ISSN 1977-0987

Il-Ġurnal Uffiċjali

tal-Unjoni Ewropea

C 362

European flag  

Edizzjoni bil-Malti

Informazzjoni u Avviżi

Volum 63
28 ta' Ottubru 2020


Werrej

Paġna

 

II   Komunikazzjonijiet

 

KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

 

Il-Kummissjoni Ewropea

2020/C 362/01

Irtirar tal-avviż dwar konċentrazzjoni (Il-Każ M.9748 — KKR/Dentix Health Corporation) ( 1 )

1


 

IV   Informazzjoni

 

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

 

Il-Kummissjoni Ewropea

2020/C 362/02

Rata tal-kambju tal-euro — Is-27 ta' Ottubru 2020

2

2020/C 362/03

Sommarju tad-Deċiżjonijiet tal-Kummissjoni Ewropea dwar l-awtorizzazzjonijiet għat-tqegħid fis-suq għall-użu u/jew għall-użu tas-sustanzi elenkati fl-Anness XIV tar-Regolament (KE) Nru 1907/2006 tal-Parlament Ewropew u tal-Kunsill dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi (REACH) (Ippubblikat skont l-Artikolu 64(9) tar-Regolament (KE) Nru 1907/2006)  ( 1 )

3


 

V   Avviżi

 

PROĊEDURI AMMINISTRATTIVI

 

Il-Kummissjoni Ewropea

2020/C 362/04

Sejħa għall-proposti Appoġġ għall-miżuri ta’ informazzjoni b’rabta mal-Politika ta’ Koeżjoni tal-UE

4

 

PROĊEDURI DWAR L-IMPLIMENTAZZJONI TAL-POLITIKA TAL-KOMPETIZZJONI

 

Il-Kummissjoni Ewropea

2020/C 362/05

Avviż minn qabel ta’ konċentrazzjoni (Il-Każ M.9911 — Voith/PCSH/TSA) Każ li jista’ jiġi kkunsidrat għal proċedura ssimplifikata ( 1 )

24

 

ATTI OĦRAJN

 

Il-Kummissjoni Ewropea

2020/C 362/06

Pubblikazzjoni ta’ komunikazzjoni dwar l-approvazzjoni ta’ emenda standard ta’ Speċifikazzjoni tal-Prodott għal isem fis-settur tal-inbid, kif imsemmi fl-Artikolu 17(2) u (3) tar-Regolament Delegat tal-Kummissjoni (UE) 2019/33

26


 


 

(1)   Test b'rilevanza għaż-ŻEE.

MT

 


II Komunikazzjonijiet

KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

Il-Kummissjoni Ewropea

28.10.2020   

MT

Il-Ġurnal Uffiċjali tal-Unjoni Ewropea

C 362/1


Irtirar tal-avviż dwar konċentrazzjoni

(Il-Każ M.9748 — KKR/Dentix Health Corporation)

(Test b’rilevanza għaż-ŻEE)

(2020/C 362/01)

Ir-Regolament tal-Kunsill (KE) Nru 139/2004

Fi 4 ta’ Frar 2020, il-Kummissjoni rċeviet avviż (1) ta’ konċentrazzjoni proposta skont l-Artikolu 4 tar-Regolament tal-Kunsill (KE) Nru 139/2004 (2) (ir-“Regolament dwar l-Għaqdiet”).

Fi 14 ta’ Frar 2020, il-parti notifikanti infurmat lill-Kummissjoni li hija rtirat l-avviż tagħha.


(1)  ĠU C 48, 12.2.2020, p. 22.

(2)  ĠU L 24, 29.1.2004, p. 1.


IV Informazzjoni

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

Il-Kummissjoni Ewropea

28.10.2020   

MT

Il-Ġurnal Uffiċjali tal-Unjoni Ewropea

C 362/2


Rata tal-kambju tal-euro (1)

Is-27 ta' Ottubru 2020

(2020/C 362/02)

1 euro =


 

Munita

Rata tal-kambju

USD

Dollaru Amerikan

1,1832

JPY

Yen Ġappuniż

123,74

DKK

Krona Daniża

7,4406

GBP

Lira Sterlina

0,90718

SEK

Krona Żvediża

10,3060

CHF

Frank Żvizzeru

1,0732

ISK

Krona Iżlandiża

165,30

NOK

Krona Norveġiża

10,8398

BGN

Lev Bulgaru

1,9558

CZK

Krona Ċeka

27,337

HUF

Forint Ungeriż

365,41

PLN

Zloty Pollakk

4,5842

RON

Leu Rumen

4,8765

TRY

Lira Turka

9,6466

AUD

Dollaru Awstraljan

1,6585

CAD

Dollaru Kanadiż

1,5589

HKD

Dollaru ta' Hong Kong

9,1699

NZD

Dollaru tan-New Zealand

1,7639

SGD

Dollaru tas-Singapor

1,6078

KRW

Won tal-Korea t'Isfel

1 332,89

ZAR

Rand ta' l-Afrika t'Isfel

19,0620

CNY

Yuan ren-min-bi Ċiniż

7,9345

HRK

Kuna Kroata

7,5745

IDR

Rupiah Indoneżjan

17 344,17

MYR

Ringgit Malażjan

4,9274

PHP

Peso Filippin

57,157

RUB

Rouble Russu

90,5710

THB

Baht Tajlandiż

36,940

BRL

Real Brażiljan

6,6711

MXN

Peso Messikan

24,6622

INR

Rupi Indjan

87,1635


(1)  Sors: rata tal-kambju ta' referenza ppubblikata mill-Bank Ċentrali Ewropew.


28.10.2020   

MT

Il-Ġurnal Uffiċjali tal-Unjoni Ewropea

C 362/3


Sommarju tad-Deċiżjonijiet tal-Kummissjoni Ewropea dwar l-awtorizzazzjonijiet għat-tqegħid fis-suq għall-użu u/jew għall-użu tas-sustanzi elenkati fl-Anness XIV tar-Regolament (KE) Nru 1907/2006 tal-Parlament Ewropew u tal-Kunsill dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi (REACH)

(Ippubblikat skont l-Artikolu 64(9) tar-Regolament (KE) Nru 1907/2006 (1))

(Test b’rilevanza għaż-ŻEE)

(2020/C 362/03)

Deċiżjoni li tagħti awtorizzazzjoni

Referenza tad-Deċiżjoni (2)

Data tad-Deċiżjoni

Isem is-sustanza

Detentur tal-awtorizzazzjoni

Numru tal-awtorizzazzjoni

Użu awtorizzat

Data ta’ skadenza tal-perjodu ta’ rieżami

Raġunijiet għad-Deċiżjoni

C(2020) 7104

Il-21 ta’ Ottubru 2020

Trijossidu tal-kromu

Nru KE 215-607-8, Nru CAS 1333-82-0

ThyssenKrupp Rasselstein GmbH Koblenzer Str. 141, 56626 Andernach, il-Ġermanja.

REACH/20/15/0

Passivazzjoni tal-azzar bil-pjanċa stanjata

Seba’ snin mid-data tal-adozzjoni ta’ din id-Deċiżjoni

F’konformità mal-Artikolu 60(4) tar-Regolament (KE) Nru 1907/2006, il-benefiċċji soċjoekonomiċi huma akbar mir-riskju għas-saħħa tal-bniedem mill-użu tas-sustanza u ma hemm l-ebda sustanza jew teknoloġija alternattiva adattata.

REACH/20/15/1

Kisi elettrolitiku tal-azzar bil-kromu

Il-31 ta’ Diċembru 2028


(1)  ĠU L 396, 30.12.2006, p. 1.

(2)  Id-Deċiżjoni hija disponibbli fuq is-sit web tal-Kummissjoni Ewropea: http://ec.europa.eu/growth/sectors/chemicals/reach/about/index_en.htm


V Avviżi

PROĊEDURI AMMINISTRATTIVI

Il-Kummissjoni Ewropea

28.10.2020   

MT

Il-Ġurnal Uffiċjali tal-Unjoni Ewropea

C 362/4


SEJĦA GĦALL-PROPOSTI

“Appoġġ għall-miżuri ta’ informazzjoni b’rabta mal-Politika ta’ Koeżjoni tal-UE”

(2020/C 362/04)

Werrej

1.

INTRODUZZJONI — Sfond 6

2.

Objettiv(i) — Tema/i — Prijoritajiet 4

3.

Skeda 8

4.

Baġit disponibbli 6

5.

Rekwiżiti ta’ Ammissibbiltà 6

6.

Kriterji ta’ Eliġibbiltà 6

6.1.

Applikanti eliġibbli 8

6.2.

Attivitajiet eliġibbli 9

6.3.

Perjodu ta’ implimentazzjoni 9

7.

Kriterji tal-Esklużjoni 10

7.1.

Esklużjoni 10

7.2.

Miżuri ta’ rimedju 11

7.3.

Proposti li ma jintlaqgħux għas-sejħa għall-proposti 11

7.4.

Dokumenti ta’ sostenn 11

8.

Kriterji tal-għażla 12

8.1.

Kapaċità finanzjarja 12

8.2.

Kapaċità operazzjonali 12

9.

Kriterji għall-għoti 13

10.

Impenji legali 14

11.

Dispożizzjonijiet finanzjarji 14

11.1.

Forom tal-għotja 14

11.2.

Kostijiet eliġibbli 14

11.3.

Kostijiet ineliġibbli 16

11.4.

Baġit ibbilanċjat 17

11.5.

Kalkolu tal-ammont finali tal-għotja 17

11.6.

Arranġamenti ta’ rrappurtar u ta’ pagament 18

11.7.

Kundizzjonijiet finanzjarji oħra 18

12.

Pubbliċità 19

12.1.

Mill-benefiċjarji 19

12.2.

Mill-Kummissjoni 20

13.

Proċessar ta’ data personali 20

14.

Proċedura għall-preżentazzjoni tal-proposti 21

1.   INTRODUZZJONI — SFOND

Din hija sejħa għall-proposti għall-finanzjament ta’ miżuri ta’ informazzjoni fis-sens tal-Artikolu 58 (1) (f) tar-Regolament (UE) Nru 1303/2013 mill-approprjazzjonijiet tal-baġit tal-2020 kif imħabbra mid-Deċiżjoni tal-Kummissjoni C(2020) 305 tas-27.1.2020 (1).

L-aġenda politika tal-Unjoni Ewropea għas-snin li ġejjin tinkludi deċiżjonijiet ta’ importanza ewlenija għall-futur tal-UE: bħalissa għaddej dibattitu wiesa’ dwar il-prijoritajiet li għandha tiffoka fuqhom l-UE. B’mod parallel, dalwaqt se jiġi adottat qafas finanzjarju pluriennali ġdid li jkopri l-perjodu ta’ wara l-2020 u se jiġu stabbiliti programmi u mekkaniżmi ta’ finanzjament ġodda sabiex jimplimentawhom.

F’dan il-kuntest, huwa importanti li d-deċiżjonijiet futuri dwar il-prijoritajiet għall-UE jqisu b’mod adegwat il-kontribut tal-Politika ta’ Koeżjoni (2) għat-twettiq tal-prijoritajiet tal-UE u l-potenzjal tagħha li tgħin biex l-UE terġa’ tingħaqad maċ-ċittadini tagħha.

Il-Politika ta’ Koeżjoni tipprovdi investimenti fir-reġjuni kollha fl-UE sabiex tappoġġa l-ħolqien tal-impjiegi, il-kompetittività tan-negozji, it-tkabbir ekonomiku, l-iżvilupp sostenibbli, u ttejjeb il-kwalità tal-ħajja taċ-ċittadini fil-276 reġjun tal-UE. Dawn l-investimenti — li jirrappreżentaw terz tal-baġit totali tal-UE — jgħinu biex jintlaħqu l-prijoritajiet politiċi tal-UE. Huma jirrappreżentaw l-aktar prova tanġibbli u konkreta tal-impatt tal-UE fil-ħajja ta’ kuljum ta’ miljuni ta’ ċittadini.

Madankollu, iċ-ċittadini għadhom mhumiex konxji biżżejjed tar-riżultati tal-Politika ta’ Koeżjoni u tal-impatti tagħhom fuq ħajjithom. Sabiex ikun jista’ jsir dibattitu infurmat dwar il-prijoritajiet futuri għall-UE u tiġi żgurata aktar trasparenza dwar kif qed jintużaw il-fondi tal-UE u b’liema riżultati, iċ-ċittadini jenħtieġ li jkollhom għarfien u sensibilizzazzjoni aħjar tal-investiment fil-pajjiżi, fir-reġjuni u fl-ibliet tagħhom.

Il-Kummissjoni Ewropea, il-Parlament Ewropew u l-Kunsill tal-UE enfasizzaw kemm-il darba l-ħtieġa li tiżdied il-viżibbiltà tal-Politika ta’ Koeżjoni tal-UE, kif muri mill-Konklużjonijiet tal-Kunsill Affarijiet Ġenerali (3) dwar “It-tqarrib tal-Politika ta’ Koeżjoni lejn iċ-ċittadini”, mir-Riżoluzzjoni tal-Parlament Ewropew (4) dwar “Iż-żieda fl-involviment tas-sħab u l-viżibilità fil-prestazzjoni tal-Fondi Strutturali u ta’ Investiment Ewropej” u mill-proposti mill-azzjonijiet ta’ komunikazzjoni konġunta (5) dwar il-Politika ta’ Koeżjoni mressqa mill-Kummissjoni Ewropea.

Fi ħdan il-qafas legali attwali li jirregola l-implimentazzjoni tal-Fondi Strutturali u ta’ Investiment tal-UE (6), din is-sejħa għall-proposti għandha l-għan li tipprovdi appoġġ għall-produzzjoni u t-tixrid ta’ informazzjoni u kontenut marbuta mal-Politika ta’ Koeżjoni tal-UE, filwaqt li tirrispetta l-indipendenza editorjali sħiħa tal-atturi involuti.

2.   OBJETTIV(I) — TEMA/I — PRIJORITAJIET

B’din is-sejħa għall-proposti, il-Kummissjoni Ewropea għandha l-għan li tagħżel il-benefiċjarji potenzjali għall-implimentazzjoni ta’ għadd ta’ miżuri ta’ informazzjoni (7) kofinanzjati mill-UE. L-għan ewlieni huwa li jingħata appoġġ għall-produzzjoni u għat-tixrid ta’ informazzjoni u kontenut marbuta mal-Politika ta’ Koeżjoni tal-UE (8), inkluż fost l-oħrajn il-Fond għal Tranżizzjoni Ġusta (9) u l-pjan ta’ rkupru għall-Ewropa (10), filwaqt li tiġi rrispettata l-indipendenza editorjali sħiħa tal-atturi involuti.

Il-kontenut eżatt tal-miżuri ta’ informazzjoni proposti se jiddependi fuq l-għażla editorjali tal-applikanti. L-indipendenza editorjali se tkun garantita permezz ta’ karta ta’ indipendenza li se tkun parti mill-ftehim iffirmat bejn il-Kummissjoni Ewropea u l-benefiċjarji tal-għotjiet.

L-objettivi speċifiċi għal din is-sejħa għall-proposti huma li:

—

Jiġi promoss u jitrawwem fehim aħjar tar-rwol tal-Politika ta’ Koeżjoni fl-appoġġ tar-reġjuni kollha tal-UE;

—

Tiżdied is-sensibilizzazzjoni dwar proġetti ffinanzjati mill-UE — b’mod partikolari permezz tal-Politika ta’ Koeżjoni — u l-impatt tagħhom fuq il-ħajja taċ-ċittadini;

—

Tinxtered l-informazzjoni u jiġi mħeġġeġ djalogu miftuħ dwar il-Politika ta’ Koeżjoni, ir-riżultati tagħha, ir-rwol tagħha fit-twettiq tal-prijoritajiet politiċi u dwar il-futur tagħha;

—

Tiġi mħeġġa l-parteċipazzjoni ċivika fi kwistjonijiet marbutin mal-Politika ta’ Koeżjoni u titrawwem il-parteċipazzjoni taċ-ċittadini biex jiġu stabbiliti l-prijoritajiet għall-futur ta’ din il-politika.

Il-proposti għandhom juru u jivvalutaw ir-rwol tal-Politika ta’ Koeżjoni fit-twettiq tal-prijoritajiet politiċi tal-Kummissjoni Ewropea u fl-indirizzar tal-isfidi kurrenti u futuri għall-UE, l-Istati Membri tagħha, ir-reġjuni tagħha u l-livell lokali. B’mod aktar speċifiku, dawn jenħtieġ li jkunu marbuta mal-kontribut tal-Politika ta’ Koeżjoni biex:

—

jiżdiedu l-impjiegi, it-tkabbir u l-investiment fil-livell reġjonali u nazzjonali, u titjieb il-kwalità tal-ħajja taċ-ċittadini;

—

jgħinu biex jitwettqu l-prijoritajiet ewlenin tal-UE u tal-Istati Membri, li minbarra l-ħolqien tal-impjiegi u tat-tkabbir, jinkludu fost l-oħrajn l-indirizzar tat-tibdil fil-klima, il-protezzjoni tal-ambjent, it-tisħiħ tar-riċerka u l-innovazzjoni;

—

isaħħu l-koeżjoni ekonomika, soċjali u territorjali fl-UE, filwaqt li jitnaqqsu d-diskrepanzi fil-pajjiżi u r-reġjuni tal-UE u bejniethom;

—

jgħinu lir-reġjuni jisfruttaw il-globalizzazzjoni billi jsibu l-qasam partikolari tagħhom fl-ekonomija dinjija;

—

jirrinfurzaw il-proġett Ewropew, minħabba li l-Politika ta’ Koeżjoni taqdi direttament liċ-ċittadini.

Ir-riżultati u l-outputs mistennija huma dawn li ġejjin:

—

Li tiżdied il-kopertura tal-midja dwar il-Politika ta’ Koeżjoni, b’mod partikolari fil-livell reġjonali;

—

Li jiżdied l-għarfien tan-nies dwar ir-riżultati tal-Politika ta’ Koeżjoni u tal-impatti tagħhom fuq ħajjithom;

—

Li jinkisbu outputs u riżultati konkreti mmirati lejn sensibilizzazzjoni wiesgħa matul id-durata tal-miżura — eż. xandir fuq it-TV u r-radju, kopertura online jew stampata, tip ieħor ta’ miżuri ta’ informazzjoni u tixrid — filwaqt li jitqies il-multilingwiżmu;

—

Li tiġi stabbilita kollaborazzjoni effiċjenti u effettiva bejn il-Kummissjoni Ewropea u l-benefiċjarji tal-għotjiet.

L-udjenza fil-mira tal-miżuri ta’ informazzjoni li għandhom jiġu implimentati permezz ta’ din is-sejħa hija l-pubbliku ġenerali u/jew il-partijiet interessati relatati. B’mod aktar speċifiku:

—

Għall-pubbliku ġenerali: l-objettiv huwa li tiżdied is-sensibilizzazzjoni tal-pubbliku dwar ir-riżultati tal-Politika ta’ Koeżjoni u l-impatt tagħhom fuq il-ħajja taċ-ċittadini għall-Ewropej li mhumiex konxji mill-UE u mill-azzjoni tal-UE fir-reġjun tagħhom. L-informazzjoni għandha tiffoka fuq l-iżvilupp ta’ fehim akbar tal-kontribut tal-Politika ta’ Koeżjoni biex tingħata spinta lill-impjiegi u t-tkabbir fl-Ewropa u jitnaqqsu d-disparitajiet bejn l-Istati Membri u r-reġjuni.

—

Għall-partijiet interessati: l-objettiv huwa li jkun hemm involviment mal-partijiet ikkonċernati (inklużi l-awtoritajiet nazzjonali, reġjonali u lokali, il-benefiċjarji, in-negozji, l-akkademiċi) biex jiġi kkomunikat aktar l-impatt tal-Politika ta’ Koeżjoni fuq ir-reġjuni tagħhom u biex jikkontribwixxi għad-diskussjoni dwar il-futur tal-Politika ta’ Koeżjoni u, b’mod aktar ġenerali, dwar il-futur tal-Ewropa.

3.   SKEDA

 

Passi

Data u ħin jew perjodu indikattiv

(a)

Pubblikazzjoni tas-sejħa

13.10.2020

(b)

Skadenza għas-sottomissjoni tal-applikazzjonijiet

12.1.2021

(c)

Perjodu ta’ evalwazzjoni

Frar sa April 2021

(d)

Informazzjoni lill-applikanti

Mejju 2021

(e)

Iffirmar tal-ftehimiet ta’ għotja

Ġunju sa Awwissu 2021

4.   BAĠIT DISPONIBBLI

Il-baġit totali allokat għall-kofinanzjament tal-proġetti taħt din is-sejħa għall-proposti huwa stmat li jlaħħaq EUR 5 000 000.

L-ammont massimu tal-għotja se jkun ta’ EUR 300 000.

Il-Kummissjoni tirriżerva d-dritt li ma tqassamx il-fondi kollha disponibbli.

5.   REKWIŻITI TA’ AMMISSIBBILTÀ

Sabiex ikunu ammissibbli, l-applikazzjonijiet iridu:

—

jintbagħtu mhux aktar tard mill-iskadenza għall-preżentazzjoni tal-applikazzjonijiet imsemmija fit-Taqsima 3;

—

jiġu ppreżentati bil-miktub (ara t-Taqsima 14), billi tintuża l-formola tal-applikazzjoni disponibbli fuq https://ec.europa.eu/regional_policy/en/newsroom/funding-opportunities/calls-for-proposal/; u

—

abbozzati f’waħda mil-lingwi uffiċjali tal-UE.

In-nuqqas ta’ konformità ma’ dawn ir-rekwiżiti jwassal biex l-applikazzjoni tiġi miċħuda.

6.   KRITERJI TA’ ELIĠIBBILTÀ

6.1.   Applikanti eliġibbli

Il-proposti jistgħu jiġu ppreżentati minn kwalunkwe wieħed mill-applikanti li ġejjin (11):

—

organizzazzjonijiet tal-midja/aġenziji tal-aħbarijiet (it-televiżjoni, ir-radju, l-istampa, il-midja online, midja ġdida, taħlita ta’ midja differenti);

—

organizzazzjonijiet mingħajr skop ta’ qligħ;

—

universitajiet u istituzzjonijiet edukattivi;

—

ċentri ta’ riċerka u gruppi ta’ riflessjoni;

—

assoċjazzjonijiet ta’ interess Ewropew;

—

entitajiet privati;

—

awtoritajiet pubbliċi (12) (nazzjonali, reġjonali u lokali), bl-eċċezzjoni tal-awtoritajiet inkarigati mill-implimentazzjoni tal-Politika ta’ Koeżjoni f’konformità mal-Artikolu 123 tar-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013.

Il-persuni fiżiċi kif ukoll l-entitajiet stabbiliti għall-iskop uniku tal-implimentazzjoni tal-proġetti f’din is-sejħa għall-proposti mhumiex eliġibbli.

L-applikanti li pparteċipaw fis-sejħiet imnedija mill-Kummissjoni Ewropea fl-2017, 2018 u 2019 (is-Sejħa għall-proposti 2017CE16BAT063, 2018CE16BAT042, u 2019CE16BAT117 rispettivament, għal “Appoġġ għall-miżuri ta’ informazzjoni b’rabta mal-Politika ta’ Koeżjoni tal-UE”) huma eliġibbli minkejja l-eżitu tal-applikazzjonijiet preċedenti tagħhom.

Kun af li wara d-dħul fis-seħħ tal-Ftehim dwar il-Ħruġ bejn l-UE u r-Renju Unit (13) fl-1 ta’ Frar 2020 u b’mod partikolari l-Artikoli 127(6), 137 u 138, ir-referenzi għal persuni fiżiċi jew ġuridiċi residenti jew stabbiliti fi Stat Membru tal-Unjoni Ewropea jridu jinftiehmu li jinkludu persuni fiżiċi jew ġuridiċi residenti jew stabbiliti fir-Renju Unit. Ir-residenti u l-entitajiet tar-Renju Unit huma għalhekk eliġibbli biex jipparteċipaw taħt din is-sejħa.

Pajjiż ta’ stabbiliment

Huma eliġibbli biss applikazzjonijiet minn entitajiet legali stabbiliti f’wieħed mill-pajjiżi li ġejjin:

—

L-Istati Membri tal-UE;

Dokumenti ta’ sostenn

Għall-valutazzjoni tal-eliġibbiltà tal-applikanti, qed jintalbu d-dokumenti ta’ sostenn li ġejjin:

—

entità privata: silta mill-Ġurnal Uffiċjali, kopja tal-istatut ta’ assoċjazzjoni, silta mir-reġistru kummerċjali jew ta’ assoċjazzjoni, ċertifikat ta’ responsabbiltà għall-ħlas tal-VAT (jekk, bħal f’xi pajjiżi, in-numru tar-reġistru kummerċjali u n-numru tal-VAT ikunu identiċi, ikun meħtieġ wieħed biss minn dawn id-dokumenti);

—

entità pubblika: kopja tar-riżoluzzjoni, tad-deċiżjoni jew ta’ dokument uffiċjali ieħor li jistabbilixxi lill-entità regolata bil-liġi pubblika;

—

persuni fiżiċi: fotokopja tal-karta tal-identità u/jew tal-passaport; iċ-ċertifikat tar-responsabbiltà għall-VAT, jekk applikabbli (eż. xi persuni li jaħdmu għal rashom)

—

entitajiet mingħajr personalità ġuridika: dokumenti li jipprovdu evidenza li r-rappreżentant tagħhom ikollu l-kapaċità li jissodisfa l-obbligi ġuridiċi f’isimhom.

Qed tinġibed l-attenzjoni li, matul il-proċedura, l-applikanti jistgħu jintalbu jirreġistraw u jipprovdu Kodiċi ta’ Identifikazzjoni tal-Parteċipant (PIC, numru b’9 ċifri), li jservi bħala l-identifikatur uniku tal-organizzazzjoni tagħhom fir-Reġistru tal-Parteċipanti. L-applikanti jirċievu struzzjonijiet dwar kif joħolqu PIC fi żmien xieraq.

Mal-komunikazzjoni tal-PIC tal-applikant, is-Servizzi ta’ Validazzjoni tal-UE (Servizzi ta’ Validazzjoni tal-Aġenzija Eżekuttiva għar-Riċerka) jikkuntattjaw lill-applikant (permezz tas-sistema ta’ messaġġi inkorporata fir-Reġistru tal-Parteċipanti) u jitolbu lil dan tal-aħħar jipprovdi d-dokumenti ta’ sostenn meħtieġa biex jagħtu prova tal-eżistenza u l-istatus legali tal-organizzazzjoni. Id-dettalji u l-istruzzjonijiet kollha neċessarji jiġu pprovduti permezz ta’ din in-notifika separata.

6.2.   Attivitajiet eliġibbli

L-attivitajiet eliġibbli għandhom ikunu dawk meħtieġa biex titwettaq il-miżura ta’ informazzjoni u joħorġu l-outputs/ir-riżultati maħsuba skont l-objettivi, it-temi u l-udjenza fil-mira kif elenkati taħt it-Taqsima 2 ta’ din is-sejħa għall-proposti.

A.

Il-miżuri għandhom jiġu implimentati fl-UE fil-livell lokali, reġjonali, multireġjonali, nazzjonali, jew fil-livell ta’ diversi Stati Membri.

B.

Il-proposti għandhom jinkludu attività u għodda waħda jew diversi li jkollhom karattru innovattiv bil-għan li jintlaħqu l-objettivi, jiġu koperti t-temi u tintlaħaq l-udjenza fil-mira.

C.

Il-miżuri meħtieġa bil-liġi jew skont il-kuntratti speċifiċi ta’ servizz pubbliku (fil-każ ta’ entitajiet pubbliċi) mhumiex eliġibbli.

6.3.   Perjodu ta’ implimentazzjoni

L-applikanti huma mistiedna jissottomettu proposti għal proġetti b’durata massima ta’ 12-il xahar.

7.   KRITERJI TAL-ESKLUŻJONI

7.1.   Esklużjoni

L-uffiċjal tal-awtorizzazzjoni għandu jeskludi lil applikant milli jipparteċipa fi proċeduri ta’ sejħa għall-proposti meta:

(a)

l-applikant ikun fallut, soġġett għal proċeduri ta’ insolvenza jew ta’ likwidazzjoni, l-assi tiegħu jkunu qed jiġu amministrati minn likwidatur jew minn qorti, ikun jinsab f’arranġament mal-kredituri, l-attivitajiet kummerċjali tiegħu jkunu ġew sospiżi, jew ikun jinsab f’xi sitwazzjoni analoga li tirriżulta minn proċedura simili prevista skont il-liġijiet jew ir-regolamenti nazzjonali jew tal-UE;

(b)

ikun ġie stabbilit b’sentenza finali jew b’deċiżjoni amministrattiva finali li l-applikant ikun qed jikser l-obbligi tiegħu marbuta mal-ħlas tat-taxxi jew tal-kontribuzzjonijiet tas-sigurtà soċjali f’konformità mal-liġi applikabbli;

(c)

ikun ġie stabbilit b’sentenza finali jew b’deċiżjoni amministrattiva finali li l-applikant ikun ħati ta’ mġiba professjonali gravi billi jkun kiser il-liġijiet jew ir-regolamenti jew l-istandards etiċi applikabbli tal-professjoni tal-applikant, jew billi jkun indika intenzjoni ħażina jew negliġenza gravi, inkluż, b’mod partikulari, kwalunkwe wieħed mill-eżempji li ġejjin:

(i)

ir-rappreżentazzjoni skorretta b’mod frodulenti jew negliġenti tal-informazzjoni meħtieġa għall-verifika tan-nuqqas ta’ raġunijiet għall-esklużjoni jew l-issodisfar tal-kriterji tal-eliġibbiltà jew tal-għażla jew fit-twettiq ta’ kuntratt, ftehim ta’ għotja jew deċiżjoni ta’ għotja;

(ii)

jidħol fi ftehim ma’ applikanti oħra bl-għan li ssir distorsjoni tal-kompetizzjoni;

(iii)

jikser drittijiet tal-proprjetà intellettwali;

(iv)

jipprova jinfluwenza l-proċess tat-teħid tad-deċiżjonijiet tal-Kummissjoni matul il-proċedura tal-għoti;

(v)

jipprova jikseb informazzjoni kunfidenzjali li tista’ tirriżulta f’vantaġġi mhux xierqa għalih fil-proċedura tal-għoti;

(d)

ikun ġie stabbilit b’sentenza finali li l-applikant ikun ħati ta’ kwalunkwe wieħed mill-eżempji li ġejjin:

(i)

frodi, skont it-tifsira tal-Artikolu 3 tad-Direttiva (UE) 2017/1371 tal-Parlament Ewropew u tal-Kunsill u l-Artikolu 1 tal-Konvenzjoni dwar il-protezzjoni tal-interessi finanzjarji tal-Komunitajiet Ewropej, imfassla permezz tal-Att tal-Kunsill tas-26 ta’ Lulju 1995;

(ii)

korruzzjoni, kif definita fl-Artikolu 4(2) tad-Direttiva (UE) 2017/1371 u l-Artikolu 3 tal-Konvenzjoni dwar il-ġlieda kontra l-korruzzjoni li tinvolvi uffiċjali tal-Komunitajiet Ewropej jew uffiċjali tal-Istati Membri tal-Unjoni Ewropea, imfassla mill-Att tal-Kunsill tas-26 ta’ Mejju 1997, u l-aġir imsemmi fl-Artikolu 2(1) tad-Deċiżjoni Kwadru tal-Kunsill 2003/568/ĠAI, kif ukoll korruzzjoni kif iddefinita fil-liġi applikabbli;

(iii)

mġiba marbuta ma’ organizzazzjoni kriminali, kif imsemmija fl-Artikolu 2 tad-Deċiżjoni Kwadru tal-Kunsill 2008/841/ĠAI;

(iv)

ħasil tal-flus jew finanzjament tat-terroriżmu fis-sens tal-Artikolu 1(3), (4) u (5) tad-Direttiva (UE) 2015/849 tal-Parlament Ewropew u tal-Kunsill;

(v)

reati terroristiċi jew reati marbuta ma’ attivitajiet terroristiċi, kif definiti fl-Artikoli 1 u 3 tad-Deċiżjoni Kwadru tal-Kunsill 2002/475/ĠAI, rispettivament, jew inċitament, għajnuna, tixwix jew tentattivi għat-twettiq ta’ tali reati, kif imsemmija fl-Artikolu 4 ta’ din id-Deċiżjoni;

(vi)

tħaddim tat-tfal jew reati oħra li jikkonċernaw it-traffikar tal-bnedmin kif imsemmija fl-Artikolu 2 tad-Direttiva 2011/36/UE tal-Parlament Ewropew u tal-Kunsill;

(e)

l-applikant ikun wera nuqqasijiet sinifikanti fil-konformità mal-obbligi ewlenin tal-eżekuzzjoni ta’ kuntratt, ftehim tal-għotja jew deċiżjoni tal-għotja ffinanzjati mill-baġit tal-Unjoni, li jkunu wasslu għal terminazzjoni bikrija jew għall-applikazzjoni ta’ danni likwidati jew penali kuntrattwali oħra, jew li jkun ġie skopert wara li jkunu saru verifiki, awditjar jew investigazzjonijiet minn uffiċjal tal-awtorizzazzjoni, mill-OLAF jew mill-Qorti tal-Awdituri;

(f)

ikun ġie stabbilit b’sentenza finali jew b’deċiżjoni amministrattiva finali li l-applikant ikun wettaq irregolarità fis-sens tal-Artikolu 1(2) tar-Regolament tal-Kunsill (KE, Euratom) Nru 2988/95;

(g)

ikun ġie stabbilit b’sentenza finali jew b’deċiżjoni amministrattiva finali li l-applikant ikun ħoloq entità f’ġuriżdizzjoni differenti bil-ħsieb li jiġu evitati obbligi fiskali, soċjali jew kwalunkwe obbligu legali ieħor ta’ applikazzjoni obbligatorja fil-ġuriżdizzjoni tal-uffiċċju rreġistrat, tal-amministrazzjoni ċentrali jew tal-post prinċipali tan-negozju;

(h)

ikun ġie stabbilit b’sentenza finali jew b’deċiżjoni amministrattiva finali li entità tkun inħolqot bil-ħsieb imsemmi fil-punt (g);

(i)

għas-sitwazzjonijiet imsemmija fil-punti minn (c) sa (h) hawn fuq, l-applikant ikun soġġett għal:

(i)

fatti stabbiliti fil-kuntest ta’ awditjar jew investigazzjonijiet imwettqa mill-Uffiċċju tal-Prosekutur Pubbliku Ewropew wara l-istabbiliment tiegħu, mill-Qorti tal-Awdituri, mill-Uffiċċju Ewropew ta’ Kontra l-Frodi jew mill-awditur intern, jew kwalunkwe verifika, awditjar jew kontroll ulterjuri li jsiru taħt ir-responsabbiltà ta’ uffiċjal tal-awtorizzazzjoni ta’ istituzzjoni tal-UE, ta’ uffiċċju Ewropew jew ta’ aġenzija jew korp tal-UE;

(ii)

sentenzi mhux finali jew deċiżjonijiet amministrattivi mhux finali li jistgħu jinkludu miżuri dixxiplinari meħuda mill-korp superviżorju kompetenti responsabbli għall-verifika tal-applikazzjoni tal-istandards tal-etika professjonali;

(iii)

fatti msemmija fid-deċiżjonijiet ta’ persuni jew entitajiet li jkunu fdati b’kompiti ta’ implimentazzjoni baġitarja tal-UE;

(iv)

informazzjoni trażmessa mill-Istati Membri li jimplimentaw il-fondi mill-Unjoni;

(v)

deċiżjonijiet tal-Kummissjoni marbuta mal-ksur tal-liġi tal-kompetizzjoni tal-Unjoni jew ta’ awtorità kompetenti nazzjonali marbuta mal-ksur tal-liġi tal-kompetizzjoni nazzjonali jew tal-Unjoni; jew

(vi)

deċiżjonijiet ta’ esklużjoni minn uffiċjal tal-awtorizzazzjoni ta’ istituzzjoni tal-UE, ta’ uffiċċju Ewropew jew ta’ aġenzija jew korp tal-UE.

7.2.   Miżuri ta’ rimedju

Jekk applikant jiddikjara waħda mis-sitwazzjonijiet ta’ esklużjoni elenkati hawn fuq (ara t-Taqsima 7.1), dan irid jindika l-miżuri li jkun ħa biex jirrimedja għas-sitwazzjoni ta’ esklużjoni, u b’hekk juri l-affidabbiltà tiegħu. Dan jista’ jinkludi, pereżempju, miżuri tekniċi, ta’ organizzazzjoni jew tal-persunal li jikkoreġu l-imġiba u jipprevjenu aktar okkorrenzi, kumpens għal dannu jew ħlas ta’ multi jew ta’ kwalunkwe taxxa jew kontribuzzjoni tas-sigurtà soċjali. L-evidenza dokumentarja rilevanti li turi l-miżuri ta’ rimedju meħuda trid tiġi pprovduta fl-anness tad-dikjarazzjoni. Dan ma japplikax għas-sitwazzjonijiet imsemmija fil-punt (d) tat-Taqsima 7.1.

7.3.   Proposti li ma jintlaqgħux għas-sejħa għall-proposti

L-uffiċjal tal-awtorizzazzjoni ma għandux jagħti għotja lil applikant li:

(a)

ikun f’sitwazzjoni ta’ esklużjoni stabbilita f’konformità mat-Taqsima 7.1; jew

(b)

ikun irrappreżenta b’mod ħażin l-informazzjoni meħtieġa bħala kundizzjoni għall-parteċipazzjoni fil-proċedura jew ikun naqas milli jipprovdi din l-informazzjoni; jew

(c)

fl-imgħoddi kien involut fit-tħejjija tad-dokumenti użati fil-proċedura tal-għoti meta dan ikun jinvolvi ksur tal-prinċipju ta’ trattament indaqs, inkluż distorsjoni tal-kompetizzjoni li ma tistax tiġi rimedjata b’xi mod ieħor.

L-istess kriterji ta’ esklużjoni japplikaw għall-entitajiet affiljati.

Jistgħu jiġu imposti sanzjonijiet amministrattivi (esklużjoni) fuq l-applikanti, jew l-entitajiet affiljati fejn applikabbli, jekk xi waħda mid-dikjarazzjonijiet jew l-informazzjoni pprovduta bħala kundizzjoni għall-parteċipazzjoni f’din il-proċedura tkun falza.

7.4.   Dokumenti ta’ sostenn

L-applikanti u l-entitajiet affiljati jridu jiffirmaw dikjarazzjoni fuq l-unur tagħhom li tiċċertifika li ma jkunux f’waħda mis-sitwazzjonijiet imsemmija fl-Artikolu 136(1) u fl-Artikolu 141 tar-Regolament Finanzjarju (14), billi jimlew il-formola rilevanti mehmuża mal-formola tal-applikazzjoni li takkumpanja s-sejħa għall-proposti u li hija disponibbli fuq https://ec.europa.eu/regional_policy/en/newsroom/funding-opportunities/calls-for-proposal/

Dan l-obbligu jista’ jiġi ssodisfat b’wieħed mill-modi li ġejjin:

Għall-għotjiet lil benefiċjarju wieħed:

(i)

l-applikant jiffirma dikjarazzjoni f’ismu u f’isem l-entitajiet affiljati tiegħu; JEW

(ii)

l-applikant u l-entitajiet affiljati tiegħu kollha jiffirmaw dikjarazzjoni separata f’isimhom.

Għall-għotjiet lil diversi benefiċjarji:

(i)

il-koordinatur ta’ konsorzju jiffirma dikjarazzjoni f’isem l-applikanti kollha u l-entitajiet affiljati tagħhom; JEW

(ii)

kull applikant fil-konsorzju jiffirma dikjarazzjoni f’ismu u f’isem l-entitajiet affiljati tiegħu; JEW

(iii)

kull applikant fil-konsorzju u l-entitajiet affiljati kollha jiffirmaw dikjarazzjoni separata f’isimhom.

8.   KRITERJI TAL-GĦAŻLA

8.1.   Kapaċità finanzjarja

L-applikanti jrid ikollhom sorsi stabbli u suffiċjenti ta’ finanzjament biex iżommu l-attività tagħhom tul id-durata tal-għotja u biex jipparteċipaw fil-finanzjament tagħha. Il-kapaċità finanzjarja tal-applikanti se tiġi vvalutata abbażi tad-dokumenti ta’ sostenn li ġejjin li jridu jiġu ppreżentati flimkien mal-applikazzjoni:

—

dikjarazzjoni fuq l-unur tagħhom, u

JEW

—

ir-rapport tal-introjtu kif ukoll il-karta tal-bilanċ għall-aħħar sentejn finanzjarji li għalihom ikunu ngħalqu l-kontijiet;

—

għal entitajiet ġodda li għadhom kemm inħolqu: il-pjan ta’ direzzjoni tan-negozju jaf jieħu post id-dokumenti msemmija hawn fuq;

JEW

—

it-tabella prevista fil-formola tal-applikazzjoni, kompluta biċ-ċifri statutorji tal-kontabbiltà rilevanti, sabiex jiġu kkalkulati l-proporzjonijiet kif deskritt fil-formola.

Abbażi tad-dokumenti ppreżentati, jekk il-Kummissjoni tqis li l-kapaċità finanzjarja tkun dgħajfa, hija tista’:

—

titlob aktar informazzjoni;

—

tiddeċiedi li ma tagħtix prefinanzjament;

—

tiddeċiedi li tagħti prefinanzjament f’pagamenti parzjali;

—

tiddeċiedi li tagħti prefinanzjament kopert minn garanzija bankarja (ara t-Taqsima 11.6.2 hawn taħt);

—

fejn applikabbli, titlob l-obbligazzjoni finanzjarja in solidum tal-kobenefiċjarji kollha.

Jekk l-Uffiċjal tal-Awtorizzazzjoni Responsabbli jqis li l-kapaċità finanzjarja ma tkunx biżżejjed, huwa jiċħad l-applikazzjoni.

8.2.   Kapaċità operazzjonali

L-applikanti jrid ikollhom il-kompetenzi professjonali kif ukoll il-kwalifiki xierqa meħtieġa biex ilestu l-azzjoni proposta. F’dan ir-rigward, l-applikanti jridu jippreżentaw dikjarazzjoni fuq l-unur tagħhom, u d-dokumenti ta’ sostenn li ġejjin:

—

lista ta’ proġetti/attivitajiet preċedenti mwettqa u relatati mas-sejħa jew lista ta’ attivitajiet li twettqu fl-aħħar sentejn (massimu ta’ 4 proġetti/attivitajiet).

Jistgħu jintalbu dokumenti ta’ sostenn addizzjonali biex tiġi kkonfermata l-kapaċità operazzjonali.

9.   KRITERJI GĦALL-GĦOTI

L-applikazzjonijiet/proġetti eliġibbli jiġu vvalutati abbażi tal-kriterji li ġejjin:

 

Kriterji

Elementi li jridu jiġu kkunsidrati

Ponderazzjoni (punti)

1.

Ir-rilevanza tal-miżura u l-kontribut għall-objettivi tas-sejħa għall-proposti

—

Ir-rilevanza tal-objettivi tal-proposta fir-rigward tal-objettivi u l-prijoritajiet tas-sejħa għall-proposti

—

Ir-rilevanza tat-tipi ta’ azzjonijiet ta’ informazzjoni użati fir-rigward tar-reġjun(i)

—

Il-valur miżjud għall-inizjattivi eżistenti fir-reġjuni tal-Ewropa

—

Il-karattru innovattiv tal-proġett fir-rigward tal-evoluzzjoni tal-panorama tal-komunikazzjoni.

30 punt; (livell limitu minimu ta’ 50 %)

2.

Sensibilizzazzjoni u effettività tal-miżura

—

Objettivi speċifiċi rilevanti, li jistgħu jitkejlu u jintlaħqu, rigward is-sensibilizzazzjoni u t-tixrid

—

L-abbiltà tal-pjan ta’ sensibilizzazzjoni (inkluż pereżempju skeda tax-xandir, kanal(i) tad-distribuzzjoni u għadd ta’ kuntatti garantiti abbażi tar-rekords preċedenti) biex jintlaħaq kemm jista’ jkun pubbliku destinatarju possibbli fil-livell lokali, reġjonali, multireġjonali u nazzjonali (effett multiplikatur), pereżempju permezz ta’ kooperazzjoni tal-applikanti man-netwerks u/jew mal-atturi/midja reġjonali

—

L-effettività tal-metodoloġiji proposti biex jintlaħqu l-objettivi ta’ din is-sejħa, inklużi metodi biex: jiġi prodott il-kontenut, jiġi mmonitorjat il-progress, tiġi żgurata l-indipendenza editorjali, jinbnew soluzzjonijiet tekniċi u jiġu evalwati r-riżultati tal-proġett

—

Il-pubbliċità ppjanata għall-attivitajiet u l-metodi għat-tixrid tar-riżultati

—

Il-possibbiltajiet għat-tkomplija tal-proġett lil hinn mill-perjodu mitlub għall-appoġġ tal-UE

40 punt; (livell limitu minimu ta’ 50 %)

3.

L-effiċjenza tal-miżura

—

Il-kosteffettività rigward ir-riżorsi proposti, billi jiġu kkunsidrati l-kostijiet kif ukoll ir-riżultati mistennija

20 punt; (livell limitu minimu ta’ 50 %)

4.

L-organizzazzjoni tat-tim tal-proġett u l-kwalità tal-ġestjoni tal-proġett

—

Il-kwalità tal-mekkaniżmi ta’ koordinazzjoni proposti, is-sistemi ta’ kontroll tal-kwalità u l-arranġamenti biex jiġu ġestiti r-riskji

—

Il-kwalità tal-allokazzjoni tal-kompiti bil-għan li jiġu implimentati l-attivitajiet tal-miżura proposta

10 punti; (livell limitu minimu ta’ 50 %)

Se jingħata massimu ta’ 100 punt għall-kwalità tal-proposta. Il-punteġġ globali minimu meħtieġ huwa 60 punt minn 100, filwaqt li punteġġ minimu ta’ 50 % huwa meħtieġ għal kull kriterju. Il-proposti li jissodisfaw il-livelli limiti ta’ kwalità msemmija hawn fuq biss se jitpoġġew fuq il-lista ta’ klassifika. Li jintlaħaq il-livell limitu ma jimplikax awtomatikament li tingħata l-għotja.

10.   IMPENJI LEGALI

Fil-każ ta’ għotja mogħtija mill-Kummissjoni, jintbagħat ftehim tal-għotja lill-applikant, imfassal fil-munita euro u li jiddeskrivi l-kundizzjonijiet u l-livell ta’ finanzjament, flimkien mal-informazzjoni dwar il-proċedura għall-formalizzazzjoni tal-ftehim tal-partijiet.

L-ewwel, il-benefiċjarju jew il-koordinatur irid jiffirma żewġ kopji tal-ftehim oriġinali f’isem il-konsorzju qabel ma jibgħathom lura minnufih lill-Kummissjoni. Il-Kummissjoni tkun l-aħħar li tiffirmahom.

L-applikanti jifhmu li s-sottomissjoni ta’ applikazzjoni għal għotja timplika l-aċċettazzjoni tal-kundizzjonijiet ġenerali mehmuża ma’ din is-sejħa għall-proposti. Dawn il-kundizzjonijiet ġenerali jorbtu lill-benefiċjarju li lilu tingħata l-għotja u għandhom jikkostitwixxu anness għad-deċiżjoni tal-għotja.

11.   DISPOŻIZZJONIJIET FINANZJARJI

11.1.   Forom tal-għotja

11.1.1.   Rimborż tal-kostijiet imġarrba realment

L-għotja tiġi ddefinita bl-applikazzjoni ta’ rata massima ta’ kofinanzjament ta’ 80 % għall-kostijiet eliġibbli mġarrba realment u ddikjarati mill-benefiċjarju u mill-entitajiet affiljati tiegħu.

Għad-dettalji dwar l-eliġibbiltà tal-kostijiet, irreferi għat-Taqsima 11.2.

11.1.2.   Rimborż tal-kostijiet eliġibbli ddikjarati abbażi ta’ rata fissa

L-għotja tiġi ddefinita bl-applikazzjoni ta’ rata massima ta’ kofinanzjament ta’ 80 % għall-kostijiet eliġibbli ddikjarati mill-benefiċjarju u mill-entitajiet affiljati tiegħu abbażi ta’:

(a)

rata fissa ta’ 7 % tal-kostijiet diretti eliġibbli (“rimborż ta’ kostijiet b’rata fissa”) għall-kategoriji ta’ kostijiet li ġejjin: kostijiet indiretti.

Ir-rata fissa titħallas wara l-aċċettazzjoni tal-kostijiet li għalihom trid tiġi applikata r-rata fissa.

11.2.   Kostijiet eliġibbli

Il-kostijiet eliġibbli għandhom jissodisfaw il-kriterji kollha li ġejjin:

—

ikunu mġarrba mill-benefiċjarju.

—

jiġġarrbu matul id-durata tal-azzjoni, bl-eċċezzjoni tal-kostijiet marbuta mar-rapporti finali u maċ-ċertifikati tal-awditjar;

—

Il-perjodu ta’ eliġibbiltà tal-kostijiet jibda kif speċifikat fil-ftehim tal-għotja.

—

Jekk benefiċjarju jkun jista’ juri l-ħtieġa li jibda l-azzjoni qabel ma jiġi ffirmat il-ftehim, il-perjodu ta’ eliġibbiltà tal-kostijiet jista’ jibda qabel dak l-iffirmar. Il-perjodu ta’ eliġibbiltà fl-ebda ċirkustanza ma jista’ jibda qabel id-data tal-preżentazzjoni tal-applikazzjoni għall-għotja.

—

ikunu indikati fl-estimu tal-baġit tal-azzjoni;

—

ikunu meħtieġa għall-implimentazzjoni tal-azzjoni li tkun is-suġġett tal-għotja;

—

ikunu identifikabbli u verifikabbli, u b’mod partikolari jkunu rreġistrati fir-rekords kontabilistiċi tal-benefiċjarju u kkalkolati skont l-istandards kontabilistiċi applikabbli tal-pajjiż fejn ikun stabbilit il-benefiċjarju u skont il-prattika kontabilistika komuni tal-kostijiet tal-benefiċjarju;

—

ikunu konformi mar-rekwiżiti tal-leġiżlazzjoni fiskali u soċjali applikabbli;

—

ikunu raġonevoli, iġġustifikati, u jikkonformaw mal-prinċipju ta’ ġestjoni finanzjarja tajba, b’mod partikolari rigward l-ekonomija u l-effiċjenza.

Il-proċeduri interni ta’ kontabbiltà u ta’ awditjar tal-benefiċjarju jridu jippermettu r-rikonċiljazzjoni diretta tal-kostijiet u tad-dħul iddikjarati fir-rigward tal-azzjoni/proġett mad-dikjarazzjonijiet kontabilistiċi u mad-dokumenti ta’ sostenn korrispondenti.

L-istess kriterji japplikaw għall-kostijiet li jiġġarrbu mill-entitajiet affiljati.

Il-kostijiet eliġibbli jistgħu jkunu diretti jew indiretti.

11.2.1.   Kostijiet diretti eliġibbli

Il-kostijiet diretti eliġibbli għall-azzjoni huma dawk il-kostijiet li:

filwaqt li jitqiesu l-kundizzjonijiet ta’ eliġibbiltà stabbiliti hawn fuq, ikunu identifikabbli bħala kostijiet speċifiċi marbuta direttament mat-twettiq tal-azzjoni u li għaldaqstant jistgħu jiġu assenjati direttament lilha, bħal pereżempju:

(a)

il-kostijiet tal-persunal li jaħdem b’kuntratt ta’ impjieg mal-benefiċjarju jew b’att ta’ ħatra ekwivalenti u li jkun assenjat għall-azzjoni, sakemm dawn il-kostijiet ikunu konformi mal-politika normali tal-benefiċjarju dwar ir-remunerazzjoni.

Dawn il-kostijiet jinkludu s-salarji reali flimkien mal-kontribuzzjonijiet tas-sigurtà soċjali u kostijiet statutorji oħra inklużi fir-remunerazzjoni. Jistgħu jinkludu wkoll remunerazzjonijiet addizzjonali, inklużi l-pagamenti abbażi ta’ kuntratti supplimentari, tkun xi tkun in-natura ta’ dawk il-kuntratti, bil-kundizzjoni li dawn jitħallsu b’mod konsistenti kull meta jkun meħtieġ l-istess tip ta’ xogħol jew għarfien espert, ikun xi jkun is-sors ta’ finanzjament li jintuża;

Il-kostijiet tal-persuni fiżiċi li jaħdmu b’kuntratt mal-benefiċjarju li mhuwiex kuntratt ta’ impjieg jew li huma ssekondati bi ħlas minn parti terza lill-benefiċjarju jistgħu jiġu inklużi wkoll f’dawn il-kostijiet tal-persunal, dment li jissodisfaw il-kundizzjonijiet li ġejjin:

(i)

il-persuna taħdem b’kundizzjonijiet simili għal dawk ta’ impjegat (b’mod partikolari fir-rigward tal-mod kif ikun organizzat ix-xogħol, il-kompiti li jitwettqu u l-post fejn jitwettqu);

(ii)

ir-riżultat tax-xogħol jappartjeni lill-benefiċjarju (sakemm ma jkunx miftiehem mod ieħor b’mod eċċezzjonali); u

(iii)

il-kostijiet ma jkunux differenti b’mod sinifikanti mill-kostijiet tal-persunal li jwettaq kompiti simili b’kuntratt ta’ impjieg mal-benefiċjarju;

Il-metodi rakkomandati biex jiġu kkalkolati l-kostijiet diretti tal-persunal huma pprovduti fl-Appendiċi.

(b)

il-kostijiet tal-ivvjaġġar u l-indennizzi tas-sussistenza relatati, dment li dawn il-kostijiet ikunu konformi mal-prattiki tas-soltu tal-benefiċjarju dwar l-ivvjaġġar;

(c)

il-kostijiet tad-deprezzament tat-tagħmir jew ta’ assi oħra (ġodda jew użati) kif irreġistrati fid-dikjarazzjonijiet kontabilistiċi tal-benefiċjarju, dment li l-assi:

(i)

jiġi amortizzat f’konformità mal-istandards kontabilistiċi internazzjonali u skont il-prattiki kontabilistiċi tas-soltu tal-benefiċjarju; u

(ii)

jinxtara f’konformità mar-regoli dwar il-kuntratti ta’ implimentazzjoni stipulati fil-ftehim tal-għotja, jekk il-bejgħ ikun sar fil-perjodu tal-implimentazzjoni;

Il-kostijiet tal-kiri jew tal-kiri fit-tul ta’ tagħmir jew ta’ assi oħra huma eliġibbli wkoll, dment li dawn il-kostijiet ma jeċċedux il-kostijiet tad-deprezzament tat-tagħmir jew ta’ assi simili u dment li jeskludu kwalunkwe tariffa ta’ finanzjament;

Biex jiġu ddeterminati l-kostijiet eliġibbli jistgħu jitqiesu biss dak il-porzjon tal-kostijiet tad-deprezzament, tal-kiri jew tal-kiri fit-tul tat-tagħmir li jikkorrispondi għall-perjodu ta’ implimentazzjoni u r-rata tal-użu reali għall-finijiet tal-azzjoni. Bħala eċċezzjoni, il-kost totali tax-xiri tat-tagħmir jista’ jkun eliġibbli skont il-Kundizzjonijiet Speċjali jekk dan ikun iġġustifikat min-natura tal-azzjoni u fil-kuntest tal-użu tat-tagħmir jew tal-assi;

(d)

il-kostijiet tal-oġġetti ta’ konsum u ta’ provvisti, dment li dawn:

(i)

jinxtraw f’konformità mar-regoli dwar il-kuntratti ta’ implementazzjoni stipulati fil-ftehim tal-għotja; u

(ii)

ikunu assenjati direttament għall-azzjoni;

(e)

il-kostijiet li jirriżultaw direttament mir-rekwiżiti imposti mill-Ftehim (it-tixrid ta’ informazzjoni, l-evalwazzjoni speċifika tal-azzjoni, l-awditjar, it-traduzzjonijiet, ir-riproduzzjoni), inklużi l-kostijiet tal-garanziji finanzjarji mitluba, dment li s-servizzi korrispondenti jinxtraw f’konformità mar-regoli dwar il-kuntratti ta’ implementazzjoni stabbiliti fil-ftehim ta’ għotja;

(f)

il-kostijiet li jirriżultaw minn sottokuntratti, dment li l-kundizzjonijiet speċifiċi dwar is-sottokuntrattar kif stipulati fil-ftehim tal-għotja jiġu ssodisfati;

(g)

il-kostijiet ta’ appoġġ finanzjarju lil partijiet terzi, dment li l-kundizzjonijiet stipulati fil-ftehim tal-għotja jkunu ssodisfati;

(h)

id-dazji, it-taxxi u l-imposti mħallsa mill-benefiċjarju, b’mod partikulari t-taxxa fuq il-valur miżjud (VAT), dment li dawn ikunu inklużi fil-kostijiet diretti eliġibbli, u sakemm ma jiġix speċifikat mod ieħor fil-ftehim ta’ għotja.

11.2.2.   Kostijiet indiretti eliġibbli (kostijiet ġenerali)

Il-kostijiet indiretti huma kostijiet li ma jkunux marbuta direttament mal-implimentazzjoni tal-azzjoni u għaldaqstant ma jistgħux jiġu attribwiti direttament għaliha.

Ammont b’rata fissa ta’ 7 % tal-kostijiet diretti totali eliġibbli tal-azzjoni huwa eliġibbli bħala kostijiet indiretti, li jirrappreżenta l-kostijiet amministrattivi ġenerali tal-benefiċjarju li jistgħu jitqiesu bħala debitabbli fuq l-azzjoni/il-proġett.

Il-kostijiet indiretti jaf ma jinkludux il-kostijiet li jiddaħħlu f’intestatura oħra tal-baġit.

L-applikanti tajjeb li jinnotaw il-fatt li jekk qed jirċievu għotja operattiva ffinanzjata mill-baġit tal-UE jew tal-Euratom, dawn ma jistgħux jiddikjaraw kostijiet indiretti għall-perjodu/i kopert(i) mill-għotja operattiva, sakemm ma jkunux jistgħu juru li l-għotja operattiva ma tkopri l-ebda kost tal-azzjoni.

Sabiex dan jintwera, fil-prinċipju, jenħtieġ li l-benefiċjarju:

a.

juża l-kontabbiltà analitika tal-kostijiet li tippermetti li jiġu sseparati l-kostijiet kollha (inkluż il-kostijiet ġenerali) li jistgħu jiġu attribwiti lill-għotja operattiva u lill-għotja għall-azzjoni. Għal dak il-għan, jenħtieġ li l-benefiċjarju juża kodiċijiet kontabilistiċi u koeffiċjenti ta' distribuzzjoni affidabbli biex jiġi żgurat li l-allokazzjoni tal-kostijiet issir b’mod ġust, oġġettiv u realistiku.

b.

jirreġistra b’mod separat:

—

il-kostijiet kollha mġarrba għall-għotjiet operattivi (jiġifieri l-kostijiet tal-persunal, il-kostijiet operazzjonali ġenerali u kostijiet operattivi oħra marbuta mal-parti tal-attivitajiet annwali tas-soltu tiegħu), u

—

il-kostijiet kollha mġarrba għall-għotjiet għall-azzjoni (inkluż il-kostijiet indiretti reali marbuta mal-azzjoni)

Jekk l-għotja operattiva tkopri l-attività annwali kollha u l-baġit tas-soltu tal-benefiċjarju, dan tal-aħħar ma jkun intitolat li jirċievi l-ebda kost indirett skont l-għotja għall-azzjoni.

11.3.   Kostijiet ineliġibbli

L-entrati li ġejjin ma jitqisux bħala kostijiet eliġibbli:

a)

id-dħul minn kapital u d-dividendi mħallsa minn benefiċjarju;

b)

id-dejn u l-imposti tas-servizzi fuq id-dejn;

c)

il-provvedimenti għat-telf jew għad-djun;

d)

l-imgħax dovut;

e)

id-djun dubjużi;

f)

it-telf mill-kambju;

g)

il-kostijiet tat-trasferimenti mill-Kummissjoni imposti mill-bank ta’ benefiċjarju;

h)

il-kostijiet iddikjarati mill-benefiċjarju skont azzjoni oħra li tirċievi għotja ffinanzjata mill-baġit tal-Unjoni. Dawn l-għotjiet jinkludu għotjiet mogħtija minn Stat Membru u ffinanzjati mill-baġit tal-Unjoni u għotjiet mogħtija minn korpi oħra li mhumiex il-Kummissjoni għall-iskop tal-implimentazzjoni tal-baġit tal-Unjoni. B’mod partikolari, il-benefiċjarji li jirċievu għotja operattiva ffinanzjata mill-baġit tal-UE jew tal-Euratom ma jistgħux jiddikjaraw kostijiet indiretti għall-perjodu/i kopert/i mill-għotja operattiva, sakemm ma jkunux jistgħu juru li l-għotja operattiva ma tkopri l-ebda kost tal-azzjoni.

i)

il-kontribuzzjonijiet in natura minn partijiet terzi;

j)

in-nefqa eċċessiva jew bl-addoċċ;

k)

il-VAT deduċibbli.

Il-VAT (15) ma tkunx eliġibbli meta l-attivitajiet li għandhom jiġu appoġġati permezz tal-għotja jkunu attivitajiet intaxxati/attivitajiet eżentati bid-dritt tat-tnaqqis jew attivitajiet li jkunu involuti fihom korpi regolati bil-liġi pubblika li jaġixxu bħala awtorità pubblika ta’ Stat Membru (jiġifieri attivitajiet li jirriżultaw mill-eżerċizzju tas-setgħat sovrani jew il-prerogattivi eżerċitati mill-Istati Membri taħt ir-reġim legali speċjali applikabbli għalihom f’konformità mal-Artikolu 13(1) tad-Direttiva tal-Kunsill 2006/112/KE (16): pereżempju l-pulizija, il-ġustizzja, id-definizzjoni u l-infurzar tal-ordni pubbliku, eċċ.).

11.4.   Baġit ibbilanċjat

Il-baġit stmat tal-azzjoni irid jinhemeż mal-formola tal-applikazzjoni. Dan irid ikollu d-dħul u n-nefqa bbilanċjati.

Il-baġit irid jitfassal f’euro.

Jenħtieġ li l-applikanti li mhux se jġarrbu l-kostijiet f’euro jużaw ir-rata tal-kambju ppubblikata fis-sit web tal-Infor-euro disponibbli fuq:

http://ec.europa.eu/budget/contracts_grants/info_contracts/inforeuro/inforeuro_en.cfm

L-applikant irid jiżgura li r-riżorsi li huma meħtieġa biex titwettaq l-azzjoni jistgħu ma jkunux ipprovduti għalkollox fl-għotja finanzjarja mill-UE.

Il-kofinanzjament tal-azzjoni jista’ jieħu l-forma ta’:

—

ir-riżorsi proprji tal-benefiċjarju,

—

l-introjtu ġġenerat mill-azzjoni jew mill-programm ta’ ħidma,

—

kontribuzzjonijiet finanzjarji mingħand partijiet terzi.

11.5.   Kalkolu tal-ammont finali tal-għotja

L-ammont finali tal-għotja jiġi kkalkulat mill-Kummissjoni meta jsir il-pagament tal-bilanċ. Il-kalkolu jinvolvi dawn il-passi:

Pass 1 — Applikazzjoni tar-rata ta’ rimborż għall-kostijiet eliġibbli u żieda tar-rata fissa

L-ammont taħt il-Pass 1 jinkiseb bl-applikazzjoni tar-rata ta’ rimborż speċifikata fit-Taqsima 11.1.1 għall-kostijiet eliġibbli realment imġarrba u aċċettati mill-Kummissjoni, inklużi l-kostijiet iddikjarati fil-forma ta’ rati fissi li r-rata ta’ kofinanzjament tapplika għalihom f’konformità mat-Taqsima 11.1.2.

Pass 2 — Limitu għall-ammont massimu tal-għotja

L-ammont totali li jitħallas lill-benefiċjarji mill-Kummissjoni ma jista’ fl-ebda ċirkustanza jaqbeż l-ammont massimu tal-għotja kif indikat fil-ftehim tal-għotja. Jekk l-ammont miksub skont il-Pass 1 ikun ogħla minn dan l-ammont massimu, l-ammont finali tal-għotja jkun limitat għal dan tal-aħħar.

Jekk il-ħidma tal-voluntiera tiġi ddikjarata bħala parti mill-kostijiet eliġibbli diretti, l-ammont finali tal-għotja jkun limitat għall-ammont tal-kostijiet eliġibbli totali approvati mill-Kummissjoni li minnu jitnaqqas l-ammont tal-ħidma tal-voluntiera approvat mill-Kummissjoni.

Pass 3 — Tnaqqis minħabba r-regola li tipprojbixxi l-profitt

“Profitt” tfisser is-surplus tad-dħul fuq il-kostijiet eliġibbli totali tal-azzjoni, fejn id-dħul huwa l-ammont miksub wara l-Passi 1 u 2 flimkien mad-dħul iġġenerat mill-azzjoni għall-benefiċjarji u l-entitajiet affiljati għajr l-organizzazzjonijiet mingħajr skop ta’ qligħ.

Il-kontribuzzjonijiet in natura u finanzjarji minn partijiet terzi mhumiex meqjusa bħala dħul.

Il-kostijiet eliġibbli totali tal-azzjoni huma l-kostijiet eliġibbli totali kkonsolidati u approvati mill-Kummissjoni. Id-dħul iġġenerat mill-azzjoni huwa d-dħul ikkonsolidat stabbilit, iġġenerat jew ikkonfermat għal benefiċjarji u entitajiet affiljati għajr l-organizzazzjonijiet mingħajr skop ta’ qligħ fid-data li fiha ssir it-talba għall-pagament tal-bilanċ.

Jekk ikun hemm profitt, dan jitnaqqas b’mod proporzjonat mar-rata finali ta’ rimborż tal-kostijiet eliġibbli reali tal-azzjoni approvata mill-Kummissjoni.

Pass 4 — Tnaqqis minħabba implimentazzjoni mhux xierqa jew ksur ta’ obbligi oħra

Jekk l-azzjoni ma tkunx ġiet implimentata sew (jiġifieri jekk ma tkunx ġiet implimentata jew tkun ġiet implimentata b’mod ħażin, parzjalment jew tard), jew jekk ikun inkiser xi obbligu ieħor skont il-Ftehim, il-Kummissjoni tista’ tnaqqas l-ammont massimu tal-għotja.

L-ammont tat-tnaqqis ikun proporzjonat skont kemm l-azzjoni tkun ġiet implimentata b’mod mhux xieraq jew skont il-gravità tal-ksur.

11.6.   Arranġamenti ta’ rrappurtar u ta’ pagament

11.6.1.   Arranġamenti ta’ pagament

Il-benefiċjarju jista’ jitlob il-pagamenti li ġejjin dment li jiġu ssodisfati l-kundizzjonijiet tal-ftehim tal-għotja (pereżempju l-iskadenzi tal-pagamenti, il-limiti massimi, eċċ.). It-talbiet għall-pagament għandhom ikunu akkumpanjati mid-dokumenti pprovduti hawn taħt u deskritti fil-ftehim tal-għotja:

Talba għall-pagament

Dokumenti ta’ akkumpanjament

Pagament ta’ prefinanzjament li jikkorrispondi għal 40 % tal-ammont massimu tal-għotja

garanzija finanzjarja (ara t-Taqsima 11.6.2)

Pagament interim wieħed:

Għall-iskop tad-determinazzjoni tal-ammont dovut bħala pagament interim, ir-rata ta’ rimborż li għandha tiġi applikata għall-kostijiet eliġibbli approvati mill-Kummissjoni għandha tkun ta’ 80 %.

Il-pagament interim ma għandux jaqbeż l-40 % tal-ammont massimu tal-għotja.

L-ammont totali tal-pagamenti ta’ prefinanzjament u tal-pagamenti interim ma għandux jaqbeż 80 % tal-ammont massimu tal-għotja.

(a)

rapport tekniku interim

(b)

dikjarazzjoni finanzjarja interim

Pagament tal-bilanċ

Il-Kummissjoni se tistabbilixxi l-ammont ta’ dan il-pagament abbażi tal-kalkolu tal-ammont finali tal-għotja (ara t-Taqsima 11.5 ta’ hawn fuq). Jekk it-total tal-pagamenti ta’ qabel ikun ogħla mill-ammont finali tal-għotja, il-benefiċjarju jkun meħtieġ jirrimborża l-ammont żejjed li jkun tħallas mill-Kummissjoni permezz ta’ ordni ta’ rkupru.

(a)

ir-rapport tekniku finali

(b)

dikjarazzjoni finanzjarja finali

(c)

id-dikjarazzjoni finanzjarja fil-qosor li taggrega d-dikjarazzjonijiet finanzjarji li jkunu diġà ġew ippreżentati qabel u li tindika r-riċevuti

F’każ ta’ kapaċità finanzjarja dgħajfa, tapplika t-Taqsima 8.1 ta’ hawn fuq.

11.6.2.   Garanzija ta’ prefinanzjament

Tista’ tintalab garanzija ta’ prefinanzjament sal-istess ammont bħall-prefinanzjament sabiex jiġu limitati r-riskji finanzjarji marbuta mal-pagament ta’ prefinanzjament.

Il-garanzija finanzjarja, fil-munita euro, għandha tingħata minn bank jew istituzzjoni finanzjarja approvata stabbilita f’wieħed mill-Istati Membri tal-UE. Meta l-benefiċjarju jkun stabbilit f’pajjiż terz, il-Kummissjoni tista’ taqbel li bank jew istituzzjoni finanzjarja stabbilit(a) f’dak il-pajjiż terz jistgħu jipprovdu l-garanzija jekk hija tqis li l-bank jew l-istituzzjoni finanzjarja joffri/toffri sigurtà u karatteristiċi ekwivalenti għal dawk offruti minn bank jew istituzzjoni finanzjarja stabbilit(a) fi Stat Membru. Ammonti li jkunu marbutin f’kontijiet il-bank ma għandhomx jiġu aċċettati bħala garanziji finanzjarji.

Il-garanzija tista’ tiġi sostitwita bi:

—

garanzija in solidum minn parti terza jew,

—

garanzija konġunta tal-benefiċjarji ta’ azzjoni li jkunu partijiet għall-istess ftehim ta’ għotja.

Il-garanzija għandha tiġi rilaxxata hekk kif il-prefinanzjament jiġi approvat gradwalment kontra pagamenti interim jew il-pagament tal-bilanċ, skont il-kundizzjonijiet stabbiliti fil-ftehim ta’ għotja.

Bħala alternattiva għat-talba ta’ garanzija fuq il-prefinanzjament, il-Kummissjoni tista’ tiddeċiedi li taqsam il-pagament tal-prefinanzjament f’diversi pagamenti parzjali.

11.7.   Kundizzjonijiet finanzjarji oħra

a)    Għotja mhux kumulattiva

Azzjoni tista’ tirċievi biss għotja waħda mill-baġit tal-UE.

b)    Nonretroattività

L-ebda għotja ma tingħata retrospettivament għal azzjonijiet diġà kompluti.

Għotja tista’ tingħata għal azzjoni li tkun diġà nbdiet biss meta l-applikant ikun jista’ juri fl-applikazzjoni għall-għotja li jeħtieġlu jibda l-azzjoni qabel ma jiġi ffirmat il-ftehim tal-għotja.

F’dawn il-każijiet, il-kostijiet eliġibbli għal finanzjament jaf ma jkunux iġġarrbu qabel id-data ta’ preżentazzjoni tal-applikazzjoni għall-għotja.

c)    Kuntratti/sottokuntrattar ta’ implimentazzjoni

Jekk l-implimentazzjoni tal-azzjoni tkun teħtieġ l-għoti ta’ kuntratti ta’ akkwist (kuntratti ta’ implimentazzjoni), il-benefiċjarju jista’ jagħti l-kuntratt f’konformità mal-prattiki tax-xiri tas-soltu tiegħu sakemm il-kuntratt jingħata lill-aktar offerta ekonomikament vantaġġuża jew lill-offerta li toffri l-orħos prezz (kif xieraq), u jiġu evitati kunflitti ta’ interess.

Il-benefiċjarju huwa mistenni li jiddokumenta b’mod ċar il-proċedura tal-offerti u li jżomm id-dokumentazzjoni f’każ li jkun hemm bżonn ta’ awditjar.

L-entitajiet li jaġixxu fil-kapaċità tagħhom bħala awtoritajiet kontraenti skont it-tifsira tad-Direttiva 2014/24/UE (17) jew entitajiet kontraenti skont it-tifsira tad-Direttiva 2014/25/UE (18) jridu jikkonformaw mar-regoli nazzjonali applikabbli dwar l-akkwist pubbliku.

Il-benefiċjarji jistgħu jissottokuntrattaw il-kompiti li jiffurmaw parti mill-azzjoni. Jekk jagħmlu dan, huma jridu jiżguraw li, minbarra l-kundizzjonijiet imsemmija hawn fuq dwar l-aqwa valur għall-flus u n-nuqqas ta’ kunflitti ta’ interess, ikun hemm konformità mal-kundizzjonijiet li ġejjin:

a)

is-sottokuntrattar ma jkoprix kompiti ewlenin tal-azzjoni;

b)

ir-rikors għas-sottokuntrattar ikun iġġustifikat minħabba n-natura tal-azzjoni u dak li jkun meħtieġ għall-implimentazzjoni tagħha;

c)

il-kostijiet stmati tas-sottokuntrattar ikunu identifikabbli b’mod ċar fl-istima tal-baġit;

d)

kwalunkwe rikors għas-sottokuntrattar, jekk ma jkunx previst fid-deskrizzjoni tal-azzjoni, jiġi kkomunikat mill-benefiċjarju u approvat mill-Kummissjoni. Il-Kummissjoni tista’ tagħti l-approvazzjoni:

(i)

qabel kwalunkwe rikors għal sottokuntrattar, jekk il-benefiċjarji jitolbu emenda

(ii)

wara rikors għal sottokuntrattar jekk is-sottokuntrattar:

—

ikun iġġustifikat speċifikament fir-rapport tekniku interim jew finali u

—

ma jkunx jinvolvi tibdil fil-ftehim dwar l-għotja finanzjarja li jixħet dubju fuq id-deċiżjoni inkwistjoni tal-għoti tal-għotja finanzjarja jew li jmur kontra t-trattament ugwali tal-applikanti;

e)

il-benefiċjarji jiżguraw li ċerti kundizzjonijiet applikabbli għall-benefiċjarji, elenkati fil-ftehim tal-għotja (pereżempju l-viżibbiltà, il-kunfidenzjalità, eċċ.), ikunu applikabbli wkoll għas-sottokuntratturi.

d)    Appoġġ finanzjarju lil partijiet terzi

L-applikazzjonijiet ma jistgħux jipprevedu l-għoti ta’ appoġġ finanzjarju lil partijiet terzi.

12.   PUBBLIĊITÀ

12.1.   Mill-benefiċjarji

Il-benefiċjarji jridu jirrikonoxxu b’mod ċar il-kontribuzzjoni tal-Unjoni Ewropea fil-pubblikazzjonijiet kollha jew fl-ambitu tal-attivitajiet li għalihom tintuża l-għotja.

F’dan ir-rigward, il-benefiċjarji huma meħtieġa jagħtu prominenza lill-isem u lill-emblema tal-Kummissjoni Ewropea fuq il-pubblikazzjonijiet, il-posters, il-programmi u prodotti oħra tagħhom kif ukoll matul attivitajiet relatati (konferenzi jew seminars, u aktar.) imwettqa taħt il-proġett kofinanzjat.

Biex jagħmlu dan, huma jridu jużaw:

—

id-dispożizzjoni li tispeċifika: “B’appoġġ finanzjarju mill-Unjoni Ewropea”

—

L-emblema hija disponibbli fuq https://europa.eu/european-union/about-eu/symbols/flag_mt

—

id-dikjarazzjonijiet ta’ ċaħda ta’ responsabbiltà li ġejjin:

Għall-pubblikazzjonijiet stampati jew f’format elettroniku:

“Din il-pubblikazzjoni ġiet prodotta bl-appoġġ finanzjarju tal-Unjoni Ewropea. Il-kontenut tagħha huwa r-responsabbiltà unika ta’ <isem l-awtur/sieħeb> u mhux neċessarjament jirrifletti l-opinjonijiet tal-Unjoni Ewropea”

Għas-siti web u l-kontijiet tal-midja soċjali:

“Dan <is-sit web/il-kont> inħoloq u huwa miżmum bl-appoġġ finanzjarju tal-Unjoni Ewropea. Il-kontenut tagħha huwa r-responsabbiltà unika ta’ <isem l-awtur/sieħeb> u mhux neċessarjament jirrifletti l-opinjonijiet tal-Unjoni Ewropea”

Għall-vidjows u materjal awdjoviżiv ieħor:

“Dan il-<vidjow/film/programm/reġistrazzjoni> ġie prodott bl-appoġġ finanzjarju tal-Unjoni Ewropea. Il-kontenut tiegħu huwa r-responsabbiltà unika ta’ <isem l-awtur/sieħeb > u mhux neċessarjament jirrifletti l-opinjonijiet tal-Unjoni Ewropea”.

Jekk dan ir-rekwiżit ma jiġix issodisfat għalkollox, l-għotja finanzjarja tal-benefiċjarju tista’ titnaqqas skont id-dispożizzjonijiet tal-ftehim dwar l-għotja finanzjarja.

Minbarra l-obbligi ta’ hawn fuq, il-benefiċjarji huma mistiedna biex (b’mod fakultattiv) jaġġornaw mappa fuq is-sit web ta’ Inforegio (billi jissottomettu entrata b’eżempji tal-azzjonijiet tagħhom).

12.2.   Mill-Kummissjoni

Bl-eċċezzjoni ta’ boroż ta’ studju mħallsa lil persuni fiżiċi u appoġġ dirett ieħor imħallas lill-persuni fiżiċi l-aktar fil-bżonn, l-informazzjoni kollha marbuta mal-għotjiet mogħtija matul sena finanzjarja għandha tiġi ppubblikata fuq sit tal-internet tal-istituzzjonijiet tal-Unjoni Ewropea mhux aktar tard mit-30 ta’ Ġunju tas-sena ta’ wara s-sena finanzjarja li fiha jkunu ngħataw l-għotjiet.

Il-Kummissjoni se tippubblika l-informazzjoni li ġejja:

—

isem il-benefiċjarju;

—

l-indirizz tal-benefiċjarju meta dan tal-aħħar ikun persuna ġuridika, ir-reġjun meta l-benefiċjarju jkun persuna fiżika, kif iddefinit fil-livell NUTS 2 (19) jekk ikun domiċiljat fl-UE jew l-ekwivalenti jekk ikun domiċiljat barra mill-UE;

—

is-suġġett tal-għotja;

—

l-ammont mogħti.

Fuq talba motivata u sostanzjata kif xieraq mill-benefiċjarju, il-pubblikazzjoni ma għandhiex issir jekk dan l-iżvelar iqiegħed f’riskju d-drittijiet u l-libertajiet tal-individwi kkonċernati, kif inhuma protetti mill-Karta tad-Drittijiet Fundamentali tal-Unjoni Ewropea, jew inkella jikkawża ħsara lill-interessi kummerċjali tal-benefiċjarji.

13.   PROĊESSAR TA’ DATA PERSONALI

It-tweġiba għal kwalunkwe sejħa għall-proposti tinvolvi r-reġistrazzjoni u l-ipproċessar ta’ data personali (bħall-isem, l-indirizz u s-CV). Din id-data tiġi pproċessata skont ir-Regolament (UE) Nru 2018/1725 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data. Sakemm ma jkunx indikat mod ieħor, il-mistoqsijiet u kwalunkwe data personali mitluba li jkun hemm bżonn għall-evalwazzjoni tal-applikazzjoni f’konformità mas-sejħa għall-proposti jiġu pproċessati biss għal dan l-għan mid-DĠ REGIO — Ġestjoni Baġitarja u Finanzjarja.

Id-data personali tista’ tiġi rreġistrata fis-Sistema ta’ Identifikazzjoni Bikrija u ta’ Esklużjoni mill-Kummissjoni, f’każ li l-benefiċjarju jkun f’xi waħda mis-sitwazzjonijiet imsemmija fl-Artikoli 136 u 141 tar-Regolament (UE, Euratom) 2018/1046 (20). Għal aktar informazzjoni ara l-Istqarrija ta’ Privatezza fuq:

https://ec.europa.eu/info/data-protection-public-procurement-procedures_mt.

14.   PROĊEDURA GĦALL-PREŻENTAZZJONI TAL-PROPOSTI

Il-proposti jridu jiġu ppreżentati sal-iskadenza stabbilita fit-Taqsima 3.

Ma hi permessa l-ebda modifika fl-applikazzjoni ladarba tgħaddi l-iskadenza għall-preżentazzjoni. Madankollu, jekk ikun hemm bżonn li jiġu ċċarati ċerti aspetti jew li jiġu kkoreġuti xi żbalji klerikali, il-Kummissjoni tista’ tikkuntattja lill-applikant matul il-proċess ta’ evalwazzjoni.

L-applikanti jiġu infurmati bil-miktub bir-riżultati tal-proċess tal-għażla.

L-applikanti huma mitluba jissottomettu l-applikazzjonijiet tagħhom permezz ta’ email f’format pdf fl-indirizz elettroniku li ġej:

REGIO-CALL-FOR-MEDIA@ec.europa.eu

Id-data u l-ħin tal-wasla tal-email bl-applikazzjoni mehmuża jikkostitwixxu l-evidenza tas-sottomissjoni.

L-applikazzjonijiet li jintbagħtu bil-posta jew bil-faks ma jiġux aċċettati.

Kuntatti

Kwalunkwe mistoqsija relatata ma’ din is-sejħa tista’ tiġi indirizzata lil REGIO-CONTRACTS@ec.europa.eu. Sabiex jiġi żgurat it-trattament effiċjenti ta’ kwalunkwe mistoqsija, inti ġentilment mitlub tindika b’mod ċar ir-referenza ta’ din is-sejħa għall-proposti fis-suġġett jew fit-test tal-email.

It-tweġibiet għall-mistoqsijiet li jiġu ppreżentati jiġu ppubblikati fil-lista tal-Mistoqsijiet u t-Tweġibiet fuq https://ec.europa.eu/regional_policy/en/newsroom/funding-opportunities/calls-for-proposal/ biex jiġi żgurat it-trattament ugwali tal-applikanti potenzjali kollha. Il-mistoqsijiet jistgħu jintbagħtu mill-applikanti fl-indirizz ta’ hawn fuq sa mhux aktar tard minn 10 ijiem qabel l-iskadenza għas-sottomissjoni tal-proposti.

Annessi:

—

Formola tal-applikazzjoni

—

Lista ta’ kontroll tad-dokumenti li jridu jiġu pprovduti

—

Mudell tal-ftehim ta’ għotja


(1)  https://ec.europa.eu/regional_policy/sources/tender/pdf/official/2020_financing_decision_ta.pdf

(2)  http://ec.europa.eu/regional_policy/en/policy/what/investment-policy/

(3)  http://www.consilium.europa.eu/en/meetings/gac/2017/04/25/

(4)  http://www.europarl.europa.eu/sides/getDoc.do?pubRef=-//EP//TEXT+REPORT+A8-2017-0201+0+DOC+XML+V0//MT&language=mt

(5)  http://ec.europa.eu/regional_policy/sources/informing/events/3005-pamhagen/20170523_joint_communication_actions.pdf

(6)  Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Ewropew għall-Affarijiet Marittimi u s-Sajd u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (b’mod partikolari l-Artikoli 115-117 tiegħu u l-Anness XII) (ĠU L 347, 20.12.2013, p. 320).

(7)  Għall-finijiet ta’ din is-sejħa għall-proposti, “miżura ta’ informazzjoni” hija sett ta’ attivitajiet ta’ informazzjoni li huma indipendenti u koerenti marbutin mal-Politika ta’ Koeżjoni tal-UE.

(8)  Permezz ta’ din is-sejħa għall-proposti, il-Kummissjoni Ewropea qed tappoġġa miżuri ta’ informazzjoni relatati mal-Politika ta’ Koeżjoni tal-UE, li titwettaq permezz ta’ tliet fondi prinċipali: il-Fond Ewropew għall-Iżvilupp Reġjonali (FEŻR), il-Fond ta’ Koeżjoni (FK) u l-Fond Soċjali Ewropew (FSE). F’dan is-sens, proġett li jindirizza l-impatt ta’ kwalunkwe wieħed minn dawn it-tliet Fondi f’reġjun huwa eliġibbli.

(9)  https://ec.europa.eu/info/strategy/priorities-2019-2024/european-green-deal/actions-being-taken-eu/just-transition-mechanism/just-transition-funding-sources_mt

(10)  https://ec.europa.eu/info/live-work-travel-eu/health/coronavirus-response/recovery-plan-europe_mt

(11)  Din il-lista mhijiex eżawrjenti.

(12)  Korpi rregolati bil-liġi pubblika jew korpi rregolati bil-liġi privata b’missjoni ta’ servizz pubbliku.

(13)  Il-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika.

(14)  Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni (ĠU L 193, 30.7.2018, p.1).

(15)  L-Artikolu 186 (4) (c) tar-Regolament Finanzjarju

(16)  ĠU L 347, 11.12.2006, p. 1.

(17)  Id-Direttiva 2014/24/UE tal-Parlament Ewropew u tal-Kunsill tas-26 ta’ Frar 2014 dwar l-akkwist pubbliku u li tħassar id-Direttiva 2004/18/KE (ĠU L 94, 28.3.2014, p. 65).

(18)  Id-Direttiva 2014/25/UE tal-Parlament Ewropew u tal-Kunsill tas-26 ta’ Frar 2014 dwar l-akkwist minn entitajiet li joperaw fis-setturi tas-servizzi tal-ilma, l-enerġija, it-trasport u postali u li tħassar id-Direttiva 2004/17/KE (ĠU L 94, 28.3.2014, p. 243).

(19)  Ir-Regolament tal-Kummissjoni (KE) Nru 105/2007 tal-1 ta’ Frar 2007 li jemenda l-Annessi tar-Regolament (KE) Nru 1059/2003 tal-Parlament Ewropew u tal-Kunsill dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS) (ĠU L 39, 10.2.2007, p. 1).

(20)  https://eur-lex.europa.eu/legal-content/MT/TXT/?uri=CELEX%3A32018R1046


Appendiċi

Kundizzjonijiet speċifiċi għall-kostijiet diretti tal-persunal

1.   Kalkolu

Il-modi kif jiġu kkalkolati l-kostijiet diretti eliġibbli tal-persunal stipulati fil-punti (a) u (b) hawn taħt huma rakkomandati u aċċettati bħala li joffru aċċertament għall-kostijiet iddikjarati li jkunu reali.

Il-Kummissjoni tista’ taċċetta metodu differenti għall-kalkolu tal-kostijiet tal-persunal użat mill-benefiċjarju, jekk hija tqis li dan joffri livell xieraq ta’ aċċertament tal-kostijiet iddikjarati li jkunu reali.

a)   għall-persuni li jaħdmu esklużivament fuq l-azzjoni:

{ir-rata ta’ kull xahar għall-persuna

immultiplikata

bl-għadd ta’ xhur realment maħduma fuq l-azzjoni}

Ix-xhur iddikjarati għal dawn il-persuni ma jistgħu jiġu ddikjarati għall-ebda għotja oħra tal-UE jew tal-Euratom.

Ir-rata ta’ kull xahar hija kkalkulata kif ġej:

{il-kostijiet annwali tal-persunal għall-persuna

diviżi bi 12}

billi jintużaw il-kostijiet tal-persunal għal kull sena finanzjarja sħiħa koperta mill-perjodu ta’ rappurtar ikkonċernat.

Jekk sena finanzjarja ma tingħalaqx fit-tmiem tal-perjodu ta’ rappurtar, il-benefiċjarji jridu jużaw ir-rata ta’ kull xahar tal-aħħar sena finanzjarja magħluqa disponibbli;

b)   għall-persuni li jaħdmu part time fuq l-azzjoni

(i)

Jekk il-persuna tkun assenjata għall-azzjoni fuq pro rata fissa tal-ħin tax-xogħol tagħha:

{ir-rata ta’ kull xahar tal-persuna mmultiplikata bil-pro rata assenjata għall-azzjoni

immultiplikata

bl-għadd ta’ xhur realment maħduma fuq l-azzjoni}

Il-ħin tax-xogħol pro rata ddikjarat għal dawn il-persuni ma jista’ jiġi ddikjarat għall-ebda għotja oħra tal-UE jew tal-Euratom.

Ir-rata ta’ kull xahar hija kkalkulata bħal hawn fuq.

(ii)

F’każijiet oħra:

{ir-rata ta’ kull siegħa għall-persuna mmultiplikata bl-għadd ta’ sigħat reali maħduma fuq l-azzjoni}

jew

{ir-rata ta’ kuljum għall-persuna mmultiplikata bl-għadd ta’ ġranet reali maħduma fuq l-azzjoni}

(aġġustati ’l fuq jew ’l isfel għall-eqreb nofstanhar)

L-għadd ta’ sigħat/jiem reali ddikjarati għal persuna jrid ikun identifikabbli u verifikabbli.

L-għadd totali ta’ sigħat/jiem iddikjarati f’għotjiet tal-UE jew tal-Euratom, għal persuna għal sena, ma jistax ikun ogħla mis-sigħat/jiem produttivi annwali użati għall-kalkoli tar-rata fis-siegħa/ta’ kuljum. Għaldaqstant, l-għadd massimu ta’ sigħat/jiem li jistgħu jiġu ddikjarati għall-għotja huwa:

{l-għadd ta’ sigħat/jiem produttivi annwali għas-sena (ara hawn isfel)

li minnhom jitnaqqas

l-għadd totali ta’ sigħat u jiem iddikjarati mill-benefiċjarju, għal dik il-persuna għal dik is-sena, għal għotjiet oħrajn tal-UE jew tal-Euratom}.

Ir-“rata fis-siegħa/ta’ kuljum” hija kkalkulata kif ġej:

{il-kostijiet annwali tal-persunal għall-persuna

diviżi

bl-għadd ta’ sigħat/jiem produttivi annwali individwali}

bl-użu tal-kostijiet tal-persunal u l-għadd ta’ sigħat/jiem produttivi annwali għal kull sena finanzjarja sħiħa koperta mill-perjodu ta’ rappurtar ikkonċernat.

Jekk sena finanzjarja ma tingħalaqx fit-tmiem tal-perjodu ta’ rappurtar, il-benefiċjarji jridu jużaw ir-rata fis-siegħa/ta’ kuljum tal-aħħar sena finanzjarja magħluqa disponibbli.

L-“għadd ta’ sigħat/jiem produttivi annwali individwali” huwa l-għadd totali ta’ sigħat/jiem reali maħduma mill-persuna fis-sena. Dan ma jistax jinkludi btajjel u assenzi oħra (bħal-liv minħabba mard, il-liv tal-maternità, il-liv speċjali, eċċ.). Madankollu, jista’ jinkludi s-sahra u l-ħin li wieħed iqatta’ f’laqgħat, f’taħriġ u f’attivitajiet simili oħra.

2.   Dokumentazzjoni li tappoġġa l-kostijiet tal-persunal iddikjarati bħala kostijiet reali

Għall-persuni li jaħdmu esklużivament fuq l-azzjoni, meta l-kostijiet diretti tal-persunal jiġu kkalkulati skont il-punt (a), ma hemm l-ebda bżonn li jinżamm reġistru tal-ħinijiet, jekk il-benefiċjarju jiffirma dikjarazzjoni li tikkonferma li l-persuni kkonċernati ħadmu esklużivament fuq l-azzjoni.

Għall-persuni assenjati għall-azzjoni fuq pro rata fissa tal-ħin tax-xogħol tagħhom, meta l-kostijiet diretti tal-persunal jiġu kkalulati skont il-punt (b)(i), ma hemm l-ebda bżonn li jinżamm reġistru tal-ħinijiet, jekk il-benefiċjarju jiffirma dikjarazzjoni li l-persuni kkonċernati jkunu effettivament ħadmu bil-pro rata fissa fuq l-azzjoni.

Għall-persuni li jaħdmu part time fuq l-azzjoni, meta l-kostijiet diretti tal-persunal jiġu kkalkulati skont il-punt (b)(ii), il-benefiċjarji jridu jżommu reġistru tal-ħinijiet għall-għadd ta’ sigħat/jiem iddikjarati. Ir-reġistru tal-ħinijiet irid ikun bil-miktub u approvat mill-persuni li jaħdmu fuq l-azzjoni u s-superviżuri tagħhom, mill-anqas darba fix-xahar.

Fin-nuqqas ta’ reġistru tal-ħinijiet affidabbli tas-sigħat maħduma fuq l-azzjoni, il-Kummissjoni tista’ taċċetta prova alternattiva li tappoġġa l-għadd ta’ sigħat/jiem iddikjarati, jekk tqis li din toffri livell adegwat ta’ aċċertament.


PROĊEDURI DWAR L-IMPLIMENTAZZJONI TAL-POLITIKA TAL-KOMPETIZZJONI

Il-Kummissjoni Ewropea

28.10.2020   

MT

Il-Ġurnal Uffiċjali tal-Unjoni Ewropea

C 362/24


Avviż minn qabel ta’ konċentrazzjoni

(Il-Każ M.9911 — Voith/PCSH/TSA)

Każ li jista’ jiġi kkunsidrat għal proċedura ssimplifikata

(Test b’rilevanza għaż-ŻEE)

(2020/C 362/05)

1.   

Fis-16 ta’ Ottubru 2020, il-Kummissjoni rċeviet avviż ta’ konċentrazzjoni proposta skont l-Artikolu 4 tar-Regolament tal-Kunsill (KE) Nru 139/2004 (1).

Dan l-avviż jikkonċerna l-impriżi li ġejjin:

—

Voith Austria GmbH (“Voith”, l-Awstrija), Teil der Voith GmbH & Co. KGaA (“Voith-Gruppe”, il-Ġermanja).

—

PCS Holding AG (“PCSH”, l-Isvizzera).

—

Traktionssysteme Austria GmbH (“TSA”, l-Awstrija).

Voith u PCSH jakkwistaw, fis-sens tal-Artikolu 3(1)(b) tar-Regolament dwar l-Għaqdiet, il-kontroll bi sħab ta’ TSA kollha kemm hi.

Il-konċentrazzjoni hija mwettqa permezz ta’ xiri ta’ ishma.

2.   

L-attivitajiet kummerċjali tal-impriżi kkonċernati huma:

—

Il-grupp Voith huwa attiv fl-oqsma li ġejjin: manifattura u bejgħ ta’ magni li jagħmlu l-karta, stallazzjonijiet li jipproduċu enerġija idroelettrika, teknoloġija tat-trażmissjoni u tal-kontroll għal vetturi kummerċjali u karozzi tal-linja, makkinarju agrikolu u tal-kostruzzjoni, materjal fuq ir-roti, applikazzjonijiet għat-tbaħħir u industrijali inkluż għal diversi setturi tal-industrija bħall-industrija tal-kimiċi u l-industrija petrokimika, l-industrija taż-żejt u tal-gass u l-industrija tal-minjieri u l-azzar. The grupp Voith huwa wkoll attive fis-setturi tal-awotmazzjoni u l-IT għall-inġinerija mekkanika u tal-impjanti.

—

PCSH, permezz tal-kumpanija li fihom għandha l-ishma, hija attiva fil-materjali bir-roti u f’vetturi bi skop speċjali għall-muniċipalitajiet u l-agrikoltura.

—

TSA timmanifattura, b’mod partikolari, mutur ta’ propulsjoni elettrika u ġeneraturi.

3.   

Wara eżami preliminari, il-Kummissjoni tqis li t-tranżazzjoni notifikata tista’ taqa’ fil-kamp ta’ applikazzjoni tar-Regolament dwar l-Għaqdiet. Madankollu, id-deċiżjoni finali dwar dan il-punt hija riżervata.

Skont l-Avviż tal-Kummissjoni dwar proċedura ssimplifikata għat-trattament ta’ ċerti konċentrazzjonijiet skont ir-Regolament tal-Kunsill (KE) Nru 139/2004 (2) jinħtieġ li jiġi nnutat li dan il-każ jista’ jiġi kkunsidrat għal trattament skont il-proċedura stabbilita fl-Avviż.

4.   

Il-Kummissjoni tistieden lil terzi persuni interessati biex jibagħtulha l-kummenti li jista’ jkollhom dwar l-operazzjoni proposta.

Il-kummenti jridu jaslu għand il-Kummissjoni mhux aktar tard minn għaxart ijiem wara d-data ta’ din il-pubblikazzjoni. Jinħtieġ li r-referenza li ġejja dejjem tiġi speċifikata:

M.9911 — Voith/PCSH/TSA

Il-kummenti jistgħu jintbagħtu lill-Kummissjoni permezz tal-email, permezz tal-faks jew permezz tal-posta. Uża d-dettalji ta’ kuntatt ta’ hawn taħt:

Email: COMP-MERGER-REGISTRY@ec.europa.eu

Faks +32 22964301

Indirizz postali:

European Commission

Directorate-General for Competition

Merger Registry

1049 Bruxelles/Brussel

BELGIQUE/BELGIË


(1)  ĠU L 24, 29.1.2004, p. 1 (“ir-Regolament dwar l-Għaqdiet”).

(2)  ĠU C 366, 14.12.2013, p. 5.


ATTI OĦRAJN

Il-Kummissjoni Ewropea

28.10.2020   

MT

Il-Ġurnal Uffiċjali tal-Unjoni Ewropea

C 362/26


Pubblikazzjoni ta’ komunikazzjoni dwar l-approvazzjoni ta’ emenda standard ta’ Speċifikazzjoni tal-Prodott għal isem fis-settur tal-inbid, kif imsemmi fl-Artikolu 17(2) u (3) tar-Regolament Delegat tal-Kummissjoni (UE) 2019/33

(2020/C 362/06)

Din il-komunikazzjoni hija ppubblikata f’konformità mal-Artikolu 17(5) tar-Regolament Delegat tal-Kummissjoni (UE) 2019/33 (1).

KOMUNIKAZZJONI DWAR L-APPROVAZZJONI TA’ EMENDA STANDARD

PROSECCO

PDO-IT-A0516-AM07

Data tal-komunikazzjoni: 14.8.2020

DESKRIZZJONI U RAĠUNIJIET TAL-EMENDA APPROVATA

1.   “Prosecco” DOP — Spumante Rosè — Fil-kategorija VS u VSQ

Jiddaħħal l-ispumanti rożè sabiex fl-isem tiġi introdotta l-produzzjoni ta’ nbid spumanti magħmul mill-varjetajiet Glera B. u Pinot Nero vinifikat bl-aħmar.

Dan it-tip ta’ prodott kien diġà mifrux fit-territorju kkonċernat, anki jekk kien jiġi prodott taħt isem ta’ kategorija differenti tal-prodott.

L-emenda tikkonċerna l-Artikolu 1,2,4,5,8 u 9 tal-Ispeċifikazzjoni tal-Prodott u t-Taqsima 4,5,8 u 9 tad-Dokument Uniku.

2.   “Prosecco” DOP — Spumante Rosè — Varjetajiet ta’ dwieli

L-inbid spumanti rożè huwa magħmul mill-varjetajiet ta’ dwieli li ġejjin: Glera B. mill-inqas 85%, massimu ta’ 90%; Pinot Nero, vinifikat bl-aħmar, mill-inqas 10% massimu ta’ 15%. Din il-kompożizzjoni tippermetti li jinkiseb il-kulur “rosé”.

L-emenda tikkonċerna l-Artikolu 2 tal-Ispeċifikazzjoni tal-Prodott u ma taffettwax id-Dokument Uniku.

3.   “Prosecco” DOP — Spumante Rożè — Rendiment tal-inbid għal kull ettaru u qawwa alkoħolika naturali minima skont il-volum

Ir-rendiment massimu tal-għeneb tal-varjetà Pinot Nero ġie stabbilit għal 13.500 kg/ha biex jippermetti konċentrazzjoni akbar ta’ sustanza li tagħti l-kulur u stabbiltà akbar tagħha.

Il-qawwa alkoħolika naturali minima skont il-volum ġiet stabbilita għal 9 % vol.

L-emenda tikkonċerna l-Artikolu 4 tal-Ispeċifikazzjoni tal-Prodott u t-Taqsima 4, 5b tad-Dokument Uniku.

4.   “Prosecco” DOP — Spumante rożè — Produzzjoni tal-inbid

Dan l-inbid għandu jiġi prodott esklussivament permezz ta’ fermentazzjoni naturali permezz ta’ awtoklava b’perjodu ta’ pproċessar ta’ mill-inqas 60 jum. Dan il-metodu ta’ produzzjoni jippermetti li l-ħmira tirrilaxxa komposti bħal mannoproteini li jwettqu azzjoni protettiva tas-sustanza li tagħti l-kulur (kumplessi antoċjanini-tannini b’piż molekulari baxx) fir-rigward tal-ossidazzjoni tad-diossidu tal-kubrit, u jkabbar il-kumplessità olfattiva u tat-togħma.

L-emenda tikkonċerna l-Artikolu 5 tal-Ispeċifikazzjoni tal-Prodott u ma tikkonċernax id-Dokument Uniku.

5.   “Prosecco” DOP — Spumante Rożè — Prattiki enoloġiċi

Fil-lottijiet tal-prodott destinati għall-preparazzjoni tal-inbid spumanti rożè u l-inbid spumanti ta’ kwalità rożè, jistgħu jiżdiedu prodotti miksubin mill-vinifikazzjoni tal-għeneb Pinot nero (bil-vinifikazzjoni fl-aħmar), fi kwantità minima ta’ 10 % u mhux ogħla minn 15 %, bil-kundizzjoni li l-vinja li minnha jiġi l-għeneb Glera B. użati fil-vinifikazzjoni, tkun ġiet ikkultivata b’varjetajiet puri jew inkella li l-preżenza tal-għeneb Pinot nero, flimkien ma’ dawk permessi għal din il-prattika, ma taqbiżx il-15 %. Din il-prattika enoloġika hija simili għal dik diġà prevista għall-inbejjed spumanti diġà preżenti u f’konformità mal-leġiżlazzjoni tal-Unjoni Ewropea.

L-emenda tikkonċerna l-Artikolu 5 tal-Ispeċifikazzjoni tal-Prodott, u kif ukoll it-taqsima 5a tad-Dokument Uniku.

6.   “Prosecco” DOP — Spumante Rożè — Karatteristiċi mal-konsum

Minħabba l-introduzzjoni tal-inbid spumanti rożè, huma indikati l-karatteristiċi fiżiko-kimiċi u organolettiċi.

L-emenda tikkonċerna l-Artikolu 6 tal-Ispeċifikazzjoni tal-Prodott, kif ukoll it-Taqsima 4 tad-Dokument Uniku.

7.   “Prosecco” DOP — Spumante Rożè — tikkettar bit-terminu "Millesimato"

Fuq it-tikketta ta’ prodott bħal dan, huwa obbligatorju li jiġi indikat it-terminu "millesimato", segwit mis-sena tal-produzzjoni tal-għeneb f’konformità mal-Artikolu 49(1) tar-Regolament (KE) Nru 2019/33.

L-emenda tikkonċerna l-Artikolu 7 tal-Ispeċifikazzjoni tal-Prodott, kif ukoll it-Taqsima 9 tad-Dokument Uniku.

8.   “Prosecco” DOP — Spumante Rożè — Rilaxx għall-konsum

Il-prodotti għandhom jiġu rilaxxati għall-konsum mill-1 ta’ Jannar tas-sena ta’ wara l-ħsad sabiex jippermettu rfinar akbar tal-prodott.

L-emenda tikkonċerna l-Artikolu 7 tal-Ispeċifikazzjoni tal-Prodott u ma tikkonċernax id-Dokument Uniku.

DOKUMENT UNIKU

1.   Isem il-prodott

“Prosecco”

2.   Tip ta’ indikazzjoni ġeografika

DOP — Denominazzjoni ta’ Oriġini Protetta

3.   Kategoriji tal-prodotti tal-inbid

1.

Inbid

4.

Inbid spumanti

5.

Inbid spumanti ta’ kwalità

6.

Inbid spumanti ta’ kwalità tat-tip aromatiku

8.

Inbid frizzanti

4.   Deskrizzjoni tal-inbid (tal-inbejjed)

“Prosecco” — inbid

Kulur: isfar lewn it-tiben;

Riħa: fina, karatteristika, tipika tal-għeneb użat;

Togħma: minn xotta għal ftit ħelwa, rinfreskanti u karatteristika;

Qawwa alkoħolika totali minima bil-volum: 10,5 % tal-volum;

Estratt mingħajr zokkor minimu: 14 g/l.

Il-parametri analitiċi l-oħra, li ma jidhrux fit-tabella ta’ hawn taħt, jirrispettaw il-limiti previsti mil-leġiżlazzjoni nazzjonali u tal-UE.

Karatteristiċi analitiċi ġenerali

Qawwa alkoħolika totali massima (f’% tal-volum):

 

Qawwa alkoħolika proprja minima (f’% tal-volum):

 

Aċidità totali minima:

4,5 fi grammi kull litru espressi bħala aċidu tartariku

Aċidità volatili massima (f’milliekwivalenti għal kull litru):

 

Total massimu totali ta’ diossidu tal-kubrit (f’milligrammi għal kull litru):

 

“Prosecco” Spumante — inbid spumanti, inbid spumanti ta’ kwalità u nbid spumanti ta’ kwalità tat-tip aromatiku

Kulur: isfar lewn it-tiben ftit jew wisq qawwi, jgħajjat, bir-ragħwa persistenti;

Riħa: fina, karatteristika, tipika tal-għeneb użat;

Togħma: minn brut nature għal demi-sec, rinfreskanti u karatteristika;

Qawwa alkoħolika totali minima bil-volum: 11 % tal-volum;

Estratt mingħajr zokkor minimu: 14 g/l.

Il-parametri analitiċi l-oħra, li ma jidhrux fit-tabella ta’ hawn taħt, jirrispettaw il-limiti previsti mil-leġiżlazzjoni nazzjonali u tal-UE.

Karatteristiċi analitiċi ġenerali

Qawwa alkoħolika totali massima (f’% tal-volum):

 

Qawwa alkoħolika proprja minima (f’% tal-volum):

 

Aċidità totali minima:

4,5 fi grammi kull litru espressi bħala aċidu tartariku

Aċidità volatili massima (f’milliekwivalenti għal kull litru):

 

Total massimu totali ta’ diossidu tal-kubrit (f’milligrammi għal kull litru):

 

“Prosecco” — inbid spumanti

Kulur: isfar lewn it-tiben ftit jew wisq qawwi, jgħajjat, bil-bżieżaq evidenti;

Riħa: fina, karatteristika, tipika tal-għeneb użat;

Togħma: minn xotta għal ftit ħelwa, rinfreskanti u karatteristika;

Qawwa alkoħolika totali minima bil-volum: 10,5 % tal-volum;

Estratt mingħajr zokkor minimu: 14 g/l.

Fit-tipoloġija frizzanti prodotti tradizzjonalment permezz tal-fermentazzjoni fil-flixkun, il-karatteristiċi organolettiċi fil-punt tal-konsum jistgħu jvarjaw:

Kulur: preżenza possibbli ta’ tleqqija;

Riħa: pjaċevoli u karatteristika bi ħjiel possibbli tal-qoxra tal-ħobż u l-ħmira;

Togħma: xott, frizzanti, tal-frott bi ħjiel possibbli tal-qoxra tal-ħobż u l-ħmira.

Il-parametri analitiċi l-oħra, li ma jidhrux fit-tabella ta’ hawn taħt, jirrispettaw il-limiti previsti mil-leġiżlazzjoni nazzjonali u tal-UE.

Karatteristiċi analitiċi ġenerali

Qawwa alkoħolika totali massima (f’% tal-volum):

 

Qawwa alkoħolika proprja minima (f’% tal-volum):

 

Aċidità totali minima:

4 grammi kull litru espressi bħala aċidu tartariku

Aċidità volatili massima (f’milliekwivalenti għal kull litru):

 

Total massimu totali ta’ diossidu tal-kubrit (f’milligrammi għal kull litru):

 

Prosecco — Spumante Rożè — Inbid spumanti, inbid spumanti ta’ kwalità

Kulur: lewn roża ftit jew wisq qawwi, jgħajjat, bir-ragħwa persistenti;

Riħa: fina, karatteristika, tipika tal-għeneb użat;

Togħma: minn brut nature sa extra dry, rinfreskanti u karatteristika;

Qawwa alkoħolika totali minima bil-volum: 11 % tal-volum;

Estratt mingħajr zokkor minimu: 14 g/l.

Il-parametri analitiċi l-oħra, li ma jidhrux fit-tabella ta’ hawn taħt, jirrispettaw il-limiti previsti mil-leġiżlazzjoni nazzjonali u tal-UE.

Karatteristiċi analitiċi ġenerali

Qawwa alkoħolika totali massima (f’% tal-volum):

 

Qawwa alkoħolika proprja minima (f’% tal-volum):

 

Aċidità totali minima:

4,5

Aċidità volatili massima (f’milliekwivalenti għal kull litru):

 

Total massimu totali ta’ diossidu tal-kubrit (f’milligrammi għal kull litru):

 

5.   Prattiki tal-produzzjoni tal-inbid

a.   Prattiki enoloġiċi speċifiċi

Il-prattika enoloġika għal-lottijiet tal-prodott destinati għall-preparazzjoni tal-inbid spumanti, l-inbid spumanti ta’ kwalità, anki tat-tip rożè

Prattika enoloġika speċifika

Fil-lottijiet tal-prodott destinati għall-preparazzjoni tal-inbid spumanti u l-inbid spumanti ta’ kwalità huwa permess li jiżdiedu prodotti miksubin mill-vinifikazzjoni tal-għeneb Chardonnay, Pinot bianco, Pinot grigio u Pinot nero (bil-vinifikazzjoni fl-abjad), waħedhom jew flimkien, fi kwantità mhux ogħla minn 15 %, bil-kundizzjoni li l-vinja, li minnha jiġi l-għeneb Glera użat fil-vinifikazzjoni, tiġi kkultivata b’varjetajiet puri jew inkella l-preżenza ta’ għeneb ta’ varjetà minuri, flimkien ma’ dawk permessi għal din il-prattika, ma għandhiex taqbeż il-15 %.

Fil-lottijiet tal-prodott destinati għall-preparazzjoni tal-inbid spumanti rożè u l-inbid spumanti ta’ kwalità rożè, jistgħu jiżdiedu prodotti miksubin mill-vinifikazzjoni tal-għeneb Pinot nero (bil-vinifikazzjoni fl-aħmar), fi kwantità minima ta’ 10 % u mhux ogħla minn 15 %, bil-kundizzjoni li l-vinja li minnha jiġi l-għeneb Glera użati fil-vinifikazzjoni, tkun ġiet ikkultivata b’varjetajiet puri jew inkella li l-preżenza tal-għeneb Pinot nero, flimkien ma’ dawk permessi għal din il-prattika, ma taqbiżx il-15 %.

b.   Rendimenti massimi għal kull ettaru

 

“Prosecco”

 

18 000 kg għeneb għal kull ettaru

 

“Prosecco”

 

135 ettolitru għal kull ettaru

 

“Prosecco” — spumante Rożè (varjetà Glera)

 

18 000 kg għeneb għal kull ettaru

 

“Prosecco” — spumante Rożè (varjetà Glera)

 

135 ettolitru għal kull ettaru

 

“Prosecco” — spumante Rożè (varjetà Pinot nero)

 

13 500 kg għeneb għal kull ettaru

 

“Prosecco” — spumante Rożè (varjetà Pinot nero)

 

101,25 ettolitru għal kull ettaru

6.   Żona ġeografika ddefinita

L-għeneb destinati għall-produzzjoni tal-inbid bid-Denominazzjoni ta’ Oriġini Kontrollata “Prosecco” jridu jiġu prodotti fiż-żona li tinkludi l-provinċji ta’: Belluno, Gorizia, Padova, Pordenone, Treviso, Trieste, Udine, Venezia u Vicenza.

7.   Il-varjetà/varjetajiet prinċipali tal-għeneb tal-inbid

Glera B. — Serprino

8.   Deskrizzjoni tar-rabta/rabtiet

“Prosecco” DOP — Il-kategoriji kollha ta’ nbid

Fatturi naturali rilevanti għar-rabta

Iż-żona areali tad-Denominazzjoni “Prosecco”, li tinsab fil-parti tal-Grigal tal-Italja, hija pjuttost ċatta b’xi żoni bl-għoljiet. Il-klima ta’ din iż-żona tal-Veneto u l-Friuli hija moderata: fit-Tramuntana ż-żona muntanjuża tal-Alpi sservi bħala lqugħ kontra l-kurrenti kesħin mit-Tramuntana, u fin-Nofsinhar il-baħar Adrijatiku huwa l-mogħdija prinċipali li permezz tagħha jasal ir-riħ tax-Xlokk, li jipprovdi biżżejjed preċipitazzjoni speċjalment fix-xhur tas-sajf, itaffi t-temperaturi u jipprovdi l-ammont ta’ l-ilma li hemm bżonn biex id-dielja tarmi r-rimjiet u tgħaqqad l-għenieqed.

Fl-aħħar tas-sajf, kif jonqsu s-sigħat ta’ xemx u bil-prevalenza ta’ rjieħ xotti tal-bora mil-Lvant, iseħħu flutwazzjonijiet sinifikanti bejn it-temperaturi ta’ binhar u billejl, u jkun hemm ukoll preżenza abbundanti ta’ sustanzi aromatiċi fl-għeneb, proprju fil-fażi aħħarija tal-maturazzjoni.

Iż-żona ta’ produzzjoni hija rikka b’minerali u mikroelementi; il-ħamrija hija l-aktar ta’ oriġini alluvjali u għandha tiswira dominanti taflija-xaħxija, bi preżenza abbundanti ta’ skeletru li ġej mill-erożjoni tad-dolomiti u mid-depożiti fluvjali, li jippermetti skular tajjeb tal-art.

Fatturi storiċi u umani

L-ewwel dokumenti li fihom jissemma l-inbid “Prosecco” jmorru lura sal-aħħar tas-seklu sbatax u jiddeskrivu nbid abjad, delikat, li joriġina mill-karst ta’ Trieste u b’mod partikolari fit-territorju ta’ “Prosecco”.

Wara dan, il-produzzjoni ta’ dan l-inbid iċċaqilqet u żviluppat l-aktar fiż-żona tal-għoljiet tal-Veneto u l-Friuli.

Is-suċċess tal-“Prosecco” huwa dovut l-aktar għall-kapaċità tal-operaturi li jiżviluppaw, sa mill-ewwel snin tas-seklu għoxrin, tekniki adatti ta’ kultivazzjoni għat-tkabbir tal-varjetà Glera, li hija b’saħħitha ħafna, sabiex jillimitaw it-tagħbija ta’ produzzjoni fuq kull pjanta u jippermettu l-maturazzjoni korretta tal-għeneb u jinżamm il-potenzjal aromatiku tal-għeneb, kif ukoll tekniki adatti ta’ pproċessar tal-inbid, permezz ta’ fermentazzjoni mill-ġdid naturali, l-ewwel fil-flixkun, imbagħad fl-awtoklava.

F’dan l-aħħar seklu, fiż-żona ta’ produzzjoni ġie żviluppat network ta’ professjonisti ta’ livell għoli tekniku u xjentifiku li għandu l-għan li jipperfezzjona l-metodu ta’ produzzjoni tal-“Prosecco” li jippermetti li jiġu enfasizzati l-karatteristiki li l-konsumaturi nazzjonali u internazzjonali japprezzaw. Fattur determinanti kien il-kapaċità tal-operaturi li jesperimentaw u jtejbu t-teknoloġiji tal-vinifikazzjoni u tal-ipproċessar tal-inbid spumanti anki permezz tal-użu tal-għeneb iswed vinifikat fl-aħmar, li jippermettu li jiggarantixxu l-kwalitajiet distintivi tad-denominazzjoni anki għal spumanti rożè.

Ir-rabta kawżali bejn l-ambjent ġeografiku u l-ispeċifiċitajiet tal-prodotti

Il-klima moderata, bil-preżenza ta’ xita u r-riħ sħun tax-Xlokk matul is-sajf, tiddetermina l-iżvilupp korrett tad-dwieli matul il-fażi veġetattiva.

Il-flutwazzjonijiet fit-temperaturi bejn binhar u billejl u l-irjieħ prevalentament xotti tal-bora fil-fażi finali tal-maturazzjoni tal-għeneb, jivvaforixxu l-persistenza ta’ sustanzi “aċidużi” kif ukoll il-produzzjonji ta’ kwantità sinfikanti ta’ prekursuri aromatiċi li jiddefinixxu l-irwejjaħ tipiċi floreali u tal-frott tal-inbid “Prosecco”.

Il-ħamrija alluvjali, b’tiswira taflija-xaħxija, hija pjuttost fertili u tippermetti li jinkisbu produzzjonijiet bi kwantitajiet ottimali, filwaqt li tivvaforixxi akkumulazzjoni moderata ta’ zokkor u tipprovdi l-minerali u l-mikroelementi meħtieġa biex tinkiseb kompożizzjoni kimika u sensorjali tal-għeneb bilanċjata, li tippermetti li jinkiseb inbid bażi għall-inbid frizzanti u għall-inbid spumanti mhux eċċessivament alkoħoliċi u bi profil sensorjali/tat-togħma rinfreskanti, xott u tal-frott, li huwa karatteristika tal-“Prosecco”.

It-tipoloġija tal-għeneb prodott u tal-Glera b’mod partikolari, hija karatterizzata minn akkumulazzjoni moderata ta’ zokkor u preżenza tajba ta’ aċidità u sostanzi aromatiċi, li jippermettu li jinkiseb inbid bażi, b’kontenut baxx ta’ alkoħol u li huwa pjaċevolment aromatiku.

L-inbid “Prosecco”, fil-verżjonijiet spumanti u frizzanti, huwa tipikament xott, bi profil sensorjali b’kulur isfar lewn it-tiben, jgħajjat, jew roża ċar fil-każ tat-tip spumanti rożè, b’perlage fin, ibbilanċjat bil-preżenza persistenti tar-ragħwa.

Ir-riħa tal-inbid hija karatterizzata minn noti notevoli ta’ floreali (fjuri bojod, u għall-verżjoni spumanti rożè anki fjuri ħomor) u tal-frott (tuffieħ, lanġas, frott eżotiku u taċ-ċitru, fil-verżjoni spumanti rożè anki aroma ta’ frawli u lampun) li jesprimu eleganza u finezza. It-togħma hija bilanċjata bejn il-komponenti taz-zokkor u l-aċidità, li flimkien mat-togħma bnina jagħtu palat rinfreskanti, ħafif u vivaċi.

Sabiex jissaħħu l-karatteristiċi ta’ dan l-inbid partikolari fil-verżjoni spumanti jintuża l-metodu “Martinotti” li jipprevedi l-fermentazzjoni mill-ġdid naturali tal-inbid bażi f’reċipjenti kbar jew awtoklavi.

Il-“Prosecco” b’hekk jesprimi aħjar il-potenzjal tiegħu aromatiku u pjaċevoli, it-tipiċità u l-freskezza.

Ta’ min isemmi l-produzzjoni, għalkemm limitata, tal-inbid “Prosecco” mhux frizzanti, li għandu profil sensorjali simili għat-tipoloġiji preċedenti, imma li għandu riħa ta’ frott u togħma iktar bnina u palat iktar qawwi.

Bħala tali l-inbejjed tad-DOP “Prosecco” huma rikonoxxuti minn konsumaturi nazzjonali u internazzjonali.

9.   Kunsiderazzjonijiet oħra essenzjali (imballaġġ, tikkettar, rekwiżiti oħra)

“Prosecco” DOP

Qafas ġuridiku:

Fil-leġiżlazzjoni tal-Unjoni

Tip ta’ kundizzjoni addizzjonali:

Deroga għall-produzzjoni fiż-żona ġeografika ddefinita

Deskrizzjoni tal-kundizzjoni:

L-operazzjonijiet tal-ipproċessar tat-tipoloġiji kollha ta’ nbid, skont id-deroga msemmija fl-Artikolu 5(1)(a) tar-Regolament UE 2019/33, jistgħu jitwettqu wkoll fit-territorju amministrattiv tal-komuni tal-provinċja ta’ Verona li jikkonfinaw maż-żona tal-produzzjoni ddefinita, imma huma limitati għall-għeneb li jiġi mill-vinji li kienu qed jitħaddmu fit-30 ta’ Novembru 2011. Barra dan, b’awtorizzazzjonijiet individwali maħruġa mill-Ministeru, dawn l-operazzjonijiet jistgħu jitwettqu anke fil-provinċji l-oħra li jikkonfinaw maż-żona ta’ produzzjoni ddefinita.

Barra dan, il-proċess tal-produzzjoni tar-ragħwa tal-inbid bażi għall-kategoriji “frizzanti” u “spumanti” b’awtorizzazzjonijiet individwali maħruġa mill-Ministeru, filwaqt li tingħata kunsiderazzjoni lis-sitwazzjonijiet tradizzjonali tal-produzzjoni, jistgħu jitwettqu, skont l-Artikolu 5(2) tar-Regolament UE 2019/33, anki lil hinn mill-viċinanzi immedjati taż-żona ġeografika ddefinita.

“Prosecco” DOP — Unità ġeografika miżjuda

Qafas ġuridiku:

Fil-leġiżlazzjoni tal-Unjoni

Tip ta’ kundizzjoni addizzjonali:

Rekwiżiti addizzjonali dwar it-tikkettar

Deskrizzjoni tal-kundizzjoni:

Fid-denominazzjoni tal-“Prosecco”, it-tikketta tista’ tinkludu r-referenza “provincia di Treviso” jew “Treviso” jew “provincia di Trieste” jew “Trieste” jew “Pokrajina Trst” jew “Trst”, dejjem jekk il-lottijiet ikunu magħmulin esklussivament minn għeneb miġbur minn vinji li jinsabu fil-provinċji rilevanti u l-ipproċessar tagħhom u l-imballaġġ tal-prodott isiru fl-istess provinċja tal-produzzjoni tal-għeneb kif previst mill-Artikolu 55 tar-Regolament Nru 2019/33 u l-Artikolu 120(1)(g) tar-Regolament (UE) Nru 1308/2015.

“Prosecco” DOP

Qafas ġuridiku:

Fil-leġiżlazzjoni tal-Unjoni

Tip ta’ kundizzjoni addizzjonali:

Ibbottiljar fiż-żona ġeografika demarkata

Deskrizzjoni tal-kundizzjoni:

Id-dispożizzjonijiet dwar l-ibbottiljar fiż-żona demarkata huma stabbiliti, u koerenti mal-leġiżlazzjoni tal-Unjoni (l-Artikolu 4(2) tar-Regolament UE 2019/33). B’konformità mal-leġiżlazzjoni msemmija, l-ibbottiljar irid isir fiż-żona ġeografika demarkata sabiex tinżamm il-kwalità, ir-reputazzjoni tad-DOP “Prosecco”, u jiġu ggarantiti l-oriġini u l-effikaċja tal-kontrolli relatati. Tabilħaqq, il-kwalità u l-karatteristiċi partikolari tal-inbid “Prosecco”, konnessi maż-żona ġeografika ta’ oriġini, kif ukoll ir-reputazzjoni tad-denominazzjoni, huma żgurati aħjar permezz tal-ibbottiljar fiż-żona, billi l-applikazzjoni u r-rispett tar-regoli tekniċi kollha rigward it-trasport u l-ibbottiljar jistgħu jiġu fdati lill-azjendi taż-żona, li għandhom il-konjizzjoni u l-għarfien meħtieġ u l-interess li jżommu r-reputazzjoni li jkunu kisbu. Barra minn hekk, dan l-obbligu jiggarantixxi lill-operaturi tal-produzzjoni tal-inbid sistema effiċjenti ta’ kontrolli fil-fażi tal-ibbottiljar min-naħa tal-korpi kompetenti, u jiġu evitati r-riskji potenzjali li jista’ jinvolvi t-trasport barra miż-żona. Għaldaqstant din id-dispożizzjoni hija ta’ benefiċċju għal dawn l-operaturi li huma konxji u responsabbli mis-salvagwardja tal-livell ta’ kwalità u tar-reputazzjoni tad-denominazzjoni.

“Prosecco” DOP — Spumante rożè

Qafas ġuridiku:

Fil-leġiżlazzjoni tal-Unjoni

Tip ta’ kundizzjoni addizzjonali:

Rekwiżiti addizzjonali dwar it-tikkettar

Deskrizzjoni tal-kundizzjoni:

Għal dan it-tip ta’ għeneb, huwa obbligatorju li tiġi ttikkettata s-sena tal-produzzjoni tal-għeneb skont l-Artikolu 49(1) tar-Regolament (UE) 2019/33.

Link għall-ispeċifikazzjoni tal-prodott

https://www.politicheagricole.it/flex/cm/pages/ServeBLOB.php/L/IT/IDPagina/15890


(1)  ĠU L 9, 11.1.2019, p. 2.