	l-integrazzjoni sussegwenti tal-Istati Membri tar-RIM fl-MNSWs; u

—	l-eliminazzjoni gradwali tal-verżjonijiet antiki tar-RIM mill-Istati Membri u mid-dikjaranti.

Servizz Komuni ta’ Indirizzar (CAS)

Skont l-Artikolu 13(2) tar-Regolament dwar l-EMSWe, l-ispeċifikazzjonijiet tal-CAS se jiġu adottati sa Q3 2024. L-iżvilupp ta’ dan il-komponent huwa mistenni li jibda wara l-iżvilupp tar-RIM u li jiġi konkluż qabel id-data tal-applikazzjoni tar-Regolament (15 ta’ Awwissu 2025). Ladarba l-ispeċifikazzjonijiet ikunu ġew adottati, u f’konformità mal-punti (b) u (e) fl-Artikolu 19 tar-Regolament, il-Kummissjoni se tistabbilixxi ż-żmien għall-integrazzjoni tal-CAS fl-ambjent tar-rapportar u l-proċedura għall-ġestjoni tat-tibdil għall-aġġornament tiegħu.

Sistema ta’ ġestjoni tar-reġistru tal-utenti u ta’ aċċess tal-EMSWe

Il-Kummissjoni se tistabbilixxi, u se tiżgura d-disponibbiltà ta’ sistema komuni ta’ ġestjoni tar-reġistru tal-utenti u ta’ aċċess għall-awtentikazzjoni tad-dikjaranti u tal-fornituri tas-servizzi tad-data li jużaw l-MNSWs. L-awtoritajiet nazzjonali se jaċċessaw ukoll is-sistema f’każijiet fejn tkun meħtieġa l-awtentikazzjoni.

Is-sistema komuni ta’ ġestjoni tar-reġistru tal-utenti u ta’ aċċess se tipprevedi reġistrazzjoni ta’ utent wieħed permezz ta’ reġistru tal-Unjoni b’rikonoxximent fil-livell tal-UE, ġestjoni federata tal-utenti u monitoraġġ tal-utenti fil-livell tal-UE.

Ladarba l-ispeċifikazzjonijiet tas-sistema ta’ ġestjoni tar-reġistru tal-utenti u ta’ aċċess jkunu ġew adottati, il-Kummissjoni se tistabbilixxi ż-żmien għall-integrazzjoni tagħha fir-RIM u fl-MNSWs.

6.   Fażijiet ta’ implimentazzjoni

L-EMSWe se tiġi implimentata f’serje ta’ fażijiet li jistgħu jikkoinċidu parzjalment. Ir-restrizzjonijiet fiż-żmien ifissru li xi kompiti se jitwettqu b’mod parallel, fejn possibbli. Madankollu, xi azzjonijiet se jiddependu fuq l-eżitu tar-riżultati preċedenti, u għalhekk id-dipendenzi jridu jiġu analizzati fid-dettall.

Il-pjan jinvolvi l-fażijiet li ġejjin:

Il-Fażi 0:

Bidu (Q2 2019) L-abbozz tal-pjan ġenerali, l-istrutturi organizzattivi ewlenin, il-kanali ta’ komunikazzjoni u l-mandati għall-implimentazzjoni koordinata ġew stabbiliti.

Il-Fażi 1:

L-abbozzar u l-adozzjoni tal-ispeċifikazzjonijiet funzjonali u tekniċi u ta’ atti relatati oħra (12) (Q3 2019 — Q3 2021) L-ispeċifikazzjonijiet funzjonali se jiġu abbozzati abbażi tal-ħtiġijiet tal-partijiet ikkonċernati (l-awtoritajiet u l-industrija) u l-karatteristiċi tad-data meħtieġa. Dawn se jgħinu biex jiġu evitati d-duplikazzjonijiet u l-inkonsistenzi, u se jippermettu stimi aktar preċiżi tax-xogħol u r-riżorsi meħtieġa. Dawn se jipprovdu idea preċiża tal-ħtiġijiet (eż. il-proċessi u l-flussi tad-data mas-sistemi tal-industrija, tal-awtoritajiet tal-Istati Membri u tal-UE, il-politiki ta’ aċċess, it-tqassim skont id-daqs tad-data li għandha tiġi pproċessata), sabiex l-arkitetti tas-sistema jkunu jistgħu jiddisinjaw is-sistema b’mod effiċjenti u jistmaw l-ispejjeż tal-alternattivi fid-disinn. Aktar tard, dawn se jipprovdu gwida għall-iżviluppaturi u għat-testers li jimplimentaw u jivverifikaw ir-rekwiżiti tekniċi. L-ispeċifikazzjonijiet tekniċi se jiddeterminaw l-istrutturi tekniċi, il-formati u l-protokolli għall-komponenti komuni tal-EMSWe, inklużi l-interfaċċi mal-industrija (eż. RIM armonizzat, bażijiet tad-data komuni, sistema ta’ ġestjoni tar-reġistru tal-utenti u ta’ aċċess). Il-pjan proviżorju għall-finalizzazzjoni tal-proġetti huwa kif ġej: Tabella 5 Proġetti taħt ir-responsabbiltà tal-Kummissjoni Proġett Skadenza (13) L-elenkar tal-informazzjoni dwar id-dikjarazzjoni fil-qosor tad-dħul (ENS) li għandha ssir disponibbli għall-MNSWs Q3 2021 Speċifikazzjonijiet għall-modulu tal-interfaċċa tar-rapportar armonizzat (RIM) Q3 2021 Funzjonalitajiet komuni ta’ interfaċċa grafika tal-utent (GUI) Q3 2021 Mudelli ta’ spreadsheets diġitali armonizzati Q3 2021 Struttura armonizzata għas-sit web nazzjonali ta’ appoġġ tal-Istati Membri Q3 2021 Speċifikazzjonijiet tekniċi għall-ħinijiet tal-wasla u tat-tluq Q3 2021 Speċifikazzjonijiet għall-format uniformi għall-indirizzi tal-internet tal-MNSWs Q3 2021 Speċifikazzjonijiet għas-sistema ta’ ġestjoni tar-reġistru tal-utenti u ta’ aċċess Q3 2021 Speċifikazzjonijiet għall-bażi tad-data dwar il-vapuri tal-EMSWe Q3 2021 Speċifikazzjonijiet għall-bażi tad-data komuni ta’ lokalizzazzjoni Q3 2021 Speċifikazzjonijiet għall-bażi tad-data komuni dwar il-Hazmat Q3 2021 Gwida għall-implimentazzjoni tal-messaġġi 2022 (indikattiv) Messaġġi ta’ rispons għar-rikonoxximenti u d-deċiżjonijiet tal-awtoritajiet 2023 (indikattiv) L-elenkar tad-data li għandha ssir disponibbli għad-dikjaranti bejn żewġ sejħiet portwarji 2023 (indikattiv) L-elenkar tad-data li għandha titqiegħed għad-dispożizzjoni tal-MNSWs permezz ta’ SafeSeaNet 2023 (indikattiv) Speċifikazzjonijiet għal bażi tad-data komuni tal-kundizzjonijiet sanitarji fuq il-vapuri 2023 (indikattiv) Speċifikazzjonijiet għas-servizz komuni ta’ indirizzar (CAS) Q3 2024

Il-Fażi 2:

Fażi ta’ implimentazzjoni teknika — l-UE u l-Istati Membri (Q3 - 2021 — Q4 - 2022) F’din il-fażi, is-sistemi ċentrali u nazzjonali jiġu ppreżentati għall-offerti (il-Kummissjoni, l-Aġenzija Ewropea għas-Sigurtà Marittima u l-Istati Membri) u jiġu implimentati f’konformità mal-ispeċifikazzjonijiet. B’mod partikolari, huwa mistenni li l-ewwel rilaxx tar-RIM se jkun lest fi Q3 2022. Se jkollha tiġi pprovduta dokumentazzjoni (eż. rekwiżiti tal-infrastruttura tal-hosting, manwali tal-installazzjoni, gwidi tal-interfaċċa tas-sistema) u taħriġ. Il-pjan proviżorju għall-użu tad-diversi komponenti huwa kif ġej: Tabella 6 Lista ta’ riżultati taħt ir-responsabbiltà tal-Kummissjoni Riżultat tanġibbli Skadenza L-ewwel żvilupp tar-RIM Q3 2022 Il-forniment tar-reġistru tal-utenti 2023 (indikattiv) Il-forniment tas-sistema ta’ ġestjoni tal-aċċess 2023 (indikattiv) Forniment ta’ bażi tad-data dwar il-vapuri 2023 (indikattiv) Forniment ta’ bażi tad-data komuni dwar il-hazmat 2023 (indikattiv) Il-forniment ta’ bażi tad-data komuni ta’ lokalizzazzjoni 2023 (indikattiv) Il-forniment ta’ bażi tad-data tal-kundizzjonijiet sanitarji fuq il-vapuri 2024 (indikattiv) Forniment ta’ servizz komuni ta’ indirizzar (CAS) Q4 2024

Il-Fażi 3:

Fażi ta’ ttestjar inizjali — amministrazzjonijiet pubbliċi (Q1 2023 — Q2 2024) (14) Matul din il-fażi, kemm il-Kummissjoni kif ukoll kull Stat Membru huma mistennija jwettqu testijiet tekniċi, kif ukoll testijiet funzjonali u mhux funzjonali. It-testijiet funzjonali jivverifikaw azzjonijiet jew funzjonijiet fl-ispeċifikazzjonijiet funzjonali — għandhom it-tendenza li jwieġbu l-mistoqsijiet “l-utent jista’ jagħmel dan?” jew “din il-karatteristika partikolari taħdem?”. L-ittestjar mhux funzjonali jirreferi għal aspetti bħall-iskalabbiltà jew rendiment ieħor, l-imġiba f’ċerti restrizzjonijiet, u s-sigurtà. Skont ir-riżultati tat-test, jistgħu jkunu meħtieġa diversi rilaxxi tar-RIM jew ta’ komponenti oħra. Is-servizzi tal-Kummissjoni se jipprovdu lill-awtoritajiet tal-Istati Membri b’assistenza teknika matul il-konfigurazzjoni u l-istabbiliment tar-RIM, u se jwettqu testijiet ma’ kull Stat Membru biex jiżguraw li l-installazzjoni tkun ta’ suċċess u kompletament funzjonali.

Il-Fażi 4:

Speċifikazzjonijiet u emendi ulterjuri (Q2-2023 — Q2 2024) Din il-fażi tista’ tibda b’mod parzjalment konġunt mal-Fażi 3. Il-Kummissjoni se tadotta atti ta’ implimentazzjoni (15), probabbilment fit-tieni nofs tal-2023, biex tiddetermina d-data tal-EMSWe li għandha tintuża mill-ġdid mal-wasla u d-data li għandha tiġi kondiviża permezz ta’ SafeSeaNet. Hija se tiżviluppa wkoll il-messaġġi ta’ rispons għar-rikonoxximenti u għad-deċiżjonijiet tal-awtoritajiet. Il-mekkaniżmi u l-interfaċċi għall-iskambju tad-data ta’ SafeSeaNet, inkluż il-miżuri ta’ sigurtà meħtieġa, se jiġu definiti fejn meħtieġ. Qabel l-applikazzjoni sħiħa tar-Regolament dwar l-EMSWe, se jiġu emendati d-Dokument ta’ kontroll tal-interfaċċa u tal-funzjonalitajiet (IFCD) u l-gwida ta’ referenza ta’ SafeSeaNet u d-dokumentazzjoni rilevanti. (16) Jekk obbligi ta’ rapportar ġodda jiġu nnotifikati u approvati mill-Kummissjoni f’konformità mal-Artikoli 3 u 4 tar-Regolament, il-Kummissjoni se tadotta l-att delegat li jemenda l-Anness u l-elementi l-ġodda tad-data se jiġu inklużi fis-sett ta’ data tal-EMSWe. Sussegwentement, hija se taġġorna r-RIM. Huwa previst li l-Kummissjoni se tadotta l-att ta’ implimentazzjoni dwar il-bażi tad-data komuni tal-kundizzjonijiet sanitarji fuq il-vapuri (17).

Il-Fażi 5:

L-implimentazzjoni u t-tieni fażi ta’ ttestjar — l-industrija u sistemi ġodda (Q1 2024 — data tal-applikazzjoni) Ladarba jiġu adottati l-ispeċifikazzjonijiet tekniċi meħtieġa u l-interfaċċi u komponenti oħrajn stabbiliti, huwa mistenni li l-industrija tiżviluppa u tittestja l-konnessjonijiet u l-proċeduri relatati tagħhom. Is-sistema ġenerali tar-rapportar se tiġi allinjata ma’ sistemi ġodda żviluppati taħt inizjattivi oħra tal-UE. Kull Stat Membru huwa mistenni li jistabbilixxi helpdesk tekniku u sit web ta’ appoġġ online. Sad-data tal-applikazzjoni, il-Kummissjoni se taġġorna l-MNSWs u s-SafeSeaNet sabiex tiskambja d-data rilevanti f’konformità mal-Artikol 8 tar-Regolament.

Il-Fażi 6:

Fażi ta’ tħaddim inizjali (Q1 2025 — data tal-applikazzjoni) Matul din il-fażi, l-industrija u l-Istati Membri se jkunu jistgħu jivverifikaw il-funzjonament tas-sistema.

Il-Fażi 7:

Fażi ta’ applikazzjoni (data tal-applikazzjoni — ’il quddiem) Mid-data tal-applikazzjoni tar-Regolament, l-informazzjoni kollha meħtieġa għat-twettiq tal-obbligi ta’ rapportar se tiġi pprovduta permezz ta’ u f’konformità mas-sett ta’ data tal-EMSWe permezz tal-interfaċċi armonizzati u, fejn rilevanti, b’mezzi ta’ rapportar oħra. Kull Stat Membru se jipprovdi helpdesk fl-ewwel 12-il xahar (mill-15 ta’ Awwissu 2025) u sit web ta’ appoġġ online għall-MNSW tiegħu, bi struzzjonijiet ċari fil-lingwa/i uffiċjali tiegħu u, fejn rilevanti, lingwa li tintuża internazzjonalment.

---

(1)  Ir-Regolament (UE) 2019/1239 tal-Parlament Ewropew u tal-Kunsill tal-20 ta’ Ġunju 2019 li jistabbilixxi sistema ta’ Single Window Marittima Ewropea u li jħassar id-Direttiva 2010/65/UE (ĠU L 198, 25.7.2019, p. 64); https://eur-lex.europa.eu/eli/reg/2019/1239/oj

(2)  Dan id-dokument ġie abbozzat f’konsultazzjoni mal-esperti marittimi u doganali tal-Istati Membri fil-Grupp ta’ Tmexxija ta’ Livell Għoli għall-Governanza tas-Sistema u s-Servizzi Marittimi Diġitali u l-Grupp tan-Negozju Doganali.

(3)  Kif stabbilit bid-Deċiżjoni tal-Kummissjoni (UE) 2016/566; https://ec.europa.eu/transparency/regexpert/index.cfm?do=groupDetail.groupDetail&groupID=3450

(4)  Ara l-Artikolu 11(3) tar-Regolament.

(5)  Ara l-Artikoli 6(1) u 4 tar-Regolament.

(6)  Ara l-Artikolu 12(4) tar-Regolament.

(7)  Ara l-Artikoli 14(4), 15(4) u 16(6) tar-Regolament.

(8)  Ara l-Artikolu 8(5) tar-Regolament.

(9)  Ara l-Artikolu 17(3) tar-Regolament.

(10)  Ara l-Artikolu 13(2) tar-Regolament.

(11)  Ara l-Artikolu 6(2) tar-Regolament.

(12)  Ara t-Tabella 3 hawn fuq.

(13)  Data ppjanata għall-finalizzazzjoni tad-dokumenti.

(14)  Ara l-punt (f) fl-Artikolu 19 tar-Regolament.

(15)  Ara l-Artikolu 8(5) tar-Regolament.

(16)  L-emendi se jiġu approvati mill-HLSG f’konformità mal-kompiti fil-punt 2.2 fl-Anness III tad-Direttiva 2002/59/KE.

(17)  Ara l-Artikolu 17(3) tar-Regolament.

Ebda oppożizzjoni għal konċentrazzjoni notifikata

(Il-Każ M.10345 — Equistone Partners Europe/CVG)

(Test b’rilevanza għaż-ŻEE)

(2021/C 299/04)

Fi 20 ta’ Lulju 2021, il-Kummissjoni ddeċidiet li ma topponix il-konċentrazzjoni notifikata msemmija hawn fuq u li tiddikjaraha kompatibbli mas-suq intern. Din id-deċiżjoni hi bbażata fuq l-Artikolu 6(1)(b) tar-Regolament tal-Kunsill (KE) Nru 139/2004 (1). It-test sħiħ tad-deċiżjoni hu disponibbli biss fil-Franċiż u ser isir pubbliku wara li jitneħħa kwalunkwe sigriet tan-negozju li jista’ jkun fih. Dan it-test jinstab:

—

fit-taqsima tal-amalgamazzjoni tal-websajt tal-Kummissjoni dwar il-Kompetizzjoni (http://ec.europa.eu/competition/mergers/cases/). Din il-websajt tipprovdi diversi faċilitajiet li jgħinu sabiex jinstabu d-deċiżjonijiet individwali ta’ amalgamazzjoni, inklużi l-kumpanija, in-numru tal-każ, id-data u l-indiċi settorjali.

—	f’forma elettronika fil-websajt EUR-Lex (http://eur-lex.europa.eu/homepage.html?locale=mt) fid-dokument li jġib in-numru 32021M10345. Il-EUR-Lex hu l-aċċess fuq l-internet għal-liġi Ewropea.

---

(1)  ĠU L 24, 29.1.2004, p. 1.

Rata tal-kambju tal-euro (1)

Is-26 ta’ Lulju 2021

(2021/C 299/05)

1 euro =

	Munita	Rata tal-kambju
USD	Dollaru Amerikan	1,1787
JPY	Yen Ġappuniż	130,05
DKK	Krona Daniża	7,4372
GBP	Lira Sterlina	0,85468
SEK	Krona Żvediża	10,2050
CHF	Frank Żvizzeru	1,0826
ISK	Krona Iżlandiża	148,60
NOK	Krona Norveġiża	10,4270
BGN	Lev Bulgaru	1,9558
CZK	Krona Ċeka	25,629
HUF	Forint Ungeriż	361,65
PLN	Zloty Pollakk	4,5888
RON	Leu Rumen	4,9223
TRY	Lira Turka	10,0973
AUD	Dollaru Awstraljan	1,6010
CAD	Dollaru Kanadiż	1,4804
HKD	Dollaru ta’ Hong Kong	9,1656
NZD	Dollaru tan-New Zealand	1,6889
SGD	Dollaru tas-Singapor	1,6032
KRW	Won tal-Korea t’Isfel	1 360,69
ZAR	Rand ta’ l-Afrika t’Isfel	17,4846
CNY	Yuan ren-min-bi Ċiniż	7,6426
HRK	Kuna Kroata	7,5245
IDR	Rupiah Indoneżjan	17 084,23
MYR	Ringgit Malażjan	4,9877
PHP	Peso Filippin	59,342
RUB	Rouble Russu	87,1713
THB	Baht Tajlandiż	38,832
BRL	Real Brażiljan	6,1546
MXN	Peso Messikan	23,6826
INR	Rupi Indjan	87,7305

---

(1)  Sors: rata tal-kambju ta’ referenza ppubblikata mill-Bank Ċentrali Ewropew.

Notifika minn qabel ta’ konċentrazzjoni

(Il-każ M.10332 — KKR/Equitix Tetragon/Target)

Każ li jista’ jiġi kkunsidrat għal proċedura ssimplifikata

(Test b’rilevanza għaż-ŻEE)

(2021/C 299/06)

---

(1)  ĠU L 24, 29.1.2004, p. 1 (ir-“Regolament dwar l-Għaqdiet”).

(2)  ĠU C 366, 14.12.2013, p. 5.

Avviż minn qabel ta’ konċentrazzjoni

(M.10277 — Geely/Futaihua/JV)

Każ li jista’ jiġi kkunsidrat għal proċedura ssimplifikata

(Test b’rilevanza għaż-ŻEE)

(2021/C 299/07)

---

(1)  ĠU L 24, 29.1.2004, p. 1 (ir-“Regolament dwar l-Għaqdiet”).

(2)  ĠU C 366, 14.12.2013, p. 5.

Avviż minn qabel ta’ konċentrazzjoni

(Il-każ M.10369 — APG/Stockholms Stadshus/Stockholm Exergi Holding)

Każ li jista’ jiġi kkunsidrat għal proċedura ssimplifikata

(Test b’rilevanza għaż-ŻEE)

(2021/C 299/08)

---

(1)  ĠU L 24, 29.1.2004, p. 1 (ir-“Regolament dwar l-Għaqdiet”).

(2)  ĠU C 366, 14.12.2013, p. 5.