ANNESS I

Il-lista tal-UE ta’ ġurisdizzjonijiet li ma jikkooperawx għal finijiet ta’ taxxa

1.   Is-Samoa Amerikana

Is-Samoa Amerikana ma tapplika l-ebda skambju awtomatiku ta’ informazzjoni finanzjarja, ma ffirmatx u ma rratifikatx, inkluż permezz tal-ġurisdizzjoni li hija dipendenti fuqha, il-Konvenzjoni Multilaterali tal-OECD dwar l-Assistenza Amministrattiva Reċiproka kif emendata, ma tapplikax l-istandards minimi tal-BEPS u ma impenjatx ruħha li tindirizza dawn il-kwistjonijiet sal-31 ta’ Diċembru 2018.

2.   Guam

Guam ma japplika l-ebda skambju awtomatiku ta’ informazzjoni finanzjarja, ma ffirmax u ma rratifikax, inkluż permezz tal-ġurisdizzjoni li huwa dipendenti fuqha, il-Konvenzjoni Multilaterali tal-OECD dwar l-Assistenza Amministrattiva Reċiproka kif emendata, ma japplikax l-istandards minimi tal-BEPS u ma impenjax ruħu li jindirizza dawn il-kwistjonijiet sal-31 ta’ Diċembru 2018.

3.   In-Namibja

In-Namibja mhijiex Membru tal-Forum Globali dwar it-Trasparenza u l-Iskambju ta’ Informazzjoni għal Skopijiet ta’ Taxxa, ma ffirmatx u ma rratifikatx il-Konvenzjoni Multilaterali tal-OECD dwar l-Assistenza Amministrattiva Reċiproka kif emendata, ma tapplikax l-istandards minimi tal-BEPS u ma impenjatx ruħha li tindirizza dawn il-kwistjonijiet sal-31 ta’ Diċembru 2019. Barra minn hekk in-Namibja għandha reġimi preferenzjali tat-taxxa li huma dannużi u ma impenjatx ruħha li temendhom jew tabolixxihom sal-31 ta’ Diċembru 2018.

4.   Palau

Palau tiffaċilita strutturi u arranġamenti offshore bl-għan li jiġu attirati profitti mingħajr sustanza ekonomika reali u rrifjutat li tidħol fi djalogu sinifikattiv biex taċċerta l-konformità tagħha mal-kriterju 2.2.

L-impenn ta’ Palau li tikkonforma mal-kriterji 1.1, 1.2, 1.3 u 3 ser jiġi sorveljat.

5.   Samoa

Samoa għandu reġim preferenzjali tat-taxxa li huwa dannuż u ma impenjax ruħu li jindirizza din il-kwistjoni sal-31 ta’ Diċembru 2018.

L-impenn ta’ Samoa li jikkonforma mal-kriterju 3 ser jiġi sorveljat.

6.   Trinidad u Tobago

Trinidad u Tobago ma ffirmatx u ma rratifikatx il-Konvenzjoni Multilaterali tal-OECD dwar l-Assistenza Amministrattiva Reċiproka fi Kwistjonijiet ta’ Taxxa, kif emendata, għandha reġim ta’ taxxa preferenzjali dannuż u ma kkommettietx ruħha li tindirizza dawn il-kwistjonijiet sal-31 ta’ Diċembru 2018.

L-impenn ta’ Trinidad u Tobago li tikkonforma mal-kriterji 1.1, 1.2 u 3 ser jiġi sorveljat.

7.   Il-Gżejjer Verġni tal-Istati Uniti

Il-Gżejjer Verġni tal-Istati Uniti ma japplikaw l-ebda skambju awtomatiku ta’ informazzjoni finanzjarja, ma ffirmawx u ma rratifikawx, inkluż permezz tal-ġurisdizzjoni li huma dipendenti fuqha, il-Konvenzjoni Multilaterali tal-OECD dwar l-Assistenza Amministrattiva Reċiproka kif emendata, għandhom reġim preferenzjali tat-taxxa li huwa dannuż u ma impenjawx ruħhom b’mod ċar li jemendawh jew jabolixxuh, ma japplikawx l-istandards minimi tal-BEPS u ma impenjawx ruħhom li jindirizzaw dawn il-kwistjonijiet sal-31 ta’ Diċembru 2018.

ANNESS II

Sitwazzjoni attwali tal-kooperazzjoni mal-UE fir-rigward tal-impenji meħuda sabiex jimplimentaw il-prinċipji ta’ governanza tajba fil-qasam tat-taxxa

1.   Trasparenza

1.1   Impenn sabiex jiġi implimentat l-iskambju awtomatiku ta’ informazzjoni, jew permezz tal-firma ta’ Ftehim Multilaterali tal-Awtoritajiet Kompetenti jew permezz ta’ ftehimiet bilaterali

Il-ġurisdizzjonijiet li ġejjin huma impenjati li jimplimentaw skambju awtomatiku ta’ informazzjoni sal-2018:

Antigua u Barbuda, il-Bahamas, il-Bahrain, Curaçao, Dominica, Grenada, Hong Kong SAR, il-Macao SAR, il-Gżejjer Marshall, New Caledonia, l-Oman, il-Qatar, it-Tajwan u l-Emirati Għarab Magħquda

Il-ġurisdizzjonijiet li ġejjin huma impenjati li jimplimentaw skambju awtomatiku ta’ informazzjoni sal-2019:

It-Turkija

1.2   Sħubija fil-Forum Dinji dwar it-trasparenza u l-iskambju ta’ informazzjoni għal finijiet ta’ taxxa u klassifikazzjoni sodisfaċenti

Il-ġurisdizzjonijiet li ġejjin huma impenjati li jsiru membri tal-Forum Globali u/jew ikollhom klassifikazzjoni sodisfaċenti sal-2018:

Anguilla, Curaçao, il-Gżejjer Marshall, New Caledonia u l-Oman

Il-ġurisdizzjonijiet li ġejjin huma impenjati li jsiru membri tal-Forum Globali u/jew ikollhom klassifikazzjoni suffiċjenti sal-2019:

Il-Bożnija-Ħerzegovina, Cape Verde, Fiġi, il-Ġordan, is-Swaziland, it-Turkija u l-Vjetnam

1.3   Firma u ratifika tal-Konvenzjoni Multilaterali tal-OECD dwar l-Assistenza Amministrattiva Reċiproka jew netwerk ta’ ftehimiet li jkopru l-Istati Membri kollha tal-UE

Il-ġurisdizzjonijiet li ġejjin huma impenjati li jiffirmaw u jirratifikaw il-MAC jew li jkollhom fis-seħħ netwerk ta’ ftehimiet li jkopru l-Istati Membri kollha tal-UE sal-2018:

Antigua u Barbuda, il-Bahamas, il-Bahrain, Dominica, Grenada, Hong Kong SAR, il-Macao SAR, New Caledonia, l-Oman, il-Qatar, it-Tajwan u l-Emirati Għarab Magħquda

Il-ġurisdizzjonijiet li ġejjin huma impenjati li jiffirmaw u jirratifikaw il-MAC jew li jkollhom fis-seħħ netwerk ta’ ftehimiet li jkopru l-Istati Membri kollha tal-UE sal-2019:

L-Armenja, il-Bożnija-Ħerzegovina, il-Botswana, Cape Verde, Fiġi, l-Eks-Repubblika Jugoslava tal-Maċedonja, il-Ġamajka, il-Ġordan, il-Maldivi, il-Mongolja, il-Montenegro, il-Marokk, il-Perù, is-Serbja, is-Swaziland, it-Tajlandja, it-Turkija u l-Vjetnam

2.   Tassazzjoni ġusta

2.1   Eżistenza ta’ sistemi ta’ taxxa dannużi

Il-ġurisdizzjonijiet li ġejjin huma impenjati li jemendaw jew jabolixxu r-reġimi identifikati sal-2018:

L-Andorra, Antigua u Barbuda, l-Armenja, Aruba, Barbados, il-Belize, il-Botswana, Cape Verde, il-Gżejjer Cook, Curacao, Dominica, Fiġi, Grenada, Hong Kong SAR, il-Ġordan, il-Korea (Repubblika ta’), Labuan, il-Liechtenstein, il-Macao SAR, il-Malasja, il-Maldivi, Mauritius, il-Marokk, il-Panama, Saint Kitts u Nevis, Saint Lucia, Saint Vincent u l-Grenadini, San Marino, is-Seychelles, l-Iżvizzera, it-Tajwan, it-Tajlandja, it-Tuneżija, it-Turkija, l-Urugwaj u l-Vjetnam

2.2   Eżistenza ta’ sistemi tat-taxxa li jiffaċilitaw strutturi offshore li jattiraw profitti mingħajr attività ekonomika reali

Il-ġurisdizzjonijiet li ġejjin huma impenjati li jindirizzaw it-tħassib relatat mas-sustanza ekonomika sal-2018:

Anguilla, il-Bahamas, il-Bahrain, Bermuda, il-Gżejjer Verġni Brittaniċi, il-Gżejjer Cayman, Guernsey, Isle of Man, Jersey, il-Gżejjer Marshall, il-Gżejjer Turks u Kajkos, l-Emirati Għarab Magħquda u Vanuatu

3.   Miżuri kontra l-BEPS

3.1   Sħubija fil-Qafas Inklużiv dwar il-BEPS jew implimentazzjoni ta’ standards minimi dwar il-BEPS

Il-ġurisdizzjonijiet li ġejjin huma impenjati li jsiru membri fil-Qafas Inklużiv jew jimplimentaw l-istandard minimu dwar il-BEPS sal-2018:

Aruba, Antigua u Barbuda, il-Bahrain, il-Gżejjer Cook, Dominica, il-Gżejjer Faroe, Greenland, Grenada, il-Gżejjer Marshall, New Caledonia, Saint Kitts u Nevis, Saint Lucia, Saint Vincent u l-Grenadini, it-Tajwan, l-Emirati Għarab Magħquda u Vanuatu

Il-ġurisdizzjonijiet li ġejjin huma impenjati li jsiru membri fil-Qafas Inklużiv jew jimplimentaw l-istandard minimu dwar il-BEPS sal-2019:

L-Albanija, l-Armenja, il-Bożnija-Ħerzegovina, Cape Verde, Fiġi, l-Eks-Repubblika Jugoslava tal-Maċedonja, il-Ġordan, il-Montenegro, il-Marokk u s-Swaziland

Il-ġurisdizzjonijiet li ġejjin huma impenjati li jsiru membri fil-Qafas Inklużiv jew jimplimentaw l-istandard minimu dwar il-BEPS jekk u meta t-tali impenn isir rilevanti:

Nauru, Niue