Artikolu uniku

L-applikazzjoni għal emenda tal-Ispeċifikazzjoni għad-denominazzjoni “Vinos de Madrid” (DOP), skont l-Artikolu 105 tar-Regolament (UE) Nru 1308/2013, tinsab fl-Anness ta’ din id-Deċiżjoni.

Skont l-Artikolu 98 tar-Regolament (UE) Nru 1308/2013, il-pubblikazzjoni ta’ din id-Deċiżjoni tagħti d-dritt li wieħed biex jopponi għall-emenda tal-Ispeċifikazzjoni msemmija fl-ewwel paragrafu ta’ dan l-Artikolu fi żmien xahrejn mid-data tal-pubblikazzjoni tagħha f’Il-Ġurnal Uffiċjali tal-Unjoni Ewropea.

ANNESS

“VINOS DE MADRID”

PDO-ES-A1525-AM02

Data tal-applikazzjoni: 25-2-2016

TALBA GĦAL EMENDA FL-ISPEĊIFIKAZZJONI TAL-PRODOTT

1.   Regoli applikabbli għall-emenda

L-Artikolu 105 tar-Regolament (UE) Nru 1308/2013 — Emenda mhux minuri

2.   Deskrizzjoni u raġunijiet għall-emenda

2.1.   Emenda li testendi ż-żona ġeografika protetta, b’żieda ta’ subżona ġdida msejħa “El Molar”

Id-deskrizzjoni u r-raġunijiet għall-emenda huma dawn:

L-istudji u d-dokumenti disponibbli juru li l-limitu amministrattiv taż-żona ġeografika eżistenti attwali tad-denominazzjoni ta’ oriġini “Vinos de Madrid” attwali mhix xierqa għalkollox għax ma tinkludix reġjun ieħor fejn qed jiġu magħmul l-inbid effettivament, fejn qed jinżammu l-prattiki tradizzjonali li jintużaw biex isiru l-inbejjed għaż-żewġ kategoriji ta’ nbid koperti minn din id-denominazzjoni ta’ oriġini (inbid u nbid frizzanti ta’ kwalità). Minħabba f’hekk, il-vitikulturi, il-produtturi tal-inbid u l-awtoritajiet tal-ħdax-il muniċipalità li jiffurmaw dik li hi magħrufa bħala “s-subżona ta’ El Molar” esprimew interess biex jingħaqdu mad-denominazzjoni ta’ oriġini “Vinos de Madrid”.

Fit-Taqsima 4 tal-Ispeċifikazzjoni tal-Prodott, jeħtieġ tiġi emendata ż-żona ġeografika fejn isiru l-inbejjed koperti mid-denominazzjoni ta’ oriġini “Vinos de Madrid”. Tiżdied ir-raba’ subżona, imsejħa “El Molar”, mat-tliet subżoni eżistenti (Arganda, Navalcarnero u San Martín de Valdeiglesias).

Is-subżona l-ġdida ta’ “El Molar” tikkonsisti fi 11-il muniċipalità: Colmenar Viejo, El Molar, El Vellón, Patones de Arriba, Pedrezuela, San Agustín de Guadalix, Talamanca del Jarama, Torrelaguna, Torremocha del Jarama, Valdetorres de Jarama u Venturada, li jaqsmu l-istess fatturi naturali u umani bħaż-żona attwalment demarkata għad-denominazzjoni tal-oriġini “Vinos de Madrid” u l-istess rabta bejn il-prodott u ż-żona ġeografika.

Dan ifisser li ż-żona ġeografika protetta issa se tkun tikkonsisti minn 70 muniċipalità minflok id-59 eżistenti li jiffurmaw it-tliet subżoni l-oħra.

Anki l-punt 6 tad-Dokument Uniku jeħtieġ jiġi emendat ħalli t-test tiegħu jkun identiku għat-test ta’ Taqsima 4 tal-Ispeċifikazzjoni tal-Prodott.

2.2.   Deskrizzjoni tal-inbejjed

Jiġi emendat il-paragrafu 2(a) Karatteristiċi Analitiċi tal-Ispeċifikazzjoni tal-Prodott ħalli tiġi speċifikata l-qawwa alkoħolika reali minima meħtieġa li tiggarantixxi l-omoġeneità ta’ din is-subżona ġeografika ġdida ta’ “El Molar”, stabbilita għal 11 % għall-inbid abjad, 11,5 % għall-inbejjed rożè u għal 12 % għall-inbejjed ħomor. Għandu jiġi nnotat li dawn iċ-ċifri huma l-istess bħal dawk previsti għaż-żewġ subżoni attwali (Navalcarnero u San Martin de Valdeiglesias). Ma hemm l-ebda ċifra speċifika għall-bqija tal-parametri analitiċi f’din is-subżona ġdida; għandhom japplikaw dawk li ġew stabbiliti għad-DOP “Vinos de Madrid”.

Din ma taffettwax id-Dokument Uniku.

2.3.   Il-varjetà jew varjetajiet tal-għeneb tal-inbid

Il-punt 6 tal-Ispeċifikazzjoni tal-Prodott hi emendata biex tispeċifika l-varjetajiet ewlenin tad-dwieli fis-subżona l-ġdida ta’ “El Molar”: Malvar fil-każ tal-inbejjed bojod u Red Grenache fil-każ tal-inbejjed ħomor.

Fi kwalunkwe każ, l-istess varjetajiet ta’ dwieli awtorizzati bħalissa se jibqgħu fis-subżona l-ġdida u fit-tliet subżoni eżistenti; inbejjed bojod: Malvar, Albillo Real, Airén, Viura, Torrontés, Parellada, Moscatel de grano menudo (Muscat tal-ħabba żgħira) u Sauvignon Blanc; inbejjed ħomor: Tinto Fino (Tempranillo jew Cencibel), Red Grenache, Merlot, Cabernet Sauvignon, Syrah, Petit Verdot, Graciano u Grenache Tintorera).

Din ma taffettwax id-Dokument Uniku.

2.4.   Rabta maż-żona ġeografika

L-ewwel sinjali ta’ attività tal-produzzjoni tal-inbid fis-subżona “El Molar” imorru lura saħansitra sal-Medju Evu Bikri. L-eqdem “għerien tal-inbid” fir-reġjun b’oriġini Għarbija jmorru lura għas-sekli 9 u 10. L-ewwel referenza bil-miktub dwar l-eżistenza tal-vinji f’San Agustín de Guadalix tmur lura għas-seklu 13, u fil-muniċipalitajiet oħrajn għas-seklu 14. Din l-attività ssoktat sal-ġurnata tal-lum, b’erba’ industriji tal-produzzjoni, b’600 tal-vinja u b’iżjed minn 300 vitikultur attiv. Għalhekk, is-subżona l-ġdida ta’ “El Molar” hi inkluża fid-denominazzjoni ta’ oriġini “Vinos de Madrid” attwali u għandha l-istess kuntest storiku tagħha.

Jista’ jiġi kkonfermat ukoll li s-subżona “El Molar” taqsam l-istess uniformità u omoġeneità tagħha fejn jidħlu l-karatteristiċi pedoklimatiċi tagħha, il-varjetajiet, il-prattiki tal-produzzjoni u enoloġiċi u l-karatteristiċi tal-ħamrija marbuta maż-żona ġeografika attwali protetta bid-denominazzjoni tal-oriġini “Vinos de Madrid”.

L-aktar varjetajiet komuni fis-subżona ta’ ta’ “El Molar” huma Red Grenache u Malvar. Dawn ilhom jitkabbru f’din iż-żona sa minn żmien żemżem u jistgħu jinstabu anki fis-subżoni attwali oħrajn fejn xi varjetajiet oħra tad-dwieli huma komuni wkoll, u dan sa minn dejjem ta reputazzjoni mill-aqwa lill-inbejjed imkabbra hemmhekk.

It-Taqsima 7(a) “Dettalji dwar iż-żona ġeografika. Fatturi naturali” tal-Ispeċifikazzjonijiet tal-Prodott hija estiża biex iżżid issemmi s-subżona l-ġdida ta’ “El Molar”.

—	Il-post tas-subżona ta’ “El Molar” bejn is-Sistema Ċentrali u x-Xmara Jarama.

—

Deskrizzjoni tal-ħamrija fis-subżona ta’ “El Molar”: Il-ħamrija fis-subżona ta’ “El Molar” żviluppat skont materjali ġeoloġiċi bħal granit, kwarz, lavanja, shale, gness, ġebel ramli, lom, ħamrija tal-ġir, franka u arkoż. F’din is-subżona, id-dwieli jinsabu fil-kampanja miftuħa u f’żoni alluvjali tax-Xmara Jarama, u l-ħamrija hi taħlita ta’ dik li hemm fit-tliet subżoni preeżistenti, jiġifieri għoljiet relattivament ċatti fuq l-art bejn ix-xmajjar (dan jgħodd għal kull waħda mill-erba’ subżoni). Il-firxa tal-pH hi wiesgħa ħafna, minn ħafna aċida għal ħafna alkalina.

—	Taħt “Altitudni u xita”: jiżdiedu l-muniċipalitajiet ta’ El Vellón u Colmenar Viejo maż-żoni ogħla marbuta mal-muntanji; San Martín u El Molar jissejħu s-subżoni bl-akbar ammont ta’ xita.

Fit-Taqsima 7(b) tal-Ispeċifikazzjoni tal-Prodott, li tirreferi għall-fatturi umani, “Malvar li huwa indiġenu għal Arganda u Navalcarnero” hija sostitwita bi “…Malvar li huwa indiġenu għal Arganda, Navalcarnero u El Molar”. Bl-istess mod, fil-parti li tispjega r-rilevanza tal-varjetà ta’ Grenache (“reġina”) f’Navalcarnero u San Martín, l-emenda testendi din ir-rilevanza għal “Navalcarnero, El Molar and San Martín”.

Minħabba l-emenda fiż-żona ġeografika, in-numri msemmija huma korretti biex ir-referenzi preċedenti għal “tliet subżoni” jsiru “erba’ subżoni”.

It-Taqsima 7(c) “L-interazzjoni kawżali tal-Ispeċifikazzjoni tal-Prodott” ġiet ifformulata mill-ġdid biex tenfasizza b’mod aktar ċar il-karatteristiċi li essenzjalment jew esklussivament huma kkawżati mill-ambjent ġeografiku, għal kull waħda mill-kategoriji ta’ prodotti tad-dwieli koperti mid-denominazzjoni ta’ oriġini “Vinos de Madrid”: inbid u nbid frizzanti, li japplika għall-erba’ subżoni:

Il-punt 8. Id-Deskrizzjoni tar-rabta(rabtiet) tad-Dokument Uniku hi emendata biex tagħti sommarju tat-test il-ġdid tal-Ispeċifikazzjoni tal-Prodott.

2.5.   Possibbiltà li jiżdied ir-rendiment

Deskrizzjoni u raġunijiet:

Fir-rebbiegħa jitfassal rapport tal-fertilità (l-għadd ta’ twarrid), u qabel il-ħsad jinħareġ rapport tekniku motivat (li jivvaluta aspetti bħall-ammont ta’ xita fix-xitwa jew rebbiegħa mingħajr ġlata) biex jintwera li din il-varjazzjoni mhux se tħalli impatt ħażin fuq il-kwalità tal-prodott protett. Fi kwalunkwe każ, iż-żieda massima li tista’ tiġi awtorizzata ma għandhiex taqbeż il-25 % tal-limiti stipulati.

Emenda għall-Punt 8 tal-Ispeċifikazzjoni tal-Prodott, ir-Rekwiżiti Supplimentari, u t-Taqsima 2.5.1 tad-Dokument Uniku, biex tiddaħħal il-possibbiltà ta’ żieda fir-rendiment.

DOKUMENT UNIKU

1.   Denominazzjoni reġistrata

Vinos de Madrid

2.   Tip tal-indikazzjoni ġeografika

DOP — Denominazzjoni ta’ oriġini protetta

3.   Kategoriji tal-prodotti tad-dwieli

1.

Inbid

5.

Inbid frizzanti ta’ kwalità

4.   Deskrizzjoni tal-inbejjed

Inbid — Inbejjed Bojod

Dehra: Isfar ċar lewn it-tiben xi kultant bi sfumaturi ħodor qawwijin għall-griż fl-inbejjed ġodda, li jsiru sofor dehbiena jew kulur id-deheb antik għall-inbejjed “Crianza” jew “Reserva”. L-inbejjed bojod li jiġu fermentati jew immaturati fi btieti tal-ballut jkollhom sfumaturi safranin lewn it-tiben li jsiru dehbiena meta jeqdiemu.

Aroma: Frisk u b’togħma predominanti ta’ frott, b’aromi ta’ frott biż-żerriegħa u bl-għadam, aromi tropikali u zokkor maħruq. L-inbejjed immaturati u/jew fermentati jew immaturati fi btieti tal-ballut ikollhom aromi pikkanti, balsamiċi, u/jew tal-injam, skont l-età tagħhom. “Sobremadres” jista’ jkollu aromi ta’ ħmira.

Togħma: Togħma friska, kemxejn aċiduża, u ħelwa għall-inbejjed semiħelwin u ħelwin. Żejtni u jħallilek togħma morra. Ċar u b’tul medju.

Qawwa alkoħolika reali minima: 10 % vol. fis-subżona ta’ Arganda.

Massimu ta’ diossidu tal-kubrit: 250, jekk > 5 g/l taz-zokkor

Limitu tal-volatilità: 16,7 meq/l għall-inbejjed eqdem minn sena.

Aċidità totali minima għal “Sobremadres”: 5 g/l

Karatteristiċi analitiċi ġenerali
Qawwa alkoħolika totali massima (f’% ta’ volum)
Qawwa minima alkoħolika reali (f’% ta’ volum)	11
Aċidità totali minima	4,5 grammi għal kull litru, espressi bħala aċidu tartariku
Aċidità volatili massima (f’milliekwivalenti għal kull litru)	13,3
Il-kontenut massimu totali tad-diossidu tal-kubrit (f’milligrammi għal kull litru)	180

Il-valuri mhux mogħtija huma neċessarjament skont il-limiti legali, b’konformità mal-leġiżlazzjoni rilevanti tal-UE.

Inbid — Inbejjed Rożè

Dehra: Roża bi ħjiel ta’ frawli, lampun jew salamun; l-inbejjed rożè jaf ikollhom xi daqsxejn oranġjo wara sentejn jew jekk ikunu mmaturaw.

Aroma: Friska u tal-frott b’aromi ta’ frott aħmar u/jew b’natura ta’ fjuri u/jew ta’ ħxejjex. Fl-inbejjed eqdem minn sentejn, jaf jingħaqdu aromi pikkanti skont l-età tagħhom.

Togħma: Friska, kemxejn aċiduża, u ħelwa għall-inbejjed semiħelwin u ħelwin. Żejtni b’tannini ċari u tul medju.

Qawwa alkoħolika reali minima: 11 % vol. fis-subżona ta’ Arganda.

Massimu ta’ diossidu tal-kubrit: 250, jekk > 5 g/l zokkor riduċenti

Massimu ta’ volatilità: 16,7 meq/l għall-inbejjed eqdem minn sena.

Karatteristiċi analitiċi ġenerali
Qawwa alkoħolika totali massima (f’% ta’ volum)
Qawwa minima alkoħolika reali (f’% ta’ volum)	11,5
Aċidità totali minima	4,5 grammi għal kull litru, espressi bħala aċidu tartariku
Aċidità volatili massima (f’milliekwivalenti għal kull litru)	13,3
Il-kontenut massimu totali tad-diossidu tal-kubrit (f’milligrammi għal kull litru)	180

Il-valuri mhux mogħtija huma neċessarjament skont il-limiti legali, b’konformità mal-leġiżlazzjoni rilevanti tal-UE.

Inbid — Inbejjed Ħomor

Dehra: L-inbejjed ġodda jkollhom sfumaturi ħomor, vjola għal lewn iċ-ċiras, u meta jimmaturaw l-isfumaturi jvarjaw minn lewn ir-rubini għall-aħmar tal-ġebel.

Aroma: Friska u tal-frott u/jew tal-ħxejjex fl-inbejjed ġodda, li jaf ikollhom ukoll aromi ta’ njam, u fl-inbejjed magħmulin u mmaturati fi btieti tal-ballut. L-inbejjed immaturati jaf ikollhom aromi ta’ frott imnixxef, pikkanti, ta’ ħxejjex aromatiċi, u empiromatika u/jew minerali. “Sobremadres” jista’ jkollu aromi ta’ ħmira.

Togħma: Tannika, fietla u dejjiema. Tal-frott fl-inbejjed ġodda, bi ħjiel ta’ ballat għall-inbejjed iffermentati u/jew immaturati fi btieti tal-ballut.

“Sobremadres” għandhom ċerta togħma żejtnija.

Qawwa alkoħolika reali minima: 11,5 % vol. fis-subżona ta’ Arganda.

Massimu ta’ diossidu tal-kubrit: 200, jekk > 5 g/l 200, jekk > 5 g/l zokkor riduċenti.

Limitu tal-volatilità: 16,7 meq/l għall-inbejjed eqdem minn sena.

Aċidità totali minima għal “Sobremadres”: 5 g/l

Karatteristiċi analitiċi ġenerali
Qawwa alkoħolika totali massima (f’% ta’ volum)
Qawwa minima alkoħolika reali (f’% ta’ volum)	12
Aċidità totali minima	4,5 grammi għal kull litru, espressi bħala aċidu tartariku
Aċidità volatili massima (f’milliekwivalenti għal kull litru)	13,3
Il-kontenut massimu totali tad-diossidu tal-kubrit (f’milligrammi għal kull litru)	150

Il-valuri mhux mogħtija huma neċessarjament skont il-limiti legali, b’konformità mal-leġiżlazzjoni rilevanti tal-UE.

Inbid frizzanti ta’ kwalità

Dehra: tvarja minn isfar ċar lewn it-tibna għal daqsxejn dehbiena, skont l-età. Bi bżieżaq delikati u abbundanti, rilaxxati matul iż-żmien. Roża lewn il-frawli jew is-salamun, għall-inbejjed rożé frizzanti.

Aroma: Tal-frott u mikrobijoloġika

Togħma: Friska u qawwija u b’ċertu togħma żejtnija għall-inbejjed rożè; ħelwa għall-inbejjed b’kontenut ta’ zokkor akbar minn 10 g.

Karatteristiċi analitiċi ġenerali
Qawwa massima alkoħolika totali (f’% ta’ volum)
Qawwa minima alkoħolika reali (f’% ta’ volum)
Aċidità totali minima	5 grammi għal kull litru, espressi bħala aċidu tartariku
Aċidità volatili massima (f’milliekwivalenti għal kull litru)	10
Il-kontenut massimu totali tad-diossidu tal-kubrit (f’milligrammi għal kull litru)

Il-valuri mhux mogħtija huma neċessarjament skont il-limiti legali, b’konformità mal-leġiżlazzjoni rilevanti tal-UE.

5.   Prattiki enoloġiċi

(a)   Prattiki enoloġiċi essenzjali

Il-prattika tal-kultivazzjoni

Tekniki għall-ġestjoni tal-uċuħ tar-raba’ għall-inbejjed kollha:

Densità tat-tħawwil: Bejn 900 u 4 000 stokk għal kull ettaru.

Tkabbir u żbir: Sistemi tat-tkabbir tal-vinji bi struttura sferika jew espaldera b’massimu ta’ 16-il rimja produttiva għal kull stokk jew 36 000 għal kull ettaru.

Ir-rendiment massimu għal kull ettaru jista’ jinbidel mill-Bord Regolatorju f’ċerti staġuni, bid-diskrezzjoni tiegħu stess jew meta jintalab mill-vitikulturi interessati. Għal dan il-għan, għandu jinħareġ rapport mill-awtoritajiet kompetenti fil-qasam, li jiġbor flimkien ir-rapporti tekniċi rilevanti biex juri li l-bidla mhux se tħalli impatt ħażin fuq il-kwalità tal-prodott protett. Fi kwalunkwe każ, din il-bidla ma tistax taqbeż il-25 % tal-limitu stipulat.

Prattika enoloġika speċifika

Ir-rendiment massimu hu ffissat għal 74 litru ta’ most tal-għeneb għal kull 100 kg tal-ħsad.

L-għeneb adattat għall-użu fil-produzzjoni tal-inbejjed bid-denominazzjoni tal-oriġini għandu jkollu kontenut taz-zokkor ekwivalenti għal 170 grad kull litru ta’ most, jew iżjed.

L-inbejjed bojod u ħomor li minħabba l-metodu tal-produzzjoni speċjali tagħhom ikun fihom il-gass tal-karbonju ta’ oriġini endoġena, ikkawżat mill-fermentazzjoni tal-mosti tal-għeneb fuq il-“madres” (għeneb bla zokk mgħaffeġ) jistgħu jiġu tikkettati bħala “Sobremadres”.

L-inbid frizzanti għandu jkun magħmul minn inbid abjad u rosé.

Fil-produzzjoni jistgħu jintużaw biss il-varjetajiet tal-għeneb awtorizzati. Il-produzzjoni għandha ssir bil-metodu tradizzjonali.

Restrizzjoni rilevanti għall-vinifikazzjoni

Għall-estrazzjoni tal-most mill-għeneb frisk li jkun qed jiġi pproċessat għall-ewwel darba, jew jekk l-inbid magħmul mill-karfa ffermentata waqt il-produzzjoni tal-inbid aħmar, fil-proċessi użati biex jinkisbu prodotti xierqa għad-Denominazzjoni ta’ Oriġini “Vinos de Madrid”, is-sistemi mekkaniċi jistgħu jintużaw biss meta dawn ma jagħmlux ħsara lill-komponenti solidi tal-għanqud; l-użu ta’ magni ċentrifugi b’veloċità kbira hu pprojbit.

Ma tistax tintuża prassi li tinvolvi t-tisħin minn qabel tal-għeneb jew it-tisħin tal-most jew tal-inbejjed meta jkun hemm il-karfa, ħalli tiġi sfurzata l-estrazzjoni tal-materjal koloranti.

(b)   Rendimenti massimi

Il-varjetajiet ta’ Malvar, Airén, Viura, Parellada u Torrontés

8 000 kilogramma ta’ għeneb għal kull ettaru

Il-varjetajiet ta’ Malvar, Airén, Viura, Parellada u Torrontés

56 ettolitru għal kull ettaru

Varjetajiet oħra

7 000 kilogramma ta’ għeneb għal kull ettaru

Varjetajiet oħra

49 ettolitru għal kull ettaru

6.   Żona demarkata

Iż-żona tal-produzzjoni għall-inbejjed koperti mid-denominazzjoni tal-oriġini “Vinos de Madrid” tikkonsisti minn artijiet li jinsabu f’ dawn il-muniċipalitajiet tal-Komunità ta’ Madrid, li jinkludu s-subżoni ta’ Arganda, Navalcarnero, San Martin de Valdeiglesias u El Molar:

—

Is-subżona ta’ Arganda Ambite, Aranjuez, Arganda del Rey, Belmonte de Tajo, Brea del Tajo, Campo Real, Carabaña, Colmenar de Oreja, Chinchón, l-inħawi ta’ “El Encín” (Alcalá de Henares), Estremera, Fuentidueña de Tajo, Getafe, Loeches, Mejorada del Campo, Morata de Tajuña, Nuevo Baztán, Olmeda de las Fuentes, Orusco, Perales de Tajuña, Pezuela de las Torres, Pozuelo del Rey, Tielmes, Titulcia, Torres de la Alameda, Valdaracete, Valdelaguna, Valdilecha, Villaconejos, Villamanrique de Tajo, Villar del Olmo u Villarejo de Salvanés.

—

Is-subżona ta’ Navalcarnero El Alamo, Aldea del Fresno, Arroyomolinos, Batres, Brunete, Fuenlabrada, Griñón, Humanes de Madrid, Moraleja de Enmedio, Móstoles, Navalcarnero, Parla, Serranillos del Valle, Sevilla la Nueva, Valdemorillo, Villamanta, Villamantilla, Villanueva de la Cañada u Villaviciosa de Odón.

—	Is-subżona ta’ San Martin de Valdeiglesias Cadalso de los Vidrios, Cenicientos, Colmenar del Arroyo, Chapinería, Navas del Rey, Pelayos de la Presa, Rozas de Puerto Real, San Martín de Valdeiglesias u Villa del Prado.

—	Is-subżona ta’ El Molar Colmenar Viejo, El Molar, El Vellón, Patones de Arriba, Pedrezuela, San Agustín de Guadalix, Talamanca del Jarama, Torrelaguna, Torremocha del Jarama, Valdetrorres del Jarama u Venturada.

7.   L-għeneb tal-inbid ewlieni

RED GRENACHE – LLADONER

ALBILLO REAL

MALVAR

TEMPRANILLO – CENCIBEL TEMPRANILLO – TINTO FINO

8.   Deskrizzjoni tar-rabtiet

Inbid u nbid frizzanti ta’ kwalità

Id-DOP “Vinos de Madrid” hi demarkata mit-Tramuntana u mill-Punent bis-Sistema Ċentrali Spanjola, assi vertikali li jifred Madrid minn Kastilja u Leon. In-naħa tal-Lvant hi mdawra minn Alcarria, pjanura ta’ ċertu livell, bi ftit jew l-ebda fertilità, u klima ħarxa, li tipprovdi konfini naturali mal-pjanura ta’ Castilla-La Mancha. Ix-xmara Tajo timmarka konfini naturali fin-Nofsinhar. Id-deżinjazzjoni hi maqsuma b’sitt passaġġi fuq l-ilma li jimmarkaw iż-żoni ta’ akklimatizzazzjoni għad-dwieli: is-subżona ta’ San Martín de Valdeiglesias bejn is-Sistema Ċentrali u x-Xmara Alberche; is-subżona ta’ Navalcarnero bejn ix-Xmara Alberche u x-Xmara Guadarrama; is-subżona ta’ El Molar bejn is-Sistema Ċentrali u x-Xmara Jarama, u subżona ta’ Arganda bejn ix-Xmara Guadarrama u t-Tajo.

Fis-subżona ta’ Arganda, it-tipi ta’ ħamrija prevalenti għandhom kontenut għoli ta’ ġir u hemm inħawi li għandhom lom bil-ġibs (pH alkalina); Fis-subżona ta’ Navalcarnero, għandha oriġini silikuża, fuq meded b’pH aċidika; il-ħamrija fis-subżona ta’ San Martín de Valdeiglesias għandha oriġini granitika fil-biċċa l-kbira tagħha, fuq l-għoljiet u x-xaqlibiet b’pH aċidika; il-ħamrija fis-subżona ta’ El Molar żviluppat abbażi ta’ materjali ġeoloġiċi diversi ħafna, ikkaratterizzata minn taħlita ta’ ħamrija li hemm fit-tliet subżoni l-oħra.

Id-dwieli jikbru f’altitudni ta’ bejn 480 u 1 000 metru. Iż-żona għandha klima Mediterranja kontinentali, b’ammont medju ta’ xita annwali ta’ 658 mm u b’temperaturi li jvarjaw bejn 40 °C u -17 °C. Is-sigħat tax-xemx ivarjaw bejn l-2 300 u l-2 800 siegħa.

Dawn il-kundizzjonijiet pedoklimatiċi influwenzaw il-fatturi umani fejn jidħol it-trattament speċifiku tad-dwieli, li tradizzjonalment tkabbru f’sistemi bi struttura sferika mingħajr irrigazzjoni, b’densità tat-tħawwil baxxa u b’għadd limitat ta’ trattamenti tal-protezzjoni tal-pjanti. Il-fatturi naturali kienu wkoll deċiżivi fejn jidħlu l-varjetajiet li kienu tħawlu: il-Malvar indiġena f’Arganda, Navalcarnero u El Molar u l-Albillo Real tradizzjonali f’San Martín de Valdeiglesias. Fir-rigward tal-varjetajiet imkabbra għall-inbid aħmar, Tinto Fino f’Arganda u Red Grenache f’Navalcarnero, f’San Martín de Valdeiglesias u f’El Molar jitqiesu bħala dawk ewlenin għad-diversi subżoni, minħabba l-fatt li dawn ilhom jitkabbru b’mod tradizzjonali minn żminijiet antiki u minħabba l-impatt deċisiv tagħhom fuq l-aroma u t-togħma tal-inbejjed prodotti.

F’termini ta’ varjetajiet lokali, Malvar hija indiġena għal Arganda, Navalcarnero u El Molar, u Albillo Real hija tradizzjonali f’San Martín de Valdeiglesias. Fir-rigward tal-varjetajiet imkabbra għall-inbid aħmar, Tinto Fino hi lokali għal Arganda u Red Grenache għal Navalcarnero, San Martín de Valdeiglesias u El Molar.

Sa fejn huma kkonċernati l-prattiki tal-produzzjoni tradizzjonali tal-inbid, il-fokus huma l-inbejjed “Sobremadre”, li jiġu bbottiljati mingħajr tisfija wara li l-most jitħalla f’kuntatt mal-hekk imsejħa “madres” (għeneb bla zokk mgħaffeġ).

L-inbejjed magħmulin mill-varjetajiet ta’ Albillo Real u Malvar huma kumplessi fejn tidħol l-aroma tagħhom, b’elementi prevalenti ta’ frott abjad, tuffieħ u lanġas. Fejn tidħol it-togħma, dawn jixbhu l-frott misjur. L-inbejjed ħomor u rożè minn Grenache u Tempranillo jkollhom aromi ta’ tut aħmar u togħma ta’ frott misjur.

Dawn il-fatturi klimatiċi, tal-ħamrija, varjetali u umani kollha jitħalltu flimkien biex l-inbejjed magħmula f’din id-denominazzjoni ta’ oriġini jkollhom ċerti karatteristiċi uniċi: normalment rendimenti baxxi (produzzjoni medja għal kull ettaru ta’ madwar 3 000 kg ta’ għeneb), inbid b’qawwa alkoħolika medja għolja (14° għall-inbejjed ħomor u 12,5° għall-inbejjed bojod), aċidità medja baxxa, lewn intens għall-inbejjed ħomor, aromi ta’ frott matur jew matur ħafna, ħafna drabi bħall-ġamm, għall-inbejjed bojod normalment bi ħjiel ta’ lanġas u tuffieħ, u għall-inbejjed rożé u ħomor bi ħjiel ta’ frott aħmar u iswed. Togħma minerali bi ħjiel aromatiku ta’ xagħri u maturità tal-frott, kemm fit-togħma u fl-aroma.

L-inbejjed frizzanti ta’ kwalità jsiru minn inbejjed bojod u rożè, minn varjetajiet ta’ Malvar, Albillo Real, Torrontés, Viura, Parellada, Red Grenache u Tinto Fino biss; jaqsmu l-istess elementi distintivi taż-żona (fatturi karatteristiċi pedoklimatiċi), kif ukoll l-istess fatturi kulturali u umani (id-daqs, id-densità tat-tħawwil, il-varjetajiet, il-prattiki kulturali, l-aċidità totali minima ta’ 5 g/l), li jagħtuhom il-karatteristiċi speċifiċi tagħhom mil-lat ta’ dehra, aroma – minħabba l-karfa – u togħma (ratba u kremuża). Minħabba l-proċess tradizzjonali li matulu jsiru dawn l-inbejjed frizzanti naturali, inkluż stadju li matulu ssir il-maturazzjoni fil-fliexken u t-tieni fermentazzjoni, dawn l-inbejjed ikollhom bżieżaq fini li jdumu, aroma mikrobijoloġika tal-frott, u togħma punġenti u friska.

9.   Kundizzjonijiet oħra essenzjali

Qafas ġuridiku:

Fil-leġiżlazzjoni nazzjonali

Tip ta’ kundizzjoni oħra:

Dispożizzjonijiet oħra dwar it-tikkettar

Deskrizzjoni tal-kundizzjoni:

L-inbejjed għall-konsum jeħtieġ ikollhom siġill ta’ garanzija, u tikketti jew tikketti ta’ kontroll enumerati maħruġa mill-Bord Regolatorju. Dawn għandhom jitwaħħlu fil-fabbrika tal-inbid stess skont l-istandards stabbiliti minn dak il-korp, b’mod li dan ma jkunx jippermetti t-tieni użu u l-użu sussegwenti.

Qafas ġuridiku:

Fil-leġiżlazzjoni nazzjonali

Tip ta’ kundizzjoni oħra:

L-imballaġġ fiż-żona ġeografika demarkata

Deskrizzjoni tal-kundizzjoni:

L-inbejjed bid-denominazzjoni ta’ oriġini “Vinos de Madrid” jistgħu jiġu bbottiljati u trasportati biss mill-kumpaniji tal-ibbottiljar li huma rreġistrati u awtorizzati mill-Bord Regolatorju u li jinsabu fiż-żona tal-produzzjoni tagħhom ħalli jiġu ppriżervati l-karatteristiċi fiżikokimiċi u/jew organolettiċi speċifiċi tal-prodott, u b’hekk jitħarsu l-kwalità u r-reputazzjoni tad-denominazzjoni ta’ oriġini, abbażi tal-ħila u s-sengħa tradizzjonali (b’għarfien profond tal-karatteristiċi speċifiċi miksuba matul ħafna snin) tal-operaturi fiż-żona protetta.

L-għan hu li jkunu żgurati l-oriġini u l-kwalità tal-inbejjed b’mod partikolari, filwaqt li jkun evitat li l-inbid ikun soġġett għal kundizzjonijiet ambjentali mhux xierqa li jistgħu jaffettwaw il-karatteristiċi sensorjali tiegħu (fenomeni redox, varjazzjonijiet fit-temperatura, u l-bqija) u b’hekk jinbidlu l-aspetti li jiddefinixxu din id-DOP.

Qabel ma jitbagħtu, l-inbejjed protetti kollha li jiġu kkummerċjalizzati għall-konsum għandhom jiġu bbottiljati. L-inbejjed protetti bid-DOP jistgħu jiġu ċċirkolati u trasportati biss mill-fabbriki tal-inbid ġo fliexken li ma jnaqqsux il-kwalità jew il-prestiġju tagħhom. Fid-dawl tal-fatt li l-ibbottiljar tal-inbejjed hu wieħed mill-punti kruċjali għas-salvagwardja tal-karatteristiċi miksuba tul il-proċess tal-manifattura u, meta applikabbli, tul il-proċess tal-maturazzjoni, dan għandhom jagħmluh biss is-sidien tal-fabbriki tal-inbid fil-faċilitajiet tal-ibbottiljar tagħhom li jkunu jinsabu fiż-żona demarkata protetta.

Link għall-ispeċifikazzjoni tal-prodott

http://www.madrid.org/cs/Satellite?blobcol=urldata&blobheader=application%2Fpdf&blobheadername1=Content-Disposition&blobheadervalue1=filename%3DPliego+de+condiciones+DO+vinos+de+Madrid.+Modificacion+subzona+El+Molar.+v180215.pdf&blobkey=id&blobtable=MungoBlobs&blobwhere=1352947741300&ssbinary=true